مهداة إلى .. أهل العوض .. أبو جهينة .. سجيمان .. تمبس .. تاج السر ومن لف لف

مهداة إلى .. أهل العوض .. أبو جهينة .. سجيمان .. تمبس .. تاج السر ومن لف لفهم .. الوهـم

قصيدة قالها زول مغترب زاد على العشر سنوات وحكى تجربته في هذه القصيدة وهي قصيدة انتشرت قبل أكثر من 12 سنة وأحببت نقلها وتنشيطها لأنها ما زالت نشطة

الوهــــــــــــــــــــم

يا غــربـــة يا بكـايـــــة .. يا غشاشة .. يا مستهبلـــة
تغــريـنــــا بدرهـم قــروش .. ووراه قنطـــار بهدلــــة
جينــاك نقـعــد بس سنــة .. وحاجتنــا ناقصــة نكلمــــلا
نبني البيــوت في العاصمة .. ونفــرش أثاثـهـا نجمــــــلا
وكورولا حـارة نرسلـهــا .. أصلـو النقــل صار مشكلــة
ونكمِّــل الـدِيــن بى مهــل .. ما السمحة جاهزة نحصـــلا
غير القـروش اللي الأهـل .. عبــر الشهـــور حنرســـلا
والباقي يـدخـل في البنــوك .. ونشـوف دبــَـارة نشغـــلا
نـاس فكّـرت تجني العلم .. تبدأ الدراسـة تواصلا
أحـلام كتيرة وشيقة .. وآمــال كبـيــرة مـدنكــــلـــــة
لكن حساباتنا الغــلـــط .. في كــل عـــام بنرحـــــــلا
مــرت سنين من العمـــر .. بنعــــزهـــا وبنفضـــــلا
والحِسبــة وصلـت طـاشــرات .. إمكن نعيش وندبــــلا

وتعال نحاسبـك يا وهـــم من غيـر رقــم أو أمثـلـــــة
كان للقروش .. نجري ونحوش .. لكن تقول بنشاكـــلا
ما راضية تقعـــد في الجيـــوب .. وتقول حرامي بنشــلا
لكـن بترقـد في الضهور بديـــون تقيـــلــة مطـــولـــــة
ممحوقــــة ما بتقضي الغرض .. وأقــل حاجـــة تكمــلا
كمــلانة بطحـــاء وحـق وزِن .. ومجـاملات مستفحلــة
ضــرائـب أب عاج المشى .. وإلـزامي حمدي نحـــولا
وأحلامنا ديك صبحت سراب .. نمشي ونجر ما بنحملا
يا ريـت يكون هـم القروش .. يا غـربة فيك هو المعضلة
لكن تعال شوف الهمــوم .. الما افتكــرنا نقـابـــلا
ذلـة ومهانة واحتقـار .. خلــى النفـــوس متمـلـملــــة

سجنـا كبيــر .. فيهو الكفيل .. سجّــان قيــوده مكبلـة
أشغــالــو شاقة ومـؤلمــة .. ودايمـا تكـون مستعجلة
مـرض الضغـط والسكــري ومرض القلب ووجع الكلى
مصران وقرحة وإكتئـاب .. ونفوسنـا ما متحملـــــة
وبقيــنا فيـك كيمان لحــم .. تحت الهدوم متنــدلــــة
وأكيـد حيكـــون .. أكل المعلب وأكل المجمّـد عاملا
عدم الرياضة والكندشـن .. لابد يكــون ليــهــم صلـة

وكمان تعال لى معادلة .. ما قدرنا أصلو نعـدلا
سجن العيال جوة الشقق .. ولا فـــراق العائلـة
جيب العيال بى جيبنا مال .. وجيوبنا غيرو مميلة
وصغارنا صبحت بالزهج .. متوحشــة ومتجفلـــة
لا قادرة تدرس بى نفس .. من الدروس المذهــــلة
تلقى الولـد غالبو الكلام .. والبت كبيـــرة مريـلـــــــــــة
كل الضغوط جاتن سوا .. ما قدرنا حتى نقــلـلا
في كل طرف تلقى القرف .. تلقى الخيوط متداخلـة
أما الفراق أصل الوجع .. ومشاكلو بايتة ومقيلـــة

يا غربة أدينا كتير .. أدينــا خاطرك يسهـــلا
خلينـا نرجع بالفضــل .. نلحق حياتنا نعــدلا
آمالنـا فيك بدري انتهت .. إلا الرجول متوحلــة
وبقينا زي أهل القبور .. لا البـرة عارف يدخــلا
ولا الجوة يرجع لى وراء .. يحكي الحقيقة يوصلا
لكن خلاص هان الخــلاص .. عــدِك نزل مهما علا

وإن شاء الله نودعــك .. وتكــوني ذكـرى نغازلا
يا غربة .. يا بكايــة .. يا غشاشــة .. يا مستهبــلة

بالرغم من مرور اكثر من إثنى عشر عاماً على هذه القصيدة كما ذكرت أخي إلا أن حالنا أبي إلا أن يزداد سوء على سوئه فأصبحت الإقامة في السودان أشد مرارة من متاهات بلاد المهجر والإغتراب ، وأصبح الحلم لكل شاب الهجرة من البلاد ، صحيح أن هناك الكثير من النبت الشيطاني الذي أثرى ثراء فاحشاً على حساب الغبش لكن واقع الحال يقول أن جميع المؤسسات التعليمية تلفظ طلابها إلى عرض الشارع لتزيد واقع البطالة والعطالة في البلاد فهناك سائق تاكسي خريج كلية الهندسة وهناك خريج الإدارة الذي جعله الحظ العاثر يدير مقود حافلة وهناك المهندس الزراعي والصيدلي والمحاسب والقانوني وجميع الخريجين في مختلف التخصصات النادرة الذين حالت المحسوبيات بينهم وبين وظائف هم أحق بها من غيرهم وأسألوا سائقي الركشات إن كنتم لا تعلمون.

أخوي الملا عمر .. العوافي
أمنياتي لك بطول العمر في طاعة المولى .. والصحة في الغربة الغشاشة لكن
لكن حساباتنا الغــلـــط .. في كــل عـــام بنرحـــــــلا
مــرت سنين من العمـــر .. بنعــــزهـــا وبنفضـــــلا
والحِسبــة وصلـت طـاشــرات .. إمكن نعيش وندبــــلا

وأنا اتفق معك بأن السودان ووضعه الحالي هو الذي جعلنا في هذه الحالة والتي لا نعرف كيف تكون نهايتها ؟؟؟

وبقينا زي أهل القبور .. لا البـرة عارف يدخــلا
ولا الجوة يرجع لى وراء .. يحكي الحقيقة يوصلا

*

غايتو يا سيف كلي..هديتن ما عندها طعم اديتنا ليها..... بارك الله فيك

أخوي سجيمان .. حكايتك شنو .. الظاهر عليك لسع ما كملت الطاشرات دي .. ونية رجعة مافي .. طيب ورينا نحن الكملنا العشرين نسوي شنو .. أي ما هو الترياق التي تستخدمه انت .. علماً أنني أقود حملة ضد أكل الجداد الميت

سجنـا كبيــر .. فيهو الكفيل .. سجّــان قيــوده مكبلـة
أشغــالــو شاقة ومـؤلمــة .. ودايمـا تكـون مستعجلة
مـرض الضغـط والسكــري ومرض القلب ووجع الكلى
مصران وقرحة وإكتئـاب .. ونفوسنـا ما متحملـــــة

والطريقة مع الحكاية دي؟؟

تلقى الولـد غالبو الكلام .. والبت كبيـــرة مريـلـــــــــــة