Post: #1
Title: سجمى الراجل دة ؟
Author: alfatih
Date: 11-08-2004, 12:07 PM
Parent: #0
شوفى يا ولية على الطلاق انا كان قمت لا بعرفك لا بعرف ( ود دبرك ) ياخى شغالة لى اليوم كلو فى لازم نبقى فى حلبة التساوى , ولازم انت تسمع الرأى الاخر , ولازم , ولازم , انتى شغالة لوازم بناء ؟ .... ياخى لو سمحت خلى لى حياتى دى مشّرمة كدة انا رضيان بيها ... ما دايرك تجيبى لى سيرة اللوازم والملازم والبلازما والبلازمديوم دى تانى .... عشان كجنتها وبقيت وكت اسمعا بتجينى كاروشة وشعر اضنى دة بقيف على حيلو ياخ جنك نقة ؟! بريتينى خليتينى زى قلم الرصاص , وحات الطاحونة اجعص نجار ما يطلّع منى نشارة تلج , واسمعى الكلام دة كويس ... اى جلابية شلتيها بدلتى بيها العدة ولا عراقى لازم تجى عشان اوريك كلمة لازم دى كويس ... وشوفى برضو تانى ما بشرب فى حاجة بدلتى بيها عراريق .... وبعدين تعالى هنا ... انا عارفك درستى هندسة قسم الخرصانة ... فمن الطبيعى كدة مفروض تخصصك يبقى معاى مسلح ... يعنى من قدرة الفول لحدى الزى العسكرى ... من الله دة ما خلقنى ما لقيت لى زول اتخصص دكتوراة فى الحصحاص كلاموا كلو بمبى وعدة وعراريق ... يمكن تخصصك طلع فى سوق الملجة !! انتىبالمناسبة ولية باعوضة ... تنونى الليل والنهار يا كافى البلا نشفتى ريقى الناشف براهو من الكتاحة والشعلقة فى الدفارات .... اجيب ليك فليت ولا بف ياف ؟ ياخ انتى لو كنتى عرستى ليك بتاع عدة ولا زول شغال فى الملجة ما كان ريحتينى ؟ ... وانا زاتى لو كنت عزابى كدة بقرض بوش بالدكوة وقصب سكر بالطعمية ما كان احسن لى من البشتنة الانا فيها دى ؟! لكن كويس التسوى كريت فى القرض بظهر فى جلدا ... انا غلطان ... وانا الكنت مفتكر نفسى تفتيحة تقومى فى رمضان تسحرينى بموية وتفطرينى بوش ؟ ... لا ما فرقت بوش ولا كيرى كلو واحد ... النسوان بيعوسن الابرى وانتى تعوسينى باللوازم والحوامض ...
هى هى هى هييييييي يا راجل ... اسمع هنا .... انا من قبيل ساكتا ليك ودايرة اشوف اخر كلامك النى دة .. انا بتك يا الفاكوكى ... انا الكربنت ليك الفكى مرة من صلاة المغرب ما فكيتو الا صلاة التراويح ... يا يمة هييييى .. انا المن قمت ما بعرف الكضب وحات نظرى .... انت الظاهر عليك الليلة حرشوك ناس تانيين يا راجل يا سجم يا ما عندك شخصية ... هو انت راجل مع الرجال ؟! ... الرجال يا يمة بيجيبوا داك يا السمح والعديل والزين .. الرجال يا يمة كسوا نسوانهم الدهب والماس ... الرجال يا يمة اشتروا التياب من كرسى جابر للمرايا للشريعة طرشقت ولحدى الجديد دة ( كان راجل اشترينى ) ... ديل يا يمة الرجال البهزوا ويرزوا ... اخوان البنات , لكن دة ما حظى الرمانى فيك ... حظ الشقى الفى الفشفاش بيلقى عضم ... عندك كلام تقولوا مع الناس السمحين ؟ عراريق شنو البتتكلم عنها ؟ انت من يوم عرستك غير عراقيك المشرط ومفرتق ومكرمش زى وشك دة جبت واحد تانى ؟؟ ... والله عراقيك دة بتاع العدة لو شافوا يخلى الحوامة بين البيوت ... يا سجمك .. عراقى جك موية ما بيجيبوا ... هسى قوم اعمل الفطور وبعدين بتكلم معاك فى حق العيد يا سجم .... خلاص يا ولية هسى فى زول سألك ؟ ... اهو انا قايم اسوى الفطور ..... تفطرى بالمكوة فى رقم خمسة .
سجمى الراجل دة ؟
|
Post: #2
Title: Re: سجمى الراجل دة ؟
Author: lana mahdi
Date: 11-08-2004, 12:14 PM
| Quote: وانا زاتى لو كنت عزابى كدة بقرض بوش بالدكوة وقصب سكر بالطعمية ما كان احسن لى من البشتنة الانا فيها دى ؟! |
والله كان احسن ليك/خاصة قصب السكر بالطعمية
|
Post: #3
Title: Re: سجمى الراجل دة ؟
Author: alfatih
Date: 11-09-2004, 06:58 AM
الاديبة لنا
سلامات كتييييرة جدا
القال ليك دة انا منو ؟
انتى عارفة بكره الطعمية بقصب السكر
وبحب بوش وكيرى فى صحن واحد
تسلمى وكل سنة وانتم بخير
بعدين .. خبزتو ؟
|
Post: #4
Title: Re: سجمى الراجل دة ؟
Author: الصادق خليفة
Date: 11-09-2004, 11:22 AM
الحبيب الفاتح
كل سنه وانت طيب
| Quote: قوم اعمل الفطور وبعدين بتكلم معاك فى حق العيد يا سجم .... خلاص يا ولية هسى فى زول سألك ؟ ... اهو انا قايم اسوى الفطور ..... تفطرى بالمكوة فى رقم خمسة . |
يا حبيب مافي انصاري بهرش من وليه وبعدين انت فصاحتك بس في خشمك بقيت مصري بتهرش بلسانك (ههههههه)
الصادق خليفة
|
Post: #5
Title: Re: سجمى الراجل دة ؟
Author: alfatih
Date: 11-09-2004, 11:46 AM
الحبيب الصادق خليفة
قلت الخشم ممنوع فى الهرش ؟
بمناسبة المصريين ديل قالوا اولاد بمب عملوا مشكلة مع
سودانى وانت عارف الراجل خش ليك فيهم شمال جاب السنون
فى الواطة .. الجماعة شتتوا ومستغربين .. واحد قال ؛
ما فيش كلام .. ضرب على طول ؟
تسلم يا غالى
وكل سنة وانت طيب
بس اوع من الهرش
|
Post: #6
Title: Re: سجمى الراجل دة ؟
Author: نيازي مصطفى
Date: 11-09-2004, 01:39 PM
| Quote: انتىبالمناسبة ولية باعوضة |
الحبيب الفاتح تحياتي
زولك دا سجمان صحي صحي بس دي بالغ فيها
|
Post: #7
Title: Re: سجمى الراجل دة ؟
Author: محمد حسن العمدة
Date: 11-09-2004, 04:30 PM
Parent: #6
| Quote: زولك دا سجمان صحي صحي بس دي بالغ فيها |
اهااااااا يا نيازي عاوز تجيب مشاكل للفاتح مع سجيمان ولا شنو ؟ ما عارف الاسم محجوز
ازيك يا الفاتح انت شكلك بقيت تحضر سهرات الفضائية كتير .. رمضان دا كلو سهراتم الراجل والمراة الراجل والمراة نق نق نق نق نق وزي ما قال الحلم تيشي نقناقة تنقنقي ومافي حل غير تطلقي
مع انو نقة الرجال بقت اكتر من نقة النسوان
وبكدا
نقناق تنقنق ومافي حل غير تطلق
موش ممكن برضو المراة تطلق الراجل ؟؟؟
يعني الكتوف متساوبة ومافي زول احسن من زوله
ولا زوله احسن من زول
|
Post: #8
Title: Re: سجمى الراجل دة ؟
Author: alfatih
Date: 11-10-2004, 06:56 AM
الحبيب نيازى
سلام من هنا والشوق كتييير
انت عارف زولى ناقش لكن عامل نايم
مسالة الملاريا وارتباطا بالولية دى شنو ؟
اعمل حسابك من امراة انوفلس
تسلم يا غالى
|
Post: #9
Title: Re: سجمى الراجل دة ؟
Author: alfatih
Date: 11-10-2004, 07:05 AM
الحبيب ود العمدة
سلامات يا زول .. والشوق عنيف
صحبك نيازى داير يرمينى فى شبكة سجيمان
هسى كمان يقولوا عنصرى
سجيمان .. وحات الطاحونة دة ما انا
بعدين يا ود العمدة الطلاق الزى دة الا يوقعوا
ليهو اتفاقية سيداو كلها .. او نسوانا يكونن
اوربيات.
تسلم يا عزيز
|
|