*** * فهـل رأيـتـموهــا ؟؟؟

هل رأيتموها :

بملامحها السودانية الأصيلة
بثوبها السوداني البديع
بوجهها الطفولي الوديع
وصورتها الساكنة الناطقة ؟؟؟.


هل رأيتموها؟؟

فماأن تقف عند ملمح من صورتها .. حتى تشعرك بالطمأنينة
والأمان .. في زمان الرعب والخوف المسافرين فينا بلا مدى ..
حتى لكأنك ـ وأنت تتأمل تلكم الصورة ـ تمتلئ احساسا بأنك
طفل ينحشر في حضن أمه الدافئ خوفا من مجهول يطارده وسط
عتمة ليل عاصف مرعد .

تشعرك بالوقار .. وقار أمهات فاضلات صارعن طويلا في صبر وجلد
حتى يبقين كما هن دون زيف أومساحيق تجميل او بودرة أو روج
أو حتى ابتسامات دخيلة .

تشعرك بملامح وطن غابت ـ هي الاخرى ـ في أتون ( صراعات ديوك !!)
تأبى الا أن تحطم كل شيئ يشبهنا .. بدءا بـ ( ملامح وجهنا) ..
مرورا بـ ( دواخلنا النقية ) .. انعطافا بــ ( مواريثنا
السمحة ) .. وانتهاءا بـ ( ثوابت الوطن الحبيب) .

فياأختنا .. يا أيتها الرائعة النقية .. أين أنت ؟؟؟؟؟.

فقد طال غياب ملامح صورتك عن ( حوشناالكبير ) .. وعشنا
( أبتسامات الزيف ) و( عنطلجة الفرنجة) .. ومللنا عبارات
التحذلق والتذلف .. والنفاق والرياء .. وسئمنا كل المجاملات
الساذجات الباهتات .. وتبعثرنا ـ في غيابك ـ شللا .. ومللا ..
وجماعات .. وطوائف شتى .

فها نحن ـ وفي ظل احتفائنا بعودة بعض من فراشاتنا الجميلة
مثل ( سوما) ذات النشيدالأصيل .. و(لنا) صاحبة اليراع الحي
والموضوعات الثرية.. و( راوية العباسي ) والتى عادت أكثر ودا
وأقوى عودا.. ولكنا حتما نطمع في أن نرى هنا جميع من غابوا
لسبب أو لأخر .. لذا نرفع نرفع صوتنا منادين : عودي الينا ..
عودي الينا ..علك ـ بمعية كثيرات هنا ـ تساهمين في تجميع
ما تشتت وأضمحل .


فهل عرفتموها ؟؟؟؟؟؟

أنهاأختنا الفاضلة ( زولة 123) .

لها ولكم/ن خالص آيات احترامي ومودتي .

خضر عطا المنان

تسلم يا خضر اخوى الحنين ..
يديك الف عافيه وانت كل يوم تمطرنا بعطر كلامك الحنين ..
الاخت زوله زوله حنينه وانسانه شفافه ..ربنا يديها العافيه ويرجعا بالسلامه يا رب..
اعتقد انها فى اجازه بالسودان الحنين يا خضر اخوى .. الله يطراك ويطراها بالخير وما تفقدك شينه ان يا يابا ..
التحيه لكل بنات بلدى الغالى .. والتحيه ليك مره تانيه والى ما لا نهاية يا اخونا اخو البنيات لى حدهن .. اخوى خضر ود عطا المنان ..

خضر اخوى اسمح لى
اهديك **العديل والزين ** يا خضر يا ود مساحات البلد ...

****


***عديلة وزين****
يا ود مساحات البلد ..
مفروش ارض معروش سحاب..
مبلول مطر راوى الجرف..
كاسر السراب..
معقود جواك اخضر رضاب..
مزروع مجدع فى التراب..
نواره تفتح كل باب..
مليانه بى دغش الرزاز..
رويانه بى نفس العزاز..
ممطوره بالبلد الهشاب..
طارح الحنين عبر السنين..
وارث الدوايه مع الكتاب..
مشتول مكشح فى الدروب..
ممزوج مدمدم بالضباب..
مدفون جوار عمق الفرح..
مبسوط محكر فى الهضاب..
*****
يا ود مساحات الاهل..
مرشوش عطر مربوط هلال..
جرتق موشح بالبرش....
مرصوص سبح حزمة جمال..
سايقنو لى ست الحسن ..
مليانه حنه وكوم خصال ..
ديسا مكحل بالسواد ..
خدا مورد بالدلال ..
مسكونة بى ضحكة صغار..
منسوجة بى صافى الزلال ..
معروفه بى خاطر الكبار ..
مرسومة فى واحة ظلا ل ..
سمحة و عديلة و زين ..
عزة قبيلة و فــــــــا ل ..
سومـــــــا
اسماء الجنيد ..
مسقط عمان
18/11/2002

(( ** التحيه لكل بنات بلدى الغالى .. والتحيه ليك مره تانيه والى ما لا نهاية يا اخونا اخو البنيات لى حدهن .. اخوى خضر ود عطا المنان ..

خضر اخوى اسمح لى
اهديك **العديل والزين ** يا خضر يا ود مساحات البلد**)) >
**********************************************************

فراشتنا الجميلة
تسلمي يا بت القبيلة
يا بت بلدي الأصيلة
ومحفل الزين والعديلة ..


كم تستعصي على الحروف كلما أقف عند أحرف منك
أشتم فيهاكل عبق الزمان الزين
زمان كان الناس .. متآلفين ومتحابين
وبالحلوة والمرة رضانين
وقانعين وقنعانين
ولى رب العباد حامدين وشاكرين.

فيوم شكرك يا سوما ان شاء الله مايجي ..
دا حالنا معاك كل يوم تمطرينا برشاش يراعك
الحاني ..
ربي يجيب لينا كل الغائيبين من أهل الحوش الكبير دا
زولة وبرفقتها بقية العنقود المضاء الجميل.

مليون تحية لك ..

خضرعطا المنان

العزيز الغالى خضر عطا المنان

حقا الابنة زوله نفتقدها ولعلها كانت فى اجازة فى الوطن ما زالت هنالك نتمنى لها اجازة سعيدة وممتعة بين الاهل والاقارب وعودا حميدا حتى تثرى البورد بحلو مشاركاتها ..

لك الشكر على تذكر الاحباب والاصدقاء ..

ونذكر مع زولة123 كل الغائبين ( نجلاء عثمان ، ميرفت ، الصادق الرضي ، أسعد ، الطيب برير ، وغيرهم ) عودوا الينا فكلنا إنتظار

((** ونذكر مع زولة123 كل الغائبين : نجلاء عثمان ، ميرفت ، الصادق الرضي ، أسعد ، الطيب برير ، وغيرهم .
عودوا الينا .. فكلنا إنتظار **)).

*************************************

العزيز : صديق

الله يطراك بالخير يا ود القبايل .

لا شك أننا جميعا هنا بانتظار كل أخ وكل أخت ممن يتقاسمون معنا
الاقامة داخل هذا الحوش الكبير ..وأنا بدوري احيي من ذكرتهم
هنا وأضم صوتي مخلصا الى صوتك علهم يعودون جميعا الينا
لتتكاتف الأيادي وتتوحد الصفوف لبناء قبيلة شعارها أبدا :
(( السودان وطن الجيمع .. وكلنا في هواه سواسيا)).

لك المعزة.

خضر عطا المنان

رفيق العمر والصبا: عمدتنا قرشو

أينما وحيثما كانت نسمات الأصالة تسري كنت ياأصيل في مقدمة
الركب .. هكذا عرفتك يا قرشو .. لم تغيرك السنون .

فلك خالص معزتي .. ولاختنا( زولة ) التى ـ كما تقول ـ كم أفتقدها
الجيمع هنا سلامنا.. ولها صالح الدعوات وهي هناك تطرز مساحات الشوق لوطن نعيش نحن هناعلى حبنا له .. نأكله خبزا .. نشربه ماءا .. نتسامر معه في المنافي أطراف الليل وآناءالنهار .. رغم المسافات الشاسعات.


خضر عطا المنان

العزيز
أستاذ خضر عطا المنان

تابعت بوست ناجي الملك عن لقاءات بورداب الخرطوم على شرف د زولا وبدعوة كريمة منها

عبر ترحابك أبعث التقدير لبنت البلد تراث الأصالة


مع الود


أحمد الشايقي

العزيز : أحمد ود الشايقي

أحييك يا سيدي عبر هذه المداخلة الضافية.
وعبرك أمديدي محييا كذلك لأخي الفاضل : ناجي الملك .

ومن خلالكمامعا أرسل بتحياتي لكل بورداب عاصمتنا التي لاتزال
تتحسس طريق الخلاص من براثن النكبات والأسى .. وكذا الحزن المقيم على ضفافها منذ سنين .

ولأختناالأصيلة : زولة السلام .

خضر عطاالمنان

الاخ العزيز خضر

أنا هنا, اكتب من الامارات بعد حوالي 22 يوما قضيتهم في السودان الوطن الذي افتقدته
فغرقت ابحث في تفاصيله واحفظ قسماتها كدرس مدرسي
ساسمعه لكم قريبا

اتمنى ان استحق نصف ما كتبت عني
وانه لامر مفرح ان تشعر بتقدير الناس لك
فشكرا لك ولكل من كتب في حقي عبارة اطراء في هذا البوست

ارتباطي بهذا البورد يزيد يوما بعد يوم
وادين له بالكثير من الافضال علي
لذالك لن اتنازل عنه وعنكم بسهولة ابدا
انا قااااااااااعدة زي ما بتقو تماضر

تحياتي وشكري مرة اخرى
زولة123

يازوله لا تتأخرى
كل البيسأل طمنى
وانا فى البعيد مشتاق لهمسه من الوطن.

أو

أى حاجه من الوطن.

((** انا قااااااااااعدة زي ما بتقول تماضر**)).
***********************************************

أختنا الغالية : زولة 123

وأخيرا طليتي ؟؟؟؟.
أقعدي .. ثم أقعدي ... ثم أقعدي .. كيفما طاب لك ( القعاد)
ان تقعدي ..

ألف حمد لله على السلامة .. رغم ان الكثيرين ـ وانا واحد منهم
دون شك ـ يحسدونك على تلكم الزيارة المباركة لوطن غابت ملامح
وجهه عنا منذ سنين .. ولكنه ـ مثلك ياعزيزتي ـ قاعد .. ثم
قاعد .. ومتحكر كمان جوانا ..

وأعظم مافي هذه العودة هو ( قعادك وتحكيرتك كمان) جنبا
الى جنب مع تماضرنا العظيمة .. رشاش الابداع في زمن الجفاف المر.

لك ولهاودي وتقديري .. وعبرك أحيي كل ذرة رمل بتلك الدولة
المضيافة الجميلة.. ولكل ( زولاتهاوأزوالها) كمان فردا فردا..

فقد شكلت أحلى (خرزة) في (جدلة) عمري الصحفي كله.. خاصة مدينة أبوظبي والتي اكادأن أذكر كل شارع فيها.. وكل معلم بها:
الكورنيش الرائع ..شارع حمدان والبرج الذهبي .. الخالديةوحدائقها
وعماراتها الأنيقة..النادي السياحي ومايحيط به من شوارع ومعالم
ومنظر فندق الشيراتون وماحوله ومعانقته الأبدية لاستمرار كورنيش
المدينة والنافورة المتلالئة ليلا وهي تناجي ماءا يتطاير في الهواء مرسلا رازازا ناعما في وجه الجموع حوله...... الخ . أنه شريط طويل
يازولة من ذكريات لن يمحوه الزمن الاوروبي من الذاكرة أبدا.

عفوا لهذه التداعيات التي جاءت عفو الخاطر ودون ارادة مني .

خضر عطاالمنان

خضر عطا المنان