السايقي واصلي قصيدة بصوت حميد

السايقي واصلي

محمد الحسن سالم حميد


كنا أحسن حالا وإن كان
ما إتلقي الحكم اليصلِّح
الزمانات كانت أمهل
المعايش كانت أسهل
كانت الملحات تملح
كان قشيش الأرض أخضر
والخدار للعين يفرّح
كنا من طرف التقاند
نملا ماعونا ونروّح
كانت المويات حبطرش
وما مرق بترول بلدنا
بي ضي النجمة الحميرا
أو القميرا نسوق نبوق
والمتر بي فوق مفرّش بالسواعد
شيل نفسنا وختوا واحد
وفينا قولة الله يساعد
كانت أصدق
و اليتم للتاني يلحق
كنا نتونس نفاقد
و الرقاب تالا التراب عرقن يسابق
و العيون بالحر يقطرن
والعريريق تلقا لاصق
في جسمنا وفينا كدّب
بالترابه السودا دابغ
بس تبرّد لي بطنا
قولة الدارعنو فوقنا ده من قطنا
تمرق الإبر المكيني يجيك وطنا
ثم تلقي الباقي كلو بصاره ايدينا
والله ينصر دين بلدنا
وينصر إخلاص الشغيلة
علي العفاريت الدخيلة
تنكسر ريح العوارض
وتبقي كل الدنيا هيلا
وما يصح تملاها عافي
وتحيا في أحوال عليلا
هي البتستاهل رحيق
مرقاتا روقاتا وعديلا
وفي الحقيقة هي أولي بالخير
من فقر شيخ القبيلة
و الجلاليب الرهيفة
ولمعة الكاب العميلة
بتنا لمن نقول لا
نستغفر كأنو كفرنا بالله بعدنا عنو
مع أنو عارفين الله عادل
ومافي ظلماً جاي منو
والرسالات السمويات جميعن
عادن الجوع حرمنو
كنا ننضم زي فياقة
في ضليل منقاي نفطر
والقراريص حار فراقها
قمحة سمحة ومو إغاثه
من زارعتا للعواسة
جمبنا الجدول شرابنا
جاي من نيلنا اليطمن
ونيلنا مدعوم من سحابنا
صن و الشاي بي رواقا
وحيو دارفور يارفاقا
سنتطا ونبقا الدقاقا
الجنوب الارضو عاقا
الله يديها اليخارج زولا من مطموسا ضاقا
وكب نعكم في الطواري
ونلقي نفسنا في هجير
بلا المراكبية التمقدف
والبحر فاير دميري
بتنا في حالة طواري وحظر هاري
وطن تجاري ونيلنا جاري من الزفاري
الفي الكباري كرم جروفو عقاب صحاري
قرف يمين ووجع يساري
بتنا نقضم و الوخم شال فوقنا يردم
الا حالنا وبالنا بنضم
سبع حيكومات ومالن كلهن سفهن رجالنا
سبع حيكومات ومالن كلهن طلعن خوازيق
كلهن جحدن نضالنا
سبع حيكومات ومالن كلهن قلبن علينا
كلهن حرنن قِبالنا
وقولة العمال سواعد الثورة
و الزراع ضراعا وقولة حماية الديش لشعبوا
نفاق اشاعة
الثورة وينا
خزي الجلاليب الرهيفة الإنقلابات المباعة
انقرعوا يا حكام جرايد فالصوا تلفزيون إذاعة
نحن ناس الوجعة عارفين ياتو جيها
قلوبنا فيها معانا
بالحق و الامانة
قبل نزيها
وياتو جيها تكت وشيها
علينا بالزيف والخيانة
كفانا قطت
وكانت المرحات تملح
وكنا أحسن حالا وان كان
ما انلقي الحكم البصلح
إلا ما دام فينا حرقة
وفينا فورة دم غبينا
نعز نبينا ومن نبينا
نعز وطنا ومن وطنا
نعزو عالم
من محبة سلام سكينة
غيمة غيمة ونبتا نبتا وطينا طينا
ما بيصد السيف جفيروا
إلا ترتاح المدينة
و البلاد تفرد جناحا
مع الزمانات الحنينة
و العصافير و الشجر
وجملة اطفال الفقاري
تغني للمطر البجينا
في الصباحات الطراوه
والندي البغسل جبينا
فيا وطن تصبح خير
بيكا اصبحنا ومسينا
فيا وطن تصبح خير
و الميامين مينا مينا
فروا ضرعاتم بوارق
لي ملاقة السفينة
ويا بحرنا السايقي واصلي
وما نضب ذات يوم معينا
والله كانت ديك عترا
وياما كم عدلت مشينا
فيا وطن تصبح خير
بيك اصبحنا ومسينا
فيا وطن تصبح خير
و الميامين مينا مينا
فروا ضرعاتم بوارق
لي ملاقة السفينة
ويا بحرنا السايقي واصلي
وما نضب ذات يوم معينا









اضغط يمين الماوس واختار save target as

يا سلام عليك يا لندى ...
أنا متابع بوستاتك عن حميد بالمناسبة ـ وبس أشيل وألقط
التحية ليك ...
والتحية للمبدع ( محمد الحسن سالم ) حميد اينما حل ...
ومنتظرين منك الضو وجهجهة التساب يا لندي ...
ياريت لو عندك تنزلا ...

Quote: والله ينصر دين بلدنا وينصر إخلاص الشغيلة علي العفاريت الدخيلة

وانا اقرا هذا النص تجولت قليلا في نشاط الاهليه تزكرت الزميل حاتم (ود فيزياء) وهو يقرا هذه القصيده شكرا اللندي وانت تساعدنا في تنشيط الزاكرة شكرا للجبهة الديمقراطية وشكرا لهذا الحميد وكفي

Quote: من فقر شيخ القبيلة و الجلاليب الرهيفة ولمعة الكاب العميلة بتنا لمن نقول لا نستغفر كأنو كفرنا بالله بعدنا عنو مع أنو عارفين الله عادل ومافي ظلماً جاي منو والرسالات السمويات جميعن عادن الجوع حرمنو

شكرأ للرائع: الليندي .... وشكرأ لحميد المبدع

شكراً الهادي الضو وجهجة التساب كبيرة الحجم حتى بعد ضغطهاومساحتا اكبر من الحجم المسموح لكن اوعدك نلقى ليها حل

خضر حسين
حاتم محمد أحمد ( فرفور ) وكأني استمع للجابرية بصوته التحية له هو الآن معلماً باحدى مدارس الحاج يوسف

مهدى الامين
يبدو لي أنو القصيدة دي ما لقت حظها رغم أنها لا تقل عن عيوشة أو بقية القصائد الاوسع انتشاراً


لكم خالص الود

الليندى
شكرا وهل من مزيد
عبرك احى السكون طربا الشاعر حميد
تحياتى