كرويات الصبر البيضاء بصوت حميد اهداء لراني خليل وأخرين

كرويات الصبر البيضاء بصوت حميد اهداء لراني خليل وأخرين


09-05-2004, 04:39 AM


  » http://sudaneseonline.com/cgi-bin/sdb/2bb.cgi?seq=msg&board=95&msg=1094355576&rn=0


Post: #1
Title: كرويات الصبر البيضاء بصوت حميد اهداء لراني خليل وأخرين
Author: الليندي
Date: 09-05-2004, 04:39 AM

كرويات الصبر البيضاء

محمد الحسن حسن سالم (حميد)

كرويات الصبر البيضاء انهزمت .. وجمت وخرّ جوادك ... قبل يقرّبْ
حمُيّات القلب السوداء إنلمت وضمت وبَرَت أجسادك .. وبتّ تهضْرِبْ
من هضريبك ومُر تعذيبك .. بين النخلة ومجرى النسمة انساقط طاير ...
فَتْفَتْ حَتْحَتْ ريشو قُصادَكْ ... وكان ده حبيبك ... وقُمت تجقلب
بين القيفة وباب النهر ..
دبيب الريح من دبش القهر ..
اتلوى اتلبّدْ ولدغ الشيمة
الشيمة انكفت ..
البحر انخجّ ..
الزبد انعجّ .. الطين انحترب ..
ومرقت عقرب ورفعت شارة .. اندفعت فارة تجاه المركبْ
ووقعت سارية على صنقور رواسي قريبك
وقام مِنْوهدِبْ
وكابسو الجندبْ ..
وكان دي امجادك
بين الميضنة والإرصاد انجرحت غيمة .. الغيمة الطيبة وحاملة حلالْ
من ألق البسمة الفي الأطفالْ
من عَرَقْ النسمة الفي العمالْ
والناس الفالْ
انسرحت فيها شظايا آذان الوقت الواقع بين تقريبك وسرقة زادكْ
مَدّتْ إيدك تالا القبلة رشاشها يصيبكْ ..
تسبي نديهتك ..
تفقد جيهتك
تنزف تنسف دانات دعت الهوس الديني الطيني
تجيني قوافل اورادكْ
تقضف .. تركُض تالا جنازك ونعش أولادكْ
باري نحيبك .. ترجف تتعب .. تغضب تهتف ..
تلقى قصادك سد ومرابي
ارزقي .. رباطة
وكور همباتة ..
لحى ونخاسة .. وكل الساسة الباعو نصيبك باستشهادكْ
عاد ان شاء الله تكون الجنة الماهلة ميعادكْ
إلا الحاصل ديل حُسّادكْ
بعضِ يقول الله لا عادكْ
وبعض إن لاقي طريقة يعيدك تاني عشان الموت يصطادكْ
يا مجلوب في سوق الآخرة .. ويا متقلب تحت جهادكْ
خرّ جوادك .. مات الطاير .. لدغت شيمة
كرش الغيمة إنبعجت دمّت ..
عينيك طمّت ..
وغمّ قليبك .. وكان دي بلادكْ
وين مستغرب .. تقدر تكسر حمرة عينك .. تنكر سيفك تابى جفيرك ..
دابك تقوى
يا بني آدم .. تفقد مرة مريرة .. ضميرك تكسب ثروة ..
وتلقى العالم تحت سريرك تشبع تروى ..
ترضع ذاتك .. من لذّاتك .. وحلو الحلوى
من ما تبلع يوت تتبرع .. وكلك نخوة ..
صدقة لعمرك وباقي حياتك ونصر الدعوة
حبّة جوامع .. وقبة صوامع .. وكوتة وكوتة تفوت الفوتة بأسرع صهوة
عُمرة وحجة وتسأل ربك يقبل توبتك يغفر ذنبكْ
يمسح سفّك .. خيرات شعبك .. اصلها كانت عترة في دربك
لما تعبت وفاتك ح######
لما ضهبت وخانك قلبك
كانت هفوة في لحظة سهوة
عن الإنسان والحال الأسوأ
ودابك فُقت .. وجاتك صحوة
وجيتَ تكفّر .. يا رب تغفر .. اغفر .. اغفر
عبدك خاسر شيء ما بيسوى
انت القادر ... إنت الأقوى
يا البتخادع حتى الله ..
وين الشهرة المال والجاه
وين السطوة .. الجشع .. القسوة ..
اركز .. اركز لا تجيب رخوة
يا متلبّك في الأدران .. الحجر الأسود ما هو البروة
وما ها مكاوى الكعبة تجيها .. حين ينكرفس توب التقوى
ومافي خرط للجنة تودي .. لا في خطط ممهورة برشوة
والمشروع الديني الخالص ... ما محتاج لدراسة جدوى
يا من قال يارب من قلبو .. رد الخالق دائماً أيوة
اركز .. اركز .. لا تجيب رخوة
اركض .. اركض .. تالا اشجار العملة
واقصف .. اقصف من اوراقها ..
يمكن تستر عورة شينك وما سواهو زمانك جملة
اركز .. اقوى .. ولِفْ بشكيرك فوق الرأس النشّف غيرك
لا تستهون .. قضّي منافعك وتم العمرة
وفوّر موية زمزم قهوة
اركز .. اركز .. لا تجيب رخوة
ماك غلطان ..
غلطان الشعب الجزّ جراد الغفلة كفاحو
الجنى أرباحو .. ضياع أرواحو
وجيد للحاصل وبخت الحاسد
ماك غلطان
غلطان الشهداء الراحو .. الواحد .. واحد
ماك غلطان
غلطان الحزب الجمّ سلاحو وخيلو تناهد
ماك غلطان
غلطان زمنك واصلاً وطنك ياها جراحو وعندك شاهدْ
رفضك .. سجنك .. شان الكادح والمتكادح يلقى صراحو ويبرأ السّاعِدْ
تهتف لامن تقضف دم .. وشارع هازيء .. يهز اصفاحو .. وبرضو تجاهدْ
لامن صَقّرْ سن منقارك .... لامن طيرك قصو جناحو .... وخرّ يكابدْ
ما حَسّابَكْ إلا عذابك وليلاً دائماً كاتمو صباحو .. ونجمك ساهدْ
لما بديت تفرز لي عيشتك .. لاكو عويشتك .. واجمعوا جملة بأنك تالف
وانو سقطت مع أنك واقف فوق اسمنت وتحتك عملة
هم ساقطين في البرد الناشف .. وجاهم زاحف قوز الرملة
الإملاق العيش الشاظف ..
وفي ظلمات الزمن العاصف ... قاسي عبور اليم يا نملة
وهسه غلابة الدنيا الكنت بتتعب غنية عشان يرتاحو ..
المنك راحو .. الكجنو حِنّك وعنك أشاحو
ضراعم غادي
عليك يتجارو .. بدون ما تنادي ..
وصاروا نفيرك وقت حصادك .. ورابى نصيبك
هرِّب .. هرِّب .. خير بلادك برة وسيبكْ
يا أوعية البلد القطّتْ .. ما بيسقيك الدم الفاسدْ
يا أودية الولد الشطّتْ .. ما بيشفيك اليم الراكدْ
إلا الدم البدأ يلقّط .. واحد .. واحدْ
إلا اليم أب غيماً نقّط .. وجاييك قاصدْ
يا محبوبة في وضع خريف .. شالع دجلو .. وكضباً راعدْ
بيت راكوبة .. وحوشو صريف .. سَوّسْ مِرْقو .. وسقفو يناهدْ
احسن تحت المطرة نقيف .. بي كفيك .. كفي .. والساعدْ
وراسنا نضاري الطفل الواعدْ
لامن يبقى سمانا نضيف .. من تخويف .. تسويف .. من زيف
ونلقى الوطن الحِنْ .. مو الطاردْ
واللا الموت الدغري الواحدْ









اضغط يمين الماوس واختار save target as

Post: #2
Title: Re: كرويات الصبر البيضاء بصوت حميد اهداء لراني خليل وأخرين
Author: mahdy alamin
Date: 09-05-2004, 04:43 AM
Parent: #1

العزيز : اليندي
تتوالى في نشر كل ما هو نادر ومميز من ابداعات حميد

كنت في انتظار هذا النص بالتحديد
الشكر لك

وهات من عندك تاني....

مهدي الأمين

Post: #3
Title: Re: كرويات الصبر البيضاء بصوت حميد اهداء لراني خليل وأخرين
Author: الليندي
Date: 09-05-2004, 05:21 AM
Parent: #2

شكرا يا زميل وانا بصد اعرص فكرة عمل مكتبة لحميد بس نخلص اولا من مكتبة الشهيد عبد الخالق البتمنى أنها تكون بقدر قامتو


مع خالص الود

Post: #4
Title: Re: كرويات الصبر البيضاء بصوت حميد اهداء لراني خليل وأخرين
Author: rani
Date: 09-06-2004, 05:01 AM
Parent: #3

الرائع ليندي
شكرا ليك كتير جدا علي الاهداء.. وحقيقة كنت بفتش للنص دا من فترة
مع انو عندي لكن التسجيل ما واضح...
شكرا مرة تانية..
ويلا واصل توصيل الكلمه..الكلمة..الصاح..
ودي
راني السماني

Post: #5
Title: Re: كرويات الصبر البيضاء بصوت حميد اهداء لراني خليل وأخرين
Author: rani
Date: 09-06-2004, 05:31 AM
Parent: #4

بواسطة..مهدي الامين..
كرويات الصبر البيضاء ....الشاعر المبدع : حميد

Post: #6
Title: Re: كرويات الصبر البيضاء بصوت حميد اهداء لراني خليل وأخرين
Author: الليندي
Date: 09-07-2004, 02:42 AM
Parent: #5

شكراً العزيز راني خليل ويا ريت لو تقدر تتحفنا بماريل اكون سعيد جداً

مع خالص الود