الاخ بشـــــــــــاشــــــــــا وماهية هذا الخلاف

الاخ بشاشا

كتبت فى بوست احمد الريح العبارة دي

Quote: رغم خلافنا الجذري لكن ليك معزة خاصة

فقط من باب هذه المعزة اريد ان اعرف ماهية اختلافنا هذا ؟؟

فيما يتعلق بقضية السودان
اريد سودان حر ووطن حقيقي به سلام حقيقي وشايفو ما بتحقق الا بالاتي

*السودان بلد متعدد الثقافات والأعراف به تمايز فريد. دولة المواطنة حل فعلي لكل هذه المشاكل دولة ديمقراطية تكفل
لنا أقصى درجات الاستفادة من هذا التمايز.

• مسألة التهميش واقع وحقيقة لا يستطيع أي مواطن صالح إنكارها
• أين وقع هذا التهميش ومن هو الذي خلفه للأسف الشديد طيف سوداني من الشمال والجنوب والشرق والغرب
• تمثل فى الوسط وكانت الضحية أطراف السودان وخاصة جنوب السودان
• ضد النظرة المطلقة وغير المحددة من مثقفي الجنوب وبعض مثقفي غرب السودان تجاه اهل الشمال بشكل عام
• الوجود العربي في السودان واقع تاريخي لا يمكن إنكاره او رفضه لأنه ليس بيدي او بيدك يا بشاشا اخوي




انا شخصيا واضح جدا وما بحب اللف والدوران والفلسفة الفاضية وبكره الحفظ مووت وكمية الحفظ الشفتها فى المنبر دا
من ربنا ما خلقني ما شفته زيها وبضايق شديد جدا وبفقد اعصابي لمن اجد واحد بقول ليهو فى كلام ما عارف ابعاده وعايز منو شنو وعلاقته شنو بواقعنا حقيقة

*ناس بتتحدث عن حريات وهم ما عارفين بقولو فى شنو، ناس مثاليين لا علاقة لهم بالواقع خلاف ما يرسمونه فى عقولهم لإرضاء جماعة معينة بالنفاق و المداهنة.


دا راي باختصار شديد ويمكن اكون اكتر واحد فى المنبر دا اتكلم فى الموضوع دا وما عايز احكي ليك كتير عن ايام زمان المنبر دا كان كيف. المهم اعرف انو كان موضوع الهوية وقضية التهميش معلب عديل كدا وما بتهبش نهائي واقولها ليك بصراحة معظم اعضاء البورد دا ما كان عندهم مانع يكتبوا الشعر لبعض ويسلمو على بعض ويضحكوا مع بعض وبطريقة مثالية تخليك تعتقد انك فى ارض الاحلام ذاتها وكلو باسم الاحترام برضو.عندما فتحت الموضوع دا عارف فى نظرة غير محددة ومطلقة
من مثقفي الجنوب والغرب تجاه اهل الشمال ككل وما داخلة فى راسي من زمان وشايفها دي واحدة
من مشاكلنا ومازلت مقتنع انها من اكبر مشاكلنا واذا ما اتحلت ما ح نمشي لقدام


يارت يا بشاشا اخوي توريني الاختلاف شنو تعرف انت الوحيد القابلتو فى النص لكن معظم ناس البورد التقيت بهم فى بوستات متعلقة بالموضوع دا. والعبد لله بكره انصاف الحلول باسم الاحترام وباسم الابتعاد عن التجريح والكلام الكتير داك انت بتعرفو كويس.

تعرف يا السنجك اوعك تندهش تاني لامن زول يقول ليك انا مختلف معاك جذريا وتقوم تفتح لينا بوست كامل ..
الزول لامن يكون كايس ليهو بت حلال هدية ورضية تقليدية ولامن تتخلع تدق صدرها وتقول سجمي ...

بكون اي زول تاني مختلف معاهو جذريا













بشاشا قال عايزالسودان الجديد..

سمعتا بيهو ؟؟


اها ده شي ذي البان جديد كده


حصل مشيت البان جديد؟؟؟

الاخ السنجك

بدون زعل للاخوة المتداخلين..

فكرة السودان الجديد فكرة نابعة عن كراهية..
نحنا ما قادرين نطيق بعضنا عشان كده مافى ففكرة حتتحقق بدون تفاهم وتفهم.

لانو حتتكرر فيها تانى الماساة. ناس فوق وناس تحت وبالطريقة دى حتكون زى ساقية جحا بعد مية سنة الكانوا تحت ببقوا فوق وهكذا دواليك.
بفتكر انو يكون الطرح المصاحب للفكرة اكثر واقعية نحو الحل الشامل. تفتكر انو ناس الشمال حيرضو يكونو تحت؟
ما يا نكون قلنا فوق او نكون كلنا تحت وطبعا احسن نكون كلنا فوق.

بعدين شمال وين هو الفوق ده؟!
ما هو كلنا مشردين بالبلدان وكايسين سترة الحال.

دكين

Quote: اها ده شي ذي البان جديد كده

اعتقد الوصول للبان جديد دي اسهل للشايفو الواحد هنا

Quote: بت حلال هدية ورضية تقليدية ولامن تتخلع تدق صدرها وتقول سجمي ...

دي ما برضو بان جديد اخرى



الاخ عبدالله الصادق تحياتي

كتبت

Quote: بفتكر انو يكون الطرح المصاحب للفكرة اكثر واقعية نحو الحل الشامل. تفتكر انو ناس الشمال حيرضو يكونو تحت؟ ما يا نكون قلنا فوق او نكون كلنا تحت وطبعا احسن نكون كلنا فوق. بعدين شمال وين هو الفوق ده؟!

تعرف بكتب فى المنبر لاكتر من سنتين وبقول فى كلامك دا
تصدق بالله طلعت اكبر عنصري فى تاريخ البورد والسودان اعمل حسابك
والله تتكلم عن الشمال كلمة واحدة وتقول تعبان بس يعملوك مجرم حرب




الاخ بشاشا اتمنى اشوفك


لكم التحية

الاخ السنجك

تحية وفي البال دايما

بشاشا ما بيحتاج تفتح ليهو بوست جديد براهو ...بشاشا (مفرمل) بموضوع واحد وبفكرة واحدة (هي الصاح المطلق في نظره)
اذا لعبت في الكتشينة وست ...الزول المفرمل بصورة وباقي الورق دوهات وما شابه بسمي تسمية كبيرة عشان يجيهو اللعب ويفتح اللعب بي الصورة دي عشان يفكها وياكلوها ويدك القيم او يتخارج من السيك
اها بشاشا زي الزول دا فاكي فرمالته دي في اي مكان عشان يخرطوهو ويطلع من السيك بدك الورق دك (قانوني) والفرمالة دي هو شايفها الصاح المطلق فاذا اكلوها طلع من السيك بدك القيم واذا اكلت برضو طلع من السيك ...
عشان كدا ما حتطلع منه حق ولا باطل
يا جاك وحاورك واقتنعت بي وجهة نظره وكدا عداك معاهو
ولا جاك وانت افحمته وحيتهمك بانك كوز وانت ما عارف نفسك لانك كوز في عقلك الباطن وفي الحالتين زايغ من السيك

العزيز اساسي كيفك مشتاقين والله

اشكرك على المرور وعلى كلماتك

عايز اعرف حقيقة مسألة الاختلاف الجذري دي مع ما الاخ بشاشا
وياريت ما يطلع زي ما قلته. بدك الورق

والتحية ليك



متمني اشوفك يا بشــــــــــاشــــــــا

Alsngaq

Quote: الوجود العربي في السودان واقع تاريخي لا يمكن إنكاره او رفضه لأنه ليس بيدي او بيدك يا بشاشا اخوي

Alsngaq ya akhouy

I am sorry to tell you are certainly dreaming. Bashasha does not have a political difference with you. He is against your mere presence, your ethnic presence and cultural presence in the land of Sudan. He is against everything arabic in the geographic region know today as Sudan, regardless of whether that arabic presence is good or bad. See, our sole presence and existence in the land of Sudan is spit at by Bashasha. This man is not like the other africansit ideology people who are simply calling for peaceful coexistence of arabic culture and african cultures in Sudan. He is for a complete annihilation of your presence as a culture and as arabic ethnicities if and when needed. There is nothing in common with this individual and us (or me should you decide to distance yourself). What is really between us is a struggle and survival for the fittest. Sorry that I have to put it bluntly as this but believe me I tried my best to find much better nicer words but could not find

Thank you