يا مســــافــات أرحمــيــنــا

يا مسافات أرحمينا
هدي من روعك شوية
خففي الحالة العلينا
قدر ما نرحل نسافر
نلقي جرحك لسه فينا
وقدر ما ترتاح عيونا
تلملمي الاحزان تجينا
تدي من فرحة مشاعرك
غربة تتوسد سنينا
تبكّي ساعات المحنة
وتبكي من ظلمك عنينا

سكة الشوق يا مسافه
لسة ما عارفين ضفافه
ما بسم فيها التمني
ما صحت فيها اللطافه
شايله من وهج التشابك
حته بتعطر شفافه
خاته فى شتل المحنه
غنوه ادتني المخافه
تهته زي زولا متيم
ما أظن الفرحه شافه

يا مسافآت ارحمينا
شفنا من وهجك كفايه
جاني طيفك مرة نايم
صحي أحلامي الصبايا
هدى حيلي ربيع عيونك
غني من حزنك شقايا
بمشي من دون الخطاوي
وما انسمع ترديد غنايا
لا موده غشت دروبى
ولا فرح ظلل سمايا

يا مسافات أرحمينا
هدي من روعك شوية
نحنا من ظلمك شقينا
في المطارات ـالمحطات ـ
البلودات ـ البيوتات الحزينه
كل يوم صوتك بجينا
مره ساعة لحظه حلوه
ومره من آخر المدينه
جاني صوتك مره خافت
قلتا إمكن دى الحنينه
شلتا من شوقي الكفايا
وقلتا فرحك طلا فينا
الا بس الفرحه ماتات
قبل ما نشوف الرزينه

يا مسافاتنا العنيده
خفي الحاله البتفضح
رعشة الريد الوليدة
قولي لى الزول المسافر
غادي في البلد البعيدة
الفراشآت الحيارى
ما أظن هجرت نشدة
ما فتر فيها الترجي
وكلي يوم تفتح بريده

لندن ـ 12ـ8 ـ 2003

مرحب بك ايها المتدفق احساسا

الاخ العزيز شرنوبي
لك التحية والشكر وشكرا على اطلالتك الجميلة فمنكم يأخذ النبع رحيقة ومنكم تشرب المعاني حسها النبيل لك الود
عبدالله

أخي عبد الله وداعه الأمين
كأني أسمع أنفاسك المتسارعة من ركضك كل هذه المسافات ، شكراً لهذا الجمال. بس ما تبخل علينا وعلى البورد وأبقي شارك في إضفاء الجمال على هذا المكان.

Quote: يا مسافات أرحمينا هدي من روعك شوية خففي الحالة العلينا قدر ما نرحل نسافر نلقي جرحك لسه فينا وقدر ما ترتاح عيونا تلملمي الاحزان تجينا تدي من فرحة مشاعرك غربة تتوسد سنينا تبكّي ساعات المحنة وتبكي من ظلمك عنينا

الأخ الحبيب عبد الله

مبدع كما عودتنا

كلماتك سلسه عذبه وتفعل بالمشاعر ما نريد وما لا نريد

فهات ما عندك من قديم الشعر وحلو كلامك الجديد

دمت ودامت لك معزتى