قنابات تل العمارنة جزء من نص محمد عبيد الفاضلابي

تلحقيني ان كان معالم الدخلة جرت واصل
وتلحقيني اذا الفواصل خيرت
والعام دخل في طفلة ميتة من الضحك
ونوضحك
في تسعة من شهر الولادة
يا قاعدة في طائر ويا طائر
شوايلك باطلة
من باب الغلب والطيش
يا لطيش مطر في حاوية كايسة الموية فينا الشق
وكايسة بلا سعايا الجيل
وكايسة الوردة فينا الحيل
وكايسة تفتشي المعدودة والمقدودة
كملتي النطع
البساط
الخوف
الدايرة من ترحال
ومن شيلة دلوك
كملتي الملوك
الدم
وشهدتي النبات
الكم يفوت بلا مترار
وكملتي
البنات والطاعة
شواف العيون الخلقة
رسام الدرب للمرقة
يوم الحل يكون في زراعة
الرحمة
الامين
والاخو
الفنان
ابوالطبع الجميل
البالغ الانسان
محمود محمد طه
شقيش من عمايلك نبرا
يا سطوة حليق البال وين المدن من وين
وين الشعر من وين
اكان من قلبي مابيك
ومابياك الحواس الخمسة تنسلبي
وين الرامية فينا حجارة
وين الحارقة فينا دبارة
وين الغيم
وين الدم
وين المافي
وين الطين
وين .....ال
استغفر الله العظيم
اجبر خاطر الوطن الثبات
وانزل علي حمل البيوت الشايلة شيل
وادخل علي بيوت الذوات
ما يلخمك هذا الكنز
ادخل عليهم وقولهم
نحنا المطاليق
الصعاليك
الوقاية
الدود
البنلد الجاهلة تنضم
ادخل عليهم وقولهم
صوتكم في الحرابات 9
وفي الحرازات البطون متقابلة
وغبن المابيصل للحق
دا ... غبن الحوقة
غبن الموية
غبنا ساي
قامة الحجاز طويلة
ماشا عمال
ماشا في الارض الافندية التوابع
وماشا ارواح من غرائز
جابوا نصين من هضاليم المكسر
لاقتن نية اليتامي
متشدعين
وشايلين كلامن في اصايص
نحن من خابرين بلادن ولانا خابرين... الدسائس
جابوا سرجين جيبنا ناقة
جابوا سيفين جبنا فوق الطاقة طاقة
قالوا نحلب من ضفورها
قلنا ما بنحلب جنونك
انت ناقصاك المدارس
والعيادات والمرونة
شتمت فينا التواريخ والمساجد
قلنا نصبر
صبر اوطان في ضميرنا
صبر طير الجنة غايس
نفتح المزروب نوحد
بين كلامنا
وبين عواطفنا وصلاتنا
في المساجد وفي الكنائس
بعد ما حصلنا حالنا
شلنا في المدلوقة ضيقنا
طق خبر الجنة ارضك
سوي فرضك يا مدائن
عاكسوك بتعاكسي ضلك
جابوا ضلمة جبنا شمعة
جابوا قلمين للرواية
جبنا من فخذ المماليك قطعة
ومن خيالات المطر قطعة
ومن لبس الغجرقطعة
ومن قطع البحر قطعة
اصلو صوتكن في الحرابات 9
وجابوا جلاد للكتابة
جبنا للطائر علامو
وجابوا واقود الحرابة
جبنا كل الدنيا تقعد
والعمارنة مليناو تـــب
قالوا حانبنيها فوكم
جابوا سيخهم يسقفوها
كنا زارعين نحنا نيمة
قامت النيمة كبرت
وكبرت النيمة ........كبرت
قدت السقفة القديمة
شالوا من النص خيالو
غتغتوبو الحفرة والساق العظيمة
ومرقنا من تل العمارنة بخير
ومحمود
كان
مشجر بين سلامات الولاد
وبين مخاليت النقادة
قلنا نحجز في القيادة
قالوا راحة البال تفضل ندي منها كل واحد
فيكو عودو
قلنا في حس الغبن
وفي صفق الكتابة
علي اللكاك
نحن جند الله جند الوطن
ان دعا داعي الفداء لن نخن
نتحدا الموت عند المحن
نشتري المجد باغلي تمن
ونحنا في هذا الزمن
لا مجد بعناهو ......... لا اشترينا
نحنا لا جندي ولا افندي
ولا داعي دعانا
ولا وفينا
ولا وقفنا علي وطنا
اصلوا ما اتحدينا موت
وما تحداو الا محمود
يبقي محمود
الوطن
في حس الغبن
وفي صفق الكتابة
علي اللكاك
اتحصبن الفال والحبل
ورجعنا لامن جينا فيهو
الخيت رخا
والدم نجيض
والانزرع في الانحرق
المنجبر في المنكسر
الماقرص من دابى حى
رش النخا
وعافو اليبيض
ما بننتــــــــــــــــهى
ولا اظن نفوتها مفلخا
نرجاها لو ما بتترجى
فوق المظنات والكسر
فوق العواجيز والحجى
فوق المغايس والضلال
قالوا
راحة البال تفضل
ندًى منها كلو واحد فيكو عودو
قلنا
فى خس الغبن وفى صفق الكتابه على اللكاك
نحن جند الله
جند الوطن
اهداء الى كل السودانيين وافريقيا
محمد عبيد الفاضلابي

ده فووووووق
شكراً للمهندس

اخى العظيم فاضلابى
ياأنت الذى أصبح نحن
أيها القادم من زمن الحب
حاملا فى يديك باقة ورد
وفى قلبك مدينة شامخة من الأحاسيس
تقف تحت نوافذنا جميعا
تغنى لنا مواويل الشوق للانسان الانسان
ومواويل العشق للوطن
ترسم لناعصافير الأمل
وتظللنا بأشجار الأمان
تمنحناما يمنحه أخوة لك
يحلمون بصدق
وينحت فى اجسامهم الغياب
كان حبهم للوطن فى زمانهم مفاجاة جميلة
حلموا من اجله
وحاربوا لاجله
ومازالوا يتمسكون باحلامهم لاجله كطوق نجاة اخير


لك أخى المهندس التجلة والاحترام
وعميق الشكر على القصيدة المضيئة

ولاخونا فاضلابى المزيد من الألق