Post: #1
Title: مــاســيــنــجــر عــلــى الــهــواء..
Author: Raja
Date: 06-24-2004, 07:38 PM
عشان يا بكري شلتا مننا الماسينجر، حنعمل بوست ماسينجر لأي زول عايز يسلم، يسأل من زول أو يقول ليهو شئ في السر  ..
أها انا حأرسل ماسينجرات أون لاين لـ:
- عمر الماحي.. ليه مسجل غياب..؟
- مريم بت الحسين.. بوستك بتاع يوسف السباعي كاتلني عديل.. لكن كتابة العربي عندي صعبة صعبة.. يوم السبت أرجع المكتب بعد الاجازة، وحأعوض كلو..
- كوستاوي نصر.. ما قادرة أشوف عرض تماضر كلو كلو.. HELP
- منوت الليموني.. سلااااام وسؤال عن الأحوالات..
- راكوبة.. وين حركتك تقلت في البوست..؟ عااارفة أدوك عين..
- أسعد.. أخبارك شنو..؟
- راوية.. أمي بتسلم عليك..
****
لغاية بعدين ممكن اي زول يستخدم الماسينجر ده..
|
Post: #2
Title: Re: مــاســيــنــجــر عــلــى الــهــواء..
Author: منوت
Date: 06-24-2004, 07:49 PM
Parent: #1
بت العم رجاء
و اللهِ فعلاً ( قرمنا ) للماسنجر ، و القرم هو قمة الشوق ، و يبدو أن الريس بكري عندو أسباب وجيهه لحجب الماسنجر .. عموماً ، ربنا يعين .
طبعاً يا بت العم ، اليومين دي كاتلنا السهر بفعاليات الكأس الأوربي ، و طبعاً الدنيا عندنا بتكون صباح عدييييييييييييل .
شكراً ليمونياً على هذا الماسنجر الهوائي .
|
Post: #3
Title: Re: مــاســيــنــجــر عــلــى الــهــواء..
Author: Rawia
Date: 06-24-2004, 07:52 PM
Parent: #1
سلام امى زى العسل على قلبى
|
Post: #4
Title: Re: مــاســيــنــجــر عــلــى الــهــواء..
Author: Raja
Date: 06-24-2004, 08:09 PM
Parent: #1
ماسينجر لي بكري..
ألحق في هكرز داخل باسم Frankly 
|
Post: #5
Title: Re: مــاســيــنــجــر عــلــى الــهــواء..
Author: Rawia
Date: 06-24-2004, 08:13 PM
Parent: #4
السهيلى حمد مجذوب سلام
اتمنى اننك تكون بخير
اسأل من اخبار الاهل
حنان بالتحديد
|
Post: #6
Title: Re: مــاســيــنــجــر عــلــى الــهــواء..
Author: Frankly
Date: 06-24-2004, 08:33 PM
Parent: #4
الاخت العزيزة رجاء
ما قلتي لي
الماسنجر عندك وصل كم؟
عندي انا غايتو بالعملة الصعبة والصعبة جدا
_____
أتق الله حيث ما كنت واتبع السيئة الحسنة تمحها وخالق الناس بخلق حسن
|
Post: #7
Title: Re: مــاســيــنــجــر عــلــى الــهــواء..
Author: Elsuhaili Magzoub
Date: 06-24-2004, 08:37 PM
Parent: #1
سلام يا بنتا العباسي
معليش امكن المشغوليات ويا رجاء شنوا الفلسة الالكترونية دي الحضر القسمة يقسم
|
Post: #8
Title: Re: مــاســيــنــجــر عــلــى الــهــواء..
Author: Raja
Date: 06-24-2004, 09:14 PM
Parent: #1
منوت، راوية، فرانكلي والسهيلي..
نفهم كده انو ما عندكم رسايل لاصحابكم..
يعني الماسينجر وجوده زي عدمو؟
|
Post: #9
Title: Re: مــاســيــنــجــر عــلــى الــهــواء..
Author: الجريفاوي
Date: 06-24-2004, 10:44 PM
Parent: #8
التحايا العطرة لكم أل العباسي
|
Post: #10
Title: Re: مــاســيــنــجــر عــلــى الــهــواء..
Author: Raja
Date: 06-24-2004, 10:55 PM
Parent: #9
الصديق عاطف الجريفاوي..
ياااااا
Long time no see, no hear
حمد لله على السلامة..
|
Post: #11
Title: Re: مــاســيــنــجــر عــلــى الــهــواء..
Author: ASAAD IBRAHIM
Date: 06-24-2004, 11:01 PM
Parent: #1
| Quote: - أسعد.. أخبارك شنو..؟ |
يسال منك الخير ونحن جميعا بخير وعافية
اود ان ارسل مسنجر للاخ معتصم "ســـــــــــــامو" :
اها عملتو شنو انت والشباب؟؟؟
يرجي تطميننا
ومسنجر تاني للفردة ابو الريش :[/B]
وينك نحن منتظرينك يا راجل فريقنا المسمي بفريق الظلاميين اتمرن وسخن لمن حرق وانتو ما جيتو :
D 
ومسنجر تالت للمدير بكري :
شنو ما زلت تعمل بذلك المثل " دي بطينة ودي بعجينة"
شكرا للخدمات السياحية والمرجو ارسال الفاتورة للاخ اساسي ليدفع قيمة المسنجرات اعلاه
مع الشكر
|
Post: #12
Title: Re: مــاســيــنــجــر عــلــى الــهــواء..
Author: مراويد
Date: 06-24-2004, 11:05 PM
Parent: #1
اولا تبادى:
يا خددددددر عند الشدايد
التانى ياكل باسطه بالصوانى:
ابراهيم الجريفاوى ضربت ليك مليون مره ، الموبايل ده انت عاملوا زينه و لاشنو؟؟؟؟
التالت جا يذكرنى اكلوا الدايرين حتوفى:
و ياامونه ما شفتى الود البديع الاسمو الفاضلابى
والرابع:
والود الغمامه عاصم
واحد فى النص ساكت: راويه ردى لى على الايميل والا حيكون اول و اخر واحد
والخامس:
رسلي لى فخفخينا من بتاع العصاير الفى اول الدقى، نسيت اسم الشارع الكبير حاجه كده العرب. عجزنا والله
سادسا:
سلمى على خالتى علويه والسيده زينب و الحسين وميدان التحرير و مكتبة مدبولى و الولا عدويه و البت الرهيبه عبله كامل ... و راصنى يا قدع
|
Post: #13
Title: Re: مــاســيــنــجــر عــلــى الــهــواء..
Author: Rawia
Date: 06-24-2004, 11:09 PM
Parent: #12
فـــــــــــــــــــــــــــــــــــــــــــرغلى
امبارح دى روحى طلعت فى عصير منقه من فرغلى وسندوتش من كافتريا رضوان
|
Post: #15
Title: Re: مــاســيــنــجــر عــلــى الــهــواء..
Author: مراويد
Date: 06-24-2004, 11:10 PM
Parent: #13
انت ما بت حلال و مبروكه، اها الشارع اسمو شنو؟؟
واحد فى النص ساكت: راويه ردى لى على الايميل والا حيكون اول و اخر واحد
|
Post: #18
Title: Re: مــاســيــنــجــر عــلــى الــهــواء..
Author: Rawia
Date: 06-24-2004, 11:17 PM
Parent: #15
الجريفاوى تسلم وليك وحشه
مراويد قول بسم الله
انت رسلته بالايميل الفى البروفايل؟
محل فرغلى التانى فى ناصيه شارع جامعه الدول العربيه مع شارع شنو كدا ماعارفه المهم فى اول جامعه الدول العربيه
المده طالت
|
Post: #20
Title: Re: مــاســيــنــجــر عــلــى الــهــواء..
Author: مراويد
Date: 06-24-2004, 11:25 PM
Parent: #18
ايوه شارع جامعة الدول العربيه،قلت ليك متذكر فيهو عرب كده
ايوه الايميل الفى البروفايل طبعا, اهاااا اجيب ايميلك من وين كمان يا راويه؟؟
ده ايميلى :[email protected]
|
Post: #14
Title: Re: مــاســيــنــجــر عــلــى الــهــواء..
Author: omer ibrahim
Date: 06-24-2004, 11:09 PM
Parent: #12
| Quote: و ياامونه ما شفتى الود البديع الاسمو الفاضلابى |
بس انابرضو كنت عاوز أسأل
|
Post: #16
Title: Re: مــاســيــنــجــر عــلــى الــهــواء..
Author: مراويد
Date: 06-24-2004, 11:12 PM
Parent: #14
انت عدت على صلعتك سحليه و لا ....؟
اها اجيب صلعتى واجيك؟ تشارك؟؟
|
Post: #21
Title: Re: مــاســيــنــجــر عــلــى الــهــواء..
Author: Raja
Date: 06-24-2004, 11:25 PM
Parent: #12
أسعد.. بركة الظهرتا بخير..
لكن الماسينجرات ما عندك.. انتا وناس سامو وأبو الريش عايزين تعملو شنو بالضبط  ..؟
مراويد.. ازيييييييييييك..
انحنا قلنا الموضوع ماسينجر مش شحتفة روح لحاجات مصر..
المحل اسمو "فرغلي" بتاع العصير.. وكان شفتا "شب" الفخفخينا بقى صغيروووووووني ما الكبير بتاع زمان .. ولا نحنا كبرنا ما عارف ..
عدوية جاب ولدو بقى يغني بدلو.. وآخر فيديو كليبات مع الحسان.. وعبلة كامل منورة مع زواجها بمحمود الجندي.. أها قصرتا معاك  ..؟
باقي السلامات وصلو كلهم..
|
Post: #23
Title: Re: مــاســيــنــجــر عــلــى الــهــواء..
Author: مراويد
Date: 06-24-2004, 11:37 PM
Parent: #21
| Quote: وكان شفتا "شب" الفخفخينا بقى صغيروووووووني ما الكبير بتاع زمان |
الكبابى ياهن زاتن العتب على العيون، نضيضيراك الشفتهن ديل يخلن البرميل فنجان والفيل جعران
شكرا ليك على توصيل السلام، سعيد انا لانو المراسله بتاعتى جاده جدا
|
Post: #17
Title: Re: مــاســيــنــجــر عــلــى الــهــواء..
Author: مراويد
Date: 06-24-2004, 11:14 PM
Parent: #1
ماسنجر لى بكهام:
فكت فكت فكت فكت فكت فكت فكت فكت فكت فكت
|
Post: #19
Title: Re: مــاســيــنــجــر عــلــى الــهــواء..
Author: omer ibrahim
Date: 06-24-2004, 11:20 PM
Parent: #17
مسنجر لي أخونا مراويد
شكرا لأعلامك لي بأنك حلقت زلبطة... نعيما
عوضك الله عن قملك خير
وعن قلمك الشايفو انا بهناك دا ... غير
معقول يا مرمر .. ياخ دا كلام تكتبوا في بورد .. عوائل؟؟
|
Post: #22
Title: Re: مــاســيــنــجــر عــلــى الــهــواء..
Author: مراويد
Date: 06-24-2004, 11:32 PM
Parent: #19
غلطانه العوائل، البجيبا محل الرجال شنو؟؟
بالمناسبه ما نقترح لى بكرى نبنى حيطه فى البورد ونعمل حوش للحريم والعوائل وناس كلية الطب (تتذكر تشجيع الكوره فى الجامعه) والحوش التانى يقعدوا فيهو الرجال ناس اهل العوض وسجيمان وابوقوته والملا عمر اسامى تملا الخشم موش زى ناس طارق (ابوعبيده) وسنو و سنو،
|
Post: #25
Title: Re: مــاســيــنــجــر عــلــى الــهــواء..
Author: Rawia
Date: 06-24-2004, 11:42 PM
Parent: #22
مراويد دا حسه يترد عليه ازاى
انت لسانك ده انا قايل بقدر عليهو
عموما انا عندى ايميل تانى برسله ليك لانه الايميل دا طالما طلع كدا فعوارضه كتيره وما بفتحه الا فى الشغل عشان عندهم حمايه كويسه
|
Post: #24
Title: Re: مــاســيــنــجــر عــلــى الــهــواء..
Author: مريم بنت الحسين
Date: 06-24-2004, 11:40 PM
Parent: #1
يا رجا.. شايفاك حايمه بي جاي زيي نص الليل ده.. إزيك..
Quote: مريم بت الحسين.. بوستك بتاع يوسف السباعي كاتلني عديل.. لكن كتابة العربي عندي صعبة صعبة.. يوم السبت أرجع المكتب بعد الاجازة، وحأعوض كلو..
|
والله خجلتيني عديل كده ياخ.. ما عارفه زاتي أقبّل وين.. يعني أنفع؟ عليك الله أنفع؟...
ماسنجر صغير، إليه
.. حاولت أن أخبرهم عنك! لكني على ما يبدو، لم أملك الشجاعة الكافية.. أو ربما امتلكتها، لكن كلامي صار طلاسم..
(رجوية)... ده سر... وصلي المسنجر بالله
بنت الحسين
|
Post: #26
Title: Re: مــاســيــنــجــر عــلــى الــهــواء..
Author: مراويد
Date: 06-24-2004, 11:46 PM
Parent: #24
و واحد لى بت الحسين:
وينك و وين اكلاتك وين وين طبخاتك
و فولك فولك جرى قدامك
وانت طبيخ الصبح طعامك ولحس طواتك
|
Post: #29
Title: Re: مــاســيــنــجــر عــلــى الــهــواء..
Author: Raja
Date: 06-25-2004, 00:03 AM
Parent: #24
مريوما الحبيبة..
ازييك - نص الليل كده - لووووووووووول
طبعا عندي اليومين دي اجازة حلوة جات من غير ترتيب.. لغاية السبت ان شاء الله..
من ناحية تنفعي.. زماااان الناس البتفهم في النقد قالو ليك كده.. انحنا ناس بنعرف الحاجة البتريحنا وين وبنمشي.. وكلامك بجيبنا داخلين تووووش.. اها كده كويس..؟
ماسينجرك الجميل ده حأحفظوا ليك بعيد من برطمانات الشمار الحايم اليومين ديل..
عمر العريس..
اعمل ليك زي الناس المجننكم..؟ اها ما بقيتو 3 ؟ طبعا ده السؤال الأزلي لأي عريس بعد داك حيقولو ليكم الوليد ولا البينية ما دايرين تاخووهم ..؟
لووووووول
تحياتي لفطومة السمحة..
|
Post: #27
Title: Re: مــاســيــنــجــر عــلــى الــهــواء..
Author: مريم بنت الحسين
Date: 06-24-2004, 11:51 PM
Parent: #1
مراويد إزيك..
إنت من زمن الموضوع بتاعنا داك! .. والله الفول بخير والحمد لله.. قبل شويه أكلت فول بي جبنه وزيت سمسم.. والله ما تدي الجنبك كان بقى منو داك...
تقولوا لي مايونيز
بنت الحسين
|
Post: #28
Title: Re: مــاســيــنــجــر عــلــى الــهــواء..
Author: مراويد
Date: 06-24-2004, 11:55 PM
Parent: #1
اخر واحد لى مراويد:
قوم نوم راجيك بكره زى كل يوم غسيل عده وقطيع سلطه ونضيف واطه، عندك نفس تتونس كمان، على الحرام ما اكعب منك الا تماضر الاكتشفت مؤخرا انها عمال!!!!
|
Post: #30
Title: Re: مــاســيــنــجــر عــلــى الــهــواء..
Author: Rawia
Date: 06-25-2004, 00:07 AM
Parent: #28
مريومه ازيك
انا عينى على بوستك
عاوزه انداح فيهو وحقيقى حضرت الجزء بتاع تحويل اعمال يوسف السباعى الى افلام سينمائيه وجمعت الداتا لكن ما عاوزه ادخل فيهو الا تنتهى انت خلصى وبحكى ليك عن يوسف السباعى
انا كلامك بيعجبنى شديد
|
Post: #33
Title: Re: مــاســيــنــجــر عــلــى الــهــواء..
Author: مريم بنت الحسين
Date: 06-25-2004, 00:14 AM
Parent: #30
راوية.. انا كمان بعجبني كلامك يا ذوق...
انا موضوعي مع يوسف السباعي يمكن يجر.. غايته كان دايره نصيحتي.. الجزء بتاع الأفلام.. ختيه.. عشان انا والله لما أبدا أكتب ما بعرف زاتي دايره أكتب شنو.. عشان ما ألخبط ليك كلامك الموزون,, والداتا المرتبه.. إنت أجبريني على الترتيب.. وانا رهن إشارتك
بنت الحسين
|
Post: #37
Title: Re: مــاســيــنــجــر عــلــى الــهــواء..
Author: bamseka
Date: 06-25-2004, 06:05 AM
Parent: #33
ماسنجر بيت الحسن مريم  البنية دي كانت بتاعين لشنو صورة كتير لزيزه بامسيكا
|
Post: #31
Title: Re: مــاســيــنــجــر عــلــى الــهــواء..
Author: Raja
Date: 06-25-2004, 00:09 AM
Parent: #28
مراويد..
انتا ما قلتا عزابي ومشيت عملت مراهنات في بوست الكورة عشان تلم المهر.. غسيل العدة ونضيف الواطة ده ما لسة بدري عليهو
|
Post: #32
Title: Re: مــاســيــنــجــر عــلــى الــهــواء..
Author: Rawia
Date: 06-25-2004, 00:13 AM
Parent: #31
شغـــــــــــــــــــــال كدا
لازم تحرجونا يعنى
|
Post: #34
Title: Re: مــاســيــنــجــر عــلــى الــهــواء..
Author: Raja
Date: 06-25-2004, 00:29 AM
Parent: #32
Quote: شغـــــــــــــــــــــال كدا
لازم تحرجونا يعنى |
لووووووووووول..
بالفصاحة دي كلها..؟
|
Post: #35
Title: Re: مــاســيــنــجــر عــلــى الــهــواء..
Author: خالد الأيوبي
Date: 06-25-2004, 05:02 AM
Parent: #1
ماسنجري يا رجاء لأخ عزيز بدون ذكر إسمو:
أخ "طيب" جداً، مسجل غياب منذ فترة طويلة. بوستاته كانت لها طعم خاص فإفتقدناها و إفتقدناه. كنت أعده ترمومتر لقياس حالة البورد. فوجوده بالنسبة لي "بشير" خير بإنعدال حالة البورد و عودة الطعامة إليه و غيابه نذير بحلول الكآبة والمساخة عليه.
ولن أذكر إسمه.
|
Post: #36
Title: Re: مــاســيــنــجــر عــلــى الــهــواء..
Author: Abureesh
Date: 06-25-2004, 05:10 AM
Parent: #35
المعـا ماسنجــر.. المعـا ماسنجــر..
.....
- يا إبن العـم دا بيت ناس رجاء؟
- أااى ياهـو زاتـو..
المعـا ماسنجـووووووووووووووور
|
Post: #44
Title: Re: مــاســيــنــجــر عــلــى الــهــواء..
Author: Raja
Date: 06-25-2004, 10:34 PM
Parent: #36
بامسيكا العزيز..
اها ماسينجرك وصل واتردا عليه كمان ..
الأيوبي خالد..
يااااااااه.. ليه الغيبة دي.. عاارفة حايم في أيوا  .. لكن كان تطل..
وبرضي فاقدة أبو بشير.. اتمنى نشوفو. ويا ريت يرد كمان على الماسينجر ده..
أبو الريش صديقي..
أولا حمد لله على السلامة..
تانيا البوست ده ماسينجر وتخريمات بلاش ..
ما قلتا لي.. الماسينجر الليلة عندكم وصل كم ..؟
|
Post: #38
Title: Re: مــاســيــنــجــر عــلــى الــهــواء..
Author: ودقاسم
Date: 06-25-2004, 07:10 AM
Parent: #1
لا لا ما دايرين سيمستر semister
في منتصف السبعينات كانت الهتافات تردد لا لا ما دايرين سيمستر ،،
لا لا ما دايرين ماسينجر ،،
والله تعرفي يا رجاء أنا قربت أعمل لي محبة ، في مدني شارع القبة ،، وكلو كان عن طريق الماسينجر ، ولما بكري وقف الماسينجر ، وقّف حالنا ، وحبيبتي قالت لا أرغب إلا في الحب الالكتروني، يعني جوابات تلفونات وصايا ما بنفع ،، جبت الإم إس إن ماسينجر msn قالت ما داير إلا ماسينجر سودانيز أون لاين ،، كلمت بكري ، ما اشتغل بي ،، قامت حبيبتي أدتني شاكوش ،،
|
Post: #39
Title: Re: مــاســيــنــجــر عــلــى الــهــواء..
Author: ahmed haneen
Date: 06-25-2004, 08:06 AM
Parent: #1
هوي يا الناس القوق الذاذ ازيكم كلكم
علكم طيبين في حيكم
نشكركم علي ماسنجر شماركم
وانا عندي شمار حار شديد وجديد
خلوه سر ،، يمكن يجي واحد مضهب بي جاي
يعمل فيها مقددة وناقش اي حاجة
زي حكاية الضب السكران
اتمطي وفرد عضلاتو
وقال للحيوانات ( والله انا لو ما السكر
ومبارات الجكس كان بقيت تمساح)
ماسنجري الخاص
للأخ الرائع بكري الجاك
يا اخوي خلاص بطل عسل ،، البورد يفتقدك
|
Post: #40
Title: ماسنجرات
Author: mohmmed said ahmed
Date: 06-25-2004, 08:23 AM
Parent: #1
فكرة جميلة يارجاء
كيفك
سلامى للحاجة وراية فى البلاد الطيرة عجمى
هدى العباسى وين فلق الصباح
سارة العباسى لسه زاهى فى خدرو ما تألم الا يوم كلمو
عبد الخالق السر
من افضل كتاب البورد وين مختفى
|
Post: #48
Title: Re: ماسنجرات
Author: Raja
Date: 06-25-2004, 11:47 PM
Parent: #40
ود قاسم العزيز..
عاد كان بقيت انتا المقصود بالماسينجر بتاع الريدة القالو بين اتنين في البورد.. يبقى شيلة الماسينجر صحي خلا ..
غايتو الماسينجر لو رجع.. تاني ما بقبل منك أي رسالة فيها شبهة سياسة أوشغل ..
الحنين أحمد..
ده نقول عليهو شنو..؟
انتا حاسد بكري ولا بغران ..؟
محمد سيد أحمد يا عزيز..
بعد الصورة الوجيهة دي ما بنقدر نقول حاجة ..
عطبراوي صحي كتًاب.. لكنه إما كسلان.. أو زهجان من الحاصل..
وفي الاتنين غلطان.. لأنو الجمال يكسب..
تحاياك وصلت وزيادة..
|
Post: #41
Title: Re: مــاســيــنــجــر عــلــى الــهــواء..
Author: مريم بنت الحسين
Date: 06-25-2004, 12:35 PM
Parent: #1
بامسيكا..
البنت دي ما قاعده تعاين لأي حته.. هي بس بتضحك.. وخجلانه من التصوير.. شايله في إيدها علبة كولا أكبر منها.. عشان كده ما ظاهره في الصورة.. وبعدين على قول ناس كده.. الشلاضيم بتخلي العيون دايره تتقفل.. ...
شكرا على التعليق الظريف...
ماسجنر.. عمو أبو الريش...
والله ليك وحشه.. لعله المانع خير...
بنت الحسين
|
Post: #42
Title: Re: مــاســيــنــجــر عــلــى الــهــواء..
Author: haleem
Date: 06-25-2004, 02:34 PM
Parent: #1
خليتونا نطراه مالطم
بما انو فرغلي فتح فرع في الرياض
فمن دربي دة هسة طووووووييلللل
|
Post: #45
Title: Re: مــاســيــنــجــر عــلــى الــهــواء..
Author: Rawia
Date: 06-25-2004, 11:12 PM
Parent: #43
ماسينجر لى ياهو زاتو
شايفاك اونلاين
انشاء الله تكون بخير
نتواصل..........
|
Post: #46
Title: Re: مــاســيــنــجــر عــلــى الــهــواء..
Author: إيمان أحمد
Date: 06-25-2004, 11:14 PM
Parent: #1
رجاء والمسنجرات! سلام عليك وعلي ضيوفك كلهم
ولي مريوم رئيسة الجمهورية ألف تحية
|
Post: #47
Title: Re: مــاســيــنــجــر عــلــى الــهــواء..
Author: Rawia
Date: 06-25-2004, 11:32 PM
Parent: #46
ماسينجر لى الشريف
الف مرحب بيك فى كندا
|
Post: #49
Title: Re: مــاســيــنــجــر عــلــى الــهــواء..
Author: kamalabas
Date: 06-25-2004, 11:51 PM
Parent: #47
راوية أزيك .. أخباركم أيه ؟
بالله متولي الشريف جائ كندا? أريد أخباره بالتفصيل
كمال
|
Post: #50
Title: Re: مــاســيــنــجــر عــلــى الــهــواء..
Author: Rawia
Date: 06-25-2004, 11:56 PM
Parent: #49
اهلا كمال عباس
متولى وصل كندا من ثلاثه اسابيع تقريبا
لكن لسه ما استقر
وبيدخل النت من مكتبه مؤقتا
ما عنده تلفون لسه
انا بعتمد على انه يتصل بى هو
عموما لو اتصل حا اكلمه
|
Post: #52
Title: Re: مــاســيــنــجــر عــلــى الــهــواء..
Author: Raja
Date: 06-26-2004, 00:39 AM
Parent: #49
العزيز كمال عباس..
اولا مرحب بيك في البوست..
تانيا الاحظ غياب من جهتكم.. خير ان شا الله..؟
راوية الحبيبة..
معاك ارسل مسينجر لمتولي الشريف.. وأتمنى له إقامة طيبة في مهجره الجديد.. كندا..
وبعد الاستقرار نعمل بوست معتبر للمناسبة.. هو الشريف شوية..؟
ومسينجر لقصي الياهو، وأبو مهيار وكل الغايبين من الحبايب..
|
Post: #51
Title: Re: مــاســيــنــجــر عــلــى الــهــواء..
Author: Raja
Date: 06-26-2004, 00:24 AM
Parent: #46
حليم العزيز..
سلاااام..
عليك الله كما مشيت فرغلي وشفتا "شُب" عصير الفخفخينا.. وتعال قول لي مراويد اللسانو طويل ده..
الخوفة الشًوب بتاعكم يكون حجم عائلي، بمناسبة الافتتاح وكده ..
نصر الكوستاوي..
تسلم للمجهود.. الظاهر عندي مشكلة ما في الجهاز.. بكرة أشوفو في المكتب بمزااااااج.. وأدخل اكتب في البوستات المعنية..
الحبيبة ايمان..
اللللللليلة.. كل ده لي مراويد..؟ غايتو الله يستر وما يقبًل عليك  ..
Quote: ملحوظة: عندنا إصلاحية صارمة القوانين للأحداث،
والجرائم لا تسقط بالتقادم!!!!!!! |
حللللللوة.. أؤيد  ..
|
Post: #53
Title: Re: مــاســيــنــجــر عــلــى الــهــواء..
Author: ابو جهينة
Date: 06-26-2004, 10:32 AM
Parent: #51
أنا في حاجتين واحشني أوي أوي
أكل الفول الصباح من عربية يد في حى السيدة زينب مع الجرجير و البصل
و الحاجة التانية ( أهليييييييييييييييييييييييييييييييييييييييييييييييين )
|
Post: #57
Title: Re: مــاســيــنــجــر عــلــى الــهــواء..
Author: Rawia
Date: 06-26-2004, 11:19 AM
Parent: #53
الغالى جلال
مشتاقه اكتر لى ريحه عيش بلدى طالع من الفرن حسسسسسسسسسسسسسسسه وشايلنو فى محفه بتاعه جريد النخل عشان الهوا يضربه شويه وما يتعجن فى بعضه
|
Post: #68
Title: Re: مــاســيــنــجــر عــلــى الــهــواء..
Author: مراويد
Date: 06-27-2004, 04:42 PM
Parent: #46
ايمان
انتى زعلتى ولا شنو يا دكتوره؟؟؟
ردك ده فيهو ريحة غضبه حقيقيه، لو فى احسن تقولى عديل عشان نتفاهم
عن بعض الاشياء التى تبدو كانفلاتات هنا وهناك، استعين احيانا بالخيال و السخريه لتحمل قبح هذا العالم واحمل له المراه كى يري وجهه الحقيقي بما فيه فكرة الحيطه بامتدادتها الاجتماعيه والاخلاقيه والنوعيه، فى احيان اخرى قد تكون قليل من الركاكه ضرورى فى مواجهة ركاكات اكبر، بالطبع لا يخلو الامر من خسائر و خدوش للحساسيه هنا وهناك.
انحنا عمرنا كلو حنقيف فى الحيطه؟؟؟
حنهندها و نبينى محلها دكان ناصيه فى الحوش وميدان كوره و كوافير، شن قولك؟؟
الاصلاحيات خشيتا زمان و طلعتا ابوظ مما دخلت
هل قراتى فارس الرمال لجورجى امادو؟؟
|
Post: #99
Title: Re: مــاســيــنــجــر عــلــى الــهــواء..
Author: إيمان أحمد
Date: 06-29-2004, 04:07 PM
Parent: #68
الأخ الكريم مراويد
عذرا لو زعلتك كلماتي، بالتأكيد لم أقصد الإساءة فاسمح لي بالاعتذار.
فقط عنيتها كمزحة امتدادا لفكرتك، وليتك قرأتها بروية.
علي كل حال لك اعتذاري وما عاش اليزعل منك ولا يزعلك
أفهم تماما إنك تحمل سيف الكلمة في وجه الكثير من الركاكة
إعتذاري لك يا رجاء، ولعاصم، وأبو ساندرا وكل من أصابته الكلمة بأذي
(أفهم تماما ما عنيته بها، لكن ليس هذا مجال التوضيح)
ربما يأتي يوما الوقت المناسب لذلك
شكري واحترامي يا رجاء
إيمان
|
Post: #100
Title: Re: مــاســيــنــجــر عــلــى الــهــواء..
Author: Raja
Date: 06-29-2004, 04:28 PM
Parent: #99
الحبيبة ايمان..
فهمت اي كلمة قلتيها بما عنيته من مزاح..
لا عليك ولا تغضبي..
|
Post: #54
Title: Re: مــاســيــنــجــر عــلــى الــهــواء..
Author: صديق الموج
Date: 06-26-2004, 10:41 AM
Parent: #1
لكن يا رجاء لو الماسنجر سيد الاسم (يا حليلو) فى الشمارات
كانت بتكون كدى....غايتو بورد بدون ماسنجر زى اكل الاسبتالية
اه يا زمان الماسنجر..طبعا شمار كتير واقف للزول فى الحلق
الله يعينا..ويا بكرى الفطامة صعبة شوف لينا طريقة فقد بلغ
الشمار الزبى،،،، الله يصبرنا،،،
|
Post: #60
Title: Re: مــاســيــنــجــر عــلــى الــهــواء..
Author: Raja
Date: 06-26-2004, 01:39 PM
Parent: #54
أبو جهينة وأخواتها يا غالي..
أهلييييييييييييين..
وليك وحشة آآآد كده..
قلت لي وحشك شنو..؟
| Quote: أكل الفول الصباح من عربية يد في حى السيدة زينب مع الجرجير و البصل |
طبعا انا لما بشوف العربيات دي.. بستغرب على الناس المشنكتين يأكلو حوليها .. ونفسي أعرف بيعيشو بعد الأكلة دي ولا لأ ..
صديق الموج العزيز..
سلاااامات كتيراااات..
انتا بس أبدأ في شمارك هنا لغاية ما يرجع التاني ..
|
Post: #55
Title: Re: مــاســيــنــجــر عــلــى الــهــواء..
Author: ودقاسم
Date: 06-26-2004, 10:54 AM
Parent: #1
| Quote: غايتو الماسينجر لو رجع.. تاني ما بقبل منك أي رسالة فيها شبهة سياسة أوشغل .. |
رجاء
وها تسوي شنو في ما سينجراتنا الزمان ؟؟ شيلي شيلتك أحسن ، وبلاش تكبي الزوغة ..
إنتي عارفة أنا بفتح بوست في الهينة والقاسية ،،
فوزية
ما تصدقي ، أنا والله بهظر مع رجاء ..
|
Post: #56
Title: Re: مــاســيــنــجــر عــلــى الــهــواء..
Author: مريم بنت الحسين
Date: 06-26-2004, 11:04 AM
Parent: #1
ماسنجر لي إيمان أحمد..
مرحب مراحب.. سلامك وصل .. مسؤول التشريفات بلغني ليهو.. كنت بجهّز لزيارة باول.. قشيت حوش القصر.. واستحميت.. واتمسحت.. وسرحته شعيراتي.. وقشرتها على الأخير.. يمكن الزول يناسب جورج بوش وكده.. اها ياختي جابو لي خبر عنان قالوا جاي كمان... لقيت ليك الموضوع خرب.. ...
ماسنجر للمتجرسين من ثقالتي في "البحث عن جسد"...
ما تنسوا انا رئيس جمهورية في إيدي مصلحة الضرائب.. أخير تقروا ساكتين...
ماسنجر لرجاء...
والله انا بموت فيك يا رجوية...
بنت الحسين
|
Post: #59
Title: Re: مــاســيــنــجــر عــلــى الــهــواء..
Author: abdelrahim abayazid
Date: 06-26-2004, 12:19 PM
Parent: #56
رجاء
سلامات
لو امكن نلتقي علي الماسنجر التاني بعني الهوت ميل ضروري جدا او ارسلي لي تلفونك
سلام
|
Post: #61
Title: Re: مــاســيــنــجــر عــلــى الــهــواء..
Author: Raja
Date: 06-26-2004, 01:47 PM
Parent: #56
ود قاسم يا ذكي ..
يعني هسع جاي ترمي التهمة عليً بعد ما صرفتا كلام حلو لجهات أخرى ..
لسة فيها.. والمسينجر مصيرو يرجع.. وخلينا نشوف..
مريوما الحبيبة..
تعيشي انتي يا واعية وسابقة سنك..
أقول ليك حاجة..؟
أنا زاتي بريدك ونفسي كل البنيات يبقو زيك  ..
|
Post: #58
Title: Re: مــاســيــنــجــر عــلــى الــهــواء..
Author: طيفور
Date: 06-26-2004, 12:14 PM
Parent: #1
هووووووووي يا ناس المثجرات الحلوة
جابتني ريحة الشمارات الحاااااااااارة
مسنجر سلام لي زول اخدر ورويان واحشني كلامو
راوية... بطلي الشمشرة
|
Post: #62
Title: Re: مــاســيــنــجــر عــلــى الــهــواء..
Author: Raja
Date: 06-26-2004, 01:56 PM
Parent: #58
عبدالرحيم العزيز..
رسلت ليك ايميل حسب رسالتك يومداك..
وحضرت ولم أجدكم في مسينجر الهوت ميل الليلة حسب رسالتك ..
ارجو ان ترد على ايميلي.. لأعطيك رقمي..
طيفور الحنين..
سلااااااااام..
وينك يا راجل..؟
غايتو زول أخدر ده عرفتو عديييل ..
|
Post: #63
Title: Re: مــاســيــنــجــر عــلــى الــهــواء..
Author: abdelrahim abayazid
Date: 06-26-2004, 02:05 PM
Parent: #62
يا رجاء
هذا عنواني ولم استلم اي رسالة
[email protected]
|
Post: #64
Title: Re: مــاســيــنــجــر عــلــى الــهــواء..
Author: omer almahi
Date: 06-27-2004, 08:33 AM
Parent: #63
هدية مهترشة للاخت رجاء
بالحب بالجمال مداخلاتنا ليك مفروشة
بالريد بالإحترام قلوبنا ليك معروشة
في السمح فى الشين ديمة باسمة بشوشة
للجو النتن قارورة عطر مرشوشة
الكرهوك كذبوا وشهاداتهم مغشوشة
مصابين بالحسد ودواخلهم مخروشة
نفوسهم بالجد ضعيفة وبالحقد مدروشة
ماني شاعر يا رجاء وحروفي ماها منقوشة
كلمات طلعت مني ليك منسابة ما مبروشة
لك الود
|
Post: #65
Title: Re: مــاســيــنــجــر عــلــى الــهــواء..
Author: Frankly
Date: 06-27-2004, 10:54 AM
Parent: #64
تحياتي واشواقي للوالدة الكريمة
وللوالد الكريم
ولكل اشقائي
كما ابعث بتحياتي الى
رومانة
السارة
الصادق وزوحتة
عسل
تبلدينا
بناديها
الخواض
تاج 25
سودانية 2000
و...........
_____
أتق الله حيث ما كنت واتبع السيئة الحسنة تمحها وخالق الناس بخلق حسن
|
Post: #66
Title: Re: مــاســيــنــجــر عــلــى الــهــواء..
Author: Raja
Date: 06-27-2004, 02:20 PM
Parent: #65
عمر الماحي يا عزيز..
تسلم.. يعجبني هذا اللون من الأشعار.. أو قل الدوبيت..
لما بكري يرجع لينا محل الامضاءات حأخليهو توقيعي ..
العزيز كمال فرانكلي..
تحياتي معاك للوالد والوالدة..
بالمناسبة انتا وين ..؟
وكمان لكل أصحابك الذكرتهم هنا..
كل يوم بتوقعك ترسل لي مسينجر صحي صحي ..
|
Post: #74
Title: Re: مــاســيــنــجــر عــلــى الــهــواء..
Author: طيفور
Date: 06-28-2004, 06:09 AM
Parent: #62
رجويه العزيزة..
خلاث اثكتي ثااااااي وما تكلمي زول
زين....؟؟؟
|
Post: #67
Title: Re: مــاســيــنــجــر عــلــى الــهــواء..
Author: Teeta
Date: 06-27-2004, 04:12 PM
Parent: #1
بنات العباسى سلام
ممكن ادخل ؟ قلت يمكن بى هنا القاكم
تحياتى
ام الاء
|
Post: #69
Title: Re: مــاســيــنــجــر عــلــى الــهــواء..
Author: عاصم الحزين
Date: 06-27-2004, 05:35 PM
Parent: #67
هل اتاك حديث الشوق ؟
اذاً ما بالك لا تطعمه بعض اناشيدك يا مراويد ؟
كيفك ؟
تعرف
استمتع هذه الايام بشكل خاص ب ( كتاب اللاطمأنينه ) للشاعر المحترم و المجنون علي طريقة المتمرّد ( جان جينيه ) في تجواله المرهق في صحاري الانسان و و حدائق الروح حين تلوذ بالاسئله ذات يتم .
تعرف
هذا المحترف اغاظتنا فينا قال :
( حيث استحالة الكلام هي امكانيته الوحيدة ، و حيث الاستحالة نفسها هي الطريقة الوحيدة التي تجعل النشيد ممكناً )
تعرف
و علي هامش النص ، في الصفحة المرعبة تلك ( 392) قال :
( الانسان الكامل لدي الوثني تمثّل في كمال الانسان الموجود بالفعل ، الانسان الكامل لدي المسيحي تجسّد في كمال الانسان الذي لا وجود له ، الانسان الكامل لدي البوذي هو عدم كمال وجود الانسان .
الطبيعة هي الفرق بين الروح و الله .
كل ما يعرضه الانسان او يعبر عنه هو بمثابة ملاحظة علي هامش نص الكون الخامد .
من المعني العام للملاحظة ، نستخرج المعني المفترض للنص ، و لكن الشك يظل قائماً ، فالمعاني المحتملة كثيرة جداً . ) .
تعرف
كتبت قصديتين كونيّتين ، و ما استغرب لجرأته في مشاغلتي هو ذلك الحنين الدائم للحبيبة منذ اشواقٍ كثيره و اكثر .
تعرف
اهلاً
و
اعضّك في الانف علي هيئة كلام سرّي و نضيف لابس نشيد بمبي و بحندّك قلبي كل ما شاف غناك لامع هنا.
طيّب
كفاك
و
سلام حتي مطلع الامر
|
Post: #80
Title: Re: مــاســيــنــجــر عــلــى الــهــواء..
Author: Raja
Date: 06-28-2004, 01:00 PM
Parent: #69
الحبيبة أم آلاء..
مرحب بيك انتي.. وملاحظة غيابك في الفترة قبل الفاتت.. ارجو ان يكون خير.. وألا يتكرر..
ودمتي يا غالية..
الغالي عاصم..
ويييييييييينك يا عزيز..
إن شا الله طيب.. ونريد الاطمئنان على الصحة والأسرة.. تحياتي ليهم زول زول ولإسلام صاحبك..
|
Post: #70
Title: Re: مــاســيــنــجــر عــلــى الــهــواء..
Author: ايهاب
Date: 06-27-2004, 05:40 PM
Parent: #67
ماسنجر رقم واحد
سلام وتحيات واشواق كتتاااااااااار لكل الاعزاءوالعزيزات وحنين من هنا لي اخر نقطه يتواجد فيهااي بوردابي
مانسجر رقم 2
العزيزه رجاء لك الشوق كميات انت بالزات كنتا محتاج اكتب ليك مسنجر ضروري
المهم وعد حا يصلك بطريقه ما و شكرا على هذه المساحه المسنجريه بس استحمليني لانو انا مسانجراتي كتيييييييييره بسبب طول الغياب رغم التواجد
ماسنجر رقم 3
العزيز الغالي احمد سعيد (قرنفل) لك الود موصول بطول خط رحلاتك البطوطيه وانت يا ملك المسنجر شي قليل في حقك وانتظر مني تلفون تاخر كثيرا وكثيرا وكل التباريك بمناسبه لم الشمل وبعد دا تفكر جادي في الخطط السابقه الموعودين بيها ةشكرا على الخيانات التقيله ان شاء الله تكون استمتعتا حد التشبع
ماسنجر رقم 4
راويه العزيزه الاغنيه عجيبه سمعتها 1430 مره و قديت بيها ابو الساء كايس للبوست ما لاقيهو
ماسنجر رقم 5
الغالي تمبسبعد السلامات والتحايا والاشواق كايس ليك بي شده اظهر ف يالمسنجر عليك الله ضروري
تمنيت انك تكرمنا بالزياره والله انا ما كنتا جايب خبر بالموضوع الا قريت الكلام بعد فوات الاوان
خساره والله والجايات اكتر من الرايحات
طبعا كلام ابو ساندرا بكون جننك هسه
loOooOoOoOoOoOoOOOoOoOoOoLZ
ماسنجر رقم 6
بت قضيم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ماسنجر رقم 7
بلقيس ملكه سبا
وين الحي بيك !!!!!!!!!!
ماسنجر رقم 8
الشريف متولي
في انتظار اخبارك المقطوعه طمنا عليك يا شريف
ماسنجر رقم 9
مريم بت الحسين
الباذنجان بيحرقوهو ولا بحمروهو
ماسنجر رقم 10
.... ولا خلاص كفايه لانو لو ما وقفتا هسه ما بقيف تاني
شكرا تاني يا رجويه على المساحه دي
|
Post: #71
Title: Re: مــاســيــنــجــر عــلــى الــهــواء..
Author: smilewomen
Date: 06-27-2004, 07:20 PM
Parent: #1
رساله الى رجاء
بحب الكشرى موت وعايزه أعرف طريقة عمله ومكوناتو
أسألى لى ناس الخبره بس سريع
الموضوع مستعجل شويه
|
Post: #72
Title: Re: مــاســيــنــجــر عــلــى الــهــواء..
Author: Elkalakla_sanga3at
Date: 06-27-2004, 10:41 PM
Parent: #71
سسسسلام اها اخوتي رجاء قولتي ليا ارسل التلفون في ماسنجرك داء سمعنا من مصادر موثوقة سوف يرجع قريب الماسنجر
|
Post: #81
Title: Re: مــاســيــنــجــر عــلــى الــهــواء..
Author: Raja
Date: 06-28-2004, 01:06 PM
Parent: #72
إيهاب صديقي العريس..
شفت حيرة المسينجر كيف ..؟
اضم رسايلي لرسايلك المسينجرية لأصحابك.. تصدق لقيتهم كلهم أصحابي ..؟
وفي انتظار الباقين..
العزيز بهاء الكلاكلة..
الحل اكتب لي ايميل وانا أرسل ليك فيهو..
شفت الجهجهة دي ..؟
|
Post: #79
Title: Re: مــاســيــنــجــر عــلــى الــهــواء..
Author: Raja
Date: 06-28-2004, 12:55 PM
Parent: #71
الحبيبة سمايل وومان..
سلام وتحية..
أها دي وصفة عمل الكشري..
المقادير:
رز - مكرونة - عدس أبو جبة (العدس الأسود) - حمًص (كبكابيه) - طماطم -زيت - ثوم - خل. (المقادير حسب الكمية المطلوبة).
الطريقة:
- يسلق الرز والمكرونة والعدس والحمًص - كل على حدة -
- لعمل (الدقًة) وهي صلصة الكشري.. يوضع قليل من الزيت على النار، ويضاف اليه الثوم ويقلب حتى يصفر لونه ويضاف ماء وملح وكمون وقرن فلفل أخضر وشطة حمرا وتقطع الطماطم مكعبات صغيرة وتضاف الي الخليط.. (يبقى زي السخينة عندنا كده) ..
التقديم:
يوضع الرز، ثم المكرونة والحمًص والعدس وتصب فيهم الدقًة..
وبالهنا والشفا..
|
Post: #73
Title: Re: مــاســيــنــجــر عــلــى الــهــواء..
Author: elsharief
Date: 06-28-2004, 04:32 AM
Parent: #1
الأخوات والأخوه راوية ورجاء وكمال عباس وايهاب يسأل منكم الخير ووصلنا بخير
كمال وايهاب سوف اكتب لكم بالتفصيل عن طريق الأيميل
ماسنجر الى خريجى وطلبة الهند
لماذا الغياب عن بوست التواصل
ماسنجر الى بورداب الرياض
اين الأخوه
اسماعيل وراق, بن بن, الصادق خليفة, المأمون خضر
|
Post: #75
Title: Re: مــاســيــنــجــر عــلــى الــهــواء..
Author: أبو ساندرا
Date: 06-28-2004, 10:59 AM
Parent: #1
رجاء
فكرة خطيرة وتحايل ذكي وفعلآ كنت محتاج لعدد من الماسينجرات ، حا أنزل منها ، والباقي محاكاة للفقيد العزيز ماسينجر البورد
ماسينجر إلى عادل عبدالعاطي :
كيفك ، توقع إتصال هام اليوم من الإستاذ معاوية الزبير زميل المنبر الحر ومدير تحرير في قناة الجزيرة ، بتوصية منا
ماسينجر غلى ماهيتاب :
لسه مزنوقة في الإمتحانات ، راجعي إيميلك وردي ، وأقرصي أمك في أي حتة عشان تصحى معانا، يا بت إمتحانات ولا حبكانات!
مسينجر إلى صديق الموج :{ ده خيالي }
صاحبك { ال########} ده أحسن يعمل حسابو ويبطل { العلقنه} البيعمل فيها دي ، المرة الجاية ما بي تحت { بالمسينجر} حا أشوتو ليك عديل وبي فوق ،على رؤس الاشهاد ، بس إنت قنطرو لي ،لو ما إرعوى
مسينجر إلى علاء سنهوري:
وبعدين معاك ، لا رسالة منك ولا بوستآ يطمئن ،، أريتك تبقى طيب إنت أنا البي كلو هين ،،ياااخ سمعتو ولا شفتو
|
Post: #82
Title: Re: مــاســيــنــجــر عــلــى الــهــواء..
Author: Raja
Date: 06-28-2004, 02:03 PM
Parent: #75
العزيز متولي الشريف..
ألف حمد لله على سلامة طلتك..
وطبعا بوست التعريف والرحول واجب ..
الغالي أبو ساندرا واخواتها...
Quote: مسينجر إلى صديق الموج :{ ده خيالي }
صاحبك { ال########} ده أحسن يعمل حسابو ويبطل { العلقنه} البيعمل فيها دي ، المرة الجاية ما بي تحت { بالمسينجر} حا أشوتو ليك عديل وبي فوق ،على رؤس الاشهاد ، بس إنت قنطرو لي ،لو ما إرعوى |
أول مرة أعرفك شراني قدر ده ..
دي رسالة ولا شكلة ..؟
تمنياتنا لماهي بالتوفيق.. ونفتقد قلمها الندي..
|
Post: #76
Title: Re: مــاســيــنــجــر عــلــى الــهــواء..
Author: كبسيبة
Date: 06-28-2004, 12:20 PM
Parent: #1
كبسيبتي العزيزة ( خاص جداً)
فلتعلمي إني عشقت هذا المنبر لأجلك
عندما آتي ولا أجد اسمك بين الأسماء أكون ميتاً
فأنا دائماً في شوق إليك
أشتاق إليك ..شوق المغيب لقمره المنير.
حبك يتغلغل في أوصالي و يتأصل في أعماقي مع كل فجر جديد.
يسافر إليك على أجنحة النسيم العليل , يقبل وجنتيك بلطف رقيق و حنو رهيف.
أنا هنا في غربتي بعيدة المسافات أشعر بقربك و أحس بدفئك الحميم.
أراك أمامي كلما استيقظ صباحي من جديد و كلما نام ليلي و غاب في الأفق البعيد.
أحبك .. أحبك .. يا أمسي و حاضري و مسقبلي الرغيد.
سأحطم المسافات و سأغتال الآنات والآهات لأعود إليك من غربة الآلام و السجن الرهيب
لأرتمي في أحضانك كطفل شريد
لأسمع نغمات صوتك العذب و أنجو من صمت مقيت
لأكحل عيناي برؤية وجهك الجميل البريء
فأنا أحبك بكل ما يحمل الحب من معنى
ليتك كبسيبتي تحسين بي
راسليني عبر المسنجر
|
Post: #77
Title: Re: مــاســيــنــجــر عــلــى الــهــواء..
Author: ازرق
Date: 06-28-2004, 12:44 PM
Parent: #76
رجاء العباسى
سلامات
سؤال عاوز اسألك ليهو من زماااان , وقد يكون طرح عليك ,
الشاعر محمد سعيد العباسى بتربطك بيهو اى علاقة ؟ لانه قد يكون
فى سؤال تانى لو الرد كان بالايجاب..
مع تحياتى وودى
|
Post: #78
Title: Re: مــاســيــنــجــر عــلــى الــهــواء..
Author: ازرق
Date: 06-28-2004, 12:49 PM
Parent: #76
رجاء العباسى
سلامات
سؤال عاوز اسألك ليهو من زماااان , وقد يكون طرح عليك ,
الشاعر محمد سعيد العباسى بتربطك بيهو اى علاقة ؟ لانه قد يكون
فى سؤال تانى لو الرد كان بالايجاب..
مع تحياتى وودى
|
Post: #83
Title: Re: مــاســيــنــجــر عــلــى الــهــواء..
Author: Raja
Date: 06-28-2004, 02:12 PM
Parent: #78
كبسيبة الوسيم..
عاد كبسيبتك كما ردت على الكلام السمح ده تكون اتلومت غايتو ..
آآدي قعدة في انتظار الرد ..
العزيز أزرق..
سلام وتحية..
العباسي التي أحملها في إسمي هي لقب اكتسبه جدي لأبي محمد الأمين الذي كان أستاذا في الأزهر ثم أندونيسيا.. وهي تعريف أكثر به..
للأسف لا تربطنا صلة بالشاعر الكبير محمد سعيد العباسي الذي نشرف بالانتماء لأمثاله ونسله..
هم من السروراب.. ونحن من المحمية غرب..
ويسرني معرفتك ان كنت من أسرة الشاعر الكريم.. فقد تكونت لنا وعلى مدار السنوات صداقات بهذه الأسرة بسبب الإسم..
ودمت..
|
Post: #84
Title: Re: مــاســيــنــجــر عــلــى الــهــواء..
Author: Elkalakla_sanga3at
Date: 06-28-2004, 02:40 PM
Parent: #83
سسلام اها قولتي كداء طيب هاك
[email protected]
|
Post: #85
Title: Re: مــاســيــنــجــر عــلــى الــهــواء..
Author: Ahmed Al Bashir
Date: 06-28-2004, 02:59 PM
Parent: #1
الاحت رجاء
شكرا على الفكره الظريفه دى
بمناسبة القاهره. واحد من الناس البسال عن اخبارهم هو الاستاذ الرائع سامى سالم. اين هو الان؟
و بعدين احملك السلام امانه لعمنا على التوم و الواحد بالجد متلوم معاه.
احوك احمد عبد الرحمن البشير
|
Post: #86
Title: Re: مــاســيــنــجــر عــلــى الــهــواء..
Author: Raja
Date: 06-28-2004, 03:13 PM
Parent: #85
العزيز أحمد البشير..
سلام وتحية..
الزميل سامي سالم غادر القاهرة منذ 5 سنوات تقريبا.. وهو يعيش الآن في كندا.. ويمكن يحيي فضل الله او اي زميل آخر في كندا يفيد بمكانه بالتحديد..
وسلام العم علي وصله..
ودمت..
بهاء..
سلام يا خصمنا الكروي يوم الأربع..
أرسلت لك بالفعل الآن..
|
Post: #87
Title: Re: مــاســيــنــجــر عــلــى الــهــواء..
Author: بت القبايل
Date: 06-28-2004, 04:42 PM
Parent: #1
بيت العباسى الحبيبة كما عاهدناك شجرة الضل ورح الكل عزيزتى رجاء اتمنى التوصل معك هذا من اصلك ضرورى يارجوية زيارتنا فى الامارات كمان على حسابى كلام رجال انت على العين و الراس اود منك طلب رقمك التلفون على الايميل [email protected]
ودامت المحبة والاخاء بيننا يارجوية طبعا الماسينجر على الهواء مباشر تحياتى لرواية وكل العقد الفريد
بت القبايل
|
Post: #88
Title: Re: مــاســيــنــجــر عــلــى الــهــواء..
Author: Raja
Date: 06-28-2004, 04:59 PM
Parent: #87
الحبيبة بت القبايل..
سلام وود..
السعادة والشرف من نصيبي لمعرفتك والتواصل معك..
أرسلت لك الآن رسالة..
|
Post: #89
Title: Re: مــاســيــنــجــر عــلــى الــهــواء..
Author: abdalla BABIKER
Date: 06-28-2004, 05:09 PM
Parent: #1
الاخت العزيزة رجاء بنت المحميه
سلامي وتحياتي
اتمنى التواصل
وشكرا لبناء بيت داخل بيت بكري الجديد والفكرة رائعة
وتحياتي
|
Post: #90
Title: Re: مــاســيــنــجــر عــلــى الــهــواء..
Author: ايهاب
Date: 06-28-2004, 05:55 PM
Parent: #89
رجاء العزيزه شكرا على التضامن المسنجري
مساءتك كما تشتهي
ماسنجر رقم 10
العزيز الشريف نحن في الانتظار
ماسنجر رقم 11
بت قضيم تاني ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ماسنجر رقم 12
الشفيف الباسم مامون خضر وين الحي بيك اخباركم مقطوعه
ماسنجر رقم 13
الابنوسي تبلدي
نشتـــــــــــــــــــــاقك و نسال عنك
|
Post: #91
Title: Re: مــاســيــنــجــر عــلــى الــهــواء..
Author: ايهاب
Date: 06-28-2004, 05:57 PM
Parent: #90
ماسنجر رقم 14
العزيز ابو ساندرا
ابحث عن بوست زيكو وهوازن غطس وين
كل الود والتحايا
|
Post: #92
Title: Re: مــاســيــنــجــر عــلــى الــهــواء..
Author: smilewomen
Date: 06-28-2004, 06:43 PM
Parent: #1
الغاليه رجاء
ألف شكر ليك على الاستجابه السريعه
وحاجرب أعملوا
وسنعلمكم بالنتيجه
مع حبى وامتنانى
|
Post: #93
Title: Re: مــاســيــنــجــر عــلــى الــهــواء..
Author: اسامة الخاتم
Date: 06-28-2004, 07:43 PM
Parent: #1
احم احم.......
|
Post: #98
Title: Re: مــاســيــنــجــر عــلــى الــهــواء..
Author: Raja
Date: 06-29-2004, 03:34 PM
Parent: #93
قريبنا العزيز عبدالله بابكر..
تسلم يا ذوق.. نحنا قلنا مادام المسينجر مشى نجيب واحد محلي ..
الغالي أسامة..
أحم ساكت..؟
والله خجلانة منكم جنس خجل..
|
Post: #94
Title: Re: مــاســيــنــجــر عــلــى الــهــواء..
Author: Raja
Date: 06-28-2004, 09:10 PM
Parent: #1
مسينجر مخصوص للصديقة والحبيبة لنا العباسي.. لنا مهدي..
اتمنى ان تكوني مستمتعة باجازتك في البلد.. وكمًلتي الواجب كلو.. وحتتطرينا عشان بجد افتقدناك..
تحياني للوالد والوالدة.. ولكل ناس حيًكم..
|
Post: #95
Title: Re: مــاســيــنــجــر عــلــى الــهــواء..
Author: د.كرار التهامي
Date: 06-29-2004, 01:15 AM
Parent: #94
الاخت الكريمة رجاء
تحية طيبة
اشكرك على سؤالك عن الغائبين وكل الاحباء الذين انزوا بعيدا عن البورد كل بسببه,, كما اشكرك على وجه الخصوص على تلطفك بالسؤال عنى فى ذلك البوست ...وكتر خيرك بتفقدى الناس ,,كنت بالامس فى مجلس ضم الدكتور الباقر الذى ذكرك بكل الخير ويقريك السلام,,اما الغياب الطوعى من هذه المدينة(البورد)فسببه هذه الدنيا التى ليس لها اول ولا آخر وكلما اشرع فى الكتابة يداهمنى الوقت و تأسرنى الاولويات ولكنى على موعد مع اجازة طويلة ستتوزع بين كندا والسودان و البورد ... مع ذلك اكتب القليل هنا وهناك واقرا ماتيسر فى هذا البورد بين الحين والاخر لتقر عينى بمساهمات ابناء الوطن فى السمح والشين......تحياتى لكل الذين كانوا لطفاء مثلك فسالوا وتفقدوا الغياب واخص منهم عمر الماحى وسيف الدين ود الجريف واخرين فى القلب
لك الودوللجميع الا حترام والتقدير
|
Post: #97
Title: Re: مــاســيــنــجــر عــلــى الــهــواء..
Author: Raja
Date: 06-29-2004, 01:26 PM
Parent: #95
الفاضل د. كرار التهامي..
ألف حمد لله على سلامة طلتك..
وحقيقة افتقدنا وجودك معنا.. ولم يكن السؤال عنك في ذلك البوست إلا أضعف الإيمان، مثلما يقولون، مع التمنيات لك بإجازة هانئة مع مواصلة الطلة علينا من حين قريب لآخر أقرب..
تحياتي عبرك للدكتور الباقر..
ودام الود..
|
Post: #96
Title: Re: مــاســيــنــجــر عــلــى الــهــواء..
Author: أبو ساندرا
Date: 06-29-2004, 09:30 AM
Parent: #1
رجاء العزيزة ،
أخوك لا شراني ولا شرامي ، مسالم وحنين ، لكن بالطبع لم يفوتك القصد ، فالماسينجى عج بهذا النوع من الحدة او ما سميتيها الشرانية ،ووردت فيه لغة وعبارات غير مقبولة في سياق التعامل مع الناس ، يمكن ان نتعاطاها ضمن رؤية إبداعية ، نص روائي مثلآ ، وعن نفسي التي لا أرغب في تزكيتها ، تجنبت هذه الطريقة وتنكبت ذاك الطريق المعفر بما يزكم الأنوف ، فعفوآ وعذرآ للعبارتين المشطوبة والأنكى منها التي لم تشطب ، وعذرآ للصديق ، صديق الموج الذي أعرف موقفه من { الدقداق} أي الماسينجر
العزيز ايهاب
مثلكأسال عن البوست المفقود ، وياريت بت الحسين ترفعو لينا
يا رجاء شكرآ على التحايا وماهيتاب طالعة لتوها من الإمتحانات ولكنها عالقة مع كورس سوداتل ، ومثلك ننتظرها بشوق السنين وأعرف ان لديها الكثير المفيد
|
Post: #102
Title: Re: مــاســيــنــجــر عــلــى الــهــواء..
Author: Raja
Date: 06-30-2004, 02:48 PM
Parent: #101
راكوبة العزيز..
مسينجر نمرة واحد: شكرا للغنية الحلوة..
مسينجر نمرة اتنين: ان شاء الله الليلة هولندا تمشي خطوة زيادة كمان.. يا حاسد ..
مسينجر لراوية.. وييينك.. خير ان شا الله..
|
Post: #103
Title: Re: مــاســيــنــجــر عــلــى الــهــواء..
Author: kamalabas
Date: 06-30-2004, 03:08 PM
Parent: #1
سؤال للأخوة بأمريكا
أخبار نتائج اللوتري الأمريكي لهذا العام أيه؟
كمال
|
Post: #104
Title: Re: مــاســيــنــجــر عــلــى الــهــواء..
Author: Raja
Date: 07-01-2004, 02:38 PM
Parent: #1
مسينجر على الهواء لـ:
- راكوبة.. خلاص ارتحتا.. أهي هولندا طلعت  ..
|
Post: #105
Title: Re: مــاســيــنــجــر عــلــى الــهــواء..
Author: مراويد
Date: 07-01-2004, 02:42 PM
Parent: #1
هولندا بس الطلعت؟؟؟
روحنا و نفسنا زاتا طلعت
طماااااااااام شديد يا رجاء
|
Post: #106
Title: Re: مــاســيــنــجــر عــلــى الــهــواء..
Author: Raja
Date: 07-01-2004, 02:53 PM
Parent: #105
مراويد ازيك..
زماااان قالو:
العمل العظيم يتطلب ألم وجهد عظيمين..
تحية ليك في كلمة تكتبها..
|
Post: #107
Title: Re: مــاســيــنــجــر عــلــى الــهــواء..
Author: zumrawi
Date: 07-01-2004, 04:13 PM
Parent: #1
العزيزة رجاء
الرجاء ارسال رقم تلفونك فى ايميلى
موجود فى البروفايل
|
Post: #108
Title: Re: مــاســيــنــجــر عــلــى الــهــواء..
Author: Raja
Date: 07-01-2004, 08:55 PM
Parent: #107
زمراوي العزيز..
سلام..
ارسلت لك منذ قليل..
تحياتي وفي الانتظار..
رجاء
|
Post: #109
Title: Re: مــاســيــنــجــر عــلــى الــهــواء..
Author: Nada Amin
Date: 07-01-2004, 09:00 PM
Parent: #1
رجاء الغالية و كل ناس الماسنجرات "الهوائية"، كيف تمام؟
و يا كمال عباس كلنا بنسأل عن أخبار نتائج اللوتري، كل سنة خيبة أمل، السنه دي الحاصل شنو؟ أخدونا و لا فطونا؟ باين الأخيرة الحاصلة.
|
Post: #110
Title: Re: مــاســيــنــجــر عــلــى الــهــواء..
Author: bint_alahfad
Date: 07-01-2004, 09:04 PM
Parent: #109
ماسنجر خاص لبنات العباسى
ما عيب عليكم صحبتكم تتخرج وما تقولو ليها حتى مبروك؟؟؟
يعنى مستكترين الكلمه ده عليها
بجد انا زعلانه
وفى امان الله
لا اله الا الله
|
Post: #112
Title: Re: مــاســيــنــجــر عــلــى الــهــواء..
Author: Raja
Date: 07-01-2004, 09:36 PM
Parent: #110
الحبيبة بوني..
عارفة روحي متلومة معاك..
سأهاتفك بكرة بعد الغدا.. بتاعنا ما بتاعكم..
مبرووووووووووووووووووووك يا زينة..
|
Post: #111
Title: Re: مــاســيــنــجــر عــلــى الــهــواء..
Author: kamalabas
Date: 07-01-2004, 09:20 PM
Parent: #1
الله أعلم يا أستاذة ندي أمين لاخبر حتي اللحظة عن نتائج اللوتري
أتمني لك التوفيق .هذه المرة
كمال
|
Post: #113
Title: Re: مــاســيــنــجــر عــلــى الــهــواء..
Author: Raja
Date: 07-01-2004, 09:48 PM
Parent: #111
الحبيبة ندى امين..
ويييييييينك يا غالية..؟
لا لا ما تقولي، عرفتا.. حال المنبر .. معليش كلو لنهاية باذن الله..
العزيز كمال..
ما قلت لي اللوتري عندك فيهو منو ..؟
|
Post: #115
Title: Re: مــاســيــنــجــر عــلــى الــهــواء..
Author: Elkalakla_sanga3at
Date: 07-01-2004, 09:55 PM
Parent: #111
سسسسلام. اها يا رجاء وصلنا لمبارة الفاينل
بسسسسس جنس ازعاج صديقي قال ما داير انتصارهم
عشان جنس داء طبعا بقصد الازعاج
بهاء اثيناء ت 00306947760013
|
Post: #114
Title: Re: مــاســيــنــجــر عــلــى الــهــواء..
Author: مراويد
Date: 07-01-2004, 09:55 PM
Parent: #1
يا جماعه ما تشوفو لينا طريقه فى اللوترى ده، انحنا نقعد فى حفرتنا دى لى متين؟؟
|
Post: #116
Title: Re: مــاســيــنــجــر عــلــى الــهــواء..
Author: zumrawi
Date: 07-01-2004, 10:25 PM
Parent: #1
العزيزة
تسالينى بالنبى نوح
رسالتك ماوصلتنى لسه قلبت الايميل فوق
تحت ماجات
|
Post: #117
Title: Re: مــاســيــنــجــر عــلــى الــهــواء..
Author: zumrawi
Date: 07-01-2004, 10:28 PM
Parent: #1
السهيلى
عليك الله بسرعة رسل لى تلفونك فى البوست ده او فى الايميل
[email protected] انا فى شيكاغو
|
Post: #118
Title: Re: مــاســيــنــجــر عــلــى الــهــواء..
Author: Raja
Date: 07-01-2004, 10:34 PM
Parent: #117
ياسر..
انت كاتب بس ايميل الياهو.. هسع جيت الهوت ميل..
اوكي حأرسل ليك مرة تانية في الهوت ميل..
|
Post: #119
Title: Re: مــاســيــنــجــر عــلــى الــهــواء..
Author: zumrawi
Date: 07-01-2004, 10:37 PM
Parent: #1
معليش ياعزيزة
قايل نفسي كاتب ايميل الهتميل فى البروفايل
حاجك الايميلين وتسلمى
|
Post: #120
Title: Re: مــاســيــنــجــر عــلــى الــهــواء..
Author: Rawia
Date: 07-02-2004, 01:02 PM
Parent: #119
الغاليات
تيتا. ندى امين. وبونى .ورجاء
تحيه وود وسلام
وشكرا على السؤال
بونى نجاحك فرحنى حاولت الاتصال لكن زى المره الفاتت فرصتى اكبر فى المحاوله فى الويكند
|
Post: #121
Title: Re: مــاســيــنــجــر عــلــى الــهــواء..
Author: Raja
Date: 07-07-2004, 07:09 AM
Parent: #1
مسينجر على الهوا للعزيز عبدالرحيم ابا يزيد..
الرجاء مقابلتي مساء علي الهوت ميل.. للأهمية..
لأهل الشمار: المودوع خاااااس ..
|
Post: #123
Title: Re: مــاســيــنــجــر عــلــى الــهــواء..
Author: ابو جهينة
Date: 12-15-2004, 10:43 PM
Parent: #1
بمناسبة عودة الماسينجر
و أهديها إلى الأخت راوية في بتسبيرج و إلى كل الأخوات المغتربات
|
Post: #124
Title: Re: مــاســيــنــجــر عــلــى الــهــواء..
Author: Rawia
Date: 12-16-2004, 07:01 AM
Parent: #123
الاخت راويه فعلا سعيده جدا بهذا الاهداء
وتتمنى لكم كرسماس سعيد وراس سنه اجمل
وتطمع في مكالمه تلفونيه طويله المدى
|
Post: #125
Title: Re: مــاســيــنــجــر عــلــى الــهــواء..
Author: Napta king
Date: 12-18-2004, 05:05 AM
Parent: #1
up
|
|
