تضامنوا لإطلاق سراح قرشو

الأخ والزميل القديم قدم هذا المنبر وشيخ الأعضاء وعميدهم ودفعة الزميل الموصلي وديك الجن والدكتور أبكر آدم إسماعيل وشيري وبت قضيم والجندرية وآخرين منهم من إختفى ورحل دون أن يترك أثر ومنهم من ينتظر ، حال بينه وبين منبرنا العامر هذا مشكلة تقنية أو قل technical لا فرق ، لقد فقد أخينا وصديقنا قرشو باسوورده وإستعان بكل الباسات والويردات إلتي طالتها ذاكرته التي شاخت بفعل الزمن والغربة والشوق والحنين إلى أن كادت تطرحه الورده – متعه الله بالصحة والعافية - ، لذا فكر وقدر وعبس وبسر ونظر وحاشا لله لم يتكبر كالعهد به بسيطاً متواضعاً في غير ذل ، وفتش كثيراً عن الباسوورد مستعينا في ذلك بكل ما أؤتي من قوة وحكمة ونظره وبسمه ولم تنجح محاولاته ففي كل مره كان يأتيه الرد ، عفواً هذا الباسوورد مرفوع من الخدمة مؤقتاً يرجى محاولة الدخول في وقت لاحق – أو أن الباسوورد الذي إستخدمته غير صحيح please check and try again وقبل أن يحاول أن يجب على هذا الذي يخاطبه من وراء حجاب يأتيه الرد – هذه رسالة مسجلة – أخيراً هداه تفكيره ، وحليل الكان بيهدي الغير ، إلى أن يخاطب صاحب المنبر الأخ/ بكري أبوبكر مباشرة ليسهل له إعادة الباسوورد حتى يتمكن من الدخول والخروج في الشبكات الإلكترونية والعادية ويتجول في طرقات المنبر الحر بجلاله ووقاره وعصاه العسكرية ومركوبه الفاشري الأصلي ، ذلك لأن الأخ قرشو رجل حقاني يؤمن بمبدأ ائتوا البيوت والمنابر من لوق إناتها – نسبة إلى - log-in - لكن يبدو أن عمدتنا قرشو وقعت عليه حكاية إيميلاتي البوديها تقول لا بتمشي لا حاجه ، ووديت ليهو الميل بالليل والإيميل مشى وما جاء – مع شديد الإعتزار وعظيم الإعتزاز بهرم الغناء السوداني المبدع محمد وردي متعه الله بالصحة والعافية – فهلا تضافرت جهود الزملاء وفي مقدمتهم أخونا بكري أبوبكر في إعطاء عمدتنا قرشو حريته وإطلاق كيبورده ليعود مغرداً كسابق عهده.

متضامنه مع قرشو



ويا كيبوردات العالم اتحدوا

راوية كالعهد بك سباقة للخير وفي الخير وفعل الخير يا وجه الخير. ولا غرابة في تضامنك مع قرشو والتضامن سوا ليهو وزارة وبدوهو جماعه بي دكان خدار وجزاره وعملو فيهو web site ومزرعه وقشاره.

عزيز سأل عن عزيز .. شكراً أخي الملاعمر

متضامنين وإنتو متين تجونا .. سهرانين والليل طال علينا ..

رحم الله الراجل النعام آدم ..

جاد

اتضامن

واتضامن

واتضامن

واتضامن

من هنا لى حنتوب


ده قرشو العزيز ياخ

لن نتضامن فقط..بل نصر ونطالب الأخ بكري..بحل المشكلة خلال الأربعة والعشرون ساعة القادمة..فضلا لا أمرا..فقرشو قمة لا يجب تجاهلها

الزاكي

وأنت أيضاً قمة يا نيل شكرا

عمنا الغالى قرشو
نفتقد يراعك والله بشده نقف ونشد من ازرك واى حاجه
ولا الضبح بالله مستعدين نسحب الجنود بتاعتنا من البورد
وكل شئ عشانك اهووون يا عمنا

SAdo7
كل شئ ولا سحب الجنود أو الإنسحاب ، يا أخي حياتنا كلها بقت إنسحاب في الكورة منسحبين ومن العسكر منسحبين ومن جيوبنا منسحبين في المواصلات العامة لذلك لا إنسحاب بعد اليوم.
ويا بكري شوف ليك فرقه صغيرة لي باسوورد قرشو من خلال الباندوثات.

محبة فيه
وشوقاً اليه
ولأنه كان يريد أن يشتري مني قطعة ارض
وحتى اعرف كل الحاصل
بإمكاني أن أسلفه الباسوووووورد الخاص بي
بس لمدة اسبوع
نحن مش في السودان بنشحد من بعض
يعني الواحدة مرات بتقول ليك
عليكم الله أدوني المفراكة حقتكم دي وبرجعها ليكم
ليش نحن الواحد ما يدي الباسوووووورد حقتو دي ويرجعوها ليهو
كمان برضو اسأل عمو قرجة
لأني شايفو برضو لحق عمك قرشو
أنا أول شيء قلت يمكن بكري أحالهم للمعاش
لكن ترا الحكاية تكنيكال

أب حراز هوي فلسفة من صلي أو صام لأمر كان يدركه دي ما بتنفع معانا عشان الراجل داير يشتري منك قطعة أرض تقوم تتضامن معاهو والحمد لله إنو البيعه لم تتم لأنو إتضح إنك بايعها لي ثلاثة قبل قرشو ودى أرض سكنيه ولا أرض معركة ، وإنت قالو – يكفينا شر القواله – إنك كنت قون قريتكم وبعت المباراة لي القرية المجاورة لكم وعملتها ظاهرة فما دايرين تضامنك يلا شتت وكمل كتابك بتاع ست النفر بي سرعه وأطرحه في السوق لأنو ما زال في جزلاني بقية من الدينارات والتي أدخرها لشراء روايتك بس ما تستغل الموقف وتطبع في كل نسخه إهداء مختلف ، أنا عارفك رجل إستغلالي ومولود عند إستقلال السودان

أخي دريمز أيها الحلم السماوي الجميل شكراً لهذا التضامن ، أنا غايتو حا أنتظر لغاية يوم الأحد القادم بإعتبار أنه بطالة الإنجليز – إن شاء الله يطيروا من كأس الأمم الأوروبية كما طارت روسيا وأسبانيا – عمو قرشو رجع رجع ما رجع حا أديهو باسووردي ويا سودانيز أون لاين ما دخلك شر.

الأخ جاد
جادك الغيث إذا الغيث همى يا زمان الوصل بالأندلس
لم يكن وصلك إلا حلماً في الكرى أو خلسة المختلس
شكراً للإطلاله وشكراً للتضامن

و الله يا ملا عمر وقفت قلبنا
قلنا العمدة معتقل ولا الحاصل شنو؟
طلعت الحكاية غير
كان كدة متضامنيييييييييين
و نياية عن كل بورداب جدة

يا فالكون كرست يعني بالله في إعتقال أكتر من كده ، يعني لازم تشوف قرشو في الـ CNN ولا قاعدة غوانتنامو بخليج البنغال ولا خليج ما عارف إيه كده ،كل ذنب الأخ قرشو إنو دقس وضيع الباسوورد تقوموا تفتحوا ليهو كلكم

نبصم ونتضامن مع الرجل العفيف الشريف عمدتنا
ولو بينفع نتنازل ليه عن الباسورد حقتى
بس نشووووووووووفووووووووووووووو

موقف غير مستغرب منك يا دكتورة ونكران ذات جميل وليس نكران للجميل زي ناس أب حراز - ويا ناس هذا بيان للناس

تيت .. تيت .. قرشو حديد ..

حميده يا أخوي قرشو ده من الرعيل الأول ولمن بدأت عضويته في المنبر ده كان الماوس بيشلوا تلاته وعشان تعمل كليك صغييير داير ليك 4 عتاوله غلاظ شداد تقول لي قال

والله العمدة قرشو من الناس الليهم وحشة اذا غابوا عنك .نأمل ان نراه قريبا.

نرجوا فك الحصار والا ؟

وياعمدة وين اراضيك ولا نسيتنا ؟


علي احمد

أخي على ود أحمد بحق البوستات والإيميلات والمنبر الحر بلاش كلمة ولا ... دي تضامنوا مع قرشو سليماً أو تبرعوا لترعة كنانه والرهد أو شريان الشمال أو قرية العيكورة أو مرشحكم رمز الشجرة
شكراً دقنه لهذا التضامن العربي

الطاهر يا اخوي تضامنك يعني مرخي شوية أنا عاوز تضامن قوي يعني حاجة كده زي نايل بور الأسد النتر. سلمت يا سيدي للطله

يا ملا

الزي العمده قرشو دا...نديه باسويردنا

غتاس...وبعد داك نتضامن معاه كان في حرّايه
كان في زيف وسقط...ولافتاتنا متلببنها اتنين

وفيها...

Engn. Bakri

No seperation 4 one nation
Gorasho Gorasho back to station

نطالب بعودة باسوورد قرشو...وبوستاتو وماسنجراتو من سنة48

أخي الكريم نزار حسين
تضامنك وصل ورقم الحساب هو 339822/1 بنك دكان حاج فضل تقاطع شارع الشنقيطي بأمدرمان مع شارع المعونة بالخرطوم بحري والدفع باليورو في الخرطوم وود دورو وبرضو ما تناسنا من صالح الدعاء وكده يعني بالعربي حقي ما تودرو والدال على الخير كفاعله

الملا عمر
فى الاول مضامن معاك ميه فىالميه
قرشو هرم فى البورد فنحن فى انتظاره
تحياتى

انا متضامن ونص...مع قرشو

وانا نص يا سجيمان مع قرشو
الملا عمر مسئول من الخير : العمده ده قرش شنو؟؟

مراويد
شكرا لتضامنكم
يقولون والعهد على الرواي والذي هو عادة مبني للمجهول أو مصدر رفض ذكر إسمه أن قرشو كان مغرماً بقرش ومصمصة أضلع العتان – جمع عتوت سالم – أيام أن كانت سرعةالعتوت تفوق سرعة الركشة وتضاهي سرعة الصوت ، ونكتفي بهذا القدر من التوضيح ، حتى لا يتجرأ أحدكم ويفاجئني بسؤال عن المناسبة أو المكان الذي يقرش فيه قرشو عظام العتوت المقروش وعندها لن أتجرأ على الرد على السؤال وأقف مشدوهاً كالذي يسبح في إتجاه سمكة من أسماك القرش.

كدى خليوه يجرب الان


قرشو user id

***** password


ولك ودى

أخي أب قوته
أولاً شكراً لظهوركم العلني في هذا البوست ، ثانياً الشكر كل الشكر لأهالي قرية أبو قوته وأب لعوته وأب كريك في اللجج وأب فرار في النهار الحار. ثالثاً أهدي سلامي للأهل بمنطقة شلعوها الصهاينه بوادي عربه وأقول لك التسوي كريت في البوست تلقاهو في باسووردها. أنا وخلاص البقت علي بقت يعني ممكن ألحق أخونا العمده قرشو بي باسووردي ما أقدر أدخل يعني يغيروا الكالون وكده أها عندها سوف أغني من كلماتي وألحاني طبعاً:
بوستي السبب لي أذايا ، أها إنت حا تغني وتقول شنو لو باسووردك ضاعت أو غيروا كالون الباب

سجيمان شكرا لتضامنكم وقرية العيكوره تحذر أمريكا للمرة الأخيرة

بلدي يا حبوب وإنت هرم في الجيزة أقصد هرم في السلطه وتضامنكم أثلج صدورنا بس لغاية هسع لم يتم إطلاق سراح عمدتنا الغائب قرشو ، إتصل الآن ولا تترد رضاؤكم هو هدفنا

I cannot write Arabic now

So I did a copy and paste from Sijeiman

انا متضامن ونص...مع قرشو

Dr. Yasir Elsharif
I can read English sometimes so as you can see the problem is not that big man whether your write in English or in Urdu
شكراً لتضامنك مع عزيزنا العمده قرشو ، بس بالله عليك يا دكتور وبيني وبينك وبقية الأعضاء والزوار تفكيريك ما مشى بعيد وقلت قرشو مسكوهو الجماعه لأنو شكو في إنو من الجماعه.
شكراً لك مرة أخرى يا دكتور ، وربنا يفك أخونا قرشو ويرجع ليه باسووردو وقالو الحجيج قطع

Dear Mulla OmerSalamat ya Ameer Almumineen bihuqouq Qarashu

Of course I know that you can read English but I was not known to write in English, so why now? I wanted to explain, why. That is all ya man.

Quote: بس بالله عليك يا دكتور وبيني وبينك وبقية الأعضاء والزوار تفكيريك ما مشى بعيد وقلت قرشو مسكوهو الجماعه لأنو شكو في إنو من الجماعه.

To be honest with you: the suspicion crossed my mind. I know that many of the Sudanese in KSA are devout Muslims who go the mosque regularly and may have friendships with people like the Qaida activists without knowing thei reality. Yesterday I read Aguguta telling that he was in Almalza, where the shooting in Riyad took place.
A couple of years or so ago one of my friends, a Republican, was arrested in Yemen because he was suspected to have links with alqaida, do you believe? It turned out to be that certain groups were targetting another non Alqaida tribesman for certain reasons but they accused him of links with Alqaida and so they arrested his friend, Ahmed accordingly. At last he was expelled from Yemen, thanks Allah, after some monthes in prison.

Stay well

Yasir

أخي دكتور ياسر
بالله هو الشيخ قرشو في السعودية يستاهل إن شاء الله بعد ما ضاعت باسوورده تضيع إقامته ويوطنوا وظيفته عشان يرجع لي مدني وحنتوب الجملية - بعدين القاعدة تقول مش المنظمة القاعدة في الواطه دي والله يا دكتور ياسر ده المقصود وقرشو لا له في القواعد ولا المحفوظات راجل ماشي جمب الحيط بحسب إفادة شهود عيان وبعدين قرشو مغترب في السعودية أها دي معلومه brand new أها يا دكتور لغتي دي بتشغلني في الخليج ولا مصنع النسيج - لك تحياتي وتقديري وإن شاء الل كي بوردك ينقلب عربي وفي العربي أهل عوض

العمدة قرشو شخصيا معتقل لدى سلطات التجاهل ؟
بكري : أمنحك ساعتين لإعطاء العمدة قرشو كامل حقوقه ورفع حالة الاعتقال عنه وإعادة العمودية إليه ، وإلا سوف ترى ،، والسلام ..

الملا عمر
يارائع
وقرشو باسفوردو
ضايع..
يارجل ياهميم...
ومن بنى تميم..
همك الليم..
وقرشو يجلس
فى شجرة النيم...
ومعاه بت قضيم

غنوتك سمحة

بس انا لو غيروا
الكالون
بنفخ البالون
وبقلب الماعون
وبكون كتير معيون
ياحبيبى ياحيزبون
انت دون الدون
وهاك منى عربون
بسمة وبياض سنون
قرشو اخوى كان هون
وغيابو طول سنون
الليلة وين يانون
يالساكنة العيلفون
الملا عمر
ياقمر
قاعد فى تورا بورا
ومخوف المعمورة
وينك ياسارة منصورة
اليلة هوى
ياليلة هوى
يابلالى الليل ليلى انا
وبكرى طلع من لومى انا
قرشو قالو جاء
البوستات طلعن سوا
والماجبو ياكل هوا

الغالى الملا عمر بركة الشوفة
كنت قد ارسلت للعزيز قرشو كلمه سر قبل اسبوع لكن الظاهر عندو ايميل جديد خلية يراسلنى على
[email protected]
لارسل له كلمة السر و شكرا للاهتمام

شكراً لك أخي بكري وأنا بصراحة ما عارف درب قرشو بي وين ولا في ياتو بلد من أرض الله الواسعة واحدين قالو شفنا الشافو ما شفتوهو يا خلاي ، ولكل الذي يعرفون عنوان قرشو أو إيميله أن يتكرموا مشكورين بنقل رسالة our administrator بكري أبو بكر حتى يعود باسوورد العمده قرشو. نداء أخير للعمده قرشو بالله عليك لو باسووردك رجع أكتبو في حيطة الجامع أو في ورقه وأحفر ليها في الركن عشان ما تتعبنا ونقوم نهرق وندلق كل هذه الباندوثات من أجل شوية حروف وأرقام ربما تسمىى إصطلاحاً باسوورد.
---
أها يا قرشو بوستك وصل لغاية 41 مداخلة ده بوست ولا البص السياحي بتاع الحلة الجديدة الإتنشل فيه أخونا حميدة

الحبيب الملا عمر تحياتي وتقديري
نطالب بشدة عودة العمدة قرشو وكل الطيور المهاجرة التي غابت طويلاً

أخو ي إبراهيم علي
[email protected]

الكرة في ملعب قرشو وعشان بمشي وبجينا الناس عملوها فينا يا ناس برانا والله يأذي الأذانا وتييت تايوتا تيت تيت تيت تايوتا وفي رواية أخرى سكروته والأولى عربيه أو fork lift والثانية جلابية تتكرفس لأتفه الأسباب.
وشكل عنوان إيميل أخونا بكري أبوبكر كان ما أخاف الكضب وتكون لغتي خانتني معناه بكري/ على إتصال يعني بالسودان بأقل الأسعار بس كوم الأخيرة دي ما عرفت تفسيره.

ولو عملنا بوست لي كل طائر مرتحل حا نحتاج لباندوثات أكثر من عدد السنوات الضوئية التي مرت على كوكب زحل

العزيز الملا عمر والجميع

نتضامن تماما مع العمدة قرشو

عادل

أخونا الحبيب عادل عبد العاطي شكرا على هذا التضامن فقد وصلت أصواتكم ونداءاتكم لأخونا بكري أبوبكر وقد تفضل مشكوراً بنشر عنوان بريده الإلكتروني وفي إنتظار رسالة من قرشو حتى يعيد إليه باسوورده ويعود لقرشو صوابه ويعود لمنتدانا رجل رائع بروعة قرشو.

المبدع ود قاسم اللابخاف ولا بتر
وعدت فأوفيت والباقي على عودة قرشو رسالة من حيث يقيم إلى إيميل أخونا بكري أبوبكر

هذا بريد قرشو يابكــــــــــــــــــرى

[email protected]
ولكم ودى

أخي بكري أبوبكر
خليني أستغل الفرصة أصلو أنا راجل إستغلالي أكثر من أبو حراز والذي ولد قبل إستغلال السودان وأنا ولدت فجر إستقلال جنوب أفريقيا بيوم وضحوه – والأخيرة يسأل عنها أهل العوض – فقد حدث أن كنت متسللاً ولم يراني رجل الخط لأنه كان سارحاً فأحرزت هدفاً من تسلل أيام أن كان التسلل يبدأ عند راية الكورنر ما علينا. نعود لموضوعي
دحين يا بكري يا أخوي أنا ما رسلت ليك صورتي مرتين متتاليتين وبرضو ما نشرتها عديل منك الكلام ده تنشر صور الناس كلها وصورتي أنا لا أرجو التوضيح قبل أن أفتح بوستاً آخر لهذا الموضوع.

العمده قرشو..
مكرر
الملا عمر ..
وتاني مكرر الملا عمر ..
نتضامن معكم في حملة توقيعاتكم لإطلاق صراح العمدة قرشو..
قف..
العمدة قرشو احد ( اعمدة ) البورد ( المولعة ) أربعو وعشرين ساعه
قف
العمدة قرشو.. (حريف) في إدارة الحوارات الهادفه بمهارة .. أحرف من زين الدين زيدان زاتوووووووو
قف
في انتظار عودتكم .. ( أضربوا ) بكيبوردات من مايكروسوفت
( ولمبه )
ترجع بالسلامة بترجع ايامناالجميلة..

نتضامن الشوية دي ؟
تعرف يا ملا يا اخوي
انا قبل يومين قربت اضبح
في زول عمل لي اضافة في ماسنجر الهوت ميل
مستخدم نفس توقيع اخونا قرشو الله يفك اسره ويرجعه لينا سالم غانم
طلع ماهو
وهو نان نحن سعيدين قدر دا لمن يضيفنا العمدة ؟

الحبيب المولاعمر المطلوب القبض عليه رسلها تانى و اكتب معها اسمك بس ابعدنا من الصورة البجيب لينا الريح ...اصلو كتابة كلمة الملا عمر دى هنا ساكت بتظهر عن الجماعة بهناك و حا يتابعوا نحن قاعدين نفول فى شنو!!!!!!!!!!!

تشكر يا بكري يا زعيم والأخيرة دي برضو بتجيب الهوا في هذا الزمن الغائم إلى غائم جزئي سوف تصلك يا سيدي قريباً وشكراً

شيخنا الملا عمر المحترم دبايوا

ده القدرن عليه والزعيم كتر خيروا استجاب فوريا ولو كان ماعمل كده كنا كلمن ليهو كوفي عنان شخصيا


علي احمد

اها ساجور كلمة الهنا ده فكه ولا لســــــــــــــه؟؟؟؟

يا فارس الحوبه اخونا بكري

بالله عليك فك اسر هذا الطائر الغريد وأعده لسربه فهو وتر يضيف التناغم للنشيد.. وفي انتظار العمده

الحبيب الملا عمر

دايما سباق

وحباب الغالي عمدة الدار

وياما كتبنا لامن فترنا حتى يعود

وبصراحة مقدمة البوست تحفة ادبية رائعة

طبعتها حتى استزيد منها في كتاباتي المتواضعة

وليك وحشة ياود المزاد وديوم بحري يا قديم

الملا عمر شكرا , والله يطراك بالخير
وتحياتنا للعمدة قرشو وان شاء الله بكري يرسل ليك بدل الواحدة اتنين

newbie
الشيخ قرجه
Noon3
ودأمي يا ناسي

شكراً لتضامنكم ووقوفكم المشرف بجانب أخونا العمده قرشو ، شكراً لبكري الذي أتاح لنا كل هذه الباندوثات للكتابة في شأن قرشو ، وشكراً لضياع باسوورد قرشو والتي أثبتت أصالة معدن السودانيين وتضامنهم ، نحن قادرون على النجاح لو وجدنا القائد الفعلي ، ولو تفتح عمل الشيطان وفي روايات أخر تفتح دكان إسبيرات أو قزازة كوكا كولا أيهما أسهل.
------
سؤال للأخ بكري أبوبكر وله الحق في أن يستعين بمن يشاء أو يحذف كل الإجابات إن أراد
السؤال هو: توقيعي مشي وين وبالتأكيد توقيعات جميع الأعضاء التي تذيل مقالاتهم.
-----------------------
حين يكون الحب كبيراً والمحبوبة قمرا لن يتحول هذا الحب لحزمة قش تأكلها النيران أها جابت ليها قش وغنم تاني يا حميده تك كر وهلم جرا

الوقور الملاعمر

تحياتي

في إنتظار قرشو الحبيب
و تشكر على حملة إعادته ..

أخي شيخ الكلام أبا جهينة
لقد تضامن الجميع وتعاطف الجميع وأخشي ما أخشاه أن يخذلني أو قل يخذلنا أخونا قرشو وتأخذه العزة بالإثم ويدفن دقن ولا يظهر متعللاً هذه المرة بالكمبيوتر أو إشتراك الإنترنت وبهذه الطريقة لن يكون أدخلنا في .... بل سنقلب السحر على الساحر ويدخل الوزه وهذا أمر لا طاقة لنا به. وأرجع أغني تاني من جديد
بوستي السبب لي أزايا

انا المحيرني كيف يتجرأ اخونا تمبس و ينزل اغنية قي بوست حق الملا عمر

بلاش مشاكل مع ناس تورا بورا

أظرف حاجه يا زول يا واحد إنو الأغنية بالعود يعني أغنية قعدات و get up stand up بس يا زول يا واحد برضو إنت أطلهع منها وهي تحلى ، ففي بوست سابق تفضل أخونا تمبس بإهدى أغنية من أغانيه الحلوة وأنا عندى كم كبير بتاع أغاني بس ما بعرف أنزلها عشان كده بسمعها لوحدى هنا بس النيه واصله أظن في الحالة دي ولا شنو يا شيخ قرشو

العزيز الغتيت فضيلة مولاي الملا عمر .......... قدس الله سره
والأحباب المتضامنين
أول حاجة خلوني أتضامن بأثر رجعي لأني لم أشهد الصيوان دا إلا الآن بعد أن لفت نظري إليه الحبيب شتات

ومسك الختام .. تكرم الآخ بكري وأرسل لي كلمة المرور وسأوصلها للحبيب قرشو في أقرب فرصة

تحياتي لكم ولآلكم وأصحابكم أجمعين

عاشت قرشو
وعاشت الشعب البوردي
وعاش البكري الإستجابتو المرة دي عايزالها خروووووف
ورجعوا ليهو قروشو أقصد باسووردو ونحن من خلفك ...