دكتورة بيان و دكتورة اماني ..امرأتان في شماخة الجبال

الاخت العزيزة الغالية دكتورة بيان
اولا عودا حميدا
اتابع كلما اسعفني الوقت بقراءة بوستاتك وتعقيبك على بوستات بعض الاعضاء
ويعجبني فيك حسن اختيار الكلمة ودقة مدلولاتها مما يدلل على ملكة قوية في التعبير والفهم الحاذق
واتابع يشقف كتاباتك في مقال الاخ دكتور ياسر عن كتاب موسم الهجرة الى الشمال
التي استفدت منها كثيرا
والله ان وجود امثالك في هذا المنتدى اثراء لنا نفخر به ونفخر بوجودنا بينكم

الاخت العزيزة الغالية دكتورة اماني
اولا احب ان ارحب بك وبوجودك القوي في هذا المنتدى
واعجبت كثيرا بردودك في مقالات شتى
فيا اهلا وسهلا بك وكلي ثقة بأن وجودك بيننا اضافة قوية للعقلانية ومقارعة الحجة بالحجة والكلمة بالكلمة.

الاختان العزيزتان
لي رجاء ارجو ان يجد صداه عندكما وهو :
ان لا تعطين هؤلاء الذين يحبون العيش في الظلمات "الظلاميين" كل هذا القت من جهدكن فهؤلاء لا يشكلون في معادلة القوى السياسية والاجتماعية السودانية ادنى رقم ولا حتى صفر صغير ام كبير
وبدلا من ذلك دعونا من علمكن ننهل
فانتما مثل كثير من النساء الائي هن في شماخة الجبال
مع تحياتي


_____


أتق الله حيث ما كنت واتبع السيئة الحسنة تمحها وخالق الناس بخلق حسن

الاخ الكريم فرانكلى
شكرا ليك ايها الكريم
واتمنى ان اكون عند حسن الظن

ولك فائق الاحترام

والله ان وجود امثالك في هذا المنتدى اثراء لنا نفخر به ونفخر بوجودنا بينكم
اااى والله كلامك فى محلو ياربى اعطيهم العافيه واضع لهم فى كل خطوه سلامه قادر يا كريم

اليومين دي في موضة بتاعت تلميع كيزان ولا شنو؟

دينق.

دنق امشي العب بعيد
انا ما فاضي ليك
انتهى


_____


أتق الله حيث ما كنت واتبع السيئة الحسنة تمحها وخالق الناس بخلق حسن

شوفتا يا روح ماما

بس الدور جانا فى التلميع
الاسبوعين الفاتو كان تلميع الجنوبين
وانتهت بطرد عائلة بحالها
اسع جا دورنا يلمعونا حبتين لكن لانك الجنوبى
الوحيد ما بيطردوك والا بقى البورد فلم هندى مافيهو عوير الفيلم
طبعا دورنا فى التلميع دا على خلفية السلام وخلاص الكيزان والجنوبين بقو سوى سوى
لازم يكون فى عدل اسبوعين ليكم واسبوعين لينا(البنود الخفية اسبوعين ليكم واسبوعين لينا فى سودانيزاونلاين)

فيفتى فيفتى ولا كيف كلام دى.؟
ولا حقنا يروح سمبلة( ساكت)

عندما رحلت عنا الأخت عربية سعودية
ولحقت بها الخالة رمانة
حسبت أن التفاحة في جبل مرة لم يعد طعمها كتفاح الشام
ومادام الأصل حواء فالأرض لم تعد جرداء
شكراً فرانكلي
غبت طويلاً ولكنك عدت مواكب

الاعزاء
وليد500
ايمو
ود.بيان
لكم الشكر
,اسأل الله ان نسخر جهدنا ووقتنا لما فيه فائدة الجميع


_____


أتق الله حيث ما كنت واتبع السيئة الحسنة تمحها وخالق الناس بخلق حسن

جزاك الله خيرا أخي فرانكلي ولا نزكي علي الله احدا، جعلنا الله قرة اعين لكم ولاهلينا، لانرجو منكم الله الا صادق الدعوات بان يلهمنا الله الصدق والهداية
كما انه قد قابلتني صعوبة في الكتابة بخط كبير او واضح ارجو ممن يمكنه المساعدة شرح الطريقة لي وجزاكم الله خيرا

شكرا كتير والله
تكريمك لي الثنائي دة
تكريم لينا كلنا

كتبت بيان:

بس الدور جانا فى التلميع
الاسبوعين الفاتو كان تلميع الجنوبين
وانتهت بطرد عائلة بحالها
اسع جا دورنا يلمعونا حبتين لكن لانك الجنوبى
الوحيد ما بيطردوك والا بقى البورد فلم هندى مافيهو عوير الفيلم
طبعا دورنا فى التلميع دا على خلفية السلام وخلاص الكيزان والجنوبين بقو سوى سوى
لازم يكون فى عدل اسبوعين ليكم واسبوعين لينا(البنود الخفية اسبوعين ليكم واسبوعين لينا فى سودانيزاونلاين)


بيان.

بدون لف ودواران. أنتي مضرودة من البورد ده كم مرة ومن البورد التاني بتاع معاز داك كم مرة لسوء السلوك؟ أجابة صريحة وواضحة لو سمحتي.

دينق.

شكرا للأخ فرانكلي على الروح الطيّبة، والحقّ أني معجب بكتاباته وتناوله الموضوعي للكثير من الأمور، المدح يلقي على الممدوحتين عبئا ثقيلا في التـاكيد لمن لم يقرأ لهما على استحقاقهما له، قرأت بعض مقالات ومداخلات الدكتورة بيان -ليس كلها- ورغم عدم تقاطع اهتماماتي واهتماماتها إلا أنّ لها مقدرات كتابيّة ومعرفيّة تمكنها من إضافة الكثير من المعرفة لأعضاء وزوار المنبر، وأذكر لها مواقفها القوية والمبدئية في التصدي لحملات هزّ الثوابت والقيم الإسلامية السمحة، أما الأخت أماني فهي وافدة جديدة يصعب الحكم على ملكاتها الفكرية في أيام معدودة وإن كنت أحمد لها شجاعة إبداء اتجاهها السياسي في منبر الاتجاه الواحد، وأهمس في أذنها بوجوب طول البال ورحابة الصدر والابتعاد قدر الإمكان عن مجاراة البعض في أسلوبهم المتواضع والقائم على "شخصنة" الامور وجر النقاشات الهادفة نحو هاوية السباب والتهجّم.
ولديّ طلب خاص لدكتورة بيان أتمنى أن تنظر له بعين الرضا وأكون لها شاكرا إن قبلته وهو أنّي أرجو منها -حادبا عليها- عدم الرد على الأخ دينق الذي أثبت بما لا يدع مجالا للشكّ حرصه على العودة بالمنبر لأيام مظلمة نحن كلنا في غنى عنها.
أحمد الريّـح

الابن احمد الريح
شكرا لك على كلامك الطيب
ولكن اعذرنى فى قبول رجائك بخصوص مستر دينق لانى ارى انه صار مثل الطفل المدلل.. واوعدك اننى لن اسف معه ولن يرمينى فى اى شرك من شراكه التى ينصبها للاخرين.. فأنا ما داقسة ليه فلا تخشى على..
ولا تخشى على المنبر
وشكرا مرة اخرى

Quote: بدون لف ودواران. أنتي مضرودة من البورد ده كم مرة ومن البورد التاني بتاع معاز داك كم مرة لسوء السلوك؟ أجابة صريحة وواضحة لو سمحتي.

ومن ثم نعلنكم ياايها المتداخلون والزوار ان مستر دينق قد أعلن افلاسه تماما..



مستر دينق من طردنى من بورد معاذ؟
اذا طرد معاذ كل من فى ذلك المنبر فلن يطردنى.. امشى اعمل ليك شوية بحث عن الخلفيات العائلية وتعال.. بالله لسع شغال بدون ادلة مادية.. دى نمرة واحد من هذا المنبر عطل اشتراكى لماطالبت بحقى فى تنشيط اللائحة اقصاء احدهم تهجم على و كان من آل البيت ..وهذه قصة مشهورة ومعروفة ادت الى حل الادارة السابقة راجع الارشيف.. انشط شوية وخليك
دقيق لانه الناس قاعدة وشاهدة.. الضرب ليك تلفون اداك المعلومات دى
دا شاهد ما شافش حاجة وشوف لم الشمارات بالاميل والتلفونات
طوالى بدخل الناس فى حتت ضيقة شديد والله حننتنى شديد.. دا ردى ليك بصراحة كدا...
وبدون لف ودوران

عجبتنى جدا كلمة سؤ السلوك تكون عاجبك اللفظة ساكت وما فاهم معناها ذى نكتة واحد من الناطقين بغير اللغة العربية عاجباه كلمة خصوصا
قام قال والله القطر سريع جدا خصوصا درجة رابعة.. لانه يا دينق
لو بيطردوا الناس لسؤ السلوك من المنبر دا.. كنا فقدنا عوير الفيلم..ولاه كيف كلام دى؟

عن إذنك عزيزي إيمو .. استعير كلماتك التفاحية دي ..

لأشكر الأخ فرانكلي ..

وأحيي الدكتورتين .. بيان وأماني ..

:::
عندما رحلت عنا الأخت عربية سعودية
ولحقت بها الخالة رمانة
حسبت أن التفاحة في جبل مرة لم يعد طعمها كتفاح الشام
ومادام الأصل حواء فالأرض لم تعد جرداء
شكراً فرانكلي
غبت طويلاً ولكنك عدت مواكب
:::

جاد

الحبيب العزيز فرانكلي تحياتي وعظيم احترامي
لك التحية والشكر على هذه البوست والذي يحكى عن روعة هذا الثنائي القادم بقوة الصاروخ وأخص بالذكر الدكتورة/ أماني والتي اعجبتني جداً مداخلاتها وكتاباتها وتحليلاتها العميقة أما الدكتورة بيان فيكفى أنها مفخرة لحواء السودانية هنا

كل الود لذلك الثانى
هما فعلا اشجار مثمره نتمنى ان تظلا دوما فى حالة اثمار
اما انت يا جاز او دينق
ايها المسكين تعرف المشكله فى ناس طردوهم من السودان من بيتهم وما قدروا اعملو اااى حاجه بس فصاحه فى البالتوك
والبوردات ومسكين البدا يامل املو يغلبو تحقيقو

الدكتوره بيان
صوت حر وقلم ماض كالسيف..مرحبا بها..وبالدكتورة أماني

الزاكي

الأخوات د بيان واماني
ما رائكم في ما كتبه
الأخوان هوبفل وصادوح في بوست من هي روضة
وقال هوبفل بالحرف الواحد

ما رودا الا امرأة يطأها الرجال وتلد الأطفال
تعمل الملاح وتتحدث حين يباح
تغسل العده وتحش البصل وتتكبرت

فلما كل هذه الظنبليطه ؟
وسوف ارجع
لأنقل لكم قول الأخ صادوح
عن ام المرأة ناقصة عقل ودين
فهل انتن تؤيدان هذا القول
ام انكم من صنف آخر
غير الذي يتحدثان عنه مفتيا البورد
هوبفل واساسي

اخينا المجاور 2
بالله سعر الريال قدام الدينار السوداني الليلة وصل كم؟
لأنو عندناقريبنا بناضل مع الشباب في اريتريا من أجل القضية وقال فردة بوته إنشرطت وإسياس قالوا قال ليهم خلونا نخلص من موضوع الراجل القلتوا يتأدب دا بعدين نرجع لموضوع البوتات
،،،قريبنا قالوا قال ليهم لكن نناضل كيف الرمضة حارة
تيسير زعل وقال ليه نضال شنو يا زول ،الناس إتصالحت؟ ما تبقي بليد، هسع لو كنت بتعرف حبة أنقليزي كان شفنا ليك طريقة علي كاليفورنياو من هناك عمرة وزوقة، لكن ما مشكلة لو علاقتك قوية مع حنين خليه يرسل ليك عقد،، أب كرفتة بعرف الجماعة الببيعه العقود النضيفة،،لكن قريبناأجابهم بخ بخ لو دي نهايتها أحسن النرجع لآهلي جاتكم خيبة،، ورسل قال يرسلوله حق البص،،

بت السني
يظهر انو عقلك فاضي
انا ماعارف بقيتي دكتورة كيف
بعدين حكاية الأغتراب المزعلاك دي
يعني خلاص انت اتعلمت جوة السودان
واتخرجت من جامعة الخرطوم،، والله حكم
وسؤالي ما زال قائما
هل انت تؤيدين كلام هوبفل وصادوح عن المرأة
يا اخونا السؤال دا صعب
ولا داير ليهو درس عصر،،،
د بيان
الأخت بيان اشكرك علي نفسك الهادئ
انا عندما سألتك كنت اعتقد انك سوف
تديرين حوارا ،، يجعل الأخ هوبفل يغير
نظرتو للمرأة ،، الأ اذا كنت تتفقين معه
في هذة النظرة القاصرة،،
لأن الأخت رودا وانت واماني
من نفس النوع الذي تحتقره تلك النظرة
لك الود ،وبدون زعل

الكريم احمد حنين
فى الحوارت الاتلكشوال تأتى بقضية عامة
ولكن لا يمكن ان تتحدث عن كيف يرى الاسلام المرأة وتأتى لى
بكلام قيل من اخوة هنا.. لدى ايمان قاطع لا احيد عنه وأدرب عليه نفسى ان كل فرد له مطلق الحرية فيما يرى.. ولذلك اذا تريد مناقشة عن وضع المرأة فى الاسلام.. افتح بوست جديد ويمكننى ان احاورك
حوارا هادفا على ان يكون غير مقصود به ذر الرماد فى اعين اى شخص آخر.. فى هذا المنبر رجل يختلف معى فكريا واجد راحة كبيرة فى التحاور معه هو دكتور ياسر الشريف الجمهورى.. لآنه يجرد حواراته للمعرفة المحضة.. فلا احس منه استخفافا ولا احتقارا.. اود لو كان كل المتحاورين فى مستواه.. لكن هذا البورد مكان للمعرفة وتطوير الاطروحات.. اريد حوارا يجعلنى اذهب وابحث واقرأ..
هذا ما اتمناه وأحلم به فاذا رغبت فحبا وكرامة اطرح اى موضوع
تريده ودعنا نتحاور نتفق ونختلف باحترام
وشكرا لك

Quote: فهل انتن تؤيدان هذا القول ام انكم من صنف آخر غير الذي يتحدثان عنه مفتيا البورد هوبفل واساسي

الاخ الكريم احمد حنين
سلام

دهشت جدا لتوجيهك لى هذا السؤال الذى لم افهم معناه و سببه
لان هذه المناقشات قد تجاوزتها بربع قرن من الزمان
لو لديك اسئلةتحترم بها عقولنا فحبا وكرامة

وانا كنت دائما انظر اليك كرجل انتلكشوال ولكن الان حقا دهشت
لوقوعك فى مثل هذه المناقشات التى لا تسمن ولا تغنى من جوع.. وتوجيهها لنساء مثلى ومثل الدكتورة امانى..
اذا كان لديك تساؤلات اعمق واطروحات مفيدة
كان بها.. غير ذلك تجدنى فى غاية الاسف اذ اننى لا ادخل فى هكذا حوارت..

كنت يمكن ان اتجاهلك ولا ارد عليك كما افعل دائما لمن لا ارغب فى الرد عليهم..
ولكن .. لانى ارغب فى حورات جادة يوما ما معك قررت ان ارد عليك
اى ان املى فيك لم ينقطع..
ولك الشكر

استأذنكم شاكرا

والله يا دينق انا ما عارف انت بنيت تقييمك للاخت بيان دى انها كوزة فى شنو؟
الحاجة دى خلتنى اراجع حساباتى الشخصية امكن يكون في كوز لابد
جواي وانا ما عارف
وقد اكون جديد عهد بالبورد ، ولكن بالقدر القليل الذى قراءته للاخت
بيان كافى لان يرسم فى ذهنى صورة جديرة بالاحترام

بل ما ذاد بيان جمالا هو دفاعها عن دينها وموروثهاوهى تناضل ضد فكر الكيزان الوافد

تعرفي يا اختي بيان

أنا كان ممكن ارد ردطيب زي ردك دا لاخونا حنين لو كان فعلا عايز رد، لكن ما تنسي إنك علمتيني قبل الرد علي أي موضوع لازم اقراه جيدا وبالذات ما وراء السطور لانومرات حسن النية أسهل وسيلة للدردقة للمحرقة خاصة لما الواحدة فينا تشم رايحة المكرالسئ فاحسن تخليه لحدي ما يحيق بأهله!!!اضرب ليك مثال بسيط بالسؤال اعلاه فقد سألني له اول من سألني المجاور1 اب آمنة، وقبل ماأجاوبه نطوا لي اتنين من هناك إذكر منهم السيد زمارة فرحين مهللين بأنني لم ولن أستطيع الرد علي هذا السؤال الحريف من حجة زمانه وعجب رفقانه !!ولما فرغت من إجابتي كان في أخرين مازالوايطقعوني برضو واهو قدامك سعادتو واللي كان ممكن ببساطة يرجع لردي علي اخيه في الإغتراب اب آمنة علي هذا السؤال الخطير لكن أظن ما سمع بأنهاردت!!! المهم عملت بنصيحتك وسألت نفسي يا تري هل هم حقيقة عاوزين إجابة علي السؤال ولا إحراجنا!!! وبعديها قعدت أضحك علي نفسي وسذاجتي وعليهم وسذاجتهم وقلت لي نفسي يا بت سوطيها زي ما هم سايطنها والني ادي للنار!!!لكن يابت بيني وبينك كدا هو صحي هوبفل قاليها كدا ؟ هو جعلي ولا شنو ؟ لانوا واحدة صاحبتي قالت لي الجعليين رجالهم ديل لما يتحمقوا بتحولوا لوحوش عديل واحسن زولكم دا عملوا كلام خشم ساي عندنا جارنا لما إتحمق من مرتو قطع نخرتاودخل السجن بعد داك وحاتك ولا هماو، عليك الله لو في طريقة وصلي ليه الوصية دي من اختك اماني ، قول ليه اياك اياك تزعل تاني جوا المنبر،اطلع تفها برة وادخل تاني ، هو ما قاعد يقرا(ممنوع البصق داخل البص) بعدين الكمرات الحايمة يمين وشمال دي ما عشان تصور بس ، ديل بمنتجوا كمان ، يااختي بتعرفي المنتجة يعني شنو؟ محمد معاي ما تغشاني!!! دي ممكن تجيب واحدة طرشة و مكسرة ويخلوها تعرف تتكلم زي العجب صدقي؟ وممكن تقول ليكي طالعيني كمان؟ فخليه يعمل حسابه وانت زاتك اعملي حسابك ديل ما واحد ولا اتنين ديل عصابة، ياختي كترت عليك اللخليك بكملوا ليك بكرة!!

اصبحنا واصبح الملك لله
ولا اله الا الله


جبليييييين من نور
كم احب الشواهق الراسيات العاتيت

ماما بيان عملاقه في كل شئ
لها كااااامل احتراماتي وودي

دكتوره اماني
ثارت لفكرها فاهتزت خفائف الأشياء
وطارت فزعه

لها احتراماتي ايضاً

وشكراً شكراً فرنكلي ود البيت العامر

------------
وقبل ما انسى
دكتوره اماني بتسأل عن تكبير وتظبيط الخط

((FONT SIZE=4 COLOR=GREEN))
واستبدلي الأقواس
بعلامات اكبر من واصغر من
اي
<**********>

الحبيبة امانى
لم يبقى لنا الا ان نحلم
ان نكون فى مكان حوار.. فنجد التقدير والاحترام
وولكن يبدو ان هذا سيكون حلما مستحيلا
ولكن لا يبقى لنا الى ان نرنو الى الشمس المضيئة ربما ربما
يوما نجد من لا يحفر لنا الحفر ويمكر بنا لاننا مختلفين عنه فكريا
اتمنى الا يتهمك الناس و يجمدوا موضعيتهم ويلغوا عقولهم والمنطق ويعلو صوت الكره
حتى يلبس العدو ثوب الشيطان ويصفه بكل ما هو مقيت لاغيا انسانيته تماما.. ناشرا اكاذيبه والغريب ان هذه الاكاذيب الواضحة لاى صاحب عقل يميز.. ولكن هل صاحب العقل يريد ان يميز؟؟!!
صاحب العقل لا يريد ان يميز لان ضبابية الآخر لا تسمح له بهذا
ولاننا لم نتعلم ان نختلف بشرف..ولاننا تعودنا ان نلقى التهم هكذا ولا نحاسب عليها..
فيا عزيزتى
فى كل جملة عابرة هناك لغم.. وفى كل بوست هناك فخ
فأحذرى ان تمشى على الالغام او الفخاخ مغمضة العنين لان كل دقسة فيها لحسة..
واياك واياك الرد على سقط المتاع
drama queens& the crying babiesو
لان الاول خسارة للباندوث والثانى لن يكف عن البكاء واستدرار
العطف والثالثة تخرج لك كل شيزوفرنيتها
ومنخوليتها..
فمن هؤلاء اعملى لا اسمع ولا ارى
وربنا يديك العافية

سؤال فقط
اين الدكتورة الظاهرة اماني السني التي دخلت بسرعة وخرجت باسرع مما نتصور هل وراء ذلك الاختفاء شيء ؟؟
نتمنى الاجابة من الاخوة بورداب جدة
وتحياتي لك الشرفاء والشريفات من أبناء بلادي القابضين القابضات على جمر القضية