رباعيات نادية عثمان مختار ..وعجبى !! طلال عفيفى واحباء المنبر الوطن هاهو لون اخر من كتاباتى ..

كتلنى الشعر عشقا وهزتنى القوافى
حبيبتى حروف وكلمة من الزمن الخرافى
بقت فى الغربة مآوى فى قلب المنافى
مصيبة الشعر أكبر فى دنيا الصحافى
وعجبى!!




السلام كان ديمة مطلب وكل جارا ليهو ساعى
بس بخاف المدة تطول ونحنا هدتنا المساعى
الحجج والنقة كترت مابشوف كان ليها داعى
الوطن الجرحو نوسر كان جميل لو ليه نراعى
وعجبى!!



قلت وحدوى قلنا مرحب أكد القول بالسلام
قول وداع للآلة تكتل فى ربا السودان حمام
العدالة طلب اساسى وببقى سفك الدم حرام
نحنا أخوان ده الأساسى وبينا حب جد وانسجام
وعجبى!!



كل مانقول ده موسى يطلع برضو فرعون
ابليس بى قرونو وجد اولادو شيطون
الشر امتلكنا وخت عمارو فى الكون
كل مانقول ده انسان يطلع برضو ملعون
وعجبى!!


أصوات القنابل شيبت أطفال
بقت بغداد مدافن ومقبرة أجيال
أمريكا الغرورة قبيحة الأفعال
عشان بترول عراقى تضحى بالأنجال
وعجبى!!



لو تنسانى برضو مابنساك أنا
روح الزهرة قلبى وعبق السوسنة
يانى الجرتكوها سمحة محننة
ولو تنسانى حقك بيضيع ياجنا
وعجبى!!


ياوطنى القبائلك تشكى من تهميشك
ظالم ولا مظلوم من فعايل جيشك
أولادك بقطعوا فى منابت ريشك
قول ياوطنى حكمك الا بس ببشيشك
وعجبى!!


من شان السلام جابو الوسيط جنرال
ايمكن بالنياشين ينصلح ده الحال
ويرجعوا ناس بلدنا الهدهم ترحال
بين أمريكا كندا وكينيا ست الخال
وعجبى!!



دارفور العزيزة امى الحنينة الغرة
شن سووالوليدات جابو ليك الضرة
كبوا الدم بحورا وشربوك المرة
وين راح خير زمان الكابى جوة وبرة
وعجبى!!



ياعاشق الجمال أعرف انحنا جمالنا مالو مثيل
انحنا الفركة والسوميت وقولة السى معاها عديل
انحنا الخمرة والدخان والريف دور فتيل فى فتيل
معانا بتعرف ايه الحب وبدونا أخير تقع فى النيل
وعجبى!!



نحنا فى زمن المصالح بالقولات والسواطة
وانت يازولى الشفيف أحلى مافيك البساطة
لامنافق لامخادع زى بشر زاد انحطاطها
الا بس حظك معاكس فى زمن سمتو الوساطة
وعجبى!!



شلكاوية حلوة جمالها زى فينوس
شجرة سيسبان ودعامة الابنوس
بى سحر العيون خلبت عيون ونفوس
جننت الجنوب وبيها الشمال مهووس
وعجبى!!



أرفعوا صوت حواركم وأخرسوا البارود
الفور دار سلاطين من جدود لجدود
لابينكم جبان لا زول سفيه وحقود
الحق بالحوار مابالرصاص بيعود
وعجبىّّّّ!!




فى بلد الزرق دار سلطنة وسلطان
بتلقى القاسية هينة والقساوة حنان
أهل حكمة المساليت والزغاوة كمان
أطفوا الفتنة بينكم وكتروا الكيمان
وعجبى!!




الحرب القبيل مالقينا فيها هوادة
حقول الغام ونار لابد من اخمادها
من أجل التحول لازمة لينا ارادة
جنوب وشمال بلدنا ونحنا كلنا سادة
وعجبى!!




صاح انت الملك وفوق رأسك أجمل تاج
مصنوع من دهب أحمر وسن العاج
بس قلبك لئيم أسود بلون الصاج
مابتخاف من الله برغم انك حاج
وعجبى!!


سمعت وقالوا عنك دار تكون مشهور
عاشق الكورة مرة وفى الأغانى سرور
بى قرشك بقولو بتشهر المغمور
تخلى الدنيا تحكى عن الوجيه فرفور
وعجبى!!



شايقى ودنقلاوى أخوة فايتة الحد
فتيل ريحة وبخور عودين عبيرهم ند
ايد فوق ايد تملى بيبقو ساعة الجد
لو تسأل عليهم تلقى عندى الرد
وعجبى!!



أوعك تخاف واغرز خناجرك فى صميم قلب الرئيس
انت الشروق لو اظلمت وانت البتستر للبنيات ياعريس
قلمك درع حبرك رصاص يحرق حشا الاسد الكديس
انت الطريق مرسوم عديل وأصلو العوج درب التعيس
وعجبى!!



ادمان الكتابة منو البشفينى منو
كلماتى الرقيقة وحروفى على بحنو
بعشقو لون محابرى وقلمى العاجبو سنو
ولو ماكتبو شعرا أناملى أكيد بجنو
وعجبى !!

Quote: شلكاوية حلوة جمالها زى فينوس شجرة سيسبان ودعامة الابنوس بى سحر العيون خلبت عيون ونفوس جننت الجنوب وبيها الشمال مهووس

من تالا الهوس فوق بابنا طلعت راية
وانكسروا القفر كساح يقودو عمايا
وشيلة الشلية من دار أبونا كفاية
شن بندور فيها كان علاية كان وطاية

من تالا الهوس فوق بابنا طلعت راية
وانكسروا القفر كساح يقودو عمايا
وشيلة الشلية من دار أبونا كفاية
شن بندور فيها كان علاية كان وطاية
الله عليك يالمسافر
تسلم والله
لكن قول لى انت الكاتب الكلام الرباعى السمح ده ولامنو ؟

عبدالله ابوبكر
تسلم
قول اااامين

يا عاشق الجمال أعرف انحنا جمالنا مالو مثال
أنحنا الفركة والسوميت وقولة السي معاها عديل
أنحنا الخمرة والدخان والريف دور فتيل في فتيل
معانا بتعرف إيه الحب وبدونا أخير تقع في النيل..
... عجي يا نادية ودة الكلام
إنشاء الله بتاع البوست بتاع زواج الهنديات يقرا الكلام دة

سارة جمال عيونك مافى زيو جمال
فيكى السمرة تكتل والبسيمة زلال
بيكى البورد نوّر وانتى زايدة دلال
لاهندية شبهك لاشرق لاشمال
وعجبى

نادية يا إمرأة أكاد أشمّ عطرها من هنا ..
لك منّي مليون سلام يا جميلة جمال القصيدة ورنّانة زي دوبيت..
صراحة ما عارفة أرد عليك كيف أدينى فرصة.. ولا أقول ليك هذا بعض من حبري..
يا غطاء دثّر عمرى من برد الزمن..
يا نسمة أطلّت على صباحى فأزاحت حر الأيام..
يا ضوء تغلغل في صباحاتى فأشرقت مسامى نورآ.. وإبتهل وجهى ضياء..
يا رجلآ يختصر الروعة بحضوره..ويفجّر الدهشة عند لقاه..
عندما تأتى تجلب معك كل الصباحات الجميلة وعندما
تذهب تأخذ معك الأماسى الحالمة وكل مواعيد الغرام..
تعال يا حبيبى كفانا بعدآ..فالهجر شمسه تحرق و ليله موحش..
تعال لتزيح عنّى تعب الشوق وألم الفراق..
لا تسكن المدن البعيدة فأنا ممنوعة من السفر..
الأذن صماء إلى أن تسمع صوتك والعين عمياء إالى أن تراك..
لا تبتعد فرياح بعدك أقوي من أن أتصدّي لها فبيتى من قش..
حبّك أكبر من تحمّلى فهو يفاجئ ويكسّر وينهى ويأمر..
وأنا لا أقوى على حبك... فإنه يقتل النساء شوقآ ولوعة
أشتاق لجنونى وأنا معك .زلدلالى وأنا معك..أشتاق لحبّك لي
أشتاق لحواسى التى أفقدها حينآ ولا أسترجعها إلا وأنا معك..
________________
ولك منّى عودة

سارة رغم الغربة حارة ..التقينا فى المحطات الشتات
خوة فى معناها روعة ..ودنيا تحيا بعد ممات
لوعة الشوق فى المنافى ..افقدت صبرى الثبات
ريحة الوطن الدعاشة..وخالتى عاشة وقعدة القهوة وحياة
ناس نفيسة وحاجة آمنة ..واحدة فاتت وتانية جات



فى بيوت الشعر غنية ..التقيت بى سارة لوحة
شايلة من توتى النضارة ..وهيبة ام در ليها طرحة
حالمة زى غيمة شجونا ..ومن ليالى العيد هى فرحة
غالى ياوطن الجسارة ..ولون بناتك صافى قمحة



انتى للمنبر شقيقة ..ولى نضال اهلك رفيقة
وطنى حر بى اهلو عامر ..موية فى قلب الحريقة
مهما ليل الغربة طوّل .. بى تجمعنا بنطيقها
القناديل مهما تذبل ..بكرة بتنور وريقة
ونحنا مهما طال غيابنا ..طيف بلدنا بظل حقيقة !!

Quote: عبدالله ابوبكر تسلم قول اااامين

آآآآآآآآآآآآآآآآآآآآآآآآآآآآآآآآآآآآآآآآآآآآآآآ

ممممممممممممممممممممممممممممممممممممممممممممممم
يييييييييييييييييييييييييييييييييييييييييييييي

نننننننننننننننننننننننننننننننننننننننننننننن

سارة ونادية
الحكاية شنو
عاملين كده زي نسوان بربر
تشكروا في بعض ما خليتوا لينا حاجة نقولا
يا شباب
اتكلو كده و ارتاحو خالص وخلوا لينا موضوع الشكر ده
ما ممكن ياخ
المنبر ده قايلنو ساكت كده انتو
لا حولا ياخ

محمد الفاتح قلت لى كده..
تشكروا في بعض ما خليتوا لينا حاجة نقولا
لكن انت قلت حاجة ونحنا ماسمعناها؟
لقيت رباعياتى زول قراها غير سارة حبيبتى مافى وقعدنا انا وهى نشكر فى بعض زى نسوان بربر نسوى شنو يعنى ؟
اهو زى ماقال الشاعر
لما سارة التقت بى نادية شكرتها.. ولما نادية التقت بى سارة شكرتها
وسارة فى لندن ..ونادية فى القاهرة وناس الفاتح ماشكرونا وهكذا يعنىّّ!!
حلوة القصيدة دى يامحمد ؟
معمولة فيك مخسوس والله

نادية

وحات نضري وعافتي....انتي سمحة في كل شي....حتى في نضمك



الفاضلابي .... صاحبي

Quote: عاملين كده زي نسوان بربر

رجال بربر برضو قاعدين يشكرو بعض..... تصفح المنبر جيدا

وبعدين نادية وسارة ديل الشكر ما بيشحدنو.... الشكر فيهن مو كضب

نادية

وحات نضري وعافتي....انتي سمحة في كل شي....حتى في نضمك
سيجيمان ..اريتك تبقى طيب انت ..وانا البى كلوووو هين
والله سعيدة حد السعادة بى طلتك دى والكان بى قلق على عدم المراسلة والمداخلة لحدى مالقيت روحى فى بالك وعامل لينا بوست مخصوص انا وسارة وسامية
اها اطمنت وقلت سيجيمان ماحقر بينا وعزانا فوق عز البورد
تسلم ياغالى
قلت لى
نادية

وحات نضري وعافتي....انتي سمحة في كل شي....حتى في نضمك
ووحاة نضرى وعافيتى ياسجى البورد ده بدونك شوال سكر مايطعمو
انت شكولاتة البورد وحلاوة ماكنتوشو ..وكلامك بيعمل طراوة فى حر المنافى والشتات
انت عارف..انا كنت ناوية اجيك السعوديةاشوفك مالك ..لكن الحمد لله اطمنت عليك
وتسلم من كل شر
قول ااااامين

هذا المكان حقل ..

نادية
اسمحى لى بالإتّكاء هنا .

لؤى كل حدائقى لك متكأ ودوحة
ووجودك فيها يزيدها القا
مرحب بيك تسلم

لا أستطيع التعقيب علي كلامك صراحة..
لكن لا بدّ لنا من لقاء
لك منّي كل الحبّ يا إمرأة تسكنها القصيدة
ويطل من عيناها الفرح يا حلوة

يا ندّوية بوسسسسسسسسسسسسسسسسسة كبيرة منّى ليك
بي جاي وبي جاي وبي جاي
خلّى محمد الفاضلابي يموت

نادية وسارة والله السودان دا كأنما الناس يولدون فيلجوهم بالشعر ، كم أذهرت بكم صفحاتنا

امانى السنى
قلت:
كم أذهرت بكم صفحاتنا
بل انك انت الزهر وشذاه وعبق الرياحين يارائعة

نادية السنى شكرآ يا روعة
ودة من زوقك تابعينا وحتنبسطى
لك منّي الودّ والشوق


نادية سورى على التخريمة
وسي جي الرباطابى جة هنا جيّة بت كلب
وإشتغل الناس الإشتغلونا..
وتشكر يا ملك..
ويا فاضلابي رد علي سي جي كدي
عامل لينا بطل وشايلنك كمان قال
ولك منّى التحيّة يا صاحب الدوش

سارة الحلوووة
انتى قايلة الفاضلابى ده شايلنو كده بهتف يقول فى شنو؟
عاشت سارة السمحة
عاشت
عاشت
عاشت
نادية

وحات نضري وعافتي....انتي سمحة في كل شي....حتى في نضمك
على قول سيجيمان صاحبنا ياسرورة
خلى ناس البورد يقولو ماشاء الله بس

Quote: حبيبتى حروف وكلمة من الزمن الخرافى بقت فى الغربة مآوى فى قلب المنافى

ياريت كان عرفنا من زمن الجهاله
أنو الفرقه حاره اصلو الدنيا حاله
بـ تفرق حبايب وبـ تحرق رساله
في (وطنا) شقينا وغيرو ما هوينا
يوم فرقنا دربك ( ياسودان ) زاد الهم علينا

Quote: الحجج والنقة كترت مابشوف كان ليها داعى الوطن الجرحو نوسر كان جميل لو ليه نراعى

ينصر دينك يا ناديه

سمؤل ابراهيم
ينصر دينك يا ناديه
وينصرك دينك انت كمان ياشفيف
وسلمت من كل شر

ناديه..
وساره

اهلا بيكم ..وفعلا لقد فتحتم في دواخلنا.. كوة من الدهشه الجميله
بهذه الرباعيات التي تتسربل بالابداع..
وتتسرب بالدواخل..

سنكون علي حافة الصمت نستمع لكما..

دون مراعات لمداخلات سجيمان... وودالفاضل..

تحياتي ,,

ايهاب الطيب قلت مشكورا
ناديه..
وساره

اهلا بيكم ..وفعلا لقد فتحتم في دواخلنا.. كوة من الدهشه الجميله
بهذه الرباعيات التي تتسربل بالابداع..
وتتسرب بالدواخل..
بل اهلا بك انت هاهنا فى هذا البيت العامر بالحب والاخاء والنقاء
وننتظر سارة وشخصى مزيدا من مداخلاتك الثرة

ايهاب الطيب

Quote: دون مراعات لمداخلات سجيمان... وودالفاضل

بي تنقنق مالك؟......نِق نِق نِق نِق


والله دي تبقى شتيمة .....ما اخليك

سيجيمان
ماتقوم نفسك ساى خلى الطيب ينقنق
وانا وسارة نغنى سى جى معانا ماهمانا



احمد الشايقى دعوات مقبولات

نادية عثمان

وسارة فضل


انضمامكن

يعني انضمام (كوكبتين) شاعرتين تأتيان بالجزل المتدفق والمشرف على جمالات الكلم والنظم.

هنيئاً للجميع بهذا الانتصار

وتحياتي

هنيئاً للجميع بهذا الانتصار
والله يااحمد الشايقى الانتصار لينا انا وسارة وكل الجدد بالانضمام لامثالكم من الرائعين
تسلم من كل شر انشاء الله
قول ااااامين

العزيزه , أستاذه ناديه ..
شكرا لك على إهتمامك ودأبك على الكتابه .. هو امر يسر القلب
ويرحمه ..
الآن تطوف ببالي مشاهد جميله ..
القاهرة : ذلك الباب المفتوح على العالم والحياة ..
هناك رأيتك مره !
في الطابق الثاني المطل على شارع الجمهورية عند Gallery Grant .
كان هناك معرضا للتشكيل ..
كان حسان يرففع درجات الحراره في ذلك الشتاء بألوانه الزيتيه
الدافئه ..

تحياتي لك وللقاهرة وليلها المسحور .
ولكل شوارعها وبناتها وباعة كتبها المفترشين الأرض .

...
طلال

طلال عفيفى ايها الشفيف الناضر الدواخل
قلت :
هناك رأيتك مره !
في الطابق الثاني المطل على شارع الجمهورية عند Gallery Grant
وقلت لنفسى يالك من تعيسة كان طلال معك فى ذات المهرجان التشكيلى ولم تصافحيه او تعرفى ان هذا هو ذلك الطلال الذى يدهشك بوحه وكتاباته المبدعة!!
انا أسفة ياطلال عفيفى ولكن لماذا لم تنبهنى لوجودك رغم انى كنت المح هالة نور ولكنى ماعرفت مصدرانبعاثها..كنت انت اذن ياطلال!!

العزيزة نادية عثمان


قلنـــــا



ااااااميـن

Quote: عاشق الجمال أعرف انحنا جمالنا مالو مثال أنحنا الفركة والسوميت وقولة السي معاها عديل أنحنا الخمرة والدخان والريف دور فتيل في فتيل معانا بتعرف إيه الحب وبدونا أخير تقع في النيل.. ... عجي يا نادية ودة الكلام إنشاء الله بتاع البوست بتاع زواج الهنديات يقرا الكلام دة

سارة....
انت قاصدة ابقوتة ولا زولا تانى...
ياسارة الجمال عندك وفى كل بيت سودانى...
فى حسن الطبع ونظافة توب ولسانى...
ورائح خمرة ووشاف وطلح وزراق دخانى>>>

اما الهنديات فيهن جمال ظهرانى...
شعرا طويل.. ريحة الزيت تقلب المصرانى...
جسيما اصيفر لادن..تفوح منه ريحة غسيل واوانى...
اخوك مو صعيليك ...لكن زميلات دراسة فى لحظة من الزمان

ابقوتة انت قلت كده
ورائح خمرة ووشاف وطلح وزراق دخانى>>>
قلت شنوووو؟
زراق دخانك يابقوتة؟
هو انت ......؟
والله كويس الطلح ده بالمناسبة فيهو شفاء للناس
والناس هنا مافرقت رجال من نسوان!!

أنحنا عقولنا ما بدخل خفيف في دارن
ثابتات الجبال كيفن رحيل حجارن
يمشن دوغري بالدرب المشوبو كبارن
والبيلد المحن مجبور يلولي صغارن

الاخ محمد بهنس..لك التحية على الرباعية الرائعة وهكذا يكون التحريض على المجاراة ابداعيا
سلمت واسمع ردى:
نحنا عقولنا بعيار الدهب موزونة
نحنا بنات رجال معروفة مابهينونا
مهيرة الغالية بت عبود كسبنا فنونها
هدية وعاقلة بت سودانى مو مجنونة
وعجبى!!

ناديه و سجيمان سلامات :

وانتو سجيمان دا اخد الجنسيه بي هنا ولاشنوLoooooooooooooL

Quote: بي تنقنق مالك؟......نِق نِق نِق نِق والله دي تبقى شتيمة .....ما اخليك

انت يا سجيمان لسه لابد بي هنا!!!!!

انا قلت الزول دا.. اكون كتب كلاموا ..
وشتت,,

ايهاب

Quote: انت يا سجيمان لسه لابد بي هنا!!!!!

لابد...وشايل عكازي

سجيمان اوعى تدقس او نعاسا يشيلك
ماتشمت عجايز البورد يقولو حليلك
انحنا الزملاء فى الجامعة ودفعة جيلك
ومهما يقولو فيك بورداب أقيف شد حيلك
وعجبى !!

ايهاب ليه تشتت سيجو من بوستينا
سجيمان زول حبيبنا وديمة فرحان بينا
سامية وسارة الحقو سيجو يحرد لينا
ايهاب اوعى تغلط سيجو بودى قاردينا
وعجبى !!

أحمد الشايقي شكرآ يا راقي علي تنبيهي..ولك مني الود..

الأخت أمانى السنّي عفوآ علي كتابة إسمك غلط..أعمل إيه نادية كانت في لساني
وهي ست البيت دة ..
شكرآ يا إيهاب الطيب على مرورك وسجيمان دة خلاص أديناهو حق اللجؤ..
أب قوتة ضحكت لمّاشرقت..
سوري يا ندوية عملنا البيت بيتنا

ســر النسيـم بمرأهـا فحيّاهـا

اشتاق طلـتها هـاف لريـاهــا

رثـّاً تلطّـف مـزهوّاً بطلعتهــا

آت بغبطتـه فاهتـاج تيـّاهــا

فـوح يؤانســه واش بفرحتــه

ضـوع يعطر إذ ما هـب يلقاهـا

لـه المسـرة جمعاً كلما خرجـت

لغيـره قسمت منهـن إحـداهــا


وتحياتي

اها

نعتبر قاقارين ما هبط علي سطح القمر
و لسه صورة الرومتنسية باقيه في
المخيلة الجمالية
الحرف قادر علي الفعل الجميل
و لمان ينتج الجمال عن جمال
بتتحقق الصورة المطلقة


هنا نريد أن ندرك حدود الاطلاق
اللامتناهي
و أن عز المزار

الحرف هو الطلق
و الفراشات في هيامها
عاشق صوفي
تخترق المغالق
لتلقح الازهار
و الثمار نتاج موضوعي
انهمااااااااااااااااااااااااااار


اجزل الود
و فائق خلاصات الانسانية
حيث تتوه اللغة و تغالبها المعاني

نادية،
يا همس الحروف الحايمة في بطن الكتب
رباعياتك شجن
نزيف
وحريق وطن

واحساس بمتع لحظة التعب القديم بإلفة خاصة جداً
___________
أهدي ليك كلمات جميلة كتبها د. معز وأصبحت متداولة في رسائل الموبايل:

كل إحساس من هواي
بحرو ساكن بين إيديك
اشتقت للحظة البتسرق
عمري كلو تجيبو ليك
اشتقت للنجم البسافر
في الخيال يرحل يجيك
اشتقت و الشوق مستحيل
في دربو يتمرد عليك

،،،،،،

سامية

سامية الفاهمة من ولدوها فالحة وراسية
بت بى توب حنان مكسية ماها القاسية
دائما للوداد هى الحافظة تب مو ناسية
تلقاها البشوشة الضاحكة صابحة وماسية

أكاد لا أصدق يا أنت يا أنت
فقد نجحت خطتي التحريضيه في شحذ خيال صديقتك الجديدة في البورد ساره فضل بأن تتألق .. فقد قرأنا مفردات لغتها المتقدمه في بوست آخر .. وقمنا بما يقوم به أهل الإبداع في بلادي
الشكر لك ولها .. ومزيدا من الإبداع .. مع ترك القليل من مفردات العلاقات العامه جانبا
ودمتم إضافة جديدة لثقافة أهل السودان التي توزعتها مدن المنافي
لكما التحيه

الاخ الفيلسوف نصار
قلت:
نعتبر قاقارين ما هبط علي سطح القمر
و لسه صورة الرومتنسية باقيه في
المخيلة الجمالية
الحرف قادر علي الفعل الجميل
و لمان ينتج الجمال عن جمال
بتتحقق الصورة المطلقة
وانا بقول ليك بالضبط كده
مواااااااااافقون!!

ياعاشق الجمال أعرف انحنا جمالنا مالو مثيل
انحنا الفركة والسوميت وقولة السى معاها عديل
انحنا الخمرة والدخان والريف دور فتيل فى فتيل
معانا بتعرف ايه الحب وبدونا أخير تقع فى النيل
وعجبى!!
وعجبى انا كمان استاذه ناديه كلام رائع ومن صميم المعمعه

نسوان بربر سلام....
نادية.... الربعيات السودانية....مبالغة يا ناس....
فاضلابي دا اصلو حاسد و راصد....
ما تشتغلو بيهو ....
هو لاقيكوم وين.....

ضياء الدين خليل


حلات نسوان بلدنا فى دنقلة وفى بربر

سودانية بس حلاتها فايتة الكستر

بى النضم المفيد يقوى ويعيش المنبر

والجكس النضيف خلى القلوب تتكسر

وعجبى!!

الزوق والجمال حايزاهن انت علامة
وزايده عليهن الابداع معاه وسامه
تنقشي في الحروف نقش الخبير للشامه
شافها سريع نكر تب راغب ابن علامه

أُمْحُمّد تعال شكّر بنات الشاشة
ما خلّن سمح فاتنّو أحلف حاشا
معزولات عزل زي برتكان الباشا
وكان دُرْتَ الرزق اقعد مع الفرّاشة
( سبحان الله! )



الفراشة ديل البورداب عموم وهم في الاصل الباعة الذين يفترشون الارض)*

محمد عبد القادر سبيل


أمحمد تعال دى شاشة مو غشاشة

وفيها قلوب يمين زى القطن والشاشة


نسمات جات تهفهف حاملة غيم ودعاشة


حلاة اولاد بلادى السادة والشماشة

نزار حسين


تعيش يازول ومرحب بالعظيم سودانى

الصادق الامين العمرو ماغشانى

روضت الحروف العاصية بس علشانى

تسلم يانزار منك نظم الحانى

مدهــوش بالشعـر

يا نادية نضمك عالي

قولاً صــح رفيـع

فرّحني ريـّـح بالي

حـظ البـورد كسـب

بي الشاعرة دراً غالي

والأدب الأصيــل

باهي ومعسـل, حالي

وتحياتي

سلام ويالمتعة ان اضيع هنا,
على كل يمكن يلقونى,


لكن المتاكدمنو جدا ان روحى الان هنا00






حتما عائد اليكم ولهذا الجمال






سلام

انتى بريـــــــــــــــه من جن الانامل

واهلا بيك يا اصيله
وابشرى بالخير

مبدعنا حمزه سامحني في استلاف عبارتك الجميله وانجر عليها

انت برية من جن الانام لا السرحه
اسرحي بي عقولنا قلوبنا ليك منشرحه
فرّي كلامك المعسول تياب منطرحه
شري صبرنا في سلك الزمن زي طرحه

نزار حسين

زاد انا انشراحى وبيتى بيك مزدان

يالمرق السند ضهر البيوت زى زان

قلبك خضبوهو بلون فرح وحنان

وسيم الروح وقلبك باليقين انسان

Quote: أُمْحُمّد تعال شكّر بنات الشاشة ما خلّن سمح فاتنّو أحلف حاشا معزولات عزل زي برتكان الباشا وكان دُرْتَ الرزق اقعد مع الفرّاشة

اسمحا لي يا سبيل وكمال بشاشا...والله النية بيضاء....ولتسمح لي كذلك اميرة هذا البوست

أمحمّد تعال اهديه لينا بشاشا
يفتل في حبال الفتنة من نيفاشا
اشميقو اللسان نضما معاه هشاشه
والراي مو قحف فالتنو بس في الشاشه

اترسو في الكلام غتيه بي دشداشه
وان سرّب ورطن اكسرو في حواشه
واندهلو اللبيب تاج سرنا الرشاشه
بيعرف كان زعل يمسكو المقشاشه

هوي الصيد ورَد اركز وشيل الهَمْ
وحبل البال قِصِر، تاني العقل فوق كم؟
يا النيشنجي " بيش" .. رايك تلف حرّم
كيف جاهلات حقوقي بعلّمني النَم! .

جاهلات الحقوق بي علمهن وبتغابن
ما دخلن محاص فتشتهن وما انهابن
كل مخلوق معلّم في الاذل بي كتابا
ان دلّيتو وان خليتو ما بتجابن

لا مغرورة حاشا ولانى زولة عنيدة

امنت بآلهى خلقنى شبه الصيدة

نعم عرجونة لآدنة وبرضو جد صنديدة

ساعة الشدّة صلبة وناعمة ساعة الريدة

وعجبى !!

الى نزار حسين



مِي جاهلات فهَم ، ود الحسين أفهمني !
ديل خارتات عقول ايشمعنى جاهلاتني؟
الفاضلابي القبيل قال فوقن المحنّي
من يوم داكْ كضَم .. كان كفّتنّو بغني؟!
والله اعلم !

محمد عبد القادر سبيل

البنوت بغنولك حلاتو جناى

وكت تقعد بجيبولك كبابى الشاى

كان قبّلت يلتفتو ويقبلو جاى

ومن فرحن يضيع اسمك وتبقى هناى

وعجبى !!

حمزة سليمان

سلمت من كل شر

وبشرت بكل خير

وعديلة فألك يازين الرجال

عصام عبد الحفيظ

عد متى ماشئت وستجدنا هنا فى انتظارك دون ملل

سلمت من كل شر


مازال المهرجان طفلا يحبو فعد وستجدنا مازلنا نسرد وننظم ونقووووول

احمد الشايقى

أريت الاندهاش يايابا لينا يلازم

ماك صول الشعر ياشايقى انت ملازم

كلامك زى درر تسلم ايدين الناظم

ليك تعظيم سلام والدهشة تفضل لازم!!

وعجبى !

دحين اهلي القبيل سايقاهم الحكامة
بي وصف الجميل في طبعو او في القامة
تكتب ناديه شعرا راقي زي هنداما
ميراث الجدود ومنو البقيف قداما

وعجبك

عشنا وشفنا جمال مزدان
لكن فاقد قيم وروح انسان
ولقينا الجمال في السودان

الاخوات الكريمات
نعم اقتنعنا بمزايا بنات بلدي
لكن يا ابقوتة خنت العهد لبلدك الثاني الهند
وسوف نعقد محاكمة في بوست الاتحاد





اما الهنديات فيهن جمال ظهرانى...
شعرا طويل.. ريحة الزيت تقلب المصرانى
... والله اجمل من رائحة شعرهن لم نعرف حتي الان الا عندك في حيدراباد وما تجامل كتير

جسيما اصيفر لادن..تفوح منه ريحة غسيل واوانى...

اكثر شعب يستعمل البودرة المعطرة هم الهنود

اخوك مو صعيليك ...لكن زميلات دراسة فى لحظة من الزمان

شعب جميل ضحوك محبوب يا احمد

اسف لهذه المرافعة الصغيرة

بوست جميل بس لو كان بدون تحميل

هنا الطرب ولا بلاش
ابشروا بالخيـــــــــــــر
هلا هلا

مهاجر شكرا على المرور

لكن عشان تكون عارف ابقوتة زول عااااقل وبعرف يميز كويس جدا


صاح ياابقوتة؟

عشنا وشفنا جمال مزدان
لكن فاقد قيم وروح انسان
ولقينا الجمال في السودان

الاخوات الكريمات
نعم اقتنعنا بمزايا بنات بلدي

الاخت نادية
ليه ما لاحظتي ما كتبت جيدا
عشان تعرفي رايي من راي ابقوتة
لكن اختلفت معه في رايه في الهنديات
والله لولا تلتلة الاولاد بعدين كان تزوجت هندية زمان
فيها فوارق كبيرة عن السودانية
فيها حسن المعشر والحب والحنين الي زوجها طول الوقت
فيها نظام توفير لن تجدي له مثيل عند السودانية
فيها نظام تربية حديث وممتاز
جمييييييييييييييييييييييييييييييييييييييلة جدا
وجمالها دائم حتي لو انجبت خمسة اولاد برضو هي هي
لدينا زملاء تزوجوا والان زواجهم ناجح جدا
ايضا نحنا اتعلمنا اللغة الهندية ونجيدها

وليد محمد المبارك

ربى حبانى قلبا مافى زيو قليب

ولسان حالى ولطيف مابنطق أصلو العيب

أبوى ربانى شابة وهسة بعد الشيب

بقول ياالله يفضل قلبى صافى حليب

وعجبك !!

جاييك
ما هسة
لكن فكريني لو بقيت أنسي!!


سمح؟؟!!!

حبيب نورة الرسول خليك شوية معانا

مستعجل دوام بى كلمة بس تغشانا

مابنستاهل انو تقيل انت حدانا

ولايعنى بتخاف زعل الحبيبة فلانة

وعجبك!!

نادية
شكيتك علي الله زكرتيني غنية حنانا
النسي أهلوا ما نسانا
ما جانا لو جانا بغيظ فلانا
لكن انتي والله زي البرتكانة



أسمعي
ما تجي نقول حاجة بتشبه المطر
تعالي نرجع الروح للوتر
نشيل أسانا يرحل يمشي الخطر
يفرهد الريد يخضِّر مد البصر


سامعة ؟؟!!!
.....!!!!!!!!

الى نادية عثمان



الليلة الصعيد شالعات بروقو كُتاااار
وقش الصَيْ بتَق.. الكيك عِرفلو دَبار
شاحد الله الكريم يملانا صيد وخدار
وكان جَنْ اللواري عاد ماسَجَم سنار!

محمد عبد القادر سليم

البراق برق شلعن خيوط الضو

الحب انبهل دفّق سمعتلو شو

محروسين يقين ماقلنا كلمة لو

قوافلنا بتسير وكلابها تنبح هو

البورداب عموم حيّـوا الحضور يا نادية


شعـر الحاضرة شــارب من أصالة البادية


كـان لازم نـلازم, تبقي إنـتي الهاديــة


والدّر المصون, شاعرة وأديبــة وشاديـة


وتحياتي

البورداب عموم يا الشاعرة حيّوا حضورك


علينا وجب بدل خرفانا ننحـر تــورك


نور الشّـم بهت بالطلّــة من شع نورك


وبالشعـر الزّلال غرّد, دوام, عـصـفورك


وتحياتي

ياود الشوايقة حضورك انت الباهى

واشراقات كلامك ونور حروفك زاهى

عمرك مابتغيب رغم المعيشة تلاهى

حباب أحمد حباب وعازماك نشرب شاهى

بت الام حباب طلة هبـوب القايلة

ظبي المندراب ست النفايل الخايلة

تتباخت أكان قصدوها إيداً طايلــة

عزك بالمكـوك الشم جبارة المايلة


وكل التحايا

معروفك وصــل يا الشاعـرة خيرك بــرّه

ويوم شكرك بعيـد ما نشوفه, تـب بالمـرّة

مجلس شاي عـزيـز, نديان جمـال ومســـرّة

والبورداب معازيمنا -- ويا النّــم, (جـــرّة)



وتحياتي

عامر جمعكم ان شاء الله ما ينفضّ
والقول السمح منو القلوب تتوضأ

بشوف الشاهي برادو الدهب مو فضة
يلصف وجنبو احمد تاكي راجي العضه

من اجل تنويع موضوعات (النم) ومن اجل استدعاء اجواء البيئة التي تنتج هذا الفن تالرفيع
ارجو ان تسمحوا لي بهذه المحاولة:



الساعوط عدم.. الليلة شِن بنْسَوّي ؟!
والكيك الدغيل فوق رايو ماسك قوّي
تبْ مِي مطرة نصاح والمرفعين بيعوّي
ويا القلتو عني ختَر أنا ماني صقراً جوّي!
very realistc isnt he?

محمد عبد القادر سبيل ...كمان جابت ليها ساعوط ؟

طيب اسمع..

التور وكت يهيج معناها شّم الدم

لابيرضى الحقارة ولانميمة الذم

فى الحق لابيحابى اخوهو لاود عم

يتجسّر يقول حرّم نسف الهم

وراجياك يانزار تاكل معانا العضة

انا وأحمد أخوك تب بابنا مو بتسدا

ضاحبين العجل منو المرارة ام شطة

نزار ود السرور غسّل معاى العدّة

ياود الشوايقة الليلة كيف أمسيت

ياشيخ القبيلة وياركيزة البيت

جيت فى الحارة أسدا اصلو ماتدسيت

حباب أحمد تعال سويتلك السنكيت

الكنداكة الجميلة مالكة القوافى
ناديةعثمان

جئت متأخرا لهذا المولد الجميل وطربت لرباعياتك ووقفت مرات امام اكثر من رباعية ارقص كالصوفى:

قلت:

لا مغرورة حاشا ولانى زولة عنيدة

امنت بآلهى خلقنى شبه الصيدة

نعم عرجونة لآدنة وبرضو جد صنديدة

ساعة الشدّة صلبة وناعمة ساعة الريدة

وعجبى !!

واقول لك:

يا نادية وندية ويا شبيهة الصيدة
ما احلى الأغانى تتسمع من سيدا
وما احلى الجمال مزدان بلحن قصيدة
ويا بؤس اللى ماشاف نادية او باس إيدا
------------
شاعر ومن زمان راجى الخطوط تتشابك
وتسمح لى اسافر فى بحور اشعارك
من طليتى فى البورد والجميع فى مدارك
لافين فى الصوانى بدون حلل ومفارك
-------------
هذا الشعر من دنيا السحر يا نادية
ومن عبقر بلادنا ومن جروفا النادية
جانا بهمبريبو وصحى ارواح صادية
وخلى البورد إجقلب زى غزال البادية
------------------------
ما احلى الشعر لمان تقولو بنية
مثل الحور يمين واجمل من الحورية
العجب العجيب فى لسانها بس عربية
لكين كليوباترا وفى اللسان نوبية
------------------------

الاخ منان

منان يأخى نادية الليلة جد يوم عيدها

يالطليت مليت بورد الحبايب ريدة

بوح الاغنيات منك يكون تريدها

والشوق ياشفيف شوفة الأماسى اكيدة


راجياك من زمان انا برضو ليك مشتاقة

الزول الجميل طب القلوب ترياقها

الدوحة الظليلة الليلة زاد عشاقها

فى ساعة الغروب يلاك تعال نتلاقى


الشعر الحلال بالكأس بنشرب منو

الحرف العنيد نحرث مزارع فنو

القمرى البقوقى وناس سعاد بيغنو

وكم ياقيس كتير فى الدنيا غيرك جنو


ماأحلى الشعر لمّن يكون لى فارس

حبيب بنوت فريقو وزول قراية ودارس

ركازة القبيلة وللعقاب الحارس

يامنان تعال زور كايرو أول مارس

مع طلب الاذن , هذه المحاولة تعليقاً على الاخ نزار حسين



راجي الـوز كــرف

ريحة الدعــاش واتـقــدل

ماهــل نادي راتـع

بالخشـــش اتـــنــقّــل

بدور احضــر وأشـــوف

كيفـن عـرض واتـــرقّـل

داك اليــوم صـعيـب

صــبري ومــحال اتّــقـل



وخالص تحياتي

تعرف يا احمد اخوي...انو الوزه برضو ماركة شاي ممتازة...زيّها وزي ليبتون

دحين...

كرف الوزه ساهل لو فؤادك نقّل
نقّي علي هواك بشويش واقيف اتقّل
الطلح البداوي الزول وقت يتعقّل
غالي علي الفزع وقتين تشوفو منقّل

قالت نادية

وليد محمد المبارك

ربى حبانى قلبا مافى زيو قليب

ولسان حالى ولطيف مابنطق أصلو العيب

أبوى ربانى شابة وهسة بعد الشيب

بقول ياالله يفضل قلبى صافى حليب

وعجبك !!

عيون الناس شبابيكاً.. بتفتح جوه
عيونك فضحت الداساهو .. صَدق الخوه
بدورو غلات ؟؟!! طبعك زين وروحك حلوه
ابوك رباي .. تقول كان حاري بيك نبوه

عجبي وعجبك !!

وليد محمد المبارك

عيون الناس شبابيكا مفتحة برة

ماتخاف ياشفيف تب مابتجينى مضرة

محروس الآله ماعندو الا مسرة

بس خليك معاى اوعك تسوى الشرة

الى كل احبائى الذين احببتهم واحبونى فى هذا المكان الرائع
ود نقاس عفوا ان كان ردى عليك قد سقط ولكن والله لا ولم ولن اقصد ابدا عدم الرد على احد هنا وفى اى بوست اخر

لاننى احبكم واحترمكم جميعا

ويلا تانى نقول ياشايقى ويانزار ومنان ونقاس وسارة
ويايمنى وسامية وكبسيبة واستاذ فضيلى ودكتور معز وفيصل والباشا وعبد الله بابكر
وكل كل كل من احبهم واحترمهم فى هذا المكان اقول لكم :

يلا نواصل غنا ودوباى للصباااااااااااح

المؤمن صحيح يااهلى قالو مصاب

ومرات بتجرح بى خنجر الاحباب

مكتوب للقليب يشقى ويقاسى عذاب

يفتش للحنان ويكون نصيبو سباب

وعجبى شديييد والله!!

وليد محمد المبارك

عيون الناس شبابيكا مفتحة برة

ماتخاف ياشفيف تب مابتجينى مضرة

محروس الآله ماعندو الا مسرة

بس خليك معاى اوعك تسوى الشرة




عجبى وعجبك وعجب العاجبهم !!!

أخي الكريم

نـزار حسـين

كدي شوف دي,


ريـــد الــــوز قســا
توب آاااانـــزار واتعقّــل

من أشــواقــه (خــوك)
شـكنــب زمــان واتبهدل

كــان بـيّــن نزل (سيتيت)
ورد في المنـــهــــل

تــلـــف الــراي معــاك,
ضــارب الفـــؤاد في مكتل



وخالص تحياتي

شنو يا نادية
قربّت أعد مع الموسيقي دي وأقول
رقّّّّصنى يا جدع

نادية عثمان.. ابشري بالصح المو كضب !!

Quote: محمد عبد القادر سبيل البنوت بغنولك حلاتو جناى وكت تقعد بجيبولك كبابى الشاى كان قبّلت يلتفتو ويقبلو جاى ومن فرحن يضيع اسمك وتبقى هناى وعجبى !!

هوي قايلاني بستحمل يا بِت الناس نصايبك دي؟!
أنا الجَدْ روحي بتْقرْقِر ولو من ناي فِلِم هندي!
وما بقدر على الهبباي ولا ظنيت أكون جندي
وكان بوستك دا باص بربر، أخير لي نار بنات شندي!

الاستاذة نادية
وتزدادين شموخاوبريقاباطلالتك الجامحة كمهرة عربية يتمنى الفرسان ترويضها.. تطلين على هذا المنبر الصاخب فتهدأ الاصوات المشتجرة وتشرئب الرقاب لحضورك السامق والبهى.. فتلقين بالدرر (مجانا) فى زمن كثر فيه رماة الحجارة وقل فيه رماة الحدق.. وينفلت حلو الكلام منك شعرا فى كل اتجاه كشعرك الغجرى.. فيتناثر الجميع كقطع الشطرنج لتلعبى بهم شعرا ونثرا..
فرحى خلق الله يا نادية بموهبتك ولا تبخلى بترطيب صحراء حياة المنفيين والتائهين فى المرافئ البعيدة بحلو كلامك..
أخيرا.. اردت مجاراتك شعرا ولكن نفسى قصير..

طيفك فى ليالى الغربة مد وشاحو * وهوم بى بعيد رفرف حزين بجناحو
قلبى خلاص تعب ودع زمان افراحو * ومات مكتول بدون تار منهزم بجراحو
ـــــــــــــــــــــــــــــــــــــ
يا نادية الخدود مالك تزيدى الكربة * بعد مات القليب والحال بقت مضطربة
من ملح المنافى ومن صقيع الغربة * جلدنا تخن عديل بقى مستعد للضربة
ــــــــــــــــــــــــــــــــــــ
منان كان زمان وافى وامير القعدة * إلا الغربة هدتو صار عديم الفايدة
حليل ناس كايرو جمعا والقلوب متحدة * تسلمى نادية بس تكفينى منك وردة
ـــــــــــــــــــــــــــــــــــ
يا ارض الكنانة سلام لأحلى اميرة * فخر النوبة نادية صاحبة اجمل سيرة
سليلة كوش بعانخى سبتنى بى تأثيرا * ترفل فى جمالها وفى دمقس حريرا
ــــــــــــــــــــــــــــــــــ
قال الطشت قاللى وقلنا يللا تعالى * يا كايرو العوالم والجمال يتلالا
ضقنا الغربة مرة وآه من دى الحالة * ما اظن الظروف تسمح نزور تمثالا
ــــــــــــــــــــــــــــــــــ
يا كنداكة يا رمز الجمال والسلطة * بيكى يزيد بهانا وبيكى تحلو الخلطة
اوعك يوم تغيبى وتطرشق علينا الخطة * عشان ما نضرب السكلى وتجينا الجلطة
ــــــــــــــــــــــــــــــــــ
عفوا يا صحاب قالو الجمال دا مذاهب * بس نادية الجميلة الودرت كم راهب
نفرتارى ونفرتيتى وجمالا اللاهب * يتبخر امام نادية وشعرها الغارب
ــــــــــــــــــــــــــــــــــ
يا اميرة القوافى ويا لحن اشعارا * ويا اهزوجة البورد الحزين وكنارا
شعللى فينا نيران الهوى واسرارا * بس خلينا من شعرك خجل نتضارى

شكوى الى احمد الشايقي


شقاوة عمري في يوم البلوم ناداني
وفرفر ريشو فوقي وقام سألني سؤال
أها من يوم داكَ بتلفّت على الخلاني
أحاحي دموعي في وادي الفقر والمال
مَبتّبْ تبْ وما بسمع كلام خِلاني
أشاور قلبي واقول: الولِف كتّال
الولف كتال
الولف كتال



ملحوظة
أقصد بوادي الفقر والمال : الاغتراب

مع الإذن, هذه المحاولة مجاوبة للاستاذ / محمــدعبد القادر سبيــل



سالـم, ود سبيل, مـاك البسـف التّابـة


أبواتـك تلــوب الحـار جمـر تقّابــة


مطـر (النتـرة) كان حجّـر دروب الغابة


نارك تضـوي مـن فـوق سنجـة للشكّابـة


-----------------------------------



طايرة الغربة, طاريها التّخربـو خرابة


جـارت خـتـّت الأرباب ورا (الحلاّبـة)


كان مو المولى كاتب (ختوة) في (طالبابا)


كيفن تلقى ود (جاويـش) يتـاوق بابــا


مع خالص تحياتي

----------------------------------------------

النترة:- عينة أو (نوء) من عين الخريف شديدة الإمطار.

ونواصــل مع الاستاذ سبيـــل



الدنيا أم قــدود هـوّن عليــك أتعابــا


خليـها ال – تــدور- يعلا ويزل دولابا


كان ما لحقـنا فيهــا البلحقـو الكسّابة


يكفينـا الشّــرف, إن غلـبـت أم غلابـا



وتحياتي

مع الشكر الموصول اخي احمد الشايقي
الرد:


حباب ود اللعَم بَكَم البدورلو حديس
أجواد ودْ كرم ، كان مدّ ايد ما بقيس
ياتمساح عشاري المابِخود فوق ميس !
بنوت الفريق أُمّات ضمايراً سيس
قِصْرنْ لكْ بالصبر وطوّلن لك دِيس !

اواصل مع اخي احمد الشايقي

اولا اود استشيرك - وكذلك نادية والاخوان - حول البيت الأخير اعلاه هل ابقيه كما هو أم الاجمل ان استبدله بقول آخر أقول فيه:

بِخلنْ لك بالصبر وجدّّعَن لك ديس


ثم بقية القول:


الحُرْ ما بِتُرْ حَتْ لو مكاتل ابليس
يا الدود الرزم وكتين عدوهُ يخيس
ياود عمْ لزَمْ للجايبو الدرب كبّيس
ظبيات البوادي اللِضروعن كيس
عشقن في الخلا وعشمن: بجينا عريس!!

مع التحية

الأخ الأستاذ محمد عبد القادر سبيل


جئت هنا بالسهل الممتنع وحقيقة هو من النظم الرفيع, بالنسبة للبيت


أستسيغه كالأتي:

بخلــن بالصبــر وجدعــن لك ديــس


(اللهم أمين)

وتحياتي باذخــة

أواصل ..

جيت فاجّي الصعيد غيماً مصادفو خميس
حارساك الجبال الواقفة ليك تقيس
ذاكر الله الأحد يا الجدك أب ادريس
فيك برق المكادة اللقلوبنا أنيس
تخلع في الرجال وان جربوك غميس

وتسلموا



ملحوظات
________________
يا اخي احمد الشايقي ونادية عثمان وبقية الزملاء الكرام
1/ ارى ان من المناسب عمل بوست مستقل بعنوان ( مجادعات دوبيت ) يكون مفتوحا للكل ، بدلا من مضايقة نادية في هذا البوست الذي استضافتنا فيه مشكورة رغم انه تحت عنوان ( رباعيات نادية عثمان مختار ..الخ
2/ اذا اتفقنا على ذلك فسوف اتقدم اليكم بموجهات عامة للبوست الجديد نلتزم بها جميعا للمصلحة العامة، هذا اذا وافقتم طبعا وذلك تعزيزا واهتماما بهذا الفن الشعبي العريق.
3/ يا احمد وما رأيك اذا كان البيت المشار اليه كالآتي
طالن بالصبر وطولن لك ديس !

الشايقى
منان
محمد سبيل

نزار

وكل الذين احببتهم واحترمتهم هاهنا


خلاص بيتى الكبير الليلة ضاق يااهلنا


راحلين منى ليه شايلين شجن ومحنة

خليكم ده بيتكم ودوحة ليكم جنة


هنا نبتت ورود وكبر الاراك والحنة

أخي الأستاذ سبيل الموقر


أوافق بالطبع وأتمنى فتح البوست بمشاركة الأخت الكريمة نادية عثمان واقترح نقل المشاركات التي جرت هنا كبدايات وردود إلى البوست الجديد.

بالنسبة للبيت ما رأيك فيما يلي:-


قاصرات الصّبــر ومطــوّلات الدّيــس.

عندي مقاطع جاهزة فيها نفس القوافي التي أوردتها اليوم وقد يتعذر تغييرها, فأعتذر مقــدماً.


لك وللجميع تقديري.

يا نادية بنت عثمان ليه ما بتردي عليا
طناشك ياام زمام زاد الأزية أزيــّة
خليتك لي الخلق البحر يا شقيّــة
حالف ما أجيك لو قالوا بالزندية

ياحبيب نورة عارف انت ماك شوية

قاعد فى الفكر والله صباح وعشية

ماتزعل تعال خلى العليا عليا

انا والله حزينة من البلانى اذية




بعدين بطل حركاتك دى رسلت ليك رسالتين بى لفة الياهو يعنى ماشفتهم ؟

انت عزيز وغالى ارقد عافية اخوى

نادية العزيزة تداعى واذهبى بنا الى حدائقك الخلفية..
جميل هذا النظم...وفيه رائحة دعاش تذهب بالعقول فلا تحرمينا
حتما سوف اعود،،،

والله أطرشني يا نادية
كدي أقوم أشوف الخبر شنو!!

الاخ الأستاذ محمد عبدالقادر سبيل

الموقــر


في هذا البيت ملاحم ومعاني وما زلت لا استقر فيه على حال.

ماذا تري في

(قاصرات الصبر طايلات مجادع الديس)

أو

قصّــرن الصـبــر طايلات مجادع الديـس

وأميل للصيغة الأخيرة ولا يخفى عليكم ما تضيف من بديع الوصف الإجمالي

تحياتي

الأستـاذة / ناديـة عثمـان

أولا تحياتي

ثانياً دعوة الأسبوع الماضي على العين والرأس
ثم اسمعي ما يلي:-

متلــك في الفنــون

من يوم (عـرف) مـا لقـيـت

و(شــايتك) راكـزة تـب

مـا بقلـعـــا الخرتـيـت

ورايـك في الـرجـوح

ظـاهـر تقـول سـومـيــت

والنايــل رضـاك

والــداه أمــه (بـخـيـت)

وإعجابي وخالص تحياتي.

الأخت الكريمة نادية عثمان

سنبقى كلما مددت الافاق وداً وترحاباً كشأن أبناء وبنات البلـد, والذي فهمته من أخي الاستاذ / سبيـل , أنه يريد أن يفتح بوستأً لمجادعي الدوبيت السوداني وفق ضوابط منافســة معينة , وذلك لتعدد موضوعات الدوبيت أما هذا البوسـت فسيبقى في إطار مواضيعــه وخطــوطه البيانية.




الأستاذ / سبيـل

دعنا نقترح أسماء للعنوان وليكن مقدمـة لخطـوات تتلاحـق ولجولات أخرى تنظم بعده.

مثلاً

(خيمــة الدوبيت) - الملتقى الأول للمجادعـة.

ملتقى شعراء الدوبيت - مجادعة فورية .

او ما شــابه, مع ضرورة تعيين (مودريتـر) للقاء يقرر سير الحوار واقترح بدء الدعـوة للمجادعــة بأبيات يقدمها أحد المشاركين ونقل عدد من المشاركات السابقة , هنــا.

خالص تحياتي

احمد الشايقى واخوانى الرجال بالكلام الصح المو كضب


عايزاكم معاى لاتفوتوا تقطعوا بيا

اخوانى الرجال صافين بياض النية


اولاد عازة حازوا الجائزة الذهبية

فد شافع يمين يساوى الف ومية

وعجبى

اختي نادية مختار
اخي احمد الشايقي

السلام عليكم ورحمة الله وبركاته

اولا البوست الجديد ضروري يا نادية ويعتبر وليد بوستك هذا ولابد سيشرفك التطور الذي بدأ في بيتكم العامر وانبثق منه .. خاصة وان هذا البوست عنوانه كما ترين يجعل المسار الذي بدأ التحول اليه غير متناغم وغير مناسب .

ثانيا اقترح ان نكمل نقاشنا هنا حول اسم البوست الجديد ( وأقترح انا ان تقومي انت باختيار الاسم المناسب من بين الاسماء التي اقترحها ود الشايقي اعلاه

ثالثا سأتقدم اليكم بعد يومين ببنود الاسس التي ستؤطر البوست الجديد وبعد أخذ موافقتكم وتعديلاتكم سأقوم- بعد اذنكم طبعا - برفعه من جانبي حسب العنوان الذي تختارينه انت يا استاذه نادية .

ثالثا اقترح أن يبدأ البوست الجديد بمربع ( رفيع المستوى) للحاردلو وذلك نوعا من رسالة تحية لروحه الشاعرة ولما اسهم به في التأسيس الحقيقي والقوي لهذا الفن السوداني الرفيع ،حيث ان أحمد عوض الكريم اب سن هو بمثابة المتنبي في شعرنا الشعبي، ومن باب الوفاء اقترح هذا المربع الذي ما يزال يدهشني منذ عرفته وحتى غدا وبعده :

الليلة بشوف بِشْلِع بريق النَوْ
وحِس رعّادو بنْقُر في الضمير كَوْ كَوْ
شوف كُور القطا دوّر مشارع الهَوْ
فرقان البطانة اتماسكن بالضَوْ
وبعدين:
ويا احمد أجدني افضل البيت بصيغته الاولى ، لأنك في البيت الآخر جعلتهن قصارا ( قصّرن الصبر) وهو الخطأ نفسه الذي وقعت فيه انا حينما قلت ( قصرن بالصبر وطولن لك ديس ) ولقد كان كلامك في محله حينما اخترت لي قولي الآخر ( بخلن بالصبر وجدّعن لك ديس ) مع حذف كلمة (لك) بعد (بخلن) وذلك لضرورة الوزن واشكرك على اللحظ الجميل .
_____________
رب اشرح لي صدري

بتنا ناديه طلت بالجميل في الساحه
مما جاتنا حلت في العقول بي راحه
مكتوب ليها تقدل في الشعر سواحه
هاشه وباشه ديمه وللشرور مساحه

اها العندي اديتوا

والله يا استاذ لاكن ما شعااااااار

وتحت تحت شعرك اسمح من تلحينك (ده هزار عشان ناس البورد ديل اي شي بسوهو جد)

لينا زمن ما سمعنا منك حاجة
اضنينا ما صنو من المذيكا البنسمعها هنا في السودان
ورايك شنو في شريط عصام محمد نور الجديد
عبقرية الكاشف

الوليد ياخوي انا ما محتاج
أصلو انا (ملاكم سابق)
وبعدين كويس كان كده كان الموضوع بتاع المزيكه كان فكه وكده
اها نقوم ننجر عليك الله ما اخير من جلابيه بيضا مكويه

توقع في القريب العاجل انتاج غزير ومركز وموجه
لك الموده

الاستاذ قال
توقع في القريب العاجل انتاج غزير ومركز وموجه

طمنتي والله يا استاذ
قربنا نطرش من طقيع الحلل الهنا ده

بى قول الفطاحلة ود خالى العزيز شاعر وزول موسيقار

موسيقى وشعر والحان وقلبا حار


رباعية وغنا ودوبيت شعر مسدار

بلال ياخالى ولدك علما مولع نار


ود المبارك والشايقى ونزار و..و..و..من دون فرز خوفا من الغلط او النسيان


خلاص انا راضية نرحل للبيت الكبير

يلا وشدوا حيلكم وينطلق النفير


زى ماقلتو نبدأ بالسمح الخطير

وبى قول الفطاحلة الزهر النضير




الاحباء اولاد البلد انا معاكم ويلا نبدا وفى انتظار البوست الجديد وممكن نسميه مثلا مسدار بلدنا ..او مجادعات ..او دوبيت والف بيت ..او كما تحبون

المهم ان لايتوقف هذا العمل الرائع منكم ياناس اصيلة ..

up