Post: #1
Title: أولاد عوائل وعندنا فايل !!!!
Author: نادية عثمان
Date: 03-01-2005, 08:30 PM
Parent: #0
كلما ذهبت الى السودان فى اجازتى السنوية انا وطفلتى الوحيدة نعود من هناك محملين بكثير من الخيرات السودانية بمختلف انواعها واحجامها ونكهاتها ..!!
فمن الويكة المطحونة ، مرورا بالشطة والشمار ، والابريه حتى ولو لم يكن رمضان على الابواب تماما ..!!
والتسالى ، والطلح بالكميات , والشاف ، وبخور الصندل وخمرة الضفرة ,والدلكة ، ومراكيب الجلد لزوجى ولشقيقى ، والشباشب السيور لشقيقتى وان توفرت الميزانية فلامانع من توب ربط على الماشى من ابو مائة الف (ابو الرخا )!!
وايضا لابد من لبسة بلدى لزوجى واخى وهى الجلابية والطاقية والشال طقم واحد من نفس التطريز والشكل الفنى البديع (لزوم المركوب جلد الاصلة طبعا )!!
وكما اعود محملة بهذه الاشياء والاغراض الحميمة اعود ايضا محملة بكم رهيب من المصطلحات التى نظل نتداولها انا وابنتى الى ان يحفظها زوجى المصرى النشأة والمزاج بحكم الميلاد والتربية والمعيشة طيلة عمره فى مصر ويردد معنا هذه المصطلحات وكأنها اقوال مأثورة وقد لايفهم السياق الذى يجب ان يوضع فيه المصطلح ولكنه يردده اعجابا ومن باب التغيير فى اللهجة احيانا ..!!
ومن هذه المصطلحات التى بدأ انتشارها فى اوساط الشارع السودانى سريعا جدا وبين مختلف الطبقات المتعلمة او غيرها مثلا:
كيس نايلو والهوا شايلو !!
كركديه وماعرفنا ليه!!
اولاد عوائل وعندنا فايل !!
بشتنة ورقاد واطة !!
سمعتنا ومصاريف جامعتنا !!
بجم وعدم فهم !!
مكرونة وماعرفنا لونها !!
مس كولنا وناكل فى فولنا !!
وغيرها كثير وكثير جدا ..!!
وهذه المصطلحات كما قلت سابقا ليست حكرا على طبقة معينة كالشماشة مثلا فهى لغة طلاب الجامعات والصحافيين الشباب وموظفين البنوك وتلاميذ المدارس وغيرهم كثير التقيتهم فى الخرطوم ووجدتهم يتحدثون بهذه اللغة ..
لم استغرب ذلك ففى القاهرة يوميا يخرج علينا مصطلح جديد
مثل :
روش (وتعنى اساتيل او حلو )
وانجز
وروش طحن
وغيرها مما افهمه ولاافهمه !!
فمن اين وكيف ولماذا تتولد هذه اللغة او المصطلحات الجديدة هذا مااود ان اطرحه معكم فى هذا البوست الذى اتمنى ان تكون فكرته مفهومة وواضحة بما يجعل النقاش ثر ومفيد وايجابى وموضوعى ..
هذا مع فائق تقديرى
وعظيم ودى احبتى البورداب ..!
|
Post: #2
Title: Re: أولاد عوائل وعندنا فايل !!!!
Author: فريد ودالمسيد
Date: 03-01-2005, 09:48 PM
Parent: #1
الأستاذة نادية
صباحاتك فل
دائما إطلالاتك تحمل الجديد والمفيد
ودائما أبحث عن أشعارك في كل بوست لروعتها
أطمع في نسخة أو مجموعة من الأشعار الخاصة بيك لو أمكن
أما عن موضوع المصطلحات المتداولة هذه الأيام أو كما يسمونها لغة الرندوك حسب معرفتي هناك بعض الناس من العامة اتصفوا بسرعة البديهة والتعليق الساخر وأحيانا تخرج من أفواههم بعض المصطلحات يرددها من حولهم فتتسع دائرة الترديد حتى تغطي كل القطاعات وأعتقد كل مدينة في السودان أيضا تنفرد بمصطلحاتها الخاصة بها ويعتبر البعض تداول هذه المصطلحات نوع من الخروج من جو النكد ليضفوا على الجو المحيط نوع من الكوميديا الشعبية .. وأيضا بعض الذين يستخدمون هذه المصطلحات من باب أن يوصفوا بالفهلوة أو أن يقال عنهم (تفتيحة)
هذا كل ماعندي ولنسمع من الآخرين.....
|
Post: #3
Title: Re: أولاد عوائل وعندنا فايل !!!!
Author: ترهاقا
Date: 03-01-2005, 10:22 PM
Parent: #2
الاخت نادية
Quote: كيس نايلو والهوا شايلو !!
كركديه وماعرفنا ليه!!
اولاد عوائل وعندنا فايل !!
بشتنة ورقاد واطة !!
سمعتنا ومصاريف جامعتنا !!
بجم وعدم فهم !!
مكرونة وماعرفنا لونها !!
مس كولنا وناكل فى فولنا !!
|
كلام لذيذ جدا، تعرفى انا بحاول احفظ المصطلحات دى عشان اقبض بيها الجو
السودانيين لذاذ
مع التحايا للاسرة
|
Post: #5
Title: Re: أولاد عوائل وعندنا فايل !!!!
Author: نادية عثمان
Date: 03-02-2005, 00:08 AM
Parent: #3
ترهاقا اخوى الغالى
Quote: كلام لذيذ جدا، تعرفى انا بحاول احفظ المصطلحات دى عشان اقبض بيها الجو
السودانيين لذاذ |
طبعا لازم تحفظها عشان تقشر بيها بكرة فى المكتب واى زول يكلمك تقول ليهو بشتنة ورقاد واطة !!
هههههههههه
تسلم على المرور وفعلا ياخى السودانيين ديل لذاااااااااذ جدا والله
ومع احلى التحايا لاسرتك ياكريم الاصل وتسلم يارب
|
Post: #4
Title: Re: أولاد عوائل وعندنا فايل !!!!
Author: نادية عثمان
Date: 03-01-2005, 11:48 PM
Parent: #2
الاكرم الفاضل فريد ود المسيد
وانت كمان يارب دائما
Quote: دائما إطلالاتك تحمل الجديد والمفيد
ودائما أبحث عن أشعارك في كل بوست لروعتها |
تسلم ودى شهادة اعتز بيها والله..وسعيدة دون شك اشعارى ان بحثت عنها وقرأتها ..
| Quote: أطمع في نسخة أو مجموعة من الأشعار الخاصة بيك لو أمكن |
مافى اى مشكلة وهذا من دواعى سرورى انت بس ورينى العنوان وانا جاهزة ارسل ليك الديوان باذن الله ..
Quote:
أما عن موضوع المصطلحات المتداولة هذه الأيام أو كما يسمونها لغة الرندوك حسب معرفتي هناك بعض الناس من العامة اتصفوا بسرعة البديهة والتعليق الساخر وأحيانا تخرج من أفواههم بعض المصطلحات يرددها من حولهم فتتسع دائرة الترديد حتى تغطي كل القطاعات وأعتقد كل مدينة في السودان أيضا تنفرد بمصطلحاتها الخاصة بها ويعتبر البعض تداول هذه المصطلحات نوع من الخروج من جو النكد ليضفوا على الجو المحيط نوع من الكوميديا الشعبية .. وأيضا بعض الذين يستخدمون هذه المصطلحات من باب أن يوصفوا بالفهلوة أو أن يقال عنهم (تفتيحة) |
لغة الرندوك؟ وهم الرندوك زاتهم منو يعنى ؟ وصدقت فاستخدام هذه المصطلحات قد شاعت بشكل كبير فى السودان ككل ولكل مصطلح مختلف حسب المنطقة ..
| Quote: هذا كل ماعندي ولنسمع من الآخرين..... |
كفيت ووفيت تسلم وكن مارا دوما من بيوتاتى فوجودك يسعدنى جدا
|
Post: #6
Title: Re: أولاد عوائل وعندنا فايل !!!!
Author: Dr. Moiz Bakhiet
Date: 03-02-2005, 00:18 AM
Parent: #4
الأمورة نادية،
طبعاً الحاجات دي من زمان موجودة لكنها بتتطور كل مرة.
مثلاً:
تاكلو تسالينا
وتنسوا أسامينا..
الصقت جا
خلي عندك زوق
الباب اتقفل
يلا نط بي فوق
وحاجات تانية كتيرة أحاول أتذكرها واجيك راجع
|
Post: #8
Title: Re: أولاد عوائل وعندنا فايل !!!!
Author: cantona_1
Date: 03-02-2005, 01:01 AM
Parent: #6
سلامات يا شباب
أها هاكم دي: نعمل جوزيف لاقو ونسافر نيكاراجوا
البعرفها ليهو جائزة كبيرة
ألمي البارد بقد الدلو
كباشي الصافي
|
Post: #27
Title: Re: أولاد عوائل وعندنا فايل !!!!
Author: نادية عثمان
Date: 03-02-2005, 08:04 PM
Parent: #8
cantona_1
تسلم على المرور الباهى
وهاك انت دى
حبونا وفى الحدائق شرونا !!
وتعال تاااانى !!
فى رجاك!!
|
Post: #16
Title: Re: أولاد عوائل وعندنا فايل !!!!
Author: نادية عثمان
Date: 03-02-2005, 06:27 AM
Parent: #6
د. معز الغالى
مرحب بيك حبابك
اليوم السعيد الليلة جابك
Quote: تاكلو تسالينا
وتنسوا أسامينا.. |
وتكشكرو فينا وتنسو وعدكم لينا !!
انت والموصلى طبعا ..!! فاهمنى يافردة موش كده ؟!!
هههههههههه
| Quote: وحاجات تانية كتيرة أحاول أتذكرها واجيك راجع |
وانا فى رجااااااااك..!!
|
Post: #20
Title: Re: أولاد عوائل وعندنا فايل !!!!
Author: Mohamed A. Salih
Date: 03-02-2005, 10:08 AM
Parent: #6
Quote: تاكلو تسالينا
وتنسوا أسامينا.. |
وفي روايه أخري
تاكل التسالي تساهر الليالي
تاكل المنقه تخاف الزنقه
شلاليف ولا مجاري خريف
نخره ولا ....
نواصل
|
Post: #7
Title: Re: أولاد عوائل وعندنا فايل !!!!
Author: فريد ودالمسيد
Date: 03-02-2005, 00:59 AM
Parent: #1
الأستاذة نادية
أشكرك على التفضل بإرسال الديوان
وعنواني
الإمارات العربية المتحدة
دبي
مؤسسة الشيخ محمدبن راشد آل مكتوم
ص ب 28428
UAE
DUBAI
P.O.BOX28428
|
Post: #9
Title: Re: أولاد عوائل وعندنا فايل !!!!
Author: يازولyazoalيازول
Date: 03-02-2005, 01:45 AM
Parent: #7
يا دكتور معز ، الظاهر عليك حضرت:
كده يا ورور
تشرب شايينا
وتكسر كبابينا
يا ناديه ، البوست ظريف شديد
|
Post: #10
Title: Re: أولاد عوائل وعندنا فايل !!!!
Author: محمد حسن العمدة
Date: 03-02-2005, 02:11 AM
Parent: #9
| Quote: يا ناديه ، البوست ظريف شديد |
و انت الاظرف 
شفت نادية دي بتنكت الناس كيف ؟؟؟؟
|
Post: #22
Title: Re: أولاد عوائل وعندنا فايل !!!!
Author: نادية عثمان
Date: 03-02-2005, 06:36 PM
Parent: #10
محمد حسن العمدة الغالى
| Quote: شفت نادية دي بتنكت الناس كيف ؟؟؟؟ |
كلامك صاح والدليل انى نكتك من مافى ..!!!
يازول انت بتمشى وين ؟
والله صحى :
لمتنا واولاد حلتنا ..!!
|
Post: #11
Title: Re: أولاد عوائل وعندنا فايل !!!!
Author: Ahmed Osman
Date: 03-02-2005, 02:17 AM
Parent: #9
الاخت المحترمة والقلم الرشيق نادية عثمان
ان كتاباتك سهلة الهضم وفطائر مسكرة يحلو التهامها مع قهوة الصباح
اوع بس تقومى بعد يومين يصيك ابو الحريد تحردى و تتوقفى من كتاباتك الشيقة
بس خايف يجى الخريف واللوارى تقيف
التحايا لك ولاسرتك
|
Post: #12
Title: Re: أولاد عوائل وعندنا فايل !!!!
Author: bayan
Date: 03-02-2005, 02:45 AM
Parent: #11
نادية العثل
بوست حلو شديد..
جد كلما امشى القى كمية من الكلام الذى دا بسطح اسبوع لكن تانى بعرفو..
لكن من اجى هنا بنساهم..
اها اتمنى يجو ناس يثروا البوست بيها.. نعمل معجم الراندوك...
مودتى وماسنجرك الماشى كدارى ما وصل
|
Post: #24
Title: Re: أولاد عوائل وعندنا فايل !!!!
Author: نادية عثمان
Date: 03-02-2005, 07:13 PM
Parent: #12
بيان الدكتورة الغالية
عثل انتى وبثكويت يانجاة النقية جدا..
Quote: بوست حلو شديد..
جد كلما امشى القى كمية من الكلام الذى دا بسطح اسبوع لكن تانى بعرفو..
لكن من اجى هنا بنساهم..
اها اتمنى يجو ناس يثروا البوست بيها.. نعمل معجم الراندوك... |
طبعا لازم نعمل القاموس ونبيع المصطلح بدولار عشان نحافظ على سمعتنا ومصاريف جامعتنا !!
| Quote: مودتى وماسنجرك الماشى كدارى ما وصل |
والله يابنونة وماطالبانى حليفة الماسنجر بلّك روحو براهو وحلف مايشتغل ومزهجنى زهج العدو اقايتو قاعدة اعافر فيهو والله كريم ..!
|
Post: #23
Title: Re: أولاد عوائل وعندنا فايل !!!!
Author: نادية عثمان
Date: 03-02-2005, 06:59 PM
Parent: #11
العزيز احمد عثمان
| Quote: ان كتاباتك سهلة الهضم وفطائر مسكرة يحلو التهامها مع قهوة الصباح |
تسلم يااحمد وسعيدة بمحاولاتى تقديم بعض الاسهامات المفيدة فى هذا المنبر الحر الذى جمعنا بحب واحترام ..
Quote: اوع بس تقومى بعد يومين يصيك ابو الحريد تحردى و تتوقفى من كتاباتك الشيقة
بس خايف يجى الخريف واللوارى تقيف |
ماتخاف على اختك يااحمد وربنا مايجيب يوم فراقكم يارب
وانا قاءاااااااااااااااااااعدة زى ماقالت الغالية تماضر ومافى شئ بيحردنى لحدى الان على الاقل..!
| Quote: التحايا لك ولاسرتك |
والتحايا لكل احبابك واهلك..
|
Post: #19
Title: Re: أولاد عوائل وعندنا فايل !!!!
Author: نادية عثمان
Date: 03-02-2005, 09:55 AM
Parent: #7
الاكرم فريد ود المسيد تسلم على الاهتمام
واتمنى من ان يصلك فى اقرب وقت
وكن مارا من بيوتاتى دوما فوجودك مرحب به جدا ..
|
Post: #13
Title: Re: أولاد عوائل وعندنا فايل !!!!
Author: مريم بنت الحسين
Date: 03-02-2005, 02:54 AM
Parent: #1
نادية (صاحبتي)...
عملت موقع (سنة دو).. فيهو المصطلحات دي.. والزمن داك كانت مصطلحات غير القلتيها دي... طبعا الموقع هجرته بعد ما عملته... لكن لساهو قاعد..
لو ضغطي http://www.geocities.com/marryy9/shbab.html ... بتلقي المصطلحات الشبابية دي
وهو ضغطي http://connect.to/sudaneyes .. بتلقي موقعي كله...
مع مودتي.. وسلامي للعروسه (بنتك)
بنت الحسين
|
Post: #28
Title: Re: أولاد عوائل وعندنا فايل !!!!
Author: نادية عثمان
Date: 03-02-2005, 09:23 PM
Parent: #13
مريم بت الحسين ..صحبتى الغالية
والله يابتى محتارة جنس حيرة!!
ايوة لانى رديت عليك بمداخلة كبيييرة وهسى ..سقط لقط ..مالقيتها !!!!
المهم ياعسل الروابط لانها من سنة دو ابت تفتح اكتبى لينا عديل يافردة !!
و
مكرونة وماعرفنا لونها!!
|
Post: #14
Title: Re: أولاد عوائل وعندنا فايل !!!!
Author: محارب
Date: 03-02-2005, 03:10 AM
Parent: #1
العزيزة نادية ...
بوست حلو جدا جدا
ومنتظرين الزيادة
اضيف ليك اتنين :
* قهر وفراق اهل
* شدة وغسيل عدة
وواحدة بالرطانة
* مونن تاد قريرو مونن
|
Post: #37
Title: Re: أولاد عوائل وعندنا فايل !!!!
Author: نادية عثمان
Date: 03-03-2005, 08:26 AM
Parent: #14
العزيز محارب
تسلم على المرور الباهى
| Quote: مونن تاد قريرو مونن |
اها لكن دى ترجمتها شنو ؟؟
انتى محسى اكيد لانو دى مارطانتا ولاشنو ياموصلى ود خالى ؟؟
|
Post: #38
Title: Re: أولاد عوائل وعندنا فايل !!!!
Author: Mohamed A. Salih
Date: 03-03-2005, 09:15 AM
Parent: #37
LOOOOOOOOOOOOOOOOOOOOOOOOOOOL
يا ناديه الزول دنقلاوي وده رطانتنا
مونن تاد قريرو مونن = لامن تابي .. تابي في القرير
اها الدناقله المستدنقله بتاعن سجيمان اتعرفو
 
|
Post: #40
Title: Re: أولاد عوائل وعندنا فايل !!!!
Author: نادية عثمان
Date: 03-03-2005, 05:14 PM
Parent: #38
محمد صالح تود
Quote: يا ناديه الزول دنقلاوي وده رطانتنا
مونن تاد قريرو مونن = لامن تابي .. تابي في القرير
اها الدناقله المستدنقله بتاعن سجيمان اتعرفو |
دى اقايتو ماادونا ليها فى دنقلا!!
يكون المنهج اتغير ولاشنو؟!!!!!!1
|
Post: #15
Title: Re: أولاد عوائل وعندنا فايل !!!!
Author: maia
Date: 03-02-2005, 03:13 AM
Parent: #1
العزيزة نادية
فعلا الشعب السوداني تحفة في حكاية اختراع المصطلحات
بس اكتر مصطلح حاليا قابض الجو بتع : الشي ده بيفهمك حاجة
و ما اكتر المصطلحات
تسلمي يا ستي للبوست الظريف
|
Post: #50
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 09:00 AM
Parent: #15
مايا
ياسلام على المرور الحلو
Quote: فعلا الشعب السوداني تحفة في حكاية اختراع المصطلحات
بس اكتر مصطلح حاليا قابض الجو بتع : الشي ده بيفهمك حاجة |
فعلا الشئ ده فهمنا حاجة !!
| Quote: و ما اكتر المصطلحات |
فى رجاك يلا نقول كل الحافظينو من مصطلحات!!
|
Post: #17
Title: Re: أولاد عوائل وعندنا فايل !!!!
Author: ود الشيخ
Date: 03-02-2005, 07:05 AM
Parent: #1
والله يا نادية
قولتي لي كشا مشا عزمو فطور جا عشا
وشوفي هشام طلع تقتيحة من زمن يا ورور
ما نسيناكم ونسيتونا
نمشي ليكم وما تجونا
خارج النص
قالوا السحسوح ما بلبس فنيلة بي حمالات لانها بتنزل كتفو
وبياكل لبانه عشان يريض خشمو
وما بلبس السفنجةعشان بتشاغلو
طبعاً يا نادية لواري السفنجة لمن تدوسي فرملة بتعمل بس بس
|
Post: #41
Title: Re: أولاد عوائل وعندنا فايل !!!!
Author: نادية عثمان
Date: 03-03-2005, 05:21 PM
Parent: #17
ود الشيخ الغالى
| Quote: وما بلبس السفنجةعشان بتشاغلو |
دى اقايتو قلبت فيها الهوبا ياود الشيخ
سفنجة شنو انت من زمن السفنجات ؟
برستيج ياناس وليد!!
استايل ياناس وائل !!
|
Post: #18
Title: Re: أولاد عوائل وعندنا فايل !!!!
Author: wadaldeem
Date: 03-02-2005, 08:15 AM
Parent: #1
ماتشتتى جهودنا خلينا نتم بتاع الغناء الهابط داك بعداك افتحى واحد تانى
على العموم
ماعلينا
ياكانتونا انتو السودان دا بتجوه زيارة كل سنتين عشان كدا ماتخش فى مسالة تحديات وهاك دى لو عرفتها ابقى رسل لى ميل
........خلاص خبزتو?..........نجيب الرقشة?
والداير دكشنرى يرسل لينا عنوانو
كتبت ليك لا بينى بينك ريدة لا قصة غرام...طيب القال ليك اكتب ليها منو
ودالديم
|
Post: #21
Title: Re: أولاد عوائل وعندنا فايل !!!!
Author: عشة بت فاطنة
Date: 03-02-2005, 02:17 PM
Parent: #18
ناديةهاك...
تراترا يا اللستك الورى
أكلتو تسالينا ونسيتو اسامينا
قطاطي ومستوى واط...
كرور يا وسخ الخور
بطاطس ومستوى غاتس
الصين فيها حصين
كيس نايلو والهواشايلو، الصين فيها حصين ، كل ستة في حتة ، وكل تلاتة في شكلاتة ، وكل ورقة سادة فرقة، أنت قايل كرعينا رقاق ولا مولودين في زقاق ، نحن اولاد عوايل وعندنا فايل ، وقع ليك ولا أعيدو ليك .
أعمل شخيت وأقيف بعيد ..( تنفع للبورد!!)
|
Post: #25
Title: Re: أولاد عوائل وعندنا فايل !!!!
Author: Tumadir
Date: 03-02-2005, 07:42 PM
Parent: #21
فى المسرح عندنا ...ولمن اهم "المباحث" للوصول لمنابع الابعاد الثلاثية (نفسية اجتماعية جسمانية) للشخصية موضوع البحث من جهة الممثل او المخرج حتى يتم وضعها على خشبة المسرح هى لغة الشخصية او الالفاظ التى تستخدمها...
وذلك لان فئات المجتمع المختلفة تمر بظروف معرفية يومية مختلفة بحسب مستوى تعليمها وتلقيها للثقافة...وثقافة الفئة الواحدة لها منتوج لغوى واحد او متقارب...وكثير من الالفاظ المعلبة هذه ...تحدث وسط الفئات التى تتعاطى الثقافة السماعية...فانشغالهم بكسب العيش "او الفقر المدقع" او اهمال المجتمع لاحتياجاتهم المعرفية ...تجبرهم على ابتكار او ابداع مفرداتهم الخاصة التى تحتوى على قدر من السخرية وعدم المبالاة بالقيم السائدة للثقافة التى يحترقون تحت سياطها..او قل هى "ثقافة المركز"او القنوات الرسمية...فهم خارج محيط التعليم المركزى او مصلحة العمل المركزية او العنصر المركزى او السبكة الثقافية المعترف بها مركزيا...
"شفتو الدم ده تقيل بقى كيف"؟ المهم.. الاعجب ان احد الظرفاء الذين عرفتهم الخرطوم فى القرن الماضى هو الدكتور عوض دكام ولعله انحيازه لعرق مهمش او انتماؤه لثقافة مهمشة بالدم...هو الذى عمل على انتاجه لهذه الاقوال التى اشتهرت حتى بين مثقفى عصره...
وقد قيل ان بعضها كان يجاريه فيها الفنان الظريف الاخر زيدان ابراهيم ...وقيل عمر الشاعر واسماء اخرى كثيرة
...
القدم بالقدم والامات خدم...
كلام ياعوض دكام
ونحن اخر تعابير "مسجوعة"سمعناها قبل ان نغادر السودان كانت ناس
بنضورة وكشفنا دورا...
وتكوركو لينا نجيكم ..نجيكم تكوركو...
والباقى نسيتو>>
كل ما اتذكر حاجة بجى يا نادية الظريفة
|
Post: #26
Title: Re: أولاد عوائل وعندنا فايل !!!!
Author: إيمان أحمد
Date: 03-02-2005, 08:00 PM
Parent: #25
العزيزة نادية
بوست روش طحن
(من زمان كايسة لي حتة استعملها فيها ، ومالاقية )
|
Post: #52
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 09:45 AM
Parent: #26
ايمان احمد الغالية
مرحب بيك كتييييييييييييييير
وبى زيارتك بوستى نور
والله نور
كلووووووووو زينة !!
Quote: بوست روش طحن
(من زمان كايسة لي حتة استعملها فيها ، ومالاقية )
|
سألت ليك ايمان بتى من معناها
قالت لى روش طحن
يعنى استايل اوى
شيك لى درجة يعنى
روش يعنى هاى فى كل شئ
وقع ليك ولااكروو ليك..!!
انتى بتحبى كلام المصريين يظهر عليك
اشطة ياباشا
اوعى وشك يتعوّر !!
وهكذا..!!
|
Post: #51
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 09:08 AM
Parent: #25
الحبيبة الغالية جدا تماضر
Quote: والباقى نسيتو>>
كل ما اتذكر حاجة بجى يا نادية الظريفة
|
ودائما بكون فى رجاك ياعسل حياتنا فى الزمن المسيخ !!
وهاك منى ديل مؤلفين منى عشانك مخصوص..!!
تماضر عسلنا ومافى زول بحصلنا !!
حبيناك لى الله يانوارة الحلة !!
بت الشيخ لذيذة وفى قلوبنا عزيزة !!
وهكذا..!!
|
Post: #49
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 08:05 AM
Parent: #21
عشوشتنا الطيبة بت امنا فاطمة السمحة
| Quote: أعمل شخيت وأقيف بعيد ..( تنفع للبورد!!) |
وهاك ديل مؤلفين عشانك منى مخصوص:
حصتين عتاب يالمسجلة غياب!!
يامطرة ادينا رشة ويازمن جيب لينا عشة !!
|
Post: #39
Title: Re: أولاد عوائل وعندنا فايل !!!!
Author: نادية عثمان
Date: 03-03-2005, 03:33 PM
Parent: #18
ود الديم العزيز
Quote: ماتشتتى جهودنا خلينا نتم بتاع الغناء الهابط داك بعداك افتحى واحد تانى
على العموم
ماعلينا |
ياود الديوم ده ماتشتيت جهود ولاحاجة لانى عارفة طاقة البورداب الشمارية كبيرة جدا وامشى شوف ردى فى البوست داك برضو سمح..!
Quote: ياكانتونا انتو السودان دا بتجوه زيارة كل سنتين عشان كدا ماتخش فى مسالة تحديات وهاك دى لو عرفتها ابقى رسل لى ميل
........خلاص خبزتو?..........نجيب الرقشة? |
الكلام مالى وانا مامطيرة عينى لانى بجئ السودان كل سنة وااااااحدة موش اتنين!!
| Quote: والداير دكشنرى يرسل لينا عنوانو |
عنوانى الشعبية جنب المركز الصحى وفى القاهرة جنب سوق الخضار
| Quote: كتبت ليك لا بينى بينك ريدة لا قصة غرام...طيب القال ليك اكتب ليها منو |
بس كده شوبار وعدم دبار !!
ياتو ديم فى الديومات؟
|
Post: #29
Title: Re: أولاد عوائل وعندنا فايل !!!!
Author: ابو مهند
Date: 03-03-2005, 02:40 AM
Parent: #1
هوي يا انتو شنو كلو في محلو كل تلاته في خلاطة,كل سته في حته,كل جركان في مكانه كركدي وماعرفته ليه قرفة وعدم عرفه,هبهان وعدم بيان,كيس نايلو والهوا شايلو,اقيف بعيد واعمل شخيت اعمل لاين واقيف اعاين, انتو قايلين كرعينارقاق ولا مولدين في زقاق,اولاد عوايل وعندنا فايل,,,
وقع ليكم ولا اعيدو ليكم
شوية هترشة
|
Post: #31
Title: Re: أولاد عوائل وعندنا فايل !!!!
Author: إسماعيل وراق
Date: 03-03-2005, 03:18 AM
Parent: #29
إن كان للبوستات دم فهذا البوست دمه خفيف جداً
شكراً نادية على خفة الروح
**
كانتونا_1
حمد لله على السلامة
جوزيف لاغو مقصود بها المجازفة..
|
Post: #54
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 10:00 AM
Parent: #31
الاكرم اسماعيل وراق
Quote: إن كان للبوستات دم فهذا البوست دمه خفيف جداً
شكراً نادية على خفة الروح |
تسلم اخوى على الاطراء البوستى اللطيف!
|
Post: #53
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 09:53 AM
Parent: #29
ابو مهند الظريف جدا
Quote: هوي يا انتو شنو كلو في محلو كل تلاته في خلاطة,كل سته في حته,كل جركان في مكانه كركدي وماعرفته ليه قرفة وعدم عرفه,هبهان وعدم بيان,كيس نايلو والهوا شايلو,اقيف بعيد واعمل شخيت اعمل لاين واقيف اعاين, انتو قايلين كرعينارقاق ولا مولدين في زقاق,اولاد عوايل وعندنا فايل,,,
وقع ليكم ولا اعيدو ليكم |
اقايتو مافضلت لينا حاجة نقولها
لكن ممكن تعيدو لينا
لانو
ماوقع لينا
اها شن قولك..!!؟
تسلم على المرور الحلو جدا..
|
Post: #30
Title: Re: أولاد عوائل وعندنا فايل !!!!
Author: لؤى
Date: 03-03-2005, 03:03 AM
Parent: #1
نادية العزيزة
تحايا
والله القائمة الكتبتيها عن الأشياء البتجوا محمّلين بيها من السودان شوّقتني للسودان وللخالات والحبّوبات والمناسبات .. أمّا قائمة المصطلحات فغايتو الواحد محتاج ليهو قاموس زي بتاع دكتور عون الشريف قاسم داك .. تعرفي انا أول مرّة أسمع مصطلح شمار كانت في المنبر دا ، وفي الأول ماكنت فاهم الموضوع ليهو علاقة بي فطور بي فول مدنكل ولا الحاصل شنو !! وبعد شويّة بعد كترة إستخدام المصطلح من الناس بديت أفهم معنى التعبير ..
لو في طريقة أعملي لينا قاموس عشان الواحد مايصيبو الحرج لو سألوهو سؤال بالمصطلحات بتاعة "شنو يامنقة نفحّط ولا نَكْسِر هنا؟" يعرف يجاوب
تحاياي لأسرتك
|
Post: #32
Title: Re: أولاد عوائل وعندنا فايل !!!!
Author: saif massad ali
Date: 03-03-2005, 03:26 AM
Parent: #30
ما شاء الله عيني باردة
الفك المفترس لي سجيمان
اها هاكي
قرقور طالع مرور
لابس جكيته متكل علي الحيطه
|
Post: #33
Title: Re: أولاد عوائل وعندنا فايل !!!!
Author: انا بنت النيل
Date: 03-03-2005, 04:17 AM
Parent: #32
نادية الحبيبة
كلماتك الرشيقة..دائما تغري بالمطالعة رغم ضيق الوقت
ليس لي المام كبير بهذه اللغة ولكن اسمعها احيانا..وعندنا في الشمالية سمعن " بالطا" واستغربت من التعبير وعندما سألت علمت انه " بتطولي" سألت تاني هي ذاتا معناها شنو قالو يعني زي مافي ليك ولا ابيت !!
هذه اللغة غريبة وعجيبة ..بس اتمني ان لا تمحو اصل كلامنا السمح ويبقي الكلام كله شرط وقطيع وسلك وفرد!!
تسلمي ويسلم دوبيتك السمح يوت
|
Post: #34
Title: Re: أولاد عوائل وعندنا فايل !!!!
Author: Balla Musa
Date: 03-03-2005, 06:45 AM
Parent: #33
| Quote: أولاد عوائل وعندنا فايل !!!! |
القدم بالقدم والأمات خدم
|
Post: #35
Title: Re: أولاد عوائل وعندنا فايل !!!!
Author: Elmosley
Date: 03-03-2005, 06:51 AM
Parent: #34
ناديه طبعا نحن دقه قيمه 14 سنه منالبلد
غايتو
قاعد جمب الحيطه وعامل زيطه
البباري الجداد بودي الكوشه
ارد ليه ولا امي (تنطق اميه علي وزن البيه) المصريه؟؟؟
|
Post: #65
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 03:50 PM
Parent: #35
الموصلى ود خالى الغالى
| Quote: البباري الجداد بودي الكوشه |
والببارى الكلاب بهوهو !!
خلى بالك من روحك شدييييييييييييييييييد!!
|
Post: #55
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 10:11 AM
Parent: #34
الغالى بلة موسى
| Quote: القدم بالقدم والأمات خدم |
هووووووووووووووووووووى
ياناس العنصرية والنعرات القبيلية !!
حلوة النعرات دى موش؟!!!
|
Post: #36
Title: Re: أولاد عوائل وعندنا فايل !!!!
Author: cantona_1
Date: 03-03-2005, 06:53 AM
Parent: #33
| Quote: أنت قايل كرعينا رقاق ولا مولودين في زقاق ، نحن اولاد عوايل وعندنا فايل ، وقع ليك ولا أعيدو ليك |
يا عشه بت فاطنة... مولدين في الإمتداد وحبينا في البلاط
ياود الديم أنا يا ود أخوي قاعد في خرتوم أحمد... وأكتب لك هذه الرسالة وماشي متغدي في الديم جنب محطة الغالي ... رأيك شنو...وكمان من الخرتوم بسافر أم طرقن عراض محل المنقة والجوافة والقشطة وكلها وحاتك ببلاش
ياوراق غلطان... نعمل جوزيف لاقو معناها نتلاقي ... وشوف الباقي معناه شنو
.. الكلام قلتو وما ناكرو.. كان ما قلتو قلتو.. كان ليك شيلو وكان ما ليك ختّو..
يا بمبي يا وسخ كرعي...
ألمي البارد بقد الدلو
كباشي الصافي
|
Post: #58
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 03:12 PM
Parent: #33
انا بنت النيل الغالية
وينك؟
منتظراك فى بوست الدوبيت ماتغيبى بالله
| Quote: هذه اللغة غريبة وعجيبة ..بس اتمني ان لا تمحو اصل كلامنا السمح ويبقي الكلام كله شرط وقطيع وسلك وفرد!! |
والله ضحكتينى جدا
اقايتو يابت امى تبقى مصيبة لو تبقى ده اللغة البديلة للشارع السودانى !!!
الله يكضب الشينة!!
|
Post: #57
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 03:05 PM
Parent: #32
الاكرم سيف مساعد
Quote: قرقور طالع مرور
لابس جكيته متكل علي الحيطه |
الغريبة ماسمعت الكلام ده فى الخرطوم!!
انت ياسيف عندك ملكة تأليف من ورانا ولاشنو؟
|
Post: #56
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 02:46 PM
Parent: #30
لؤى الرائع
| Quote: لو في طريقة أعملي لينا قاموس عشان الواحد مايصيبو الحرج لو سألوهو سؤال بالمصطلحات بتاعة "شنو يامنقة نفحّط ولا نَكْسِر هنا؟" يعرف يجاوب |
لا ماتفحط وخليك هنا ..!!
انت عايز قاموس شنو اكتر من هذا البوست الذى جمع كل جهابذة الراندوك السودانى ؟
انت بس خليك معانا ..
|
Post: #42
Title: Re: أولاد عوائل وعندنا فايل !!!!
Author: Agab
Date: 03-03-2005, 09:21 PM
Parent: #1
سلامات نادية
البوست في السلــــــــــــك
أكتر حاجة عجبتني في إجازة السنة دي
مسمسنـــــــــي
بجيكم صادي
وشتــــــــــــــــــــــــــــات خالي محطات
كل الود
ودالعجب
|
Post: #43
Title: Re: أولاد عوائل وعندنا فايل !!!!
Author: Abdelrahman Elegeil
Date: 03-03-2005, 11:34 PM
Parent: #42
جـاء وراء وأخـد الضـراء
|
Post: #44
Title: Re: أولاد عوائل وعندنا فايل !!!!
Author: HAMZA SULIMAN
Date: 03-04-2005, 01:08 AM
Parent: #43
ده كلام رائع جدا وممتاز
ويا ريت نعمل مقارنه ما بين مصطلحات زمان وهسى
والفرق الاجتماعى فى الثقافة اليومية
عنوانه هذه المصطلحات
ويا ريت تعملى دراسة
من رقصة الكاروشة يحدى النبق
ومن اول مصطلح يحدى المس كول
شكرا شكرا
|
Post: #46
Title: Re: أولاد عوائل وعندنا فايل !!!!
Author: alfatih
Date: 03-04-2005, 02:47 AM
Parent: #1
نادية فى ذمتك تخلينى ارجع المنبر سريع لييه
مما قمت من الصباح لقيتك قدامى الليلة والضحك شرطنى ...
يسلم شبابك وقلمك يا اعز الناس
عطالة وحالة بطالة
كرور وساكنين الخور
تخريمة ...
كتلتينى بى بشتنة ورقاد واطة
|
Post: #61
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 03:35 PM
Parent: #46
الفاتح الراقى الظريف
Quote: نادية فى ذمتك تخلينى ارجع المنبر سريع لييه
مما قمت من الصباح لقيتك قدامى الليلة والضحك شرطنى ... |
اجى ياولدى وهو انت كنت حردان وانا ماعارفة ولاشنو ؟
عموما بركة الجيت والله
وصحى
نكورك ليكم
ماتجو
نجيكم
تكوركووووووووووووووووو!!!
|
Post: #47
Title: Re: أولاد عوائل وعندنا فايل !!!!
Author: abdalla BABIKER
Date: 03-04-2005, 02:50 AM
Parent: #1
فوووووق
لحدي ما ارجع
|
Post: #62
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 03:40 PM
Parent: #47
عبد الله بابكر
تسلم يازول ياراااااااااااقى جدا
|
Post: #48
Title: Re: أولاد عوائل وعندنا فايل !!!!
Author: صباح احمد
Date: 03-04-2005, 04:59 AM
Parent: #1
العزيزة نادية
طبعا السبقوني ما خلو لي حاجة اكتبها
لكن هاكي ديل لحدي ما اتذكر غيرهم
ترا ترا اللستك الورا
ديامة والنار يوم القيامة
حكومة والناس مظلومة
|
Post: #59
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 03:25 PM
Parent: #48
زميلة المهنة الغالية صباح احمد
Quote: ترا ترا اللستك الورا
ديامة والنار يوم القيامة
حكومة والناس مظلومة
|
تسلمى ياغالية وبالمناسبة انتى عارفة مجتمع الصحافيين عندو لغة برااااهو حلوة خلاص سمعت منهم حاجات لمن كنت فى الخرطوم..
بالمناسبة ياصباح انحنا اتقابلنا فى الخارجية موش؟؟
|
Post: #60
Title: Re: أولاد عوائل وعندنا فايل !!!!
Author: Balla Musa
Date: 03-04-2005, 03:34 PM
Parent: #59
نادية
تحيات
Quote: القدم بالقدم والأمات خدم
هووووووووووووووووووووى
ياناس العنصرية والنعرات القبيلية !!
حلوة النعرات دى موش؟!!! |
دا كلام عوض دكام الله يرحمو
|
Post: #63
Title: Re: أولاد عوائل وعندنا فايل !!!!
Author: osly2
Date: 03-04-2005, 03:40 PM
Parent: #60
بندورة وكشفنا دوره
كركاب ومطر بلا سحاب
ترا ترا شبه اللسـتك الورا
يا شارع الزلط المركب غلط
القطاطى ومستوى واطى
تربيهو كتكوت يكبر يفوت
|
Post: #66
Title: Re: أولاد عوائل وعندنا فايل !!!!
Author: ود المدفع
Date: 03-04-2005, 04:00 PM
Parent: #63
الأخت ناديه كيفيك .. الموضوع جميل .. ورأى رأى الاخ فريد ود المسيد فعلا هم الظرفاء الذين يطلون علينا بهذه القفشات الحلوه .. واذكر من التعليقات الحية من وسط اسرتى الشنداوية : ابن عم مره في جلسه اسريه تضم معظم شباب الاسرة وكلهم عندهم موبايلات إلا هو واختى الكبيرة فقال لها : يا اختى يا ..... انا وانتى لا فايل لا موبايل .
ايضا لى خاله من صاحبات الطرف وهى مرة من المرات في مناسبة عرس خارج المدينة وعادة بعد الحفلة تحصل ازمة مويه في بيت العرس وخالتنا ماشه على المزيره تشرب حصلت الحكايه ناشفه خالص وفى تلك اللحظه واحده من صاحباتها قالت ليها يا ..... جيبى لى معاك مويه فقالت لها : لا مويه ولا قعويه الليله قالت ليها الرقاد ارضيه والوساده كوريه انكربي ساكت
مع تحياتى
|
Post: #68
Title: Re: أولاد عوائل وعندنا فايل !!!!
Author: نادية عثمان
Date: 03-05-2005, 04:43 PM
Parent: #66
الاكرم ود المدفع
| Quote: لا مويه ولا قعويه الليله قالت ليها الرقاد ارضيه والوساده كوريه انكربي ساكت |
ياسلام على قريبتك دى ظريفة ظرافة ماعادية والله
وفعلا صدقت ايه البخلى الناس تتكلم الكلام الظريف ده ومابيجيبوهو من وين زاتو ؟
|
Post: #67
Title: Re: أولاد عوائل وعندنا فايل !!!!
Author: نادية عثمان
Date: 03-05-2005, 04:25 PM
Parent: #63
اوسلى تو العزيز
| Quote: تربيهو كتكوت يكبر يفوت |
اها دى عاد القالها صدق والله خاصة فى الزمن الشين ده
تسلم على المرور وتعال دائما مارى بى هنا وبهناك فوجودك يشيع البهجة جدا
|
Post: #64
Title: Re: أولاد عوائل وعندنا فايل !!!!
Author: نادية عثمان
Date: 03-04-2005, 03:44 PM
Parent: #60
بلة موسى الزول الراقى
| Quote: دا كلام عوض دكام الله يرحمو |
طيب ماانا عارفة انو كلام ود دكام الله يرحمه!!
خفت الشبك ولاشنو ياود عمى الغالى ؟
ههههههههه
اها وقولة ياناس العنصرية والنعرات القبيلية دى حقتى الفتها انا زى الدوبيت مالها موش حلوة بالله؟
|
Post: #69
Title: Re: أولاد عوائل وعندنا فايل !!!!
Author: osly2
Date: 03-05-2005, 04:54 PM
Parent: #64
العزيز ه ناديه
بوستاتك تكتسب بهجتها دائما بخفة دمك ونشاطك الجم لا باطلالة
امثالى وصديقى دكتور بله موسى
اكيد بجيك بى غادى والا نلتقى هناك هاك ديل
المشى كدارى ولا ركوب اللوارى
كوارع وحايمه فى الشارع
طاحونه ومره مجنونه
يا عشى البيت يا قطع الخيط
تحياتى
|
Post: #70
Title: Re: أولاد عوائل وعندنا فايل !!!!
Author: نادية عثمان
Date: 03-05-2005, 05:33 PM
Parent: #69
الغالى اوسلى تو
Quote: بوستاتك تكتسب بهجتها دائما بخفة دمك ونشاطك الجم لا باطلالة
امثالى وصديقى دكتور بله موسى |
بل من وجودك وبلة وكل الاصفياء الذين قد جمعنى بهم الله فى هذا الوطن الافتراضى فكانوا لى الاخوة الاشقاء الذين لم تلدهم بطن امى ..!
ربنا ماحرمنى منكم يااااااارب
| Quote: اكيد بجيك بى غادى والا نلتقى هناك هاك ديل |
وانا فى رجاك دائما وفى كل لحظة وبرضى بجيك فى بيوتاتك
Quote: المشى كدارى ولا ركوب اللوارى
كوارع وحايمه فى الشارع
طاحونه ومره مجنونه
يا عشى البيت يا قطع الخيط |
هل من مزيييييييييييييييدايها الرجل الحبوب جدا ؟!!
|
Post: #71
Title: Re: أولاد عوائل وعندنا فايل !!!!
Author: Balla Musa
Date: 03-05-2005, 06:08 PM
Parent: #70
| Quote: اها وقولة ياناس العنصرية والنعرات القبيلية دى حقتى الفتها انا زى الدوبيت مالها موش حلوة بالله؟ |
نادية ... الزهر الجميل فواح
|
Post: #72
Title: Re: أولاد عوائل وعندنا فايل !!!!
Author: Balla Musa
Date: 03-05-2005, 06:21 PM
Parent: #71
أوسلى الحبيب
Quote: بوستاتك تكتسب بهجتها دائما بخفة دمك ونشاطك الجم لا باطلالة
امثالى وصديقى دكتور بله موسى |
عشةالفلاتية كان عندها حفلة فى مدنى قامت مرضت والناس قطعوا التذاكر وحددوا اليوم وكان لازم الناس المنظمين يتصرفو . مشوا جابوا أبوداؤد وما كان فنان مشهور, قالوا ليهو نعلن عنك كيف والناس متوقعين يسمعوا عشة الفلاتية قال ليهم قولوا الفنان أبو داؤد راجل عشة الفلاتية.
طبعا الكاشف ماكان حاضر الحفلة خايف من عشة الفلاتية
|
Post: #73
Title: Re: أولاد عوائل وعندنا فايل !!!!
Author: osly2
Date: 03-05-2005, 08:52 PM
Parent: #72
نـا ديــــه
وهاك ديل كمان
كجنكى ومسمار زنكى
غادى غادى الجزام بعادى
الليله بلاش وبكره بلاش
جايبنو بالطياره وبايعنو بالخساره
دكتور بله
حضور الكاشف ولا عدمو هيين المشكله فى تكاسى فجراوى
تحياتى
|
Post: #74
Title: Re: أولاد عوائل وعندنا فايل !!!!
Author: نادية عثمان
Date: 03-06-2005, 09:21 PM
Parent: #73
اوسلى وبلة اولاد الكاشف ابوى
قولو لحدى مااجيكم صادة
اختكم عشة الفلاتية !!
|
Post: #75
Title: Re: أولاد عوائل وعندنا فايل !!!!
Author: نادية عثمان
Date: 03-07-2005, 04:05 PM
Parent: #71
الغالى بلة
الزول الشمس وضاح ..!
|
Post: #76
Title: Re: أولاد عوائل وعندنا فايل !!!!
Author: نادية عثمان
Date: 03-07-2005, 04:09 PM
Parent: #71
يلا بلا لمة
العدد تمة !!
ليمونة وعاملة فرعونة !!
|
Post: #77
Title: Re: أولاد عوائل وعندنا فايل !!!!
Author: osly2
Date: 03-07-2005, 05:24 PM
Parent: #76
بستله وحايمه فى الحله
اوع يغشك يأكل قرشك
مقاعدنا سوسته وسواقنا اوسطى
نفر والســـفر
|
Post: #78
Title: Re: أولاد عوائل وعندنا فايل !!!!
Author: osly2
Date: 03-07-2005, 05:25 PM
Parent: #76
بستله وحايمه فى الحله
اوع يغشك يأكل قرشك
مقاعدنا سوسته وسواقنا اوسطى
نفر والســـفر
|
Post: #79
Title: Re: أولاد عوائل وعندنا فايل !!!!
Author: نادية عثمان
Date: 03-07-2005, 06:00 PM
Parent: #78
اوسلينا ولعب الحرينا
ولدنا السمح ولاود الناس الوقح!!
|
Post: #80
Title: Re: أولاد عوائل وعندنا فايل !!!!
Author: مبيوع
Date: 03-07-2005, 06:13 PM
Parent: #1
شوكة حوت لاتنبلع لاتفوت
اولاد قبايل وعندنا استايل
والاخيره من تأليفى
|
Post: #82
Title: Re: أولاد عوائل وعندنا فايل !!!!
Author: نادية عثمان
Date: 03-08-2005, 12:15 PM
Parent: #80
الفنان الرائع مبيوع
| Quote: والاخيره من تأليفى |
تاليفنا ونعنشة ليالى خريفنا!!
هاااااااااااااك التأليف ده!!
حلو والله استمر وايمكن نقول حاجة ترددها بعدنا الاجيال!!
|
Post: #81
Title: Re: أولاد عوائل وعندنا فايل !!!!
Author: Ahmed Al Bashir
Date: 03-07-2005, 06:39 PM
Parent: #1
ما تقيفوا فى اازلط و تتكلمو غلط
كان جبل طلعناو و كان عسل لحسناو
اوع من كده و الدنيا شتا
|
Post: #84
Title: Re: أولاد عوائل وعندنا فايل !!!!
Author: نادية عثمان
Date: 03-08-2005, 04:04 PM
Parent: #81
الاكرم احمد البشير
| Quote: ما تقيفوا فى اازلط و تتكلمو غلط |
ماتقيف فى الرصيف وتعمل زول حريف!!
|
Post: #83
Title: Re: أولاد عوائل وعندنا فايل !!!!
Author: seham_musa
Date: 03-08-2005, 03:41 PM
Parent: #1
كلامك عسل يا نادية
وتتخيلي اخوي المشى الخرطوم ( شهادة عربية ) رسلنا ليهو رسالة جوال نسال عن احواله
وقال لينا
انا عامل زي حنفية محلوجة في بيت عذابة والعذابة مافشين
|
Post: #85
Title: Re: أولاد عوائل وعندنا فايل !!!!
Author: نادية عثمان
Date: 03-08-2005, 04:15 PM
Parent: #83
سهام موسى الغالية
Quote: وتتخيلي اخوي المشى الخرطوم ( شهادة عربية ) رسلنا ليهو رسالة جوال نسال عن احواله
وقال لينا
انا عامل زي حنفية محلوجة في بيت عذابة والعذابة مافشين |
ده حالتو شهادة عربية بس يعنى مامؤسس فى السودان!!
انا اخوى كل مااجى السودان اول حاجة يقول لى
هوووووووووووى يختى
يلا ورينا الكتاكت (القروش)
ويقول:
سمعتنا ومصاريف جامعتنا !!
|
Post: #86
Title: Re: أولاد عوائل وعندنا فايل !!!!
Author: yasiko
Date: 03-08-2005, 04:33 PM
Parent: #1
سلام
نادية
"مشينا رحلة
ورحلة شينة
لا فيها بيبسي
لا فيها جكسي
ولا بنات يعاينو لينا"
انا ذاتي جيت رجع ما فاهم حاجة
لك الاحترام
|
Post: #87
Title: Re: أولاد عوائل وعندنا فايل !!!!
Author: نادية عثمان
Date: 03-08-2005, 07:30 PM
Parent: #86
ياسيكو
| Quote: انا ذاتي جيت رجع ما فاهم حاجة |
كلنا فى الهوا سوا !!
|
Post: #88
Title: Re: أولاد عوائل وعندنا فايل !!!!
Author: حبيب نورة
Date: 03-10-2005, 08:54 AM
Parent: #87
ست الشي وكل شي
بوست السرور دة يا بنت أمي
انا حالياً في مرحلة بتستدعيني أكتر محلبية خيالاتي
و أسافر بعيد في اطار مشروع رجع البلد
شخصياً انا بري أنو الموضوع ممتع
يعني شكلو حيكون غابة و باقي الناس حطّابة
بي الفهم دة بحاول ارجع ليك لي أصل الحكاية
انا بري انو المصطلحات دي بتجي من خلال النفسية السودانية
المشجعة للسجع و القافية والدوبيت وهذه الضروب من الشعر
يعني قبيل انا كنت بتكلم مع الوالدة
الأكاديمية نوعاً ما
قلت ليها بكرة انا ح أحول ليك المصاريف
لزوم المعايش وحق الكسرة و الهديمات و الكريمات
جارتنا عشة سمعت الكلام طوالي قالت ليها دستور
قلت ليها والما بقول دستور سنة وستة شهور
فلانات جارتنا الله يطراها بالخير
كانت بتقول لي وليدها أمجد
يبقي لي بي أمر قبض
لمن يطلب منها حق السجاير
كلام كتير انا شخصياً بحب أرددو بحكم اني تربية حبوبات من الطراز
الاول يعني بتلقيني علي طول أستنجدت بي ( سحـّارة اللغة)
ومرقتها عن حبوبتي صبر هان
مع أنها من اصول غير عربية
لكن قدرت تحل عقدة الكدوس و تصر أنو عيونها الخضراء دي
جات نتيجة عيب خلقي
و بتتمسك بي سودانية غير مبررة
أجي يا بنتي!!!!
ما كلو زي دة
كترت الكلام
لكن تاني بجيك طاير و فاكي الزراير
ويا انا يا أنتي في البوست دة
مع انو الحال مجوبك
جوباك حياة في الدايات!!!!!!!
|
Post: #89
Title: Re: أولاد عوائل وعندنا فايل !!!!
Author: نادية عثمان
Date: 03-10-2005, 04:50 PM
Parent: #88
حبيب نورة حبيب الحبيبات لى حدهن
جيتنا ونورت بيتنا
كركديه وماعرفنا ليه!!
مكرونة وماعرفنا لونها
اجى ياود امى هو انت شوية ولالحمة جزاركم نية؟
و| Quote: يا انا يا أنتي في البوست دة |
انا وانت والبورداب كلهم ولو النفوس اطايبت الدنيا بتشيل خمسين مليون الف نسمة!!
Quote: مع انو الحال مجوبك
جوباك حياة في الدايات!!!!!!! |
سجمنا ياولدى
بشتنة ورقاد واطة!!
|
Post: #90
Title: Re: أولاد عوائل وعندنا فايل !!!!
Author: الملك
Date: 03-11-2005, 04:41 AM
Parent: #89
....
ندى شكرا ليك هنا وهناك على الإهــــــــــداء
....
لكن لو عارف فى بوست زى ده ما كان عملتاالبوست ده
ونسة .....بالراندوق (الراندوك)
....
غايتو
بساسق بى جاى وبى هناك
.....
.....
لكن روصتك دى نفرتيتى ....دعيل دكه
|
Post: #93
Title: Re: أولاد عوائل وعندنا فايل !!!!
Author: نادية عثمان
Date: 03-11-2005, 05:48 PM
Parent: #90
الملك عندنا ؟
يامرحبا يامرحبا نورك غطا على الكهرباء !
| Quote: ندى شكرا ليك هنا وهناك على الإهــــــــــداء |
ياملك انا اسمى نااااااااااااااااادية لكن برضو ندى حلوة منك..!!
....
| Quote: لكن لو عارف فى بوست زى ده ما كان عملتاالبوست ده |
مافى مشكلة يافردة انت ترندك ونحنا نردك واهو كلو راندوك!!
والبحر مابياابى الزيادة ياغالى ..
|
Post: #91
Title: Re: أولاد عوائل وعندنا فايل !!!!
Author: بلدى يا حبوب
Date: 03-11-2005, 10:29 AM
Parent: #1
نادية
على فكرة انا خايف باكر تظهر شرايط بسوق ليبيا وتكون د ه الاغانى بينى وبينك مع الجماعه البرنسات ديل ذى ما قال ابو دؤاود الله يرحمة بنتفع معاهم
تحياتى
|
Post: #95
Title: Re: أولاد عوائل وعندنا فايل !!!!
Author: نادية عثمان
Date: 03-12-2005, 11:37 AM
Parent: #91
بلدى ياحبوب
ماقانا دى المشكلة حقت السودانيين عدم المحافظة على حقوق الملكية الفكرية !!
اقايتو طبعا ماعندك مانع تشهد معى فى المحكمة لو حصل سطو مسلح على مؤلفاتى الهنا دى موش كده يافردة ؟
|
Post: #92
Title: Re: أولاد عوائل وعندنا فايل !!!!
Author: معتز تروتسكى
Date: 03-11-2005, 03:09 PM
Parent: #1
خالص التحايا...
العزيزه ندويه...
سلام كتير ليك يا استاذه ...
بوست لمن الوحد يكون معكنن يجى يطل عليهو ..
تشكرى عديل عليهو ..
نبدا نضيف معاكم بعدين حاجيب لى كراس اسجل لى كل الشمار الطالع ده عشان نزيد ثقافتنا..
طبعا انا دى بقول عليها لغة الشارع ولغة الشارع انا بعطبرها اقوى حضورا لان الشارع دايما هو البورينا طريق الصاح..
من خلال احتكاكى زى مابقولوا بااولاد الشمس فى قسم علم النفس نبدا نذكر معاك..
اولا ..
جرجخيس ونبق رخيص..
بستله وحايمه فى الحله..
ترا ترا وشبه اللستك الوراء..
منكوشه وشبه الكوشه..
قايتو دا القدرت اتذكرو ستى بالرغم انى فى كلمات منهم مافاهميها لكن ياهو قلنا نشارك الحلوين المعاكى ديل
البهجه والحب والمرح البيناتكم ده...
ويلا نفكر ونحاول نجى
افوتك بعافيه...
|
Post: #94
Title: Re: أولاد عوائل وعندنا فايل !!!!
Author: Elawad Eltayeb
Date: 03-12-2005, 09:36 AM
Parent: #92
الأخت نادية: بوست رائع.
العزيزة تماضر:
| Quote: وتكوركو لينا نجيكم ..نجيكم تكوركو... |
والله رهيبة جد.
|
Post: #97
Title: Re: أولاد عوائل وعندنا فايل !!!!
Author: نادية عثمان
Date: 03-12-2005, 08:57 PM
Parent: #94
العوض الطيب
تسلم على المرور الباهى
وماتقطع الزيارة يافردة
سمح
|
Post: #96
Title: Re: أولاد عوائل وعندنا فايل !!!!
Author: نادية عثمان
Date: 03-12-2005, 11:40 AM
Parent: #92
معتز تروتسكى الغالى
| Quote: بوست لمن الوحد يكون معكنن يجى يطل عليهو .. |
كان كده ضمنا انك حاتجينا كتييييييييير جدا لانو المنبر عجاجتو قايمة للسماء طوالى والشكل فيهو مابينتهى ابدا !!!
مرحب بيك ياغالى
و
قمح وحديث سمح
جمال وفراق محال
و
هكذا..!
|
Post: #98
Title: Re: أولاد عوائل وعندنا فايل !!!!
Author: almulaomar
Date: 03-13-2005, 03:11 AM
Parent: #1
كل شئ في السودان بتغير بسرعة وفي معظم الأحيان يكون هذا التغيير للأسوأ نص السودانيين في العاصمة القومية بيقو يبيعو الأكل والشاي والنص الآخر زبائن مركلسه ، هناك الكثير من المصطلحات الجديدة في التعامل واللهجة والإتيكيت والبيع والشراء وكل نواحي الحياة ولمن تكون جديد على طول بيعرفوك لأنك ببساطه بتكون شايت ضفاري أو عكس الهوا – دائماً ما تكون المصطلحات الجديدة سهله وبسيطه بشرط أن تأتي في هيئة سجع حتى تكون سلسه مقبولة وغير منفرة مثل ترا ترا اللستك الورا أو سمعتنا ومصاريف جامعتنا وحتى عنوان المقال لو كان أولاد عوائل وعندنا ملف لكان منفراً وإليكم شئ من هذا القبيل:
عالم مركب بالغلط
طابونه بتبيع أيسكريم
راكوبه في نص الزلط
الركشه لابسه فنيله كط
مستر عتوت لابس شبط
وللقصيدة بيقيه
أعجبتني هذه ارسالة حد الدهشة فقد وصلتني على موبايلي ووصلت عن طريق الخطأ حيث أنها ضلت طريقها أو أن صاحبها بالرغم من روح النكتة المتأصلة فيه متأخر كثيراً في تقنية الموبايل ، فقد كان ذلك خلال عيد الأضحي المنصرم وكانت الرسالة كالتالي:
عيدك مبارك وخرفان تتعارك وكل سنه وإنتو طيبين وضفيرة كمونيتكم مترين
|
Post: #99
Title: Re: أولاد عوائل وعندنا فايل !!!!
Author: abdalla BABIKER
Date: 03-13-2005, 10:31 AM
Parent: #1
أولاد عوائل وعندنا فايل
|
Post: #100
Title: اولاد عوائل وعندنا فايل
Author: ahmed shaaeldin
Date: 03-13-2005, 09:52 PM
Parent: #1
القميص جمايكة والصلعة فورمايكة
الكراع مكسورة والنخرة ماسورة
اها رايك شنو ؟ دقة قديمة زي ماقال الموصلي مش كدة
بالمناسبة دى طبعا امبارح عامل زيطة فى فرجينيا .. اقصد عامل حفلة فى الاحتفال بيوم المرأة العالمى. والراجل ابدع
وكمان هاك الشمار دة طبعا الموصلى حيكون بيناتكم فى القاهرة خلال الايام القليلة القادمة.
|
Post: #101
Title: Re: أولاد عوائل وعندنا فايل !!!!
Author: samwal ebrahiem
Date: 03-13-2005, 10:23 PM
Parent: #1
الرائعة / نادية
بوست رائع وموضوع يستحق المناقشة
وياريت كل انسان يكتب اي مصطلح سوداني
شعبي بيعرفو وبعد داك ممكن بوستيك الجميل
دي يبقي موسوعة مصطلحات شعبية ( راندوكيه )
انا بديك اتنين وكل ما اتذكر بجي راجع تاني
والله يا نادية لمن كنت في السودان كنت حافظ راندوك
كتير خالص لكن الواحد فينا مع متاهات المنافي نسي
حاجات كتيرة وربنا يكون في العون المصطلحين هم
* بستلة وحايمة في الحلة
* اعمل شخيت واقيف بعيد
ودي وتقديري
السمؤل
|
Post: #102
Title: Re: أولاد عوائل وعندنا فايل !!!!
Author: munswor almophtah
Date: 03-15-2005, 11:10 PM
Parent: #101
هذه (منذ كان النخل ينبت فى الجبل)
درب دابى وجانا حابى
كتلو شريف اهلو فى الريف
عقرب وإسم الله أقرب
الحوض فوقو بلومه
وزه وسارقه البزه
حكومه والناس أهالى
سيادة ومانا بياده
البقول أخ الليله بنلخ
محل الرهيفه التنقد
البتقع من السماء بتحملها الواطه
لسانك حصانك
رازه وشوش
عايره وأدوها صوت
.....وشايله موسها تطهر
سويلن جكة اللخدر
منصور
|
Post: #103
Title: Re: أولاد عوائل وعندنا فايل !!!!
Author: امل فاروق محمد
Date: 03-16-2005, 01:30 AM
Parent: #102
الاخت نادية كيف حالك قرات ابداعك وعجبنى متشوقة الاقيك بالنسبة للمصطلحات عندك حق اصبحت منتشرة بالسودان بس دمها خفيف وما منها ضرر واعتقد ان لها معنى عند المتداولينها
تحيااااتى
|
Post: #104
Title: Re: أولاد عوائل وعندنا فايل !!!!
Author: قريب الله محمد الحسن
Date: 03-16-2005, 10:05 AM
Parent: #1
الاستاذة نادية
لك التحية
اهديك بعض المقتطفات من قطعة نثرية كنت قد شاركت ها في مهرجان ثقافي بجامعة الجزيرة ولكن طالت الفترة والذاكرة عنكب عليها الفقر وهي تصب في ذات الاتجاه
جديرون بالاحترام
اذا ساقك القدم الى بلاد اهل السودان ذات المليون ميل مربع تجد اناس غريبون وعجيبون
فالسودانيون لهم اراء شتى في كل شعوب العالم فالمصريون فراعنة اوغاد والخليجيون عرب اجلاف واهل العراق اهل كفر ونفاق ولكن سرعان ما تتلاشى كل هذه الافكار والمفاهيم عندما تحط طائراتهم في مطارات تلك الدول فيعملون في تنظيفالمطارات وغسل الصحون في المطاعم ولهم في ذلك اقوال مأثورة بلدا ليست بلدك يمكنك ان تمضي فيها عاري الجسد
والرجل في لاد السودان لا يجد حرج في ان بخلع رداءه وسط عشرات المارة ويتبول في الميادين العامة والغريب من ذلك يرد السلام على المارة لان في ذلك اجر وثواب
ونساء السودان تنحصر كل مهمتهن في اسعاد الزوج فاذا دخلت بيوتهن تجد اشياء مثل حفرة الدخان حتى الخليل كبيرهم الذى علمهم الشعر عندما غنى لعزة باسم الوطن قال لها يا الكبرتوك فالكبرتة هي مزيج من الروائح والعطور المركزة تستخدمها النساء لاثارة الشهوة لدى الرجل
القطعة طويلة ونسيت منها كتير وجلبت لى حينها تعب كتير
|
|