ما بتستاهل التفكير!!!

ما بتستاهل التفكير!!!


02-21-2005, 04:46 PM


  » http://sudaneseonline.com/cgi-bin/sdb/2bb.cgi?seq=msg&board=86&msg=1133858201&rn=50


Post: #1
Title: ما بتستاهل التفكير!!!
Author: نادية عثمان
Date: 02-21-2005, 04:46 PM
Parent: #0

ما بتستاهل التفكير!!


بفكِِّر فيك كتير يا زول .. وما بتستاهل التفكير
عشانك إكتويت بالريد .. واتحمَّلت نارو كتير
زفّيت ليك هواي والشوق .. وصدودك كان لغة تعبير
وما بتستاهل التفكير
* * * *
بفكِّر فيك وبِستَغرب ... كيف سِبْتَك تعيش جُوَّاي؟
سنين وسنين هواك بيكبر ... وبعزف لحنو جوَّة غُناي
كيف سبتك تعشعش كيف ... وتقنعني المحب سَوَّاي
وماك سَوَّاي ... وما بتستاهل التفكير!!
* * * *
بحبك أيوه ما بنكُر ... ونقطة ضعفي حبي إليك
بلا استئذان دخلني هواك ... وتحدَّى عنادي لون عينيك
بحبك بِعْتَرِف يا زول ... وخطواتي بتسوقني أجيك .. وبجيك وأجيك وأحدَّق فيك
وأقول في سرِّي رغم الحب ..
ماكَ سوَّاي !!
وما بتستاهل التفكير!!

Post: #2
Title: Re: ما بتستاهل التفكير!!!
Author: waleed500
Date: 02-21-2005, 05:00 PM
Parent: #1

والله بستاهل التفكير

Post: #3
Title: Re: ما بتستاهل التفكير!!!
Author: نادية عثمان
Date: 02-21-2005, 05:22 PM
Parent: #2

العزيز وليد 500

قلت:

(والله بستاهل التفكير)


ايمكن اكون هسة زعلانة وشايفة انو مابستاهل التفكير كدى نشوف رأى البورداب ونعمل استفتاء كده!!

ايمكن يطلع بستاهل !!!!

وايمكن لا!!

Post: #4
Title: Re: ما بتستاهل التفكير!!!
Author: shazaly gafar
Date: 02-21-2005, 05:46 PM
Parent: #3

العزيزة نادية
تحياتى وحبى
ما اجملك وانت تعطرين المنبر بعبق القصائد
-------------
ممكن نتبادل الادوار :
لمَّا لقيتِك فى عينيهو
وكان متحكِّر فى عينيك
شايل قلبِك يلعب بيهو
وقلبو بيلعب بين ايديك
سايل ريقِك يجرى عليهو
نسيتى السايل ريقو عليك
كرهتَ اليوم الشفتِك فيهو
وكل قصيدة كتبتها فيك
شاذلى

Post: #5
Title: Re: ما بتستاهل التفكير!!!
Author: نادية عثمان
Date: 02-21-2005, 06:10 PM
Parent: #4

العزيز شاذلى جعفر

العطر من دوحاتكم ينساب وبوجودكم يعبق اريجه الدنياوات الندية

لك كل التقدير ومرورك اسعدنى كثيرا ..

Post: #6
Title: Re: ما بتستاهل التفكير!!!
Author: Rashid Elhag
Date: 02-21-2005, 06:33 PM
Parent: #1

بسم الله الرحمن الرحيم
العزيزة نادية
ندوية الحبوبة...عليك الله يا زولة غيري رأيك ده...أصلو عندي قصيدة حلوة خلاص عن المرأة السودانية...ولازم أهيئ ليها الجو عشان أنزلها في البورد..وبعدين الغلطة غلطتك...إنتي الوداك تحبي في الزول الغلط منو?..يعني ما عارفانا نحن قاعدين بي هنا منتظرنك?..يمين نقدها ونسدها..علي العموم حصل خير...نحن لسه منتظرين.

خالص الود

Post: #7
Title: Re: ما بتستاهل التفكير!!!
Author: نادية عثمان
Date: 02-21-2005, 07:04 PM
Parent: #6

العزيز راشد الحاج

تسلم على المرور الباهى

وقصيدتك بالتأكيد حاتعمل التوازن المطلوب انت بس نزلها طوالى ولايهمك

اما عن هذا الحبيب فمنه لله!! زى مابقولو اهلنا المصاروة!

Post: #8
Title: Re: ما بتستاهل التفكير!!!
Author: munswor almophtah
Date: 02-21-2005, 11:52 PM
Parent: #7

وزي ماإنتى فاكره كمان
أنحنا كمان يمين زاكرين
ولما الريده بقت نار
منو الفى الدنيا غيرناحنين
وكان للشوق دميرة نيل
تجابد دافره عسل التين
بعيش جواك
عشان جواى شوق ولهان
كبر شامخ
شرخ جواى بحار تحنان
وزى ما إنت شايل الشوق
نشيل الريد واصير عنوان
وتكبر انت بى حبك
ويكبر حلمى يبقى أمان
وانده فى الخلوق ياناس
انا الممكون انا الشرقان
انا االحاتل عشق غرقان
انا الممكون انا الشرقان
انا االحاتل عشق غرقان



منصور

Post: #9
Title: Re: ما بتستاهل التفكير!!!
Author: نادية عثمان
Date: 02-22-2005, 04:32 AM
Parent: #8

منصور العزيز

قلت:

وزى ما إنت شايل الشوق
نشيل الريد واصير عنوان
وتكبر انت بى حبك
ويكبر حلمى يبقى أمان
وانده فى الخلوق ياناس
انا الممكون انا الشرقان
انا االحاتل عشق غرقان
انا الممكون انا الشرقان
انا االحاتل عشق غرقان


مااروع هذا الدفق الحميم ....حبيب مثل هذا يستحق كل التفكير بلا شك !!

كن مارا دوما من بيوتاتى يامنصور فحضورك يبث الامان فى نفسى والسعادة فى روحى ..

Post: #10
Title: Re: ما بتستاهل التفكير!!!
Author: محمد حامد جمعه
Date: 02-22-2005, 04:44 AM
Parent: #9

الزول ما عندا ذوق ... الزول منو ؟!

Post: #12
Title: Re: ما بتستاهل التفكير!!!
Author: نادية عثمان
Date: 02-22-2005, 05:04 AM
Parent: #10

محمد حامد جمعة ......أهلا بيك كتييييييييير

دى اول مرة تمر من حلتنا ونورتنا والله

موش انت ياهو سعادتو زاتو ياجنابو ؟؟

عشان كده سالتنى وقلت:

الزول ما عندا ذوق ... الزول منو ؟!

اها عاد ياجنابو لابد من البحث واستكمال التحقيق قبل الكشف عن هويتو ولاشنو ؟؟


ههههههههههه..تسلم على المرور الجميل وكن بالف خير ..

Post: #11
Title: Re: ما بتستاهل التفكير!!!
Author: 7abib_alkul
Date: 02-22-2005, 04:50 AM
Parent: #9


كلماتك رائعه تستحق الرد عليها وان كان الرد ليس بمستوي الكلمات ولكن نحاول تسلق القمم


لو فكرتي يوم علي المجداف تشدي
ولــــخارج حدود نفسك تعــــدي
ونظرت لقلبا برحيق ريدك مندي
ما كان لهواي دائما تصـــدي
ترفضي حبي النبيل ليه بتعاندي
ما كننت شايلك في اسمأ مكان عندي
كنت راسمك مستقبلي وخائض بيك تحدي
الا انتي غير لصداء صوتك ما بتردي
عاملة نفسك مراية وفيها براك تقعدي
عل السنين بيك بكرة بتعــــدي
وتشيلك امواج الوحده وما بتهدي
وتكوسي ايدي ليديك تشــــدي
ما زمان كان محتاجه ليك كان ليها بتصدي
وقلت اجمل سنيني داير اعيش براي وحدي

Post: #13
Title: Re: ما بتستاهل التفكير!!!
Author: عوض الله الفولانى
Date: 02-22-2005, 05:21 AM
Parent: #11

الرائعة / نادية

كم هو جميل ان تكون حواء السودان بهذا ألألق الجميل

لله درك ولا اسكت لك فاه ... لك التحية

الفولانى

Post: #16
Title: Re: ما بتستاهل التفكير!!!
Author: نادية عثمان
Date: 02-22-2005, 06:00 AM
Parent: #13

العزيز عوض الله الفولانى

قلت:

كم هو جميل ان تكون حواء السودان بهذا ألألق الجميل

ولعمرى ان حواء ادم السودان لهى دفق من الالق الباهى جدا ..ولهذا فبوحك فى مكانه

سلمت ايها النبيل

ومعكم وبكم لن تسكت افواهنا جميعا عن قول الجمال ..وفعله ايضا..!

Post: #14
Title: Re: ما بتستاهل التفكير!!!
Author: ترهاقا
Date: 02-22-2005, 05:24 AM
Parent: #11

شــــيلى شـــــيلتك يا ناديـة ، ما حتـقدرى تتفكى منو
ولا حتقدرى تتخلى عن التفكير فيهو

ده غايتو من تحليلى للقصيدة الرائعة

Post: #17
Title: Re: ما بتستاهل التفكير!!!
Author: نادية عثمان
Date: 02-22-2005, 06:05 AM
Parent: #14

العزيز ترهاقا

قلت:

شــــيلى شـــــيلتك يا ناديـة ، ما حتـقدرى تتفكى منو
ولا حتقدرى تتخلى عن التفكير فيهو

لكن انا بحاول قدر المستطاع اقايتو ...بس بينى وبينك هو بيستاهل التفكير لكن غتيت شوية ولازم انا اعمل ليهو انى مابفكر فيهو عشان يبطل غتاتة رايك شنو موش علاج برضو ؟


هههههههههههه......تسلم على المرور الغالى ياترهاقا

Post: #15
Title: Re: ما بتستاهل التفكير!!!
Author: نادية عثمان
Date: 02-22-2005, 05:51 AM
Parent: #11

العزيز حبيب الكل
قلت:


كلماتك رائعه تستحق الرد عليها وان كان الرد ليس بمستوي الكلمات ولكن نحاول تسلق القمم

يازول وهو فى قمة فى الروعة اكتر من قولك ده :

لو فكرتي يوم علي المجداف تشدي
ولــــخارج حدود نفسك تعــــدي
ونظرت لقلبا برحيق ريدك مندي
ما كان لهواي دائما تصـــدي
ترفضي حبي النبيل ليه بتعاندي
ما كننت شايلك في اسمأ مكان عندي
كنت راسمك مستقبلي وخائض بيك تحدي
الا انتي غير لصداء صوتك ما بتردي
عاملة نفسك مراية وفيها براك تقعدي
عل السنين بيك بكرة بتعــــدي
وتشيلك امواج الوحده وما بتهدي
وتكوسي ايدي ليديك تشــــدي
ما زمان كان محتاجه ليك كان ليها بتصدي
وقلت اجمل سنيني داير اعيش براي وحدي

تسلم على الكلام البديع والفق الحنين وسعيدة بمجاراتك وردك على قصيدتى وتسلم من كل شر يارب

Post: #18
Title: Re: ما بتستاهل التفكير!!!
Author: أبو أحمد
Date: 02-22-2005, 06:19 AM
Parent: #15

وحات الله حلاوة تشرق عديل كده
اقصدالقصيده
رائعة بجنون

Post: #20
Title: Re: ما بتستاهل التفكير!!!
Author: نادية عثمان
Date: 02-22-2005, 06:43 AM
Parent: #18

العزيز ابو احمد

قلت:

اقصدالقصيده
رائعة بجنون

والروعة بتكتمل بى طلتك البهية ..تسلم ياسيد الروح الوسيمة

وكن دوما مارا من بيوتاتى فوجودك يفرحنى جدا جدا

وكن واحمد الذى انت ابوه بالف الف خير ..

Post: #19
Title: Re: ما بتستاهل التفكير!!!
Author: ودقاسم
Date: 02-22-2005, 06:32 AM
Parent: #1

أقيف أتأملك يا زول
ألاقيك بالفرح جايي
وقليبك في دروب الريد
محكّر في الفؤاد جوّاي
وألقاك في حناياالروح
تزغرد زي حنين الناي
وأقدل بيك ، وأفرح بيك
وأشيلك غيمة في يمناي
أقيف أتأملك تاني
تعشش فرحة في دنياي
وتتورد خدود ريدي
وأحسك جوة في أحشاي
وتتفتح بسيمة الريد
تلاقي حنيني فاض بكّاي
تلاقي عيوني في عينيك
وكم رمش العيون حكّاي
وريدك في وريدي يسيل
وهمسك في الكليمة غناي


وهكذا

Post: #21
Title: Re: ما بتستاهل التفكير!!!
Author: نادية عثمان
Date: 02-22-2005, 06:51 AM
Parent: #19

الرائع حد الدهشة ود قاسم الغالى

قلت:

أقيف أتأملك يا زول
ألاقيك بالفرح جايي
وقليبك في دروب الريد
محكّر في الفؤاد جوّاي
وألقاك في حناياالروح
تزغرد زي حنين الناي
وأقدل بيك ، وأفرح بيك
وأشيلك غيمة في يمناي
أقيف أتأملك تاني
تعشش فرحة في دنياي
وتتورد خدود ريدي
وأحسك جوة في أحشاي
وتتفتح بسيمة الريد
تلاقي حنيني فاض بكّاي
تلاقي عيوني في عينيك
وكم رمش العيون حكّاي
وريدك في وريدي يسيل
وهمسك في الكليمة غناي

ووقفت مشدوهة اتأمل هذه الروعة وهذه الحميمية ..وهذا البوح الشجى ..

الله مااروع بوحك واصدقه ياود قاسم الشفيف

ثم تأتى لتقول( وهكذا!!!)

كل ده وهكذا ؟!!

اتمنى ان يكون مولد قصيدتك هذه قد جاء ردا على قصيدتى هذه لنكون محرضين بعضنا على فعل الابداع الجميل ..و


هكذا..!

Post: #22
Title: Re: ما بتستاهل التفكير!!!
Author: شتات
Date: 02-22-2005, 08:36 AM
Parent: #21

وأقيف أتأملِك تاني ..
وأدغدغ روحي بالنوناي ..
أقبل جاي .. واقبل جاي ..
مافي قبلك .. مافي غيرك
إلا إنتي واشواقي المعاي
والدروب الليك تودي
فيها ليك مرسال هواي
والنسايم الهابة منك
فيها زاد عمري وهناي
بكرة تجمعنا الأماني
واحكي ليك مشوار شقاي
أبلِّل من عيونك عيوني
وأوشِّح بالفرح دنياي
واقدل في الدروب طربان
وازيد في النمة والدوباي
أشيلك في الفؤاد واجري
يبارك لََيْ صباحي مسـاي
واهتف في جميع الناس
بريدك انتي يا "نجواي"

وهكذا ..

النديَّة .. ذات القوافي الحميمة نادية عثمان
التحية ليك على أشعارك الرقيقة والرصينة كما عوَّدتينا دائماً ..
تعرفي أنا لقيت الخال ودقاسم كتب كلامو دا وفات .. ولقيتا فرصة وقلت أجاريهـو
بس بالله ما تكلميهــو .. دا لو عرف حا يجيب عكازو ويجيني !!

كل الشكر يا نادية ..
وتسلمي
صلاح / شتات


Post: #23
Title: Re: ما بتستاهل التفكير!!!
Author: نادية عثمان
Date: 02-22-2005, 09:31 AM
Parent: #22

العزيز المرهف صلاح شتات

يازول انا والله لو كنت عارفة قصيدتى دى بتولد القصائد الرائعة دى كلها والله كنت كتبتها من زماااااااااااااان!!

شتات كل هذا الدفق:

وأقيف أتأملِك تاني ..
وأدغدغ روحي بالنوناي ..
أقبل جاي .. واقبل جاي ..
مافي قبلك .. مافي غيرك
إلا إنتي واشواقي المعاي
والدروب الليك تودي
فيها ليك مرسال هواي
والنسايم الهابة منك
فيها زاد عمري وهناي
بكرة تجمعنا الأماني
واحكي ليك مشوار شقاي
أبلِّل من عيونك عيوني
وأوشِّح بالفرح دنياي
واقدل في الدروب طربان
وازيد في النمة والدوباي
أشيلك في الفؤاد واجري
يبارك لََيْ صباحي مسـاي
واهتف في جميع الناس
بريدك انتي يا "نجواي"

وبرضو تقول لى وهكذا؟!!


طيب يلا وهكذا يتواصل ابداعكما الحلو وياود قاسم جيب الهامك وشاطح خيالاتك وتعال قول الشعر وبوح مع صلاح شتات الزول الخطر !!

Post: #24
Title: Re: ما بتستاهل التفكير!!!
Author: Elmosley
Date: 02-22-2005, 09:34 AM
Parent: #1

رائعه

Post: #25
Title: Re: ما بتستاهل التفكير!!!
Author: نادية عثمان
Date: 02-22-2005, 09:49 AM
Parent: #24

الموصلى الموسيقار الخطييييييييييييييييييييير

رائع انت واروع الزمن الجابك لينا ياود الخال الغالى

Post: #26
Title: Re: ما بتستاهل التفكير!!!
Author: عبدالله وداعه الامين
Date: 02-22-2005, 08:22 PM
Parent: #25

العزيزة نادية ازيك تاني بي هنا
سكرا ليك على هذا الابداع وهاكي اسمعي مني



بفكر فيكي برضي كمان اريت لو يرحم التفكير
ولو سكتنا عترت يوم وجاطت جدول التغيير
تجي و تلقيني حاضن الشوق ويصبح حبي بيكي كبير
وتسكني في مراسي هواي و اديلك محنة كتير
وجد تستاهلي التفكير

بفكر فيكي بس عارف مكانك جوة في الاحساس
وعارف انو حبك لي بقسموا منو حب الناس
ولو سالوني عنك يوم بلاقو هواكي في الانفاس
وبعرفوا قصة التفكير و انو هوايا ليهو اساس
وجد تستاهلي التفكير

بحبك و برضو ما بنكر و لو انكر بشوفوا هواك
مسطّر في مسام الروح وبعرفوا اني كيف بهواك
وما فارقتا دربك يوم ولا حنيت لي غالية سواك
لانك عندي كل الكون ومركز دورة الافلاك
وجد تستاهلي التفكير





عبدالله وداعه الامين

لندن 23.02.2005

Post: #27
Title: Re: ما بتستاهل التفكير!!!
Author: bayan
Date: 02-22-2005, 09:01 PM
Parent: #26

الحبيبة ست الرقة و الحلا

قصيدتك حلوة شديد...
عارفة انا بتستغرقنى العلاقات الانسانية بعامة...
ولم احب زول وولا زولة الله قال بقولو ..(حب اخوى لله لله)

كثيرا من احبهم لا يستحقون ان افكر فيهم...
فقصيدتك وقعت لى فوق جرح...

جد ما ببيستاهلو التفكير.....
ولا ان نحاول نجد لهم الاعذار..
و التبريرات...
احسن حاجة تحصنى نفسك من الاستغراق.. وتخلق علاقات سطحية
خشية يوما ما يتركونك دون سبب واضح...
شكرا لك لهذا الالق

Post: #31
Title: Re: ما بتستاهل التفكير!!!
Author: نادية عثمان
Date: 02-23-2005, 02:47 PM
Parent: #27

د. بيان الغالية

قلتى :

عارفة انا بتستغرقنى العلاقات الانسانية بعامة...
ولم احب زول وولا زولة الله قال بقولو ..(حب اخوى لله لله)

وانا والله زيك ..

ومن اول يوم انا قلت بيان دى زولة ريااااااااااادة وقلبها طيب جدا والله

تسلمى ياست الذوق والحلا

ومرورك من بيوتاتى يسعدنى جدا فلاتغيبى ابدا ..

Post: #28
Title: Re: ما بتستاهل التفكير!!!
Author: نادية عثمان
Date: 02-23-2005, 09:43 AM
Parent: #26

العزيز عبدالله وداعة الامين

تسلم بى هنا وبهناك وبى كل حتة

وقصيدتك اكتر من رائعة وهاك اسمع منى :



أديني عمرك


كنت طايرة وبيك سعيدة.. وبرضو جُوَّة سعادتي خوف
رِقَّتك وعطفك عليَّ.. وطبعك الراقي الولوف
همستك جُوَّاي تدغدغ.. ويفرح البوح بالحروف
خوفي ما كان سببو إنت.. خايفة من ظلم الظروف
* * * *
السعادة الكُنت فيها.. رقَّصَت جُوَّاي أغاني
حب وشوق وهيام وفرحة.. مفردات أسمى المعاني
لحظة عشت معاك دنيا.. الزمان كان فيها حاني
ساعة من عُمر الليالي.. خاطفة عَدَّت زي ثواني
* * * *
أبقى زي ما إنت فارس.. أوعى فيكَ تخيب ظنوني
يلا نبني عِشَانَّا واحة.. من جنونك ومن جنوني
دنيا نبكي وفيها نفرح.. ويبقى شَجَنَك من شجوني
يا حبيب أديني عمرك.. وما حا أبخل بي عيوني

Post: #29
Title: Re: ما بتستاهل التفكير!!!
Author: Balla Musa
Date: 02-23-2005, 11:22 AM
Parent: #28

الأخت نادية تحيات بعدد حروف كلماتك

Quote: ما بتستاهل التفكير!!


بفكِِّر فيك كتير يا زول .. وما بتستاهل التفكير
عشانك إكتويت بالريد .. واتحمَّلت نارو كتير
زفّيت ليك هواي والشوق .. وصدودك كان لغة تعبير
وما بتستاهل التفكير
* * * *
بفكِّر فيك وبِستَغرب ... كيف سِبْتَك تعيش جُوَّاي؟
سنين وسنين هواك بيكبر ... وبعزف لحنو جوَّة غُناي
كيف سبتك تعشعش كيف ... وتقنعني المحب سَوَّاي
وماك سَوَّاي ... وما بتستاهل التفكير!!
* * * *
بحبك أيوه ما بنكُر ... ونقطة ضعفي حبي إليك
بلا استئذان دخلني هواك ... وتحدَّى عنادي لون عينيك
بحبك بِعْتَرِف يا زول ... وخطواتي بتسوقني أجيك .. وبجيك وأجيك وأحدَّق فيك
وأقول في سرِّي رغم الحب ..
ماكَ سوَّاي !!
وما بتستاهل التفكير!!


Quote:
بفكر فيكي برضي كمان اريت لو يرحم التفكير
ولو سكتنا عترت يوم وجاطت جدول التغيير
تجي و تلقيني حاضن الشوق ويصبح حبي بيكي كبير
وتسكني في مراسي هواي و اديلك محنة كتير
وجد تستاهلي التفكير

بفكر فيكي بس عارف مكانك جوة في الاحساس
وعارف انو حبك لي بقسموا منو حب الناس
ولو سالوني عنك يوم بلاقو هواكي في الانفاس
وبعرفوا قصة التفكير و انو هوايا ليهو اساس
وجد تستاهلي التفكير

بحبك و برضو ما بنكر و لو انكر بشوفوا هواك
مسطّر في مسام الروح وبعرفوا اني كيف بهواك
وما فارقتا دربك يوم ولا حنيت لي غالية سواك
لانك عندي كل الكون ومركز دورة الافلاك
وجد تستاهلي التفكير[ ]

Post: #32
Title: Re: ما بتستاهل التفكير!!!
Author: نادية عثمان
Date: 02-23-2005, 02:50 PM
Parent: #29

بلة ود عمى موسى

انت الروعة زاااااااااااااااتها ياغالى

اسمع مداخلة كده ساى مابتنفع

جيب الهامك وشطح خيالك وتعال نحنا راجينك ..

Post: #30
Title: Re: ما بتستاهل التفكير!!!
Author: ود الشيخ
Date: 02-23-2005, 11:31 AM
Parent: #1



بوست بشرق عديل

Post: #33
Title: Re: ما بتستاهل التفكير!!!
Author: نادية عثمان
Date: 02-23-2005, 02:51 PM
Parent: #30

ود الشيخ العزيز

تبرى من الشرقة اخوى

يلا يازول جيب روائعك وتعال بشهد كلماتك البتشرق ديك

ونحنا فى رجاااااااااك

برضو ..!

Post: #34
Title: Re: ما بتستاهل التفكير!!!
Author: عشة بت فاطنة
Date: 02-23-2005, 03:08 PM
Parent: #33

Quote: وبجيك وأجيك وأحدَّق فيك
وأقول في سرِّي رغم الحب ..
ماكَ سوَّاي !!
وما بتستاهل التفكير!!

لا لا يا ندوية ، دا شاكوش حار خلاس .

Post: #35
Title: Re: ما بتستاهل التفكير!!!
Author: نادية عثمان
Date: 02-23-2005, 03:56 PM
Parent: #34

الغالية عشوشتنا بت فاطنتنا السمحة

قلتى :

لا لا يا ندوية ، دا شاكوش حار خلاس

هو شاكوش ساى ....ده شاكوش صامووووتى وحاتك

ههههههههه

اقول ليك حاجة اجمل الشواكيش هى التى تولد القصائد وجميل الابداع

تسلم ياحبيبة

وكونى بخير دوما

Post: #36
Title: Re: ما بتستاهل التفكير!!!
Author: munswor almophtah
Date: 02-23-2005, 04:18 PM
Parent: #30

منو البستاهل التفكير
منو الياناديه غيرنا قدير
منو الشيد قلاع الحب
منو السواك جوا أمير
منو الرصاك بالالماظ
منو الغطاك كسوه حرير
منو الياناديه غيرنا أمير
روائع الفه صدق احساس... وضاخه عبير
وباقات الورود اصناف... طيور الجنه للتعبير
نوافير العشق شربات ومنبجسات أزاهير خير
شريفات القليب مفتوحه مين غشاك مين صداك
مين نحاك مين ودر دروب الشوق ونثر الشوك شراك لخطاك
مين فجر براكين غيره قاذفه اللافا...بين لقياك
انا الدايس ابار الشوق زرار الحب لى محياك
انا الفى الدنيا باقى معاك وكان للآخره بترجاك


منصور

Post: #37
Title: Re: ما بتستاهل التفكير!!!
Author: نادية عثمان
Date: 02-23-2005, 04:50 PM
Parent: #36

العزيز منصور

اجمل رد على كلامك ده هو :



اندهاش


من يوم رأيتك يا جميل ... وانا جد كتلني الاندهاش
يا هاش وباش
يا ريحة المطر الدُّعَاش
يا نفحة من عطر الأزاهر.. ويا تلاوين الفراش
* * * *
من يوم رأيتك شفت فيك ألق الصباح
نورو اترسم
ولو ما السعادة صحيح قِسَم
أنا لي هواك كان اتْقَسَم
ضحك الزمان ليك ابتسم.. ونصيبي من بدري اتحسم
* * * *
من يوم رأيتك إشتهيت.. قول السمح وفال العديل
يا زول مجرتق بالورود.. مولود في أحضان الخميل
ولو مِلتَ مال الكون معاك.. ولو لا لا يبقي عذاب طويل
* * * *
من يوم رأيتك قُلت ليك.. فكِّر ورُد بس بي مهل
بضمن معاك فرح السنين.. لو إنت تديني الأمل
رُد يا حبيب جاوب علي.. وصدّق بيانك بالعمل

Post: #38
Title: Re: ما بتستاهل التفكير!!!
Author: محمد حسن العمدة
Date: 02-23-2005, 05:17 PM
Parent: #37

لالالالالالالالالالالالالالالا دا ابداع حقيقي



ويا موصلي كلمة رائعة بس ما كفاية انا اطلب منك طلب خاص ويا ريت يتحقق رائعة صلاح شتات ونادية ومنصور ديل لااااااااازم تلحنن لينا وتغنيهم وتقدمهم هدية للمنبر عليييييييييييييييييك الله يا موصلي ما تخذلني واول مرة اطلب منك طلب

دا ابداع ما بعدو ابداع ويا ريت كما لو اخونا المطر جاب جورج وجو بيجاي دا سودانا ح يولع بالفرح عديل


يا خوانا نكورك ولا نسوي شنو انا غايتو عاوز انطط عاوز اكورك عاوز اعمل اي حاجة

Post: #39
Title: Re: ما بتستاهل التفكير!!!
Author: نادية عثمان
Date: 02-23-2005, 06:10 PM
Parent: #38

الغالى محمد حسن العمدة ..العمدة

تسلم من كل شر يارب

قلت:

يا خوانا نكورك ولا نسوي شنو انا غايتو عاوز انطط عاوز اكورك عاوز اعمل اي حاجة

انت ممكن تعمل كتييييييير يامبدع

سن قلمك السنيييييين واكتب وادينا من شعرك مدد

كن مارا دائما من بيوتاتى يامحمد فوجودك باهى جدا اينما حللت..

Post: #40
Title: Re: ما بتستاهل التفكير!!!
Author: bayan
Date: 02-23-2005, 08:17 PM
Parent: #38

Quote: يا خوانا نكورك ولا نسوي شنو انا غايتو عاوز انطط عاوز اكورك عاوز اعمل اي حاجة


انا المفروض اكورك واصرخ وانطط واعضى كلب الجيران كمان..

معقول يا العمدة تخلينى امرق مصارين كمبويترى فى السهلة وتقول ماشى تصلى .. وتشرنى؟

يا اخى انا انتظرتك لغاية 2 صباحا بتوقيتنا...الا كان صلاة جنازة دى...
الله ينعل ميتين
شناتنا دى..البتخلى الزول يشرك دونما تأنيب ضمير ولا اعتذار...

نادية يا حبيبتى قولى للعمدة دا ما يشر خالتو تانى...
ويجى يتم الشغل البداه...

Post: #41
Title: Re: ما بتستاهل التفكير!!!
Author: bayan
Date: 02-23-2005, 08:26 PM
Parent: #40

نادية الحبيبة..

لازم تعملى كوت للكلام البتنقليه عشان يكون واضح..

تقومى تنقلى الجزء العايزاه.. تختيه فى مكان الكتابة تظلليه

فوق فى مسطرة خيارات بتلقى مكتوب
Quote

Quote: ما بتستاهل التفكير!!!




اها تضغطى عليها بيجى صندوق طوالى تضغطى اوكى..

بيجيك الكلام فى كوت...كدا بوستك بيكون منظم..

اسع بكرة يجى ذول يقول بيان "الحاجّة الهكرة" لها خبرات واسعة فى الكمبويتروالدليل بتعرف تعمل كوت..

Post: #44
Title: Re: ما بتستاهل التفكير!!!
Author: نادية عثمان
Date: 02-24-2005, 06:33 AM
Parent: #41

الحبيبة د. بيان ..الكمبيوتر اومين الخطيييييييييرة !!

انا والله مابعرف اسوى الكوت ده لكن كدى احاول اسويهو هنا وانفذ كلامك واجى ايمكن استوعب حاجة



Quote: لازم تعملى كوت للكلام البتنقليه عشان يكون واضح..

تقومى تنقلى الجزء العايزاه.. تختيه فى مكان الكتابة تظلليه

فوق فى مسطرة خيارات بتلقى مكتوب
Quote


لادى مانفعت!!

عملت كوت لكن مابجينى الكلام فى مربع كده ..فى حاجة غلط اكيد

Post: #42
Title: Re: ما بتستاهل التفكير!!!
Author: نادية عثمان
Date: 02-23-2005, 08:33 PM
Parent: #40

والله بااااااااااااااااااالغت ياعمدة

تشر الدكتور

وتهرد مصارين كمبيوتر الدكتورة

وتخليها فى السهلة مشرورة ؟؟

لا عاد فى دى اتلومت ياود العمد !!

بيان الدكتورة الحبيبة

النبى ماتزعلى ......وهو اكيد يكون صلى ونام فوق السجادة جنب الابريق ونسى الحكاية

معليش وهسى بجيك ياغالية ..

هسة برجع يعتذر واحتمال يجيب ليك لاب توب جديييييد لنجى كنوع من الاعتذار الجنتلمان جدا !

Post: #43
Title: Re: ما بتستاهل التفكير!!!
Author: جمال السنوسي
Date: 02-24-2005, 02:57 AM
Parent: #1

Quote: ما بتستاهل التفكير


بستاهل وبستاهل وبستاهل لأني حقيقة بستاهل
وتكفي الريدة بيناتنا تخلي إحساسنا بتواصل
لا بتغيبي من جواي ولا عن ريدك بتغافل
وما ظنيت اعيش في يوم اسيب ريدك واتجاهل



جمال السنوسي

Post: #45
Title: Re: ما بتستاهل التفكير!!!
Author: نادية عثمان
Date: 02-25-2005, 12:10 PM
Parent: #43

العزيز جمال السنوسى

Quote: بستاهل وبستاهل وبستاهل لأني حقيقة بستاهل
وتكفي الريدة بيناتنا تخلي إحساسنا بتواصل
لا بتغيبي من جواي ولا عن ريدك بتغافل
وما ظنيت اعيش في يوم اسيب ريدك واتجاهل


ايوة انت بتستاهل

لكن هو

ماااااااااااااااااا بيستاهل ابدا !!

Post: #46
Title: Re: ما بتستاهل التفكير!!!
Author: نادية عثمان
Date: 02-27-2005, 02:09 PM
Parent: #45

والله صدقتى ياندى القلعة

مابيستاهل التفكير

رأيكم انو ندى حاتغنى النص ده بكل ابعاده الشعورية والحسية واللحنية زى ماانا متوقعة ؟

ندى بت فنانة جدا ..وانا متشوقة اسمع النص بصوتها والله ..!

Post: #47
Title: Re: ما بتستاهل التفكير!!!
Author: خدر
Date: 03-23-2005, 04:30 AM
Parent: #46

Quote: بفكِِّر فيك كتير يا زول .. وما بتستاهل التفكير
عشانك إكتويت بالريد .. واتحمَّلت نارو كتير
زفّيت ليك هواي والشوق .. وصدودك كان لغة تعبير
وما بتستاهل التفكير


ده زول مالذيذ

Post: #51
Title: Re: ما بتستاهل التفكير!!!
Author: نادية عثمان
Date: 03-24-2005, 04:13 PM
Parent: #47

المبدع خضر



Quote: ده زول مالذيذ



وهو كان لذيذ .........كنت قلت ليهو مابتستاهل التفكير ؟

شنو ياخدر ماتخليك ود لذيذ ..وتفهمونا بقى !!

Post: #48
Title: Re: ما بتستاهل التفكير!!!
Author: ست البنات
Date: 03-23-2005, 10:22 AM
Parent: #1

واا سيجيمتى انا الفاتنى اللعب دا كلو !!


يا نادية يا روعة


يا منبع الأحساس

شبه العقيق والماس

الزول دا ما انسان

خلاك للأحزان

مكسورة الخاطر

تبكى الدموع أطنان

ما قيم الريدة

وماب يعرف التحنان

خليهو ما تأسى

ماب يستحق حبك

ولمن يجيك راجع

قابليهو بى صدك

ياخد درس مظبوط

يعرف حدود قدرك

وان جاك كمان ندمان

ما أجمل الغفران

ست البنات .

Post: #49
Title: Re: ما بتستاهل التفكير!!!
Author: نادية عثمان
Date: 03-23-2005, 11:48 AM
Parent: #48

ست البنات العسسسسسسسسسسسسسسسسل


زكرتينى ليهو تااانى بعد ماكنت نسيتو !!!


ست البنات ياناس

روعة وجميل احساس

البت حديقة عديل

بى طعمها الاناناس

الزولة راقية شديد

وزى الدهب والماس !


وبجيك تانى يالحبيبى آست البنوت لى حدهّن!!

Post: #50
Title: Re: ما بتستاهل التفكير!!!
Author: ست البنات
Date: 03-23-2005, 07:38 PM
Parent: #1

لله درك يا بهية ، وأنت قمر يتوسط نجمين ، يجمعكم النظم الرصين ، والجمال ، والتفرد !!!

ست البنات .

Post: #53
Title: Re: ما بتستاهل التفكير!!!
Author: نادية عثمان
Date: 03-25-2005, 06:02 PM

ست البنات ..ست الرقى والطيبة والجمال الفى الدنيا كلووووووووو





Quote: لله درك يا بهية ، وأنت قمر يتوسط نجمين ، يجمعكم النظم الرصين ، والجمال ، والتفرد !!!


تسلمى ياست البنات لى حدهن ..والله السر احمد قدور والتيجانى حاج موسى فعلا نجوم فى سماء الابداع فى بلادى ومن دواعى سرورى ان تجمعنى بهم اللحظات الطيبة الشجية


اما حكاية انى قمر دى ......اقيتو الله يجبر بى خاطرك ياالرافعة معنوياتى دائما ياست الجمال ياغالية!!

Post: #52
Title: Re: ما بتستاهل التفكير!!!
Author: Ehab Eltayeb
Date: 03-24-2005, 07:00 PM
Parent: #1

Quote: بحبك أيوه ما بنكُر
ونقطة ضعفي حبي إليك...
بلا استئذان دخلني هواك
وتحدَّى عنادي لون عينيك...


الاخت ناديه سلامات...

وكيف الحال لي عدة ايام -اسبوع عديييل- اقرأ عنوان البوست..

وافوت اخليه... اول يوم افتحه ...

فلك التحية علي هذه الدوزنة الرائعة ..والتوليفة الجميله..

تحياتي.. وفي إنتظار المزيد,,,

Post: #55
Title: Re: ما بتستاهل التفكير!!!
Author: نادية عثمان
Date: 03-26-2005, 11:18 AM
Parent: #52

الاكرم ايهاب الطيب

تسلم على المرور الباهى جدا

بعد اسبوع ..بعد شهر ..بعد سنة..!!

المهم انك تزورنا يارائع

وبزيارتك بيتنا نور ..زى رتينة


وسعيدة ان اعجبتك ايقاعاتى الشعرية ..

Post: #54
Title: Re: ما بتستاهل التفكير!!!
Author: أحمد الشايقي
Date: 03-25-2005, 10:44 PM
Parent: #1

نادية عثمان


مبدعــة دايما

بتفكير وبدون تفكير

تحياتي

Post: #56
Title: Re: ما بتستاهل التفكير!!!
Author: نادية عثمان
Date: 03-26-2005, 06:54 PM
Parent: #54

العزيز احمد الشايقى



Quote: نادية عثمان


مبدعــة دايما

بتفكير وبدون تفكير



ياسلام عليك......ده بس من ذوقك ياراقى


والله اخجلت تواضعى !!


انت قصيدة ود الشوايقة ماوقعت تحت عينك فى صفحة خرتومية ولاحاجة؟!!

Post: #57
Title: Re: ما بتستاهل التفكير!!!
Author: فريد ودالمسيد
Date: 03-26-2005, 09:01 PM
Parent: #1

ما عدمنا شدوك يا نادية النادية

أكيد بستاهل ما دام فكرت فيهو نادية

روعة وإبداع ...

Post: #58
Title: Re: ما بتستاهل التفكير!!!
Author: نادية عثمان
Date: 03-27-2005, 06:30 PM
Parent: #57

العريس فريد ود المسيد شخصيا هنا؟


يامرحبا ..يامرحبا

والف الف مبروك بالعريس الجميل


سعيدة لمرورك الملائكى من بيتى هذا وطربك لكلماتى ايها العزيز

Post: #59
Title: Re: ما بتستاهل التفكير!!!
Author: أحمد الشايقي
Date: 03-27-2005, 10:24 PM
Parent: #1

الاخت الكريمة نادية عثمان


طبعاُ طالعت القصيدة (هو أنا أقدر ما اقراها)

وكان ذلك بعين الرضــا

وخشيت من التدخــل


خــوف (العين)


وليحفظكم الله

Post: #60
Title: Re: ما بتستاهل التفكير!!!
Author: نادية عثمان
Date: 03-28-2005, 05:29 PM
Parent: #59

الاكرم احمد الشايقى


Quote: وخشيت من التدخــل


خــوف (العين)



ماتخاف من العين انت محروس بى برا وياسين

يلا امشى وقع على القصيدة ياود الشوايقة!!

Post: #61
Title: Re: ما بتستاهل التفكير!!!
Author: نادية عثمان
Date: 04-05-2005, 09:56 AM
Parent: #60

عندما يقتلنى الشوق اليه

ويستفزنى التفكير فيه

اخلد الى النوم هروبا فاجده متحكرا فى احلامى !!!


ياله من لايوووووووووووق!!!!!