إصلاح الكتابة في المنبر

إصلاح الكتابة في المنبر


01-11-2005, 06:52 AM


  » http://sudaneseonline.com/cgi-bin/sdb/2bb.cgi?seq=msg&board=85&msg=1188762399&rn=192


Post: #1
Title: إصلاح الكتابة في المنبر
Author: محسن خالد
Date: 01-11-2005, 06:52 AM
Parent: #0

إصلاح الكتابة

لقد قرأت موضوع الكاتب الإسفيري وأُعجبت به بالرغم من كوني "كاتب من ورق"، على وزن نمر الورق. وفي كلتا الحالتين للكتابة شروط اللغة، وقيود التعبير، وإلا كَتب كلُّ شخصٍ لنفسه، أو في مدى تجريدي يفهمه هو، يشذ عن حالتي الكتابة الورقية والإسفيرية. وإذا قمنا بشكل عمومي بمقارنة الكتابة العربية إجمالاً/ الكتب والصحافة وتحرير المواد للفضائيات وغيرها من وسائل الإعلام، (بـ) الكتابة السودانية في إجمالها أيضاً، نجد أنّ المستوى التحريري للكتابات السودانية رديء جداً، يعني (إملاء ما عندهم). وعنوان هذا الموضوع (إصلاح الكتابة) أنا أخذتُه من صديقي وأستاذي السوري د. ياسر شرف، إذ يمثّل عنواناً حديثاً لأحد مؤلفاته التي ربما تبلغ الـ100، والمؤلَّف بصدد نظرية جديدة حول إصلاح الكتابة العربية. على العموم أنا سأقوم بعودة موسّعة لأُناقش هذا الكتاب، ولأحاول أن أكتشف أنا ومن شاء أن يسبر معي هذه المادة، وأن نرى فيمَ يختلف هذا الكتاب حول إصلاح الكتابة عن الكتابات سابقته، مثل كتابات أمين الخولي وإبراهيم مصطفى أو تلميذه المخزومي، وماذا عن نظرية إسقاط العامل، وماذا عن مقترح إدخال روابط عربية جديدة على اللغة، وماذا عن وعن وعن.....
طيّب،.. كتابتنا الإسفيرية في هذا البورد،... مالها؟؟؟ سجمانة،...
طيّب،... المقترح،... نقوم بإصلاحها! كيف؟ بمشاركتنا لبعضنا فيما يحوزه كلٌّ منا من معرفة، (بالساهلة).
عن نفسي سأستخدم لفظة (لطيفة) النقدية الحلوة هذه، لأنّ القدماء من العرب والعاربين وغيرهم، كانوا إذا رغبوا في انتقاد أمر ما، عنونوا كلامهم بـ(لطيفة) ثم شرعوا يكيدون كيدهم،... وأدعو كلّ من يشاركني هذا الهم أن يختار لنفسه باباً لينزل فيه ما يشاء من ملاحظات حول الكتابة وإصلاح الكتابة في البورد،..
أنوّه لكوني سأقوم بسودنة ما أكتب لتكون الانتباهة واضحة لمن يقرأها.

لطيفة (1)

1 – يلاحظ في البورد أنّ معظم الشباب يكتبون: إنشاء الله،... هكذا،.. وهذا يعني: تشييد الله، أو كما تقول إنشاء كُبري.
الصحيح: إن شاء الله، (إنْ) مفصولة عن الفعل لكونها أداة شرط، وشاء بموجبها تصبح جملةً للشرط، أو فعل لا علاقة له بـ"إن".


2- أما الخطأ الكبير والفادح، الذي يتجاوز السودانيين ليشمل كل الدول التي تكتب بالعربية تقريباً، فهو الخطأ الآتي:


[COLOR: #1e90ff]...


لو حبّيت أكتب إحدى هذه الكلمات: الاعتراف ، الإكرام، الإسلام، استثمار، انتظار، إيمان،...
أو الأفعال (الثلاثية) اذهب، امضِ، ابكِ....
طيّب المشكلة شنو؟؟؟
المشكلة هي الهمزة الصغيرونة دي، كيف نكتبها؟؟ من فوق من تحت، هي نفسها في وألا مافي؟؟؟؟ وووو...

القاعدة:
ما عليك إلا أن تكتب الكلمة التي تودُّ كتابتها: الاستثمار مثلاً،... هل يجب كتابتها: الاستثمار،... بدون (الهميزة) من تحت، أم الإستثمار،.. مع (الهميزة) من تحت.
عليك فقط استخراج الفعل من الكلمة، وأقرب فعل يمكنك استخراجه،..
الاستثمار...... الفعل منها: استثمر. ثم تحسب عدد حروفه، طبعاً 6 أحرف.

الائتمان.... الفعل منها: ائتمن..... 5 أحرف.

الاتكال .... الفعل منها....... اتّكل ... يعني مع حساب الشدة (اتتكل)، 5 أحرف

والقاعدة هي، إيّاك وحذراك أن تكتب (الهميزة) (من تحت) في الكلمات التي يكون أقرب فعل مستخرج منها غير رباعي، يعني كان ما لقيت الفعل 4 أحرف تحرم الكلمة من الهميزة المزعجة،...
الاختصار ............ بدون هميزة من تحت، أقرب فعل منها هو: اختصر... خماسي
الاسترزاق.......... بدون هميزة من تحت، أقرب فعل منها هو: استرزق... سداسي


طيّب لو كان وجدنا الفعل 4 أحرف، هنا في إضافة صغيرونة، ماهي؟
مثال:
الإيمان... الفعل منها آمن. مع حساب المدّ (أأمن) 4 أحرف.
الإكرام... الفعل منها "أكرم" 4 أحرف.
الإسلام... الفعل منها "أسلم" 4 أحرف،..

في حالة إنو يكون الفعل بتكون من أربعة أحرف، يجب أن نلاحظ إنو الهمزة ستُكتب من فوق، إن كنّا سنكتب الفعل نفسه: أسلم... أكرم....
وبرضو لو حاولنا صياغة "فعل الأمر" من الفعل الرباعي، بنلقى إنو الهميزة بتظل مكتوبة من فوق:
أسلم يا رجل.... أي أمرت الرجل بأن يسلم..
أكرم ضيوفك يا أحمد..... أي أمرتُ أحمد أن يكرم ضيوفه...

وكمان لو حاولنا أن نكتب (الاسم) و(المصدر) من الكلمة رباعية الأصل، بنلقى الهمزة بتكتب من (تحت)
أكرم.... الإكرام..... الهمزة كُتبت من تحت (الاسم)
أوفد.... الإيفاد....... الهمزة كُتبت من تحت (الاسم)

أوفد.... الإيفاد... إيفاداً..... (إيفاداً) كُتبت من تحت (المصدر)
أعطى ... الإعطاء..... (إعطاءً) كُتبت من تحت (المصدر)

هنا القاعدة مشروحة مع اختصار شديد ولكن بوضوح، لمن شاء الاستزادة فليتابع هنا، من باب التمادي في الشرح، على النهج المدرسي:

أولاً الهمزة الأنا سمّيتها من فوق ومن تحت دي، اسمها (همزة القطع)، اللهي بتظهر عليها حركة الهمزة، بالنسبة للألف الميطي ساي دا، بدون أي رأس من فوق أو من تحت، دا اسمو (همزة الوصل) يعني لما تقراهو بتصلو بما يجاوره وما بظهر،..

اقترب (أحمد اقترب من المدينة) بحكي عن أحمد....
وممكن برضو (اقترب مني يا أحمد)، وهذا أمر لأحمد بأن يقترب مني،
أقتربُ من المدينة (بتكلم عن نفسي)

ماضي الرباعي وأمره ومصدره (همزة قطع)
أقبل... فعل ماضي
أقبِل.. فعل أمر
إقبال... مصدر...

ماضي الخماسي والسداسي وأمرهما ومصدرهما (همزة وصل)
انهمر... فعل ماضي،
انهمر... فعل أمر
انهمار... مصدر

استعمر... فعل ماضي،
استعمر.... فعل أمر
استعمار.... مصدر

(طيّب الأمثلة دي كلللها ليه؟ قبل ما ندخل للثلاثي، برضو ليه؟ لأنو مصدر الرباعي والخماسي والسداسي، "قياسي"، أما الثلاثي فسماعي)


إذن أمر الثلاثي –المتأكدين منو بس- (همزة وصل)
اذهب أنت وربّك فقاتلا
طيّب مصدر الثلاثي "سماعي" ما عندو قاعدة ذاتو، إذن القواعد هنا كلها غطست؟
مثلاً:
كتب وذهب... كتابةً وذهاباً..... يعني مافي قطع ولا وصل

على العموم تحسب الفعل، لو رباعي تديها صنّ ويا همزة من تحت في حالة (الاسم) و(المصدر)، ويا من فوق في حالة (فعل الأمر)، لو مش رباعي تجردو فوراً من أيتها همزة، ما لم تكن أنت المتكلم:
سأذهب إلى الخرطوم
سأستسقي لقومي
ويمكنك مراجعة الأفعال أعلاه إذا لم ينفع هذا التلخيص،..
بأي حال ربما نسبة الهمزات = 30 في المائة، بينما نسبة عدمها تساوي 70 في المائة، لو غلبك تحددها ما تكتبها،..


3 – اللطيفة الثالثة هي في القاعدة الثابتة والساهلة الخاصة بالقول وبمختارات أخرى، (قاعدة كسر همزة إنّ)،... وهي قاعدة طويلة ولكنني سأُثبت منها الأشياء الضرورية جدا جدا، والتي يكثر فيها الخطأ في المنبر: مثلاً،..
يقول أن الحركة الشعبية لتحرير السودان، ..... وهذا خطأ، ... وحتى نحن في عاميتنا نكسر همزة (إن) بالسليقة، لا أدري لم نفتحها في الفصيح، لتصبح خطأ،،،
القاعدة:
بعد أي قول أو (قوالات) نكسر همزة إنّ،..
يقول إن الحركة،..
يقول إنهم سرقوا كتابه،...
تقول الأميرة إن الفارس الفلاني،..
قال إن،..
باختصار، أي قول ، أو متى ما وجدت قال، يقول، تقول، يقولون، يقلن،.. نكسر همزة إن.
وأيضاً نكسرها بعد الرابط (حتّى) أي نقول: حتى إنه لم يخبرني بالأمر، حتى إنها سافرت ولم تودعني،.. يعني وين ما شفت حتى بعدها تكسر همزة إن..
وأيضاً بعد (ما) الصلة،..
فالخطأ الشائع في البورد، ما أن رفعت رأسي إلا وكيت كيت،...
والصحيح/ ما إن رفعت رأسي،..
ما إن اتضح الأمر إلا وووو...
وكذلك يجب كسر همزة (إن) بعد القَسَم:
فخطأ قولك أُقسم أنني سأفعل كذا وكذا،..
الصحيح أُقسم إنني سأفعل كذا...
أُقسم إنه لكاذب
أقسم إنها لكيت وكيت

وإلى لقاء عند اللطيفة القادمة،.....
(هذه القواعد قطعية الثبوت والصحّة، ولذلك أنا أنزلتها لعامل اتضاحها الشديد، من كتاب لي بعنوان، "الُمعْرِب الصحفي"، وكنت قد قصدت به العاملين في كل مجالات الإعلام والثقافة، لحاجتهم للضروري والمختزل من اللغة).
يلا... الدعوة للجميع....




Post: #2
Title: Re: إصلاح الكتابة في المنبر
Author: نصار
Date: 01-11-2005, 07:30 AM
Parent: #1

العزيز محسن صالح

دعوة شنو يا زول اللجميع، واصل يا اخينا
الشغلة ما شغلتنا بس الظروف جبرتنا
بس لاحظ انه اغلب الناس بكتبوا بالحرفنة
في المنبر دا هم اصلا ما كتاب و لا صحفيين
و ما عندهم برامج عربية و لا لوحات مفاتيح
عربية ولا امكانيات تشكيل.

استمتعت جدا و استفت من اصلاحاتك فالرجاء
ان تواصل


صادق ودي

Post: #3
Title: Re: إصلاح الكتابة في المنبر
Author: محسن خالد
Date: 01-11-2005, 08:13 AM
Parent: #2

الأكرم نصّار، تحية ماطرة تصلك غيمة بعد غيمة
طبعاً إصلاحنا للكتابة سيكون فيما نقدر عليه، إذا المشكلة من الأجهزة فلا بأس،..
قصدي إنو الشينة تب، زي إنشاء الله، على الأقل نرتقها
وليك الود والاحترام، وسنواصل في هذا الموضوع حتى نهاية الشوط، لو اتسهّلت معانا، وشكرا

Post: #4
Title: الكتابة الصاح
Author: هشام المجمر
Date: 01-12-2005, 02:07 AM
Parent: #1

الأخ / محسن

فضحتنا وكشفت المستور.

اقحمنا نفسنا على عالم ندرى أن له قواعد وترتيبات نجهلها ربما بدافع رغبتنا الجامحة لإطلاق سراح ما بين جوانحنا.

أرجو أن تواصل الكتابة و بسرعة .
كيف نتحصل على الكتاب المذكور.؟

Post: #430
Title: Re: الكتابة الصاح
Author: Mohamed E. Seliaman
Date: 04-15-2006, 02:12 AM
Parent: #4

السلام عليكم جميعا
الشكر لصاحب الكتاب
بعض التنبيهات هنا:المســـك والعنبـــر: اصـــلاح (((اصلاح الكتابة في المنبر))))
نرجو من صاحب الكتاب
أن يتولى مراجعته وتصحيحه.
شكري للجميع
الحبشي

Post: #5
Title: Re: إصلاح الكتابة في المنبر
Author: محمد ابراهيم قرض
Date: 01-12-2005, 02:31 AM
Parent: #1

محسن ...
مشكوور ... و الله نجمت لينا المثقفاتية
ديل جنس نجامة ... أتاري نحن من زمان
بنقرأ كتابات مكتوبة غلط و نحن ما عارفين؟؟؟

و بعدين واحد يكتب ليك :
(حيث أن الفزلكة السلحفائيةتدل
على الاستدامة التفكيكية الناشئة من
صيرورة الحداثة البنيوية ، فإن الإمور
تكون قد جاطت كعها جوطة بنت كلبية) !!!

بالذمة ده كلام يتفهم ؟؟؟
عليك الله دي ما نوعية شاذة
من الاستعلاء اللغوي ؟؟؟

لاحظ عدم وجود الهميزة في كلمة الاستعلاء !!!

Post: #6
Title: Re: إصلاح الكتابة في المنبر
Author: المعتمد
Date: 01-12-2005, 02:35 AM
Parent: #1

الاخ محسن.
سلام.
كلامك سليم ومبسط وقواعد سهلة التطبيق ان شاء الله نقدر عليها.
بس فى ملاحظة صغيرة وهى بالنسبة لى انا بالذات بكون داير ارد على عدد كبير من الناس او ان اكتب موضوع والزمن لا يسمح لى بوضع همزة ان او همزة الأكل وهلمجرا عشان كدة الكتابة بتجى بدون ضوابط نحوية او لغوية تقليدية.
على العموم هذه المعلومات التى اوردتها ستفيدنا طثيرا فى الكتابة الرسمية .
نرجو مواصلة اللطائف
ولك الود

Post: #7
Title: Re: إصلاح الكتابة في المنبر
Author: Alsadig Alraady
Date: 01-12-2005, 03:20 AM
Parent: #6

لطائف فعلا يامحسن
وعلى قول الحلفاوي ، في نكتة لطيفة : ورمدان (رمضان ) عملتو لينا فيهو شنو ؟
تسلم يا حبيب

Post: #8
Title: Re: إصلاح الكتابة في المنبر
Author: محمد الواثق
Date: 01-12-2005, 03:31 AM
Parent: #1

شكراً استاذنا الكبير
محسن خالد
وحقو كل مرة ترسل بوست عن الأخطاء الشائعة قي مجال اللغة العربية ، وياريت تعمل كمان بوستات عن قواعد النحو علشان نتسفيد . وما نترك أمرنا للخواجة في الكمبيوتر يقترح لينا الهمزات .

Post: #10
Title: Re: إصلاح الكتابة في المنبر
Author: محسن خالد
Date: 01-12-2005, 06:36 AM
Parent: #8

هشام المجمر،..
مرحب يا هشام، شكرا يا فاضل على احتفالك الجميل بي، بعدين لاحظ (احتفالك) بدون هميزة من تحت، هاهها...
ياخي مشتاقين كتير، بعدين اللاب توب، قصتو انحلت وبي كدا لاحظت إني مطوّل منك، تلفن وألا حتى بالتخاطر ما تحرمنا مناجاتك، وخليك عايش ضد أي حاجة، وأولها ضد العيش...

محمد إبراهيم قرض،..
تحياتي ياعزيز، بعدين ما تتورط معاي، أنا ذاتي مرّات بتمسكني نوع حمتن دي، وأقعد أسوي،...
طوبولجي، وميكانيك كم، ونسبولوجي،... وهلمّ خوّافات... هاهاها
وخليك صاحي جناين بس،... ومشكوووور

المعتمد،..
إزيك يا أمير، فهمتك تمام، وأنا ذاتي بجوبكة مرات جوبيك شترتو كعبها تب، لكن ملاحظتك الدقيقة والفي الصميم هي إنو الواحد ممكن يلم الانتباهات دي للكتابة الرسمية، وحقيقي هذا هو قصدي، في البوست ننتبه لإصلاح الكتابة ما أمكن، بس بره بره ننتبه بالضرورة، وفي مقدمتي أنا قلت كدا، وراجع جرايدنا وإعلانات تلفزيونا وووو.... بتعرف قصدي وانتباهتك حول الكتابة الرسمية، وتحيااات من القلب،..

الصادق الرضي،..
شوف ما تعمل لي فيها صحبة صحبة ونحن بيناتنا كلام كتير، كترة الرتيلة في حوض البرسيم، مستني حاجات منك، ومستني تذكرني في مواضيع كتيرة طرحتها عليك، أنا كلمتك إنو الزواج، بلم للزول كرعيهو، لكن بشتت مشهادو البمشوهو بالرأس، (وما تبقه قوّال، هاهاها)،
كتير والله فاقدك ومشتاق ليك،...

محمد الواثق،..
شكرا ليك إنت علي تحريضك دا، وليك مني وعد نجيض إني دائما، وفي نفس المساحة دي أنوّه لكل شيء بستحق، وأرجو من الآخرين وفي نفس المساحة دي، التنويه لكل ما أرتكبه من أخطاء،..
والموضوع مفيد بأي حال زي ما قلت للأخ المعتمد،..
وتسلم دائماً يا سيدنا،...

Post: #9
Title: Re: إصلاح الكتابة في المنبر
Author: محسن خالد
Date: 01-12-2005, 06:32 AM
Parent: #1


Post: #11
Title: Re: إصلاح الكتابة في المنبر
Author: sympatico
Date: 01-14-2005, 03:52 AM
Parent: #9

اعتذار من الاخ محسن خالد الى الاخوان والاخوات المتداخلين في هذا البوست


يعتذر الأخ محسن خالد بشدة عن عدم تمكنه _ او تأخره _ من الرد عليكم لظروف صحية ، حيث دخل مستشفى المفرق صباح اليوم لاجراء عملية جراحية خفيفة ( مساء اليوم) , وسوف يواصل الكتابة بعد انتهاء العملية وفترة التقاهة .

============

امنياتنا للأخ محسن محسن بعاجل الشفاء

والف الف سلامة ليك

Post: #12
Title: Re: إصلاح الكتابة في المنبر
Author: عاطف عبدالله
Date: 01-15-2005, 07:39 AM
Parent: #11

الأستاذ محسن خالد

تعلم فك طلاسم اللغة العربية وحفظ القرآن الكريم بثلاث قراءات قبل دخوله المدرسة الابتدائية، لذا فهو عدا كونه فأر كتب وباحث وقاص وشاعر يعد كذلك عالم في مجال اللغة
سلامتك محسن وألف عزيز كرامتك
سنظل منتظرين جديدك المبهر

Post: #13
Title: Re: إصلاح الكتابة في المنبر
Author: sympatico
Date: 01-18-2005, 00:58 AM
Parent: #1

up

Post: #14
Title: Re: إصلاح الكتابة في المنبر
Author: ود شاموق
Date: 01-18-2005, 01:17 AM
Parent: #1

خطوات عملية .. تحريضية .. لقتل كهنوت الكلام المكتوب

.

Post: #15
Title: Re: إصلاح الكتابة في المنبر
Author: محسن خالد
Date: 01-18-2005, 02:27 PM
Parent: #14

الأصدقاء،
سمبتيكو،....
شكراً لك عن غيبتي، وأنت رجل كنتَ كريماً معي، ومع جهدي في هذا المكان، تحياتي الغالية والوافرة،...


عاطف عبد الله،...
شكراً يا صديق ويا زول شهم، وشكراً حتى على تنوهيك بخصوص تاريخي، الذي صار للقبض علي حيث الذنبوب، هاهاهها....
وليك محبتي وعميم الود،..


ود شاموق،...
ألف مرحب بيك، ولك تحياتي،..
لقد ذهبت مع اللنك وقرأت ما كتبته أنت كاملا، وأبعاضاً مما كتبه ضيوفك،...
أنت بالطبع أحلتني إلى هناك دون أن تقول رأيك هنا، عليه فأنا سأتكلم موجزاً، لعامل مرضي، عمّا هناك،...
أولاً (إصلاح الكتابة) يتضمن هذه الملاحظات التي أنت قلتها بخصوص كتابة الأحرف إجمالاً (المنطوقة وغير المكتوبة)- في مؤلَّف الدكتور ياسر شرف، وليس التي في اسم الجلالة أو في القرآن والنصوص التي يتعامل معها المسلمون بوجه عام على كونها مقدّسة فحسب،...
مع ملاحظة: أن ما قلته هو أصلاً قائم في بعض كتابات قراءات القرآن الأخرى، يصبح الناتج كالآتي: مع القرآن لا مشكلة، لأنها أحياناً كُتبت، وأحياناً لم تكتب،..
ولكن مع مع النصوص العادية والكلمات العادية مثل كلمة (هذا) نحن ننطقها (هاذا) ونكتبها على النحو الناقص والمعروف،....
أمّا الخط الذي أجابك به الناس، فهو ما لن يتبعه محسن خالد ولن يوافق عليه، قصدي قداسة وما قداسة،... لأن الكتابة للقرآن من عمل البشر وليست شيئاً مقدّساً، ويمكنهم أن يحاجوا بأن الصوت مقدّس (ما قرأه جبريل على محمد) ويمكننا أنا وأنت أن نحتج بـ: ولكن كيف نكتب الصوت؟
ولكن أحد المشاركين في الحوار وجّه إليك تساؤلاً أنا أقررته عليه، وسأُعيد صياغته ليعبّر عني بالضبط وكما أرغب،...
يسألك عن هذه الأشياء هل هي ملاحظات خاصة بمفردات أم هي نظرية كتابة جديدة، ليتبعك أنت من رميت القديمة بالصنمية والقداسة المفترضة؟؟،... أنت ستناصر نظرتك طبعاً، وهو سينقلب ليقول لك: ائتني بنظرية كاملة إذن؟؟؟ وهي ستصبح مطالبة مستحقة له،...
أنا نفسي كتبت حول هذا الموضوع كثيراً، ولي ملاحظات جمّة، وما أبحرت في العربية إلا بمثل مفاهيمك هذه، لكي أدمّر أصنامها وما زلت أنصب شراكي، ولكن ليس ضد ما هو منطقي من اللغة،..
لذا تصبح نظرتي للغة إجمالاً با بابتسار شديد:
أنا مع ماهو منطقي، ولست مع ما هو موروث،...
أوافق الاصطلاح بشكل قوي، لأنّ الاصطلاح هو نفسه لغة،.. أو إلى ماذا سأقود الناس أنا؟ إلى أن يتفاهموا أم لا يتفاهموا؟؟؟
ويا أخي العزيز أسعدتني بحق، بإثارتك لهذه السيرة،.. وأنا معك مع (إصلاح اللغة)،...
ولولا المرض لكتبت لك الليل بطوله، دون أن أزعل من إحالتك الصامتة لي، وحرمانك لي حتّى من التحية، هاههاها
بأي حال شكراً،
وخليك في الجوار،...

Post: #16
Title: إصلاح الكتابة في المنبر
Author: محسن خالد
Date: 01-20-2005, 09:02 AM
Parent: #15

اللطيفة (2 )


اللطيفة (2 )
هناك استخدامات خاطئة ومبنية على حس عام خاطئ، تتم مع الروابط التالية:
طالما، ما دام، -- لا زال، ما زال، -- ممّا، ما –
هنا تجب الإشارة إلى أنّ الاستخدامات المبنية على حس عام مكرّس وخاطئ، هي أخطاء يصعب تصحيحها أو النزول عند حسها الجديد، ولكن المسألة أنا أنظر إليها في منحيين، أولاً يمكن للحس أن يتدرّب بمرور الزمن، ثانياً، أنّه لا بد من تصحيحها في استخدامنا لأجل الأجيال القادمة، فالذي نكتبه لن يضيع هباءً، وإنما سيبقى، فوجوده يُسهم في بناء الحس الذي يأتي بعدنا ويقرأ، فإن بنيناه على الخطأ جعلنا أخطاءنا متوارثة وبعيدة الوجود في المستقبل، وإن قمنا بمعالجتها، قمنا بعكس ذلك،....
والناس يقومون بتصحيحات فيما يخص المفردات، مثلاً:
لا تقل: (شيّق)، بل قُل (شائق)، لو كنت تعني المتعة، أي (موضوع ممتع)،...
لا تقل: (وِفْقاً) لقوانين سبتمبر، بل قُل: (وَفْقاً)،....
لا تقل: (صَعَد) لسطح المنزل، بل قُل: (صَعِد)،..
وهكذا، بطريقة مختصرة وسهلة، وهو الأمر الذي سأنزل به قوائم مطوّلة في المستقبل وبهذه الكيفية اليسيرة،.... ولكن الناس ينسون الروابط من جنس:
طالما، ما دام، -- لا زال، ما زال، -- ممّا، ما –
بالرغم من سوء الاستخدام لها ومن الجميع تقريباً،.. لدرجة تكوين حس عام خاطئ في استخدامها، الأمر الذي سأسعى لتوضيحه هنا،...
1- الخطأ الأول كأن نقول:
عليك أن لا تحتج على كلامي، طالما أنت لم تكن حاضراً،... أو:
طالما أنك ستذهب للسعودية فابعث لي بالشيء الفلاني،...
(طالما): تعني كثيراً ما،.... ولا علاقة لها مطلقاً بالاستخدامين أعلاه،،...
والصحيح أن تستخدمها هكذا:
(طالما) أو (لطالما) تغنّيتُ بالحرية،،
طالما نصحتك ولم تستجب،..
(الذي حدث هو أنّ الناس أبدلوا حس (ما دام) بـ(طالما)،... فالجملتان المتقدمتان تصبحان كما يتلي،..
عليك أن لا تحتج على كلامي، ما دمتَ لم تكن حاضراً،
ما دام أنك ستذهب للسعودية فابعث لي بالشيء الفلاني،...
(العجيبة أننا في حسنا العامي (السوداني) نستخدم ما دام، وبشكلها الصحيح، ولكن في الفصحى (نتفلهم شوية) ونخطئها،...
(يا زول ما دام ضمنو ود علي ما بيّتوهو في الحَرَاسة)،،...
(ما دام جيتني آود الشيخ برقبتك للبنيّة، والله تب مي كتيرة علي ولدك)،.... هاهاهها

2- الخطأ الثاني كقولنا:
لم يعثروا على المفقود، ولا يزال البحث جارياً
تركته في لندن، ولا يزال مواصلاً في كذا وكذا
(لا يزال) لا تُفيد أبداً الاستمرارية ودوام الحال،.... ولا علاقة لها بذلك،
بل هي تُفيد الدعاء والتمنّي،...
فالصحيح قولنا:
لم يعثروا على المفقود، وما يزال البحث جارياً
تركته في لندن، وما يزال مواصلاً في كذا وكذا
وفي آخر الحفلات والهجيج يقولون: ولا يزال الليل طفلاً يحبو...
والصحيح: وما يزال الليل طفلاً يحبو،...
لا يزال تستخدم هكذا:
لا زال لي فيك رجاء،...
لا زلتُ أدعوك لنبذ العنصرية،..
فهي بذا تعني: أرجوك، أو لي فيك أمل، أن تفعل كذا وكذا،....

3 – الخطأ الثالث كقولنا:
طفح البورد بالعنصرية، ممّا اضطر البعض للامتناع عن المشاركة فيه
صعبت عليّ الدراسة، ممّا دفعني للاستقالة
وهذا خطأ فادح، (ممّا) تعني (من الذي)،... فالله يقول:
(والذين ينفقون ممّا آتيناهم) أي من المال الذي آتيناهم،...
بينما نحن في الجملتين الخاطئتين أعلاه نقصد (ما يُفيد السبب) أو ما يفيد (الذي) فحسب، وليس (من الذي)،....
فالصحيح:
طفح البورد بالعنصرية، ما اضطر البعض للامتناع عن المشاركة فيه،...
صعبت عليّ الدراسة، ما دفعني للاستقالة،..
بمعنى أنّ (فيض وطفحان) العنصرية هو (الأمر الذي) فعل كذا وكذا،...
فتصبح (الذي) صفة لمحذوف تقديره: (الأمر)،...
وأرجو أن أكون قد نجحت في توضيح ما أحببت توضيحه.

لطائف لذيذة:
وهذه لطائف قابلتني في القواميس، ونحن نستخدمها في عاميتنا،...
نقول: الزول دا (أروش) وألا شنو؟: (أروش) فصيحة وبنفس المعنى الدارج.
نقول: فلان (بات القَوَى): (بات القَوَى) فصيحة وتكتب كما تقدّم، وأيضاً هكذا: (بات القواء).
نقول: خالتك النعمة جاتني هنا أمس زعلانة، قمت أنا (هدّنت) ليها شوية.
(هدّن) وبنفس المعنى فصيحة،.. وهذه الكلمة ظريفة لأننا يمكننا استخدامها مع السيارة أيضاً كما في لغتنا الدارجة، نقول: (هدّنت) ليه العربية شوية عشان يركب معاي، أو (هدّن) لي عشان أركب. (طبعاً أنا زول ريف، ناس (بص الخضار ودغش)،.. (كوريلا وكريسيدا هنا مافي، عشان ما تقولو دا كلام شنو؟ يعني بص واحد ومع صلاة الصبح، لو ما سكّيتو سك، وهدّنوا ليك ما بتلم فيهو).
بالفصيح نقول: فأبطأت له سرعة السيارة، خفضتها، أو قللتها،.. وفي كل الحلات الجملة ستصبح طويلة، للاختصار: هدّنت السيارة،....
وإلى لطيفة (تانية وغنّاية)،....

Post: #17
Title: Re: إصلاح الكتابة في المنبر
Author: محسن خالد
Date: 01-24-2005, 05:15 AM
Parent: #16

تنبيه

إلى حين اللطيفة الثالثة، ماذا لو تركنا كتابة (عدا) رابط الاستثناء، على هذا النحو (عدى)،... الصحيح: (عدا) بهذه الشكلانية، بالألف الواقف،... أمّا (عدى) فخطأ، وتجعل من يقرأها يظن أنك ستغنّي أغنية الراحل مصطفى (عدّى فات، زمن العيون، الأُلفة والحضن الملاذ)!!!

Post: #18
Title: Re: إصلاح الكتابة في المنبر
Author: محسن خالد
Date: 01-29-2005, 11:25 AM
Parent: #17

لطيفة (3)

هنا سأشير باقتضاب كبير، دون الخوض في تفاصيل المبتدأ والخبر، أو الاختصاص، فهدفي هو (الدرّاب الكبار كبار)،...

خطأ قولك: نحن مقتعنين بحالنا،...

خطأ قولك: نحن العارفون لم نثق بك،...

بمجرد أن ترى (نحن) تبحث في الكلمة التالية لها، أتبدأ بالألف واللام، أم بالتنكير، والقاعدة بدون الخوض في الإعراب سهلة جداً،...

الصحيح: نحن مقتنعون بحالنا،.... ليه؟؟ لأنو مافي ألف ولام.... لو كانت فيها ألف ولام لأصبحت، نحن المقتنعين بحالنا،... بس أمسك في الألف واللام دي شديد،.. ما بتجيك عوجة، لقيتها تنصب، ما لقيتها ترفع،...
نحن العارفين لم نثق بك،..
نحن سودانيون،...
نحن السودانيين،...
ولمن شاء الإعراب،...
نحن سودانيون .... نحن مبتدأ، وسودانيون: خبر المبتدأ،...
نحن السودانيين،... نحن مبتدأ، والسودانيين، اسم منصوب على الاختصاص،...
والانتباهة ماذا لو تلت السودانيين كلمة أخرى تعرضنا لخيار النصب والرفع،،،،
يعني الصحيح: نحن السودانيين باسلون،...
أم....
نحن السودانيين باسلين،...

الصحيح هو: نحن السودانيين باسلون،...
لتعرب كالآتي:
نحن: مبتدأ،...
السودانيين: اسم منصوب على الاختصاص،...
باسلون: تلقائياً تصبح خبراً للمبتدأ،...

وإذا نفذنا نفْس الخيار على الجملة الأخرى،...
نحن سودانيون باسلون،...
أم...
نحن سودانيون باسلين،...

الصحيح: نحن سودانيون باسلون،...
نحن: مبتدأ،...
سودانيون: خبره،..
باسلون: نعت،... نعت للسودانيين، والنعت يتبع المنعوت،...

Post: #19
Title: Re: إصلاح الكتابة في المنبر
Author: ود شاموق
Date: 01-31-2005, 11:17 PM
Parent: #15

صديقي خالد

اعتذاري الشديد عن شيئين .. الأول : التأخير الذي لم يكن بالخاطر، وقد كنت مشغولاً عن هذا المكان بملاحقة بعض المجرمين (إلكترونياً) ولازلتُ، ولازالت (الملاحقة) قائمةً ولم يدخلِ السِّجنَ أحد، ولا أظنه سيفعل.

الثاني : لم أكن مترفعاً حين أحلتك إلى نصي دون المرور على نصك، فنصك عندي مقدس، ونصي أنا مدنس، لذا وجدت نفسي بما يشبه الخجل أحليك، هكذا إحالةً، دون أن أقول لك : هذه إحالة، إلى نص أعتبره محاولة من عدة محاولات بائسة لتأسيس واقع جديد أفضل.

وبعد ..

قريتك بتمعن، وملاحظاتك في محلها، بس انتا عارف يا سيد خالد، هنا في المكان دا، المحبطات كتيرة جداً، أتمنى أن يعافيك الله منها.

وأخيراً : يا خي إنتا كتّّاب جداً؛ شكراً على الكتابة.


.

Post: #20
Title: Re: إصلاح الكتابة في المنبر
Author: عمر الفاروق شيخ الدين
Date: 01-31-2005, 11:34 PM
Parent: #1

خالد محسن :
الزول الكتاب شديد (عليك الله ما تدقق في كلامي ده لاني لسة ما حفظت اللطائف بتاعتك دي)..
شكراً كبيراً لهذا الجهد المقدر وبس ما تحاول تركز علي البورد ده شديد لأنك لو حاولت تكتب لطائف البورد ده حاتلقي روحك بقيت لطيف شديييييييييييييييد ونحن شعارنا :
في الناس القيافة حبينا اللطافة ..
واصل ياباشا
..

Post: #21
Title: Re: إصلاح الكتابة في المنبر
Author: محمد السر
Date: 02-01-2005, 00:16 AM
Parent: #1

انت فعلاً زول مفيد
أها حا تمشي متين زي الجماعة المشو من هنا؟

Post: #22
Title: Re: إصلاح الكتابة في المنبر
Author: محسن خالد
Date: 02-01-2005, 04:09 AM
Parent: #21

ود شاموق،...
يا أخي تسلم، وأنا بصدْق، مهما انتشرت الكعوبية في الأرض، دائماً أحمل معي أعذار للناس،..
وما لمتك وفي بالي نعتك مترفعا، بل استوقفتك إذ أحسستك مستعجلاً،..
ولن أشكر لك جمالك "ملاحظاتك في محلها" فالجمال يشكر صاحبه بنفسه،..
بعدين بلغة الخوّة، أقوليك: لما رجعت مع اللنك، لقيتك لغتك نظيفة ومكرّبة كأفضل ما يكون،..
قلت ود شاموق دا، مستهبلللل، وألا شنو؟؟ بعد ما نظم أمورو "وعرف" تمام، كوّن رأيو في الصاح والغلط، بس الناس التانين حالن كيف، يعني كلامك كلام خواص، أو للهظار "فلهمات، وتغيات" العارفين والشبعانين تمام،...
أهلنا بقولوا (اللعوج رأي والعديل رأي)، بس غلطانين، كان يقولوا (اللعوج وجهة، والعديل وجهة)،..
لأنّ الرأي كما أفهم، لا يكون إلا بعد معرفة،...
وأنا أفهم جيداً، إشكالات الحروف الناقصة هذه كناحية في اللغة، وتعاطيك لها أنت من باب المقدّس وغير المقدس، موضوعة من صميم اللغة ومن صميم هذا الحوار،... ولكن تمنيتُ عليك لو أنّك أسرفت في أدلّتك أكثر من باب الموضوع، كي يشعر القارئ بنوع المشكلة، ولا يصبح بمقدوره، قصر مشاغباته على "الرحمن"، وغيرها،..
كان لك: هذا/ هاذا،... ذلك/ ذالك،.... هؤلاء/ هاؤلاء،... أولئك/ أولائك،... كذلك/ كذالك،... السموات/ السماوات، ...
فيسترسل الموضوع ويدخلك في النَبْر: نساءٌ/ نساءُن ... رجلٌ/ رجلن،.. نساءً/ نساءَن،..
ويسترسل الموضوع أكثر فيدخلك أبواباً لنواقص أخرى مع حروف ثابتة، لا علاقة لها باضطرابات حروف العلّة الإشكالية،..
الذي/ اللذي،.... التي/ اللتي،... الذين/ اللذين،... (هنا الحرف الناقص -اللام)،..
وحتّى تصل لإضافة (حرف ناقص) لكل الكلمات المبدوءة بحرف شمسي،..
الششمس، الننور، الددم،... وهكذا،،...
وحتّى تصل إلى أنّ ما بين أيدينا الآن من اللغة، هو نتاج سعي وتعب واجتهاد لا حدود له،...
فتسلم مرة تاني، وخليك أخوي، وخليك ضد إحباط هنا،..
وشكراً، لوقوفك عند كتابتي وح أتابعك أنا كمان،...
والمرة الجاية تعال هنا، بحقّك، بـ"لطايفك" وما تجي تتونّس معاي، عشان أنا زول ونّااااس، وفقّاع،.. هاهاهاهاا
سلام يا صاحبي

عمر الفاروق شيخ الدين،...
عمر الفاروق، شكرااا يا لذيذ،....
وخليهم يتردوا ساي، ونحن نشيل اللطافة،...

محمد السر،...
أرجو يا سيدي أكون كذلك،...
والرحيل عِزّ الباريا، بس (الفولة بتمّلي والبقارة بجوا)،...
و(الحنين بوصفه الموطن)،...

Post: #23
Title: Re: إصلاح الكتابة في المنبر
Author: محسن خالد
Date: 02-02-2005, 11:53 PM
Parent: #22

لطيفة صغيرونة/

لا تقل: لن أذهب إليه قط،... لأنّ قط لا يستخدم معها إلا الفعل (الماضي) وليس المضارع،...
بل قل: ما ذهبتُ إليه قط،...

ومع بقية الأفعال استخدم (أبدا) للنفي بدل (قط)
فيصبح تصحيح الجملة الأولى: لن أذهب إليه أبداً،..

Post: #24
Title: Re: إصلاح الكتابة في المنبر
Author: محسن خالد
Date: 02-05-2005, 04:27 AM
Parent: #23

لطيفة مستعجلة


ما هي لغة (أكلوني البراغيث)،....

هي إيراد فاعلين لجملة واحدة أو لفعل واحد، وهي متعلقة غالباً بـ"نون النسوة" أو "واو الجماعة" لعامل كمونهما في الفعل،... ---عشان بيلبدوا يعني والعين ما بتشوفم..


كقولك: البنات ذهبن إلى الحقل،...

فيصبح الفاعل هو "البنات" وأيضاً نون النسوة في "ذهبن"،...

أو --- الرجال ذهبوا إلى الحقل،...

فيصبح الفاعل هو "الرجال" وأيضاً واو الجماعة في "ذهبوا"،...

أو المثال نفسه لكونها اسمها "لغة أكلوني البراغيث"،...

أكلوني البراغيث،... واو الجماعة في أكلوني فاعل، وأيضاً البراغيث،...

الأبلغ هو قولك:

ذهبت البنات إلى الحقل،...

ذهب الرجال إلى الحقل،...

البراغيث أكلتني،...


بأي حال كمجرد إشارة، القرآن تكلم بهذه اللغة،...


ولغدٍ أفصح،....

Post: #25
Title: Re: إصلاح الكتابة في المنبر
Author: zola123
Date: 02-05-2005, 05:34 AM
Parent: #1

الاستاذ محسن
موضوع رائع ومفيد جدا
ولحد ما نقدر نطبقه استحملوا أخطائنا
يديك ألف عافية

تخريمة: ما عندك حاجة تصلح الخط؟
عشان خطي من شدة ما كعب مرات انا زاتي ما باعرف أقراه

زولة123

Post: #26
Title: Re: إصلاح الكتابة في المنبر
Author: محسن خالد
Date: 02-06-2005, 00:21 AM
Parent: #25

zola 123 ،.....

شكراً يا زولة وتحياتي،...
بعدين إنتو برضو أصبروا علي البري،..
ولو لقيتٍ الناس البصلحوا الخط، ما تتوصي، كلمي أخوك (أخاك)، أنا كمان خطي مكعوج ومعيوق في إيدي،...
وليك سلام

Post: #27
Title: Re: إصلاح الكتابة في المنبر
Author: shammashi
Date: 02-06-2005, 05:05 AM
Parent: #26

الأخ محسن على حسن سلوكه
يديك العافية.

والله ياخي أنا أن وإن دي مجننناتني جن .
لكن بعد دا أمانة ما وقعن.

واصل عليك الله.

Post: #28
Title: Re: إصلاح الكتابة في المنبر
Author: محسن خالد
Date: 02-06-2005, 10:59 PM
Parent: #27

Shamashi،...

ويديك العافية، وتاني أحقر بإن وأن، والبتعمل ليك فيها لميضة، كلمني عليها،...
وتحياتي،....

Post: #29
Title: Re: إصلاح الكتابة في المنبر
Author: محسن خالد
Date: 02-11-2005, 05:29 AM
Parent: #28

لطيفة:


حروف الجزم معروفة، ولكن هناك ملاحظة تغيب عن واحدٍ منها وعن تأثيره على الفعل المضارع،...
(لا) الناهية، التي تنهى عن فعل معين،...

الناس تكتب: لا تنعي أخاك،.... خطأ،..
وأيضاً: لا تنهى عن خلقٍ وتأتي بمثله،.. خطأ
لا تنسى ذكر الله،.... خطأ

الصواب هو أنّ (لا) هنا ناهية وليست نافية، إذن يجب جزم الفعل المضارع، والذي سيتجلى في حذف حرف العلّة في مثل هذه الحالات الثلاث،..

فالصحيح: لا تنعَ أخاك،...
لا تنهَ عن خلق،...
لا تنسَ ذكر الله،...

والفتح عند آخر الفعل هو واجب (في هذه الحالات) وإشباع للصوت المحذوق لعلّيته،..

وإلا كان الفعل هكذا،.. (بدون فتح) في حا لات ثانية،..

لا يغتبْ بعضكم بعضاً،..

وإلى حين مناديل أخرى،..

Post: #30
Title: Re: إصلاح الكتابة في المنبر
Author: Shinteer
Date: 02-11-2005, 12:34 PM
Parent: #29

إزيّك يا مُـحْسْ.
الحمد لله أنك ما زلت علي قيد الحياة البوردية. تصدق يا محسن أنت الكاتب الوحيد "المحسن" الذي خشيت أن "تـبَـرْبِحه" قوانين البورد الجديدة. أنت يجب أن تبقى أيها المسخوت .. لأنك لست عاطلاً. وقديماً قيل لنا (في جيهة أم شديدة): أرجى سفيه ولا ترجى عاطل.

هذا البورد يا فهيم كشف عن خلل عظيم في حظ السودانيين من البراعة والتجويد النحوي والإملائي. ما كنت أحسبني أحيا إلى زمنٍ يوصف أحدهم بالمفكر أو الرائع وهو لا "يحسن" أداة تواصله اللغوية؛ عربية كانت أو انقليزية. رأيت كل ذلك في هذا البورد اللطيف يا بتاع اللطائف انت. ورأيت ما رأيت.

لدي سؤال فلسفي إبن ستين كلب .. وكم وددت أن أفرد له بوستاً منفصلاً. سؤال لا علاقة له بالنحو أو الصرف أو الإملاء أوالقواعد اللغوية المعهودة .. سؤالي هو عن "حشرة" كلامية جديدة دخلت جحر الكتابة السودانية .. ولست متأكداً من أصلها. أظنها جاءت من الدارجية الشامية واعتلى ظهرها السودانيون قبل غيرهم من أهل الله في البلاد الأخرى، وأنت تعلم حب السوادنة "المثقفين تحديداً" لالتهام كل ما هو غريب، دون مساءلة. قرأتها أول ما قرأت في مطبوعة تصدر عن جماعة خير الدين حسيب (المستقبل العربي) في منتصف الثمانينات. وبحثت في أمر كاتب ذلك المقال الذي تضمن تلك الكلمة فوجدته شامياً، وللشوام "لغا" يعتبرها الهامش لغة. ثم بحثت وبحثت فلم أجد كاتباً مصرياً أو غير شامي يستخدم تلك الكلمة (أهي كلمة؟) بتلك الطريقة. الآن أراها تسرح وتمرح في كتابات السودانيين، في البورد وخارج البورد. وأنا بدي أسألك من "هيك" شغلات يا محسن.

لكن خليها بعدين. أنا هسع بدور أبارك ليك الحياة .. وخروجك سالماً من محكمة البَرْبَحة.

Post: #31
Title: Re: إصلاح الكتابة في المنبر
Author: سمرية
Date: 02-12-2005, 04:20 AM
Parent: #1

الاخ / المبدع ،الاديب و الروائي
الاستاذ محسن خالد

لطيف .. أن تجد الكتابة كل هذه العناية الفائقة وقد رأيتها يوما تحتضر على ارصفة الحروف النازفة بفعل اقلام غير مبالية بما قد يصيب اللغة من هلاك .
لطيف .. ان اجدني هنا وقد وجدت لي معلما .. يرتب لي لغتي التي يزاحمهاالبوح بلا موازنات نحوية او املائية فكنت دوما ألجا لتحرير النصوص كلما دفعني حدس اللغة للشعور بخطأ ما .. وهكذا طالبت قبل عام من استاذي بالمرحلة الثانوية ان يساعدني لاخرج باللغة من ظلام الاخطاء النحوية الى قبس اللغة الرصينة .

وكم هو لطيف ان تتألق الكتابة بثيابها الباهرة وهي في أقصى حالات اتزانها وثقتها ببلاغتهاوصرفها.

الاخ محسن شكرا لهذا الاهتمام .. فكلنا نحتاج لمثل هذة الوقفة لاصلاح الكتابة لدينا ولاننا بفعل ثقافة الالفية الجديدة لا نستطيع ان نعبر عن اي شيء وعن كل شيء الا بالكتابة والتي يجب ان تخضع لمثل هذا الاهتمام لنكتب بلغة صحيحة نحويا واملائيا وبلاغيا بنسبة 100% .

استاذي الفاضل .. محسن
- لدي بعض تساؤلات حول مخارج الحروف .. فكمااننا نكتب فنحن ما زلنا نتحدث .. فهناك لبس كبير في نطق ( حرف القاف والغين ) ( الثاء والسين ) فارجو ايضا طرق هذا الامر ونكون بذلك قد اعطينا لغتنا الحلوة حقها كاملا .
- الخطأ الفادح في عدم التمييز ( وليس التمييذ ) بين حرفي ( الذال والزين او الزاي )كما يسميها ( اهل الشام ) ..


استاذ محسن خالد،
ازداد اعجابا لطريقتك في سبر اغوار المواضيع التي لم تجد يوما الاهتمام الملائم لها، فاصلاح الكتابة هو في نظري اعظم شأن من اي موضوع ادبي آخر باعتبار انها البداية الحقيقية والتي تأخرنا كثيرا لمعالجتها وتصحيحها حتى كادت ان تلفظ انفاسها الاخيرة لولا ... ( الوجيع ) استاذ محسن .

Post: #32
Title: Re: إصلاح الكتابة في المنبر
Author: محمود الدقم
Date: 02-12-2005, 07:48 AM
Parent: #1

مجهود مقدر ودا الكلام ياالاستاذ محسن خالد ولي قدام (طبعا كتبت بالعامية حتى ما يكون في تدقيق لغوي على كلامي)..

Post: #33
Title: Re: إصلاح الكتابة في المنبر
Author: محسن خالد
Date: 02-13-2005, 07:11 AM
Parent: #32

شنتير،...
إزيك يا شنتير،...
(أرجا سفيه ما ترجى عاطل)، إنت عارف دا أحلى نقد وتعليق سمعتو من الله جابني هنا، وبالجد حبوبتي الحرم بت طيفور ما عندها لي وصف غيرو، دا وواحد تاني، كُل ما أقول لي واحدة من البنات طايرة وين وألا ماشه وين – شوف بنات أهلي أو الجيران، أنا وحيد أمي وأبوي، تناولني أخوه -أخاه: السفيه قلبو مرضان عاد،...
لكن سؤالك الفلسفي دا جاب كثافتي، لأني شكيت في كلمة بدافروا فيها جماعة بهناك، قلت أكتب ليك، خايف تجيب لي الدفاس هنا، وباقي عندي تيراب خايف عليهو، دُفاس البقر يا عاق البحرت يا طرّح الحامل،..
بعدين أنا قبضتك عمرياً من جماعة خير الدين الحسيب، ولا حظ إنو ديل جماعة عراقية، اتخاتفوها ناس هيك شغلات، وشكيت في كلمة تانية أنا مستخدمها، بس المرّة الجاية تعال لي بالأكيدة، وأسألني من تاتيرها ليك مكان مكان،... وسَكْ سَكْ الكلمات دي بدوني عليها ماهية ما تهم،...
وأبقه عافية،..
والله يبارك فيك،....

سمرية،...
يا ستي تسلمي،...
وشكراً لاهتمامك إنتِ، وأرجو أن نتعاون هنا جميعاً في هذه الصفحة، لا تتركوني لكسلي، كل زول يجيب كورتو ويجي،..
وتاني تحياتي وشكرا،..

محمود الدقم،...
شكراً يا أخي، وأرجو أن لا ينقطع وتلحق بنا العطالة،...
تحياتي

Post: #34
Title: Re: إصلاح الكتابة في المنبر
Author: Shinteer
Date: 02-14-2005, 04:43 AM
Parent: #33

Quote: دُفاس البقر يا عاق البحرت يا طرّح الحامل،..

يا مُحْسْ .. لقد تدافس البقر ولم يعق الذي يحرث .. بيد أن الحامل قد طرحت؛ عجْلاً أدهماً برأسين .. فما قولك في "هكذا" طُراح؟. وبين البقر والطُراح تجد الأكيدة.

أين أنت يا هذا؟. مقلول السياسة.

Post: #35
Title: Re: إصلاح الكتابة في المنبر
Author: Rawia
Date: 02-14-2005, 04:45 AM
Parent: #34


كل سنه وانت طيب استاذ محسن خالد

Post: #36
Title: Re: إصلاح الكتابة في المنبر
Author: Shinteer
Date: 02-14-2005, 05:04 AM
Parent: #35

Quote: دُفاس البقر يا عاق البحرت يا طرّح الحامل،..

تور وحش الخلا الـ خلعو وخِتو الصيّادة
ملفوخ قرْنو ما بِقْلِب لسانو شهادة

دي شوية زيادات كده عشان راوية عتّرت لي وأنا في انتظارك آ ضراعي.

يا مُحْسْ .. لقد تدافس البقر ولم يعق الذي يحرث .. بيد أن الحامل قد طرحت؛ عجْلاً أدهماً برأسين .. فما قولك في "هكذا" طُراح؟. وبين البقر والطُراح تجد الأكيدة.

أين أنت يا هذا؟. مقلول السياسة.

Post: #37
Title: Re: إصلاح الكتابة في المنبر
Author: صديق الموج
Date: 02-14-2005, 05:07 AM
Parent: #1

بالله ترانى الطيش وانا كل يوم اسود فى الصفحات..شكرا وفعلا (العلم
نورن) تسلم يا محسن والرجاء ان تواصل عسى ولعل نفك الدفة لى غيرنا
تسلم يا جميل..بالله بعد ما تنصلح الغلطات الاملائية واللغوية نسأل
الله ان ينعدل الطرح كمان لان المنبر صار ينعاف..تسلم،،،،،،،

Post: #38
Title: Re: إصلاح الكتابة في المنبر
Author: محسن خالد
Date: 02-14-2005, 05:22 AM
Parent: #37

شنتير،...
التور البنف خرت الحبال وإدلّى
كربو التقيلة محارتو ما بتنقلّه
نهشو الكرباج وفي سريهو اتملّى
كضّمو الشويش قطع الجرير والتلّة
ودي من مسرحية –مجادعة- كتبتها زمان، إن لقيتلي منها شيء بجدعو ليك، حاكم أنا بعد التنتّر الكتابي دا كلو مهمل في كتابتي،.. بعدين عجل 2 رأس دا طُراح السرور،... وللمعلومية (طرحت الأنثى والبهيمة فصيحة كررر)
وبرضك ما قلت لي الكلمة، ما تبقه حاسد،..
وأرقد عافية

راوية،..
مشكورة شديييد، ذكرتيني إنّي عزّابي، بعدين أنا مطوّل لساني علي الصديق وود أمّنا السمندل، ما بقدر أتجرّس هسه، غايتو علينا وعليك مبروك،...

صديق الموج،..
تسلم يا أمير، وبعد وزنا موجة أم درمان، إن شاء الله عاد ربي يوزن أم درمان في رقبتها،...
وتحياتي،..

Post: #39
Title: Re: إصلاح الكتابة في المنبر
Author: Shinteer
Date: 02-14-2005, 06:14 AM
Parent: #38

علي بالدين قلتها. يا زول ركز شوية. وبيني وبينك .. أنا أفضل الخوض معك في أصولها خارج هذا البوست حتى لا أقع تحت طائلة الظلام.

واصل يا محسن بالله في أدوات الاستثناء .. وبعدها تمييز العدد .. وبعدها المفعول معه .. وبعدها ما يسمى بالفضلة .. ثم التوابع، توابع اللغة الأربعة .. و و و .. وهكذا. بلاوي في البورد.

Post: #40
Title: Re: إصلاح الكتابة في المنبر
Author: قرشـــو
Date: 02-14-2005, 06:47 AM
Parent: #1



الأستاذ محسن خالد

لك التحية والاحترام

بعد قراءة هذا البوست القيم لابد من مراجعة كل ما نكتب هنا فقد اتضح لنا اننا عثنا فى البورد اخطاءً واننا وضعنا كل شىء فى غير موضعه ولتسامحنا اللغة التى - لا شك - ستعتبرنا دخلاء عليها ولكنها على كل اصبحت لغتنا الاولى ولا مناص من تعلمها بطريقتها الصحيحة كما توردها انت هنا سيدى ..

نسأل الله ان يكون تعليمك لنا ما يفيدنا فى ميزان حسناتك لا سيما وان اللغة العربية هى لغةالقرآن وحرى بمن يود التعامل معها ان يتعلمها جيدا ان لم يتقنها..

مع كل الود

Post: #41
Title: Re: إصلاح الكتابة في المنبر
Author: محسن خالد
Date: 02-15-2005, 01:57 AM
Parent: #40

شنتير،..
ياخوي كلامك السمح دا ما تسويهو لطيفة وترميهو لينا هنا، بس إلا أخوك يقوم بيها يعني، قلنا بالساهلة، وبعدين ما في زول مقاولني،..
وكن بخير

قرشو،...
شكراً يا رجل،.. وتحياتي،..
حبّيت أقول ليك حاجة صغيرة، وافهمني صاح أنا ما ضد أدعيتك ونصايحك، وبصحى كل يوم عشان يكون ماعوني أوسع،..
قولك العربية لغة القرآن،.. وفي الحقيقة القرآن هو من لغة العرب، لأن اللغة وقومها سابقون عليه وهو تالٍ لهما،...
أنا عارفك قلتها ساي، عشان كدا قلت ليك كلامي دي ساي، مجرد تصحيح،..
وكن بخير،...

Post: #42
Title: Re: إصلاح الكتابة في المنبر
Author: مهيرة
Date: 02-15-2005, 03:55 AM
Parent: #41

الاخ الفاضل محسن

شكرا على اللطائف الصغيرة ذات الفائدة الكبيرة.

لطيفة صغيرونة:

اعتقد ان القرآن سابق للعرب،لأنه كان فى اللوح المحفوظ قبل ظهور العرب،فى سابق الازمان

كذلك العربية هى لغة اهل الجنة فى قادم الازمان،كما يقول بعض العلماء

والله اعلم

تحياتى

Post: #43
Title: Re: إصلاح الكتابة في المنبر
Author: محسن خالد
Date: 02-15-2005, 04:57 AM
Parent: #42

عفواً يا دكتورة مهيرة،
وحقك علي يا خالتو

Post: #44
Title: Re: إصلاح الكتابة في المنبر
Author: Elawad
Date: 02-15-2005, 05:46 AM
Parent: #1

الأخ محسن
موضوع ممتع و مفيد جدا. كلنا في (حوجة) إليه.... بالمناسبة هل (حوجة) صحيحة؟ سمعت من قبل أن الصحيح حاجة.
المهم الموضوع مفيد جدا و مطروح بصورة مبسطة أرجو ان تواصل فيه. كلمة شنتير القصدها هي الاستعمال لكلمة هكذا كما استعملها هو أعلاه:
Quote: فما قولك في "هكذا" طُراح؟

فقد أصبحت (موضة) في الكتابة.
أمر آخر لم أفهم سر غضيتك على الفاضلة د. مهيرة فهي لم تفعل غير الحديث عن تصورها حول موضوع معين و لم أدر لم فسرته أنت على أنه محاولة لصرف البوست عن وجهته. و عموما هي ضيفتك و وجهة نظري أنها تستحق منك غير ما استقبلتها به. و في انتظار المزيد من اللطائف.

Post: #45
Title: Re: إصلاح الكتابة في المنبر
Author: مهيرة
Date: 02-15-2005, 06:49 AM
Parent: #44

اعتذر لكل من ازعجه كلامى

ولن ازعجكم مرة اخرى

تحياتى

Post: #46
Title: Re: إصلاح الكتابة في المنبر
Author: محسن خالد
Date: 02-15-2005, 08:50 AM
Parent: #45

Elawad،...

تحياتي يا أخي، وسلام،...
وشكراً لك عقب التقريظ، وسلامي أوفره
حوجة لم ترد في القواميس كما أسلفت، بل حِوَج/ حاجات/ وحوائج/ ويجوز: حائجة، ومنها أيضاً لكمة لذيذة وهي: المحاويج، التي يُلسن بها بدونا، بمعنى المحتاجين،...
الكلمة التي أشار لها (شنتير) وكلمات أُخر تجادعنا بها على الإيميل،...

(كلامهما وكلامي، مبني على خلفيات غير موجودة في هذا الكتاب)،..
بخصوص مهيرة، أو من عند "قرشو"، هناك "كتاب" أُفرد بخصوص "تيموليلت" قام به "قرشو"، وكتبت فيه "مهيرة"، ويمكنك مراجعة ما فيه، ولم يكن مسيئاً لي أبداً، ثم من خلال رسالة على المسينجر من "قرشو"، وليست مسيئة أيضاً، وإن فيها توجيه ديني كما في الكتابة عن تيموليلت،.............. ترسّخ لدي الآتي، وربما أكون مخطئاً، ولكن بأي حال أُنبّهك إلى أن للغتي المختلفة هنا ما وراءها، ومرّة ثانية قد أكون مخطئاً، فقد شعرت بأنّ الموضوع مطاردة لأفكاري وكيفية تفكيري وإملاءات، ولا أرغب لهذا الكتاب عن اللغة هنا في التشتّت، لأنه لا ذنب له، ولا غبار عليه، إن لم تكن فيه فائدة عميمة، أنا أُريد للناس كلهم أن ينتجوا، وليس فقط التصدّي لإنتاج الآخرين، أو لأفكار صغيرة في أعمالهم، سواءً قدحاً أو مدحاً، وثِق أنني صادق فيما أقول، ولست أعني أن أكون جلفاً مع أحد، وأحفظ الود ما استطعتُ، وراجع كل كتبي هنا، وطريقة تعاملي وروددي على الناس، بل أجتهد لهم في الجمال، لدرجة تطمح في أن تخلق نصاً موازياً، يا خي أنا كتبتُ معكم هنا هرباً من القبح، وإلا فالكتب الورقية تغنيني، وأنا أعتذر منك، ومن ضيوفي، بما فيهم قرشي ومهيرة،.....

مهيرة،...
شكراً جزيلاً، وتقول العرب: كلّمته فما ردّ لي حَوجَاءَ ولا لَوْجاءَ، أي لا كلمةً قبيحة ولا حسنة،...
وكلامي الفوق دا عدّيهو زهجة من ولدك زي ما قلتِ في كتاب قرشو،...

Post: #47
Title: Re: إصلاح الكتابة في المنبر
Author: محسن خالد
Date: 02-15-2005, 08:50 AM
Parent: #45

Elawad،...

تحياتي يا أخي، وسلام،...
وشكراً لك عقب التقريظ، وسلامي أوفره
حوجة لم ترد في القواميس كما أسلفت، بل حِوَج/ حاجات/ وحوائج/ ويجوز: حائجة، ومنها أيضاً لكمة لذيذة وهي: المحاويج، التي يُلسن بها بدونا، بمعنى المحتاجين،...
الكلمة التي أشار لها (شنتير) وكلمات أُخر تجادعنا بها على الإيميل،...

(كلامهما وكلامي، مبني على خلفيات غير موجودة في هذا الكتاب)،..
بخصوص مهيرة، أو من عند "قرشو"، هناك "كتاب" أُفرد بخصوص "تيموليلت" قام به "قرشو"، وكتبت فيه "مهيرة"، ويمكنك مراجعة ما فيه، ولم يكن مسيئاً لي أبداً، ثم من خلال رسالة على المسينجر من "قرشو"، وليست مسيئة أيضاً، وإن فيها توجيه ديني كما في الكتابة عن تيموليلت،.............. ترسّخ لدي الآتي، وربما أكون مخطئاً، ولكن بأي حال أُنبّهك إلى أن للغتي المختلفة هنا ما وراءها، ومرّة ثانية قد أكون مخطئاً، فقد شعرت بأنّ الموضوع مطاردة لأفكاري وكيفية تفكيري وإملاءات، ولا أرغب لهذا الكتاب عن اللغة هنا في التشتّت، لأنه لا ذنب له، ولا غبار عليه، إن لم تكن فيه فائدة عميمة، أنا أُريد للناس كلهم أن ينتجوا، وليس فقط التصدّي لإنتاج الآخرين، أو لأفكار صغيرة في أعمالهم، سواءً قدحاً أو مدحاً، وثِق أنني صادق فيما أقول، ولست أعني أن أكون جلفاً مع أحد، وأحفظ الود ما استطعتُ، وراجع كل كتبي هنا، وطريقة تعاملي وروددي على الناس، بل أجتهد لهم في الجمال، لدرجة تطمح في أن تخلق نصاً موازياً، يا خي أنا كتبتُ معكم هنا هرباً من القبح، وإلا فالكتب الورقية تغنيني، وأنا أعتذر منك، ومن ضيوفي، بما فيهم قرشي ومهيرة،.....

مهيرة،...
شكراً جزيلاً، وتقول العرب: كلّمته فما ردّ لي حَوجَاءَ ولا لَوْجاءَ، أي لا كلمةً قبيحة ولا حسنة،...
وكلامي الفوق دا عدّيهو زهجة من ولدك زي ما قلتِ في كتاب قرشو،...

Post: #48
Title: Re: إصلاح الكتابة في المنبر
Author: Elawad
Date: 02-15-2005, 09:21 AM
Parent: #1

الأخ محسن...
لا أدري... لكن شعرت أن هناك جزءا من ردك قد سقط أو أن الرد غير مكتمل بالذات فيما يتعلق بكلمة (هكذا) التي أثارها الأخ الحبيب شنتير.
أما بخصوص قولك:
Quote: ولست أعني أن أكون جلفاً مع أحد، وأحفظ الود ما استطعتُ، وراجع كل كتبي هنا، وطريقة تعاملي وروددي على الناس، بل أجتهد لهم في الجمال، لدرجة تطمح في أن تخلق نصاً موازياً،

فيعلم الله لو لا ما لمسته منك من علو خلق و حسن مخاطبة ما تجشمت عناء لومك و عتابك على ردك على الدكتورة مهيرة. و كم من كلام غث يقرأه الواحد في هذا المنبر و غيره و لا يعتب على صاحبه لآن حسب كل إناء أن ينضح بما فيه.
لا يفوتني هنا أن أعبر عن إعجابي بقول شنتير:
Quote: هذا البورد يا فهيم كشف عن خلل عظيم في حظ السودانيين من البراعة والتجويد النحوي والإملائي. ما كنت أحسبني أحيا إلى زمنٍ يوصف أحدهم بالمفكر أو الرائع وهو لا "يحسن" أداة تواصله اللغوية؛ عربية كانت أو انقليزية. رأيت كل ذلك في هذا البورد اللطيف يا بتاع اللطائف انت. ورأيت ما رأيت.

فأمثالي معذورون إن خرمجوا في كتاباتهم و لكن المشكلة في من يطرحون أنفسهم كمفكرين و أدباء و إعلاميين و لا يسلم لهم سطر من أخطاء يشيب لهولها الولدان و أمثالهم في المنبر كثير.

Post: #49
Title: Re: إصلاح الكتابة في المنبر
Author: هاشم نوريت
Date: 02-15-2005, 10:08 AM
Parent: #48

الاستاذ محسن خالد
دبايوا
شكرا على هذه المائدة الدسمة.
ولى سؤال مكتبوب اعلى المنبر الحر (المتواجدون الان)
هل الصحيح المتواجدون الان
ام الموجودون الان؟

واعمل حسابك من المادة14

Post: #50
Title: Re: إصلاح الكتابة في المنبر
Author: محسن خالد
Date: 02-16-2005, 04:17 AM
Parent: #49

هاشم نوريت،...
دبايوا، إيتانينا،..
فارس ود القبيلة، ما بتكفى دياهو الأثر،...
ولّعت والدرر فيها، فوقين ديا متر،.. هوي هوي مرحبا،..

إزيك يا زول، وتحياتي، وشكراً علي كلامك الجميل، بعدين للنكتة أنا محضّر مخلايتي تب للرحول كان 14 كان 15،... وهاك الفتوى الطلبتها،..

لا يجوز مطلقاً أن نقول (المتواجدون الآن) ونحن نقصد من هم حاضرون، بل الصحيح أن يكتب الأخ بكري (الموجودون الآن)، أو (الحاضرون الآن)،...
وكذلك لا يجوز أن نقول المتواجد في المكان الفلاني،.. بل الموجود،..
لأنّ التواجد تفرّعات من أصل كلمة (الوَجد)، فالمتواجدون الآن، تعني الذين هم في هيام وغرام في هذه الساعة، يعني داخل القواطيع وغرف النوم،..

ودي النصيحة أنا مرقتها ليك يا ود نوريت، وربّك يستر،...

Post: #51
Title: Re: إصلاح الكتابة في المنبر
Author: هاشم نوريت
Date: 02-16-2005, 05:43 AM
Parent: #50

استاذ محسن خالد
دبايوا
شكرا جزيلا على التوضيح وعلى العموم انا حذرتك من العواقب
ويبدو انك غاوى مغامرة وربنا يستر .
Quote: لا يجوز مطلقاً أن نقول (المتواجدون الآن) ونحن نقصد من هم حاضرون، بل الصحيح أن يكتب الأخ بكري (الموجودون الآن)، أو (الحاضرون الآن)،...
وكذلك لا يجوز أن نقول المتواجد في المكان الفلاني،.. بل الموجود،..
لأنّ التواجد تفرّعات من أصل كلمة (الوَجد)، فالمتواجدون الآن، تعني الذين هم في هيام وغرام في هذه الساعة، يعني داخل القواطيع وغرف النوم،..

اتارى نميرى(....)مطلعنا ناس هيام ساى وبى كبرنا دا.
تسلم اخى وواصل لان هذا البوست فيه فائدة وكم كنت اتمنى من الاخ بكرى تثبيت
هذا البوست للفائدة بعد استبدال كلمة الموجودون او الحاضرون الان بدل كلمة
المتواجدون الان لانها خطا .

Post: #52
Title: Re: إصلاح الكتابة في المنبر
Author: farda
Date: 02-16-2005, 07:54 AM
Parent: #1

الكاتب الروائي محسن خالد...
Quote: ...بالرغم من كوني "كاتب من ورق"
(فليحتفِ بك الوَرَق إذاً...)

بصراحة يا عزيزي (إسمح لي بها)، أنا مصاب في هذا الفضاء ، هذه الأيام، بحالة من "الزهق" لا حدود لضربته الماحقة ، وهذه بالتحديد – الحالة – هي ما أعجزني عن التداخل معك ، ترحيباً واحتفاءاً... إذ بدا لي صوتك الروائي قريباً من القلب ولصيقاً بهمِّ الكتابة كما أفهمها...

وها أنت تجترح هذا الخيط الذي لديَّ فيه كلام كثير...
سأعود اليك هنا إذاً ، ربما لأتحدث عن جانب آخر من جوانب الكتابة وتجويدها (كلمة إصلاح أزعجتني قليلاً، أظنك ستعرف لماذا)...
سأضيف هنا بعض الملاحظات حول العلامات البيانية في اللغة العربية (بالعلامات البيانية – مقابل البلاغية – أعني ما اصطُلح عليه بـعلامات الترقيم). وكنت قد كتبت دراسة طويلة عن استخدام هذه العلامات في الكتابة العربية ، ولكن انتهى بي الأمر الى قراءة استخدامها في الكتابة الشعرية – سعدي يوسف نموذجاً- مما أجَّل المشروع البحثي (الى حين، مثلما أتمنى) لصالح مشروع المتعة!

لك المودة والتقدير...

و..."سأتواجد" هنا يا عزيزي؛

ح. خير


Post: #53
Title: Re: إصلاح الكتابة في المنبر
Author: محسن خالد
Date: 02-16-2005, 03:15 PM
Parent: #52

Elawad،...
تحية، فارهة
أنا أشرت لك لكوني رددتُ على شنتير بشكل خاص، حول (هكذا ...)،.. ولكن من حقك أن تعرف ما دار، هو أنّها تقليعة، هكذا مواضيع، وهي (مواضيعٌ هكذا، أو هكذا صفتها، بحيث لا تتقدم المشار إليه،...
وفي تقديري، هي ركاكة فحسب، أدخلها تحديداً مترجمو الكتابات الأجنبية لأدوات الإعلام العربية، إذا حاولنا أنّ نتقصّى تاريخها فلا علم لي،... ولكن بالتأكيد هي نتاج التعريب بالمفهوم الأوسع والأشمل للكلمة، وأظنها في المقابل للرابط الإنجليزي:
في الإنجليزية: such a matter
Or: such a man… such a woman
ولا حظ الحس هنا، تقريباً هو موضوعة نقل: هكذا مواضيع بالضبط،...
وتحياتي ثانية،..


هاشم نوريت،...
وشكراً لك، يا عزيز، بعدين الهيام ما عليهو كبر، هيم وخلي الشدر المكتّف ذاتو يهيم لو بتقدر،...
وخليك في الجوار،..

Farda،...
كيفك يا زول، وسلّم لي علي قلبك الهمو خاتف لون همّي، همّ التوهّم والجكّة بالقلم،..
(فليحتفِ بك الوَرَق إذاً)، بس برضو جروف سماكم مغرية،.. وسلوكتي معاكم الشبحة بالشبحة،.. يا زول ماني فايت كان ماطردوني بالرقيب والعتيد، وألا كمان طردتني واحدة من بنات نعش،.. وما ببعد! أقرب مجرّة أم عنقريب بنتمدد ونتغطى بالنجم،...
وتاني أريتك طيّب،..
حلوة تسمية (العلامات البيانية، بالجد) وراقية، وفيها ملاوحة كلام كتير،... ودا موضوع موجّع رأسي زمن، وعندي فيهو ملاوة شخصية لا أسميها دراسة،.. وأنا منتظرك، وثِق ببراهو علامة علامة،..
أرجو أن ترميلنا دراستك هنا، وح تكون بكل تأكيد النصف الآخر، المكمّل لشكل الكتابة، لأنني مركّز على الجانب الفني، المحتاج ترقيم كودي أو رمزي شكلي، من باب غير اللغة، ولو ملاحظ تشحيحي للانغماس في اللغة من جانب بنيتها (الدلالية- النحوية) انحرافاً نحو شكل الكتابة في الأعم الأبسط،... فمرحباً بك وبدراستك،..
وزي ما بقولوا أهلنا المغاربة (ما كينش مشكل) بالنسبة (لإصلاح) ربما قادتك إلى السمكرة أو المنطقة الصناعية، وبيني بينك فيها الشاكوش دا،..
وتسلم،...

Post: #54
Title: Re: إصلاح الكتابة في المنبر
Author: محسن خالد
Date: 02-17-2005, 02:03 AM
Parent: #53

لطيفة (كتابة الهمزة)
يُراعى على الدوام حركتها وحركة الحرف السابق لها، وهنا رصد لتنظيم وترتيب الحركات، (دا كلام خلاوي بس مهم بشكل حاسم)،...

ـــــــــــــِ الكسر (الجر) أقوى الحركات،..

ــــــــــــُ الضم يليه،..

ـــــــــــــــَ بعده الفتح،..

ـــــــــــــــْ أخيراً السكون،..

وهاهنا القواعد البنائية، والناس لا يخطئون فيها، بل بالحس النفسي للغة يكتبونها بشكل صحيح، ولكن متابعة النهاية ضرورية، لأنّ الإشكالات تأتي لاحقاً، وقد سعيت لتوضيحها بأبسط صورة ممكنة،..

1- إذا كانت (الهمزة) "ساكنة" وما قبلها "مفتوحاً"،... تُكتب على (ألف)،.... (فَـأْل)

2- إذا كانت (الهمزة) "مفتوحة" وما قبلها "مفتوحاً"،... تُكتب على (ألف)،.... (قَرَأَ، صَبَأَ)


3- إذا كانت (الهمزة) "مفتوحة" وما قبلها "ساكناً"،... تُكتب على (ألف)،.... (جُرْأَة)

4- إذا كان ما قبلها "ألفاً" أو "واواً"، وهي مفتوحة تُكتب على السطر:
(مسَاءَه،..................... ضوءه،.....)،...

5- إذا كان ما قبلها "ألف" أو "واو" وهي مفتوحة تُكتب على السطر:
مساءَه،... رداءَه،... ضوءَه،... مروءَة،........

6- إذا كانت مضمومة وما قبلها ألف، أو أي حرف ساكن،... تُكتب على واو:
يجرؤ،.............. دِفؤها،.....

7- وإذا كان ما قبلها مكسور،.... تُكتب على ياء:
يُنْشِئ.......... يُنشئها................ يُبوِئها............. يُجزئها.................

7- إذا سبق الهمزة المتطرفة أي حرف مد،... آآ........... (هذه القاعدة مهمة) تُكتب مفردة، على السطر.... بمعنى متحكّرة علي رقبتها بدون كرسي،...
مساء،................ ضوء،.............. مجيء.................

طيّب إذا قبلها كسر، طوالي بتكون محتاجة لكرسي، والكرسي هو (فقط رسم الياء، بدون نقط، يعني الحرف الفي مفتاح الـz في الكي بورد، والحرف دا مش ياء)، (ومن هنا بتلم فيكم اللخبطة والتردي).............

شَاطِئ...................... الطاء مكسورة، الكرسي مفتاح الـz في الكي بورد،...
بادِئ.......................... الدال مكسورة، الكرسي مفتاح الـz في الكي بورد،...

وللتوضيح أكتر، ركّز علي الخلاصة الجاية:


الياء هي دليلٌ على الكسر،...
الواو دليل على الرفع،...
الألف دليل على النصب،...
(هذا لتبسيط الموضوع)

إذن كيف نكتب الهمزة بعد الياء؟؟؟؟؟؟؟؟
(التركيز على الياء لكثرة الإشكالات مع حروف العلّة عادة)

الهمزة بعد الياء من الطبيعي أن تكون على نبرة لتوافقها:

ليُضيـ{ئ}ـوا..... الياء سابقة، فالهمزة هنا تكتب على النبرة: ليُضيئوا،..

1- طيّب لو كانت الياء نفسها مفتوحة: (تهيَأ)................ تُكتب (الهمزة) على الألف: (أ)،..


2- طيّب لو كانت الياء مرفوعة: (تَهَيُؤ)................ تُكتب (الهمزة) على الواو لأنّه هو الذي يناسب الرفع: (ؤ)،..


3- وأيضاً نفس الحالة أعلاه إذا كان الحرف الذي يسبق (الهمزة) مرفوعاً، حتّى ولو كان غير الياء:
(يَجْرُؤ) أيضاً تُكتب على الواو لأنّ الحرف السابق لها مرفوع،..


4- طيّب إذا كانت الياء مكسورة: (يُهَيِئ)........ وهنا تُكتب على النبرة القاصية، غير المشبعة، أو التي بهذه الصورة الموضّحة: (ئ)،..

5- طيّب إذا سبق (الهمزة) حرف ساكن: (دِفْء).............. وهنا تُكتب على السطر (ء)،..


6- مع ملاحظة أنّ الخوض في البنية الدلالية- النحو أيضاً يقودنا لطرق كتابة الهمزة، يعني الإعراب برضو بدّيك القاعدة:
جاءني دِفْؤها، على الواو لأنّه يناسب الرفع،..
ظللتني بدفئها، على النبرة لمناسبة الجر،..
تلقيتُ دِفْأها،...
وهنا تحديداً (تلقيتُ دِفْأها) ملاحظة، فالقاعدة كما هو واضح يجب أن تنتهي إلى كتابة الهمزة بهذه الصورة (أ) في حالة النصب، كما تقدّم أعلاه، ولكن الاصطلاح جرى على أن تُكتب هكذا: دفئها، أي بدون فرق عن حالة الجر، وأنا شخصياً أمتلك الشجاعة لأكتب كما يقودني المنطق والبنية الداخلية للغة دون خوف.

وتحياتي،...


معليش: مع أي شيء أعتذر،...
ليشنو: لأي شيء هو،...
هولي: هو لي،... هولك: هو لك،..
هسّه، وهسّع: هذه الساعة،..
كيفنّك: كيف إنّك؟
براك، براي، برانا: براءتك، براءتي، براءتنا،...
ومنها براءة اختراع، أي ما يخص الشخص وحده، بُرءاً لنفسه، وهي أفصح الفصاحة،...
قشط: فصيح
انشحط: فصيح، ولكن باستخدام البدو لها، بمعنى البُعد،
الدرب انشحط، واللوس جبالو اتناطن
والبندر فوانيسو البيوقدن ماتن
بنوّت هضاليم الخلا البنجاطن
أسرع قودع أمسيت والمواعيد فاتن
(والأبيات للطيب ود ضحوية، وليست لشاعر مجهول، كما كتب الطيب صالح على مدخل كتابه).

Post: #55
Title: Re: إصلاح الكتابة في المنبر
Author: محسن خالد
Date: 02-18-2005, 12:17 PM
Parent: #54

لطيفونة

لدى الاستفهام نقوم بحذف الألف من (ما):

فنقول: لِمَ

حَتَّامَ

إلامَ

علامَ

بِمَ

فيمَ

فبمجرد أن تجد حس السؤال والتساؤل (الاستفهام) واجب عليك حذف الألف،..

Post: #56
Title: Re: إصلاح الكتابة في المنبر
Author: Shinteer
Date: 02-19-2005, 02:26 AM
Parent: #55

إلى حين إنزال اللطيفة التالية، نظل في الانتظار.

الأخ فردة .. في انتظار إسهامك المنتظر. قرأت لأحدهم أن "الترقيم" البياني ليس من أصل اللغة العربية. وكان الأولون في كتاباتهم يصلون الكلمة بتاليتها دون حاجز ترقيمي، إلى نهاية الموضوع. لا أعلم مدى صحة هذه المعلومة. إشهامك في هذا البوست قد يكشف لنا عما نجهل.
ولك الشكر.

أين أنت يا محسن؟

Post: #57
Title: Re: إصلاح الكتابة في المنبر
Author: بدري الياس
Date: 02-23-2005, 11:25 PM
Parent: #56

عليك النبي يا محسن واصل عشان خاطر الكتابة
و
*
*
*
(
ترفع عن كل سفيه وذمّهُ
خلقُكَ يأبى عليك تميلُ

وحيِّ كل شريف نطق حقاً
وضع على حرفهم إكليلُ
)
*
*
*
أرجو إعادة تشكيل النص أعلاه وهو (للشاعر) ود الشيخ
وفتح فصل للدروس الخاصة ..
وشكراً ...

Post: #58
Title: Re: إصلاح الكتابة في المنبر
Author: بدري الياس
Date: 02-27-2005, 04:14 AM
Parent: #57

- الناس دي ما عايزة كتابتا تنصلح والا شنو؟
- .....
- طيب مالن بخلو زي البوست ده يحتل؟
- .....
- إنت ما سامعني والا شنو؟
- ....
- طيب كان ماب تسمع ماب تقرا؟
-....
- خلاص أنا بدفر البوست لي قدام وانت الله يعدل علينا وعليك.

Post: #59
Title: Re: إصلاح الكتابة في المنبر
Author: Shinteer
Date: 02-27-2005, 08:22 PM
Parent: #58

الزول ده مشى وين؟ يا زول الكتاب خربت .. وفي مطالبات بتحسينها بشرط تغييرها. يعني فرنساوي كده وللا سنسكريتي.

Post: #60
Title: Re: إصلاح الكتابة في المنبر
Author: محسن خالد
Date: 03-04-2005, 11:35 AM
Parent: #59

يسلم السلام من تكنيك النضم، يسلم السلام ويطيب من عَوَجة مقاصدنا حد يكون السلام،..
السلام متعافي، عليكم،..
يا أحباب خليكم متلخبطين بالحزن، وبالرماد، طوّالي طوّالي، في الحزن معرفة وخَرَس جميل،...
اخرسوا من حزن،..
أو قولوا من طول صمت الأصدقاء، سنعبر،...

شنتير،....
تحياتي يا عزيز،... وماك طيّب؟؟
طبعا الترقيم ليس من أصل "الكتابة" العربية مش "اللغة"، ولا غيرها من اللغات حسب علمي، بل هو اجتهادات حداثية، (ولا حتى النقاط كما تعلم –بخصوص اللغة العربية) مع أنّها من بنية النبر، وواجب توضيحها، وكتاب الأصنام باعتباره من النصوص العربية الأقدم، لو رأيت مخطوطاته تجد أنّك أمام خربشات آخر ما يمكن أن تكونه "الكتابة" الحالية،...
وأنا معك أنتظر الأخ فردة ليُرينا رؤيته كي نستفيد منها جميعاً،...
وليك السلام آخوي،...

بدري الياس،....
إزيك يا زول، وأهو وصلنا وبنشوف الفي الكتاب، ربك يسهّل،..
إنت بس كان أنا سهيت والله شالتني موتة وألا سفرة، أدفر البوست قِدّام، وأهل الرايحة بلقوها،...
وتحياتي يا عزيز،...


أهو جينا يا شنتير،...
وين حاجاتك بتعة اللغة ديك، فكّها هنا، في البال حاجات كتيرة، بس خايفين الكتاب المبسّط يتحول إلى كتاب نحو ممل،...





أصدقائي كلكم،...
يبدو أنني متعب جداً، على غير العادة، فالتعب والألم والحزن المؤجلون بتمامهم، لحقوا بي عند هذا الحد من الدنيا والدهر، لذا أعتذر منكم، فاليومي أصبح مثل كأس لئيمة جدا، وبحال إمرأة لا تدري هي ولا أنت ماذا تريدان من بعضكما، الحب ينهار في طريقه إلى الحب، ودرويش وصديقه نوري الجرّاح يتحاوران منذ زمن طويل: الطريق إلى البيت أجمل أم البيت؟
سأعتني بكم، رغم تعبي، وأنتم هنا هنا هنا، الآن أؤشّر ناحية القلب،...

Post: #61
Title: Re: إصلاح الكتابة في المنبر
Author: Shinteer
Date: 03-04-2005, 01:43 PM
Parent: #60

يا شقي .. الكتابة تطير .. ياخي شفّقتنا في رقبتك دي. نجعت وين آآ عكليت؟. تصدق أنا قربت اسوي لي فراش هنا واستقبل المعزيين .. وحيكونوا بوذيين عن بكرة أمهم .. نعمنّك طفشت وقلت لي راجع فسراع. والله حمدللا بسلامة الرجعة .. ومن دربك ده أدّها نومة يومين تلاتة .. وبعد داك تعال صلح الكتابة .. إن بقيتن بتتصلّح

والله ليك وحشة. ثم رابعاً: غتست وين؟ يعني ما "رفسوك"؟ الحمد لله من قبل ومن بعد ومن تحت ومن فوق

برضو في انتظار الزول الراقي فردة الذي كان مزنوقاً زنقة الكديس. أها ورونا الجديد القديم

معليش يا محسن .. أنا قصدت الكتابة، التي هي غير اللغة. يكتبوك الجماعة إياهم إن شاء الله. أنا عارف إنها الكتابة لكن ترانا بنقول اللغة. أها .. في الكتابة العربية .. حسب علمي شبه المتواضع لا يوجد ترقيم .. أما الكتابات باللغات الأخرى فلا علم لي بها لأنني وحيات عيونك وعيون الصيد لا أتكلم غير هذه اللغة المجغمسة

والله ليك وحشة ووحشات

Post: #62
Title: Re: إصلاح الكتابة في المنبر
Author: محسن خالد
Date: 03-05-2005, 01:18 PM
Parent: #61

شنتير،...
والله الكتابة تطير، هسي رأسي لا فيهو عربي ولا محل للتمباك،... يرعوها كيف ما عرفتها؟؟
بعدين بكاك دا ح يكون بكاء يوبيلي ماسي،...
والجماعة ياهم كاتبني برضو والكتبة بايتة، وشايلها زي الحنّة لأنها مطبوقة فوق كتبات كتيرة،...
ياخي مشهادي جايط الأيام دي،... وأتمنى كلو يوم لو أطير وأتبدد متل ريمودوس بتاعة عمك ماركيز، تشيل ملايات علي الحبل تشرّهن تقوم هي والملايات فو فو في السماء،... يبقيها علي الله دي،...

تسلم،...
حس أب جقرة والقَرَبين دوام باريني............. وأنا أخو اللينة كان يبقه الحديث عانيني،... (جدك ود ضحوية يرد على الضرير في مجادعة)

Post: #63
Title: Re: إصلاح الكتابة في المنبر
Author: هاشم نوريت
Date: 03-06-2005, 09:16 PM
Parent: #62

محسن خالد
دبايوا
بتزوغ وين يازول خلاص قلنا لقينا لينا واحة بقيتى تكب الزوغة
كدى ادينا الجديدالمفيد.

Post: #64
Title: Re: إصلاح الكتابة في المنبر
Author: domdom
Date: 03-07-2005, 01:19 AM
Parent: #63

يا محسن خالد و الله العظيم
و كتابه الكريم
انا اكان في محلك اسيب اي شي
و ألبي طلب هاشم نوريت
ياخي دي نقلة نوعية كبيرة جدا
و ان شاء الله بكرة هاشم نوريت
يطلب من الجماعة البنزلو المديح
بردةالامام البوصيري او يا راحلين الي مني
بتاعة برعي اليمن .
و الله يا هاشم نوريت انتا مجيرني عديل
كلامك في اشياء كتيرة منطقي خاصة الوطنية
بس تجي تلبس جلابتك القصيرة بتاعة انصار السنة
ترجع الف سنة لي وراء
علشان كده انا اي بوست بتاعك قاريو داير اشوف
نهاية تفكيرك شنو خاصة انك زول ما ساهل
يعني عديل كده اناشايفك زول تمام
بدون جلابية انصار السنة دي و خاصة في مسائل التصوف
و موقفك من الاخوة الجمهوريين
سلام

Post: #65
Title: Re: إصلاح الكتابة في المنبر
Author: محسن خالد
Date: 03-07-2005, 04:35 AM
Parent: #64

هاشم نوريت،...
تحياتي يا عزيز،...
وصدقني دنيتي جايطة شوية، بس ليك وعد نجيض، من هنا لي بكرة، نباصرها،....
سنرى،...
وشكرا يا غالي،..

domdom،...
ياخي سلامات وماك طيب،...
واحمد ربك إنك ما في محلي،... لو ملاحظ كل الناس في البورد دا، بقولوا ما فاضيين ولو لقيت زمن وما برد عليك هسي، وبنجي راجعين،... ياخي جنس الكلام دا، أنا بكجنو عديل،... وبتمنى لنفسي ما تقولوا إلا مغبية وتبحت طايحة علي الأرض من فتفتة موت التعب مش تعب الموت،...
ودي أنا عاملها لرقبتي، ما للناس، (يعني تدور 24 ساعة زي المكنة) لأنني لا آمن نفسي على نفسي من التفكير،... أُريد لها الانشغال، بدل السهك أو حتّى مغازلة التجارب الغامضة-الرحيل لغابة إلى لا مكان إلى أي حُفرة بعيدة عن هنا، كل هنا،...
أو حتى تجريب الالتحام مع الغياب الكبييير،...
بس تفكّني الحاجات، وتلقاني هنا،...
وما بطوّل،...
تحياتي يا جميل

Post: #66
Title: Re: إصلاح الكتابة في المنبر
Author: Tumadir
Date: 03-07-2005, 04:42 AM
Parent: #65

مرة كده يا محسن رجاء جابت كلام انا كتبتو زمان وحبت تستشهد بيه عشان ترفع من مقامى

ولما طالعت الكلام المكتوب لقيت فيه غلطة لغوية قدر الهجمة كمان مكررة ...وانا طبعا جابدنى ابوى بنضرس من الاخطاء اللغوية والاملائية...فلما شفت غلطتى ...عرفت انه اخطاء الكتابة فى المنبر ده "قضاء وقدر"..

جيت هنا عشان اشيد بجهدكم المقدر..فى البوست ده...وعلى موهبتكم الابداعية المعتبرة فى مقام الكتابة فى بوستات أخريات.."بضم الالف" والابداع قسم...

لك محبتى

Post: #67
Title: Re: إصلاح الكتابة في المنبر
Author: Shinteer
Date: 03-07-2005, 09:31 AM
Parent: #66

وعـُـقـْـبان يا الـلّـصَـم عـادَن ليالي ســهـَـرْنا

محسن خالد .. الدُّخْري .. داير لي معاك زمْبَعة، بصحبة أقحاحٍ كِرامٍ كزاعرِ. وكزاعِر هذي لا بعلمها إلا الله والراسخون في فقه الشِّياص. يا رفيقي .. استمر هنا في إصلاح ما لا يمكن إصلاحه. ولك الضروع الدِّلاء .. أو كما قالت: الضروع الدَّلَوَة.

يا سيدي .. هل لك أن تشعلها حملة تطهيرية ركينة الجناب والعِماد؟. اشعلْها ودعْـها تحرق الغثاء.

ليك وحشة مرة أخرى. وأنا بين حضوري وغيابي .. أراك مفلقاً. وسوف يطووووووول غيابي وعشم حضورك.

إنت عفريت. وقد أتيتها من حيث تؤتى. فيا لك من سائس أنفسٍ عتيق. عتق دنّك ذواهب المعتقين (المعرّي قال هذا ردئ) ودارت كؤوس السعد (سنيحاً وبارحاً) فوق رأسك "المفارِق".

آآ جنى .. أنا كان ما لميت فيك عيني ما بتلاقي (دي رطانة يا مُحْسْ).

الليل أمسى وألبِل حرّرنّو مشيهِن
عَقَبَن موية .. والجبل أب قِرود راجيهِن
الـ خَلاني فرْض الخمسة ماقَـضِّـيهِن
رزْق الدنيا .. والـمِـحَـن البصارِع فيهِن

رحم الله شيخنا ود ضحوية .. وبوّأنا مكانته الأدبية.

يا زول إت مطَرطَش.

أنا تاني ما عندي بيك شغلة. من هنا وغادي ما بقدر أدافر الانترنت .. لأني معزِّل إلى ما شاء الله.

Post: #68
Title: Re: إصلاح الكتابة في المنبر
Author: هاشم نوريت
Date: 03-07-2005, 10:12 AM
Parent: #67

دمدم
دبايوا
شكرا على كلاماتك واتمنى ان اكون عند حسن ظنك وحكاية انصار سنة دى نخليها
حسى وارجو ان تكون من الموجودين هنا عشان تساعدنا فى مناشدة محسن كما
والراجل نستطيع انو نستفيد منو بس يخلى زوغاناتو دى .



الاستاذ محسن خالد
دبايوا
الاسئلة كثيرة والهموم كبيرة بس شوية وقت منك تخصصه لنا ستعم الفائدة
ودمت.

Post: #69
Title: Re: إصلاح الكتابة في المنبر
Author: محسن خالد
Date: 03-12-2005, 05:51 AM
Parent: #68

أولاً عذري يا أصدقائي جميعا، انتهينا من السفر دخلنا في مشهاد الحُمى، وما زلت بنصف روح،...



تماضر،...

تحياتي يا عزيزة، وأوافقك إنو في أخطاء قضاء وقدر، وأنا بعد فلهمتي دي كلها، كل يوم أقرأ فيهو واحد من كتبي ألقى بالة أخطاء مش خطأ واحد، وأرجع للناشر والديّة تقوم، لأنو ح يضطر يستخدم بليت جديد للطباعة،..
وتحياتي لك يا جدعة،...

شنتير،...

ياخوي هسي أنا محمووم، ورأسي نمل نمل،..
بعدين بلاد الساكي دي ما جربتها، بس ما تخاف، بقوم أسك ليها تأشيرة وأخليك توصف: لا شارع تايوتا خليهو،... تمسك سوني طوالي وتدلى بعدلك، لامن تلم في بنايات توشيبا، أها...
خلي الحمى تروح، أو تروحنا،..

هاشم نوريت،...

تحياتي يا عزيز،...
وهسي المادة جاهزة، يعني فكّرت فيها، بس كيف نتنتنها في الكمبيوتر ونراجعها، مِد الصبر براحات،...
وسنرى،..

Post: #70
Title: إصلاح الكتابة في المنبر، بين قوسين!
Author: farda
Date: 03-12-2005, 09:28 AM
Parent: #1

متأخر بعض الشيء، فعذراً يا أصدقاء.

أتفق معكما يا شنتير ومحسن خالد. الترقيم – أو العلامات البيانية – هو ظاهرة حديثة ، وهي مربوطة أساساً بعصر الطباعة. فالترقيم ينتمي للعلامات الصورية ، يعني هي (visual signifier) وليست مثل الحرف المكتوب على الورقة فـالحرف المكتوب هو "صورة تدلُ على صوت". فعندما تقرأ صورة الحرف "أ" فأنت تستبدله بـالصوت "أ". ولكن حين "تقرأ" (أو، للدقة، حين "تبصر") العلامة: فاصلة "،" أو نقطة"." فإنك تستبدلها بتبديل في سرعة استرسال القراءة أو وتيرة اندفاعها. أو بالصمت التام مثلاً. وهكذا، فإن علامة الإستفهام في قصيدة لإمريء القيس مثلاً ستبدو مثل ساعة رقمية على معصم فارس يرتدي زيَّ العصور الوسطى.
لم يكن الترقيم معروفاً قبل الكتابة، والأهم ، أن الكتابة نفسها لم تكن مركز اللغة. كان الصوت سيد الموقف.
ولكننا نخطيء لو ظننا أن الكاتب القديم لم يكن يُعمل الترقيم – أو يدرك أهميته – في قصيدته مثلاً. العلامات البيانية تمفصل المعاني، تعيد ترتيب وإحكام التراكيب اللغوية ودلالاتها. وللصوت أيضاً علاماته البيانية. إن الإلقاء (ويسميه البعض فناً) هو في حقيقته تجليٍّ لقدرة القاريء أو المُلقي في "ترقيم" و"تنويت" النص المقروء: الضغطُ على كلمةٍ ما، تلوينُ الصوت، إرتفاعُ وتائره، إنخفاضُها، الصمتُ المفاجيء، الإسترسالُ والتتابع – كل هذه علامات بيانية مهمتها أن تُـدخل النصَ المقروءَ فضاءَ الأذن السامعة، منوَّتاً بحركية المعاني وجدلها (وبجماليات الصوت أيضاً!)
طبعاً، العرب تعلموا العلامات البيانية مؤخراً جداً، لذلك لا يعرف أغلب من يستخدمونها في العربية سوى علامات محدودة جداً: النقطة، الفاصلة، التقويس، وعلامتي الإستفهام والتعجب، واستخدامها يكون فقيراً جداً. هنالك بالمقابل إرث ضخم في العناية بالعلامات البيانية في الإنكليزية. ومثلما يقول لك مدرس اللغة العربية – لتضخيم أهمية الإعراب والتنوين – أنَّ كلمة "في" دي بـتـْجُر "الفيل" ذاتو!، يقول لك مدرس الإنكليزية أنْ: the Full Stop, or the Period, will stop a speedy train on it's tracks!
هنالك كتاب صدر حديثاً عن العلامات البيانية في الإنكليزية، تأمل معي غلافه الطريف، ولك أن تتمعن خطورة الأخطاء الفادحة في العلامات البيانية التي يمكن أن تصيب المعنى الذي تقصده في مقتل:



إليك إذاً هذه اللطيفة القصيرة عن التقويس:
إذا فتحت قوساً في منتصف الجملة (لتضيف شرحاً، أو جملة واصفة، أو إعتراضية مثلاً) فاحرص على أن تغلق القوس وتأكد أن جملتك النحوية ستظل مكتملة ومتواصلة حتى لو سحبت القوسين وما بينهما تماماً.
الجملة السابقة نفسها تحتوي على مثال جيد لما أعنيه. فلأعيد كتابتها مرة أخرى إذاً دون الأقواس:إذا فتحت قوساً في منتصف الجملة فاحرص على أن تغلق القوس وتأكد أن جملتك النحوية ستظل مكتملة ومتواصلة حتى لو سحبت القوسين وما بينهما تماماً.

أيضاً، تجنب أن تفتح قوساً في منتصف (أو بعد كتابة فعل ينتظر فاعله، أو وصف ينتظر الإكتمال، أو بين مضاف ومضاف إليه،) الجملة. هل تبدو لك الجملة السابقة مرتبكة التركيب ومختلة المعنى؟ هي كذلك، لأن التقويس المستخدم فيها يفصل المفردات قسراً بدلاً عن أنْ يمفصل المعاني ويربطها.
أخيراً، لا تثرثر بين القوسين للأبد! فإنك حينما تفتح قوساً فكأنك تقيم موعداً مع القاريء على الضفة الأخرى من النهر. والى أن تغلق هذا القوس اللعين (عذراً للمغاربة السودانيين) قد يمل القاريء الإنتظار وقد يصيبه الإرتباك وربما يفقد الإهتمام.
من المهم في الكتابة وتجويدها هو لا ننظر الى الترقيم واستخدام العلامات البيانية وكأنما كانت إجراءاً تقنياً منفصلاً عن الكتابة، فالعلامات البيانية هي جزء أصلي من مجهودك وفعلك الكتابي، وهي أيضاً تتطلب ذات العناية والتجويد الذي نوجهه للنحو والقواعد والإعراب.

أما أكثر العلامات التي يثيرُ استخدامها غيظي في سودانيز أون لاين فهو تكرار علامات التعجب "!" أو الإستفهام "؟". فهذا يوحي لي بأن الكاتب يتوقع فيَّ الغباء، وأحياناً أقول أنه قد عجز عن قول ما يريد، وينتظر مني أناأن أقوم بالمجهود نيابة عنه: عليَّ أناأن أتخيل حدة غضبه، دهشته، فرحه، الخ. لست أدري بحق الجحيم لمَ يفعل البعض ذلك؟؟؟؟؟؟!!!!!؟؟؟!!؟؟؟؟!!؟!!!!!

ح.خير

Post: #71
Title: Re: إصلاح الكتابة في المنبر، بين قوسين!
Author: محسن خالد
Date: 03-12-2005, 09:50 AM
Parent: #70


farda،...

تحياتي، لقد هُددتُ تماماً، لأكتب هناوبالحمى والرهق، معلقا أو محرضاً،... وأها بكرر الكلام المكجنو، ح أجي لكلامك تاني،..
وإلى ذلك الحين، واصل أنت هنا في موضوعك، واترك لي عنوان الدار التي أصدرت ذاك الكتاب لو أمكنك،..
وتحياتي أبدا،...
ودم بخير

Post: #72
Title: Re: إصلاح الكتابة في المنبر، بين قوسين!
Author: هاشم نوريت
Date: 03-12-2005, 10:24 AM
Parent: #71

محسن خالد
فردا
سلامات
وفى انتظار المزيد.

Post: #73
Title: Re: إصلاح الكتابة في المنبر، بين قوسين!
Author: farda
Date: 03-12-2005, 10:37 AM
Parent: #71

محسن خالد،

لا عليك. سنواصل الى أن تعود.
يمكنك الحصول على Eats, Shoots & Leaves بزيارة موقع الكتاب نفسه هنا:
http://eatsshootsandleaves.com/book.html
أو من أمازون هنا:
http://www.amazon.co.uk/exec/obidos/ASIN/1861976127/026-4875863-3465214

ح.خير



Post: #74
Title: Re: إصلاح الكتابة في المنبر، بين قوسين!
Author: Shinteer
Date: 03-12-2005, 11:53 AM
Parent: #73

Quote: Eats, Shoots & Leaves

A perfect riddle; if not properly punctuated.0

Thanx ya Farda for this funny, telling example.0

Post: #75
Title: Re: إصلاح الكتابة في المنبر، بين قوسين!
Author: محسن خالد
Date: 03-15-2005, 05:31 AM
Parent: #74

هاشم نوريت،...
إزيك وماك طيّب، أها الليلة فيها عمار،..

فردة،...
يا عزيز، أستمر طوالي، وما تهم بوجودي وعدمو،...
واصل،...
أنا طبعاً ما راجي الأقواس والفواصل والشرطات والنَقْط، ولا علامات التعجب والأسئلة والكلام دا، داير أشوف ما بعد داك، وحتى ما بعد علامات القرآن البيانية: (قلي، صلي، لا، م، نهي وسجدة) ودي برضو كانت محاولات فقهاء يا شنتير،...
لأنو عندي رأي إنو طريقة الترقيم العربي دي لسه في الروايات دايرالها اجتهادات،...
ولاحظ قصة يوسف، سورة (يوسف) –الرواية، كيف كانت صعبة في توجيه الحوارات، الحوار لأنو بدون ترقيم كان محتاج ينزل في بنية النص،...
واصل،...

شنتير،...
أريتك عافية،...
وكُن بخير يا عزيز

Post: #76
Title: Re: إصلاح الكتابة في المنبر، بين قوسين!
Author: محسن خالد
Date: 03-15-2005, 05:35 AM
Parent: #75

لطيفة حول كتابة الألف الممدودة والمقصورة






هنا أيضاً نعوّل في كتابة الألف على الفعل المضارع، وهو الفيصل الوحيد بالإضافة للمصدر في طريقة كتابة الألف،...

فيما يخص الأفعال:
هل الصحيح أن نكتب:
غلا الماءُ على النار......... أم: غَلَى الماء
علا الطيّار بطائرته.......... أم: عَلَى الطيّار

فيما يخص الأسماء:
هل الصحيح أن نكتب:
(رُبا) جمع رابية ..... أم: رُبى
خُطَا......... أم خُطَى

القاعدة هي استخراج الفعل المضارع أوّلاً والمصدر ومن بعد الحُكم،..
1- غلى.............. يغلي............. غلياناً
الذي مضارعه أو مصدره بالياء يصير لألف مقصورة:
إذن الصحيح: غَلَى

2- علا........ يعلو ............... عُلوَّاً
الذي مضارعه أو مصدره بالواو يصير لألف ممدودة:
إذن الصحيح: عَلا

وكتطبيقات:
دعا............. يدعو.......... دعاءً
خلا............. يخلو.............. خُلوَّاً
***
مضى........... يمضي........... مُضاءً
زنى............. يزني.............. زِناءً

(يعني في حالة المقصورة بتشابهو شوية في الشكل (ى) (ي)، لكن أعملوا حسابكم دا لمجرد التسهيل، لأنو واحدة ألف والتانية ياء، يعني فرق الليل والنهار)،...

بخصوص الأسماء:
نَفْس القاعدة، مضارع/ مصدر وبعدين الحُكم:
1- خُطا الاسم، الفعل منها،... خَطا.............. يخطو........... خطواً
المضارع والمصدر (واو) إذن تصير لألف ممدودة

2- رُبا الاسم، الفعل منها، رَبا.............. يربو........... رُبُوَّاً
المضارع والمصدر (واو) إذن تصير الألف ممدودة،..

نموذج للألف المقصورة:
لُقَى الاسم، الفعل منها،.. لقي.... يلقى.... لقاء


سلامات:
ممكن نخلي: سارا سوياً، بقصد معاً،...
سوياً تعني مستقيما وليس معاً،...
فإن كنا نقصد المعية وجب علينا أن نقول: سارا معاً،.... بعداك يتلولو في الدرب وألا لا ، دا شيء تاني
والزخم بقصد الاحتشاد والكثرة، هي لا تعني لا الاحتشاد ولا الكثرة، وحتى بقت غلطة قديمة والناس خلتها من الاستخدام بهذه الصورة،.. لأنها تعني اللحم المتعفن والمنتن الرائحة،..

والناس أيضاً يقولون بإدماج الشركتين في بعض،.... وهذا خطأ،..
الصحيح بدمج الشركتين،...
لأن الفعل أدمج موجود بالفعل ويعني لفَّ الشيء بالشيء، وليس أدخل أو دغم الشيء في الشيء،...

وطيبين،...

Post: #129
Title: Re: إصلاح الكتابة في المنبر، بين قوسين!
Author: ABUZEEGH
Date: 07-14-2005, 01:31 PM
Parent: #75

هناك أخطاء كثيرة يمكن أن أساهم معك في إيضاحها. ولكن ماذا عن علامات الترقيم؟

Post: #130
Title: Re: إصلاح الكتابة في المنبر، بين قوسين!
Author: ABUZEEGH
Date: 07-14-2005, 01:32 PM
Parent: #75

هناك أخطاء كثيرة يمكن أن أساهم معك في إيضاحها. ولكن ماذا عن علامات الترقيم؟

Post: #77
Title: Re: إصلاح الكتابة في المنبر
Author: عبدالله الشقليني
Date: 03-15-2005, 12:25 PM
Parent: #1

عزيزنا محسن
تحية لك ، وأنت
تُشير علينا وتضيء
مواضع الضعف لنُصلِح
اللغة والإمــــلاء ، وهي
مفتاح للقراءة
وللكتابة .
شكراً لك ،
ونحمد عودتك من السفر حتى نلقاك

Post: #78
Title: Re: إصلاح الكتابة في المنبر
Author: محسن خالد
Date: 03-16-2005, 03:01 AM
Parent: #77

عبد الله الشقليني،...
تُشكر يا أخي، وتحياتي لك أوفرها،..
أهي محاولة، وبرضو الخوف يترصدها من أمام ومن خلف، خوف الخطأ والدعوة له،...
وتحياتي لك إلى حين لقاء قريب،...

Post: #79
Title: Re: إصلاح الكتابة في المنبر
Author: هاشم نوريت
Date: 03-16-2005, 08:19 AM
Parent: #78

محسن خالد
دبايوا
صدقنى ناس يربو ديل عملوا لى ربو فى المخيخيخ ماعلينا

لكن قول لى هل صحيح ان نكتب(مساءا) كما هو شائع ام (مساء) والتنوين على
الهمزة (ماعرفتها موجودة فين على الكى بورد)
وقس عليها بقية الكلمات التى اخرها همزة على السطر وقبلها الف.

Post: #80
Title: Re: إصلاح الكتابة في المنبر
Author: محسن خالد
Date: 03-19-2005, 00:49 AM
Parent: #79

نوريت،...
سلامي يا هاشم،..
ياخي إنت أدروب شنو؟ أسئلتك كلها عكاز –شوتال في الركبة،...
وصحيح هنا في شوية ربكة،...

نجد أن الكتابة لكلمات مثل: مساءً، قضاءً، ضياءً، سماءً،.... تتم على هذا النحو، يُوضع التنوين هكذا بدون ألف متأخرة،...
بينما كتابة كلمات أخرى مثل: ضوءاً، جزءاً، نوءاً،... يتم فيها تثبيت الألف،...
والثابت هو أنّ أساتذة اللغة منذ عهد الفقهاء رأوا أن لا يكتبوا الألف مرتين، في حالة الكلمات التي تكون فيها ألف سابقة (نموذج المجموعة الأولى) لا نكررها،..
أما في نموذج المجموعة الثانية، فلا بد من كتابتها، لكي لا يسقط صوت الحرف حين القراءة،..
يعني هم لا يكتبونها في الحالة الأولى حفاظاً على شكل الكلمة،...
ويكتبونها في الحالة الثانية حفاظاً على بنيتها،...
جات معاك يا ود نوريت وألا نحرتها تاني؟
(بعدين علي الكي بورد عادية بتكتب الهمزة من (X) والتنوين عليها من حرف (ص: W)، وجرِّبها علي كدا)،...
وتحياتي يا عزيز

Post: #81
Title: Re: إصلاح الكتابة في المنبر
Author: خضر حسين خليل
Date: 03-24-2005, 03:35 AM
Parent: #1

معاً

Post: #82
Title: Re: إصلاح الكتابة في المنبر
Author: محسن خالد
Date: 03-26-2005, 01:45 AM
Parent: #81

خضر حسين خليل،...

شكراً يا ذوق،...

وسوياً،..

Post: #83
Title: Re: إصلاح الكتابة في المنبر
Author: محسن خالد
Date: 03-30-2005, 04:30 AM
Parent: #82

الإلفة خطأ.............................. الصواب: الأُلفة

Post: #84
Title: Re: إصلاح الكتابة في المنبر
Author: Shinteer
Date: 03-30-2005, 12:28 PM
Parent: #83

خطأ: في هكذا موضوع. صواب: في موضوعٍ كهذا.

إزيك يا مـحْـس ود خالد. كيف أحوالك؟.

يا أخي أنا حكاية: هكذا موضوع دي عملت لي عقدة. نفس العقدة التي عانيتها من مفردة البنفسج. لقد كرهت مفردة البنفسج تماماً، وبعدها الالق.

قلنا نسلّم عليك لأنك واحد من قلائل الظرفاء الخسوسيين.

Post: #85
Title: Re: إصلاح الكتابة في المنبر
Author: Amjad ibrahim
Date: 03-30-2005, 04:16 PM
Parent: #1

سلام جميعا
الأخ محسن
شكرا على هذا البوست المفيد
أمجد

Post: #86
Title: Re: إصلاح الكتابة في المنبر
Author: محسن خالد
Date: 03-31-2005, 09:29 AM
Parent: #85

Shinteer،...

تحياتي يا شنتير،...
يايخي الحكاية دي ما قلنا مشهادها زمان، إنت محرقة روحك عند زول وألا شنو؟
بعدين قبل كم يوم، لقيت لي حوار عاملاهو معاي مجلة وأنا ذاتي كاتبها "حبيبتك هكذا بطولها،..
أها الليلة أمش ماتنوم،..
وأبقه عافية،...
وإنت أهم الظرفاء الحلوين في هذا المكان،...


Amjad ibrahim،....

تحياتي وسلامي، وأنا أشكر لك اهتمامك به،..
ودُم بخير،...

Post: #87
Title: Re: إصلاح الكتابة في المنبر
Author: محسن خالد
Date: 04-03-2005, 02:57 AM
Parent: #86

لطائف نتشه



الغِواية،... بالكسر خطأ، الصواب (الغَواية) بفتح الغين


الغِلالة،... بالكسر خطأ، الصواب (الغُلالة) بضم الغين


العَنجهية،... بفتح العين خطأ، الصواب (العُنْجَهية) بضم العين


لا تقل (عَياناً بياناً) بفتح العين خطأ، الصواب (عِيانا بياناً) بكسر العين،..


وأيضا (شاهد عِيان) بكسر العين وليس بفتحها،..


الودِع، (ست الودِع) الكلمة فصيحة، ولكن (الودَع) بفتح الدال وليس بكسرها،..

Post: #88
Title: Re: إصلاح الكتابة في المنبر
Author: محسن خالد
Date: 04-06-2005, 04:03 AM
Parent: #87

أنا (الإنسان) ولست ظاهرة، والموت لا وجود له سوى على حياتي، فأيُّنا الظاهرة؟

Post: #89
Title: Re: إصلاح الكتابة في المنبر
Author: محسن خالد
Date: 04-24-2005, 05:28 AM
Parent: #88

الأعزاء، غصباً عنا، وشوية شوية، نجد أنفسنا مضطرين للخوض في أُسس الدلالة اللغوية، بنية النحو، ومفارقين لشكل الكتابة، هناك الكثير من القواعد البسيطة، ولكن الناس هنا "يتردونها ترداً، جنسو بَرَا"، هذا المكان هو عالَمٌ ليس من الافتراض أو الوهم التكنولوجي، كما يروّج الكُسالى والمتهرّبون من ضرائب الكتابة "وقطايعها"، بل هو عالمٌ من الكتابة، وشروط هذا العالم كلها موضوعةٌ على أُسس الكتابة، فيا أحباء رجائي إليكم دعوا العجرفة الجاهلة، وتعالوا إلى هذا المكان واذهبوا أيضاً إلى غيره، لمجرّد محاولة تحقيق شروط هذا العالَم،..

(الأفعال الخمسة)

(يفعلان... تفعلان).... (يفعلون... تفعلون) (تفعلين)
أمثلة:
(يذهبان... تذهبان) ... (يذهبون... تذهبون) (تذهبين)
أها ديل مالم؟
هذه الأفعال الخمسة (الصياغات) تُنصب وتُجزم بحذف حرف "النون"، وفي حالة الرفع تترك النون لتكون علامة الرفع،..
حروف النصب: (أن)، (لن)، (كي)، (إذن) (واو المعية)، (حتى)، (لام التعليل)، (فاء السببية) (لام الجحود)،..
حروف الجزم: (لم) ، (لمّا) ، (لا الناهية)، (لام الأمر)

أنا هنا تجاهلت عن عمد حروفاً أخرى، وعن الجوازم التي تجزم فعلين، نحن بصدد ماهو ضروري، وليس احترافي،...

طيّب خطأ قولك: حتى يمضون في هذا الاتجاه.... الصحيح: حتى يمضوا في هذا الاتجاه...
ولاحظ العطف أيضاً، هناك من يطبّق القاعدة مع فعل ويتجاهلها مع أفعال معطوفة عليه، ...
كأن يكتب: حتى يمضوا في هذا الاتجاه ويصلون إلى نتائج تشرّفهم ويفرحون بذلك،.. هذا خطأ إذا جاء ناصب وهو في مثالنا هذا (حتى) وتلته أفعل أخرى، إن شاء الله 100 فعل، كلها تنصب، عطفاً على الفعل الأول،...
الصحيح: حتى يمضوا في هذا الاتجاه ويصلوا إلى نتائج تشرّفهم ويفرحوا بذلك.

يقول حبيب لمن أعطته شاكوش: لن تتركيني لتمضين مع ذلك المغترب،.. خطأ..
الصواب أنّ لام التعليل تُوجب حذف النون، الصحيح: لن تتركيني لتمضي مع ذلك المغترب،..

الجزم:
ألم تذهبان إلى المدرسة بعد؟ وهذا سؤال ضال وغير صحيح،...
الصواب: ألم تذهبا إلى المدرسة بعد؟
أداة الجزم (لم) تحذف النون من آخر الأفعال الخمسة،..
لا تجادلين وكأنك الأعرف بالحقيقة،.. وهذا خطأ،..
الصواب أنّ (لا) الناهية تُوجب حذف النون،...
لا تُجادلي ولا تكذبي ولا تسرقي،.... إلخ


يبدو أنني نعست وسأعود لنفس النقطة لألوكها حتى يفتح الله بيني وبين من يتردون الكتابة واللغة في هذا المنبر، عفوكم

Post: #90
Title: Re: إصلاح الكتابة في المنبر
Author: Frankly
Date: 04-30-2005, 11:43 AM
Parent: #89

up

Post: #91
Title: Re: إصلاح الكتابة في المنبر
Author: اشرف السر
Date: 05-02-2005, 02:00 AM
Parent: #90

up

Post: #92
Title: Re: إصلاح الكتابة في المنبر
Author: محسن خالد
Date: 05-08-2005, 10:52 AM
Parent: #91

يا أخوانا (لا الناهية) دي بتأثّر على الفعل المضارع، بتجذو جذ،..
سواءً كان من الأفعال الـ5 أو إن لم يكن:

في القرآن، الفعل: يقفو....
تدخل لا الناهية،... لا تقفُ ما ليس لك به علم،... شايفين؟ جذت حرف العلة طوالي (الواو)، وكُتبت ضمة على آخر الفعل،..
يخبو............. لم يخبُ.... حرف الجزم (لم) أيضاً يُقصي حرف العلة (الواو)، وكُتبت ضمة على آخر الفعل،..

يرمي........... لم يرمِ............. .... حرف الجزم (لم) أيضاً يُقصي حرف العلة (الياء)، وكُتبت كسرة على آخر الفعل،..

يلقى..... لم يلقَ.................... حرف الجزم (لم) أيضاً يُقصي حرف العلة (الألف –طبعا الحرف دا كدا (ى) يعني "ألف" مش "ياء")، وكُتبت فتحة على آخر الفعل،..

أما الأفعال الخمسة، مع لا الناهية، فتحذف النون مع حالتي النصب والجزم،...
الصحيح: لا تكتبي على الجدار،.............. فخطأ إن تكتبها (تكتبين)
الصحيح: ألم تغفري............... أو.. ألم تغفرا....... أو... ألم تغفروا.......
فخطأ : تغفرين ... تغفران.... تغفرون... لأنّ (ألم) هي (لم) مع صيغة السؤال،..

طيّب (لام التعليل):
بمعني (لكي) يحدث كذا وكذا،...
هذه اللام، تنصب الفعل المضارع وتحذف (نون) الأفعال الخمسة، ولا تحذف أبداً حرف العلَّة،...
كيف؟
أنتظرك (لــــ)ـتقولَ لي كيف جئت،..
هنا تنصب الفعل المضارع (تقول)،..
طيّب نحن عارفين مع أدوات النصب مفروض نحذف نون الأفعال الخمسة،..
ولام التعليل من أدوات النصب، كما بيَّنا أعلاه،..
يجتهد التلاميذ ليكتبوا قصيدةً،.. لا يجوز أبداً قولنا (ليكتبون)، بل يكتبوا، بنون محذوفة،..
أمّا كونها (لا تؤثِّر) على الفعل المضارع بحذف (حرف العلّة) منه، فنفس المثال:
أنتظرك لتقول لي كيف جئت،.. هذا هو الصحيح،
الخطأ هو أن نتعامل معها كأنها لام أمر: فتصبح الجملة، أنتظرك لتقل لي الآن كذا وكذا،.. أي حذفنا (الواو العلي) في تقول، وهذا خطأ، هي لا تؤثِّر على العلّية،..

(لام الأمر):

تقوم هذه (اللام) بجزم الفعل المضارع، وبحذف نون الأفعال الخمسة، كما تحذف حرف العلة من الأفعال المعتلة،..
(يعني بتخرب خراب القرنتية في البرسيم)
وهي اللام بمعنى (افعل كذا) بصيغة الأمر،...

جزم الفعل المضارع:
لـــتقل لي كيف جئت، وهذه جملة أستاذ أو أب أو صاحب سلطة لآخر واقع به الأمر،..
الفعل تقول: مع لام الأمر لــتقل،.... حذفنا الواو
ومثلها،... لتنم الآن....... بدل تنوم

لتُعْطِني هذا الكتاب،.... بدل تعطيني..... نحذف الياء

بالنسبة لنون الأفعال الخمسة:
تأمر أمٌ ولدها الأكبر بخصوص إخوته الأصغر منه: ليمضوا معك إلى حيث تلعب،،..... مش يمضون،... نحذف النون
لو له أخوان: ليمضيا معك،.... مش يمضيان،..


لو أسرة متحررة شوية، سيأمرون بنتهم: لتمضي مع أصحابك،..

ولاحظ الأخيرة ليست (لتمضِ) لأنّ الياء الأخيرة هي (ياء المؤنّث المخاطب) ولذلك تبقى كما هي لأنو دي ما عندها علاقة بياء العلّة،..
فإن كان رجلاً نقول: امضِ مع رفاقك،.. (نحذف الياء، ونكسر الضاد)
اشترِ حلاوةً،.. (نحذف الياء، ونكسر الراء)
وإن كانت امرأة نقول:
امضي مع رفيقاتك
اشتري حلاوةً،

بالنسبة لحرف العلة ولام الأمر:
لتمضِ من هنا يا رجل،.. وليس: لتمضي من هنا يا رجل،.... هكذا ستفهم اللام هنا لام تعليل، وإلا فعليك حذف حرف العلّة،..

انتبهوا للامات دي ولحروف العلّة جيداً،...


...

Post: #93
Title: Re: إصلاح الكتابة في المنبر
Author: هاشم نوريت
Date: 05-08-2005, 10:56 AM
Parent: #92

التحية لاستاذنا محسن خالد

Post: #94
Title: Re: إصلاح الكتابة في المنبر
Author: محسن خالد
Date: 05-09-2005, 03:07 AM
Parent: #93

هاشم نوريت،..
وتحياتي لك يا عزيز، وسلامي ومعزتي،..
كنُ بخير أبداً وأزَلاً

Post: #95
Title: Re: إصلاح الكتابة في المنبر
Author: banadieha
Date: 05-09-2005, 03:20 AM
Parent: #94


كنت متابع البوست دا من قولة تيت يامحسن ومفنجل عيوني منتظركم تحلوا لينا مشكلة تعريف حرف غير بإضافة الف لام التعريف، مثل قولهم: الغير سودانيين..وغير حرف والف لام التعريف يجب أن تلحق بالاسم والمصدر ولكن مش بالحرف..لتكتب: غير السودانيين..صحي؟



Post: #96
Title: Re: إصلاح الكتابة في المنبر
Author: ودقاسم
Date: 05-09-2005, 03:24 AM
Parent: #1

كتبت هذا ، فرموني بالعنصرية ،،،
فيروس يضرب المنبر الحر

Post: #97
Title: Re: إصلاح الكتابة في المنبر
Author: محسن خالد
Date: 05-09-2005, 04:06 AM
Parent: #96

banadieha،...
تحياتي يا رجل ومحبتي،..
هذا صحيح، فالحرف (غير) بالإضافة لـ(إلا) و(دون) هي روابط للاستثناء، حروف استثناء بالتعريف القديم، فلا يجوز تعريفها،...
هو بالفعل خطأ شائع ما أوردته -الغير سودانيين، والغير محرمين،...
وأيضاً الحركة نفسها مع (بعض)،...
فخطأ قولنا: مع بعضهم البعض، الصحيح أن (بعض) لا يدخل إليها التعريف،..
مع بعضهم بعض،..
خطأ: البعض منهم قال،........... الصواب: بعضهم قال،..
وصحيح أنّ التعريف يتم لبابي المصدر والاسم دون (الحروف)،..
وفي ما ندر يدخل التعريف على (الفعل)، وإن كانت هذه القاعدة معتمدة في كل عاميات البلدان العربية،..
البت دي أنا الرَّسلتها للدكان،... سوداني،..
نحن الريايل اللنيب الأغراض هاي،... خليجي
دا اللجبتها يا بيه،......... مصري،..
مو أنا اللّبعتها يا زلمة،........... شامي
أما الفصيح فمثل قول الفرزدق: ما أنت بالحكم الترضى حكومته،..
هذا رأي فقهاء اللغة، ولمحسن خالد آراء أخرى،...

ودقاسم،...
التحايا،..
رجعت للمادة وهي دعوة جيّدة في تقديري، للّغة، وليس للعروبة، لأننا بأي حال نتحدّث العربية، قراءة التاريخ والأصول والإثنيات ليس بوسعها حل المسألة، يتبقى حاصل أنّ الذي يتحدث العربية ويكتب بها عليه أن يتحدثها ويكتبها كما هو صحيح،..
وهناك من يعتقد بأنَّ الكتابة مزحة، وهذا شيء يؤلمني على نحو خاص، الذي يريد أن يكتب عليه أن يتعلم الكتابة، فنحن ولدنا بسوء الكتابة نفسه، ولكنا اجتهدنا وأدّبنا أنفسنا لنبدّله،..
وكُن بخير،..

Post: #98
Title: Re: إصلاح الكتابة في المنبر
Author: banadieha
Date: 05-09-2005, 08:06 AM
Parent: #97

Quote: فخطأ قولنا: مع بعضهم البعض، الصحيح أن (بعض) لا يدخل إليها التعريف،..
مع بعضهم بعض،..
خطأ: البعض منهم قال،........... الصواب: بعضهم قال،..




مشكور يامحسن على النقطة دي بالذات وتستأهل عليها دن شربوت نقي ودافئ فقد ظللت أكتبها العمر كله أتوماتيكيا وكتبتها آخر مرة هنا وللمرة الأخيرة إن شاء الله في ترجمة موضوع السودانيين المحبوسين في بغداد..ربنا يفك أسرهم

Post: #99
Title: Re: إصلاح الكتابة في المنبر
Author: محسن خالد
Date: 05-09-2005, 08:33 AM
Parent: #98

Banadieha،..
مشكور يا عزيز،..
لكن... وبيناتنا، المحل دا هنا محل آبري وتمر، جنس زرّيعتك تربيع دي، حد الشربوت، شيلها وأسبقني بيها علي تيموليلت، هسي بجي، فوق دربك،..

Post: #100
Title: Re: إصلاح الكتابة في المنبر
Author: محسن خالد
Date: 05-10-2005, 06:15 AM
Parent: #99

يا شباب أنا أخدت لي خفسة في البورد دا اليوم، لقيت واحد دون شك تاوق هنا، في لا الناهية،..
ولمّ في الأفعال المضارعة التي كتبها جذَّاً، كررها مع كم فعل، ما جعلني أتيقّن بأن هذا الشخص يقصد لا الناهية، لكن الخطأ الذي وقع فيه، أن (لا) التي قصدناها هي (الناهية) و(لا) التي أجرى عليها تطبيقاته للأسف كانت (النافية)،..
لا النافية تنفي، ولا تنهى،.. لا حظ أنني في جملتي هذه نفسها،
كتبت: لا النافية تنفي، ولا تنهى،... أي أنني لم أقم بجذ حرف العلّة في (تنهى)،..
أما لو كانت الناهية، لكان الأمر هكذا: لا تنهَ عن خلقٍ وتأتي مثله،...

(لا) النافية للجنس، قاعدتها هي، الاسم الذي يليها "اسمها" يُبنى على الفتح، لاحظ يبنى، وليس يفتح فحسب، يعني لا إعراب له سوى البناء على الفتح، يعني حركة الفتح ثابتة معاهو وين ما طار ولي ديمة،..
أما الاسم التالي لاسمها فيكون صفة منصوبة، إلى الأبد،..
لا أحدَ حاضراً،..
لا أحدَ مهتماً بهذا البوست،..
لا رجلَ مغموطاً حقه،..

Post: #101
Title: Re: إصلاح الكتابة في المنبر
Author: Shinteer
Date: 05-10-2005, 06:52 AM
Parent: #100

سلام عليك يا زول يا نجيض. نعلّك بيخير آ ضراعي.

البوست ده يجب تخليده .. علّه يزيل بعض العلل، أو ما وصفه ود قاسم قبلاً بالفيروسات أو شيئ من ذلك.

أها أنا سادر. ودعتك الله

Post: #102
Title: Re: إصلاح الكتابة في المنبر
Author: محسن خالد
Date: 05-10-2005, 07:51 AM
Parent: #101

شنتير،..
لعلّك عافية آزول، والله متقريف لك بالحيل خلاص، إلا إيميلك طاشي مني، وكل يوم أقول أنتلك إيميل ببتاع البورد دا، أشوف الزول دا حي وألا ميّت، وما أخبرلو، إلا أعمل ربلاي وبس، دحين آخوي هسي رأسي تقل خلاص، وبقيت زول نوم، لكن من الليلة لا بُكرة، راجي منك كلام خاص علي إيميلي،..

Post: #103
Title: Re: إصلاح الكتابة في المنبر
Author: محسن خالد
Date: 05-11-2005, 02:02 AM
Parent: #102

هناك كتابة قديمة، بعد تمحيص فيها من أساتذة اللغة، ولكي تتزن الكتابة في مناطق ثانية ومع حركات أخرى قاموا بتعديلها، أمثلة:
قديم: قرأوا................. حديث: قرؤوا
قديم: بدأوا.......................حديث: بدؤوا
قديم: شئون..................... حديث: شؤون
مسئولية: مسؤولية، ......... مسئول... مسؤول

لطيفة أخرى:
الاسم الذي يلي (لولا) دائماً يكون مرفوعاً،..
لولا الماءُ لهلكت
لولا الولدان،........ لاحظ ما تقع في المقلب، المثنى يُرفع بالألف
لولا المقاتلون.............. جمع المذكر السالم يُرفع بالواو،...

وهناك القول الجميل لجرير،...
لولا الحياءُ لهاجني استعبارُ........... ولزرتُ قبرَكِ والحبيبُ يُزارُ
وَلَّهتِ قلبي إذ علتني كِبْرَةٌ........... وذو التمائم من بنيك صِغارُ

وهناك القول القبيح، من إعلام الكيزان:
والله لولا اللهِ ما اهتدينا، وهذا تحريف جاهل لقول ابن رواحة،..
يا كيزان يا بتاعين العروبة والإسلام، الاسم الذي يلي (لولا) يكون مرفوعاً،..
والله لولا اللهُ ما اهتدينا،.. اسم الجلالة الأوّل بالكسر لواو القسم، والتاني بالرفع لأنّه تالٍ لولا،..

Post: #104
Title: Re: إصلاح الكتابة في المنبر
Author: بدري الياس
Date: 05-11-2005, 11:24 AM
Parent: #103

غبت عن هذا المكان طويلاً يا صديقي يا محسن
ولكن وجدت أن علي أن أعبر من هنا لأقول لك ان ما تقوم به هنا كبير ، كله كبير ويشبهك
"خالص" فأنت كما أعرف تحترم ما تفعل.
وأقول لك: كثيرون يمرون من هنا ، وللأسف كثيرون منهم لا يسرهم الذي تقوم به. وأنت تعرفهم ؟
فهم لا يودون الاعتراف بأن:

Quote: هذا المكان هو عالَمٌ ليس من الافتراض أو الوهم التكنولوجي، كما يروّج الكُسالى والمتهرّبون من ضرائب الكتابة "وقطايعها"، بل هو عالمٌ من الكتابة، وشروط هذا العالم كلها موضوعةٌ على أُسس الكتابة



محبتي وتقديري ،،،

Post: #105
Title: Re: إصلاح الكتابة في المنبر
Author: محسن خالد
Date: 05-12-2005, 06:10 PM
Parent: #104

تحياتي يا ود الياس،..
لك امتناني، والمحبَّة،..
الزعل أكتر من موضوع الهمزات، مرّات الواحد يفكّر يعمل كوبي من اللطيفة بتاعتها ويمشي يلصّقها في أي بوست، يقوموا الصباح يجوا يلقوا درس الهمزات
دا في أي مكان كان يريحونا من الموضوع دا، وهو موضع جد بسيط، ما دايرلو عبقرية ولا طولة بال،..




طيّب للاختصار:
البادئة (است) لو لقيتها في أي محل، الكلمة أو الفعل ما بياخد همزة، إنما ألف (حاف)،..
استفهمت من الأستاذ،...... مش الخطأ (إستفهمت)
استلفت قروشاً من صديقي،.... مش الخطأ (إستلفت)
الاستقطاب،...
الاستمالة،...
الاستحضار،..

Post: #106
Title: Re: إصلاح الكتابة في المنبر
Author: محسن خالد
Date: 05-15-2005, 02:00 AM
Parent: #105

هنا صيغٌ، متى حضرت وجب علينا أن ننصب ما بعدها، مباشرة،..

1- بوصف + الضمير (الموجّه للكلام)............. لتصبح: بوصفي، بوصفها، بوصفه، بوصفهم، بوصفهن،.. إلخ،..
حيّيتُه بوصفه رجلاً فاضلاً................ بوصفها إمرأةً فاضلةً
ألقى عليهم خطاباً بوصفهم مرشّحين للتأهل (مرشحين) وليس (مرشحون)،..


2- باعتبار + الضمير (الموجّه للكلام)................. لتصبح: باعتباري، باعتبارها، باعتباره، باعتبارهم، باعتبارهن،.. إلخ،..
تناولتُه باعتباره كتاباً مهماً
ناقشتهم باعتبارهم المسؤولين عن القضية

3- (بكون + الضمير) وأيضاً (لكون + الضمير) (الموجّه للكلام)................ لتصبح: بكوني، بكونها، بكونه، بكونهم، بكونهن،.. إلخ،..

اعتذرتُ له لكونه رجلاً يستحق
أقنعتني بكونها مطلعةً على الأمر


والقاعدة الضابطة لما أسلفناه هي:
كلما يضاف الفاعل إلى المصدر يأتي الذي بعده منصوباً، مع فعل متعدٍّ تحديداً،...
شرب الطفلُ الشاي، شُرْبِه الماءَ
قاتل الفارس الأعداء، قتالِه الأعداءَ
(وعشان ما تجوط رأسك أحفظ الـ3 الفوق ديك (باعتباره، بوصفه، بكونه) وتكون ما قصّرت، لأنهن بتكررن كتير، ومستخدمات أكتر،..

(ويا تماضر وجنّي ما تضحكوا، أوعَ)

Post: #108
Title: Re: إصلاح الكتابة في المنبر
Author: banadieha
Date: 05-15-2005, 02:25 AM
Parent: #106


عودة ياسي محسن لموضوع لا النافية..وقد شدني الإستعمال غير الدارج لها لها مع ال التعريف في هذا المقال للكاتب أحمد المديني:


http://www.aawsat.com/details.asp?section=28&issue=9662&article=298761


Quote: ثم يقفون ضاحكين ومزهوين أمام فعلتهم الشنيعة ظانين أنهم خدموا البشريةـ أما الإنسانية فشأن آخر ـ بهذا اللا يوصف

المألوف أن نقول مقابل (بهذا اللا يوصف): بهذا الذي لا يوصف.

Quote: هو ذا الوعي الكلي لا يمكن لأي غرّ أو دعيّ أو طري العود من ناحية التجربة، وضمنها العمر بلا شك، أن يتوفر عليه ويشتمل على مزاياه اللا تحصى


المألوف أن نقول مقابل (مزاياه اللا تحصى): مزاياه التي لا تحصى.

ولاحظ أن لا النافية المعرفة ب ال هي مفردة مستقلة عن الفعل المضارع الذي يليها وليست مقترنة بها بل بينهما مسافة كما هو بين أي كلمتين. عموما المقال به الكثير من نماذج هذه الإستعمالات.

وحقيقة أنا دخلت البوست عشان أتكلم عن استخدام الذي والتي (من اسماء الوصل؟) ولكن لا النافية طيرتها في رأسي وطشت مني الأمثلة..معليش خليها يوم تاني.


Post: #336
Title: Re: إصلاح الكتابة في المنبر
Author: نادية عثمان
Date: 12-25-2005, 11:43 AM
Parent: #98

شكرا استاذ محسن جدا

وقد تعلمت ان شاء الله ان للهميزة فعل السحر فى نطق الكلمة !!


احيانا لااعرف اين اضع الهميزة .. والان فى طريقى نحو المعرفة فلك جزيل الشكر ..

Post: #107
Title: Re: إصلاح الكتابة في المنبر
Author: محمد السر
Date: 05-15-2005, 02:08 AM
Parent: #1

يا أستاذي
حصصك دي بقت صعبة وعايزة ليها درس عصر

Post: #109
Title: Re: إصلاح الكتابة في المنبر
Author: محسن خالد
Date: 05-16-2005, 01:29 AM
Parent: #107

banadieha،..
العزيز لك المحبة، والسلام لك، وجيب أسماء الموصول القلتها وتعال، لي زمن بأذِّن في مالطا، مافي أي زول جاب كورتو وألا قدحو وجاني تب،..
(اللا).... الصيغة دي مستحدثة، وأوَّل ما ظهرت في الستينات، حينما كتبها مترجم كتاب (اللامنتمي) لكولن ويلسون، وأنا مبسوط منها وشايفها حركة حريفة منو،..
اللا يحصى، واللا يوصف،.. هي غير موجودة، وركيكة بدون شك، لأنّ (حس) الفعل بعد نفيه يصبح غريباً وبدون معنى،..
هو اجتهاد مش حلو منو، واضح إنو عارف قصة اللامنتمي دي، وداير يبتكر أكتر، خلينا نقطع فيهو شوية،..
ويضحك صباحك يا أمير،..

محمد السر،..
إزيك يا صاحبي،..
شوف لو بعد دا داير درس عصر، إنت كان كدي ما داير القراية ساي،..
وأبقه طيّب ومتعافي،.

Post: #110
Title: Re: إصلاح الكتابة في المنبر
Author: banadieha
Date: 05-16-2005, 02:15 AM
Parent: #109



شكرا ياسي محسن وربنا يحفظك..وبرضو لسه ما لقيت الورقة الكتبت فيها الأمثلة العويصة وما قادر اتذكرهم. ولكن هاك المثالين ديل كقولة خير:

هذا هو الرجل التي تبيع بنته الورد.
هذا هو الرجل الذي تبيع بنته الورد.

الثاني متعودين عليه وما فيه مشكلة لكن الأولاني فهو الذي يصادفنا اليومين ديل وما بتبلع بسهولة رغم أنو المعنى واصل.





Post: #111
Title: Re: إصلاح الكتابة في المنبر
Author: إيمان أحمد
Date: 05-16-2005, 11:28 PM
Parent: #109

Dear Muhsin Khalid
.Thanks for this post. I am getting to learn and refresh my Arabic
I used to have a "love-hate" relationship with Arabic grammar, and still remember those books from Egypt, one with an orange cover, one blue and the other probably green.

.Now this is a nice and smooth way to present the subject
Regards
Iman

Post: #112
Title: Re: إصلاح الكتابة في المنبر
Author: محسن خالد
Date: 05-18-2005, 00:52 AM
Parent: #111

banadieha،..
تحياتي، وربنا يحفظك كمان يا سيدي،..
مثلك لاحظت الكثير من نوع هاتين العبارتين،..
لو الواحد بخلي بالو في الضمير أكتر من الفاعل ما بقع في خطأ زي دا،..
وأبقه طيّب، ولك المحبة،..


إيمان أحمد،..
تحياتي يا سيدتي، وسلام
طبعاً الكتابين المصريين ديل بالذات، ياهن الخربن العربي السوداني، معروف أنّ الكتابة المصرية أردأ الكتابات العربية، وأنا منحازٌ كبير لكتابة بلاد الشام، لأنّها عندها ذوق وفي نفس الوكت مدروسة،..
أرجو أن تعملي (رفريش منت) كويس من خلال هذا البوست، وأن يمنحك شيئاً،..
وكوني بعافية وأمن،..

Post: #113
Title: Re: إصلاح الكتابة في المنبر
Author: محسن خالد
Date: 05-19-2005, 01:20 AM
Parent: #112

الإنسان في المكان أعمى عنه، الإنسان مع الإنسان وبينهما سوء التفاهم،..
المحبّة قاطرة البلاد كلها، الصلات كلها،..

Post: #114
Title: Re: إصلاح الكتابة في المنبر
Author: محمد السر
Date: 05-19-2005, 02:09 AM
Parent: #1

يا أستاذي عساك طيب
أنا لما قلت عاوز درس عصر ما قصدت شرحك ما واضح بالعكس شرحك يفهِّم صاحب أنكر الأصوات، لكن الحصل أنا غبت فترة من البوست دا عشان كدا فاتتني حاجات كتيرة عشان أحصلها محتاج درس عصر (على شرط يكون مختلط)
لك محبتي

Post: #115
Title: Re: إصلاح الكتابة في المنبر
Author: محسن خالد
Date: 05-21-2005, 03:00 AM
Parent: #114

محمد السر،..
إزيَّك يا صاحبي، خابر كلامك أنا بكاوي فيك، خلي أضانك خفيفة،..
يلا بالسلامة

Post: #116
Title: Re: إصلاح الكتابة في المنبر
Author: محسن خالد
Date: 06-11-2005, 05:55 AM
Parent: #115

يا أخوانا صَعِد على الطاولة............... مش صَعَد....

بالعامية نقول، كمان جا معاهو ود عمّتو................ (كمان) هي تطفيف لتركيبة ( كما أنّ)............... كما أنّ ابن عمّته جاء معه

Post: #117
Title: Re: إصلاح الكتابة في المنبر
Author: محسن خالد
Date: 06-28-2005, 02:37 AM
Parent: #116

البدل.. وعلاقته بأسماء الإشارة

1- إذا جاء اسم الإشارة قبل (نكرة) يكون الإعراب على أنَّه (خبر) و(مبتدأ)،..

هذه بنتٌ
هذا رجلٌ

2- إذن كيف هو "البدل"؟
البدل يكون إذا جاء اسم الإشارة قبل "اسم معرفة"، يعني فيهو "ألف ولام"، مش زي "بنت" و"رجل"،..

قابلتُ هذا الرجلَ،...
قابلتُ هذه البنتَ،..

قابل فعل ماضٍ مبنيٌّ على الفتح لا محل له من الإعراب، وتاء المتكلم في محل رفع فاعل، الهاء للتنبيه وذا اسم إشارة مبنيٌّ على السكون في محل نصب مفعول به و"الرجل" بدل،..


3- وإذا كانت الجملة بالعكس تصبح توكيداً،..
بمعنى إذا جاء اسم الإشارة بعد الاسم "بعد الكلمة المعرفة"،..

قابلتُ الرجل َ هذا،..
قابلتُ البنتَ هذه،..

وبذلك يُعرب اسم الإشارة توكيداً لما سبقه،..
إذن يتبعه في أخذ حركة إعرابه،..

لا تكن مثل هذا الغافلِ
تفلسف علينا هذا الغافلُ
سئمتُ هذا الغافلَ



مختصر القاعدة هو كالآتي:
البدل.... اسم معرفة يأتي بعد اسم الإشارة،..
لا تسخر من هذا الضعيف

التوكيد... "معربٌ" أي يأخذ حركته بموقعه في الجملة، وهو يأتي في آخر الجملة،..
لا تسخر من الضعيفِ هذا،..


إضاءات:
المنتزهات خطأ شائع،..
الصواب المتنزّهات،..

نقول بالعامية "رزَّة" الباب،... وهي فصيحة مئة بالمئة،..
يقال دخلوا الإسلام عن بَكْرَة أبيهم،..
والصواب، دخلوا الإسلام على بَكْرَة أبيهم،..


الحويَّة، بتاعة الإبل لأجل الركوب عليها، فصيحة مئة بالمئة،..

يا عازة الفراق بي طال، وسال سال مني الدمع وشّال،..
وَشَلَ، وشْلاً، ووَشلاناً الماءُ، أي سالَ وقَطَر،..
والوشل جمع أوشال، القليل من الدمع، أو الماء القليل يتحلّب من صخر أو جبل،..

Post: #118
Title: Re: إصلاح الكتابة في المنبر
Author: Shinteer
Date: 06-28-2005, 09:03 PM
Parent: #117

العندو بليلة بِعاشي بيها. أها

1- البدل يتبع المُبدَل منه في حركات إعرابه. يعني دلدول تابع.
2- العطف (عطف النسق وعطف البيان) يتبع المعطوف في كل حركاته. دلدول آخر.
3- النعت أيضاً يتبع المنعوت محل ما قبّل. يعني شرْحو.
4- والتوكيد (اللفظي والمعنوي) تابع للمؤكَّد قياماً وقعوداً. وده آخر طرطور.

وتعرف هذه الطراطير بالتوابع الأربعة.

محسن ياخي عليك الله أغشى معاك الاستثناء .. لأنه عامل دشمان عجيب في بعض المحافل.

Post: #119
Title: Re: إصلاح الكتابة في المنبر
Author: محسن خالد
Date: 07-01-2005, 04:52 AM
Parent: #118

يا شنتير،..
إت يا زول ما تجدع سرجك وتنهر معاي، البليلة دي دفقها كلها هنا، وخلينا نغرف،..
بعدين وعد مني ليك، نقوم بمباصرة الاستثناء،..
عمَّا قريب... فارتقب إنا مرتقبون،..

Post: #120
Title: Re: إصلاح الكتابة في المنبر
Author: محسن خالد
Date: 07-10-2005, 05:40 AM
Parent: #119

كلمة (الرزيلة) تُكتب هكذا (الرذيلة)،..

كلمة (المرزول) تكتب هكذا (المرذول)،..


شايف بعض منابر الحوار بتكتب: اعتبر كل المواضيع قرأت

هسي الجملة ماشه علي وين،..

من الذي يعتبر؟ الزول وألا الكمبيوتر؟
ومن قرأ؟ الزول وألا الكمبيوتر؟

بقترح إنها تُكتب: اعتبر المواضيع كلها قُرئت،..
ويبقى المخاطب الكمبيوتر، مش اللاأحد، لأنو هو البعمل التظليل بالأحمر مش الزول،..

Post: #121
Title: Re: إصلاح الكتابة في المنبر
Author: هاشم نوريت
Date: 07-10-2005, 05:54 AM
Parent: #120

استاذنا محسن خالد
دبايوا
قلت اسلم عليك ومتابع بس قراية الكبر باقى ليك تنفع؟
كدى شوية تحدثنا عن تصريف الاسماء ناس /عمر/عثمان/بعلبك/وابن عوف
ناس حلتنا دول ياريت توسع وكما تكون الامثلة تشمل كل الانواع.
ولك كل التقدير..

Post: #122
Title: Re: إصلاح الكتابة في المنبر
Author: محسن خالد
Date: 07-10-2005, 06:05 AM
Parent: #121

هاشم نوريت،..
تحياتي يا رجل،..
المحبة واتوحشناك آسيدي،..
هسع إنت مديني إحساس إنك زول في بداية التلاتينات، ما تعمل لي فيها عجوز وتأكلني كبر،..
ما فهمت سؤالك بالضبط،..
بأي حال هنا في قاعدة عنصرية، وبتجيبلينا ناس الجندرية والجندريات،..
لأنو العلم المذكَّر في (العموم) يُصرف، إلا ما اشتبك مع قواعد مانعة -أخرى- مانعة للصرف،..
عثمان هذه مثلاً: تشتبك مع قاعدة (فعلان) مثل ظمآن وعطشان، كما تعلم،..
بينما العلم المؤنّث لا يُصرف،..
في مدخل (قاموس) المنجد بتلقى تبسيط وشرح جميل للقاعدة، الخاصة بالممنوع من الصرف للعلمية والتأنيث،..
إن بقينا حيين ناوين علي مداقشة الكثير بعون الأصدقاء هنا،..
وخليك عافية وطيّب،..

Post: #123
Title: Re: إصلاح الكتابة في المنبر
Author: محمد السر
Date: 07-10-2005, 08:50 PM
Parent: #1

أستاذي وزملائي الدارسين... سلام
بروفيسور/ عبد الله الطيب –طيِّب الله ثراه- في شرح:
وثدياً مِثلَ حُقِّ العاجِ رخصاً ***** حصاناً من أكفِّ اللامسنا
قال: دي قراية غلط لأن حق العاج صلِب ما رخص، الصاح نقراها كدا:
وثدياً مِثلَ حُقِّ العاجِ... هنا تقيف شوية حتين بعد داك تقول: رخصاً *****حصاناً من أكفِّ اللامسنا.
الوقفة شوية دي أكيد عندها حركة تتكتب زي: الـ "،" أو الـ " ..." أو الـ ".." أو الـ "." أو الـ " ،.." أو "–فصلتي الاعتراض-"أو الـ "!!!" أو الـ " !؟. " إلخ.
أها يا أستاذي... عاوز أعرف كيفية استعمال الحاجات دي، خصوصاً في الشعر.

Post: #124
Title: Re: إصلاح الكتابة في المنبر
Author: محسن خالد
Date: 07-11-2005, 01:39 AM
Parent: #123

وثدياً مثل حُقِّ العاج رَخصاً ... حَصَاناً من أكفِّ اللامسينا

حق العاج، صلبٌ... هذا صحيح، ولذلك هو طارَد المعنى بمحاولته "لَزق" معنى جديد، وإضافته،... ما جَعَلَ الفقهاء يقولون بأنّ تشبيهه ركيك، وأنّ القرآن كان أبلغ منه، حين قال: "كأنَّهن بيضٌ مكنون"،..
البيض المغلي، لامن يغلوه في موية على النار ويقشّروه، شوفتو ببقه تكتكوني كيف يا ود السر، أها العَضَّة بتاعة الجنة لادنة زي دا، وفرنيب،..
إذن يصبح كلام عبد الله الطيّب، غير منطقي، لأنو اللازمة الصامتة ما بتفك البيت برضو من الركاكة، فالشاعر بالأصل أراد من "حق العاج" التكوير، ولكن عليه غسل المعنى جيداً، وإلا لقصّر عن وظيفة الشاعر، فالشاعر مهمته البلاغة الناجزة، وأن يقول لك كلاماً ما تقدر تقول بعدو بِغِم، وبدون لصّيق،..
إلا عجبني الـ ومعها علامة بيانية زي ما بقول فردة،..
الكلام دا دايرلو مجابدة طويلة،..
وأخوك هسع، غير انشطاف الروح متابَق بالزهج والكتابة دايرة الروقة،..
بس قلت أرد عليك، لأني شايفك مسجّل حضور،..

Post: #125
Title: Re: إصلاح الكتابة في المنبر
Author: nashaat elemam
Date: 07-11-2005, 01:51 AM
Parent: #1

محسن الحبيب الأديب الأريب
أمتعتنا بحكاك.. وهسه بادبك.. يازول يا كون... واصل.. كلو منك زيك.. راقي وجميل

Post: #126
Title: Re: إصلاح الكتابة في المنبر
Author: محسن خالد
Date: 07-11-2005, 02:11 AM
Parent: #125

nashaat elemam،..
أهلا أهلا، والحب وراك وقدامك،..
إنت عارف أي زول بكتب معاي هنا، بديني إحساس ما، ما شرط يكون صاح وألا غلط، "توما" قلت ليها إنت "بنيتي"، أها يا نشأت دائماً بتديني إحساس ولدي الوسطاني،..
ما تقول لي ليه ولدك وليه الوسطاني، ما عارف،..
مجرد صور بلتقطها اللاوعي من وين؟ الله أعلم،..
بناء على ماذا! برضو مجهول،..
يلا خليك طيّب،..

Post: #127
Title: Re: إصلاح الكتابة في المنبر
Author: nashaat elemam
Date: 07-11-2005, 02:26 AM
Parent: #1

كويس انك ابعدت عني شبهة عوارة البكر.. وعجن السغيروني..
انا ما كبرتك للحد ده.. يعني ممكن تقول اخوي الصاحبي.. فرق بين اخوك ساي
واخوك صاحبك.. وشكراً لجميل شعورك
يلا واصل.. ما نلخمك بالصلات الاجتماعية دي.. وبعد ما تورينا كيف نصلح
كتابتنا.. ورينا كيف نصلح افكارنا ذاتا.. وانت كروائي حنعتبرك استاذنا
وحنجيب كراساتنا تصححا لينا.. ونعذبك في الفسحة البين الحصص
وحنجي درس العصر بتاع زمان.. المجاني الما بقروش
وانت ما حتبخل علينا.. انا اكيد من كده

Post: #128
Title: Re: إصلاح الكتابة في المنبر
Author: محسن خالد
Date: 07-11-2005, 08:58 AM
Parent: #127

nashaat elemam،...
نشأت في الدرب، يا رجل،..
نمشي ونمشي نحو بلاد، محبة وصداقات وحبيبات، هكذا هي سيرة الطريق إذن،...

Post: #131
Title: Re: إصلاح الكتابة في المنبر
Author: محسن خالد
Date: 07-14-2005, 01:47 PM
Parent: #128

ABUZEEGH،...
هناك أخطاء كثيرة يمكن أن أساهم معك في إيضاحها. ولكن ماذا عن علامات الترقيم؟



ABUZEEGH،...

سلامي يا رجل، وتحياتي،..
هلم إذن لإعانتنا في رصد الأخطاء،..
العلامات أنا سأتكفَّل بها، سأقول ما هو متعارف عليه، وأيضاً شطحاتي حول ذلك،..

Post: #132
Title: Re: إصلاح الكتابة في المنبر
Author: هاشم نوريت
Date: 07-14-2005, 03:34 PM
Parent: #131

استاذنا محسن
دبايوا
ارجو ان تحدثنا عن المفعول /له/معه
وعن /لا التى تقوم بعمل /ان واخواتها
لانك حدثتنا عن لا الناهية ولا النافية.
متعك الله بالصحة والعافية.

Post: #133
Title: Re: إصلاح الكتابة في المنبر
Author: هاشم نوريت
Date: 07-14-2005, 03:37 PM
Parent: #132

ياريت عنوانك الالكترونى.
وان كنت لا تريد كتابته فهذا عنوانى.
[email protected]

Post: #134
Title: Re: إصلاح الكتابة في المنبر
Author: محسن خالد
Date: 07-15-2005, 03:14 AM
Parent: #133

هاشم نوريت،...
المحبة والسلام، والود،..
ياخي إنت وشنتير وبناديها، وباقي الشباب، أنا ذاتي داير ألفح لي منكم عِلِم علمين،..
جيبوا إنتو الحاجات دي وأرموها هنا وخلونا نتشارك فيها، أنا براي ما بكفي الفضاءات دي كلها، "شولبوا معانا شوية"،..
وما يهمك، لو بقى في العمر نصيب، وحَبَّة انطلاقة، بنزوع علي المواضيع دي كلها،..
وتحياتي،..

أنا بعثت ليك رسالة علي بريدك وجات راجعة،.

[email protected]

Post: #135
Title: Re: إصلاح الكتابة في المنبر
Author: Hussein Mallasi
Date: 07-16-2005, 08:05 AM
Parent: #134

سلامات يا محسن؛

كنت اظن ان إذاً تكتب هكذا؛
حتى قرأت بوستك الاخير:

هي الحرب إذن؟ فخذوا..................

فاختلط عليّ الامر!

Post: #136
Title: Re: إصلاح الكتابة في المنبر
Author: محسن خالد
Date: 07-16-2005, 08:25 AM
Parent: #135

حسين ملاسي،..
تحياتي وسلام وافر، وشكراً لقدومك،..
ولو للمزحة كدا، بقوليك تمنيناك أبكر، وهسي جاي تعتقلني عند خطأ وألا شنو؟..
ويضحك مساك،..
إذن: حرف مكافأة وجواب،.. هذا هو (إعرابها) أو تعريفها،..
وهي تنصب الفعل المضارع إذا تقدّمته: إذن تنجح،.
وإليك قاعدة كتابتها:
إذا وقفت على إذن تُكتب هكذا: (إذاً).... كما تقول عمراً وزيداً،..
وإن وسطّتها (كما فعل محسن خالد) وكان ما بعدها معتمداً على ما قبلها، تُكتب هكذا: إذن،..
فلا تثريب عليك،..
ولك منا المحبة يا رجل،..

Post: #137
Title: Re: إصلاح الكتابة في المنبر
Author: Hussein Mallasi
Date: 07-16-2005, 08:47 AM
Parent: #136

سلامات يا محسن؛

إذن فقد ضاع مني ما ظننته صيداً ثميناً.


Post: #138
Title: Re: إصلاح الكتابة في المنبر
Author: محسن خالد
Date: 07-17-2005, 05:01 AM
Parent: #137

يا ود ملاسي سلام وتحية،...
وما بيناتنا والله،...
إنت بس كَرِّب شباكك للمرة الجاية، البحر قاعد، قبض الحوت الكبار داير التعب،...
لكن أعمل حسابك، البحر دا كان قام زعل منك وتلَّب ليك جُوَّة المركب بتاعتك –بوستاتك، بتبقه في "سيك" زي ما بقول ود السر،..
وكلامي دا للضحك، بس أنا ما بعرف ألصِّق الوشوش الضاحكة دي، بصارتي ومروَّتي في الكمبيوتر قليلة، لكن ناس (إذن، وإذ، وبز) ديل، طابقلهن الحبال ورابطن زي السخيلات في راكوبتي،..

Post: #139
Title: Re: إصلاح الكتابة في المنبر
Author: عبد الله إبراهيم الطاهر
Date: 07-18-2005, 02:03 AM
Parent: #1

العزيز المحسن خالد
لك من الود أجمله ...
عذراً للغياب والمشغوليات التي (هدت حيلي) ....
كيفك وعساك بالخيرات آزول ...
لقد سعدت للغاية وأنا أقرأ إصلاح الكتابة ... و(عدل المشي في شارع الكلام) في زمن أصبحت فيه الأشياء مترهل بفعل الغياب التام للوعي ... بكل شئ ...
أكتب يا سيدي ولا (تشغل بالك .... ولا تبقالك مشغولية) من كل الحاصل والبحصل كل صباح ....
في يوم بجي بعرفوا فيهو محسن خالد وبعرفوا الشي البسوي فيهو شنو عشانم وزي ما قلته (قاعد أشيل عيونن ديل وأجدعن ليهم في ياتو شوك لا بد منو، الكحل البسمّح جد جد حاااار) ...
والشوف من زاوية واحدة زي ما بيسووا الجماعة ديل (عبث طفولي) زي ما بيقول عثمان صالح ..
(إصلاح الكتابة) منهج متقدم لتفكيك العقلية المتحجرة والخروج من وهم المعرفة والعنجهية العروبية التي تسيطر على عقول البعض .. هو تصحيح لمسار كان من المفترض أن يكون قبل هذا ....
سأعود لاحقاً
ويبقى لك مني الود
و ... معاي ومعاي
مصوبر بي لقاك والشوق ...

Post: #140
Title: Re: إصلاح الكتابة في المنبر
Author: محمد السر
Date: 07-20-2005, 12:20 PM
Parent: #1

زملائي الأساتذة والطلبة
دخلت الفصل وما لقيت زول... الظاهر الليلة إجازة!!!
المهم يا أستاذ لما تجي من الإجازة أشرح لي الكلمة العامية الحا أكتبا ليك في السبورة دي:

يِتْكايتْ!!!
عندي بيها شغلة صغيرة كدة
ولي قدام لو لقينا فرصة بنعمل بوست زي دا ونسميهو
"شروح العامية لصاحب السحاقية"
عبد المحسن بن خالد المسيكتابي
معليش اليومين دي أنا مشغول شوية
أها علقوك فوق الشجرة ولاَّ لسة
أبقى Cool

Post: #141
Title: Re: إصلاح الكتابة في المنبر
Author: هاشم نوريت
Date: 07-20-2005, 12:57 PM
Parent: #140

استاذنا محسن خالد
دبايوا
مازال سؤالى قائما عن المفعول /له/معه.
وساكون لك شاكرا ان عرجت الى العدد.
وعندى ايضا اشكالية صغيرة حول اننا اعتدنا وضع التنوين على الالف
كمثال...شكرا نضع فتحتين على الالف هل الصحيح وضع ا لتنوين على الالف
ام الحرف الذى يسبقها؟

لبابى.

Post: #142
Title: Re: إصلاح الكتابة في المنبر
Author: محسن خالد
Date: 07-22-2005, 06:00 AM
Parent: #141

عبد الله إبراهيم الطاهر،...
الصديق عبد الله، تحياتي يا رجل وأريتك عافية،...
وكيف حال البنوتة العسل، تحياتي ليها يا سيدي،..
وأهو كلها مدافرات لأجل إعطاء القلم رُشدَه،...
تعرف بالطبع أننا في محيط اللغة العربية من باب كونها اللغة التي نتكلمها ونكتب بها لا أكثر، وتعرفني بالطبع أنني من أكثر أعداء الدعوات القومية، وأنني لا أؤمن إلا بالإنسان مُجَرَّداً،..
فلك التحية والحب على هذه الإشارة، ولك السلام
ولندع العبث الطفولي كما يقول زميلنا عثمان للطفوليين،..




محمد السر،....
إزيك يا محمد صاحبي،..
الليلة غايتو عندنا بهنا الجمعة،..
يتكايت: مثال، أهلنا بقولوا (صَبَّت المطر واتكايتنا كلنا في الأوضة) يعني دخلنا وأدخلنا معنا أشياءنا، بالتالي بحصل شنو: تكَدُّس،..
وهذا هو المعنى الفصيح من القاموس: كَيَّتَ الوعاء حَشَاه،...
يعني فصيحة طق طرق،..

بعدين رقبتي دي متوفرة للضبح، بس هم خلوا شجر؟

وأبقه (عيزانا)،..




هاشم نوريت،...
دبايوا،..

سؤالك يا سيدي ما رافض الإجابة عليهو ولا حتى (العدد) الطلبوهو ناس كتيرين،..
لو أخوك قام جاب الدروس دي من المراجع مباشرة وكباها هنا، الناس بتطش، وألا كمان بطنها بتطم من الكلام الكتير والمعقد،..
يعني لا بد لي من فرقة -بس- عشان أقعد أختصرها، وأعملها بلغتنا المفهومة دي، وأبربحها تمام التمام،..
وكت ألقى فرقة والله يا ود نوريت الطلبات دي كلها ما بقصر فيها، إلا أصبروا علي شوية،..


بخصوص كتابة التنوين علي الحرف السابق، صحيح في كلام زي دا، ورأيي فيهو إنو حذلقة فاضية، لأنو التنوين براهو مابديك الصوت المطلوب... يعني: (الألف + صوت "ن" -التنوين) حتى يدوك المطلوب،..
وأصلاً قاعدة الكتابة لو ما انحشر فيها الإعراب، لأنو الإعراب لو انحشر بكون ضروري مراعاتو هو أكثر من غيرو، ولو ما انحشر براعو فيها حاجتين: التبسيط والجمال –يعني شكل الكلمة مهم،..

بعدين نظام كلام خاص كدا، ومشاغلَة، أجدني مبسوطاً منك جداً جداً يا زول، لأنك قادر تفرز الكيمان، وتقسم عقلك لمناطق مختلفة ما يجوط بعضها في بعض،...
يعني محل (إصلاح الكتابة) بتقولي يا "أستاذ" ومحل تيموليلت والكلوروفيل بتديني فوق رأسي، وإن بأدب وبدون شتائم،..
عارف؟ أخوك زمان كان أنصاري سنة، يحوم من جامع لجامع ويتكلم على المنابر، وأهو حالياً زي ما إنت شائف!

لبابى،... ولو إني ما عارف معناها لكن قَدَّرت إنها بتكون (خليك عافية)

Post: #143
Title: Re: إصلاح الكتابة في المنبر
Author: الوليد محمد الامين
Date: 07-22-2005, 06:29 AM
Parent: #142

محسن سلامات
ومستمتعين معاك ... عجبني كلامك - وقبلو احترامك - للأخ هاشم نوريت ,
قصة أنك كنت أنصار سنه دي طبعا حكاها لي عبد البديع دفعتك ,
قال لي الزول دا كان أنصار سنه وكمان كان مكحل عيونو,
أها يازول قال لي محسن كان بجيني في البيت , قام واحد من أعمامي _ أعمام عبد البديع والرواية لا زالت له _ قال لي هوي يا عبد البديع زول المكحل وكيف كيف دا أخير تزحو مننا , أو كما قال ....
بأحكي ليك القصة دي وفي بالي رد من مسئول في السفارة السودانية في المغرب لما الطلبة كانو مسخنين , عمك قال ليهم : يا ولدي كلنا زمان كنا يساريين . القصة دي أظني قريتا في واحد من بوستات السمندل لو ما خانتني الذاكرة ...
الشاهد : ستبقي لغة محسن خالد الهادرة ويمضي نهرها , أما برك الهوام فأشعة الشمس كفيلة بتجفيفها ...
محبتي يا رجل .

Post: #144
Title: Re: إصلاح الكتابة في المنبر
Author: محسن خالد
Date: 07-22-2005, 06:56 AM
Parent: #143

الوليد محمد الامين،...
تحياتي يا محمد، واتوحشناك آلشريف، زيد آسيدي زيد،..
ياخي إنت ماكفّاك الـcv البكتبو أنا، ماشي للزيادات من (عَبُّوش)،..
لكن في حاجة هو ما كلمك بيها، حيهم معروف بالكُفُر، وكلام للسماء ضفاري عادي، لأنهم كلهم لعيبة كورة، أتخيل إنو يجي مع ولدن أنصاري سنة، الزمن داك كانت الكلمة دي غامضة جداً، كأنك تتحدث عن المعتزلة مثلاً،....
بعدين هاشم نوريت دا أنا والله عندي ليهو تقدير خاص، وأكتر،..
(يا ولدي كلنا زمان كنا يساريين)، العبارة دي حلوة، يعني شنو يعني؟ محل قاعدين دا، أنحن جينا منو؟
وهذه أحلى: بِرَكُ الهوام أشعة الشمس كفيلة بتجفيفها،...
أتفضلي يا الشمس إذاً،...
ومعاك قلبي ما تنسَ،...

Post: #145
Title: Re: إصلاح الكتابة في المنبر
Author: هاشم نوريت
Date: 07-22-2005, 07:34 AM
Parent: #144

استاذنا محسن خالد.
دبايوا.
كل ما اكتبه هنا او فى اى مكان من هذا البورد اكتبه صادقا
دون ادنى مجاملة ولا ادعى تملكى للحقيقة ولا اقول باننى على
الحق دائما وكلمة استاذنا انا صادق فيها وانت تستحق هذه
المكانة لاننى وجدت عندك مالم اجده عند غيرك ويقينى ان هذا
البوست المتاوقون اكثر من المتداخلين .
ارجو ان يستمر عطاءك وفخرنا بك لن ينقطع ان استمريت او انقطعت.
فلك كل الود والتقدير..

لبابى.
تعنى فى رعاية الله فتك بعافية اتمنى لك السلامة.

Post: #146
Title: Re: إصلاح الكتابة في المنبر
Author: محسن خالد
Date: 07-22-2005, 12:55 PM
Parent: #145

هشام نوريت،...
دبايوا،..
أعرف أنَّك صادق ولا تجامل فيما تؤمن به، وهذا ما قصدته بالضبط،..
وأنا أيضاً قصدتُ أنني أحترمك بالفعل، وأُقدّرك، وكل من قال رأيه في كتابتي بقصد الرأي أنا أحترمه،..
وحتى من قالوا رأيهم من باب الظهور وتوضيح أسمائهم فلا مشكلة لي معهم،..
لأنَّ الشخص هو الذي يُقَرِّر لنفسه ما هيتها وليس أنا،..
تبقى بيننا المحبَّة يا ود نوريت، والمودة، وتبقى من أصدقائي وأصدقاء هذا المكان،..

وأنا شفت بوست لغة البجة، ودا كلام سمح، لأني بحب اللغات، وإن شاء الله نكون من حيرانك هناك،...

ولبابى

Post: #147
Title: Re: إصلاح الكتابة في المنبر
Author: humida
Date: 07-22-2005, 01:12 PM
Parent: #146

عارف يا استاذ محسن خالد
وبقول ليك هنا يا استاذ
لانه فعلا البوست يستحق القراءة
وفيه من المفيد الكتير
مما يجعلنا منصتين للدرس
بس عارف ياسيدي
وأظن البوست دا قبل .. ما " طيارة جات بفوق "
الناس ادتك حقك من الاحترام فيه كاملا ..
بقت عليك يا سيدي حكاية حارس المرمي
طار فوق قبض الكورة ..
الناس صفقت ليهو ..
شاتها جوه القون .. !

Post: #149
Title: Re: إصلاح الكتابة في المنبر
Author: محسن خالد
Date: 07-23-2005, 05:14 AM
Parent: #147




humida،...
تحياتي،... وكيفنَّك؟
أولاً أنا زول أشتر في الكورة، أشتر تب، بس ما لدرجة أمسك الكورة وأدخلها قون بنفسي، أظن النكتة بتقول إنو الزول البعمل كدا، دا العتالي بتاع البطيخ الجابوهو عشان يحرس المرمى، لأنو كان متعوِّد علي جدع البطيخ جُوَّه اللوري، في النهاية نسى وجدع الكورة جُوَّه القون،..
قول لي ليه ما بطلع هو، لأنو البطيخ ما هو الكورة،..
لكن الكتابة ياها اللغة،..
يعني عشان تكتب مفروض تعرف اللغة،...
مثلاً، أنا شفت البوست بتاعك -بتاع الضفدع الفي خشمو نملة وفوق غصن،...
أول جملة بتقول: (الاثارة ..
لها وجهين كما العملة)، ..
وكلمة الإثارة متروكة بدون همز سفلي، دا زي الجنس السفلي، القلتو ما عجبكم دا، ودا أول موضوعة في بوست إصلاح الكتابة، كيف تكتب الهمزات،..
ما علينا... الدرابة الأكبر هي (لها وجهين)،..
الضمائر دائماً يا حميدة البجي بعدها بجي مرفوع، إلا الزول كان ما بعرف الضمير،...
يعني الجملة بتبقه: (الإثارة لها وجهان)،..
أنا قلتلك الكلام دا ليه، أول شيء عشان أعلمك تكتب صاح، وثانياً عشان أوريك إنو البوست دا مش (فيه من المفيد الكثير)، بل ما فيهو سوى الفائدة، يعني كلو فائدة،..
ودي نقطة اختلافك التانية معاي، لاحظ أنا ما عندي معاك اختلاف، لأنو أنا ما ممكن أمشي أخصّصص ليك بوست، طيّب أنا عارف إنك إنت قلت الكلمة دي (ساي)، ما قاصد فيها حاجة، ومصدّقك، بس كتابة محسن الما عاجباك دي، إنطلاقتها الأساسية ما من بيوت النسوان الما كويسات، لكن من هنا، اللي هو تفادي البايت من اللغة والنظرة إلى اللغة كشغلانية كبيرة بدون أي تدخل من ناحية (ساي)، أمشي أقرأ كلام (أبو ذر المطر)،..
وقبل تمشي أعلمك تاني حاجة، إنت كتبت:
مما يجعلنا منصتين للدرس،.. ودا غلط،..
الصاح: ما يجعلنا منصتين للدرس،..
وراجع البوست دا فوق بتلقى الفرق بين –ما- ومما- وطالما- ومادام،...
أها للنكتة كدي بقوليك، نكتتك جابتلك الهوا،..
آخر كلام مني ليك، المحل دا "مَسيد"... المرة الجاية، تجيب لوحك وتدلِّي شرافتك مع أخوانك ديل هنا، ولمَّن تمرق من هنا، بتكون اتعلمت عشان تكتب الداير تكتبو بشكل صحيح، وصدقني تجي تتعلم هنا وتمرق تشتِّر بالحجار ببرّه ما فَرَقت، وبرضو الحصّة الجاية لا أستقبلك إلا بمحبة الأستاذ لتلميذه، وأكثر، ممكن أصحّح ليك كلامك البتكتبو قبل النشر، ودي ما اتعلمتها من مسيحية متمسكنة، لكن الدنيا هي الورتني إنو العندو كلام داير يكتبو، مافي شيء بقدر بوقفو،..

Post: #154
Title: Re: إصلاح الكتابة في المنبر
Author: humida
Date: 07-25-2005, 02:59 AM
Parent: #149

Quote: آخر كلام مني ليك، المحل دا "مَسيد"... المرة الجاية، تجيب لوحك وتدلِّي شرافتك مع أخوانك ديل هنا،


مدد يا شيخ محسن ..
يديك العافية يا زول
والله انا اكتر حاجة عاجباني فيك
العنجهية الفارغة بتاعتك دي ..

زمان يا شيخنا ..
قالوا اللبيب بالاشارة بيفهم ..
ما بدقق فيها كتير ..
وجهين ولا وجهان قلبة ولا عدلة
المهم في الامر من باب الكلام ليك يا المنطط عينيك
وكذلك الامر مع البطيخ .. أنف الذكر

بالنسبة للغة ..
او نوعية الكلام هنا .. في المنبر
الطابع الغالب .. العامية
دي ما عندها وزن معين للفلسفة
يعني اعتمادها علي المسموع
اديك مثال بسيط
اذا جينا ننسب كلمة اساس لواحد مثلا
ممكن نقول . اساسهُ ..
ولا نكتبها بالعامية السودانية .. اساسو
بالعامية وبالواو بتدينا الجرس بتاعنا
وبتكون مفهومة
والشيء الاهم ..
الناس هنا ما طارحين نفسهم
كأدباء ومفكرين .. عشان ما نعمل ليكم زحمة وكدا
ثقافة الـمنتديات في الانترنت ..
ثقافة شعبية .. ودا المديها الرواج بتاعها
ما شرط حتي يكون كاتب البوست بجيد الكتابة
ممكن يكون رسام .. وبتقنية الاكواد ينزل صورة
بتكون في نفس جمال الكتابة ..
وكذلك الاغاني .. واي نوع من التسلية الراقية

كدي النمسح اللوح دا .. ونجيك



Post: #148
Title: Re: إصلاح الكتابة في المنبر
Author: محمد السر
Date: 07-23-2005, 03:13 AM
Parent: #1

Quote: (صَبَّت المطر واتكايتنا كلنا في الأوضة) يعني دخلنا وأدخلنا معنا أشياءنا
أنا المعنى كان واصلني ،خصوصاً مع كلمة التأكيد "كُلِّي"، لكن حبيت أتأكد
أها يا أستاذ لمَّن إنت عارف معناها... كتبت كلامك داك مالك؟؟؟
كدي بجيك في محل المكايتة بي غادي.
ملاحظتك عن أخوي نوريت في محلها، أنا زاتي ،من البوست دا، بديت أشوف فيه حاجات جميلة
ودي واحدة من الفوائد الكتيرة الفي البوست دا
،،إن شاء الله في ميزان حسناتك،،
أمين
وكعربون محبة أقول لاخوي نوريت:
يا هاشم... أستاذك بقى يدي دروس خصوصية... الظاهر الماهية ما حايقة
أها قبضتو بدي حصة مهمة لي زول في الحلة الغادي، وأنا ما حبيت الكلام السمح دا يفوتك لأني شايفك أكتر واحد فينا مركِّز في البوست دا... إذن، إلى الدرس:
Quote: وما من كاتب إلا سيفنى ويبقى الدهر ما كتبت يداه
فلا تكتب بكفك غير شيئ يسوؤك في القيامة أن تراه

وبالشكل الصحيح هي هكذا:
وما من كاتبٍ إلا سيفنى ويُبقي الدهرُ ما كتبت يداه
فلا تكتب بكفك (غير شيء) يسوءك في القيامة أن تراه

أنا صلّحت ليك (يُبقي.. بدل.. يبقى)، و"الشيء" تُكتب بالياء المشبَّعة والهمزة على السطر، و"يسوءك" هي الأخرى تُكتب همزتها على السطر وليس على الواو كما فعلت أنت،..
دا كلو ما همية زيك وزي أخواتك البكتبو "الحذف" بالزاي، مافي مشكلة هنا، بس المقلب يا المكاشفي في (غير شيء) معقول الشاعر يكون قال كدا، ببقه زول جاهل، لأنو دي زيها زي (لا ينقصنا شيء سوى عدم رؤياكم الغالية)،..
إما أن يقول الشاعر:
فلا تكتب بكفك غير شيء يسرك في القيامة أن تراه،..
وكدا بكون صلّح المعنى، ووقع في خطأ لُغوي، اللهو:
لما تنفي الجملة، ما بجوزلك تستخدم (غير)، الجملة المنفية (لا تكتب) ياهو دا النفي، عشان تعرفو، أها الجملة المنفية بجي بعدها "سوى: مش "غير"،..
تقول:
لا تكتب سوى شيء مفيد،.
لا...... طوالي بتعادلها من هناك ....سوى
إذن الشاعر ما قال كدا،..
الشاعر دا ما بحلو شيء (سوى) يكون البيت هكذا،..
(فلا تكتب بكفك أيَّ شيء يسوءك في القيامة أن تراه)،..
ولو جبت أي رابط (أنا فتشتها في رأسي كويس)، أي رابط غير "أي" بكسر البيت، لأنو دا بحر الوافر،...
(مفاعلتن مفاعلتن فعولن)،....
سلام

Post: #155
Title: Re: إصلاح الكتابة في المنبر
Author: nadus2000
Date: 07-25-2005, 06:20 AM
Parent: #148

الجميل محسن
ظللنا ولفترة طويل ننسب للرئيس، بإضافة الياء أو الياء مقرونة بتاء التأنيث فنقول "الرئيسي" و"الرئيسية"، وظلت هذه المفردت تلوكها media مقروءة ومسموعة ومرئية، ثم فجأة تغيرت وأسقطت اليا فصارت تقرأ:
الرئيس والرئيسة. وأصبحنا نسمع
وإليكم العناوين الرئيسة.
والخبر الرئيس.

شنو "الجدة على المخدة"، وما هي القاعدة التي إستند عليها المجددون.
إبتد أهل تيموليلتك بعض التعديلات وسار على إثرهم عربان المشرق،
كمفردة "المشكل" بدلا عن "المشكلة".
فياريت تأتينا بتفسير وقواعد هذه التعديلات.
وشكرا و"لسه بيناتنا العبارة"

Post: #150
Title: Re: إصلاح الكتابة في المنبر
Author: المكاشفي الخضر الطاهر
Date: 07-23-2005, 07:31 AM
Parent: #1

الاستاذ محسن خالد
إسمح لي أن أقول لك أن هذا البوست






































تحسد عليه

سأقوم بطباعته وقرآءته بتروي وتؤده وطمأنينة

Post: #151
Title: Re: إصلاح الكتابة في المنبر
Author: هاشم نوريت
Date: 07-23-2005, 10:05 AM
Parent: #150

استاذنا محسن صالح
دبايوا
بعد اذنك ارجو من الاخوة الكرام الالتزام بقوانين البوست.
لان هذا البوست فقط للدارسين والمتاوقين
وغير مسموح لاى هرجلة او خروج عن مضمون البوست وبصفتى الالفه هنا انبه
الجميع الالتزام بقواعد وضوابط البوست حتى لا نفقد السيطرة على النظام.


لبابى.

Post: #152
Title: Re: إصلاح الكتابة في المنبر
Author: محسن خالد
Date: 07-23-2005, 03:17 PM
Parent: #151

محمد السر،..
تحياتي ليك يا صاحبي،..
وداير أنبهك،...

إنو تقريباً كلَّ الأفعال البنستخدمها في العامية هي أفعال فصيحة،..
يعني لو في نجر بكون في مسميات، لكن أي مسمّى بتقدر تطلّع منو فعل، ستجد له علاقات ولو من بعيد بجذر صحيح، ويا ريت والله تلم كل ملاحظاتي عن لغتنا العامية، ونشتغل تاني عليها مع الأحباب هنا، ونطلّع منها حاجة جميلة،..

أبقه طيّب وخليك عافية،...






المكاشفي الخضر الطاهر،...
تحياتي يا المكاشفي، ومرحباً،..
فعلاً هذا البوست فيه من الخير والفضل الكثير،...
وبإسهامات الأحبة هنا نستطيع تغيير بعض ما نقع فيه من أخطاء،..
بعد ما تطبعو لرقبتك كمان قسّمو، كان ينوبنا منّو ثواب وأجر،..
وخليك عافية،..
وتحياتي ليك،..








هاشم نوريت،...
دبايوا،..
يا زول تحيات،..
بعدين شايف في غياب كتير،..
خصوصاً "شنتير" و"بناديها"،..
أبقه طيب،

لبابى

Post: #153
Title: Re: إصلاح الكتابة في المنبر
Author: Shinteer
Date: 07-24-2005, 05:37 PM
Parent: #152

ولست بنحويِّ يلوك لسانه ....
سلام يا محس وسلام لأهل البيت

أوضح الأخ محسن القاعدة العامة للأسماء التي تأتي بعد الضمائر، في معرض رده على الأخ حمّيدة. والقاعدة العامة تقول إن هذه الأسماء تكون مرفوعة؛ مثلاً: الاثارة .. لها وجهان كما العملة.
فماذا إذا جاء ناصبٌ قبل هذه الضمائر؛ من عائلة كان أو عائلة إنّ؟
1- كان وإخواتها: لا تنصب الاسم الذي يعقب الضمائر. إذن تكون الجملة: كان لها وجهان كما العملة.
2- إنّ وجماعتها: تنصب الاسم الذي يأتي بعد الضمائر، فتكون الجملة: إن لها وجهين كما العملة.

والله أعلم. ولو في أي خطأ في كلامي ده يبقى على مولانا محسن أن يتدخّل قبل ما سوبا تخرب.

Post: #156
Title: Re: إصلاح الكتابة في المنبر
Author: محسن خالد
Date: 07-25-2005, 11:16 AM
Parent: #153

nadus2000،...
والحب والتحايا يا أستاذ،...

الموضوع كلو مستحدث، يعني هم ما عملوا حاجة، قالوا "الرئيسي والرئيسية" كموضوع حديث، وتاني رجعو ينسبوا (الرئيس والرئيسة) كموضوع حديث،..
ليه؟
لأنو بنية المفردة نفسها (الرئيس.... والرئيسة) تتضمَّن النسبة، ودي واحدة من مخاتلات اللغة العربية النادرة، زي الأشرتها ليها قبل كدا،...
مع الفعلين في فعل واحد،...
مثال: تقاتلا..... تحاربا..... تخاصما..... وكل لغات الدنيا ما فيها الحركة دي،..

يعني هم، رجعوا للمعنى الأساسي المتضمن في المفردة نفسها، ودَقِّق فيها شوية بتلقى إنو النسبة بالفعل قاعدة ببطن الكلمة،..

"المشكل..... من مشكلة....
"الموضوعة..... من موضوع....
"البحاثة.... من باحث عن (الحق)

يعني هسي لو قابلك عروة بن الورد..... وقلت ليه ("الإشكالية" دي نحلها كيف؟)،... ما ح يفهمك،..


وكل التطويرات الزي دي، كانت حراكات تطويرية طبيعية، بعدين أُعتمدت،...
يعني هسي: حِراك.... وتطويرية.... دا كلو كلام جديد،...
طيّب ليه أُعتمدت؟
لأنها بالأصل زحفت من أفعال راسخة....
مثال... "المُشكلة..... الفعل هو (أشكلَ......)،...
إذن يجوز أطلّع فعل (مُفْعِل)، مُشكل،....

بعدين داير أقولك، أنا مع تطوير اللغة دا، لاحدي حدو،....







شنتير،...

اتوحشناك يا رجل،..


طبعاً، أي قاعدة في العربي –قائمة- ما لم تنحشر مسألة أخرى، أو أولوية ثانية،...
كويسة جداً إضافتك هنا للقاعدة، (في العموم)، ومن بعد التخصيص،..
طبعاً هذا هو عيب العربية الأفدح، تقريباً لا توجد قاعدة بدون استثناءات وانحشارات، ومش في حالة أو حالتين، لكن بكثرة تكاد تلغي القاعدة نفسها، الشيء الأساسي في العربية هو أن نعرف (الإعراب)، أي اتجاهات الكلام، الفاعل منو، والمفعول شنو،... ودي النقطة التانية المهمة،...
ودي نفسها النقطة الأساسية الانطلقوا منها كل العلماء الحاولوا إدخال إصلاحات في اللغة، وهو إنو عدم الاهتمام بالجُمل إلا من باب بنيتها الأساسية،...
يعني لو قلت: جاء أحمدُ راكباً.............. يعني هنا في شكلها القديم (الحال)
أو: جاء أحمد راكبٌ،... يعني هنا بقت (نعت)
الجملة ما بتتأثر، ودا صحيح،....

لو قلت: قابلتُ أحمد مساءً.......... (ظرفية)
أو قابلتُ أحمد مساءٍ،... (اعتبرتها إضافة)
الضرر شنو؟ مافي ضرر، وهنا مجمل فلسفة د. ياسر شرف، (في إصلاح الكتابة)،...

هو عندو جن مع الزوائد المزعجة دي زي ما بسميها،...

لاحظ يا شنتير إنو اللغات التانية بتنضبط لحد كبير بقواعد ثابتة، ما عدا استثناءات وانحشارات نادرة جداً،..
اللغة الإنجليزية مثلاً، ربما هناك قاعدتان فحسب (الشتر)، الباقي كلو راكب عدلو من أولو لآخرو،..

أتذكر منهن (جزئية) من القاعدة بتاعة (if 2)
أو ما يُسَمَّى بـ(preterite tense)
اللهو القاعدة العامة إنو: I .... الضمير أو (الفاعل) subject..... بجي معاهو الفعل المساعد (am)،..... طيب القاعدة دي ما بتتكسر إلا في حالة (preterite tense) الذكرناها دي،...

واللهي تستعمل مع الافتراضات اللامنطقية وفي ظرف ماضوي،..

If I were you I would change my life

أو القاعدة الشتره التانية بتاعة Question Tag

وزي ما عارف دا لعبتو قايمة على (نفي... باليمين) إثبات بالشمال، أو العكس،..
You are Ali ….. Aren’t you?
She isn’t Salma …. Is She?

ما عدا قاعدة واحدة، وغريبة،...
I’m Muhsin ….. Aren’t I?

بس ديل الشترتين البعرفن أنا في الإنجليزية،..

أما العربي فافتح عِبَّك يا صاحبي،...

إذن التعليق علي كلامك، يكون الضمير (في العموم) البجي بعده بنرفعو، ما لم ينحشر منحشر، زي (إنَّ) وأخواتها وغيرن،..

حتى لو تقدّم فعل، برضو بلكلك الجملة،..
سيوفنا التي (قاتلنا) بها المشركين،..

لو اتقدم اسم القاعدة في محلها،...
(مكة) بها مشركون كثر،...

بعدين الموضوع كلو إنت يا شنتير عارفو تسهيلات،....

وكن بخير، وما تغيب تاني،..

Post: #157
Title: Re: إصلاح الكتابة في المنبر
Author: Shinteer
Date: 07-25-2005, 02:46 PM
Parent: #156

عزيزي العزيز محسن .. ما سعلت منك شينة. أبعدتنا عنكم بعض مشاغل واستضافة وِرْدة خفّافية.

سمعت أن اللغة الألمانية أيضاً متشعبة القواعد وبها شرتمات قد تضاهي شرتمات اللغة العربية. وقيل إن اللغة الصينية خارتة رسنها وكاسرة قيدها وملصقة للنحو رفسة في صفاقو. أحد أصدقائي الصينيين قال لي في لغتهم لا عندهم ماضي لا حاضر لا مستقبل بس تركب راسك وتقول الفيه بشرط إضافة قرينة دالّة على زمن وقوع الفعل: أنا أمشي أمس/ أمشي بكرة/ أمشي حركة ورا. الزول ده يمكن يكون ببالغ شوية.

الإنقليزي شتاراتو النحوية ماها كتيرة. بالإضافة للشتارات التي أوردتها أنت، هنالك شتارة أخرى، وهي ما يعرف بـ The Unreal Past ده ضيفو للشتارات الإنقليزية. لكن يا سيدي شتارة الإنقليزي العظمى تكمن في تهجيته غير المبنية على أي منطق. في النقطة دي اللغة العربية أسهل بكتير من الإنقليزي ......... عشان كده بحتار في الأخطاء الإملائية في لغة تُكتب (في مجملها تقريباً) حسب الصوت.

دي ونسة بتاعة زول معاه بواقي وِردة. المرة الجاية داير منك مباصرة المصيبة الاسمها لدى دي. إعراب لَدَى .. وصلِّحو بالله.

Post: #158
Title: Re: إصلاح الكتابة في المنبر
Author: banadieha
Date: 07-25-2005, 11:38 PM
Parent: #157

Quote: بعدين شايف في غياب كتير،..
خصوصاً "شنتير" و"بناديها"،..


يسأل منك العرس ياسي محسن وتبراه العافية ووراءها القروش..ولكنه الجدب وأكثر منه الوقت الممحوق بركته.

Post: #159
Title: Re: إصلاح الكتابة في المنبر
Author: اشرف السر
Date: 07-26-2005, 00:39 AM
Parent: #158

كلنا حضور، من ذُكر ومن لم يُذكر.
أعانك الله يا محسن.

Post: #160
Title: Re: إصلاح الكتابة في المنبر
Author: محسن خالد
Date: 07-26-2005, 07:27 AM
Parent: #159

Shinteer،....
شنتير،...
الزول اللحو وشنحيب،..
ياخي سلامتك من الوردة، وتاني السلام،..

الألمانية دي عارف ما عندي عنها معرفة بتاتاً، يعني الفرنسية شوية بكابس فيها واللاتينية القديمة وتطلعات أخرى،..
المهم إنو الصينية دي كان عندي منها أصحاب كتيرين، وبعرف بعض معلومات وجذاذات، والكلام القلتو دا صحيح، الناس ديل لغتن طلقيت ساي يا شنتير، وكمان لغة (تصويرية ما زالت –زي موسيقى تصويرية، بالأحرى كودية من كود،...
بعدين إنت أهلك اليابانيين ديل ما بعرفوا الكلام دا تمام، وتقاطعاتن مع الصين أثّرت على الصينيين بحكم الاحتلال الياباني ليهم،..

بعدين شكلنا كدا ح نقلبها إنجليزي،..

لأنو The Unreal Past هو برضو (افتراض ماضوي) يعني زي قاعدة ( If 2) مشكلتن هم في الحتة دي، التخيل على صعيد الماضي، الناس ديل ناس عمل ساااااي يا شنتير أخوي، وشغل الخيالات وكمان في الماضي دا هم بالكلام ساي ما بعرفولوا .... شوف نجاضتن دي ساي،..

If only I met you yesterday

I wish you fought with us


وزي ما قلت دي ونسة زول مع سيد وردة،...


banadieha،...
تسلم يا بناديها،...

وتحياتي ليك يا عزيز،..

أريتك طيّب، وأجمل أمنياتي ليك،...

سؤال من باب المحبة،...



أشرف السر،...
صديقي أشرف،...

السلام والتحية،...
وواظب علي الحضور، إياي أنا أفتقدك

Post: #161
Title: Re: إصلاح الكتابة في المنبر
Author: Adil Al Badawi
Date: 08-06-2005, 04:27 AM
Parent: #160

عزيزي محسن خالد

هذا بوستٌ مفيدٌ جداً
إنَّ بوستاً كهذا (من بوست) / كهذه (من بوسة) لمفيدٌ / ةٌ جداً

أها...العربي الفوق ده، وجندرتو، خَبَرُن شنو.

والعربي التحت ده، خبرو شنو:

ياخوي رايح لي، من دارجيتنا، حرف. فَدْ حرف. علي بي جملة الأيمان، كُسْتَ عربي أفرنجي ما لقيت لي درباً أكتبو بيهو كأنو "جنيَّة في لعوتة". تعرف لما الكلب يكشِّر عن أنيابه ويصدر صوتاً عدائيَّاً نقول: "الساعة ال*رَّ ليك الكلب فيهو..." أها الحرف * ده ألقاهو وين في الكيبورد. مثال تاني: لما "ندعِّي" زول، وأللا قول شي، بأن تقطع يده زي ما دعَّى واحد قريبنا جلابيتو لما ما لقى إيدا: هيْ إيدك وينا إيدك *تْ.

ألحقني ياخوي، الله يرضى عليك، بمكان الحرف * عندي نضماً داير انضمو وواضح إنِّي ما "نكتَّ" البوست ده إلا لأنِّي متضايق تَبْ.

ومشكور على البوست (البوس) كلو.

Post: #162
Title: Re: إصلاح الكتابة في المنبر
Author: محسن خالد
Date: 08-06-2005, 08:20 AM
Parent: #161

Adil Al Badawi،..

تحياتي يا عزيز وسلامي،..
والمحبة لك،..
الحرف دا انا ذاتي كان مزازيني، لكن شخصياً عندي ليهو ابتكار، ما عارف لو بقدر أنزلو هنا،...
بأي حال تسبقو بـ(نون) وبعداك تكتب بعدها (ج) معطّشة،..

نچـرَّ فيني الكلب،..

أو

نچـت الخملة

بعدين الحرف دا بتلقاهو بالنسبة للويرد في:
Insert
ثم:
Symbol

بعدين عشان الحرف يربط مع أخوانو، لو أبى يربط في أخوانو تختار ليهم (خط واحد) يعني نيو تايمز أو سيمبليفايد، أو أو...

وتحياتي يا رجل،..

Post: #163
Title: Re: إصلاح الكتابة في المنبر
Author: محسن خالد
Date: 08-08-2005, 10:47 AM
Parent: #162

كاليم أُوقظ حياتي، وأمضي في الموج دون أن أنتظر،..
العواصف تضرب رجلي، والنوارس تتخطّف مشيتي،..

Post: #164
Title: Re: إصلاح الكتابة في المنبر
Author: محسن خالد
Date: 08-13-2005, 02:30 PM
Parent: #163

..


اليوم ح نشوف محنة كبيرة، ظللتُ أُطاردها لسنوات طويلة،...

نحن والمصريون نستخدم كلمة (زي) بمعنى (مثل)،..

لزمن طويل وأنا أُطارد أصل هذه الكلمة فأوشكتُ على أن أجنح لكونها مختلقة وما من أصل لها، حتى فُتِح لي، فعرفتها،..

هناك رواية لحديث عن الرسول (ص) يقول فيه:
(إنما بنو هاشم وبنو المطلب (سِيٌّ) واحدٌ)،... أي مِثْلٌ وسَواءٌ،...

مع أنَّ الرواية الشهيرة للحديث تقول:
(إنما بنو هاشم وبنو المطلب (شيءٌ) واحدٌ)،..

بالعامي كدا نقول: زي بعض، ودي بالضبط الكلمة الفصيحة والقديمة (سِيٌّ)،..
يقول الشاعر:
وهُم سِيٌّ، إذا ما نُسِبُوا،
..... في سَناء المجد من عبد مَناف

يقول ابن منظور:
السِّيَّان: المِثلان، وهما سَواءان وسِيَّان: مِثْلان، والواحد (سِيٌّ)،..



الغريب في الأمر، ومع أنني مقطّع إعراب (لا سِيَّما) تماماً، (عندي كتاب قديم، كتاب كامل في إعراب لا سيما بس) إلا أنني لم أقرنها بها أبداً، ولو فعلت لانحلّ اللغز في لمحة ولأضحت سهلة ومكشوفة على الفور،..
ما علينا، أي حاجة ما بتبقه سهلة إلا بعد تعرفها، التذاكي بعداك بجي، يضحك نهاركم،..

الخلاصة (زي) هي بالفصيح (سِيٌّ)،..

وما تنسَ حرف (السين) مكسور،..

طيّب، (لا سيّما)، هي (سِيٌّ) مع (ما) مضافة،..
وهي (لا سِيّما) تحسب في روابط (الاستثناء)، والاسم الذي يأتي بعدها يُعرب على وجهين،..

(الرفع) و(الجر)

زارني الشباب لا سيّما (أخوك) أو (أخيك)،..

في حالة (الرفع) بنعتبر (ما) بمنزلة (الذي)، فنرفع ما بعدها...
في حالة (الجر) بنعتبر (ما) زائدة وحشرية، بالتالي بنتجاهلها،..

أها، البحصل شنو؟
تجي صاحبتنا (زي –سِيٌّ)، التي تعني (مثل) فيأتي ما بعدها كمضاف لها،..

زارني الشبابُ سِيٌّ أخيك،...




انتهى،...




لاحظت النسوان الكبار بقولوا:
يا بت ما تخمي (السفير) من تحت الشدرة دي،...
هَيْ يا حبوبتي هي النيمة دي بتتقابل؟

(السَّفير) كلمة فصيح طق طرق، بدون أي تعديلات: تعني ما تساقط من ورق الشجر،...












..

Post: #165
Title: Re: إصلاح الكتابة في المنبر
Author: عبد الله إبراهيم الطاهر
Date: 08-14-2005, 02:48 AM
Parent: #1

الزول السمح ...
المحسن الخالد ...
عساك بالخيرات ....
متابعين يا حبيب ...
واصل سعيك ... واصل ...

Post: #166
Title: Re: إصلاح الكتابة في المنبر
Author: محسن خالد
Date: 08-21-2005, 02:33 AM
Parent: #165

عبد الله إبراهيم الطاهر،...

تحايا، وحب،...
وما نزال في المخاضة، سنسعى في الأمر،...
وسنرى،...

Post: #167
Title: Re: إصلاح الكتابة في المنبر
Author: محسن خالد
Date: 08-23-2005, 10:46 AM
Parent: #166

...



المستثنى بـ(إلا)









في شباب كتيرين طالبوا بالمستثنى، وأولهم صاحبي الشاب شنتير ود أشيقر،...



يلا خلونا نشوف الفي الشونة،..


عندنا حاجتين بنجي نشوفن أولاً بالتبادي، لو لقيناهن الكلام ببقه ساهل، ولو ما لقيناهن بعداك بنشوف الدواء كيف!


الحاجة الأولى هل الجملة قبل أداة الاستثناء (مثبتة) أم (منفية)؟

الحاجة الثانية، هل (المستثنى منه) موجود أم غائب؟



أمسك في المدخلين ديل كويس، والباقي كلو هيّن،...
في البداية نشوف الاستثناء بالرابط (إلا) لأنو هو الأصل والأهم، وبالمهلة بنرجع نشوف الاستثناء بالروابط (غير) و(سوى) و(خلا) و(عدا) و(حاشا)،...


الأمثلة:
عاد الغائبون إلا أخاك،...

القاعدة الأولى فحصناها، فوجدنا أنّ الجملة قبل أداة الاستثناء (إلا) طلعت (مثبتة)، إذ قال (عاد الغائبون) ولم يقل (لم يعد الغائبون)، بل أثبت عودة الغائبين،...

القاعدة الثانية فحصناها أيضاً، ووجدنا أنَّ (المستثنى منه) وهو (الغائبون) موجود، أي مذكور في الجملة وليس بمجهول،...

ومن هو المستثنى؟ المستثنى هو ما يرد بعد أداة الاستثناء، وهنا يكون هو (أخاك)،...

طيّب، وجدنا المستثنى منصوباً، لأنه من الأسماء الستة،...

إذن ما هي القاعدة العامة؟

القاعدة العامة هي: أنَّ المستثنى بـ(إلا) يكون منصوباً في الأحوال كلها إذا تحقَّق له شرطا أن تكون جملته (مثبتة) وأن يكون (المستثنى منه) موجوداً في الجملة،...

أمثلة:

عاد الغائبون إلا أخاك،... (الغائبون –المستثنى منه)، إعرابه هنا فاعل، ومع ذلك نصبنا (المستثنى -أخاك)....

قابلتُ الشباب إلا شابَّاً،... (الشباب –المستثنى منه)، إعرابه هنا مفعول به، ومع ذلك نصبنا المستثنى -شابَّاً)،..

سَلَّمتُ على الأصدقاء إلا خالداً،... (الأصدقاء –المستثنى منه)، إعرابه هنا مجرور بـ عَلَى)، وبالرغم من ذلك نصبنا (المستثنى –خالداً)،...

أيوووة، إذا كانت الجملة قبل أداة الاستثناء (إلا) (مثبتة) وكان (المستثنى منه) مذكوراً وموجوداً، نقوم بنصب المستثنى، أي الاسم بعد أداة الاستثناء (إلا) طوالي وبدون تردّد وفي كل الأحوال،...


يلا بعد دا نخش في الكسور وبواقي،...

طيّب نبدأ بكسر القاعدة الأولى، لو كانت الجملة قبل أداة الاستثناء (إلا) (منفية) مش (مثبتة)، الرأي شنو؟

(منفية) إما بأداة نفي مثل (ما) القاعدين نستخدمها في عاميتنا السودانية دي، (الزول دا (ما) مشيتلو في بيتو تب)،..

أو (لا) النافية المعروفة، لا أحب كذا وكذا،..

أو حتى لو كانت الجملة (شبه نفي) ودي زي (النهي)... لا تلعب بالنار، لا الناهية المعروفة دي،..

مثال:
ما وصلت الرسائلُ إلا (رسالتَك –بالنصب، أو رسالتُك –بالرفع)،...

يعني شنو؟
يعني لو كانت الجملة (منفية) إلا إنو (المستثنى منه –الرسائل) قاعد ومنطط عيونو (مذكور في الجملة)، بجوز (النصب -للمستثنى) أو كمان بجوز إنو (المستثنى) يتبع (المستثنى منه) ويكون (بدل) ليه، ومعروف إنو (البدل) بتبع (البدل منه) في حركة إعرابه، لو مرفوع بكون مرفوع متلو، ولو منصوب بكون منصوب، ولو مستهبل برضو بكون مستهبل زيو،..

أمثلة:

لا أحب دواوينَ الشعر القديم إلا ديوانَ أبي العلاء المعري،...

(ديوانَ) في الحالتين بتكون (منصوبة)، إما لكونها (مستثنى بإلا) وإما لكونها (بدل)،........ علي كيفك،...

لا تمشِ مع أحد إلا (الجيّدَ –منصوبة، أو الجيّدِ –مجرورة)،.....

(الجيّدَ) في حالة (النصب) لكونها (مستثنى بإلا)،،،...
(الجيّدِ) في حالة (الجر) لكونها (بدل) من (أحد)، وبدل المجرور (مجرور)،...


إذن القاعدة هي:
لو كانت الجملة قبل حرف الاستثناء (إلا) (منفية) وكان (المستثنى منه) موجوداً ومذكوراً في الجملة، يجوز أحد أمرين (نصب المستثنى) أو إتباعه للمستثنى منه في إعرابه على أنه بدل منه.

يعني في الحالة الفوق دي كسرنا قاعدة إنو الجملة تكون (مثبتة) وعملناها (منفية) وشفنا كيف نتصرف معاها،...

طيّب خلينا نكسر القاعدة التانية، اللي هي إنو يكون (المستثنى منه) مذكور في الجملة، خلينا نجيب جملة (المستثنى منه) مافي ونشوف الرأي معاها شنو؟

مثال:

لا يقع في السوء إلا (فاعلُه)،..

لا يُشاغل في الشوارع إلا (أخوك)،...

خلينا نشرح بالجملة رقم اتنين لأنها واضحة،...

(المستثنى منه) مافي، وهو الأولاد،...
يعني لودايرين نجيب (المستثنى منه) بتكون الجملة: لا يشاغل الأولادُ في الشوارع إلا أخاك أو أخوك،... وبتجوز فيها الحالتين لأنو الجملة (منفية)، ولأنو (المستثنى منه) ظهر،..


في نوع الحالة دي، المافيها (مستثنى منه)، المستثنى يسمّى (مفرغاً) يعني (ماعندو شغلة)، بيقوم يسوي شنو؟ بشتغل في المستثنى اللي هو (الاسم) البعد (إلا)،...







الأمثلة:

لا يقع في السوء إلا فاعلُه -مرفوعة

هنا لم يجد الفعل (يقع) معمولاً له، فتفرَّغ لرفع (فاعلُه)،...

لا تتبع إلا الحقَ –منصوبة

هنا لم يجد الفعل (تتبع) معمولاً له، فتفرَّغ لنصب (الحقَ)



لا يحيق المكرُ السيئُ إلا بأهلِه –مجرورة

هنا يتفرَّغ الفعل (يحيق) لجرِّ (بأهلِه)

يعني هنا الإعراب بكون حسب ما يقتضيه العامل قبل (إلا)..... و(إلا) نفسها بتكون في الحالة دي أداة (حصر) مش استثناء، وبتكون عاطلة لا عمل لها،...





طيّب المرة الجاية، نشوف الاستثناء بـ"غير" و"سوى"، والمرة البعدها نشوف "خلا)" و"عدا) و"حاشا"،... وأبقوا عافية،...



طبعاً أصول الكلمات الإنجليزية في عاميتنا السودانية كتيرة، لكن في بعض منها غير واضح واتلخّ فيها تمام التمام، لدرجة بقه أصلو ما معروف،...



تفكيك عامية:

مثلاً الجزار بقوليك: ياخي خلاص ولا تزعل أنا بديك من اللحمة المعلقة قدامك في "الشنكل" دا،...

"الشنكل" هي كلمة Shackles بالإنجليزية،...


كمان الناس عندنا في الريف الشمالي الكبار منهم، الواحد يقولك: يا زول المصيبة دا نوعو أبدا ما شفناهو، والله الناس دي كلها "بَلَفا" ليك "بلف" تمام، أنا سيد شركة، وأنا بعملكم إقامات وتشتغلوا في السعودية بكم، عييك، في النهاية شال قريشاتن وحتل،..
كلمة "البلف" هنا، هي كلمة Bluffed الإنجليزية،... بمعنى الخداع ومن منطلق القوة،....

الكلمة العذبتني جداً في العثور علي معناها، عندنا الناس بقولوا "قدون" العجلة، وبقصدوا منها الميزان بتاع العجلة، أو الدركسون بتاعها،...

كلمة "القدون" بالمعنى دا هم جابوها من Guide on الإنجليزية،..

وخليكم عافية،....




..

Post: #168
Title: Re: إصلاح الكتابة في المنبر
Author: Shinteer
Date: 08-24-2005, 03:32 PM
Parent: #167

سلام يا محسن يا زول يا مَجَيَّه. نأسف لطول الغياب وانقطاع الخبر. المشاغل أصبحت أوسع من رقعة الحياة ولا نملك إلا مغافلتها والنظر عبر ثقوبها صوب البورد. لسع في بالي الاتصال، لكن متين!!! الله أعلم.

طيب يا سيد أبوك. الاستثناء بـ "إلا" نجضتو نجاض القبورة. لكن مين يشرح لبعض الناس الفرق بين التاء المربوطة والتاء المفتوحة .. والفرق بين التاء المربوطة والهاء؟.

واصل في الاستثناء .. ولا تستثني أحداً.

Post: #169
Title: Re: إصلاح الكتابة في المنبر
Author: Osman M Salih
Date: 08-24-2005, 03:56 PM
Parent: #168

وهذه يا شقيقي في
عـنت التدوين ـ
محسـن ـ سنـدة
للبوسـت
أرك دوماً جسوراً
و بخير

Post: #170
Title: Re: إصلاح الكتابة في المنبر
Author: محسن خالد
Date: 08-26-2005, 11:01 AM
Parent: #169

شنتير،...
السلام في أبهائه وقِبَابه الصالحة والعالية،..

ولا يهمك يا سيدي، وأنا في انتظار أسمع صوتك، وأرجو أن يكون ذلك قريباً،..

والناس دي الدايراهو كتير، لكن منو بقول البغلة في الإبريق؟

أنا أكتر شيء واجعني إنو ناس قال الله وقال الرسول ديلاك، بكتبوا (إنشاء الله) هكذا،..
يعني الواحد لو دخل هنا كان عرف: إن شاء الله، وكان عرف الهمزات وحاجات كتيرة،..

بس إنت خليك عافية، والشترة ربنا يزيلها من فيضو وجودو،..



Osman M Salih،...
تحياتي يا أستاذي الكريم والفاضل،..
وأهي علامة على الطريق وخطوة من مشوار، يا شقيقي في حارة الحبر والقلم،..
وأرجو أن لا تخزلنا الجسارة لدى هاوية،..

تسلم يا رجل وتحياتنا المحبة كلها لك،.
وشكراً لمؤازرتك إصلاح الكتابة، ومن لها إن لم يكونوا الكتاب؟
والمحبة قدامك ووراك،..

Post: #171
Title: Re: إصلاح الكتابة في المنبر
Author: محمد السر
Date: 08-26-2005, 11:20 AM
Parent: #1

حضرَ الطلابُ للدرسِ إلا نوريتاً

Post: #172
Title: Re: إصلاح الكتابة في المنبر
Author: محسن خالد
Date: 08-26-2005, 11:30 AM
Parent: #171

إزيك يا ود السر،..
كويس بالتطبيقات الحية، واتوحشناهو ود نوريت، أريتو طيّب،..
وكيفك يا ود السر، خليك عافية وبطل،..

Post: #173
Title: Re: إصلاح الكتابة في المنبر
Author: محسن خالد
Date: 08-29-2005, 12:39 PM
Parent: #172

يا ود السر،...
أنا كنت منتظر نوريت يجي وأشاغلو شوية، لكن الظاهر إنو قابضاهو ظروف،..
خلينا نشاغلو في غيابو، وبالمرة نجاوب علي جزء من طلب هو طلبو،..
إنت قلت:
حضرَ الطلابُ للدرسِ إلا نوريتاً

أها أخونا هاشم نوريت قبل كدا سأل عن الممنوع من الصرف وفي الأعلام تحديداً كما أذكر،.. غايتو بجاوبك، كان ما يقوم هاشم يجيب لينا بنادق البجا وحركاتن ويجينا،

الجملة الصاح كدا:
حضر الطلاب للدرس إلا نوريت

لأنو نوريت اسم غير عربي وأكثر من ثلاثة أحرف، بالتالي بكون ممنوع من الصرف،..
وأنا ما ح أقوليك اسم (عجمي) لأنو الكلمة دي سخيفة وعنصرية، ومعناها البهيمة، يعني العرب (القدماء) بشوفوا إنو أي زول ما بتكلم بالعربي دا أعجمي،..
بالرغم من إنو ثقافة العرب نفسها والإسلام بنوها الناس الما عرب، الفرس والروم والروس وغيرن من المولدين،..
وشوف أشهر ناس في العربي هم الإربلي والدؤلي وسيبويه والسيوطي وقوم كتيرة ما متذكرها هسي، ماعدا (ابن الأعرابي) العربي، وديل كلهم ما عرب،...
التاريخ كتبوهو (الطبري) و(ابن كثير) و(ابن هشام) و(ابن الأثير) وديل ما عرب، والقرآن فسّروهوا (ابن كثير) و(القرطبي) و(الجلالين) و(المسعودي) و(ابن تيمية) وديل ما عرب،..
الأدب كتبوهوا (ابن عبد ربه) و(الأصفهاني) و(المبرّد) وديل ما عرب،..
الحديث كتبوه (البخاري) و(مسلم) و(ابن ماجة) و(النسائي) و(أبو
داؤد) وديل ما عرب،...
والمتصوفة الكبار هم (ابن عربي) و(الجنيد) و(الحلاج) و(السُهْرَوردي) و(ابن عطاء السكندري) وديل ما عرب،...
والأئمة الأربعة (أبو حنيفة) و(مالك) و(الشافعي) و(ابن حنبل) العربي الخالص فيهم هو (ابن حنبل) بس،...
والعلماء الفلاسفة (الرازي) و(ابن النفيس) و(ابن خلدون) و(الطوسي) وغيرهم، كلهم ما عرب، ما عدا (جابر بن حيان)،..
والجغرافيون (البيروني) و(ابن الفقيه) و(ابن إياس) و(الهمداني –الفارسي) ووو كلهم تقريباً ما عرب،..
أهم قواميس العربي (لسان العرب) و(مختار الصحاح) و(المنجد) عملوها ما عرب، وأهمها على الإطلاق هو لسان العرب، ودا عملو ابن منظور الإفريقي ومعروف إنو (نوبي –دنقلاوي) من أهل زميلنا "بشاشا"،...



وووو... لو فتحت في الموضوع دا ما بننتهي،..

يعني في النهاية بطلعو العرب هم العجم والبجم، هنا في الخليج بقولوا للهندي والباكستاني عجمي، بالرغم إنو الهندي والباكستاني عندو قنبلة نووية، وهم ما عندهم غير ضراطن،..
يضحك نهاركم،..

Post: #174
Title: Re: إصلاح الكتابة في المنبر
Author: محسن خالد
Date: 08-29-2005, 01:14 PM
Parent: #173

..




المستثنى بـ"غير" و"سوى"




بما أننا ما نزال في درس "الاستثناء" نفسه، فعلينا أن نبدأ بقاعدة الدرس الماضية نفسها، أو كما قلنا في الحلقة الأولى من المستثنى،..


عندنا حاجتين بنجي نشوفن أولاً بالتبادي، لو لقيناهن الكلام ببقه ساهل، ولو ما لقيناهن بعداك بنشوف الدواء كيف!


الحاجة الأولى هل الجملة قبل أداة الاستثناء (مثبتة) أم (منفية)؟

الحاجة الثانية، هل (المستثنى منه) موجود أم غائب؟


أها مع "غير" و"سوى" برضو نمسك في المدخلين ديل كويس، والباقي كلو هيّن،...


أمثلة المجموعة الأولى:

لاحظ إنها بنفس شروط المجموعة الأولى بتاعة (إلا) بمعنى إنو الجملة (مثبتة)، و(المستثنى منه) موجود:

تصدأ كُلُّ المعادن غيرَ الذهبِ، (لاحظ إنو غيرَ –منصوبة، أو...
تصدأ كُلُّ المعادن سوى الذهبِ، (وهنا برضو كان مفروض ننصب سوى، لكن بيتعذر نصبها عشان ما بنقدر ننصب فوق الألف زي ما في درس المقصور، بمنع النصب هنا التعذُّر، لكن مفروض هي تكون منصوبة، ولمن نعرب بنقول منصوبة بفتحة مقدّرة منع من ظهورها التعذُّر،...

سمعتُ القصيدة غيرَ بيتين.... أو سوى بيتين...

أثنيتُ على الطلاب غيرَ المهملِ.... أو سوى المهملِ

طيّب الخلاصة شنو؟
إذا كانت جملة الاستثناء (مثبتة) و(المستثنى منه) مذكور وموجود، أول حاجة إنو "غير" و"سوى" بياخدن حكم المستثنى نفسه، يعني حكم الاسم البجي بعد (إلا) في الدرس بتاع (إلا)، فبنعمل شنو؟ بنقوم ننصبن في رقبتن دي، وكأنهن هن المستثنى، والاسم البجي بعدن طبيعي إنو نقوم نجرو بالإضافة،...

قاعدة سهلة جدا، لو الجملة (مثبتة) و(المستثنى منه) موجود بننصب (غير) و(سوى) وبنجر الاسم البجي بعدن بالإضافة، هو أصلا ما في طريقة غير إنك تجر الاسم البجي بعدن، معقول يعني تقول: جاء الرجال كلهم غير (رجلان).. دا إلا زول خشمو أشتر من خشم معتّر ليهو العرقي،....

يعني الاسم البعد (غير) و(سوى) في جميع الحالات بكون مجرور، ودي قاعدة،..

طيّب لو كسرنا القاعدة الأولى، اللي هو أصبحت الجملة (منفية) –مش مثبتة، و(المستثنى منه) مذكور وموجود، نشوف الأمثلة:

لا يسعى أحدٌ في طلبِ الفضيلةِ غيرَ الفاضلِ...... أو....
لا يسعى أحدٌ في طلبِ الفضيلةِ غيرُ الفاضلِ....

وكمان بالنسبة لـ"سوى"،...
لا يسعى أحدٌ في طلبِ الفضيلةِ سوى الفاضلِ.... بتقدير إنو "سوى" –منصوبة،....
أو...
لا يسعى أحدٌ في طلبِ الفضيلةِ سوى الفاضلِ..... بتقدير إنو "سوى" –مرفوعة، ومنع من ظهور حركات الإعراب عليها التعذّر كما أسلفنا،...


لا أعرف مذهباً غيرَ مذهبِ الحق.... أو سوى مذهب الحقِ...




لا تثق بأحدٍ غيرَ الأمين "غيرَ" –منصوبة،.......... أو لا تثق بأحدٍ غيرِ الأمين... "غيرِ" –مجرورة،...

ونفس الطريقة مع "سوى"، هن أصلاً قاعدتن واحدة، وفي جميع الأحوال، يعني ما شرط نضرب أمثلة بيهن الاتنين، أمثلة أي واحدة بتنطبق علي التانية، الفرق بس إنو غير بتظهر عليها الحركات، وسوى بتقدّر تقدير، وبنقول منع من ظهورها التعذّر،..

طيّب القاعدة شنو:
إذا كانت جملة الاستثناء "منفية" و"المستثنى منه" مذكور في الجملة، علي كيفك، إما أن تنصبهما (غير –سوى) على الاستثناء، زي مثال: لا يسعى أحدٌ في طلبِ الفضيلةِ غيرَ الفاضلِ...

وإما أن تُتبِع (غير - سوى) لما قبلهما، زي مثال: لا يسعى أحدٌ في طلبِ الفضيلةِ غيرُ الفاضلِ....
وعشان ما يسأل زول طيّب ليه ما (جَرّيناها) لأنو (الفضيلة) اللي قبل "غير" مجرورة، بنقولو لامن نعاملها على أساس إنها جزء من الجملة، مش أداة استثناء، وهذا معنى الاتباع لما قبلها، عليه بنعاملها بموقعها الإعرابي في الجملة، وهي هنا تكون مرتبطة بالفاعل (أحدٌ)... يعني بتصبح الجملة: لا يسعى أحدٌ غيرُ العاقل في طلب الفضيلة....
طيّب من هنا ولافوق لو غلبك تصرّف معاها، أنصبها وبس، لأنو النصب في الحالتين بجوز،... زي قاعدة (إلا) في نفس الحالتين:
(مثبتة) و(المستثنى منه) موجود، (نصب) أو (رفع)
(منفية) و(المستثنى منه) موجود، (نصب) أو (موقعها الإعرابي في الجملة)..

إذن لامن تتلكلك معاك أنصبها وبس، لأنو النصب في الحالتين بجوز،..


طيّب، لو كسرنا القاعدتين، يعني لو كانت الجملة (منفية) وكمان (المستثنى منه) غائب وغير مذكور أو موجود في الجملة:

أمثلة:

لم ينفعني غيرُ الصدقِ.......... أو سوى الصدقِ...

لا تقل غيرَ الحقِ....................... أو سوى الحقِ...

لا تتعرّف بغيرِ الأخيارِ........... بسوى الأخيارِ


طيّب هنا القاعدة بتقول: إذا كانت الجملة (منفية) و(المستثنى منه) غير موجود، بنقوم نعربن (غير-سوى) على حسب موقع إعرابن من الجملة،..

يعني في الجملة الأولى بتكون (غير-سوى) فاعل... للفعل ينفعني...

الجملة التانية (غير-سوى) بكونوا (مفعول به) للفعل تقل... الفاعلو إنت...

في الجملة التالتة (غير-سوى) بكونوا مجرورين لأنو اتقدمن حرف جر،...






تفكيك عامية




لو عدنا للطفولة، والحريم بعوسن في الكسرة، ونحن نتلب جاي وجاي:

خالتي أديني شيطة... ها ولد ماتفوت من النار دي جاي وألا جاي ما تحرق،..

وبنقصد بالشيطة الكسرة البتحرق لامن تنشف وتمسك في الصاج،..

وهي فصيحة طاخ طراخ...

شَاطَ الشيءُ... شَيْطَاً... وشِياطةً وشيطوطةً: احترق،..
وشاطتِ القِدرُ شيطاً.... احترقت ولَصِقَ بها الشيءُ...
وقال الليث: التشيُّطُ شيطُوطةُ اللحم إذا مسَّته النارُ يتشيّطُ فيحترقُ أعلاه...


يقول ود ضحوية، متكلماً عن الإبل المُهَبْتَة، مخاطباً خيالات ابنته الزينة:
أبوك يا الزينة (عَكَّاهن) قبض في روسن
الهوج والشرق فوق العواتي بكوسن
أمسوا الليلة في الغُوب الكتير جاموسن
نووا العودة للغالي ورفيع ملبوسن

وفي الفصيح:
عَكَّه يَعُكُّه عَكَّاً: حَبَسه، وإبل (معكوكة) أي محبوسة،...

وكذلك نقول: فلان عكشو البوليس.... وهي بالأصل عكشبه البوليس... لأنو الباء ثقيلة حُذفت... في غرب السودان يقولون (عكشبه) كما هي في الأصل،..
وفي الفصيح: عكشب... بمعنى شَدَّه وثاقاً، كتّفو وقبضو،..


وأيضاً حين كنا صغاراً كنا نقول، فلان طَلَع فوق رأس البيت بالعُكَن،...
ونعني تلك النتوءات على الجدار، التي بمستطاع الإنسان أن يضع فيها رجله للصعود...

والعكن فصيحة تماماً، ومئة بالمئة..

في القواميس:
العُكَن والأعكان: الأطواء في البطن من السِّمَن... وواحدتها عُكْنَة... وتعكّن البطنُ صار ذا عُكَن...
وعُكَن الدرع، ما تَثَنَّى منها.......





وإلى اللطيفة القادمة مع الاستثناء بـ(خلا) (عدا) (حاشا)





...

Post: #175
Title: Re: إصلاح الكتابة في المنبر
Author: Elawad Eltayeb
Date: 08-30-2005, 08:49 AM
Parent: #174

اتوحشناك يا رجل،..

Post: #176
Title: Re: إصلاح الكتابة في المنبر
Author: هاشم نوريت
Date: 08-30-2005, 12:26 PM
Parent: #175

الافاضل
محمد السر
محسن خالد
دبيانا..
اعجبنى الدرس الجديد وفى شوق شديد ل(ما) المصدرية وعمايلها
وداير اعرف هم كم (ما) موجودة...
محمد السر حكاية الاسماء غير العربية دى عايزة ليها قعدة
وحكايتها كبيرة وياريت استاذنا محسن يكتر الحديث عنها..



همسة....
استاذنا محسن الليلة نوريت اتجه للجزيرة عديل كده ربنا يستر...

Post: #177
Title: Re: إصلاح الكتابة في المنبر
Author: محمد السر
Date: 08-31-2005, 03:28 AM
Parent: #1

أكوجا الممنوع من الصرف... حمد لله على السلامة.
أستاذنا محسن
صبحك ومساك الله بالخير
يعني المثقفين رفاقتك ديل.. لو كل واحد فيهم سوَّى عرفته في بوست زي حقك دا وبسَّطو قدر أمخاخ الزيي أنا وأخوي نوريت ما كان دعينا ليهم بالخير.. بدل ساوينها لي الليل والنهار تناص وتشيوء وما بعد الحداثة و..
يعني أنا بعد تلاتين سنة كدا لما أسمع زول يكوجن في المستثنى أقول ليهو يا حمار أستاذ محسن "الله يطراهو بالخير أو ألله يرحمه ويحسن إليه" قال: هنا لازم ننصب لأنـ..
وتخيل الدعوة دي لاقت باب السما مفتوحة... آآآآآآآآممممممييييييييييننننننن..
الساعات البتاخدا من وقتك عشان تعلمنا مقدرنها.. وإن شاء الله في ميزان حسناتك..
يا زول أنا عشان عارف دعوتي مجهجهة رفعتها لي جهات أعلى.. الليلة ضربت لي عمك الحاج عشان يديك دعوة.. بس لقيتو مافي.. لكن ما بخليه.
يضحك صباحك..
ومساك

Post: #178
Title: Re: إصلاح الكتابة في المنبر
Author: محسن خالد
Date: 08-31-2005, 04:08 AM
Parent: #177

Elawad Eltayeb،...
ونحن كمان آلشريف،...
أريتك طيب، وهاني ياك؟

كن بخير دوماً،...


هاشم نوريت،...
دبايوا،...
إنت عارف يا ود نوريت ياهو إنت زي جدودك "الدؤلي" و"سيبويه" و"الإربلي" و"الزمخشري" الماعرب ديل، ما عرب ومقدّدنها، كلو فوق جاه القرآن والإسلام وعزةً لي الله ما لي زول،..
أها (ما) المصدرية ماشة عليك، أنا قلتلك الكلام دا، لأنك إنت عارفها جاية علينا في (خلا) و(عدا)... يعني الحلقة الجاية من المستثنى،....
أنواع (ما) كتيرة، قبل كدا ما انتبهت لإني أعدهن، بتذكر هس منهن ما (النافية)، وما (النكرة) وما (الزائدة) وما (المصدرية)،...

وطلبك يا ود نوريت إن ربنا مدّ في العمر بجيهو،..

قبّال ما أقولك (لبابى) الجزيرة دي الله يستر عليها،..

كن بخير،..


محمد السر،...
تحايا، ومحبة،...
جنس كلامك دا، وكلام نوريت، دا كلام ناس هم ذاتن بعرفو وعندهم (عَرَف) زي ما بقولوا أهلنا،...

غايتو مستني دعوة عمي الحاج، أضربلو تاني، ناس أمريكا ديل دعواتن ما مضمونة،...
ويضحك دهرك،...

Post: #179
Title: Re: إصلاح الكتابة في المنبر
Author: محسن خالد
Date: 08-31-2005, 04:21 AM
Parent: #178

..



الحلقة الأخيرة من المستثنى



المستثنى بـ"خلا" و"عدا" و"حاشا"






هنا الموضوع أسهل من الدرسين الفاتو بكتير،....


أول حاجة بنجي نشوفها، هل الشباب ديل: "خلا" و"عدا" و"حاشا"... سبقتم (ما) وألا قاعدين أم ميطي ساي، بدون (ما)...

لأنو لو (ما) دي اتقدمت الأدوات –الحروف ديل، بتقوم ما تديهن فرصة غير إنهن يكونن أفعال... وبرضو الموضوع بكون ساهل، لأنو لو قطعنا شَكّهن أفعال معناها البجي بعدن وهو (المستثنى) ببساطة بكون مفعول به ليهن،... معناها لو اتقدمتن (ما) وجب بالضرورة نصب الاسم البجي بعدن (المستثنى)،...



طيّب لو ما سبقتن ما (بدون ما)... هنا علي كيفك، ممكن تعتبرن أفعال وتنصب البعدن، وممكن تعتبرن حروف جر وتجر البعدن،....

قلنا الدرس دا هنا موية بس،...

الأمثلة:

وضَعَ أبو الأسود الدؤلي أبواب النحو عَدَا بابَ النعتِ.... (بابَ –المستثنى... منصوب)...

أو وضَعَ أبو الأسود الدؤلي أبواب النحو عَدَا بابِ النعتِ.... (بابِ –المستثنى... مجرور)...

طيّب، لأنو المثال دا، عاينا وما لقينا (ما) الشقية، أها الحصل شنو، الحصل طبّقنا القاعدة ببساطة، وهي عندنا الخيار، إما ننصب الاسم بعد عدا (المستثنى) ونعتبر إنو (عَدَا) دي فعل ماضي، والبجي بعدها بكون مفعول به لها، -المثال الشق الأول،...

أو كمان نعتبر عَدَا دي حرف جر، المثال الشق الثاني، ونقوم نجر المستثنى بها،...

مثال 2

نَبَغ الطلاب ما عدا أخاك...

أو: نَبَغ الطلاب ما عدا طالباً...

وهنا ما عندنا خيارين، لأنو (ما) اتقدمت (عدا)... بالتالي بننصب ما بعدها (وجوباً)... وبنعربو مفعول به لها.... ودائماً الفاعل بكون ضمير مُسْتَتِر فيها،..
يعني هنا (عدا) بتكون فعل ماضي كسر رقبة، ليه؟ لأنو اتقدمتها ما،...


مثال 3
أُحِبُّ السفر في كُلِّ الأوقات حاشا فصلَ الشتاء.... أو حاشا فصلِ الشتاء،...

يعني بدون (ما) بالتالي بجوز النصب والجر،...

طيّب هل بجوز دخول (ما) على (حاشا)؟

ناس قالوا أيوة بتدخل، واستشهدوا بقول الشاعر:
وأما الناس ما حاشا قُريشاً.... فإنَّا نحن أحسنهم فعالاً

وبرضو بحديث الرسول: (أُسامة أحبُّ الناس إليَّ ما حاشا فاطمة).

وناس قالوا ما بتدخل، وإنو بيت الشعر الفوق دا شاذ، والحديث طبعاً ما بقدروا يقولوا شاذ سكتوا خلوهوا،...

رأيي أنا فيها إنو (ما) ممكن تدخل على (حاشا)، بيت الشعر الفوق دا ما شاذ والحديث بأكّدوا، والشاعر والرسول هما حجة على علماء اللغة المتأخرين وليس العكس،... ليه؟ لأنو أهم قاعدة في العربي إنو لغة سماعية،...

طيّب لو دخلت (ما) على (حاشا) ياها القاعدة نفسها، وجب نصب ما بعدها،...


طيّب الخلاصة شنو؟ بالنسبة لـدرس "خلا" و"عدا" و"حاشا"؟
لو ما دخلت (ما) بجوز النصب والجر،...
لو دخلت (ما) وجب النصب فقط،..


إذن لو غلبتك أي جملة، ما عليك إلا إنك تنصب وبس، لأنو النصب بجوز في الحالتين، ولو الدرس دا زهّجك، ما عليك إلا تجيب البعد (عدا) و(خلا) و(حاشا) منصوب وبس، وما تشوف ذاتو لو فيه (ما) وألا ما فيهو (ما)، لو غلبك تنصب وبس، وفي جميع الأحوال،...








تفكيك عامية






هناك كلمة غريبة، نحن فقط من يستعملها، أنا سألتُ عنها في معظم بلدان العرب لا يعرفونها، نحن بنقول: فلان دا أحوص... وفلانة دي حوصاء...

وفي لعبة البنات المعروفة:
أريكه... عمياء.... أريكة حوصا...
بقولوا (عمياء) لما الكراع تكون مائة بالمائة في نص المربع، يعني إنت ما شايف بطرف عينك،...
وبقولوا (حوصا) لما الكراع تهبش خط من خطوط المربع،...

الكراع طبعاً فصحية ومعروفة للناس،..
وكمان (أريكه) دي ذاتها فصيحة طاخ طراخ، معناها... أُريكها... أي (أوَ أُريك إياها)... يعني أورّيك ليها.... (أورّيك ليها) يعني (أُريك إيّاها)،..

العرب بقولوا أحول،... أو أحور.... تب ما عندهم أحوص وحوصاء دي،...
بمعنى العين المعيبة، أو التي فيها خلل،...

وحتى لما تكتبها في الكمبيوتر بخطلك تحتها خط أحمر، بمعنى نجرتها من رأسك،..



والكلمة فصيحة بالضبط وبدون أي تحوير فيها،..

يقول ابن منظور: الحَوصاء من الأعين التي ضاق مَشَقُّها، غائرةً كانت أو جاحظةً،..
يقول ابن الأعرابي: الحَوَصُ بفتح الحاء، الصغارُ في العيون وهم الحُوص،...

ابن منظور: الحَوَص ضِيقٌ في مؤخر العين، حتى كأنها خِيطَت، وقيل: هو ضِيقُ مَشَقِّها، وقيل: هو ضِيقٌ في إحدى العينين دون الأخرى،..





***
طيّب، برضو بنقول: حاحيت الغنم،.. والمحاحاة،... ودا كلام فصيح تمام التمام، وأنا ملاحظتي إنو اللغة المبارية الرواعية دي كلها فصيحة، ما دخلت عليها تأثيرات كتيرة،...


يقول أبو زيد: حاحَيْتُ بالمِعْزَى حِيحاءً ومُحاحاةً: صِحتُ،..
يقول أبو عمر: حَاحِ بضأنك وبغنمك... أي: ادعها،..
يقول سيبويه: أبدلوا الألف بالياء لشبهها بها، لأنّ قولك: حاحيتُ، إنما هو صوتٌ بنيتَ منه فعلاً... كما أنّ رجلاً لو أكثر من قوله (لا) لجاز أن يقول (لاليتُ)، بمعنى قلت (لا) كثيراً،...




..

Post: #180
Title: Re: إصلاح الكتابة في المنبر
Author: محسن خالد
Date: 08-31-2005, 04:21 AM
Parent: #178

يا شنتير، خلاص؟ استبينا؟؟؟

Post: #181
Title: إصلاح الكتابة بالمنبر
Author: jafar hashim
Date: 08-31-2005, 09:40 AM
Parent: #1

للرفع والتوثيق وتعميم الفائدة


الحلقة الأخيرة من المستثنى



Quote: المستثنى بـ"خلا" و"عدا" و"حاشا"






هنا الموضوع أسهل من الدرسين الفاتو بكتير،....


أول حاجة بنجي نشوفها، هل الشباب ديل: "خلا" و"عدا" و"حاشا"... سبقتم (ما) وألا قاعدين أم ميطي ساي، بدون (ما)...

لأنو لو (ما) دي اتقدمت الأدوات –الحروف ديل، بتقوم ما تديهن فرصة غير إنهن يكونن أفعال... وبرضو الموضوع بكون ساهل، لأنو لو قطعنا شَكّهن أفعال معناها البجي بعدن وهو (المستثنى) ببساطة بكون مفعول به ليهن،... معناها لو اتقدمتن (ما) وجب بالضرورة نصب الاسم البجي بعدن (المستثنى)،...



طيّب لو ما سبقتن ما (بدون ما)... هنا علي كيفك، ممكن تعتبرن أفعال وتنصب البعدن، وممكن تعتبرن حروف جر وتجر البعدن،....

قلنا الدرس دا هنا موية بس،...

الأمثلة:

وضَعَ أبو الأسود الدؤلي أبواب النحو عَدَا بابَ النعتِ.... (بابَ –المستثنى... منصوب)...

أو وضَعَ أبو الأسود الدؤلي أبواب النحو عَدَا بابِ النعتِ.... (بابِ –المستثنى... مجرور)...

طيّب، لأنو المثال دا، عاينا وما لقينا (ما) الشقية، أها الحصل شنو، الحصل طبّقنا القاعدة ببساطة، وهي عندنا الخيار، إما ننصب الاسم بعد عدا (المستثنى) ونعتبر إنو (عَدَا) دي فعل ماضي، والبجي بعدها بكون مفعول به لها، -المثال الشق الأول،...

أو كمان نعتبر عَدَا دي حرف جر، المثال الشق الثاني، ونقوم نجر المستثنى بها،...

مثال 2

نَبَغ الطلاب ما عدا أخاك...

أو: نَبَغ الطلاب ما عدا طالباً...

وهنا ما عندنا خيارين، لأنو (ما) اتقدمت (عدا)... بالتالي بننصب ما بعدها (وجوباً)... وبنعربو مفعول به لها.... ودائماً الفاعل بكون ضمير مُسْتَتِر فيها،..
يعني هنا (عدا) بتكون فعل ماضي كسر رقبة، ليه؟ لأنو اتقدمتها ما،...


مثال 3
أُحِبُّ السفر في كُلِّ الأوقات حاشا فصلَ الشتاء.... أو حاشا فصلِ الشتاء،...

يعني بدون (ما) بالتالي بجوز النصب والجر،...

طيّب هل بجوز دخول (ما) على (حاشا)؟

ناس قالوا أيوة بتدخل، واستشهدوا بقول الشاعر:
وأما الناس ما حاشا قُريشاً.... فإنَّا نحن أحسنهم فعالاً

وبرضو بحديث الرسول: (أُسامة أحبُّ الناس إليَّ ما حاشا فاطمة).

وناس قالوا ما بتدخل، وإنو بيت الشعر الفوق دا شاذ، والحديث طبعاً ما بقدروا يقولوا شاذ سكتوا خلوهوا،...

رأيي أنا فيها إنو (ما) ممكن تدخل على (حاشا)، بيت الشعر الفوق دا ما شاذ والحديث بأكّدوا، والشاعر والرسول هما حجة على علماء اللغة المتأخرين وليس العكس،... ليه؟ لأنو أهم قاعدة في العربي إنو لغة سماعية،...

طيّب لو دخلت (ما) على (حاشا) ياها القاعدة نفسها، وجب نصب ما بعدها،...


طيّب الخلاصة شنو؟ بالنسبة لـدرس "خلا" و"عدا" و"حاشا"؟
لو ما دخلت (ما) بجوز النصب والجر،...
لو دخلت (ما) وجب النصب فقط،..


إذن لو غلبتك أي جملة، ما عليك إلا إنك تنصب وبس، لأنو النصب بجوز في الحالتين، ولو الدرس دا زهّجك، ما عليك إلا تجيب البعد (عدا) و(خلا) و(حاشا) منصوب وبس، وما تشوف ذاتو لو فيه (ما) وألا ما فيهو (ما)، لو غلبك تنصب وبس، وفي جميع الأحوال،...









تفكيك عامية






هناك كلمة غريبة، نحن فقط من يستعملها، أنا سألتُ عنها في معظم بلدان العرب لا يعرفونها، نحن بنقول: فلان دا أحوص... وفلانة دي حوصاء...

وفي لعبة البنات المعروفة:
أريكه... عمياء.... أريكة حوصا...
بقولوا (عمياء) لما الكراع تكون مائة بالمائة في نص المربع، يعني إنت ما شايف بطرف عينك،...
وبقولوا (حوصا) لما الكراع تهبش خط من خطوط المربع،...

الكراع طبعاً فصحية ومعروفة للناس،..
وكمان (أريكه) دي ذاتها فصيحة طاخ طراخ، معناها... أُريكها... أي (أوَ أُريك إياها)... يعني أورّيك ليها.... (أورّيك ليها) يعني (أُريك إيّاها)،..

العرب بقولوا أحول،... أو أحور.... تب ما عندهم أحوص وحوصاء دي،...
بمعنى العين المعيبة، أو التي فيها خلل،...

وحتى لما تكتبها في الكمبيوتر بخطلك تحتها خط أحمر، بمعنى نجرتها من رأسك،..



والكلمة فصيحة بالضبط وبدون أي تحوير فيها،..

يقول ابن منظور: الحَوصاء من الأعين التي ضاق مَشَقُّها، غائرةً كانت أو جاحظةً،..
يقول ابن الأعرابي: الحَوَصُ بفتح الحاء، الصغارُ في العيون وهم الحُوص،...

ابن منظور: الحَوَص ضِيقٌ في مؤخر العين، حتى كأنها خِيطَت، وقيل: هو ضِيقُ مَشَقِّها، وقيل: هو ضِيقٌ في إحدى العينين دون الأخرى،..





***
طيّب، برضو بنقول: حاحيت الغنم،.. والمحاحاة،... ودا كلام فصيح تمام التمام، وأنا ملاحظتي إنو اللغة المبارية الرواعية دي كلها فصيحة، ما دخلت عليها تأثيرات كتيرة،...


يقول أبو زيد: حاحَيْتُ بالمِعْزَى حِيحاءً ومُحاحاةً: صِحتُ،..
يقول أبو عمر: حَاحِ بضأنك وبغنمك... أي: ادعها،..
يقول سيبويه: أبدلوا الألف بالياء لشبهها بها، لأنّ قولك: حاحيتُ، إنما هو صوتٌ بنيتَ منه فعلاً... كما أنّ رجلاً لو أكثر من قوله (لا) لجاز أن يقول (لاليتُ)، بمعنى قلت (لا) كثيراً،...




..
(


التحية والتقدير للأستاذ محسن خالد
جعفر هاشم

Post: #182
Title: Re: إصلاح الكتابة بالمنبر
Author: Shinteer
Date: 08-31-2005, 12:06 PM
Parent: #181

العزيز النصيح ... محسن. شِن حالك؟

لقد استبينا، فيما يتعلق بالاستثناء. وقد طلبت منك توضيحه متقمصاً همّاَ عاماً. أما الآن يا قريبي فإليك طلبي الخاص الذي سبق لي ذكره على حاشية إحدى المداخلات.

لَدَى .. بنت الذين. مشكلتي مع لدى (غير الظرفية). أها دي شني في عالم الإعراب؟. لدى الظرفية ظريفة ولذيذة وبنت حلال. عليك بـ لَدَى الثانية الأخرى؛ عليها النَعْلَة.

تفكيك العامية: زيادة خير.
لفتت لغة الرواعية وجذورها الفصيحة انتباهي منذ زمنٍ بعيد. وفي تقديري فإن اللغة العربية أصلها لغة رعوية في المقام الأول، مع شوية بهارات لاحقة وليدة التمدن الطارف. لقد عرفتُ كلمة رِبِق قبل أن أعلم أنّ للاستعمار ربقة، وعرفت الغارب الذي ما زال في ظن البعض قارباً.

نِخْ قلوصَك فوق صنقور لَدَى. وبالمناسبة .. كلمة قلوص دي من المفردات اليومية الدارجة بين عتاة الرعاة الأبّالة في الشرق، وربما الغرب أيضاً. أكتفي بهيك مثالات، وغيرهن كتير موجود.

وإلى لقاء. أو زي ما بتقول: يضحك صباحك/مساءك

Post: #183
Title: Re: إصلاح الكتابة بالمنبر
Author: Shinteer
Date: 08-31-2005, 02:04 PM
Parent: #182

تلحيقة:
رغم إغراءات الألف الأحمر أبو همزة .. تركنا فعل الأمر من أناخ هكذا "نِخْ"؛ فأي قياس لغوي يجيز لنا هيك استخراج يا مُحْسْ؟.

"هيك" دي عندي معاها غرام لأنها الأم البيولوجية لـ "هكذا" الركيكة ديك.

في انتظارك .. ويسعد نهارك. النهار انقرض عندكم وللا لسع فيه بليص؟.

Post: #184
Title: Re: إصلاح الكتابة بالمنبر
Author: Adil Al Badawi
Date: 09-01-2005, 00:59 AM
Parent: #183

كما في أدناه.

Post: #185
Title: Re: إصلاح الكتابة بالمنبر
Author: Adil Al Badawi
Date: 09-01-2005, 01:10 AM
Parent: #183

كما في أدناه.

Post: #186
Title: Re: إصلاح الكتابة بالمنبر
Author: Adil Al Badawi
Date: 09-01-2005, 01:16 AM
Parent: #183

عزيزي محسن خالد

شُكُر متأخِّر على الحرف الكان مزازيني والشكر أجزله على هذا البوست التحفة. حاجات ليها علاقة بدرس المستثنى العظيم:

1. حبوباتنا بقولن، لتأكيد النفي، "لا حاشا" أها، دي راكبة من وين ونازلة وين؟!
2. كلامك عن كلمة المحاحاة فرَّحني جداً لأنَّو دي الكلمة البستخدما الأيام دي عشرات المرَّات في اليوم لأنَّو، وانت عارف، حياة المدن ما فيها شي غير المحاحاة من ما تقوم تشيل وتحاحي وحتى وإنت نايم برضك ما بتنجى من المحاحاة. الحاصل إنّو أيام الجامعة (85 – 89) ولأنَّو محاحاة الزيت، البصل، الفحم...الخ كانت، كما يقول بشرى الفاضل، تعنينا فقط على تجريداتها، إدَّعى صديقنا جاليليو إنُّو نجر معكوس لكلمة المحاحاة وهي كلمة "رهرجة"وسؤالي: يا ترى عندك ليها دَرِبْ وأللا منجورة بي قَدُّوماً سنين؟!
3. يا أخوي ما دام انت وشنتير هامَّاكم لغة الرواعيَّة ما تفتحوا لينا ليها بوست براها وبالمرَّة دخِّلو معاها لغة المزارعيَّة، يعني ببساطة، لغة أهل الخلا خلا من تمدَّن منهم (وأعرب المثال ده باللاهي). بمناسبة لغة المزارعيَّة، مرَّة سألتَ في حفلة عن مراحل نمو العيش (شوكة، أضان فار، سواسيو، جداد، صقَّار...إلى أن يفرك ويقاوي) ولمَّا بقيت خلاص داير أدِّي الجايزة رفع واحد إيدو وقال لي: غلط، العيش أوَّل حاجة بِزِم!! فألقمني حجراً إذ كيف فاتت عليَّ مرحلة من مراحل نمو العيش هي الأهم في صناعة أهمَّ مشروبين سودانيين أصيلين: المريسة والآبري وما بقول الحلومر لأنَّو أعتقد دي تسمية ناس مدن ساكت وأللا شنو؟!. وعلى ذكر كلمة الآبري، عندك ياخوي ليها دَرِبْ وأللا برضها منجورة نجراً مَمَيَّز؟!.

وليضحك يومكم كلَّه ضحكاً لا يشبه "ضحك أب سنينة علي أب سنينتين" في شيء.

Post: #187
Title: Re: إصلاح الكتابة في المنبر
Author: wadahmed
Date: 09-01-2005, 03:14 AM
Parent: #1

العزيز محسن ،

لم تكن قواعد اللغة العربية يوما بهذا الجمال .

Post: #188
Title: Re: إصلاح الكتابة في المنبر
Author: محسن خالد
Date: 09-03-2005, 00:34 AM
Parent: #187


jafar hashim،...
المحبة لك يا صديقنا، وماك طيّب،..
أرجو أن تكون بخير،...
والأشواق والمحبات لك،..







Shinteer،...


الحبيب شنتير، كيفنك واتوحشناك آجنى،..
وماك طيّب،..
عارف إنو طلبك تقمّص لطلب عام، بعدين إنت دارس شنو؟ أظنو عربي، لو ما أطلع أشتر، مش كضيضيب،...
العربية فعلاً لغة رواعية بالإضافة لتحديد إنو اللغة الجات السودان على وجه الخصوص جاء بها الرعاة من العرب -قبل الإسلام بكثير، وبملاحقتنا للبيوتات العربية التي وفدت على السودان عن طريق الشرق والشمال والغرب بنجد إنهم معظمن كانوا قبائل رعوية، بالإضافة للغة الرواعية ممكن نضيف (الأفعال)، تقريباً كل الأفعال إما أنها فصيحة أو زاحفة أو منجَرَّة من فعل فصيح، هذا مع العلم إنو "أبو العلاء المعري" في "رسالة الغفران" بيرجع الأصل في لغة العرب للأسماء مش الأفعال، طبعاً ممكن تشم التأثر بنظرية القرآن في اللغة من هذه الناحية (وعَلَّمَ آدم الأسماءَ كلها)، أي من يقولون بأنَّ اللغة "علم توقيف"، بعيداً عن نظرية عمك "دارون" في التطور، ومن ثم الأصوات ثم الحاجة الوظيفية ووو....
عندنا في السودان ممكن تلقى في "التسميات" أصول إما "كوشية قديمة" أو "قبطية" أو "تركية-فارسية" أو حتى "لاتينية"، أما الأفعال فعربية كلها،...
(كلها تقريباً)
يعني: هَبَدَ... قَشَط... صَفَعَ ...خَبَط.. مَزَق... كَفَت... خَمَشَ...
يقولك، والله الجماعة ديل البيناتن ما خربت خلاص، اتلادموا قِدّام الدكان دا جنس ملادَمَة..
لَدَمَ، يلدم، لدماً... يقول ابن منظور: اللَّدمُ: اللَّطم، والضربُ بشيء ثقيل يُسمع وَقْعُه..

أخوك آلشنتيري حام مع أهلك البدو، لكن قلوصي دي تب ما شرمت أضاني، يمكن ديل أبّالة الشرق، ديل ما شفتهم،..
يقول البحتري:
حَنَّت قلوصي بالعراق وشاقها في ناجرٍ...... بردُ الشآم وريفُه


وقُبَّال ما نترد في الكلام كتير واتشايلنو اللسنات أرجع ليك لأنواع من (ما)،...
ما "النافية"،...
ما "الحجازية"،..
ما "التميمية"،..
ما "الظرفية –الزمانية"،..
ما "المصدرية"،..
ما "الصلة"،..
ما "الزائدة" لكيما، ربما، فبما...
ما "الزائدة / للتعويض"،..
ما "الكافَّة"،..
ما "المسلّطة"،..
ما "الموطئة"،..

وبالمرة كدي يا ود أشيقر أدلك علي كتاب مودِّك تمام في (حروف المعاني) هو كتاب موزون وزنة تمام يعني ما بغرِّق في الهردبيس وما بفطلو شيتاً مهم، وهو كتاب الدكتور أحمد جميل شامي (معجم حروف المعاني)،..

بالنسبة لموضوع "نِخ"،...
أيوة صحيح إنو القاعدة دائماً بنحذف حرف العلة حين الإتيان بالأمر،...
بس إنت غلطان، (نِخ) فعل أمر...... مستخرج من الفعل: (ناخ)..... مش أناخ،... وهذه تُوجّه للجمل (غالباً) وليس للشخص،...
أناخ فعل الأمر منها (أنِخ) وهذه للشخص، تقول له أنخ راحلتك،..
يقول ابن منظور: أنختُ البعير فاستناخَ... ونوَّخته فتنوَّخ، لاحظ ما بتقول نوَّخته فـ"ناخ" ولا حتى "أناخ" ممنوع، بل نَوَّخته فتنوَّخ،...
وبتذكر قول الشاعر السوداني:
نوَّختو حنّستو حَلّيت القشاط من دايرو
يا .... الماهن كشايمة بشايرو
محل النقاط طشَّ منّي ضُمّة،..
لو تبقى متذكر الرباعية دي تمها عليك الله،..

وطبعاً الأفعال مشكلتها مشكلة، والمسألة كلها سماعية بالرغم من وجود قواعد ضابطة لا أول لها ولا آخر،...
الكتاب الممتاز في مزازاة الأفعال سأوصيك به، وهو (معجم عين الفعل) للأستاذين جوزيف الياس، وجرجس ناصيف،..




بالنسبة للسيدة الفاتنة (لدى)،...
ابن منظور قصرها على معنى "عند" واستشهد بقوله تعالى (هذا ما لديّ عتيد) والعبارة يقولها الملَكُ وليس الله- يعني ما كُتِب من عمل العبد حاضرٌ "عندي"،..
الجوهري يقول: (لدى) لغة في لَدُن، ولَدُن ظرف مكان بمعنى عند إلا أنَّه أقربُ مكاناً من عند وأخصُّ منه، ويستشهد بـ(وألفيا سيِّدَها لدى الباب) ويضيف: اتصالها بالمُضْمَرات كاتصال (عليك)، يعني: لَدَيْكَ، لَدَيْكِ، لَدَيْهم، لَدَيْهن،..

غايتو ما عرفت إنت قاصد بالأخرى شنو، لكن.....
في "تذكرة أبي علي" ذكر لها هذا الرجل أحد المعاني الغريبة، ربما هو الذي تقصده أنت، قال إنها تأتي بمعنى ("هل" عن المفضَّل) واستدلَّ بقول الشاعر:
لَدَى من شبابٍ يُشترى بمشيبِ.... وكيف شبابُ المرء بعدَ دبيبِ
بمعنى: هل من شبابٍ يشترى بمشيبِ.... وكيف شبابُ المرء بعدَ دبيبِ

أها، دي ياها القاصده إنت يا شنتير وألا واحدة "لوخرى" كما تقول تيموليلت وأهل المغرب،...

وهيك فعلا بالطريقة دي بتطلع الأم الروحية لهكذا مواضيع...
أنا قايل إرجاعك ليها لي (هيك) أحسن من إرجاعي بتاع such a
لكن لاحظ، إنو الشوام ما عندهم قليب، القليب دا حقنا نحن، يعني نحن بنقول: يا زول إنت اسمك منو؟ هم بقولوا: شو اسمك يا زلمة؟
والفصيح ببدأ أقرب لكلامن هم، بأداة السؤال أولاً، وتاني باقي السؤال،..
نحن بنأخر دائماً أداة السؤال،..


يا ود أشيقر خليك عافية،...
وأرقد لليوم بالكالود تحت المسيميع، ما بوصيك،...





Adil Al Badawi،....

إزيك يا حبيب، وليك الحب،..
وأريت بلدك ممطور وقلبك كمان،..
بتاعة حبوباتنا دي ياها ذاتها، إلا مركبلها (لا) من صنقورن، مع إنو لامن يستخدموها كحرف بقولوا (حاشاي يا يمة) بدون (لا) وكدا بتظبط علي الفصيح تمام،..
ففي حاشا نجد، أنها تُكتب: (حاشَ) و(حاشى) و(حاشا) في موقع الحبوبات الذي ذكرته أي بمعنى براءةً لله ومعاذاً لله، وتُسمى في ما يقابله من الفصيح (حاشا "التنزيهية")،..

بعدين الزول ليهو حق: في زمّ، دي ضربة البداية وقولة تيت، وقولة المزاج في اتجاه المرايس والآبري،..

الآبري دي من زمان كايسة وماعارف ليها درب، المشكلة إنو اللغات الكوشية ما في ليها قاموس، أنا برجّح إنها تطلع كوشية مع إنو زمان كنت شاكّي في إنها جابوها الأتراك وربما تكون فارسية،..
غايتو لو طلعت معاي ياهو بجي بكتبها هنا،..

يا زول بالسلامة، والمعزّات كلها لك، وسلامي

Post: #189
Title: Re: إصلاح الكتابة في المنبر
Author: Adil Al Badawi
Date: 09-03-2005, 02:47 AM
Parent: #188

أشكرك عزيزي محسن مرَّة أخرى

كلامك مع شنتير عن "نِخْ" ذكَّرني موضوع كنت داير أقول ليك تمسكو في بابك حق تفكيك العاميَّة والموضوع هو لغة تخاطب أهلنا (كان رواعيَّة كان مزارعيَّة) مع حيواناتهم. يعني لاحظت إنُّو "نِخْ" دي ياها، الخالق الناطق، "إخْ" البقولوها، زي ما اتفضَّلت، للجمل. الملاحظة التانية إنُّو لغة تخاطب أهلنا مع حيواناتهم فيها تقتير مريع في استخدام الحروف، يا ترى الحكاية دي من شنو؟! شوف مثلاً: عَرْت/حاو، تَكْ/حاس، هُرْد/بَسْ، جَرْ، كَرْ، إِخْ، بِسْ...

وعلى ذكر كلمة كَرْ، أود أن أهديك هذه القصة الحقيقية راجياً أن يكون فيها استراحة لعينيك من زغللة نَضْمَ العقود، أم هي السِّبَح، البتسوِّي فيهو ده:

حبوبة فَضْلَرَّاجِ (فَضْلَ الرَّاجِي) صلَّت صلاتا وقاعدة تسبِّح. جا جداداً زاحما في مصلاتا، لمَّا طردتو بي سِبْحَتَا وما اشتغل بيها نَهَرَتو: كَرْ...كَرْ...كَرْ إِكُر دينك!! بِنَيَّات بِتَّها اسغرَبَنْ: أجِيْ آحبوبة بِتْسِبِّي الدين؟!!، قالت ليهن: هَيْ أنا خابراهو ما تَراني بشوف التيمان بِقولو جِنِس كلامي ده!

وبالسلامة إلى حين، وما بعد، تفكيك عاميَّة نضمينا مع بهايمنا.

Post: #190
Title: Re: إصلاح الكتابة في المنبر
Author: محسن خالد
Date: 09-03-2005, 05:21 AM
Parent: #189


Adil Al Badawi،...

سلام، وتاني شكراً علي النكتة –القصوصة الحلوة،..
أصوات البهائم، وأصوات النضم معاها وتوجيهها دي أبواب مطولة في العامية وفي الفصيح، لا أول ليها ولا آخر، لأنها أصوات تختلق بما يشبه حركة وأشكال ووو... شغل سوريالي،...
هناك مثلاً في الفصيح: هاع هاع... لحث الإبل، والكثير الكثير، من أصوات المستأنس والوحش،..

وبتاعة العامية ديل ترا إنت لميتن كويس، انزغمت منك: عَيْ .. دي للنعاج،..
أما لامن يعزمو البهائم علي موية وألا برسيم، ديل دايراتلهن طرق كتابة في البداية، وشيء منهن صفافير، نوع صفافير معين، وعييييك،..
الموضوع شائق... وليس شَيّقاً... كما هو في الخطأ الشائع،...

السلام يا حبيبنا، ويبدو إنو إصلاح الكتابة دا لقى حبيب جديد ومكرّب، فهنيئاً لنا بك،..

Post: #191
Title: Re: إصلاح الكتابة في المنبر
Author: محسن خالد
Date: 09-04-2005, 03:23 AM
Parent: #190

1- في العامية قصة شكلها كدا:
أسمعي يا سلمى، أنا بنقل ليك المحاضرات مافي مشكلة،...
أها الزول دا وصاحبوا بعد يبعدوا شوية من البت صاحبو بكاويهو:
أنا بنقل ليك، والله جنس بلبصة،..
بلبصة شنو ياخي البت عيانة،...
عيانة؟ بالله، ما أنا دا المرض قاجي فوقي قطية فيكم واحد بنقل لي محاضراتي؟
ياخوي بطّل البلبصة،...
بلبصة شنو ياخ،..

(البلبصة) هي بالفصيح: (البَصْبَصة)، تحريك الكلب لذنبه طمعاً أو خوفاً، شوف الكلمة دي لعيمة كيف؟ و(التَّبَصْبُص) هو التملُّق،..


2- من الكلمات العامية التي لها مرجعية إنجليزية،...

يقولك، والله لاقوهم رباطية (هنضبوهم) ليك جنس (هنضبة)

الهنضبة جاءت من Hands up البقولوها الشباب وفي وشك المسدس

Post: #192
Title: Re: إصلاح الكتابة في المنبر
Author: Adil Al Badawi
Date: 09-04-2005, 04:47 AM
Parent: #191

كما في أدناه

Post: #193
Title: Re: إصلاح الكتابة في المنبر
Author: Adil Al Badawi
Date: 09-04-2005, 04:49 AM
Parent: #191

أشكرك عزيزي محسن خصوصاً على ما وقع من طرف القُفَّة! أي، قولك:
Quote: الموضوع شائق... وليس شَيّقاً... كما هو في الخطأ الشائع،...
والواقع أنَّني كنت في حزب هذا الخطأ الشائع حتى نبَّهتني، فيمن نبَّهت، إليه وهذه إحدى فوائد هذا البوست.

تعرف، الكتابة مرَّات فيها عمى بصيرة غريب: يعني شوف لو ما نبَّهتني وكنت داير أقول، مثلاً: "الموضوع شائق وشائك في آن واحد" تلقاني، رغماً عن إنَّو الله أدَّاني جناس لا حاريهو ولا داريهو، برضك أتحذلق وأجوبكو قائلاً: "الموضوع شيِّق وشائك في آن واحد" وأكون لا لمّيت جاي (أي، في العبارة الصحيحة) ولا جاي (أي، في العبارة الرشيقة) فبالله عليك في عمى بصيرة أكتر من كده. واصل...واصل...فتِّح بصرنا وبصيرتنا...ومشكور.

Post: #194
Title: Re: إصلاح الكتابة في المنبر
Author: محسن خالد
Date: 09-04-2005, 07:47 AM
Parent: #193

Adil Al Badawi،...
فعلاً إنت زول حلو، وأنا بعرف الزول من طريقة تعبيرو،..
ونادراً نظرتي تجلّي،..
ودا ما اسمو عمى بصيرة، عمى البصيرة ما بتصلّح، دا اسمو تأخر الوقوف على الشيء،..
عارف عمى البصيرة شنو؟ إنو تحبك مغربية وتقوم تتفلهم عليها، وتطلقها،..

أها في الوداعة،...
ويضحك نهارك

Post: #195
Title: Re: إصلاح الكتابة في المنبر
Author: Shinteer
Date: 09-04-2005, 08:34 AM
Parent: #194

يا شيخنا محسن .. نعلك عافية.
أها بعد وصل أخونا عادل البدوي هنا .. أمانة ما تشوف قفشات وردود واستفسارات مجنونة في راسها. عادل ده من الناس المغرمين بالحكي واكتشاف الغريب من المتداول بين الناس، من الكلام يعني.

قلت لي لَدَى تاريها عاملة لخبطة من زمان؟ عليها النعلة في الأولين والآخرين. وأنا كمان لخبطتك بحكاية "لدى الأخرى" .. التي أعني بها لدى المعروفة الكثيرة الاستخدام دي. يعني: لديّ شوية قروش. هنا بقى بتكون مختلفة عن لدى الظرفية بتاعة "لدى الباب". أنا داير أعرف إعراب لدى .. بتاعة لديّ حمار وكلب وديك. شوف أنا خليت ليك حمار وكلب وديك كلهن بدون أي حركات إعراب لأني ما عارف لدى دي بتكون سوّت فيهن شنو. أنا داير أعرف إعرابها وبس عندما تقع في جملة بصورة زي دي.

شغلك نضيف في مسعلة نِخ وأنِخ. وعادل جاب ليها هُوادات من عائلة إخ وتك وحاو.



لـ قدّام

Post: #196
Title: Re: إصلاح الكتابة في المنبر
Author: محسن خالد
Date: 09-04-2005, 09:25 AM
Parent: #195

إزيك يا شنتير،...

وماك طيّب،..




لديَّ كلبٌ

هي أصلاً (لدى) (البمعنى "عند") + ياء المتكلم، إذن بتعرب بشكل عادي، حسب موقع "عند + ياء المتكلم" الإعرابي،..


أمسك في عند، مثلاً في القرآن: (أم عندهم خزائن ربّك) (عندهم) مضاف ومضاف إليه، الظرف والضمير، و(عندهم) كلها خبر مقدّم


تصبح جملتك: لديَّ كلبٌ.....


لدى ظرف مكان وياء المتكلم مضاف إليه،..

وتكون مرتبطة بخبر مقدّم،(في محل خبر محذوف)، زي: في الحديقةِ بقرةٌ.... عارف اللعبة دي طبعاً إنت، تقدم الظروف والجار والمجرور، بنعربو بصفتو وبنقول كتمامة في محل خبر محذوف،..
(في) حرف جر، الحديقة مجرور بفي، والجار والمجرور في محل خبر المبتدأ،...


تبقه الجملة: لديَّ حمارٌ وكلبٌ وديكٌ،...


هسي أنا قفّلت خلاص وكنت ماشي، لما شفت البوست اترفع رجعت... يعني بالمهلة بمشي أحفرها حفر تمام وأجيك، وأنا ذاتي ما كنت مفتّح ليها عيوني كويس،..



وحبابو صاحبنا عادل البدوي شكلو زول فَنّان، خلينا نقطع فيهو بالخير،...

Post: #197
Title: Re: إصلاح الكتابة في المنبر
Author: Adil Al Badawi
Date: 09-05-2005, 00:04 AM
Parent: #196

أشكرك عزيزي محسن واسمح لي أن أشكر شنتيرَ (أم هي شنتيراً) عبرك. إنتو بتقطعو فيني بالخير وأنا، والله، طاريكم الاتنين بكلَّ الخير...ومشتاق، والله، لي نَضَمي شنتير..

تعرف أنا زول مُغْرَبي، يعني عَقَابي من تالا المُغْرَبِيَّة الحَبَّتَك واتفلهمت طلَّقْتَها دي، أمانة ما اتلوَّمت لوماً شين...الزولة ما بِتَّ أعَمَّنا لَزَم...تصدِّق إنُّو لمَّا الهلال السوداني لِعِب مع الرجاء المُغْرَبي كانت راياتنا (هلالاب علي مرِّيخاب) تّهَبْهِب تَكَنَّنا في استاد؟!.

يا أخوي مسَكْتَك محل بوجعك وخلِّيني اسْتَغِل دي عشان تَفِكَّ لي الماسِكْني محل بوجعني: أَهَبِش لي عليك الله استخدامات "أنَّى" نَعَمِنُّو اتغالطنا أنا ورفيقاً لي في إنَّها بتستخدم، بالتناوب، في ظرفي الزمان والمكان وللاستفهام كمان. أهَبِشا، مافي زولاً بِفِك الاشتباك ده غيرك...ومشكور مقدَّماً.

Post: #198
Title: Re: إصلاح الكتابة في المنبر
Author: محسن خالد
Date: 09-05-2005, 03:03 AM
Parent: #197


Shinteer،....

تأكيد يا ود أشيقر،..

مشيت راجعت إعراب الآية: (هذا ما لديَّ عتيد) من سورة قاف، (معجم إعراب ألفاظ القرآن الكريم)، وطلع تقديري ليها صحيح مائة بالمائة، فقد أورد (لدى) على أنَّها (مفعول فيه-ظرف) و(الياء على أنها مضاف)،...
ونفس التفكيك مع الآية الأخرى من نفس السورة: (لا تختصموا لديَّ)، (مفعول فيه-ظرف) و(الياء على أنها مضاف)،...
وكمان مع الآية الثالثة من نفس السورة: (ما يُبَدَّلُ القول لديَّ وما أناْ بظلامٍ للعبيد)
يعني أرقد قَفَا،...


Adil Al Badawi،...
عادل البدوي ماك طيّب،..
أتاريني ردتك من أول وهجة، أظن الحاسة السادسة شمّت ريحة محبتها،..
كلو فوق جاه المغرب،..

أول حاجة بالنسبة لطريقتي أنا الخاصة مع العربي إني بتعامل معاهو كالدنيا الزائلة، مافي قاعدة بتقدر تعتمد عليها مائة بالمائة، المهم إنك بتشوف -التصنيف العام-، وبعد داك بتتعامل بمعرفتك للربكة والجوطة بس، مش بامتلاكك لقاعدة نهائية، يعني مافي قاعدة في العربي مافيها كسور وبواقي، حتى الفاعل المرفوع أبداً دا، بجي كمان "مجرور"، زي ما ربنا قال: (وكفى بالله شهيداً) اسم الجلالة هنا فاعل مجرور بـ"باء" زائدة، والآية: (وما تسقط من ورقةٍ إلا يعلمها)، وورق هنا فاعل مجرور بـ"مِنْ" زائدة.

طيّب دا مدخل لـ"أنَّى"...
أولاً هي في -التصنيف العام- ظرف مكان وبس، ليه؟ لأنو الظروف أو (درس المفعول فيه) بنقسم لقسمين أساسيين،...
1- الظرف المتصرِّف: وهو الممكن يكون ظرف أو أي حاجة تانية ما ظرف، مثل: صباح.. ضحى... مساء
(صباح.. ضحى... مساء) ديل ممكن نقول: الصباحُ بدايةُ اليوم... هنا اتعاملنا معها كمبتدأ.. و(رفعناها) إذن أمكننا أن نتصرَّف فيها... وباقي الشلّة كذلك..
2- الظرف الجامد: ودا البكون ظرف وبس، لاحدي القيامة تقوم، ما بكون أي حاجة تاني غير ظرف.
طيّب "أنَّى" البتسأل عنها دي، في -التصنيف العام- التصنيف العام قصدت منها ما تعارف عليه العلماء، والحالة التي تُطرح بها كقانون عام في كتب النحو،..
تصنيفها العام إنها ظرف مكان-جامد، (جامد الفوق دي ذاتها) يعني المفروض ما تكون إلا ظرف مكان وبس، وما بجوز تكون ظرف زمان ولا أداة سؤال بناءً على هذا التصنيف،...
دا كلام الفقراء قلناهو،..
كلامي أنا إنو في حالات وروائح كتيرة لـ"أنَّى" غير كدا، ومافي ليها داعي، يعني زمان ومكان زي ما اقترحتو إنت وصاحبك، مفروض نرسي القواعد علي بر ما أمكن، وأنا ما قابلتني بمعنى السؤال بتاتاً،...
القرآن: (أنَّى لهم التناوش) وهنا واضح إنها ظرف مكان فعلاً بمعنى: بَعُد عليهم التناوش... هنا مامعناها أداة سؤال.. انتبه يا عادل أخوي، ربما من هنا اقترحتما السؤال،...
أما (نساؤكم حرثٌ لكم فأتوا حرثكم أنَّى شئتم) فياها دي الجابت الجقلبة للجماعة النحويين –طبعاً خوفاً من الجماعة الدينيين، ما بقدرو يقولوا ظرف مكان، ويبقى بجوز صَلْق النساء من قُبُل ومن دُبُر، (صَلق دي فصيحة)،..
أها قالوا المسألة إنها رمضان وما رمضان، والصلق بالليل كان محرّم وتاني حَلّلوهو و"أنَّى" دي طلعت حَقَّت بالليل، يعني زمان،..

ويضحك نهارك،...

رأيي يا ود البدوي نسد بابها علي مكان ونتوكّل علي الله،...

Post: #199
Title: Re: إصلاح الكتابة في المنبر
Author: Adil Al Badawi
Date: 09-05-2005, 05:45 AM
Parent: #198

كما في أدناه

Post: #201
Title: Re: إصلاح الكتابة في المنبر
Author: محسن خالد
Date: 09-05-2005, 08:24 AM
Parent: #199


Post: #200
Title: Re: إصلاح الكتابة في المنبر
Author: Adil Al Badawi
Date: 09-05-2005, 06:36 AM
Parent: #198

أشكرك عزيزي محسن وأمانة ما جيتني بالفايدة. أصلو الآية "نساؤكم حرث لكم فأتوا حرثكم أنَّى شئتم" هي ذاتا سبب الغُلات، لأنَّو إن بِقَت "أنَّى" ظرف زمان أوب وإن بِقَت ظرف مكان أوبين. صاحبي بقول إنُّو قاطع الشك إنُّو "أنَّى" هنا ظرف مكان وكان داير يقوم من محلَّو داك يمشي يسوِّي سواتو وين ما داير أكان ما حَجَّزْتو بي قولي إنُّو "حرث" دي في ناس بقولو معناتا "فرج" ويبقى تجيهو من ورا، تجيهو من قِدَّام، من فوق، من تحت، بالجنبة ما فَرقت بس ما تختاهو. قام تاني جاب لي نضماً نسبو لسيدنا عمر بن الخطاب...قمت قلت ليهو يا زول كدي قول بسم الله، أنا عندي فقيراً لاحق بداوي ليك الكلام ده الكمدة بي الرمدة...خلِّيني انَّشوفو بعد داك سوِّي البِعَجْبَك..أها، قمت جيتك.

تراكا لحقتنا وفزعتنا آلفقير بي قولك رأيي يا ود البدوي نسد بابها علي مكان ونتوكّل علي الله،...بَسْ الله يقدِّرني عاد أثبت ليهو حكاية "حرث" دي وأللا إبقى أدِسَّ الكلام ده من زولي المغالتني ده، غير كدي المنعول ياهو المتوكِّل على كلام الله ومبشتن بت الناس دي كل ما جاتا العادة.

أوب ظرف الزمان القاصِدا سبَبا إنِّي جقلبت ليهو جقلبة النحويِّين القلتها إنت (رمضان وما رمضان) قام قال لي: المعنى يعني "شد وأركب" أكان في عادة أكان مافي؟! أها قام راح لي الدَّرِب في الموية وجِبت ليهو حكاية "حرث" دي وأظِنِّي سمعتها في رادي وأللا شي، لكين هي عندها مرجع وأللا كلام روادي ساي؟!.

Post: #202
Title: Re: إصلاح الكتابة في المنبر
Author: محسن خالد
Date: 09-05-2005, 08:29 AM
Parent: #200

...




إزيك يا عادل، وحبابك،..
ضحكتني بقصة صاحبك، وفي نفس الوكت اضطريتني أجر شريط القصة دي من أولو،...

الآيات كاملة:

(ويسألونك عن المحيض، قُل هو أذىً فاعتزلوا النساء في المحيض ولا تقربوهن حتى يَطْهُرن، فإذا تطهَّرن فأتوهن من حيث أمركم الله، إنَّ الله يحبُّ التوابين ويحبُّ المتطهرين(222) نساؤكم حَرْثٌ لكم فأتوا حَرْثكم أنَّى شئتم، وقَدّموا لأنفسكم، واتقوا الله واعلموا أنكم ملاقوه، وبَشِّر المؤمنين(223) -البقرة،...


طيّب، خلينا نحلل الآيات دي، من جهة لغتها، وروايتها، وما تدلُّ عليه،..
أولاً إيماني إنو القرآن دا ما فيهو كلمة مختوتة ساي، أبداً، أي كلمة في القرآن هي كلمة نجيضة ومقصودة في رقبتها، كما أنني لا أؤمن بوجود الترادفات في القرآن، يعني أي كلمة ترد في القرآن عندها معنى خاص بيها، لا هوادة لا لُحَّاقة،..
والقرآن نص متين، وبتحمّل أي مجابدة، مهما تكن،..
أها، قصة عمر بن الخطاب معروفة، ومختصرها، إنو كانت المضاجعة في رمضان ممنوعة، وكان الصيام بعد الفطرة أو لاحدي قريب العشاء، ببدأ صيام اليوم التاني، أها عمر بن الخطاب كان بنسرق وألا بياخدلو خفسة يسويلو فيها دور دورين، قُبَّال ما صيام اليوم التاني يدخل،...

طيّب، القصة دي ما عندها أي علاقة بآية (أنَّى شئتم) إطلاقاً، ولو كسروا رقبتم ما ممكن يسحبوا الموضوع دا لهنا، ليه؟

لأنو الآية 187 من سورة البقرة هي الآية البتظبط معاها القة دي، طاق طراق، لا زيادة لا نقصان،..
وعمر بن الخطاب ذاتو، ما كان كايسلو موضع لرفاثه، بل كان الموضوع موضوع تعدي لخطوط واضحة وتانية ما عندها علاقة بآية (أنَّى شئتم)،..

وهاهي الآية 187 أقراها براك، وشوفها كيف مفصّلة تفصيل علي قصة عمر بن الخطاب:

(أُحِلَّ لكم ليلةَ الصيام الرَّفَثُ إلى نسائكم، هُنَّ لباسٌ لكم وأنتم لباسٌ لهن، علم الله أنكم كنتم تختانون أنفسكم فتاب عليكم وعَفَا عنكم، فالآن باشروهن وابتغوا ما كتب الله لكم، وكلوا واشربوا حتى يتبيّن لكم الخيطُ الأبيضُ من الخيطِ الأسودِ من الفجر، ثم أتموا الصيام إلى الليل، ولا تباشروهن وأنتم عاكفون في المساجد، تلك حدود الله فلا تقربوها، كذلك يبيّن الله آياته للناس لعلهم يتقون) الآية 187 من البقرة،..


يعني كدا، انتهينا من قصة عمر بن الخطاب وعلاقتها بآية (أنَّى شئتم)
لاحظ إنو الآية دي رقم 187 وآية (أنَّى شئتم) موضوعها التسلسلي ببدأ بالآية 222 وهي بترد الآية رقم 223... يعني بيناتم 35 آية مختلفة القصص والمواضيع،..

إذن أول حاجة نسلم بيها إنو آية (أنَّى شئتم) دي عندها موضوع براها، ولا دخل لها مطلقاً بقصة عمر بن الخطاب،..

طيّب أنا بحاول أستبعد قصة عمر ليه؟ عشان ننفي شبهة إنو المراد هو الزمن، لأنو "أنَّى" بالقصة دي بتبقه كسر رقبة معناها الزمن، أنَّى شئتم يعني متى شئتم،..
بس القصة ما عندها فعلاً علاقة بآية (أنَّى شئتم)

(ويسألونك عن المحيض، قُل هو أذىً فاعتزلوا النساء في المحيض ولا تقربوهن حتى يَطْهُرن، فإذا تطهَّرن فأتوهن من حيث أمركم الله، إنَّ الله يحبُّ التوابين ويحبُّ المتطهرين(222) نساؤكم حَرْثٌ لكم فأتوا حَرْثكم أنَّى شئتم، وقَدّموا لأنفسكم، واتقوا الله واعلموا أنكم ملاقوه، وبَشِّر المؤمنين(223) -البقرة،...

طيّب الآيات دي بتبدأ بشنو، إنو في ناس جوا سألو الرسول عن (الجماع) "زمن" المحيض وأقيفوا كويس عند "زمن" دي، لأنها مهمة جداً،..
الإجابة إنو ممنوع النساء "زمن" المحيض، بعد ينتهي "زمن" المحيض مسموح ومن الحتة الأمركم بيها ربكم، طبعاً المقترح إنو الحتة دي قِدّام والدعم من الحديث الشريف: من أتى امرأة من دبرها فقد كفر، مش عصى، أبداً، بل كفر عديل كدا،..
طبعاً هنا بجوا سمكرجية تانين، اسمون ناس (فقه أصول الدين) ديل بقوموا يقسموا الكفر لي أنواع، وعندهم قاعدة كبيرة اسمها (الكفر دون كفر)، بقوموا يطلعوا الزول دا كافر حَبّة مش كتير، عشان ما يصطدموا بنصوص تاني بتقول إنو الكفر دون مرتبط بس بالأشياء العقائدية وما عندو علاقة بالمعاصي، شايف كيف؟...

(أها، الحديث دا ذاتو لو ربنا مدّ في العمر أنا عندي معاه وقفة في الإسناد بتاعو، وفي لغتو، هل هي "من دبرها" أم "في دبرها" لأنو الفرق بين "من" و"في" شاسع جداً، شساعة ما بين ناس قِدّام وناس ورا)،..

طيّب نواصل في الآية،..
أها، خاتمة الآية إنو الله يحب التوابين ويحب المتطهرين، ودي الحتة الأنا قدمت ليها بإنو القرآن مافيهو كلام ساي، كلو محكم ومقصود،..
التوابين اتقدمت علي المتطهرين، ليه؟
لأنو معناهو كان في ناس بناموا مع زوجاتن وهن حايضات، مش كانوا بنوموا مع زوجاتن من ورا، والمتطهرين معناها الناس ديل لما يتطهروا من الفعل دا (النوم مع امرأة حائض) يطهروا بالمعنى المادي يستنوهن يطهرن والدم يقيف، ويطهروا بالمعنى المعنوي ما ريجعوا للفعل دا تاني كربط للكلام بالتوابين المتقدمة،...


أها، نجي علي آية: (أنَّى شئتم)،..
اللي هي جاءت من صميم الآية التي تقدمتها، "الحَرْث" هو الحصاد بدون أي غلاط،..
نساؤكم حَرْثٌ لكم فأتوا حَرْثكم أنَّى شئتم، وقَدّموا لأنفسكم، واتقوا الله واعلموا أنكم ملاقوه، وبَشِّر المؤمنين(223) -البقرة،.

يعني النسوان ديل (تَقَاة الفول وألا القمح) حقتكم، طيب قمحكم دا تسولوا شنو؟ تحصدوهو من (وين) ما شئتم، وألا تحصدوه "متين" ما شئتم،...
وسؤال مبدئي جداً، في زول بحصد حواشتو "وين" ما شاء يعني في جرفو الفلاني وغرب أو شمال ساقية فلان، وألا كمان بحصدها "متين" ما شاء "قُبال ينتهي الخريف، قُبّال يدخل الشتاء، بعد المطر، قبل المطر"،...
طبعاً المنطقي التحكم في المكان لأنها حواشتو وعارفها وين، مش الزمان، لأنو مافي زول بيقلّع طماطمو نيَّة، ولا العجور قبل ياخد عدد معلوم من السقيات، ولا البصل،...
ودي مش المشكلة، المشكلة وين؟
المشكلة إنو لو قلنا "أنَّى" ظرف زمان، والآية مرتبطة بالناس الجو سألو عن "زمن" المحيض، ببقى نقوليهم، أشلعوا ساكت، حايض ما حايض ما عندكم شغلة، ولو قلنا "أنَّى" ظرف مكان، كمان ناس ورا بقولوا "أبشر بالخير"،..
أها، الحل شنو؟


أصلاً أهل اللغة ما عندهم مشكلة، عارفين إنو (أنَّى) دي بتاعة مكان، بس ما بدخلوا مع بتاعين الدين في غلاط خوف التكفير،..

وفقهاء الدين ما عندهم هنا مشكلة واحدة، بل مشكلتان، لو قالوا بتاعة زمان، زمانيتها بتكون راجعة علي الشباب البسألوا عن المحيض،...
ولو قالوا بتاعة مكان، ناس ورا بعيروا، ودي الجزء الصغير من المشكلة، الكبير إنو الكلام بتضارب ليهم مع الفقرة الفوق البتقول: (من حيثُ أمركم الله)،...

أها، علم المسألة دي عند ربي، وفوق كل ذي علم عليم،..



بعدين يا ود البدوي، كان حَرْث الفوق دي عملتها (الفرج) عشان تتخارج من مدلول الآية دي، "الحَرْثات" التحت ديل بتعمل فيهن شنو:
(وإذا توَّلى سعى في الأرض، ليفسد فيها ويهلك الحَرْثَ والنسل)
(كمثلِ ريح فيها صِرٌّ أصابت حَرْثَ قوم ظلموا أنفسهم فأهلكته)
(وجعلوا لله مما ذرأ من الحَرْثِ والأنعام نصيباً)
(وقالوا هذه أنعام وحَرْثٌ حجر لا يطعمها إلا من نشاء بزعمهم)
(من كان يُريدُ حَرْثَ الآخرة نزد له في حَرْثه)
(ومن كان يُريدُ حَرْثَ الدنيا نؤته منها وماله في الآخرة من نصيب)
(أن اغدوا على حَرْثكم إن كنتم صارمين)


هسي في ذمتك آود البدوي الآيات الفوق ديل كلهن، بشبهن من بعيد وألا من قريب "الفرج" وألا بعند السروال ساي بجن؟
في رأيي إنو بتوع اللغة يحلوا مشكلتن بمرق الحد للناس فوق السروبة، ويخلوا بتوع الدين والمفتتين يحلوا مشكلتن بطريقة تانية، غير تخريب اللغة، ولو ما عاجبن يقعوا قِدَّام بس، زولاً واحد عازمن ورا مافي،..
الغريبة كلهم يحاجوك في الجامع إنها (قِدّام) وبعد يصلوا العشا يتراوحوا بيوتن ناس ورا ساااكت،..

أها لامن الشِبكة دي يحلوها، صاحبك الليعَيِّد عيدو، ويحمد سيدو
يضحك نهارك



..

Post: #203
Title: Re: إصلاح الكتابة في المنبر
Author: محسن خالد
Date: 09-05-2005, 08:55 AM
Parent: #202

..

أها يا ود البدوي، خلينا واقفين في محل "من حيثُ أمركم الله" دا، هسي ضهري وجعني، واليوم عندنا هنا شطّب، إن بقينا حيين بجي بسوق الكلام من "من حيثُ أمركم الله" وأنا باحث عن المعرفة،...
والله يا ريت الزول الصحفي داك، بتاع "شهادتي لله" القال يا شيخ فلان وشيخ علان، يلحقنا بشيوخو ديل في حل المسألة دي، وأنا على استعداد للمناقشة، ولو آخد إجازة من العمل بتاعي،...

كن بخير، والمحبة كلها ليك يا ود البدوي


..

Post: #204
Title: Re: إصلاح الكتابة في المنبر
Author: محمد السر
Date: 09-05-2005, 02:05 PM
Parent: #1

يا أستاذ..
ود البدوي دا ما واقع لي!!!
أنا خايفو يكون من حمَلَة الشهادات..!! "ناس شهادتي لله وكدا!!" وشغال يدودر فيك في الدرب دا لمن تقع.. ويجي صاحبنا داك ويجيب جماعتو ويقيموا عليك الحد..
ويتخيل لي حا يفرقوا بينك وزوجك.. حا يلقوك مطلق!! يقوموا يفرِّقوا بينك وبين الذكريات الجميلة في تلك الزيجة..!! وأهو كُلُّو في الآخر حِسبة..
المهم.. بعد تخلصوا إنت وود البدوي من تحديد المكان "قُبُل ولاَّ دُبُر"، لي صاحبو داك،.. دا كان لسة زولو داك راجي فتوى، وما حدد براهو وأدبرَ وتولَّى.. الله يكضب الشينة.. أها بعد تقضوا غردكم شوف لينا دي:
كتير قعد نقول: (سوف لن)
وهسة في بوست في الصفحة الأولى فيسوف لن يتم إلا بإجراء نقد موضوعي لكل مفردات التاريخ و.. )
سوف.. وبعدها النفي دي ما قعد تقع لي.. ودخلتها في أضاني بعطس!!
أها كلامي صاح ولاَّ الجيوب الأنفية دي وصلت الأضان كمان؟؟
يضحك يومكم

Post: #205
Title: Re: إصلاح الكتابة في المنبر
Author: Adil Al Badawi
Date: 09-05-2005, 11:47 PM
Parent: #204

أشكرك عزيزي محسن فقد أوفيت وما خلِّيت. تقول لي: أها لامن الشِبكة دي يحلوها، صاحبك الليعَيِّد عيدو، ويحمد سيدو هو المنعول بتغشَّ بي دسديس الكلام وأللا بِرْجَاني أوصِّل ليهو الوصية، كلامك ده لي حدي هسي بكون فات أضانو بي غادي وأكان قريب بكون بِدُق في نوبة عيدو...ده طبعاً أكان ما بِقى أصلاً بِسَوْ سواة جماعتك القلت عليهم يحاجوك في الجامع إنها (قِدّام) وبعد يصلوا العشا يتراوحوا بيوتن ناس ورا ساااكت، الزول ظنَّيتو كان بغالت فيني حمل جمل في شان الغُلات لكين أول ما يفارقني بسوي الدايرو.

لكين الحديث آخوي لا تنساهو...شوفو...وورينا خبرو...وأهبش لينا العرب القبل الحديث لأنُّو الشي دا ما كان جا فيهو ما قال الله وما قال الرسول أكان ما كان الجماعة عايسنُّو عواسة جد وركِّز علي شعراهُم المطاليق الما بْتِتْبَلَّ في خَشُمُن فولة ديلاك إن ما لقيت فيهم مجرِّب، قَطِع شك، بتلقى فيهم طبيب ومشكور تَبْ لحدي ما أجيك بي نصيبتن تانية.

واسمح لي بي همسة في أضان ود السِّر ده: محسن دا يا خوي ما راجي ليهو زولاً يدودرو...واقف ليهو زمناً مِعِد يكسِّر في الدرق قِدَّام القلابة بَس الموضوع آخوي كان مَرقتَ مِنُّو غلاتي مع صاحبي ما بتمرُق منو غلات الناس، كل الناس، مع الناس الماسكين الدِّين من رُكْبَتو. يعني، كَدي قوم أطبع نضمي محسن الفوق ده (وهو بالمناسبة أغلبو ما قال الله وما قال الرسول) وخُتَّ الورقة في جيبك وأمش ليك أقرب جامع أنْضُم، مثلاً، في الحجاب تلقى أول واحد يمرقك كافر علي الأقل بي بعض الكتاب...أها هنا أمرق ورقتك ووريها ليهو تلقاهو قام هو ذاتو تراح كفر بي بعض الكتاب لكين ما بِرجاك تفهم الحاصل شِنو أكان ما مرَقَنَّك كرعيك ياهو المِلَحِّقك بصطونة بصطونتين.

Post: #206
Title: Re: إصلاح الكتابة في المنبر
Author: محسن خالد
Date: 09-06-2005, 00:12 AM
Parent: #204

إزيك يا ود السر،..

ياخي فقدناك في الموضوع الشائق وشائك دا،...

الغريبة ناس كتار جوا يتأكدوا تلفونياً، غايتو الدنيا دي فيها كترة مستهبلين،..

قلتيلهم ياناس هوي، أنا لا مُفتي ولا إمام جامع، أنا روائي،...

والشغلانية دي حرام بالشرع والتذوق وبقوانين الطبيعة،..

أنا مجرَّد زول داير يقول بس إنو (أنَّى) دي ظرف مكان،...


سوف لن...

طبعاً سوف بتاعة مستقبل............ ولن برضو بتاعة مستقبل،...

أها، لامن يختوهن مع بعض، صاح بتبقه في (ضرسة) بس ما حرام،...

يعني جائز تكون كدا مع الضرسة، زي بتاعة مع حلال مع الكراهة،..


وخليك أجمل مما تُمليه الظروف،..

Post: #207
Title: Re: إصلاح الكتابة في المنبر
Author: محسن خالد
Date: 09-06-2005, 00:16 AM
Parent: #206

...



بسم الله يا صاحبي عادل البدوي،..
ويسعد صباحك،..

وقفنا لدى (من حيث أمركم الله)
طيّب، النحويون بقولوا إنو (حيث) دي ظرف مكان جامد، يعني زيها زي (أنَّى) بالضبط، وكهوادة وزيادة فايدة مني بقولكم إنو الاسم البجي بعد (حيثُ) بكون مرفوع، سبحنا حيث (النهرُ) ممتلئٌ بالصخور، مثلاً،..

أها، أهل القواميس بقولوا شنو؟ ابن منظور: حيثُ ظرف مُبْهم من الأمكنة،..
يعني لا دخل لها أبداً بالزمان،..

ح نشوف نهاية موضوع ورا وقِدّام في نفس الحلقة دي،..

لكن عشان نطلع بفائدة لغوية من كلامنا دا كلو (وما نبقى بنتونّس وبنهرجل ساي) نقوم نورد المقطوع شكو من الظروف المتصرِّفة وكمان الظروف الجامدة علي المكان أو الأخرى الجامدة علي الزمان أو التالتة البتجي مرة جامدة علي المكان وتارة علي الزمان، أي الفيها خيارين،..

وبرضها مقدمة ممتازة لمواصلة نقاش قضية ناس ورا وناس قِدّام،..

الجامد قلنا إنو ما جمد على وظيفة نحوية واحدة لا يتعداها،..
يعني بجي بوظيفة نحوية واحدة هي الظرفية، كان ظرف زمان، كان ظرف مكان، أو ظرف قابل لأن يكون زمان أو مكان، بس في النهاية ظرف وليهو وظيفة (نحوية-إعرابية) واحدة،..

الظروف الجامدة على المكان:
أينَ،..
أنَّى،..
ثَمَّ –بفتح الثاء ما تفتكروها ثُمَّ بضمها،...
هنا،..
لدى،..
حيثُ،..
فوقَ،..
حَوْلَ،..
حَوالَيْ،..

الظروف الجامدة على الزمان:
قطُّ،..
عَوْضُ،..
متى،..
أيَّانَ،..
لَمَّا،..
ذاتَ مساءٍ.... لاحظ إنو "ذاتَ" دي بتكون جامدة لما تكون مضافة لزمان بس، يعني لو أضفناها لمكان بنصرّفها ونقول: بيتُك ذاتُ الشمال، وكدا (ذاتُ) المضمومة دي، بقت تختلف عن (ذاتَ) المفتوحة أبداً عشان نعربها كظرف،..
ذا صباحٍ،..
بينا،..
بينما،..

الجامد على الظرفية "زماناً" حيناً، و"مكاناً" حيناً آخر:
عند،..
لَدُن،..
قبل،..
بعد،..


طَيّب طلعنا من المقدمة دي بإنو (من حيثُ أمركم الله) دي، بتتكلَّم عن المكان بالنسبة للنحويين وبدون غلاط، لأنو (حيث) دي ظرف مكان جامد،..
(طبعاً كلامنا الذي تقدّم والفيهو الآن كلو بالنسبة للنحويين، وبنمشي نشوف ناس القواميس كمان قالوا شنو)،..

طَيّب، هل القرآن فيهو آيات تانية بتناقش القضية بوضوح أكثر، لأنو الله بقول من حيث أمرتكم، هل عندو أمر في القرآن عن نَفْس القضية في موقع آيات أخرى، الإجابة القاطعة (لا)،..
اللهم إلا باللفّة: (ما أتاكم الرسول فخذوه وما نهاكم عنه فانتهوا)، ونقوم نمشي نعتمد حديث النهي عن إتيان الدبر، وكدا نصل لقاعدة تشريعية، ويحموا صاحبك يا ود البدوي أخوي يعيّد عيدو،..

طيّب، قبل ما نمشي بهناك، لناس القواميس ونشوف الجماعة ديل مجورتن كيف، زي ما بقول أخوي شنتير، أدّي شوية ملاحظات عن الكيمان دي،...

النحويون بدؤوا بالإمام علي بن أبي طالب، يعني برؤية المسلم، ومش أي مسلم، علي بن أبي طالب تحديداً،... هذا في رواية،..

أو أنَّهم بدؤوا بأبي الأسود الدؤلي، وهو أيضاً من المسلمين الأوائل،... وهذه رواية ثانية،...

الخلاصة أنَّ نظرة "معظم" النحويين، للغة، هي نظرة تضع في حسابها عدم التضارب مع النصوص الدينية، بخاصة القرآن والحديث،...

طيّب أهل القواميس، وديل برضهم بالرغم من إنو معظمهم بياخدوا من المفسرين، وبدخلوا بشكل أساسي لنقاش لغة القرآن وغيرها من خلال كتب المفسرين –الدينيين بامتياز- إلا أن منهم ناس (الجمع) وديل زي جدّي الدنقلاوي (ابن منظور)، يعني بحجّة الجمع بدوك الأدلة كلها، من الشعر الجاهلي مروراً بالقرآن والحديث، وإلى المتأخرين،..

المتأخرون طبعاً ظهر فيهم أهل الكلام والغلاط والمعتزلة وأهل الباطن وحتى الملاحدة عديل والشرسين،...
الملاحدة أنا ذكرتهم هنا، لأنو ديل بجوا يقيسوا الكلام من خلال علوم اللغة أولاً، وثانياً بالمنطق والمقايسة مع لغة العرب القديمة والأصلية (قبل) القرآن والحديث،..
طيّب الفقرة الفوق دي موضوعة ضخمة وخطيرة جداً، منذ سنوات عديدة أنا وقفتُ لديها وسألتُ نفسي: الحل شنو؟
الحل هو إنشاء قاموس لُغوي مثل قاموس (ويبيسترز في الإنجليزية) أي الاهتمام بتحديد تاريخ المفردة كأولوية من أهم الاعتبارات،...

(لعزل اللغة التي جاء بها الإسلام عن اللغة العربية القديمة –الأصلية، الماعندها شغلة بحرام وحلال، وما عندها شغلة بتدابير فقهاء تُريد إثبات أفكار معيّنة بِلَيْ عنق اللغة ليَّاً لإثباتها)

ودا مشروع كما أسلفت، أنا شَغَّال عليهو من سنين، الكلام دا هنا ما استعراض بل في موقعو تمام، وأنا أعلنتو عشان الناس يشهدوا إنها دي فكرتي، لأنو واحد من أصدقائي شاف المشروع دا، وعرف اللعبة المكّارة والعبقرية البسوي فيها، فبمحبة قام نشر عنها موضوع في الصحافة، شوية شوية رسّل لي جواب قال لي إنو سامع همهمة تحت تحت بتقول إنو جامعة الدول العربية –المصرية، بتتكلم عن تدابير لسواة مشروع زي دا،...
أولاد الكلب، أصلو المشروع القوي لاحدي هسي في القواميس ياهو ابن منظور الدنقلاوي دا، والتاني دا برضو حق السود، وأتحداكم أعملوهو لو بتقدروا، لأنو خطاباتي لجامعة أكسفورد قاعدة عربي إنجليزي، وبشهدوا علي الشغل دا إنو حقي عشرات الأساتذة من بلاد الشام والمغرب والخليج ومصر والسودان وموريتانيا،...

(الداير الخطابات دي بنشرها ليهو، وفي نفس البوست دا، خطابات أوكسفورد)،..

وهو الموضوع ما موضوع لعب، بل من سابع المستحيلات، داير ليهو مع جلادة الباحث طربة زول بريد حاجاتو شديييد، سنين أنا عديتها بس بنتج في آلية إنتاج هذا القاموس، كيف بتعرف تاريخ المفردة، وماهي الأُسس التي ستعتمدها لمعرفة تاريخ المفردة، لأنو لو كانت هي جاهزة وألا ساهلة ما كان سووها من زمان، ما كان رجتني، بس أنا الله فتح عليّ وباصرتها،...
(المشكلة هي الفلوس الفلوس الفلوس، فلوس قدر تبقيك مجرّد طالب دكتوارة في جامعة غربية، لو عندك فلوس تصبح ابن منظور بكرة دي، منعول أبوها من حياة فقر)،..

أها، نجي نشوف كلام القواميس في "أنَّى" بعيداً عن أهل النحو،...
هل في طريقة نخارج بيها معنى الآية من إجازة ورا وقِدّام وألا لا؟

قلنا النحويين غير أنها (ظرف مكان جامد ما عندهم أكتر وألا أقل)،...

ابن منظور يقول: أنَّى كلمة معناها "أين" وقد تكون بمعنى "كيف"،...

يعني كلامك يا ود البدوي، الأنا قلت ليك ما سمعت بيهو بطلع صحيح إذا أخذناها بالمعنيين ديل، وأنا كلامي جايبو من أهل النحو لأنهم ما عندهم ليها غير أنها (ظرف مكان)،..

شوف ابن منظور بقول إنها (كلمة) بمعنى "أين" و"كيف" ودا المعنى الأساسي ليها عندو،..
ثم يضيف ابن منظور وبدون إسناد، {قال بعضهم: "أنَّى" أداةٌ ولها معنيان، أحدهما أن تكون بمعنى "متى"، وبعد دا بجيب استدلالات كلها من القرآن، لاحظ إنو ما جاب شعر جاهلي): بل قرآن:
الآية (قلتم أنَّى هذا) أي متى هذا وكيف هذا،...
ثم يُكمل: وتكون "أنَّى" بمعنى من أين، ويستدل بالآية: (وأنَّى لهُمُ التناوشُ من مكانٍ بعيد)، يقول، أي: من أينَ لهم ذلك؟}

أها، بعد داك بقع في أمثلة من الشعر، والشعر ما عندو ليها أي معنى غير "أين" وأحياناً قليلة "كيف"،...



إذن واضح إنو (الجامع –ابن منظور) الحتة الأنا حددتها بأقواس الاقتباس دي، جابها من كتاب ديني، بل بشكل واضح وبتعَمَّد يقدّم حتى معنى "متى" على "أين" الكل الاتجاهات متفقة علي إنو دا المعنى الأساسي للكلمة بالنسبة (للمعنى) والاتفاق الآخر بتاع النحويين كلهم علي إنو هي "ظرف مكان"،...
والغريبة ابن منظور دائماً بوريك الكلام جابو من وين، بس دي ما قال فيها، ولو كان الكلام ماخدو من "التهذيب" كان ثبّتو، بس يبقالي جايبو من محلاً ممهمج،..


شفتَ المجورة دي كيف يا ود البدوي!؟

قاموسي دا زي ما قلتكلم ضروري بالحيل؟ ضروري عشان تكون في لغة لأنها لغة، ومن باب إنها لغة وبس، مش لأنها داير تصحّح أو تغلّط نصوص لغوية تانية وتتصارع مع أهلها أو كمان تخاف منهم،...

طيّب نحن من حَلْقة ورا وقِدّام الفاتت قلنا إنو لا المكان بحل، مع الآية الفوق دي ولا الزمان،..

(نساؤكم حَرْثٌ لكم فأتوا حرثكم أنَّى شئتم)،..

طيّب لو جربناها بمعنى (كيف)؟

طبعاً واضح إنو لو دخّلنا الكيوف والكيّيفين الموضوع بخرب مرة واحدة،...
خصوصاً إنو الإمام مالك سُئل عن (كيف) هو استواء الله على العرش؟

فقال: الاستواء معلوم، والكيف مجهول، السؤال عنه بدعة، والإيمان به واجب،..

طبعاً السؤال عنه بدعة دي نظام محاحاة،..

المهم إنو (الكيف مجهول) ولو الآية دي "أنَّى" بتاعتها بتعني "كيف"، وأصلاً الكيف مجهول، أو بتصبح معناها "كيفما شئتم" يعني مخيّرين في الكيف، أها يا ود البدوي دي ياها ذاتها أم الطلقيت من ضنبها لقرونها،...

أها الحل شنو؟

الحل قالوا الشيخ "فرح ود تكتوك حلاّل المشبوك": إنْ ما مرقتك النصيحة، الكضب ما بمرقك"،..

بعدين لاحظ، القرآن دا مُحْكَم، أي تحريف غبي من قبل الفقهاء عشان يمرقوهوا من مشكلة "مُتَوَهَّمَة" بحشروه في مشكلة أكبر من الدايرين يمرقوه منها، ببقوه في قِلَّة عدييل- لام قِلَّة دي تفخمها عشان تديك معناها الدارجي،..

طيّب مقترحي أنا شنو: إنهم ما يكابروا ويعترفوا بإنو "أنَّى" دي من الله عَلَّمها لآدم ظرف مكان، لكن....
يرجعوا لبداية الآية (من حيثُ أمركم الله)...

وتاني يجيبوا ناس (شرطة العمليات الخاصة –القواعد الأصولية للفقه)، وديل عندهم "قاعدتان"، الأولى بتتكلم عن:
1- (آيات العام المقيِّد للخاص)
2 – (آيات الخاص المقيِّد للعام أو المطلق)


المهم، نخت القاعدتين ديل ونطلع بـ(من حيثُ أمركم الله) دي (خاص أو مُتَعَيِّن) (مُقيِّد لعام) اللي هو (نساؤكم حَرْثٌ لكم فأتوا حرثكم أنَّى شئتم)،..
(الآية الأولى معناها: في الحتة الأمركم بيها ربكم، والحتة نفسها غير مذكورة في الآية)
(الآية التانية يبقى معناها: في أي حتة تعجبكم، لكن العجب دا ذاتو نحن محدّدنو بالآية الفوق، والآية الفوق بدون شك بتأكد إنو في أمر بخصوص المسألة، بس الأمر ما مذكور، لا في الآية نفسها، ولا في القرآن كلو، وبعد داك بجوا الفقهاء بوروك إنو "العجب مُحدّد" في الحديث الشريف: البنهى عن إتيان الدبر)،..

تصدّق الفقهاء ديل وألا رجّتك وحجّتك تقيف معاهم قَنَا، بطريقتك،..

ودي أنسب تخريجة للآية، إن لم تكن التخريجة الوحيدة،..

لكن يا ود البدوي الناس المتحيّلين ممكن يقولوا في حل أحسن، ونضيف تمام التمام، بدون سمكرجية، إنو الآية التانية نسخت الأولى، ويمشوا يقصوا درب تاريخ نزول الآيات دي ومن (الروايات والرواة بتاعين القرآن أنفسهم) مش من بتاعين التفسير، لأنو بتاعين القراءات متخصصين في القرآن بس، وما عندهم غير الحفظ صم، لكن بتاعين التفسير ديل شُداد، والحتة البتخيّل ليهم إنها "ما مواسية وألا بتجيب الهواء" بقوموا يواسوها من خلال تفاسيرن، ودي كلها شغلانية غلط، مفروض الحتة المابتقع ليهم يقولوا: الله أعلم، ويبطلوا الملاوة لأنها بتجيب الملاوة،..


غايتو أنا شايف إنو أنسب تخريجة ليهم للآية ياها حقتي الفوق دي، إن لم تكن التخريجة الوحيدة،..


ألحق زولك دا أحبسو يا ود البدوي ما يغرّق في الذنوب،..


تخليص ذمة،..
أنا كلامي هنا دا، لا يدعوا إلى أي اتجاه موقفي، مع الأحكام أو ضدها، مع ما تعارف الناس على أنّه صحيح أو ضده، بل هدفي الأول والأخير هو محاحاة اللغة،...
لأني في النهاية ما ح أشبّلي زول من بتوع قِدّام، ولا كمان ماشي أحجز لي زول من بتوع ورا...

(وكلٌّ آتينا يوم القيامةِ فردا)...




..

Post: #208
Title: Re: إصلاح الكتابة في المنبر
Author: Adil Al Badawi
Date: 09-06-2005, 01:06 AM
Parent: #207

أشكرك عزيزي محسن مرَّة أخرى.

أها، شُفْتَ يا ود السِّر؟! حتى لو دودرتو، محسن، ماني غلطان هَديل ترانا استفدنا بي نَضِم لا كُنَّا حاريِنُّو لا داريِنُّو وده طبعاً فيه بعض من إجابة على سؤال: لماذا يكتب الكاتب ولماذا يقرأ القارئ؟...يعني هَسِّي محسن ساوِّي ليهو بوست لإصلاح، شكل، الكتابة في المنبر لكين إصلاح، موضوع، الكتابة في المنبر وغير المنبر ياهو بِجِي بي زي الدَّرِب السَلَكو محسن فوق ده يعني نظام "النقود الجيِّدة تطرد النقود الرديئة" وكدا وأوعَ بالَك "النقود" دي، الكتابة يعني، ما بتطرد بعضها إلا بالتداول بين الناس ومثال على ذلك جنيه الدَّهب المرق من جيب محسن فوق ده حتماً حا يصنقر تَّبْ في محل جنيهاً رَدِي مدفون في راس زول وأللا زولة وتلك قصة أخرى كبيرة جداً بس ما كبيرة علي الله ثمَّ الأقلام الساكَّاها.

Post: #209
Title: Re: إصلاح الكتابة في المنبر
Author: محمد السر
Date: 09-06-2005, 01:41 AM
Parent: #208

يا ود البدوي دوديرك جا بي فوائد كتيرة.. من ضمنها خبر القاموس.. دا الأستاذ كان داسيهو مننا
يا ريت تواصل
وتسلم

Post: #210
Title: Re: إصلاح الكتابة في المنبر
Author: محسن خالد
Date: 09-06-2005, 03:51 AM
Parent: #209

يا ود البدوي وود السر، ماكن طيبين،..

باقي إنتو ناس أهل محبة وأهل خاصة، وإن شاء الله أكون عندكم زي ما إنتو عندي،..
أرواحٌ لا هَمَّ لها سوى الجمال، والتفتُّح، لا تبغض ولا تعادي ولا تكره بالمبدأ،...
وتحب وتحتفي بكل ما هو جميل بالمبدأ،...
خليكم وازنين موجة الروح علي كدا، وقطع شك أماتكم عافيات منكم،..
وأنا في سعي دائم أخَلِّي موجة روحي مضبوطة معاكم،...


طيّب الدنيا ما مضمونة، بكرة يمكن أموت، والجماعة ديل يهمبتو قاموسي، وبقوة عين يلقى "تيم الأشرار" محل خنجر في جنازتي ويقولوا "القاموس المحسني" دي أحلى زَنَّة سمعناها من محسن خالد،....

هنا الخطاب الأكسفوردي عربي إنجليزي، والداير يسابقني علي عمل القاموس دا مرحب، وواحـ1... اتنيـ2... تلاتـ3
واحد /استعدال... اتنين /ضرب نار.... تلاتة/ جَري



Quote: القاموس التاريخي
إنه لمن الجميل لدي أن أتقدّم إليكم بمشروعي الخاص للدكتوارة، راجياً أن تَحظَى بالقبول والدعم من قبلكم، ولكم أجزل الشكر وأوفاه. وبعد:
على نحو مختصر جداً، أُحاول تعريف موضوعتها بأنها خُطّة لبناء قاموس تاريخي للّغة العربية، لأنّها واحدة من اللغات التي لم يتوافر لها قاموس كهذا. وموضوعة تاريخانية اللغة تُمثّل المنحى الأساسي للقاموس المقترح، فضلاً عن مزايا أخرى كثيرة، إذ أنّ هناك (إضافات) و(تحسينات) و(تصويبات) تالية سنستدخلها على (القاموس التاريخي) ليكون متجاوزاً لكافة القواميس المتوافرة من ناحية "المضمون" و"التصنيف" و"الأُسلوب" و"العَرْض".
ولكي تصبح فكرة (قاموس تاريخي) هذه واضحة، نقارب بين ما ننوي فعله وبين الإشارات المحدِّدة لتاريخ ظهور (المفردة) لدى قاموس (ميريام ويبسترز)، ففيه نجد أنّ المفردة تُسْتتبَع بالتصنيف: (إنجليزية قديمة: OE، إنجليزية وسيطة: ME، إنجليزية حديثة: MD) وبتاريخ ظهور الكلمة مباشرة لو كان معيّناً.
ونظراً لوعورة الموضوع ولشساعة حقله المعرفي، فيما يخص اللغة العربية تحديداً، وإشكالية تاريخها السردي، ناهيك عن اللُّغوي، سنقوم بافتراض ثلاث مراحل ننتخبها من التاريخ الحضاري للعرب إجمالاً، (بوصفهم شعوباً، ولغةً، وديانةً) عَبَرت من خلال مخاضات تاريخية/ جغرافية/ أيدولوجية كبرى، أثّرت على صياغة لغتهم وخطابهم الحضاري والإنساني بشكل عام.
ولكن رغم ذلك، نجد أنّ القريحة أو السليقة (الذاكرة الخفية والآلية للّغة) العربية قَلِقت عند تاريخ ما، لما يمكن أن يحدث للغتها، سواءً بأيدي مستعربين أو بأيدي أبناءٍ لها بعُد البون –زمانياً كان أو مكانياً- بينهم وبين أجدادهم، أصحاب تلك القريحة الصافية. وهذا ما حدث بتأكيد التاريخ والمؤرخين والواقع الملموس، ولولاه لما وُجِدت القواميس العربية من أساسه.
والوقوف عند تاريخ وجغرافية –الزمكانية- اللّغة العربية له أهمية فائقة، لأنها اللغة الوحيدة في العالم التي تتحدث بها 22 دولة تتفرّق بين قارّتين، وتتمدد في مساحة شاسعة الأمداء. أمّا الرابط العميق والمتجذِّر بين (قواميس هذه الأنحاء كلها) فهو تاريخ المفردة، وأيضاً الدال الأهم على صحتها أو خطئها، فالكلمة ما قبل القرآن (الجاهلية) لها وزن (معياري) يختلف عن الكلمة بداخل القرآن أو الحديث أو النصوص الأخرى من شعر وغيره (إبّان وخلال زمن القرآن والحديث)، والكلمة في مآثر (عهد الخلافات) في معيارية وزن جديدة، مثلما أنَّ الكلمة في العهد الأُموي (المتقوقع –لحدٍ ما- إثنياً/ لسانياً) هي غيرها في العهد العباسي (المنفتح إثنياً/ لسانياً)، وهكذا..... حتى مرحلة زمكانية اللغة، حيث ظهر (الاصطفاء الجغرافي للّغة، بعامل الاستخدام) فهناك ما استخدمه (العراقيون) و(الشوام) من الماعون الكبير للّغة، وأيضاً الحجازيون واليمانيون والمصريون والأندلسيون، وما استخدمه عربٌ آخرون مثّلوا قِلّة في بيئاتهم أو مجتمعاتهم، كعرب المغرب والجزائر وتونس وسط شعوب (المور) وعرب موريتانيا والصحراء الغربية والسودان وسط (الأفارقة) وهكذا... ومن هذه الزاوية أيضاً تتضح الطبيعة الهامة والحاسمة لتاريخانية الكلمة، وأهمية ذلك في تحديد وزنها المعياري،...
وبإشارتنا أعلاه (بوصفهم شعوباً، ولغةً، وديانةً) نُمَهِّد بلفظة "ديانة" إلى مراجعة الانقلاب الكبير الذي أحدثه الإسلام في لغة العرب، أوّلاً بكون القرآن الوثيقة الأقدم والأكثر تفوُّقاً من ناحية ثبوتها، ما خلا بعض الجُذاذات المتفرّقة واليسيرة. ثم يتلوه (الحديث) لكونه نَعِم أيضاً بدرجة توثيق لم تتوافر لنصوص غيره كثيرة، وإنْ كانت معاصرة له. وما يهمنا هو مدارس الفقهاء الدينيين التي نشأت تبعاً لذلك، وبمقوماتٍ أساسها الأبجدي هو معارف اللغة. فـ(القاموس التاريخي) يُضيء لنا تاريخ المفردة على المستويين المهمّين، إبّان وجودها على لسان (قوم) اسمهم (العرب، وكفى)، وإبّان وجودها خلال (مجتمع) اسمه (العرب/ الإسلام/ الفقه/ الخطاب الدينوسياسي). ومن هذا المنظور يُحقّق لنا (القاموس التاريخي) الكثير الفاضح، والموجع، من كشف أخطاء القراءات والخطابات والأقنعة واللُّبوسات، باعتبار أنّ النصوص الإسلامية هي هَديُّ العرب الرئيس حتى يومنا هذا، ولكون حروب المسلمين التنظيرية والفكرية كلها، وفي كافّة المجالات لا زالت حروب لغة/ نصوص/ مفردة. فمثلاً، ما أبعد معاني مفردة "النسيء" عند العرب، عنها في نص آخر يُفَسِّر القرآن لابن كثير/ الطبري/ الزمخشري/ سيد قطب، وما أغربها في معيّة فقهاء آخرين وبجيوبهم.
أما التطبيق لهذه الرسالة (القاموس التاريخي) فسأقوم بإجرائه على ألف كلمة فقط، بالنسبة لمشروع دراستي، أي سأضع منه ما هو أساس وأوّلي (الإطار النظري والآلية، مع قاموس نموذج يعالج 1000 مفردة)، على أن يستكمل المشروع من خلال عمل مؤسسي، لو توافرت الرغبة في صنع قاموس شامل وجامع، لطبيعة حجمه الضخم بالطبع. وهذه هي الخلاصة الجوهرية لفكرة مشروعي الدراسي (القاموس التاريخي).
* أما التحقُّقات الجانبية التي يمكن تحصيلها أيضاً من خلال هذا القاموس فتتجلّى في معالجة الطبيعة الكلاسيكية -غير المعصرنة- لقواميس اللغة العربية، فسيشتمل القاموس مقترحنا على الآتي:
1 – تعيين حركة عين الفعل بالنسبة لكلمات القاموس كلها. لكونها الأساس في النطق والكتابة الصحيحين للمفردة وتصريفاتها.
2- تعيين "التأنيث"، "التذكير"، "الجمع"، الإفراد"، وهذا الشيء نجده غير متمّم في القواميس الحالية، والمتّمم منه نجده قد ثُبّت بدون قصدية، ما يجعله يحدث أحياناً ويغيب في معظم الأحايين، إذ كان تواجده محض عَرَض أو مصادفة مفيدة، فهو لم يكن مقصوداً في حد ذاته، ولم تتم معالجته وتصفيته والانتباه له بصورة مدروسة واستقصائية.
3- "حصر معاني الكلمة كلها"، أو تثبيت كل ما أوردته القواميس حول المفردة مع تبيين مرجعية كل قاموس باسمه. والزعم الإضافي أن عملنا لن يكتفي بلعب دور توفيقي فحسب بين تضاربات القواميس الكثيرة واختلافاتها، بل سيُنْجِزُ وظيفةً علاجية أولاً، ثم يقوم ثانياً بوضع تراتبية انتقائية (لمعاني المفردة) حسب مكانة وقيمة القاموس الأم المأخوذ عنه. فالقواميس كلّما تأخرت لحظة ميلادها، كلّما ازدادت جمعاً وضعُفت مصداقيةً، ما لم تُتدارك بالتمحيص الدقيق والبحث المتأني.
4- سيعتمد القاموس في تبويبه على التسلسل الأبجدي الطبيعي للأحرف، ولن يعتمد طريقة معظم القواميس الكلاسيكية في التبويب لمادتها عن طريق مصدر (اللفظة). وسيتم تبويب المعجم التاريخي على هذا النحو لاعتبارات كثيرة أهمها أن القواميس القديمة تفترض في كل متصفحٍ لها عالماً باللغة، وهذا شيء يتناقض مع وظيفة القاموس نفسها، إذ لا يُعقل أن يهتدي قارئ غير محترف أو قارئ من ناطقين بغير العربية، إلى أنّه لا يمكنه العثور على كلمة "ميزان" إلا في باب مادة "وزن"، أي في مادة "حرف الواو"، الذي لن يراه مطلقاً ومهما اجتهد في كلمة "ميزان" بُغية بحثه.
مع العلم بأنّ (القاموس التاريخي) سيبيّن مصدر كل كلمة، لمعرفة أصلها وتفرّعاتها المنبنية على ذلك.
5- بل سينُوف على ذلك بأن يُثبت المصادر للأفعال الرباعية والخماسية والسداسية، الأمر غير المتحقِّق في القواميس الكلاسيكية.














Quote: A Historical dictionary

The following is an overview of my doctoral degree research project. I hope that you find it acceptable in terms of desirability and originality.
Briefly, I define its subject matter as a plan to compile a historical dictionary of the Arabic language. Arabic is one of the languages that lack such a dictionary. The historicity, in addition to other characteristic features: ‘additions’ ‘improvements’ ‘corrections’ which will be an integral part of the historical dictionary. This will endow it with supremacy among currently available dictionaries in terms of ‘content’ ‘style’ and ‘presentation.
To elucidate the idea of the "historical dictionary" I have to approximate between what I intend to do and particular references to the appearance of the ‘word’ (as a vocabulary item) in Merriam - Webster’s dictionary, where words (vocabulary items) are followed by categorical labeling – OE (old English), ME(Middle English), and MD (Modern English); and by the history of the appearance of the word directly if this history is of note.
In view of the difficulty of the subject and the expansiveness of its field, particularly with reference to Arabic language, in addition to the problematics of its narrative and lingual history, I will assume the existence of three phases, selected from the overall history of Arabic civilization (in terms of Arabs being peoples, language and religion), that have been transposed via major historical, geographical and ideological parturitions. These birth processes have generally affected the way Arabs formulate their language and discourse in the fields of civilization and humanities.
This not withstanding, we find that the natural disposition (i.e. the hidden memory and tool of the language) of the Arabic language is irritable at a certain history. This irritation derives in a great measure from what could happen to the language, either in the hands of Arabized people, or people who are separated- whether temporally or spatially- by a great chasm from their ancestors, the fountainhead of pure natural disposition. That this has actually happened is emphasized by historians and tangible reality. If it had not been so, the focus on the history and geography- temporal spatiality- of the Arabic language in the world that is spoken in 22 countries spread over two continents. The landscape of Arabic extends over domains of expansive reaches. The deep, rooted link between the lexicons of these expansive domains is the history of the ‘word’. This history is also the most important indication of its correctness or falsity. The word prior to the Koran (in the Jahiliya) has a different standard morphology from the word in the Koran, or Hadith, or other poetic and non-poetic texts (during and through the era of the Koran and Hadith). The word in the tradition of the era of orthodox caliphates has a new morphology just as the word in the Umayyad era (to some extent pure in ethno-lingual terms) is different from the word in the Abbasid era. In the Abbasid era geographical selection in usage emerged; there is a variety used by Iraqis and Sham inhabitants (the people living in the Fertile crescent area) Chosen from the big repository of the language. There are also varieties used by Hijazis, Yemenis, Egyptians and Andalusians. Still there are other varieties used by other Arabs Who Were minorities in their milieus and societies, such as the Arabs of Morocco, Algeria and Tunisia among Moors, and the Arabs of Mauritania, Western Sahara and the Sudan among (Africans), and so on. Viewed from this angle, the important and crucial nature of the historicity of the word becomes clear; so to is the role this plays in determining its morphological standard.
With reference to the above (the fact that speakers of Arabic form a continuum of nations, language and religion), I use the word ‘religion’ as an introductory item to review the great upheaval that Islam initiated is the oldest and most superior document in terms of constancy except for some dispersed and easy to deal with scraps. Secondly, there is the Hadith Which enjoyed a degree of documentation that was not available to many other texts which were contemporaneous to the Hadith. What one is concerned about here is the schools of jurists which were founded according to the tradition of the Hadith and their constituent parts- linguistic knowledge. The ‘historical dictionary’ sheds light on the history of the word on two important levels: during its reign as a lingua franca among a people called (Arabs) and during its reign in a society called (Arabs/ Muslims/ jurists/ and propellers of a religo-political discourse). This perspective avails us of the (historical dictionary)– a painfully revealing vehicle that lays bare errors of reading and discourse and masks. This is so because, firstly, Islamic texts are the main guide of Arabs up to today and, secondly, because all the theoretical and scholarly fights in all domains are still ones that involve language/texts/words. For instance, the meaning of ‘postponement’ (al nasi’iy) for Arabs is quite different from its meaning in a text explaining the Koran by Ibn kathir/al Tabri/al Zamakhashri/ Saiyd Qotb. Still its meaning is quite novel in the Writings and implications of other jurists.
Applying this (historical dictionary) will involve one thousand words only. The application includes fundamentals and primaries (the theoretical framework and the tools, together with a sample dictionary dealing with 1000 entries). The project can then be completed via institutional work if there is a desire to compile a comprehensive dictionary. This is my research project in a nutshell.
The dictionary also comprises ancillary investigative works dealing with the classic nature of Arabic dictionaries. It will include in this respect the following:
1. Determining second radicals of all the words of the dictionary because this is the base of correct pronunciation and writing as well as derivatives.
2. specifying ‘feminine’ ‘masculine’ ‘plural’ and ‘singular; this aspect is neglected in current dictionaries. Where they are specified thes is usually unintentionally done; thus the practice is occasional and lacks scrutiny and investigation.
3. ‘specifying all the meanings of a Word’ or confirming all the material about a word contained in existing dictionaries, with reference to each dictionary by title. My aim is not to reconcile discrepancies and differences here, but performing a remedial function, firstly, and then creating a selective hierarchy of the meanings of the word in accordance with the rank and value of each dictionary. Belated births of dictionaries result in accumulated entries and weakened authenticity unless followed by close scrutiny and investigation.
4. in its classification, the dictionary will rely on alphabetical order; it will not adopt the dictionary will rely on alphabetical order; it will not adopt the methods of classic dictionaries whose classifications depend on the infinitive forms of verbs. The classification of the historical dictionary will depend on this method for many reasons. The most important of these is the assumption on the part of compilers of classic dictionaries that every user is knowledgeable about language. This assumption contradicts the very function of a dictionary. It is inconceivable that an ordinary reader, or a reader whose mother tongue is not Arabic, Would know that a word should be looked up under the letter of the infinitive form of the verb formed from that word: ‘mizan’ (beginning by meem) should be looked up under ‘wazan’ (beginning by wawo). The historical dictionary will specify the indefinite form of every word in order to show its origin and derivatives.
5. Moreover, the dictionary will include the infinitive forms of quadliteral, quinqueliteral and hexametric verbs. This is not usually done by classic dictionaries.













...

Post: #211
Title: Re: إصلاح الكتابة في المنبر
Author: Adil Al Badawi
Date: 09-06-2005, 06:24 AM
Parent: #210

مشكور يا ود السر وأشاركك، يا محسن، الرأي في أنَّ أجَلَّ خدمة قدَّمها هذا الموضوع هي: محاحاة اللغة وهذا هو الشيء الذي يجعلنا نضيف، لما قلناه حتى الآن، تعليقاً متعلِّقاً بمشروع قاموسكم المنتظر وتحديداً قولكم:

Quote: ...فـ(القاموس التاريخي) يُضيء لنا تاريخ المفردة على المستويين المهمّين، إبّان وجودها على لسان (قوم) اسمهم (العرب، وكفى)، وإبّان وجودها خلال (مجتمع) اسمه (العرب/ الإسلام/ الفقه/ الخطاب الدينوسياسي). ومن هذا المنظور يُحقّق لنا (القاموس التاريخي) الكثير الفاضح، والموجع، من كشف أخطاء القراءات والخطابات والأقنعة واللُّبوسات، باعتبار أنّ النصوص الإسلامية هي هَديُّ العرب الرئيس حتى يومنا هذا، ولكون حروب المسلمين التنظيرية والفكرية كلها، وفي كافّة المجالات لا زالت حروب لغة/ نصوص/ مفردة...


والتعليق هو: دايرنَّك، أكان الله مدَّ في أيَّامك وسوِّيت قاموسك، تخلِّي "خلال (مجتمع)" دي تبقى خلال (مجتمعين)، يعني كومين: كوم اسمو (العرب/الإسلام/الفقه) وكوم تاني خالص اسمو (الخطاب الدينوسياسي) وشُفتَ الكوم التاني دا، تمسكو تعلِّقو من كريعاتو وتَسلخو سلخة نضيفة تَخَلِّي جلدو قَّد قَدُر قَّدَّ الإبرة ما فيهو ودا، بالمناسبة، ما من كراهيَّة في الخطاب ذاتو بقدر ما هو من حرص على الوصول لتصحيح ما تسمِّيه "أخطاء القراءات والخطابات والأقنعة واللُّبوسات" التي أحسب أنَّ هذا الخطاب، خصوصاً المعاصر، مليان بيها لي اضنيهو. وبالتوفيق.

Post: #212
Title: Re: إصلاح الكتابة في المنبر
Author: محسن خالد
Date: 09-06-2005, 07:13 AM
Parent: #211

..

Adil Al Badawi،...
إزيك يا حبيب،..

تعرف إني من أكبر الكارهين للغة، لأنها هي المعرقل الأساسي لجميع نواحي التفكير في البلاد المسلمة والعربية، والمتأثرة بذلك،..
في درب المزحة بقوليك، ياخي أتخيل بنية عيونة عسلية وفيهن بريق بسمة خِلْقة، وغمازات حلوين وغاليين جداً، في جيب كلو خد،...
تقوم إنت (اللغوي) (تلغلغ) وتقول ليها: إنتِ شعر، وإنت شنو وشنو... ديني أنا... القمرة ووو
تقوم هي بس تبتسم، بريق البسمة الخِلْقة يحتل ويقلّع زي فينار السفن، والغمازات يلفّن دوائر زي شيمة في دميرة عسل، يتكلّم صمتها الأبلغ،...
أها إنت ينخطف قلبك، تقوم تتعاور تاني: إنتِ شعر، وإنت شنو وشنو... ديني أنا... القمرة ووو..
لو في زول –عاقل- كان جنبك، وكان مشارك بالتأمل بس، بركبك حي الله عُكاز،..

وفي درب اللغة التاني،..
لاحظ إنو الكندي الغزالي الخوارزمي والرازي وابن النفيس ونصير الدين الطوسي وابن حيّان وووو...

الناس ديل كلهم كانوا علماء ناجحين جداً، وكانوا فاشلين جداً كمفكّرين وفلاسفة، فقط اكتفوا بنقل الفلسفات الفارسية والرومية والهندية، وأوربا عرفت أثينا من خلالهم هم،...
عارف ليه؟
لأنهم كانوا بتغالطوا مع اللغة والنصوص وحُرّاس تلك اللغة وتلك النصوص،..
علومن اتصدّرت لأوربا، مع تفكيك "جاهز" للإرث الهيليني، ومجتمعاتم هم، استمرت تغالط فيهم فيما نقلوه من فلسفة، من الجهة التانية، الجهة التانية بقت ممتلكة لعلوم وفلسفة، وجهتم هم ما تزال مستمرة في الغلاط اللغوي....
هسي عليك الله لاقاك مسيحي وألا يهودي بتغالط معاك في قضية يومية بلغة ونصوص؟ أبداً... لأنهم حسموا الغلاط دا من جاليلو وكبلر بعد ما راح فيها المسكين كوبرنيكس،...

هسي أنا لامن أشوف الناس دي بتقول العلمانية معناها فصل الدين عن الدولة بضحكوني،...
طيّب مصطلح العلمانية دا نحتوه باستدخال كلمة علم ليه؟ عدم عرفة!؟
العلمانية كانت بالأساس وبالتعريف الصحيح، فصل العلم عن سلطة الكنيسة،...
الدولة دي شني هني؟ ما موضوعة تافهة بنجز العلم الحر، وبنجزها مجتمع متعلم، مش غالاط،...

العلمانية بدت لما كوبرنيكس وغاليلو وكبلر، أشاعوا مفاهيم "علمية" ضد نظرية أرسطو، المعتمداها الكنيسة وحارساها بعكازة، وقالوا إنو نظرية أرسطو من أنّ الأرض مركز الكون والكواكب والنجوم بتدور حولها، دا كلام غلط،..
يعني لما وقف الغلاط مع اللغة والنصوص،...

العلمانية بالأصح العميق هي وقّيف الغلاط يا بتاعين السياسة الدعائيين وجهلاء،..



المسلم هو الوحيد الذي لا يزال بتغالط في كل شيء باللغة والنصوص، تقول ليهو الناس طلعوا القمر، يقولك كضب كان ذكروها في الكتاب، أو كمان مذكووورة وقديييمة، ودا أسوأ نوع من مغالطية طبقة (الدينوسياسي) الجديدة، بس الغلاط ما بديهو أي فرصة يقول: والغلاط حاكمو زي البول، ما مخليلو نفس يقول طلعوا كيف؟


..

Post: #213
Title: Re: إصلاح الكتابة في المنبر
Author: banadieha
Date: 09-06-2005, 11:47 PM
Parent: #212



سلام ياسي محسن..من غياب ولغياب ولحدي ما يزول الشاغل.

البوست مترع بالمفيد الذي لا غنى عنه لنا ومهما بلغ شأننا في اللغة ولكن طي الصفحات والعودة لما سبق من فوائد قد يقعد الكثيرين ممن أقطعوا عن متابعة المنبر وبالتالي البوست دا..ومما فاتني موضوع إذا وإذن الذي هبشك به حسين ملاسي..ولسهولة الرجوع إليه لمن اراد اضع اللينكات هنا..فورة حسين وفشتك ليها:

Re: إصلاح الكتابة في المنبر


Re: إصلاح الكتابة في المنبر

Post: #214
Title: Re: إصلاح الكتابة في المنبر
Author: Adil Al Badawi
Date: 09-07-2005, 01:14 AM
Parent: #213

مشكور، عزيزي محسن، وتجدني آسفاً لأنِّي تَوَّرْتَ نَفَسَك بالموضوع إيَّاه الذي أرجو أن لا يجد فيه سناير الطلاب بهذا البوست انحرافاً عن موضوعه، أي البوست، رغم أنف التحذير وإن كنت لا أرى ذلك فقد بدأ الموضوع بسؤال في اللغة وتشعَّب في ذلك وانتهى كذلك، مع محاحاة هنا وهنالك.

في شأن الغلاط، صدقتَ. أنا بَضيف لي كلامك إنُّو الغلاط كان ما قصَّر عمر الزول بإهراق جزء مقدَّر من هذا العمر، في فارغة ومقدودة، بقصِّرو بإنُّو يسلَّط عليك واحد يهرق دمَّك إما بإنُّو يقُص رقبتك عديييل زي ما سوَّى الجماعة مع الأستاذ محمود، أو بإنَّك ما تنجى على الأقل من بذرة من كُفُر. أعتقد أنَّ أغلب الآيات الوَرَد فيها الجدال في القرآن، سبحان الله، إمَّا إنَّها ما شاكراهو أو بتقول صراحة إنُّو يكون بي أدب حتى مع عتاة الأعداء زي فرعون مثلاً وتوجد قصة لطيفة وردت في تفسير الآية "وكان الإنسان أكثر شيء جدلاً" توضِّح إنُّو الغلاط تَّبْ ما مشكور.

كلامك عن تعريف العلمانية ذكَّرني حوار شهير أجراه صحفي فرنسي مع حسن الترابي، أم كان تعقيب من الترابي على الحوار أم غير ذلك؟! لست متأكِّداً، استغلَّ فيهو الترابي الضبابية حول تعريف العلمانية بكلِّ دهاء وأعلن على رأس الأشهاد إنُّو علماني. بيني وبينك، لو الناس عاينت للتعريف، من حيث اشتقاق الكلمة، حا يلقو إنُّو مافي زول ما علماني وحتى الناس البحاربو في العلمانية (حسب فَهَمُن ليها) تلقاهم بِحاربو فيها بأدوات علمانية*. وعشان المشاركين في البوست دا ما يقولو إنِّي اتجاهلت، تاني، تحذير الانحراف بموضوع البوست بقول إنِّي جِبْتَ الكلام دا لأنُّو نازل تِكْ في موضوع البوست ومن هسِّي صُرَّها في طرف توبك لي حَدِّي ما تفضى ليها: ضمن مسعاك لإصلاح الكتابة في المنبر، شوف لينا الاستخدام الخاطئ للمصطلحات والمفاهيم خصوصاً المتداولة تداولاً كثيفاً في هذا المنبر وتلك الناتجة عن حركة الترجمة وخصوصاً الترجمة التي نشطت في ثمانينات القرن الماضي**

*واحد أمريكي محارب للعلم (أو قول العِلْمانية بتعريفها كمشتقَّة من كلمة العِلْم) وقاعد ليهو في حتَّة ما فيها منتجات العلم (ناس كهربا وكدا) إضطرَّ يحارب علمانيتو دي بأدوات غارقة في العِلْمَانية: كان برسِّل قنابل بالبريد!...عِلِم وأللا ما عِلِم؟!
**اضطرَّ مترجم كتاب الاستشراق لإدوارد سعيد إلى أن يقوم ببحثٍ في أمر المصطلحات نتج عنه، حرفيَّاً، كتاب في جوف ترجمته لذلك الكتاب وهو البحث الذي أخرج إلى الناس كلمات مثل الجغراسي وما إليه. طبعاً شنتير أخوك دا شَرْبَان كورة النَّضَمي دا لا حتروبا.

Post: #215
Title: Re: إصلاح الكتابة في المنبر
Author: محسن خالد
Date: 09-07-2005, 01:50 AM
Parent: #214

تصحيح محسن بدل الكتابة

إلى هاشم نوريت وشنتير،..

يا أخوانا أنا معترف بإني كبرت، وعجزت، وبالتالي خَرَّفت،..

يادوب لاحظت إنو نداء ملاحقة أنواع (ما) أطلقه هاشم نوريت مش شنتير،..
ما "النافية"،...
ما "الحجازية"،..
ما "التميمية"،..
ما "الظرفية –الزمانية"،..
ما "المصدرية"،..
ما "الصلة"،..
ما "الزائدة" لكيما، ربما، فبما...
ما "الزائدة / للتعويض"،..
ما "الكافَّة"،..
ما "المسلّطة"،..
ما "الموطئة"،..

أها دا مقترح هاشم، مش شنتير،...

ويا أصحاب كلكم، خصوصاً أصدقاء هذا المكان المضطلعين معي بملاواة الكلام من أجل فائدة الجميع، النداءات هذه أنا أفهم أنها من أجل فائدتي "أنا" أولاً، فأنتم تمنحوني فرصة تعليم نفسي، ثم المراجعة والمذاكرة، وفرصة أكون صاحي، والمسألة متبادلة بينا، تكاووني وأكاويكم، ونربح بهذه المشاغبات المعرفة،..


ويا شنتير ود أشيقر،..
العيد دا.. كلو.. الجاب كنبة ناس ورا وكنبة ناس قدّام... لينا ما جابك،..

ويا هاشم نوريت،...
خليني أكاويك شوية –وألا أضحكك- إنت شَرّدك موضوع "أنَّى" دا وألا شنو؟

وثانياً إلى الأخ ABUZEEGH،...
ياخي وينك إنت! واعدنا تجي تشولب معانا وتاني ما جيتنا صادي، أنا قريت كلامك هسي بروابط "بناديها" الختاها دي، وافتكرت إني ما رديت عليك لأنو ردك شكلو لم يأتِ علي التسلسل الطبيعي، أها كتبت ليك رد جديد، بس فتشت كويس قمت لقيت إني رديت عليك في صفحة تانية حينها،...
بس قلنا نعرقك ونسأل منك،..
إن شاء الله تكون بخير،..

وشكراً للأصدقاء جميعهم،..


قاعد أنا يا بناديها وعادل وبرد عليكم هسي،..
يا عادل الكلام حول كتاب الاستشراق وحول ترجمة كمال أبو ديب ليه (ذو أزقّة)،...

.

Post: #216
Title: Re: إصلاح الكتابة في المنبر
Author: محسن خالد
Date: 09-07-2005, 02:48 AM
Parent: #215

..



banadieha،...
إزيك،..
ويمين قلبي أنا قلت الليلة أسأل منك، وأفقدك،..
قمت جيت لقيتك غشيتنا،..
وأبقه طيّب دوام،..

لو إنت ما جيت من موضوع (إذن) دا بتكون طوّلت شديد، تاني ما تنقطع ما أمكنك...
وكن أبداً بخير،..
واتوحشناك آلشريف،..



Adil Al Badawi،...

الغلاط دا والله بيكف رحمة الله من النزول،..
وأنا بطبيعتي الناس الغالاطين في الدرب دا ما بمشي معاهم، بعدين هو مرض نفسي، دا بمعناه الصغير،..
بمعناه الكبير، لابد من إيقاف غلاط المتشعلقين في الدين هؤلاء، مع تطور الحياة بشكل عام،..

في اتجاه العلمانية، أسوقك تاني في اتجاه قاموس محسن، نحن ما ننسى إنو الناس ديل لغتن تاريخ المفردات فيها معروف، يعني هم عارفين متين أي مفردة ظهرت عندهم،..
بعدين المفردة دي بتلقاها بمعناه الصحيح القلتو أنا فوق دا لمن تقرأ تاريخ العلوم في أوربا، والفيزياء تحديداً، الحرب الدارت بين الفيزيائيين والكنيسة دي الحرب الجابت المفردة دي، ودي الفترة التاريخية نفسها، البعتبروها الفاصل بين (القرون الوسطى) و(عصر النهضة)،..
يعني نحن لسه في غلاط القرون الوسطى،...
أنا زول درست اقتصاد، ولمن تقرأ ما يُزعم أنَّه (اقتصاد إسلامي) بتتأكد فعلاً من إنك في القرون الوسطى.. ومن إنو الناس البغالطو في كل شيء ديل، باللغة والنصوص، هم حقيقة سبب كل التكريس للبدائية والقرون الوسطى، وإنو ما في حل غير ترك الغلاط،..

هسي في البورد دا، شوف كمية الغلاط، يعني شعب كامل من طينة الغلاط، لأنو أنتجهم مجتمع سلطوي ومتحكّم،..
الواحد مفروض يقول رأيو وبس، وبطريقة بتعتني بالشرح والتوضيح، مش الغلاط،..
لأنك في النهاية (إنت –مش الزول داك)... قول رأيك وامش،..

طيّب، كنت ناوي أكتب ملاحظات كتيرة عن كتاب (الاستشراق)، لكن لقيت دا ممكن يجرني لاستطرادات وتطويلات هسي فتران وما قادر عليها،..

لكن بالإجمال كدي، مسألة المصطلح دي مفروض يعملولها معاهد متخصصة عشان تفك الأزمة دي، لأنها مش أزمة فلسفة وبس، أبداً، بل أزمة وجود كاملة- من فلسفة وعلوم وفنون وآداب ويومي،...
من مصطلحات الفلسفة البقت بعد نقلها للعربية ما عندها أي معنى، وحتى ناس الطب –ديل كمان قالوا كتب الطب العربية بتاعة سوريا والعراق إخير منها اللاتينية بتاعة القرون الوسطى، وناس الهندسة وناس الفنون والاقتصاد ولامن تصل الكمبيوتر بتقول عيييييييييك...
غايتو ربنا يكون في عون أي أمة غير منتجة للمعرفة،...
لأنو أزمة المصطلح سببها الحقيقي إنك متلقٍ للمعرفة وحسب، مستورد وغير مصدّر،..
وما دايرين نضرب المثال المكرّر بتاع (Algebra ) –جابر ابن حيان، (logarithm) اللوغريثمات –الخوارزمي، ووو حتى المثال الكبير الخاص بينا نحن، لأنو جغرافيا (الإدريسي) الكان بتلكم فيها بشكل الخواجات ما فهموهوا عن دنقلا وكريمة فهموا منها إنو هو نوبي، ولمدة 200 سنة في أوربا عُرف كتابو الشهير بـ(جغرافيا النوبي)، أها، تاني بعداك دا بقه مصطلح، وما بقدروا يغيرهو،..
يعني لمن كانت الحضارة الإسلامية منتجة للمعرفة، كانت الحضارة الغربية عندها مشكلة مصطلح،..
وبفتكر إنو دا عقاب إلهي لكل متقاعسٍ كسول، وغير منتج، عشان كدا السوداني عندو أزمة في كل حاجة، من لباسو لي رأسو،..


لكن برضو اللغة وراها، لأنو الياباني ممكن يصنع حاجة وكمان يخترع ليها اسم، لكن ما بقدر يبيعها في السوق، إلا يقول (يلا علينا جاي، وكلو بخمسة) بالإنجليزي، والسبب الخفي والتاريخي للقصة دي هو (مرحلة الاستعمار) مدعومة بسهولة اللغة الإنجليزية مقارنةً باللغات الأخرى، ومدعومة بإنو السيطرة الحالية للآلة الإعلامية التي تبث "معرفة" و"سينما" و"أخبار" و"دي في دي" وانترنت ووو من بلدان إما إنها ناطقة بالإنجليزية وإما إنها ملمة بها نتيجة الاستعمار أو -التعليم،...
أها خليك عافية،..


..

Post: #217
Title: Re: إصلاح الكتابة في المنبر
Author: Adil Al Badawi
Date: 09-08-2005, 03:32 AM
Parent: #216

Quote: كاليم أُوقظ حياتي، وأمضي في الموج دون أن أنتظر،..
العواصف تضرب رجلي، والنوارس تتخطّف مشيتي،..


كل ما أشوف نَّضمي زي نضميك الفوق دا بشبِّهك بي راعي بهايمو راتعة رتعة جَدْ لدرجة إنُّو إجيهو إحساس بالفياقة (والفايق الهم إزِمُّو) يقوم إتْكِل راسو علي شَدَرة وإشيل وإدوبي وأللا إمْرُق زُمْبَارْتو إمسحا بي حِنِيَّة وإزمبر، إبَكِّي الكون كُلّو إلا نفسو. يا ترى قلبك بقول ليك شِنو؟!...أنا غايتو بقول لي: ما أقسى الهدوء على الروح الوحيدة!...عقلي؟!، بقول لي: أمانة آلكشاكيش ما ليك حوبة.

Post: #218
Title: Re: إصلاح الكتابة في المنبر
Author: محسن خالد
Date: 09-18-2005, 04:23 AM
Parent: #217

Adil Al Badawi،...
إزيك يا عادل ومشتاقين،..
عارف خليني أكاويك، جنس كلامي دا حق زول غنموا لمّت فيهن (نَقَرَة) عدّمتن الحلابة وأم كشكوش،..

والله قلبي دي بقول لي كترة كلام، أهم حاجة فيهو: "الدنيا" دي.. ورطة شنو دي؟ لكن بحاحيني من هناك بيت "أبو العلاء المعري التنوخي":
أيها الغِرُّ إن خُصصت بعقلٍ... فاسألنه... فكُلُّ عقلٍ نبيُّ

وهو الرجل المجرم نفسه الذي قال:
تعبٌ كلها الحياة... فما أعجبُ... إلا من راغبٍ في ازدياد

وأمانة يا الكشاكيش ما ليك حوبة،..
خليك عافية وطيّب










تنبيه

الأعزاء وأصدقاء هذه (الحادثة الكتابية) أرجو منكم جميعاً أن لا ترفعوا هذا البوست مع ارتقابٍ لي (أعني وشيكاً)، فأنا سأتغيَّب قليلاً، كما أنني في وضعية لا تسمح لي حالياً بالمتابعة،..
ومن شاء أن يُلبس هذا البوست (فستان عيده) لوجه عيد الكتابة، فهو حُر،...




.

Post: #219
Title: Re: إصلاح الكتابة في المنبر
Author: محسن خالد
Date: 10-12-2005, 08:01 AM
Parent: #218

يُمَّه.. أنا زولي ما جا و"بشكى" أنا زول راجيه


هذه الأغنية تَحَدَّرت من البطانة، لذا تلوح مفردة (بشكى) كمفردة غريبة خرطومياً‘ وإن هي بالنسبة للبطانة مألوفة جداً، في السابق،..

و(البشكى) هي الناقة السريعة،...

Post: #220
Title: Re: إصلاح الكتابة في المنبر
Author: محسن خالد
Date: 10-12-2005, 08:04 AM
Parent: #218

يُمَّه.. أنا زولي ما جا..... و"بشكى" أنا زولي راجيه


هذه الأغنية تَحَدَّرت من البطانة، لذا تلوح مفردة (بشكى) كمفردة غريبة خرطومياً‘ وإن هي بالنسبة للبطانة مألوفة جداً، في السابق،..

و(البشكى) هي الناقة السريعة،...

فالحبيبة تستحث تلك الناقة السريعة لإبلاغهم الحبيب في أسرع وقت،..

Post: #221
Title: Re: إصلاح الكتابة في المنبر
Author: Adil Al Badawi
Date: 10-13-2005, 01:59 AM
Parent: #220

عزيزي محسن،

بركة الشفناك طيِّب وبصراحة خُفَتَ بوست إصلاح الكتابة ده إلحقو، في فورتك وقومة نَفَسَك ديك، برطوش بطوشين من شاكلة "كتابة شنو البصلحوها في منبر زي دا، إن شاء الله عنَّها ما انصلحت". أها، عشان أبرِّد ليك نَفَسَك زيادة داير أقُصَّ ليك قِصَّة عن واحد من أهلك ناس البطانة:

قال ليك الجماعة عِنْدَهُم واحداً بحاكمو فيهو سارق ليهو غنماية...أها لمَّا المحاكمة طوَّلت في غلاط من نوع: أحلف بالله...بَحلِف، أحلف بي hالشيخ حسن...ما بحلف، قام كبير الجماعة زنقو بول ومرق بي ضهر المحكمة إتناول ليهو حجراً إتجمَّر بيهو. لمَّان قضى جا داخل المحكمة يربط في تِكَّتو وحجر جُمارو في إيدو...لِقَى زولو حكمو عليهو، سأل جماعتو: أها آناس...حكمو عليهو بي شنو المرمَّد؟! قالوا ليهو: حكمو عليهو بي كذا. زولك رمى حجر الجُمار فوق طربيزة القاضي وقال: طلَّق إيَّا مُشهادو!

البوست ده مشهادو ماهو سجناً في قاع المنبر المنشود إصلاح الكتابة فيهو دا. عشان كدة جيتك بي واحدة خفيفة...سَلاخِيَّة يعني:

المثل بقول "سيد الرايحة بفتِّش خشم البقرة" وأنا الرايحة البفتِّش فيها في خشم البوست ده هي كلمة "خَشُم" دي ذاتا. يعني، عندنا الخشم ياهو الخشم كان خشم الزول كان خشم البيت كان خشم القِربة كان خشم الموس. المشكلة إنُّو الناس النحنا قاعدين حداهم ديل إن قاصد الخشم لازم تاخدلك سندة، زي ما قال زول "الفِنِّيسَة"*، لا فوق، يعني: الخشم عندهم هو "النَّخَرة" عندنا عشان كدي تلقاهم، لمَّا يجو يوعدو بي شيء، يقولولَكْ: "على خشمي" وكأنَّهم قاصدين "رغم أنفي"...ياخوي، الصاح منو؟! مع إنُّو، أكان ما أخاف الكِضِب، بقول الاتنين غلطانين والفصيح يملأ شبكتو.

* "الفنِّيسة" قرية من قرى جنوب البطانة أراد "شيخ العرب" أن يستدعي عمدتها فنسي اسمها فقال: إجينا آجماعة شيخ ####### فقام إليه شيخ "الفنِّيسة" ونبَّهه إلى خطئه بالقول: أُخُدْلَك، آشيخ العرب، سندة لا فوق!!

Post: #222
Title: Re: إصلاح الكتابة في المنبر
Author: محسن خالد
Date: 10-13-2005, 02:42 AM
Parent: #221

..

عادل البدوي،
والله تحيات، واتوحشناك بزاف آلشريف، محباتنا ليك، وشكراً جزيلاً لكلامك ومغازيه،...

الخشم، بدون ما أدخل في بابها الواسع، هي الأنف ولا علاقة لها أبداً بالفم، يعني هم صاح طاخ طراخ، ونحن غلط طاخ طراخ،..
(الخشم هو النُّخْرَة –طبعاً بالعامية نحن بنفتح النون ودا غلط، أو الأنف) ولا علاقة له بالفم مطلقاً،..
أما الأهم يا ود البدوي، هو عن صديقنا شنتير ود أشيقر، ياخي الزول دا شفقني عليهو ووالله ماني عارف ليهو عنوان غير الإيميل، رسلت ليهو إيميلين وما برد، الزول دا تب مو شديد، ياكمان مسافر،..
دحين آخوي لو عارف منو خبر وريني، وألا كمان خلي لي تلفونو هنا، الزول دا شفقني عليهو بالحيل،...


..

Post: #223
Title: Re: إصلاح الكتابة في المنبر
Author: Adil Al Badawi
Date: 10-13-2005, 03:05 AM
Parent: #222

مشكور يا محسن. شوف المسنجر في شأن شنتير.

ودمتما.

Post: #224
Title: Re: إصلاح الكتابة في المنبر
Author: عبدالله الشقليني
Date: 10-13-2005, 02:22 PM
Parent: #1

منْ يرفع قلمه ليتحسس مكان الحِبر ؟

اللُغــة تَستَحِق العِناية

شكراً للأديب مُحسن

Post: #225
Title: Re: إصلاح الكتابة في المنبر
Author: محسن خالد
Date: 10-14-2005, 02:31 PM
Parent: #224

..


Adil Al Badawi،..
شكراً يا عادل، ولو أنَّ التلفونات لم تستجب، وما زلنا نجهل خبره،..
وتحياتي،..



عبدالله الشقليني،..
وشكراً لك أنت يا أديبا الشقليني،..
وعامر الحنان،..
تحياتي،..
وكن بخير، أبداً بخير،..


..

Post: #226
Title: Re: إصلاح الكتابة في المنبر
Author: Shinteer
Date: 10-20-2005, 01:19 PM
Parent: #225

سلام يا أهل الدار. الزول القارح محسن صاحب القلم المِشاقِق، يسأل عنك الخير .. والعذر عندك مقبول.

أزيك يا عادل .. اظهر وبان وأدينا من جرابك التخين.

Post: #227
Title: Re: إصلاح الكتابة في المنبر
Author: هاشم نوريت
Date: 10-20-2005, 02:02 PM
Parent: #226

سلامات محسن ورمضان كريم وتحياتى لاهل الدار

Post: #228
Title: Re: إصلاح الكتابة في المنبر
Author: خضر حسين خليل
Date: 10-20-2005, 02:42 PM
Parent: #1

محسن ياخالد
تحياتي الحارة
ورمضان يشبه احلامك (منبر صليح ووطن ماهل ومتساهل)


خضر

Post: #229
Title: Re: إصلاح الكتابة في المنبر
Author: محسن خالد
Date: 10-20-2005, 03:21 PM
Parent: #228

...



Shinteer،..
يازول حبابك، وادخل لاجوة وما تكتّر الغيبة، باقي اتوحشناك آلحبيب،..
وحبابك وكن بخير،..
ويضحك دهرك،..

هاشم نوريت،..
إزيك يا هاشم صاحبي وأمانة ماني زعلان منك، يا زول رمضان الحبيب دا كلو ماتجي تباركو لينا،..
غايتو كل سنة وإنت طيّب وأجمل،..
والمحبة لك،..

خضر حسين خليل،...
إزيك يا خضر يا حبيبنا والزول السمح والجميل،..
يسعدن أيامك يا جميل،..
ورمضان حبيب وماك طيّب،..
كن بخير... وبس


..

Post: #230
Title: Re: إصلاح الكتابة في المنبر
Author: Shinteer
Date: 10-21-2005, 07:11 PM
Parent: #229

وين يا محسن يا زول يا محسن. والله عاجبني الخمج اللغوي الدافرو قدامك ده. عدوك قمحان. أنا ما عارف الناس دي بتفور فوق أم كم؟. بعينَيْ رأسي أرى ما يزيد عن خُرْتُميّة باب لدخول عوالمك، وما من مزاجٍ إلا وجد باباً يناسبه للدخول المستحب. الناس دي ما شايفة إلا باب واحد بس؟. دي مشكلة مين؟.

جاموس الخلا الـ خَلَعو(هـ) وْخِتو(هـ) الصيّادة
مِلْفوخ قَرْنو ما بِقْلِب لِسانو شْهادة

أها خلّي قرنك سنين ومَحنْدد.

نجي للسؤال في محل السؤال:
سمعت كلمة "مُكْلِف" كثيراً وأصبتُ منها بأذى سمْعي. أجدها غير مستساغة، ولم أسمع بالفعل "أكْلَف"؛ فهل هناك فعل أو مصدر لهذه الكلمة الغريبة؟.

الذي دفعني للسؤال هو أنني سمعتها اليوم من صديقٍ مقرّب لكنّه من المطلِّشين، وهنا عجاجتنا ربطت. هو مُصِر عليها وليس لديه اي سند، لا من المتواتر سماعاً ولا من القياس. وأنا بحاول أقنعه بأن "مُكْلِف" دي مصدرها أكْلَف .. وده فعل أجرب، الأفعال متبرّية منّو.

شن قولك؟.

Post: #231
Title: Re: إصلاح الكتابة في المنبر
Author: محسن خالد
Date: 10-23-2005, 05:10 AM
Parent: #230

.



Shinteer،..
إزيك يا شنتير أخوي، وماك طيّب،..

الفعل (أكلف) موجود ولكن المعنى منه مختلف،.. ليس بمفهوم التكاليف بمعنى المشقّة من الأمر،.. وإنما هو من الغرام والعشق،...


(كلَّفـ) ـه: أمره بما يشقُ عليه،...


(أكلفـ) ـه بكذا: جعله مغرماً بكذا...

والمُكْلِف: مبدئياً كدا في القاموس (المنجد) ما لقيتها تب، لكن بشوفلها الدمائر لاجوَّة،..
ومن زمان الكلمة دي أنا بتحاشاها لأنها ما قابلتني عِياناً بياناً،..

وخليك عافية،..
..

Post: #232
Title: Re: إصلاح الكتابة في المنبر
Author: محسن خالد
Date: 10-23-2005, 05:10 AM
Parent: #230

.



Shinteer،..
إزيك يا شنتير أخوي، وماك طيّب،..

الفعل (أكلف) موجود ولكن المعنى منه مختلف،.. ليس بمفهوم التكاليف بمعنى المشقّة من الأمر،.. وإنما هو من الغرام والعشق،...


(كلَّفـ) ـه: أمره بما يشقُ عليه،...


(أكلفـ) ـه بكذا: جعله مغرماً بكذا...

والمُكْلِف: مبدئياً كدا في القاموس (المنجد) ما لقيتها تب، لكن بشوفلها الدمائر لاجوَّة،..
ومن زمان الكلمة دي أنا بتحاشاها لأنها ما قابلتني عِياناً بياناً،..

وخليك عافية،..
..

Post: #233
Title: Re: إصلاح الكتابة في المنبر
Author: محسن خالد
Date: 10-23-2005, 12:53 PM
Parent: #232

..

تفكيك عامية






(حُمَّى الوِردِ)

أخونا شنتير دا زمان قال لي (عندي وِرْدَة) وأهلنا بقولوها طوالي بدل الحُمَّى، (وِرْدة –حُمَّى)

والفصيح بس تشيل منها التاء المربوطة، الفصيح (حُمَّى الوِردِ)

(بج)
الناس بقولوا (لحم) عتود وألا خروف (بج) بمعنى رخص وصغير السن، والكلمة فصيحة تماماً،..

(لتخ)


لتخو لتخ تمام بمعنى لطخه وجلده، وهي فصيحة،..
وبتقول المرأة تلتَّخت بالعجين، وبرضو فصيحة، يعني باختصار يمكن تستخدم (لتخ) بدل (لطخ) وكلها فصيحة،..

(جَمَّ)


جَمَّ: الماء يَجِمُّ، يَجُمُّ... الماء.... الجَمَّام،.... فصيحة


(السبخة)

(السبخة) يقولون أرض سبخة، وهي فصيحة


(بَغَم)
(بَغَم)، الناس بقولوا ما تقول (بِغِم) والفعل منها صحيح، بَغَم بمعنى صوَّت وصاح،..


(القِرْم)

القِرْم هو السيد العظيم

وربما منها جاءت مَقَرَّم،..
ولو إني أميل إلى أنها جاءت من (قَرَم) العتود أي صار بوسعه أكل العشب، والغريب أنَّ الكلمة (عتود) فصيحة، أما الأغرب فإنها تجمع على (عِتَّان) –كما نقول بالسوداني- ما أحار علماء اللغة،..

(الحِلَّة)

نقولها للقرية، وهي كلمة فصيحة من الحِلّ والمنزلة،..


من انحشارات اللغة الإنجليزية:



نقول الزول دا بعرف يضقل بالكورة تمام، وأصلو ما بتقع منو الكورة،...

يضقّل بالكورة: dodging
من الكلمة الإنجليزية المتقدمة،..

(بستفو)

وأيضاً نقول والله بستفو ليك جنس بستفة، من الفعل الإنجليزي PISSED OFF



..

Post: #234
Title: Re: إصلاح الكتابة في المنبر
Author: Shinteer
Date: 10-23-2005, 01:02 PM
Parent: #232

كيف أنا نسيت أكلف وكَلِف بالفتاة!!! نعم هناك فعل "أكْلَف" لكن كما قلت أنت ليس هذا هو الفعل الذي جاءت منه مُكْلِف بمعنى باهظ الثمن أو شاق. ودي هي البنسأل عنها وعن أصلها.

مُكْلِف، بمعنى: باهظ .. أظنها عامية لبنانية أو شامية .. والله أعلم. غايتو أنا بقيت، لا شعورياًً، أي مفردة طالعة زي موضة كده وبتعمل لي إزعاج نفسي، بعتبرها عامية لبناينة.

Post: #235
Title: Re: إصلاح الكتابة في المنبر
Author: محسن خالد
Date: 10-25-2005, 12:51 PM
Parent: #234

..



Shinteer،..
تحياتي يا جميل،..

هي عامية شامية بالفعل، وهم متحركون على الدوام في استيلاد الكلمات ونحتها، بس ما عندها أصل، النحت أنا عندي مقبول ما لم يحاكك فعلاً آخر، أو مصدراً ثانياً، له معنى مختلف،..
قبل أيام وصلتني قصة من صديق وفيها كلمة (البئيسة) والصديق يقصد منها (البائسة)، ولكن البئيسة موجودة في اللغة وبمعنى (الشجاع أو القوية أو الشدة في الحرب) وليس بمعنى البؤس، لو كان النحت يصطدم بمفردة أصيلة موجودة ويعارضها المعنى، حسب رأيي البسيط وجب التخلي عن هذا النحت،..
ودم طيّباً وبخير،..



..

Post: #236
Title: Re: إصلاح الكتابة في المنبر
Author: saadeldin abdelrahman
Date: 10-25-2005, 01:34 PM
Parent: #235

سلام محسن أخوي

والله بوستيك ده فيهو خيرا كتير ومتعه وفائده لنا جميعا وتسلم

أرجو أن لا يكون في صدرك علي شئ أخي الكريم مما فات ومات ومن جانبي لا أحمل لك سوى الحب الأخوي الصادق

يامحسن

كلمة دكك نجرناها أمس في شعر المتنبئ بالاضافة لخيار لكك وذلك لتسهل نزول كلمة ودك في عجز البيت الذي يليه (ظرافه وكده)
مالي اكتم حبا قد برى جسدي

وي/تدعي حب سيف الدوله ال'دكك' أواللكك
...أعيذها نظرات منك صادقة
أن تحسب الشحم في من شحمه 'ودك'

اها الودك دي فصيحه لكن الدكك والكك ديل اصرفن لينا

اضافه لإنحشارات اللغه الانجليزيه (كانحشاري في بوستك الجميل ده)
مصطلحات الMain road:-

دبرسه: Depression
تنشنه : Tension
قد أعود بالمزيد

اها انبلاجات لغة الضاد في الإنجليزيه كيف

سكرو الجبر وكده

لك الود

Post: #237
Title: Re: إصلاح الكتابة في المنبر
Author: محسن خالد
Date: 10-25-2005, 02:48 PM
Parent: #236

..
..



saadeldin abdelrahman،....

كيفك يا عزيز، ورمضان حبيب وكريم،..
بحق اندهشتُ لكلامك، أعني هذه الجملة:

Quote: أرجو أن لا يكون في صدرك علي شيء أخي الكريم مما فات ومات ومن جانبي لا أحمل لك سوى الحب الأخوي الصادق



وقمتُ بالاتصال على أحد الأصدقاء المتابعين هنا، فبيّن لي بأنك ربما تقصد بوست كذا وكذا، هذا لو وثقتَ في كلامي، وصدّقت الحادثة،..
صَدّقني يا أخي أنا لا أتوقّف لدى موقع أكثر من تموقعه ولحظته، وبعدها ربما أنسى الموضوع بكامله، فلك مني الاعتذار أنا إن كنتُ قد أسأتُ إليك أو حاددتك كما يقول القرآن (يُحادّون الله ورسوله)، فالمعذرة إن كنتُ قد حاددتُك القول وخدشتُ معك روح الزمالة والكتابة في هذا المكان،..
وهنا إسهامي حول ما قلت،..

دَكَّ: بمعنى هدم، وهذه معروفة،..
(دكَّك الشيء بالشيء خلطه)،...
والدَّكَك: جمع دُكّ.. وتعني الفرس العريض الظهر والقصير،..

لَكَّ لَكَّاً (لَكَّاه، أو لَكَّاها) بمعنى ضربه-ها بجمع كفّه في قفاه-قفاها، بالسوداني كدا: يعني أدَّاه -أدَّاها: أم دلدوم،..
لَكَّ لَكَّاً الجِلدَ: بمعنى صبغه،...


واللِكاك جمع لـ(لُكَك... و.. لِكاك)...
ومعناه الزحام، والناقة الشديدة اللحم،..
اللكيك: اللحم المكتنز، أو الصلب المكتنز لحماً،..

وأظنَّكم هكذا ستخرجون بأنَّ لُكك .. تُؤخذ بمعنى: اللحم المكتنز، ليتسق المعنى والودك،..


وشكراً لمساهمتك حول انحشارات اللغة الإنجليزية،..
أمّا وجودك أنت في المكان، فبوصفك صاحب المنزلَة، بيتك ومطرحك،..
فكن بخير، أبداً بخير،..
ولا تحرمنا من وجودك هنا،..
وتسلم يا رجل، وقلبي مضيافٌ ومحبٌ للفضل والإخاء، فالعذر إن بدا منا بعض السوء الذي مآله وموئله دون شك، للرهق الفكري والنفسي وللخسران بكافّة أوجهه،..
فشكراً يا عزيز وكن بخير،..

غاية الود والتجلّة
..

Post: #238
Title: Re: إصلاح الكتابة في المنبر
Author: saadeldin abdelrahman
Date: 10-25-2005, 03:05 PM
Parent: #237

لَكَّ لَكَّاً (لَكَّاه، أو لَكَّاها) بمعنى ضربه-ها بجمع كفّه في قفاه-قفاها، بالسوداني كدا: يعني أدَّاه -أدَّاها: أم دلدوم،..
لَكَّ لَكَّاً الجِلدَ: بمعنى صبغه،...

والله لكن جيهتها لي تب

برجع تاني بالمزيد ان شاء الودود

نزلت علي كلماتك بردا وسلاما وهذا يزيدني يقينا في نقاء قلبك الجميل....
و اللسان والناس ديل تاعبينا كلنا

عندي فزعه في بوست تاني حا اسيب ليها النوم واحتمال المنبر زاتو.

جزيل شكري واحترامي

Post: #241
Title: Re: إصلاح الكتابة في المنبر
Author: محسن خالد
Date: 10-29-2005, 02:05 AM
Parent: #238

..


saadeldin abdelrahman،....
تحياتي يا رجل،..
ونحن راجنّك ترجع بالمزيد، وفي انتظارك،..
كن بخير،..
ودُم طيّباً،..

..

Post: #242
Title: Re: إصلاح الكتابة في المنبر
Author: محسن خالد
Date: 10-29-2005, 02:05 AM
Parent: #238

..


saadeldin abdelrahman،....
تحياتي يا رجل،..
ونحن راجنّك ترجع بالمزيد، وفي انتظارك،..
كن بخير،..
ودُم طيّباً،..

..

Post: #239
Title: Re: إصلاح الكتابة في المنبر
Author: Shinteer
Date: 10-25-2005, 04:15 PM
Parent: #237

واهاً لأسماءَ ابنةِ الأشدِّ *** قامت تَراءَى إذ رأتني وحدي
كالشمسِ بين الزَّبْرَجِ المنقدِّ *** ضنَّت بخدٍ وجَلَت عن خدِّ
ثم انثنت كالنفَسِ المرتدِّ *** الشطرة التانية لا أذكرها
أرقُب منه مثلَ حُمَّى الوِرْدِ *** حَمَلتُه في رقعةٍٍ من جلدي

كيف حالك يا شيخنا محسن
مواصلة لتفكيك العامية، هنالك كلمات نستخدمها (استخداماً بيئياً وليس قومياً) ولا أعرف لها أصل؛ مثل:
راغ يروغ؛ بمعنى بحث يبحث.
سِهْمة ومُشهاد؛ بمعنى جهة أو وِجهة.
الهيرة (الهَيْرة، بإمالة الهاء)؛ بمعنى الوَحل. أتهَيَّر الحمار= أتوحّل الحمار في الطين.
العيمة (العَيْمة، مع إمالة العين)؛ بمعنى جوع الرضيع، من البهائم عادةً.
مُوبِل .. كلبة موبل؛ دي انت عارف استخدامها.

ولسّع في لستة من المفردات.

من الكلمات الفصيحة التي سمعتها في بعض أشعار شيوخنا وككلمة متداولة بغير كثافة .. وأظنها الآن في طريقها إلى الانقراض .. كلمة بَتات. كنت أظنها كلمة منجورة في خلانا داك، إلى أن رأيتها (زماااااااان) بشحمها ولحمها في معلقة طرفة بن العبد، رضي الله عنه، وختّيت راسي فَرَق إيديْ:
ستُبدي لك الأيام ما كنت جاهلاً *** وَيَأتيكَ بالأخبارِ مَنْ لمْ تُزَوّدِ
وَيَأتيكَ بالأخْبارِ مَنْ لمْ تَبِعْ لَهُ *** بَتاتاً وَلم تَضرِبْ لهُ وَقْتَ مَوْعِدِ

ولك السلام

Post: #240
Title: Re: إصلاح الكتابة في المنبر
Author: محسن خالد
Date: 10-29-2005, 01:49 AM
Parent: #239

..

إزيك يا ود أشيقر، وماك طيّب،..
عارف أنا حُمّى الورد دي ذكرني ليها إيراد أبي العلاء المعري لها في (رسالة الغفران) قبل فترة كنت مصنقر علي الرسالة دي وبلاوي فيها، وبرضو كلمة (بج) الفوق دي لقيتها بصمتها في بطنها، وحاجات ممتعة تانية بجي بونسك بيها،..

(كلمة) بتاتاً دي أنا بتذكرها بالرجل الكلوروفيلي (أبو صخر الهذلي) والناس بقولوا الأبيات دي لمجنون ليلى ودا ما صاح:
عجبتُ لسَعْيِ الدهرِ بيني وبينها........ فلمَّا انقضى ما بيننا سَكَنَ الدهرُ
وإنِّي لآتيها وفي نفسي هَجْرُها ... بتاتاً لأُخرى الدهر ما وضح الفجرُ
فما هو إلا أن أراها فجاءةً ... فأُبْهَتُ لا عُرْفٌ لديَّ ولا نُكْرُ
تكادُ يدي تَنْدَى ما لمستُها ... ويَنْبتُ في أطرافها الورقُ الخُضرُ



البيت الأخير –الكلوروفيلي- ياهو طبعاً البيت الشديد، يلمسها كدا يعرق يا دين النبي، وتبتّق إيدو ورق أخضر، وياااا حليلنا منها جنس المَحنَّة يا ود أشيقر،..


...

Post: #243
Title: Re: إصلاح الكتابة في المنبر
Author: Shinteer
Date: 10-31-2005, 07:08 PM
Parent: #240

Quote: تكادُ يدي تَنْدَى ما لمستُها ... ويَنْبتُ في أطرافها الورقُ الخُضرُ

وينك أيها الزول المحسن. ما زلنا بعدُ في حالة نجيع .. ناجعين.
حقيقة وحقاً .. يا حليلنا من المحنّة المدفّقة دي. تعرف .. أنا ما كنت عارف للبيت ده غير أخو واحد بس .. والبيت ده مع أخوه كانوا بمثّلوا لي قصيدة مكتملة. والغريب إن البيتين البعرفهم وصامّي عليهم حنكي، أولهم هو البيت المقتبس فوق ده، مع شوية اختلاف، والبيت التاني ما بعرفو جايي من وين. المهم في النهاية البيتين مشوا مع بعض وأنا اكتفيت بيهم وما عرفت شاعرهم مِنُو في أهل الله: نقول ليك البيتين:

تكاد يَدِي تندى إذا ما لمستها *** وينبت في أطرافها الورقُ النضْرُ!!!!
وإني لتعروني لذكراكِ هزةٌ *** كما انتفض العصفور بلّله القَطْرُ

غايتو صاح ما صاح البيتين ديل لابسين في بعض لكن شكلهم كده زي المفروض يكونوا واحد في أول القصيدة وواحد في آخرها؛ لو كان عندهم قصيدة جايات منها. والله أعلم.

بالمناسبة .. الأبيات بتاعة حمى الورد ديل أنا متذكرهم من رسالة الغفران ذاتها .. لكن في عجز بتاع واحد من الأبيات طار من راسي طيرة اب ريش من الدريش.

بعد كده أنا خلاص حأعمل جرد عام للبوست ده وأطبعه كمرجع مُيَسَّر للنحو الواضح وغير الواضح. أما لو كان لسع عندك قواعد لإصلاح الكتابة فسوف ننتظر حتى مطلع فجر البوست.

ودمت ودام بهاك.

Post: #244
Title: Re: إصلاح الكتابة في المنبر
Author: Prof
Date: 11-01-2005, 01:30 AM
Parent: #1

السيد المحترم محسن خالد

كلما قرأت لك اتمنى ان تلتقى بدكتور مصرى اسمه عمر عبد الكافى وتحادثه عن عدم ايمانك بالاديان

( تجاسرت اخيرا وحدثتك عن امنيتى )

كل عام والجميع برضى الله ينعمون



Post: #245
Title: Re: إصلاح الكتابة في المنبر
Author: محسن خالد
Date: 11-01-2005, 01:50 PM
Parent: #244

..



Shinteer،...
العزيز ود أشيقر، أريتك بالسلام وبيوتو وحنّاياتو وقانجاتو،..
قانجاتو دي جمع لكلمة (قانجة) والغنَّاي بالحيل خلف الله ود حمد، بشكّر زولو وبقول عنو (بيتو قانجة مو قطّية)،..
عارف الأبيات الكلوروفيلية دي ليها ذكريات حلوة، أخوك طبعاً عضو في اللجنة العملت (الموسوعة الشعرية) ودا من أخطر المشاريع الحداثية في الأدب العربي، 3 ملايين بيت شعر ملمومات في حتة واحدة البسموها (السي دي) مع ترجماتها ومع تسجيلات صوتية للمعلقات، لو ماك عارف الحاجة الفردوسية دي، قول عووك لأنو ضروري زول زيك تصلو وبهمّنا تصلو، برضو في مشروع موقع (الورّاق) ياهو أخو الموسوعة الشعرية وتومة، ودا بتلقى فيهو يات ما تفكّر فيهو من كتب التراث الإسلامي والعربي، أرجو إنك تدخل عليهو، www.alwaraq.com
أها زمان الحجّة وقفت بيني وبين عمك الشاعر والمعرفي المكرّب (علي كنعان) في الأبيات دي، وإنو القالها منو؟ في (حماسة أبي تمام) وردت لصخر الهذلي، ودا ما استند عليهو علي كنعان، وهسّع إنت نبهتني لحاجة مهمة، فعلاً أنا كأني متذكرها لدى أبي العلاء، بس الغريبة ما انتبهت أبداً للاسم الذي أوردها له المعري، بكرة إن شاء الله بمشي مكتبتي في البيت وبشوف الحاصل شنو؟
بخصوص (إذا – ما لمستها) أنا لم أسقطها بل هي مسقطة في الموسوعة، وأكيد بفعل الطباعة، لأنو دا بحر (الطويل) والبيت من دون –إذا- ما بستقيم، دي العجلة طبعاً، لو انتبهت ما بتفوتني جنس القِلَّة دي،..
أها نديك الأبيات كاملة، وشوية ترجمة لصخر، لاحدي ما نشوف صاحبي المعرّي قال فيها شنو؟

Quote: إذا قلتُ هذا حين أسلو يَهيجني .... نسيمُ الصبا من حيثُ يَطِّلعُ الفجرُ
وإنِّي لتعروني لذكراك فترةٌ .... كما انتفض العصفور بَلَّله القطرُ
هجرتُكِ حتى قيل لا يعرف الهوى .... وزرتُكِ حتى قيل ليس له صبرُ
صدقتِ أنا الصبُّ المصاب الذي به .... تباريحُ حُبٍّ خَامَر القلبَ أو سِحْرُ
أمَّا والذي أبكى وأضحكَ والذي .... أمات وأحيا والذي أمرهُ الأمرُ
لقد تركتني أحسدُ الوحشَ أن أرى .... ألفينِ منها لا يروعهما النَّفرُ
فيا هجر ليلى قد بلغتَ بي المدى .... وزدت علي ما لم يكن بَلَغ الهجرُ
ويا حُبَّها زدني جوىً ليلةٍ .... ويا سلوة الأيامِ موعدُك الحشرُ
عجبتُ لسَعْيِ الدهرِ بيني وبينها........ فلمَّا انقضى ما بيننا سَكَنَ الدهرُ
وإنِّي لآتيها وفي النَّفس هَجْرُها ... بتاتاً لأُخرى الدهر ما وضح الفجرُ
فما هو إلا أن أراها فجاءةً ... فأُبْهَتُ لا عُرْفٌ لديَّ ولا نُكْرُ
تكادُ يدي تَنْدَى إذا ما لمستُها ... ويَنْبتُ في أطرافها الورقُ الخُضرُ




أبو صخر الهذلي
80 هـ: 700م
عبد الله بن سلمة السهمي، من بني هذيل بن مدركة،..
شاعر من الفصحاء، كان في العصر الأُموي، موالياً لبني مروان، متعصباً لهم، وله في عبد الملك وأخيه عبد العزيز مدائح،..
وكان قد حبسه عبد الله بن الزبير عاماً وأطلقه بشفاعة رجال من قريش.


بعدين الكلام دا كلو من صميم الرد علي أخينا (prof) عارف؟ لمن تشتغل في تحقيق الكتب وتشوف جنس التبديلات والتغييرات، وكلو زول يكتب بمزاجو، وكل زول ينسب بمزاجو، الحاجة بتاعة (التأكدية) الغريبة ديك، إنو دا كلام دين، وثابت، ومقطوع شكو ومائة في المائة، بتبقه تضحكك، وتعرف إنو أي كتاب لو مرّت عليهو 10 سنوات بس، وكتبوهو 3 كتبات بس، والله يتبدّل لامن يعرف حاجة، أو لامن يبقه كتاب تاني،...
أها، فتك عافية، يا ود أشيقر،..
برجع للمعري وبجيك صاد،..


Prof،...
تحياتي يا رجل، وكل عام وأنت بخير،..
وكن طيّباً على الدوام، وطاب مساؤك،..
أنا لا أعرف كيف أُحَقِّق لك أمنيتك، وإلا لجعلتها لك عيدية، ولكن بوسعك الاتصال بالرجل، مادام هو من المجنّدين لله، ولا مانع عندي من محاورته أو مناظرته،...
وجعلنا اللهُ ممن يشملهم رضاه، فالأمور مختلطة في رؤوسنا وكثيرة المطبات، ولو كان الإيمان باليد لكنّا أفضل المؤمنين، فلا مصلحة لنا في أن نُنكر بعض الأمور الدينية، ولكن الأديان مليئة بالكثير مما هو ضد العقل والمنطق والعدالة والخير، ولذلك تجوط أفعالنا ورؤوسنا،..
اللهم خذ بأيدينا إنك القائل: (سنريهم آياتنا في الآفاق وفي أنفسهم حتى يتبيَّن لهم أنه الحق)،..


..

Post: #246
Title: Re: إصلاح الكتابة في المنبر
Author: Shinteer
Date: 11-01-2005, 02:47 PM
Parent: #245

Quote: 3 ملايين بيت شعر ملمومات في حتة واحدة البسموها (السي دي) مع ترجماتها ومع تسجيلات صوتية للمعلقات، لو ماك عارف الحاجة الفردوسية دي، قول عووك لأنو ضروري زول زيك تصلو وبهمّنا تصلو.

عووووووووووووووووووك. يا أخي هذا كنز نبذل من أجل اقتنائه كل عووووووووووكٍ على وجه اليابسة. وعلى قولك، فإن الدخول في معافرة الكتب يُبينُ كوك اليقينيات عند المخادة. وفي اعتقادي، إن ما أقدم عليه طه حسين في كتابه ذاك، والتشكيك في نسبة الشعر، ليس نابعاً من حبٍّ للاختلاف بل من طول المعافرة مع الكتب.

يعني الأبيات ثبتت للهذلي أم ما زالت تتنازعها أدواء النسب الهامل؟.

الورق الخضر. هذه الصفة (الخضر) أبت تقع لي مع كلمة الورق .. إلا أن يكون معناها غائب عني؛ أي معنى الورق. ورق أخضر أو أوراق خضراء/خضر .. أما ورق خضر فلم استطع تقعيدها. افتِنَا فيها.
الورّاق من الصفحات التي كنت ارتادها كثيراً في وقت غير بعيد، قبل أن يفرضوا الاشتراك كشرط للإطلاع .. لكني توقفت بعد فرض الاشتراك؛ عن كسلٍ مني.

هل هذا الـ سي دي الذي ذكرت مطروح للبيع على الانترنت؟.

وكل سنة وانت في خيرين وزيادة.

Post: #247
Title: Re: إصلاح الكتابة في المنبر
Author: محسن خالد
Date: 11-02-2005, 03:46 PM
Parent: #246

..

shinteer


يا ود أشيقر كيفنّك، وكل عام وإنت أروق وأجمل،..
كلام الموسوعة دا بنتمو علي الإيميل، وعجبني كلامك دا عجباً شديد:

الدخول في معافرة الكتب يُبينُ كوك اليقينيات عند المخادة. وفي اعتقادي، أنَّ ما أقدم عليه طه حسين في كتابه ذاك، والتشكيك في نسبة الشعر، ليس نابعاً من حبٍّ للاختلاف بل من طول المعافرة مع الكتب.

هو لكن كوك ساي، كوك البكوكي، والعجب ناس (الأحاديث) ديك بهناك، جلال الدين السيوطي عندو كتاب اسمو (ألآلئ المصنوعة في الأحاديث الموضوعة) وأي حديث منها تمسكو، والله ما ياخدك شك إنو قالو زول أقل من رسول، يا زول خليها مستورة ساي الدنيا عقاب رمضان وقبائل عيد، وبالفعل طه حسين أخذ يشكك في الشعر و(الرواية) بشكل عام من هذا الباب، اليقينيات تصلح لشخص يُقرأ له، الناس البقولوا ليك (مشينا سعلنا العالِم، والفكي فلان قال) أما من يقرأ بنفسه فسيعرف أنّ الأكاذيب والروايات الخاطئة لم تترك شيئاً لم تطاله، عشان كدي أنا مبسوط شديد من علم الأركيولجي الحديث، في تقصيه للتاريخ عبر العلم، لامن التاريخ الديني يقول (موسى شَقَّ البحر بعصاه) طوالي ناس الجيولوجيا ودراسة العُصُر التاريخية يجوا مطّفرين، ويشبكولك الناس (التحات وما التحات) (الكربون وما الكربون) والكوك يقلّع سنامات جُمال والحجّة تقيف،..
أها نجي للأبيات المنجوهة دي،..
إنت لو لاحظت الأبيات دي مذكورة فيها (ليلى)، ودا الساق الناس جهة مجنونها، في حماسة أبي تَمَّام نُسبت لصخر الهذلي، لكن أنا مشيت فتشت فتيش عجلة وما لقيت الأبيات في (رسالة الغفران) لو قريبة منك حاول تشوفها هناك نُسبت لمنو؟ لو أبو العلاء نسبها للمجنون تبقه حقّتو لأنو الأعمى داك شديد ومصرّم، ولو قال حقة صخر معناها خلاص انقطع شكّها، زي ما قلتلك فتشت سريع وما لقيت الأبيات، أخشى نكون متوهمين نحن،..
أما الخُضُر، فهي جمع أخضر،..
الورق اسم جمع، والخُضُر جمع أخضر، اللهو جمع الصفة، يعني ما فيها حاجة، الاسم مجموع قام، زي ما تقول: (النوق الحمراوات) يعني هو جمع الصفة عشان التناسب، ما بعرفها دي زنّت معاك مالها، كدي جرّبها بعد رمضان دا ما انقطع طاريهو بتظبط معاك،..
بعدين اشتراك الورّاق دا كتابة اسمك بس، يعني لمعرفة الحدود القرائية الوصلها الموقع،..
وكل عام وإنت أجمل،..
اتوحشناه صديقنا عادل، أريتو طيّب


..

Post: #248
Title: Re: إصلاح الكتابة في المنبر
Author: Shinteer
Date: 11-02-2005, 11:17 PM
Parent: #247

Quote: أما الخُضُر، فهي جمع أخضر،..
الورق اسم جمع، والخُضُر جمع أخضر، اللهو جمع الصفة، يعني ما فيها حاجة، الاسم مجموع قام، زي ما تقول: (النوق الحمراوات) يعني هو جمع الصفة عشان التناسب، ما بعرفها دي زنّت معاك مالها، كدي جرّبها بعد رمضان دا ما انقطع طاريهو بتظبط معاك،..

إذن مشكلتي يا سيد أبوك ليست مع الخُضْر، إنما مع الورق. ظننت، وما زلت أظن، أن الورق ليست اسم جمع. أحسبها جمع كثرة عادي: ورقة (مفرد) .. ورقات (قِلة) .. ورق (كثرة)؛ بمعنى صفقة .. صفقات .. صفق. وبفهمي هذا لم استطع وضع "خُضْر" كصفة مناسبة لكلمة "ورق".
شغلتني هذه المسألة وبدأت تمارين لتطبيق صفة "فُعْل" على بعض من جموع الكثرة، ولم أنجح.

نمْل: نملٌ حُمْر!
تمْر: تمرٌ سود!
قمْل: قملٌ بيض!
حَسَكٌ: حسكٌ خُضْر!
صدقني، إما أن يكون فهمي لكلمة "ورق" خطأ أو لا طريقة لي لبلع صفة "خضر" لكلمة ورق.

كل سنة وانت طيب .. وربنا يحقق أمنياتك.

عادل اختفى .. إن شاء الله يكون بخير.

Post: #249
Title: Re: إصلاح الكتابة في المنبر
Author: محسن خالد
Date: 11-04-2005, 10:06 AM
Parent: #248

..


Shinteer،..
كيفنّك يا ود أشيقر،..
وتحيات متلتلة،..
يا زول مالك إنت معاها الطيبة دي؟ عارف ضحكتني وذكرتني بمواقف لي كثيرة لما تعلّق معاي واحدة زي دي، خصوصاً في القرآن، يُخَيّل لي إنو بس الزمن هو الطال بينا وبين الحس الأصلي للكلام البخلينا بالتذوق كدي نقول دي ماشية ودي ما بتركب، هسع أنا الكلمة دي ماشية معاي تمام التمام، بل لو قال أي حاجة تانية كان بشوفها مش محنّكة،...
طَيّب يا سيد أبوك نفترض إنها (الورق: جمع كثرة) الاتبدّل شنو؟ ولا حاجة، جموع الكثرة ما برضها جمع، وهي تصنيفات متفذلكة في النهاية، لو كان الجمع جمع مباشر من المفردة، أو جمع للجمع نفسه، ياهو في النهاية جمع، وياهو بتناسب أكثر لامن نقوم نجمع الصفة، زي حالتنا دي،...
والمسألة في النهاية بحكمها التذوق، لو أخدت جملتك دي بس مثال: نمل حُمر... صاح ما بتظبط، لكن رأيك شنو لو جبت جمع تاني لنفس الجملة: نمالٌ حمر... كدا ظبطت وألا لا؟ والجمل الباقية ما عندها شيء بظبط معاها، ودا واحد من مطّبات اللغات اللهي في الإجمال سماعية، مش قواعدية،..
وكل عام وإنت بخير،..

..

Post: #250
Title: Re: إصلاح الكتابة في المنبر
Author: Shinteer
Date: 11-04-2005, 10:11 AM
Parent: #248

كدت أن أخرج بقاعدة جربندية لولا عدم يقيني من صحة فهمي لكلمة ورق. شغلتني هذه الكلمة، عليها اللعنة.


الأخ عادل بدوي، أين أنت يا رجل؟. مشيت عمرة وغلبتك الرجعة؟

Post: #251
Title: Re: إصلاح الكتابة في المنبر
Author: محسن خالد
Date: 11-04-2005, 05:01 PM
Parent: #250

..

تحياتي يا ود أشيقر،..

والله أنا ساعل منهم أصحابنا كلهم، وعليهم العيد مبارك،...

..

Post: #252
Title: Re: إصلاح الكتابة في المنبر
Author: Shinteer
Date: 11-05-2005, 01:34 AM
Parent: #251

كل سنة وانت طيب يا محسن، والسنة الجاية تكون متوهّط في أوكسفورد.

ياخي أنا بديت أشك في صواميل راسي. قد يكون السهر لخبط سلوك الدماغ وبقى ما بيستقبل أي موجات كلامية.
السؤال الأخير اللي بيجيب لي خبر الدوشة دي هو:

هل يمكنني أن أقول: هذه ورق؟

الإجابة على السؤال ده حتكون نهاية ملاواتي مع الورق وملاح الورق.

Post: #253
Title: Re: إصلاح الكتابة في المنبر
Author: محسن خالد
Date: 11-05-2005, 01:02 PM
Parent: #252

...

Shinteer،....


يا زول وإنت طيّب، ومتوهّط وسط ثريا كواكبها الوليدات،...

الليلة فقعتني بالضحك يا ود أشيقر، دي شِبكة شنو مع الكلمة دي؟ بعدين واحد من اتنين، لو سؤالك دا

Quote: (هذه ورق)


جاء عفو الخاطر كدا، وذوقياً، فأنا والله أشهد ليك بالحس الخطير في اللغة، الخطير بالجد، أما لو كان المقصود منه وضع قلابة للكلمة اللعينة دي بفيتريته من حواشه تانية، فأنا كمان والله أشهد ليك بالحصافة وأشد التفتيحية،...

بأي حال أنا ما عندي دخل، يجاوبك ربك الله من سورة الكهف:


(قالوا ربُّكم أعلم بما لبثتم فابعثوا أحدكم بـورقكم هذه إلى المدينة)



أها، تعال وريني وصلت لشنو بعد الله قال بجوز؟

غايتو لو ما عندك استعداد تمشي معاي لا جوووه، لامن يلاقوك ناس كافر كافر ديك، ما تجيني تاني راجع، لولح رأسك ساكت وأديهو كأس وألا فأس، علي كيفك،...


...

Post: #254
Title: Re: إصلاح الكتابة في المنبر
Author: Shinteer
Date: 11-05-2005, 01:22 PM
Parent: #253

يا ساتر يا رب .. يعني الشغلانة ممكن تجيب ليها قلسيب ونحن في غفلة؟. يا زول أحسن نوقفها هنا.

بس يا عزيزي .. جواب رب العالمين داك كان قروش، نقدية، مكسورة الراء. والله دي شِبكة دي.

Quote: (قالوا ربُّكم أعلم بما لبثتم فابعثوا أحدكم بـورِقكم هذه إلى المدينة)

يا زول نوقفها هنا .. عنّها ما دخلت راسي.

كلامك صاح .. أنا داير أدردقها .. لأني اليومين الفاتوا ديل بعد لت وعجن مع نفسي وإبليس، اقتنعت، لحدٍّ ما، إن أي جمع ما بنقدر نشير ليه بـ (هذه) فإن صفة (فُعْلٌ) ما بتركب معاه. شفت الجربندية دي كيف؟.

أها نوقفها هنا، ونشوف غيرها، قبّال ما يجي جند سليمان.

وعشان أبعدك عنها تماماً .. برجع بيك لكسر همزة إن. بعد "حيث"، هل نكسرها أم نفتح ليها خشمها؟. أها دي واحدة من الحاجات الهسسسسسسع دي بدت تتلخبط معاي.

وربنا يديك العافية.

Post: #255
Title: Re: إصلاح الكتابة في المنبر
Author: Shinteer
Date: 11-05-2005, 01:30 PM
Parent: #254

أها نسيت .. نسّيتك البلا.

سؤالي ليك ما قادر أضعو في خانة عفو الخاطر أو خانة القلاّبة .. لكن ممكن يكون خليط من الاتنين. أنا وصلت ليه بعد تفكير أعتبره وليد الذوق اللغوي تماماً .. وكحل نهائي يحلّنا من شِبكة الكلمة دي.

ننساها يا زول. أنا قنعت منها تب وهادا طرفي منها.

Post: #256
Title: Re: إصلاح الكتابة في المنبر
Author: محسن خالد
Date: 11-05-2005, 02:01 PM
Parent: #255

..




Shinteer ،...

يا صاحبي يضحك نهارك،..
يعني أنا ما عارفك بتجيني بالسطر دا يا ود أشيقر:

Quote: بس يا عزيزي .. جواب رب العالمين داك كان قروش، نقدية، مكسورة الراء. والله دي شِبكة دي.



وصيتي كانت بخصوص السطر تحديداً، وإنت داير تعمل لي فيها شيطونية شيطونية، وعيتنوبة عيتنوبة، غايتو أنا زمان وبالواضح كدي، السورة دي: (إنَّا أعطيناك الكوثر، فصَلِّي لربك وانحر، إنَّ شانئك هو الأبتر)،...
طبعاً المفسرون يقولون بأنَّ الكوثر حوضٌ في الجنة، هرباً من هذه الكلمة، وأنا رأسي وقف مع تفسيرن دا تج، رأسي وألف سيف ما تكون الكلمة دي معناها حوض في الجنة، واللي يلاقوني هناك بعطشن، يعني زي وقفتك مع ورق دي بس بالسنين الطوال، عمر كامل، إلا يوم صاحبي دكتور ياسر شرف صاحب اسم البوست دا ذاتو، جات السيرة وأنا قلتلو رأيي دا في السورة، يعني كيف يكون الكوثر حوض في الجنة، المكان الجمالي، وبعداك ربنا يطلب من النبي الصلاة والضبح، دا منطق شنو دا؟ دي شتره في البيان لا يمكن يعملها إله، والله الزول دا قام من محلو وسلّم لي علي رأسي، قال لي أنا زيك من سنين، لامن لقيت ليها تفسير براي وبرضو قبل سنين طويلة، بس تقولوا لي منو، الناس ما شايفين فيها مشكلة لأنو دي فكرة دايرة شخص فعلاً إحساسو باللغة والبيان نمرة واحد، رأسي كبر طبعاً -عشان نقولها ونريّح المتفولحين- قال لي لو أديت الآية دي لأي يهودي بفهمها طوالي، بدون أي مشكلة، لأنو ببساطة الجزارة عندهم اسمها (كوشر)، والكلمة دي ما عندها رواية بالشين، البقدر يقول البغلة في الإبريق منو؟ وكدا الآية تظبط تمام، نحن أديناك المذبح فصلي لربك وأضبح، وأي زول (شانئك) أي (كارهك ومبغضك) هو الأبتر –المجذوذ،...

أها يا زول، مادام (ورق) دي قنعته منها هنا (نجادعها) في الإيميل، كان ما يبقوا الملائكة القوّالين لابدين هناك،...
وكن بخير،...


..

Post: #257
Title: Re: إصلاح الكتابة في المنبر
Author: محسن خالد
Date: 11-06-2005, 01:45 AM
Parent: #256

...


العدد





هذه استجابة متأخّرة لطلب مبكّر جداً من الأخ الروائي عاطف عبد الله، سأحاول أن أختصر دروس العدد الكثيرة فيما هو أساس، وجوهري، سنأخذ بالعظم وبتيسير شديد، فالناس هنا يكتبون (خمسة روايات) و(خمسة رجال) دون أن ترمش لهم عينٌ، يا شابّات ويا شباب (خمسة رجال) و(خمس روايات) وأتفضلوا بكل يسر وسهولة...


من البداية كدي نقول، العدد ياهو خمسة، والمعدود ياهو الرجال،..



القاعدة الأساسية لكل دروس العدد هي بنشوف (المعدود) مذكّر وألا مؤنّث، وبس،...


العدد (1 )




1- إذا كان المعدود مُذكَّر، العدد (1) يطابقه أي يكون مذكّراً مثله:

جاء منهم رجلٌ واحدٌ....

2 – إذا كان المعدود مؤنّث، العدد (1) يطابقه... أي يكون مؤنّثاً مثله:

جاءت امراةٌ واحدة...

يعني هنا ما في مشاكل، قاعدة بسيطة وبرضو البعدها زيها،......


العدد (2)



1- إذا كان المعدود مُذكَّر، العدد (2) يطابقه أي يكون مذكّراً مثله:

جاء رجلان اثنان....

2- إذا كان المعدود مؤنّث، العدد (2) يطابقه... أي يكون مؤنّثاً مثله:

جاءت امرأتان اثنتان.....


الأعداد من (3) إلى (10) كلها تُضبط بقانون واحد، شوف السهولة دي كيف!

القانون هو، المخالفة والمعاكسة، يعني عكس القاعدة الفوق، هنا لو كان المعدود مؤنّث، العدد بكون مذكّر.... ولو كان المعدود مذكّر، العدد بكون مؤنّث،...

طيّب ناخد أمثلة من تلاتة لاحدي عشرة، مع إنها تكرار، بس ح نقوم ننوّع في الأمثلة.. كلو عشان التردي دا يقل شوية...

3 - جاء ثلاثةُ رجالٍ....
3- جاءت ثلاثُ نسوةٍ...

يعني هسع التذكير والتأنيث وينو؟ ياهو البتم بالحرف (التاء المربوطة)، اللهي دلالة التأنيث....


لو كان المعدود مذكّر (الرجال)، العدد (3-4-5-6-7-8-9-10) بتكون فيهو تاء مربوطة....
ولو كان المعدود مؤنّث (النساء)، العدد (3-4-5-6-7-8-9-10) ما بتكون فيهو تاء مربوطة...




4- قرأتُ أربعة كتب..... لأنو الكتاب مذكّر، أدينا 4 تاء مربوطة....
4- قابلتُ أربعَ صحفيات.... أو كمان: قابلتُ صحفياتٍ أربع.... نفس الشيء.... لأنو الصحفيات مؤنّث، حذفنا التاء المربوطة من 4

5- قَبّلها خمس قبلات.... دي طبعاً أحسن من "دقّاها خمس دقّات، أو "أدَّاها خمسة شلاليت"
5 - قُطعت خمس شجرات.... يا للأسف... بواسطة خمسة معتدين....

6- جاء ستةُ رجال...
6 – جاءت ستُّ نسوة...

7 – جاء سبعةُ رجال...
7 – جاءت سبعُ سنينٍ عجاف...

8 – قُتِل ثمانية متهمين...
8- قُتِلت ثماني متهمات...

9- جاء تسعة رجال...
9- جاءت تسعُ نسوة...

10 – جاء عشرةُ رجال...
10 – جاءت عشرُ نسوة...



يلا يطيب دهركم، إن بقينا حيين بنجي نتم دروس (الأعداد المُرَكّبة والمتعاطفة وألفاظ العقود)




..

Post: #258
Title: Re: إصلاح الكتابة في المنبر
Author: محمد السر
Date: 11-06-2005, 05:10 AM
Parent: #257


دي ذكرتني الدمبعلو

Post: #259
Title: Re: إصلاح الكتابة في المنبر
Author: محسن خالد
Date: 11-07-2005, 10:03 AM
Parent: #258

..




محمد السر،...
إزيك يا لصيص،...
أنا داير أشكّر ليك الرجل السوداني، ما كتير دقّاق لمرتو، ممكن أخواتو في البيت، بس مرتو ما كتيرين البعملوها، هذا مقارنة بالشعوب الأخرى،...
فدي واحدة من المحامد الكتيرة عندنا، أنا يمكن مرة واحدة بس أديت مرتي السافرت أهلها ديك ضريبة صغيرونة بزعل وما علي الوش، يعني ممكن تقول دبزة، ويا هسع لامن أتذكرها بعَضِّي إيدي ندماً، الغريبة هي ما انتبهت أصلاً، أنا اعتذرت بسرعة وبلباقة لامن انخلعت، عارف ليه؟ لأنو عادي الرجل المغربي بدق مرتو لامن تأكل إيديها،..
أها ما ونستك؟




Shinteer،...
الله الله يا زول والله مسعلتك عن همزة إن بعد (حيث) دي أُنسيتها، وما أنسانيها إلا الرهق والعيون الما ظنيتن يقدمننا لاحدي الـ 37 من العمر، غايتو لامن صاحبنا دكتوراً مبروك بتاع عربي من ناس الخليج ديل (من أصدقاء هذا البوست) قال لي مسعلة ود أشيقر عن حيث دي تلَّبت فوقها ساي، يا زول العفو، العفو،....

يجب كسر همزة (إنَّ) بعد حيث، لدى بعض المزالق تتغير القاعدة بوجوب الفتح، ونحن لم نتطرق إليها.. فنحن متفقون على أنَّ هذا البوست هدفه التيسير ما أمكن، والدليب الكُبار كُبار...


يعني في العموم كدي، خلي الناس تكسرها علي مسؤوليتي، أنا أخوك إت، أنا عارف جماعتنا ديل بصيغو الجُمَل كيف، يعني محل حفير الفتح دي ما كتير بردوها،.....

حيث إنَّه النسيان وارد.....

فسامحنا،... علي قول حبوبتي لامن تدور تتفلهم،....


..

Post: #260
Title: Re: إصلاح الكتابة في المنبر
Author: عاطف عبدالله
Date: 11-08-2005, 04:41 AM
Parent: #259

شكرا للأستاذ محسن خالد
في ظني أن هذا البوست من أهم ما كتب في المنبر الحر ، لذا أرى أنه يجب أن يتصدر صفحته الأولى إلى أن ينصلح حال الكتابة بالبورد

Post: #261
Title: Re: إصلاح الكتابة في المنبر
Author: Shinteer
Date: 11-08-2005, 05:56 PM
Parent: #260

UP

Post: #262
Title: Re: إصلاح الكتابة في المنبر
Author: محسن خالد
Date: 11-09-2005, 05:45 AM
Parent: #261

..


عاطف عبد الله،...
شكراً يا صديقنا عاطف، وتسلم، وعامك ندي وأخضر
وما عندك ورق لي بداية العام السنة دي؟ يا ريت والله نشوف حاجتك الجديدة البتسوي فيها..




Shinteer ،...

تحياتي ولك هنا مراجعة بخصوص (حيث) وخيّاتها....






كسر همزة (إنّ) بعد (حيث) و(إذ) و(حتى)









طبعاً القاعدة الأساسية بتاعة كسر (إنَّ) بتشترط عدم القدرة علي شنو؟ علي إنو نقدر نأولها هي واسمها وخبرها بمصدر، طيّب لو بنقدر نأولها معناها ممكن ما نكسرها... أيوووة، من هنا أنا تركت شوية نفَس للقاعدة دي، بس بعد الانتباه والمراجعة لقيت إنو همزة (إنّ) تكسر والقاعدة يمكن الوصول منها إلى أن تُكسر بإطلاق بعد (حيث) مرات بتجيبلها حبة ضرسها بس ما مشكلة... يعني نكسرها وطوالي وبقلب قوي، لأننا بنعتبر (إنّ) هنا بادية للكلام...

طيّب زيادة خير:



برضو بنكسر همزة إنّ بعد (حتى)... قاتل الرجل بشجاعة حتى إنّه بدا كجيش....

وكمان نكسرها بعد (إذ)... انتظرتك ثم ذهبت إذ إنَّ انتظاري بدا دون فائدة.....

وبعد (حيث)... وكرهتُ بلادهم حيث إنَّ العنصرية فيهم شيمة


أها تسلم يا ود أشيقر...


..

Post: #263
Title: Re: إصلاح الكتابة في المنبر
Author: Shinteer
Date: 11-14-2005, 09:31 AM
Parent: #262

شكراً جزيلاً يا محسن على زيادة الخير. وأمانة يا "حتّى" ما خالقة مشاكل.

واصل يا عزيزي في درس الأعداد المركبة وتمييز العدد وإعرابه.

ما تنقطع.

Post: #264
Title: Re: إصلاح الكتابة في المنبر
Author: Shinteer
Date: 11-17-2005, 12:56 PM
Parent: #263

ونبقى في الانتظار. حُرْقة بس .. ما داير البوست ده يحَتِل. وما داير أجوط فيه بما لديّ من بليلة.

Post: #265
Title: Re: إصلاح الكتابة في المنبر
Author: Adil Al Badawi
Date: 11-19-2005, 04:47 AM
Parent: #264

سلامات يا صحبي وسألت منَّكم العافية. حمداً لله على السلامة (متأخِّرة)، يا شنتير، وإن شاء الله الغطسة كانت، بمناسبة رمضان، ملائكية!

عدت من زيارة قصيرة للسودان وإنطباعي: بالله يا محسن، ولله يا محسنين، رسِّلو لي كتلوج "الانسان المجرِّي" خلوني أجترَّ جِرَّة المجرَّات لعلِّي أنْجُر لي مجرَّة أجري، وأجري على الله، عليها.

السبب؟! السودان، يا صحبي، يشيخ تارة بفعل ما يُمْتص من دمائه من قبل الدراكيولا الممثِّل لطبقة هي، بالنسبة الشعب السوداني، "قَدُر رأس الشوكة" وتارة بمحض إرادته إغراءً لملك الموت ليقبض ما بقي فيه من روح تتوق للموت فكاكاً مما أصابها من سأم. أستثني من ذلك، على استحياء، بعض من بوتوكس حُقِن به وجه/واجهة البلد حقناً غير مجوَّد وكأنِّي به قد تمَّ بطريقة "دفن الليل أب كراعاً برَّة".

ويا محسن نصيحة لوجه الله: أحسن ليك تعض بالنواجذ على ما تذكره من
Quote: ...نخلاتٍ ثلاث ونهر تتعرّج مشيته قليلاً جوار المقبرة القديمة، ثم يولّي مستقيماً وضارباً في الخلاء كالوشم على ساعد غجرية،...
لأنَّني أحسب أن ذلك النيل، المتعرِّجة مشيته، قد حفيت قدماه من كثرة ما صبَّح ومسَّى على أهل تلك المقبرة فحسدهم على رقدتهم تلك ورقد إلى جوارهم وفي ستين داهية تشبيهك البديع للنيل (الشاب) يولّي مستقيماً وضارباً في الخلاء كالوشم على ساعد غجرية إذ أنَّ السودان قد شاخ فكان لابد للنيل أن يصبح ضحلاً ذا ماء أزرق مخضر تماماً كما يصير لون ذلك الوشم على ساعد تلك الغجرية عندما تصيبها تجاعيد الشيخوخة.

أما النخلات الثلاث، فأضعف الايمان أن "ضُلَّهِن بِقَى ميت" وهو أصلاً ضُل ممحوق محقة ضُل بنات أعَمَّهِن من أشجار الدليب. الخلاصة: الفاتحة...الفاتحة...جبر الله كسركم، أحسن الله عزاكم.

أظل متابعاً، كقارئ، وأعود مشاركاً بعد أن أنفض عن دمي ما علق به من غبار السودان وبعد أن أرتِّب مشاغلي ومشاعري.

ودمتم.

Post: #266
Title: Re: إصلاح الكتابة في المنبر
Author: Shinteer
Date: 11-19-2005, 02:01 PM
Parent: #265

حِمدِلاّ بالسلامة يا عادل وكيف السودان على حسّك؟

افتكرتك مشيت عمرة وزغت، فالزوغة جايزة حتى داخل البلد ذاته.

ألكُز محسن ده خليه يواصل درس العدد. الدرس ده مهم خالس خالس لأن معظم الناس بِشوتوا الأعداد المركبة وتمييزها كيفما اتفق.

بعد درس العدد يا محسن عندي بعض الأسئلة الفنية؛ من باب التدارس وخد وهات.

في الانتظار.

Post: #267
Title: Re: إصلاح الكتابة في المنبر
Author: Adil Al Badawi
Date: 11-20-2005, 01:36 AM
Parent: #266

مشكور عزيزي شنتير والزوغة جايزة حتى داخل البيت (ما العتيق طبعاً) ذاتو. السودان على حسِّي فوق، ليس بمعنى "فوق سودانا فوق" وإنَّما بمعنى "كما هو مشروح أعلاه".

مشكور، عزيزي محسن، على المواصلة في إصلاح الكتابة في المنبر وأرجو أن أعود إليكم سريعاً لأفتح مزاداً لإصلاح "شَتَرة" الكتابة في المنبر وبانتظار الغريق القِدَّام (الأعداد المركَّبة) في درس العدد بفارغ الصبر.

أوقفتني حاجة تتعلَّق بالمثال:
Quote: جاءت سبعُ سنينٍ عجاف


والحاجة هي إلى أي مدى يمكن استخدام كلمتي "سنين" و "أعوام" بالتناوب؟. أعتقد، والله أعلم، إنُّو الحكاية ما طلقيت ساي وأللا شنو؟! يعني أكان طلقيت ساي، هسَّع لو قلنا "جاءت سبعُة أعوامٍ عجاف" بتركب عِرِي كدا وأللا بتكون دايرة ليها لِبْدَة؟!

حاجة تانية خاصة بكسر رقبة موضوع كسر همزة إنَّ: الكسر مع "حيث" و "حتى" واقع لي تَبْ سمووووث زي اللبان لكين مع "إذ" ضَرَسْتو حتَّت ضروسي، يا ربِّي يكون من باب "كسرة همزتين غرَّقو مركب العِبارة" وأللا شنو؟!"

ودمتم.

Post: #268
Title: Re: إصلاح الكتابة في المنبر
Author: محمد الأمين موسى
Date: 11-20-2005, 03:04 AM
Parent: #262

أخي محسن لك التحية على جهدك الدؤوب وسعيك نحو إصلاح الكتابة في المنبر.
إن إصلاح الكتابة يحتاج إلى إصلاح اللغة والأسلوب، وقبل ذلك يحتاج إلى الاستخدام الدقيق للمصطلحات والمفاهيم ("إعادة إعمار الجنوب"! متى كان الجنوب معمرا؟!) وحسن الاشتقاق والتوظيف السليم لعلامات الترقيم، لأن التواصل السليم يحتاج إلى ضبط المعنى واكتماله، ويحتاج إلى شيوع الإطار المرجعي بين الكاتب والمتلقي..
ويحتاج إصلاح الكتابة إلى معرفة مبادئ المنطق والسرد واستخدامهما في التطرق للمواضيع، ويحتاج إلى الثبات على الفكرة أو الموضوع وعدم الخروج منه..

Post: #269
Title: Re: إصلاح الكتابة في المنبر
Author: هاشم نوريت
Date: 11-20-2005, 11:54 AM
Parent: #268

استاذنا محسن خالد
وضيوفه
دبيانا
ارى الفصل يتسع يوما بعد يوم وهذا دليل عافية وكم كنت اتمنى من الاخ بكرى
ان يقوم
بتثبيت هذا البوست لاهميته.

واستاذنا بسأل عن الافعال (القلبية ) وكيفية معرفتها صدقنى متنشها شديد وياريت
تحكي لينا عنها شوية.

كم عدد هذه الافعال ؟

Post: #270
Title: Re: إصلاح الكتابة في المنبر
Author: محسن خالد
Date: 11-21-2005, 04:50 AM
Parent: #1

..



Shinteer
Adil Al Badawi
محمد الأمين موسى
هاشم نوريت

تحياتي يا أحباء ، ويا سمحين
يا شباب دا ما قدر ردي عليكم، بس البورد دا متجنّن علي، ما بجيب المداخلات بشكل مستقيم، بجيبن واحدة واحدة وما بقدر بدخل عليهن، قلت ليهو أعملن بشكل مستقيم أبى، قدر ما حاولت أباصرو أبى بالتكسر رقبتو ما يسمع الكلام، نشوف الحاصل شنو وبجيكم فرداً فرداً كما يجب،..


..

Post: #271
Title: Re: إصلاح الكتابة في المنبر
Author: عبدالماجد فرح يوسف
Date: 11-22-2005, 05:06 PM
Parent: #270

إنت يا محســن مشيت وين
إن شـــاء الله تكون بخير
قلنا نديك الخميس والجمعة وما جيت
قلنا إمكن بتويك إند زينا أها إتنين وتلاتاء ما جيت
عســــاك طيب
واتوحشــــناك ياخويا

Post: #272
Title: Re: إصلاح الكتابة في المنبر
Author: Shinteer
Date: 11-23-2005, 01:37 PM
Parent: #271

U
P

Post: #273
Title: Re: إصلاح الكتابة في المنبر
Author: محسن خالد
Date: 11-23-2005, 02:57 PM
Parent: #272


shinteer

تسلم يا بو ضراع، ولسه الكمبيوتر متجنن علي، بس قلت أرد مادام لقيت فرصة، وزي ما تتطلع تطلع،..



عبد الماجد فرح،..
صاحبي الجميل عبد الماجد، ماك طيّب
عارف الأيامات دي عندنا الجائزة السنوية بتاعة ابن بطوطة، وقدر ما أقول أدخل ألقى المداخلات في نفس الجوطة بتاعتها دي، وما قدرت أحل المسألة،..

ومتوحشكم بزّاف، آسيدي،...

والله يعونا جميعاً،...


خليكم بخير، لاحدي ما أستعدل أيامات دي وكمبيوتري وأجيكم،...


..

Post: #274
Title: Re: إصلاح الكتابة في المنبر
Author: عمر ادريس محمد
Date: 11-25-2005, 09:28 PM
Parent: #1

العزيز

محسن

الطهاره هى النظافه من الأوساخ الحسيه والمعنويه

وبوستك هذا يضيف بجداره

ومن الأميه

والركاكه



لك التحيه..والحب

Post: #275
Title: Re: إصلاح الكتابة في المنبر
Author: Shinteer
Date: 11-25-2005, 09:34 PM
Parent: #274

البوست الوحيد الذي لم يُصب بداء بني عجل.
أين أنت يا مُحسن؟ نعلّك عافية؟
الكمبيوتر لو لسع ملكلك .. أديه رفسة في صفحتو الليسرا، يعني من تالى اليسار. العلاج بالرفس ثابتة نجاعته في كتب الطب البلدي.

اظهر يا شيخنا.

Post: #276
Title: Re: إصلاح الكتابة في المنبر
Author: هاشم نوريت
Date: 11-25-2005, 09:45 PM
Parent: #275

شنتير
دبايوا
ومعك نسأل عن استاذنا محسن

Post: #277
Title: Re: إصلاح الكتابة في المنبر
Author: محسن خالد
Date: 11-27-2005, 02:03 PM
Parent: #276

...



العزيز shinteer ،..
يا ود أشيقر ماك طيّب، أنا اليوم مبسوط منك كطبيب، الكمبيوتر زهجني وأنا حذرتو واتمادى، أقوم أرجع وراء علي قولك وأشوتو، والله يا ود أشيقر لامن كهربتو قطعت ووصلاتو اتشتتن، قلت دي شوتة بـ1000 دولار، لكن نشوف كلام البصير ود أشيقر، يمين قلب الكلام دا صاح، بعد شوية دورتو وفتحت سودانيز بتاعكم دا، أنقر ما مسك الشارع، عفيت منك يا ود أشيقر، بمشي بجيب لي جذمة من النوع أم حديدة في رأسها ديك، بلبسوها المهندسين بتوع الورش عشان ما تقع فيهم حديدة تقرض أصابعهم، دا دواي ليهو من هنا فما قدام،..
يا زول اتوحشناكم والله، وأبقوا سامحوني كلكم على التأخر ولكلكة الكمبيوتر،..


Adil Al Badawi،...
يا زول حمدلله علي السلامة، وكلامك حلو شديد في قراءتك لتلك البلاد، ياخي مرّات أزهج وأقول والله اشتقت للمقبرة والنيل المنعرج، بس أتذكر حاجات تانية أقول خليهو السودان دا في حياة تانية وبعيدة،..
يا زول نحن اتوحشناك وسعالنا عنك أهو قدامك مسجّل، وأنفض تعبك وتعال، راجنك،..

سؤالك عن (السنين) لأنَّ كلمة السنين نفسها تشتمل على معنى (المحل والجدب والقحط) وكلمة (الأعوام) تشير إلى الزمن فقط، هذا بخصوص المعنى، فيرد في القرآن: (ولقد أخذنا آل فرعون بالسنين ونقصٍ من الثمرات)، والسنين هنا تعني الجدب والقحط والمحل، سلّطه الله على آل فرعون،..

بعدين ممكن تقول (سبعة أعوام عجاف) لأنو الصفة عجاف بتفي بالغرض، بس الأبلغ تستخدم اللفظة (السنين) لأنّ المفردة طبيعتها نفسها تنبني من القحط والزمن، يعني السنين أبلغ وأجدع،..
أما الضرسة بتاعة (إذ) دي فلوكها ساي، لأنو "السليقة" وألا السخينة بتاعتنا مخرّبة بلغة الصحافة والسماع الخاطئ منذ الصغر،..
أها يا زول كن بخير، وداوم،..

محمد الأمين موسى،..
ولك التحية، لجمال روحك المحبّة والمقدّرة، والوداد أبداً لك،..
والأخطاء بالفعل، تنتقل كلها عن طريق نقل الكلام دون التمحيص فيه، لفترة من الزمن كنت أحاول تخريب كل مساعي "نملات الكلام" دون فحص وتمحيص كما أسميهم، مثلاً يقولون (اللبيب بالإشارة يفهم) أنا فوراً أجيب: دا العوير البفهم بالإشارة، أو الأبكم، اللبيب بدون إشارة بفهم،..
علامات الترقيم، سأعود إليها باعتبار أنها جزئية ضرورية من معنى الكلام نفسه وليس شكله فحسب، لأنّ تقطيع الكلام جزء مهم من معنى الجُمَل، إشارات المرور الكلامية ضرورية لنعرف هنا مدرسة مستشفى منحدر، وإلى منتهاه من الأشياء الضرورية لجعل الكاتب والقارئ يشتركان في مرجعية واحدة كما تفضّلت،..
بخصوص: ويحتاج إصلاح الكتابة إلى معرفة مبادئ المنطق والسرد واستخدامهما في التطرق للمواضيع، ويحتاج إلى الثبات على الفكرة أو الموضوع وعدم الخروج منه،..
هذه قضية كبرى، وتتعلّق بفوضى التفكير هنا، ولا تنحصر في أداة توصيل التفكير فحسب، أي اللغة، بل هي مسألة تشير في البداية إلى المرجعية الحضارية بكاملها التي أتى منها الشخص، المجتمع والتربية والثقافة ومستوى التعليم ورُقي الإحساس وو... إلخ، أي هي مسألة تتعلّق بمجمل الإنسان،..
وأرجو مثلك، أن نتطور وأن نرتقي وأن نصبح أشخاصاً نتعامل فيما بيننا بملاحظة أننا في القرن الحادي وعشرين،...
ولك أجمل التحايا على هذه الإشارات الضرورية والمهمة بحق، ولك سلامي أوفاه


هاشم نوريت،..
دبيانا، يا عزيزنا هاشم، وسلامي الكثير لك،..
يا زول اتوحشناك، وينك يا رجل،..
أها الأفعال القلبية دي بتجيب أمور القلوب وناس "تيموليلت" وبتقوم تشرد مننا تاني، أنا ما داير أتكلم فيهن،..
متذكر يا هاشم سؤالك عن (الأسماء الممنوعة من الصرف)، وبجيهو راجع هو والأفعال القلبية بالمهلة وواحدة واحدة، بعدين يا صاحبي "البجاوي" أنا شايفك مغرّق في العربي بالحيل، الشباب ديل نحن دايرين نناضمن في نمرة 1 ، عشان ما يطشوا، والأفعال القلبية معذّبة الناس عربي وإنجليزي، perceptions verbs ، ودا وعد نجيض مع (الممنوع من الصرف)، أخلص من العدد دا، وطوالي أدوّر فيهن،..
أها يا صديقي لك أجمل الأمنيات، وامهلني ما تقول أنا اطارشتك، وما تحرمنا من طلّتك، باقي صاحبنا محمد السر بسأل منّك طوالي وفاقدك،..
وكن بخير،..


عبد الماجد فرح يوسف،..
الزول الحلو، وشارح صدري كلما رأيت ابتسامته،..
عارف كنت منشغل شوية بالإضافة للكمبيوتر الأبى يشتغل إلا بالشلاليت النصحنا بيها شنتير،..
واتوحشناك بزّاف آلشريف،..
وكن بخير،..
وديمة خليك هنا،..


عمر إدريس محَمَّد،..
يا زول أريتك بخير، وسلامي الكثير لك،..
وربنا يطهّرنا من كل ما بنا،..
وكيف حالك، وأمنياتي أجملها لك، ودم بخير صوتاً للحق ومضيفة أحبّة،..
سلامي لك، ولأهل بيتك،..
وبلّغ سلامي الخاص والشديد لـ"نبتة"، قوليها عمو البتشبه عيونو بابا بقول ليك إزيك،..
وكن بخير أبداً،..


..

Post: #278
Title: Re: إصلاح الكتابة في المنبر
Author: Shinteer
Date: 11-27-2005, 03:13 PM
Parent: #277

جيدن جيت.
مسألة استخدام أسالبيب الـ Cow-tech* مع تقنيات الـ Hi-tech من المسائل المجرّبة وقد بدأتُ أول تجاربي في هذا المجال عام 1997 حيث رفستُ كمبيوتر ماكنتوش كان يلفظ أنفاسه الأخيرة فعادت له الروح بعد تلك الرفسة الميمونة. ومن ديك وأنا شغّال رفس بس.

Cow-tech= cow technology .. وانت عارف اعتماد الناس على رفس المحاريت كعلاج لخلل طارئ.

حِمْدِلاّ بالسلامة.

Post: #279
Title: Re: إصلاح الكتابة في المنبر
Author: عبدالله الشقليني
Date: 11-27-2005, 04:40 PM
Parent: #1

عزيزنا محسن خالد
والأحباء هنا :

اللغة العربية أصعب مما نتصور .
لنرفع البوست رغبة في ترفيع الكتابة ،
و تحاشي الأخطاء الفادِحـــــــة

Post: #280
Title: Re: إصلاح الكتابة في المنبر
Author: محسن خالد
Date: 11-27-2005, 05:26 PM
Parent: #279

..


Shinteer،..
يا صديق، تحياتي، ولك السلام،..
غايتو أنا استفدت من المسألة دي جداً، وفي طريقي لاشتراء تلك الجزمة، ذات البوز الحديدي،..
ويضحك دهرك،..


عبد الله الشقليني،..
تسلم يا رجل،..
ونرجو أن نتفادى من الأخطاء ما بوسعنا تفاديه،..
فكن بخير،..
ويطيب دهرك،..


..

Post: #281
Title: Re: إصلاح الكتابة في المنبر
Author: محمد الأمين موسى
Date: 11-28-2005, 00:30 AM
Parent: #280

أخي الفاضل المبدع محسن لك التحية والتجلة على الجهد الذي تبذله في هذا المقام.
تيقنت تماما أنك تريد فعلا إصلاح الكتابة في هذا المنبر، وهذا يدفعني لكي اقترح عليك الكتابة في مستويين مراعاة لظروف القراءة في النت الموسومة بالقلق والرغبة في الإبحار المتعدد.. أتمنى أن تقدم وجبات سريعة للقارئ العابر الذي يريد أن يلتقط معلومة يضمد بها بعض جراح كتابته (أعني إصلاح الأخطاء الشائعة في الكتابة بالمنبر)؛ وفي مستوى آخر تتابع الوليمة اللغوية لمن شاء أن يستزيد.
وفقك الله

Post: #282
Title: Re: إصلاح الكتابة في المنبر
Author: nashaat elemam
Date: 11-28-2005, 01:39 AM
Parent: #281

محسن يا عزيز اتوحشناك آ لطيب

أثني اقتراح الأخ محمد الأمين موسى

Post: #283
Title: Re: إصلاح الكتابة في المنبر
Author: محمد السر
Date: 11-28-2005, 02:07 AM
Parent: #1

الأساتذة الكرام..
الشوق كراريس..
لي مدة أتاوق للفصل واتزاوغ منو.. لكن الليلة ضحكت في تعبير شنتير دا:
Quote: مسألة استخدام أسالبيب الـ Cow-tech* مع تقنيات الـ Hi-tech من المسائل المجرّبة
وقلت النخش.. أصلاً العلقة ما فايتانا.. لأنو بعد غزوة ذات الهمزات بقيت خايف أجي خاشي تقولوا لي "تصلِّح في غلط الناس وغلطك مالي المنبر!!".
يا أستاذ محسن.. عارفك ملخوم والكمبيوتر مغلبك.. لكن طالما قعد تفكِّك العامية نديك دي:
قبل فترة كنت مع جماعة من فسلطينيي الأردن.. ولاحظت في كلامهم لما يجو يقولو الحاجة حقتي ولا بتاعتي بيقولوا:
السيارة تَبَعْتِيْ
المفاتيح تَبَعْاتَيْ
السيارة تَبَعْاتَكْ

فهل (تَبَعْتِيْ) ياها (بِتاعتي) حقتنا ولا المسألة تشابه ساكت؟

لكم المحبة

Post: #284
Title: Re: إصلاح الكتابة في المنبر
Author: هميمة
Date: 11-28-2005, 10:16 AM
Parent: #1

محسن ....... يا محسن

الليله انا جيت منقطعه ليكم فى صفحة 3 دى توووش !!!

انت عارف انو دا بوستك الوحيد الما شالتو الكشه

لمتصفحى السودان ؟؟؟؟؟ انا متابعه البوست من زمان

والصفحات 1و2 منزلاهم فى لاب توبى ... بنعس بيهم ( فليل) !

وانا ح اسكت ساى ما ح اجيب سيرة المكانيه والزمانيه ..

الفى اول الصفحة دى ... اولا عشان الكشه ... وتانيا خايفه

على عضمى دا... حاكم انا فى السودان مع انى ( دى ماعنى )

عندى تنظير فيها خطيير ....

اولا يا حبيب انت عندك رخسه ؟؟؟ طبعا.... لا

لانك خريج اقتصاد ... اها دى مخالفة تدفع 150 درهم ....

وطبعا فى السودان عندنا بعد ما تدفع الغرامة بتبرز

الايصال فى اى تفتيش قادم ... دا بديك شرعيه وبقنن لوضعك

ال غير قانونى دا لى باقى اليوم شفت الجبايه دى كيف ؟؟

ولا بكلم ناس الكشه للبوست اليتيم دا ...

لكن والله ........... ابصم بالعشره انو ناس الرخص كلهم

ما فيهم زول لذيذ وفهامه زيك كدا ... من زمان وانا بقول ليهم

التدريس دا فن وموهبه وط... لكل حملة الشهادات !!!

اها عشان ما تقول لى بريتينى ...ماعنى عارفة انك خشابى !!!

افتينا فى مسالة المحاميه .... انا بصر انو اكتب المحامية

وموثقة العقود ... وكثير من القضاة الحواة الذين انتشروا فى

عهد الانقاذ يروحو شاطبنها لى بالقلم ... قال قال مجمع اللغة

العربية فى القاهرة اصدر فتوى من الخمسينات انو المهن لا تونث ؟؟؟

هى سجمى ... هى المهنه ذاتها ما مؤنث !!!!

بعدين دى مش صفه ؟؟؟؟ غايتو ورينا الدباره عشان نتفاصح


Post: #285
Title: Re: إصلاح الكتابة في المنبر
Author: محسن خالد
Date: 11-30-2005, 04:21 AM
Parent: #284

...




محمد الأمين موسى،..
تحياتي يا رجل، وكن بخير،..
أنا أوافقك تماماً، وهذا ما بدأنا من خلاله ونحاول الالتزام به ما وسعتنا الحيلة، لأنَّ شرح بعض النقاط يجرّنا إرغاماً نحو قضايا متعمّقة، وفي تقديري نحن إلى الآن نتفادى التخصصية والتوغّل، ونركّز ما أمكننا على "الدُّرَّاب الكُبار، كُبار"،..
هنيئاً لهذا البسوت بأصدقاء مثلك،..
ودم جميلاً،..


nashaat elemam،..
إزيك يا ولدي نشأت،..
يا زول إنت داير تبقه عاق زي أبوك وألا بتسوي في شنو؟
لينا زمن ما شفناك،..
أبقه أظهر،..
وكن بخير، أبداً بخير


محمد السر،..
إزيك يا صاحبي،..
عارف كلام شنتير دا انا قريتو، الغنماية تَكْ... والهاي هاي تَكْ...
وشبعت ضحك،..
بعدين تبعاتي وتبعي هي نفسها "بتاعي"، وحقّتن أصحّ من حقتنا، مع ملاحظة إنو الريفيين بقولوا (حقِّي) زي بعض الخليجيين، ودي أصح منهن الاتنين، والريفيين تب زينا كدا بقولوا "هولي" أي: هُوَ لي" ودي الأكثر أصالة، والخليجيين خالص "البدو" برضو زينا الشِبِر بالشِبِر، بقولوا: (مالتي)، أي (ما هي لي)، ونحن أحسن منهم بحذفنا لحرف "التاء" هولن دا،..
وما تغيب تاني، هَسَّع عفيناك،..



هميمة،..
كيفك يا الزولة السمحة وعسل،..
هو يا بتي الزول العمل الكشة دا ذاتو ما قالوا كشوهوا، وألا كشّاش عقب كشّاش؟ غايتو ربنا يسامحن، أنا حقي ما عافيهو،..
بس والله لو في زول خلاني ألبد غابة تطفل وحب استطلاع ياهو إنت دي، أموت وأعرف دايره تقولي شنو في الزمانية والمكانية، ونظرياتك فيها!
وأنا بجاوبك علي سؤالك لقاء إنك ما تثيري قضية الرخصة دي، نحن عايرين فيها ساي الشغلانية دي، والحمد لله أنا لا أؤمن باتحادات الكُتّاب والأدباء والنقابات الفنيّة،..
بس تاني قولي: (وضعك غير القانوني)، مش، (وضعك الغير قانوني)، أها شفتي السداد؟
ولا يهمك يا ستي، طوالي تقولي: محامية، مهندسة، طبيبة،.. إلخ..
لأنو الحركات دي أصلاً جابوها اتنين: "ناسكم، ناس القانون"، لأنو القانون بيخاطب المفرد الحاضر أو الغائب بدون تمييز، أها شنو ليك؟ ما مثقّف؟
وثانياً: جابتها اللغات الأجنبية لانعدام صيغ التأنيث والمذكر في الخطاب وغير الخطاب، زي معظم اللغات الغربية،..
بالنسبة للعربي، الكلام فيهو مفروز تمام، المره مره، والراجل راجل، بدون أي لخبطة،..
(لو سرقتْ فاطمة بنت محمد، لقطع محمد يدها)،..
أها فاطمة دي هنا اسمها "سراق"، والنبي استخدم لها "سرق". وألا اسمها "سراقة"، والفعل معها كان "سرقت"؟
والسرقة عند الكيزان وفي سودانا دا وأيامنا ديل "مهنة".
بعدين أوَّل مرة أسمع إنو المهن لا تؤنّس، يعني "الخيَّاطة" بقولوا عليها الخياط في العربي؟ وألا كيف؟ والخنساء تماضر بنت عمرو كانوا الشباب في سوق عكاظ بنادوها الشاعر وألا الشاعرة؟
الدبارة يا ست أبوك تأنّثي أي حاجة مؤنثة، والصفات نفسها مؤنّثة ومذكّرة،..


..

Post: #286
Title: Re: إصلاح الكتابة في المنبر
Author: عمر ادريس محمد
Date: 11-30-2005, 11:33 AM
Parent: #1

شكرا

يامحسن

طبعا إنت مابتكون عارف إنك (بتحاحى) مع ناس بادين من الصفر,أنا فعلا البوست ده فرشتو

فى الواطه زى ماوصيتنى زمان فى بداية هذه المأدبه الأدبيه الرائعه...وراجعت

حاجات كثيره وبحق إستفدت منه شديد فى التعبير عن نفسى وماشى لسه.

ماعارف الناس العندهم ثقه فى انفسهم ودايرين يبقوا كتاب حصل عليهم شنو, مؤكد بكون

ساعدهم ومن ملاحظاتى إختلف شكل الكتابه فى المنبر واصبح أحسن كتير.

والفضل يرجع ليك .

لما تلقى وقت

المصايب دى استعمالاتها الصحيحه كيف ؟

,,,,,,,,

!!!!!!!!!

؟؟؟؟؟؟

.......


خالص تحياتى

Post: #287
Title: Re: إصلاح الكتابة في المنبر
Author: Adil Al Badawi
Date: 12-01-2005, 01:13 AM
Parent: #286

أشكرك عزيزي محسن وأمانة "السنين" ما جضَّمتها "جِضِّيم السنين".

قولك:
Quote: ...بس الأبلغ تستخدم اللفظة (السنين) لأنّ المفردة طبيعتها نفسها تنبني من القحط والزمن، يعني السنين أبلغ وأجدع،...
وقولك سابقاً:
Quote: ...إيماني إنو القرآن دا ما فيهو كلمة مختوتة ساي، أبداً، أي كلمة في القرآن هي كلمة نجيضة ومقصودة في رقبتها،...
رجَّعني للآيات الوقَّفتني في الموضوع وهي: {ثُمَّ يَأْتِي مِنْ بَعْدِ ذَلِكَ سَبْعٌ شِدَادٌ يَأْكُلْنَ مَا قَدَّمْتُمْ لَهُنَّ إِلا قَلِيلا مِمَّا تُحْصِنُونَ} {ثُمَّ يَأْتِي مِنْ بَعْدِ ذَلِكَ عَامٌ فِيهِ يُغَاثُ النَّاسُ وَفِيهِ يَعْصِرُونَ} لاحظ "سبع شداد" و "عام فيه يغاث الناس" وكأنَّ كلمة سنين "مختوتة"، كما قلت، لتفيد الشِدَّة فيما أنَّ كلمة عام تفيد الرخاء.

أعود، قريباً، متأبِّطاً هذه السورة (الصورة التي فصَّلت قصة بكل ما يمكن أن يكون في القصة من عناصر) كجرس أقرعه مفتتحاً ما وعدت به من مزاد لاصلاح "شترة الكتابة" فإلى اللقاء.

تحياتي.

Post: #288
Title: Re: إصلاح الكتابة في المنبر
Author: محسن خالد
Date: 12-01-2005, 07:50 AM
Parent: #287

..



عمر إدريس،..
يا سيدي مخ السلام ونخاعو، وأصفى التحايا لك وأنقاها،..
رجائي دائماً أن أنتبه أنا أولاً لأخطائي، والبقدر أصحيهو معاي ويصحيني معاهو، تكون البركة كلها بيناتنا،..
وشكراً ليك كتير، على هذا الحب وجمال السريرة،..
أما المصائب القلتها دي، فأنا ملاحظ إنو الناس بتكرّر أدوات ("دعوة الإكمال والاسترسال" وهي النقاط المتتابعة (...)، وأيضاً "التعجُّب والحَيْرَة" وهي العلامة المعروفة (!) و"الاستفهام والتساؤل" وهي (؟)، لمزيد من تأكيد هذه الدلالات على القارئ،...

بالنسبة للنقاط المتتابعة (اتنين كفاية)، لأنو (واحدة) بتعني (الوقوف الكامل مش الاسترسال في الأمر وحدك،...
التعجُّب والاستفهام بالطبع (علامة) واحدة بتكفي، أما شفوت الكتابة القاصعين فديل بصيغوا الجملة نفسها بحيث القارئ يستفهم ويستعجب غصباً عنه، بالنسبة للمدلولات الأدبية، ما لم تكن الكتابة مباشرة وتقصد السؤال عن شيء بعينه والاستفهام حوله، أو التعجُّب من أمر وإبداء الحَيْرة إزاءه،..
وكما أسلفت لك، إن كان القارئ لا يشاطرك أرضية ما تقف عليه، فلن يفهم الدلالة، والتكرار الغليظ بأي حال ليس مهماً، فكما أسلفت لصديقنا محمد الأمين موسى، اللبيب –المتلقي هو الذي يفهم بدون إشارة، واللبيب –الكاتب، هو أيضاً من يُبَلِّغ بالحروف دونما حاجة لـ"رموز" إلا فيما هو ضروري،..
وهذه النقطة ستكون من صميم ردّي على عادل البدوي، بخصوص "سورة يوسف" أو رواية يوسف القرآنية، التي أنجزها الفرقان بدون استخدام أي تقنية من تقنيات الحوار والقص والحكي، المستخدمة في أيامنا هذه،...
وكن بخير، أبداً،..




Adil Al Badawi،..
وليك السلام، في الرحب
هذا صحيح، جيّد أنك ما تزال تذكره، وإن كان لا يمنع ورود السنين كمفردة دالة على الزمن فحسب، كما أسلفت،..
ولكن دعني أشاركك بهذه الأقصوصة، حول مفردتين أُخريين،..




(إنسان) أم (بشري –آدمي)





هناك اختلافات واضحة أيضاً وضعها القرآن بين المفردتين "الإنسان" و"بشري، آدمي" كمفردة واحدة، وهذا ما لم يلاحظه الكثيرون من المتدينين حين الحديث عن نظرية "دارون"، أنا طبعاً لستُ معجباً بنوعية "عبد المجيد الزنداني" و"مصطفى محمود"، فهما يحاولان تبرير الإعجاز بالعلوم، ولكنهما يشردان شردة بنات القنديل ليموتا بعطشهما في قلب الخلاء كما يُقال (عطش بنات القنديل) في أدبيات مجتمعنا الصغير، يحدث ركضهما عندما يتعكلت لهما العلم مع نصوص أخرى، شخصياً أفضّل طرائق بتوع السيميلوجيا، في التعامل مع النص بحياد كبير، وبالقراءة له فعلاً، وليس إنجاز الإسقاطات عليه، القرآن بشكل واااضح، وسااافر، ميّز بين (الإنسان)، وبالمناسبة القرآن لا يذكر هذه المفردة إلا ومتبوعة بالشر، فيما يُشير إلى الطور الأولي والمرحلي منه، ثم يتحدث عن "الآدمي أو البشري" بصورة أخرى، تشبه أن تكون صورة المُكَلَّف والراشد، صورة البشري الذي زاد جردل "دنقوسه وفاخورته" عن آخر في ماضٍ سحيق كان حجم (رأسه) أصغر، والدماغ الداخلي نفسه "كمادة سائلة ولزجة" كانت أقل أرطالاً بكثير عن (بشري) اليوم،..
(للمزحة بقولوا ليك خليك إنساني، وعندك إنسانية، في حين أنَّ (الإنسان) القرآن مارقو كعب وبتاع دم وبدائي وطور أولي وبرايمري خالص، مفروض يقولوا خليك بشري وآدمي، الشوام بقولوا "زلمة آدمي"، ودي أجمل، من "زول إنساني")،..
يعني واضح في القرآن إنو آدم كان ("مدماك" زيادة) اتولَّى أمرو ربنا بنفسه، والإنسان داك كان قاااعد وتافه ومشهور بالتفاهة والدم، والملائكة فتحت خشومن (قالوا: أتجعل فيها من يُفسد فيها ويسفكُ الدماء، ونحن نسبّح بحمدك ونقدّس لك)،..
يعني هم عارفنّو وشايفنّو، مش موضوع جديد كليةً، كيف يكون (الإنسان) كان مقترح شاورن فيهو الله يادوووب، (إني جاعلٌ في الأرض خليفةً) وهم يكونوا ناقشنوا، أبداً، هم كانوا بتكلموا عن الإنسان، وما عارفين إنو ربنا نوى يطوروا ويعمل من (الفسيخ شربات)، والشربات ياهو آدم ذاتو،..
بل الكلمة مميزة تمييز واضح في آية تانية: (وإذ قال ربك للملائكة إني خالقٌ بشراً من صلصالٍ من حمإٍ مسنون)،..
وعشان ما يجي عبقري ويقول إذن (البشر) من طين (يعني شيء جديد) نسألوا من هسّع طيّب وداك من شنو؟
(الذي أحسنَ كلَّ شيءٍ خلقه، وبدأ خلق الإنسان من طين)،..
ولاحظ –كروائي- لطريقة السرد، ربنا هنا ما قال خلق البشري، وإنما الإنسان، لأنو النقطة صفر في تعداد آدم،..


هو الله شنو؟ الله عقل ضخم، بوسعه ترتيب كل هذا الوجود والمجرّات بحيث تصبح المسألة من الضخامة أكبر من خلق الإنسان كما يقول القرآن: (لخلق السموات والأرض أكبرُ من خلق الناس ولكنَّ أكثر الناس لا يعلمون)،..
قلنا آدم مدماك زيادة في بنيان الإنسان، والإنسان أقدم من آدم، وهسع نحن لو أخطأ أي شخص في حق الآخر يقوم صاحبو طوالي، يقوليهو: عادي، ما إنت أصلك وفصلك كَيْت وكَيْت، "اتطورت والله"،..
وربنا يقر بهذا الإنسان القديم، وحينما يخطئ يذكّره بأصله وفصله: (هل أتى على الإنسان حينٌ من الدهر لم يكن شيئاً مذكورا)، طيّب يا جاحد ما نحن رفّعنّاك من خامل الذكر لشيء مذكور وكائن مفكّر، من روحنا، أي من عقلنا،..

طيّب الملائكة غالطوا ربنا، قالوا (الإنسان) دا تب ما منو خير، أها ربّنا (قلنا زادو مدماك) وهو كان في التطور بلغ مرحلة الساقين، الاستقامة، يعني طلع من حارة القرود، ويادوب "صول إنسان" وما اترقى بعد "ملازم بشري"، ربنا قاليهم تعالوا يا ملائكة أنا العالم بكل شيء، وبما أفعل، ما إنتو، تعالوا أتفرجوا:

(وعلَّم آدم الأسماءَ كُلَّها ثم عرضهم على الملائكة، فقال أنبئوني بأسماء
هؤلاء إن كنتم صادقين (31) قالوا سبحانك لا علم لنا إلا ما علَّمتنا، إنَّك أنت العليم الحكيم (32) قال يا آدم أنبئهم بأسمائهم، قال ألم أقل لكم إني أعلمُ غيبَ السموات والأرض، وأعلمُ ما تُبدون وما كنتم تكتمون (33)

هسّع القصة دي ما واضحة جداً جداً، بعدين دارون دا ما لعب، صاح هو سرّاق، والتطور والنشوء هو ما أسّسوا ولا ابتدعوا إنما شغل دكتور من جنوب إفريقيا، ما متذكرو هسّع، أنا بكتب من راسي فوراً، ودكاترة كتار بتاعين تخصصات مختلفة في إطار الزولجي، دراوين لمَّ الشغل دا لأنو حريف، وكاتب ملعون ومسّكوا الدرب، زي شغل ماركس مع ابن خلدون، ودي طبيعة العلوم كلها كدا، مدماك فوق مدماك، لامن نصل قصور الكمبيوتر، ماعدا عبقريات شرسة وشاذة زي (نيوتن) والزول دا بالمناسبة كان حاسد وغتيت وشرير عديل كدا، وحشّ لهالي رأسو حش بملعنتو، أو (إنشتاين)،..
المهم هي النقطة نفسها التي وصلت منها الإنسانية إلى نظرية (الجيشتالت)، لأنو بتوع جنوب إفريقيا كانوا شَغَّالين في تجارب كثيرة وخطيرة، أهمها: هل القرد يستطيع أن يحسب؟ طبعاً مع تضمين جزئية، إذا كان الإنسان قد جاء منه!؟ وكان افتراضهم الأولي، نعم، وكانت الاختبارات كالآتي، يختوا "موز" جوه حُفرة ويخلوا القرود تشوفها، الكلام دا قديم طبعاً، أها ينزلوا راجل واحد جُوَّه الحُفرة، القرود ما بتجي للموز، الراجل يطلع من الحفُرة ويمشي بعيد، يختفي، القرود طوالي تجي مبرطعة للموز،..
طيّب ينزلوا راجلين، يفرتك منهم واحد "بس" القرود ما بتجي، يفرتكوا الاتنين القرود تجي دافرة، قالوا خلاص (القرود دي بتعد لاحدي اتنين)،..
تلاتة رجال، لامن يفوت التالت القرود تجي مبرطعة، خلاص القرود شاطرة وبتعد لاحدي الرقم تلاتة، والعلماء المتدسيين في الشجر يشيلوا ويصفقوا،..
أها، أربعة رجال، هنا القرود "دقست"، بمجرّد تالت رجل طلع جات مندعرة، لقت الرجل الرابع جوه الحُفرة،..
طيّب الاقتراح اللحظي الفطير إنو هي بتعرف تعد لاحدي تلاتة، ولساها كانت (نظرية الجيشتالت) مدّسية في الغيب، قاموا جوهم ليك ناس البصريات، والحجّة وقفت، إنو المسألة متعلّقة بالبصر "بنظرة كلية" مش بالدماغ، بالتالي قرد يعد واحد اتنين تلاتة، ما يفترض إمكان تعليمه -كطفل- العد إلى عشرة فما فوق،..
يعني القرد بقدر يشوف الجسم الكلي لتلاتة أشخاص، ولو الجسم دا، (أي النظرة) نقص، القرد بقدر يعرف، لكن لو الحجم الكلي للـ(النظرة)، زاد من (سعة نظرة لتلاتة أشخاص) كدا القرد لن يستطيع التمييز، يعني شغلوا مبني علي الكتلة، لا بعرف يعد ولا يحزنون، والموضوع عندو علاقة بالتحليل البصري، مش التحليل الفرزي الحسابي، بتاع البشر، يعني شغل كاميرات مش جداول ضرب وطرح،..
من هنا وُلدِت الجيشتالت، وتفرقت وتلونت في العلوم، التشكيليون جابوا لوحاتن وقعدوا يشخبطوا نظرة كلية وجزئية، مدى بصري كُلّي ومدى جزئي،..
ناس التربية جابوا سبوراتن وقعدوا يشخبطوا نظرية تعليم كلية وتانية جزئية،..
وعيييك، النظرية عارت، شوفتوا كيف شجر العلوم بقوم؟ دي الفكرة،..
نرجع للإنسان والبشري، والما فاهم كلامي دا يراجع نظرية الجيشتالت، أو كمان تساءل مع روحك ونفسك،..

(تساءل، على الدوام تساءل، ليس بالضرورة من أجل أن تحصل على إجابة، بل يكفي أن تفهم مدى وطبيعة سؤالك فحسب، يكفي، لأنَّ هناك من يركضون هنا وهناك بأسئلة لا يدرون عن تساؤليتها الحقيقية شيئاً)،..

هنا دراما الإنسان كاملة، من سورة البقرة وفي ترتيبها الصحيح:

((هو الذي خلق لكم ما في الأرض جميعاً، ثم استوى إلى السماء فسواهنَّ سبعَ سمواتٍ، وهو بكل شيءٍ عليم (29) وإذ قال ربُّك للملائكة إني جاعلٌ في الأرض خليفةً، قالوا أتجعل فيها من يُفسد فيها ويسفكُ الدماء، ونحن نسبّح بحمدك ونقدّس لك، قال إنّي أعلم ما لا تعلمون (30) وعلَّم آدم الأسماءَ كُلَّها ثم عرضهم على الملائكة، فقال أنبئوني بأسماء هؤلاء إن كنتم صادقين (31) قالوا سبحانك لا علم لنا إلا ما علَّمتنا، إنَّك أنت العليم الحكيم (32) قال يا آدم أنبئهم بأسمائهم، قال ألم أقل لكم إني أعلمُ غيبَ السموات والأرض، وأعلمُ ما تُبدون وما كنتم تكتمون (33) وإذ قلنا للملائكة اسجدوا لآدم فسجدوا إلا إبليس أبى واستكبر وكان من الكافرين (34))،.. سورة البقرة،..

وفي كتاب (التوراة، الإنجيل، القرآن، والعلم) يقف موريس بوكاي، وهو متحوّل للإسلام، مع سفر التكوين، لأنو دقس بطريقة لم يدقس معها القرآن، سفر التكوين طبعاً بتعامل مع أيام الخلق السبعة كأنها أيام فعلاً سبت أحد اتنين وكدا، بينما اللغة العربية بتسعف الواحد يقول (أيام العرب) والمقصود منها حروب دارت لعشرات السنين، اليوم في لغة العرب يعني المرحلة، وكدا القرآن ما دقس، لأنو التطور احتاج لملايين السنين، بس "سفر التكوين" دقس هنا بالإضافة لإنو بقول الله خلق البحار والنباتات وشنو وشنو وشنو، والناس ووو.. ومتأخخخر يجي للشمس والنجوم والمجرات، طبعاً الزرّة والحوشة هنا واضحة، لأنو الضوء كان في البداية عشان الشجر يقوم والناس ووووو..
حسب ملاحظتي وتتبعاتي، في أي مكان –قرآني- ترد رواية الخلق، الشجرة لا تتقدم السماء أبداً، ودي اللعبة كلها ضوء فكلوروفيل، أعطك حياةً....
شوف القرآن بداها صاح الصاح، ((هو الذي خلق لكم ما في الأرض جميعاً، ثم استوى إلى السماء فسواهنَّ سبعَ سمواتٍ، وهو بكل شيءٍ عليم (29)))،..
الآية دي طبعاً ما ذكرت خلق الشموس والأقمار وو. مفردات السقف، لكن برضو مشت في الناحية دي، في آيات تانية بتتكلم بالتفصيل، وهسع ما عندي زمن أمشي أكوسها وألقطها كلها، البلقى آية مشاترة يجيبها ويجي،..
يعني في قصة الخلق القرآن طوالي بمشي السماء محل بركبوا الكهارب والأساس مش الشكل، لبناء الكون ومن ثم الكينونة، ضوء فكلوروفيل، أعطك حياةً كما اختصرنا الموضوع....



ما يمكن إضافته أيضاً هو أنني كنتُ أتساءل عن: لماذا قال الله (عرضهم) ولماذا كلمة (هؤلاء)، المعلّمتان، هل يعني (الإنسان) و(البشري) أم ماذا؟ يعني شوفوا آدم القديم، وكمان شوفوا آدم المنفوخة فيهو الروح والتفتيحة؟
أم هل هو (الاسم) (الأسماء) مفردة مذكّرة ولذلك قال عرضهم وقال هؤلاء...
الصحيح طبعاً هو المقترح الثاني، الاسم مفردة مذكّرة وانتهينا، كي تبدأ الدراما الحقيقية لـ"السي إبليس"، يعني ربنا ما كان غالبو يكسر رقبتو وانتهى الموضوع، ولا إبليس هو ذاتو ند لله عشان يخش معاهو رهان بتاع انتصار! يعني المسألة لامن ربنا يرويها زي ما تقول كدا، وبدون تشبيه أو تأويل، تمشي لصاحبك في البيت وهو من النوع البريد شفعو جداً داك، ياخي نشوف الأخبار، هاهها ضحكة لطيفة يطلقها مُوجِد الوليدات، بجمال بمحبّة وتفرّج على نمو أرواح موجوداته، يجيبك: والله الشفّع ديل رموا التلفزيون من الطربيزة العالية دي وهسّع عند الصلاح،..
ويجيك شافع منهم ينقذ بمفاهيم احتجاج زي "أمل دنقل"، آي رماهو أحمد لطخ:
المجد للشيطان معبود الرياح
من قال "لا" في وجه من قالوا "نعم"
من علَّم الإنسان تمزيق العدم
من قال لا ولم يمت
وظلّ روحاً أبدية الألم

خليكم بخير كلكم،..
إن بقيت حي تاني بجي أونسكم،..



...

Post: #289
Title: Re: إصلاح الكتابة في المنبر
Author: عبدالماجد فرح يوسف
Date: 12-01-2005, 06:27 PM
Parent: #288

أخونا الزين السمح محسن
كي داير

لي يومين قاعد أفكر في تفسيرك للآية الكريمة (إنا أعطيناك الكوثر)
وكلامك عن أصل كلمة الكوثر العبري مادخل دماغي قدر ما زازيتو
المهم عملت شوية بحث في النت ولقيت إنو كوشر العبرية بتعني الحاجة العديلة والمحافظة والمناسبة والصاح أو بي كلامنا السوداني علي المقاس, وبعدين اليهود عملوا قوانين حديثا سموها "قوانين كوشر" عشان ينظموا ويضبطوا بيها مقاييس الأكل الحلال حقهم ومن ضمنه اللبن والخضروات, مثلا من قوانين كوشر إنو ما بجوز طهي اللبن مع اللحم حتي لو كانو الاتنين من أم واحدة, بقرة ولا غنماية, والقانون ده ربما يكون ليهو إرتباط بأن سيدنا موسي عندما نشلوا من النيل رفض الرضاعة حتي جابو ليهو أمه.
المهم مالقيت أنو كوشر تعني جزارة أو مجزرة.
وهاك القطف ده من موقع كوشري:
Quote: In Judaism, the term "kosher" is not used exclusively for ritually edible food. We refer to tefillin and Torah scrolls as kosher to mean that they meet all halachic (Jewish legal) requirements. The expression can even be applied to people. Acceptable witnesses are called edim k'sherim; adam kasher is an upright, proper, observant Torah Jew. Its most common use today, of course, is in regard to food. Food is relevant to all, and it is regarding food that "kosher" or "non-kosher" is encountered most often.

وبعد ماتقرا الكلام ده كدي أقيف عند كلمة halachic التحتها خط وشوفها لينا بتشبه كلمة حلال مالها كدة ومعناها فعلا حلال لكن بالطريقة اليهودية, وهنا قطف تاني للتأكيد:
Quote: Answer: The Hebrew word "Kasheir," or "Kosher," means fit or proper. When applied to food, the term indicates that an item is fit for consumption according to Jewish law. The word "Kashruth" refers to the general subject of Kosher food.

المصدر
من الكوتيشن الفوق ده مابنلقي علاقة للكوشر بالجزارة.
من ناحية تانية أنا شايف إنو ربنا الكريم مامكن يهدى لنبيه الذي فضله علي العالمين وجعله خاتم الأنبياء والمرسلين مامكن يهدي ليهو جزارة لمجموعة من الأسباب منها:
أولاً الجزارة هي ذاتها شنو؟ سكاكين وسواطير وجدل شدرة ولاحاجة تانية, دي براهو صلي الله عليه وسلم بعملها وأكيد موجودة في مكة والمدينة بي صورتها البدائية النحنا لسه ماشيين بيها.
وتانياماشايف إنو دي هدية تستحق ليها آية(والله أعلم)

المهم يا محسن أخوي قريت في موقع إسلامي إنو كلمة الكوثر ممكن تكون صيغة مبالغة من الكثير علي وزن فوعل, وعشان كده قلنا نرجع ليك الباص ده عشان إنت اللغة دي مجضمة وتفتينا في الشغلانة دي.
وأنا إرجاع كوثر للكثير دي مقنعاني وببساطة كده أي زول بدوهو الكثير بي مبالغة كمان طوالي بقوم يصلي ويضبح التيران والخرفان وكلو يوم يسويلو عزومة ولا كرامة والا ما ياهو؟

يازول ما أكون طولنا عليك


ولك مودتي وعميق احترامي

Post: #290
Title: Re: إصلاح الكتابة في المنبر
Author: محسن خالد
Date: 12-02-2005, 07:27 AM
Parent: #289

..


عبد الماجد صاحبي، إزيك،..

وكيفنك يا صديقي في الغار، يا زول، كلامك دا سمّح ومجيّه بالحيل، بس قبّال ما أنضم معاك أعمل ليك شِبْكة ومشكلة مع أخينا النصري أمين، دا مقتبس من البوست الانت جيت وشاركتنا فيهو بهناك، بتاع رندوك الخواجات، النصري قال:
Coasher معناها (الجزارة)،..

أنا في ويبستر ما لقيتها، معناها التخمين شنو؟ الخلوق الكتيرة البتلوص في أمريكا دي جابتها معاها وجات،..


بعدين مسألة إنو الكلمة تنعدم اليوم فيما هو سائر من لغة اليهود دي ما مشكلة، يعني الكلمة اليهودية بطول الزمن ممكن تطش وتحفظها لينا اللاتينية أو غيرها من اللغات، والكلمة الفارسية ممكن تطش عن الفارسية وتحفظها العربية، أو التركية، وهكذا إلى آخر نزوح المفردات، أنا زمان كنت متحيّر في كلمة "إفريز" بمعنى السياج أو التلتوار، الكلمة دي أصلها شنو؟ الكلمة دي لطيفة بحيث إنها ما بتشبه أبداً الصوت العربي، في النهاية اكتشفت إنها (فارسية) نازحة للعربية،..

أما الكلمة العجيبة ولاحدي هسّع ساطلة رأسي، فهي كلمة (التنده)، مش الزائدة فوق رأس اللوري بقولوا عليها التنده، يعني الضلالية البتحجب السائق من الشمس، أو زي ما قال شاعر الدوبيت:

وبسّامك شمس الما بتدسّو التنده
وصدرك مدفع الإنجليز النهز بولندا،..

طبعاً هو أخطأ، لأنو قاصد مدفع الألمان الضرب بولندا، مش الإنجليز، وهو قاصد لَمَّا الألمان اخترعوا الرشاش (42) الرشاش الذي من عبقريته لم يستطيعوا تعديله حتى تاريخ اليوم، ومعروف إنهم في 1939م بدؤوا الحرب بالهجوم علي بولندا، يعني بيت الدوبيت دا برغم حلاتو كلو طالع مجلّي تاريخياً، مع ترك احتمال أن يكون الرشاش اخترع قبل الحرب بكثير وسمّي عليها بعد اندلاعها،..

أها تخيّل بالصدفة إني وقعت في الكلمة دي (التنده) ولقيت إنها وافدة على الإنجليزية، وهي (إيطالية الأصل) بمعنى (الظُلَّة) و(هانز فير) في قاموسه يعادلها بكلمة (awing) الإنجليزية،،...


كلامي دا معناتو شنو؟ يعني الكلمة الجابها النصري دي لو صحيحة فمن المحتمل تكون نازحة عن اليهودية القديمة، ودا كلو في اعتبار إنو القواميس اليهودية القديمة لم ترد فيها هذه المفردة، (كلام اليهود اليوم مش مهم) ما زي عربي اليوم، وزي فكرتي ليكم عن القاموس التاريخي، لأنو المفردات بطول الزمن بتتغيّر معانيها حتى بداخل لغتها نفسها، وبينا وبين زمن نزول القرآن ما يقارب 1500 سنة،..

يا زول دا مجرد تنبيه ليك إلى مفردة النصري أمين وبجيك تاني راجع، ويا ريت النصري يجي يوضح لينا كلمتو دي كويس،..

كن بخير، وبجيك راجع لحكاية (صيغة مبالغة من الكثير)، وشرح الحس للآية،..

اليوم جمعة يا صاحبي ماجد، وقاعد أفتش لي في بيت جديد، كرهت المحل الساكن فيهو دا بالله واحد، بجيك بالمهلة،..


..

Post: #291
Title: Re: إصلاح الكتابة في المنبر
Author: Adil Al Badawi
Date: 12-03-2005, 05:48 AM
Parent: #290

أشكرك عزيزي محسن على هذا الفيض ورغماً عن أنَّه يكاد يكون، في مجمله، جديد أضيفه إلى القليل الذي "أحصنت" في عقلي الجمعي إلا أنه، بلا شك، يشي بشيء من توارد خواطر بين ما كتبت أنت وما كنت أود أن أكتب. يعني، سبقتني على الجرس الذي نويت أن أقرعه في شأن ذلك المزاد.

تقول:
Quote: وهذا ما لم يلاحظه الكثيرون من المتدينين حين الحديث عن نظرية "دارون"، أنا طبعاً لستُ معجباً بنوعية "عبد المجيد الزنداني" و"مصطفى محمود"، فهما يحاولان تبرير الإعجاز بالعلوم،


وأقول: رغماً عن ضحالة معرفتي بنظرية داروين، إلا أنَّني على بعض من المام بما يتعرَّض له صاحب النظرية والنظرية نفسها، هذه الأيام، من هجوم اعتقد أنَّه صادر عن أعلى مؤسسات اليمين المسيحي في أمريكا ولولا ضحالة معرفتي بنظرية دارون التي لا يضاهيها إلا ضحالة معرفتي بفيضكم أعلاه، لنصحت هؤلاء الأمريكان بقراءة القرآن، ليس بحثاً عن الآيات التي تدعو لإلقاء اليهود في البحر بغية تعديلها أو سحبها طبعاً، وإنَّما بحثاً عن غطاء لسوءات العلم. بالعدم، يمكنهم مراجعة فيضكم هذا خصوصاً قولكم:
Quote: وفي كتاب (التوراة، الإنجيل، القرآن، والعلم) يقف موريس بوكاي، وهو متحوّل للإسلام، مع سفر التكوين، لأنو دقس بطريقة لم يدقس معها القرآن، سفر التكوين طبعاً بتعامل مع أيام الخلق السبعة كأنها أيام فعلاً سبت أحد اتنين وكدا، بينما اللغة العربية بتسعف الواحد يقول (أيام العرب) والمقصود منها حروب دارت لعشرات السنين، اليوم في لغة العرب يعني المرحلة، وكدا القرآن ما دقس،


هنا بقى أقوم أرفع إيدي لي حافلتك دي تقيف لي عشان أركب. "هنا" دي قاصد بيها محطة اللغة وما أدعوه، إن جاز ذلك، الاعجاز اللغوي في القرآن. يعني لو الاعجاز القرآني مقسَّم، زي مساقات الشهادة السودانية: أدبي وعلمي، فتجدني أكثر أعجاباً بالمساق الأدبي. هذا هو بالضبط، بالاضافة لأمر آخر أرجئه لمداخلة أخرى، ما دعاني للقول:

Quote: أعود، قريباً، متأبِّطاً هذه السورة (الصورة التي فصَّلت قصة بكل ما يمكن أن يكون في القصة من عناصر) كجرس أقرعه مفتتحاً ما وعدت به من مزاد لاصلاح "شترة الكتابة"
إذ إنَّني (شنو ليك في مذاكرة درس "إنَّ" دي) أرى أنَّه ما من قارئ للقرآن، وأشدِّد على كلمة قارئ قاصداً القارئ الحصيف، يظل يعاني من "شترة" في الكتابة. أها، أنا دقيت جرس المزاد والبركة في علمكم (الأدبي) في حث المزايدين على المشاركة وعشان ما يجيني واحد ناطِّي بي فكرة: غير الناطقين بالقرآن وضعهم شنو في مزادك ده، أقول: دونكم صاحب البوست، أبو اللغة وإبن القرآن الحامل له بسبع قراءات مع تفاسيرها –وتفاسيره، وإعرابها، والذي لا ينام إلا وكلماته تستغرق في حلقه وروحه وهو ذاهب في النوم (أو كما قال) يشوف ليكم حل.

في شأن مفهوم الزمن في القرآن، أرجو أن تعرِّج على قصَّة أصحاب الكهف لتأتينا بمفهومك للزمن هناك إذ إنََّّه (تاني؟!) ثمة تأملات وتأملات لصديق لي فيما يخص مدة ما لبثوا بكهفهم والشمس (ساعة الكون) التي تزاور عن كهفهم ذات اليمين وتقرضهم ذات الشمال وفجوة الكهف (أم هي فجوة الزمن؟!) ومقدار اليوم أو بعض اليوم ومقدار الثلاثمائة وتسع سنين (أم هي ثلاثمائة ثم تسع سنين؟!) الخ...الخ. صدق القول الحق: (هل أتى على الإنسان حينٌ من الدهر لم يكن شيئاً مذكورا)

تحياتي، إلى حين عودة.

Post: #292
Title: Re: إصلاح الكتابة في المنبر
Author: محسن خالد
Date: 12-03-2005, 12:13 PM
Parent: #291

...





إزيك يا صاحبي ماجد،..
نواصل،..
أولاً سألت كم فلسطيني عن "كوشر" بدون أدنى تردد كانت إجابتهم (اليهود بقولوا للجزارة كوشر، وأي جزارة عندهم مكتوب عليها كوشر، وطلبوا مني مراقبة أشرطة الأخبار عشان ببساطة أتأكد)، أها رأيك شنو؟ نديك الكرة في ملعبك، وأنا متخيّلك في أمريكا، راجيك إنت والنصري أمين تجيبوا أخبار الكلمة دي من هناك؟
المسألة دي أنا كان حسمتها بالقاموس، بس قاموس العبري شالتو بنيّة فلسطينية وطيرتو، مرات تحلف ما تدي زول كتاب، ومرات تقول الكتاب يضيع في عرض قراءة وقُراء أحسن من بقائه في عرض مكتبة وزجاج،..
قمتُ بمراجعة التلمود ("آ. كوهن"، و "جاك مارتي") المشكلة إنو النص العندي بالعربي، بس مع الذبائح والآيات والحلال والحرام، ما أخدني شك لو كان النص بالإنجليزي أو العربي كان لقيت الكلمة دي،..
طبعاً "التلمود" له قوانينه التي من الواضح أنّ هذه القوانين الكوشرية جاءت لتركب على ظهر (قوانين التلمود القديمة)، لأنو التلمود بيشبه (الفقه) اليهودي، زي ما تقول المالكي، الحنبلي،.. إلخ،..

بعدين بالمنطق ساي، لو هو بقول إنو الكلمة دي في الأصل –القديم ما عندها علاقة بطرحنا الحالي، ما هو الأكل القديم بالنسبة للبشر كلهم؟ هو (اللحم –الثمار- اللبن) إذن ما هو الطرح القديم المتعلّق بحلال وحرام لدى اليهود، هو صيد (السمك) يوم السبت، كما يقول القرآن، يعني اللحم،..

بعدين لو واصلت الموضوع بتاعك دا ذاتو لآخره، هو كاتب:

Quote: The Meaning of a label


Label يا صاحبي فرح مش معناها: كلمة أو عبارة تُضاف لتعريف قاموسي،..
أها بعدها طوالي كاتب:

Quote: Gone are the days of the local shochet (ritual slaughterer), cheese manufacturer and bakery.


Ritual slaughterer : أي: طُقوس الجزَّارين
رأيك شنو؟
أنا شخصياً اقتنعت بـ(كوشر) يعني جزارة، ما لم يثبت لي العكس،..

طيّب نجي للحس في الآية:
كما أسفلتُ فقد قمت مبكّراً، قبل الدخول في اقتراح كلمة "كوشر" هذه من الأساس، برفض أن تكون كلمة "الكوثر" تعني حوضاً في الجنّة، بالطبع لم يقابلني من قبل مقترح (كوثر) صيغة مبالغة من الكثير، الكلام دا ما عندي عليهو رد سوى إنو (نكتة) -بكل صراحة دي نكتة، لا يمكن بالطبع أن ترد لدى رجال كابن كثير والطبري والقرطبي والمسعودي والجلالين، ولو صدق أنّ هناك من قال بها منهم، فقد ترك العلم فوراً ودخل بهلوانيات الدفاع عن القرآن كما ذكرنا في موضوعة (وراء وقدّام السريرية)، يعني كلام صيغة مبالغة من كثير دي غلط لدرجة إنك ما مكن ترد عليهو بالأساس، زي سؤال غريق البحر وألا جَرّاي الحصان؟ يبقى ما عندك حل غير إجابة: حلو السكر، ويبقى الموضوع كلو هضربة في هضربة،..
الحس الخاص بي محسن خالد، مش المنطق، بل روح البيان، دي أنا ما عارف كيف أشرحها يا ماجد، الآية من ناحية المنطق يمكن قبولها (يا نبينا وموفدنا محمد نحن حاجزين ليك الكوثر في الجنة –بافتراض ما قاله المفسرون- بس أبقى صلّي وقدّم الهدايا –الدموية- وأي زول يقاشرك ويكاعبك نحن بنجذو ونخليهو ضُقُل)،..

طيّب البيان القاصدو أنا شنو يعني؟ إنو روح الكلام الداخلية لأحد نفترض فيهو البتاعة والضلاعة في اللغة، لا بد تخلي الكلام مبنٍ على صيغ جمالية كلها، أو حربية كلها، كي يتشابه الكلام بين الكوثر الجميل، والجنّة وهاه هاه ضحكات بنات الحور، وبين (يا محمد الكلام دا عشان تلم فيهو لا زم تشيل السكين وتضبح، ونحن ذاتنا بنضبح معاك أي زول يقل أدبو)، والله يا فرح لو القرآن دا كلام إله بالفعل ما يقول كدي! وأقيف أنا مع النص دا تُج،..
يا يكون النص دا كلو حربي وبتاع عين حمرة، يا كمان كلو يكون جمالي وقاه قاه دلع بنات الحور،..
وما عندي أكتر من كدا، سوى تعليقاتٍ على المقتبس التالي من كلامك:
من ناحية تانية أنا شايف إنو ربنا الكريم مامكن يهدى لنبيه الذي فضله علي العالمين وجعله خاتم الأنبياء والمرسلين مامكن يهدي ليهو جزارة لمجموعة من الأسباب منها:
أولاً الجزارة هي ذاتها شنو؟ سكاكين وسواطير وجدل شدرة ولاحاجة تانية, دي براهو صلي الله عليه وسلم بعملها وأكيد موجودة في مكة والمدينة بي صورتها البدائية النحنا لسه ماشيين بيها.
وتانياماشايف إنو دي هدية تستحق ليها آية(والله أعلم)

بالمختصر كدا يا فرح، (الهدية، الهدايا، والهدايا المشعرات.... في القرآن... دي كلها ضبايح ضبح يضبح، الكلمة نفسها "هدية، هدايا" معناها ذبيحة،..
وكلمة هدية بمعنى (باقة ورد، منديل، طاقية مطرّزة، ودي من زمن صاحبي ود الموج) لا تُذكر إلا حين الجكس والحنان والحب، ما قلنالكم، السماحة والجمال ديل حقّات النونات والأمورات:

شوف النونا بلقيس قبل عشق سليمان، سليمان مرسّل جيش وهي مرسلة هدية: (وإني مرسلةٌ إليهم بهدية فناظرةٌ بِمَ يرجع المرسلون)،..

وشوف رد سليمان كيف: (فَلَّما جاءَ سليمانَ، قال: أتمدوننِ بمالٍ؟ فما آتني اللهُ خيرٌ مما آتاكم، بل أنتم بهديتكم تفرحون)
شوف دبلوماسية المرأة كممثل للشعوب بتحضّر ورقي، وبالهدايا، لو طلعنا نحن صنف الرجال من الدنيا دي وتركناها للنسوان ديل أحكم وأجمل مننا، ولو ما عجبكم بوروكم الأسلحة التانية وما لعب، يعني جوطة سليمان وهرجيهو دا قُبّال يشوف "الكرعين الما خمج" بعد داك كبّ الجرسة والجيش العرمرم والأسطوري من جنود وجن وهداهد وريح ووو.. (وكشفت عن ساقيها) قام جيشنا وجيشكم داك كلو طلع "شيلة بتاعة عرس ساي"،..


طيّب سيرة الدم والهدايا والنصب، دي من أهم الأسباب التي جعلت الملاحدة يضايروا الكتب السماوية التلاتة دي كلها بأنها مجرّد مخطوطات وثنية قديمة مأخوذة من نقوش الأحجار، بل هناك آيات في هذا القرآن أنا سآتيك بها بالحرف من الديانات البابلية القديمة، ودا باب خليهو ساي، والله يكفّرك هسع قُبّال باكر،...
مع إنو الشفوت بتوع الدين (الإسلامي) مش المتحمسين والمندعرين ساي، وديل غالباً بكونوا من غير علم ولا عقول، قالوا إنو (ديانة بعل) دي ذاتها، هي حضارة سيدنا إبراهيم، وبرضو الملاحدة حاشوهم ليك حوشة الماعندو حاجة خايف عليها... وييييك، تضحك تضحك يا صاحبي فرح، نحن بنشجّع الباص الحلو، وإيماننا نبتعد به عن الحماسة الساذجة لكي نفهم ونؤمن بالجد، بدون تمريرات مقصودة،..
أقول ليك آيات بالحرف الواحد من القرآن منحوتة حالياً على الآثار العراقية وبتسمع هسع في طاخ طاخ بارود الأمريكان،..
بس بصراحة أنا بميل من الافتراض أعلاه لإنو الأديان دي فعلاً قديمة، وفعلاً إلهها واحد، حتى بدراسة التوراة والإنجيل والقرآن بتكتشف الكلام دا، بدون ما تكون في أي (حوشة بتاعة انقطاع الوحي بعد ما مات ورقة ابن نوفل) دي حوشة نتناساها حالياً، بدون ما نقوم بدراسة روح اللغة والبيان القلتو ليك فوق للنص القرآني -قبل موت ورقة ابن نوفل وبعده،..
طيّب نديك آيات على "هدية، هدايا":
(جعل اللهُ الكعبة البيت الحرام قياماً للناس والشهر الحرام والهدي والقلائد)
(يحكم به ذوا عدلٍ منكم هدياً بالغ الكعبة)
(فإذا أمنتم فمن تمتّع بالعمرة إلى الحج فما استيسر من الهدي)
(ولا تحلقوا رؤوسكم حتى يبلغ الهدي محلّه)
(لا تحلوا شعائر الله ولا الشهر الحرام ولا الهدي)
(هم الذين كفروا وصدّوكم عن المسجد الحرام والهدي معكوفا)


تحياتي يا ماجد،..

كونوا بخير،...
جاييك يا ود البدوي،..


...

Post: #293
Title: Re: إصلاح الكتابة في المنبر
Author: mutwakil toum
Date: 12-03-2005, 12:48 PM
Parent: #292

الأخ محسن والشباب / سلامات ..

كلمة (تندة ) ما زالت متداولة في الفارسية والأردو ومعناها البرد
كبرد الجو والأشياء . كأن تقول(تندة باني) اي موية باردة
أو (طقس كا تندة)اي الجو بارد .

فتكم بي عافية

Post: #294
Title: Re: إصلاح الكتابة في المنبر
Author: محسن خالد
Date: 12-03-2005, 02:32 PM
Parent: #293

..



صديقي عبد الماجد،..
نواصل، برضو مع المقتبس بتاعك دا ذاتو، أنا الكلام سرح بي ونسيت أرد علي المباشرة فيهو، سرحت مع أقنعة الكلام وملاحقة "الهَدي" وإنو ما كتيرة عليهو إنزال آية بخصوص الذبح، وهنا رد علي مباشرته،..

Quote: من ناحية تانية أنا شايف إنو ربنا الكريم مامكن يهدى لنبيه الذي فضله علي العالمين وجعله خاتم الأنبياء والمرسلين مامكن يهدي ليهو جزارة لمجموعة من الأسباب منها:
أولاً الجزارة هي ذاتها شنو؟ سكاكين وسواطير وجدل شدرة ولاحاجة تانية, دي براهو صلي الله عليه وسلم بعملها وأكيد موجودة في مكة والمدينة بي صورتها البدائية النحنا لسه ماشيين بيها.
وتانياماشايف إنو دي هدية تستحق ليها آية(والله أعلم)



(أعطيناك) هنا، ما معناها سلّمناك في إيدك، أبداً، معناها الإمكان فحسب، ما هي إذا بقت الكوثر حوض جنّة زي ما اقترحوا المفسرين الحرفاء "الزول العمل الاقتراح دا حريف ما في شك"، ما زي مقترح صيغة مبالغة دا، برضو (أعطيناك) بتصبح مستقبلية، بمعنى ندّخر لك، يعني ما في إشكال لغوي مع الاستخدامات المجازية بالطريقة دي، خصوصاً في اللغة العربية،..
بعدين ما بتصبح (أعطيناك) "الجزارة"، وبما فيها من سكاكين وسواطير، وإنما أعطيناك "مكاناً للذبح- الذي تذبح فيه الهدايا المشعرات لدى البيت الحرام، الحتات المخصّصة في الحج لتقديم الهدي، فهمتني؟ وكدا الكلام –حسب رأيي وحسي- ببقه راكب عدلو عديل، ولا مجلّي معنى ولا مجاز ولا بيان،..
وكدا الديانات ذاتها بتترابط، في مسألة الهدي والذبح لله، القربان والتقدمة، دي ذاتها من أهم الروابط بين الأديان الثلاثة دي نفسها، كما أسلفت،..


Adil Al Badawi،..
إزيك يا صديقي الجميل،..
في الإجمال، يجب أن نبتعد بالقرآن عن مناطحة العلوم، سواءً لإثبات الإعجاز، أو لإثبات ما هو حلال وحرام، أو كمان لما يسمونه بـ"حكمة المشروعية"، لأنّ العلوم لن تقف لدى منتهى وهي قابلة للتطور والتجديد والجدل اليومي،..
وبدون غلاط أو ظُلم لسيد قطب، -لأنني لا أحب تفكيره في مناطق أخرى- فقد كان تفسيره (في ظلال القرآن) كمدخل للوقوف مع الإعجاز البياني للقرآن فكرة صائبة جداً، أنا أوافقك هنا، بالابتعاد عن العلوم كمسألة تصبح من بنية التفسير أو مرجعياته الأساسية، لأنَّ المفسرين يقولون مثلاً في آية (ما جعل اللهُ لرجل من قلبين في جوفه)، هم فسّروها –القدامى- بمعنى القلب البيولوجي، ودا طلع الليلة غلط، فأناس كثيرون يحملون قلبين في جوفهم،..
أو (الأحقاف) هم فسّروها بمعنى الجبل، ولكن اليوم اكتشفنا أنَّه ما من جبل اسمه "الأحقاف"، وأنّ ذلك المقترح كان مجرّد فكرة أسطورية عن الجغرافيا، وما أعيبه على سيد قطب أنَّه لم يذهب بفهم الإعجاز أكثر من مفاهيم (أبو العلاء المعري) في كتابه (إعجاز أحمد)، أي مناقشته للمفردات وبالكثير الصياغة، هو قام بالضبط باعتماد نفس أقاويل المفسرين القدماء هؤلاء -بخصوص اللغة، كما قام باستدخالات هناك وهناك، من نوعية قراءة المعري للمتنبي، وأيضاً على هدي "الكشاف" للزمخشري، بعدين القدماء ديل ذاتم ما كان عندهم قراءة بخصوص ربط المدلول بالإعجاز، يعني فصاحة بدون خلاصات، أي لم يكونوا يقارنون بين الصورة كمدلولات، وبين الصورة كمادة لغوية تقود لهذه المدلولات، وإنما يأخذون الموضوع كله كفصاحة وبيان فحسب، يعني من الزمن القديم جداً، لن تجد حواراً للصور الجمالية بداخل القرآن كمدلولات وإشارات منطقية إلا لدى رجل مثل "ابن الراوندي" الذي قتلوه بتهمة الزندقة، والرجل دا كان ختري بالجد جد، وتستغرب لما تجد أنّ أبا العلاء المعري يعاديه، وأن علماً آخرَاً وخطيراً مثل الجاحظ، ومعروف الصراع الفكري الشرس الذي دار بين الرجلين،..
ودا موضوع طويل، لا أرغب في الانسياق وراءه، وترك الموضوع الفعلي للبوست، ولكم وددتُ لو كان بوسعي الاسترسال معك هنا:
Quote: في شأن مفهوم الزمن في القرآن، أرجو أن تعرِّج على قصَّة أصحاب الكهف لتأتينا بمفهومك للزمن هناك إذ إنََّّه (تاني؟!) ثمة تأملات وتأملات لصديق لي فيما يخص مدة ما لبثوا بكهفهم والشمس (ساعة الكون) التي تزاور عن كهفهم ذات اليمين وتقرضهم ذات الشمال وفجوة الكهف (أم هي فجوة الزمن؟!) ومقدار اليوم أو بعض اليوم ومقدار الثلاثمائة وتسع سنين (أم هي ثلاثمائة ثم تسع سنين؟!) الخ...الخ. صدق القول الحق: (هل أتى على الإنسان حينٌ من الدهر لم يكن شيئاً مذكورا)


لأنني روائي، والموضوع من صميم عملي، بأي حال أنا سأوصيك بكتاب يناقش الزمان من مفاهيم جِدُّ مختلفة، من مفاهيم العُصُر والجيلوجيا، وتغيّر بنية (ظواهر الأرض) العصر الأردفيشي الكامبري الجوارسيكي ..إلخ،..
وأيضاً من مفاهيم الفيزياء، النسبية، ميكانيكا الكم، الأنتروبيا ووو إلخ،.
ومن مفاهيم السيكولوجي، (الإسراء من مكّة للقدس)، والسبق العقلي، والمشهد دا يا ربي كأنو مكرّر، كأني شفتو قبل كدا، والتايم مشين ووو إلخ،..
يا زول باختصار دا كتاب سمين ومودّك، وسيجيبك عن كل ما يخطر ببالك حول الزمان، ومقسّم لفصول بتلقى فيها العلماء من كل شاكلة ولون وكلو واحد بتكلم عن مفاهيم الزمان من خلال علمه المتخصص فيهو، الكتاب دا في زمنو كان عمل ضجة بت كلب، وترجموهو ناس سلسلة (عالم المعرفة) واسمه (فكرة "الزمان" عبر التاريخ)، أرجو أن تبحث عنه وستجده بسهولة كما أتوقع العثور على أي كتاب مهم يكون سهلاً، فلم تعد القراءة تشغل أحداً، وسيد المكتبة سيسلّم عليك بشوق حار وسيتأملك طويلاً ومستغرباً،..
وكن بخير،..



mutwakil toum،..
تحياتي يا صديق،..
وهذه "هُوَادة" حلوة منك، لمعانٍ أخرى من نفس صوت الكلمة، تُشكر يا حلو،..
خليك بخير، وما تنقطع من المكان دا،..


..

Post: #295
Title: Re: إصلاح الكتابة في المنبر
Author: عثمان عووضة
Date: 12-03-2005, 10:55 PM
Parent: #294

محسن ابوي
الله يصلح حالك اكتر من كده وبدل التقسيط يوقع ليك لاب توب في الكرتلة ولو ما ظبت حكايتة الكرتلة انا بتكفل بالقسط الاول بس بعد تنتهي من اقساط ترجع لي القسط الاول بالتقسيط
اها رايك شنو -- دنقلاوي شريف وجدو العباس ولا عندك اتنين تلاتة؟؟

Post: #296
Title: Re: إصلاح الكتابة في المنبر
Author: محسن خالد
Date: 12-04-2005, 10:19 AM
Parent: #295

..

عثمان عووضة،..
يا عمو صاحبي إزيك، بعدين فرحانين إنك جيتنا، وهسّع بنسكك بتلفون،..
بس ياها فلهمتكم دي قدّام الناس، الواحد لو جيناهو في مية درهم لا غير، يتلخم أكتر من يوم عرس بتو،..
عارف زمان، قبل اللاب توب الشديد هسع دا، والتوشيبا أب بطناً غريقة وجَرَّاي، هشام المجمّر كان برضو بعمل لي ذات حركات البورصات دي.. وعيك في عيك.. لامن ربك براهو شافني، وخلاني طلّقت مرتي،..
يا عمو صاحبي الزمن داك كانت عندنا مسعولية، هسع القروش رااقدة وكتيرة، وقلة الأدب أكتر منها،..
خليك بخير، وبناغمك هسّع



...

Post: #297
Title: Re: إصلاح الكتابة في المنبر
Author: Shinteer
Date: 12-04-2005, 08:46 PM
Parent: #296

أيها الناس .. السمحين. كيف أمسيتوا وكيف أصبحتوا؟

تعرف يا محسن، في اعتقادي، وحسب فهمي، إنو مسألة الكوشر والكوثر ما بيركبوا مع بعض خالص خالص، إذا اعتبرنا أن الكوشر تعني جزارة، وهي ما بتعني جزارة ولا بتمِسَّها إلا بطريقة غير مباشرة. وعشان البوست ما يتشرتم، خلينا نرجع لعضم الموضوع: إصلاح الكتابة. وممكن بعد داك ترجع لأي موسوعة للبحث عن أصل كلمة كوشر ومعناها الأصلي؛ وحتلقاها في أي موسوعة تقع في إيدك إنو مقصود بيها كل شيء يتوافق مع الطقوس اليهودية الصحيحة، ويكثر استخدامها في مجال الأطعمة. يعني بالمختصر المفيد: كل أكل حلال وفقاً للشريعة اليهودية .. ؤبس. بدون أي تفريعات جانبية. لو عندك Encyclopædia Britannica أو أي موسوعة أخرى حتجيب ليك خبر أبوها.

عد بنا يا صاح إلى ما انبتر من حديث عن العدد وتمييزه.

Post: #298
Title: Re: إصلاح الكتابة في المنبر
Author: محسن خالد
Date: 12-05-2005, 01:55 AM
Parent: #297

..


Shinteer ،..
إزيك يا صديقنا في الغار،..

أنا موافقك تمام التمام، لكن برضو مصر إنو كلام الموسوعات دا كلو كلام بتاع الليلة، يعني فلهمة الأكل الكتيرة الواردة في قوانين كوشر دي حديثة، وكونوا اللغة الراسخة في ذهن اليومي تُطلق على الجزارة دا الصحيح،..

وكتلخيص للموضوع، الشغل دا كلو شغل قديم، يعني ما تتخيل إنو زمان كان الأكل "دكان أكل" وبيتزا وتيك أوي، أبداً، زمان الأكل يا جزارة يا غنماية يحلبوها وبعداك المسكينة ياكلوها،..
وهسع هيجتن دي كلها، لأنهم بحتجوا علي إنو الدنيا اتغيرت، ديل الحداثيين بتاعنهم يعني،...



الكلمة الصحيحة –بالإنجليزية- تُكتب هكذا: kosher
والكلمة العبرية الأم هي: Kashrut
يعني الحتة الأصلية الجات منها الكلمة، كما أفهم، ياها دي:
Quote: Kosher slaughtering
The mammals and birds that may be eaten must be slaughtered in accordance with Jewish law. (Deut. 12:21). We may not eat animals that died of natural causes (Deut. 14:21) or that were killed by other animals. In addition, the animal must have no disease or flaws in the organs at the time of slaughter. These restrictions do not apply to fish; only to the flocks and herds (Num. 11:22).

أو كمان

يا أخوانا نحن المسلمين ديل ذاتنا، مش الحلال بتاع اللحم عندنا ببدأ من طريقة الذبح، كيف وبواسطة منو وووو إلخ، (أعني الطقس الديني) كدي شوف هسع في فرق بين دا والإسلام، أو عشان كدي القرآن قال وطعام الذين أُوتوا الكتاب حلٌ لكم:
Quote: Ritual slaughter is known as shechitah, and the person who performs the slaughter is called a shochet, both from the Hebrew root Shin-Chet-Tav, meaning to destroy or kill. The method of slaughter is a quick, deep stroke across the throat with a perfectly sharp blade with no nicks or unevenness. This method is painless, causes unconsciousness within two seconds, and is widely recognized as the most humane method of slaughter possible.


يعني المسألة كلها، في رأيي الذي أظنه صائباً، جاءت من (طقوس الذبح) أو Ritual slaughter



شكلهم اليهود ديل يا صاحبي شنتير محتاجين لـ(قاموس تاريخي) برضهم، ويضحك نهارك،..

خلاص نخليها الشبكة دي، ونشوف العدد،..


...

Post: #299
Title: Re: إصلاح الكتابة في المنبر
Author: Shinteer
Date: 12-05-2005, 04:13 PM
Parent: #298

نشوف العدد يا زول. أحسن من مجابدة النصوص والمفاهيم الدينية الغميسة.

يا عادل يا بدوي .. وين انت غاتس؟ هل قابلت مجموعة الـ Tubeless في زيارتك الأخيرة للسودان؟.

Post: #300
Title: Re: إصلاح الكتابة في المنبر
Author: Adil Al Badawi
Date: 12-06-2005, 00:29 AM
Parent: #299

أشكرك عزيزي محسن على تعليقك الضافي كما أشكرك على الكتاب الذي أوصيت به رغماً عن أنَّ مساككة الكبسة قد كبست على عقولنا ولولا بعض من عَلُوق شَدَّة أو نعمة محرِّكات البحث لأصابتنا السكتة الدماغية. يا حليل أيام التهام الكتب على ضوء "حبوبة وَنِّسيني" والسطور تتراقص كلَّما هَبَّ نسيم على لهبتها.

أشاركك الرأي، خصوصاً وأنَّ شنتيرَ قد رفع عصا الزجر، في أنَّ موضوعنا:

Quote: ...موضوع طويل، لا أرغب في الانسياق وراءه، وترك الموضوع الفعلي للبوست،

وقبل أن نخلِّيها الشِبْكة ونشوف العدد، تمنَّيت لو أنَّ هميماً (كنشأت الهمام، أقصد الإمام) أو هميمة (كهميمة) نكت(ت) لنا مقالاً كتبه الأستاذ هاشم صديق ولا أذكر عنوان المقال لكن بيني وبين نفسي مسميهو "الاعجاز الدرامي في القرآن" وقد نُشر المقال (قاطع شكُّو) في يناير من العام 2002 لكنَّني ما قاطع شك مكان النشر والأرجح أنَّه بصحيفة الأيام وإلا فالرأي العام أو الصحافة أو أخبار اليوم. ويا شنتير المقال مجرَّد نموذج للكتابة الجيدة فنرجو السماح هذه المرَّة.

يا شنتير الزيارة ذاتا وحاتك كانت tubeless وتلك غُصَّة أخرى لكنَّني قابلت ود علي الطيِّب وقد وردتك أخباره وسلامه عليك في مكان آخر من هذا البورد. حسب علمي ال Tubless Company فرتقوها في عَضُما دا.

تحياتي لكم جميعاً.

Post: #301
Title: Re: إصلاح الكتابة في المنبر
Author: Shinteer
Date: 12-06-2005, 00:41 AM
Parent: #300

Quote: حسب علمي ال Tubless Company فرتقوها في عَضُما دا.

لا حكت لا بقت. عليها النعلة تلك الشركة الحرامية. أخبار ود علي الطيب معاي لكن باقي الشلة من ديك وعيك.

إذا عثرتم على موضوع هاشم صديق فلا بأس من إيراده هنا، لأنه، حسب كلامك، يصب في ترعة إصلاح الكتابة؛ وذلك هو المطلوب. كل شيء يضيف إلى إصلاح الكتابة فمكانه هنا.

وفي انتظارك يا مُحْسْ

Post: #302
Title: Re: إصلاح الكتابة في المنبر
Author: سيد محمد احمد سيدنا
Date: 12-06-2005, 01:48 AM
Parent: #1



الاخ محسن خالد


الموضوع جميل جدا

وربنا يديك العافيه عليه ونأمل المزيد عشان

يعرفوا الأجيال القادمه ويكون منار لـــــهم0

لكن للمعلوميه واظن توافقنى الرأى بــأن

اعداء اللغه تركوا بصماتهم على الاجهزه وأصبح

هناك عائق للكثيرين فى التنوين والهمزات والمد

وشاكلتهم ويمكن دا واضح أيضا من خلال مشاركتى

لكن رغم ذلك نحن مسيطرين على الساحه من حيث

الخط الجميل وسلاسة الاسلوب والغه اذا كتبنا بأيدينا

خصوصا للدارسين من خلال الخلاوى لان القراءه المتكرره

للحفظ تجعلهم متمكنين أكثر من غيرهم0



عفوا اخى اذا كان خط الاخت زولا123 او انت غير

جيد فالحل بسيط عند أهل اللغه ـ وهى مداومة الكتابة

لكن المد والجزر والشده ديل من القراءه المتكــــرره

ومعرفةالافعال يلقوهم وين ودا موضوع اخر0


تحياتــــى لكل المتابعين

( ســــيد مســـى )

Post: #303
Title: Re: إصلاح الكتابة في المنبر
Author: سيد محمد احمد سيدنا
Date: 12-06-2005, 01:56 AM
Parent: #1



الاخ محسن خالد


الموضوع جميل جدا

وربنا يديك العافيه عليه ونأمل المزيد عشان

يعرفوا الأجيال القادمه ويكون منار لـــــهم0

لكن للمعلوميه واظن توافقنى الرأى بــأن

اعداء اللغه تركوا بصماتهم على الاجهزه وأصبح

هناك عائق للكثيرين فى التنوين والهمزات والمد

وشاكلتهم ويمكن دا واضح أيضا من خلال مشاركتى

لكن رغم ذلك نحن مسيطرين على الساحه من حيث

الخط الجميل وسلاسة الاسلوب والغه اذا كتبنا بأيدينا

خصوصا للدارسين من خلال الخلاوى لان القراءه المتكرره

للحفظ تجعلهم متمكنين أكثر من غيرهم0



عفوا اخى اذا كان خط الاخت زولا123 او انت غير

جيد فالحل بسيط عند أهل اللغه ـ وهى مداومة الكتابة

لكن المد والجزر والشده ديل من القراءه المتكــــرره

ومعرفةالافعال يلقوهم وين ودا موضوع اخر0


تحياتــــى لكل المتابعين

( ســــيد مســـى )

Post: #304
Title: Re: إصلاح الكتابة في المنبر
Author: محسن خالد
Date: 12-06-2005, 10:46 AM
Parent: #303

..



Adil Al Badawi،..
تحياتي يا صديق، وفي انتظار أن تجيبك الأخت "هميمة"،..

ود أشيقر،..
تحياتنا ومحبتنا لك،..
ونديها رجعة لوراء ونجي شايتين العدد،..


سيد محمد أحمد سيدنا،..
تحياتي يا رجل، وكن بخير،..
وأمنياتنا الجميلة لك،..
الأجهزة توجد بها حركات التشكيل، وإن كان هو الكسل كما أرى،..
أما بخصوص الخط، فياخي قدر ما كتبنا أبى يظبط، ربك يحلها غايتو، أو حلاها لينا بالكمبيوتر دا ذاتو، وبقينا ما متذكرين ريحة الورق،..
نؤمّل فيك المواصلة معنا،..
وكن بخير،..
أبداً بخير،..


..

Post: #305
Title: Re: إصلاح الكتابة في المنبر
Author: Shinteer
Date: 12-07-2005, 01:09 PM
Parent: #304


お願いします

上、上、空まで

Post: #306
Title: Re: إصلاح الكتابة في المنبر
Author: محسن خالد
Date: 12-11-2005, 06:17 AM
Parent: #305

shinteer ،...
شكراً يا صاحبي ود أشيقر،...
العدد دا بالتنجهو، وقف مشهادنا عديل، نسيت أنا ذاتي وقفت وين،..

إن بقينا حيين نواصل

Post: #307
Title: Re: إصلاح الكتابة في المنبر
Author: Adil Al Badawi
Date: 12-12-2005, 00:36 AM
Parent: #306

سلامات يا محسن،، نعلَّك عافية يا رجل!

Quote: العدد دا بالتنجهو، وقف مشهادنا عديل، نسيت أنا ذاتي وقفت وين،..

Quote: ألكُز محسن ده خليه يواصل درس العدد. الدرس ده مهم خالس خالس لأن معظم الناس بِشوتوا الأعداد المركبة وتمييزها كيفما اتفق.

Quote: وبانتظار الغريق القِدَّام (الأعداد المركَّبة) في درس العدد بفارغ الصبر

Quote: إن بقينا حيين نواصل

واصل...واصل...يا رجل. المسألة مسألة حياة أو موت.

تحيَّاتي للأستاذ وللتلاميذ.

Post: #308
Title: Re: إصلاح الكتابة في المنبر
Author: محسن خالد
Date: 12-12-2005, 08:18 AM
Parent: #307

...



Adil Al Badawi،...
إزيك يا أخويا وصاحبي في الغار،..
أها لامن قلت كدا، خييير، وبلاش عطلة أكتر من كدا،..
سلامي الأكيد

..

Post: #309
Title: Re: إصلاح الكتابة في المنبر
Author: محمد حسن العمدة
Date: 12-12-2005, 11:34 AM
Parent: #308

عاجل جدا محسن خالد

بالله دخل لينا البوست ده الورشة بتااااااعتكم دي

إنضمام محامي الحركة الشرفاء لقائمة تحالف المحامين ضربة ...ن بأن جون قرن لم يمت


Quote: إنضمام محامي الحركة الشعبية لقائمة التحالف المحامين ضربة للكيزان وأعلان بأن جون قرن لم يمت

وسط زهول اصاب نقابة الجبهة الذي كان يحلم بمشاركة الحركة لهم التاريخ الطويل من التزوير والتقول على حقوق المحامين اعلن المحامي الحركة الشعبية الشرفاء الانضمام لقائمة تخالف المحامين الشرفاء معلنين الانحياذ لجماهير الشعب السوداني


يا حبيب التعليق خلينا ليك

Post: #310
Title: Re: إصلاح الكتابة في المنبر
Author: Shinteer
Date: 12-12-2005, 11:50 AM
Parent: #309

ده شنو يا ود العمدة؟ الله يرضى عليك.
لو انت فاهم حاجة ترجم لينا معاك.

Post: #311
Title: Re: إصلاح الكتابة في المنبر
Author: محمد حسن العمدة
Date: 12-12-2005, 01:35 PM
Parent: #310

Quote: لو انت فاهم حاجة ترجم لينا معاك.


حبيب شنتير سلام

يا خوي دي الا تكون ضايق قهوة ذكية عشان تفهما

وعشان كدي جبناها لمحسن ده اصلوا قالوا رامياهو شديد


ومافي شفاعة الا تكون زرت اللكود ولا الاندلس

مدد يا شيخ محسن

Post: #312
Title: Re: إصلاح الكتابة في المنبر
Author: محسن خالد
Date: 12-13-2005, 05:04 AM
Parent: #311

..


محمد حسن العمدة،...
كيفنَّك يا ود العمدة، وأريتك طيّب، يا زول إنت ضارب وين؟ ما خبرتو بلدك،..
شنو يا خي داير تجيب لينا مدافسة الأركان هنا، ويضحك نهارك
بت الفضل دي صاحبتي وكلكم أصحابي -أمة- واتحادي- وجمهوريين- ومستقلين- حتى صاحبنا الجميل والراقي –الأخ المسلم- جناح الشباب "علي حجّاج" لو متذكرو،..
أها كيتاً عليك وأشمّت فيك بت الفضل دي، نحن هنا عندنا مدرسة ما ورشة، بعدين الجهابذة الكبار في المكان دا برفعوا المنصوب وبنصبوا المرفوع، عااادي،..
عارف لو سكّينا الناس بالمعرفة بحصل شنو؟ البغضاء للمعرفة أولاً، ولنا ثانياً، ولن يتم ما نتمناه ثالثاً،..
يعني المعرفة نرصصها علي الطاولة، ونشققها زي البطيخ، الداير يشيل، والما داير علي كيفو، كل زول قدر قدرتو، وقدر حاجتو، وما يُريده، في ناس بكرهوا اللغة نفسها، وبرضو مخيرين وأكتر أهمية من بتوع اللغة، لأنو حياتن قايمة علي هندسة أو طب، أو فيما يُفيد مباشرة،..
أها كن بخير،..
ويا حليلها أيام "اللُّقد"، و"الأندلس" جيهة النشيشيبة، وكمان "الأندلس" جيهة تيموليلت،..
وتحياتي يا حلو،..


Shinteer،...
يا ود أشيقر أخوي كيفنّك،...

..

Post: #313
Title: Re: إصلاح الكتابة في المنبر
Author: عبدالله الشقليني
Date: 12-14-2005, 05:13 AM
Parent: #1

يستحق هذا البوست أن يكون
في بؤرة العيون التي تنظر

Post: #314
Title: Re: إصلاح الكتابة في المنبر
Author: Shinteer
Date: 12-15-2005, 02:23 AM
Parent: #313

السلام عليكم يا أهل الدار.

Post: #315
Title: Re: إصلاح الكتابة في المنبر
Author: محسن خالد
Date: 12-17-2005, 04:13 AM
Parent: #314

..

عبد الله الشقليني،..
Shinteer،...

العزيزان ود الشقيلني، وود أشيقر،..
تحياتي لكما، وشكراً على هذه المحبّة،...
ونرجو إكمال ما بدأناه،..
ولكما الحب


..

Post: #316
Title: Re: إصلاح الكتابة في المنبر
Author: Adil Al Badawi
Date: 12-18-2005, 02:42 AM
Parent: #315

سلامات يا محسن،، كيفِنَّك؟!

أهلك المزارعية لما ينقطع المطر وتكون (كالعادة) رايحة ليهم مطرة تنجِّض ليهم العيش يقومو ينتكلو علي الشتاء ويقولولك: باكر دي إِهِب عليهو الشتا ويفرهد.

البوست ده يا كافي البلا التقول هَبَّ عليهو صقيع من تالا شنتير. تَلَّج كُلُّو كُلُّو.

وعلى قول الأعرابي القال (لما قالو ليهو مَرَتَك ماتت من نقص الدم): يا سلام! أشِّي كركدي مافي؟! نقول: أشِّي ميكرويف مافي؟!

تحيَّاتي لكلِّ من تبرَّع بنفخة في جمرة هذا البوست المفيد.

Post: #317
Title: Re: إصلاح الكتابة في المنبر
Author: Adil Al Badawi
Date: 12-19-2005, 05:12 AM
Parent: #316

سلامات يا شباب

ما دام الفَصِل دا لا فيهو أستاذ لا ألفة خَلُّونا نهرجل شوية:

أعرابي تاني منعو غفير المستشفى من الدخول بي حُجَّة إنُّو الدنيا لَيَّلَت، أها قام قال ليهو: ها زول ما تْلَيِّل أكان لَيَّلَت، شَايِفْني داير أسْرِقْ لي ميرود؟!

غايتو، أكان الأستاذ دا ما جاي خَلُّونا نمشي بيوتنا.

Post: #318
Title: Re: إصلاح الكتابة في المنبر
Author: محسن خالد
Date: 12-19-2005, 04:56 PM
Parent: #317

..

عادل البدوي،..
كيفك يا عادل، كن جميلاً دوماً، بعدين يا حبيب أنا ذاتي مشتاق ليكم ومشتاق للكتابة، بس والله أموري متعوجة بالحيل، كن بخير يا سيدنا،..
وإن حيين نعاود برم الحبال،..


...

Post: #319
Title: Re: إصلاح الكتابة في المنبر
Author: Shinteer
Date: 12-21-2005, 03:05 AM
Parent: #318

انت ذاتك يا عادل قاعد تزوغ تمشي وين؟

الكلب ينبح في الزول هَوْ هَوْ هَوْ. الزول ركّب إيدو في خشم الكلب ودفسها لحد الضنب وجرّاها راجعة شايلة معاها كل مصارين الكلب. الكلب مُصِر يواصل نبيحو لكن النبيح المرة طلع وَهْ وَهْ وَهْ.

انت يا عادل لو داير البوست يستعدل .. أدفس إديك لحد نص البوست وجيبها راجعة ومعاها ما انقطع من درس سابق.

Post: #320
Title: Re: إصلاح الكتابة في المنبر
Author: Adil Al Badawi
Date: 12-21-2005, 10:36 AM
Parent: #319

كيفك يا شنتير، مصنقرين والله.

تعرف لما يكون في شَكَل في البورد دا حكاية إنَّك تخلِّي ليك بوست زي البوست دا مرفوع زي حكاية إنُّو فرَّاشي ينجى من كشَّة البلدية (وأللا هي هناك النظام العام) وبضاعتو كلَّها في مخلايتو.

على أي حال ترانا محاولين لكين أكان قلت ليك بدفس إيدي في خشم كلب كضَّبت عليك مع إنُّو جدَّاً لينا أشول ضايقو كلب قام ماسكو ليك من ضنبو باليمين وهاك يا براطيش بالشولا.

أقول ليك يا زول، يمين علي من البوست دا ذاتو الشي دا من ما دخل صفحة أربعة بي ذكر الشركة الملعونة في قندوس الصفحة ما كِسِب عافية تَبْ التقول رِكْبُو شيطان.

Quote: عليها النعلة تلك الشركة الحرامية


عليها اللعنة أكان قَلَّعت طواقينا وشوطنت لينا بوستينا.

غايتو راجيين الأستاذ يتم لينا فتل الحبل دا نكرِّب بيهو عنقريب الكتابة دي باقي شايفا ليها كم يوم عنقريبا مهتوك فد مرَّة.

ياها دي ذاتا الهرجلة الكُنَّا خايفين غيبة الأستاذ تبتلينا بيها. الله كريم...الله كريم.

Post: #321
Title: Re: إصلاح الكتابة في المنبر
Author: انور الطيب
Date: 12-21-2005, 11:23 AM
Parent: #320

الأخ الفاضل محسن خالد

متعك الله بالصحة والعافية ،بوست رائع بل من أروع ( أتمنى تكون ظابطة الكتابة معاي) وما أعجبني فيه أن الطريقة التي تقدم بها قواعد الكتابة واللغة سهلة وواضحة وميسرة. وبيني وبينك أخوك شايت ضفاري ما عارف كوعو من بوعو في الكتابة بس قافل على الكمبيوتر بتم الباقي ولكن تراهو أنا شايت برة القون.

Post: #322
Title: Re: إصلاح الكتابة في المنبر
Author: انور الطيب
Date: 12-22-2005, 02:58 AM
Parent: #321

الأخ محسن خالد
تحية طيبة وبعد ........

أخوك بالبلدي كدة نضميهو كتر وكتابتو شترة ، وقايل الكمبيوتر بتم الباقي تراهو الكمبيوتر ذاتو رايح فيهاوباختصار البوست دة بالانجليزي كدة براكتيكالPRACTICAL ، ما يطلعو ناس الهندسة ويقولو تيوتوريال TUTORIAL
المهم أنا عندي ليك سؤالين بيهموني شديد :

السؤال الأول : ياخي في كتابة العدد أخوك بيتجهجه جهجهة شديدة خصوصا في الأعداد المركبة و لتوضيح سؤالي ثلاث عشر والله ثلاث عشرة والله تلاتاشر ، يعني العملية عايزة مخمخة شوية .

السؤال الثاني : ياخي في التعريب شنو المبدأ المتبع في تعريب المصطلحات العلمية وأديك مثال :

كمبيوتر : حاسب آلي والله حاسوب وعشان شنو .

DIGITIZE يرقمن ، ما عارف أولا هل هذه الترجمة صحيحة والله لا ولكن وجدتها في بعض المعاجم المنتشرة على الانترنت. يعني على أي أساس رقمنوها وما رقموها دة لو كان الكلام صحيح.

فشنو المبدأ المتبع في الترجمة وهل هنالك جهة تعتمد هذه المصطلحات المترجمة والله نشوت ضفاري وما لينا بغيرنا.


وياخي واصل خلينا ننضف كتابتنا دي شوية

والجهد البتعمل فيهو دة مقدر جدا وسوف يبقي للأجيال


وكما قال الشاعر :

الخير يبقى وإن طال الزمان به
والشر أخبث ما أوعيت من زاد

ونحن فاتحين يدينا عشان الدق لأنو الدق بقى في اليدين بس ودق طوالي لأنو بعد شوية ما حايكون في دق ذاتو مع المناهج الجديدة ( ها ها) ، وبيقولوا للمدرسين ما تدقوا والدق دة ماحضاري لكن المدرسين ما شغالين بكلام الحكومة لسه ماسكين العصاية من النص برضو لكن ماسكنها ، فما تخاف دق طوالي وأصلو وكت فيها دق أحسن الدق يجي منك

وكما قال الشاعر :

إن أك مقتولا فكن أنت قاتلي
فبعض منايا القوم أكرم من بعض


أها سجلوني معاكم ، والله قرايت الكبر دي زمان قايلنها ما بتنفع لكن بيني وبينك قراية الكبر زيها مافي ، والكلام الفي راس كثير لكن ما نطول عملا بمبدأ تساوي الفرص ( ها ها)

ولك خالص الشكر

Post: #323
Title: Re: إصلاح الكتابة في المنبر
Author: Shinteer
Date: 12-22-2005, 05:53 PM
Parent: #322

زميلي في قِلّيع الطواقي .. عادل البدوي. كيف حالك؟. أنا اقتنعت أن ذكر تلك الشركة، مقطوعة الطاري، قد أودى بروح البوست أو كاد. لعنها الله وقدّد its tubes.
سأتكفل ليك بما فعله صاحب الكلب وأخمش لك البوست من نقطة توقفه:

Quote: العدد (1 )
1- إذا كان المعدود مُذكَّر، العدد (1) يطابقه أي يكون مذكّراً مثله:

جاء منهم رجلٌ واحدٌ....

2 – إذا كان المعدود مؤنّث، العدد (1) يطابقه... أي يكون مؤنّثاً مثله:

جاءت امراةٌ واحدة...

يعني هنا ما في مشاكل، قاعدة بسيطة وبرضو البعدها زيها،......


العدد (2)
1- إذا كان المعدود مُذكَّر، العدد (2) يطابقه أي يكون مذكّراً مثله:

جاء رجلان اثنان....

2- إذا كان المعدود مؤنّث، العدد (2) يطابقه... أي يكون مؤنّثاً مثله:

جاءت امرأتان اثنتان.....


الأعداد من (3) إلى (10) كلها تُضبط بقانون واحد، شوف السهولة دي كيف!

القانون هو، المخالفة والمعاكسة، يعني عكس القاعدة الفوق، هنا لو كان المعدود مؤنّث، العدد بكون مذكّر.... ولو كان المعدود مذكّر، العدد بكون مؤنّث،...

طيّب ناخد أمثلة من تلاتة لاحدي عشرة، مع إنها تكرار، بس ح نقوم ننوّع في الأمثلة.. كلو عشان التردي دا يقل شوية...

3 - جاء ثلاثةُ رجالٍ....
3- جاءت ثلاثُ نسوةٍ...

يعني هسع التذكير والتأنيث وينو؟ ياهو البتم بالحرف (التاء المربوطة)، اللهي دلالة التأنيث....


لو كان المعدود مذكّر (الرجال)، العدد (3-4-5-6-7-8-9-10) بتكون فيهو تاء مربوطة....
ولو كان المعدود مؤنّث (النساء)، العدد (3-4-5-6-7-8-9-10) ما بتكون فيهو تاء مربوطة...

4- قرأتُ أربعة كتب..... لأنو الكتاب مذكّر، أدينا 4 تاء مربوطة....
4- قابلتُ أربعَ صحفيات.... أو كمان: قابلتُ صحفياتٍ أربع.... نفس الشيء.... لأنو الصحفيات مؤنّث، حذفنا التاء المربوطة من 4

5- قَبّلها خمس قبلات.... دي طبعاً أحسن من "دقّاها خمس دقّات، أو "أدَّاها خمسة شلاليت"
5 - قُطعت خمس شجرات.... يا للأسف... بواسطة خمسة معتدين....

6- جاء ستةُ رجال...
6 – جاءت ستُّ نسوة...

7 – جاء سبعةُ رجال...
7 – جاءت سبعُ سنينٍ عجاف...

8 – قُتِل ثمانية متهمين...
8- قُتِلت ثماني متهمات...

9- جاء تسعة رجال...
9- جاءت تسعُ نسوة...

10 – جاء عشرةُ رجال...
10 – جاءت عشرُ نسوة...



يلا يطيب دهركم، إن بقينا حيين بنجي نتم دروس (الأعداد المُرَكّبة والمتعاطفة وألفاظ العقود)

لتحريك البوست، ندلي بقليل من كثير:
الأعداد المركبة:-
1- العددان 11 و 12 يطابقان معدوديهما تذكيراً وتأنيثاً
- جاء أحدَ عشرَ تلميذاً ... وغابت إحدى عشرةَ تلميذةً
- رأيت اثنيْ عشرَ تلميذاً ... واثنتي عشرةَ تلميذةً

2- الأعداد 13 و14 و15 و16 و17 و18 و19 .. هنا الجزء الأول من العدد المركب يخالف معدوده تذكيراً وتأنيثاً، أما الجزء الثاني (الـ 10) فإنه يطابق المعدود، تذكيراً وتأنيثاً
- انتخب الشعب ثلاثةَ عشرَ عضواً وثلاثَ عشرةَ نائبة
- اشتريت تسعةَ عشرَ بيتاً وتسعَ عشرةَ سيارةً آخر موديل وبدون لساتك، هدية لعادل بدوي
إذن المسألة كما قال أستاذنا محسن ما فيها لولوة كتيرة، لو كانت الأعداد مفردة أو مركبة.

زيادة خير:
عندما شرح الأخ محسن الأعداد المفردة .. ربما نسي كلمة "بضع" التي تعتبر عدداً مفرداً، وهي تخالف المعدود تذكيراً وتأنيثاً
- شربت بضعة أرطالٍ من الحليب وبضع زجاجاتٍ من العصير. والله أعلم.

على كده تكون الأعداد من 1 إلى 19 قد انتهت نهاية سعيدة.

زيادة خير تاني:
الأعداد من 3 إلى 10 بيكون معدودها جمع مجرور بالإضافة؛ والأعداد دي بتُعرب حسب موقعها في الجملة.
أما الأعداد المركبة من 11 إلى 19 بيكون معدودها مفرد منصوب؛ ويعرب تمييزاً منصوباً؛ وهي بتُعرب حسب موقعها في الجملة لكنها بتكون دائماً مبنية على فتح الجزأين. يعني ما تقوم تقول ثلاثةُ عشرُ أو حاجة زي دي.

نترك أسماء العقود وأي تصويبات ضرورية لفضيلة مولانا محسن، رد الله غربته.

Post: #324
Title: Re: إصلاح الكتابة في المنبر
Author: محمد حسن العمدة
Date: 12-24-2005, 06:01 AM
Parent: #323

غايتو كان مدرسة صلاح كان ورشة اصلاح يا محسن انا عندي حالة مستعجلة ختها في طاولة معالجاتك وشنتير , انشاء الله بحق ( الزمالة ) ؤبث

Quote: محمد العمدة البركة الشلتة الصورة

جضومك كانت ما مخليانة نشوف المنبر


Re: ودالعمدة او القلب النابض خلي التمبكة وشكل النسوان -...جيجة معاك يكاتلو ليك


غايتو كان ما صلحت لينا النوعية دي في المنبر طالوتك دي بدل المعرفة الا تفرش فيها كونية بدل البطيخ والعاجبو يشيل العاوز



معليش يا شنتير نعشرق ليكم بالمداخلة دي

Post: #325
Title: Re: إصلاح الكتابة في المنبر
Author: Shinteer
Date: 12-24-2005, 06:37 AM
Parent: #324

مرحب يا ود العمدة. دي عشراقة تخينة جداً وأكبر من احتمال شُعَب البوست الهوائية.
Quote: محمد العمدة البركة الشلتة الصورة
جضومك كانت ما مخليانة نشوف المنبر

هذا الكلام لا أملك له علاجاً. وقبل أن يأتي محسن سوف أعطيك مسكِّنات: أقرأ آية الكرسي أثناء استخدامك بخور التيمان.
العزيز ود والعمدة. البوست ده ما بيتحمّل المشاكل الدائرة في البورد وهو البوست الوحيد المعافى حتى الآن ونريد المحافظة عليه هكذا حتى لا نفقد ما يجدر باهتمامنا. هل تصدق أنني أتصفح البورد بعين واحدة إذا أردت التصفح، وغالباً لا أرغب فيه، لذلك احتفظت بلِنْك هذا البوست منفصلاً لكي أدخل مباشرة فيه دون أن أعرّض عينيّ وأنفي للأبخرة السامّة المنبعثة من البوستات الأخرى. لم يبق لنا سوى هذا البوست، فعليك بتقليل العشرقة والعشراقة عشان ما نقوم نلقى روحنا في الشارع.

وربنا يعينك.

Post: #326
Title: Re: إصلاح الكتابة في المنبر
Author: Adil Al Badawi
Date: 12-24-2005, 07:57 AM
Parent: #325

مشكور يا شنتير على ما تكبَّدت من مشاق،

مع إنُّو المثل بقول: "مساعد الياي عُمرو ما يبقى ياي" لكين نثني عليك ثناءً نبدأه بطريقة الحنكوشات ونتمَّه موية رندوق: يااااااي دا إنت طلعت مساعد ياي ناقش وتفتيحة كمان.

لكين الدلالة على إنّو مساعد الياي ما ببقى ياي أمثالك القاطِعا من طرف راسك دي:

Quote: - انتخب الشعب ثلاثةَ عشرَ عضواً وثلاثَ عشرةَ نائبة
- اشتريت تسعةَ عشرَ بيتاً وتسعَ عشرةَ سيارةً آخر موديل وبدون لساتك، هدية لعادل بدوي

يكفينا الله شر نوائب الدهر وأعضاءه وشر البكاسي (التسعة عشر) والعليها (تسعة عَشَر) بلساتك أو بدون لساتك والنوائب ال tubeless والtubes البدون لساتك (أو تِكَك). غايتو السكران في ذمة الواعي، أنا الأيَّام دي مهضرِب هضربة العاضِنِّو ستين كلب أولاد ستين في سبعين كلب.
Quote: سأتكفل ليك بما فعله صاحب الكلب وأخمش لك البوست من نقطة توقفه:

أكان غيبة الأستاذ حا تطوِّل باين كلَّنا حا نصبح من أصحاب الكلب دا أكان ما قعدنا نصقع جِرَّة البوست دا لامِن نتْصرِ(ch) وأللا نقوم بي البوست دا سدَّاري لامن الله يفرِجا. وعلى ذكر الفرج المنشود وبمناسبة عشراقة ود العمدة فلنستلهم الدعاء الشهير لنرجو أن يُجْعَل هذا البوست آمناً مطمئنَّاً ويُرْزَق أهله من الثمرات، آميييين.

Post: #327
Title: Re: إصلاح الكتابة في المنبر
Author: هاشم نوريت
Date: 12-24-2005, 08:56 AM
Parent: #326

الاخ ود العمدة
دبايوا
زى ما قال ليك شنتير بالله ما تجيب بلاوى المنبر هنا عشان دا بيتنا وندخلوا للراحة
وانت تكلكل الناس وبعدين تجرى تكورك.
تسلم مع الود

Post: #328
Title: Re: إصلاح الكتابة في المنبر
Author: Muna Khugali
Date: 12-24-2005, 10:58 AM
Parent: #327

كـل سـنة وأنت وزوارك بألف خـير أخي أسـتاذ مـحسـن..

مـني عـوض خـوجلي

Post: #329
Title: Re: إصلاح الكتابة في المنبر
Author: انور الطيب
Date: 12-25-2005, 03:41 AM
Parent: #328

الأخ Shinteer

تحياتي وما قصرت والله

لك التحية ، ولسة في انتظار التسجيل

Post: #330
Title: Re: إصلاح الكتابة في المنبر
Author: Adil Al Badawi
Date: 12-25-2005, 04:35 AM
Parent: #329

مساء الخير يا شنتير، ومع التلوج أوعك تلوج

لا بد أنَّ الجرَّافات (لديكم، طبعا) قد بدأت في إماطة الآبري الأبيض عن الطرق بتكاليف قادرة على توفير حلال القوت وحرامه لدولة "ذات سيادة وخريطة وزيطة وزمبليطة". حكمة الله الناس ولا بردانين!

لقد قلت:

Quote: الأعداد من 3 إلى 10 بيكون معدودها جمع مجرور بالإضافة؛ والأعداد دي بتُعرب حسب موقعها في الجملة.
أما الأعداد المركبة من 11 إلى 19 بيكون معدودها مفرد منصوب؛ ويعرب تمييزاً منصوباً؛ وهي بتُعرب حسب موقعها في الجملة لكنها بتكون دائماً مبنية على فتح الجزأين


ونقول: قاطعها من طرف راسك وأللا من طرف كرَّاسك، شوف لينا أمثلة للكلام دا وِشكِّلو* بالله.

* الفول المشكَّل (في هذه الديار) = الفول المصلَّح (في تلك الديار)

Post: #331
Title: Re: إصلاح الكتابة في المنبر
Author: Shinteer
Date: 12-25-2005, 06:03 AM
Parent: #330

Quote: ونقول: قاطعها من طرف راسك وأللا من طرف كرَّاسك، شوف لينا أمثلة للكلام دا وِشكِّلو* بالله.

والله يا عادل لو قاطعو من طرف كراسي كان رصّيت ليك الأمثلة. لكن الشغلانة من طرف الراس عشان كده الأمثلة دايرة ليها سطلة عديل عشان الواحد يقدر يؤلفها.

ياخي الكلام ده عديل ما داير ليه أمثلة ذاتو. الأعداد من 3 إلى 10 معدودها جمع مجرور؛ أقدر انت جيب ليها معدود مفرد عشان تعمل ليك حَوَل في خشمك. والأعداد المركبة كلها معدودها مفرد منصوب؛ وهنا برضو أقدر أنجر ليك جملة فيها عدد مركب وأعمل معدودو جمع أو أي شيء عشان تخنق هييييغ. تاني في شنو؟. بالنسبة للأعداد المركبة، من ما الله خلقنا وعرفناها لقيناها مبنية على فتح الجزأين، وما مهم كان موقعها شنو في الجملة.
يعني يا عادل أقضي يومي كلو في نجر الأمثلة؟ يا زول دي دايرة ليها مزاج موزون. هسع شوف قدر الأمثلة النجرتها من راسي دي، دحين مي مفارقة الدرب؟.
يا محسن يا زول، رسل لينا أمثلة وأنا بنزلها. ولاّ أقول ليك يا عادل، أتوكل انت وأنجر لينا أمثلة على ضوء القاعدة الهنا دي وعلى ضوء الأمثلة المجنونة النجرتها أنا.

ياخي أنا كنت داير أعمل أمثلة أدخّل فيها الكعوك. أها الانقراصة ما أخير؟.

Post: #332
Title: Re: إصلاح الكتابة في المنبر
Author: محمد حسن العمدة
Date: 12-25-2005, 06:08 AM
Parent: #331

شنتير اخوي

لا والله لم يخطر في بالي ان جلب الخرد الى هنا سوف يؤدي الى تشويه البوست ولذلك ساقوم بسحب المداخلة واحالتها للتشليح - ما عارف في اليابان اسمو شنو - . فقط يا شنتير توقعت ان يكون البوست معني باصلاح مثل هذه الحالات المتازمة ولك منى العتبة حتى ترضى


ويا شيخنا هاشم هااااااادي فرتيقة من البوست

سلام

Post: #334
Title: Re: إصلاح الكتابة في المنبر
Author: محسن خالد
Date: 12-25-2005, 07:07 AM
Parent: #332

...


يا أصحابي هوووي، عوافي كلكم، وأنا جاييكم بالمختصر هسع دي، وأدوها صبرة شوية علي ويا هسع أنا في أم تلاتل وبحلم بالرواقة وأصحابي هنا،...
تحياتي ليكم كلكم،..
Shinteer ،...
عفارم عليك يا ود أشيقر، والله انبسطت منك جنس بسط، طيّب ما دا أنا الناديت بيهو من الأول، إنو الناس تاخد معاي سحبة، وكلامك دا تاني ما بتزاد، وعادل دا ما يهرشك ساي ياهو صحيح من 13 إلى 19 مبنٍ على فتح الجزئين،..

Adil Al Badawi،...
عادل البدوي كيفنَّك، وأريتك بخير، وأبداً ما قصرتو في بيتنا دا، خليك رائق، وشكلها أيام السحل السوداني فارقت قنقون رأسك كما يقول أخونا شنتير،..
كن في سلام،..

أنور الطيب،...
يا أخي مرحباً وأهلاً وسهلاً بك، بالحق لا أتذكر إن كنت من رواد هذه المضيفة أم لا، ولكن بأي حال أنت صديق كارب لنا في هذه الحارة، تُعلن عن بشريات ما أسعدنا بها،...
أنت مددت بأسئلة نافذة جداً، وسآتي لأُجيبك بتمهل ودون عجلة،....
اليوم كنت كتبت مادة لبوست صديقي عجب الفيا، يعني أخدت زمني السارقو سرقة، وما كنت قايل الدار بجاي عامرة كدي،...
أها أدوني المهلة، وأجمل خاطر بحوزتكم،..
بس بحاول أواجب الناس هنا وهناك، فعليك الله أديني خاطرك، وبجيك بالمهلة، وهذا وعد،...
وكن بخير، أبداً بخير

محمد حسن العمدة،..
إزيك يا ود العمدة صاحبي وزميلي،..
أنا الرابط دا مشيت ليهو بس والله ما فهمت حاجة كما ينبغي، ويمكن لعامل العجلة مني والجوطة الهناك، لذا سأبعث لك برسالة على مسينجرك فراجعها،..
وكن بخير،..

هاشم نوريت،..
تحياتي يا اخي هاشم، ويا زول إنت وينك، ظروفك متعكسة زي أخيك دا وألا شنو؟
إن شاء الله بس تكون طيب وربنا يديك العافية والرضا،..
تحياتي، وكن بخير،..

Muna Khugali،..
إزيك يا منى، وأريتك إنت كمان بخير، وربنا يحقق أمانيك وكل عام وأنت بخير،...
وكوني أبداً أجمل وإياي أن أفتقدك هنا،..
عليك السلام، ولك الود


...

Post: #333
Title: Re: إصلاح الكتابة في المنبر
Author: Adil Al Badawi
Date: 12-25-2005, 07:02 AM
Parent: #331

إنتا يا شنتير السَّقَط كَنْكَشَك وأللا الكُبُر كَشْكَشَك وأللا محل ما بِطْلُبُو العِلْم بي غادي للصين حَنْكَشَك؟! مثَل...مثَل ماك قادِر تنجرو وإنت الكُنت شايِل قدَّومك وحايم لا مْخَلي كراع عنقريب لا كراع شرموط؟! عقايب!

تقول لي

Quote: أقدر انت جيب ليها معدود مفرد عشان تعمل ليك حَوَل في خشمك

أقول ليك (عشان تعرِف إنُّو ما في شيء بعيد علي الله) أسمع كلام خالتك ريَّا بِتَّ العَبَّاس: "تلاتة يوم بي لياليهن، يا بِتُّ أمي، ونحنا نعاين لي رويحة الوليد، الحمى خلَّت راسو قدر الكانون دا" طبعاً شبَّهت بالكانون لأنو كان أوَّل شيء وقع بصرها عليه.

Quote: ياخي أنا كنت داير أعمل أمثلة أدخّل فيها الكعوك. أها الانقراصة ما أخير؟.

(ك)عوووووك، الانقراصة أخير لأنُّو دي (الكعوك) أكان بِقَت جَمِع لامِن تعرِف مفردا تكون واطاتك أصبحت وأكان بِقَت مُفرَد لامِن تعرِف جمِعا رورويَكْ بِكون ضَرَب. غايتو أظِن مؤنَّثا (أكان الحاجات دي حاسبة حساب الجندر) "كعوكاية" لكين ما تقول لي جمِعا كعاكيك (على وزن كعاكيل) بَزْعَل مِنَّك. غايتو خلِّي الأستاذ، لمَّا يجي بالسلامة، يضيفها (ومشتقَّاتها مثل صفة مِكَعِّك) إلى باب تكعيك (أقصد تفكيك) العاميَّة.

الفوق دا كُلُّو كلام خارِم بارِم بس عشان أفكَّ ليك بلوز* الأحد والشتاء والرفيق الفَسِل لي حَدِّي ما أ(ت)نجر ليك أمثال زي الناس وأللا ينجدنا الأستاذ.


* Blues... Blues ياخوي ما يقوم واحِد يفتح ليهو بوست عنوانو: "في بوست لمحسن خالد، الجماعة شغَّالين في البلوزات فِكّيك". الراجل بي صراحة ما ناقِص.

Post: #335
Title: Re: إصلاح الكتابة في المنبر
Author: Shinteer
Date: 12-25-2005, 08:13 AM
Parent: #333

الناس السمحين جميعاً .. كيف أمسيتوا وكيف أصبحتوا؟ ومرحباً بعودة محسن بعد غياب.

يا ود البدوي
يا لك من مهضرِب يا عادل. إلا والله قول لي (الكعوك) دي كُنّا بنطلقها على المفرد، وبنستخرج منها فعل (إكَعِّك) واسم فاعك (مِكَعِّك) واسم فعل (تكعيك)، لكن ما حصل جمعناها رغم وجود أكثر من كعوك في "الميزين". قاتل الله (التكعيك) وايامه. لكن تعرف شيء، عندنا شيخ واثقين في علمو ونجاضتو، قال لينا لو في أي اسم ما لقيت ليه صرفة عشان تجمعو بيها لا صرفة بتاعة قياس ولا صرفة بتاعة سماع ولا أي صرفةٍ كانت (يعني كل الأسماء المكعوجة الما عندها راس ولا قعر)، فما عليك إلا أن تلصِّق ليه ألف وتاء في نهايته؛ يعني أجمعو جمع مؤنث سالم وشيل عكازك وأبقى خاتر. القاعدة دي صحيحة تب، وحتى لو بقت غلط أنا إيماني بشيخي بيمنعني أن أتخلى عنها.
أها زي الكعوك ده أردمو بألف وتاء في ضنبو: كعوكات. القبوب (قبوب ود زايد): قبوبات، وعلى ذلك هِجْ.

تحذير رسمي: هذه القاعدة التزم بها وحدي ولست مسؤولاً (أو مسئولاً) أمام أي قانون إذا اقتنع بها إنسان آخر وعمل بها. ذنبو على جنبو.

Post: #337
Title: Re: إصلاح الكتابة في المنبر
Author: عبدالرحمن عزّاز
Date: 12-25-2005, 12:35 PM
Parent: #335

سلام للجميع هنا
الأديب محسن خالد
المحاضر شنتير
الزملاء بالفصل ، محمد السر وهاشم نوريت
متابع قبل دخول البورد.
يعنى الرسالة وصلت لناس كتار جداً ، واصلو وإن شاء الله البوست دا ما يمشى الأرشيف
لكم تحياتى جميعاً

Post: #338
Title: Re: إصلاح الكتابة في المنبر
Author: Adil Al Badawi
Date: 12-26-2005, 04:15 AM
Parent: #337

سلامات يا شباب وحمداً لله على السلامة يا أستاذ. كنَّا راجيِنَّك ترحِّب بالطلاب الجدد عشان نعمل معاهم الواجب. مرحباً بكم ونرجو أن يطيب لكم المقام.

كيف أصبحت، يا شنتير، وقيَّلت وأمسيت. ترانا بنكتل الهم بالهضربة.

تقول:

Quote: عندنا شيخ واثقين في علمو ونجاضتو، قال لينا لو في أي اسم ما لقيت ليه صرفة عشان تجمعو بيها لا صرفة بتاعة قياس ولا صرفة بتاعة سماع ولا أي صرفةٍ كانت (يعني كل الأسماء المكعوجة الما عندها راس ولا قعر)، فما عليك إلا أن تلصِّق ليه ألف وتاء في نهايته؛ يعني أجمعو جمع مؤنث سالم وشيل عكازك وأبقى خاتر. القاعدة دي صحيحة تب، وحتى لو بقت غلط أنا إيماني بشيخي بيمنعني أن أتخلى عنها

أنا غايتو بقول جَمِع كعوك هي كعوك ذاتا استناداً على صرفة القياس التالية:

قبورة (جرادة) جمعا قبور (جراد)
ضُبَّانة (ذبابة) جمعا ضُبَّان (ذباب)
كعوكة* (وفي قول حنكوشي، كعوكاية) جمعا كعوك. والله أعلم.

طبعاً فكَّرت أجمعا جمع "عشائري" زي قولك "التبيب" النافعاب، الزيداب، القريداب، (ونشاغل أستاذنا شوية) المسيكتاب لكين قلت مافي داعي ندخِّل البوست دا في قزازة عشائرية بغيضة مع إنُّو صيغة آب..آب...آب دي مستهوياني ليها زمن خصوصاً لمَّا آخُدا على إنَّها تأخير آل (يعني قولهم نافعاب بدلاً عن آل نافع)

* في قولي كعوكة كمفرد كعوك أستند على أنَّ المذكَّر في الحشرات قليل. أمسك عندك: جرادة، ذبابة، نملة، بعوضة...الخ ودي ذاتا دايرة ليها نظرة بس كعَّكنا في البوست دا حول الموضوع دا بما فيهو الكفاية.

تحيَّاتي إلى أن يقدِّرنا الله "نضرب لكم الأمثال"

Post: #339
Title: Re: إصلاح الكتابة في المنبر
Author: Adil Al Badawi
Date: 12-28-2005, 08:53 AM
Parent: #338

لأساتذة وطلاب وزوَّار هذه المدرسة نقول كل عام وأنتم بخير ونسأل الله أن يصلح بالكم وكتابتكم، في العام الجديد.

Post: #340
Title: Re: إصلاح الكتابة في المنبر
Author: saif basheer
Date: 12-28-2005, 12:23 PM
Parent: #339

عزيزي محسن خالد:

كل سنة وانت طيب واجمل الامنيات في العام الجديد..

حالياً متواجد بالكويت في زيارة عمل قصيرة ستنتهي غدا... جبت الكويت طولها وعرضها علَّني أجد أحد مؤلفاتك... مكتبة واحدة فقط هي مكتبة جرير قال لي أحد موظفيها إنه (صاح الكسرة دي وللا لا؟) كان يوجد كتاب من تأليفك (أظن عنوانه على ما أذكر الطبيعة السرية للأشياء) ونفذ، وكتاب آخر في الطريق إليهم... وهأنذا أعود إلى لندن خالي الوفاض... قل لي؛ أين يمكنني أن أجد أياً من مؤلفاتك؟


فتك بي عافية

سيق بشير

Post: #341
Title: Re: إصلاح الكتابة في المنبر
Author: انور الطيب
Date: 12-29-2005, 03:50 AM
Parent: #340

الأخ محسن خالد تحياتي الحارة لك ولمن معك والله يديك العافية

Quote: بس بحاول أواجب الناس هنا وهناك، فعليك الله أديني خاطرك، وبجيك بالمهلة، وهذا وعد،...
وكن بخير، أبداً بخير



يازول زي ما بقولوا الجماعة الفورة مليون ، مهلتك ، خاطرك ، حاجاتك كلها معاك ، ولمن تجي دايرنك كمان تشوف لينا الكلمات دي وتفكيكاتها ، وقراية الكبر دي أهم حاجة فيها المهلة وكمان "حبل المهلة يحل ويربط " أو كما قيل .

والكلام كثيييييييييير ولكن خليك معانا بمهلتك في التفكيكات الجاية دي

يا خي مالك بتحوص وبتلوص ، تحوص / تلوص

أظن تحوص دي فصيحة ، وفي القرآن " هل من محيص " ، ولكن يا أخوي محسن تلوص دي جابينها من وين وكمان ملوص ، واللعبة المعروفة ملوص برضو ، مرق ملوص ، أها فكك .

يا خي انت طولت من الكتابة في المنبر حِردت والله شنو ، يا أخي انت حردان ،

وفي القرآن " وغدو على حرد قادرين "

وأظن في بيت شعر فيه كلمة تسّاقوا على حرد من دماء الأساود


يعني التفكيكة العايزنها حرد ، حردان ،وحردان ، واخواتها


وما نطول أيضا عملا بنفس المبدأ " تساوي الفرص"


ولك


Post: #342
Title: Re: إصلاح الكتابة في المنبر
Author: Adil Al Badawi
Date: 01-01-2006, 02:50 AM
Parent: #339

سلامات يا شباب

قلنا الدنيا عيد وكدا والأساتذة في إجازة، جِبْنَا مرارتنا وشربوتنا وجيناكم:

العقود: 20، 30،...،90

بسيطة جداً، أعتبرها جمع مذكَّر سالم وأركبها عكَّاز وما يهمَّك الجاي بعدا ضكر وأللا إنتاية (أي، مذكَّر أو مؤنَّث). يعني، أرفعها بالواو وأنصبها (بس ما تَنْصُب عليها) بالياء. بس أوعا بالك: تمييزها (زي ما قال شنتير، وأنا ما غالطتو يا أستاذ) بيكون مفرد منصوب:

- أكلت عشرين صحناً* شواءً وشربت ثلاثين زجاجةً* (قول يا زول) شربوتاً وما عَرِفْتُ بعدها أكان عيدُ أضحى أم كان عيدُ فطرٍ.

* ما تِهْتَموا لي "صحناً" و"زجاجةً" لأنَّها حا تدخِّلنا في المقادير وأشباه المقادير والمقادير...يا المقادير الخلَّتنا (قَدُر قُدْرَتْنا) دخلنا (بسبب غيبة الأساتذة) في شِعْراً وشَعَراً ما عندنا ليهو رقبة.

المئات: 100، 200،...، 900

إذا بدينا بي "مائة" حا تسهِّل علينا الدوشة دي تَبْ: أولاً من تالا التذكير والتأنيث، برضو ما يهمَّك الجاي بعدا أكان ضكر وأللا إنتاية (مذكَّر أو مؤنَّث) ياها بتبقى "مائة" ما بتتغيَّر (اللهمَّ إلا إذا سياسي مخبول قرَّر يَخُت صورتو في بنكنوتها وفي الحالة دي: ما علينا). أما الإعراب فحسب موقعها في الجملة:

- أرسلت مائةَ رسالةِ معايدةٍ.
- في بريد غيري مائةُ رسالةِ معايدةٍ.

لاحظتو لي الكسرة الفي "رسالةِ"؟! دي يا شباب لي سبب مهم خالس خالس وهو: تمييز "مائة" بيكون مفرد مجرور.

ناو، 200 إعتبرها مثنَّى لي "مائة" وأركبها عكَّاز "مائة" ذاتو.
300، 400،...،900 إعتبرها جمع مؤنَّث سالم لي "مائة" وأركبها عكَّاز "مائة" ذاتو.

في شنو تاني؟ "ألف"؟، زيَّها زي "مائة" الخالق الناطق وعندي "ألفُ" مثال لو حَبّيتو:

- توقَّعت ألفَ رسالةِ معايدةٍ رداً على مائةِ رسالةٍ بعثتها (وما زال في نفسي شيئ من حتى)

في شنو تاني: مليون وترليون وديشليون؟! دي هَجْمَات كبيرة نخلِّيها للأساتذة الكُبار.

تحيَّاتي وأرجو أن أكون "كعَّكْت وما عَكّيت" وأكان "عّكّيت" على الأساتذة "العكاليت" أن يصحّحوا لي ويصحّحوني في عَضمي دا.

Post: #343
Title: Re: إصلاح الكتابة في المنبر
Author: محسن عبدالقادر
Date: 01-01-2006, 08:26 AM
Parent: #342

بسم الله الرحمن الرحيم

الأخ العزيز محسن خالد

أنار الله عقلك بقدرإضاءاتك

قرأت جزءا يسيرا مما كتبته انت ، فشكرت لك صنيعك
أؤيد وأؤكد ما ذهبت اليه بقولك إن الكتابة تحتاج الى إصلاح
وهأنت تخطو خطوات سديدة في هذا الإتجاه ....
أسأل الله لك العون والسداد
كثيرة هي الأخطاء الشائعة ... كتابة .. قراءة ..غير أنها تكون أكثر قبحا
عندما تصدر ممن يفترض فيهم التدقيق ..وأخص من هؤلاء الذين يطلّون علينا
عبر وسائل الإعلام ... فما أقبحها من أخطاء .. وأشنع بها من غلطات ..
أخي الجليل / محسن
أكرر شكري ... وأعد بالتواصل عبر البوست

ودمت نورا يبدد الظلمات

Post: #344
Title: Re: إصلاح الكتابة في المنبر
Author: محسن خالد
Date: 01-05-2006, 02:56 PM
Parent: #343

Salam for all...
Adil Al Badawi
Shinteer
Abd Rahman Azaz
Saif Basheer
Anwar Eltaieb
Muhsin Abd Elgadier

Tahia and Agologize.. right now I'm in South Africa, so (Ihave no Arabic Access) yah now I tried this very famous phrase..

Stay well Friends

Post: #345
Title: Re: إصلاح الكتابة في المنبر
Author: Adil Al Badawi
Date: 01-16-2006, 01:15 AM
Parent: #344

لأساتذة وطلاب وزوَّار هذه المدرسة نقول العيد مبارك عليكم والعفو والعافية.

Post: #346
Title: Re: إصلاح الكتابة في المنبر
Author: محسن خالد
Date: 01-16-2006, 10:47 AM
Parent: #345

...

يسعد مساءكم الأصدقاء في الغار،...

وصديقنا عادل البدوي،..

للجميع تحياتي وعامكم ندي،..

قلنا نسلم بس، فيادوب حطينا الرحال،..

خليكم متونسين لامن نجيكم،..

ويا ود البدوي إنت وصاحبي شنتير ما قصرتو تب، ريحتوني من كتير،..
واصلوا وبجيكم بعد الضهر ينطرح، والله أنا بيتي العايش فيهو هنا في أبو ظبي دا ما عندو فرق كتير من العشش لكن عائلتي الكتب واحشاني شديد، ويادوب حسيت بالراحة، راحة وسط الفوضى والبيت الهامل بلا مره، أنا بقول في الكلام دا كان تجي تخطبني بت ناس، هسع الواحد يسافر من خلاء ويحط في خلاء، يعني الفرق بين جنوب إفريقيا وهنا شنو؟...

أها فتكم عافية،...

...

Post: #347
Title: Re: إصلاح الكتابة في المنبر
Author: munswor almophtah
Date: 01-16-2006, 10:52 AM
Parent: #346

محسن عيدك مبارك والقابله تشوف البتقولو وتسوى لك التحايا والأمانى









منصور

Post: #348
Title: Re: إصلاح الكتابة في المنبر
Author: محسن خالد
Date: 01-16-2006, 11:14 AM
Parent: #347

munswor almophtah ،..

وعامك ندي يا ود المفتاح، والله اتوحشناكم بزاف، ما بالعمر حيلة،...

وتحياتي، وكل سنة وإنت طيب،..

وكن بخير أبداً بخير

Post: #349
Title: Re: إصلاح الكتابة في المنبر
Author: محمد السر
Date: 01-16-2006, 03:57 PM
Parent: #348

الشباب الحلوين
كل سنة وإنتو طيبين


الأستاذ محسن خالد
ياخي مشتاقين..
يا جنا.. معيِّد ولا رُفِع عنك الشربوت؟
مستنين حكاويك عن عمنا مانديلا

Post: #350
Title: Re: إصلاح الكتابة في المنبر
Author: Adil Al Badawi
Date: 01-18-2006, 00:45 AM
Parent: #349

حمداً لله على السلامة يا أستاذ

لقد قلت:
Quote: هسع الواحد يسافر من خلاء ويحط في خلاء، يعني الفرق بين جنوب إفريقيا وهنا شنو؟...


وقد صدقت وكلامك وقع لي فوق جرحاً غائر لي العَضُم والله. يتعمَّق الإحساس بالخلاء عندما تَشِدُّ الرحال إلى خلاءٍ آخر أو تُرخي الرحال في خلاك قادماً من خلاءٍ آخر. ما أقسى التستيف والأنتستيف في خلاءٍ ما فيه إلا روحك وصداها يصفعك كلَّما مدَّ طيف روحك الأخرى يده لوعاء التستيف / الأنتستيف. قاتل الله الرحيل.

أقول ليك: ياخ "الرفيق الأعلى" ولا الخلا. أقراها إنت باللهجة المغربية عشان تظبط معاك بي جاي وبي جاي ونحنا بنقراها باللهجة السودانية لنفس الغرض.

تحياتي.

Post: #351
Title: Re: إصلاح الكتابة في المنبر
Author: Gaafar Ismail
Date: 01-18-2006, 06:34 AM
Parent: #323

العـزيز شنتير

كل سنة وأنت طيب وربنا يحقق أمانيك

أحد أصدقائي التعبانين مع حكاية العدد بقول ليك شكرا جزيلا وجزاك الله خير كثيرا. والشكر موصول للأخ محسن صاحب البوست العظيم .

مع تحياتي .

جعفر إسماعيل

Post: #352
Title: Re: إصلاح الكتابة في المنبر
Author: Adil Al Badawi
Date: 01-23-2006, 03:08 AM
Parent: #351

سلامات يا أستاذ،

كل عام وأنتم بخير يا شنتير مرتين والتالتة (بمناسبة سنة الكَلِب) فيدَّرِِب. يا زول غتست وين؟!

http://www.chinapage.com/painting/langshining/dogstream.html

كَلْبٌ عند جدول. الكَلِب هيِّن البِقْنِع الديك (يعوعي عوعاية الفرتقة) شنو؟!

نسيت أسألك: سنة التيس (عشان تتم الناقصة فَدْ مرَّة) متين؟!

تحياتي.

Post: #353
Title: Re: إصلاح الكتابة في المنبر
Author: عبدالرحمن عزّاز
Date: 01-27-2006, 11:51 AM
Parent: #352

UP

Post: #354
Title: Re: إصلاح الكتابة في المنبر
Author: محسن خالد
Date: 01-28-2006, 05:30 AM
Parent: #353

...


محمد السر،...
يا زول ماك طيّب، وأريتك بخير،..
عارف مما جيت من السفر وأنا روحي محرقاني، وحاسي بروحي بقيت زول بتاع شِبَك، مادام كدي خليني أعلّق علي جملتك دي، اللهي –عاملة تناص- مع جملة صاحبنا "حميدة" حينما جاء في تيموليلت وسأل: صائم وألا مرفوع عنك القلم!
أها أيام هجمتن ديك، كان جاري في كل مكان وعامل فيها بضحك من عبارتي: (أنا نبي جاهز، فاملؤوا قِراب الماء والسيف وكونوا جاهزين). ويشيل ويضحك، ويكرِّر أول مرّة أشوف نبي جاهز وواحد تاني ما جاهز.
أها عشان تشوف "طورانية التلقي" بالأدلة، قام فتح بوست وأسماه: ألم نشرح لك صدرك. أما حكاية عجيبة، مش كدي؟
يعني هو فتح البوست دا وما عارف قصة (السورة) دي شنو؟
لنقل إنها "سورة" تجهيز النبي، جاءت الملائكة وشرحت صدره، ورأى النبي نفسه ودواخله أمامه وهو مختطفٌ بدون آلام، الملائكة كانوا بدشنّوا فيهو، يعني بجهّزوا فيهو، عشان يكون نبي.
بالتالي قبليها ما كان جاهز، جُهِّز ثم أُطلق في كُفّار قريش،..
عارف؟ مطوّل من صاحبي "حميدة" قلت أبارك ليهو العيد، وأشرح ليهو حكاية نبي جاهز وما جاهز دي بفهموها كيف،..
يطيب دهرك يا ود السر، والعيد الفات دا لو ما "سندي وودز مان"، لعبرني دون عيد، ويمكن الزهج الهسع من اللغة والكتابة في هذا البوست من آثار تلك المفارقة لديارها، ومن باب حنين القلوص المشهورة بالحنين.
الأيامات دي قائم كلي شرّار، يا رب تطفينا قبل نعوّق لنا زول،..



Adil Al Badawi،..
إزيك يا عادل ويطيب دهرك، طبعاً ح تقرأ اعتذاري عن الكتابة هنا من مداخلتي مع ود السر، أنا ما قاعد أشفق منك ومن شنتير، بعدَّكم أهل بيت، وهسع ما شاء الله البيت أهلو كترو خلاص، عبد الرحمن عزاز، وسيف بشير وأنور الطيب، ومحسن عبد القادر، ليهم جميعاً تحياتي،
عبد الرحمن عزاز،
سيف بشير،
أنور الطيب،
محسن عبد القادر

تحياتي لكم جميعاً، وكونوا بخير،..

دائماً بتذكر يا ود البدوي أبيات كتبتها زماانك:
خلا إن مشيت علي القدّام
والخليتو وراك حق الرجعة لما تلوح
كان اتخافى كان انفزع هدّام
فرداني وطشاش القاصدو لحقو الفوت
وبراك لما القبور شابت عليك مجروح
والموت اتلبش في موت



Gaafar Ismail،..
تحياتي يا رجل وكن بخير،..
كيفك يا زول شكلك داير تكاويني، برضو نكاويك، أها العدد دا ذاتو أنا عملت فيهو النص قبّال شنتير، يعني التحية أولاً لمحسن خالد، وثانياً الشكر موصول لشنتير، ودا (بخصوص العدد بس، المغروض فيهو صديقك"، يعني ما جينا للدروس التانية،..
أها يضحك نهارك، وكن بخير،..


عبد الرحمن عزاز،..
يا زول تتبارك وتتعلى،..
وأريتك طيب،..
الأيامات دي والله قلبي فترااان، دي سمعتبها دي،..
غايتو يضحك نهارك، وكن بخير،..
وتتبارك


...

Post: #355
Title: Re: إصلاح الكتابة في المنبر
Author: Adil Al Badawi
Date: 02-01-2006, 04:22 AM
Parent: #354

سلامات يا شباب

قلنا مادام مافي حِصَص نرمي لينا دُرَّابة وسجن سجن، غرامة غرامة:

لقد هنَّأت شنتير بثلاثِ مناسبات وقد كانت الثالثة مناسبة السنة الصينية الجديدة (بدأت يوم 29/01/2006) وإسمها سنة الكلب والصينيون يسمُّون السنوات على إثنى عشر حيواناً هي: الفأر، الثور، النمر، الأرنب، التنين، الثعبان، الحصان، الخروف/التيس، القرد، الديك، الكلب، الخنزير.

ثمَّ كان أن ألحقت سؤالاً بالتهنئة وهو عن موعد سنة التيس وقد خطر لحظتها ببالي بيت الشعر (المتنازع على نسبته) لعلي بن الجهم:
Quote: أنت كالكلب في حفاظك للود وكالتيس في قِراع الخطوب
ثمَّ كان أن "عِتِرْتَ" (وأنا أبحث عن هدية مناسبة لصديق صيني) في انطباعات عن السنوات الصينية ووجدت ما يلي عن سنة الكلب:

Quote: People born in the Year of the Dog possess the best traits of human nature. They have a deep sense of loyalty, are honest, and inspire other people's confidence because they know how to keep secrets
وما يلي عن سنة الخروف/التيس:
Quote: People born in the Year of Ram are elegant and highly accomplished in the arts. They seem to be, at first glance, better off than those born in the zodiac's other years. But ram year people are often shy, pessimistic, and puzzled about life. They are usually deeply religious, yet timid by nature. Sometimes clumsy in speech, they are always passionate about what they do and what they believe in

غايتو، سألت نفسي: هسي دا يسموهو شنو، "تمثُّلات الكتابة" وألا تمثُّلات الحياة ذاتا.

يا أستاذ إنت طبعاً من مواليد سنة الثور والجماعة قالوا عنَّك:
Quote: The Ox works hard, patiently, and methodically, with original intelligence and reflective thought. These people enjoy helping others. Behind this tenacious, laboring, and self- sacrificing exterior lies an active mind. While their balance and strength inspire confidence, Oxen can seem rigid, obstinate, and slow. They impress others as leaders, fearing neither responsibility nor risk. However, sometimes they must labor long hours to accomplish little. As a result, the Ox can find life's journey laborious and the rewards uncertain.
أمَّا أنا (بالمناسبة، من مواليد سنة "الدبيب") فأقول قولي هذا وفي بالي قولك:
Quote: والله قلبي دي بقول لي كترة كلام، أهم حاجة فيهو: "الدنيا" دي.. ورطة شنو دي؟
وهو قول يكاد يكون ترجمةً للعبارة:
Quote: the Ox can find life's journey laborious and the rewards uncertain
تحيَّاتي وأكان الدُرَّابة دي ما عجبتكم، بسيطة: بولوا فوكَّا بَسْ.

Post: #356
Title: Re: إصلاح الكتابة في المنبر
Author: Gaafar Ismail
Date: 02-01-2006, 07:22 AM
Parent: #354

Quote:
Gaafar Ismail،..
تحياتي يا رجل وكن بخير،..
كيفك يا زول شكلك داير تكاويني، برضو نكاويك، أها العدد دا ذاتو أنا عملت فيهو النص قبّال شنتير، يعني التحية أولاً لمحسن خالد، وثانياً الشكر موصول لشنتير، ودا (بخصوص العدد بس، المغروض فيهو صديقك"، يعني ما جينا للدروس التانية،..
أها يضحك نهارك، وكن بخير،..



أستاذنا العزيز محسن
سلامات وكل سنة وأنت بخير

أعذرني على الدخول والتعليق المتأخر .. يا دوب شفت تعليقك الظريف.

أها يا زول عشان ما تزعل .. الشكر ليك أولا وموصول لصديقي شنتير العامل مني طناش.
دمت في رعاية الله وحفظه الأمين .

مع تحياتي ووافر احترامي .

جعفر إسماعيل

Post: #357
Title: Re: إصلاح الكتابة في المنبر
Author: محسن خالد
Date: 02-01-2006, 09:52 AM
Parent: #356

..


Adil Al Badawi،..
يا زول إزيك، ويا حليل زمن الحصص
عارف؟ أنا الأيامات الفاتت دي –وما أزال- كنت بجهّز في مقدمات لكتب حررتها، وأبشّر الشباب إنو صاحبي نوري الجرّاح طَلّع كتاب رحلة "البكباشي سليم قبطان –تتبعاً لمنابع النيل، عام 1839م-1840م "الطبعة التانية"، الللللله تخيّل إنك تقرأ كتاب عن السودان من الزمن دااااااااك، الأجمل إنو أضاف للكتاب دا من عندياته "حملة إسماعيل باشا على السودان ومقتله" –ودا شغل ابن فتلة- "لإدوار جوان المرافق للحملة" من 1819 إلى 1823م، لأنو إدوار جوان دا برسم بورتريهات "روائية" للشخوص، لو أنا كنت فنّان بورتريه كنت بعمل شغل خطري من الحاجة دي، وكمان طلّع كتاب قديم من الستينات للدكتورة "خديجة صفوت" "رحلة فتاة سودانية إلى الصين"، وكتب أخرى،...
أنا كنت حررت كتاب "أحمد حسن مطر –السندباد السوداني" و"رحلة في بلاد الزنوج" و"تشحيذ الأذهان" و"رحلة في إيطاليا" وو... إلخ، أها بالضيق سافرت جنوب إفريقيا وما كتبت المقدمات الخاصة بالسندباد ورحلة حشيمة، طبعاً مع الانترنت المسنوح دا بلحقوك ويطالبوك بيها وين ووين، المهم الشقيات كتبناهن هناك وانفكينا، جينا لقينا الكشافات الحضارية ترحب بنا، أها تم القصة براك، هسع خلاص الكتب دي مرقت بحمد ربك، لكن باقية بعض العراقيل البسيطة،...

البروج ديل عجبني، وضحكني لأني اتذكرت واحد صاحبي كان شغال في مجلة هنا وبكتب ليهم "الحظوظ"، أها بشاورني وتقريباً بكتب معاه نص فيها، بنتلاعب، عارف؟ كنا بنكتب انطباعاتنا الصباحية للقراء، وبناءً على أبراجنا نحن الفي المكتب، البجي مشاكلاهو مرتو ناس برجو تعبوا معاه، والمفلس بفلس بهم، غايتو زمان،...

عادل بتوقّعك قارئ جيّد لـ"وليم باتلر ييتس" من طريقة اختيارك لحاجات –معيّنة- في كلامي بتشبه كدا؟ رأيك شنو؟ قلنا نديك كيلة كيلتين من الأبراج،..

Gaafar Ismail،...
إزيك يا حلو، وماك طيّب،..
ياخي أنا ما زعلت بس حبيت أقرق معاك، فهمتني؟
نكاويك عشان تجي تاني،...
إن شاء الله تكاويك حبيبتك، قول 2 آمين، واحدة بتاعة الجوامع والكنائس والتانية بتاعة عمك "راي شارلس"،..
كن بخير،...

..

Post: #358
Title: Re: إصلاح الكتابة في المنبر
Author: Adil Al Badawi
Date: 02-02-2006, 04:33 AM
Parent: #357

سلامات يا محسن،

مادام "يا حليل زمن الحصص"، خلينا في زمن القصص.

لقد قُلت:
Quote: عادل بتوقّعك قارئ جيّد لـ"وليم باتلر ييتس" من طريقة اختيارك لحاجات –معيّنة- في كلامي بتشبه كدا؟ رأيك شنو؟

وأقول: (زمااان كان) أكثر ما يستهويني في كلام الحكيم William Butler Yeats هو رؤاه عن الحياة، واهتماماته بما وراء الحياة ذاتها. طبعاً، في فترة ما (من هذه الحياة)، شقلبت اسمو الأخير عشان يظبط مع وصفي (الخاص) ليهو: "ييتس، خميرة العكننة / خميرة المزاج". وهو وصف أعتقد أنَّه، في جزئه الأوَّل على الأقل، ينطبق على معظم الأيرلنديين على حدِّ حكمة ييتس نفسه:
"
Quote: Being Irish, he had an abiding sense of tragedy, which sustained him through temporary periods of joy."
أمَّا أكثر ما استهواني من حِكَمه حول الحياة فهو قوله:

Quote: Life moves out of a red flare of dreams
Into a common light of common hours,
Until old age bring the red flare again
.
شعلتنا الحمرا الأولى، بكلِّ أحلامها، عدَّت خلاص وترانا راجيين التانية. لكين نتمنَّى ليك التِّلِت بتاعك في الحكمة دي يكون ليك حسب قول ييتس:

Quote: I wonder anybody does anything at Oxford but dream and remember, the place is so beautiful. One almost expects the people to sing instead of speaking. It is all . . . like an opera.
وما دام إنَّنا وسط حِكَم ييتس، عندو حكمة كُنْتَ عاوز ألْصِقا في (كلِّ) بوستات اليومين ديل لكين قُلْتَ طالما دا بوست لإصلاح الكتابة الدايرا اليجيها هنا. يقول ييتس:
Quote:
“Those that I fight I do not hate, those that I guard I do not love.”
أشكرك وأحييك.

حاشية: ثمة كتابة (ما تمَّت لِسَّع لكنَّها مُبَشِّرة بالعكننة والمزاج) لسلوى السعيد في سودان فور أول قريتها قُبَّال كلامك دا واتذكَّرت صاحبنا ييتس. قالت سلوي نفسها، رغماً عن أنَّني (بالإشارة إلى ييتس) ما مستوعب الحلم الفي النُّص، ما يلي:

Quote: الحلم ثم الحلم ثم الحلم .
لاننا لا نستطع ان لا نعيش.

Post: #359
Title: Re: إصلاح الكتابة في المنبر
Author: Siddig A. Omer
Date: 02-02-2006, 05:05 PM
Parent: #358

الاخ محسن....ياحبيب الغار


الحال ياهو نفس الحال.......بقى ذى حال السودان.....و بمعنى أصح ذى صفيحة الطماطم....و قيس.....

معاك أينما ذهبت..... أكتب و دعنأ نتنفس بعضً من عشق......لك حبى و تقديرى،،،

Post: #360
Title: Re: إصلاح الكتابة في المنبر
Author: bayan
Date: 02-02-2006, 09:46 PM
Parent: #359

سلام يا شباب

متابعين بالكراس..

ربنا يديكم العافية

Post: #361
Title: Re: إصلاح الكتابة في المنبر
Author: Gaafar Ismail
Date: 02-02-2006, 09:56 PM
Parent: #357

الحبيب محسن

آمين مرتين ، وبعدين مسئول من الخير أخونا شنتير غاتس وين الأيام دي؟

الله يديك العافية .


جعفر

Post: #362
Title: Re: إصلاح الكتابة في المنبر
Author: saif basheer
Date: 02-03-2006, 05:32 AM
Parent: #361

العزيز محسن:

حِمْدِلّلا علي السلامة...

تحيات وتمنيات بأطيب الاوقات (الواحد بقى يلاوز من كتابة الهمزات – كنت أنوي كتابة الأوقات فآثرت السلامة ولم أكتب الهمزة)

تابعت قراءة البوست من أوله وحتى حديثك عن مشروع الدكتوراه، القاموس التاريخي، وياله من مشروع... وحتماً ستكون بهذا قد أضفتَ جديد للمعرفة الانسانية، وبالطبع هذه هي فكرة الدكتوراه، أن يتم منحها لشخص ما نظير تقديمه أو إتيانه بإضافة جديدة للإنسانية... وأنت بهذا العمل غير المسبوق ستتربع على "مصطبة" العلماء...

لا أذكر أنك تناولت كلمة غير، من حيث التعريف أوعدمه... حسب معلوماتي المتواضعة فإن غير لا تعرف، ولذلك كتبت أعلاه، غير المسبوق... لكن الشائع جداً أن تجد العديد من ذوي الكلمة الرصينة يكتبونها مُعَرَّفة، كأن يكتب أحدهم "الغير مسبوق" مثلاً....

رايك شنو؟

وضحكت لك الدنيا يا جميل..

سيف بشير

(ما قلت لي القى مؤلفاتك وين... راجع مداخلتي الكتبتها ليك وأنا في الكويت)

Post: #363
Title: Re: إصلاح الكتابة في المنبر
Author: محسن خالد
Date: 02-04-2006, 04:55 AM
Parent: #362

..



Adil Al Badawi،...
الله علي الرسم من الصباح،...
عارف؟ أنا الزول دا بحبو كيف؟ لأنو كان موزون جداً، ما زي الناس الدايرة تحش رأسنا بعروبية الإسلامية، ولا كمان بالتانيين الدايرين يحشوا رأسنا بالأفريكانية، بعدين لأنو هو العرّف الدنيا علي رامبرانات طاغور، باستعدالو لترجمة "قربان الأغاني –الجيجالي"،...
يا سلام، والله الصباح البديناهو بمقولات الزول دا سمح خلاص،...
الله يسلمك يا ود البدوي ويديك البتغطيك من كل زيفة وصنقرارة،...
كن بخير،...

Siddig A. Omer،...
أووه، إزيك يا صديقي في الغار، وعساك طيّب،..
ياخي ناضمتك بهناك، في بيت صاحبتنا تيموليلت تاني ماشفتك، كيفك يا زول،...
أنا ذاتي آلصديق معاك أينما تذهب،...
وقرييب، بجيكم في دوحة الله والرسول دي،...
وكن بخير،..


bayan،...
سلام يا شابة، أها قصّرنا معاك،...
إزيك إنت وتسلمي،...
وربنا يديك العافية وأتم الصحة،..
وكوني بخير، أبداً


Gaafar Ismail،...
ويطيب نهارك، يا جميل،..
أنا ذاتي والله سائل منو هنا، مشتاقين لقلمو الطاعم أب هبهان وقرفة،..
وأريتو يسمع نداءنا دا ويجينا متلّب،..
كن بخير،..

saif basheer،...
أهلا، يا صديقنا في الغار والراجل الحلو،..
أنا بشكرك علي كلامك المشجّع والسمح دا، في الدكترة، لكن ما ظنيتها تتم أخوك عوجاتو كتيرة خلاص،..
هي بالفعل "غير المسبوق" كلامك صحيح، ولو تابعت كويس كدي لافوق في البوست دا ذاتو بتلقاها موضّحة تب،..
ياخي أنا مزهجاني "هكذا مواضيع" وبرضها موضحة فوق ومع كامل حقوق أخينا شنتير في الزعل، و"إنشاء الله" القدر ما نبحنا بيها –إن شاء الله- ولا شغالين بيها الشغلة،..

كن بخير أبداً بخير، يا صديقنا في الغار
بالنسبة للكتب شوف المكتبات في الكويت العندها تعامل مع "المؤسسة العربية للدراسات والنشر"، أكيد ح تلقاها، بعدين فاتك معرض الكتاب الكان قبل شهور في الكويت، أصحابي اشتروها منه، بس أسأل أهم المكتبات عندكم عن كتب المؤسسة،.....

وكن بخير

...

Post: #364
Title: Re: إصلاح الكتابة في المنبر
Author: محسن خالد
Date: 02-05-2006, 10:25 AM
Parent: #363

..

إنشاء الله ........غلط................... الصاح: إن شاء الله
هكذا مواضيع..........غلط......... الصاح: مواضيع كهذه
(المتواجدون الآن)............... غلط............الصاح: (الموجودون الآن) والأفضل منها كلمة (الحضور).... "لعناية بكري، والحضور كلمة ألطف وأخف، ومفردة واحدة"...
الغير منطقي................. غلط.....................الصاح: غير المنطقي






...

Post: #365
Title: Re: إصلاح الكتابة في المنبر
Author: saif basheer
Date: 02-06-2006, 05:23 AM
Parent: #364

سلِمت يا محسن

لابد من إعادة قراءة البوست كاملاً... لأن طبيعته كطبيعة المراجع التي لا غنىً عنها...

رجعت من الكويت "زمااان"، وحا افتش في لندن...

بخصوص الدكتره، اعتقد لديك إصرار وحماس كفيلان بتزليل كل العوجات...

ولنا لقاء

سيف

Post: #366
Title: Re: إصلاح الكتابة في المنبر
Author: محسن خالد
Date: 02-06-2006, 11:12 AM
Parent: #365

..


saif basheer،...
شكراً يا صديقنا في الغار،..
ولندن مركز توزيع مهم بالنسبة ليهم، حسب تصوراتي،..
بخصوص الدكترة، يا ريت العوجات من تالا القعاد للكتب، أريتها كان كدي، العوجة من جنس لآفة "قفة الملاح" حماك الله،...
يضحك نهارك وكن بخير،..
ولك منا الحب،..


..

Post: #367
Title: Re: إصلاح الكتابة في المنبر
Author: انور الطيب
Date: 02-06-2006, 11:56 AM
Parent: #366

الأخ محسن وجميع الأخوة المتداخلين ، كدي قبل ما نبدأ أخوكم وقع في غلط في المنبر كدة قضاء وقدر ، ان شاء الله عرفناها ونغالط فيها لكن مرات بنكتبها بالطريقة القديمة ، وبعد ما نرسل البوست ننتبه انو غلط ،
وشكرا يا محسن على السؤال ونحن فاقدنكم ولكن الله يعلم بنريدكم عديل كدة ولو في طريقة نكتب عرق محبة نكتبوا عشانكم ، وبالمناسبة دي عندي ود خالتي كان مولع بالعروق وحب البنات وحركات كثيرة وكان في ظنو واعتقادو العروق دي فعالة ويوم مشى للفكي جارنا في الحلفايا وقال ليه يا فكي فلان عايز لي عرق محبة هنا الفكي ضحك شوية وقال ليه يا ولدي والله المحبة دي لا دايرة ليها عرق ولا حاجة املأ جيبك الناس دي كلها بتحبك ......
ونحن جيبنا فاضي ومخلايتنا كمان لكن بنموت فيكم عديل كدة ولكم مني التقدير والمحبة

Post: #368
Title: Re: إصلاح الكتابة في المنبر
Author: محسن عبدالقادر
Date: 02-06-2006, 12:51 PM
Parent: #367

الأخ محسن وبقية الأحباب

كيف حالكم ؟؟؟؟؟؟؟؟

وعدت ( أنا ) بحضور دائم في مداخلتي السابقة
ولكنّي لم أف لا حبا في خلف الوعد ولكن لأمر لا أملك
دفعه ......................
ولقد عدت الآن وأرغب في إضافة أمر لم يذكر ( بضم الياء وفتح الكاف)
في الإجابة عن سؤال بشأن الأعداد

صحيح أن الأعداد من (3 - 10 ) تخالف المعدود تذكيرا وتأنيثا
ولكن يجب أن ننوّه إلى أنّ العدد ( 10 ) يخالف إن كان مفردا ( بمعنى
أنّه لم يركّب مع غيره ) مثل :- عشر تفاحات وعشرة أقلام
ويكون العدد (10) موافقا لمعدوده تذكيرا وتأنيثا إن كان مركبا مثل قولنا :-
إشتريت ثلاث عشرة تفاحة وثلاثةعشر قلما...

مع غالي الأمنيات

Post: #369
Title: Re: إصلاح الكتابة في المنبر
Author: محسن خالد
Date: 02-06-2006, 03:15 PM
Parent: #368

..


أنور الطيب،...
كيفنك، وحبابك،...
الله، عارف يا ود الطيب أخوي، أولاً ضحكت لامن ادردقت بالواطـة من كلام "الفكي –الفقيه" التفتيحة دا، يعني هَسَّع أنا تعبان ساي وعميت وشبت في صبينتي، دا كلو في درب "المحبة" خصوصاً "البنات"، يعني الواحد لو مشى اتعيّن "كوز" وألا "كوز وزير" كان الدرب أقصر ليهو من دروب الكتب البلاحد، لأنو قطع شك بملأ جيبو،..
عارف؟ الفكرة الوراء كدا هي "بيع الحب" كمُنْتَج "عروق" "عروس ذات مهر عالٍ"،... وإلخ
رحم الله "زمان النعيم ود حمد" والمغني خلف الله حمد:
بقول:
غنيت لدابي الرضيمة
وما بحوى علي البهيمة
"يا باب أبوي، النعيم درّاج المتامكة"
هيلك الشكرات قديمة
وما بشيل المال الفي القسيمة

عارف؟ بناتو بقسّمن ساااي، المال بكتبوهو في قسيمة زواج بناتو بس عشان الشرع، لكن هو الفرسان والشنحيب ما بدخل جيبو منو قرش واحد، ديل بناتو وما بضاعة، شايف الزول دا شكرو بـ"الوعي" كيف؟
"يا حليل الزمن داك" زمن: "البنيّة دي (دفعناها) ليك يا فلان"، طوالي تقودها وتمشي، مجاناً سااكت،..
من زماان الفكرة دي زانة في رأسي، لما لاحظت "بيع النضال" كمُنْتَج، أها العنصريين يكتلوا ستيف بيكو –مناضل الواقع- في السجن كما قُتل السهروردي خنقاً في سجون صلاح الدين الأيوبي، وتقوم هوليود "بالمكياج وكُتّاب السيناريو، تعمل من "دينزل واشنطون" الممثل البتسوَّق ساي بمليون دولار "ستيف بيكو آخر"، بطل سينما فـ"منتجات"، أو كأن يفقد جيفارا روحه الروح، وتُباع روحه الرسمة على "الفنايل"،..
مشيتي القريبة دي لجنوب إفريقيا، لمّن شفتها الفرسان ديل، صورن واقفة فوق مقابرن زي الجبال، بس فيما يعرف بـ"المتحف" أو المتنزَّه، والسياح يدخلوا بالقروش ويقرمشوا في التسالي ويبوسوا في حبيباتن، "النضال أصبح سلعة" والله يا أنور بكيت،..
ستيف بيكو والشهيد الطفل والتلميذ هيكتور بيترسون Hector Peterson و آشلي كريل Ashley Kriel وفيوزيلي ميني Vuyisile Mini وليليان نجوي Lilian Ngoyi.
لتتمجّد أرواحكم،..

كن بخير يا أنور الطيب

محسن عبد القادر،..
تحياتي يا رجل وكن بخير،..
وأريت عوجاتك كلها تتزلّل والمراد يكون في الليد،..
أنا طبعاً توقفت لدى الرقم (10) تقريباً، عشان يتسهل الموضوع بس، ولأنو القاعدة ما فيها مشاكل من الجهة التانية وبتتطابق من 13 --- 19، دي الفكرة،..
أها أخونا شنتير ما قصّر جاء ساق الموضوع من النقطة دي، وذكرها بالتفصيل والأمثلة، وهذا اقتباسٌ من مداخلته المعنية:
Quote: 2- الأعداد 13 و14 و15 و16 و17 و18 و19 .. هنا الجزء الأول من العدد المركب يخالف معدوده تذكيراً وتأنيثاً، أما الجزء الثاني (الـ 10) فإنه يطابق المعدود، تذكيراً وتأنيثاً
- انتخب الشعب ثلاثةَ عشرَ عضواً وثلاثَ عشرةَ نائبة
- اشتريت تسعةَ عشرَ بيتاً وتسعَ عشرةَ سيارةً آخر موديل وبدون لساتك، هدية لعادل بدوي
إذن المسألة كما قال أستاذنا محسن ما فيها لولوة كتيرة، لو كانت الأعداد مفردة أو مركبة.

تحياتي لك يا شريكنا في الاسم وفي المشولبة،..
كن بخير، أبداًً بخير،..

..

Post: #370
Title: Re: إصلاح الكتابة في المنبر
Author: Siddig A. Omer
Date: 02-06-2006, 03:37 PM
Parent: #369

محسن الحبيب

كان كلامك دها صح أنا مستنيك بفارغ الصبر بس ادينى ايميل على العنوان فى البرفايل تجدنى اتحرق شوقاً لهذه اللقية الطيبة و اسرتى الصغيرة ترحب بك فى الغار و اصدقاء الدوحة يصطفون لك يارمز الفخار و حاضرين......بلغة اللاحدود.....أهلاً و مرحب حبيب الغار......صديق ..الدوحة

Post: #371
Title: Re: إصلاح الكتابة في المنبر
Author: محسن خالد
Date: 02-07-2006, 01:44 AM
Parent: #370

..



كي داير آلشريف؟
أريتك دوام عافية وضراع كرم ممدود،...
كلامي دا صااح، بس ما قطعنالو يوم، علي مقالة حبوبتي، ومرحباً بغاركم وليحط كل الحمام بالخارج،..
كلامك دا كيّفني بالحيل، أنا ذاتي أشكّرك لما تقول بس، عشان أنا فخاري ذاتو جايبو من أهل المفهومية الزيك ديل، وأهل الذوق، لو في نعمة بحمد عليها سيدي، إنو كتابتي دي وازنة علي "أطوار الوعي الإيجابي"، (طور القارئ الخلاق أكتر من كاتب النص ذاتو" أي طور قبل كدا الله كافيني شرو من جودو وكرمو، سالم أبداً يا خلاق،...
كن بخير، ولا بد من أصلك إنت والرجل الحبّاب معتصم الطاهر، عارف؟ يوم هو جاء أبو ظبي ومعاه ود الحاج أنا كنت شايل شنيطاتي ومتوجه المطار، أها قلتلم بصلكم تب، إن بقيت حي،..

كن بخير، آلسيدي، وإن حيين نتشاوف،..

..

Post: #372
Title: Re: إصلاح الكتابة في المنبر
Author: Shinteer
Date: 02-08-2006, 03:49 AM
Parent: #371

تحيات معطرة لكل الأحباب وتحيات خاصة، أملتها العُشرة القديمة، لأخينا جعفر اسماعيل الزول الرايق (غايتو يا جعفر لو دعوات محسن ليك اتحققت العكاكيز بتتطاقش: إن شاء الله تكاويك حبيبتك، قول 2 آمين، واحدة بتاعة الجوامع والكنائس والتانية بتاعة عمك "راي شارلس"،..)، وللعزيز عادل البدوي الذي يعشق الآيرلنديين من ديرموت شورتول إلى ييتس .. ولشيخ الحلقة محسن. شغلتنا عنكم شواغل.

رمية عصاة: المُـــنادى

.......
......
..... الخ

Post: #373
Title: Re: إصلاح الكتابة في المنبر
Author: Adil Al Badawi
Date: 02-08-2006, 04:42 AM
Parent: #372

سلامات يا شباب،

حمداً لله على السلامة يا شنتير.

Quote: وللعزيز عادل البدوي الذي يعشق الآيرلنديين من ديرموت شورتول إلى ييتس

أظنَّك قاصد يعشق (تِلِقِّي حِجَج) الآيرلنديين من ديرموت شورتول إلى ييتس. بالله في (تِلِقِّي حِجَج) أكتر من إنًّو الواحد يسمي نفسو شورت تول، هسي شورت كَتْ ما أخير؟. دا كُلّو كوم والجِغّيم...الجِغّيم كوم براهو.
Quote: رمية عصاة: المُـــنادى
هسِّي الأستاذ يقول ليك المنادي ما نادى وحمار الوادي ما هنَّق.

حبابك.

Post: #374
Title: Re: إصلاح الكتابة في المنبر
Author: Gaafar Ismail
Date: 02-08-2006, 07:05 AM
Parent: #372

الحبيب شنتير

الحمد لله على السلامة يا زول .. قرّبنا نتخذ الإجراءات عشان نعرفك وين غاتس بعد غتستك الطويلة دي . غايتو أخونا محسن ما قصّر تب في غيابك .وما تحرمنا من إشراقاتك يا ظريف.
مع تحياتي وأشواقي.

جعفر

Post: #375
Title: Re: إصلاح الكتابة في المنبر
Author: محسن خالد
Date: 02-08-2006, 08:06 AM
Parent: #374

..


إزيكم يا عادل وشنتير،..
يا ود أشيقر أخوي، إنت صاحبك ود سماعين الحلو دا البحلني منو شنو؟
نوريك الطمسة يا Gaafar Ismail

...

Post: #376
Title: Re: إصلاح الكتابة في المنبر
Author: Shinteer
Date: 02-08-2006, 12:41 PM
Parent: #375

كل شيء ولا الإجراءات يا جعفر .. أبعدنا منها .. وأنا ببعدك من العكاكيز. كل شيء لازم يبقى سر مبلوع في جوف بير وواقع فيه الفيل.

يا محسن .. جعفر ده من أولياء الله الصاحلين عشان كده دايماً بيكون رايق وسابح في ملكوت الجمال والصفاء النفسي، بس قلل من دعواتك ليه .. خايفنّها تصدُق وبعد داك نبقى في توزيع الثروة والسلطة.

الــمـــــــــــــنادى .. لسع ما نادوه؟

Post: #377
Title: Re: إصلاح الكتابة في المنبر
Author: sudania2000
Date: 02-09-2006, 07:46 AM
Parent: #376

السلام عليكم
شنتير ليك وحشة

Post: #378
Title: Re: إصلاح الكتابة في المنبر
Author: محسن خالد
Date: 02-09-2006, 07:47 AM
Parent: #376

..

shinteer ،...
تحيات،..
حسيت بيهو صاحبنا جعفر دا، إنو زول حلو ورائق،..
بس عجبتني بتاعة تقسيم الثروة والسلطة دي، يعني إنت مستكثرين "مكاواة الحبيبة" دي علي مقاطعة جعفر القديمة وألا شنو؟
المشاكل دي كستوها براكم،..

...

Post: #379
Title: Re: إصلاح الكتابة في المنبر
Author: Shinteer
Date: 02-09-2006, 09:49 PM
Parent: #378

لا أوحش الله أمثالِك يا سودانية 2000. لسع في صراعك مع صفق النيم؟

يا محسن نحن خايفين على جعفر من الشلهتة ورقاد الواطاة لأن توزيع الثروة والسلطة هو حيمرق منّو كيت. الحل الوحيد هو إنك تدفر لي الدعوات دي بيجاي، أنا محتاج ليها. ده حل يرضي كل الأطراف.

يا عادل البدوي .. أظهر وبان.

Post: #380
Title: Re: إصلاح الكتابة في المنبر
Author: محسن خالد
Date: 02-11-2006, 07:35 AM
Parent: #379

..



sudania2000،..
وعليكم السلام،..
كوني بخير، أبداً بخير،

Shinteer،..
محتاج لدعواتي؟ أمانة عليك؟ أوَ ذلك لأنكم أهالي بدون حكومة، أم لأنكم حكومة وأهالي بدون ثروات؟
غايتو برقد ليك بالخيرة وما تهم،..



...

Post: #381
Title: Re: إصلاح الكتابة في المنبر
Author: Gaafar Ismail
Date: 02-11-2006, 09:01 AM
Parent: #380

شنتير أخوي

داير تنفرد بي دعوات محسن بـــــــراك ليه. يا أخي حبة بي هنا وحبة بي هناك ونكون تمام التمام

ويا شيخ محسن
مدد مدد يا شيخنا .. دعواتك أنا محتاج ليها أكتر من شنتير وما تنسى فوق ده كله أنا في بلد زلازل.

Post: #382
Title: Re: إصلاح الكتابة في المنبر
Author: محسن خالد
Date: 02-12-2006, 07:20 AM
Parent: #381

..

Gaafar Ismail

بالجد داير دعواتي؟ أعمل حسابك من الكرت الأحمر، محاومتك بهنا دي ساي بتكون ماخد فيها كم كرت أصفر،..

ما ظنيتها بلد الزلازل دي فيها حق لجوء عاطفي "سو" take care

Post: #383
Title: Re: إصلاح الكتابة في المنبر
Author: Adil Al Badawi
Date: 02-13-2006, 05:36 AM
Parent: #382

سلامات يا شباب،

سأل شنتير:
Quote: الــمـــــــــــــنادى .. لسع ما نادوه؟

ونُجيب: الأستاذ كُنَّا عاذْرِنُّو نَعَمِنُّو كانت عاضَّاهو كَرَبَة لكين حمار الوادي وحمير الدنيا دي كلَّها هَنَّقَتْ وزولك عامل أضان الهامل، بين البوستات، طرشا. غايتو، ما باقي إلا ننادي ليهو حمير الأدب (وقِلَّة الأدب) وحمير السياسة (وقِلَّة السياسة) عشان ينادي لينا المنادى المنشود:

سيدي الرئيس: أستدعي إلى منصَّة النهيق رئيس حزب الحمير كما أستدعي حمار (السوداني) بِشْر الحافي** وحمار (الألماني؟!) غونتر ديبرون (يا رَبِّي النَّضَمي دا صاح وألا اتلخبطت علي الكيمان) وأكان دا كُلُّو ما جاب نتيجة يبقى، على قول المصريين*، ما بِدَّهاش بقى.

*يعجبني في كلام المصريين، رغم أنف بشاشا، تعجباتهم من شاكلة: يا نهار إسوح!، يا ليلة مِشْ فايتة!، يا نهار زي بعضو!...الخ. أما التعجب البديع: "يا نهار مالوش ملامح!" فقد كان متربِّعاً على قمة قائمة التعجبات المفضلة عندي حتى أزاحه عنها التحوير العجيب للتعجُّب المعتاد في الأفلام الأمريكية وذلك عندما تعجَّب أحدهم قائلاً: Chesus AGE Christ
طبعاً تعجُّبات/استنكارات حبوباتنا وأمَّاتنا وأخواتنا عندي ليها chart براها لأنَّها فريدة (في عصرها) واختصارها فتأمَّلوا في: أجِيْ، بِسْ، يَخْسي وتشكيلة الأصوات الحنجرية التي أُستكثر فيها مجرَّد حرف يُكْتَب. أمَّا التعجُّب بعبارة "والله ياهو!" فأعتقد، غير جازم، أنَّ شعار موقع ياهو قد أمعن في إختصاره بأن حذف كلمة "والله"، ربَّما لأسباب دينية، وأبقى على ما بقي منه بما في ذلك علامة التعجُّب. هذا، لعمري، بابٌ أجدر بأن يفتح على مصراعيه في هذا البوست المُغْلَق بابه بأمارة الهَمَلة الظاهرة على فاتحه. اللهم هل بلَّغت، اللهم فاشهد. (وَشْ مازح وفي نفس الوقت مِتْحَيِّر أشدَّ الحيرة في الشهادة المفروضة فرضاً بغض النظر عن إجابة سؤال البلاغ)


** تعديل لإضافة تعليق اقتضته "الربكة": أعتقد أنَّ قصة "الحمار" لبشَّار الكُتُبي والله أعلم وصححونا بالله نَعَمِنُّو الدرب راح لينا في الموية عديل كدا. أما غونتر ديبرون فقد يكون كاتب الرواية "الحمار" وقد يكون الشخصية الرئيسية فيها وقد أكون قطعتو من راسي وقد يكون ألمانيا، نمساوياً، شيكياً، سولفاكياً....آآآخ ياخ. أمَّا بِشْر الحافي فقِصَّتو قِصَّة.

Post: #384
Title: Re: إصلاح الكتابة في المنبر
Author: Gaafar Ismail
Date: 02-13-2006, 10:06 AM
Parent: #382

محسن الظريف

أنا ما قاعد اتكلم في السياسة عشان كدا راقد قفا من أي كروت .

تحياتي

Post: #385
Title: Re: إصلاح الكتابة في المنبر
Author: منتصر حسن محمد
Date: 02-15-2006, 06:18 AM
Parent: #384

العزيز محسن خالد


كن بالف خير


تسلم من كل شر

ود زبيدة

Post: #386
Title: Re: إصلاح الكتابة في المنبر
Author: محسن خالد
Date: 02-15-2006, 02:13 PM
Parent: #385

..


Adil Al Badawi،..

كيفك يا رجل، وكن بخير،..
أخوك شوية داقشاهو حمى،..
ببقه طيّب وبجي عندي رأي أنزل بوست أتكلم فيهو عن واحدة صاحبة قلبي،..
دا كلام زول ميرود، أعفالينا


Gaafar Ismail،..
أحسن ليك والله، أنا زمان حاولت ولقيت نفسي بليد في السياسة، قمت اتلميت علي الحتة البعرفها،..


منتصر حسن محمد،..
تحياتي يا رجل، وكن بخير،..
وآمين لدعوتك دي، كان تشيل مني الحمّى،..
كن بخير،..


..

Post: #387
Title: Re: إصلاح الكتابة في المنبر
Author: Adil Al Badawi
Date: 02-16-2006, 00:39 AM
Parent: #386

سلامات يا شباب،

سلامتك يا أستاذ. أكان وِرْدَة نزلة كاتلها، بِتَّ العفنة، بالليمون الدافي...وثمار الفراولة. أو كما قال ذلك الأعرابي في شأن مكاتلة رمضان!

تحيَّاتي

Post: #388
Title: Re: إصلاح الكتابة في المنبر
Author: البعيو
Date: 02-21-2006, 11:26 AM
Parent: #1

up

تخريمة:
يا افلاطون .. الكتابة ليست لقيطا أعمى


بالنسبة لأفلاطون، الكتابة " لقيط ". أو هي نظام ابتعد عن الأب فأصابه اليتم، بمعنى أنها " كلام منطوق يحكي ذاتيا دون متكلم، فينسى أصوله ولا يبالي بالمخاطب " كما يحلل جاك رنسيير استخفاف عدو الكتابة الواضح والدائم بالحرف الذي يمضي متكلماً بطريقته الخرساء، لأن الكتابة، من الوجهة الأفلاطونية، كائن ميت لا قدرة له على المساجلة أو الذوذ عن مضامينه، وهي صيغة ساكنة لا روح فيها، فيما الكلام كائن حي له القابلية والقدرة على التفاعل مع الآخرين، والرد على المصادفات الحوارية.



كائن أعمى هي إذا، كما يتصورها ويصوّرها فلسفياً، أو هي آلة ضريرة لا تعرف وجهتها ولا لمن توجه محمولها، على عكس الكلام الذي يقوم على حيوية التدفق الحر للمعاني، والتماس المباشر بالمستقبل، بحيث يتحدد موضوعه بحضور عيني لمتلقيه، وهذا يعود إلى أنها - أي الكتابة - تدبير ذهني بطيء الحركة، معني على الدوام بتكرار مضامينه دون مراعاة لشروط الإرسال والتلقي، إذ توصل محمولاتها إلى من يعيها ومن لا يستوعبها دون مراعاة للفوارق بين المستقبلين، فيما يجدد الكلام مضامينه، وينوّع على رسالته، تبعا للمقام الذي يقال فيه، بحيث يساق لمن يفهمه، ويحجب عمن لا يدرك مراميه.



بهذا الحماس الفلسفي، المتأتي من غرم بالمحاورات الكلامية، يجادل ثنائية ( الكلام/الكتابة ) ليعلن قناعته بجدوائية الكلام بما هو المنشط الحيوي لفعل التذكر، وازدرائه للكتابة، بما هي " آفة الذاكرة " فهي، برأيه، قاصرة دائما، وبحاجة إلى مؤلف يرعاها، ويدافع عنها، أو يدرأ عنها أخطار الفهم والإفهام المحدقة بها، لأنها وسيلة عقيمة لا حجج لها، ولا براهين بين أيديها، أما الكلام فهو سيد نفسه ومرجعها، قوته وانفعاله في ذاته وبها، وهو قادر على تأييد منطقه بحجج يستمدها من السياقات المستجدة أثناء المحادثة، ولا يحتاج إلى مرجع سواه أو إعانة برانية، وعلى عكس الكتابة المجبولة على الصمت الإضطراري، يستطيع الكلام تدارك ذاته على الفور وتصحيح نفسه.



من هذا المنطلق التفاضلي يرى أن المجد للفنون الكلامية، ويؤكد على سذاجة الفنون الكتابية، فهي بلا قيمة يمكن التعويل عليها، بل ولا يعتد بها. ولكن رغم الهجاء الواضح والدائم في خطابه إزاء الكتابة وتمجيده للمشافهة، إلا أنه لا يحط من قيمة الكلام المكتوب ويتهابط به إلى مرتبة أدنى من الكلام الناطق الحي، إنما يجلو عبر نصه الإشكالي إزاء الكتابة، حسب رنسيير، ازدواجية الركن الأساسي في مفهوم الكتاية ذاته باعتبارها من بعض " أنظمة الكلام " لأن الكتابة ليست مجرد رسم أشكال مقابل النطق الصوتي، بل عرض مشهود فريد من نوعه لفعل الكلام الناطق، بمعنى أنها شر لا بد منه، ولذلك وصمها بما يسميه " الفارماكون " في إشارة إلى مكونها البنائي المركب من السم والترياق في آن.



إذا، الكتابة كما يعتقدها، لا تتمتع إلا بعلاقة مشوهة مع الحقيقة، لأنها تفتقر إلى الصوت الذي يمتلك صلة جوهرية مع الحياة وليس الكتابة وحسب، فالتماس هو مع صورة الحقيقة وليس مع جوهرها، على اعتبار أن الكتابة " ذاتية التوجه " أو " غير متعدية " الأمر الذي يجعلها بمنأى عن صفاء الصوت، غريبة عن النفس لأنها تفد إليها من خارجها، فيما الكلام نسيبها لأنه يستوطنها، وعليه فإن الكتابة قاصرة عن الإفصاح عما تكنّه أما الكلام فإنه بارع في الإفصاح عما يتضمنه من مقاصد، لأن حياته متأتية من كونه ساكن النفس فهو جزء منها وحياته من حياتها، وهو يتجدد بتجدد النفس والصوت.



ذلك بالتحديد ما أراد جاك دريدا تفاديه من الكتابة العاطلة، وذلك في مجادلته للوحدة الأصيلة بين الصوت والكتابة، مقراً بأن الكتابة إضافة متطفلة على الكلام، ولكنها تلتصق به لتسد نقصه أحيانا، متماهيا مع ما أومأ إليه أفلاطون من امتياز للكتابة. وبموجب هذا الإستدراك الفلسفي فصل بين كتابتين. كتابة حسنة طبيعية، منبثة من خط إلهي في القلب والروح، وثيقة الصلة بالصوت والنفس، وتجهد لمفارقة الكتابة الرديئة التي يتم تدبيرها من الخارج، أو ما يسميه الفاحش، المصنّع، التقني، المنفي في برانية الجسد.



إذا، الإشكالية لا تكمن في المفاضلة بين الكلام والكتابة، ولكن في " أنظمة الكلام ". أي انتاج شكل من أشكال التواصل الذي لا يؤدي إلى كتابة " لا مقروءة " كما يصف رولان بارت ذلك الشكل البطيء والمفتعل من الكتابة، وربما لهذا السبب بالتحديد طالب بالتراجع إلى ما يسميه " درجة الصفر " في الكتابة حيث يتم تدمير علاقات اللغة والعودة بالإنشاء إلى محطات الكلام في الكتابة، إي إلى كتابة شعائرية، وثيقة الصلة بالصوت المقدس الداخلي، صوت الإعلان الإيماني، الصوت الذي يسمعه المرء عندما يفيء إلى ذاته، أي بالحضور المليء والحقيقي للكلام الإلهي الموجه إلى الشعور الجواني.



الإقتصادية – الثلاثاء 21 فبراير 2006

المصدر
http://www.m-alabbas.com/index.php?&PHPSESSID=97eac8d39...d85b3615ccdca9097982

Post: #389
Title: Re: إصلاح الكتابة في المنبر
Author: Adil Al Badawi
Date: 02-22-2006, 05:55 AM
Parent: #388

سلامات يا شباب، الحاضرين منكم والمسجِّلين غياب

ورد، فيما نقل البعيو، أن:
Quote: ...وبموجب هذا الإستدراك الفلسفي فصل بين كتابتين. كتابة حسنة طبيعية، منبثة من خط إلهي في القلب والروح، وثيقة الصلة بالصوت والنفس، وتجهد لمفارقة الكتابة الرديئة التي يتم تدبيرها من الخارج، أو ما يسميه الفاحش، المصنّع، التقني، المنفي في برانية الجسد.

وقد صادف القول أعلاه أنَّني أتأمل كثيراً هذه الأيام في قول الأستاذ محمود محمد طه
Quote: ... الإستقامة هي الوجود الكامل، الذي لا يتوزعه الوهم بين ماض إنقضى، ومستقبل غائب، لما يحن حينه بعد ـ فالإستقامة هي العيش في اللحظة الحاضرة ... فأنت، إذا إستطعت أن تعيش في اللحظة الحاضرة، مشتغلاً بتجويد الواجب المباشر، من غير أن تذهب نفسك، أسفاً على الماضي، ولا خوفاً من المستقبل، فإنك تكون قد وفقت إلى سر الحياة الأعظم، حيث تستمتع بكمال حياة الفكر، وكمال حياة الشعور...

فرأيت أنَّ الأمرين اجتمعا على أمر قد قُدِر!. فهمي لسر الكتابة الحسنة أقرب إلى فهمي لسر الحياة الأعظم كما هو عند الأستاذ محمود من حيث إنَّها مزيج بين انتاج لكامل حياة الفكر/العقل وكامل حياة الشعور/القلب وهو أمر، بتوظيف لقول الأستاذ محمود، يجعلني أتوكَّل على الحي الذي لا يموت وأصف الكتابة الحسنة بصفة "الكتابة المستقيمة" ومن ثمَّ أمثِّل على "الكتابة المستقيمة" بكتابة ماركيز من حيث إنَّها، كواقعية سحرية، تمزج "كامل" حياة الفكر/العقل/الواقع بـ"كامل" حياة الشعور/القلب/الخيال وربَّما ذلك ما جعلني، أيام القراءة المجيدة، مهووساً بكل كتابة ترتقي أعلى درجات سلم الواقعية السحرية.

أجد الكتابة (المستقيمة يعني) حياة وما ذلك إلا لأن للحياة (إذا وفِّقْتُ إلى فهم قول ييتس في أعلى أعلاه) مراحل ثلاث: الأحلام فاعتيادية الواقع فالذكريات الدائرة في فلك ذلك. أي أنَّ الحياة مزيج من الواقع والخيال وكذلك هي الكتابة التي ترقى لمستوى الحياة، على الأقل عندي، مزيج للواقعية بالسحرية.

لا هااااا، الدُرَّابة دي بولوا فوكَّا من دَرِبْكُم دا.

وتقبَّلوا تحيَّاتي

Post: #390
Title: Re: إصلاح الكتابة في المنبر
Author: AMNA MUKHTAR
Date: 02-22-2006, 06:16 AM
Parent: #1

الأخ الأديب.. سى محسن


ذكرتنى أستاذ اللغة العربية

فى الجامعة الأمريكية (القاهرة )


خلانا نحس انو نحن ما بنعرف عربى

خاااالص .

Post: #391
Title: Re: إصلاح الكتابة في المنبر
Author: محسن خالد
Date: 02-27-2006, 10:01 AM
Parent: #390

..


البعيو،..
شكراً على هذا المقال، والوقوف عنده يطول،..
ولك محبتي،..

ود البدوي،..
إنت قلت كلام سمح بالجد،..
ومبروك،..


AMNA MUKHTAR ،..
تحياتي..
تعال بس بهنا،..
أتونسوا معانا،..
وكلنا بنطلع بحاجة،..
كوني بخير


...

Post: #392
Title: Re: إصلاح الكتابة في المنبر
Author: Siddig A. Omer
Date: 03-09-2006, 04:15 PM
Parent: #391

أها الكلام بقى جد... لا أزيع سراً .... كلنا واقفين صف.....

Post: #393
Title: Re: إصلاح الكتابة في المنبر
Author: Adil Al Badawi
Date: 03-18-2006, 09:47 AM
Parent: #392

سلامات يا ناس ناسيانا*،

البوست دا مالكم قِنِعتو مِنُّو؟ عجاااااايب.

*أتكلَّم بلسان حال البوست نفسه.

Post: #394
Title: Re: إصلاح الكتابة في المنبر
Author: معتصم الطاهر
Date: 03-21-2006, 04:31 PM
Parent: #1

جئنا لنتعلم

فارفعوه عاليا..

Post: #395
Title: Re: إصلاح الكتابة في المنبر
Author: محسن خالد
Date: 03-22-2006, 02:48 AM
Parent: #394

..


Siddig A. Omer،..
تحايا،..
ياخي إنت وين، يمين فاقدك،..
كن بخير،..

Adil Al Badawi،..
إزيك،..
أمس افتكرتو وبعض الناس ناقشوني،
شعرت بشوية حماسة قلت أشتغل،..
بس المزاج خليهو ساي
كن بخير

معتصم الطاهر،..
تحياتي يا عزيز
وتسلم


...

Post: #396
Title: Re: إصلاح الكتابة في المنبر
Author: Shinteer
Date: 03-22-2006, 04:00 AM
Parent: #395

قبل كل شيء .. سلامات غليدة للجميع.

ظننت أن هذا البوست قد اختفى وأصبح ارشيفاً. الحمد لله على سلامته.

يعني لسع ما قنعتو مِنُّو؟.

إيدك يا محسن. ووينك يا ود البدوي؟.

وإلى لقاء

Post: #397
Title: Re: إصلاح الكتابة في المنبر
Author: محسن خالد
Date: 03-22-2006, 04:58 AM
Parent: #396

..

Shinteer،..
إزيك يا ود أشيقر أخوي،
كويس إنك جيتنا بقداحة السلام،..
مشتاقين

...

Post: #402
Title: Re: إصلاح الكتابة في المنبر
Author: Gaafar Ismail
Date: 03-23-2006, 11:09 AM
Parent: #397



أعزائي محسن وشنتير

أسعدني ظهوركما بعد غياب طويل

قلت أسجل مرور وأسلم عليكم وفي انتظار إشراقاتكم.

تحياتي وفائق احترامي

جعفر

Post: #398
Title: Re: إصلاح الكتابة في المنبر
Author: nashaat elemam
Date: 03-22-2006, 05:23 AM
Parent: #396

معليش يا استاذ..
امس والايام القبال امس.. كنت مساهر..
عشان كده ما جيت الليله.. والأيام القبل الليله بدري

اهو جيت وبديت انقل من زملاني.. ويلا واصل درسك

Post: #399
Title: Re: إصلاح الكتابة في المنبر
Author: Adil Al Badawi
Date: 03-22-2006, 06:04 AM
Parent: #398

سلامات يا شباب وبركة الشفناكم طيبين،

يا محسن المزاج ما يكون لَفَخو صندوق من صناديق المتاجرة بالأسهم الخليجية وألا السعودية خلاهو كَتْل أمِس.

شنتير...يا شنتير يا حريف رمتني بدائها وانسلَّت. ياخي نحنا روحنا انسلَّت نحاحي في البوست دا من ضُلْ لي ضُل وتجي، بي عين قوية، تقول لينا:
Quote: إيدك يا محسن. ووينك يا ود البدوي؟.

والله ياهو!

ويا نشأت يعني كلامي القاعد فوق راس الصفحة لامن أعول دا متغابي فيهو العِرْفة وألا شنو. أنْكُت المقال وجيبو لينا هنا أكان يحرِّك البوست دا شوية وأكان دايرنا نكلِّم ليك أبوك كمان قول لينا عشان نكلِّمو.

تحيَّاتي ونصيحة لوجه الله: أكان عِنْدَكم قريشات خايفين عليها صُرُّوها بَسْ وكرِّبو الصُرَّة بي تِكَّة السِرْوال...وأكان زول قال ليكم استثمروا إن شاء الله في صندوق بيرة، قولوا ليهو تُبْنا بَسْ.



Post: #400
Title: Re: إصلاح الكتابة في المنبر
Author: nazar hussien
Date: 03-22-2006, 01:09 PM
Parent: #399

يا ود اشيقر ...صاحبي في المرعي والجخانين والسلب ماك طيب...تاوقت ما لقيتك علا هنا
قلت اسلم عليك...


اما محسن خالد...يا زول خليتيني باري الحجرة ...يا بتاع الكتب انت...مافي شيمة
ما اتذكرتها ...تتلوي لامن ربك يغفر لها وتمشي...لكن كتّاب ...جنس كتابة...ومطرطش
طرطشة...آخرها ما بتلحق تب...

غايتو ربنا اكرمني بي قرايتك...وان شاء الله...معارض الكتب لا تفوت لا تنقطع...
وانت تزيد في طرطشتك دي...وشكرا جزيلا علي هذا الابداع المتعة...

Post: #401
Title: Re: إصلاح الكتابة في المنبر
Author: خضر حسين خليل
Date: 03-23-2006, 09:20 AM
Parent: #1

في زحمة الشغل إتزكرت بلا مناسبة أنو ما إشتريت جريدة الصحافة يامحسن (تنقش تنقش تنقش ) مشيت علي بتاع المكتبة بالله لو سمحت ياربيع أديني جريدة الصحافة قال لي يازول علي الايمان جريدة الليلة دي فيها كلام عجيب كاتبو فضيلي جماع عن (الروائي محسن خالد) قلنا خير وبركة لقيت ياصاحبي في البداية صورة ماعندها أي علاقة بمحسن خالد العندو تلاتة شعرات ومحشش بيها . الكلام كان جميل وسلس قريتو وأنا واقف علي أمشاطي عن كلب السجان والرقيب الاتحول بقدرة قادر لكلب والكلب الاتحول بقدرة الاستبداد لي رقيب . ياسلام يامحسن كان نفاج سمح يشوف بيهو الواحد مستقبل الرواية السودانية بالله ياخينا واصل في مشروعك وأمسك فيهو بالحيل والتوزيع خلي لي ولي ربيع وبالمناسبة بهديك تحاياهو تحية تحية وشوق شوق .

سلام يامحسن يافنان


خضر

Post: #403
Title: Re: إصلاح الكتابة في المنبر
Author: Shinteer
Date: 03-23-2006, 03:03 PM
Parent: #401

Quote: لقيت ياصاحبي في البداية صورة ماعندها أي علاقة بمحسن خالد العندو تلاتة شعرات ومحشش بيها

الأخ خضر، تلاتة شعرات بس؟ الزول ده شعَرو انحَتَّ متين؟. أكيد الصورة الانت شفتها دي صورة زول تاني.

الأخ من زمان عادل ود البدوي، يعني مستكتر علينا مناشدة محسن؟ نحن لينا أجر المناشدة وانت ليك أجر المجابدة .. مجابدة البوست عشان ما يضرب الدلجة.

الابن قعفر إسمائيل كيف حالك مع الدنيا؟ إن شاء الله تكون لقيت ليك كاواي كانوجو لزوم الترفيه .. ترفيه السمبرية أكّالْة العيش بالدس. يا أبودريس من البوليس؛ أعمل حسابك.

وييييييييييين يا نزار الذي كان وسيكون زميل النهيض. الشوق تَعّال وشخاتير: وفوق كارتوت شخيتيراً تخيِّن خرَّ.

Post: #404
Title: Re: إصلاح الكتابة في المنبر
Author: Adil Al Badawi
Date: 03-25-2006, 06:41 AM
Parent: #403

سلامات يا شباب والبوست دقَّ الدلجة رغماً عن تحذير شنتير

وبعدين يا شنتير تقول:
Quote: نحن لينا أجر المناشدة وانت ليك أجر المجابدة ..

لا وإنت الصادق ليكم أجر المناشدة ولينا مناهدة جهد المجابدة. تراكا تتذاكى ساااي آتاناكا سان.

وبعدينين ياخي سَمَع الشقية دي، والشقية ما سديناها، قالوا الواحد عندكم الأيامات دي يكون مِنْجَعِصْلو في قهوة وألا شيتاً زيَّها وتكون واحدة مصنوعة خصيصاً عشانو واقفة فوق راسو تخدِّم عليهو ولا هارون الرشيد في زمانو...قاتل الله الجابانيز كوميك بوكس ياخي. دحين كومك في شغل الكوميك بوكس دا قَدُر شنو؟!

لا هااااا، بلد طلب العلم بي غادي للصين فارقت الدرب يوم فارقناها...وألا يا ربي هي أصلاً مفارقة الدرب؟!

Post: #405
Title: Re: إصلاح الكتابة في المنبر
Author: عبدالرحمن عزّاز
Date: 03-26-2006, 08:39 AM
Parent: #404

*****

Post: #406
Title: Re: إصلاح الكتابة في المنبر
Author: محسن خالد
Date: 03-28-2006, 02:44 AM
Parent: #405

..



Gaafar Ismail،..
أسعدنا مرورك،...
والأمنيات أجملها لك،..
وكن بخير يا عزيزنا،..
فقدناك

nashaat elemam،..
إزيك يا ولدي،..
خلاص خليني بس أسرق لي ضحوة وأجيكم،..
أنا ذاتي بديت أشعر بالعطالة وقل الشغلة،..
إلا الأيام معاي بهنا ضنك،..
ما تملى هين،..

Adil Al Badawi،..
كتير مشتاقين يا زول،..


nazar hussien،..
باري الحَجْرة يا زول، وملفّات النيل ومطباتو،..
وماك طيّب وكيفنّك،..
معارض الكُتب دي ياها عيدنا، بالله تلقاني فرحان كيف، تقول ولدوا لي بت جديدة،..
برضي ربنا أكرمني إنو ناس أذكياء يقروني،..
تاني قدر ما تحوم في معرض كتب، بالله أرفع كتاب وأتذكر روح ود خالد في البرية وقول:
في صحتك،..
وكن بخير

خضر حسين خليل،..
أول حاجة سلّم علي ربيع، والسلام تاني ليك
كلام فضيلي دا أنا فرحني شديد والله، كم رسالة موبايل وصلتني بتعلّق عليهو، وكم إيميل،..
غايتو الصورة ما عرفتها ياتها، شكيتن علي الله ناس الصحافة كان دايرين يخربوا سوقنا الأصلو مخروب،..
يا زول كما يقول صاحبنا ود أشيقر: يدوم بهاك،..
وكن بخير،..


Shinteer،..
يا ود أشيقر أمانة ما مشتاق ليك، وأمانة ما فاقدك،
ناوي المعاودة المرة دي بالصح، رغم ما تعرف من سوء الأحوال
غايتو يباصرها ربك الله براهو، من جودو ومن كرمو،..


Adil Al Badawi،..
ميزة البوست دا يا ود البدوي إنو بوست خدمة، وداير الناس تشمّر ضرعاتها،..
دورو فيهو إنت والأخوان هنا وود أشيقر دا ما بقصّر،..
إن ربنا طلق ضراعي المرة الجاية بجيكم بكتابة،
أها مشتاقين، تاني
وربنا يخليكم،..
بالجد البوست دا عاجبني، وناسو كمان، محل هااادي، وجميل، ونضيف،..
حبة علم من فلان وشويتين علم من فرجكان، وونسة هادية وسمحة ولا تبعد كثيراً عن المعرفة، وتقوم بوسط الحب تماماً ومن روحه،..
الله يخلي البوست دا ويغطيهو،..
لأنَّه مبرأٌ إلا من غرض الحب ونور المعرفة،..

ويخليكم ربي جميعاً ويغطيكم


عبد الرحمن عزّاز،..
تحياتي يا رجل،..
وأريتك بالسلام وبيوتو،..
كن بخير


...

Post: #407
Title: Re: إصلاح الكتابة في المنبر
Author: gessan
Date: 03-28-2006, 04:21 AM
Parent: #1

"الله يخلي البوست دا ويغطيهو،..
لأنَّه مبرأٌ إلا من غرض الحب ونور المعرفة،.."

أها كان كدي عليك الله ما تنسوا تغشوا معاكم البوست دا :

ألبِـــل: دوبيـت ..سَـمَع.. ومحاولات في الشــوف ..


مع التحايا للجميع ..




----------
وما تنسى سلامي لي ناصر بالله ..

Post: #408
Title: Re: إصلاح الكتابة في المنبر
Author: saadeldin abdelrahman
Date: 03-28-2006, 05:14 AM
Parent: #1

سلام يا محسن اخونا

Post: #409
Title: Re: إصلاح الكتابة في المنبر
Author: محسن خالد
Date: 03-29-2006, 02:44 AM
Parent: #408

.


gessan،..
قيسان العريس،
إزيك،..
بنحوّد بهناك، ولا يهمك
والهلبوس بسلِّم عليك،..
الأيامات دي هو عامل فيها مهم ذاتو،..
بجاي بجاي باصرنالك منو رد سلام
كن بخير،..



saadeldin abdelrahman،..

وليك السلام، والرحمة
تحياتي يا أخانا،..
وكن بخير،..

...

Post: #410
Title: Re: إصلاح الكتابة في المنبر
Author: Shinteer
Date: 03-29-2006, 10:28 PM
Parent: #409

Nonsensical Digression


The End of History and the Last Man.0
I mean the Death of Languages and the Last Verb.0
The Emergence of Pidgins and Ad Hoc Lingua Francas.0
The Clash between Globalization and Glocalization.0
A Host of Conundrums to Follow.0

Sleepy


Post: #411
Title: Re: إصلاح الكتابة في المنبر
Author: Adil Al Badawi
Date: 03-30-2006, 01:20 AM
Parent: #410

سلامات يا شباب،

قال شنتير:
Quote: Nonsensical Digression

ونقول: بالعكس، في السِلِك. أي، موضوعي وتايملي.

كنت أشاهد تحقيقاً تلفازياً صباح هذا اليوم ولم تعلق بذهني عبارة في ذلك التحقيق المثير أكثر من عبارة conversation prostitution حمانا الله وإيَّاكم.

وبما أنَّ حادي ركب هذا المكان قد قال بما وهبه الله من عضمة لسان:

Quote: ...وونسة هادية وسمحة ولا تبعد كثيراً عن المعرفة،...

فإنَّه يحق لي أن أهديكم التحقيق المعني ويمكنكم ربطه ما شاء الله لكم بمحاولتي لـ "استجلاب" بعضٍ من معرفة عمَّن يقفن خادمات، على رؤوس الأشهاد، على رؤوس الآلاف من النماذج الحديثة لهارون الرشيد* في بلدٍ تصرف فيها مبالغ خيالية للحصول على ترفيه "خيالي".

التحقيق الصحفي هنا: http://abcnews.go.com/2020/International/story?id=1624832&page=1

تحيَّاتي لكم أجمعين

* هل كان هارون الرشيد كما أزعم؟ الله أعلم.

Post: #412
Title: Re: إصلاح الكتابة في المنبر
Author: محسن خالد
Date: 03-30-2006, 05:05 AM
Parent: #411

..


يا ود أشيقر وود البدوي، كيفنّكم؟

...

Post: #413
Title: Re: إصلاح الكتابة في المنبر
Author: Shinteer
Date: 03-31-2006, 12:16 PM
Parent: #412

Quote: conversation prostitution

كيف حالك يا ود البدوي. التسمية التي أطلقها من أطلقها في ذلك البرنامج تسمية دقيقة للغاية. معظم النشاطات الليلية التي تقدمها أمثال المرحومة الخواجية تنضوي تحت هذا النشاط المسمّى أعلاه. واحدة أو أكثر مقابل كل زبون. يشرب ويشربن معه من حر ماله، والكلام هو الجائزة الوحيدة خلال الجلسة المخملية هذه. لكن تِحِت تِحِت في فخامات بتقدر تجني بعض الرحيق.
أهلك الـ Yakuza هم المتحكم الأول والأخير في شئون هذا النوع من التجارة. ومدخلات انتاجهم مستوردة في مجملها؛ من الفلبين وبعض أوروبا الغربية، وأوربا الشرقية وحطام الاتحاد السوفيتي. عالم مظلم لا يعلم أسراره غير مجموعات الـ Yakuza، والله أعلم. وأنت تعلم هذه المجموعات وسطوتها.
أظنك قرأت الرواية: Memoirs of a Geisha وهذه تحكي عن عالم ياباني خالص تنطبق عليه نفس التسمية المقتبسة أعلاه. حوانيت Roppongi وما شابهها حوانيت لعرض البضاعة الأجنبية وقليل جداً من الإنتاج المحلي.
العالم السفلي عالم مخيف وغامض، وبعض "المطلّشات" أغراهن الين ودخلن في جب لا قرار له .. A black hole
ياخي بالمرة كده فتش لرواية عن العالم السفلى (غير الشرير) اسمها Pink Samurai ستجد متعة فيها، ما دمت تبحث عن "الجُّغُب" المطمور تحت ظاهر الحياة.

وينك يا محسن؟ الله ما طلق إيدك لسع؟.

الزول الفنان عبد العزيز قيسان .. ليت لي موهبتك ففي رأسي صور متداخلة لا حصر لها من وحي تلك البيئة. دخلت البوست المعني ولم أسمع شيئاً. الظاهر في مشلكة ما قدرت أعرف مصدرها. وعمنا الصديق ود عباس، الله يديه الصحة وطولة العمر، زول فريد في غناه وفي ونسْـتـو وللأسف ما قدرت أسمع الغنا النزّلتو انت هناك.

إيدكم.

Post: #414
Title: Re: إصلاح الكتابة في المنبر
Author: محسن خالد
Date: 04-02-2006, 08:16 AM
Parent: #413

..
shinteer،...
ود أشيقر أخوك مزنوووق، وكيفك إنت؟ نادي صاحبك ود سماعين وما تقصروا،
وينك يا جعفر؟

..

Post: #415
Title: Re: إصلاح الكتابة في المنبر
Author: Adil Al Badawi
Date: 04-03-2006, 01:58 AM
Parent: #414

سلامات يا شباب ومشكور يا شنتير،

لقد قلت:
Quote: أهلك الـ Yakuza هم المتحكم الأول والأخير في شئون هذا النوع من التجارة. ومدخلات انتاجهم مستوردة في مجملها؛ من الفلبين وبعض أوروبا الغربية، وأوربا الشرقية وحطام الاتحاد السوفيتي. عالم مظلم لا يعلم أسراره غير مجموعات الـ Yakuza، والله أعلم. وأنت تعلم هذه المجموعات وسطوتها.

وقد علمت أيضاً أنَّ ال Glocalization قد أُبْتُدعت، أول ما أُبْتُدعت، في بلدٍ فيه أهلك الـ Yakuza هم المتحكم الأول والأخير وهذا يفسِّر كلاشٍ بين Globalization و Glocalization لا يسمع فيه أي جعجعة لـ"كلاشن" ودونك قصة/غصة أوكيناوا. على ذكر أوكيناوا، هل أنت مغادر مع أول الطيور، أو آخرها، المغادرة أوكيناوا؟! ما تتعب نفسك إذ ليس الغربة بأوكيناوا التي تغادرها بأسوأ من تلك بأوكيناوا التي تغادر إليها.

يا محسن، طيبين والله اللهم إلا من وقوعنا في براثن ياكوزا الدوام والدوام، على أي حال، لله أو، على قول المغني، الذي كذب ولو صدق والعكس صحيح: ما دوَّامة، الله هوي، الدنيا ما دوَّامة. الدوَّامة الصحي صحي إنَّك تقع في براثن ياكوزان السودان. إنت، كيفنَّك؟

تحيَّاتي لكم أجمعين.

Post: #416
Title: Re: إصلاح الكتابة في المنبر
Author: Shinteer
Date: 04-03-2006, 06:21 PM
Parent: #415

كيف يا صحاب يا مشغولين خالس.

تعرف يا محسن ويا ود البدوي بتاع الياكوزا إني قريت موضوع لطيف، يعني خفيف على المعدة، كاتبه الأخ هشام آدم عن اللغة الجديدة. وهذا موضوع يمكنكم الإفتاء في شأنه. أما أنا فبعد قراءة موضوع البوست تذكرت المرحوم جورج أورويل وحكاوي 1984 وما جاء فيها من لغة جديدة مصنوعة خصيصاً لخدمة النظام وشيخها الـ Big Brother.
Newspeak وما أدراك ما الـ Newspeak. فكرة من وحي الجنون.

Post: #417
Title: Re: إصلاح الكتابة في المنبر
Author: محسن خالد
Date: 04-04-2006, 05:52 AM
Parent: #416

..

ود البدوي، وود أشيقر،..
ما زلتُ مشغولاً،..
عساها أيامكم منوّرة وطالقة إيدكم،..
شكلي بقيت خلاص ما زول خدمة، وبطني طاامة من روحي دي أول شيء،
بالمهلة بنجي،..
كايتو التراب في الزلَق وساو الحُفر،
لامن ندودرها من هَوْ لي هَوْ


...

Post: #418
Title: Re: إصلاح الكتابة في المنبر
Author: Shinteer
Date: 04-04-2006, 06:58 AM
Parent: #417

Quote: كايتو التراب في الزلَق وساووا الحُفر، لامن ندودرها من هَوْ لي هَوْ

والله ده كلام زول معايش والمعايش جبارة. نحن بنحرْبِس ليك في الميس هنا يامن تجينا معقِّب سالم وغانم.
يا أخانا الذي هو جعفر ود سماعين .. أين أنت يا أخي؟.

الأيام دي كاتحاني موجة نعاس شديد بالحيل والدكتور الكضاب قال إنه ده شيء طبيعي في فترة ريعان الشيخوخة!!! شيخوخة شنو؟ أنا أشخشخ؟ أنا عبَّك آ الله.
يا الله تجيب جعفر ود سماعين يسند الحاحاية دي ما تقع.

Post: #421
Title: Re: إصلاح الكتابة في المنبر
Author: Gaafar Ismail
Date: 04-04-2006, 07:31 AM
Parent: #418

العزيز شنتير شيخ العرب

كيف حالك ولعلك بخير وعافية .

والله يا ود إشيقر مشتاقين شديد ومعليش على التأخير في الرد .. أخوك كان مزنوق شديد مع الجري ورا الرزق .

الربيع بدأ من أول أمس وبعد داك الجو يحلو والشافني حايم في (شيبويا) ما كضّب والصقيع كان حابسنا في البيوت .

يا اخوي شيخوخة شنو البتتكلم عنها ، إنت ما شاء الله لسه شباب تهز وترز، والحاصل ليك هضربة وأضغاث أحلام ليس إلا .

تحياتي

Post: #419
Title: Re: إصلاح الكتابة في المنبر
Author: Gaafar Ismail
Date: 04-04-2006, 07:12 AM
Parent: #414

العزيز محسن اللذيذ

سلامات

أنا ذاتي كنت مزنوق زنقة الكلب في الطاحونة ، وأخونا ود إشيقر أكيد عارف حال البلد هنا، لكن سؤالك عن حالي خلاني أرتاح شديد . الله يديك العافية. خليتك بعافية وخليني أمشي بغادي أشوف ود إشيقر عامل كيف.

Post: #420
Title: Re: إصلاح الكتابة في المنبر
Author: Adil Al Badawi
Date: 04-04-2006, 07:31 AM
Parent: #419

Quote: والدكتور الكضاب قال إنه ده شيء طبيعي في فترة ريعان الشيخوخة


إياهم دكاترتكم البداوو بالكتاب ديلاك وألا دكاترتة تانيين؟

أكان شكيت ليهو يفتح الكتاب، أكان داير يسويلك فَحِص يبحِّر في الكتاب، أكان داير يكتب لك دوا يكتبو من الكتاب...

أرقد قفا آشنتير، أرقد قفا...بَس أكان سويتلك شافع شافعين يحصحصولك راسك وإنت راقد قفا برضو حكمة نعمنو كتاب جماعتك ديل مرَّات مرَّات كدي بِصْدِق.

Post: #422
Title: Re: إصلاح الكتابة في المنبر
Author: Adil Al Badawi
Date: 04-05-2006, 02:05 AM
Parent: #420

Quote: أنا عبَّك آ الله.

وهذا ضربٌ من ضروب حسن الظن بالله وحسن الظن بالله هو المرادف الديني للتفاؤل والتفاؤل هو أكثر ما يحتاجه الانسان وهو يخطو أول الخطوات في طريق الشيخوخة وطريق الشيخوخة نهايتو تدعو، في أحسن الأحوال، لتشاؤل براهو. برااااك مشيت تبحِّت!

يا زول ما تشيل هم قلنا بس نستلف "حنكولك" نلكز بيهو البوست دا نرفعو.

Post: #423
Title: Re: إصلاح الكتابة في المنبر
Author: محسن خالد
Date: 04-05-2006, 05:54 AM
Parent: #422

..


Shinteer،...
يا زول خليها ساي، غايتو لو كنا بناكل قش كان قصدنا صعايد بلدنا،
وضربنا المكاتب بالرعية، ونجي راتعين سماان، وترعانين،..
يا ود أشيقر أخوي، بالسنين وأنا عندي مشكلة أرق وسوء شهية،
ياخي عليك الله سيدك، كان ما كتحتني بأم غمّيض حقتك دي،..
مشتهي بالحيل، لامن كنت شوفيع وأمشي تلفزيون النادي،
طبعاً ما عندنا تلفزيون لا أنا لا الجيران
أها يقوم الفيلم الأجنبي يطوّل ويكترو من الدعايات، تقوم تدقس فوق كرسيك دا
من كترة الجري بالنهار واللعب في البحر،.
يتوّرك زول كبير، يا جنى قوم أتلم، ما يلاقيك كلب سعران أنصاص الليالي يتوّكك
ياخي جنس النومة دي يسويها علي الله،

Quote: كايتو التراب في الزلَق وساووا الحُفر، لامن ندودرها من هَوْ لي هَوْ


"ساووا" شايفك هنا دَبَّلت الواو في الفعل وختيت "ألف"،
حاكم الألف دا أنا مسوّي لي جن،
لاحظ إنو العاميات "العربية" كلها، بتتعامل مع المثنى "المقرف" في الفصيح،
مثله مثل الجمع، (المثنى القاصدو إنت وود البدوي)
يعني لو نفرين بنقولهم: ماشين وين؟ وألا: أرحكم معاي،..
زي الإنجليزي وباقي لغات الدنيا، حسب علمي،..
أها في كتابة عاميتنا، ما أظن بنقدر نخت "الألف" لأنهم ببقوا جماعة فعلاً،
مش مثنى، مرات بنسى بكتب "ألف" الجماعة ومرّات بتذكر،..
هسّع الناس لو عاملوا المثنى معاملة الجمع وقطعوا دابروا
ما كانوا ارتاحوا نضماً وكتابةً وإعراباً؟
رأيك شنو في الشِبكة دي؟

Gaafar Ismail،..
إزيك يا ود سماعين،..
قلنا نسأل منك، وكيفنها خباراتك،
والله يديك العافية
ويزيدك سماح


Adil Al Badawi،..
يا ود البدوي، كيفنّك؟
عارف؟ بيتي جنبو جامع، وبيتي دا من بشتنتو مسميهو "عُشش أبو ظبي"
أها لامن صلاة الصبح تخفس، أنا بكون مصنقر، ولامن الحَمَارات يرهجن برضو مصنقر، ود أشيقر قلنالو أقسم لنا معاك من النعسة دي كان يسمعنا،..
خايف من الكُبُر، مو عارفها بَخَت مبكّر جداً

...

Post: #424
Title: Re: إصلاح الكتابة في المنبر
Author: Shinteer
Date: 04-05-2006, 11:20 AM
Parent: #423

كيفنك يا محسن
يمكن يكون (الفعل) المثنّى هو الفعل الوحيد العاطل تماماً في حياة الناس العامة، ولا يوجد إلا في بطون الكتب. عشان كده ما في أي داعي ليه. وكمان ألف الجماعة دي ذاتها في ليها داعي؟ يعني الفرق شنو بين "كَتَبوا" و"كَتَبو"؟. غايتو الألف بتاعة الجماعة دي أنا شايفها زي "واو" عمرو؛ جات واقعة من وين ما معروف. وقد استغرب الشاعر في كرم الفقهاء مع عمرو وشحّهم مع "بسم" الله:
وقد سامحوا عَمْراً (وً؟) بواوٍ مَزيدةٍ *** وضُويِقَ "بسم الله" في ألِفِ الوصْلِ

يا محسن .. عمرو دي ذاتها يكتبوها كيف لو بقت منصوبة زي ما في البيت الفوق ده؟ عَمْراً ولاّ عمروً؟. جاطت عليْ.

أها أنا "ساو" الكتبتها انت ديك قلت أزيد ليها واو على الأقل عشان تفيد ضم آخر الفعل .. نعمِن الواو الأولى أصلية في الفعل. لكن الألف البعد واو الجماعة جاء تلقائياً دون قصد كبير والدليل إني ما عملت ألف جماعة للفعل الأول (كايتو أو أردمو. الفعل نسيتو في رقبتو).

طيب شكينا من واو الجماعة ومن فعل التثنية، وقبّالنا شكى طه حسين من الألف المقصورة وغيرها مما اعتبره زوائد، ودي كلها جرْسة وكبكبة ساي، لأننا لو عرفنا الصينيين بيكتبوا كيف وبشنو حنسكت ونحمد الله. جنس شَدَر وصارقيل وحراقيص و شَبَش ودوابي ما أنزل الله بها من سلطان. الواحد يقعد يصارع ليه في ما لا يقل عن خمسة آلاف شدرة عشان يقدر يكتب ليه كلام مقروء. واليابانيين كذلك، جنس كترة حروف وقعونج ما يديك الدرب. تنتح الابتدائية كلها وتطلع كيت وتدَحِّش قدّام أي كلام مكتوب. خليك من ديل وشدرهُن. شوف الخواجات العزّاهُن الله ذاتهُن. ووالله بتكلموا في وادي وبيكتبوا في وادي تاني. هسع البيضير الانقليز شنو لو كتبوا Pikcha بدل Picture أو Manoova بدل Manoeuvre .. والكتير المحيِّر.

نجي لسهرك وانسداد نفسك من مطايب الموائد. قيل إن السجاير بتسد النفِس (حسب كلام دكتور كضاب تاني يا عادل بدوي) وأنا ما حصل قفلت نفسي، وده دليل على كضب الدكتور. لكن أحياناً لمَّن أسرف في التدخين نفسي بتنسد، وده شيء وقتي ما بيستمر كتير. الثابت إنو في ناس كتيرين السجاير بيقفل طاقات إمعائهم .. ويبدو لي إنك انت واحد منهم. أما السهر والأرق ده فشيئ عادي خالس، وما تغرك النعسة الأنا فيها دي، أصلها بتجي طوفة وبتختر.

المرة الجاية نشوف موضوع فتح الكتاب القالوا عادل بدوي؛ كتاب الطب. وفعلاً الجماعة بيفتحوا الكتاب زي فقرا النسوان. وأروي ليك قصة الدكتور الفتح لي الكتاب وكان داير يحرمني من كل الحلال والحرام. لكن مرقت مِنو بـ عوم التكارير.

Post: #425
Title: Re: إصلاح الكتابة في المنبر
Author: محسن خالد
Date: 04-08-2006, 06:30 AM
Parent: #424

..


Shinteer
إزيك،..
عمرو، منصوبة تُكتب هكذا، كما تفضّلت أنت: عَمْراً
وبوافقك مية مية، في إنو مافي فرق بين كتابة ألف الجماعة أو عدمو،..
ولو بتذكّر كلامي عن جملة: جاء زيدٌ راكباً...
وسؤالي فرقت شنو لو قلنا: جاء زيدٌ راكبٌ
بالنسبة للكتابة الناس بتصحّح فيها الكتير، شوف مثلاً الرسم العثماني بتاع المصحف، لا هسّع المصاحف بصوروها تصوير، وما بقدروا يدخلوها للكمبيوتر إلا كتصوير، والشغلة دي طال الزمن أو قصر، لا بد من إعادة كتابة المصاحف بالضبط الحديث للكتابة، لأنو الأطفال ما ممكن تديهم سور في الابتدائية مكتوبة بطريقة بتخالف نفس البدرسم ليهم بهناك في حصة العربي، ما ممكن أبداً نتكلم بطريقة ونكتب بطريقتين، بل عدة طرق، وو..
أسمع إنت قلت كلام سمح هنا، وبجيك تاني، هسع في هبدة من الكون


...

Post: #426
Title: Re: إصلاح الكتابة في المنبر
Author: محسن خالد
Date: 04-08-2006, 06:34 AM
Parent: #424

..


Shinteer
إزيك،..
عمرو، منصوبة تُكتب هكذا، كما تفضّلت أنت: عَمْراً
وبوافقك مية مية، في إنو مافي فرق بين كتابة ألف الجماعة أو عدمو،..
ولو بتذكّر كلامي عن جملة: جاء زيدٌ راكباً...
وسؤالي فرقت شنو لو قلنا: جاء زيدٌ راكبٌ
بالنسبة للكتابة الناس بتصحّح فيها الكتير، شوف مثلاً الرسم العثماني بتاع المصحف، لا هسّع المصاحف بصوروها تصوير، وما بقدروا يدخلوها للكمبيوتر إلا كتصوير، والشغلة دي طال الزمن أو قصر، لا بد من إعادة كتابة المصاحف بالضبط الحديث للكتابة، لأنو الأطفال ما ممكن تديهم سور في الابتدائية مكتوبة بطريقة بتخالف نفس البدرسم ليهم بهناك في حصة العربي، ما ممكن أبداً نتكلم بطريقة ونكتب بطريقتين، بل عدة طرق، وو..
أسمع إنت قلت كلام سمح هنا، وبجيك تاني، هسع في هبدة من الكون


...

Post: #427
Title: Re: إصلاح الكتابة في المنبر
Author: Adil Al Badawi
Date: 04-10-2006, 02:05 AM
Parent: #426

Quote: المرة الجاية نشوف موضوع فتح الكتاب القالوا عادل بدوي؛ كتاب الطب. وفعلاً الجماعة بيفتحوا الكتاب زي فقرا النسوان. وأروي ليك قصة الدكتور الفتح لي الكتاب وكان داير يحرمني من كل الحلال والحرام. لكن مرقت مِنو بـ عوم التكارير.

لحدي ما تجي المرَّة الجاية بقول ليك حدَّثني من أشك في قوله، ليس من تحرٍ للكذب عُرِفَ عنه فحاشاه ذلك وإنَّما من غرابة القول، قال لي ما معناهو إنو جماعتك ديل الواحد فيهم أكان بِقى في الطب أب قراط ذاتو ياها كُتبو دي يقراها ويقرِّط على كدا...يعني يشموها قدحة، قبل التخرج والحصول على الرخصة، حكاية إنو الواحد يخُت إيدو فوق راس مريض وألا بطنو زي ما بسووا جماعتنا البِدْقشو المستشفيات من سنة رابعة. دا يعني نظام الانسان عندهم عزيز وكدا لكن فات عليهم إنو عزة الانسان وجلالو دا بباينهم بعدين لما يمرض ويفتحولو الكتاب ويصنقعو ويدنقرو وقِبَل الله كلها ما يعرفو ليهم فيها قِبْلة. الغريبة الانسان "الهامل" عندنا دا هو نفس الانسان الاتعلَّمو دكاترتنا من صحتو ومن مرضو فبلغوا في الدكترة شأواً خلاهم من نظرة يقدرو يعرفو حتى لو روحو ذاتا عليلة خلي عنَّك جسدو إلا هي بَسْ ذِلَّتو الأخيرة دي الخلَّتو يموت بي سبب وبرا سبب.

المصيبة إنو تردد ناس "Dr. "no YES", "no NO دا ممكن يكتل ليهو ناس والواحد لو بكتلو ترددو تراها "جفلة معوز" نَعَمِنو مافي غبينة لكين تموت مغبون بتردد غيرك دي مصيبة كبيرة...تخيل إنَّك ميت مغبون ولستة طويلة عريضة من الغباين التانية ماااااشة عليك. أنا القدامك دا لما فتحو لي خرتمية كتاب وجهاز وغِلبو فيني حيلة قالو لي يا زول لِمْ عُضامك واتكامل أهلك...عاد نبقي في جِنِس دا؟!، أنا سمعت نصيحتهم واتكاملت أهلي...هُمْ حا يقعدو لمتين يقولو لي دا اتكامل أهلك ولي داك اتكامل شيخوختك؟!

تعرف جماعتك ديل أظنَّهم، ودا ظن لا يأتيه الإثم من بين يديه أو خلفه، كملو ذخيرة المواجهة القسمها ليهم رب العالمين كلَّها أيامات كانو مبرطعين في الباسفيكي دا وما مخليين ليهم زول ما هابْشِنو...كمّلوها وقعدو البُخَات وبِقَت علي مداواتهم لأمراض الجسم والنفس وأمراض بين ذلك كثيرة مقالة "كلبة دفع الله" ويقال أن دفع الله رجل من نواحينا شَرَع كلبةً ليهو ورا أرنب وما رجَعَت لي يوم الليلة دا لا بي الأرنب لا براهو.

تحياتي لكم أجمعين.

الواو، الضكر دا، شوفو لينا آخرتو شنو أكان بالعربي الفصيح أكان بالعربي النصيح. وشوفو لينا كمان أكان سياسة دولة ما، أو قلة سياستها، بِتْهِد بطريقة أو بأخرى في سلوك مواطنيها.

Post: #428
Title: Re: إصلاح الكتابة في المنبر
Author: معتصم دفع الله
Date: 04-10-2006, 02:25 AM
Parent: #426

Quote: غايتو الصورة ما عرفتها ياتها، شكيتن علي الله ناس الصحافة كان دايرين يخربوا سوقنا الأصلو مخروب،..

غايتو يا محسن خربوا سوقك ودروك ضيعوا ذمتك دي كلو كلو ..



البوست دا كان بمثابة وجبة دسمة بالنسبة لي في فترة الإجازة القضيتها في السودان ..
قرأته مرات عديدة ..
عذراً إن تداخلت فيه متأخراً ..

شكراً الجميل محسن خالد ..
واصل وبقية العقد الفريد ..

Post: #429
Title: Re: إصلاح الكتابة في المنبر
Author: Adil Al Badawi
Date: 04-15-2006, 01:47 AM
Parent: #428

سلامات يا شباب،

هل يجب أن أقول: يا سارية البوست!

تحيَّاتي لكم أجمعين.

Post: #431
Title: Re: إصلاح الكتابة في المنبر
Author: إسماعيل التاج
Date: 04-15-2006, 11:08 AM
Parent: #1

(قــصــور اللغــة العربية أمْ عـجـزهـا؟)


يا محسن، تحياتي يا مبدع والشكر على المخزون الذي تخرج منه تلك الدرر. أستمتع بالقراءة أكثر من التداخل.

والحديث عن اللغة متشعب وأسمح لي اليوم بالولوج إلى مجال آخر، على خلفية تجاوز البوست موضوع إصلاح الكتابة في المنبر إلى آفاق أرحب حول اللغة العربية.

هنالك تحـدي يواجـه اللغة العربية رأيتُ أثارتـه في هذا البوست نسبةً للعلاقة الوثيقة. وبما أنَّ اللغة العربية وعلوم نحوها وتـطورها هي مثار الموضوع، فـلقـد لفت نظري قصور اللغة العربية أو عدم مقدرتها على مواكبة العصر الحديث مما يجعلها تبدو لـغـة متواضعة أمام بعض اللغات خاصة اللاتينية منها. وقـد يـُـعزى هـذا إلى اللغة نفسها، أو إلى القائمين على أمرها والمتحدثين بها.

فمن ناحية لا تمثل اللغة العربية في شبكة الإنترنت إلاَّ 0,4% ، أربعة من عشرة في المائة، من مجموع اللغات التي تـُـستعمل في الإنترنت (الحياة، 9 أكتوبر، 2005، ص 16)، بينما تتمتع اللغة الإنكليزية بنسبة 47%، الصينية 9%، اليابانية 8%، الألمانية 6%، الإسبانية والفرنسية 4% لكلٍ، الإيطالية 3%، البرتغالية 2%، والروسية أيضاً 2%. وهذه النسب تتحدث عن نفسها وتوضح بـجلاء أنَّ اللغة العربية غائبة عن تـقـنيات الحداثة والتطور الحاصل فيها. وينعكس ذلك الوضع أيضاً حتى في مجال الترجمة حيثُ تتراجع معدلات الترجمة إلى اللغة العربية مقابل اللغات الأخرى وتحتل اللغة العربية مرتبة متدنية في مجال التـرجمة حيث تحتل مرتبةً أقل من أستونيا التي يتجاوز عدد سكانها المليون بقليل جداً. وخلال الثلاثين عاما الماضية تـُـرجم إلى اللغة العربية ما يُـقارب سبعة ألف كتابـاً لعالمٍ يضم 225 مليوناً ناطـق بتلك اللغة، بينما تـُـرجم ذات العدد من الكتب لأربعة مليون ليتواني !!!

و(في اللغة العربية، تـُـستعمل لفظة احيائية لترجمة كلمة "أنيميشن" Animation... وفي الإنكليزية، يسهل وصف فيلم بأنه "احيائي من صنع الكمبيوتر بالكامل" بكلمتي "كومبيوتر أنيميتد" Computer Animated ولا يبدو الأمـر باليسر نفسه باللغة العربية)، الحياة، 27 يناير 2006.

وهـذا الخلل في مجال الترجمة يـنـأى بالمتعاطي مع اللغة العربية عن استـشراف ثـقافات أخرى وإبداعات تـنـفـتـح إنسانياً وتفتح أبواباً ما زالت تـُـعتبر تابـوهات في عالمٍ عربي تتصدر قوائم انتاجـه المعرفي كتـبـاً صـفراء لا يهمهما من العصر سوى تكفير الآخر دينيـاً والبحث فيما يُـقعد المرأة في البيت. إزاء ذلك، لا غــرو أنْ لـجـأ الكاتب المغربي محمد شكري إلى نشر أدبـه بالفرنسية أولاً.

ما ساقني لهذه المقدمـة – التي قـد تبدو في مقام الحكم الجدلي - هـو عدم مقدرة اللغة العربية على تركيب كلمـة قصيرة ذات مـغـزى من كلمات متعددة كثيرة بحيث ترمـز الكلمة الجديدة للكلمة القديمة والتي غالباً ما تكون طويلة. وأعني هنا: الإسم المركب من أوائل حروف كلمات أخرى . وهـذا ما يـُـعـرف في اللغـة الإنكليزية بـ ( Acronym ).

والـ ( Acronym ) هـي اللفـظـة الأولية: أي أنها كلمة مركبة من أوائل حروف كلمات أخرى بحيث يمكن نـُـطـق الكلمة الجديدة. فمثلاً كلمة يونيسكو UNESCO تتركب من الأحرف الأولـى لكل كلمة من كلمات:
United Nations Educational, Scientific and Cultural Organization
منظمة الامم المتحدة للتربية والثـقافة والعلوم.


وبـهـذا المعنى تختلف (الكلمة المركبة) عن (الاختصار) – (Abbreviation). فـ (Chan.)، ما هي إلاَّ اختصارٌ لكلمة (channel). وأيضاً (hist. )، هي عبارة عن اختصار لكلمة (history)، و (Sat.) هي اختصار لـ Saturday.

وبالتأكيد لا تـمثـل (الكلمة المركبة) الرمزية الجديدة إشـتـقـاقـاً.

ونلاحـظ أنَّ الكلمة المركبة قـد تـُـنـطق كـكـلمـة قائمة بذاتها كما هــو الحال في يونيسكو (UNESCO) ، و آيسسكو (ISESCO) . أو قـد تنطلق حروفها فقـط حسب الحروف المكــوِّنــة لها كما هـو الحال في بي بي سي (BBC) ، و إف بي آي (FBI). وهنالك نداء الاسـتـغـاثــة الشهير (SOS) س أو إس ، Save Our Souls، ولا يغيب عنا البي إتش دي (Ph.D.)، والـ إم بي إي (MBA)، Master of Business Administration، ماجستير في إدارة الأعمال.

ومن الكلمات المركبة التي تـُـنـطق حـرفـاً حرفـاً وليس ككلمة متكاملة نـجد الآتي على سبيل المثال:
UK = United Kingdom
EU = European Union
USA = United States of America
MF = Genetically Modified Foods

POW = Prisoner/s of war
سجين/سجناء الحرب

POC = Prisoner/s of conscience
سجين/سجناء الرأي/الضمير

CIA = Central Intelligence Agency
وكالـة الاستخبارات المركـزية (الأمريكية)

IMF = International Monetary Fund
صندوق النـقـد الدولي

ILO = International Labour Organization
منظمة العمل الدولية

ICC = International Criminal Court
المحكمة الجنائية الدولية

UDHR = Universal Declaration of Human Rights
الإعلان العالمي لحقوق الإنسان

DNA = Deoxyribonucleic Acid
الحامض النووي الريبـوزي المنزوع الأوكسجين !!!

أمـَّـا الكلمات المركبة والتـي تُـشكل فيها الكلمة الجديدة كلمـةً قائـمـةً بذاتها فهي كثيرةٌ جداُ, مثالاً:
UNRWA = United Nations Relief and Works Agency
وكالة الإغـاثـة والتشغيل التابعة للأمم المتحدة، وتعرف بوكالة غـوث (اللاجئين الفلسطينيين). وتـُـعرف أيضاً في اللغة العربية بـ (الأونروا) تماماً كما هي في اللغة الإنكليزية !!

North Atlantic Treaty Organization = NATO
منظمة حلف شمال الأطلسي – الناتـو - (حلف شمال الأطلسي مقابل حلف وارسو)

CEDAW = Convention on the Elimination of All Racial Discrimination Against Women
وتـُـعرف عربياً بـ (سيداو) أيضاً – اتفاقية مناهضة جميع أشكال التمييز ضد المرأة

وأيضاً هنالك كلمة: لوووووووول، والتي يكثر استعمالها في منابر الحوار والنقاش في الإنترنت. و (لول) مترجمة ترجمة حرفية من الكلمة المركبة الإنكليزية (LOL) والتي تـعني
LOL = Laugh Out Loud

ومن الكلمات المركبة المستعملة في الغرب في مجال الوجبات تحتل كلمة (Brunch) مكاناً مرموقاً، خاصةً في الولايات المتحدة. والكلمة مـكونة من كلمتي (Lunch) و(Breakfast). وهـي وجبة بين الفـطـور والـغـداء.

وتظهر معاناة المترجمين الفوريين العرب في المؤتمرات الدولية والتي تتوالي فيها المداخلات بسرعة كبيرة ويتم إستعمال الكلمات الإنكليزية المركبة القصيرة التي لا حد لها ويكون على المترجم أنْ ينـطق بالمقابل العربي – الطويل - متكاملاً .

ويستغرب المتابع إطلاق ليبيا على نفسها: (الجماهيرية العربية الليبية الشعبية الاشتراكية العظمى)، دون محاولة توليف إسم مركب قصير يرمـز لها، سواء كان من ذلك الإسم العربي أو حتى من المقابل الإنكليزي :
Great Socialist People’s Libyan Arab Jamahiriya
(لاحـظ هـذه الحالة مع حالة الإتحاد السابق للجمهوريات السوفياتية الإشتراكية (Union of Soviet Socialist Republics) – والتي يُـرمـز لها بالإنكليزية بـ USSR أو بـ CCCP بالروسية). لذلك دائماً ما تتم الإشارة إلى (ليبيا) في الأمم المتحدة ووكالاتها المتخصصة وفي أجهـزة الإعلام الغربية – وربما العربية – تـتـم الإشارة إليها بـ (ليبيا).

فاللغة العربية (المنطوقة والمكتوبة على حـدٍ سواء) مغرمة بالإسهاب لذلك لم تعرف الرمـوز والاختصارات فيما يتعلق بالأسماء الطويلة كما هـو الحال مع ليبيا. وربما يُـفسر هـذا طـول الأغاني العربية مما يجعل الاستماع لبعضها مملاً.

وحتى عندما لجأت بعض الدول والمؤسسات العربية إلى استعمال كلمات مركبة ترمز لها نـجد أنها استقتها من اللغة الإنكليزية وليس من العربية. ويتضح هـذا في الآيسسـكو ، والأليسكو.
فالآيسسكو (ISESCO) هي المنظمة الإسلامية للتربية والعلوم والثقافة، مقابل اليونسكو.

والأليكسـو (ALECSO) هي: المنظمة العربية للتربية والثـقافة والعلوم (وإذا شئينا الدقـة يجب أنْ تكون: منظمة جامعة الدول العربية للتربية والثـقافة والعلوم). ولكنها مجاراة ومحاكاة اللغـة الإنكليزية. ومن المفارقـات أنْ تكون هذه المنظمة معنية بترقية الثـقافة العربية وعلومها والتربية عليها بينما تأخـذ إسمها المركب من الأحرف الأولى للكلمات اللاتينية Arab League Education, Culture and Science Organization. وهنالك أسماء وكالات الأنباء العربية التي أخـذت أسمائها المركبة/الرمـزية من اللغة الإنكليزية مثل سونا، SUNA (Sudan News Agency) وقس على ذلك وكالة الأنباء الكويتية (كونا) Kuwait News Agency، والليبية (جانا) Jamahiriya News Agency.

ولكن مع هـذا العـجـز الذي يواجـه اللغة العربية لجهة إيجاد كلمات مركبة تـرمز لشيء محدد، هنالك بعض الإستـثـناءات نجحت فيها بعض المؤسسات، خاصةً السياسية، في الخروج بتوليفـة مركبة لها معانٍ ، منها:

حماس = حركة المقاومة الإسلامية
فتح = حركة تحرير فلسطين (لاحـظ هنا التقديم والتأخير – أو قراءة المختصر معكوساً أي من الشمال لليمين كما في اللغــة اللاتينية). وفي حقيقة الأمر كلمة (فتح) مركبة من الأحرف الأولى ل: حركة التحرير الوطني الفلسطيني. ويبدو أنه تـمَّ الاسـتـغناء عن الحرف الأول لكلمة (الوطني) حتـى يتم إستخراج كلمة ذات مـغـزى: فتح.
حـشـد = حـزب الشعب الديموقراطي الأردني.
حــق = حزب العمل القومي، الأردن
فــدا = الاتحاد الديمقراطي الفلسطيني (لاحـظ أيضاً التقديم والتأخير – أو قراءة المختصر معكوساً أي من الشمال لليمين كما في اللغــة اللاتينية).
حـمـس = حركة مجتمع السلم، الجـزائـر
تـقـدم = تكتل القوى الديمقراطية، موريتانيا.
س.ح.م = سكك حديد مصر
ج.م.ع = جمهورية مصر العربية

لا أعـرف إنْ كانت (حركة أمل) اللبنانية هي رمـز مركب لشيء ما أم لا.

بـظ = بعد الظهر
قـظ = قبل الظهر
والكلمتان نادرتا الاستعمال. ولكن لا قيمة لـغـوية أو فنية لهاتين الكلمتين. تُـكتبان في الغالب ولكن لا تـُـنـطقان.

ق.م = قبل الميلاد (تـُـكتب قاف ميم وتـُـنـطق قبل الميلاد).
صلعم = صلى الله عليه وسلم (أيضاً تـُـكتب صلعم وتـُـنـطق صلى الله عليه وسلم).

هنالك مركـز (أمان)، وهـو المركز العربي للمصادر والمعلومات للعنف ضد المرأة ومقره العاصمة الأردنية عمان. ولكن كلمة (أمان) غير مأخـوذة من الإسم الطويل للمركـز بل من المعنى المتجـسـد في رسالة المركـز الأساسية وهي توفير الـ (أمان) للمرأة العربية [من خلال المساهمة في الجهود الرامية إلى القضاء على العنف ضد النساء والفتيات].


سودانياً، أصابت (حركة القوى الديموقراطية الجديدة/الحديثة) التوفيق في الإسم المركب الذي أختارته رمزاً لها: (حق)، بالرغم من أنه لا يعكس كل الإسم حيث وقـف المختصر في الكلمتين الأولى والثانية – وترك نصف الباقي، تمامـاً كما فعل حزب العمل الديموقراطي الأردني بتجاوزه لكلمة (العمل) ليحقق كلمة (حق). وأنـظر لحال الحركة الشعبية لتحرير السودان / الجيش الشعبي لتحرير السودان - مقابل الرمـز الإنكليزي في سلاسته وسهولته SPLM/SPLA

وقبل الخصصة الإنقاذية لكثير من المرافق كنا نسمع عن دار الهاتف، والآن نسمع عن سوداتـل وموبيتل في السودان في بـلد تدعي فيه السلطات التـأصيل (اللغوي) فتعمل على تعريب مناهج جامعة الخرطوم بينمـا تـُـطلق على مؤسساتها الاقـتصادية رموزاً إنكليزية.

وماذا عن هـذا الموقع؟ من السهولة الرمــز إليه بـ (SOL)،
SOL = Sudanese On Line، ولكننا نـتـعثر في حال محاولة إيجاد رمـز مركب للمقابل العربي (سودانيون على الخـط).

ولا تـبـدو هنالك مؤشرات إيجابية بالنسبة للغة العربية تـُـبشر بنجاح قريب في هـذا المجال.

على أنَّ الطرافـة لا تـفارق السوداني. قال لي مرة صديق متسائلاً عن معنى حروف ماركة أروع وأجمل العربات الألمانية وهي بي إم دبليو (BMW). ولـمَّـا رآني مندهشاً لسؤاله أجابني من تلقاء نفسه: معناها Be My Wife


شكراً ومعـذرة للإطالة فـلقـد إقـتـضاها السياق.

Post: #432
Title: Re: إصلاح الكتابة في المنبر
Author: محسن خالد
Date: 04-22-2006, 08:50 AM
Parent: #431

..


Adil Al Badawi،...
تحياتي يا صديقي في الوحشة، وطولة الدرب،
أخوك ملوي ضرعات هادي الأيام، أريتك بس عاذرو
واتوحشناك

معتصم دفع الله،..
تحياتي يا جميل، وألف سلام ومراحب،..
ياخي مالك، تمشي محل الإجازة وتودرها في لغلغة العربي،
كان تمشي تنق من الحمام من برج لبرج، وبالعامية الحلوة،
غايتو تسلم،
ويضحك نهارك،
وحمدله ع السلامة


إسماعيل التاج،..
تحياتي يا رجل، وكن بخير،..
ما قلته أوافقك في سواده الأعظم وفي عظمه،
ولكن تناظر كلمة: "قصور"، في تقديري يُعطي نفس المعنى للعجز،..
حاولت أنا أفهم من عندي "قصورها" أم "عدم الشغل عليها وتطويعها"؟
بمعنى أنّ فقهاءها يحرسونها ولا يسمحون بتطويرها،..
أوافقك أنَّ اللغة الفصيحة تؤدي المعنى بعد لفلفة وطولة بال، وربما تترك الحس خلفها،
العاميات بالمناسبة لا تعاني من هذه المشكلة، وهذا ما اتفق عليه جُلُّ المترجمين
في إحدى شطحاتي رأيت أن اللغة العربية الفصيحة غير قادرة أبداً على استيعاب الكثير من المعاني في اللغات الأخرى، ولكن الأمر أيضاً ينطبق على هذه اللغات! ولينا شاهد كبير في الترجمة الفرنسية للقرآن، الراجل العملها دا مستشرق عشانها حياتو كلها، وكل الفرنسيين والمغاربة بقولوا الشغل العملوا الراجل دا سبحان من يعمل زيو، ومع ذلك هاجمه المصريون لمدى سنوات لم يتوقف فيها إطلاق النار على تلك الترجمة، لماذا؟
لأنهم مثلاً يريدون منه أن يصبح –لا أعرف ماذا- كي ينقل لهم "جانب الغربي" و"الساهرة" "القارعة ما القارعة" ووووو... من الكلمات المصاغة بروح عاطفية شعرية، يصعب نقلها، بل يصعب إدراكها كليةً حتى بالعربية نفسها، لأنها أشبه بالشعر، وتقصد الحس قبل الدماغ، والتفاسير،...
في تقديري بما أنَّ العاميات العربية هذه موجودة وهي كثيرة جداً، فلا يمكننا أن نقول بأنّ اللغة لم تتطور، أو لا يمكن تطويرها: (عشان شنو؟) –مثلاً- بالفصيح (لأي شأن هو؟)
ولكن هذا سيفسد الاصطلاح في إجماله الكبير،...
لأن الشامي سيقول: من شان شو؟
والمغاربي: علاش؟
هذا الموضوع شِعابه كثيرة، وما أوردته أنت من الاختصارات لا يمثّل مشكلةً حقيقية، لأنّ الاختصار متى تعارف عليه الناس استخدموه، كما بيّنت بالأمثلة، زي "حماس"..
عارف المشكلة وين؟ في (الحروف) و(الإضافات) و(الإعراب) و(المثنى) و(نون النسوة) و(التقديمات والتأخيرات) وفي أنّ تلاتة أرباع اللغة العربية هي عبارة عن أسماء وصفات "بدوية" و"لمفردات البادية"، فلا مانع من استيعاب مفردات جديدة من لغات أخرى، هذا شيء موجود في النص القرآني والحديث والشعر وكتب التراث،...
أما سيادة اللغة فهذه مسألة ثانية تماماً، لا علاقة لها باللغة، فاللغة العربية كانت الأولى في الدنيا حينما كانت الحضارة الإسلامية العربية "لغةً"، هي سيدة الدنيا وملكته، البعمل الكمبيوتر دون شك بنجرو ليهو الاسم، البِلِد ولد بسميهو، ولو داير أراجع الكلمات اللي الناس بفتكروها لاتينية وهي عربية قديمة، أيام كان الثقل الحضاري لهذه اللغة، فهناك ما يُدهش بحق وما يحيّر، من جامعة دي ذاتها، وشهادة الإجازة، وإلى ما لا حصر له،...
هذه النقطة وقفنا عندها من قبل، يمكنك مراجعة هذا البوست،
ما أثرته هنا، هو موضوع جِدّي وهام لا شك، تمنيت لو أنّ أيامي أسعفتني، هذه الأيام بعينها أُعاني "زنقةً" مجيهة، بالإضافة لكون الشباب هنا وشخصي، أحببنا أن نناقش بعض المسائل التقنية البسيطة المتعلقة بالكتابة، لأنّ الجانب النظري يتطلب التفرّغ التام للبحث في مسائل مطولة وعويصة، والأهم أنها لن تغير شيئاً ما لم يتغير "الوضع الحضاري" للمسلمين بعامة وللعرب بخاصة،...
هنا الكثير من القواعد التي كاتبني الناس في مراجعتها –أساتذة لغة وغيرهم- هذا البوست سيره في الظلام على بريدي الخاص أكبر منه في العلن، هنا، قلت ذلك لأوضح للجميع، هنا الكثير من القواعد التي تساءلت حولها، لستُ مقتنعاً بها، ويمكنني الكتابة بضدها، ولكن هل يجوز لي أن أكتب كلاماً لا يوافق الاصطلاح، أبداً، سأكتب بذلك في كتبي الخاصة، ولكن هنا علي أن أُلاحظ وجود بعض الناس الذين يحتاجون هذه المعرفة بشكلها الأكاديمي، إذن من باب الأمانة المعرفية أن أكتب ما يطابق كتب البحث، وأن أعوس عوسي الخاص في كتابتي الخاصة، المسألة ليست مسألة التضارب المنطقي في القواعد –الفلسفي والمنهجي- هذا لا نقاش حوله، ويريد مئات العقول لتعمل عليه، ويحتاج إلى أن تزال مئات السدود،...
مثلاً قاعدة: الفرق بين.. ما يزال، ولا يزال.... القرآن لا يفرّق بينهما في الاستخدام، أما فقهاء اللغة فيفرقون.....
أتمنى عليك أن تُراجع كتاب د. ياسر شرف، (إصلاح الكتابة)، الذي سمَّينا هذا البوست تيمناً به،...
أها يا إسماعيل التاج دا قدر بصارتي،...
شكراً على مساهمتك المقدّرة والمتعوب عليها، كن بخير
أرجو أن تعذر شلهتة أيامي،
وسلمت،...


...

Post: #433
Title: Re: إصلاح الكتابة في المنبر
Author: محسن خالد
Date: 04-24-2006, 03:50 AM
Parent: #432

..


كيف نُمَيِّز بين الفعل الماضي، والفعل المضارع؟





كيف بنعرف إنو الفعل مضارع وألا ماضي؟
بنحاول نضيف "سين" للفعل، لو دخلت أوكي، الفعل مضارع...
ولو مافي طريقة، بكون ماضي...
السين حرف يفيد المستقبل القريب،
"سوف" برضو حرف بفيد المستقبل، لكن الأبعد شوية
عشان كدا بقولوا "التسويف"، بمعنى ضرب مواعيد بعيدة وقابلة للهدر،
وما دايرين ندخل في غلاط مع القرآن،
فأي غلاط بين فقهاء اللغة وفقهاء القرآن لسنا مسؤولين عنه،


ذهب.... مثلاً..... هل ممكن أقول: سذهب؟ طبعاً لا...
أذهب....مثلاً..... هل ممكن أقول: سأذهب؟ طبعاً ممكن

وممكن تجرّب "سوف" برضو،...
ما ممكن تقول: سوف ذهب....
لكن ممكن تقول: سوف أذهب إليه....

لاحظ لبنية اللغة نفسها، إنو الماضي خلاص ماضي وانتهى،
لكن المضارع يمكن ترقيته ليصبح المستقبل، ترقيته بالسين أو غيرها من الحروف التي تفيد المستقبل،..

لو داير تعرف إنو الفعل مضارع وألا ماضي ببساطة بتعمل الاختبار دا،...

وهل دا سؤال كبير في العربي يعني؟

سبق وكتبت:

Quote: لطيفة صغيرونة/

لا تقل: لم يذهب إليه قط،... لأنّ قط لا يستخدم معها إلا الفعل الماضي،...
بل قل: لم أذهب إليه قط،...

ومع بقية الأفعال استخدم (أبدا) للنفي بدل (قط)
فيصبح تصحيح الجملة الأولى، لم يذهب إليه أبداً،..


يا أخوانا أنا واحد من الناس الماعندي مانع أتصحح وأتعلم أبداً، جاااهز،
والدنيا دي كلها عندي فصل مدرسي،
بس إن شاء الله تلقوا موضوع تعلموني ليهو غير الفرق بين الفعل المضارع والماضي،..
واضح طبعاً إنو اللطيفة الفوق دي كتبتها علي عجل، فوقع خطأ في استخدامي للفعل الأول،..

قصة دي؟ وألا حكاية يعني، لامن يندق ليها صيوان بكا مترحل زي الشبرية،
ما تستعدل الفعل الغلط دا يا مولانا وانتهينا،..
لتصبح الجملة: ما ذهبتُ إليه قط....

والقاعدة ذاتها من نوع التحريات اللغوية الأنا شايف إنها غير مهمة، لكن موجودة، نسويلها شنو؟
أنا بجدعها في أقرب كشرة جنبي، الدايرها يلمها والما دايرة يجدعها في أقرب كشرة جنبو،..

...

Post: #434
Title: Re: إصلاح الكتابة في المنبر
Author: معتصم الطاهر
Date: 04-24-2006, 06:27 AM
Parent: #1

التعلم من أدوات الرفع

Post: #435
Title: Re: إصلاح الكتابة في المنبر
Author: Shinteer
Date: 04-24-2006, 12:10 PM
Parent: #434

سلامات كتار يا محسن ومعتصم وكل الزملاء المختفين.

أرجو السماح لي بتقديم دعوة للأستاذ محمد إي سليمان للمشاركة داخل هذا البوست لحصر الجهود في مكان واحد وتوحيد الـ Package

الأخ محمد إي سليمان، أتمنى أن تنضم إلى المشاركين في هذا البوست. أنسى قرضمة محسن خالد وركّز على الكتابة وإصلاحها .. هنا في هذا المكان. والفرق بيِّن بين الكتابة ومحسن خالد. الكتابة هي موضوع الإصلاح وليس محسن. شارك مع الكل، بمن فيهم محسن، في إصلاح الكتابة إن كانت تعنيك الكتابة وليس محسن. محسن يقنجر ياخي.

Post: #436
Title: Re: إصلاح الكتابة في المنبر
Author: محسن خالد
Date: 04-25-2006, 05:57 AM
Parent: #435

..


معتصم الطاهر،..
يضحك نهارك، يا شقيقي في الغار
وأريتك بالسلام وبيوتو


إزيك يا ود أشيقر،..
ياخي أريتك في ماهلة وضراعك مطلوق،..
أي زول مرحب بيهو، بس يبقالي الزول دا ما حكايتو لغة، اللغة دي هو عاملها نظام "داير شَكَل ضرضرني تريبة"
أولاً شايفو ماخد الموضوع على نحو عدواني... ليه؟ الله أعلم
بعدين قاعد يطفر من بوست الإصلاح لتيموليلت بشكل عجيب،
أو بما يُوحي أن المسألة موضوعها تاني خالص، لا لغة، لا نقاش معرفي،
يا سيدي الظنون المشروعة متل دي نضرب بيها عرض الحائط، خلينا نرجع للّغة
تانياً،...
فهمي في الألغاز بسيط، وبرضو الإلغاز،..
أولاً دا البوست مفرود ومفروش قدّام الخلق دي كلها،
المانعو شنو يجي يكتب ما يشاء من تصحيح التصحيح، يعني يشيل مسكو وعنابرو دي كلها ويجينا بجاي،
باقي علم الله واسع،..
ما عندي مانع أناقشو، يركّز معاي، وأركّز معاهو،..
لأنو شايفو مرات بشوت ساي، وما بعرف كلام الزول كان معاهو وألا ضدو
بعدين ألفاظو –غير معرفية-
استخدم مفردات زي "جهالات محسن خالد"، تجليط وشنو وشنو... نظام مهاترات
بعدين مركّز علي كلمة "كلو" البوست كلو تخليط، كلو تجليط، كلو كلام فارغ،...
ودا كلو سببو شنو؟ وِهِم في المثال يعني؟! والقاعدة جنبك ناصعة وقاعدة، وتلمع زي ضهر السحلية،
بما يُوحي بأنّ الهدف هو التشكيك في مجمل ما يكتبو محسن،
والوهم شيء غير وارد، ما شايفو هو ذاتو ما بوهم كيف وكتب اسبرانت بتعني "دكتور"
وطلّع منها تصريف اسبيرانتورة، ودي "دكتورة"، ياخي أنا الما مشيت روسيا ولا لعبت شطرنج
مع أصدقاء مزعومين لبشرى الفاضل بعرف إنها "طالب دراسات عليا"
بعدين شوفو هو فاتح ليهو كم بوست لمحسن، قيامة رابطة من البوستات، ليه؟
دا ما محل بتاع مذاكرة ما يجي يستذكر مع الناس، يكتب ويلاجج ويقول الدايرو،
ولاحظ تزويرو لكلام بشرى الفاضل، اتمنيت لو بشرى وضّح ليهو الحاجة البقصدها،
لو هو أصلا ما فاهم كلام بشرى، يا صديقنا بشرى قُل ما أردته من ذلك الكلام، أرجو منك أن توضح ذلك أكثر
ولاحظ يا ود أشيقر اقتباساتو المجذوذة –في عدم ضمير مطلق- من كلامي عن بعض الآيات،..
دي كلها حاجات ما بتريح في نفسية الزول دا، الزول دا رايحالو حاجة تانية، غير خدمتنا البنخدم فيها دي..

وبعد تصحيح المثال بحاول يوري الناس إنو محسن خالد، بحاول يكحّلها عماها،
طيّب أهو نحن منتظرنك، تعال كحّلها لينا إنت، زي ما كلمتك أنا ما بفهم في الألغاز والإلغاز،
ولا بعرف سورياني ولا حبشي
لو بقه كلامك اللغة، حبابك
ولو بقه كلامك الدين، برضو حبابك
وأكان كلامك دا جنون ساي، برضك تعال

أوكي، يا صديقي شنتير،...
أنا موافق، خلينا نبدأ، عشان السيد المحترم دا يبَطّل حكاية إنو حاوي دي، وتحت الطربوش الكتير من المفاجآت،...
وهسع الحمامة بقلبها ليكم وطواط، والكتشينة قروش،
خليهو يشرع فوراً في التجليط، ومستعد تمام أصلحو ليهو الحرف بالحرف،
وقبل ما أصلّح أكتب بالخط العريض والأحمر، أنا غلطاااااااااااااان، وتعال يا حميدة القنيط ألقى سوقك!
قصّرت معاهو؟
بسم الله،..
يلا خش في التجليط، وورينا كيفية التصحيح؟ لأنو البوست دا الناس المهتمين قاعدين يطبعوهوا ويتناقلوهوا، ولا أحب لنفسي إشاعة الجهل، ولو بحسن نيّة،..
البوست ياهو دا قدامو،
ولو حابب بنجيب ليهو من أول درس، لآخر درس

...

Post: #437
Title: Re: إصلاح الكتابة في المنبر
Author: معتصم الطاهر
Date: 04-25-2006, 06:14 AM
Parent: #436

طبعا يا محسن

أنا كتبت بوست ما دايرك تدخل فيهو ..

عاوز أعرف رأى الناس

وبنزل رأيي ..

ان شاء الله ما يعجبك ..

عشان لما الحاجة ما تعجبك ..

بتتحرش ..و بتقول الكلام النحن عاينو ..

Post: #438
Title: Re: إصلاح الكتابة في المنبر
Author: محسن خالد
Date: 04-25-2006, 07:52 AM
Parent: #437

..

معتصم الطاهر،...
تحياتي يا شقيقي في الغار،..

مش إنت وبس، أي زول يكتب العندو وداير يقولوا،..
مرحب بأي كلام،...

أنا ما ح أخش لأني عايز أسمعك وغيرك،...
البفيدني باخدو، والما بفيدني بتركو، دي نظريتي البتعامل بيها مع الكتابة والناس،
والبتوقع هم برضو يعاملوني بيها،..

كن بخير،...

ويا صديقنا محمد سليمان،...
ياخي دي دعوة طيبة جداً ليك، وبدون أي حزازات، تعال ورينا التجليط عشان نصلحو،..
جادي معاك أنا،
ما بهظر،
يعني ما تعمل لي فيها عدوك وما عدوك، دا البوست المفروش في سوق الله أكبر للكتابة وإصلاحها،..
تعال أكتب كلامك هنا، عشان نصلح التجليط مش ليك، لرقبتنا أولا وللناس تانياً،..
بعدين مسألة إنك بتطفر من الإصلاح لتيموليلت دي، يا محمد عاد دايراله غلاط
راجع اقتباساتك بس، وألا كمان راجع عناوين بوستاتك نفسها،..
بعدين وكتين ما عندك علاقة باللغة فياخي ما تخلي البقر لحلابو،..
إنت ود أشيقر ومعتصم وبناديها وود البدوي ود. محمد المين ومنو ومنو ديل كلهم أساتذة لغة كُبار،
ما تشوف تواضعن دا،..
بعدين يا محمد ياخي نحن ذاتنا ما جينا في سيرة العربي البجيب الغلاط والتجليط
كلها نواصب وجوازم وعدد ومبتدأ وخبر
وكيف نعرف الحال، وكيف نعرف الماضي من المضارع وهلم ابتدائيات،..

راجيك أنا،
ما تقول محسن خالد شتم الأصوليين والفقهاء والأساتذة... دي كلمات ماهلة أو غامضة إن شئت،..
أما "جهالات محسن خالد" فدي عبارة بتقصد زول بعينو، بكتب معاك هنا، في الهملة دي،..

كن بخير،
وأرجو إنك تتكرم وتجي تورينا بقية الجهالات،..

الورقة الأولى، الدرس الأول كان في كتابة الهمزات -التحتية، وإنها ما بتتكتب إلا مع الفعل الرباعي،
وضربنا أمثلة، تعال ورينا التجليط في الدرس دا شنو؟
في القاعدة وألا الأمثلة -مثلاً

في رجاك،..



...





..

Post: #439
Title: Re: إصلاح الكتابة في المنبر
Author: Mohamed E. Seliaman
Date: 04-25-2006, 08:33 AM
Parent: #438

الأخ محسن السلام عليكم
اولا صادق اعتذاري عن لغتي التي
لم تخل عن جفاء بداوة وقسوة مهنية.
كلامي عن اني ما بتاع لغة
ولا بتاع كتابة قاصد ليك انو ما في سبب
يخلينا اعاديك ودعمتو بالمثل المصري (اظنو) عدوك كارك.
معناتو عدوك صاحب مهنتك يعني جزار ما بحبش جزار.
يعني ما قصدي اني ما عارف حاجة في العربي.
قصة اسبرانت وما اسبرانت
ده موضوع تاني وابرادو في السياق داك كان عندو هدف محدد
ودكتور بشرى نفسو ما شكك فيه زي ما انت عملت.
يعني قصة مزعوم دي شوية كتيرة.
من ناحية تانية
انا ضعيف جدا في الكتابة صدقني
وممكن تلاقي كتابتي كلها غلط.
بس اسلوبك في بوست اصلاح الكتابة
صراحة ما عجبني رغم انو الهدف جيد
والنقاط التناولتها مهمة
اضافة الى انو طريقة الشرح صاحبها من الخلل الكتير.
-------------------
نبدأ بالمداخلة اللتك اللخيرة:
Quote: الورقة الأولى، الدرس الأول كان في كتابة الهمزات -التحتية، وإنها ما بتتكتب إلا مع الفعل الرباعي،

اظنك قاصد همزات القطع و بسبب العجلة كتبت التحتية.
اذا كان طني في محلو اعتراضي انك قلت تنطبق على
اشتقاقات الفعل الرباعي كلها.
والكلام بي شكلو دا ممكن يحدث ربكة
خاصة مع الفعل المضارع ((رباعي ولا غير رباعي))
لانو الهمزة من "أنيت" حروف المضارعة همزة قطع بلا شك.
والربكة فعلا حصلت مع الاخ هشام ادم في "سأقتصر."
لطفا عندي اجتماع عاجل
اراك لاحقا
لك وللجميع اعتذارات صادقة.

Post: #440
Title: Re: إصلاح الكتابة في المنبر
Author: محسن خالد
Date: 04-25-2006, 11:02 AM
Parent: #439

Mohamed E. Seliaman ،....

وعليك السلام،..
تحياتي، ومرحبا،..
أوكي ما بيناتنا، خلينا ندخل للموضوع طوالي، ونتلّب فوق الكلام الفات كلو،..
نبدأ من مفردة "تحتية" دي، كتبتها قاصد، لا مستعجل ولا حاجتين،..
البوست دا بقراءتك ليهو بتكون ملاحظ إنو نحن شغالين فيهو بالدارجي، وبمحاولة الوصول للهدف مباشرة، بدون تعريفات، يعني ما قاعدين نقول الفاعل هو كدا، وألا الشيء الفلاني داك كدا، أمسك لي وأقطع ليك، لأنو الناس ما فاضية ذاتو، وبتكره القواعد عشان المطاولات دي، فدي أحسن طريقة ممكن نوصّل بيها المعلومة، كما أرى، كنت بكتب "الهميزات" هل اسمها كدا؟ أبداً، بس بنشرح بكلامنا نحن، وبالساهل فهمو..
وأهو أنا قاعد أكتب ليك بالطريقة البنضم بيها، وقبل كدا حاولت أسَهِّل، وقلت إنو بالنسبة للناس المابتعرف إعراب، ممكن يرفعوا بعد الضمائر، ما ضهبان من غلط الكلام دا في العموم وبيّنت ذلك لود أشيقر، وهو ذاتو ما ضهبان من القاصدو لكن حبَّ يبيِّن الجزء التاني من المسألة، أها أظنك بتوافقني إنو الاستخدام الأكتر في الحالة دي هو الرفع، بما أننا بنساعد في استعدال الكتابة في المحل دا، بنحاول نقول القواعد المتكررة دي، عشان تقل نسبة الأخطاء، لا أكثر..
إنهم مؤمنون.. هو رجلٌ، هُنَّ مؤمناتٌ.... دا الدرب الممشي أكتر، صاح؟
وهناك: لكونهم رجالاً.... نصب بعد ضمير، بس دي نادرة، وبرضو لما بينتها قلت إنو الناس تنصب بعد الآتي: كونهم، باعتباره... إلخ، هل في قاعدة زي دي في العربي؟
أبداً مافي، العربي بجي يفكك الجملة، ويقول "كان" إعرابها كدا، والضمير إعرابه كدا، يفتش اسم كان وخبرها وشنو وشنو.. إلخ، لتكون الخلاصة ما يأتي بعدها (منصوباً)، ودا المهم في القصة، بحاول أنفذ للخلاصة دغري، وأحصر القواعد المستخدمة أكتر، يعني التضريبات دي كلها داير أعملها في ورقة خارجية، وأدي هنا الإجابة مباشرة، ودا من باب التسهيل والتحبيب،...
فهل إنت فعلاً اتعاملت مع "التحتية" دي، على أنها كُتبت بعجلة؟ أبداً يا صديقي بل مقصودة بدقة، ولو تعاملت معها بجدية لما وصلنا للنقطة التي أوردتها عن أخينا هشام، أنا لم أرَ ما كتبه، يعني بطلب منك تربط كلامي دا مع الطريقة البشرح بيها وبيّنتها أعلاه، عشان نصل لإنو كلمة "تحتية" دي مقصودة تمام التمام، وأنا ما جبتها هنا جديدة، برجوعك لكلامي السابق، بتلقى إني بأكد كوني أقصد فقط "الهميزة المن تحت" وكلامي كلو كاتب فيهو من تحت دي،...
ليه؟
عشان الناس ما تطش ويطش منها الكلام، بقول بالدارجي المبين "الهميزة المن تحت"، فبكون واضح إنو الكلام للمصدر، البترَكَّب منو الاسم، وممكن تراجع الأمثلة كلها،...
يعني بالنسبة للزول البشوف بعينو، عارف إنو همزة "أكرَم" بالطريقة دي، ما ياها همزة "إكرام" بالطريقة التانية دي، ديل رسمين مختلفين، وصوتين مختلفين برضو، فلامن تقول ليهو (الاتنين ديل اسمهن) همزة قطع، بتجوط ليهو رأسو، لكن لامن تقول ليهو المن تحت ومن فوق بقع ليهو الكلام،...
يعني الاسلام... كدا، بدون همزة من تحت، دي غلط، نطلّع منها الفعل: أسلم، رباعي، إذن تُكتب الهمزة...
طيّب لو عاوزين نجيب منها الأمر: أسلم، وهيك قالت العرب... لو داير مشاكل منطقية –من باب الفلسفة- لهذه القاعدة، أجيب ليك ألف، بس هيك قالت العرب، شو بدنا نساو؟ يعني لو طلقوا يدّي كان بعملها كلها ألف ميتة، ونكتل المشكلة كلها،..
فمهما كان محسن خالد بعرف يفهّم الناس، كمان في حدود تعاون متوقعة من الشخص اللي ح يفهم،
أما: أستغفر الله..... هذا متكلم يتكلم عن حاله
وواضح إنو لو حذفت "همزة القطع" لتتحول لوصل، أو ألف ميّت، سيُقرأ الفعل بمعنى آخر، سيتحوَّل لأمر، من ناحية قراءته: استغفر الله... هذا شخص يأمرك بأن تستغفر الله...
اقترب (أحمد اقترب من المدينة) بحكي عن أحمد.... وممكن برضو (اقترب مني يا أحمد)، وهذا أمر لأحمد، أقتربُ من المدينة (بتكلم عن نفسي)
ماضي الرباعي وأمره ومصدره (همزة قطع)
أقبل... فعل ماضي
أقبِل.. فعل أمر
إقبال... مصدر...

ماضي الخماسي والسداسي وأمرهما ومصدرهما (همزة وصل)
انهمر... فعل ماضي،
انهمر... فعل أمر
انهمار... مصدر

استعمر... فعل ماضي،
استعمر.... فعل أمر
استعمار.... مصدر

(طيّب الأمثلة دي كلللها ليه؟ قبل ما ندخل للثلاثي، برضو ليه؟ لأنو مصدر الرباعي والخماسي والسداسي، "قياسي"، أما الثلاثي فسماعي)


إذن أمر الثلاثي –المتأكدين منو بس- (همزة وصل)
اذهب أنت وربّك فقاتلا
طيّب يا ود سليمان مصدر الثلاثي "سماعي" ما عندو قاعدة ذاتو، إذن القواعد هنا كلها غطست؟
مثلاً:
كتب وذهب... كتابةً وذهاباً..... يعني مافي قطع ولا وصل
أكل (همزة قطع) المصدر أُكُلاً
طيّب لاحظ فعل الأمر نفسو العاملين ليهو قاعدة: كُلْ
أما بالعامية حقتنا بنقول: أُكل.... عندي ثقة في العامية دائماً...
دا يقولوا فيهو شنو؟

أها يا صاحبي فلتانات العربية ذاتها ما ساعلة في فلتانات محسن خالد،..
وبيّنت الكلام دا أنا زمان، إنو العربي ما فيهو قاعدة واحدة بتمسك من هنا لامن تخفس بهناك، لا بُدّ يعتّر ليها شيء، وما عندنا حل غير نقبل بكدا، لأنو معظمها لغة سماعية، بمعنى يمكن كسر القاعدة لصالح السماع،..
فياخي الطريقة المنتهجها هنا دي، لو دخلت فيها همزة وصل وقطع ونعت وصفة متحرية للفعل والمصدر يعمل عمل كذا، وحاة الله زول واحد يتاوق هنا مافي،..
إجمالاً كتابتي بالطريقة دي، لصالح الشرح بس، وما في شيء رايح لي تب في المستوى دا،...
ولك أيضاً اعتذارات صادقة، وكن بخير،..


...

Post: #441
Title: Re: إصلاح الكتابة في المنبر
Author: محسن خالد
Date: 04-25-2006, 11:14 AM
Parent: #440

..

ود أشيقر كيفنّك،..
زمان قلت واجعاك، دودة لغوية اسمها شنو؟
(هكذا مواضيع) بدل (مواضيع كهذه)
أها شوف الدودة الجديدة دي،..
ما عارف بأي طريقة الناس بتكتب
لمزيداً من الإبداع
لمزيداً من التفاصيل
يا أخوانا اللام دي كلها بتطفروا فوقها كيف؟
لمزيدٍ من الإبداع
لمزيدٍ من التفاصيل


...

Post: #442
Title: Re: إصلاح الكتابة في المنبر
Author: معتصم الطاهر
Date: 04-25-2006, 03:55 PM
Parent: #1

بعدين وكتين ما عندك علاقة باللغة فياخي ما تخلي البقر لحلابو،..
إنت ود أشيقر ومعتصم وبناديها وود البدوي ود. محمد المين ومنو ومنو ديل كلهم أساتذة لغة كُبار،
ما تشوف تواضعن دا،
..


محسن خالد

طبعا شكرا للظن الحميد

بس ياخى أساتذة اللغة ديل ... شن جاب المشخبط العامى دا معاهم ..

Post: #443
Title: Re: إصلاح الكتابة في المنبر
Author: Shinteer
Date: 04-25-2006, 05:15 PM
Parent: #442

Quote: لمزيداً من الإبداع
لمزيداً من التفاصيل


وبالبنط العريض كمان. والله دي أخير منها "هكذا مواضيع". والاتنين تنطبق عليهِن الحكمة: ده الرماد وده قَدَحو.

حاجة تحيِّر وما عارف الخلل وين.

===

Post: #444
Title: Re: إصلاح الكتابة في المنبر
Author: محسن خالد
Date: 04-26-2006, 06:14 AM
Parent: #443

..


معتصم الطاهر،..
أممممممممم، واخا عليك آلدرواي،..
طيّب لما كنا في بيت نادوس ما وديتني وين ووين،
مع الكلام المعلّق فيهو هسع صاحبنا ود سليمان دا،..
التواضع فكرة جميلة،..
بس في بعض الأوساط ومع بعض الناس ستغدو انسحاباً،..
علي كيفك، داير مع المهندسين وما داير مع بتوع العربي علي كيفك،..
شخصياً ما عاجبني بتوع العربي ولا العربي ديالهم،..


Shinteer،..
حلوة دي، دا الرماد ود قدحو،..
بعدين مسعول من الخير، إنت يا ود أشيقر جنى عريب وألا "عجمي" زي أخوك محسن خالد دا؟ أصلو ود البدوي داك مُغربي أبيييض، ما معانا
باقي حميدة صاحبي مارق زبائن المكان دا كلهم: من غير الناطقين باللغة العربية
شوف عليك الله يا ود أشيقر أولاد العرب، ناس حميدة، عربيهم كيف؟
من غير الناطقين باللغة العربية، هسع الجملة دي معناها شنو؟ تضبح أبوي كان فهمت كلام درفون الحارث بن حِلزّة دا!
شايفو حميدة صاحبي رجع يكاويني تاني، قلت أكاويهو شوية ونواصل تعليمو،..
محسن خالد يا حميدة، واحد، من الناطقين بغير العربية


...

Post: #445
Title: Re: إصلاح الكتابة في المنبر
Author: هاشم نوريت
Date: 04-26-2006, 06:20 AM
Parent: #444

استاذنا محسن خالد
والاحباب منتسبى مدرسة اصلاح الكتابة
دبايانا
الحمد لله الاستاذ محسن رجع لينا وكما حبيبنا حبشى لقى ليهو اجابة لاسئلتو.
والتحية مرة ثانية للاستاذ محسن والجميع.

Post: #446
Title: Re: إصلاح الكتابة في المنبر
Author: محسن خالد
Date: 04-26-2006, 08:32 AM
Parent: #445

..


هاشم نوريت،..
دبيانا،..
اتوحشناك ياخي،
وأريتك طيّب وفي أحسن الأحوال
تحياتي لك وكن بخير
أبداً بخير

....

Post: #447
Title: Re: إصلاح الكتابة في المنبر
Author: Shinteer
Date: 04-26-2006, 10:33 AM
Parent: #446

كيف يا محسن. ياخوي كلام أخونا محمد إي سليمان ده وقع ليك؟. أنا غايتو ما قدرت أفهم الغلط وين والصاح وين. يا ريت لو يقدر يسهب في الشرح عشان يوقّع لينا الكلام وما نبقى معلَّقين بين غلط ما معروف وصاح ما مفهوم.
===
Quote: من غير الناطقين باللغة العربية

دي خاصة بالدواب والهوام والأنعام والجماد. الحمار غير ناطق باللغة العربية. نفي النطق ينفي انتماء المعني لبني البشر الناطقين.

أنا بين العجم والأعاريب يا محسن. واللغات عابرة للجنسيات والقوميات. فمثلما "يضرسني" الخطأ الغليظ في اللغة الإنقليزية، "يفقعني" الخطأ الواضح في اللغة العربية. الخطأ الفاضح في اللغة الإنقليزية يتعرض صاحبه للبهدلة والوصم بالجهل، أما الخطأ القاتل في اللغة العربية فلا يوصف صاحبه بأي صفة سالبة. يسوط ويعوس على غباه.
==
وينك يا هاشم يا نوريت؟. شنو مختفي كده، قاعد تخطط لضرب إيران ولاّ شنو؟.

يا عادل البدوي، وينك يا زين؟. طبعاً عادل ده فردة من الزمان الأول وهو مغربي صحيح لكن يبدو لي إنه أمازيغي، والله تعلم.

Post: #448
Title: Re: إصلاح الكتابة في المنبر
Author: Adil Al Badawi
Date: 04-27-2006, 03:29 AM
Parent: #447

سلامات يا شباب وسامحونا فقد شغلتنا عنكم شواغل وأحزان،

Quote: أصلو ود البدوي داك مُغربي أبيييض، ما معانا

Quote: طبعاً عادل ده فردة من الزمان الأول وهو مغربي صحيح لكن يبدو لي إنه أمازيغي، والله تعلم.

شايفكم شرَّقتو وغرَّبتو في شأن هويتي وما باقي إلا يجيكم أخونا بشاشا يبلِّعكم لسناتكم دي وما فرقت معاهو عربية كانت أو أعجمية. أمَّا إذا سألتم عني فأنا مِن المغاربة الزُرُق وقد اسودَّت بشرة أبي وعمي، على قول جيلي عبد الرحمن، مثل جذوع السنط وإني والله لمحبٌ* (مشكَّلة، كيداً في "لمزيدٍ") للمشبَّه والمشبَّه به. أما في شأن اللغة، فأحسب أنَّني جنى عريب وإن كانت جنى عِريبيتي قد طال عليها الأمد، وقيل تطاول عليها العُمُرُ، فتبدَّلت إلى عِجيمية ماني فارزاً فيها أكان بقيت من الناطقين بغير العربية وألا كمان من غير الناطقين بالعربية فَدْ مرَّة وترانا بِنْعافِر وقد قلت في شأن المعافرة في بوست آخر ما يلي:

Quote: ...فإنَّني أسعى بين هذه الأسافير، كما الكثيرين مثلي، آخذاً مما هو أعلم مني وواضعاً في "خرتايتي" ما أراه حكمة وتاركاً ما دون ذلك. أي، إنَّنا في هذه الأسافير نتعلَّم أكثر ممَّا نُعَلِّم

وهو قول أراه ينطبق على الجميع، أساتذة كبار أو مشخبطين عاميين يا معتصم، انطباق ذلك القفاز الشهير على يد "اللاعب المشهور" ذاك.

وددت لو انفرجت أسارير شنتير وعصاتا زجره المتقاطعتان، من زمن "نشوف العدد يا زول. أحسن من مجابدة النصوص والمفاهيم الدينية الغميسة"، عن فِريقة لكليمات يقمن صُلبي فألطش ضُبَّانة "أنَّى" ألحِّقها أُمَّات طه نعمنَّها قلَّبت علي مواجع في أيام ما عندي فيها من آتيها ذاتو لا من حيث أمرني اللهُ لا من حيث أمرني النحو.

تحيَّاتي لكم أجمعين.

* ما دام دخلتو في اللامات عالجو لينا بالمرة آلام الزائدة المتعلِّقة باللام الزائدة.

Post: #449
Title: Re: إصلاح الكتابة في المنبر
Author: محسن خالد
Date: 04-27-2006, 04:34 AM
Parent: #448

..

إزيك يا ود أشيقر،
والله بس داير أدخل وأنهم ود البدوي، لقيتو تلّب قدامي بثواني،..
أما عن سؤالك الأولاني، يمين أنا ذاتي ما فاهم، كان في شيء وقع ليك تعال أشرح لي،..
من هنا وجاي خلينا نركّز علي شغلنا، السوداني لو ما هدم ليك ما تحاول بناءه فلا تنتظر منه أن يبني شيئاً،..

يا ود البدوي حبابك،..
عارف البركة في شنتير، لأنو نبّه لإنو: من غير الناطقين باللغة العربية، ديل إلا كان البهائم،..
أها قلت لَي ناس محسن خالد الزُرق ديل قطّعو ليكم راهوبة تيموليلت البتلصف ديك في جضيماتكم،
شكيتم علي الله، اللمتمرين،..
أنا طبعاً بقدر أهظّر علي كيفي لأني أزرق وما في زول من الزرق متلي ديل بقدر يتكلّم معاي،..
زي أولاد خالاتنا الزرق في أمريكا، الواحد بقول لصاحبو يا نقرو، بس الله يقدرك وتكون وما ود أعمهم وألا خالتم وتقول الكلمة دي، وتعمل فيها ظريف،..
أما قصة اللغة دي أصلها قصة لغة وبس، المشكلة إنو ناس صاحبي حميدة الناطقين بالعربية ديل، كتابتم ما نضيفه زي كتابات أولادنا من النوبة والبجة والنوبيين والجنوبيين،..
المسألة مسألة تعليم وذوق وحس باللغة كان عربي كان إنجليزي زي ما قال ود أشيقر،..
يعني قارن كتابات "بت الأحفاد" مع كتابات "ألبينو" و"دينق"،..
بالله أتقول "ألبينو" و"دينق" ديل مُحَرّرين شوام، وبت الأحفاد من قبائل النيام نيام

بالنسبة لموضوع "اللامات" فدي حكاية،
اللام بتاعة: لمزيدٍ من التفاصيل دي، ما بقدر أفتي فيها كدا إلا بحكم "الجر"،..
حسب بداية الجملة، ممكن تكون لام تعليل، أو ابتداء، أو عاقبة، أو أيتها لام من صقع آخر، حاكم أخوانا البكتبو ديل، فيهم ناس محتاجين لمنطق الله والرسول دا، قبل اللغة البتعبّر عن المنطق،..

أما لامك الجبتها دي يا ود البدوي، أم رفع، فدي بنقدر نفتي فيها فوراً، لأنّك جايبها بالثابتة،..

إني والله لمحبٌ

لأنو فيها (إنّ) فطوالي بنعرف إنو دي "اللام المزحلقة"، تزحلقت من اسم (إنّ) لتتشعلق بالخبر،..

وكدا البعدها بجي مرفوع،..

كونا بخير، إلى أن نلتقي،..


...

Post: #450
Title: Re: إصلاح الكتابة في المنبر
Author: معتصم الطاهر
Date: 04-27-2006, 01:08 PM
Parent: #1

رغم إنى لا أرى ن الخبر لا علاقة له بالاسلام
وربما المصداقية ..

لكن ناس ورا ديل برضو فى ..



Post: #451
Title: Re: إصلاح الكتابة في المنبر
Author: محسن خالد
Date: 04-29-2006, 01:22 PM
Parent: #450

..


معتصم الطاهر،..
إزيك،..
الحقيقة هي أن لا تقول الحقيقة....
أهلنا بقولوا في أمثالهم: الحقيقة يا يقولها فارس يا مجنون...
هسّع زولك دا إمام جامع؟ إمام مش مُصَلّي ساي...
وأشتر كمان، هسع كان دا سفيه حريف ما كان أمورو سلكت
بلا كسّير رأس بلا نبايش جرائد،..
بس (الظن الحسن بالناس من واجبنا برضو) فصاحبنا الإمام دا
يمكن أشكل عليه معنى "أنَّى" في الآية، "أنَّى" ظرف مكان، الحل شنو؟
بس الفطرة -مش "أنَّى"- بتوصّف الدرب الصاح،..


...

Post: #452
Title: Re: إصلاح الكتابة في المنبر
Author: Muhib
Date: 04-29-2006, 10:41 PM
Parent: #451

ياحبيب محسن بوستك جميل .. عندي ملاحظه فتقبلها ..لاحظت انك بتستخدم كلمه اوكي Okay حتي اثناء شرحك لقاعده ماء ..طالما البوست عربي وبعالج اشكاليه لغويه عربيه كان من الافضل ان تقول ..طيب او كلمه استدراكيه اخري .... ولكي ودي وهذه فقط ملاحظه ..محب

Post: #456
Title: Re: إصلاح الكتابة في المنبر
Author: محسن خالد
Date: 04-30-2006, 09:06 AM
Parent: #452

..

Muhib،...
تحياتي ومرحب،..
ملاحظتك معتبرة، بس نسوي شنو مع العادة والنسيان،..
خصوصاً إنو يومي كلو رأسي بكون شغال عشرات الرطانات
شيء شامي، خليجي، إنجليزي، مصري، مغربي،
وهنود وباكستان وفلبينيين تتكلم معاهم بحاصل كل اللغات الفوق دي مع شاسي أوردو أو بشتو،..
ربنا يذكّرنا،..


..

Post: #453
Title: Re: إصلاح الكتابة في المنبر
Author: فيصل نوبي
Date: 04-30-2006, 03:23 AM
Parent: #1

محسن

صاحب الدار سلامات و اول مداخلة لينا مع بعض ...

سلام الي الجميع

قرأت هذا الرابط و اتمني ان يعطيه محسن اهتمام

محسن خالد – أصلحت الكتابة في المنبر .. فمن يصلح ما تفسد ؟

Quote: يعتبر البوست إصلاح الكتابة في المنبر الحر من أجمل بوستات المنتديات السودانية والعربية قاطبة ، إن لم يكن أجملها إطلاقا ، وبالنسبة لي هو أفيدها ، فالرجل ( محسن خالد ) اتضح انه نحوي ضليع ، لم يكتفي بالنقل والحفظ فقط ، لكنه يجتهد محاولا التجديد في اللغة ، وهي تقبل ذلك لأنها تتطور تطور الكائن الحي .
لكن محسن خالد في محاولته إصلاحه كتابة الكتاب في منبر اون لاين ، شطح وشط بالبوست وخرج عن هدفه إصلاح الكتابة إلى أمور أخرى ، اعتقد انه وفق في بعضها وجانبه التوفيق في أخريات – بفرضية حسن النية في تفسيره الغريب – وسأحاول الرد على بعض الأمور التي أثارها ، وستكون الردود من وجهة نظري الشخصية – وما أنا بعالم أو فقيه ، لكن تجليات الترابي هذه الأيام وتجليات محسن خالد ، شجعتني على الخوض في ذلك ، يمكن تلفق معانا .

Quote: اللبيب بالإشارة يفهم

محسن بقول
"مثلاً يقولون (اللبيب بالإشارة يفهم) أنا فوراً أجيب: دا العوير البفهم بالإشارة، أو الأبكم، اللبيب بدون إشارة بفهم،.."
ويقول
"فكما أسلفت لصديقنا محمد الأمين موسى، اللبيب –المتلقي هو الذي يفهم بدون إشارة، واللبيب –الكاتب، هو أيضاً من يُبَلِّغ بالحروف دونما حاجة لـ"رموز" إلا فيما هو ضروري،"
يكون ما كتبه ويظنه محسن صحيحا إن كانت الإشارة مصاحبة للغة ( شوف او سمع ) وبتبقى الإشارة في الحالة دي زيادة يحتاجها من يقصر عنده البيان ليتمها موية زي ما بقولوا ناس الجيش ، وطبعا الكلام ده ما بعجب ناس المسرح وناس اللغات البصرية ، عشان ده عمود أساسي في شغلهم ،
لكن في حال كانت الإشارة وحدها ، والإشارة هنا اعتقد انه مقصود بها جميع الإشارة ، باليد بالراس بالشلوت بالعيون إيماءة غمزة ...بكون قمة الذكاء والفطنة انو تفهم بي إشارة بدون صرف عربي كتير
اعتقد من وضع المثل يقصد إشارة بدون مساعدات منطوقة ومحسنات بديعية ، مكتوبة أو مسموعة ، إشارة حاف يعني ، إشارة بحته ، تأخذ مكان اللغة والحديث ويستعيض بها عنه ، و هذا مستوى عالٍ( إن شاء الله تطلع صاح عالٍ دي ) جدا من التواصل يتطلب توافق فكري وخبره – زي ما بقول عادل إمام – أو فطنة وذكاء ، لا يفوقها شي إلا التواصل الحسي غير المنظور بتاتا ، تخاطب العقل مع العقل بدون وسيط ، وهو شي لم يثبت بصورة قطعية بعد ، إذا أو إذن – البتعجبكم فيهن - من يفهم بالإشارة فقط بدون لغة ( مكتوبة منطوقة ) ودون شرح هو لبيب ( والله اعلم ومعاه الناس الفاهمين شديد )


و لكم التحايا و الاحترام...

Post: #454
Title: Re: إصلاح الكتابة في المنبر
Author: محسن خالد
Date: 04-30-2006, 08:58 AM
Parent: #453

...


فيصل نوبي،..
مرحب بيك كتير، وأهلا
في أول مداخلة ليك،..
وكن بخير
تحياتي للأخ كاتب البوست،..
وقولي له:

هذا المثل لا يتحدّث عن الإشارة، وإنما عن الذكاء والنباهة...
والتواصل التقليدي، عبر اللغة والإشارات،..
بينما مادة المحاكمة هي سرعة الفهم، الانتباه، الإلماح،
الذي قلته أنا: أنّ نابههم هذا إن كان نبيهاً بالفعل، فسيتواصل عبر عقله وحدوسه الخاصة، ولن ينتظر حتى يلكزوه بالإشارة، هكذا ما زادوا على أن جعلوا منه متأخراً في الفهم، مش متأخر وبس، وإلا يدردقوا ليهو فهّامات كمان،...
هنا الكلام عن حالة بأكملها وليس عن مفردة "الإشارة ودلالاتها"
هنا في قصة زول ما فهم براهو، أشّروا ليهو عشان يفهم،..
هاك قصة للإشارة لدى أفضل إحالاتها،..
في واحد في حلتنا ما بعرف ياكل إلا مع مرتو، طبعاً دا بَطَال في أعراف الجعليين،
الراجل الضو مفروض ياكل في ديوان مميّل علي الشارع وبابو مفتوح لديمة
الزول دا عندو ولدو صغير مصلّت، أمو قالت ليهو تمشي تقول لأبوك ختينا الفطور
بس أوعك تقول ليهو قدام الرجال المعاهو،..
الشافع وقف لأبوهو في الباب وناداهو: يابا تعال، أنا دايرك،..
طبعاً داك مجتمع ما عندو حاجة اسمها خصوصية،..
اتشالبوا الشافع طوالي، يا ولد قول ساي عان الرويس،..
الشافع أب صنقور دا، هسع أبوك الملخلخ دا يقوم يجيك بره هو..
والله ولادة آخر زمن، شوفو منفنس كيفن!
أبوهو عارف قصة الشافع ياتو قصة، لكن يقول شنو؟
أها فيهم واحد ظريف داير يتلاعب علي الشافع، قال ليهو أسمع:
نحن بنغمض وإنت كلّم أبوك بالكلام الدايرو،..
الشافع قال ليهو لكن ما بتفتحو، حاول يطمّعهم في غباهو،
وإنو كيشة ويمكن التلاعب بعقله... قالوا ليهو أيوة ما بنفتّح،
قلنا الشافع مصلّت، كلهم وافقوا يغمضوا، وهو يتكلم
قال ليهم أحلفوا، حلفوا ليهو بكل جدية باعتبار إنو هو ولد مغفل،..
الجماعة غمّضوا كلهم، الشافع "أشَّر" بايدو علي خشمو، حركة الأكل المعلومة،..
أطلق (الإشارة) مبلّغاً رسالته، ثم أطلق ساقيه للريح،...
الإشارة هنا قلنا لدى أفضل إحالاتها،
ومع ذلك احتاجت لتعطيل "بصر" المستهدَف، كي تكون ذات قيمة،..
كونا بخير،..


...

Post: #455
Title: Re: إصلاح الكتابة في المنبر
Author: فيصل نوبي
Date: 04-30-2006, 09:06 AM
Parent: #1

أشكرك عزيزي

وسوف اكون متابعا ... و قد نقلت الرد

( شغل قوالات )

Post: #457
Title: Re: إصلاح الكتابة في المنبر
Author: Muhib
Date: 04-30-2006, 10:38 AM
Parent: #455

Quote: Muhib،...
تحياتي ومرحب،..
ملاحظتك معتبرة، بس نسوي شنو مع العادة والنسيان،..
خصوصاً إنو يومي كلو رأسي بكون شغال عشرات الرطانات
شيء شامي، خليجي، إنجليزي، مصري، مغربي،
وهنود وباكستان وفلبينيين تتكلم معاهم بحاصل كل اللغات الفوق دي مع شاسي أوردو أو بشتو،..
ربنا يذكّرنا،..


جميل ..كنت بقراءه في قاعده الفعل الماضي والمضارع وفجاء رائيت اوكي واخذت زمن لكي استوعب انك قاصد استدراك او بالسوداني تاخد نفس من الجمله الطويله ..وبجي صادي تاني ولك حبي ...

Post: #458
Title: Re: إصلاح الكتابة في المنبر
Author: محسن خالد
Date: 05-02-2006, 04:26 AM
Parent: #457

..

فيصل نوبي،..
والشكر لك،..
أخوك كيشة في الانترنت، وغير المحل دا ما بعرف تاني،..
يعني كلام الشفت دا لو ما وريتني ليهو ما كان بشوفو
كونا بخير،
ولكما التحايا

Muhib
تحيا وود
بتكون أبت نقري ليك، فعلاً ممكن تربك
يذكّرنا الله، ينبّهنا لما نسينا، ويعلّمنا ما نجهل
كن بخير

...

Post: #459
Title: Re: إصلاح الكتابة في المنبر
Author: محمد أبوجودة
Date: 05-02-2006, 08:34 AM
Parent: #458

عزيزي * الأستاذ،
الرِّوائي / محسن خالد


كثير التحايا وأصدق الدّعاء بموفور الصحة والعافية والتجدّد وتحقيق المرجو ؛ والتحايا ، والدّعاءِ موصولَيْن للأخوات والإخوة المتداخلين بالاضافة والخصمِ (ولا أقول الحَسْمِ! كَدَيْدَن الحَسَبَة المعاصرين من العرب!) ،وبالجّبْر والتكسيرِ، وبالتكامل والتفاضلِ ، وفي كُلٍّ خير ، إن توفّر لمُحسننا المِجـَرِّي ، بَـراحُ الانتداء .

قضيتُ اليومين الماضَيين ،
سعيداً، بقراءة هذا البوست عظيم الفائدة، بما احتوى من تقعيدٍ لأصولِ الكتابةِ نحويـّاً في عَرضٍ سـَـلْـسَلِ النَّـهج ، لطيفٍ على الأذهان المجهدة والأفئدة المكدودة بفعلِ اللأواء المتجدِّدة صباحاً ومساء . لاغروَ ، فقد تضمّن البوست إبحاراً ماهراً بين أمواه النحو العربيِّ الشرود ، ومِلْحِ التفاسير الدينية الأُجاج ، وعذْبِ أنهار العامِّية الفُراتْ ، غوصاً لاستجلاء الصَّـدَفات المكنونة ، والدُّرر المخزونة ؛ فضلاً عن تلك اللُّمَع الاستطرادية في تاريخ العلوم والآداب والتعريفات والمصطلحات شرقاً وغربا ؛ فَلَكَ ، عزيزنا المُحسِن ، جَمُّ التهنئة بهذا العمل الخلاّق ، والعِلم الذّوَّاق ، والقريحة الصّادحة بسجع الحمام طوراً ، وزئير الأسد طوراً آخر ، ما تَطَلَّبَ السياق واقتضتِ الأنساق ..

استوقفني، إعجاباً، الكثيرُ من المقولات بين طيّات هذا البوست المقروء ؛ وعلى سبيل المثال، لا أزال مستصحباًً قولَكْ : [ هذا المكان هو عالَمٌ ليس من الافتراض أو الوهم التكنولوجي ، كما يروّج الكُسالى والمتهرّبون من ضرائب الكتابة " وقطائعها " ، بل هو عالمٌ من الكتابة، وشروط هذا العالم كلها موضوعةٌ على أُسس الكتابة، فيا أحبّاء رجائي إليكم دعوا العجرفة الجاهلة ، وتعالوا إلى هذا المكان واذهبوا أيضاً إلى غيره، لمجرّد محاولة تحقيق شروط هذا العالم ، ..] ، آملاً أن يلتفت الناس لما يفيدهم ويزيدُ من عارضتهم العلمية ويُنقِصُ من التَّردِّي الكتابي الماثل بهذا المنبر العام إنْ صَـغوا إلى هذه المقولة الرّاجحة ، وتحاشدوا لقراءة هذا البوست ممراع الخُضرة ، جليل النّبْرة .. و
تكاد يدي تَندي إذا ما لمِستُها،،، وينبتُ في أطرافهاالورقُ الخُضُر


من قصيدة لأبي صخرٍ الهُذليِّ ، جاء فيها :

عجبتُ لِسعي الدّهر بيني وبينها ،،، فلمّا انقضى ما بيننا ، سكنَ الدّهرُ
فَيا حُبَّها زدني جوىً كل ليلةٍ ،،، ويا سَلوَة الأيّامِ موعدك الحشْـرُ


هذا البيتُ، كما أوضحتَ ، أخي مُحسِن، هو لأبي صخر الهزلي، وقد ذكره أبوالعلاء المعرِّي ، في رسالة الغفران** صـ428 ، في معرض كلامه عن الدَّهريّة ؛ وقد نوَّهتْ المُحقِّقة ، أنّ نفراً نَحـَـلوه " مجنون ليلى " ! كما ذكر ابن قُتَيبة في " الشِّعر والشـُّعراء " .. وعليه ، يبقى تعويلك على أبي العلاء وفراسته في نَسَبِ القريض إلى قائله الصحيح، دِلالة على حُسْنِ استذكارك لما تقرأه مهما طالت الطِّيَلْ وتكأكأتِ المَـروِيـّات بآفاتِ الرُّواة ..

العَلَمانيَّة أم العِلْمانيّة ؟ Secularism
آنِستُ تماماً لتعريفك لها والذي تقول فيه :[العلمانية كانت بالأساس وبالتعريف الصحيح، فصل العلم عن سلطة الكنيسة] . وكذلك الفقرة السابقة على هذا المقتبس من حديثك :[طيّب مصطلح العلمانية دا نحتوه باستدخال كلمة علم ليه؟ عدم معرفة !؟] .. فهل هيَ من الترجمات الموفّقة ؟ وما مدى مُقاربة القياس لطبقة " الإسلام السياسي " بظهرانَيْنا! بانغلاقية " الكنيسة " الأوربية عقابيل العصور الوسطى ؟ .

عاد الغائبون إلاّ أخاك
والمستثنى ،هاهنا ، منصوب ، كما أسلفتَ ، عزيزي محسن ؛ وهو ، كما اعتقد ، من " الأسماء الخمسة " وليس مُثَـنَّى يُنصَب بالألف! أو جاز لنا أن نقول: عاد المحاربون إلاّ أخواك ! .. وأوقَع منها ، أخوَيْك . ولعلِّهـا سانحة طيِّبة ، بأن تفيدنا عمّا إذا كانت الأسماء (والتى تخرج عن أصل الإعراب في بيان إعرابها) هيَ خمسة أم سِـتّة ؟ ..فلـقد طالما نستذكرُ أنّها كانت - أيّام الابتدائي – خمسة ! أبوك وأخوك وفوكَ وذومالٍ وذو نَسب ، بيد أنّي قد اطّلعتُ مرّة على شرحٍ لمحمد محي الدين عبدالحميد لكتاب " قطرُ النّدَى وبَلُّ الصَّدى ، لأبي هشام الأنصاري" يُفيد بأنّها سِتـَّة ! مع خِشيَتى ان تزيد عند آخرين ، كوفيين أو بَصرِيين ، عن هذا العدد ! . ولا تَنسَ ، عزيزنا مُحسن ، أن تفيدنا عن هُمَيزة " ان " حينما تقع بعد "كما " ، وبالمناسبة، ما هو بيان " كمـا " هذي ؟ .

الحديث .. وما أدراك ما حِرفَةُ الأدب !
حِرفةالأدب، موسومة في كتب التراث بأنّها حِرمان وتعذيب للأدباء ! وأذكر أنّ " أحمد أمين " قد أشـار في صدر تحقيقه لكتاب " الامتاع والمؤانسة ؛ لأبي حيان التوحيدي " إلى زَعم الكثيرين لتلك اللّعنة التى تصيبُ قُــرّاء هذا الكتاب ! ويقولون أنّ ابا حيان قد أدركته حِرفة الأدب ! فساءت أحواله حتى اضطرّ إلى إحراق كُتُبِـه ، وزعموا انّه قد قال ، إنّي قد طلبتُ بها المثالة بين الناس ، فلم أجد غير الهوان ! . وقد نُسِبَ إلى الخليل ابن احمد الفراهيدي : إذا كثُر الأدب، قَـلَّ خيره ، وإذا كثُر خيره كثُرَ ضَيْرَه .. ونســبوا إلى أبي بكر الخوارزمي :
إن سَـــرَّك حرمان،، به تصبحُ مَقْليـّا
فكُن ذا أدبٍ جزلٍ ،، وكن مع ذلك نحويَّا

وأنشــدوا :
قالوا أديب فأين المال؟ قلتُ لهم ،،، قوسي بلا وترٍ وسهمي بلا فوقِ
من لايكون له جِدٌّ يُســاعده ،،، تكون آدابه كالنّفـخِ في البوقِ !!

ويقولون : المتقدِّم في الحذق متأخِّرٌ في الرِّزق ! وحِرفةالأدب أعدى لصاحبها من الجرب!.. والطّامة الكُبرى ، أنّهم ينســبون هذا الحديث إلى الرسول صلّى الله عليه وسلم ، أنّه قال:" ما ازداد الرجل حذقاً في صنعة إلا كان ذلك نقصاً من رزقه" ! .. وتســاؤلي : كيف الخلاص ُ من مِثلِ هذا ؟ وأين نَضـَع تلك الأقوال المناقضة لهذه الفِرية المسمّاة " حِرفة الأدب " ؟ من أمثال : إنّ الله يحبُّ من أحدكم إذا عمِل عملاً ، أن يتقَــنَه .. وكذلك ، القول المنسوب لعليِّ بن أبي طالب " قيمة المرءِ مـا يُحسـِنَـه . ومامدى تسـاوق تلك الفكرة مع جدلية المثقَّف والسـُّلطة ؟ تلك الثنائية التى تكون فيها كَفّة السـلطان هيَ الرّاجحة ، على الدَّوام عند بني العُرب منذ أيّام ابن المقفّع وأبي عثمان عمرو بن بحر الجاحظ وأقرانهم في خِدمة التنوير المعرفي في مسيرة الثقافةالعربية الصاعدة الهابطة !

اعتذر عن الإطالة في الحَكي!
والاستطالة ، غير المقصودة، في انتهاج الفصحى ! ولكَ عظيم تقديري ، وإعجابي بهذا البوست المفيد ؛؛ آلشــريف ،،
ويضحك نهارك يا جميل

..ودام عليك هذاالبهاء والرُّواء .. ولكم التحايا جميعا ..








- - - - -- - - - - - - - - - - - - - - - - - -- - - - - -
* - أصرّ مُصَحِّح الكمبيوتر على توصيل هذه الجملة : المسند إليه مرفوع تستبدل عزيزي بالكلمة عزيزاً لتصحيح الخطأ " . فما رأيكم، دام فضلَكُم؟" .
** - رسالة الغفران ، لأبي العلاء المعرّي ، بتحقيق د. بنت الشاطئ – طبعة دار المعارف 1969م

Post: #460
Title: Re: إصلاح الكتابة في المنبر
Author: فيصل نوبي
Date: 05-02-2006, 08:42 AM
Parent: #1

سلامات يا حبيب

أمسك عندك ...

Quote: نشكر الاديب كثيرا
ونتمنى ليه تمام الصحة

طبعا متفق معاك في انو مادة المحاكمة هي سرعة الفهم، الانتباه، والالماح
لكن ادوات التحكيم هي شنو ؟
اللغة ( شوق وسمع )
الاشارة ( كافة انواعها )
التواصل الحسي ( العقل مع العقل بدون وسيط)


اعتقد ان ترتيبها كما هو عالية اللغة فالاشارة فالتواصل الحسي ، اذا استخدمنا كلا منهم على حدى
بمعني لغة براها اشارة براها وتواصل حسي براه او الثلاثة مع بعض وهو ما يحدث كثير بل هو الاساس في التواصل بين البشر
يحدث ان نستخدم انثين من الثلاثة مع بعضهم عند التواصل
لغة مع اشارة في حالة الونسة نستخدم اداوت الجسد ( يدين ، الوجه ، ...) وفي حالة الكتابة نستخدم اداوت الاشارة ( ؟، ! ، ...)
لغة مع تواصل حسي (تتمه نقصان اللغة بتواصل فكري وهذا يحدث غالبا عند من يتواصلون مع بعض كيثرا ومع كثرة التواصل يختصرون اللغة - مسموعة منظورة – ويفهمون البقية بالفطرة استنادا على مواقف سابقة تكررت كثيرا .
اشارة مع تواصل حسي
الثلاثة مع بعض
طبعا لو كان التواصل حسي فهذا قمة الفهم
ويليه التواصل عبر الاشارة حاف بدون لغة
ثم التواصل عبر اللغة

وعشان كده بكون لبيب هو من يفهم بالاشارة
ونحن نضيف ليها من عندنا كلمة فقط

ويبقى المثل
اللبيب ، فقط بالاشارة يفهم

مع خالص الود

Post: #461
Title: Re: إصلاح الكتابة في المنبر
Author: محسن خالد
Date: 05-02-2006, 09:43 AM
Parent: #460

..



محمد أبوجودة،..
تحياتي وتسلم أولاً علي كتابتك السمحة ومجيهة دي، تنعش الروح،..
خليني أشوف كلامي مرة تانية وأرجع ليك،..
مبدئياً الأسماء هي ستة بس فيهن واحدة بايخة بعيد عنك:
(أبوك، أخوك، حموك، فوك، ذو مال، وهنوك)
والهن هو: عضو المرأة التناسلي،..
خليني أشوف كلام الوسكي الفوق دا وأجيك راجع،..


فيصل نوبي،..
تحياتي يا جميل،
استلمنا، وشاكرين أجزل الشكر


...

Post: #462
Title: Re: إصلاح الكتابة في المنبر
Author: محسن خالد
Date: 05-02-2006, 10:10 AM
Parent: #461

..

محمد أبو جودة،
شكراً جزيلاً على تصحيحك لي،
يومي هنا خلاص شطّب،
إن بقينا حيين بجي بعلّق علي كلامك حتة حتة
وكن بخير


...

Post: #463
Title: Re: إصلاح الكتابة في المنبر
Author: محسن خالد
Date: 05-03-2006, 02:45 AM
Parent: #462

..



محمد أبو جودة،..
أها يطيب صباحك، غايتو أنا في مهكع هسّع مطالعو صباح
ما عارف لو دي أول مداخلة ليك أم لا، لكن ذكّرتني أول ما ادّاخل معاي شنتير وعادل البدوي، ونرجو إنو تحارس معانا بهنا،..
شكراً علي كل كلامك السمح في حقي، وأريتنا متكاتفين كلنا علي السماحة، وعلي تصحيح أغلاطنا وسهونا وعجلتنا، أولاً، ثم إنارة ما بوسعنا إنارته لغيرنا ما كان بالعمر حيلة،..
شكراً لكونك قطعت لينا شك بيت صخر الهزلي،..
أنا وأخوي ود أشيقر دا كابسناهو في رسالة الغفران بس ما لمينا في محلو،..

العِلْمانية في رأيي ترجمة طاعمة ذاتها، وبتركّز الموضوع في العلم اللهو جوهر المسألة نفسها،...
أمّا الغائبون ردّهم الله، فواضح يا ود أب جودة إنو العربي كلو ما فيهو أي حاجة بتنصب بالألف عدا (الأسماء الستة) أها دي دقسات العقل البتلّب تلّيب، عندي رأي إنو رأسي قاعد يتلّب تلّيب، بكتب في حاجة وبفكّر استباقياً في حاجة تانية،..
بعدين الأسماء الستة دي لو ما أخاف من الكضب أعمى المعرّة نفسو مخرّم بعندها، ممكن يكون في الحواشي ما متذكر بالقطع، بالنسبة للنحويين "هنوك" وفروج وكدا دي بياخة، مع إنها بتذكر في المراجع الأساسية، لكن الأدباء بلقوا فيها ملعبيبة وظرافة بعرفوها براهم،..
(أبوك، أخوك، حموك، فوك، ذو مال، هنوك)
تنصب بالألف... قابلتُ أخاك
ترفع بالواو..... جاء أبوك...
تجر بالياء.... مررتُ بذي مال

طيّب بيان "كما".... الكاف دي حرف تشبيه، أمّا "ما" فممكن تكون مصدرية، أو كافّة أو زائدة،...
أها همزة "إنّ" البتجي بعدها دي من نوع الحاجات الواحد بزوغ منها، لأنها ما كسر طوالي زي بعد القسم والقول وحيث وإذ..... إلخ، القاعدة أعلاه...
بس ممكن ندافر فيها، مدافرتنا الماعاجبة بعض الناس دي، عشان تبين بشكل ساهل
أول حاجة نقولها في أغلب الحالات بتكون همزة (إنّ) بعد (كما) مفتوحة، يعني كان غلبتك أفتحها طوالي، وبرضو معاك (بما) زيها وزي (كما)
أما التبيين الدقيق للعايزو كالآتي:
تكون همزة (إنّ) بعد (كما) -مفتوحة- إذا أمكن تأويلها بمصدر
المثال: تلقّيتُ بعض المعلومات عنك كما عرفتُ أنّك ذكي..................... التأويل: كما عرفتُ ذكاءك


تكون همزة (إنّ) بعد (كما) –مكسورة-، إذا معطوفة على جملة ابتدائية أو في حكم الابتدائية
المثال: أنت مجتهدٌ كما إنّك نبيه
هنا الجملة للعطف، وكمان ما بتقدر تأوّل الجملة وتقول: أنت مجتهدٌ كما نباهتك

المهم في حالة تعصلج معاك أفتح وخلي الذنوب علي أنا

أمّا الأدب وبشتنة الحال، فدي متلازمة محسن، بضحك من روحي ومسميها كدا، لأنو ما أظن في كاتب فلسان وقحطان أكتر مني،..
عارف فكرة التجويد دي نفسها، بتختل بالنسبة للكتاب لما يكون شغلهم –الأدبي- برضو هو مصدر رزقن،..
الواحد ببقه من كترة الكتابة رأسو قايم قوب قوب، وفيهو فتحات وشطحات، عندو قدرة يكتب طوالي، بس التركيز بقل،..
ودا الدرب الخلاني لاهسع ما بستسيغ فكرة العمل بشكل دائم في الصحافة،..
يا زول طوالاتك دي حلوة ومدروسة وجميلة،..
كن بخير، وعاونا يا صديق في محارسة هذا المكان
أتمنى عليك إكمال قراءة البوست ومراجعتنا فيه بما يعنّ لك...

وكن بخير،..

...

Post: #464
Title: Re: إصلاح الكتابة في المنبر
Author: فيصل نوبي
Date: 05-03-2006, 09:07 AM
Parent: #1

Quote: محسن قال :
شخصياً أفضّل طرائق بتوع السيميلوجيا، في التعامل مع النص بحياد كبير، وبالقراءءة له فعلاً، وليس إنجاز الإسقاطات عليه

ودي كلام عندي فيه راي ، حيث إن ( لقيتوني مذاكر موش ) النص كُتب وهو يحمل في داخله إسقاطات كاتبه مضمنه فيه بل هي لبه وسبب كتابته ، لا اعتقد أن هناك من يكتب بالحياد الكامل ولن تكون هناك كتابة أصلا مع الحياد الكامل وبالتالي لا يوجد من يقراء بحياد كامل ، فالبشر يكتبون ما يفهمون ويقتنعون به ، ويسقطونه في كتاباتهم ، وهم يقرءون بما يفهمون ، ويحملون في مخيلتهم ما يقتنعون به عند القراءة الأولية – يمكن فيما بعد ان تقتنع بوجهة نظر الكاتب وتكون في الحالة دي هي قناعتك - .
صحيح يفترض وأنت تقراء اصطحاب كل الفروض والآراء ،
لكن برضو العضم عند قرايتك بكون قناعتك ورائيك
يعني الحياد ده ما بكون إلا في كتابة الأرقام ، وكمان ما دايما

وهنا بتبرز أسئلة أتمنى الأديب يقدر يجاوب عليها

حينما نقراء هل :
1)نقراء لنفهم حسب ما نحمل من فكر متجاهلين ما يريد أن يوجهنا إليه الكاتب
2)أم نقراء ونحن نحاول أن نفهم النص وفق وجهة نظر كاتبه وماذا يريد من كتابته النص

ونفس الكلام عند الكتابة
هل نكتب لنا نحن ومن اجل أن نضع فكرنا في قالب مكتوب للجمهور ، ام نكتب وفق الفهم العام وزوق الجمهور وحسب ما يريد
؟؟؟؟؟؟

ده كله لمن يكون الكلام عن النصوص الوضعية ، والكاتب بشر زينا ،
اها كيف عندما يكون النص رباني والكاتب خالق ؟
هل سنتعامل مع القرآن بنفس الفهم مع كتابة البشر ؟

Post: #465
Title: Re: إصلاح الكتابة في المنبر
Author: محسن خالد
Date: 05-03-2006, 09:50 AM
Parent: #464

....



فيصل نوبي،
إزيك،
عارف؟ اللغة دي سَكَر ومرايس،
أها إنت والشفت حالفين تخلوني مكتول في كمبوين،..
دي ما كانت سكرة،..

أولاً الاقتباس الأول دا كلمة (القراءة) دي ما حقتي، بمعنى "رسمها"، صاحبنا الشفت نقل الجملة دي نقل شكلو، فقام دبّل فيها الهمزة، يا الشفت هوي، زي ما بقول الغناي: قلبي غافر ليك ذنوبك،..
طلعت درس كسر همزة إنّ مذاكرو كويس، بس أرجع لكتابة الهمزات عموماً، ودي دعابة،..
أمَّا نقدك الموجهو لعلم السيميولوجي، ومش لمحسن خالد،..
بمنطقك نفسو بيصبح كلو غير مقبول، لأنو أصلاً كلامي دا أنا قلتو عن النص القرآني تحديداً،
ودي مداخلتي كلها، أنا أخدتها من اقتباسك ليها، حتتها وين هسع ما عارفها، علي ضمانتك،..

Quote:
هناك اختلافات واضحة أيضاً وضعها القرآن بين المفردتين "الإنسان" و"بشري، آدمي" كمفردة واحدة، وهذا ما لم يلاحظه الكثيرون من المتدينين حين الحديث عن نظرية "دارون"، أنا طبعاً لستُ معجباً بنوعية "عبد المجيد الزنداني" و"مصطفى محمود"، فهما يحاولان تبرير الإعجاز بالعلوم، ولكنهما يشردان شردة بنات القنديل ليموتا بعطشهما في قلب الخلاء كما يُقال (عطش بنات القنديل) في أدبيات مجتمعنا الصغير، يحدث ركضهما عندما يتعكلت لهما العلم مع نصوص أخرى، شخصياً أفضّل طرائق بتوع السيميلوجيا، في التعامل مع النص بحياد كبير، وبالقراءة له فعلاً، وليس إنجاز الإسقاطات عليه، القرآن بشكل واااضح، وسااافر، ميّز بين (الإنسان)، وبالمناسبة القرآن لا يذكر هذه المفردة إلا ومتبوعة بالشر، فيما يُشير إلى الطور الأولي والمرحلي منه، ثم يتحدث عن "الآدمي أو البشري" بصورة أخرى، تشبه أن تكون صورة المُكَلَّف والراشد، صورة البشري الذي زاد جردل "دنقوسه وفاخورته" عن آخر في ماضٍ سحيق كان حجم (رأسه) أصغر، والدماغ الداخلي نفسه "كمادة سائلة ولزجة" كانت أقل أرطالاً بكثير عن (بشري) اليوم،..
(للمزحة بقولوا ليك خليك إنساني، وعندك إنسانية، في حين أنَّ (الإنسان) القرآن مارقو كعب وبتاع دم وبدائي وطور أولي وبرايمري خالص، مفروض يقولوا خليك بشري وآدمي، الشوام بقولوا "زلمة آدمي"، ودي أجمل، من "زول إنساني")،..
يعني واضح في القرآن إنو آدم كان ("مدماك" زيادة) اتولَّى أمرو ربنا بنفسه، والإنسان داك كان قاااعد وتافه ومشهور بالتفاهة والدم، والملائكة فتحت خشومن (قالوا: أتجعل فيها من يُفسد فيها ويسفكُ الدماء، ونحن نسبّح بحمدك ونقدّس لك)،..
يعني هم عارفنّو وشايفنّو، مش موضوع جديد كليةً، كيف يكون (الإنسان) كان مقترح شاورن فيهو الله يادوووب، (إني جاعلٌ في الأرض خليفةً) وهم يكونوا ناقشنوا، أبداً، هم كانوا بتكلموا عن الإنسان، وما عارفين إنو ربنا نوى يطوروا ويعمل من (الفسيخ شربات)، والشربات ياهو آدم ذاتو،..
بل الكلمة مميزة تمييز واضح في آية تانية: (وإذ قال ربك للملائكة إني خالقٌ بشراً من صلصالٍ من حمإٍ مسنون)،..
وعشان ما يجي عبقري ويقول إذن (البشر) من طين (يعني شيء جديد) نسألوا من هسّع طيّب وداك من شنو؟
(الذي أحسنَ كلَّ شيءٍ خلقه، وبدأ خلق الإنسان من طين)،..
ولاحظ –كروائي- لطريقة السرد، ربنا هنا ما قال خلق البشري، وإنما الإنسان، لأنو النقطة صفر في تعداد آدم،..


هو الله شنو؟ الله عقل ضخم، بوسعه ترتيب كل هذا الوجود والمجرّات بحيث تصبح المسألة من الضخامة أكبر من خلق الإنسان كما يقول القرآن: (لخلق السموات والأرض أكبرُ من خلق الناس ولكنَّ أكثر الناس لا يعلمون)،..
قلنا آدم مدماك زيادة في بنيان الإنسان، والإنسان أقدم من آدم، وهسع نحن لو أخطأ أي شخص في حق الآخر يقوم صاحبو طوالي، يقوليهو: عادي، ما إنت أصلك وفصلك كَيْت وكَيْت، "اتطورت والله"،..
وربنا يقر بهذا الإنسان القديم، وحينما يخطئ يذكّره بأصله وفصله: (هل أتى على الإنسان حينٌ من الدهر لم يكن شيئاً مذكورا)، طيّب يا جاحد ما نحن رفّعنّاك من خامل الذكر لشيء مذكور وكائن مفكّر، من روحنا، أي من عقلنا،..

طيّب الملائكة غالطوا ربنا، قالوا (الإنسان) دا تب ما منو خير، أها ربّنا (قلنا زادو مدماك) وهو كان في التطور بلغ مرحلة الساقين، الاستقامة، يعني طلع من حارة القرود، ويادوب "صول إنسان" وما اترقى بعد "ملازم بشري"، ربنا قاليهم تعالوا يا ملائكة أنا العالم بكل شيء، وبما أفعل، ما إنتو، تعالوا أتفرجوا:

(وعلَّم آدم الأسماءَ كُلَّها ثم عرضهم على الملائكة، فقال أنبئوني بأسماء
هؤلاء إن كنتم صادقين (31) قالوا سبحانك لا علم لنا إلا ما علَّمتنا، إنَّك أنت العليم الحكيم (32) قال يا آدم أنبئهم بأسمائهم، قال ألم أقل لكم إني أعلمُ غيبَ السموات والأرض، وأعلمُ ما تُبدون وما كنتم تكتمون (33)

هسّع القصة دي ما واضحة جداً جداً، بعدين دارون دا ما لعب، صاح هو سرّاق، والتطور والنشوء هو ما أسّسوا ولا ابتدعوا إنما شغل دكتور من جنوب إفريقيا، ما متذكرو هسّع، أنا بكتب من راسي فوراً، ودكاترة كتار بتاعين تخصصات مختلفة في إطار الزولجي، دراوين لمَّ الشغل دا لأنو حريف، وكاتب ملعون ومسّكوا الدرب، زي شغل ماركس مع ابن خلدون، ودي طبيعة العلوم كلها كدا، مدماك فوق مدماك، لامن نصل قصور الكمبيوتر، ماعدا عبقريات شرسة وشاذة زي (نيوتن) والزول دا بالمناسبة كان حاسد وغتيت وشرير عديل كدا، وحشّ لهالي رأسو حش بملعنتو، أو (إنشتاين)،..
المهم هي النقطة نفسها التي وصلت منها الإنسانية إلى نظرية (الجيشتالت)، لأنو بتوع جنوب إفريقيا كانوا شَغَّالين في تجارب كثيرة وخطيرة، أهمها: هل القرد يستطيع أن يحسب؟ طبعاً مع تضمين جزئية، إذا كان الإنسان قد جاء منه!؟ وكان افتراضهم الأولي، نعم، وكانت الاختبارات كالآتي، يختوا "موز" جوه حُفرة ويخلوا القرود تشوفها، الكلام دا قديم طبعاً، أها ينزلوا راجل واحد جُوَّه الحُفرة، القرود ما بتجي للموز، الراجل يطلع من الحفُرة ويمشي بعيد، يختفي، القرود طوالي تجي مبرطعة للموز،..
طيّب ينزلوا راجلين، يفرتك منهم واحد "بس" القرود ما بتجي، يفرتكوا الاتنين القرود تجي دافرة، قالوا خلاص (القرود دي بتعد لاحدي اتنين)،..
تلاتة رجال، لامن يفوت التالت القرود تجي مبرطعة، خلاص القرود شاطرة وبتعد لاحدي الرقم تلاتة، والعلماء المتدسيين في الشجر يشيلوا ويصفقوا،..
أها، أربعة رجال، هنا القرود "دقست"، بمجرّد تالت رجل طلع جات مندعرة، لقت الرجل الرابع جوه الحُفرة،..
طيّب الاقتراح اللحظي الفطير إنو هي بتعرف تعد لاحدي تلاتة، ولساها كانت (نظرية الجيشتالت) مدّسية في الغيب، قاموا جوهم ليك ناس البصريات، والحجّة وقفت، إنو المسألة متعلّقة بالبصر "بنظرة كلية" مش بالدماغ، بالتالي قرد يعد واحد اتنين تلاتة، ما يفترض إمكان تعليمه -كطفل- العد إلى عشرة فما فوق،..
يعني القرد بقدر يشوف الجسم الكلي لتلاتة أشخاص، ولو الجسم دا، (أي النظرة) نقص، القرد بقدر يعرف، لكن لو الحجم الكلي للـ(النظرة)، زاد من (سعة نظرة لتلاتة أشخاص) كدا القرد لن يستطيع التمييز، يعني شغلوا مبني علي الكتلة، لا بعرف يعد ولا يحزنون، والموضوع عندو علاقة بالتحليل البصري، مش التحليل الفرزي الحسابي، بتاع البشر، يعني شغل كاميرات مش جداول ضرب وطرح،..
من هنا وُلدِت الجيشتالت، وتفرقت وتلونت في العلوم، التشكيليون جابوا لوحاتن وقعدوا يشخبطوا نظرة كلية وجزئية، مدى بصري كُلّي ومدى جزئي،..
ناس التربية جابوا سبوراتن وقعدوا يشخبطوا نظرية تعليم كلية وتانية جزئية،..
وعيييك، النظرية عارت، شوفتوا كيف شجر العلوم بقوم؟ دي الفكرة،..
نرجع للإنسان والبشري، والما فاهم كلامي دا يراجع نظرية الجيشتالت، أو كمان تساءل مع روحك ونفسك،..

(تساءل، على الدوام تساءل، ليس بالضرورة من أجل أن تحصل على إجابة، بل يكفي أن تفهم مدى وطبيعة سؤالك فحسب، يكفي، لأنَّ هناك من يركضون هنا وهناك بأسئلة لا يدرون عن تساؤليتها الحقيقية شيئاً)،..

هنا دراما الإنسان كاملة، من سورة البقرة وفي ترتيبها الصحيح:

((هو الذي خلق لكم ما في الأرض جميعاً، ثم استوى إلى السماء فسواهنَّ سبعَ سمواتٍ، وهو بكل شيءٍ عليم (29) وإذ قال ربُّك للملائكة إني جاعلٌ في الأرض خليفةً، قالوا أتجعل فيها من يُفسد فيها ويسفكُ الدماء، ونحن نسبّح بحمدك ونقدّس لك، قال إنّي أعلم ما لا تعلمون (30) وعلَّم آدم الأسماءَ كُلَّها ثم عرضهم على الملائكة، فقال أنبئوني بأسماء هؤلاء إن كنتم صادقين (31) قالوا سبحانك لا علم لنا إلا ما علَّمتنا، إنَّك أنت العليم الحكيم (32) قال يا آدم أنبئهم بأسمائهم، قال ألم أقل لكم إني أعلمُ غيبَ السموات والأرض، وأعلمُ ما تُبدون وما كنتم تكتمون (33) وإذ قلنا للملائكة اسجدوا لآدم فسجدوا إلا إبليس أبى واستكبر وكان من الكافرين (34))،.. سورة البقرة،..

وفي كتاب (التوراة، الإنجيل، القرآن، والعلم) يقف موريس بوكاي، وهو متحوّل للإسلام، مع سفر التكوين، لأنو دقس بطريقة لم يدقس معها القرآن، سفر التكوين طبعاً بتعامل مع أيام الخلق السبعة كأنها أيام فعلاً سبت أحد اتنين وكدا، بينما اللغة العربية بتسعف الواحد يقول (أيام العرب) والمقصود منها حروب دارت لعشرات السنين، اليوم في لغة العرب يعني المرحلة، وكدا القرآن ما دقس، لأنو التطور احتاج لملايين السنين، بس "سفر التكوين" دقس هنا بالإضافة لإنو بقول الله خلق البحار والنباتات وشنو وشنو وشنو، والناس ووو.. ومتأخخخر يجي للشمس والنجوم والمجرات، طبعاً الزرّة والحوشة هنا واضحة، لأنو الضوء كان في البداية عشان الشجر يقوم والناس ووووو..
حسب ملاحظتي وتتبعاتي، في أي مكان –قرآني- ترد رواية الخلق، الشجرة لا تتقدم السماء أبداً، ودي اللعبة كلها ضوء فكلوروفيل، أعطك حياةً....
شوف القرآن بداها صاح الصاح، ((هو الذي خلق لكم ما في الأرض جميعاً، ثم استوى إلى السماء فسواهنَّ سبعَ سمواتٍ، وهو بكل شيءٍ عليم (29)))،..
الآية دي طبعاً ما ذكرت خلق الشموس والأقمار وو. مفردات السقف، لكن برضو مشت في الناحية دي، في آيات تانية بتتكلم بالتفصيل، وهسع ما عندي زمن أمشي أكوسها وألقطها كلها، البلقى آية مشاترة يجيبها ويجي،..
يعني في قصة الخلق القرآن طوالي بمشي السماء محل بركبوا الكهارب والأساس مش الشكل، لبناء الكون ومن ثم الكينونة، ضوء فكلوروفيل، أعطك حياةً كما اختصرنا الموضوع....



ما يمكن إضافته أيضاً هو أنني كنتُ أتساءل عن: لماذا قال الله (عرضهم) ولماذا كلمة (هؤلاء)، المعلّمتان، هل يعني (الإنسان) و(البشري) أم ماذا؟ يعني شوفوا آدم القديم، وكمان شوفوا آدم المنفوخة فيهو الروح والتفتيحة؟
أم هل هو (الاسم) (الأسماء) مفردة مذكّرة ولذلك قال عرضهم وقال هؤلاء...
الصحيح طبعاً هو المقترح الثاني، الاسم مفردة مذكّرة وانتهينا، كي تبدأ الدراما الحقيقية لـ"السي إبليس"، يعني ربنا ما كان غالبو يكسر رقبتو وانتهى الموضوع، ولا إبليس هو ذاتو ند لله عشان يخش معاهو رهان بتاع انتصار! يعني المسألة لامن ربنا يرويها زي ما تقول كدا، وبدون تشبيه أو تأويل، تمشي لصاحبك في البيت وهو من النوع البريد شفعو جداً داك، ياخي نشوف الأخبار، هاهها ضحكة لطيفة يطلقها مُوجِد الوليدات، بجمال بمحبّة وتفرّج على نمو أرواح موجوداته، يجيبك: والله الشفّع ديل رموا التلفزيون من الطربيزة العالية دي وهسّع عند الصلاح،..
ويجيك شافع منهم ينقذ بمفاهيم احتجاج زي "أمل دنقل"، آي رماهو أحمد لطخ:
المجد للشيطان معبود الرياح
من قال "لا" في وجه من قالوا "نعم"
من علَّم الإنسان تمزيق العدم
من قال لا ولم يمت
وظلّ روحاً أبدية الألم

خليكم بخير كلكم،..
إن بقيت حي تاني بجي أونسكم،..


طيّب كلامي ليك، إنو النص القرآني دا، لو وقفنا شوية هو أولاً منزل بلغة البشر، وكتبوهوا البشر بلغتن،..
فمهما كان إلهياً أو سماوياً، هو موضوع أو رسالة للتعامل البشري،..
طيّب السيميلوجيا هي علوم ومعارف بحاولوا البشر من خلالها قراءة النص دا بحياد وتركيز كبير،.
ودا بتم ذاتو من خلال مجمل المعارف الإنسانية المتوافرة، والتي يفترض فيها الحياد،...
فالنص القرآني مُشكل من دون شك،...
مع العلوم التاريخية، الجغرافية، الطبيعية، الاقتصادية، اللغوية....
يعني في اشتباك حاصل، ودا كلو سببو إنو بتوع الدين من النوعية الذكرتها فوق دي، بتوع: (الإعجاز العلمي في القرآن)
عايزين يكونوا هم الأسياد المعرفيين للعلوم دي كلها، من خلال النص القرآني، ودا ما ممكن طبعاً،
الكنيسة قعدت في علبها خلاص، واليهودية أيضاً، بصراحة الله فضلوا بس الشليقين من بتوع الجوامع،
ديل بقابضوا يا هسع في علوم أصلاً ما عندهم فيها دارعة،
أطفال الأنابيب دايرين يفتوا فيهم هم، وصول القمر، الاقتصاد، الأماكن الجغرافية الواردة في القرآن
التاريخ، اللغة، ويا ود ريّا تعبي الديّة من جديد،..

وتاني نخش في العلمانية وهكذا صلبوا غاليلو، وسجنوا ابن سيناء،...

كونا بخير،..

...




..

Post: #466
Title: Re: إصلاح الكتابة في المنبر
Author: محسن خالد
Date: 05-03-2006, 09:53 AM
Parent: #464

..


مكرور

...

Post: #467
Title: Re: إصلاح الكتابة في المنبر
Author: محمد أبوجودة
Date: 05-03-2006, 12:23 PM
Parent: #1

تحياتي يا محســن ،،
كانت تلك، بالفعل مداخلتي الأولى في البوست .. ويوستيك دا، "ناظرة ما تفوّتو !" زي ما قالت المطربة في معرض تأكيدها على " أمنقيـَّة اختيارها! " : الزول دا كان زولي ،،،إلخ .. والبوست أنا شـقَّيتو ! شَقْ السـِّيحْ والرِّيح ! كما تقول خالاتنا بالبلد ؛ والقراية الأولي أدّيتا ياهو كاملة ؛ واتوقّفت في النقاط التى كانت عاملة لي ازعاج نحوي مريع ، واستَفـَـدَتْ كتير اكبيـر ! .. شـُغُل نضيف ، ما فيهو شَق ولا طق؛ ، وما صادفني غير الاستدراكية الصغيرونة بتاعة المثنّى في المستثنى ، وإنتَ نجـّضتها ، ونجّضتَّ " كما " ذاتا بي ذاتا ، وهاودتنا بـِ " بما " .. ولا أعتبرها غلطة بقدرما هي نوعٌ من السـهو ومتلازمات الأدباء ، وطبعاً الاستدراك دا هـيـَّـأ لي مدخل للتساؤل حول الأسماء الخمسة/ الستة .. فشكرَنْ شكرَنْ .. وبالأكيدا كدا ، سنُحارس معاكم في البوست ، وتحياتي للسناير ودالبدوي وود اشيقر وبقية الرّهط اللّي أثرى البوست ..

شاهدتّ ليك خفسة بوردية اليوم ، مُصحِّحاً لرواية " إن مال الشدر ما بتكسـّرنْ فرّاعو " ؛ وبيني وبينك ، التصحيح واجب وطني ، وقد ذكّرني ذاك الاستشهاد المغلوط بيْ بامسيكا (بتاع تور الجر ، عثمان سـراج) بدل حمد ود دكين (بتاع العبادي _ أو اسخيلوس ،كما تُسمِّيه ) بحديثِ مَنْ قال لآخر كان يخلط غثّ معلوماته بآخر سمين : والله لا أدري على ما ذا نحسـِدُكْ ، أعلى بَصَرَك بالأدب أم عِلمِك بالتاريخ ؟ وكان الغالاط ، في صدر الدولة العربسلامية! قد حاجج مستشهداً بما جرى بين علي بن ابي سفيان ومعاوية ابن ابي طالب! .. فإن شاء الله تكون ،دائماً ، لاقي إيدّك ؛ وهي ، كما اظن، كِناية عن وَفرة التايم .. مع أشفاقنا على مشروع " المُعرِب الصحفي ، والقاموس التاريخي " فضلاً عن التقدّمات للمؤلّفات ، وعجينة تموليلت التى تنتظر ان تدخل الفرن! وهذا البوست اللّوثري في إصلاحِـه ..

ياخوي ، كتاب السـيوطي : "أللآلي المصنوعة في الأحاديث الموضوعة " ، دحين ما منشور بالورّاق ؟ .. فقد ساككت وما لمَّيت فيهو ؛ وقد يشوقني جداً ان اضع هذه المُلحة لصاحبك "رهين المحبِسَين " : قيل أنّه تعثّر في قَدّمي رجل وهو داخلٌ على الشريف المرتضى ، فانتهره الرّجل : من هذا الكلب ؟ ..فردّ أبوالعلاء : الكلبُ مَنْ لايعرفُ للكلبِ سبعين اسماً ؟ .. بسبب من ذلك، فقد زجّل السـيوطي كتابه " التَّبرِّي من مَعرّة المعرِّي " وتوصّل إلى أكثر من ستين اسماً للكلب ، فارّاً بشخصِه من تلك المعرّة ، واظنّها ، اي المعرّة بالكلوبية، راكبا الناس لا حدّهم! ..بالله شوفتَ صاحبك دا ودواهيه ؟ ..

بالله ، يامحسن ، كان لقيتْ ايدك ، بدون ما تخرتا خَرِت من بقية السـوانح والبوارح التى تدور في ذهنَك ، شوف لينا العبارات التالية دي ، وضَرْضرلنا فيهن سكاكر ، فالكلام عندك ليهو طَعَم ..

ولاتَ حين مندم ، ، لات حين مناص ، لا تسمعُ فيها لاغية و الصَّيفُ ضيَّعت اللّبن ،

ولكم التحايا

Post: #468
Title: Re: إصلاح الكتابة في المنبر
Author: محسن خالد
Date: 05-06-2006, 04:41 AM
Parent: #467

..

محمد أبو جودة،..
تحيات
وأبقه لاجوّة يا زول
شكراً على الرحمات الفي البداية دي،
كتاب السيوطي دا بطرى لا يوم الليلة جبتو مع كتاب (الفهرست) لابن النديم، لأنو نسختو بتاعة أبوي لطشها واحد، عارف يا أب جودة أبوي كان اسمو "النديم"، ما في أي زول بناديهو محمد خالد، قلت أونسك شوية، دا كلام بدون مناسبة،
أها عندي ود خالي مزقلت كدا وبعيد عنك ريحتو كافر كافر، كنا نشيل النهار كلو قراية في كتاب اللآلئ دا ونقارن أحاديثو الموضوعة بشغل البخاري ومسلم، غايتو شبعنا ضحك في الدنيا دي،..
الأحاديث المنجورة دي أسمح من الما منجورة، في ذمتي أسمح منها، لكن الكلام دا بيني بينك، ما تجيب لينا الهواء،
للأسف الكتاب دا ما اترفع علي الورّاق، غايتو الناس البعرفو للانترنت دا بجيبو كتب من وين ما بعرفن، كان بصارتك أفضل مني، فتّش، يمكن يكون في أخو بنية منزلو،..




لات حين مناص (خلاص فات وكت الجري)
لات حين مندم (خلاص فات وكت الندم)
الأصل في المفردة دي هو "لا"، والتاء للصِّلة وكلها على بعضها،..
لات = ليس
ليس بحينٍ مناسب للندم: بعد إيه؟
اللاغية: كلمة قبيحة، فاحشة، شتيمة،..

الصيفَ ضيّعت اللبن...
تطلب الحاجة من بعد فوات الأوان
بالعربي المفهوم كدا تستخدم في حتة: دقستَ يا فردة،... أو: كان ليك
ابن منظور بقول إنو قصة المثل دا كانت في واحدة متزوجة راحلاً تغيان -قروشو كُتار- وسارحتو يغبى فيها الوادي، قومي يا المره طلقيهو وشوفي ليك واحداً زي محسن خالد، فلسو يفتح سودان كامل في السويد، أها الولية دي اتبشتنت مع ود خالد دا وفقرت بعد المهلة ديك كلها، يوم تشوف بهايم طليقها دي كان سادرة كان مدلية وتتلقاهن بماعونها، دايراله حبة لبينة، يشوفها راجلها القديم ويقوليها: الصيفَ ضيّعت اللبن...
وييين تاني تلقي زي دا؟ دقستِ يا فردة، كان ليك وطار ليك،

كن بخير

...

Post: #469
Title: Re: إصلاح الكتابة في المنبر
Author: محسن خالد
Date: 05-07-2006, 02:42 AM
Parent: #468

..

حاجة بسيطة، أو غلط بسيط، ومحسن ذاتو معاكم فيهو، داير تركيز لأنو الحس بتاعنا شوهتو الأخطاء من خلال قراءتنا، ممكن تكون عارف القاعدة لكن لما تكتب تدقس،..
عشان كدا في رسوم الكرتون بتاعة الأطفال وفي كتبهم المصوّرة بجيبو عشرات المحررين والمدققين ما يفلت منهم خطأ، لو ربيت الطفل علي لغة نظيفة دا بخلي حسو نضيف، يعني دائماً نحن بنقرأ: إذ أنَّه... لامن نجي نصلحها: إذ إنّه.... زي ما قال ود البدوي، بتجي لكن مع الضرسة، بتضرسك... في حين إنو لو كان سمعتها صاح من البداية كان بتشوف المفتوحة دي هي البتضرس، (تربية وتنمية الحس)

طيّب كلنا بنكتب: كما ولو أنّه
لم يسلّم علي.. كما ولو أنّه يكرهني....
طيّب (الواو) الزائد في (ولو) دا لزومو شنو؟
كما (لو) أنّه يكرهني...


...

Post: #470
Title: Re: إصلاح الكتابة في المنبر
Author: محسن خالد
Date: 05-07-2006, 03:09 AM
Parent: #469

..

كان في بوست سيدو تعبان عليهو جدا، جميل خالص، بتكلّم عن: (يلا) الحنكوشية...
حبيت أعلّق عليهو في حتتو لكن ما عرفتو مشى وين،..
بقول إنو الحناكيش بقوا يستخدموا (يلا) دي في بداية الكلام ساي كدا، بدون داعي،
في رأيي إنو صاحب الكلام دا ما حاول يعرّف إنو (يلا) دي شني؟
لو قدر طلّع معناها (الفصيح) مكاواة كدا لصاحبي عجب الفيا، ما كان خَطَّأ الحناكيش، لأنو استخدامن دا ياهو الصاح بالضبط،..
إذن ما هي (يلا)؟
يلا...........هي............. ألا
(ألا) يا ريح الصبا افعلي وافعلي....
(ألا) هل بلّغت؟ اللهم فاشهد...

..

Post: #471
Title: Re: إصلاح الكتابة في المنبر
Author: Adil Al Badawi
Date: 05-07-2006, 03:24 AM
Parent: #469

سلامات يا محسن،

أرجو أن تسمح لي بالترحيب بالمشاركين الجدد بدءاً بأبي جودة ومروراً بمُحب (أم هو مهيب؟)، محمد إي سليمان، اسماعيل التاج لاااا عِنْد معتصم دفع الله. بدأت بأبي جودة لحاجة في نفس يعقوبي تتمثَّل في أن يشولِب أبو جودة معانا لاسيَّما موضوع المنادى "الأعول تَبْ" وما أشكلَ على الناس من مناداة الأسماء الستة ومنها ما ارتبط بإسم أبي جودة نفسه.

Quote: في حين إنو لو كان سمعتها صاح من البداية كان بتشوف المفتوحة دي هي البتضرس،

تعرِف؟، "كان" البِتَجي قبل الأفعال دي (مرتبطة في الغالب بنضمينا) أمرها عجيب. دحين عِنْدَك ليها صِرْفة؟! أقول قولي هذا وقد جاءنا مرَّة (بالبركس) رجل كويتي يبحث عن صديق له والجماعة يقولو ليهو: كان جا كان جانا (طبعاً الكلمات ملصَّقة مع بعضها بصباع أمير) والكويتي يقول ليهم: إيش؟! وهم يقولو ليهو: كانجاكانجانا...إلى أن تبرَّع أحدهم وفضَّ اشتباك تلك الكلمات بلسانٍ، على الأقل، أفضل من لسان تلك السربعة.

تحياتي لكم أجمعين



Post: #472
Title: Re: إصلاح الكتابة في المنبر
Author: محسن خالد
Date: 05-08-2006, 06:01 AM
Parent: #471

..

عادل البدوي،.
إزيك يا زول،..
وحباب جودة والجميع،..
في الحقيقة أنا قصّرت في نقطة وهي المداخلة الجميلة والتريانة القام بيها (إسماعيل التاج)، كنت ناوي أرجع ليها وأنوّه ليها، بس الاسم راح لي وأخوك كسل من التبحيت، غايتو ما يطلع كلامي غلط، لأني قاصد المداخلة الاتكلم فيها (إسماعيل التاج) عن الاصطلاح والاختصار، مش ياها دي؟
فياخي التاج سامحنا بربّك، وأرجو منك يا عادل تجي تفلفلها بجاي وتديها هبشة مرة مرة، حاكم أخوك فارقة معاهو خالص اليومين ديل،..
الكنكنة البتتكلم عنها دي، أهلنا جايبنها من القرآن،..
وإن لقينا مهلة القلب بنجي نشالبها، ونفتشها،..
كونوا بخير جميعاً
وتحياتي لإسماعيل التاج، وود أب جودة،..


...

Post: #473
Title: Re: إصلاح الكتابة في المنبر
Author: Adil Al Badawi
Date: 05-08-2006, 06:31 AM
Parent: #472

سلامات يا محسن،

Quote: الكنكنة البتتكلم عنها دي، أهلنا جايبنها من القرآن،..
وإن لقينا مهلة القلب بنجي نشالبها، ونفتشها،..

تقول والله؟ تصدِّق ما لاحظت ليها كُلُّو كُلُّو! من أو جاي برمي ليها بالي تَبْ.

تحيَّاتي

Post: #474
Title: Re: إصلاح الكتابة في المنبر
Author: محسن خالد
Date: 05-08-2006, 06:38 AM
Parent: #473

..
عادل البدوي،..
حاول تلاحظ ليها تاني (كان) بمعنى ليت والافتراض، والتوقع،..

أبقه بخير،..

Post: #475
Title: Re: إصلاح الكتابة في المنبر
Author: محسن خالد
Date: 05-08-2006, 06:39 AM
Parent: #473

..
عادل البدوي،..
حاول تلاحظ ليها تاني (كان) بمعنى ليت والافتراض، والتوقع،..

أبقه بخير،..


أما لو قصدك الإدغام فدي حكاية تانية،..

..

Post: #476
Title: Re: إصلاح الكتابة في المنبر
Author: محمد أبوجودة
Date: 05-08-2006, 12:15 PM
Parent: #1

مُحسِن خالد " إبن النّديم " ..

يسعد مساك يا مان .. وَ مَهلة القلب تبراك محل ما كان ..

ولكَ التحية ، واستئذان بي حبَّة شولَيْب في المنادَي ، تلبية لِمَن نبُثـُّه تحايانا ، الاخ/عادل البدوي ، في ترحبيه الجميل بمقدَمِ البرالمة ..والتحية لكلِّ المحارسين لهذا البوست المفيد ؛ وبعد :

لقد طوَّفتً في الذّاكرة الخَرِبة عن شطرِ البيت التالي (والذي يتغنّى به الموسيقار محمد الأمين ، في رَميَةٍ شائقة ) :
يا نديمي ، دَعَكَ من عَثراتِ قوم .. واملإ الكأس ..............

فصُعَب الأمرُ عليَّ ، ثم قلتُ : فَليكفِ الجزءُ عن الكُل ، وحسبي أنّ اللّبيب " بأقلِّ من الإشارةِ " يفهمُ .. ولولا المُزعجاتِ من المشاغل ، لافتتحتُ " شـولَيبي " بالكنكنة ، فهيَ قد ضلَّت عنّا ، إلى حين، منذ " الكنداكة " وال كان داكا
فخلطنا بين الملكة المَرَويَّة ،والتى كان لإحداهنّ مراسلات مع "يوليوس قيصر " زمان ان كان السودان " بيرمنجهام الحديد " في أفريقيا .. كما يقول التأريخيُّون ؛ وبين تقريظ الممدوح اللّيسمو الشيخ حسب الرسول سيدي ،سيد الأراكا ! كما كان يتغنّى المرحوم " خلف الله حمد" .. واخرى : أين يقع " الكونكان 14 "
من هذه الكنكنات بنات الحفرة الواحدة ..؟

- - - - - - -
الملكة "النّمرية" تُنادي : أمـُّونا .. يا بِتْ يا أأ أمـُّــونا !
ود النِّعيسان : مِنِيْ ؟ .. ليمونا ولآ أمّونا ؟ .. تفتِّحوا في الشِّقوق ! وان قُنـّا شي تلومونا !
الملكة : هَيْ مالاا .. خلِّيــها التوصـِّل ليك ؟ ..
ود النعيسان : توصـِّل ليْ وصيفة الملكة شِيتْ دِلـَّيك ؟ ..
.....................................
و ينسدل الستار ،بُـعَـيْدَ قليلٍ من تكملة هذا الحوار ، عند هذا المشهد الأخير من مسرحية " المك نمر " ، وينجح ود النعيسان في إطفاء نائرة الحرب بين النّسابا ..

والشـّاهد ، خلوصٌ للمنادَى ..
- - - - - - -
المنادَى ، هو الاسم الذي يأتي بعد حرفِ النِّداء " يا " .. ويكون حُكمه النَّصب في مسائلٍ ثلاث كما يلي:-
- إذا كان " مُضافاً " كَــ يا عبدَ الله كُن مع الله .. [ أصلُه : أُدعو عبدَ الله .. فحُذِف الفعل وأُنيبَ " ياء " عنه ]
- إذا كان " شِبه مُضاف " كَــ يا رؤوفاً بالعباد ،أو يا طالعاً جبلاً ، يا جميلاً حُسْنـُهُ .. وطبعاً الأمثلةدي فيها دشر كتير حول " تابع " المنادَي .. نخلـِّيهو لي وقتو ..
- إن كان نكرة غير مقصود كَـ قول الأعمى : يا رُجلاً خُذ بيدي ، يا غريباً يلآ يلآ لي بَلدك ..

*_ يكون حُكم المنادَى ، مبنيـَّـاً على ما يُرفَع به ، إن توافر أمران :-
- الإفراد ( أي ألآ يكون مُضافاً أو شِبه مُضاف ، ويشمل الإفراد هاهنا المفرد والمثنَّى والجمع ) .. كَـ يا زيدٌ ، ويا زيدان ويازيدون .. فزيدٌ يُرفَع بالضّمّة ، ومثنّاه زيدان يُرفَع بالألف ، وجمعُه السـّالم ، يُرفَع بالواو ؛ ولتقريب المعنى ، يُمكننا أن نقول : يا حسنٌ ، يا حَسـَـنان ، يا حسـنون .. ولكن : هل يُمكننا ان نقول: يا فنّانٌ ، يا فنّانان يا فنّانون .؟
- المعرفة ( ويُقصَـد بها عَلَـمَـية المنادي قبل دخول النداء ، كَـ نوح و هود ؛ وكذلك ، ان يصبح معرفة من بعد النِّداء بسبب الإقبال عليه كَـ جبال ، حيثُ تُريد به مُعَـيـَّّناً مُشَار إليه في سياق الحديث ) ..والامثلة :
(يا نوحٌ قد جادلتنا ) هود32 ، و (يا جبالُ أوِّبي معـه ) سبأ 10

- - - - -
الأسماء ، تنقسم إلى نَكِرة ومَعْرِفة .. والنّكرة : ما دلّ على مُتعدِّد كَـ رَجُل ، امرأة ، شجرة ، شمس ، إلخ .. أمّا المعارف ، فهيَ ستة أقسام : الضمير / العَلَم / إسم الإشارة / إسم الموصول/ ذو الأداة – وهو المُعرَّف بِـ أل - / المُضاف إلى واحدٍ من الخمسة السابقة .


العَلـَـم ينقسم باعتبارات مختلفة الى عُدة أقسام . خلـّونا في واحدة منها ؛ قَدُر قُدْرَتنا وهي : انقسام العَلم باعتبار ذاته إلى قسمَين ، مُفرَد ومُرَكـَّب .. والمركَّب ، ذات نفسه ، ثلاثة أقسـام :
- مُرَكَّب تركيب إضافة : كَـ عبدالرحمن .. أبوبكر .. أبوجودة .. أبو قطاطي ، تاج الاصفياء إلخ,,,, . وحُكمه ان يُعرب جُزؤه الأوّل بحسب العوامل الدّاخلة ، ويُخَفَّض جزؤه الثاني بالإضافةِ دائماً .. كَـ يا أبا جودة ، يا أبابكرٍ ..

أها شنو ليك ، ياعادل البدوي ، ما شولَبْنا شوية ؟ ..

وإن كان " شــوقارنا " شيتاً مطموس! ، فنرجو من الاستاذ، إن توفّرت له " مهلة القلب " أن يعطِنا أعِد ؛ حتّى نُعيدها سيرتها الأولى ..

وللآخرةُ خيرٌ وأبقى ..

مع جميل التحايا ،،/

من أبي جودة ، أو هوَ: أب جودة

Post: #477
Title: Re: إصلاح الكتابة في المنبر
Author: محسن خالد
Date: 05-09-2006, 07:11 AM
Parent: #476

..

محمّد أبو جودة،..
عوافي
وضراعك أخضر،..
إن حيين وفي ماهل من العمر، نعود،...

...

Post: #478
Title: Re: إصلاح الكتابة في المنبر
Author: محسن خالد
Date: 05-10-2006, 04:19 AM
Parent: #477

..

في كتابة (أن لا) دا شكل قديم في الكتابة، وحالياً يُقترح الإدغام، المشكلة شنو طيب؟
المشكلة في الكمبيوتر، لو عملت (الشدّة) فوق اللام السابقة للهمزة مشكلة، وببقه شكلها غريب، الحكاية دي جننتني، العندو حل منو؟
(ألّا) دا شكلها لو عملت الشدة، ولو ما عملتها ستقرأ مخفّفة ويتغير المعنى إلى (ألا) القلناها في بتاعة الحناكيش،..
وبالمناسبة خطرت لي فكرة تانية، إنو إذا كان (يلا) الحنكوشية دي في حالة ابتداء الكلام بدون داعي بتساوي: ألا....
يلا أمشي معانا، هنا ممكن يكون المقصود (هلا)... هلا ذهبت معنا؟
أها يا ناس لغة الكمبيوتر،
شوفوا لينا حل لكتابة (أن لا) دي مدغمة وبشدة على اللام لا تشوّه صورة الكلمة...


...

Post: #479
Title: Re: إصلاح الكتابة في المنبر
Author: محسن خالد
Date: 05-10-2006, 04:51 AM
Parent: #478

..


محمد أبو جودة،..
يا ود أب جودة تتبارك،..
وإن جاني مزاج بجي بشيل مخ المنادى بس، ونطبطبو بدارجتنا، وأكون شولبت معاك، وقاسمتك البركة،..
تفتِّحوا في الشِّقوق ! وان قُنـّا شي تلومونا !
الحتة دي قال فيها: تفتّقوا في الجروح، وإن قنا شيء تلومونا
ودي:
توصـِّل ليْ وصيفة الملكة شِيتْ دِلـَّيك ؟

هي كانت ح توصّل ليهو قروش بس، يعني البنت نفسها كانت في محل إغراء له، لذا كان قوله:
توصِّل لي خادم الملكة هيل دلّيك؟
يعني المخصّصة لدليك الملكة، يعني بقصد البت نفسها مش الحاجة الحا توصلها،..
قاعد أنتح معاك من فاخورتي ساكت، كنت حافظها كلها أيام الجهلَة،
كن بخير،..


...

Post: #480
Title: Re: إصلاح الكتابة في المنبر
Author: Shinteer
Date: 05-10-2006, 09:52 AM
Parent: #479

Quote: أها يا ناس لغة الكمبيوتر، شوفوا لينا حل لكتابة (أن لا) دي مدغمة وبشدة على اللام لا تشوّه صورة الكلم

الشغلانة ما محتاجة خبراء لغة كمبيوتر؛ محتاجة شوية تحايل بسيط.
أها دحين مي ياها دي: ألاّ
وكذلك يَلاّ
وبرضو وَلاّ .. الانت قاعد تكتبها وألا وأنا مرات بكتبها وللا إمعاناً في اللولوة.

دي غشوة بسيطة على عجل. لكن أب جودة ده يستاهل كلام كتير من نوع كتابتو الوهيطة دي.

وإلى لقاء

Post: #481
Title: Re: إصلاح الكتابة في المنبر
Author: محمد أبوجودة
Date: 05-10-2006, 10:13 AM
Parent: #479

محسن خالد

ســلامات ..

وكل عام وانتم بخير ؛ بمناسبة الجردة السنوية للبورد ، وكويّس أنّو
البوست ماشِّي لا قدّام ومستمر .. وده بزيدنا سعادة وحبّة تفاؤل بأنّو
كثير من اللطائف والنُّكَت جايانا في الطريق ..

شايف " يلا " اتنسبت للحناكيش ..فالشّكِّية لابِّيْدَنْ قويّة ! مع انّو
وردي غنّى من زمان :

يلا وتعال يلا نهاجر في بلاد الله .. (كلمات الحلنقي)

وهِنا، أظنّها تفيد : هيـا ..والآ ما كَدِيْ ؟ وكمان أقرب صِلة لِـ " هلاّ "


وافر التقدير على تصحيحي في أبيات العبّادي ؛ وما شاء الله على فاخورتك .. وبالمناسبة ، هل الفاخورة و الدَّقَنوس مترادفات ؟ ..وفي انتظار ان تشولب لينا في المنادَى بحسب ما يتيسـّر ليك من وقت ومزاج ؛ والحقيقة ، اخونا عادل البدوي ، بعدما حَنْدك لينا بالمُنادّى ! مشى .. وعُقبان ما جانا صاد ! علّ المانع خير ..


Quote: شوفوا لينا حل لكتابة (أن لا) دي مدغمة وبشدة على اللام لا تشوّه صورة الكلمة...


ألاّ ألاّ ألاّ

إيه رايك في دِي ؟ تَلْفِق ولاّ لا ؟


تكتب الألف وعليه الهمزة أوّلاً .. ثمّ
الـ لا من مفتاح حرف الB بدون Shift .. ثمّ
الشـّدّة ، أخيراً، من أقصى يسار لوحة المفاتيح في الأعلى، مع الضغط على الShift


Qoute :
تفتّقوا في الجروح، وإن قنا شيء تلومونا
Unqoute:

فِتَّيق الجروح، الخُفناهو داك ، هو افتراعكم لبحور المصطلحات والتعريفات ،
وطبعاً دي ، من الغوامض في أذهاننا! وغير راسية على جلاء ، مع انّها من المُفَـكَّر فيه دائماً ، والمُتَحَدَّث به كثيراً .. ودايرينلنا فيها تجلية ، إن توفّرت عندك السانحة


ودام بهاك ، مشمول بي النظام ..


Post: #482
Title: Re: إصلاح الكتابة في المنبر
Author: محسن خالد
Date: 05-10-2006, 02:01 PM
Parent: #481

..

يا شنتير وود أب جودة،..

إزيكما،..
ما تحاولو تغشوني ساي في كتابة (أن لا)، زي الكتبتوها دي بعرف ليها،..
أها: ألاّ... بس دي شدة فوق الألف ودا غلط، بندورة فوق اللام كرع تكرع
شفتو كيف يا مطاميس،..
بعدين تاني يا ود أشيقر كنت ملاحظ للطريقة البتكتب بيها إنت (وألا) بتاعة التخيير،
كدا وألا كدا...
بعدين ليه إنت بتكتبها بالطريقة دي، حاول ترجعها لأصلها الفصيح، اللهو: إلا...
إمّا أن يفي بوعده وإلا ذهبت إليه في بيته،..
عشان كدا تنهز الهمزة (التحتية) دي، عشان تبقى (فوقية) وربك يعدلها من جودو وكرمو، وألا كيف؟

يا ود أب جودة بتاعة الحلنقي دي أظنها بتفيد: زولتنا الفصيحة ذاتها (ألا) بمعنى الحض،
ألا هُبّي بصحنك فاصبحينا... ولا تُبقي خُمور الأندرينا
وأريتكم دايمين، في سلام، وفي هانئ من الغد


...

Post: #483
Title: Re: إصلاح الكتابة في المنبر
Author: محمد أبوجودة
Date: 05-10-2006, 04:22 PM
Parent: #482

Quote: أها: ألاّ... بس دي شدة فوق الألف ودا غلط، بندورة فوق اللام كرع تكرع


عزيزي محسن ،،

هي صاح فوق الألف ، بس الألف بتقعد فوق راسـو شـدّة ؟ .. إذاً فهي لللآم ، باستحقاقها لها ، وبسببٍ من أنَفَة الألف ، الذي تحميه استقامته المعهودة من الشـّدَّات ! ..


ألِفُ الكِتابة،وهو بعضُ حروفِها ،،، لمـّا استقام، على الحروفِ تَقَدَّمـا ..

بعدين والله ، يامحسن ، انا في رايِّ ، أنّو دي أسلم طريقة لكتابة ألاّ ، بحسب ما متوفر من كيبورتات ! .. وإلى ان يحين صناعة كيبورتات جديدة ، فليس لدينا إلآ أن نتمسـّك بيها، حتى لواضطررنا نتم الباقي غُلات ساي ! ..


التحية للأخ شنتير ، في سبقِه بتحرير كتابة ألاّ ، وكنتُ قد دخلتُ النت ، وبدأت كتابتي ، وحدث ما جرّني جرّاً من مكاني ، وعدتُّ متاخِّراً لأُرسِل بصيدي في ألاّ ، فوجدتُ نفسي مُصَلِـيـَّاً لسريع النَّهمة " ود اشيقر " .. فله التهنئة ..

Post: #484
Title: Re: إصلاح الكتابة في المنبر
Author: Shinteer
Date: 05-10-2006, 07:16 PM
Parent: #483

Quote: بعدين تاني يا ود أشيقر كنت ملاحظ للطريقة البتكتب بيها إنت (وألا) بتاعة التخيير،
كدا وألا كدا... بعدين ليه إنت بتكتبها بالطريقة دي، حاول ترجعها لأصلها الفصيح، اللهو: إلا. إمّا أن يفي بوعده وإلا ذهبت إليه في بيته،..

يا محسن بن خالد، ظنيتك نعسان. أنا ما حصل كتبتها كده (وألا) أبداً. عادةً بكتبها (وللا) كيتاً في الشدة الماكلة حق اللام التانية.
بعدين الشدّة بتاعة (ألاّ) وحاتك ما في زول يقول إنها فوق راس الألف .. إلا الزول يكون متحيِّل ساي. يبقى رسمها بالطريقة دي (ألاّ) بفك الحيرة تب.

شي تاني؛ يا زول انت متأكد إنو (وللا، ولاّ) بتاعة التخيير دي أصلها (إلاّ)؟. دي دايرة ليها مخمخة، لأنها أحياناً بتقرِّب لمعنى (إلاّ) لكن في الغالب الأعم بيكون استخدامها بمعنى (أو) الواحدة دي: داير ليمون وَلاّ عجور؛ دي أصلها شنو؟ أم؟ أو؟. قطع شك المسافة بينها وبين (إلا) بعيدة بالحيل.

التحية ليك يا أبو جودة وبيك البوست نوّر وجاب خدار. الله يجيب عادل البدوي. سمعت إنو مشى عمرة .. وأنا متأكد إنّو حيزوغ.

Post: #485
Title: Re: إصلاح الكتابة في المنبر
Author: Shinteer
Date: 05-10-2006, 07:18 PM
Parent: #484

تعرف يا محسن .. يبدو لي فهمت كلامك غلط بخصوص كتابتي لـ وللا، ولاّ. أكون نعسان أنا. والله أعلم.

Post: #486
Title: Re: إصلاح الكتابة في المنبر
Author: محسن خالد
Date: 05-11-2006, 01:04 PM
Parent: #485

..

محمد أبو جودة،
أبقه طيب
ما عشان كدا (إنو ما بتقدر تصنقر فوق الألف) السافوتة داخلة رأسي من هنا،..
مشاكل الكي بيورد لا حد لها، يا ريت شباب العربي يحلوها وما ينتظروا الخواجات اتفقهوا لغوياً ويجوا يحلوها ليهم،
لسع يا ود أب جودة القرآن بيصوّر تصوير، ولا يمكن إدخاله إلى الكمبيوتر عن طريق "التنضيد والصف، أي بجمعه جمعاً"،..

وطريقتكم إنت وشنتير أخوي دي، مي غابياني، لكن إخير لي منها طريقة رسم القرآن: (وأن لا) وبخشمي أثناء القراءة، أعمل الإدغام واللازم،..

كن بخير،


Shinteer،..
إزيك،..
كويس إنك قريتها تاني ولقيت روحك إنت النعسان، لأني كنت قاصد روحي في كتابتنا للمذكورة (لافحاً)، ضحَكّتني،
عارف يوم رجعت لتصحيح ود أب جودة لي في الأسماء الستة بدل المثنى، وبرضو يوم كتبت لدكين كلام واضح عن إيفو أندريتش، وفي نهاية الكلام لقيت روحي غزلتو مع كازانتزاكيس، والله استغربت، إنو في اللحظة ديك الحصل لي شنو؟ يعني دي حاجات إنت عارفها أفضل من اسمك، يبقالي في حاجة اسمها (جان التفكير على الهواء) ودا واحد من أمراض الأسافير، في الكتب لا يحدث بكثرة التحرير والمراجعة وعدم الشفقة، وكمان بانعدام فكرة إنك ترد علي فلان وعلان، أحسن نطَّلب كتبنا، وألا كيف؟
ود البدوي فاقدنو يمين، الملاوة دي كلها إن بقى شديد كان جابتو مارق،..
بعدين راجع (إلا) الفصيحة، شوفها بتستخدم بمعنى التخيير وألا لا؟

الليلة فرحان شوية وعلى غير عادات القرف، عارف ليه؟
ماشي هسع النادي السوداني (هنالك ربَّة) عبد القادر سالم، وعبد الرحمن عبد الله، أخوك ما بريد الحفلات، ومستوحش خالص حماك الله، بس ح أقابل صاحبي فضيلي جَمّاع الزول الحلو والإنسان،..
أبقه طيب

...

Post: #487
Title: Re: إصلاح الكتابة في المنبر
Author: محسن خالد
Date: 05-13-2006, 05:19 AM
Parent: #486

..

في الغالب الأعم يا شباب، لما تكون (كان) دي لازق فيها أحد اللوازق، البعدها بكون منصوب
كانـ(ت) حملةً موفقة
كانـ(وا) رجالاً صالحين
كُـ(نَّ) نساءً محترمات

اللوازق دي كلها بتكون في محل اسم لكان، والبعدها بكون خبرها
ما في قاعدة اسمها اللوازق، دا نجرنا عشان التسهيل،..


..

Post: #488
Title: Re: إصلاح الكتابة في المنبر
Author: معتصم الطاهر
Date: 05-13-2006, 06:22 AM
Parent: #1

يا شباب ممكن فَرَقَة معام
وللاّ دى .. من ( أو لا )..
يكون وللا ما يكون
يكون أو لا يكون ..

Post: #489
Title: Re: إصلاح الكتابة في المنبر
Author: معتصم الطاهر
Date: 05-13-2006, 06:41 AM
Parent: #1

يا أهل الله ..
( و( أهل الله) دى ذاتها قاعدين نقولها ساى) صحيحة ومؤدبة ولا عادة بس


وسؤالى هو ..


Quote: وَلْتَكُنْ مِنْكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنْكَرِ وَأُولَئِكَ هُمُ الْمُفْلِحُونَ..


أمة يدعون .. لماذا ليس ( أمة تدعو ) ..


Quote: وَلا تَكُونُوا كَالَّذِينَ تَفَرَّقُوا وَاخْتَلَفُوا مِنْ بَعْدِ مَا جَاءَهُمُ الْبَيِّنَاتُ وَأُولَئِكَ لَهُمْ عَذَابٌ عَظِيمٌ


لماذا جَاءَهُمُ الْبَيِّنَاتُ .. وليس جاءتهم ..

تشيلكم العافية و تبراكم ..
وتحويكم ..

Post: #490
Title: Re: إصلاح الكتابة في المنبر
Author: محسن خالد
Date: 05-14-2006, 03:33 AM
Parent: #489

..



معتصم الطاهر،..
إزيك يا زول، وخليك طيب
أسئلتك دي ذكّرتني قواعد كتيرة، منها السماعي ومنها الذي حاول النحويون الترافع حوله وتحليله،
في قاعدة مهمة لفهم الآية دي، هي:
مثلاً إذا جاء رجل مع مليون مريّة –مريّة دي كيف يا جندريات-
(الجمع) بكون على صيغة المذكّر بتقول: ألف امرأة ورجل جاؤوا...

(ولتكن منكم أمة يدعون)
الأمة مجموع الناس، نقشتها؟ يعني الأمة هي مجموع من المؤنّثين والمذكّرين
كدا بتكون نقشت فكرة إني قدمت لكلامي بتغليب التذكير على التأنيث في العربي
بالرغم من إنو 60 من اللغة العربية مؤنث،..

إذن بتصبح الجملة كدا: لتكن منكم جماعة يدعون....
ودا بجوز، بالرجوع لشواهد تانية

أما الآية الأخرى: (من بعد ما جاءهم البينات)
هناك قاعدة عجيبة بتقول: يجوز ترك المطابقة بين الفعل والفاعل إذا فصل بينهما فاصل،
الفعل هو (جاء)
الفاعل هو (البينات)
الفاصل هو الضمير (هم)
بجوز في العربي نقول:
جاءني رسالتُك ... شفت كيف؟
الفاصل هنا هو (ياء المتكلّم)


طلع عليك الشمس
الفاصل هنا (عليك)
ولذلك جاز التخلي عن المطابقة بين الفعل والفاعل
وكن بخير،..

أهل الله دي دربها طويل وزلق،..

يضحك نهارك يا جميل
...

Post: #491
Title: Re: إصلاح الكتابة في المنبر
Author: Mohamed E. Seliaman
Date: 05-14-2006, 05:05 AM
Parent: #490

السلام عليكم جميعا
يا محسن كتبت
Quote: :

هناك قاعدة
عجيبة
بتقول: يجوز
ترك المطابقة بين الفعل والفاعل
إذا فصل بينهما فاصل،

 


هل تصح صياغة القاعدة بهذه الطريقة ؟
ثم كتبت:
Quote:

بجوز في العربي نقول:

جاء
تني
رسالتُك فـقرأتُ
ه.........
شفت كيف؟

الفاصل هنا هو
(حرف الفاء)

طلع عليك الشمس

الفاصل هنا (عليك)

ولذلك جاز التخلي عن
المطابقة
بين
الفعل والفاعل

 




المصيبة يا محسن انك مابتفرق االفاعل من المفعول به

جاء
تني
رسالتُك فـقرأت
ُه

الضمير الهاء هنا ضمير مبني في محل نصب مفعول به يا محسن

الضمير يعود على مؤنث هو رسالة!!!!  كيف خليتو يكون مذكر؟

الفاعل للفعل الأول
جاء
هو رسالة وانت أنثت الفعل بتاء التانيث يعني ما تخليت عن المطابقةفي الحتة دي!!

الفعل
 قرأته
 التاني فاعلو مذكر أصلا  وهو
تاء المتكلم
وهي ضمير مبني في محل رفع فاعل

الهاء في
قرأته
 ضمير مبني في محل نصب مفعول به

كيف
طبقت القاعدة
هنا ؟ ووين التخلي عن المطابقة بين الفعل والفاعل

والفاء يا تا دي؟

وفصلت شنو؟  بعداك نرجع لحكاية
قط
و
أبدا
والهمزة التحتية


والله أعلم



الحبشي

Post: #492
Title: Re: إصلاح الكتابة في المنبر
Author: doma
Date: 05-14-2006, 06:30 AM
Parent: #491

شنتير
آزول علك طيبا تراك حاتل بي جاي. والله اجماعه انا قواعد اللغه العربيه في المدرسه كن بسقط فيها . اليوم جابني الدرب وقلت ارد السلام علي الجنوي ديل تصدق يا شنتير امس بقلب في كومبيوتري اكان لقيت قطيعتنا الفي محسن خالد الزمان ديك

Post: #493
Title: Re: إصلاح الكتابة في المنبر
Author: محسن خالد
Date: 05-14-2006, 12:15 PM
Parent: #492

..



Mohamed E. Seliaman،..
محمَّد الحسن سليمان،..
وعليكم السلام ورحمة الله وبركاته ومغفرته ورحمته،...
(الصيغة اللفظية الكاملة للسلام الإسلامي اللفظي)
سمعتَ بي نيك الزرازير إنت؟ الفوق يكورك والتحت يكورك، ومو معروف المبسوط منو!؟
دا ياهو ذاتو تصحيحك لمحسن خالد، البتقتبسو من كلامي لأنك بتجذو غير مكتمل بطلع بهناك رطانة،
وتصحيحك عليهو يطلع بالميّت رطانة الرطانة،..
خلاص يا محمّد مادام حالف تشتغل فَرَّاش ينضّف بوستاتي كلها من أي قاذورات، تصحى بدري وتسنّن مقشاشتك، ودوامك عندي هنا يوماتي،..
أرجو إنك تواصل مع "قط" و"أبداً"، والهمزة كمان، بس في مكان غير البوست دا، أنا شفتك وإنت بتطالب غيرك إنو ما يخربو بوستاتك وما يزعجوك، فياخي ما تزعجني،..
واصل في بوستاتك، وسأكون شاكر لك، في حالة الفهم... وبعدم الفهم،..

كلامي الخشن الفوق دا والتحت الجايي برضو رد علي نوع لغتك دي:

Quote: المصيبة يا محسن انك مابتفرق االفاعل من المفعول به



المصيبة يا محمد إنك ما بتعرف من الفاعل دا حتى تكتبو صاح:
Quote: االفاعل

كلمة (الفاعل) تكتب بألف واحدة، نرجو منك تتعلم كيف بكتبو الفاعل....
الفاعل البعدوهو بألفين دا إلا كان محسن خالد،
كمان في ناس عاطلين بعدوهن بالآلاف،..

شايف عبقريتك ساهلة كيف؟

صدِّقني من استايلك كلو، ما عاد عندي رغبة أتكلّم معاك في معرفة بتاتاً، لأنها ما وجهتك، ولأنو ح أديك أكتر من حجمك المتسوّل لقيمة بإلحاح مريب، ولأنّك متقنّط في الفاضية، وكمان معاك بلفة ضمير مبني، ياخ مبني بتاع رواكيب الحارة كم؟ إنت زول ما عندك شغلة غير "محسن" "تراجي" "هاشم" "بشاشا" فلان فرجكان، قال.. سوّى.. فعل.. ترك، ياخي ربّوك إنت من نوع الشفّع البحرّسوهن الباب لنقل القوالات ديك، ما تشتغلك شغلة مفيدة،...
طاعنت من بعيد لبعيد حد المطاعنة ما مكّنتك، عَفَّناك، جيت لاعند هنا تناقش ناقشناك بكل أدب واحترام، خليت النقاش في مكانو مشرور، وبرطعت تفتح في البوستات من أول وجديد، شيء حول قلّة أدب لغتنا، وشيء تطلب فيهو المناظرة، ومطاعنات في أي مكان يُذكر فيهو اسم محسن خالد، بقولك بالواضح، الأيامات دي فارقة معاي، سَكَرَها موقّفنو بالدكاترة وما قاعد أنوم، نيكها أصبح عدم بفعل توبتنا الحاضرة، فياخي ما تزيد بنزينا بنزين، بجي بسلخ جلدك والله وبجلّد ليك بيهو كل بوستاتك الفاتحها دي،..
مطروش إنت؟ جِن يجننك،..
دا توضيح حالة، لأنو المعرفة بالضرورة ثمرة وجودية، بالتالي بتدخل فيها حالة الكائن الوجودية نفسها، وكلها،..



محسن خالد ذاتو أعلم،


doma،..
يا مرحبا وأهلاً بيك، وسلام طويل وشديد من الجنوي ديل كلهم،..
أريتك طيبة، يا ريت والله تجيبي قطيعتكم في إنت ود أشيقر،..
قلتو شنو يا وود أشيقر؟
بأي حال عافيلكم،
وكوني بخير،


...

Post: #494
Title: Re: إصلاح الكتابة في المنبر
Author: Shinteer
Date: 05-14-2006, 01:45 PM
Parent: #493

كيفنك يا دومة وأخبارك؟
قطيعتنا القديمة ديك أديت خبرها لمحسن وقلت ليه والله ما خلينا ليك صفحة ترقد عليها، وطمّنتو بأن القطيعة كلها كانت في الجانب العطر من السيرة ولم نتطرق فيها للجوانب المشوطنة.

أخونا محمد إي سليمان، كيف حالك يا عزيزي. تعرف .. أنا متأكد إنك بتمتلك خير كتير تمنعك عن إتاحته للناس عِلّة لا أعلم مصدرها. ما الداعي للمناظرة والتحدي؟. يا أخي شارك بما تملك من معرفة لتفيد المتابعين. المسألة ليست مسابقة للنيل من الخصم. تناولك للشأن اللغوي بهذه الطريقة يشوِّش على القارئ.
أتمنى أن أفهم أسباب الدواس الأحادي الذي أنت فيه.

Post: #495
Title: Re: إصلاح الكتابة في المنبر
Author: Mohamed E. Seliaman
Date: 05-15-2006, 00:36 AM
Parent: #494

يا
محسن شكرا على التصحيح وكده أنا اتعلمت منك حاجة مفيدة وعرفت الفاعل بتكتب كيف


وأعترف
انو كتابتي ليو كانت غلط لمن كتبتو االفاعل


أها
انت رأيك في تصحيحي شنو



الأمانة تخليك توضح غلطك للناس وتراجع صياغة القاعدة لو كلامي صاح


بعدين
زعلان من قولي ما بتفرق بين الفاعل والمفعول به ليه؟


ما دي
حقيقة والدليل مثالك الفوق ده


بعد ده
كلو مرحب بيك في المناظرة


ويا
شنتير انت رأيك شنو في مداخلتي الاخيرة دي


انت
شايفة واضحة والا رطانة ؟


Post: #496
Title: Re: إصلاح الكتابة في المنبر
Author: محسن خالد
Date: 05-15-2006, 05:56 AM
Parent: #495

...

shinteer ،...

ود أشيقر إزيك يا أخوي،..
حبابك وحباب دومة السمحة،
اتفضلوا اتنيناتكم، وكونا بخير
Quote: المسألة ليست مسابقة للنيل من الخصم


كان حقو جملتك دي تكون: المسألة ليست مسابقة للنيل من خصم،..

لأنو "الخصم" بالتعريف دي لا تنطبق عليّ كما أُقَدّر، ولا أعرف فيم خصومتي معه،..

يهوّن ربي القواسي،..



Mohamed E. Seliaman،..

طيّب يا محمّد كيف تناظر زول ما بعرف الفرق بين الماضي والمضارع؟ بين الفعل والفاعل؟ من باب أولى و-البديهيات- ما يفهم ليك حكاية ضمير مبني دي، لو هو فعلاً دي قدراتو، كلامك الفوق دا ببقه بندق في بحر ساي،...
وتناظرو بشأن شنو؟ وليشنو؟ وفي ياتو موضوع؟ والداعي شنو؟
بعدين ياخي المناظرة دي بتكون وش لوش، عشان يُختَبَر ما في الصنقور، على الهواء مباشرة؟ أها تلم فيني وألا ألم فيك وين؟
فترت طبعاً من تكرار أقول ليك تعال صوّبنا فيما شئت، بالتي هي أحسن ياخ، بالتي هي أجمل، وبطّل فتح بوستات جديدة لا يعلم أغراضها إلا الله، ما كتير غيرك صوّبني، وصححني، وخطأني، بس هل فيهم زول واحد سمع بنيك الزرازير مني غيرك؟ في ناس بتصححني من وراء الكواليس، شايف الكرم كيف، واحترام المعرفة والمعرفيين كيف؟
لأنو فعلاً تصحيحاتك تنايك زرازير فوق رأس جامع، يا ناس هوووي تعال شوفو جرائم محسن خالد، يا ناس هوووي دي جهالات محسن خالد، عووووك أوررروووك، صوصوصو سيك سيك سيك سيك، قوقوقو قوقووقوقوو
بخصوص الأمانة المعرفية:
بالنسبة لهمزة القطع في (الرباعي) ياخي شرحت ليك ليه أنا ما قلتها بالتفصيل، وبالطريقة المدرسية الإنت دايرها، وبعد داك ثبّتها ليك كاملة، وممكن هسع أشيل الإضافة دي ذاتها وألزقها في البداية، دا لو كلامك باتجاه المعرفة، وقصدك المعرفة، ودوافعك المعرفة،..
ياخي كل الطالبو منّك ما تلخبط موضوع في موضوع، هاشم نوريت دا ذاتو، أيام الكلام عن تيموليلت كان ليهو رأيو الواضح جداً في رفضها ونبذها، المحترم جداً من قبلنا، ندخل هنا نتأدّب عشان المعرفة، ونطلع ببره نقول رأينا في سياسة السودان في تيموليلت في أي حاجة تانية كما نشاء، وبكامل الحرية، صدّقني لما اتكلمت عن تقسيم الدماغ لأقاليم، وعن العلاقة بين علماء الفيزياء البكرهو بعض وبشتغلوا مع بعض، كنت جادي جداً، لأنو عيبنا إنو نحن ممكن نقول (بت فلان داك شرموطة بس لأنو ما جاء رفع معانا الفاتحة في عمّنا فلان)
فياخي قول رأيك في كتاباتي بالطريقة الدايرة وبكامل العداء البتحتاجو روحك لإنتاج رأي، (برّه المكان دا) وتعال هنا زيك وزي الناس، ما تمشي تفتح لي بوست لمراجعة أخطائي هنا، وتنتظر مني أجيك فيهو، دا ياهو البوست الاتطرحت فيهو اللغة ووقعت فيهو أخطائي، تعال صححها لي هنا، بدون ابتزاز بدون شماتة من السهو وترصّد له، ما إنت ما شايل أوسمة بتاعة إله لا يسهو ولا يخطئ، وبدون ادّعاء للغباء،
يعني شنو تشكرني علي إني صححتك في كتابة الفاعل؟ ضهبان يعني أنا من إنك سهوت ودا خطأ طباعي، يعني هل إنت فعلاً هدفك العلقنة؟ لما تجي بعداك تشكرني على تصحيحك، فياخي لو هدفك العلقنة أتعلقن بعيد عن هنا، ولعلمك –سأتابعك- وما أراك فيه مصيباً –بستفيد منو- وبجي بصلحو بهنا عشان الأمانة المعرفية البتنادي بيها دي،
الأمانة المعرفية يا محمّد فيها إنو كلامك المتعلّق باللغة ما تقولو إلا مع جرابين من الشتائم والتجهيل (التجليط، جهالات محسن خالد، آخر جرائم محسن خالد في اللغة)،
ياخي محسن خالد دا (نَهَّاب بنوك، كاتل كتلاء)؟ وألا هو فت نفر بجتهد عشان يعمل حاجة مفيدة قدر قدرتو؟ يشكروهو علي السمح منها، ويصوبوهو بالتي هي أجمل، وبالتي هي مشجعة، وألا كمان يُتابع بعشرات البوستات الشاتمة والمستخفة وبالتحديات والدعوة لمنازلات في شنو وعشان شنو "ما فهمتش عليك والو"؟ عشان كتبت مثال غلط؟ براك كدي أقعد أحسبها لو تلقى مبرر لبوستاتك الما عندها حد وما بتقيف، قلنا بعد الأرشفة دي تلقى "صيد" جديد، كما أنزلت بوست عن الصيد، دي ياها الأمانة المعرفية والمعرفة حقّتك؟ الصيد والرصد، طيّب ما تعاين لمقدرات كتابية ومعرفية قدر المدجّج بيها محسن خالد دي، اتخيل إنو برضو مرق للصيد في البورد متهالك الأقلام دا، البفضل منو ما بكبّو في شبكتي وأضوقو لظى حلّتي قُبّال لظى بطني، وأقطّعها ليهو في رأسو؟
ياخي ما تخجل، دي ما خمس صفحات بتاعة نت، لو في أي صفحة جيت لقيت 10 أخطاء، بتفتكر إنو الأخطاء العشرة ديل ما مستحَقّين، وحاة أمي لو عندك أدنى فكرة عن تأليف الكتب كان عرفت إنو دا زول بطل كتابة كررر، البتسكو في 5 صفحات بتاعة نت (ما يمثّل المئات من صفحات الويرد) وما تلقى ليهو إلا (3 أخطاء منها ماهو متوهم من قبلكم)، ياخي صفحة الويرد الصغيرونة دي براجعوها تلاتة مصححين وتلاتة محررين وبعد داك بنزغم خطأ واتنين، دي حكمة الكتابة الما معروفة لهسع بتحصل ليشنو؟ أسعل البكتبو لو أنا كضاب؟
يمكن لأنو (الكتابة) كفعل إبداعي بيقوم بيها الجزء الأيسر من الدماغ، وفي نفس الوكت (الكتابة) كموضوعة تدقيقية تضبطها قوانين بيقوم بيها الجزء الأيمن من الدماغ، يعني مخ "الفكي" محسن خالد دا شَغّال تلّيب شمال ويمين، على مدى 5 صفحات بتاعة نت، أها الشقي أصلو مخو دا ما بعتر في لعبة أم الحبل دي؟
بالنسبة لموضوعة "قط" و"أبداً"، العندي أنا كتبتو والعارفو سويتو، من شهر كم إنت شايل الكلام دا وبتنادي: يا جهلاء صلحو الكلام دا، يا شنتير تعال ورينا وأشرح لينا، ويا فلان.. ولو ما عارفين الإجابة تعالوا أتعلموا، وبرضك ما قلت الإجابة السرية والخترية بتاعتك دي، ليشنو؟ فكرتك شنو يعني؟

واحد من الكُتّاب هنا مشى اجتهد ونزّل ليك مشاركة جادة جداً جداً اسمو "عيون الحرية" بشأن "قط" و"أبداً"، هل رديت عليهو بما يفيد؟ هل حاورته؟ غطغطت الموضوع واستمريت في نداءاتك بما يصيب باليأس منك، ومن أي جدية يمكن ترقبها أو انتظارها، طيّب ياخي أنا وود أشيقر دا أجهل بشر بي "قط" و"أبداً" دي فهلا تكَرَّمت ووريتنا وشرحت لينا وعَلّمتنا ما لا نعلم، وألا هي المسألة مكرّسة بالأساس لإذلالنا بما لا نعلم؟
يعني المسألة شنو هي؟ تدارس أم حرب؟ عشان كدا أنا كتبت ليك "الصيغة اللفظية الكاملة للسلام الإسلامي اللفظي"، لأنو مفروض تكون شجاع وتقول: الحربُ عليكم، فتكون لك بطولة الغزاة وتكون لنا شهامة الشهداء،..
السلام أهم اسم من أسماء الله الحسنى، وهو موجز الله، فلا تقل به وتفعل ما ينافيه...
إن كنت تنوي طعن أحد، والدس له، فلا أدري حينها ما قيمة أن تُلقي عليه السلام، و"جميعاً"..
عارف؟ مرّة عبد الله الطيب كان بتكلم، قام نَصَب مرفوع في حديثو، اتحشر منحشر بين كان وتوابعها، ما متذكّر الجملة بالضبط بتقول شنو؟ الزول دا زعل جنس زعل من الحكاية دي، كل ما يتكلم شوية يرجع للموضوع دا، ويقول معليش أنا كنت مفتكر إنو الجملة كيت وكيت، وينضم شوية وتاني يحسبها في رأسو عشان يصلحها وألا يسمحها ويلقاها بس ياها كدا، وتاني يجيها راجع، اتغاظ منها غيظ بالجد، اللمة كانت في واحدة من لمّات تكريمو، والأساتذة فيها كتار وكُبار، شيخنا حرن فيها حرنة شديدة خلاص، لامن كتّرها أنا شعرت والله بالغيظ منو، ليه؟
لأنو الموضوع واضح إنو وهمة، غلطة عادية، بس دا ما الزعلني منو؟
زهجت لأنو في فكرة قانون ما ورائي لم يلاحظه شيخنا من قبل، كما يبدو، هذا القانون حريص جداً على ينبّه البشر لكونهم بشراً على الدوام، وفي طريقهم الأخطاء ما داموا أحياء، القانون دا يمكن يكون وراهو الله، أو أكيد وراهو الحدود الفاصلة بين الإله والبشر، أستاذ لغة كبير برتكب غلط هو عارف إنو غلط، يعني ما غلط بتاع جهل وجهالات، وأمام لغويين،..
لاحظ للقانون دا، يجيبو مخرج سينمائي كبير يحاوروه في التلفزيون، يقوم ينسب فيلم لمخرج غلط، البلهاء بقولوا الزول دا ما مثقف في مجالو، يعني الله يخليك تغلط محل إنت ختري بالضبط، لتبقى تلك الحدود قائمة بينك وبين المطلق،..
يجيبو مهندس بتاع حفر يكون شغال 20 سنة حفريات، يعني عارف مجالو دا من ضنبو لقرونو، المهندس دا يقوم يقول جملة عن طبقة أرضية وألا طريقة حفر، يكون غلط فادح ما يقولوا أجهل زول بالحفر، والمهندس دا ذاتو يكون عارف إنو دي جريمة عديل، وبرضو ما يعرف ليه قال كدا، ولا كيف؟ حاجة تحيّر!..
وألا طبيب كبير في سمنار طبي عالمي، يقوم يقول ليهو هجيمة لو قعد عشرين سنة عشان يعرف كيف عملها ما يعرف،
كدي لاحظ للنظرية دي، وراجعها مع روحك، شوف كم مرة عملت حاجات أبداً ما كنت جاهلها وأبداً ما عندك مبرر ليه وكيف عملتها كدا،
أها القضية التالتة، المثال الأخير: فعلاً أنا غلطااان، وغلط بايخ كمان، وما ح أعتذر بإني كنت علي عجلة وما إليه، كنت باكل في تسالي ومرووق وفكّرت فيهو كويييس، وبعد داك ما ظبط معاي، أسوي شنو؟ ما عادي طالب بيشرح لزملاو الدروس وحين الامتحان والتطبيق يقوموا يجيبوا نسبة أعلى منو، دي مسألة وجودية مش معرفية، أها المثال الغلط داك نصححو بالمثال البديل الآتي: جاءني رسالتك...
إذاً لك وعد مني، أن أنقل ما أسهبتُ فيه من قاعدة الهمزات لأُثبته في مقدمة البوست (واحد)
أن أتقبل منك ما تضيفه لموضوع "أبداً" و"قط" (اتنين) لأنني فعلاً أجهل ما تود قوله بصددهما،..
أن أقوم بتصحيح المثال الخاطئ أعلاه (تلاتة)
وأتوقع منك، إفادتنا في كل ما تراه يستحق المراجعة، دون مَنٍّ ولا أذى، لأنو محسن خالد دا شغّال الشغلانية الصعبة دي بلوشي ياخي، وبالمجان، والله كتَّر خيرو، وخضّر الله ضراعو،..
فإن شئت الأمانة المعرفية التي تنادي بها، فاشرع في تصويبنا ودعك من المماحكة التي تؤدّي إلى سوء الفهم، والاتهامات بسوء الغرض، وجهلنا لحكمة ما تريده بالضبط،
إنا منصتون فامضِ بنا، لما فيه فائدة،....


...

Post: #497
Title: Re: إصلاح الكتابة في المنبر
Author: محسن خالد
Date: 05-15-2006, 06:15 AM
Parent: #495

...

shinteer ،...

ود أشيقر إزيك يا أخوي،..
حبابك وحباب دومة السمحة،
اتفضلوا اتنيناتكم، وكونا بخير
Quote: المسألة ليست مسابقة للنيل من الخصم


كان حقو جملتك دي تكون: المسألة ليست مسابقة للنيل من خصم،..

لأنو "الخصم" بالتعريف دي لا تنطبق عليّ كما أُقَدّر، ولا أعرف فيم خصومتي معه،..

يهوّن ربي القواسي،..



Mohamed E. Seliaman،..

طيّب يا محمّد كيف تناظر زول ما بعرف الفرق بين الماضي والمضارع؟ بين الفعل والفاعل؟ من باب أولى و-البديهيات- ما يفهم ليك حكاية ضمير مبني دي، لو هو فعلاً دي قدراتو، كلامك الفوق دا ببقه بندق في بحر ساي،...
وتناظرو بشأن شنو؟ وليشنو؟ وفي ياتو موضوع؟ والداعي شنو؟
بعدين ياخي المناظرة دي بتكون وش لوش، عشان يُختَبَر ما في الصنقور، على الهواء مباشرة؟ أها تلم فيني وألا ألم فيك وين؟
فترت طبعاً من تكرار أقول ليك تعال صوّبنا فيما شئت، بالتي هي أحسن ياخ، بالتي هي أجمل، وبطّل فتح بوستات جديدة لا يعلم أغراضها إلا الله، ما كتير غيرك صوّبني، وصححني، وخطأني، بس هل فيهم زول واحد سمع بنيك الزرازير مني غيرك؟ في ناس بتصححني من وراء الكواليس، شايف الكرم كيف، واحترام المعرفة والمعرفيين كيف؟
لأنو فعلاً تصحيحاتك تنايك زرازير فوق رأس جامع، يا ناس هوووي تعال شوفو جرائم محسن خالد، يا ناس هوووي دي جهالات محسن خالد، عووووك أوررروووك، صوصوصو سيك سيك سيك سيك، قوقوقو قوقووقوقوو
بخصوص الأمانة المعرفية:
بالنسبة لهمزة القطع في (الرباعي) ياخي شرحت ليك ليه أنا ما قلتها بالتفصيل، وبالطريقة المدرسية الإنت دايرها، وبعد داك ثبّتها ليك كاملة، وممكن هسع أشيل الإضافة دي ذاتها وألزقها في البداية، دا لو كلامك باتجاه المعرفة، وقصدك المعرفة، ودوافعك المعرفة،..
ياخي كل الطالبو منّك ما تلخبط موضوع في موضوع، هاشم نوريت دا ذاتو، أيام الكلام عن تيموليلت كان ليهو رأيو الواضح جداً في رفضها ونبذها، المحترم جداً من قبلنا، ندخل هنا نتأدّب عشان المعرفة، ونطلع ببره نقول رأينا في سياسة السودان في تيموليلت في أي حاجة تانية كما نشاء، وبكامل الحرية، صدّقني لما اتكلمت عن تقسيم الدماغ لأقاليم، وعن العلاقة بين علماء الفيزياء البكرهو بعض وبشتغلوا مع بعض، كنت جادي جداً، لأنو عيبنا إنو نحن ممكن نقول (بت فلان داك شرموطة بس لأنو ما جاء رفع معانا الفاتحة في عمّنا فلان)
فياخي قول رأيك في كتاباتي بالطريقة الدايرة وبكامل العداء البتحتاجو روحك لإنتاج رأي، (برّه المكان دا) وتعال هنا زيك وزي الناس، ما تمشي تفتح لي بوست لمراجعة أخطائي هنا، وتنتظر مني أجيك فيهو، دا ياهو البوست الاتطرحت فيهو اللغة ووقعت فيهو أخطائي، تعال صححها لي هنا، بدون ابتزاز بدون شماتة من السهو وترصّد له، ما إنت ما شايل أوسمة بتاعة إله لا يسهو ولا يخطئ، وبدون ادّعاء للغباء،
يعني شنو تشكرني علي إني صححتك في كتابة الفاعل؟ ضهبان يعني أنا من إنك سهوت ودا خطأ طباعي، يعني هل إنت فعلاً هدفك العلقنة؟ لما تجي بعداك تشكرني على تصحيحك، فياخي لو هدفك العلقنة أتعلقن بعيد عن هنا، ولعلمك –سأتابعك- وما أراك فيه مصيباً –بستفيد منو- وبجي بصلحو بهنا عشان الأمانة المعرفية البتنادي بيها دي،
الأمانة المعرفية يا محمّد فيها إنو كلامك المتعلّق باللغة ما تقولو إلا مع جرابين من الشتائم والتجهيل (التجليط، جهالات محسن خالد، آخر جرائم محسن خالد في اللغة)،
ياخي محسن خالد دا (نَهَّاب بنوك، كاتل كتلاء)؟ وألا هو فت نفر بجتهد عشان يعمل حاجة مفيدة قدر قدرتو؟ يشكروهو علي السمح منها، ويصوبوهو بالتي هي أجمل، وبالتي هي مشجعة، وألا كمان يُتابع بعشرات البوستات الشاتمة والمستخفة وبالتحديات والدعوة لمنازلات في شنو وعشان شنو "ما فهمتش عليك والو"؟ عشان كتبت مثال غلط؟ براك كدي أقعد أحسبها لو تلقى مبرر لبوستاتك الما عندها حد وما بتقيف، قلنا بعد الأرشفة دي تلقى "صيد" جديد، كما أنزلت بوست عن الصيد، دي ياها الأمانة المعرفية والمعرفة حقّتك؟ الصيد والرصد، طيّب ما تعاين لمقدرات كتابية ومعرفية قدر المدجّج بيها محسن خالد دي، اتخيل إنو برضو مرق للصيد في البورد متهالك الأقلام دا، البفضل منو ما بكبّو في شبكتي وأضوقو لظى حلّتي قُبّال لظى بطني، وأقطّعها ليهو في رأسو؟
ياخي ما تخجل، دي ما خمس صفحات بتاعة نت، لو في أي صفحة جيت لقيت 10 أخطاء، بتفتكر إنو الأخطاء العشرة ديل ما مستحَقّين، وحاة أمي لو عندك أدنى فكرة عن تأليف الكتب كان عرفت إنو دا زول بطل كتابة كررر، البتسكو في 5 صفحات بتاعة نت (ما يمثّل المئات من صفحات الويرد) وما تلقى ليهو إلا (3 أخطاء منها ماهو متوهم من قبلكم)، ياخي صفحة الويرد الصغيرونة دي براجعوها تلاتة مصححين وتلاتة محررين وبعد داك بنزغم خطأ واتنين، دي حكمة الكتابة الما معروفة لهسع بتحصل ليشنو؟ أسعل البكتبو لو أنا كضاب؟
يمكن لأنو (الكتابة) كفعل إبداعي بيقوم بيها الجزء الأيسر من الدماغ، وفي نفس الوكت (الكتابة) كموضوعة تدقيقية تضبطها قوانين بيقوم بيها الجزء الأيمن من الدماغ، يعني مخ "الفكي" محسن خالد دا شَغّال تلّيب شمال ويمين، على مدى 5 صفحات بتاعة نت، أها الشقي أصلو مخو دا ما بعتر في لعبة أم الحبل دي؟
بالنسبة لموضوعة "قط" و"أبداً"، العندي أنا كتبتو والعارفو سويتو، من شهر كم إنت شايل الكلام دا وبتنادي: يا جهلاء صلحو الكلام دا، يا شنتير تعال ورينا وأشرح لينا، ويا فلان.. ولو ما عارفين الإجابة تعالوا أتعلموا، وبرضك ما قلت الإجابة السرية والخترية بتاعتك دي، ليشنو؟ فكرتك شنو يعني؟

واحد من الكُتّاب هنا مشى اجتهد ونزّل ليك مشاركة جادة جداً جداً اسمو "عيون الحرية" بشأن "قط" و"أبداً"، هل رديت عليهو بما يفيد؟ هل حاورته؟ غطغطت الموضوع واستمريت في نداءاتك بما يصيب باليأس منك، ومن أي جدية يمكن ترقبها أو انتظارها، طيّب ياخي أنا وود أشيقر دا أجهل بشر بي "قط" و"أبداً" دي فهلا تكَرَّمت ووريتنا وشرحت لينا وعَلّمتنا ما لا نعلم، وألا هي المسألة مكرّسة بالأساس لإذلالنا بما لا نعلم؟
يعني المسألة شنو هي؟ تدارس أم حرب؟ عشان كدا أنا كتبت ليك "الصيغة اللفظية الكاملة للسلام الإسلامي اللفظي"، لأنو مفروض تكون شجاع وتقول: الحربُ عليكم، فتكون لك بطولة الغزاة وتكون لنا شهامة الشهداء،..
السلام أهم اسم من أسماء الله الحسنى، وهو موجز الله، فلا تقل به وتفعل ما ينافيه...
إن كنت تنوي طعن أحد، والدس له، فلا أدري حينها ما قيمة أن تُلقي عليه السلام، و"جميعاً"..
عارف؟ مرّة عبد الله الطيب كان بتكلم، قام نَصَب مرفوع في حديثو، اتحشر منحشر بين كان وتوابعها، ما متذكّر الجملة بالضبط بتقول شنو؟ الزول دا زعل جنس زعل من الحكاية دي، كل ما يتكلم شوية يرجع للموضوع دا، ويقول معليش أنا كنت مفتكر إنو الجملة كيت وكيت، وينضم شوية وتاني يحسبها في رأسو عشان يصلحها وألا يسمحها ويلقاها بس ياها كدا، وتاني يجيها راجع، اتغاظ منها غيظ بالجد، اللمة كانت في واحدة من لمّات تكريمو، والأساتذة فيها كتار وكُبار، شيخنا حرن فيها حرنة شديدة خلاص، لامن كتّرها أنا شعرت والله بالغيظ منو، ليه؟
لأنو الموضوع واضح إنو وهمة، غلطة عادية، بس دا ما الزعلني منو؟
زهجت لأنو في فكرة قانون ما ورائي لم يلاحظه شيخنا من قبل، كما يبدو، هذا القانون حريص جداً على ينبّه البشر لكونهم بشراً على الدوام، وفي طريقهم الأخطاء ما داموا أحياء، القانون دا يمكن يكون وراهو الله، أو أكيد وراهو الحدود الفاصلة بين الإله والبشر، أستاذ لغة كبير برتكب غلط هو عارف إنو غلط، يعني ما غلط بتاع جهل وجهالات، وأمام لغويين،..
لاحظ للقانون دا، يجيبو مخرج سينمائي كبير يحاوروه في التلفزيون، يقوم ينسب فيلم لمخرج غلط، البلهاء بقولوا الزول دا ما مثقف في مجالو، يعني الله يخليك تغلط محل إنت ختري بالضبط، لتبقى تلك الحدود قائمة بينك وبين المطلق،..
يجيبو مهندس بتاع حفر يكون شغال 20 سنة حفريات، يعني عارف مجالو دا من ضنبو لقرونو، المهندس دا يقوم يقول جملة عن طبقة أرضية وألا طريقة حفر، يكون غلط فادح ما يقولوا أجهل زول بالحفر، والمهندس دا ذاتو يكون عارف إنو دي جريمة عديل، وبرضو ما يعرف ليه قال كدا، ولا كيف؟ حاجة تحيّر!..
وألا طبيب كبير في سمنار طبي عالمي، يقوم يقول ليهو هجيمة لو قعد عشرين سنة عشان يعرف كيف عملها ما يعرف،
كدي لاحظ للنظرية دي، وراجعها مع روحك، شوف كم مرة عملت حاجات أبداً ما كنت جاهلها وأبداً ما عندك مبرر ليه وكيف عملتها كدا،
أها القضية التالتة، المثال الأخير: فعلاً أنا غلطااان، وغلط بايخ كمان، وما ح أعتذر بإني كنت علي عجلة وما إليه، كنت باكل في تسالي ومرووق وفكّرت فيهو كويييس، وبعد داك ما ظبط معاي، أسوي شنو؟ ما عادي طالب بيشرح لزملاو الدروس وحين الامتحان والتطبيق يقوموا يجيبوا نسبة أعلى منو، دي مسألة وجودية مش معرفية، أها المثال الغلط داك نصححو بالمثال البديل الآتي: جاءني رسالتك...
إذاً لك وعد مني، أن أنقل ما أسهبتُ فيه من قاعدة الهمزات لأُثبته في مقدمة البوست (واحد)
أن أتقبل منك ما تضيفه لموضوع "أبداً" و"قط" (اتنين) لأنني فعلاً أجهل ما تود قوله بصددهما،..
أن أقوم بتصحيح المثال الخاطئ أعلاه (تلاتة)
وأتوقع منك، إفادتنا في كل ما تراه يستحق المراجعة، دون مَنٍّ ولا أذى، لأنو محسن خالد دا شغّال الشغلانية الصعبة دي بلوشي ياخي، وبالمجان، والله كتَّر خيرو، وخضّر الله ضراعو،..
فإن شئت الأمانة المعرفية التي تنادي بها، فاشرع في تصويبنا ودعك من المماحكة التي تؤدّي إلى سوء الفهم، والاتهامات بسوء الغرض، وجهلنا لحكمة ما تريده بالضبط،
إنا منصتون فامضِ بنا، لما فيه فائدة،....


...

Post: #498
Title: Re: إصلاح الكتابة في المنبر
Author: Shinteer
Date: 05-15-2006, 09:46 AM
Parent: #497

Quote: وياشنتير انت رأيك شنو في مداخلتي الاخيرة دي انت شايفة واضحة والا رطانة ؟

مداخلتك واضحة جداً يا أخانا محمد وما فيها أي رطانة. والخطأ في المثال الذي أورده محسن كان واضحاً أيضاً. القاعدة صحيحة والمثال خطأ وتصحيحه لا يحتاج لمناظرة.
انت يا شيخنا المانع شنو إنك تفصح وتبتعد عن روح المبارزة؟. أنت يا سيدي لا تبارح موضع الخطأ أو ما تراه خطأ لتبيّن للناس ما الصحيح. هذا هو التشويش والتداخل ناقص الفائدة.
التدراس لا يكون هكذا يا عزيزي وفي اعتقادي إن هذا البوست للتدارس وليس للتطاحن.
هذا خطأ لأنه كذا وكذا .. الصحيح هو كذا وكذا يا محسن أو يا زيد من الناس. هكذا يجب أن يكون التعاطي مع هذا البوست. المسائل الأخرى التي ربما تقف وراء حنقك أو "قرفك" من محسن خالد شوف ليها مقام آخر يا مولانا.

بيِّض نيتك يا محمد وإيدك معانا في جزئية الكتابة دي بس. وفي جزئيات مآخذك الأخرى على محسن .. شيل عكازك وأردم محسن محل ما تلقى فيه فَرَقة. ما قام مِنّها.

Post: #499
Title: Re: إصلاح الكتابة في المنبر
Author: محسن خالد
Date: 05-17-2006, 01:30 AM
Parent: #498

..

إزيك يا ود أشيقر، وخليك بخير،..


أبقه ممهول وليك الحب،..


...

Post: #500
Title: Re: إصلاح الكتابة في المنبر
Author: نهال كرار
Date: 05-17-2006, 02:12 PM
Parent: #499

محسن خالد

سلااام


محسن القاعد يشاكل دا مابعرفو أبدا, مايجي يرد علي

أنا بتكلم هسي مع محسن البره البورد دا


هاك الرواية دي , بديت اقراها قبل شويه وعاجباني من أولها


Devil On The Cross ( شيطان على الصليب )

Post: #501
Title: Re: إصلاح الكتابة في المنبر
Author: محسن خالد
Date: 05-18-2006, 06:57 AM
Parent: #500

..

نهال كَرَّار،..
إزيك، بقصد نهال البرّه البورد برضو، الما ضلامية زي ما قالت صاحبتي "طمطم شيخ الدين"،..
شكراً على الرواية، جزيل الشكر،..
وكوني بخير
وصية: الحرم بت حاج طيفور "حبوبتي" قالت ليك رأيك شنو نعرّس ليك محسن البتعرفيهو دا، والبرّه البورد ذلكم
أما التاني العوير، والشين بتاع المشاكل دا، نبرّد بيهو علي آمنة مختار، بعد الشاكوش العثمانلي الشهير،..
أها.. أقول ليها شنو؟


...

Post: #502
Title: Re: إصلاح الكتابة في المنبر
Author: شتات
Date: 05-18-2006, 01:25 PM
Parent: #501

أديبنا الكبير ..
استاذنا محسن ..
تحياتي والشكر على الخدمات الجليلة التى تقدمها هنا من أجل لغة رصينة وسليمة ..
وعندي سؤال بخصوص إذن وإذاً
الجماعة ديل مجنني جن
القدرت أجمعو عنهم كالآتي :

إذَنْ : حرف جواب وجزاء يدخل على الجملة الفعلية فينصب المضارع فيها بشرط أن يتصدَّر الجملة ويتصل بالفعل أو ينفصل عنه بالقَسَم ولا النافية فقط، وأن يكون المضارع للمستقبل؛ سأزورك غداً إذنْ أنْتَظِرَكَ. وإن لم تتوافر الشروط المذكورة فهيَ لا تَنصب وتُكتب إذاً.

إِذاً إذَنْ : حرف جواب وجـزاء إِنْ يُرِدْنِ الرَّحْمَنُ بِضُرٍّ لا تُغْنِ عَنِّي شَفَاعَتُهُمْ شَيْئاً وَلا يُنْقِذُونِ إِنِّي إذاً لَفِي ضَلالٍ مُبِينٍ / عملنا بجدٍّ إِذَنْ نحن بالغونَ الهدفَ. إذَنْ يظلُّ حرفَ جواب وجزاء ولكن يَنصب الفعلَ المضارع إذْ يسبقه ولا ينفصل عنه بفاصل ويكون الفعل للمستقبل؛ سنبحث الموضوع معاً، الجواب: إِذَنْ نخرجَ بنتائج حسنة.

لكن وحاتك للآن ما عارف التومة من كلتوم ..
يا ريت تقعدهم لينا كويس ..
ويديك العافية يا جميل

Post: #503
Title: Re: إصلاح الكتابة في المنبر
Author: نهال كرار
Date: 05-19-2006, 06:07 AM
Parent: #501

LOOOOOL


محسن البره البورد( الشافع سااي على قولة طمطم )

حبوبتي بخيتة بتقول لحبوبتك الحرم بت حاج طيفور : بتنا دي لسه صغيييرة وجاهلة وبتقرا
وولدكم دا كل يوم مقتول في حوش فلان وعلان





والقول قول حبوباتنا

Post: #529
Title: Re: إصلاح الكتابة في المنبر
Author: Mohamed E. Seliaman
Date: 02-01-2007, 02:19 PM
Parent: #495

هذا هو البوست يا أشرف الحلبي

Post: #504
Title: Re: إصلاح الكتابة في المنبر
Author: عبدالله الشقليني
Date: 05-19-2006, 09:30 AM
Parent: #1


حبيبنا الكاتب / مُحسن خالد
ألفين سلام
دوماً أقرأ في أول المنتدى العام :


( أعلانك يعني الانتشار )

يبدو هي: إعلانك يعني الانتشار

وربما غلطة مقصودة
غلطتي المست غرورك
وزعلتنا ياحبيبي

( الما بجيب اسمو

Post: #505
Title: Re: إصلاح الكتابة في المنبر
Author: محسن خالد
Date: 05-19-2006, 01:41 PM
Parent: #504

..


شتات،..
إزيك يا زول فنّان إنت،
وأريتك بالسلام وبيوتو،..
أخوك الأيامات دي مطحون طحن الجن، وضراعو غير مطلوق أبداً،
دا اعتذار لأني ح أجي لسؤالك دا قدّام كان ربنا مهلنا، قبل كدا أنبهك لإنو أخينا حسين ملاسي سألني عن كتابة (إذن)، وقد أجبت على شطر كبير من سؤالك هذا، هسع خاشي علي عجل، ووحاة أمي ما عارف كلامي دا كان في ياتو صفحة، كان أقلاها جبتو قنطرتو للإجابة قدام، أرجو إنك تشوفو لو لقيت مهلة،..
ودا وعد نجيض، إني أرجع بالمهلة لسؤالك دا،
هسع بس حبيت أحييك، وأقوليك اتوحشنا صوتك
وكن بخير


نهال كَرّار،..
البسمع شافع دي منّك يقول خلاص "مره متكلّفة"،..
متأكدة إنو دا كلام حبوبتك ما حبوبة الجيران؟
إنت من زمن "كتل أطراف إفريقيا"، مرة في رأس القارّة ومرة في قعرها؟
الأيامات دي مكتول جنس كتلة، في حوشي براهو وبراي،
كوني بخير،
وسلّمي علي حبوبتك اللّحقتني آمنة بت مختار دي..
غايتو الله يستر، آمنة دي لميييضة، بس بتكون ما جايبة خبر


عبد الله الشقليني،..
أول شيء سلّم علي الما بتجيب اسمو دا،
وتاني سلّم علي حلاوة حضرتك،..
أها الفعل دا لأنو رباعي: أعلنَ....
إذاً همزة القطع (في الأمر منو) –على عملات محمد الحسن سليمان، بتكون قاعدة...
أو الهمزة المن فوق –بلغتنا التقريبية،..
كن بخير،


..

Post: #506
Title: Re: إصلاح الكتابة في المنبر
Author: banadieha
Date: 05-20-2006, 01:14 AM
Parent: #505

Re: إصلاح الكتابة في المنبر
Re: إصلاح الكتابة في المنبر



وبصراحة ياسي محسن الجابني هنا ردك على في تيموليت وفي بالي إذن وإذا وطريقة كتابتهما ولو أن لهذا البوست فائدة واحدة لكانت هذه..ولتيسير الأمر على الأخ شتات وعليك في الرد عليك أنقل أعلاه مداخلة حسين ملاسي وردك عليه وبذلك ما في مشكلة في عملها ولكن اللبس في كتابتها وقد أزيل الآن.

ثم

كلامك ما وقع لي تب

كلامك سمح تب
كلامك سمح بالحيل


أما "البتة" فيمكن أن تحل محل تب في الأولى لأنها أتت بعد منفي، فهل يمكن أن تأتي "البتة" بعد مثبت؟ أتحدى من يأتيني بها.


بصراحة انقطعت من البوست والمنبر كمان لمدة وعندما عدت لم اتابع البوست ولا البوستات المنحوتة منه وسأقلب في البوست للنعنشة.

Post: #507
Title: Re: إصلاح الكتابة في المنبر
Author: محسن خالد
Date: 05-20-2006, 07:16 AM
Parent: #506

..



banadieha،..
الزول السمح، يمين فقدناك واتوحشناك،
الحمد لله الريحتني من الفتيش، ونقلت المداخلة هنا،..
بتاعة "البتة" دي لفتة أم الإيه يا قول المصريين،..
"تب" السودانية دي فعلاً ما عندها حل غير تكون "البتة"
والبتة معاها النفي، بس يبقالي إنو العامية بتعالج مشاكل التعقيد كلها، يعني الكلمة الفصيحة بتقع من جرابها بهناك، مبربحة تمام،
وبدون شروطها الفصيحة، الدارج من كلام بواسي المفردات بالتسهيل في رقبتها دي أولاً، وفي شروط استخدامها إن وُجِدت -تانياً، يخيّل لي كدي، دا رأيي معاك
أها (بالحيل) دي دايرالها تأمل حتها، نشوفها جاية من وين،
الأيامات دي تفكيري واقف يمين،..
وما داير ألافح ساي، بلا ملافحة الناس ما مريحانا،..
أروق وأجي لشتات وليك متلّب،
أبقه عافية، وطيّب،
وليك والله في قلبنا معزّة كبيرة وحب شحيم ولحيم


...

Post: #508
Title: Re: إصلاح الكتابة في المنبر
Author: Shinteer
Date: 05-20-2006, 04:03 PM
Parent: #507

الحيل = الحَوْل = القوّة
شد حيلك = ركِّز قوتك
متكيّف منّك بالحيل = متكيف منك بقوة

والله أعلم. لكن ما شايف ليها صرفة غير كده.

Post: #509
Title: Re: إصلاح الكتابة في المنبر
Author: محسن خالد
Date: 05-23-2006, 06:57 AM
Parent: #508

..

موافقك يا ود أشيقر أخوي،..
في الحول دي، وبالحيل
عارف زمان أنا قلت إنو لعبة: أريكها، إدغام اختصاري لشبه جملة، أُريك إياها
قبل أيام بكابس في حروف المعاني لقيت المفردة الآتية: أريتكَ.... وتعني: أخبرني،..
لمّن نرجع للّعبة اللهو الشخص البطفّر فوق الخطوط دا بسأل: أريكها؟
الإجابة بتجي: عمياء، أو كمان: حوصاء
باقيلك الأكثر صحّة ياتها فيهن؟
يخيّل لي الاتنين صاح، رأيك شنو؟
أما (بالحيل) دي، فعلاً دربها بمرق فوق: الحوْل...


..

Post: #510
Title: Re: إصلاح الكتابة في المنبر
Author: محسن خالد
Date: 06-02-2006, 10:14 AM
Parent: #509

..


تحياتي لكم جميعاً، وتحياتي للأخ محمد الحسن سليمان،..
أعتذر يا رجل عن تأخري في إنفاذ وعدي، وذلك بسببٍ من سوء الأحوال عميم
الآن خصّصت هذه الجمعة لفعل ذلك، وأرجو إعذاري،...
يمكنك مراجعة الإضافة التي ألحقتها بقاعدة الهمزات في مطلع البوست،
وأيضاً تصحيح المثال الخاطئ في أعلى الصفحة، كما الاستفادة من إشارتك إلى (ياء المونّث المخاطب)
بالنسبة لحجتك القرآنية بخصوص (أبداً) و(قط)، أقول إنّني أوافقك في الاستخدام القرآني، الذي يخالف قاعدةً بيّنة، أنا مع القرآن ومعك، ولكن هذا لا ينفي أنّ هناك قاعدة تعارضنا معاً،..
لذلك لم أقم بإجراء أي تصرّف في القاعدة، تلك لغة، وذاك القرآن، كلٌّ بدربه، ولكي لا تفهمني خِطْئاً أقول إنني ألتزم بلغة القرآن أكثر من لغة الفقهاء، ولكن في حالات معيّنة أختارها وَفْقَاً لمعرفتي و"قدر بصارتي"،..
أرجو أن تواصل في (مراجعتك) للبوست، مادمتُ حياً و-أكتب بينكم- فالآن أُعِدُّ بورتريه غيابي، استمر ليكن في الإمكان تدارك الأخطاء ما وُجدت

كونوا بخير جميعاً


...

Post: #511
Title: Re: إصلاح الكتابة في المنبر
Author: محسن خالد
Date: 06-14-2006, 04:54 AM
Parent: #510

..

تحياتي يا محمد الحسن سليمان،..

بخصوص (قط) و(أبدا)
يمكنك مراجعة قاموس (المنجد)، أو بعض كتب اللغة المرجعية، وستجد الآتي:


قَطُّ: ظرف زمان لاستغراق الماضي، وتختص بالنفي فتقول "ما فعلتُ هذا قَطُّ"، أي فيما مضى من سنيَّ. ويقال فيها (قُطُ) و(قُط)،..
المرجع (المنجد: للمعلوف)،...


أبداً: ظرف زمان للتأكيد في المستقبل نفياً وإثباتاً "لا أفعله أبداً"، أو، "أفعله أبداً".
المرجع (المنجد: للمعلوف)

بعدين بالمنطق كدا، أبداً من الأبد، الأمام الخالد، فهل يُعقل أن نستخدمها مع الفعل (الماضي)؟
هكذا سيكون الاستخدام لـ(الأزل)، الذي تناسبه (قط) كما تقول معاجم اللغة وكما يقول المنطق،...

بخصوص (أنَّى) فقد أوردتُ ما ذهبت إليه أنت، بمعنى (كيف)
وأوردت أيضاً رأيي في هذا المنحى، أرجو منك نقل مداخلتي كاملة إلى بوستك
لأنك إن شئت القول: (أنّى) بمعنى كيف، لتحدد الكيف بعد ذلك بناء على آخر الآية، (من حيث أمركم الله)، فهذا أيضاً تعرّضنا له،..
لأنّ هنالك سؤال، وين أمرنا الله؟ في ياتو آية؟

وكن بخير


...

Post: #512
Title: Re: إصلاح الكتابة في المنبر
Author: عصام أحمد
Date: 06-16-2006, 11:21 PM
Parent: #1

*

Post: #513
Title: Re: إصلاح الكتابة في المنبر
Author: محسن خالد
Date: 06-17-2006, 07:17 AM
Parent: #512

...

تحياتي عصام أحمد،..
وشكراً جزيلاً


...

Post: #514
Title: Re: إصلاح الكتابة في المنبر
Author: محسن خالد
Date: 06-26-2006, 05:20 AM
Parent: #513

..
تحياتي يا محمد الحسن سليمان،..
يا سيدي الفاضل كان بدءُ أمرك المطالبة باستدلال على ما أورده محسن خالد في باب (قط) و(أبداً)، فآتيناك بما طلبت وهوادة، ومن معجم سمين وعَلَم،..
فماذا كان جوابك تلخيصاً لإيضاحي، كل ما فعلته يا محمد أنك عملت كوتيشن لكلامي وأعقبته بهذه الفقرة.. لا غير:
Quote: فهو حجة عليك إذ أنت من يقول بصحة لم أفعله أبداً
كما أنه داعم لمنطقي ومخالف لمنطقك

دا شنو هسع؟
ظرف زمان للتأكيد في المستقبل نفياً وإثباتاً... الكلام دا إنت ما فهمتو وألا شنو؟
وألا كمان يا خوي... (أفعله) دي فعل (مضارع) وألا (ماضي)؟

أولاً أنا مبسوط منك، لأنك بتذكرني بتحديق وتدقيق الساعاتي وألا سيد الروادي، بس هنا والله ما عجبتني، لأنك زي ما بقولوا الشباب "خرخرت"، خليك شجاع زي محسن خالد، ولامن تستعجل أو تغلط، قول استعجلت أو غلطت،..
وألا كمان تعال وريني فهم كلامك دا شنو؟

تاني هام (قضية أنَّى)
أولاً إنت حُمتَ بكلامي عن أنّى دا حد ما الكيبورد ودّاك، وفي النهاية شنو؟ كتبت:
Quote: طبعا ما أورده محسن عن التفسير
لا يصح عقلا ولا نقلا.

أها كيف؟ ما توري الناس طيّب، فقرتك دي بس كفاية يعني؟ رسول إنت؟
عقلاً دي خليها تب، لأنو انتظرناك انتظرناك انتظرناك... وما كَلّفت عقلك أي مشقة، الدرب البتقترح إنو بمرقك، اللهو "أنّى" بمعنى (كيف)، تعال ختها بمعنى كيف وورينا بمرقك "كيف؟" لأنو عندك باقي آية يا صاحبي، وعندك كمان آية قبلها مرتبطة بيها، أنا سوّيت البقدر عليها وقدر بصارتي، عشان إنت تحكم بإنو كلامي ما بستقيم عقلاً، تعال ورينا استعقالك إنت ليها، ما تزوغ بجنس كلام ما عندو معنى زي دا،...
طيّب أوضح ليك شوييية، بخصوص "أنّى"، فقد أوفيتُ موضوعها حقه حسب رأيي، ولأني شايفك منتكل علي استدلالي بالإمام مالك،
أنا استدليت بأثارة (الإمام مالك) عشان أقول شنو؟
يعني يا أمحمد الحسن أخوي، (أي كيف لا يُوصّف فهو مجهول)
كيف دي أصلاً للاستقصاء والاسترسال في الوصف، عشان الكلام يقع ليك تاح تراح..
في ذمتك الآية بتاعة النوم مع النسوان دي فيها وصف؟
ح تقول لي (من حيثُ أمركم الله) بقولك هات الأمر بتاع الله دا وتعال؟ وينو الأمر؟
دا العقل انتهينا منو،...

بخصوص "النقل" بتقول:
Quote: ومن أراد أن يرى الحق فليراجع تفسير
الإمام الشوكاني. أو الدر المنثور

ياخوي كلنا كايسين الحق والنور، مش الناس يمشوا يراجعوا، لا... تمشي إنت تجيب كلام الشوكاني والسيوطي، وألا ما كان في داعي تقول للناس أنا عارف ليكم حل، وكلام محسن دا باطل (عقلاً ونقلاً) وتقووووم بعداك -يا قول محمد الحسني دفع الله- تكب الزوغة، والناس لا تلقى منك (عقل) لا (نقل).. أفو آمحمد أخوي، دا كلام دا،..
كدي خليك في النقل دا بس، أشتغل لينا نَقّال، جيب لينا كلام السيوطي والشوكاني، وخلينا نشوف، وليك علي أوريك كل استهبالات المفسرين القدماء، الغبية عقلاً ونقلاً، وح أجامل ليك شيخي السيوطي دا جدا، لأنو ختري وبحبو، وكلامي أنا كررتو كتير، التفاسير القديمة بتتحاشى –العقل- والشجاعة في قراءة النص، لظروف معلومة وما تزال قائمة،...
بأي حال ما نسبق الأحداث، خلينا نتريث، وننتظرك تجينا بالنقل، عفيناك من العقل،..

كلامي الجِدّي انتهى،..

خليني أهظر معاك شوية، إنت راجل ذكي ما في شك، أها لامن تضيف للذكاء الأمانة العقلية، يستحيل بعداك إنو الخط دا يتوافق ليك مع منهج "تفكير" أصولي، بمعني ينطلق من ثوابت،..
واحد في الاتنين، يا تخلي التفكير، يا تفكّر بحرية،...

..

Post: #515
Title: Re: إصلاح الكتابة في المنبر
Author: محسن خالد
Date: 06-26-2006, 08:37 AM
Parent: #514

...

العدد


ما بعرفو وقفنا وين غايتو، يخيّل لي لَمّينا في أم العشرين،..

بأي حال خلونا نرجع شوية لأنو القاعدة بتاعة الأعداد من 1- 10 هي أساس الحكاية كلها لاحدي مائة فما فوق،..

قلنا الأعداد (واحد) و(اتنين) ديل بطابقو (المعدود)

رجلٌ واحد

امرأة واحدة،..

يعني لو المعدود (مؤنث) بكونوا مؤنث زيو، ولو مذكر بكونو مذكّر زيو،..

طيب الأعداد من 3- 10 ديل بحبوا الكُجار والمعاكسة، إن بقى (المعدود) انتاية بنقلبو ضكر، وإن بقى ضكر بختو الروج والمكياج،..

ثلاثة رجال... (التاء للتأنيث) ظهرت طوالي لزوم المعاكسة

ثلاث نسوة... (التاء للتأنيث) اختفت من الحريم لزوم الكُجار

عشرة رجال

عشر نسوة



أها بعد داك (القاعدة) لاحدي مائة، ممكن نعتمد فيها علي القواعد دي ذاتها، بس لو عرفنا إنو قاعدة (العشرة) بتتبدّل، درس العدد دا زي ما قلنا هيّن وشوية رَضِي، ما فيهو مفاجعات، يعني لو حفظت ديل تاني الدرس كلو بتعرفو، طيّب كيف؟

أوَّلاً نعرف إنو (العشرة) دي عندها قاعدتين
القاعدة الأولى لما تكون براها، ودي زي ما قلنا فوق حكمها (المعاكسة) زيها وزي باقي الأعداد من 3 إلى 9

عشرُ نسوة
عشرةُ رجال

القاعدة التانية لما تكون (العشرة) جزءاً من (حداشر) و(اطناشر) ولاحدي الرقم تسعطاشر

لأنو الأعداد (11 و 12 وإلى تسعطاشر) ياهو بتكوَّنو من (واحد) و(عشرة) بالنسبة لـ11
(اتنين) و(عشرة) بالنسبة لـ12... وبالطريقة دي إلى تسعطاشر

في الحالة دي العشرة بتطابق زيها وزي الواحد واللتنين المعاها في الرقم 11 و12 وبتمشي بمطابقتها دي طوالي لاحدي تسعطاشر

ودي تذّكرها بالقرآن من كلام يوسف لأبيه يعقوب،..

أهو كدا:

إنّي رأيتُ أحدَ عشرَ كوكباً

المعدود هو (الكوكب) وهو مذكَّر.. أها في حداشر واطناشر الرقمين بطابقو المعدود تذكيراً وتأنيثاً

الواحد بطابق – يعني قال (أحد) ولم يقل (إحدى)...
وكمان (العشرة) بتطابق... لأنو الكوكب مذكّر حذفنا من (الـ10) (تاء التأنيث)

طيّب لو كان المثال لمؤنّث:

رأيتُ إحدى عشرةَ فتاةً

المعدود (الجيكس) وهو مؤنّث، قمنا استخدمنا (إحدى) لأنها ستاتية، وأضفنا (تاء التأنيث) إلى العشر(ة) لزوم المطابقة،...


يعني القاعدة الأساسية والمستمرة أطول للعشرة هي (المطابقة) والاستثناء الوحيد هو لما تكون العشرة قاعدة براها، بقوم مزاجها يحكم معاها وتعاكس،..

طيّب أمثلة فوق حداشر واطناشر:
قرأتُ ثلاثَ عشرةَ مجلةً
قاتلني خمسةََ عشرَ جندياً

طيّب برضو هنا في ملاحظة، إنو الأرقام من 11 وحتى 19 بتكون مبنية علي فتح الجزئين، حتى لو كانوا في محل فاعل أو أي إعراب آخر، باستثناء الرقم (12) وحيدو اللي الجزء الأول منو بيعرب إعراب المثنى،..
بخصوص (12) بتقول:
رأيتُ اثنتي عشرة وردة....
قُطعت اثنتا عشرة وردة
(كدا بقت ما مبنية علي فتح الجزئين، لأنو الجزء الأول استجاب للإعراب، مرة بنصبه بـ"الياء" ومرة برفعه بـ"الألف" زي المثنى يعني)،..

بخصوص بقية الأرقام من 11 إلى 19 بكون البناء علي فتح الجزئين
يعني (ما بتقول) زارني أحدُ عشر رجلاً.... دا غلط

بتقول: زارني أحدَ عشرَ رجلاً..... (أحد) هنا موقعها من الإعراب فاعل، بس بنكتبو منصوب كدي ودائماً.. والعشرة برضها بتكون منصوبة دائماً،..


إذن الدرس بتاع العدد دا هيِّن جداً...

كلو عبارة عن أربعة قواعد:
القاعدة الأولى: الأعداد (واحد) و(اتنين) قاعدتهما دائماً هي (المطابقة)
القاعدة الثانية: الأعداد من (تلاتة) لاحدي (تسعة) قاعدتها دائماً هي (المخالفة أو المعاكسة)
القاعدة الثالثة: العشرة لما تكون براها زي "عشر نسوة" (بتعاكس)
ولما تكون مضافة لرقم آخر (11 إلى 19) (بتطابق)

طيّب ما هي القاعدة الرابعة؟

هي ألفاظ العقود، يعني شنو؟
يعني (20) (30) (40) وإلى (90)

أها ألفاظ العقود دي ما عندها أي قاعدة، يعني ما فيها حكاية مذكّر ومؤنث دي، انتهينا منها خلاص، بس بنتعامل معاها زيها وزي ما تكون جمع مذكّر سالم، متذكرنو دا؟ يعني تُرفع بالواو وتُنصب وتُجر بالياء،..

بتقول: جاء جيشُ (الظافرين)
انتصر (المسلحون) جيداً في المعركة

جاء (عشرون) رجلاً
أحببتُ عشرين امراةً

أها هنا لا في مذكّر ولا مؤنّث

قلنا الأرقام (واحد) و(اتنين) قاعدتهم دائماً المطابقة، أها نضيفهم لألفاظ العقود دي ونشوف الناتج،..

في جيبي واحدٌ وعشرون ريالاً
في جيبي اثنتان وعشرون طرادةً

يعني ياها ريالٌ واحدٌ.... قمت أضفت ليها جملة (عشرون ريالاً)

ما فيها أيتها تغيير

لاحظ هنا لأنو الجملة بتبدأ بجار ومجرور(في جيبي) (دا خبر مبتدأ مقدّم، راجع البوست لوراء بتلقى الكلام دا، لما الجار والمجرور اتقدموا أو كمان يتقدم ظرف، بتاعة: تحت الشجرة رجلٌ)

أمضيتُ في الخرطوم سبعةَ وعشرون يوماً


لاحظ إنو الرقم (7) لسع محتفظ بقاعدتو، وهي المخالفة، لأنو يوم (مذكّر) أضفنا ليهو (تاء التأنيث) لزوم المعاكسة والمكاجرة

أها تمسك الدرب دا طوالي لامن تلم في (100) ودي برضها ما بتعرف لا مذكّر ولا مؤنّث

زرتُ مائةَ بلدٍ

وقَبّلتُ مائةَ امرأةٍ

تاني شنو غير تحج وتموت يا حاج محسن؟

طيّب لو تلّب العدد فوق المائة؟

هنا العدد ممكن يُكتب ويقرأ على صورتين، الأفصح منهما هي الالتزام بأنَّ العربي لغة تُكتب وتُقرأ من (اليمين)

لو عندي مثلاً:

113 رجل.... ما تنسى، قلنا العدد قواعدو (الأساسية) كلها (4) قواعد، طبعاً دا بعد اختزال شديد، لأنو في تاني هراتيم وحترب لاعندو أول ولا آخر، بهمنا نحن العضام الجَبُر، الودك والشحوم ما بتخصنا، نخليها للمتخصصين،..
نقوم نفكّك الرقم 113 دا في تولاهو: تلاتة + عشرة + مائة

طيّب (التلاتة) دي قلنا طوالي (بتعاكس)، هنا (الرجل) مذكّر بنخت ليهو تاء تأنيث نكايةً فيهو
(العشرة) هنا ما قاعدة براها عشان تشاتر، هنا (بتطابق) اللهو الرجل المذكّر، بالتالي بنحذف منها تاء التأنيث
(المائة) أصلاً ما عندها شغلة بمذكّر وألا مؤنّث

تصبح الجملة: ثلاثة عشر ومائة رجل..... قلنا دا الأفصح، لأنو اللغة العربية تُكتب وتُقرأ من اليمين....

لكن برضو ممكن تكتبها كدا: مائة وخمسة عشر رجلاً....

أفصح وأسهل تشتغل من اليمين، الأعداد زي ما هي قدامك ترصها، بتعرف المفروض يتذكّر وألا كمان يتأنّث


ولو كان 113 امرأة... بتكون:
ثلاث عشرة ومائة امرأة...

لو كان 111 رجل، بتكون:
أحد عشر ومائة رجل،...

111 امرأة:

إحدى عشرة ومائة امرأة

اللهي قاعدة (11 و 12) المطابقة في (الواحد) وفي (العشرة) + المائة


طيّب خلينا ندخّل فيها (ألفاظ عقود)

لو كان 125 رجل.... بتكون الجملة:
خمسة وعشرون ومائة رجل...
125 امرأة... بتكون:
خمس وعشرون ومائة امرأة


طيّب الرقم (1000)
دا برضو ما عندو شغلة بمذكّر وألا مؤنّث، يعني (ألفاظ العقود) و(مائة) و(ألف) ديل ما فيهن مؤنّث ومذكّر

لو 5000 رجل، مثلاً، بتُكتب: خمسة آلاف رجل....
لاحظ لا بُدّ من إنك تجمع لفظة (ألف) لتكون (آلاف) في حالة زي دي، ما تبقى زي (الكيزان) كاتبين في بيانن بتاع الجهاد ضد القوات الدولية، إنو كرري استشهدوا فيها (عشرة ألف رجل)، معلومة مكتوبة غلط لغةً وإحصاءً وأغلاط أخرى،... كان مفروض تكون من ناحية لغة بس مش إحصاء تاريخي (عشرة آلاف رجل)

أها: 1455 رجل، تُكتب:
خمسة وخمسون وأربعمائة وألف رجل

1455 امرأة، تُكتب:
خمس وخمسون وأربعمائة وألف امرأة

طيّب: 15306 رجل،..
ستة وثلاثمائة وخمسة عشر ألف رجل

15306 امرأة:
ستٌ وثلاثمائة وخمسة عشر ألف امرأة

لاحظ إنو قلنا (خمسة عشر ألف رجل)
وبرضو قلنا (خمسة عشر ألف امرأة)
يعني ما اتغيرت بتغير المذكّر والمؤنّث، ليه؟
لأنو بيصبح الرقم هو (خمسطاشر عادية) والمعدود هو (الألف)
وألف لفظة تذكير


أها لامن الأرقام تحَصِّل المليارات البتكون روحو ما حَرَّقتو لاهسع... بالتأكيد بتطرشق لدى المليارات، وبنعل خاش العربي وخاش يعرب بن فضيان وقليل شغلة، وبرجع للأرقام الما أحلاها، وأسهلها،...
يضحك نهاركم آلمباريك،..



..

Post: #516
Title: Re: إصلاح الكتابة في المنبر
Author: محسن خالد
Date: 06-27-2006, 05:52 AM
Parent: #515

..
[COLOR: #1e90ff]شتات،..


شتات،

الجميل والطاعم
إزيك يا فنّان
معليييش، ع التأخير، لقيت روحي كاتب ليك (وعد نجيض) أها دي الشرده منها كيف وعيب، أرجو إنو كلامي الفات عن (إذن/ إذاً) يكون كافياً كما يقترح بناديها، بس لزوم الوعد والتوضيح أزيد هاك الهوادة دي،..
الوعد ذمة، أرجو من كلو زول طالبني وعد وألا التزام أو اعتذار ينبّهني، حاكم هادي الأيام بصفّي في رحلتي عبر هذا المكان..



إذن/ إذاً
حرف (جواب) و(جزاء) أو (مكافأة)

قيل إنَّ هذا الحرف إذا نَصَب الفعل كُتب بالنون (إذن)... وإذا لم ينصب الفعل كُتب بالألف (إذاً)...

(انتبه: الفعل المضارع)

طيّب بنصب الفعل كيف ومتين؟

ينصب الفعل المضارع بناءً على شرطين:
(1) لما يكون في صدر الكلام...
(2) ما يكون في (فاصل) بينو وبين الفعل، إلا لو كان الفاصل دا ("قَسَم" أو "لا النافية")، ديل اللتنين ما بأثّرن علي القاعدة، لو جاء فاصل غيرهن بتسقط القاعدة،..

مثال متضمن الشرطين أعلاه:

زول يقولك: سأزورك
تقوم إنت تجاوبو: إذن أُكرمَك...

أها يبقى باقي القاعدة إنو يُكتب بالألف...
لو جاء منبهاً على سبب مثلاً:

إذاً هذا هو الصواب



الملاحظة إنو النتيجة هي نفس قاعدة ابن منظور مع شويية فروقات، (الكلام-الجواب) ما كان مرتبط بمتقدّم عليهو... يعني الموضوع مرتبط بقفلة الجملة.. واكتمال المعنى...

كنصيحة، عليك بكلامي السابق لأنو أوضح وأسهل، في حال شاترت الجملة معاك، وبرضو لأنو كلام ناس العربي ما عندو حد ولا بكمل، نقوم نختار الساهل وبس...
وكن بخير،..


..

Post: #517
Title: Re: إصلاح الكتابة في المنبر
Author: Ishraga Haimoura
Date: 06-27-2006, 07:10 AM
Parent: #1

الأخ محسن خالد
سلامات يا زول يا شفيف
الله يخدر ضراعك ويكتر نفاعك
فول آآآمين
البوست دا أنا عاجبني من زماااان واقترحت على بكري تثبيته لأهميته
اها تاني باحرسه ليك حرسة قدر الله فيشان ما ينزل
وانت ان شاء الله لا تفوت لا تموت..........

Post: #518
Title: Re: إصلاح الكتابة في المنبر
Author: محسن خالد
Date: 06-28-2006, 05:15 AM
Parent: #517

..


Ishraga Haimoura،...
أهليين، وآمييين،..
إن شاء الله يعجبك كل شيء سمح بتتمنيهو، وتلقيهو حااضر ومُجاب،..
مشكورة كتير على هذه المحبّة، وربنا يسمّح خاطرك زي ما سمحتي نهاري بكلامك دا
طيبي دوام وأسلمي أبداً
ولك أجمل الأمنيات والحب


..

Post: #519
Title: Re: إصلاح الكتابة في المنبر
Author: Siddig A. Omer
Date: 06-28-2006, 03:59 PM
Parent: #518

صديقى فى الغار.....عذراً,,,سرقتنى عنك أشياء....و بنين و بنوت اتعبونى....بالتحليق حولى...اخطط لاجازة طويلة بعيدأً...ربمــا أذهب الى تيموليلت.....فقد أخذتنى الدهــشة و انا غارق حتى أذنى فى المجموعــة الكاملة...التى انتشرت فى دوحــة الخير...كاأنتشار الهشيم......فى جوف العتامير........لا زلت فى الخور.... و قريباً أعود...للكهف


لعلك عافية و خير و توقع منى تلفون فى أى لحظــة...فانا مشتاق......

صديق..الخور...الدوحـــة

Post: #520
Title: Re: إصلاح الكتابة في المنبر
Author: محسن خالد
Date: 06-29-2006, 02:40 AM
Parent: #519

.

Siddig A. Omer،..
الصدِّيق، يا صديقي في الغار، والله اتوحشناك،..
السلام ليك ولأسرتك الحلوة، الحبّوبة، ولمديرة الغار
لعلكم طيبين، والخور أريتو مورق
شوف، كان بقولك تعالوا بهنا، بس والله هنا دي أنا مكجنا،
يعني ما زي المغرب تب، فعلاً لو صيّفتو هناك بتسعدو
أريتها مجموعتي بس تكون ونّاسة، وتفرّق عليكم شوية
أها ناغمني وتلفن، في رجاك

أبقوا طيبين كلكم، وجناح جبريل فوقكم تيبان

..

Post: #521
Title: Re: إصلاح الكتابة في المنبر
Author: sudania2000
Date: 06-29-2006, 08:27 AM
Parent: #1

up

Post: #522
Title: Re: إصلاح الكتابة في المنبر
Author: محسن خالد
Date: 06-30-2006, 11:39 AM
Parent: #521

..


sudania2000،..
شكراً يا ستي، وتسلمي

..

Post: #523
Title: Re: إصلاح الكتابة في المنبر
Author: Ishraga Haimoura
Date: 07-22-2006, 02:46 AM
Parent: #1

الصديق محسن خالد

أين تلك اللطائف اللطيفة؟؟؟؟؟

في انتظارك

Post: #524
Title: Re: إصلاح الكتابة في المنبر
Author: Ishraga Haimoura
Date: 07-31-2006, 06:39 AM
Parent: #1

الصديق محسن خالد
Quote: للكتابة شروط اللغة


أين نحن منها؟؟؟؟؟

في انتظارك

Post: #525
Title: Re: إصلاح الكتابة في المنبر
Author: Shinteer
Date: 08-18-2006, 01:47 AM
Parent: #524

أين أختفى الأخوة؟

Post: #526
Title: Re: إصلاح الكتابة في المنبر
Author: Gaafar Ismail
Date: 08-18-2006, 02:38 AM
Parent: #525



أخونا محسن


كيف حالك ولعلك طيب والطلة حلوة ..

شــنتير

يوم الأحد ماشين حديقة Kasai Rinkai يلا أجمع هناك

تحياتي

جعفر

Post: #527
Title: Re: إصلاح الكتابة في المنبر
Author: Adil Al Badawi
Date: 10-17-2006, 03:38 AM
Parent: #525

Quote: أين أختفى الأخوة؟

الأخوة كارامازوف؟!

والله يا أخي، أوكي الكريم، نقوم من حفرة مشاغل نقع في دوامة هموم ندفن روحنا في حفرة مشاغل نتفادى بيها دوامة الهموم وهكذا عوالَيْق.

إنتَ كيفِنَّك؟ وبلد الصراصير التصر صررر صررر صرررررررر؟ ماك حاري ليخوك عقاب (أو عبق) حفرة دخان ينغمس فيهو بدل الحفر الرذيلة دي. أقول قولي هذا نَعَمِنُّو قديماً قيل: الحاري ولا المتعشِّم*

* لن يفوت على فطنتكم، طبعاً، أنَّنا قد استخدمنا السلطات المخوَّلة لنا بموجب القول "...وعين السخط تبدي المساوئا" فعدَّلنا "المتعشِّي" إلى "المتعشِّم" لأنَّ "المتعشِّم" أفضل عندنا من "المتعشِّي" وفي كلِّ خير.

Post: #528
Title: Re: إصلاح الكتابة في المنبر
Author: saif massad ali
Date: 11-21-2006, 05:20 PM
Parent: #527


كتب الدكتور حسن موسى بتاريخ
الاربعاء ديسمبر 28, 2005 9:22 am
Quote: طبعا "حزاء" ايزابيللا" و "أحزية " الجماعة الطيبين التانين تكون ضرّست أسنان "حارس الكتابة" ( ياله من لقب بديع يليق بجهد الرجل) محسن خالد، الحريص على "اصلاح الكتابة " حتى أنه ذكّر الجميع بضرورة "استخدام اللغة العربية في التحاور مع أساتذتنا الاجلاء" (16/10).


وتاني كتب بتاريخ
السبت سبتمبر 09, 2006 11:32 am
Quote: ولو جيت للجد مافي لغة في الدنيا تستغني عن عناصر الإبانة والتحديد، ولو رفعت علامات الشكل عن تراث الأدباء العرب لما بقي فيهم نفّاخ النار. ولو مكضبني أسأل محسن خالد ـ" ذلك المحسن حيّاه الغمام" (المجذوب) ـ كَوْنَهُ آلَى عَلَى نَفـْسـِهِ أَنْ يُحـْسـِنَ عَلَى كُـتـَّابِ "سُودانِيزأُونلايِن" بِشيئٍ مِنْ عِلْمِهِ فِي خَيْطٍ نَافِعٍ عُنْوانُهُ "إصْلاحُ الكـِتابَةِ بِالْمـِنْبَرِ". طبعا مشكلة محسن خالد مع كتاب سودانيز أونلاين يمكن تلخيصها في المثل الصيني الذي يقول: يمكنك أن تأخذ البقرة لغاية النهر لكنك لا يمكن أن تجعل البقرة تشرب إن لم تكن ترغب في الشراب.



محسن خالد ما عندو مشكلة مع كتاب سودانيز أون لاين، وباهدا قاعد مع الغبش ودي دورس مجانية منو، وانت لو صاحب رسالة حقيقة كان مفروض تقعد تكتب مع (الكلاب والخنازير ) عشان يترقو ويبقوا صفوة زيكم
هسه الفايدة من حارس الكتابة وألا من حارسين أنفاس الناس. الطردو عصام جبر الله وسلوى صيام والخواض وعثمان حامد
(قول) ساااي دايرين بوست زي دا يتكتب عندكم بهناك
وبرضو (قول) يا النبي نوح

Post: #530
Title: Re: إصلاح الكتابة في المنبر
Author: محسن خالد
Date: 02-04-2007, 01:52 AM
Parent: #528

يا شباب، بالهداوة كدا:
(طالما) دي ما بتشتغل بدل (ما دام)
هسّع بالدارجي ساي مش بنقول، ما دام عملت كدا وكدا أنا بعمل كدا وكدا
بس ياها دي الصاح،
طالما دي للزمن وعدد المرات، طالما نصحته ولم ينتصح

وتاني حكاية، هكذا مواضيع.... هسع طعمها دا ساي ما قبيح وبطمم البطن
مواضيع كهذه.... دا الصاح، عليكم النبي كان تاني تقولوا: هكذا مواضيع

إنشاء الله دي (حرام) سمعتو؟ حرام سُخُط، (إنشاء الله) بالطريقة دي معناها (تشييد الله)
أكتبوها كدا، مفرّقة: إن شاء الله...

وبرضو ما تقولوا (مما) دفعني لفعل كدا وكدا... غلط، قولوا (ما دفعني)...
يعني للسبب استخدموها بميم واحدة (ما) ودي ياها البتستخدم أكتر

(مما) = (من) + (الذي)
لامن نقول لزول أنفق (مما) آتاك الله.... يعني (من) المال (الذي) آتاك له الله

وبرضو ما تقولوا (سارا سوياً) وإنتو قاصدين نفرين مشيا (معاً)
(سوياً) دي معناها مستقيماً
المعية بنستخدم ليها (معاً)

أها عليكم دينكم تبطّلوا الشترات الكعبة دي،...


...

Post: #531
Title: Re: إصلاح الكتابة في المنبر
Author: إسماعيل التاج
Date: 02-04-2007, 04:28 AM
Parent: #530

يا محسن الله

(طالما) طالبناك تبطل الشترات الزي دي.

معقول يا أخي؟
بس (ما دام) ما ملاحظ الفرق بين التاريخين ديل، قلنا نجيبهم ليك. (إنْ شاء) الله ما تكون محتاج لبيات بوردي مرة تانية.





بعد التحية

نكتب (فـِـيـمَ)، ولا نكتب (فيما).
ونكتب (ممـا)، ولا نتكتبها (مِـمَّ).

أرجـو التوضيح.

قالَ تعالي: ( إِنَّ الَّذِينَ تَوَفَّاهُمُ الْمَلائِكَةُ ظَالِمِي أَنْفُسِهِمْ قَالُوا فِـيـمَ كُنْتُمْ قَالُوا كُنَّا مُسْتَضْعَفِينَ فِي الْأَرْضِ قَالُوا أَلَمْ تَكُنْ أَرْضُ اللَّهِ وَاسِعَةً فَتُهَاجِرُوا فِيهَا فَأُولَئِكَ مَأْوَاهُمْ جَهَنَّمُ وَسَاءَتْ مَصِيراً ) النساء/97 .

وأشواق (طالما) حاولنا مداراتها.

Post: #532
Title: Re: إصلاح الكتابة في المنبر
Author: Ashraf el-Halabi
Date: 02-04-2007, 04:28 AM
Parent: #530

Quote: أها عليكم دينكم تبطّلوا الشترات الكعبة دي،...
يا زول ها ما حا نبطل شارة
وانت ما تبطل إصلاح.
لما لقيت البوست دا تذكرت (وجدنا الكنز)
البوست محتاج زمن وأنا دلوقت مشبوك في كم حتة لكن بلقى ليه زمن (إن شاء الله)
الملاحظ في مثقفينا الواحد فيهم يبخل بمعرفته على الناس إلا في الإطار البيحفظ ليه تميزه
أها إنت مالك!! ما مثقف ولا داسي البتحفظ بيه تميزك؟
شكراً كتير للجهد دا يا أستاذ.

Post: #533
Title: Re: إصلاح الكتابة في المنبر
Author: محسن خالد
Date: 02-07-2007, 10:38 PM
Parent: #532

إسماعيل التاج،..
تحيات يا زول جميل،..
عارف؟ لو قصّيت البوست دا لوراء، بتلقى حكاية "فيم" دي بطولها،..
قلنا في حالة إنها أداة سؤال بنجذ الألف ونعمل فتحة،
فيمَ غضبك يا رجل؟
وفي حالة إنو (ما) دي اسم موصول بمعنى (الذي) بنقرنن مع بعض، زي الآية التحت دي: (فالله يحكم بينهم يوم القيامة "فيما" كانوا فيه يختلفون)
أي يكون حكم الله (في) الأمر (الذي) اختلفوا فيه في الدنيا
---------
وبرضو نَفْس الشيء مع (مما) و(مِمَّ)
ينفقوا (مما) آتاهم، أي بمعنى (من) المال (الذي) آتاهم
أمّا للسؤال فبنجذ الألف ونضع الفتحة على التشديد:
مِمَّ يتكوّن هذا الشيء؟ من كيت وكيت
أبقى عافية

Ashraf el-Halabi،..
آزول ها، كتّر خيييرك،..
ولك أجمل التحايا والتمنيات بطول رتعة

Post: #534
Title: Re: إصلاح الكتابة في المنبر
Author: Ishraga Haimoura
Date: 02-08-2007, 10:53 AM
Parent: #1

العزيز محسن خالد

كل سنة وانت بخيرات كثيرة وعافية أعم
والله (أتوحشناك)

Post: #535
Title: Re: إصلاح الكتابة في المنبر
Author: محسن خالد
Date: 02-09-2007, 07:01 AM
Parent: #534

Ishraga Haimoura،..
إشراقة يا أ ميرة إزيك، وأريتك طيبة
وأنا ذاتي اتوحشتك
وين باقي شغلك الجميل علي البوست دا؟
قبل أيام لقيت الملف بتاعك وعرفت لأي درجة تعبتي فيهو
أبقي وريني الباقي عملتي فيهو شنو؟
وكوني بخير

Post: #536
Title: Re: إصلاح الكتابة في المنبر
Author: Ahmed Yousif Abu Harira
Date: 02-09-2007, 12:21 PM
Parent: #535

الأديب الجميل محسن خالد

أريتك تبقى طيب ،،،

لأول مرة اقبض عليك حيا Live عشان ابلغك تحياتي واعجابي بكتابتك وقبل ذلك روحك الجميلة بالحيل...نحن طبعا (جداد) على منبركم ده ، ولم تتح لنا فرصة التفاعل معكم في السابق (لجهلنا الإلكتروني) لكن لقينا (أتركم) وقصيناهو بالعاقب...وطق طق طق لامن الله لمانا فيكم الليلة يوم 9/2/2007...

لذا تقبلوا منا كل محبة والفرح (كونكم من عقاب عربنا) والفخر بكم...


ستجدني معك (إن شاء الله ) في كل لفة من ملفاتك من (إصلاح الكتابة في المنبر) (تيمولوليت) وحتى الرجل الكلوروفيل..


وأبقى دائما طيب

Post: #537
Title: Re: إصلاح الكتابة في المنبر
Author: محسن خالد
Date: 02-11-2007, 00:30 AM
Parent: #536

Ahmed Yousif Abu Harira،..
مرحبتين أخوي وحبابك
ومشكووور، أبداً ما قصّرت
يسمحن أيامك يا أخوي،
وأنا راجيك نبقى طبايق في الدرب دا
تشولب محل ضرعاتنا ترخي، وتعقّب علي المهاكع بالمواساة
أبقى طيّب، وفي أمان الله

Post: #538
Title: Re: إصلاح الكتابة في المنبر
Author: محسن خالد
Date: 02-11-2007, 00:30 AM
Parent: #536

Ahmed Yousif Abu Harira،..
مرحبتين أخوي وحبابك
ومشكووور، أبداً ما قصّرت
يسمحن أيامك يا أخوي،
وأنا راجيك نبقى طبايق في الدرب دا
تشولب محل ضرعاتنا ترخي، وتعقّب علي المهاكع بالمواساة
أبقى طيّب، وفي أمان الله

Post: #539
Title: Re: إصلاح الكتابة في المنبر
Author: Ashraf el-Halabi
Date: 02-11-2007, 03:30 AM
Parent: #1

السلام على محسن خالد، صاحب الجهد المقدر بهذا البوست الثمين
والسلام على ضيوفه الكرام
يا محمد سليمان
في ظني لو شاركت بنقدك (على علاته) لبوست (إصلاح الكتابة) في البوست دا بس، بدل ما هو مشتت في بوستات تانية ما ليها علاقة بالموضوع، حا تكون ساهمت مع محسن في فصل محو الأمية دا.

Post: #540
Title: Re: إصلاح الكتابة في المنبر
Author: Shinteer
Date: 02-13-2007, 02:48 AM
Parent: #539

تقدمنا بمثل طلبك هذا، يا أخانا أشرف، للأستاذ محمد إي سليمان ولم يفدنا بشيء. وما زلنا في مرحلة "قط" و"أبداً" .. وربما "أنّى". وهل إصلاح الكتابة في حاجة إلى هذه الـ"أنّى"؟. أدخلها الاستطراد، لا الحاجة لكيفية كتابتها أو كيفية استخدامها.

"قط و"أبداً":
القاعدة التي لم أتجاوزها بأحسن منها بعد هي:

"قط" .. تستخدم مع الماضي، ولا تُستخدم مع المستقبل.
"أبداً" .. تستخدم مع المستقبل ولا تستخدم مع الماضي إلا إذا كان هذا الماضي مستمراً إلى المستقبل.

هذا كل الذي أعرفه عن "قط" و"أبداً" وهو صحيح عندي حتى تثبت "إدانته".

Post: #541
Title: Re: إصلاح الكتابة في المنبر
Author: Ashraf el-Halabi
Date: 02-17-2007, 05:34 AM
Parent: #540

شنتير عساك طيب
والله نتمنى إن محمد سليمان يجي ويساهم مع محسن هنا، زي ما عملت إنت وعادل البدوي وبقية الشباب.
مجانية المعرفة دي حكاية بقت تتملص منها حتى الحكومات ذات الإمكانيات، أها لما تبقى مبذولة من أفراد يستقطعوا من وقتهم الممحوق أصلاً لتطوير المجتمع الحولهم تبقى دي حكاية لا يمكن فهمها إلا بمنطق زهد الصوفية، وحسب فهمي دا دور المثقف الحقيقي تجاه مجتمعه.
العايز أقولوا إن البوست دا فيه جهد واضح، أتمنى أي زول يقدر يساهم فيه ما يستنى دعوة ولا عزومة وحسب مراجعتى المستعجلة للبوست دا دا رأي محسن زاتو.
تحياتي ليكم جميعاً

Post: #542
Title: Re: إصلاح الكتابة في المنبر
Author: Mohamed E. Seliaman
Date: 02-17-2007, 07:01 AM
Parent: #541

Quote: القاعدة التي لم أتجاوزها بأحسن منها بعد هي:

"قط" .. تستخدم مع الماضي، ولا تُستخدم مع المستقبل.
"أبداً" .. تستخدم مع المستقبل ولا تستخدم مع الماضي إلا إذا كان هذا الماضي مستمراً إلى المستقبل.

شنتير
الخلاف ليس حول القاعدة المنقولة
الخلاف حول تطبيق هذه القاعدة!!
كتب محسن خالد :
Quote: فيصبح تصحيح الجملة الأولى، لم يذهب إليه أبداً،

هل هذا صحيح حسب القاعدة التي نقلها محسن ؟
Quote: هذا كل الذي أعرفه عن "قط" و"أبداً" وهو صحيح عندي حتى تثبت "إدانته".

من حقك أن تراه صحيحا حتى بعد أن تثبت "إدانته". !
Quote: في ظني لو شاركت بنقدك (على علاته) لبوست (إصلاح الكتابة) في البوست دا بس،

تعال شارك أنت بلا علات !!

Post: #543
Title: Re: إصلاح الكتابة في المنبر
Author: Ashraf el-Halabi
Date: 02-18-2007, 01:47 AM
Parent: #542

حاضر يا محمد سليمان
لو ربنا فتح علي بمساهمة في في نقد إصلاح الكتابة مؤكد حا تكون هنا.

Post: #544
Title: Re: إصلاح الكتابة في المنبر
Author: Shinteer
Date: 02-18-2007, 02:42 AM
Parent: #543

Quote: الخلاف ليس حول القاعدة المنقولة
الخلاف حول تطبيق هذه القاعدة!!

شكراً يا محمد سليمان على هذا التوضيح. لماذا لا تتبرع بكتابة المثال الصحيح أو الذي تراه صحيحاً؟. أهذا بخل أم "غتاتة"؟

القاعدة السالفة لم تثبت إدانتها، ولو ثبتت فسوف أعمل بالقاعدة الجديدة غير المدانة.

Post: #545
Title: Re: إصلاح الكتابة في المنبر
Author: محسن خالد
Date: 02-18-2007, 03:36 AM
Parent: #544

Quote: شنتير
الخلاف ليس حول القاعدة المنقولة
الخلاف حول تطبيق هذه القاعدة!!

يا سلام يا سلام يا سلام، يا عملات بادي!
هسّع بس القاعدة يا ود سليمان بقت منقولة، دحين دي ماياها القاعدة ذاتها الضوقتني فيها المراير
وقلت أوريك جبتها من وين، والمنجد وما المنجد، والقاموس وما القاموس وأورررررروك
هوووووي يا محمّد، ونجرتها من رأسي وما نجرتها، هووووووي يا محمّد
أول شيء تجي تقول إنو ((أخيراً)) ((اكتشفت)) إنها ((قاعدة منقولة))
بعدين المثال مالو؟ بالمناسبة برضو مضمونو منقول! أها رأيك شنو؟
دا فعل مضارع، أوكي؟ مبدوء بحرف من حروف المضارعة: (أنيت)
يذهب،...
المثال مالو يا محمّد سليمان؟
نورنا، خليك شجاع وقول الرووووووووووووووب

Post: #546
Title: Re: إصلاح الكتابة في المنبر
Author: Mohamed E. Seliaman
Date: 02-18-2007, 07:18 AM
Parent: #545

Quote: هسّع بس القاعدة يا ود سليمان بقت منقولة، دحين دي ماياها القاعدة ذاتها الضوقتني فيها المراير
وقلت أوريك جبتها من وين، والمنجد وما المنجد، والقاموس وما القاموس وأورررررروك

يا مدلس أنا طالبتك بالقاعدة التي زعمت أنها تشهد ضدي وضدك!!
أما القاعدة التي ذكرتها أولا فهي منقولة!!
وأنت شايلة وماك مافاهمة !!
أنت كتبت في إصلاح الكتابة :
Quote: لا تقل: لم يذهب إليه قط،... لأنّ قط لا يستخدم معها إلا الفعل الماضي،...
بل قل: لم أذهب إليه قط،...

ومع بقية الأفعال استخدم (أبدا) للنفي بدل (قط)
فيصبح تصحيح الجملة الأولى، لم يذهب إليه أبداً،..

وهنا بينت لك أنك تخلط بين الفعل الماضي والفعل المضارع
وقلت لك :
ماهو الفرق بين " لم يذهب إليه قط،..." و" لم أذهب إليه قط،..."
يذهب فعل مضارع و أذهب فعل مضارع.
الفرق انه يذهب "للغائب"
وأذهب "للمنكلم".
وعليه فإن قولك :
Quote: فيصبح تصحيح الجملة الأولى، لم يذهب إليه أبداً،..

برضو غلط يا محسن !! غلط حسب القاعدة الجبنهت إنت
عشان تشرحها للناس وماك فاهم !!!
وأنت اعترفت يا محسن :
Quote: بس إن شاء الله تلقوا موضوع تعلموني
ليهو غير الفرق بين الفعل المضارع والماضي،

وأنا عايز أعلمك حاجات غير الفعل المضارع والماضي
تقبل ؟
Quote: هوووووي يا محمّد، ونجرتها من رأسي وما نجرتها، هووووووي يا محمّد
أول شيء تجي تقول إنو ((أخيراً)) ((اكتشفت)) إنها ((قاعدة منقولة))

النجر كثير يا محسن !!!
تحديدا الخلاف هنا كان حول التطبيق
وأنت زعم أن هناك قاعدة تخالفني وتخالف شواهد القرآن
والكلام ده موجود في الأرشيف !!
بطل شوطنة
Quote: بعدين المثال مالو؟

المثال غلط وإصرارك على صحته يفضح جهلك بأبسط مبادئ العربية!!
قبال ما نمشي لي قدام :
هل أنت مصر على أن المثال صحيح ؟
Quote: دا فعل مضارع، أوكي؟ مبدوء بحرف من حروف المضارعة: (أنيت)
يذهب،...

ما أجهلك يا محسن خالد !!
وهل تدخل أداة الجزم "لم" على غير المضارع ؟
Quote: المثال مالو يا محمّد سليمان؟
نورنا،

هل أنت مصر على صحته ؟
جيب القاعدة وتعال أنورك
Quote: خليك شجاع وقول الرووووووووووووووب

اصبر عليها يا محسن
الروب تحتاج تفرغ !!!
------------------------------------------

Post: #547
Title: Re: إصلاح الكتابة في المنبر
Author: Mohamed E. Seliaman
Date: 02-18-2007, 07:42 AM
Parent: #546

عشان ما تدلس وتشوطن يا محسن :
ده كلامك:
Quote: بالنسبة لحجتك القرآنية بخصوص (أبداً) و(قط)، أقول إنّني أوافقك في الاستخدام القرآني، الذي يخالف قاعدةً بيّنة، أنا مع القرآن ومعك، ولكن هذا لا ينفي أنّ هناك قاعدة تعارضنا معاً،..

هذه هي القاعدة التي أطالبك بها يا محسن !!!
أما القاعدة المنقولة فهي تعارضك أنت وشنتير
وتعارض مثالك البليد ده !!
ولا تعارض القرآن ولا شواهد كلام العرب !!
----------------------------------
عشان تفهم :
لم يذهب تفيد شنو يا شنتير ؟ ويا محسن ؟
هل تفيد نفي حدوث الفعل في الزمن الماضي أم في الزمن المستقبل ؟
الفرق شنو بين (ما رأيته) و(لم أره )؟؟
زمان كتبت يا محسن :
Quote: لا تقل:
لم يذهب إليه قط،...
لأنّ قط لا يستخدم معها إلا الفعل الماضي،...

بل قل: لم أذهب إليه قط،...
...

ونبهتك إلى إنو (أذهب) و(يذهب ) التنين مضارع !!
قمت إنت كتبت :
Quote: واضح طبعاً إنو اللطيفة الفوق دي كتبتها علي
عجل، فوقع خطأ في استخدامي للفعل الأول،..

قصة دي؟ وألا حكاية يعني، لامن يندق ليها صيوان بكا مترحل زي الشبرية،

ما تستعدل الفعل الغلط دا يا مولانا وانتهينا،..

لتصبح الجملة: ما ذهبتُ إليه قط....

وطبعا
انت في الحتة دي حاولت تصحيح الحاجة الما غلط أصلا !!
الأديب محسن خــالد هل تقبل المناظــرة مع الحبشي؟

Post: #548
Title: Re: إصلاح الكتابة في المنبر
Author: Mohamed E. Seliaman
Date: 02-18-2007, 09:23 AM
Parent: #547

يا شنتير تحياتي :
Quote: شكراً يا محمد سليمان على هذا التوضيح. لماذا لا تتبرع بكتابة المثال الصحيح أو الذي تراه صحيحاً؟. أهذا بخل أم "غتاتة"؟

القاعدة السالفة لم تثبت إدانتها، ولو ثبتت فسوف أعمل بالقاعدة الجديدة غير المدانة.

شنتير
الخلاف ليس حول القاعدة المنقولة
الخلاف حول تطبيق هذه القاعدة!!
أنت قلت :
Quote: القاعدة التي لم أتجاوزها بأحسن منها بعد هي:

"قط" .. تستخدم مع الماضي، ولا تُستخدم مع المستقبل.
"أبداً" .. تستخدم مع المستقبل ولا تستخدم مع الماضي
إلا إذا كان هذا الماضي مستمراً إلى المستقبل.


كتب محسن خالد :
Quote: لم يذهب إليه أبداً،

هل هذه الجملة صحيحة حسب القاعدة التي ذكرتها ؟
وشكرا

Post: #549
Title: Re: إصلاح الكتابة في المنبر
Author: Mohamed E. Seliaman
Date: 02-18-2007, 05:22 PM
Parent: #548

أرجو إجابة واضحة يا شنتير

Post: #550
Title: Re: إصلاح الكتابة في المنبر
Author: Mohamed E. Seliaman
Date: 02-19-2007, 06:32 AM
Parent: #549

سوف أرد عليك هنا بالتفصيل يا محسن

Post: #551
Title: Re: إصلاح الكتابة في المنبر
Author: Mohamed E. Seliaman
Date: 02-20-2007, 07:55 AM
Parent: #550

دع عنك نهبا صيح في حجراته
يا شنتير

Post: #552
Title: Re: إصلاح الكتابة في المنبر
Author: saadeldin abdelrahman
Date: 02-20-2007, 08:39 AM
Parent: #1

غايتو يا محمد أخوي ذكرتني بي طريقة اشعال النار
عند اجدادنا القدماء ..يفركوا العود لمن يمسك شرار..
اها انت (أبدا) و قط ديل خليت بوخهن يلوي!

Post: #553
Title: Re: إصلاح الكتابة في المنبر
Author: Mohamed E. Seliaman
Date: 02-21-2007, 03:30 PM
Parent: #552

يا سعد الدين أخوي إنت رأيك شنو؟
I talked to him
I didn’t talk to him

الجملة الأولى تثبت وقوع الحديث في الزمن الماضي
والجملة الثانية تنفي الحديث في الزمن الماضي برضو
طيب معاك ؟
حدثته .
لم أحدثه !!

في شبه ؟
الفعل في جملتي النفي باللغتين
فعل مضارع حسب الاصطلاح الصرفي
صاح يا سعد ؟

Post: #554
Title: Re: إصلاح الكتابة في المنبر
Author: Mohamed E. Seliaman
Date: 02-22-2007, 12:40 PM
Parent: #553

Quote: صاح يا سعد ؟

لم يرد سعد!!
نواصل ...
جملة (ما ذهبت إليه) تؤدي المعنى الذي تؤديه
جملة (لم أذهب إليه )
فما الذي يجعل جملة
ما ذهبت إليه قط (صحيحة)
ويجعل جملة
لم أذهب إليه أبدا (صحيحة)
يا سعد
القاعدة تتحدث عن الماضي والمستقبل
كمفاهيم للزمن وليس من جهة الاصطلاح الصرفي
المجرد المعني ببنية الكلمة !!!
وبتطبيق القاعدة فإن الصواب هو :
ما رأيته قط
ولم أره قط
ما ذهبت إليه قط
ولم أذهب إليه قط
والخطأ هو :
لم أذهب إليه أبدا
و
يتبع

Post: #555
Title: Re: إصلاح الكتابة في المنبر
Author: Mohamed E. Seliaman
Date: 02-22-2007, 08:11 PM
Parent: #554

Quote: المثال مالو يا محمّد سليمان؟
نورنا، خليك شجاع وقول الرووووووووووووووب

ده برضو كتبتو في لحظة غضب يا محسن؟

Post: #556
Title: Re: إصلاح الكتابة في المنبر
Author: Mohamed E. Seliaman
Date: 02-23-2007, 05:48 PM
Parent: #555

Quote: القاعدة السالفة لم تثبت إدانتها، ولو ثبتت فسوف
أعمل بالقاعدة الجديدة غير المدانة.

Quote: لماذا لا تتبرع بكتابة المثال
الصحيح أو الذي تراه صحيحاً؟.

فقط أنتظر شواهدكم يا شنتير !!
Quote: أهذا بخل أم "غتاتة"؟

ليس بخلا (وما شأن الغثاثة ؟)
فقط أسعى لتعزيز مهارات التفكير النقاد !!
Trying to foster critical thinking skills

Post: #557
Title: Re: إصلاح الكتابة في المنبر
Author: Shinteer
Date: 02-24-2007, 01:50 AM
Parent: #556

Quote: فقط أنتظر شواهدكم يا شنتير

شواهدنا؟ نا؟ من نحن؟. إذا كنت تخاطبني أنا فأنا كتبت القاعدة التي اتبعها ولا أحتاج لشواهد ولست مطالَباً بها. القاعدة المكتوبة أعلاه (في المداخلة الفووووق ديك) هي القاعدة التي أعرف وأفهم، ولم أجد ما يثبت لي عدم صحتها. إذا وجدت ما يخالفها واقتنعت به فسوف أعمل بالقاعدة الصحيحة المخالفة.

أنا الذي انتظرت الشواهد القرآنية التي تخالف القاعدة، حسب كلامك أنت، ولم أجدها، حسب فهمي للقاعدة.

أنا ما عندي شواهد .. أنا عندي القاعدة الفووووق ديك وأنا مقتنع بيها. لو في زول قال ما فاهمها تبقى مشكلتو هو. وقع ليك الكلام يا شيخنا؟

Post: #558
Title: Re: إصلاح الكتابة في المنبر
Author: Mohamed E. Seliaman
Date: 02-24-2007, 07:12 AM
Parent: #557

Quote: شواهدنا؟ نا؟ من نحن؟.

أنت ومحسن خالد-حسب ما فهمت-
تقولون بصحة : لم أذهب إليه أبدا.
وأنتظر منكم شواهد تدعم ذلك
...
Quote: القاعدة المكتوبة أعلاه (في المداخلة الفووووق ديك)
هي القاعدة التي أعرف وأفهم، ولم أجد ما يثبت لي عدم صحتها.

دي بقى مكابرة محضة ....
وقد بينت لك أن الخلاف ليس حول القاعدة المنقولة
الخلاف حول تطبيق هذه القاعدة!!
وقد عقبت أنت بقولك :
Quote: شكراً يا محمد سليمان على هذا التوضيح. لماذا
لا تتبرع بكتابة المثال الصحيح أو الذي تراه صحيحاً؟. أهذا بخل أم "غتاتة"؟
القاعدة السالفة لم تثبت إدانتها، ولو ثبتت فسوف
أعمل بالقاعدة الجديدة غير المدانة.

طيب يا شنتير :
لم أذهب إليه أبدا.(خطأ)
والصواب هو : لم أذهب إليه قط ...
هذا حسب القاعدة ...
وعندي شواهد أشهرها:
وأحسن منك لم تر قط عيني وأجمل منك لم تلد النساء .....(حسان بن ثابت)
ولا يخفى عليك أن (تر) فعل مضارع مجزوم ,
ومع ذلك قال حسان رضي الله عنه :لم تر ((قط ))
وقد كانت حجتكم أن ( أذهب ) في مثال محسن فعل مضارع .
هل تستطيع أن تأتي بشاهد على صحة
لم أذهب إليه أبدا ؟
Quote: أنا الذي انتظرت الشواهد القرآنية التي تخالف القاعدة،
حسب كلامك أنت،
ولم أجدها، حسب فهمي للقاعدة.

هل ممكن تذكرني وين أنا كتبت عن وجود شواهد قرآنية تخالف القاعدة،
؟
---------------
Quote: أنا ما عندي شواهد .. أنا عندي القاعدة الفووووق ديك وأنا مقتنع بيها
. لو في زول قال ما فاهمها تبقى مشكلتو هو

دي مكابرة بحتة ومراوغة محضة !!
أنت تتجنب الحديث عن تطبيق القاعدة وهو محل الخلاف
أكرر لك السؤال الذي تحاول التهرب منه:
لم يذهب إليه أبداً
هل هذه الجملة صحيحة حسب القاعدة التي ذكرتها ؟
وشكرا

Post: #559
Title: Re: إصلاح الكتابة في المنبر
Author: Mohamed E. Seliaman
Date: 02-24-2007, 12:15 PM
Parent: #558

up

Post: #560
Title: Re: إصلاح الكتابة في المنبر
Author: محسن خالد
Date: 02-24-2007, 02:21 PM
Parent: #559

...


قط


حتى إذا جنّ الظلام المختلط ... جاؤوا بضيح هل رأيتَ الذئب قط


(من كتاب "أخبار الحمقي والمغفلين"، لابن الجوزي:
باب: أزهر الحمار الأحمق:
ومنهم أزهر الحمار، كان جالساً بين يدي عمرو بن الليث يوماً يأكل بطيخاً، فقال له عمرو: كيف طعمه يا أزهر أحلو هو؟
قال: ما أكلتُ الخرا قط).

إذا أوتيت بطعام تكرهه فلا تعبه واتركه واعتذر عن أكله (فما عاب رسول الله صلى الله عليه وسلم طعاما قط، بل إن أعجبه أكله وإلا تركه)
رواه البخاري ومسلم

---------
أبدا


أبلغ بني ثُعَلٍ بأنّي لم أكن .... أبداً لأفعلها طوال المُسند
(حاتم الطائي) – قبل الإسلام

لو منكم كان فينا لم ينل أبداً .... حتى تُلاقي أمورٌ ذاتُ آثار
(الخنساء)، تماضر بنت عمرو – من المخضرمين، صدر الإسلام

فإن لم تردوها فإن سماعها .... لكم أبدا من باقيات القلائد
(المزرد الغطفاني) مخضرم


..

Post: #561
Title: Re: إصلاح الكتابة في المنبر
Author: محسن خالد
Date: 02-24-2007, 02:36 PM
Parent: #560

Ya shinteer, did I cut him down to size by these examples or not yet
قعّدنا في علبو، وألا فيهو باقي روح؟

Post: #562
Title: Re: إصلاح الكتابة في المنبر
Author: Mohamed E. Seliaman
Date: 02-24-2007, 03:38 PM
Parent: #561

محسن يا مسكين
بطل فهلوة
Quote: حتى إذا جنّ الظلام المختلط ... جاؤوا بضيح هل رأيتَ الذئب قط
(من كتاب "أخبار الحمقي والمغفلين"، لابن الجوزي:
باب: أزهر الحمار الأحمق:
ومنهم أزهر الحمار، كان جالساً بين يدي عمرو بن الليث يوماً يأكل بطيخاً، فقال له عمرو: كيف طعمه يا أزهر أحلو هو؟
قال: ما أكلتُ الخرا قط).
إذا أوتيت بطعام تكرهه فلا تعبه واتركه واعتذر عن أكله (فما عاب رسول الله صلى الله عليه وسلم طعاما قط، بل إن أعجبه أكله وإلا تركه)
رواه البخاري ومسلم

ديل ما كانوا محل خلاف !!!
أما هذه الشواهد:
Quote: أبلغ بني ثُعَلٍ بأنّي لم أكن .... أبداً لأفعلها طوال المُسند
(حاتم الطائي) – قبل الإسلام
لو منكم كان فينا لم ينل أبداً .... حتى تُلاقي أمورٌ ذاتُ آثار
(الخنساء)، تماضر بنت عمرو – من المخضرمين، صدر الإسلام
فإن لم تردوها فإن سماعها .... لكم أبدا من باقيات القلائد

فهي ضدك يا مسكين وهي لا تخالف القاعدة !!
لأن
Quote: "أبداً" ..
تستخدم مع المستقبل ولا تستخدم مع الماضي
إلا إذا كان هذا الماضي مستمراً إلى المستقبل.

وكل شواهدك بها قرائن تدل على الاستمرار إلى المستقبل
أما مثالك :
لم أذهب إليه أبدا (خطأ)
لأنه ينحدث عن نفي وقوع الفعل في الزمن الماضي
ولا يصلح معه غير (قط)
بطل مكابرة
فهمت وللا أفهمك ؟

Post: #563
Title: Re: إصلاح الكتابة في المنبر
Author: فيصل نوبي
Date: 02-24-2007, 04:57 PM
Parent: #1

نقطة نظام
و سؤال
يا محسن
سلام يا مان..
Quote: أول شيء تجي تقول إنو ((أخيراً)) ((اكتشفت)) إنها ((قاعدة منقولة))

نقول إنو و لا نقول إنه ؟؟

Post: #564
Title: Re: إصلاح الكتابة في المنبر
Author: Mohamed E. Seliaman
Date: 02-24-2007, 05:46 PM
Parent: #563

محسن يحاول المراوغة
والتدليس .
ويصر عل المكابرة ....
ويحاول خداع المتابعين
والتلبيس عليهم بأن
يغرق المكان بشواهد لما ليس
بمحل خلاف . من ذلك إيراده هذه النصوص :
Quote: (فما عاب رسول الله صلى الله عليه وسلم طعاما قط،
بل إن أعجبه أكله وإلا تركه)

و
Quote: قال: ما أكلتُ الخرا قط).

من غير داع لأني قد بينت أن :
Quote: ما رأيته قط
ما ذهبت إليه قط

صحيحة وهي ليست محل خلاف ؟
فلماذا يوردها محسن ؟ إن لم يكن بهدف التضليل!
---------------------
أما ما أتى به غير ذلك من شواهد
فهي لا تدعم مزاعمه, وإليكم بيان ذلك :
الشاهد الأول :
Quote: أبلغ بني ثُعَلٍ بأنّي لم أكن .... أبداً لأفعلها طوال المُسند

ونفي (الكون) هنامتبوع بفعل مضارع متصل باللام
إضافة إلى قوله طوال المُسند..
وهو أمر يدل على الاستمرار !!
وبذلك يصح استخدام أبدا....
أما لو قال: لم أفعلها
فالصواب هو ( لم أفعلها قط) وليس (لم أفعلها أبدا)
الشاهد الثاني :
Quote: لو منكم كان فينا لم ينل أبداً .... حتى تُلاقي أمورٌ ذاتُ آثار

فواضح أن النفي هنا يفيد الاستمرار إلى المستقبل
والقرينة الدالة هي قولها: حتى تُلاقي
الشاهد الثالث:
Quote: فإن لم تردوها فإن سماعها .... لكم أبدا من باقيات القلائد

فليس له صلة بهذه المسألة إلا إن أراد
محسن أن يستشهد به على جهله!!!
لأن (أبدا ) هنا وردت في جملة
Quote: فإن سماعها .... لكم أبدا من باقيات القلائد
وليس في جملة
Quote: فإن لم تردوها

ولو قدمت (أبدا ) لتكون الجملة:
فإن لم تردوها أبدا
فإن المعنى يتغير !!
وأمثلة ذلك كثيرة ....
----------------------
من جانب آخر
لوصح استدلال محسن بهذه الشواهد
فإنه يكون قد نسف القاعدة
وذهب بأسباب إيرادها في هذا الخيط !!!
كيف ؟
يتبع



Post: #565
Title: Re: إصلاح الكتابة في المنبر
Author: محسن خالد
Date: 02-24-2007, 07:52 PM
Parent: #564

......

وَوَدَّ اللَيلُ زيدَ عَلَيهِ لَيلٌ ...... ولم يُخْلََق لَهُ أبدا نَهارُ

(جران العود النمري) مخضرم

-----------------------

ما يَلبَثُ الحُبُّ أَن تَبدو شَواهِدُهُ ...... مِن المُحِبِّ وَإِن لم يُبده أبدا

(الأحوص الأنصاري) أُموي
----------------------

وَلَو أَنَّ غَيرَ المَوتِ لا قى عَدَبَّساً....... وَجَدِّكَ لم يسطع لَهُ أبدا هَضما
(الطرماح) أُموي


......

Post: #566
Title: Re: إصلاح الكتابة في المنبر
Author: Shinteer
Date: 02-24-2007, 07:55 PM
Parent: #564

كتبتَ يا محمد:
Quote: أما القاعدة المنقولة فهي تعارضك أنت وشنتير

هذا هو الدليل يا محمد. واعتقد أن الاسم الذي تحته خط هو اسمي.

أين دليلك أنت على أن القاعدة "المنقولة" تعارضني.

ثم ثالثاً ورابعاً .. أنا حر في أن أمسك عن الإجابة على أسئلتك. فهمت ياخوي؟

Post: #567
Title: Re: إصلاح الكتابة في المنبر
Author: فيصل نوبي
Date: 02-26-2007, 08:07 AM
Parent: #566

*

Post: #568
Title: Re: إصلاح الكتابة في المنبر
Author: Mohamed E. Seliaman
Date: 02-26-2007, 08:59 AM
Parent: #567

Quote: *


ما قلنا:
Quote: يتبع

Post: #569
Title: Re: إصلاح الكتابة في المنبر
Author: محسن خالد
Date: 03-01-2007, 08:20 PM
Parent: #568

...

نماذج تدل على (ماضي مخدوم بالمضارعة)، دون تَمَنٍّ أو تصور أو أي صيغة أخيلة شعرية أخرى، وتظل القاعدة تعمل كما بيّناها سابقاً، لماذا؟ لأنّ هناك قاعدة (ثالثة) لا يجهلها إلا من جهل، من شاءها فـ(ليتعب)، كي لا يتعلّم بعضهم من هنا بعد لجاجة ولأيٍ، ثم يجدون الوقاحة والصفاقة الكافية بعد ذلك، ليكذبوا جهرةً ويزيفوا، مدّعين (عارفين القاعدة منقولة)، طيّب، المرة دي، القاعدة الثالثة التي تضبط هذا الكلام، فتّشوا (بنقلوها) من وين؟
أمثلة:
فـ لَم يَنلني أبدا رفده .............. ولم أكد أسلم من جبهه
(البارع البغدادي) عَبّاسي
--------------------------------------
لَم يَخلُقِ الرَحمَنُ مِثلَ مُحَمَّدٍ ................ أبدا وَظَنّي أَنَّهُ لا يَخلُقُ
(أبو الطيب المتنبي) عَبّاسي
-------------------------------------
لَم أحظَ مِنكَ بنائلٍ أبداً .............. ورجعتُ بالحرمان منصرفا
(الناشئ الأكبر) عَبّاسي
---------------------------

لَولا الوَزِيرُ أَبُو عَلِيٍّ لَم أجد ............. أبداً إِلى الشَرَفِ العَلِيِّ سبيلا
(ابن أبي حصينة) فاطمي
-------------------------------------------

والموت لَم تدفعه عنا حيلة ............ أبداً ولا جيش أجش عرمرم
(اللواح) أيوبي
------------------------------------
لَم تنقطع أبداً ولم ترقب نزو ...... ل الشمس من حمل الى ميزان
(الإمام ابن قيم الجوزية) مملوكي

---------------------------
إلى أصدقائي، ربما نُبَيِّن القاعدة في المستقبل، إلى ذلك الحين تعاملوا مع القاعدة حرفياً، إذا كان الفعل (مضارعاً) فاستخدموا معه (أبداً) . وإذا كان (ماضياً) فاستخدموا معه (قط) ، لا عليكم مطلقاً بتفكيك الدلالة، اللغة العربية لغة سماع وممارسة، قبل كونها لغة قياس، واللغات عموماً (يصنّفها ابن خالد، محسن دا) كأبعاض تتخلّق من المنطق وضده في آن، وتؤدّي عملها كمزاوجة بين التاريخ واللحظة الحاضرة بنَفْس القدر.

..

Post: #570
Title: Re: إصلاح الكتابة في المنبر
Author: محسن خالد
Date: 03-01-2007, 08:36 PM
Parent: #569

..
أهلا يا فيصل

Quote: نقول إنو و لا نقول إنه ؟؟


إنت رأيك شنو؟ ما عندي مانع أتبع رأيك!

يا فيصل، إقحامك للبنات في البوست داك، ما كان شيء جميل منّك، وما كان في مناسبة ليهو بتاتاً،
كانت أول مرة لي أشوفك تعمل حاجة شتره، كلامي دا لو غلط ما تشتغل بيهو الشغلة، مجرد رأي

Post: #571
Title: Re: إصلاح الكتابة في المنبر
Author: فيصل نوبي
Date: 03-02-2007, 08:38 AM
Parent: #570

سلام يا محسن

في إنتظار الاجابة منكـ ( السؤال ده جاد) ..

البوست داكـ نمشي ليو بهناكـ عشان ما نخرب هنا..
و أشكركـ علي الكلمات الطيبة....

Post: #572
Title: Re: إصلاح الكتابة في المنبر
Author: محسن خالد
Date: 03-03-2007, 02:09 PM
Parent: #571

..

فيصل مرحبا وإزيك
السؤال الجاد (يا فيصل) يُفصح عن جدّيته، وذلك بإيضاحه أكثر، خصوصاً في جو موبوء كهذا الماثل أمام عينيك، ولا يُكتب أمامه أنّه (سؤال جاد)، الجدية يأخذها من مبتناه وليس من نعته،..
إن كان لك زعم عن جدية سؤالك، فلي أيضاً زعمٌ يقابله عن جديّة إجابتي السابقة
قصدتُ فعلاً أن تُبدي أنت رأيك في الأمر، لأفهم ما تعنيه بالضبط
وإليك رأيي:
"إنو" بالذي "هو دارج" من لغتنا، وهي تؤدّي أكثر من وظيفة "إنه" التي هي بما "هو مرقون" من لغة.
ممكن نقول:
ما كلّمتني إنو جيت بعربيتك وألا المواصلات
وإنو هنا تعادل (إنّكَ) للمخاطب، ويمكن أن تستخدم في موقع (إنه) للغائب، وكذلك هي تحطّم الإفراد والتثنية والجمع، يعني (إنو) تلعب كـ"جوكر" لشغلانية (الضمائر) دي كلها. شفتَ نِعم وبركات سهولة اللغة اليومية كيف؟ اللغة (المَبربحة) عن زوائدها وتعقيداتها

------------------
تنبيهي ليك يا فيصل، إنو هو دا ذاتو ما كلام بتاع بوستات، لا هناك لا هنا، ولا في أي حتّة تانية. دي حياة ناس غيرك وهم فيها أحرار؟
وكن بخير
..

Post: #573
Title: Re: إصلاح الكتابة في المنبر
Author: Mohamed E. Seliaman
Date: 03-03-2007, 02:58 PM
Parent: #572

كمان بقيت تستشهد بما لا يستشهد به يا محسن ؟
طيب ما كان تجيب شواهد من شعر
نزار قباني !!
Quote: (أبو الطيب المتنبي) عَبّاسي

طيب رأيك شنو في ديل:
Quote: حدثنا ‏ ‏أبو بكر بن أبي شيبة ‏ ‏حدثنا ‏ ‏سفيان بن عيينة ‏ ‏عن ‏ ‏ابن أبي لبيد ‏ ‏عن ‏ ‏أبي سلمة ‏ ‏قال ‏ سألت ‏ ‏عائشة ‏ ‏عن صوم النبي ‏ ‏صلى الله عليه وسلم ‏ ‏فقالت ‏ ‏كان يصوم حتى نقول قد صام ويفطر حتى نقول قد أفطر و لم أره صام من شهر قط أكثر من صيامه من شعبان كان يصوم شعبان كله كان يصوم شعبان إلا قليلا


وأحسن منك لم تر قط عيني وأجمل منك لم تلد النساء
حسان بن ثابت (عاش في الجاهلية والإسلام )

Quote: (الإمام ابن قيم الجوزية) مملوكي

Quote: : قال العلماء : انما خص الابل من غيرهالان العرب لم يروا بهيمة قط اعظم منها ,

ابن قيم الجوزية
رأيك شنو يا محسن ؟
--------------------
ده موش كلامك إنت يا محسن خالد ؟
Quote: بالنسبة لحجتك القرآنية بخصوص (أبداً) و(قط)، أقول إنّني أوافقك في الاستخدام القرآني، الذي يخالف قاعدةً بيّنة، أنا مع القرآن ومعك، ولكن هذا لا ينفي أنّ هناك قاعدة تعارضنا معاً،..

أين هذه القاعدة التي تعارض النصوص القرآنية؟
هذه هي القاعدة التي أطالبك بها يا محسن !!!

_______________
Quote: إلى أصدقائي، ربما نُبَيِّن القاعدة في المستقبل، إلى ذلك الحين تعاملوا مع القاعدة حرفياً، إذا كان الفعل (مضارعاً) فاستخدموا معه (أبداً) . وإذا كان (ماضياً) فاستخدموا معه (قط) ، لا عليكم مطلقاً بتفكيك الدلالة،


________________________
كتبت يا محسن :
Quote: -الضمائر دائماً يا حميدة البجي بعدها بجي مرفوع، إلا الزول كان ما بعرف الضمير، ...
يعني الجملة بتبقه: (الإثارة لها وجهان)،.
أنا قلتلك الكلام دا ليه، أول شيء عشان أعلمك تكتب صاح، وثانياً عشان أوريك إنو البوست دا مش (فيه من المفيد الكثير)، بل ما فيهو سوى الفائدة، يعني كلو فائدة،..

أرجو أن تبين لنا من أين أتيت بهذه القاعدة!!
وفي القرآن الكريم:
وَاعْلَمُوا أَنَّ فِيكُمْ رَسُولَ اللَّهِ لَوْ يُطِيعُكُمْ فِي كَثِيرٍ مِّنَ الْأَمْرِ لَعَنِتُّمْ وَلَكِنَّ اللَّهَ حَبَّبَ إِلَيْكُمُ الْإِيمَانَ وَزَيَّنَهُ فِي قُلُوبِكُمْ وَكَرَّهَ إِلَيْكُمُ الْكُفْرَ وَالْفُسُوقَ وَالْعِصْيَانَ أُوْلَئِكَ هُمُ الرَّاشِدُونَ (7) الحجرات
وَإِنَّ لَنَا لَلْآخِرَةَ وَالْأُولَى (13) الليل
وكماتعرف فإن كلمة "رسول" في الآية الأولى قد جاءت منصوبة بعد ضمير
وكذلك كلمة "للآخرة" في الآية الثانية!! وأمثلة ذلك في القرآن
وأشعار العرب كثيرة !!
ولو شئت لأتيتك بمثال لاسم مجرور بعد ضمير!!
Quote: وكذلك مثال آخر لهمزة وصل جعلتها همزة قطع يا محسن !!!

وكان ردك :
Quote: ياخي في إطار تبسيط لناس ما كُتّاب محترفين، لامن تحسب كميّة الغلط الممكن يرتكبوه بدرب الأمثلة الواضحة فوق دي، ح يكون تسعة وتسعين في المائة من تعبيرن اتصحّح، وشوف إنت مبحِّت ليك آيات من وين وين، عشان تهدم التسهيل دا، هسّع دا شنو بلا الخراب؟ ود أشيقر اتضامن مع الفكرة لأنها حلوة وملعوبة، وأضاف بس حقو ننبّه للانحشارات، زي كان

أنت كتبت في مقدمة إصلاحك المزعوم:
Quote: (هذه القواعد قطعية الثبوت والصحّة، ولذلك أنا أنزلتها لعامل اتضاحها الشديد، من كتاب لي بعنوان، "الُمعْرِب الصحفي"، وكنت قد قصدت به العاملين في كل مجالات الإعلام والثقافة، لحوجتهم للضروري والمختزل من اللغة).

ثم كتبت مبررا :
Quote: ياهو نفس الاستغلال التافه لمداخلات الغضب، خط مهيرة،
حميدة، الحسن، عبد الرازق الطالب، وبالعكس،

ده تناقض مفضوح فياخ بطل مكابرة
كلامك لحميدة كان عن قاعدة مزعومة
تجعل ما بعد الضمائر مرفوعا (دائماإلا زول ما عندو ضمير )
ما في غضب يخليك تنجر قاعدة!!
ده غير تناقضه مع ما كتبته حول المسألة نفسها-في هذا البوست-
مدافعا عن نفسك بزعم أن (نسبة كبيرة) من الأخطاء
يمكن تجنبها باتباع هذه القاعدة المنجورة
وقولك إن هذا الأمر قد نال إعجاب شنتير!!
فكيف يستقيم أنك تعمدت إيراد القاعدة
بمسوغ إحصائي كمي
أسع دي أتحداك نفتح المصحف
ونبدأ من سورة الفاتحة
عشان نشوف نسبة (99%) المزعومة دي

Post: #574
Title: Re: إصلاح الكتابة في المنبر
Author: Mohamed E. Seliaman
Date: 03-04-2007, 07:10 AM
Parent: #573

تحياتي يا محسن
نبدأ بسورة الفاتحة :
اهدِ نَا الصِّرَاطَ المُستَقِيمَ (6)
(نا) ضمير و(الصراط) منصوب !!
صِرَاطَ الَّذِينَ أَنعَمتَ عَلَيهِمْ غَيرِ المَغضُوبِ عَلَيهِمْ وَلاَ الضَّالِّينَ (7)
هم ضمير و(غير ) مجرورة !!

الدور عندك لتأتي بشاهد (لقاعدتك ) من سورة الفاتحة
قبل أن نذهب إلى سورة البقرة.

Post: #575
Title: Re: إصلاح الكتابة في المنبر
Author: Mohamed E. Seliaman
Date: 03-04-2007, 09:32 AM
Parent: #574

بأول هذا الخيط كتب محسن
مخاطبا نهال كرار:

Quote: أما التاني العوير، والشين بتاع المشاكل دا، نبرّد بيهو علي آمنة مختار، بعد الشاكوش العثمانلي الشهير،..
أها.. أقول ليها شنو؟
ثم كتب إلى نوبي :
Quote: يا فيصل، إقحامك للبنات في البوست داك، ما كان شيء جميل منّك، وما كان في مناسبة ليهو بتاتاً، ___
تنبيهي ليك يا فيصل، إنو هو دا ذاتو ما كلام بتاع بوستات، لا هناك لا هنا، ولا في أي حتّة تانية. دي حياة ناس غيرك وهم فيها أحرار ؟


Post: #576
Title: Re: إصلاح الكتابة في المنبر
Author: sunrisess123
Date: 03-04-2007, 09:54 AM
Parent: #575

القلمـ نور
و الكثير منا لديهم أقلام ...
لكن ليس المهم كم قلم لديك ....
بل المهم هو مدى استخدامك لهذا القلم ......
و كيفيه كتابتك فيه !!............................
نجد أقلاماً كثيره لا تخط سوى الكلمات الساقطه ...
و هناك اقلام لا تعبر إلا عن ذاتها......
و هناك أقلام تكتب لمجرد الكتابه .......
وهناك أقلام تخرج حبرها من أجل الشهره ......
و هناك أقلام تبطل الحق و تصحح الباطل !.......
وهناك أقلام تصف واقعاً و تنصر الحقيقه..........
فــنسأل الله سبحانة وتعالى أن يجعل أقلامنا من النوع الأخير...........

Post: #577
Title: Re: إصلاح الكتابة في المنبر
Author: Mohamed E. Seliaman
Date: 03-05-2007, 03:41 PM
Parent: #576

Quote: كما رواه أحمد وحسنه ابن حجر ، قال : حدثنا يعقوب بن إبراهيم حدثنا أبي عن ابن إسحاق حدثني الحصين بن عبد الرحمن بن عمرو بن سعد بن معاذ عن أبي سفيان مولى ابن أبي أحمد عن أبي هريرة قال : كان يقول : حدثوني عن رجل دخل الجنة لم يصل قط ؟! فإذا لم يعرفه الناس سألوه من هو ؟ فيقول " أصيرم " بني عبد الأشهل عمرو بن ثابت بن وقيش


Quote: فيقول الله عز وجل : شفعت الملائكة وشفع النبيون وشفع المؤمنون ولم يبق إلا أرحم الراحمين ، فيقبض قبضة من النار فيخرج منها قوما لم يعملوا خيرا قط قد قد عادوا حمما فيلقيهم في نهر في أفواه الجنة يقال له نهر الحياة فيخرجون كما تخرج الحبة في حميل السيل ألا ترونها تكون إلى الحجر أو إلى الشجر ما يكون إلى الشمس أصيفر وأخيضر وما يكون منها إلى الظل يكون أبيض .
فقالوا يا رسول الله كأنك كنت ترعى بالبادية .
رواه مسلم في صحيحه

Quote: وحديث رسول الله صلى الله عليه وسلم أنه قال:" نزع رجل ( لم يعمل خيرا قط غصن شوك عن الطريق إما كان في شجرة فقطعه وألقاه وإما كان موضوعا فأماطه فشكر الله له بها فأدخله الجنة)"

Quote: وكذلك حديث قاتل المائة نفس الذي جاء: " لم يعمل خيراً قط "؛ لأنه توجه تلقاء الأرض الصالحة، فمات قبل أن يصلها،
‘ في حديث الرجل الذي أمر أهله أن يحرقوه بعد موته وكان أسرف على نفسه ففي الحديث أنه
( لم يعمل خيراً قط إلا التوحيد !)

Quote: وحديث رسول الله صلى الله عليه وسلم أنه قال إن رجلا لم يعمل خيرا قط وكان يداين الناس فيقول لرسول خذ ما تيسر واترك ما عسر وتجاوز لعل الله يتجاوز عنا


Quote: عن ابن عباس رضي الله عنهما قال بينما جبريل قاعد عند النبي صلى الله عليه وسلم سمع النبي نقيضا من فوقه ( أي صوتاً مثل صوت الباب إذا فتح ) ، فرفع رأسه فقال هذا باب من السماء فتح اليوم لم يفتح قط إلا اليوم فنزل منه ملك فقال هذا ملك نزل إلى الأرض لم ينزل قط إلا اليوم فسلم وقال أبشر بنورين أوتيتهما لم يؤتهما نبي قبلك ، فاتحة الكتاب وخواتيم سورة البقرة لن تقرأ بحرف منها إلا أعطيته "رواه مسلم.


Quote: ونص الحديث كما رواه الأمام أحمد عن ابن عمر رضي الله عنهما قال: (كان الكفل من بني إسرائيل لا يتورع عن ذنب عمله فأتته امرأة فأعطاها ستين دينار على أن يطأها فلما قعد منها مقعد الرجل من امرأته أرعدت وبكت فقال لها ما يبكيك ؟ أكرهتك ؟ قالت : لا ولكن هذا عمل لم أعمله قط وإنما حملتني عليه الحاجة ..قال : فتفعلين هذا و لم تفعليه قط ؟ ثم نزل فقال أذهبي بالدنانير لك ، ثم قال : والله لا يعصي الله الكفل أبدا فمات من ليلته فأصبح مكتوبا على بابه : قد غفر الله للكفل) .

______________
يتبع

Post: #578
Title: Re: إصلاح الكتابة في المنبر
Author: محمد المختار الزيادى
Date: 06-17-2007, 10:15 AM
Parent: #1

هكذا دوما عندما يشعر المبدع بنشاز الكلام او(الكلام المشاتر للغة)
يا سيدى اللغة العربية مثل الافق كاذب من يستطيع مد بصره حتى يلاحقها

بوست جميل جدا
واتمنى شاكرا لو وجدت مثل هذه الكتب ان تمدنا بهافى شكل(pdf)

تحياتى ودام الود
مخو

Post: #579
Title: Re: إصلاح الكتابة في المنبر
Author: محسن خالد
Date: 06-19-2007, 03:39 AM
Parent: #578

محمّد المختار الزيادي
مشكور يا رجل، وكتّر خيرك
إلا طلبك بتاع "البي دي إف" دا أنا ذاتي بنتظر الجماعة المتفقهين في الكمبيوتر يعملوهوا ويشملونا بخيراتهم منو
كن بألف خير


----------------
يا كُتّاب وكاتبات،
كلمة (النبز) اللهي الشتائم دي بكتبوها بالزاي مش بالذال.
لو كتبتوها كدا (النبذ) يعني بالذال، فدي معناها الإقصاء والإبعاد
وكلمة (الاعتذار، والعذر، واعذرني) بالذال مش بالزاي
وشنو حكاية:
فالنصوت ..... وكمان:
فالننتخب...
فالنتحد...
(الفوق ديل كلهن غلط)
يا أخواتنا وأخوانا، الفيهن فعل "أمر" ديل وألا "حض" و"حث" كلهن (الفاء) دي بتلزق في "لام" الفعل طوالي بدون ألف منجور، يعني الصاح كدا:
فلنصوت
فلننتخب
فلنتحد



Post: #580
Title: Re: إصلاح الكتابة في المنبر
Author: Mohamed E. Seliaman
Date: 06-19-2007, 07:00 AM
Parent: #579

الأستاذ محسن
السلام عليكم ورحمة الله
كتبت في خيط آخر:
Quote: (ولا تحزن عليهم ولا تكُ في ضيقٍ مما يمكرون) دي آية –النحل،..
وكمان في آية النمل، (ولا تحزن عليهم ولا تكن في ضيقٍ مما يمكرون)،
ولو كان عندي زمن كان وريتك ليه الأولى (تكُ) والتانية (تكن)
أو ممكن تراجع بوست (إصلاح الكتابة) لو بتقدر تستنتجها براك،
دايرالها رأس قوي دي، ما ساهلة،..

أين يشرح بوست إصلاح الكتابة ((ليه الأولى (تكُ) والتانية (تكن) ))؟
أو ما هو الموضع الذي يساعد على استنتاج السبب ؟
بعدها نرجع لموضوع (قط وأبدا )
وعلة التقاء الساكنين التي قطعت همزة ((امرأة))



________________________________________________________________________
Quote: بعدين إضافة أخيرة، في زول بقدر يدافع عن خطاب هو بجهلو؟ سمعتبها دي؟


Quote: أنا أُطالبك بالاستغفار لرب العالمين أولاً، وتانياً بالاعتذار لنا كمسلمين لأنك جرحت شعورنا المسلم بعبثك في كتاب الله،

محسن خالد

Post: #581
Title: Re: إصلاح الكتابة في المنبر
Author: ودقاسم
Date: 06-20-2007, 05:09 PM
Parent: #580

أول مرة في حياتي أرى ميتا يعود من القبر ...
كيف خرج إلينا هذا البوست ؟
لابد أنها أفعال محسن خالد .. أصلا يا محسن انت تنتمي للعوالم الأخرى ... لذا فإنك تأتينا بخبر ما بعد الموت ...
شكرا للذين نبشوا هذا القبر وسنغتح طاقة جديدة لتقبل العزاء في المتوفى ,,,

Post: #582
Title: Re: إصلاح الكتابة في المنبر
Author: Ashraf el-Halabi
Date: 06-21-2007, 00:23 AM
Parent: #581

ود قاسم سلامات
كلامك دا يشبه كلام محسن في قصته "الوجود والوجود الآخر" (حسب فهمي ليها بعد قراية سريعة
)
قال ما معناه الوجود ما هو الوجود الفيزيائي للشخص بقدر ما هو وجود أفعاله
دلوقت يا ود قاسم زي ما إنت قلت المرحوم محسن دا غائب وبوستو محكّر لينا في الصفحة الأولى واحنا (أنا وأخوي الكاشف ) ندبج في اليوم الواحد بدل البوست اتنين وتلاتة وبمجرد نزولها للصفحة التانية نصبح نسياً منسيا رغم محاولة إحيائها بالتنفس الصناعي (UP)

يا محسن المرة الفاتت قلت ليك بجيك راجع لحكاية "الوجود والوجود الآخر" لأني كنت منتظر أتحصل على نسخة من كتاب "كلب السجان" عشان أعرف ليه في ناس فضلت قصة "الوجود والوجود الآخر" على قصة "كلب السجان" وبعد القراية لقيت نفسي محتار، فالرمزية في الاتنين كل واحدة أجمل من التانية
لكما تقديري

Post: #583
Title: Re: إصلاح الكتابة في المنبر
Author: عبدالله الشقليني
Date: 06-21-2007, 06:59 PM
Parent: #1

هذا ( البوست ) يهُم كل من يكتُب

Post: #584
Title: Re: إصلاح الكتابة في المنبر
Author: محسن خالد
Date: 06-21-2007, 09:56 PM
Parent: #583

ود قاسم
تحيات يا قسيم الريد، وينك يا فنّان
أكان انجمعت علي عوالمي دي أنا قايل إخير لي، نبقى نشوفك بهناااك
وأبقى طيب

أشرف الحلبي
إنت يا أشرف الحلبي دي اسم وألا نعت؟ كدي أعربها لينا، عشان صورتك ديك كانت مُعْرَبَة خالص خالص ويضحك نهارك
أنا منتظرك في كلامك عن القصة، تقديري ليك إنّك زول شديد وفنّان، صحيح الأيامات دي بجي خفسة خفسة ومدعوك، لكني منتظرك، داير أسمع قولك، أها الكتاب إن شاء الله عجبك!؟
وكن بخير

عبد الله الشقليني
كيفك يا بيكاسو؟
والبنيات الحلويات وأمهم شن عاملين؟
هسع يا بيكاسو أخوي الكتابة بقت عِرِي ساي، لا لبدة ولا سرج ولا حويّة
والله المستعان على ما يدهجون
كن بخير

Post: #585
Title: Re: إصلاح الكتابة في المنبر
Author: خضر حسين خليل
Date: 06-21-2007, 10:07 PM
Parent: #1

سلامات يازول يا ترس