"سندي وودز مان".. الصبيَّة حارسة البحر.. "صور للفضوليين"

......

أول مرة رأيتها وهذا السلسل الغليظ والوقح يحول بيني وبينها، رأيتُها والطريق إليها مجنزر كمجنون،..


عنترة لم يلمح قَدَرَه ومصيره تحت شَمْع السيوف، كان يستضيء بها نحو مصيره فحسب، وحدها عيون "عبلة" المُجالِد الذي تضل معه حكمة سيفه، يا له من مُجَالِد مسكين،..


الصبيَّة حارسة البحر،..

هي ذنب قلبي ما قبل الأخير، بعد أيام سأقلع عن التدخين والتحنان نحو نساء يحرسن البحر، الكحول ألزمني الطبيب بالإقلاع عنها، وقلبي هذه الأيام يحدّثني بالصلاة وبحب امرأة أكتب لها بوستاً بعنوان (فلانة: خاتمة النبيَّات وليل المرافعين)،..

كحال الطفل الذين لم يظهروا على عورات النساء، رأيتها تحرس البحر، وغَبَّن عيوني فيها، والقلب حتل في برد لُجَّته،..
الكاميرا نهبت نهبتها واختبأت في جيبي،
وإن وجدت سندي عينيّ ما تزالان مغبّيتين فيها، فقالت بمنقار ذلك الطائر "قَدُّوم أحمر": Don’t look at me

قلت: You are beautiful
Everyday is so wonderful,
and suddenly,
it’s hard to breathe

لو كانت تعرف لهجة ناحيتنا، لصكَّت قلبها وقالت: ووب علي، إنت قاعد تريد Christina Aguillera أصلو ما بصدّق! بحبها موت،..

قلت: أوكي، هنا الناس بشوفونا،..

قالت: I’m beautiful,
No matter what they say
Words can’t bring me down
I’m beautiful in every single way
أيوة وأيوة Words can’t bring me down
Oh no
So don’t bring me down today

ما ذنب الغناء بس؟
والقلب كنيسة الذنوب،...


تنويه: الواحد تعب من الحُمَّى دي قال يجعلها جماهيرية،...


يتسلسل، مع زيادة صور تحسباً لزيادة الفضول،..



..

Quote: يتسلسل، مع زيادة صور تحسباً لزيادة الفضول،..

الأستاذ محسن , سلامتك وسلامة قلبك من الآهات
تجدني طفيلي* ملاريا,يتغذي علي آهات قلبك ,ولايريد لك هلاكا,دم صديقي.
........................................................................................
محمد السيد

مُحسـن خالد
يعني إنت قايل بنتوقع منك شنو غير الجمال ؟
شُفت الورطة .. دخلناك ودخلنا فيها معاك ؟
ونجحت إنت وفشلنا نحن نضوقك بي لسان قدرك

Quote: تنويه: الواحد تعب من الحُمَّى دي قال يجعلها جماهيرية،...

مثل تلك الحُمّى يزيدها التعميم تخصيصاً
وحاجة زي دي فيروس يُبيد أمة كاملة من القبح
أنا ما عارف كيف كنت مستحمل براك
هسي الجميل منو ؟؟ حارسة البحر أم حديثك عنها ؟؟

حبنا لك يدعوك أن تحتكــر وحبنا للجمال يدعو للشيوع
وإنت والجمال حاجة واحدة ...
أحكم فينا بالدايرو .. ماهو ريدك وإنكتب لينا

بس سؤال :
زي الحاجات دي الواحدة بعد يشوف يعمل شنو ؟؟
يتوضأ ؟
يصلي ؟
يصوم؟
يمشي يفرش روحو قدام البحر ؟؟
لابد من أداء شــعِيرة جمال

صديقي محسن

ايامك سكوبيس

وانا لي هسع فاتح خشمي

ومنشده

وراجي بقية الصور

وان شاء الله حمتك دي يتبنوها بالعود ولا يتاوقو ليها بالشباك

ما همانا ما دام سندي معانا

سلام

لك ود لا ينضب ،،

OOOOOOOOOOOOOPS














بين الجبلين فقدنا رجال والله

محسن خالد

غايتو البنت الشايفة فى الصور دى لا قدرك لا لحم سدرك (جنس حسادة)

بس انحنا قاعدين هنا فى البوست ده نتفرج و ما بنفوت

إلا تقول القول السمح كلوا

بحق قدوم احمر كم اسميتها

او فاكهة الجنوب الطازجة كما سميتها انا.

..


Eng. Mohammed al sayed،..
تحيات،..
تسلم يا أمير، عِشْ ع الدم آه وساقية القلب، قواديسها البنات،..
قلنا نغني شوية، شان الحُمّى تروح،.


ثابت محمد،..
وأنا ذاتي ما دا ظني فيكم، وألا كان متّ من وحشتي زمان،..
أنا كمان محتار كيف مستحمل، بس الحمّى دي والله غير الشافعة دي ما عارف ليها سبب،..
غايتو زي ما قال ود ضحوية: يوماً كربتيت... ويوماً عشانا ربيت... ويوماً نسف التابه وعليها نبيت،..
كويس كدا يا حلو؟
ياخي عشان نونا دي أنا مشيت الكنيسة، إنت ما بعرفك تعمل شنو؟ مخيَّر

ahmed haneen،..
عارفك غتيت في محبتك،..
يمين قلبي حالي دا ما حال زول بحارس النت، لكن ثابت دا كشف نومتي،..
وعرف الحمولة تقلت علي، أو كما قال السهروردي كلاماً يشبه تلك الأغنية الشعبية: في الحالتين أنا الضائع،..
السهروردي بقول شنو كدا ما عارف؟ إن كتموا السر تفرطقت منهم الأرواح، وبرضو كان باحوا دماءهم تُباحُ
فيما معناه ومعنى سندي يعني،..
فهمت يا لصيص؟

خدر،..
أوفى ما قال الراحل الفاضل سعيد، وبٌ ثم وبٌ علي.. فـووباتٌ متتالية،..


يا هشام المجمّر،..
ياخي الروب نسوي شنو، أو كما قال ذلك المغني من ناحيتنا،
الليلة هوي يا ليلة،..
أسوي شنو؟ والمنقه جُوَّه جزيرة
أسوي شنو؟
الحسادة ما تنفعك، حسناء مقدّامي طليقتنا ما أشدّ منها، كان الله أدَّى منها..
بشوتلك صورتها هنا، وسندي ذاتها بتآمن معاك


هامش:
أنا بحب البنات الشديدات، العاجبو عاجبو، والما عاجبو يحب الشينات،...


...

يا محسن يا خوي كان سمعتة كلامها كان أخير ليك واخير لينا

Quote: وإن وجدت سندي عينيّ ما تزالان مغبّيتين فيها، فقالت بمنقار ذلك الطائر "قَدُّوم أحمر": Don’t look at me

يا زول بعد جنوب أفريقيا دي الظاهر عايز تشوف ليك فكي كارب ، وكان سمعتة كلامها كان الحمة دي ما نجضتك ولا نجضت الناس الجو ناطين ديل .


الله يكتب الشفا

Quote: هامش: أنا بحب البنات الشديدات، العاجبو عاجبو، والما عاجبو يحب الشينات،...

هَيْ لاكين "بِتَّ الحطاب" ما شديدة شِدَّةً قطعت نفس "الأرباب".

أها أمش:

...بخيتة وعديلة عليك.

..

Adil Al Badawi،..
أجيب بس درب من وين وأمشي فيهو؟
بت الحطّاب أول ما شفتها كان الدرب مسوكر ومطبول بجنس جنزير حياتي ما شفتو، كدي أتفرج في الساجور دا، هسع دا بربطو فيهو مركب، وألا عزرائيل؟
بس اتعاهدنا نكون قساوسة بعض، حتى الموت، نكايةً في ذاك الحطاب،..
أصبر القصة ماشَّه عليك


..

..

أنور الطيب،..
والله ياهو كلامك دا ذاتو،..
لكن دي فقراء السافل والصعيد كلهم ما بطبوا منها، آآخ أنا كل ما أمشي محل عشان أكتب كتاب أجي كاتب لي مره وكاتباني في كتاب،..
يقول إسماعيل بن القاسم (أبو العتاهية)
المرء دنيا نفسه.... فإذا انقضى فقد انقضتْ


...

لص المواني ..
محسن بن خالد


روعة لامن الواحد يكون من اوائل المتداخلين معاك في بوست ليك ..
بوستاتك الزخم ديك لانو الناس كسحوني انا غلبني اخشها ..
كما وان مداخلات الخلايق وطبيزهم وخرمجة حديث الغالبية تبشتن اوصال اسكلتون النص الروائي (اسكلتون دي بتاعتك )وتفسد متعة القراءة طويلة الاجل ..
اتخيل رواية غونتر دبرون بتاعة (الحمار) وبين كل صفحة والتاني مداخلة لي قاري..
حرم كان كان لامن تصل نهايتها تنسى من كتبها..



جعلك هذه الحمى على الشيوع امرٌ يريح كاهلك قليلا لكنه يوزع ادوار السهر علينا اجمعين ..

محسن ..بتك دي سممممممممممممحة ياخوي وما اظنها منمن اضعلن على عورات الرجال بعد بيد ان جبهتها دي اعرض مما تحتمل الشواطي ..

..


الوغد (دكين)،..
شفتَ مرسوم بنات الكاب تاون كيف؟
عارف؟ إنت زول كاتب حريف، عشان كدا بقوليك ما تضبط علي أي ملاحظات ضعف كتابة لقدام في هذا البوست،..
الشافعة دي دنقيرتها دي ساي، كاتبها الله براهو، ويمكن الاتكال عليها وطبعها وتوزيعها في كتاب يقرأه حتى الأُميون والكفيفون بدون ما يحتاجوا لطريقة لويس برايل في التحسس، لو في حبر سري، دي ح تكون كتابة طَيّارة، من جنس مواد الكمستري الطيّارة وبارود،..
كان ممكن أجر معاك في الدرب دا، لولا أن جبهتها أعرض مما يسعه كتاب،..
وبسمتها (حمدو) صلاة البنات،..
سنؤجل هذا الحديث إلى حين إنجيل نعدّه لأول نبيّة تخرج بين ظهراني قوم،..
أو إلى حين مرسوم بنات الكاب تاون، كما ألهمتك تلك الكدراوية،..
فرحان بأترك في هذا المعبد، يا ريت كل الزنادقة يتعلموا معانا الصلاة، ويكونوا كُوَرَس، يشيلوا بعدنا آآمين ما قبل الانحناء، أو حتى السقوط من دوخة عطر حبيبة،..


...

محسن ..

شكيتك على القدرك ..
أما كفانا ( بلاوي ) عصام عبدالحفيظ .. تحرس باب المندب من جهته الأمهرية ..
حتى تفجعنا بهكذا ( قيامة ) حديقة ؟؟؟
قالها هشام : دي لا قدرك ولا لحم سدرك
لكن ..
( متى كان للقلب شيبة ؟ )

خاف الله فينا ..

يا صديقي .. تُستتاب
فتتوب ..
فناخد نفسنا نحنا من ( أفراس جهاتك الأربع )
........

ما تسمع كلامي ده و تتوب مره واحدة ..
يعني خفيف خفيف

..


Emad Abdulla،..
الله، جهة الأمهرا، بقولوا فيها قصص وبُهَار تاني،..
وأديس مدينة النعناع وريحة القهوة، أظن رحلتها ستكون وأنا داخل حدود التوبة الأخيرة،..
قلت لي أهدّن في التوب؟ أوكي، دا كلام سمح، بقوم بنمرة واحد، وما بقطع فيها نمرة خمسة من قولة تيت، زي صاحبي محمد سبيل، عربيتي براها ملكلكة وبتقوم تنقلب،...
عارف؟ الحب هو الإيمان دي واحدة من أبرع خلاصات رواية (إحداثيات الإنسان)، القلب الخالي مشرع على الخلاء والغابة.. (ليل المرافعين) كما أسميناه أعلاه،..
أيما ليل لم تمازجه رائحة حبيبة، فهو مسموم


..

محسن خالد :
لمن تكتب حبة حبة وبسييييييتة بسييييتة بيكون كلامك سمح ...

Quote: هي ذنب قلبي ما قبل الأخير، بعد أيام سأقلع عن التدخين والتحنان نحو نساء يحرسن البحر، الكحول ألزمني الطبيب بالإقلاع عنها، وقلبي هذه الأيام يحدّثني بالصلاة

وكم نتمنى ان لا تستغفر مثل هذا الذنب الذي سيوصلك لهذا الطريق !!!!
كما نتمنى أن نعرف ذنبك الأخير !!!!!

تخريمة :




يظهر الجميع وقد أداروا وجوههم لها ...
إلا إنت يا شليق !!!!!!!!!!

عمر الفاروق في حالة تزول بزوال المؤثر..

محسن يا رائع
تدفق روعة كما هذا البحر وذاك الجمال والفتنة

..

عمر الفاروق،..
متذكر لما عيون "سيف الدين" بتاع الطيّب صالح داك انشكّن في السماء، وخلالاص، الناس قنعوا منو تب وقالوا: ووب ووب، الزين كتل سيف، الزين كتل سيف،..
يقول الراوي، ما نسمع إلا: كَب آلمبروك،...
والدنيا غباش في غباش،..
كَب آلمبروك،..
قوم آلزين، المبروك كَب، يقولها شيخ الحنين، الذي لا نعرف أين كان، ولا من أين جاء في ذلك التوقيت،..
أنا كنت بنحك من الزهج والقريفة، لدى بوابة مانديلا، ناوي علي جزيرة روبن وما لقيت حجز، وأشوف الخواجات ديل يشيلوا ويجقموا في تُرَع البيرة زي اللساتر، وجميع المشاريب من نوع red heart ، martell، gordons ،schnapps، zabb، Dimple
قلت ياخ دكتور شنو دا، في جنس الساعة دي وجنس البلد دا، ومشيت عدييل تجاه أحلى وأجمل بار،..
مع اللفّة بالضبط، زي ما تقع في بير سحرية، وقعن عيوني في عيونها الكانن بكوركن في لحظتها، بعد صنّة الدنيا تممممم: كَب آلمبروك، المبروك كب،..
يطير طير، ويحط تاني،

المقبلين منها كدي ديل، ما صوفية في أعماق أعماق روحن زيي، عشان يسمعوا: كَب آلمباريك،..


ما نحن بالصور دي ذاتو، ملينا جَرَّ المريسة، ولن نؤاخذ أحداً على ما يقول، هنا الكلام للتراجمَة بقواميس المتصوفة، يشيلوا الكلام من قلوبن يختوهو في قلبك، ديل سماعن ما بالأضان، وكوراكن كب آلمبروك، ما باللسان...


..

..


عاطف عبد الله،..
أيوة واعدك أدفق، يا صديقي في الغار وشقيقي في الحبر،..


..

قالت :

ـ عيناك تُجرِّدني و تُغسلني برغائب صُدفة داجِنة .

نظرت وفي نفسي أنها من قطيع الجِّمار التي عبرت
قلبي بين الألفة وانتظار الرحيل . قُرص الوجه يراع
أضاء نفسي كأن موطني قد تنفس صورة من حبيبة سرقها العُمر مني .

قالت :

ـ إنكَ نَزَّاع أن تقذف حجراً في بِركة أية أُنثى تُصادِف في المُنعَطف
هَواك .. وأعجب !

...

عبد الله الشقليني،..
أبداً وحاتك، ما قصة أجدع حَجَر في أي بِركة نسوية،..
بل شامخات الفتيات هُنَّ من يرمين بحجر على رأسي، كلما عبرت من تحت السياج،..
نسوان زي الجبال، والصخر المسنّن وناتئ في انتظارنا بالفلّيق
يا رحمة صباح سندي وودز مان


...

مريم ماكيبا تدى محسن خالد شبّال
فلتحفظها الالهة. ولتحفظك يا محسن خالد. وليبارك غناء مريم ماكيبا هذا المحراب. بين الاطلسى والهندى. بين السهل والجبل. بين العرق والقبيلة. بين البياض والسواد.
كم يقتلنى الشعر البنّى يا محسن.
هل ترى خجل المراهقة التى يفاجئها صدرها بالحمام؟ فر.. فر.. فر..

شكرآ لك. القلم فى حضرة جمال المرأة يصير عذبآ. وناعمآ. مثل بتلة زهرة. ويقطر الريحان من حبره. فيضوع الريحان ويضوع الجسد، وينحنى زى فريع البان اليسوح.... يا سلام..

تسجيل حضور ومتابعة وتحية

...


يا برنس،..
البت دي ونّاسة خلاص، عجبتني ونستها.. أحلى من الروايات الكتبوها ناس الدنيا ديل كلهم،

...

..


Adil Osman

عادل عثمان
الشَّعَر البني ورهاف، نُقَر نُقَر، زي شَعَر القنقر، مش؟
وليهو ملمس يبدّل ليك أصابعيك القُدام بأصابع لبيتهوفن وباخ ومزار وفاغنر ومنو ومنو، عارف الحركونية دي إنت؟
القلم دا بالنسبة لي هو المرأة ذات روحها ولفتتها وبشَعرَها الرهاف،..


..

حبيبنا في غُرف القص السماوي
مُحسن خالد

أسمع الدُنيا تدور بخبر عودتك غانماً .. وفرحت .
لا أعرف هل اكتمل قُرص التسفار وجهاً كاملاً وعُدت
إلينا أم أنك لم تزل .
يقولون للصدفة غرابة ، ولن نتركك قبل أن تنفُخ كُرتك
السِحرية من جديد : ـ

إنني أرى من هُنا تبدأ روايتك التفاعلية الجديدة .
من غيرك أقدر على قراءة النفوس والشخوص وحليات
القص ، ومكر مُداعبة الدُنيا ، والرؤية من خلف رواحل
من يجولون بقاع الدُنيا من جديد .
مما يحسبه المداخلون نثراً للود لصديق تجول في الفضاء
الكوني ، وسكن بِطاحاً لم تكُن تعرف إلا العفاريت والملائكة
في القص المُقدس ، أحسبه مادة تنطق .

لك أن تُشمِّر ساعد الجّد وتبدأ .
نثرت بالوناً أحسبه خير من يستدرجك .
بيني وبين مُداخلتي السابقة ( نومة راعي )
هُنا التتِمَّة .

لك المحبة دوماً

محسن

لا أخالني متوهما" إذ هي إلا عروس البحر تلكم التي تسكن مخيلتنا الطفولية،،
إذا" منذ اللحظة ستجدني أجوب البحار مستكشفا" مثل كولمبوس علني أجدها، وعندها لن أصيح وجدتها..
هو رجاء مشفوع بدعوة شيخ صالح

..


عبد الخالق محمد خير،..

أيوة هي ذاتها حكت لي حكوتها، وسألتني شفت توم هانكس ومعاهو حوريتو في الفيلم داك، وفرحت لما عرفت إني عوَّام جداً،
شفت بطن البحر كيف زاهية وخضراء؟ بتشبه موعد


..

البحر ختاف الرجال يا هوي.

..


محمد السر،..
بس بعد إيه؟ ح تبهني هسع وأنا بكتب من بطن البحر
كنت عايز أتجنن في البوست دا، ما صدّقت تميت مشاهدات جنوب إفريقيا للجريدة، بس جاتني شغلانية تانية، لأنك أكتر زول بحب إحداثيات الإنسان وبسأل منها، البروفة بتاعتها جاتني أمس وهسع بدقّق فيها، ما أكتر من أيام وح تنجض الطبخة دي

...

..

كونها تكون لابسه أسود، وأكون لابس أبيض،..

والصورة تتشات في فلك الفكرة نفسها،
ياتو حلاوة "مُدبَّرة.. لأن الأمور جرت في غاية منتهى الصدفة"
وكمان في بلد العنصريين قبل شوية ديل،..

دا مش موعد مُرتَّب مما جدّها مانديلا كان متمحّن جُوّه جزيرة روبين؟
أو حتى منذ الأزل وبأقل تقدير منذ الغمر وحداثة الكائنات البَحَّارة،
التي جاءت بها مركب عبر غمر كوني،...

بس أبوها لا يؤمن بالقدر ولا بمركب نوح،..



يا رائحتها، يا هُيلى روحها تنز من ثقوب الجسد، في أعطافي،
وفي "فنيلتي البيضاء"،..
التي أضحت مقدّسة ومرتبطة بغيب القادمين ببشارة من بلاد بعيدة،
بفرحٍ وقمحٍ وطَمَعٍ كثير،
سأدخرها "قميص" اليوسفية رسولتي الحَبّوبة،
لأجد ريحها إن فَصَلَت الطائرات مطار الكاب تاون، أو إن لم "تفصل" ظروفي،...


أما انتباه، فأنا رجل له شغفٌ بالاطلاع اليومي والكتابة اليومية،
نظاراتي "صحن صيني" ولن تُبَلَّغني عيناي أكثر من سنتين أو ثلاث،..
حينها ستنفعني "فنيلتي" كما نَفَع القميص يعقوب،
صلَّى الله والمسيح ومحمد على اليوسفية،...

عامٌ فيه يُغاث الناس وفيه يعصرون،
أما تفسيري للرؤيا فـسيكون في بوست "فلانة: خاتمة النبيَّات وليل المرافعين"،..

هذه الفتاة فيها شيء غلامي، والله أعلم

ابنة الحطّاب التي احتطبت قلبي بالنار فوراً،
حارقةً لمراحل الفأس والحبال،..
مع الفأس كان سيكون لي حتى ولو الأمل بالعيش في مخزن ضرير،...


هامش:
أنا بحب البنات الشديدات، العاجبو عاجبو، والما عاجبو يحب الشينات،
والشينات الماعاجبن يستقيلن،...


وإنما الشديدة شديدة بالعذوبة أولاً... ولا يعوّل على الساقين إلا بقدر الحاجة


..

Quote: وإنما الشديدة شديدة بالعذوبة أولاً... ولا يعوّل على الساقين إلا بقدر الحاجة

محسن خالد

كده أنت فارقت درب ناس الفليل العندهم " الحلة بصل والمرة كرعين" و مسألة العذوبة دى بتجى فى الآخر.

غايتو فاكهة الجنوب الطازجة دى ما عندنا فيها كلام

لكن الفى بطنك عرفناهو

..

هشام المجمّر،
الاعتذار أعددناه للتانيين، وليس لها،..
أما هي فلها أعظم مما قال الجاهلي عمر بن كلثوم:
ساريتي بلنطٍ أو رخامٍ .... يرنُّ خُشاش حليهما رنيناً،..
أنا بحب الضباب في القصص وفي الصور،..
وإلا جعلت لعلنها ما تشيب له العقول والقلوب، والجسد

العذوبة مع سندي فكرة أخرى وأعمق،..
مضافة لمنقار قدُّوم أحمر، شعرها السنبلي، وقوامها الكمندان

Ooh yah? إنت ما سمعت دي عندها بتقولها كيف؟
وألا U kidding me..right ...


العذوبة هي امتلاك آليات وقدرة، لإبراز ملامح جمال الروح


العذوبة أخطر من الساقين مافي شك،،
ما سمعت يعني النسوان يقولن: هي يا يمة هو الله أسمح منها،
والبقطعوا فيها دي وشايلين حالها بتكون هي أعذب منهن،
ما ناش صاحبنا وألغزَ عليهن تأويله،
هو العذوبة


...

..

لأجل أطفالٍ كُثر سأحتفظ بـ"الفنيلة" لأُباركهم برائحة اليوسفية،..
بعد عودتي من هناك مباشرة، في هذه الصورة
جعلت ريحة اليوسفية تندغم في (آية الجَرّاح) وتباركها،...
بنية رفيق دربي نوري،..
وسأسافر نحو بلدانٍ كثيرة، لأُبارك الأطفال بـ"فنيلة" اليوسفية،..
سأذهب وأتجول في عيد "رائحة اليوسفية" كـبابا نويل بتاع الفنايل،..
سأكون في هولندا بعد حين، وستتبارك "لقاء طارق أبو عبيدة"،..
وبما أنني هاربٌ كبير من المعركة،..
سأنتظر المناضلين جميعاً الواقعيين والانترنيتيين ليحرروا الخرطوم،..
وحينها سيذهب بابا نويل بتاع الفنايل
وستتبارك "رفقة" بنيّة الصادق الرضي،..
الصبيان لا يُباركون عندي،
وأنا معجبٌ بولادة الطفلات أكثر من الصبيان

لستُ من المعجبين بالأطفال –كلهم- كثيراً،..
لا أحب أن أكون مسؤولاً عن مصير كائن،..
خصوصاً لدى السن التي يصرخون فيها نصف الليل،
بكل أنانية الكائنات غير الواعية والمتعلّمة،..
هذا برؤية كاتب تقوم حياته حين تنام حياة الكائنات الأخرى،..
اللهم إلا اليوسفية،..
وحدها التي نفحتني منها رائحة طفل،..
وتخيلتها تدفعه أمامي بتلك العربات الصغيرة،
بينما أتأخر إنا بحجّة كوني سأشتري لها ولبنيّتها مني الآيسكريم،
وهذا بأي حال لا يعني حرمان نفسي من شراء السيجار بلهفة أكبر،...


هامش خاتم بخصوص العذوبة:
أنا بحب البنات الشديدات، العاجبو عاجبو، والما عاجبو يحب الشينات،
والشينات الماعاجبن يستقيلن،...
أمّا السمحات الماعاجبن فليمتهنَّ الغَيْرَة والحسد كما يجب،..

العذوبة متاحة للجميع، فقط شوية تأمل فيما هو لطيف

..

وطوا صوت الغزل



فى بنات سودانيات "جوه"

..

Tumadir،..
أوكي،
وألا أقوليك: أبيت
أولاً كويس إنك مرقتي لي البوست دا من ورطة يكون ديوان رجال،
وما أدراك من أحم أحم والكضب الكُبار كُبار وبايخ، وريحتن مقطوعة الطاري
عارفين في بنات، ودا كلو تسخينات لبوست (فلانة: آخر النبيّات وليل المرافعين)
أمانة ما داسي ليهن "الجوَّه ديل" جنس شكر،..


...

Quote: وإنما الشديدة شديدة بالعذوبة أولاً... ولا يعوّل على الساقين إلا بقدر الحاجة

ليست الشديدة بشِدَّة العذوبة أولاً وإنَّما الشديدة بشِدَّة العذوبة أولاً وأخيراً.

محسن،

مع إنِّي هسَّع دي سامع الحروف الفي المنبر دا كلو تقول: حراااااام عليييييييك يااااااخ، لكين خليني أقول قولي هذا واستغفر الله: البِتْ دي، من العيون ولي تِحِت، بِتْ أشبهك. علي الأقل وهي صامَّة خشمها علماً بأنَّه قد يقول قائل: وخشمها ذاتو صاميهو ليها لي شنو...محسن خالد فَرْ وإنْتَ بي وراهو.

أديني فِريقة أمرق قبَّال العكاكيز دي ما تْدمِّمني. كدي عاين لي نِخْرينك في مراية وقارنها بأنف بِتَّ الحطاب وقول لي كضَّاب

..

Adil Al Badawi،..
زي ما بقول جدي، كلامي داك برضو ما تودرو
عارف؟ يمين قلب، آخر إيميل استلمتو من بت هسع بقول كلامك دا بالحرف
هاكها:

Quote: تعرف انت انو البت الجبتها من جنوب أفريقيا دي العاجبك فيها شنو انها بتشبهك بس والله لو لونوها بالاكحل شوية تقول محسن الخالق الناطق. العيون والخشم والنخره ده في الخالق أما الناطق ففي الازدراء لما قالت ليك ما تعاين لي. اتذكرت شيخ العرب ابوسن قال لي واحد بشبهو شديد انت ياولد امك ما جات حايمة بي جاي. العريبي الفهيم عرف اللمز وقاليهو لا يا شيخ العرب لكن ابو جاء..دحين أبوك محمد خالد الله يطراه بالخير ما مشاء بي هناك.

وصاحبتها سندي كانت مصرّة إنو نحن شبهينا واتحالينا،..
بس أنا ذاتي خايف من الاتهام بالتطاول اللبطي والعكاكيز


...

Quote: العذوبة هي امتلاك آليات وقدرة، لإبراز ملامح جمال الروح

Thank you Mohsin.This is the best I have read for a very long time

Adil

أجمل ما في محسن خالد أنه رجل لا يشبه إلا نفسه...
وأجمل ما في كتاباته أنها خارجه عن السائد والمألوف ...

لك حبي وإعجابي
سحر

..

Adil Isaac،..
إنت زول حلو وصيّاد بالجد، لا تغب عنا
أنا ذاتي شتها ساي، لامن قريتها تاني،
قلت بالله دي مرقت كيف! أحب محسن لامن تجننو حُمَّة بنيّة


..

..



Sahar Abdelrahman،...
بتمنى بس أخلي شبه روحي دا، وأشبه "نونا" الإفريقية دي،..
دا كلام ود البدوي وصاحبتي ديك، أنا ما عندي فيهو خُص،.
وما أجملك إنت،..
ولك أجمل الأمنيات


..

Quote: عارفين في بنات، ودا كلو تسخينات لبوست (فلانة: آخر النبيّات وليل المرافعين) أمانة ما داسي ليهن "الجوَّه ديل" جنس شكر،..

شكروهن ...

عليكم الله

واجبروا بخاطرهن..ولا تحرموهن ..ولا تضربوهن بالاجنبيات فى مقتل..ولا تهملوهن بعد ان ربطتموهن وكمكمتموهن وزجرتموهن وخفضتموهن وطلعتم زيتهن بالقوانين التعسفيهن...

ليه اصلهن سون ليكهن شنو؟؟

وفى انتظار آخر النبيات..وليل المرافعين ..يا محسن على احر من الجمر

..


Tumadir،..
طمطم "النونا" هسع في ذمتك سندي دي أجنبية؟
أقوم أنزل ليك صور بنات أهلي؟
وألا أقوليك، المسألة مسألة الجو التاني، مش البنيّة في عضيماتها،
قلتو الكلام دا زماان، بخصوص تيموليلت،..
من قبيل كايس مناسبة أكتب الحاجة الغريبة الحصلت في ندوة "مشروعنا" بالخرطوم،..
عارفة؟ الناس ديل انذهلوا بالخرطوم وبالمرأة السودانية على وجه الخصوص،..
أربعة كُتّاب عرب حبّوا بنات سودانيات بسرعة الضوء ودايرين يجنّوا لو ما خطبوهن وذلك كان ثم كان،..
اتنين ما بقدر أكتب أسماءهم لظروف بعرفها براي،..
الاتنين التانين التشكيلي العراقي "الحمادي"
الصحفي العراقي "جمال حسين"،..
يا ستي بناتنا برضو بدّن (الأجنبي) في مقتل، ما تخافي عليهن،
بس تجيهن عين ما تكون شافتن كتيييييييييير، ومسخن،..
الغرائبية يا طمطم الغرائبية، هي ملخّص سيرتي،..


...

Quote: أحب محسن لامن تجننو حُمَّة بنيّة

For me, all the time with or without beautiful girls

..


Adil Isaac،..
Ooh yah?
بس لو كنت بعرف أقولها زيها، (فلانة: خاتمة النبيّات وليل المرافعين) ديك حقتها بتقول ليك لما تنبسط من حاجة: "راااستا"، اتخيّل! مع لوية قدّوم أحمر كدا، تعدل كل صباحاتك،..
عشان حلاوتك دي، شيلن الاتنين، البعربي والبي الإنجليزي، والله ما تقول حاجة،..


...

...

هنا سيرة سندي في الصحافة، أنا وهي وصاحبتنا الشجرة، نعدّ حياتنا من صلصال الحلم والكتابة نحن،..

Quote: في مطار كاب تاون، بينما المسافرون يعبرون في عجلة، مخطوفي البال، مخطوفي اللغات والألوان، مزعزعين بين تاريخهم المُرّ، وبين جنوب إفريقيا اليوم، صاحبة أنزه وأقيم دستور ونظام برلماني، كنتُ أعبر بينهم وأنا المخطوفُ كلّه، وكُلّ ما اختُطِف. أحسست بذاك الصباح طويلاً كجدران، وأنا مكرّسٌ بتمامي لأمسي الذي نَفَق، قلبي يعدو متعثراً فوق ذكرياتٍ كثيرة، الحزن الوجودي الفاتر يُلَفّعني كالشَّرَى، لأول مرّة أحسست بتلك العبارة الساذجة التي تقول: "يُمَزِّق نياط القلب"، التي كانت تضحكني فيما مضى، وحين أقرأها تمتلئ أشداقي بالضحك، وقلبي بالمرح، من حالها وحال لغتها الهشَّة، مباشرة الاستجداء للرحمة. رحمتك يا رب، ثم رحمتك يا صباح "سندي وودز مان". هذا كان حين مغادرتي لمدينة الكاب يوم السبت 7 جانوري، وكنتُ قد هبطتُ في مطارها ببداية الشهر نفسه، حللتُها في ضحى غائم، وقلبي ينكت كأنّه على موعد عشق، ومن ورائه خلفية خافتة وجارية مثل نهر، نحو سمو مرتقب، لم أكن أعرف بأنني سأصعد مع المتسلقين إلى قمة جبال المائدة التي تُحاصر كاب تاون كمائدة مستديرة، والمدينة تتفَلَّت منها هنا وهناك، لتنوجد منافذ وألسنة لاعقة للمحيط الأطلسي، من أعلى تلوح تلك المائدة ملعوقة لدى جانبين بألسنة من المحيط. أعلى القمة يُسَمَّى "رأس الأُسود"، من هناك رأيتُ السحاب يمور في مرمى كَفّي، وبين قدميّ، والبعيد مني أراه فوّاراً يتماوج وينكب أمام الجبال مثل شلال وهمي، أو كفتاة فاقعة البياض سندت ظهرها إلى المخفي من الصخور، وتركت شعرها تتلاعب به ريح الجبال. شوارع المدينة البعيدة من ذلك العلو تلوح كأزقة صغيرة تتعرّج هنا وهناك في الأسفل، بين المنازل البيضاء والطوبية القانية. أثناء نزولي من قمة الأسود بعدة أمتار، وتسلّق المتر هنا يساوي الكثير من الرعب والحذر والزمن، اجتياز المتر في عرض هذه السماء الرحبة والسحاب، لا يساوي شبحة المتر فوق الأرض، وجدتُ شجرة جميلة وظليلة، اختارت لنفسها كل تلك الرفعة والخيلاء، جلستُ تحت ظلها لأرى المدينة من زاوية محيطة ومهيمنة، ولأكتب وصفي هذا، أسميتُها شجرة السمو العاطفي، فقد حملت من جميع جوانبها نقوشاً لمحبين كُثر رسموا بأعينهم وكاميراتهم مشهد مدينة الكاب من هنا، كما سجّلوا أسماءهم في ارتباط الحب بالحفر على جذعها، نقش ليليان لجانب استيوارت، وبيتر مع حبيبته لورا، قمتُ بنقش محسن خالد لجانب سندي وودز مان، الصبيّة البحّارة، من باب المرح والاحتفاظ بالمكان وروح اللحظة، فقد شعرتُ بوخز مجهولها الدافئ في قلبي، بينما أنا أنزل مطار مدينة الكاب، وحين كانت هي في تلك الساعة لدى المنطقة المعروفة بالوتر فرونت Water front-الواجهة البحرية- تُعِدُّ الزوارق التي تحمل الناس من لدى بوابة مانديلا الشهيرة، من حيث يعبرون إلى جزيرة روبن، التي احتُبِس فيها مانديلا مع معظم مشاهير النضال الوطني في جنوب إفريقيا.

..

لا حول ولا قوة إلا بالله العلي العظيم
الموت حق والحياة باطلة .. أستغفرتك يا مالك روحي
والله الواحد يشوف الصورة دي يقول القيامة قامت وحاسبوهو ودخلوهو الجنة
وجاءت أول الحور العين والكواعب الأتراب

محسن والله العظيم إنت فى الصورة زايد جمال عدييل كده
لمن عاوز تبقى حاجة تانية حاجة ما من هنا ولا بتحدها الصورة
حتى شعر راسك بدأ يقوم بعد ما حاجات كتيرة فيك ماتت
شعرك وشعر الشافعة دي من سبيبة واحدة
شوف شعرها قام ليك بالجيهة الملاصقاك ولا لا ؟؟
الصورة دي فيها تناظُر عجيب
حتى إضنيكم رُهااااف من حلاة سمعكم لي بعض الإضنين تقول ما رقات من ساونا سعادة
فتحة الفم .. سِـعة العيون .. البسمة .. كلو ( شيل ودُقّ ) بالكربون
كتمة النّفس واحدة .. والله كتمت نفسي معاكم بس ما قدرت
إنتو كاتمين جمال كتيير أنا ما بقدر عليهو
إنت عارف يا محسن ؟؟
زي الشافعة دي لما تتسجّل عندك تشطُب من طرف
تشطُب لحدي ما تصل طرف توب أمك زاتو

ياخ إنعل أبو غير كده ..
يازول قرطِس البنية دي في سّولفان روحك وصُم قلبك وأبقى راجل

وقف عرض الصور والله هسي بقينا زي الأمي البحضر فلم أجنبي
لا عارف يتابع حلاوة الصور ولا يقرأ الترجمة

بس أمووت وأعرف كانت محجوزة ليك كيف ؟؟
الجنزير ده كانوا رابطنها ليك بيهو ؟؟
بغراان ساااي يا مُحسن ماني حاسد
لكن والله برضو مبرووك عليك الهجين الحلو ده ..
حليب شوكلاتة ولا أبنوس بريحة الخُمرة

أنا من ســنديك دي ماني فايت
والله بس : التليفة العِرف بيت العدو .

محسن الرائع
اقصد المغضوب عليهم والضالين
في بلدنا
كيفك يا هندي
الحكاية شنو....جكس في كل حته
كانو الطيب صالح اهداك سر مصطفى سعيد
وانت ما صدقت انك تستمتع بعطره
والعطر بس هاك يا بنات وما بنات ساي
بنات من نوع معين
لكن بيني وبينك
هناية في جامعة الجزيرة
ما احلى منها
ما بلدنا كمان جميل

...


ثابت محمّد،...
مش عليك الله؟
عجبني حد الموت، تأويلك للجنزير، أنا قلت إنو ساجور وصادّيني من ناحيتها،..
وإنت قلت إنو رابطنّها بيهو لي نظام حجز، ينعل ديشك،..
بس يا ريت؟
أنا زول رؤيوي بالحق ولا أزعم،
بمجرّد شفتو، قلت آآخ كان في داعي بس،..
كدي حاول تكتم نفسك تاني،..


...

..


هواري،..
عارف؟ كلامك وكلام تماضر دا، ذكّرني بدعم "رأس مالنا الوطني" و"منتجاتنا المحلية"،
الحتّة دي ذاتها اتذكرتها ليك من جامعة الجزيرة البتتكلّم عنها دي،..
هنا الموضوع ناس وحب وقلوب مش تكتّلات استراتيجية،...
قلنا بناتنا سمحااات، وأهو بعد الأربعة شباب العرب ديل، كمان بدينا نصدِّر ما شاء الله
يا أخوانا ويا أخواتنا "المقاطعات"، الزولة دي قلبي رادها وبس،
ما قلنا أحلى من بناتنا ولا كمان هي شينتاً ليهن،..
بكلام زي الطلقة كدي، أنا كنت ميّييت، وقنعان من عمري، وافتكرت إنو موضوع قلبي دا انتهى مع "هناية" بتاعة جامعة الجزيرة الخابرها المستهبل هواري دا،..
أها ديك هَسَّع بوليداتها، إنت قايلني أنا عوير ليها، وألا الطيّارات ما حامن بي،..
أما حين لؤمئذ وكعوبيتئذ فنقول،
والله بسمتها بس الفرحة البتدخلها في "حبيب" لأنو "حابيها" مش في أي زول "شايفها" وداير عيونو يعرفنّها كم أردب حلاوة..
قلنا بالنسبة لقلبي، بسمتها بس..
يقهقهن بنات جامعة الجزيرة كلهن ومعاهن بنات الأهلية والأحفاد وآداب الخرطوم وكمبيوتر مان،
وكل البنات بداخل باصات المدارس الثانوية الحكومية والخاصة المتجهة صوب مدارسها،
ومعاهم رضوان خازن الجنّة وميكائيل قسّام المطر و"البرووووق"...
وبرضو هين فرح قصاد إنها:
(أحيتني كما يُحيي المسيح عليه السلام طيراً ميتاً ويعيده إلى سيرة الحياة بسم الله -المحبَّة)،..
دي حبيبتي وبس، وأنا فرحان بيها بالشارع دا وما أكتر،...
وقعلك يا ود أم ضريسة
أم ضريسة دي حلَّة ناس هواري،...
يلا جاي وألا جاي من بت الكاب تاون يا مستهبل


...

..

الشجرة ستنمو، كما هي عادة الشجر، وتطلعات النبات،..
واسمي واسمها، لن ينحَتَّا مع تبدّل قشرة الشجرة،..
إن شاء التوقُّعُ أن يفترض ذلك
لا تنسوا أنّ الثمر يتكوَّن من ملح وسُكَّر كثير
أنا الملح، وهي السكّر
الخوف كلّه من قداديم العصافير الأخرى،
"وفلانة" خاتمة النبيّات وليل المرافعين"
وليس من تبدُّل أحوال الشجر
الناس ظنّوا أني أقصدُ بـ"فلانة" امرأةً أخرى بعينها،..
أنا مبيّت علي كدا وبس، اللهم أجعلوا خير


...

القرصان محسن خالد

صدقت البت صاحبة الايميل يامحسن ..دي فعلا بتشبهك بس لونك لون جنزير قارب صدى..
انتا عجبك فيها انها مراية نفسك النفيسة وانعكاس قسمات وشك بي لون بحري ..

لو كنتا في ميناء اغادير او بنطون شندي كنتا قتا دي بتك .. بس كيب تاون دي ما عمنا حسابا يامسحن ..
زي عمك مصطفى سعيد قفل منافذو كلها قامت جاتو من لسانو وقات ليهو قرمزي و كان به غروب شمس..
دحين انحنا كنا راجنك تجيبا لينا من جهات نعركها ونعلم مخارجها مرقتها لينا في بلدا لحى الشجر فيها كتاب..


كدي فتش المناطق التي تجولت فيها ام هذه الفتاة يا محسن ..الدنيا دي ضيقة والأرض قطع ُ متجاورات .. ومثلك اهل للمفاجأت..

البت دي طازجة محسن اخوي ...و شكلها عمرها ماصحت من نوم..
وبتك الرسلت ليكي الاميل دي مسخت على الكتابة .. شوفها كان بتراسلنا ..نحنا صحي ما بنلحق الناس الشبه سندي وودزمان بس كمان المابتحلقو خاف الله فيهو ..

...

دكين،..
دا كان زمان، بس سندي دي
هي القَرْصنتني وهكّرتني،...
وأنا كل القرصنتو منها، إني شلتها معاي رَوّاب حلم، كل ما نومي يِْفطَر من أحلامو نجيبلو من روح تكوينها الأمس، "روَّاب حلم، بس روَّاب حلم"..
ما نحن مارقين للنيشان دا، وإنت عارف،
متذكر كلامك لمّا قلت لي إنك في ظُلَلٍ من قلوب النساء
مشكلتي أنا من زمن طويل عايش مواسم من تحاريق القلب،
ولم أعد أرغب في نساء من دون حب، يمكن كُبُر
طبعاً قُّبال سارية الشافعة دي، وبطايني هجّن قشوش يا دكين، هجّن مخاتر عربان
ومدلى سيول، وناس تدوبي وناس تنم وألبل راتعة شقيش ما تمد بصرك، وغيوم
عارف يا دكين، أنا داير أقول ليك كلام
ما تقوم تجي تخربو لي زي التانين، بثق فيك أنا
أم البت دي يا دكين، تشبه "تراجي" والله ما تديها فرقة في ملمح
أبوها شكلو قريب جداً من معتصم الطاهر، ونَفْس السمرة
يعني الشافعة دي لونها الفاتح شوية دا، نتائج لدهجي خواجات قديم،
عشان كدا اللون استكان وطلع ناضج،
لا مستعجل يبقى خواجة ولا متفلهم علي أمنا إفريقيا
فعلاً طازجة، ولو إني بحب النساء حين يبكّرن ويتنين،..
المرأة أم شافعين دي حسب ملاحظاتي وملاحظات سفهاء كثيرين،
جميلة حتى في إناث البهائم،..
البت الرسلت لي الإيميل والله أنا ذاتي ماعارفها هي منو، وألا شنو..
مجرّد رسائل بتجيني من شخص مجهول،..
وكما مثلها الآلاف،..


...

ما بال العامل نبعثه عشان يعمل حديث صحفي مع مانديلا يجي يسوِّيها لينا "سندي فعلت وسندي تركت"!
غلطانين هم.. بدل صحفي بعتوا شاعر..
بدل يحكي لينا عن قيود الأبارتيد يجي يقول:

"الطريق بيني وبينها مجنزر كمجنون"
أما حكاية.

شقيقي وأمنا المهنة
طبعا إنت الكبير (بمقدار) على قولة الجمهوريين

حب....وحب ...وحب
ما دام حبك يلد هذا الإبداع
ويا تماضر يا خيتي
دي ما دعوة لمقاطعة المنتجات بس
جنس الشفع الحلوين البطلقهم محسن في بطن الحوش كنا حنلقاهم وين
لو كان وقف عند "بت جامعة الجزيرة" حسب كلام هواري.


في كل بلد سوالو ولاد
والليم متين يا مولاي

"مش في مدحة زي دي....يا ربي كان قاصد محسن دا"

..

محمد السر،..
ياخي مشتاقين، وينك إنت يا زول، عارفك شايل الضر مع صاحبتك تيموليلت
يا ريتها بقت عليّ... البقت علي "صحابي الرسول"
عشان أملأ الجرايد والصحف دي كلها سندي،..
أول ما وصلت، أديتن الكتابتين،
قلت ليهم شيلوا ما لكم، ودعوا ما ترون أنه أُهدي لي،..
واتمنيتم يشيلوا سندي، بس جدعوها لي، فاحتفظت بما أُهدي لي عشان أهديكم له
ما شفتك دخلت علي شغل جنوب إفريقيا، الجمعة الجاية في حلقة،..
ما بقدر أكتب علي كيفي هنا يا ود السر،
الناس ديك دفعوا عشان رحلتي قروش سندي دي ذاتها اتعشت كتير منهن، لامن ينتهوا هم، وبنجيكم للمجاني


..

..

أبنوسة،..
كيفك يا "حارسة الجليل"
أيووة، الله يعدلها عليك،..
كلامك دا أحلى زغروتة هنا،..
تماضر صاحبتي متبخالة علي بالجرتق، أتصبر
(والليم متين يا مولاي؟)
ياهو قاصدني بيها تب،..


...

العزيز محسن

اتكأت هي.. وتوكأت أنت على شجنك.. وسدرت في غي اللوعة.. وبين مجون القوم وبيرتهم انعشت عقلك بنعمة التأمل.. ونفاذ البصر ومن ثم البصيرة.. وهي ليست (أم حمد) بل بصيرة من أثخنته سهام عيون سيندي..
لك المحبة كلها..
لكن بيني وبينك.. ياخي انا ما ولدك الوسطاني.. والبت دي قدر ولدك السغير.. ياخي بطل حركات (الحاج متولي) دي.. وما تشيل زمنك وزمن أولادك!!!

محسن خالد

هوووووووووووووووووووووووووووووووووووووووووى
عصام عبد الحفيظ ما خله لينا قلب
جاب بنات أكسوم ونجض الناس على نار هاديه
وجاي انت مع سندى عشان تكمل الباقي
حسبي الله ونعم الوكيل
في انتظار مقالتك عن السودان
وفي انتظارك اخر الشهر في الدوحه

مداخلة على لسان واحدة صاحبتى ..


بتقول ليك :


بطل الكضب الصورة دى

مركبة...


وباين انو انت ما مصور

مع الشافعة دى .




يعنى مونتاج...


وما على الرسول الا البلاغ

..


nashaat elemam،..
ولدي نشأت، أيوة كدا، بحب الناس البقالعوا ديل،..
لكن عاد مع أبوك، يا ولد اختشِ
خلاص أختها الصغيرونة أشد منها،..
وحق الطيارات عليّ


...

..

محمد السني دفع الله،..
إزييييييك
عارف؟ أنا ما شفتو شغل عصام دا، وروني محلو وين، الفضول كتلني
مقالي عن السودان أريتو يا با يكون قريب
بالمناسبة إنت زول "عَذْب"،
عشان السميحات ما يفتكروا إنو العذوبة حقتم هم بس
إن شاء الله، نص ساعة بس وأنا في الدوحة، فركة جناح طيّارة


...

..


AMNA MUKHTAR،..
قولي لصاحبتك العميانة زيي دي،
وفايتاني بكونها أُمّية في قراءة تعابير الوشوش
الروائي لو خلّى الكضب تاني يشتغل شنو؟
ترزي وألا جلاد عناقريب؟
أو بلغيها بالواضح إنو "أبيييت" مافي صور زيادة، إلا بمزاجي
نحن لا نخضع للابتزاز
وما على الرسول إلا البلاغ


...

بقدرما حاولت الا اتجاوز حاجز العمر
و ذاكرة التخفي في اللحية و الشيب
لم استطع
اتطلع الي الصورة فأتذكر
The Water Point
ذلك المكان الساحر في كيب تاون
حيث وجدت هذه الجنية العادية في عين من رأي انصهار جمال البشر من جميع الالوان و البلدان و الجينات في جنوب افريقيا و كيب تاون تحديدا
الله
اللون الخمري
اعرف جيدا ان الخمر المعتق يفعل افعاله بالعقل
لكن لم اكن ادري أن الون الخمري يفعل فعل الخمر في غياب العقل لمن تاب من الخمر الا في جنوب افريقيا
الله
لا اريد ان اتعدي اللون الي انصهار القامات في اهل جنوب افريقيا
القد الافريقي و اللون الخليط
الحضارة الاوربية من النشاط الاسيوي
غايتو
تذكرت النكتة البتقول انو السعودي امن ابنه سالوه
ابوي انتا لمن نحن الرجال نمشي الجنة و تجينا الحور العين ناس امي بمشوا وين
قالوا ابوه قال ليهو
ناس امك بمشوا للسودانييين
اها انا ما داير منهم
انا داير من جنوب افريقيا ان شاء الله

..

domdom ،...

أيوووة، يا نعوم،..
أنا داير الناس الحامت بهناك، وشافت هوايل تلك السواحل
طبعاً الكلام الإنت عارفو، وأنا عارفو، إنو الناس ديك،
إن نظرت نساءهم من وراء، فيومك قد تم
وإن نظرتهن مقبلات، فقلبك قد راح فيها،..
الغريبة زمان زول بن زول ونّسنا لُغوياً حول "black a.ss"
بس نظريتو دي هناك بتبوظ، لأنو البيض برررضك بلاك آس،..
غايتو دي أكتر حاجة محّنتني،..
ناس بالله ياخدو العقل،
أنا اتأكدت من كوني عاقل، لأني جيت راجع،.
بعدين الناس ديل ذاتن سودانيين،..
اتعجنوا عجنّا دا ذاتو،..
بس العنصرية هناك نسفها التطور الماهل للكنلوجيا، بالتالي الوعي
إن شاء الله دا يسويهو علينا الله


..

Quote: وبسمتها (حمدو) صلاة البنات،..

أعجبنى أعلاه
وكأنى بك تردد


مين يمنحنى
قُدرة
...أتحمَّل شوفِك
سُتْرة
... ما أقيف قِدامِك
حاضر ومافيش
يا حِضْرة شربات القوم
.. سُكر العشاق
جيتِك مشتاق
فى حالة درويش
وزهوِك مالينى عناق
فسّحنى بستان العِشق الطازج
فضّـلنى على راحة بال
و عَزَمْنِى على دهشة و ذوق،
لِبس الفرح الكان مريوق
أنهار الأرض تَساب
وغيم اللُقيا خصوبة ..
وشال من شوق
ودَفَقْنى عليك
حيل مِجداف ..و طوف ماروق ..

..


معتصم الطاهر،..
يعجبوك وليداتك، بما فيهم سندي،..
البنيّة دي ياها ذاتها "شربات القوم"،..
كن بخير،..
وجاينكم قرييب،..

كان اتهونت القواسي

...

المبدع محسن خالد

اليوم صدفه دخلت لاحد بوستاتك

ولقيتك كالعاده رايق ومتجدع يا بختك

واعذرني ان كنت لاجد زمنا لهذا الجمال

قد سرقوا كل الاشياء الحلوه منا(مجرمين الانقاذ)

حتى مقدرتنا لان نقرأ لمن نحب.

نرجع للبنيه الحلوه

عارف اكثر ما اعجبني بها

ان وجهها خالي من المكياج

هي نقيه وجمالها طبيعي بحق.

صفاء بسمتها دلني على نقاء دواخلها.

نعود لتعليق صديقة صديقتي آمنه

بان الصوره ليست حقيقه.

لا اتفق يا آمنه مع صديقتك

وقولي ليها لو تأملت في ظل وجهها الساقط على جبهة محسن لعرفتي انها حقيقه.

ويا محسن يالذيذ

اخالك سعدت حتى بسقوط هذا الظل

ويا بختك شفت بلاد مانديلا

الا ما قلت لينا هذه الرائعه من اي خليط هي؟؟؟؟؟؟؟؟؟

نعلم ان بالبلاد (الافارقه والبيض و الهنود)

هي لا تشبه ايا منهم مفصل

لكنها نتاجا مختلط, اليس كذلك؟؟؟؟

تراجي.

...


Tragie Mustafa،...
الفارسة تراجي،..
وأختي الكبيرة،..
عارفة؟ أمّها إنت بالضبط.. والربط،..
وشها مش خالي من المكياج وبس، الصور دي ماخودة وهي شغّالة،
وبملابس الشغل،..
شغلتها حلوة "سَوَّاقة بنطون"،..
وبتدرس كيمياء أغذية، سواقة البناطين دي نظام هواية منها في الإجازات
لمّا مشينا جزيرة روبن قَعّدتني جنبها،
وكنت فرحان جداً لأني حبيب السوّاق
الخليط،..
يا ها دي الحاجة الحصلت بالضبط، ما بتعرف إنو هم شنو؟
ياهن ديل الملوّنين البعنوهم،..
خليط من جميع أنحاء الدنيا
Afrikaans وليس Africans
اللغة بتاعتن مزيج من الدتش والإنجليزية،
دي لغة منجورة عندهم هناك وبس، ومكتوبة
زي لغة (الصربو كرواتيان) في يوغسلافيا القديمة
أها ديل خليط من كلو،..
والخلط دا شَغّال من قرون
،،،
أما إنك حريفة بصحيح،
الفقرة الجاية والله كان داير أنضم في الضل الواقع علي منها
لكن صاحبتك بت مختار وصاحبتها بخلني من المكاواة
كوني بخير،..


...

محسن
شكيتك علي الله ، وأنا أقول ناس المنبر ديل مشوا وين ؟ أتاريهم ملمومين عندك وعند سندي ... يا أخي إنت الناس الزي ديل بتلقاهم وين وبتصل ليهم كيف ؟ تكون يا ربي ونستك لذيذة زي كتابتك ؟ بالمناسبة في زول صاحبك شديد قال لي محسن ده أحسن وصف ليهو هو ( المجنون ) ، وأنا وقتها ما اقتنعت بس هسّة آمنت عدييييل كده ...
وبعدين سندي دي بتكون أصلا خرجت من البحر لأنها بتشبه الأصداف كده ، وعشان كده بيكون عندها حق إنها تحرسو ... إن شاء الله تحرسني أنا ذاتي ... وقول ليها خليها تناديني جدّو عشان الناس كلهم بيقولوا لي الخال ...

Quote: نعود لتعليق صديقة صديقتي آمنه بان الصوره ليست حقيقه. لا اتفق يا آمنه مع صديقتك وقولي ليها لو تأملت في ظل وجهها الساقط على جبهة محسن لعرفتي انها حقيقه.

يا جماعة الزولة مصرة ..!

على رأيها أعمل ليها شنو !؟







(طبعا يا تراجى عرفتيها منو المكاواتيه دى ).





الأخ محسن..

الزولة دى متابعة مواظبة

لكتاباتك خصوصا البى اللهجة

المغاربية..

وبتقول ليك :

( حشومة عليك يا سى محسن..حشومة قع )

السي محسن أزيك

جئت أقول السلام وكثير الأشتياق ,

المشاغل تمنعنا من الدخول اليك والتداخل ,

لكنها لا تمنعنا من أن نقول للبوست عالياً لوجه الجمال ....

..

ود قاسم،..
أيووة،..
ما شايفني أنا بنظّر في العذوبة،..
ياها دي ونستي أمّها وبت أعمها،..
وقطع شك إنت رجل عذب،..
ود السني دا، يومتها اتكلّمت معاهو،..
والله الزول دا الما نضم معاهو في تلفون عمرو كلو رايح
العذوبة.. العذوبة... مش الحنك السنين
مَرّات أقول لروحي أنا بشبه "مجنون" ديدرو، علي عملات صاحبك..
بنحبك كتير يا جدو،..
أنا وهي،..


..

..


AMNA MUKHTAR،..
لكن أنا ما عرفتها منو؟
لو ما كلّمتيني قد نتسولو تراجي،..
وبلّغيها
كما يقول الداودي:
سامحي لي يا
غَدّا راح نهدرو هدرة مزيانة



...

..

الوليد محمد الامين،..
ياخي إنت ذاتك عالياً
بتمشي وين إنت؟
اتوحشناك بزّاف
لوجه جمالك الخاص،..
وفنّك


...

أخي محسن..

جميلة فتاة البحر..

أجمل من ملامحها عذوبتها التي تبدو في كل سكناتها..

و أجمل من عذوبتها زهرة عمرها التي لم تكد وريقاتها تتفتق!

....

جميلة..غير..ان ما استوقف الكثيرين..و استوقفني..

هو كلماتك فيها..

فمع نسبية جمال الملامح التي لا تعدم مثلها و أجمل منها حتى في الإنتاج الوطني..

إلا أن كلماتك (وهي بالتأكيد ..إنتاج وطني)..

قد زادت جمالها نورة..بكل المقاييس..و النسب!!

.......




تخريمة...

(أجبرني عليها تغزل جمعكم في صورة لفتاة بالكاد تظهر مفاتنها..)

كيف يدعي البعض الحكمة أكثر من الحكيم..عز وجل..

الذي أمر المرأة بالحجاب فلا تظهر ساقيها و لا خصلات شعرها..

و أمرها بخفض الصوت و عدم الخضوع في القول..فلا تظهر عذوبتها..

ألم يأمرها بذلك رحمة بها..و بكم..معشر الرجال..!!

...

مش برضو قوانين ربنا أرحم من كل قوانين خلقه!!

..




مستقيلة..

..


Sana Khalid،..
كلامك صاح الصاح،..
أحلى ما فيها عذوبتها،..
والباقي تمّينا ليها قلم وغناء
وإن جات لسماحة الهياكل، والعين، أجمل بت شفتها في حياتي هي "تيموليلت"
وتاني بت طوالي، واحدة كانت بتقرأ زراعة في جامعة الجزيرة
وزملاي هنا، ناس النشيشيبة، هسّع بكونوا كلهم قالوا، هممممم: فلانة،..
يلا أها ناخد الملف مع تخريمتك،..
أولاً البنيّة دي طالبة جامعية في سنة 2، ما صغيرونة يعني،..
أقري كلامي فوق لتراجي، ملامحها بس طفولية،
وجسدها لو جبنا الصور لتحت جسد إنسان أكتر من ناضج
ودينياً السيدة عائشة كانت تمانية معرسّنها للرسول عليه الصلاة والسلام
ودخل بها لما بلغت الحلم، والحلم بناءً على جسد وثقافة بدو ذلك الزمن،..
يعني أقل من البت دي بكتيييير،..
أمّا حجاب في جنوب إفريقيا دا إلا كان الهنود والباكستان الجديدين في البلد،..
مسلمو جنوب إفريقيا ناس لذيذين، أسألي منعم دا كان هناك لزمن أطول مني،
إمام الجامع بجي بالجكس بتاعو جُوّه الجامع
وحجاب دا إلا زول مسلم جايي من برّه جنوب إفريقيا
البيرة عادي جدا، والديسكو أكتر عادية منو،
الأهم إنو البت دي مسيحية،..
وأنا شخصياً وبصراحة الله إخير لي عذاب العذوبة
وأحوم في الشوارع دي كلها مكتول مكتول مكتول،
مرة بندق شَعَر ومرّة سهم حاجب، ومرّة عكّاز ساق
دي تخريمتي ليك، بكل صراحة وصدق
فاعفي لي،..


..

المجنون محسن خالد

والله كنت عايزه اكتبها لك في الاول لكن خفته تتعقد

وانا الزول المميز عندي بقول عليه مجنون.

Quote: مسلمو جنوب إفريقيا ناس لذيذين، أسألي منعم دا كان هناك لزمن أطول مني، إمام الجامع بجي بالجكس بتاعو جُوّه الجامع

عجبتني عبارتك دي

ويا اخوي ماقلنا افراقه جننتونا

حسه بالله مولاناتنا ديل لو وديناهم جنوب افريقيا دورات تدريبيه

ما اخير لينا من دورات الازهر وفتاوي الامام البجاوي؟؟؟؟؟

وفتوة الامام البجاوي دي كان ما سمعته بيها نص عمرك ضائع يا محسن

انا قريتها في مكاننا ما اما عند فرج فوده او نصر ابو زيد

غايتو حاجه كده بتقطع مصارينك بالضحك وبتوريك نحن عقيمين في تفكيرنا لاي درجه.

لك الود وللخلاسيه قريبتنا كل الود.

تراجي.

..


تراجي مصطفى،..
يا ستي ولا يهمك، أكتبي البعجبك،..
هناك في حاجة اسمها ثقافة مجتمعية واستايل بتاع حياة،..
الناس كلهم، مسيحي، مسلم، يهودي، بوزي،.
بشتركوا فيها،..
بيظلّ المعتقد وبعض الممارسات الأخرى،
لأنّ الصلاة والصيام وباقي الشعائر هي سلوك روحي، شخصي، غير مجتمعي
أما نظام العيش وثقافة المجتمع فواحدة،..
أها بعض الوصايا العشر –المتعلّقة بالضرر- مشتركة بين الأديان كلها، بما فيها الفلسفية والوضعية،..
لا تقتل، لا تسرق، لا تكذب لا تخن.. إلخ
يبقى هناك من الخطايا ما هو من جنس "الزنا"
ولأنو مجتمعهم علماني وما هو بمسيحي تتحول الصيغة بدل لا تزنِ )
لتصبح (لا تغتصب)
وإلى آخره، مما يفرضه نظام العيش في وسط علماني،..
فتاوي الإمام البجاوي دي يطرشني فيها،..
يا ريت والله تكلميني بيها، إن شاء الله في المسينجر


...

Quote: مسلمو جنوب إفريقيا ناس لذيذين،

هادى الهدرة مزيانة بزاف...



اسمحو ليا...



وفى النهاية فى سودانيزاونلاين

لا تستغرب ولا تقول علاش..ولا كيفاش



الدنيا هانية ياصحبى ...

اتهنى براساتك .










دى واحدة تانية....ماالأولى

وما على الرسول الا ... البلاغ

..


AMNA MUKHTAR،..
ياختي مساء الخير،..
وهانية ياك؟

شكلك مالية عبك، واحدة أولى ودي تانية، الحسادة ما تنفعك،..
أمانة في ذمتك أديني أنا واحدة، وأدي صاحبي سموأل دا التانية،
رويحتو دايرة تمرق بدرب المغرب

كان قسمتي لينا تبارك الله عليك، وكان اتفاسلتي..
واخا عليك آلدراوية،..


..

Quote: هذه الفتاة فيها شيء غلامي، والله أعلم

Quote: إن كتموا السر تفرطقت منهم الأرواح، وبرضو كان باحوا دماءهم تُباحُ

يا خوى انت عديت بى غادى
وجيت راجع ليك بهذا الشيء* الغلامى ..

* الشيء بتاع البوست ..

..


معتصم الطاهر،..
كيفك يا أمير،..
لا لا لا،... أوعك من الدرب دا، غايتو موّتني بالضحك،..
قصدي طلاقة الروح وفصاحتها بس، واثقة طوفان وحلو جِن،..
دي بنوّتة ونص وبرطماناتٍ من عسل


...

يا محسنين
كلموا بعضكم هذا
بانه سوف يؤدي بردتي التي لم تمض منها سوى أيام
وسوف يؤدي بالردة وبي في غياهب توبة تتحالا لي
ونفسي الأمارة بالسوء بدأت في أوامرها من يوم ما عصام عبدالحفيظ تور وجع الضرس القديم
وتور نفسي
وتور كل ساكن و كامن داخلي
ياولاد الحنوت
بالطريقة دي حاتدخلونا النار
وبيني وبينكم نارآ مضمونة ولا جنة مجهجهة

يا جن إنت ، جايينا متين

المجنون محسن
اه جبت الكلام لي نفسك وظهر ليك جن أخرته المخيرة ...
لكن معاهم حق انت مش مجنون !!
مر على بوست أبق لحظة ل عصام عبدالحفيظ
وحتعرف انت منو؟؟
البعرفو انك جمالي تسكنك روح الشعر
وشاعر تراقص الروايات
وحالم تتخاطرروحك الحرة مع كل وردة
كفراش متعطر برحيق زهرةلساحر أفريقي
تعال لنرقص حول نار توهجك
لنضئ للعشاق دروبهم
ونحترق على حواف اللهب....

الاخ محسن

ازيك

انا طبعاً جيت بعد ما الفلم انتهى , ولا لقيت صورة ولا قدرت اسمع غنا

لكن خليني ابدي رايي , والقاعد اعزّ من الواقف .

اسي انا بسمع في كلام الناصر قريب الله . ورينا البنفع معاك منو :

قادني نحوهنّ كل كثيبً قد تبارى مع الصفا في المقال

ما أخوها الجرئ يأمن عقباها وان كان صائد الرئبالِ

بين اطرافها مخاوف ادناهنّ بُعد الهدى وقرب الضلال

وفتاةٍ لقيتها ثَمّ تجني ثمر السنط في انفراد الغزالِ

تمنح الغصن أسفلي قدميها ويداها في صدر آخر عالي

فيظل النهدان في خفقان الموج والكشح مفرطاً في الهزال

اي انس اتاحه لي ذلك اليوم وأي الجّواء فيها صفا لي

فجزى الحب الكاهلية عني ما جزتني عن جرأتي واتصالي


انت البت القطعت ليها خط الاستوا لقيتا واقعة وين ؟

..


....


Marouf Sanad،...
يا زول كيفك؟
أول شيء الردود جاطت علي،
أي خطة اتبعتها عشان أعمل ليهن ترتيب مع بعض فشلت،..
وأنا براي لما جيت الصباح لقيت الحفلة فرتكت،..
لكن البركة في سمبتيكو لملم الفنّانين والحلوين تاني،..
أريتك تكون قريب بس المرة دي، ما تفوتك برضو
عارف؟ من أيام وفي أبيات مدوّرة في رأسي للناصر قريب الله
عمّك علي كنعان بحبو شديد وبقرالي منو،..
كدي أول شيء شكراً، علي إنك خليت روحو دي ترفرف هنا،..
شوفو الزول دا وصّفها كيف؟ بنية الكواهلة دي،
ياهم أهل صاحبنا ود أبقوتة ديل ذاتم،
بتتناطى عشان تلقّط البرم،
و(البرم) دي فصيحة كرررر
أها حركة تمد إيديها لفوق، وتبقه واقفة علي أمشاطها بس،
والما بجيب اسمو داك يبدأ ينخج
والبتفرّج قلبو ينخج لامن ينقطع ويترتر تحت كرعيهو

أنا وصاحبي الناصر قريب الله أظننا مرقنا بالبيت دا:

Quote: بين أطرافها مخاوفَ.... ....... أدناهنّ بُعد الهدى وقُرب الضلال

الناصر أقطع شكو، لكن أنا ما تضمني، وإن بتضمني مخيّر،..

بنيتي ديك والله ما كنت داير ليها وقوع الجغرافيا
37 شمال كدا، و24 جنوب كدا،..
كان دايره تقع وقوع "برم" الناصر دا،..
في خشم البنيّة وعِبَّها،..


...

..


محمد سنى دفع الله،...
صحي والله أنا مجذوب بنات،..

وبرضو يا صاحبي ود السني مسحور بالناس السمحين وبشبهوك
وعذبين، الناس البنوموا جذوع شجر من خير وحب،
وكل ما يصحوا تحط عليهم عصافير جنّة
وتتشتت من أغصانم الثمرات والتغاريد
أنا كلّمت حديقة جيرانا عنك، ونّستهم بيك، طلعوا عندهم جوابات منّك
والشجر كلو بسلّم عليك
وما بنسى وصايا نهر لورنزو في جنوب إفريقيا،..
خوف يزعل لو طنّشتو


...

..



أبو ساندرا،..
أيوووة، جنرررر، بررر
بعديها أزأر شوقاً... ثم أفترسك بوساً وسلاماً
إنت يا زول دربك معانا، أخد خفساتك وتعال،..
الصالحين بطشوا، وما بروحوا،
وشتّان ما بين الطششان والروحان،..
الشايفو أنا، الجنّة دي بخشوها ناس شايفنّهم مبرّكين نياقن بعيييد منها،..
وغيرن مفتكر نفسو ناهر عليها لامن يلم في جنزير مالك،
الزي الجنزير الترسني من الشافعة دي
سبحانه إلهي، لا ينقطع رجائي فيه لمعصية،..
ولا تغرّني أمامه طاعة،..
أنا مشتهيك آلمبروك،..
وقريب ود العين يسالم ود العين



..

محسن ..الأديب..

Quote: أمّا حجاب في جنوب إفريقيا دا إلا كان الهنود والباكستان الجديدين في البلد،.. مسلمو جنوب إفريقيا ناس لذيذين، أسألي منعم دا كان هناك لزمن أطول مني، إمام الجامع بجي بالجكس بتاعو جُوّه الجامع وحجاب دا إلا زول مسلم جايي من برّه جنوب إفريقيا البيرة عادي جدا، والديسكو أكتر عادية منو، الأهم إنو البت دي مسيحية،..

لا لا لا..

أنت لم تفهم قصدي..

اسم الصبية..لم يترك لي مساحة للظن في أن تكون مسلمة..

و لم أطلب تحجيبها..و لن أطلب حتى لو كانت مسلمة..!!

لست مهووسة باملاء الدين على الآخرين..

و في نفسي الكثير الذي يحتاج إصلاحاً..!!

في ظني أيضاً..

أن كل الدين..كلّه..

لا يأتي بالإملاءات من الأفراد لبعضهم..

أو السلطة على الشعب..

بل يأتي خالصاً مخلصاً من الفرد لربه..بإملاءات الخالق وحده..

و هو تعالى خيّر الجميع بين أخذها و تركها..!!

أما انحرافي بالبوست عن مجراه الأدبي و الغزلي..

فقد جاء بسبب واحد..

أنني رأيت القوم..في جرسة شديدة..

و أردت أن آخذ جرستهم حجة عليهم..

فالبعض هنا..

حين يأتي الحديث عن المرأة..و الأوامر الربانية..

يهبون مطالبين لها بحق مزعوم ..مدعين أنهم أرحم بها من قوانين الرحيم..

و يستنكرون رأي الدين في أن النساء..فتنة..

بالذمة..يا محسن..

مش المرأة فتنة..؟؟!

أهو انت كلامك كله..

كلام زول مفتون..ما مجنون..

و أنا كل الكنت عايزاه..

اني أقول للناس دي..أها.. صورة فتنتكم..

أمال لو سمعتو و لو شفتو..

كيف كان يكون الحال..!!


نجي للفتنة الأكبر..

قلمك ده..

انت قاعد تملاه حبر..و لا خمرة..

يبدو قلمك مخموراً..و مسكراً.. في آن معاً..

متى سترتكب ذنبك الأخير..

و بعدين..(تحجّب) قلمك..مش (تحجبه)..؟؟!

.....







تناتيف...

Quote: إمام الجامع بجي بالجكس بتاعو جُوّه الجامع

و ما كل أئمة المسلمين ..و الرسول صلّى الله عليه وسلم..برضو..

لكن كان الجكس في الصفوف الخلفية...!

Quote: مسلمو جنوب إفريقيا ناس لذيذين

ضيفتي على العشاء الأسبوع الماضي..كانت من جنوب أفريقيا..

شقرااااء كالشمس...

و بها عذوبة..

مسيحية لذيذة ..

و هي أول من أعرف من جنوب القارة..

أما ما حملته لنا معك من رحلتك..

فيبدو أنه سيكون زاداً دسماً..

يغذي فكرتي عن تلك البقاع..

و مادة للحديث عندما ألتقيها مرة أخرى..!





تخريمة مستغربة..

لماذا حجبت الصور..؟؟!

..


Sana Khalid،..
أوكي يا ستي،..
الفهمتو غلط كلو سامحيني عليهو،..
بس أرجع أكاويك
إنو اسم البنيّة مع مسلمي جنوب إفريقية عادي جداً
المسلم مارك، والمسلمة أنطوانيت،..
لو بالغوا بقولوا محمد أو نور،..
أنا عملت بحث في المساجد هناك وتاريخ الإسلام ونوعيتو،..
وبصراحة الله دينن حلو، وما بتاع مضاربة، ولذيييذ

كلامك حلو و"عذب"، وفيهو محلات نضم ما ليها أول ولا آخر،
أما سؤال المرأة فتنة دا، براهو بوست
بخصوص المرأة بتخيّل كدا،..
لو كنّا نحن بنتكاثر بانقسام وألا خُضري وألا شنو فلقتين داك ما بعرف
الدنيا كلها راحت فيها،..
أولاً الدنيا دي نصها يتم إنجازه،
لأنو الذكر يريد أن يستعرض أمام الأنثى
وممكن نبداها من ذكر الضبان إلى ذكر الأفيال،..
وبالخصوص الرجل ذكر الإنسان
كان لا شعر لا مسرح لا غناء لا ليلة ليل يا ليل..
وليلة وليل، ليل ويا ليل
حتى السهر دا كان بمسخ
يعني كان الدنيا دي تطقها جنس مساخة وبياخة،..
أوكي؟
أها أقرب مرقة لي إلى سوق الكتابة،..
القلم دا نشتري ليهو عباية وطرحة وجونتيات،..
ويبقه أريدو أبوي،..
بس ما تجوا تقولوا بقه مسيخ،..
ودعتك الله،
وسلّمي لي علي الجنوب إفريقية دي


الصور حجبت رقبتها، أها هسع رجعت، دايرة تبقه زي كهربة السودان

..

محسن خالد
اتوحشناك بزّاف

شايفك جاي من جنوب افريقيا
محمول معرفة وحب ونقاء ، حلال عليك
ياصديقي في الغار ( علم جنوب افريقيا وحب
جنوب افريقيا )

Quote: رأيتها تحرس البحر، وغَبَّن عيوني فيها، والقلب حتل في برد لُجَّته،.. الكاميرا نهبت نهبتها واختبأت في جيبي، وإن وجدت سندي عينيّ ما تزالان مغبّيتين فيها، فقالت بمنقار ذلك الطائر "قَدُّوم أحمر": Don’t look at me

لااستطيع الي ان اقول لك وبلسان مغربي ( يا ويلي يا ويلي، آلغزال، آلزوين، آلفسر )
ولكن مهما كتبت لي عن جنوب افريقيا و"سندي وودز مان" ما اظن ححبها ذي ما حبيت المغرب
من خلال كتابك ( تيموليلت ) ، فكم انا اتمني بان ازور المغرب وبالتحديد هذه المناطق "سهوب تادلا " و"منطقة الفقيه بن صالح" هناك شي ما في قلبي يدفعني لهتين المنطقتين ، لماذا لاادري ، وبنفس القدر ما حبيت مدينة "بني ملال" ينتابني احساس بان جميع النساء فيها كـ ام طليقتكم حسناء "التي يوم طلقتموها كنتم مذنبين دون ادنى شك - البنية يامحسن كانت حلوة ومناسبة معاك لكنها الاقدار" لايحبون آلدراوي ، محسن ياصديقي اذا موت قبل ان ازور المغرب لن اسامحك ذي ماختيت لي المغرب في رأسي وديني ليها...

بعدما كنت بحلم بالذهاب الي امريكا اصبحت احلم بالذهاب الي المغرب ( سبحان الله مغير الاحوال من حال الى حال )

تخريمة :-
اتعرفت بي زميل ليك في جامعة الجزيرة اسمو مجاهد عبدالرحمن لمن عرفتو خريج الجزيرة اقتصاد سالتو عنك طلع دفعتك ، وقال لي اول ما اتعرف عليك اتعرف عليك بي مشكلة في مكتبة الكلية كان في مرجع مهم تقريبا في الاقتصاد ومافي منو الى نسخة واحدة في كل المكتبة( تخيل مكتبة جامعية لايوجد بها سوء نسخة واحدة لمرجع مهم - دي ادانة مع سبق الاصرار والترصد في قانون المكتبات الجامعية ) كنت انت واقف جنب الرف بتاع المرجع بتفتش عليه جاء هو مد يدو علي المرجع قال قمت فيه وقلت ليه انا بفتيش عليه من قبلك ودورت الشكلة ، انا قلت ليه مدام الشكلة كانت في معرفة قطع شك محسن خالد بشاكلك وبكاتلك كمان الزول ده ما بلعب في المعرفة وقال بعداك بقيتو اصحاب ، وحكي لي عن تقديمك للشعر في محاضرة اللغة العربية وكان المحاضر اسمو ( عادل خالد ) كان بيعمل في البريك بتاع الكشر نزهة شعرية تحت اسم ( إتكاءه ) قال كنت بتبدع في رش رزاز الشعر ، الزول ده بسلم عليك كتير .
ناسف للاطالة والخروج من الصبية حارسة البحر " الماعجبت سموءل لانو دا ماالجمال العايزو سموءل سموءل يا محسن داير جمال مخيف " ذي نوع دا ( كنّا نجلس في مبنى خارجي حينما مرّت هي لأول مرة رأيتها فيها، صحبة فتاة أخرى مخيفة الجمال.)

محسن
كنت محارب البورد
وبتاوق ساى
بتك دى جابتنى جرى

سعالتك بالذى خلقك
وين دسيت الجلحات
تكون لبست باروكة يومها
لكن الموضوع دا فيوه دقيسة
تكون دى صورة ام العيال
لما كانت رخص
عموما ننتظر
الى اخر الصور

Quote: بعدين الناس ديل ذاتن سودانيين،.. اتعجنوا عجنّا دا ذاتو،.. بس العنصرية هناك نسفها التطور الماهل للتكنلوجيا، بالتالي الوعي إن شاء الله دا يسويهو علينا الله

أولا وبالتبادى: من خشمك ولى الله ياود البتولا اختى

قولوا آمييييييييييين

تانيا: عجنا دة زاتوووا ما ياهو الجاب لينا ولدا طاااااعم وريقه حلو وبلسان عربى مبين...كمان!

تالتا:البت دى بتشبهك شبها يحير....يخلق من الشبه اربعين

يلا فتش ليناال39 الباقيات......واروى الصفحات عذوبة

تحياتى

..


يا أخوانا كلكم، العذر وعوافي،..
بجي ح أرد عليكم هسع زول زول،..
باقي مزعلني عمر الفاروق دا من أمس،..
يا أخوان كلكم ما تشوفوا قِلّة أدبي وقوّة عيني،..
أنا والله راجلاً مأدّب وما برضى العوج في الناس الكُبار،..
ومن النوع الربّوهو شايل الإبريق جنب خشم الديوان عشان يغسّل للناس الكُبار يدينهم،...
ووحاة ربي يا هسّع بسوي كدي،
إن دخلت في ديوان ما النوع المهن وقليل الأدب وألا شايف روحو زي ما فاكرين،..
أوّل شيء أقيف في الباب وأي زول أكبر مني أغسّل ليهو إيديهو،..
آخر من يتكلّم وآخر من يدخل يده في طعام،..
هسّع راجلاً زي معتصم الطاهر دا، وفي مقامو وشيبتو الزول بقدر يلمسو بكلمة،..
سامحوني كلكم، جاييكم،..


...

محسن خالد

سأهرب عن بوستاتك إلى يوم يبعثون حتى لا يسكنني حبك ويبهدلني إدمان محرابك يا ابن الــــ ...............................

....



عبدالرحمن عبدالله أبوشيبة،..
ليه ياخ؟ يا ابن الذين طابوا وعسلوا،..

أنا فرحان بيكم والله أكتر مما إنتو فرحانين بي،..

وبحبك يا زول،..



...

..


samwal ebrahiem،..
واخا عليك آلدراوي،..
اتوحشناك،

زيد آسيدي زيد،..
عارف؟ ليك ولي غيرك،
البموت بدون ما يشوف المغرب والله ندمان في قبرو
وتمااام، تجي تمشي معاي نزور المرة دي المغرب وطارق جبريل
وكان ناوي ترجع حي تلاقي تيموليلت هنا ككلام مكتوب وتكتفي
ولو مطلّش وقنعان من رقبتك أسوقك معاي لبيتها،
وبعد داك –بالطبع- أودي خبرك لأهلك،..
يا سلالام، سلّم علي مجاهد وبلّغوا تحياتي بزّاف بزّاف
أما يمين فالمحاضر عادل خالد دا أنا حياتي ما شفت بشري زيو،..
دا ملاك،..
بالتبادي وسيم وسامة الله والرسول الواحدة دي، الهيكل
لامن يدخل القاعة دي، البنات ديل يكوركن واااي كُر علينا
وروحو وأدبو وعدم استغلالو لحلاتو وعلمو ومركزو ونضافتو وشرفو،..
والله ما قابلني متلو بتاتاً، اللهم إني آمنتُ بذلك الرجل،..
لا يفعل إلا ما هو خير، ولا يظن بالناس إلا ما هو خير،..
والله ويمين (عادل خالد) دا ما ساعل في الأنبياء،..
اللهم فحيي أستاذي الكريم،..

ماهيتو كلها وشغلو الإضافي في المعاهد كان بودّرو علي الطلبة الفقراء،
اللهم فحييه أينما كان،..


...

..



abuguta،..
أولاً بنات كمبو مالك والله كلهن قَطْع الشافعة دي،
إن ما زادن عليهو،..
كأنك بتزرّني تاريخياً،..
ياخي أصقاعكم ديك خطيرة، معترف،.
أنا شفتها وباريت بعندها، والما بمشي متحصّن..
وألا كمان متحضّر وسيرتو تسوي الييوي اليوي وراهو،
بتوَّك ما في شك، وقلبو بتلبع بنادق لامن يعرف الله واحد
غايتو الجلحات ديل زاليني بيهن زلّة، الله يسامحك
طيّب أم العيال جاية
لأنو البت دي ما بتاكل معاها عيش
ما دايرين نفشّل البوست
المغربيات ديل ما بتصاقعن بأخوي وأخوك
أينما حللن جَرّدن أخريات النساء من رجالهن،
وكمان شوف صور جنوب إفريقيا بهناك
في بوست نهال، برضو في صور
وهنا بنزّل ليك صور
بنفس القميص الهناك داك
وبتشوف إنو الصور دي ما حكم أبداً
مش الشعر دا هنا ممعوط كدي، ومافي، بوريك أصبر بس
وحارس المكان دا،..
ما خُفي أجمل


...

..


مهيرة،..
آمييين،
يا شقيقة البتولا بت الموفد
أختك بت الموفد دي، هي الحفظتني القرآن،..
باقي بحبّها وما عندي عزيز غيرها،
عشان كدي لامن تقولي لي يا ود البتولا أختي، بنبسط والله..
بعدين أنا شكلي ذاتي فترت من اللواصة، بصراحة الله
كدي باركيني بدعوة لواحدة بس، أنا براي مطيميس
منها وأنطم وأمشي دغرييي
أكتب روايات عن الفكر والسايكولجي وهلمّ حلاوات
كوني بخير،.
يا شقيقة البتولا بت الموفد


...

محسن حاف
بحثت عن القاب فما وجدت منها ما يناسبك !!!
لك التحية و السلام الانيق انت و صبيتك البحر

محسن خالد
شكيتك لمن علمك أن تري بعين القلب
ياخوي أنا لابدة قلت البوست ده بيت عزابة وأحسن لي ألبد ما يقبضني النظام العام مرقت لي تماضر وبت مختار وسحر والعزيزة رغماً عنها تراجي
قلت وقت الصلاة ... لالالالالا أقصد الحفلة بقت مختلطة سوف أغادر صفوف النساء وأنضم اليك من زاوية ان الحرية في النظر (الفكرية) إلى الجمال تزيده جمال يا خوي بنيتك دي ما صادتها الفةإجتماعية حجبت حركتها.
هي جميلة قطع شك وانت جميل لتراها بهذا الجمال.
يا زول هي لا تتوبوا لا تموتو
ولا تحجب قلمك
ولا أفكارك
ولا عيونك
منوا القال ليكم المرة فتنة وما تبقى فتنة هو زاتو فتنة يعني شنو؟؟
لكن أقول ليك حاجة في أضانك العاصرة على كضم البنية ؟؟
صورك دي شغل حندكة
وجننت الوليدات ساكت وقسمت عليهم شرك وحرك
وتحت تحت كاويت البنيات في البورد ( لكن ما بيناتنا ) اسدر في غيك مصيرك تهرم

بالله عليكم من منكم لا يحب السني دفع الله ؟؟ ..
ربما لأن الوجوه الجميلة ..
تبحث عن موئل ترتاح فيه
وهنا عند محسن خالد ناتي دائما ..
وربما لأن غموضا في وجه الصبية ..
في لفتة جسدها الانيق على طرف المركب الحديدي ..
او في التصاق وجهها الحميم بوجهه الجميل ..
ربما لأنها هنا وليست هنا ..
اذا من نحاور غيرها , الا هو ؟..
ربما لأنه يكسر لناالتابو ويفتح المغالق !!
ويأتي الينا من البعيد البعيد بقلوب نحبها كثيرا

...



Dr.Abbas Mustafa،..
الله!!
ود السني دا قصيدة براهو،..
تحياتي ليك وما أجملك،..
أهو أنا أجيب بت حلوة زي دي،
وأعمل فيها ولي أمر الأحاديث عنها، شفت الحلاوة دي كيف؟
"نونا"، ما حصلت
والبعجب فيها أكتر المسؤولية في سن صغيرة،..
بت قدر دي، بدل تدلّع وتسويها كريمات وبارتيات
تنزل البحر تسوق رفاسات ولنشات
تساعد أبوها في تربية أخوانها وأخواتها الأصغر منها،..
أنا كتير مبسوط من شخصيتها،
بس لأنو الحاجات دائماً بتبدأ بالعين
خشينا فيها من زاوية حلاوتها أولاً،..
بشكرك علي كلامك المزيان،..
وكن بخير،..


...

الاديب بحق

محسن

انا غايتو من الفضوليين

بس بعاين ولا املك الا ان اقول ما كل هذه الروعة

لستُ من المعجبين بالأطفال –كلهم- كثيراً،..
لا أحب أن أكون مسؤولاً عن مصير كائن،..
خصوصاً لدى السن التي يصرخون فيها نصف الليل،
بكل أنانية الكائنات غير الواعية والمتعلّمة،..
هذا برؤية كاتب تقوم حياته حين تنام حياة الكائنات الأخرى،..
اللهم إلا اليوسفية،..
وحدها التي نفحتني منها رائحة طفل،..
وتخيلتها تدفعه أمامي بتلك العربات الصغيرة،
بينما أتأخر إنا بحجّة كوني سأشتري لها ولبنيّتها مني الآيسكريم،
وهذا بأي حال لا يعني حرمان نفسي من شراء السيجار بلهفة أكبر،...


أنـا يادوب هنـا ابتـديت أصـدق!

مـني

عزيز محسن

الفضول ... (ما قلنا حاجة)

الحسد ( ما تسالني حسد منو علي منو وعلي شنو)

الله يغطيكم الاتنين ...


----------------------
سناء خالد

الف مبروك لاسعد
ما اخرني الا الشديد القوي

..


إنعام عبد الحفيظ،..
الفنّانة بحق،..
هو أنا ذاتي لو ما فايتك في الفضولية
كان جبت ليكم حلاوة جنوب إفريقيا دي
خليك هنا، عشان تعايني أكتر،..
لسع ولسع ياما حاجات،..


...

..


Muna Khugali،..
إزيك يا زولة،..
غايتو ما بعرفو تصدقي شنو!
كان كلامي عن الأطفال في تيموليلت؟
وألا كان كلام إنو الراجل لو ما حبّ المرأة لن يحب الإنجاب منها؟
مخيّره، صدقي البعجبك،..

..

..


Gafar Bashir،..
أب آمنة، يا زول إنت وينك،..
صاحبنا "الصحابي الصادق" ما حدّدناها معاهو، وطشيت
آمييين،
نكون بالليل كدا، مدمدمين،..
والمطر ببره تحجّي الحلّة كلها بالمنام،..
وتحنّك حِيَط مسكينة تنهار نص الليل،..


...

سلام يا محسن

أول مرة اشوف الصورة

لكن يا خي زول (حر) زيك كدي يمشي مع واحدي خلاسية ساكت ,,

اها كان البت دي في بلدا حاسبنها مع الافارقة , عليك الله جماعتنا بتاعين السودان

ديل ما يحترموا نفسهم ياخي .

..


Marouf Sanad،..
كيفك،.
عليك الله تقول شنو؟
ناس متفلهمين وعاملين فيها أحرار علي منو ما بعرفو،..
البنية دي لامن تشوفها ما بتعرفها جنسها شنو ذاتو،..
إلا تشوف أمها وأبوها،..
لكن برضو قوانين الأبارتيد تخمها مع أكتر زول إفريقي قح
أما نوع ناسنا ديل (العاملين فيها أحرار) لو مشوا هناك،..
في حاجة اسمها "أبهت بطاقة"
هم بقسموا بطاقات بالألوان، ممكن الناس تراجع بوست نهال كرّار
وكلامي عن متحف الأبارتيد،..
والله لومني لو في واحد سوداني أدهو بطاقة أعلى
من (أبهت بطاقة) دي لو يموت،..
كن بخير،..

..

الجميل .. محسن

يا وجع قلبك ..
يتفرق دمك بين ( الجدائل ) .. !!!
و ( أشركها ) تلك المجدولة من ( إيمانك ) بالمعبود - الأصهب - ذاك ..
يلجم لك العواصف رواحلا .. فامتطي .
كثيرة هي العواصف موقوتة القصف ..
و مثلك طقسه ( برمودي ) ..
فابشر بمناخات القلق .. و تهيأ للقادمات

أتُراك :
الأسد الفي القيد يناتل
يتأكد ما ليهو كاتل
غير مكحول جدي النتيلة
؟؟؟؟
لا يدانيك صبابة و جِناً كلكياً إلا ذاك الذي أوقف ( علي المك ) :
كان ( يباري ) حفلات أبو داوود .. ويتربص بـ ( زهر الرياض في غصونو ماح )
و تنطلق الـ : ووووووووووووووب من حرِّ ( ما به ) فيشق ( جلابيتو ) عند مقطع :

خدام جنابِن يا زميل
لازلت لامِن أنعدمْ ..

وأنت تستوي عشقا ..
أذكرنا ( في الطّبع الجِماح ) ..
قبل أن تأخذك ( النوبة ) الخلاسية تلك
وتعصفك ( حتف حسدنا )

نعِمّا هو .. حال
( أريتو بي حالنا ) ..
و سنتقف حينها ( متقرقبين ) خصورنا بعمائمنا .. صفاً صفا ، نرزم خلفك :
الحي قيوم .. الحي قيوم .. الحي قيوم

..



Emad Abdulla،..
أول شيء إنت كتابتك دي حلوة ومقعّدة، مبروكين لبعض
فعلاً الشافعة دي دايرالها حلقة ذكر،..
عارف؟
كنت متألم منها،
وما قادر أمسح صورة موادعتي ليها في مطار الكاب تاون
شوية شوية، بديت أكابس حياتي بهنا،..
لما كتبت عنها والناس جوا وقالوا حلوة حلوة
تاااني بديت أتجرس،..
وندمتَ ذاتو
سلام يا زول،..
الألم قصته قصة
بإحداثيات الإنسان
(الألم نوعٌ من ثمار الحس..
... وبعضٌ من عطائك)


...

المبروك محسن ..

Quote: فعلاً الشافعة دي دايرالها حلقة ذكر،..

أذكرها ..

Quote: مبروكين لبعض

..........

Quote: تاااني بديت أتجرس،..

أفوو ..
كلاما أعوج تب ..
علا عازرينك ..
وعجبنا ليك ..
عشان تضوق جرستنا..
....
تاني تجي ??

..


عماد عبد الله،..

ولا يهمك يا زول، أشمت طوالي،..

بكيت عدييل، خليها الجرس،..

أصلو غير النونات ديل الله ما خلق من يجرسنا


..

آسي محسن
كي داير وخى عليك آدراوي العزي

ملي مشيتي جنوب افريقيا قلنا غادي تجيب لينا السر ديال هاداك الحب اللي عند مانديلا ولكين جيتي لينا هازي قليبك في الليد ومعاه تيموليلت مانديلا...
راني بارك ليك حدا هادا البوست حتى نطلعوا ليك في الراس.. بغيتي ولا كرهتي..

آسيدي بغينا نسلموا عليك وندوزوا نشوفوا آش كاين..

..



طارق جبريل،..
واخا عليك آلدراوي،..
حشومة عليك،..
فين مشيتِ يا؟
اتوحشناك بزّاف
السموأل دا تبقه عليهو عشرة


...

..

صورة مأخوذة بتاريخ 15 -11 – 1981م

محسن خالد... السماني أبوعبيدة... الرفاعي أبو عبيدة

أها، لكل الناس (البنات) الدايرين يطلعوني عجووووز،..

خصوصاً إنتِ يا هدى، كيتاً عليك،..




..

..

Quote: ناس متفلهمين وعاملين فيها أحرار علي منو ما بعرفو،..

آلعزى ...

كى داير ..

هادى الهدرة مزيانة بزاف .

..


AMNA MUKHTAR،...
صباحك والشروق،..
العزوة مش العزى،..
أها مرّات لامن أم حسناء (مرتي) تكون دايره تتنفجر معاي كويس
وتقطع لي من أحلى معراكة صاج، بتقول لي (اللمتمّر) أسألي منها صاحباتك ديل،..
ودا الزيتون الأسود لامن بلمع داك،..
شفتي محن المره دي، بس بتفهم النكتة،.
ودا أحلى ما فيها
أنا ذاتي لساني موهيّن
كوني بخير
أها زي أصحابنا اللمتمرين ديل، متفلهمين علي منو

..

صديقي الكريم / اللمتمّر ... ( وش ضاحك ) ما بعرف اعمل الوشوش

Quote: AMNA MUKHTAR،.. ياختي مساء الخير،.. وهانية ياك؟ شكلك مالية عبك، واحدة أولى ودي تانية، الحسادة ما تنفعك،.. أمانة في ذمتك أديني أنا واحدة، وأدي صاحبي سموأل دا التانية، رويحتو دايرة تمرق بدرب المغرب كان قسمتي لينا تبارك الله عليك، وكان اتفاسلتي.. واخا عليك آلدراوية،..

والله يا محسن اصيل ود قبائل وكريم ،،، كدا المسؤلية اتحولت لي AMNA MUKHTAR
انت كلو كلو ماقصرت ،،، ويا AMNA MUKHTAR محسن علق ليك آمانة في ذمتك

..


samwal ebrahiem،...
إزيك يا سموأل،..
ما صدقت إنت،..
غايتو ناس الدنيا ديل، على قولة حبوبتي
كن بخير
أمنة مختار دي غتيتة، ما بتشتغل بك،..
بترد لما تكون عايزه هي بس

..

صديقي محسن

Quote: وكان ناوي ترجع حي تلاقي تيموليلت هنا ككلام مكتوب وتكتفي ولو مطلّش وقنعان من رقبتك أسوقك معاي لبيتها،

يااخوي صديقك مطلّش وقنعان من رقبتو
بس نزور ناس طارق جبريل اول قبل ما نموت

يا محسن سلامات...
بنيتك نجاضه وبتشبه اهلنا المكا سيك ,الله يطراهم بالخير....
شفت زكرك لصحابي ,دا اخوي بعيد عنك....وبعيد عنك دي فيها قصه بشيل منو
الاذن وبجيك بيها....
اتابع كتاباتك ما اتاحت غربتي هنا..
لحدي ما اجيك,ارقد عافيه...
لؤي الهاشمى..

..


Luay Elhashimi،...
ياسلالالام، الصحابي أخوك،..
كفّارة والله، إن شاء الله حسنة وأجر،...
صاح صاح، الصحابي الصادق الشريف "الهاشمي"،..
باين عليك ماخد من لذاذتو، ما تكتّر الكلام معاي،
بس خلي لي العنوان بتاعو في المسينجر،
ياخي الزول دا أخوي أكتر منك والله،..
كدي أديني العلوان فسراعك،..
كن بخير


...

..

سموأل،..
كويس طلاشة الزول الساجننو في السعودية دي بعرفها،..
بس بلاقيك،...


...

Quote: والله يا محسن اصيل ود قبائل وكريم ،،، كدا المسؤلية اتحولت لي AMNA MUKHTAR انت كلو كلو ماقصرت ،،، ويا AMNA MUKHTAR محسن علق ليك آمانة في ذمتك

ابيييييييييييت .

العزيز محسن
السموأل ما بنقصر فيه بس يصلنا..

يا آمنة مختار
عهدي بي ناس بورتسودان الكرم
مافي داعي تجهجهي الجماعة

تحياتي لكم جميعا

طارق جبريل..

البت العسولة دى جبتها

متين ؟!؟!؟!


( الظاهر نحنا عجزنا عجز )



ماشاء الله ربنا يحفظها

فيها شبه منك..لكن

باين عليها خلاسية

زى بت الحور الجهجهت

محسن خالد و أصحابه..

Amna Mukhtar

Quote: ابيييييييييييت

واخا عليك آلدراوية

طارق جبريل

Quote: السموأل ما بنقصر فيه بس يصلنا..

تسلم ياحبيب

سلامات
وعوافي
محسن خالد ...
البنية عاوزة الزول يعاين ليها بي (زواية) زي بتاعت عاطف خيري ديك ..
ياتري الجميل شنو في صاحبة الصورة موش احسن تتوغل شوية باقي ليك العطش قاتلنا ساااااااي...التوغل المقصود زي بتاع ابوالقاسم الشابي ان لم تخن الذاكرة لما قال عن الزولة الشديدة ولضيضة .. قال :-
كل شيئ موقع فيك حتي لفتتة الجيد واهتزاز النهود
طبعا دا ثراء ماطبيعي ثراء في المفردة وثراء اخر تميز به الشابي في هذه المقدرة علي الوصف التي لايوجد لها نظير ... اذا (استمخ) مع البيت دا وخلينا نشوف البت (حايمة) بي كرعيها بيننا هنا ... امكن امكن نتعرف عليها في يوم من الايام .. ان لم يكن في عالمنا هذا فربما في عالم اخر تجد فيه ارواحنا حريتها وتستعيد فيه (المقل) وظيفتها البكر لتوغل في ابعاد (الرؤية) واعماقها ...
المهم الواحد لما يقرا ليك حاجة بيحس بي راحة ولطافة ..
دحين اقعد في بساط الرضا ..

فتاة من حوريات البحر فتاتك هذه يامحسن !

والقول ماقلته انت

Quote: العذوبة هي امتلاك آليات وقدرة، لإبراز ملامح جمال الروح

فهل أروع من امراة تنطقك هذه الحكمة يامحسن ؟!!

كن كما انت مدهشا ابدا فى كتاباتك ايها الولد الكتاااااااااااااااااااااااااب !!

..

ود رملية،..
إزيك يا حلو،..
يمين مشتاق ليك، ولعالية عوض الكريم، بت حلّتكم
المحارباني ديك،..
أيوووة، نمش لتحت حبّة مش كدا؟
مااافي،..
قلت لي الشابي ثري وما ثري؟
حنكك شديد،..
وبكرعيها بيننا في المنبر ويمكن نتعرّف عليها،..
شوف الزول دا بلباص كيفن!
دي عشان تتعرّف عليها أول شيء ألف دولار لأم جناح
وألف تانية للفندق،..
وكتلات في مواضع أخرى،..
أما الكتلات المعنوية ياهو بترجع زيي كدا،..
لا تعرف تنوم ولا تعرف تأكل
ولا الدكاترة يعرفوا الحمّى يداووها كيف!
يا زول هادي قعدة في بساط الرضا
كن بخير آلشريف


...

..

الأستاذة نادية عثمان،..
ألف تحايا ومودة على لمسة قلمك هنا،..
شكراً جزيلاً لكلماتك العذبة والودودة والزاهية
كوني بخير، أبداً بخير


..

..



كنتُ أرغبُ فقط في أن يطول تذكاري مع سيندي
وددتُ أن ينمو
كنت عايز أكتب الآن تذكاري مع سندي طوله 25 سم، وبعد سنة سنتين
ح يكون نصف متر،..
بس خايف من ناس زراعة، يجوني بالبستاين وعلمها كلو
وإنو الشجرة بتزيد بالتراكم مش المطّيط زي البشر والحيوانات
غايتو تذكاري دا ح يطول،..
غصباً عن كل علم البساتين، شجرتنا وألا شجرتكم


...

...




...

العزيز محسن
مرينا للتحية

بعدين انت يا اخوي السموأل دا قلتلو شنو عن المغرب لامن اتجهجه كدي..

يا آمنة مختار
البنية في 2 ابتدائي وشرب شوية من النيل وشوية من ابي رقراق..

التحية لكم جميعا

..


يا طارق جبريل،..
أبداً، قالتلو تيموليلت، أنا بالتقطع لساني كان قلت حاجة،..
كانت جاياني "عزيزة" زيارة هنا، زولك اتحضّر من هناك وكوّم شنطو،
جات ماجات جات ما جات، لامن ما لمَّ فيها،..
حالف بالتكتلو وتقطعو كل بحار المالح الفي الدنيا،..
إلا يصلها وود العين يقيف قصاد ود العين،..

بعدين البنيّة الحليونة دي، ما تمرق حق الله فيها،...
البنية دي يا آمنة أمها مغربية، وكلها أبو رقراق،..
بطلي مجاملات واستهبال و"كضب"،..
كونوا بخير،..


...

..

هنا تحية ليك يا طارق جبريل،..
هذا الغلاف من ابتداع طارق جبريل،..

..





(المخرجة) و(الفنّانة) و(الكاتبة) الجميلة تماضر شيخ الدين أثناء عرض فني لها بأمريكا،..


..

تمادر دي اصلها ممثلة مشهورة مادايرين معاها
البنات السمحات عاينو ليهم
بكره حايبقوا ممثلات مشهورات
وماتنسوا نبوئتي دي لكن

..





أيوة يا طارق أبو عبيدة "العادي"،..
هسع جاتني طفطاشر تلفون بتقول هيييه هيييه
عايزين "طمطم" عايزين "طمطم"،..
أهو طمطم، بعد عرض آخر، ما اللولاني داك، وألا كيف؟..
متفسّحة في الخواجات يا طمطم إنت،..
مستنيك "ديش" في مهرجان الشارقة للفنون المسرحية،..
وليك عليّ، ترجاك الصحافة الإماراتية كلها،..
والقنوات الإعلامية كلها، والروادي، والوكالات..
أنا تور شين وكت أدور،..


..

تعرف يا فردة
القصة كلها صعبة ... !!!

لكن ما علينا هى
صور
والروح دائما مستجدة للصورة
وهلاكنا يبدأ بلحظة الصورة
وذاك المجد
اين انت
فلنتحد فى تكوين الرؤية والروح
يا لى بك
انقذنى وابعد عنى الهواجس
واجلعنى سطرا ممدا
لكل الجميلات
وذات الهدب




ودائما ليتنى زهر فى خدك النادى اناااا


صعاليك مش كده ... ؟؟؟؟.

...


عصام عبد الحفيظ،..

وااو،..
دا شنو يا زول أرض جو دا؟
يا صاحبي عصام عبد الحفيظ، أها بدأ الشعبطة،
شوف "صاحبي" دي ساي محنّتها! واخد بال حضرتك؟
دي مني؟
أخوك ختري، ولا يعترف بالدواليب أبداً،..
هناك على الدوام شنطة مركونة كالدراجة قُرب الباب،
لساتيكه منفوخين ديمة،
فرشة ومعجون وبشكير وغيارين تلاتة بالكتير،..
لباسات وفنايل، وحاجات سفيهة أخرى،..
دوو يقوم صاروخ زي دا،..
طوالي، وفوراً، نلفح الدراجة،
ونحصلو وين ما يكون ونوريهو الصواريخ،..
بصصني وحياتك،
يا عصام نحن أصحاب أصحاب، مش؟
يا زول آمييين،..
عارف؟
أنا عندي ليك صاروخ سندوي، بالجد جد،..
لكن ما بقدر أفكو من المنصّة دي،..
زمان في واحد في ماهلة بكري دي،..
قال لي: "لا لممارسة الجنس في المنبر"،..
كان ما كدي، كان تشوف أحلى بوسه في حياتك،..
هاك أها،
وأبقه أقسم معاك للسمحة دي،..


...

محسن ههههييييى
انت ما الزول البتكلمواصلوا
معاك
فى النت وبس



وانا زول احب كامل الوصول
فى النت والاصول
وبرضو وبس

واراك عصى دمع الوصول
وهل لى بك

وليتك اين ... ؟
وليتنى أناوانت
تلعب الخمر

بأحيانى احيانا
وانا وانت نقذف الحجر
صوب ذاك النهر
وانه يا نهر من
من ورق
واننى اخبرت والدى
انه يانهر.... من ورق




ومضى النهر مسرعا
حاملا قارب الورق








ويلعب الوجد بى كل السنين


وانا اسائل نفسى اهوقارب من ورق






سلام لقارب الورق

..


عصام عبد الحفيظ،..
هااههاها مش كدا؟
أمشي يا فسل، أنا ذاتي صاحب تيموليلت
كل ما تلاقيني بت سمحة وأكعّها عين
تقوم هي تحمّر لي
أقول ليها: هاهاهاي، وين دا، أنا صاحب تيموليلت
عان لاوية بوزها كيفن؟
أريتك كان شفتِ تيموليلت،
البتحرّد البنات روحن

سلام لقارب سندي وودز مان

استغفرتك يا مالك روحي
الضحك كتلني،


..

..


عصام عبد الحفيظ،..
هااههاها مش كدا؟
أمشي يا فسل، أنا ذاتي صاحب تيموليلت
كل ما تلاقيني بت سمحة وأكعّها عين
تقوم هي تحمّر لي
أقول ليها: هاهاهاي، وين دا، أنا صاحب تيموليلت
عان لاوية بوزها كيفن؟
أريتك كان شفتِ تيموليلت،
البتحرّد البنات روحن

سلام لقارب سندي وودز مان

استغفرتك يا مالك روحي
الضحك كتلني،


..

عصام

شكيتك على البتريدهم ..

ياخ عوقتنا فى التانية

الأولى عوقها محسن ..

عزيزي محسن

Quote: هنا تحية ليك يا طارق جبريل،.. هذا الغلاف من ابتداع طارق جبريل،..

ان نكون في حضرتك هو ابداع في حد ذاته

..

طارق جبريل،..
أنا شاكرك بزّاف،..
ودي تحية منك حلوة لتيموليلت
ولأحباب تيموليلت
وكن بخير،..


...

Quote: صعاليك مش كده ... ؟؟؟؟.

..



AMNA MUKHTAR،...
أيوة صعاليك،..
وكمان فسالة عصام دي زعلتني
ح أديهو صور شديدة الصعلكة
الما عاجبو يزح عينو من هسّع
ما تقوم ليهو فيها بت حلوة


...

تعرف صديقى محسن , علينا تدارك الامر
سريعا قبل ان يتفشى الخبر
ويعم القرى واطراف المدن




وهل لى بحكمة منك
ويبدو انك سيد الحكم كما ارى





وانا مصور مسكين
اشكو قلة الخبرة
وسوء الطالع
وقصر النظر


ولا اعرف الجميلات
وكيف آخذ تلك النظرة واكتفى
ولا آخذ تلك اللقطة واكتفى

وابحث عن صبرا ولغة عندك تأسر بها
من مروا حولك

وللحديث اسرار ويطول .... طولهن
والفجر حتما قادم ... عاشق لا محالة





سلام حتى مطلع الفجر

..

يا صاحبي عصام عبد الحفيظ،..
جدعوا لي اللنك بتاع بوستك،
وكشفت المكان الانت بتسرق منو
يا زول هي، أنا كاتباتي، ومش مصوراتي
بعتمد علي تكنلوجيا دماغي، ومش الكاميرا
يلا فوت بوستينك،..
وخليني أكتب
بجيك بهناك
تاريك إنت مصوّر محترف يا ملعون
الشفّع الحليوين ديل،
لو بتوعك، أديني واحد أربيهو
بس ما يكورك نص الليل
يشرّد مني الكتابة
مبروك، ويا ليتك صحبتني لجنوب إفريقيا


...

.



yumna guta،..
يا ستي اتوحشناك بزَّاف
وأريتك بس تكوني طيبة
افتقدنا قلمك،..
ولك أجمل الأمنيات


...

..



شادية عبد المنعم،..
آآآ قلتِ شنو؟
لان أنا أضاني الانعصرت في كضم البنيّة دي ما خليتها هناك
عاد أسمعك بي وين؟
أضاني براها،
أصابعيني خشو بين شعرها السنبل دا،
وبعد خلاص فرحت، وقلت الله أداني أصابع موزارت
أنا الأشتر زول دا، أخش في أي آلة وترية صعبة
أخليها تنضم من الأوبرا ولفوق
وأقول للموصلي صاحبي، إنت بتعرف شنو؟
بس اللمسة ديك أتاريها لمسة ميدوزا
يا تنقلب حجر بعديها،
يا قَدَرك تخليها تشيل في ناحية تانية
بلمسة أطول من بتاعة حنّة العريس
أما شنو داك
بيغااادي، بعند منقار قدُّوم أحمر، وشوية ظلال
وحاتك، رجعت بعدها أبكم
ياختي باختصار أنا اتشتت جنب الأطلسي إسبيرات
وشالتني النوارس في قداديمها
فما عندي مانع أفكّك صواميل الناس دي كلها معاي
وأهديهم إلى طيور

المشكلة زي كلامي دا، البحنّك داخلية كاملة بتاعة بنات
بتفهميهو إنتِ أو أي سودانية تانية
بينما ستفتح سندي منقار قدّوم أحمر
وندخل في ليل الوطاويط
What did u say?

أول ما شفتها يا شادية
قلت اللهم ألهمني إنجليزية كل شباب سودانيز أون لاين
خصوصاً النصري وزول بن زول وكوستاوي وندى علي
وباقي كل الفرنجة القاصعة من ولاد وبنات أهلي
وتخليهم متمحنين كلهم في بلد الخواجات ديك،
الواحد منهم ما يعرف يشتري كباية لبن بالإنجليزي
أنقري الله ما استجاب لي
بس ما بعرفو، جابها لي من خشوم الشباب ديل
وألا من محل تاني
برضو يمكن جبتها من حلاتها
حلاتها تخلي الزول يبقى سيدنا سليمان عديل
ويناطق الشجر والريح والنمل والطير
(يا أيها الناس عُلِّمنا منطق الطير، وأُوتينا من كل شيء)
حين حلاوتئذ


ما بين القوسن دي آية، عشان ما يجي واحد ويقول والله محسن خالد دا مغرور خلاص،..
(يا أيها الناس عُلِّمنا منطق الطير، وأُوتينا من كل شيء)

كويس، دا سليمان النبي، كان عندو منهج كتابة يا ربي؟

هامش:

"قصدي من البوست دا، أقول حاجات عن الحنان والأُلفة"




..

صديقي الجنون

محسن

صباحاتك بطعم نسايم الأطلسي

ياخي نحن مازلنا فاتحين خشمنا ومنتظرين

باقي الصور

وباقي الحكاية

والباقي من ليل الأسي ،، وضي الكتابة الما نضب

ابقي راجل دحين

واحكي الحكاية من طقطق لي مع السلامة وقبلات قدوم احمر

اديناك خلاص الولد الكبير

لكنو ما يبكى بالليل . لتشرد منك
اباليس الكتابة

* بس بيكون عاوز اخت البت دى
رايك شنو

Quote: ياخي نحن مازلنا فاتحين خشمنا ومنتظرين باقي الصور وباقي الحكاية والباقي من ليل الأسي ،، وضي الكتابة الما نضب ابقي راجل دحين واحكي الحكاية من طقطق لي مع السلامة وقبلات قدوم احمر

محسن و عصام

خدر

تعال مارق لي بره ...

..


ahmed haneen،..
بالمختصر كدا، أبوها قال أنا عربي
قلت ليهو نقاها منك نحن وألا من بشاشا
أصبر ما تضيق،
القصة ماشيه عليك
وبرضو الصور


...

..



عصام عبد الحفيظ،..
ما عندي مانع،
بس البعصة النزلها خدر تحت دي،
شكلها بتقول الولد دا قصتو تانية،..


..

..


خدر،
شففني وحلّفتك بلقاء،..


...

الشافع دا أمهرا، وألا مهيراوي؟

..

..


Gafar Bashir،..
دايريني أتطوطح، مش كدا،.
شكيتكم علي الله



...

اخوي محسن

حليل زمن الصبر

لكم معاك نصبر

قالوا الصبر عاقبو الحلو

بعدين حكاية عربي دي شنو

Quote: بالمختصر كدا، أبوها قال أنا عربي

يعني عشان انت عربي ما بناسبك ولا بديك بنيته

عووك يا ناس عبد الرازق الطالب مواهيم العروبة
علي قول الحاضر الغايب بشاشا

نحن كده انتو كيييف !!!!!

Am I the only one who don't know what this post is about!!!???lool

ووووووووووووووووووووووووب

شكيتك على الله يا محسن
جبت لي نفسيــــــــــــــــــــــــات

..


ahmed haneen،..
أيوة، إزيك
أبوها متفلهم، المشكلة إنو كلامو من ناحية بدعم خط العروبيين،
"الحطَّاب" بعتقد إنو الشماليين السودانيين ديل عرب ساكت، ومش أفارقة،
ومن الناحية التانية هو بحتقرن،..
شفتَ محن الدنيا دي كيف؟

عصام عبد الحفيظ،..
أهو نحن برضو كدا،..


...

..


Rawan Hamid،..
مسوية اسمك السمح دا،.
أها كيفك؟

هذا البوست لأحد الأسباب الآتية، أو لها كلها في آن:
(1) البنت التي ستكون محظوظة وتقابل محسن خالد في حياتها، هي بت مفروض تكون غير عادية، ولا بد أن تلوح سيماء "الحظوظ" عليها والخلود، يعني البنيّة دي الأمة دي كلها عرفتها، بأسطرٍ قليلة من لدنا،..
(2) للتحدث عن العذوبة، وما أدراك ما العذوبة،..

(3) لمجرّد المرح الراشد

(4) وفاءً لذكرى أحد عزيز عليّ

(5) للكتابة، برضو... بس الناس ما أدتني فرصة، وأنا بحب الناس

فوائد جانبية للبوست:
كونك تشوفي طمطم، في عروضها الأمريكية، دي ما فائدة؟
كونك تشوفي محسن في مسلسلاته المكسيكية، ديل كم فوائد؟
كوننا نعمل لأشرف السر صاحبي دا نفسيات، دي براها أوسكار

"رَوَان"، اسمك حلو،


...

اول مرة اشوف "صورة العهن المنفوش" بتاعتى دى هنا...

محسن خالد يا جميل ..شيل صورتى وخلى الناس تتونس..

..

أشرف السر،..
وهو المطلوب، كنت ناوي أوزّع الحمى علي الناس، كما أعلنت ذلك،..
هسّع الحُمَّى خفّت شوية،..
مشتاق ليك يا صديقي تحت شجرة الأولومب،..
بس ملحوظة، تعالي أحذف من الثكاليج بتاعتك دي شوية،
عشان نستعدل البوست

...

..

يا طمطم،..

خلاص طفينا النور، أمشوا يا شباب نوموا



..

محسن
عصام


ارحموا عزاب قوم اذلتهم السعودية







لسقراط الالفية الثالثة

..

حمد فتح الرحمن،..
يا صاحبي تعالوا مارقين علي الدنيا،..

السعودية دي فيها بيت الله، ما قلنا حاجة،..
لكن عيزومة الله بَرَّاها،..

أتفضّل بهنا، الإمارات يخيّل لي
مع قطر، أكتر بلدين خليجيين معقولين،...

السجن حااار، يا ود أمي،..

الله يفك ساجوركم،..



...

Thanks Mohsen for your complement on my name and for explaining the topic for me , It is only your kindness and inner beauty that allow you to see things beautiful, I was curious to know about the topic because I felt it was worth it and it sure is , I am happy to see the photos of the members of course , now I will let you go ahead and continue explaining why your soul mate is the luckiest woman alive
,Respectfully
Rawan

نمتهن الحراسة، فشجرة الأولمب تحرس الصبيَّة حارسة البحر.

..


Rawan Hamid،..
يسعد صباحك
الصول مات دي جاية، لقدّام
والفكرة للمكاواة، إنو أيما أنثى تلتقي محسن خالد، فهي سعيدة
شفتِ التغا دا كيف؟
صاحبي ود أشيقر عدل لي الشارع بإنو ميّز بين الغرور والتغا
يضحك نهارك



أشرف السر،..
بتذكّر لما كتبت الحاجات الحلوة ديك
لـ"فلانة" بت جامعة الجزيرة،..
كتبت ليها كرّاس لم يكتبه كاتب لامرأة، ولن يكتبه
لأنو الكتّاب بخيلين، لو ما مليت رأسن تمام، ما بدوك سطر لو تموت
يا ريتها لو كانت بت كيشة وما بتفهم كتابة، كان عذرناها
بس الحمد لله شرطناهو وشرّطناها
شنو ليك؟
كونك تكتب لامرأة وكونك تعدم كتابتك،
تشرّط كم بت من دفترك، دي ساهلة
بس تشرّط كتابتك دي فروسية ما بعدها
عشان كدي ما بكتب تاني إلا لامرأة نهائية وخاتمة
تدخلنا جُوّه من ليل المرافعين، وتسد الباب


..

الزول السمح و صديقي محسن

( ما عارف ليه مُصٍر أقول ليك : أبو خالد ) ؟

تعرف يا محسن

Quote: هي ذنب قلبي ما قبل الأخير، بعد أيام سأقلع عن التدخين والتحنان نحو نساء يحرسن البحر، الكحول ألزمني الطبيب بالإقلاع عنها، وقلبي هذه الأيام يحدّثني بالصلاة وبحب امرأة أكتب لها بوستاً بعنوان (فلانة: خاتمة النبيَّات وليل المرافعين)،..

المرحلة دي عديت منها بشق الأنفس .. فقد كان إبليس كالحاوي في إحتفالات المولد بمصر .. يمسك بسيجارة و بقربه فتاة تصبغ وجهها بأكثر من مسحوق و يغريني بالحب .. و مما زاد الطيبن بِلة .. ترحالي الدائم في أركان المعمورة .. فقد كنت أخرج من دهشة لأدخل في شهقة تجربة أخرى ..
أنت تسميها ذنب قلبك ما قبل الأخير .. و بذاك تفسح مجالاً لذنب آخر .. بينما عندي الحبل متروك على الغارب .. بلا ضفاف و لا شطآن .. و لكن يحدوني أمل أن أكون صوفيا على طريقتي .. دون طبيب .. فالتدخين تركته على أمل أن أحتفظ بكامل طاقتي و أنا أحاول تعلم التزلج في آسبن بضواحي كلورادو .. أما التحنان فدونه خرط القتات .. أو بالأصح .. إن كن يحرسن البحر فسأبقى رغاوي الموج المتلاطم أتاوق بين الفينة و الأخرى ..

Quote: كحال الطفل الذين لم يظهروا على عورات النساء، رأيتها تحرس البحر، وغَبَّن عيوني فيها، والقلب حتل في برد لُجَّته،.. الكاميرا نهبت نهبتها واختبأت في جيبي، وإن وجدت سندي عينيّ ما تزالان مغبّيتين فيها، فقالت بمنقار ذلك الطائر "قَدُّوم أحمر": Don’t look at me

تعرف يا محسن .. عفواً أبو خالد .. ذكرتني بقصة فتاة كتبت قصتها في قصتي بعنوان ( أماندا و الأبنوس ) .. بداية دهشتي على ضفاف بحيرة جنيف .. حيث كان أخوك لا يزال أغبشاً ( جوة و برة ) ..
هي متل سيندي ..
غايتو يا أبو خالد ..
دخلت بفضول .. و مارق و قد إزداد الفضول فضولاً .. أها ما تقطع ..
أرقد عافية

..

أبو جهينة،..
ياخي كلامك دا سمح جنس سماحة،..
عارف؟ يا أبا جهينة، مرّات أقول السفاهة والذنوب دي أصلها ما مشكلة،
يمكن حسمها بسهولة، بس كعبة خيانة القلب، خيانة الجسد دي
إلا زولاً طمّاع ساي
والقلب ربنا خلقو وصاغو من الصدق، ذات تولاهو
أها لو قمت عَرّست لي مره، وألا هي عرستني، بدون ريده أصيلة
كاتفاق يعني، بتقدر تلتزم تجاهها، وتلتزم تجاهك،
طيّب، لو يوم واحد فيكم وقع في حب زول تالت،..
حباهو لامن صَرَخ chـــاااك
دي يسوا فيها شنو؟
أتخيّل إنو المره هي الحبّت زول تالت،
أها تجي للزول الأوَّلاني دا تقول ليهو شنو؟
أنا آسفة؟ أنا غلطانة؟ أنا مذنبة؟ أنا شريرة؟ أنا كعبة؟
وألا لو وقع هو، يجي يقول ليها شنو؟
قلبي خانك، بعرّسها فيك؟
أنا بعرف زول صاحبي، سفيه جنس سفاهة،
وفي نفس الوكت بحب حبيبتو دي جنس حب،
غايتو مُشهاد القلوب دا،
عليمو كريمو،..

عارفكم أنا كلكم، بتدسوا قصصكم في قصص "الخيال"
أبو خالد دا عازمكم كدي مرّات مرّات، تقولوا لينا هاكم بالواضح والنجيض
ودي للمزاح بس، يخيّل لي صاحبنا أبو ساندرا -لأنو في كتابتو بعمل فاولات كتيرة، وبفك ورق- أها بتوقّع إنو ماخد ليهو دقات كتيرة من الشرطة المنزلية، أنا مبسوط منو شديد
كن بخير،
وما تنقطع


...

الحبيب المحسن الخالد ...
شوق سنين مرتج فوق بعض ... كيمان كيمان ...
وما ضرني غير هذا الفضول الذي وضعت لأجله صوراً ...
لك الله أخي ..
ولهذا الوجه الصبوح الرائع ...
يا أخي مالك وهذا الضجيج الذي تفعله فينا ...
هذا الجمال الرقراق يدوخ ويصيب ... سهمه نافذ وبصيرته تطعن ...
لزمان وأنا مفتون "بالوجنات" سيدي ... حتى أن أغنية أحمد المصطفى (أحبو وأحب نوناتو ... نوناتو الفي وجناتو ...) تلك هي من المفضلات عندي ... ونور الدين لا يأبه لمثل هذه الخطرفات ويلوح بيديه ويصيح: "هذا هراء" ... من يهتم لهكذا أفكار سيدتي ... هذا المحسن مجنون وليس الجنون سبة يا أنتِ ... من منكم يعيرني عينين غير عينيّ حتى أرى ... جميلة بائعة الشاي يا محسن كانت هنا وسألت عنك ... لا أعلم لماذا تذكرني بتيموليلتك ... وما ضرني غير هذا الفضول ... لم تكن ضحكتها فاجرة ... ولكن نور الدين يصر على فتح بلاغ فيها نكاية في روبرتسون ... وبعض الناس قالوا أنه حلف بالطلاق ليزجنه في السجن ... ونور الدين يعيش على تلك الأفكار قبل أن يأتي أصحاب القبعات الزرقاء روبرتسون وزملاءه ... فالفجور كان له معايير والآن أصبحت له أخرى مختلفة ... هنا يا سيدي تستطيع أن ترفع عقيرتك بما تريد وتحتسي حتى الفودكا دعك من الويسكي الذي أصبح يتم إستيراده خصيصاً للقوات الأجنبية داخل البلد (عيان بيان) ... ولقد أكلوا هنا (الكسرة) و(ملاح أم رقيقة) ... يحلف جار النبي بأنه رآهم بأم عينيه ... سألته: أين؟ قال: عند بخيتة التي تبيع الأكل قبالة (بسط الأمن الشامل) ...
يا لقوة العين ...

بجيك راجع ومعاي الجماعة ديل زاتم ...

أبو خالد

السمح فالك ..

Quote: مرّات أقول السفاهة والذنوب دي أصلها ما مشكلة، يمكن حسمها بسهولة، بس كعبة خيانة القلب، خيانة الجسد دي إلا زولاً طمّاع ساي والقلب ربنا خلقو وصاغو من الصدق، ذات تولاهو

كلامك زين و تمام .. و فعلا الذنوب و السفاهة مي مشكلة ..
السفيه دة بجي يوم يتوب و يحسم سفاهتو بالتوبة النصوح ..
لكن يا أبو خالد كعبة التوبة ال نصها موية ..
عندي نسيبي بطحاني ( عقاب همباتة ) .. هو و صاحبو شربو العرقي لامن وقفو لطْ .. و لسبب تافه إتضاربو و إتلابعو .. أها الصباح ندمو ندامة الكسعي .. و حلفوا على المصحف إنو تاني ما يشربو المدعوق دة.
أها كل يوم وكت تجيهم الحالة و يقعدوا يهرشو الريسين .. يقعدوا في طرف الكنار .. و يقولوا للماشين يشربو في الكمبو : هوووى .. ما تشرب من ديك .. حقها ما سمح .. أشرب من هناية ديك .. حقها بِكِر و نضيف ..

Quote: أها لو قمت عَرّست لي مره، وألا هي عرستني، بدون ريده أصيلة كاتفاق يعني، بتقدر تلتزم تجاهها، وتلتزم تجاهك، طيّب، لو يوم واحد فيكم وقع في حب زول تالت،.. حباهو لامن صَرَخ chـــاااك دي يسوا فيها شنو؟

طبعا نحن كسودانيين في الحالة بنقطعها في حنانا و نكتم على كدة و نبقى في حكاية الحشا المحروق .. لو الزول فيهو القدرة بيتزوجا فوق مرتو و بشيل شيلتو .. و لو ما عندو مروة بيقعد ينق ليل نهار .. طبيخ مرتو السمح بيبقالو زى ال فسيخ ال بايت برة التلاجة ..
غايتو أغلب النوع دة بيبقى شاعر في آخر عمرو .. ولا يجيهو إكتئاب .. ولا يدمن كنكان 14

أهل الغرب و الأوربيين عموماً في الحاجات دي صريحين .. زواج يعني حب .. حب يعني زواج أو عشرة صادقة .. لو كره ال معاهو و حب واحدة تانية .. بصراحة الله دي بيقول .. أهم شيء عندهم عدم الكتمان ..

Quote: أتخيّل إنو المره هي الحبّت زول تالت، أها تجي للزول الأوَّلاني دا تقول ليهو شنو؟ أنا آسفة؟ أنا غلطانة؟ أنا مذنبة؟ أنا شريرة؟ أنا كعبة؟

ياما في بلادنا مظاليم يا أبو خالد ..
تلقى الواحدة ميتة في دباديب واحد ..
فجأة يكلفتوها و يصروها لي واحد تاني في القرمصيص ..
و يموت ال في قلبها و ترقد بيهو كمد ..
للأسف حتى بعض المتعلمات .. في سبيل اللحاق بركب الزواج تلقاهن يقبلن بأول متقدم .. و بعد الفاس ما تقع في الراس .. تبقى الجرسة ..
غايتو الحب عمايلو كعبة يا أبو خالد.

Quote: وألا لو وقع هو، يجي يقول ليها شنو؟ قلبي خانك، بعرّسها فيك؟

غايتو زول إتزوج زواج مصلحة و إتفاق جنتلمان .. يقعد مكرفس سااااكت و يرضى بي قسمتو .. لو جاهو بعد دة حب فإنني أهمس في أذنه / أذنها : الحب قضاء نازل .. فتحلوا بالصبر .. فالحب ليس إمتلاك .. يكفي أن نتنفس أوكسيجين المحبوب و نتاوق لنفس القمرة و نفس النجوم و نلتحف نفس السماء و ندب على نفس أديم الأرض .. و تلك متعة و الله جربتها يا أبو خالد .. نوع من الصوفية حتى في حب الأنثى ..

Quote: أنا بعرف زول صاحبي، سفيه جنس سفاهة، وفي نفس الوكت بحب حبيبتو دي جنس حب، غايتو مُشهاد القلوب دا، عليمو كريمو،..

غايتو صاحبك دة حبو صادق .. لأنو لو ما صادق كان إتسافه مع حبيبتو و قضى غرضو و فرتق .. بس هو مدي جسدو كامل الحرية بينما قلبو أسير حبها و مشاعرو رهن مشاعرها ..
مش ؟

Quote: عارفكم أنا كلكم، بتدسوا قصصكم في قصص "الخيال"

كان داير الجد .. أنا دسيت قصصي كلها في عصيدة الخيال .. و هاك يا صواطة ..

Quote: أبو خالد دا عازمكم كدي مرّات مرّات، تقولوا لينا هاكم بالواضح والنجيض

هي عزومة أبو خالد عزومة نصاح .. عزومة بوخا يلوي زى شيةالسنكيت ..

معليش أبو خالد .. إتكلمت كتير أعفي مننا ..
و أرقد عافية دايما

..

عبد الله إبراهيم الطاهر،..
إزيك يا عبد الله، وكيفنها أخبارك،..
عامل فيها بتتغزّل مش كدا، وجناتو وما وجناتو،
الكلام دا كلو أنا بوصلو بهنااك، وبتكب الجرسة،..
قلت لي البوريه الأزرق جاب ليكم معاهو الخير؟
مبروكين الخواجات ديل، والله مبروكين،
نحن قلنا خيرن دا داب دارفور، لكن أولاد جون ديل خيرن بعم،..
وبعدين ناساً حبوبين ومجاملين،
كان ما كدي كسرتنا دي لحصاناً ليهم بتتأكل؟
الله يخضّر ضرعاتن،
ما في خبر إنهم يدوروا في العكاليت ديل بندقية قريب؟
يسويها ربي،
ونشوفم في الأخبار ونشمت
كن بخير،..

أبو جهينة،..
تحياتي يا جميل،..
ما قصَّرت تب
وإن شاء الله في جديد كتابتك
إنت تتكلّم زي ما عايز،
ويوم تعمل العيزومة دي كلنا بنتلم عندك
ويضحك نهارك


...

محسن خالد

والله البت دى الا تعلمها عربى عشان تعرف قيمتها

فى أخت عزيزة سألتك البوست دا لزومو شنو ؟

اسع سيدنى دى ما فرّبت تبقى موناليزا

اسع موناليزا لو ما رسمها الزول دا كانت اتعرفت

اها البنية دى عندنا بذات المقام

مقام دافنشى لمحسن خالد ..

قبل متاكاة الباب

قول لينا جايى متين ؟
لأن الندوة اما يوم24 او 30 مارس وفقا لظروف سعادتكم ( من سعيد )..اوع تصحح دى كمان ..

..



معتصم الطاهر،..
أيوة البت دي "موناليزا" و"غرنيكا" و"حرية تقود الثوار" و"جبل سانت فيكتوار" تمام التمام،..
وأنا فاتح ليها مش البوست دا متحف، قلبي ذاتو متحف،
وجوا كل الناس البريدم يشوفوا رسمتها، طلعت رسمتها حِنَّة عرس بس،
حِنَّة زغاريدها رابطه وشايله من زمن إبليس وآدم بجرّبوا في طعم صحانة الشجر،..

بسم الله نجيك للدوحة،..
بس مستني فيزا بتاعة الزيارة منَّكم، وينها لا هسّع؟
المطلوب من مستندات بحوزة نادوس،..
كدي خابرو وأديني خبر،..


...

الحبيب
عساك طيب ومبسوط

Quote: الكلام دا كلو أنا بوصلو بهنااك، وبتكب الجرسة،..

حب الجمال ما بندسو
وسندي دي يا أخوي نضمها براهو ...

ومراهنات الواقع مع الخواجات ما معروف تودينا لي وين يا المبروك ...

وللنضم بواقي ...

Quote: مستنيك "ديش" في مهرجان الشارقة للفنون المسرحية،.. وليك عليّ، ترجاك الصحافة الإماراتية كلها،.. والقنوات الإعلامية كلها، والروادي، والوكالات.. أنا تور شين وكت أدور،..

ترقبوا حضورنا يوم الجمعة الموافق 17 مارس الجارى "وهو فعلا جارى" جارى وين ما عارفة ..اللخمة الضربوها فينى ناس المهرجان ..بس الله يغفر ليهم..

انا لمن اكون ملهخومة يا محسن بكون زى خالتى زينب لما ضفع الله يجى من بره جيعان...

ضفع الله ده ولدها الكبير والوحيد وهى عنصرية ضد البنات ..

اتخيلت منظر البنات لما ضفع الله يجى من بره جيعان؟؟

اها دى انا الليلة ...

لكن عزائى الوحيد انا قربت اشوفكم يا محسن..وناس الشارقة والامارات المتاخمة لها..ودى من تخمة طبعا ....

شكرا على الوعود ...حتى لو ما نفذتها ...شكرا عليها

...

عبد الله إبراهيم الطاهر،..
أوكي،
ما بتدسو بهنا، وألا بهناااك؟
علي كيفك،..

الخواجات ديل كدي باركوها وخلونا نضوق طعمن
اللصوص ديل عرفنا الفيهم،..

Tumadir،..
أوكي،
هلمي وما تهمّي،..
في رجاك،
تصلينا بالسلامة وبس


..

..

هسَّع دي مش صورة سوداني وبس؟

يا عمي وودز مان، ما قدرت أعرف، الماعجبك فيني شنو؟
أنت عربي،...
قلت ليهو أبداً والله ما عربي، أنا إفريقي،..
قال لي: لا، أنا وسندي إفريقيان، أما أنت فعربي،...
قلت له وماله العربي، لنفترض ذلك، هل ورثتم العنصرية عن عنصريّ أوربا،..
قال بكل اعتداد إفريقي أصيل: الإفريقية لإفريقي، وليست لدخلاء على إفريقيا،..
تمتمت في سري، يعني هسَّه إنت لو ما مُلوَّن وبتك ذاتها حلاوتها جابتها لأنها خاتفة قارتين، أم تلج وأم صيفاً ينجض الموز في مشوار وصولك من الجنينة للبيت، يعني لو كنت "زولو" وألا "بانتو" أو "هنانوا" أو "سوتو" نظيف وأصلي، كان تجدعني في الأطلسي دا، وألا كيف؟..
صمتنا شوية كدا، نظام قريفة لدعة السكون، تعبر ذكريات زي جمال في رهاب صحراء بعيد،...
ثم انتبهنا لبعض من جديد، ما هي لغة أمك؟ سألني،..
عربي،..
هل تجيد أي لغة إفريقية؟
قلت لا،..
استغرب،.. هو يتحدث ثلاث لغات.. لذا استفهمني Is it? ... وثقافة مجتمعك، أهي عربية؟
قلت عربية بالنسبة لمجتمعي الصغير وإن ليست خالصة، ومتداخلة ومتنوعة بالنسبة لثقافة مجتمع السودان الكبير،..
قال لي أنا أعرف يا مستر خالد، أنت عربي من الشمال، أنا أعرف
قلت له بكل جدية تمنيت أن تكون مقنعة:
والله ما عربي، ولو مكضبني كدي أمشي أسعل مني بشاشا،...


بعد شاكوش "أبو سندي" مش سندي، حلاتها هي "النونا" بنجيها، وزوغاتها معاي ببره، وعشاءاتنا،.

يا بشاشا ويا عروبيين بعد دا تقولوا نحن غير سودانيين –تبقوا مواهيم كلكم،..

ودمعي الغلب اللقّاط... أنا يا دمعي اتشتت،..
دمعي الجرى بلاني
والحبيب راح وخلاني
أنا يا دمعي اتشتت، ودمعي الغلب اللقاط أنا يا.. دمعي اتشتت
يا روح روحي أنا يا سيد روحي
وبشكي ليك أنا بجروحي
يا دمعي اتشتت

يا أخوانا نعيد السؤال بتاع "إدريس قريمان" الحَمَري، بطل رواية (المرور من أمام النشنكة)
"

Quote: الأنانيا الوسخ يقترح علينا الذهاب إلى السعودية". ابتسم الكمندان بفم شاحب ومتيِّبس. الجانب الآخر للنهر ليس بعيداً، ولكن نهر الجور يندفع من مرتفعات قريبة، فهو يمر من هنا في جِلدة صلف الجبال التي انسلخ عنها للتو. تياره المتعجل والمدوي، صارم وأسود كسير طاحونة لعين. في الوقت الذي ترمي فيه بمجداف يشتت هو مفعول عشرة مجاديف. هذا نهر يا كمندا أم بول شيطان!؟، يسأل إدريس مقهقهاً ويتابع: لو صدَّقت الأنانيا يا كمندان وذهبت إلى الحجاز ستطاردك "كشة" السعوديين كالصيد، وسيرسلونك إلى "بورسودان" في برميل فسيخ. أولاد أي بَرّ نحن يا ساري الليل، "جدة" أم "سواكن"؟ هؤلاء يعتبروننا ضيوفاً بلا حياء، وأولئك يعتبروننا إما مرتزقة أو حُجَّاج نيجريين. غايته، دخلنا في طيز الوزة

..

...

كاظم الزعيم

ما زلت لدى سؤالك لي يا ابن أُمي، (شكليش تلاقيلك رفيق؟)

Quote: تسبير الأرض بالطباشير 16 -7 -2005م (1) كاظم الزعيم ولد أجدع بكتير من التظنو فيهو،.. في قامة العشم وأطول شوية،.. أنا وهو كنَّا صغار، وأمَّاتنا كانوا زي كبابي الشاي، كملت لينا أم، وفضلت لينا واحدة،.. كاظم كان حبيب لبنات كتيرات، أقوليهو، يا ولد إنت منتهي خالص،.. يقول لي، وترقرق ضحكتو، أبداً يا محسن، دا هو الحب المبتدي خالص، كأنو بتزقلت عليّ،.. يخت الأورغ قدامو، نقول نعزف، يطير الكروان الكان جُوَّة الأورغ،.. وصورة آخر حبيبة لكاظم علي الجدار، تشق صدرها نافورة، ننزغم بعيد من حليب المطر،.. يقول هو: أورغن بدون قلب، ياخي الله ينعل تاريخك،.. ياخي أنا جعان،.. وعشاؤنا يكون كليلة أمس، والفول يقصِّر لدى نفس الموقع من الرغيفة،.. أوكي، هاك سَفَّة،.. ليه ح تبقى عشاء يعني؟ أهو بتطمم بطنك شوية،.. ليه ياخي؟ لأنو إحساس الشبع أصلاً بشبه الطُمام،.. يا خي بطِّل،... يغني: من جديد جيت تاني تكسر... صمتي بالنظرة الخجولة يا أمل عمري القبيل... يا سنين عامرات فصولها ماقدرت... أنساك من زمان... بس ضاعت أحلام الطفولة الحنين الجيتني بيهو جاني في لحظات ندم يا زمان ضيع صبانا وكل أشتات العشم من جديد جيت تاني كيف تبني فيني الانهدم بعد داك يقول لي: شفت "النخلي" دا خطر كيف؟ والأخطر "خالد الصحافة"! والأخطر منهم "مصطفى سيد أحمد" اللَّحنها! طيّب يا كاظم غَنِّي من كلماتك إنت؟ أبدأ أنا أدق على الطربيزة: تتا تا تراتا تا... تاتا تراتتا... الدنيا ياما تعلمّك،.. تتا،.. ياخي أقيف، أنا أشتر منك يا محسن ما قابلني،.. أضحك أنا،.. يدوزن هو الليل: بَكَّاني صمتك، وهَدَّ حيلي الانتظار،.. بَكَّاني ترحل في البعيد.. ولسه ما كمل الكلام بيناتنا.. ما طلع النهار والأورغن يعير ويعير، يشق جنائن وظلال ناس ورحراح موية وسواقي، والنخيل يزفزف هنا وهناك بتمرو،.. يزفزف النخيل بتمرو لامن تَطْعَم الريح، دا غنا شنو الطاعم دا؟ في 1997م... أُعتقلنا -أنا وهو ود. عمر السنوسي،.. يخرج هو قبلنا، ثم أتبعه أنا فعمر،.. أنا أطلع عيني ورمانة جداً، وبها خدش خطير، لأرسب في الجامعة،.. يهاجمني المثقفون –لمحاضرات سابقة ألقيتها عن سقوط المادية من خلال النسبية- في الوقت الذي تتشدد فيه حملات الاعتقال ضدي،.. أقوم بتمزيق ثلاث مجموعات من كتابتي، "ساندرا"، و"مسرحية قصيرة"، و"أطلس"، شعرت باليأس الذي جعل "مكسيم جوركي" يجرِّب الانتحار،.. فيهديني "كاظم الزعيم" قصيدة جميلة، من زمان كان يخلط أوراقي بأوراق عشيقاته، ربما لذلك يزيدني أرطالاً من الحب فوق ما أستحق،.. يكتب لي: لِسَّاك مجََّدع في العتامير الحريق أنساك مزعزع وصاري في طرفك طريق إلاك موزَّع شكليش تلاقيلك رفيق؟ في العتمة ضلك منكرب سابقك علي الشمس الطشيش ضهب المداخل والرمض وَهَن الخطيوات الدويش رهق احتمالك للمشي زامَل عذاب كونك تطيش صحرا قدامك... وراك حسرة تملالك عمر.. ويضيع عشم إنك تعيش شكليش تلاقيلك رفيق والضلمة فاتحالك سما العبرة سادالك طريق والجرح قدامك رمى قدرك تشيل.. ما فِضِل منَّك علي طول الطريق والسكة في عيونك عمى تسكن تفاصيلك تضيق تعرف ملامحك تسأما تتناطى للحرف الشليق والحزن في جوفك سما وخوفي عليك ... خوفي من غربة أو طولة مشي وانسكنت بلا وطن يدي المسافرين الهوية ويدي لى جسدك وشي وانتظرت براك قطار في سكة لا جابت غريب لا مرة صافَاها المشي يا ضل مساماتك عليك رقراق غباين واحتدام تحتك مشاويرك نجيع ومغموتة في كفك غمام لملم فضاءاتك هزيع واحزم مواعيدك ... قيام وشكليش تلاقيلك رفيق؟ الضلمة فاتحالك سما العَبْرَة سادالك طريق الجُرح قِدامك رمى وقدر تشيل ما فضل منَّك علي طول الطريق والسكّة في عيونك عمى تسكن تفاصيلك تضيق تعرف ملامحك تسأما تتهاوى في داخلك غريق والحزن في جوفك سما اليوم، وهو بأستراليا يراقب الهجمة على محسن خالد يزيدني أرطالاً أخرى، وألحاناً جديدة،.. كتب لي: حد ما غناك أدَّى العصافير وجهتا وشََّق المزامير بالنحيب ندّيك من فيض الأماني المفرطة وهجعة من زمن المغنين الحبيب نقسم معاك خبز الطريق .. شمس الأماني الفالتة والعِِرفة للزول الغريب حنشتهي الحزن المعاك… وضحكة صافية نحتحتا في صيف سنينك والمظنَّات القبيل داخراكا من آآآآخر شتا ما نحن ذات المُفْلِتين من ليل سفين ذات اللي كايسين الغُتا من ريح دروب… ومظنّات متخنجرة جايانا ما عارفين متى؟ نحن اللي واقفينلك… تعال فالدنيا ما خاتالنا بال عكس المشارق وجهتا يا صاحي ما شالك خيال الحق بصيرتك وألفتا على ضو نضيف ما تمشي في الشارع الختا من كونك هزمت الاحتمال مشيت …. شهِّيتني طعم الأغنيات السافرت خلفك تَرِح وأديتني من غيبتك سكات زمن الكلام الما سَمِح ما كنت يا صاحب تقول أو أقلّو إنك تقترح سفرا مسافاتو بتطول وانا راضي لو خطوك ملح لكن برااااااك غنيت بلاي خليتني لى حزنا بضوقو ملح ملح مشيت لوَّحت مد القدرة ما شالت إيديك رجعت نداءاتك … أسف ومتاح .. سبورة لى حصة قدر أشَّرت لكَمِّين قطار.. عندك المجهول .. وقف الكع وطوِّح في مداك تحتك الموية وقفاك.. سهم الكايسك هدف الكع ... سماك ما حمل الغيوم تتشابى لي محض الصدف كان تستريح من حزنك الرامي الفسيح ويسكت الجرح الفصيح ويطيب غناك... الكم …. نزف الكلمات هي حربنا ضد الحرب،.. (2) أقول لي كاظم ويقول ليّ،... العهود بيانتنا مرعيّة،.. خلاص عمرنا انملص من سنينو جلد ثعبان،.... وصنقر من جديد فوق دَكَّة ورق،... قريب إن شاء الله، تذهب إلى البحر فيصطحبك،.. بوسعك أن لا تذهب معه يا كاظم، ممكن تستغل انشغالو وتتعرَّف علي حقل، وتجلس لتسرِّح للقنقر شَعَرَاتو،.. يضحك هو، ويقول مزوِّغاً عينيه بعيداً كبورتريه جيفارا الشهير: قُرى كلها فترانة، وقاعدة، مستنية النهر يقول: محكمة،.. خلينا نطلع من هنا ياخ، أقول أنا،.. وأتاريها كانت الفُرْقة بتتاوق من ضِلَف الباب، ضِلَف القلوب، من كل فَرَق،.. بعد سنين (الفُرْقة) تضحك مننا، وننهرها اللديحة: يا بت روقي،.. (3) في يوم ما، الشمس فيه تكون قرييييبة، تمدلها إيدك، وتنفضها -"حَيْ"، تَشَّتني،.. أحلى القلم جيفارا،.. وأثوَر جيفارا القلم،.. هسي الليل دا بتقرطع كدا ساي يا كاظم؟ قصدك شنو يا مان؟ لا.. بس ما محتاج إسبرين نبلعو معاهو؟ ونضحك ويخجنا الضحك، زي مشينا.. وزي الأنا خجّيت العبّار جُوّه جردل المريسة،.. أقوليك، الساعة كم؟ الساعة تندمس في مكانك دا! ونص.. تمام مواعيد الطوارئ... وخيل السواري،... يا زول النوم رحمة،.. عارفو رحمة، لكن هو ذاتو النوم بكم كأس؟ حزين حزين، يا صديقي حزين، لدرجة تقوم تشتِّر حزنك بالشراب من المغارب للصباح.. والسَكَر يجَلِّي رأسك،.. ونبدأ نكضب علي الروح بالخيال، الدنيا الوهم دي تتلاصف من فَرَق القزاز،... ياخي المحشي دا خليهو يقاصد البيرة الباااردة دي،... وتضحكوا،.. يجاريني كاظم، في درب حندكة النفيسة بالغادي منها،... إنت عارفني ما بشرب، قول لي دي شية مبوِّخة،.. ماهو إنت ذاتك ما صاحبي، إنت صاحب روحي، وطاهر زيها،.. أيوة يا صاحب روحي، أنا بضرب نصك في العرقي، ولا تهم، ماهو القعدة كالآتي: الشية بالكانون، والعرقي بالجالون،.. وقاه قاه قاه،.. وكمان تتخيلوا مشيتكن في الشوارع، وتشوفوا البنات في مشيتن... وبدل طَق طَق.... كعب عالي البنات،... تسمعوا الصوت chـررر chـررر، كَبْ الشراب في الضلام،.. المزيد من الشراب، المزيد من إحالة الذات والواقع نحو العدم الوجودي، هرباً من العدم المعيش، المزيد من الشراب لتثوير الشارع بالسكارى،.. عسى ولعلَّ يموتون دون ألم أو يُفتح لهم باب القصر،.. أمَّا أوهامات كضابة يا كاظم! يا زول إنت مالك؟ أنا مالي كيف؟ النوم بقه غالي، والسكر أغلى منو، يعني ملوة الحلم تطلع بكم؟ ونضحك نص الليل،.. يا محسن إنت في الحلم بكم، وألا في جارنا "حسن" –بتاع الكارو- العرّس بالدين!.. وقاه قاه قاه، تتبعّج بطون الضحك الفاضية،... وووه، بالجد يا كاظم، ونضحك، ليه الجابرو شنو؟ أمانة عليك يا محسن دا سؤال، هسي الليل دا إنت وتلاتة حصين بتقطعوهو ساي كدي... بدون ريحة بنية وراكم وألا قدامكم، مش عندك مقطع يا محسن، بقول: المرأة ريح المضارب وسمعة القبيلة،.. أسألو أنا، أها ريح المضارب دي بكممممم؟ ونشيل الكوراك مع بعض،... أورررروووووووووووووك... دي غااااالية،.. أنسَ المضارب والفريق يا صاحبي، خلينا طاشين كدي،... طاشين "ملح"، كما يتشافَه ملونو الجزم بالأورنيش،.. طاشين "مجاناً"، كما كان يُكتب في دفتر التموين أيام الإنجليز،.. في يوم ما، الشمس فيه تكون قرييييبة، تمدلها إيدك، وتنفضها -"حَيْ"، تَشَّتني،.. أحلى القلم جيفارا،.. وأثوَر جيفارا القلم،.. (4) لغتك مجنونة يا كاظم وبتحنن كيف!؟ هسي تركيبة (شكليش) دي نجرتها كيف؟ أسمع يا كاظم طويل إنت وألا طويل الشعر؟ كدي أقيف علي حيلك وأتعابروا،... يضحك: بنطلع قَدَرا قَدَرا،.. أيووة، طيب ليه بتكتب لي أنا (تتناطى للحرف الشليق)، يعني أنا أقصر من قامة الكلام السمح،.. يقول هو، يا عوير، إنت محسنك الشايلو جواك دا أظنو ما صاحبك كويس، وإلا كان عرفته إنو محسن خالد الكلام البجي للناس في سُرَّتها دا، ما دايرو، داير كلام شمعدان ومدقوق في السقف، يتناطلوا مناطة، مرات تجيبو، ومرات تنقلب عليك طربيزة الطلوع، بس ما عمرك بتجيب أقلّ من دا،.. أضحك أنا، غايتو أكلتني حنك شاعر،.. أيووة يا مستهبل، أتمسكن، يقول هو،.. والله يا كاظم إنت أشطن مني، والدليل عدد البنات البريدوك،.. أبداً يا محسن البريدوك إنت أكتر، لكن إنت متوحش،... ياخي أنا طيُّوب، البنات هم المزاجن غريب، بت النشيشيبة ديك، الحلييوة، لو بتذكرها.. تأكلني حنك حبيبة، وإنت تاكلني حنك شاعر، ومحمد شمس الدين يأكلني حنك دجال، هسي أنا في أطيب مني؟ يقول لي، والله إنت عارف غير تقرأ وتكتب ما شايفلك أي نجاح، ويشيلنا الضحك.. منذ الطفولة وأنا أُخبئ قطاري في الدولاب،.. رحيلي الذي من البلاستيك، ألعب به كل يوم،.. كأنك يا كاظم لعبت معاي بقطار اللعبة دي،.. يقول: برضك يا قطار شايت في اتجاهين،.. أُكمل له: محطة تخرتنا من حضن ناس،.. ومحطة ترمينا في حضن أحباب تانين،.. يجيبني هو، هذه هي اللعبة، لكي تصبح أنشوطة الحنين المؤلم متدلية من يات ثقب في السماء،.. ويمشى رأسك مشنوقاً تحت السموات كلها،.. نقول: أو يا قطار تووووت، تقلع جذورك من حضن... تنسى ثمارك معلّقاً فوق جذع حبيبات كالشجر،.. أنت تنام وتذهب، ومن بعدك الحبيبة تُثمر طفلاً،.. عموماً الطفل يوثّق للرحيل لا للرجل،.. خلينا يا صاحبي كاظم نَسَبِّر الأرض بالطباشير، قصيدة منك، قصة مني، تنقلب الأرض سبُّورة،... أحبك لو تسبِّر الأرض بالطباشير،.. يضحك هو، والنيل نعمل فيهو شنو؟ ياخي النيل خليهو إن شاء الله يبقه أستاذ وألا ألفا، منعول أبوهو،.. أمممم، ياخي النيل غائب، ما تقطع فيهو، لا تأكل لحم أخيك ميتاً،...

..

..

Quote: بس اللمسة ديك أتاريها لمسة ميداس Midas يا تنقلب حجر بعديها،

دا الكنت كاتبو فوق، لأختنا شادية، زول واحد صححني مافي،
شادية طبعاً قابلتها في الدوحة من باب الصدف، وما ألطفها، بحضرة وفي استضافة "العجوز" أبو ساندرا، ما تشوفو كتابتها الحلوة دي، والله البامية المفروكة البتعملها خلوها ساي،


كان قصدي لمسة "ميدوزا"
دي هي البتقلب الملموس لحجر،
ميداس لمسته بتقلب الملموس لـ"ذهب"،..
اتذكرتها كيف؟ أمس شفت تمثال الميدوزا العلي رأسها الأفاعي، وفجأة بالليل خطر علي بالي إني استخدمتها قبل كدا، وما قدرت أتذكر إلا ميداس البي الإنجليزي دي، جيت جاري بجاي طوالي،..
والقصة واضح إنو منبعها ومنبع قصة ميداس واحد، (التشابه كبير) والفكرة قريبة من بعضها،
هسّع قصة روميو وجوليت مش منقولة بالحرف من قصة عراقية قديمة
من زمن نينوى البائدة،
قصة بيرام وتسبين
اللهو حبيبها بلقى منديلها وعليهو دم وحش، الوحش كان ماكل أرنب وألا حيوان
وشرب موية وقش قدمو في المنديل دا، حبيبها شاف المنديل افتكرها ماتت وانتحر طوالي، وهي بعد داك جات لقتو مات انتحرت برضو،..

يبدو إنو معاي حق لما أقول:
القصص مش مهمة، المهم هو بناء القصة، وبناء التفكير بداخل القصة،..
لأنو روميو وجوليت بلا شك من ناحية البناء أعظم وأهم من خام قصة قديمة وأولية جداً،..



..