أحب محسن خالد

الزول ده ممتاز خلاص.
أول حاجة ما بختشي من عدم العرفة,
تاني حاجة ما بقول عارف و هو ما عارف,
تالتا عندو الله الخاص بتاعو المسالم و الجميل ولو المسلمين كلهم زي محسن ولا جمهوريين, الإسلام ده دين ما بنفات
بعدين ما بلبس الكلام بدلة ويحلق ليهو. يعني بتكلم زي ما بتكلم مش زي المسلسلات السودانية( المسلسل السوداني بقولو فيه إخرس!). أو زي غالبية السودانيين , بتكلموا بي طريقة و بكتبوا بطريقة.
بعدين كتاب
و مر
هيع
والله مبسوط منو شديد خلاص.

**
قرأتُ قبل أيام كتابه الروائي "الحياة السرية للأشياء"، فخطر لي أن أقول لك "وأنا أيضاً يا فاضلابي..."
ومصدر المحبة هو أنه كاتب بإمتياز ، دينه الكتابة وإيماناته بها تشعُّ بيقين الثقة بالإنسان ...

أما حياته الإسفيرية هنا، فهي تسر البال وتطمئن القلب على مستقبل حياتنا على الأرض وفي الأسافير معاً...

لك تحياتي ، وتعالَ دائماً بكتاباتك وتصاويرك يا فاضلابي


ح.خ

انا عاجبني لانو

فنان جد
سوداني فعلا
و
قليل ادب





فـ




جدا والله

فاضلابي وحافظ خير

أشكارككما محبة هذا الشاب الموهوب. من جميل الصدف أنني أعالج الآن مقالا عن مجموعة قصصية لمحسن خالد ‘ أرجو أن يجد المقال طريقه إلى إحدى الصحف قريبا جدا. فن تكثيف المشهد عند محسن خالد خاصة لا يحوزها إلا كاتب موهوب. وأجمل من ذلك أنه يكتب بلغة خالية من المعاظلة والتكلف. يعجبني استخدامه للدارجة ، فإن به كثيرا من الإنطلاق والعفوية إلى درجة أنه قد يعطي في بعض الأحايين نتيحة معاكسة!

على الصعيد الشخصي التقيت محسن كثيرا جدا...لكن عبر الحرف والهاتف فقط..أي أنني لم أتشرف بلقائه وحها لوجه حتى الآن. نتحدث عبر الهاتف وكأننا نعرف بعضنا بعضا من سنين. شديد التهذيب وهو يتحدث إليك.

دا ولد بالحيل (سادي الفجة) كما نقول عندنا في غرب السودان -أي مالي مركزو ! وهو دون شك إضافة جادة لدفتر الرواية السودانية. حماه الله من مرض إسمه الغرور..أصيب به كثيرون فأودى بهم.

الشهادة لله

زول كتّاب جدا ومالك لناصية اللغة بشكل مدهش

له التحايا

ولك اخى الفاضلابى

..

حافظ خير،..
ممكن يكون طقش عينك هنا، إنو أوّل ما قرأتُه من هذا المكان بوست الكاتب الإسفيري،..
ومنتظر أسمع رأيك في الحياة السرية عبر عِدَّة الشغل،..
ويا ليت كل الناس مفيدين زيك،..

انطباع عنك:
بتأمّلك للأسافير.. كُتّابها، والكتابة فيها، بقيت عارف مواقيت الكتابة الصاح



...

..

طارق أبو عبيدة،..

إزيك



___________
انطباع عنك:
سمعناك كتير، وعرفناك في حِلَّة فوق دي،
لقينا روحنا مبسوطين منك، غناء وفهم

...

..

فضيلي جَمَّاع،..
أنا في انتظار هذه البشرى،

بمعرفتك فقط أُفاخر، فيا لحظي بكتابتك عني،
وأرجو أن نرى بعضنا قريباً،..
وجودك هنا يُعَلّمنا الله- الإنسان -الكتابة،..

لك كل الحب، يا شقيقنا في الحبر،

ـــــــــــــــ
انطباع عنك:
من أوّل لحظة نضمنا فيها، حسيت إنو خوّتنا من قديم،
كانت فوق رفّ، دليناها واستخدمناها فحسب


..

..

نادية عثمان،..
شكراً يا أميرة وأجمل الأمنيات لك،
والمودة
________
انطباع عنّك:
إنت زولة فرَاشة، تباري الرحيق من بيد لبيدر



..

الاخ الفادلا

ختونا فى اللسته بالله

وانا شــــــــــــــديد




ذي ما قال اخونا فضيلي "سادي الفجة"


تحياتي ليكم جميعا..

me too

وانا كمـــان واناكمــان وانا كمــان وانا كمـــان
وانا كمـــان واناكمــان وانا كمــان وانا كمـــان
وانا كمـــان واناكمــان وانا كمــان وانا كمـــان
وانا كمـــان واناكمــان وانا كمــان وانا كمـــان
وانا كمـــان واناكمــان وانا كمــان وانا كمـــان
وانا كمـــان واناكمــان وانا كمــان وانا كمـــان
وانا كمـــان واناكمــان وانا كمــان وانا كمـــان
وانا كمـــان واناكمــان وانا كمــان وانا كمـــان

Quote: ختونا فى اللسته بالله

كلنا في الهوي ... سوا

شهادتي في محسن مجروحة لكونه صديقي، لكني أحب كتاباته، فمحسن مبدع من طراز فريد فعلا. مبدع في كتابته، ومبدع في حياته، ومبدع في جنونه

سلامات
وعوافي
محسن خالد انسان جميل ..
وبتحبا والله يافاضلابي وواحد من اولاد الذين نحبهم .. كتًاب شديد وبيهبش (مثلثات) الكتابة المظلمة بي (حرفنة) حتي يفضحها بضوء معالجاته النافذة و(شفت) من الدرجة الاولي (مقرم) (مثقف) باتع ودي كلها معطيات تقود للمحبة والمحبة الشديدة يعني لما ماتقرا ليهو حاجة جديدة (بتخرم) وبتصاب بي (حكة) .. ماقريت ليهو غير في المنبر دا وطمعان شديد في اصدقائي الذين يملكون رواياته عشان يرسلوها لي ... ياريت وياريت .. علي العموم لكم المحبة جميعا كونكم كائنات تبعث البهجة في النفس والروح..
فدعني احبه معكم ..

..

النصري أمين،..
إزيك
ياخ البوست السمح داك خليتو مات ليه؟
زعلان منك أنا،..

انطباع عنك:
إنت زول ذكي ومؤدّب
أبقه ذاتك ختّنا في اللستة
وين بتختفي

..

..

د. نجاة محمود،..
متفنجرة معاي الأيام دي،.
إن شاء الله في جديد كتابتك

انطباع عنك:
إنت كاتبة حُرَّة، البشوفك في شكلة يستعجب،..
والبشوفك تتكلمي نقد، آخر رصانة وشكيمة عبارة، وذكاء من لظى
عارفة؟ أبداً قلمك ما بشبه قلم امرأة لا سودانية ولا غير سودانية
بتلمسي حاجات عارفاها إنها عبارة عن توقية الكورة لجلف عشان يشوتها جنسياً
إيماءة أو تلميحة عشان يحنّطك في علب الأنثى
بس إنت ولا بهمك، مبسوط منك شديد في الحتة دي
عشان بتهدم نظرية خطيرة في عقلية الرجل السوداني ونظرتو للمرأة
ليه الرجل السوداني بفتكر إنو لو قال لمرأة أنا ببوسك وألا بقرصك
وألا بعمل ليك كدا وكدا
إنها اتهانت؟ وليه ما بلاحظ في الأفلام إنو المرأة الخواجية –عادي- بتقول للرجل الخواجي: f.u.ck u

f.u.ck them … God bless u

عندك مواقف سياسية بكمية معقولة من المجاملة بقول إني ما فاهمها، وبأي حال ما بتعنيني، أي زول مخيّر في رقبتو، أنا بتكلّم عنك ككاتبة


..

..

عصام عبد الحفيظ،..
يا نورك وصباح الله في السواقي
أظنك آخر برطمان عسل، وقع عليه الولد الكسلان
ملوّن حريف، ومصوِّر جميل

_____________________________________________
انطباع عنك:
اكتشفتك جديد، ولساي بوزن في الزوم


...

..


saif basheer،..
يا زول صباح الخير عليك،
وعلي الملائكة الحلوين في الصورة ديل



انطباع عنك:
إنت ذاتك ختّنا في اللستة
يا قدّامي

..

..


AMNA MUKHTAR،..
شكرا يا أميرة


انطباع عنك:
بتذكريني كلامي في تيموليلت عن المساخة الراقية، المعطونة في اللباقة وبدبلوماسية ترسيم الحدود


...

..


Gafar Bashir،..
كيفك أب آمنة،..
اطارشتني في الصحابي لمن زهجت منك
بس لؤي أخوهو أداني تلفونو، ولو تموت ما بقسم ليك معاي

_______________________________________
انطباع عنك:
مادام بتعرف صحابي الصادق وصاحبك، يطلع بالميت كدا جدك عبد الخالق محجوب



...

..

خالد عويس،..
ياخ بلا انطباع عنك بلا استهبال علي خلق الله
أنا بعرفك عديل، بالشارع وبالدرب الدغري،
بنعمل فيها أولاد اشتاقوا للبلد ونمشي نفتش أكل سوداني
يا سلالام، حركات المغتربين ديك، والله ياخ مش أم رقيقة
حتى الكتاحة اشتقنا ليها،..
زمان الكلام دا لامن أسمعو من مغترب،
بقول بالله شوف الزول دا وشوف دجلو
بس يا خسارة طلع صاح
شكراً يا صديقي،


...

..

ود رملية،..
يا ود رفاعة الهوووووي، والهوى،
بهواك أنا، بمناسبة الهوى دي
المعطيات الإنت قلتها عن المحبّة دي، عجبتني،..
بس بشرط يكون الزول قلبو طاهر زيك،..
في ناس بالضبط بتكره علي الوزنة الذكرتها فوق دي



______________________________________________________
انطباع عنّك:
إنت زول بِشْر، مبسوط منك في حاجات كتيرة ما عارفها شنو


...

عليكم الله محسن خالد دا تحبوا ليهو شنو ؟

فوق الى حين حضور المجنى عليه !!!

ايوة أأي مجسن موهوب جد ، تحس انو المفردة المارقة منو ح تطرشق لأنو محملها أكتر من طاقتا ، يعني لو شرًحت الكلمة الواحدة جواها كلام ، وبدي الكلمة الدارجة الغبشة موسيقئ ولحن تخليها رقاصة ورقاشة زي بنات المدن ،
محسن دة (كراع) السودان في (و.ا.ط.ه) أدب الكون ، (العالمية) .
اها ياسيد البوست ، واللهي بنحبوا معاك ، (ده بعد اذنك طبعا).

له لغة يجيرك الله بس...

تتلبد ليها بين البوستات

محسن خالد زول بديع وجريء جُرأة العارف لا الوقِح. عايش بين حنايا اللغة وعايشة اللغة بين أصابعو، وعلى طرف لسانو. الموهبة الفريدة في مزج الدارجية بالفصحى والتمكن من كليهما موهبة أشهد إني ما شفتها في زول قَبْلو. شيخنا محسن جعل من المفردة الدارجية إحدى محسِّنات الكتابة وعجنها وأخرج منها مخلوق طيِّع، سهل الانقياد والبلع. خبير بَرْبَحة من الدرجة الأولى. وهنا بأمِّن على تحفظات أستاذنا فضيلي.
محسن مُحَصَّن من الغرور المَرَضي لأن النوع ده من الغرور بيصيب أصحاب المواعين الضيقة البتملاها مقالة في دورية أو ظهور في محفل أو حتى كتاب .. لكن هذا المحسن زول مواعينو واسعة وَساع تخليه يسخر من الغرور ذاتو. الزول ده أقرب للهمباتة والهمباتة ما بيصبيهم الغرور، بيصيبهم التـَّغـا .. والتغا خايل فوق الزول البيستاهل. يا زول أقدل وأتغا فوق صوبَك.
في راسي كلام كتير ما قادر أنضمو في جمل مفيدة.
ياخي انت تمسِّخ الكتابة ذاتها. عليك "البَـهْـلة" يا محسن.

محسن خالد ..الكاتب الفاضح؟؟


نحن لا نحبه.

محسن خالد الكاتب الفاضح الذى فضح الذات والذات التى تليها فى "الغماسة" ..بقلم مفتح ..وحريف؟؟

نحن لا نحبه بل نبجله ..

لأنه رفع راس الوعى ..وخلى المفاهيم "المعتته" تخجل من وجودها. وتقلع هدومها ..وتمشى عريانه فى طرقات الحقيقة ..مناطق محررة


.وتنفض "عتتها" فى "حتتتها"

شكرا فاضلابي للبوست

واسمحي لي تماضر باستعارة عبارتك:

Quote: نحن لا نحبه بل نبجله .. لأنه رفع راس الوعى ..وخلى المفاهيم "المعتته" تخجل من وجودها. وتقلع هدومها ..وتمشى عريانه فى طرقات الحقيقة ..مناطق محررة

تراجي.

..

Tumadir،...
تسلمي،..
يا فنّانة /مخرجة /كاتبة /ممثلة /مسرحية، إنت مره ضو،..
وجنينة وحوَّاشة بتاعة فنون،..


-------------------
انطباع عنَّك:
أتفنّني –فينا- زي ما عاوزة ولا يهمك،..
(قافلة فنونك تسير في عدلها، والكلاب تهوهو كما هو طبعها)


..

..

Tragie Mustafa،..
شكراً يا أختي الكبيرة،..

وكوني بخير،..


------------
انطباع عنّك:
مره فارسة وسودانية،
وتاني نعيدلك، شيلي صورتك دي من هنا
لأنو كلما أشوفها قلبي بفر، وبتذكرني أم سيندي،


...

Quote: محسن خالد زول بديع وجريء جُرأة العارف لا الوقِح. عايش بين حنايا اللغة وعايشة اللغة بين أصابعو، وعلى طرف لسانو. الموهبة الفريدة في مزج الدارجية بالفصحى والتمكن من كليهما موهبة أشهد إني ما شفتها في زول قَبْلو. شيخنا محسن جعل من المفردة الدارجية إحدى محسِّنات الكتابة وعجنها وأخرج منها مخلوق طيِّع، سهل الانقياد والبلع. خبير بَرْبَحة من الدرجة الأولى. وهنا بأمِّن على تحفظات أستاذنا فضيلي. محسن مُحَصَّن من الغرور المَرَضي لأن النوع ده من الغرور بيصيب أصحاب المواعين الضيقة البتملاها مقالة في دورية أو ظهور في محفل أو حتى كتاب .. لكن هذا المحسن زول مواعينو واسعة وَساع تخليه يسخر من الغرور ذاتو. الزول ده أقرب للهمباتة والهمباتة ما بيصبيهم الغرور، بيصيبهم التـَّغـا .. والتغا خايل فوق الزول البيستاهل. يا زول أقدل وأتغا فوق صوبَك. في راسي كلام كتير ما قادر أنضمو في جمل مفيدة. ياخي انت تمسِّخ الكتابة ذاتها. عليك "البَـهْـلة" يا محسن.

علي الطلاق ده أجمل وأبلغ تعليق أقرأه منذ تاسيس سودانيز أون لاين..
شنتير الله يديك العافية ويستر حالك في الدنيا والآخرة
والله هذه بلاغة ما بعدها بلاغة..
الحمد لله يا شنتير إنك وفرت علي كلام كتير كنت حأقولو في إخينا المبدع محسن خالد..
لكن ما أعتقد حأقدر أعلق بعد كده.. الزول ده أقرب للهمباتة والهمباتة ما بيصيبهم الغرور، بيصيبهم التغا.. والله يا شنتير صدقت في كل كلمة..
أنا ما حأتكلم عن محسن خالد ككاتب .. لأن الموضوع ده محسوم..
أول مرة أقرأ لمحسن خالد كنت شاعر إني أنا غليان كلام (لو قدرت أعبر عن الموقف
بصورة معبرة) ، ما مصدق عيوني من فرط الاندهاش ، وكنت بقرأ زي الأحوص ، أقرأ
سطر وأفط سطر، كجائع وجد نفسه في مائدة ملك كريم..
ما كنت مصدق إنو في كاتب سوداني شاب موجود بيننا مبدع إلى هذه الدرجة..
أنا ما عاوز أزيد عن محسن الكاتب لأنو كلامي حايكون لازم الفائدة..
لكن أكثر ما لفت انتباهي لمحسن الإنسان ، إنو انسان متواضع (ولو كان مغرور برضو
معذور).. محسن يهتم بالرد على كل المتداخلين معه، رغم أن هذا الشيء يأخذ
منه وقتاً كبيراً ، وحتى ردوده فيها بلاغة وفصاحة لا تقل عن رواياته..
أنا بعرف كاتب معانا في المنبر عندو رواية واحدة زي (بيضة الديك) لكنو انسان
متعالي ومغرور ، إذا تداخل معه مائة شخص في بوست من بوستاته لا يرد
إلا على أصدقائه منهم حتى لو كانوا تلاتة بس..
التحية لمحسن خالد الكاتب
والتحية لمحسن خالد الإنسان
والتحية لشنتير الرائع..

..

تيسير عووضة،...


مش كدا بالله؟
أنا قلت الظاهر فاضلابي دا أخد ليهو شاكوش مظبَّط في رأسو
قال يسدّى فيني، يكتب لي "بحبك" وإنت ولد "منتاز"، علي قول حبوبتي،.
ولما أجي أحبو، يزوغ ويخلي جلحاتي لشاكوش السداد،..


-------------------------------
انطباع عنّك:
ألذ ما فيك إنو أبوك صاحبي، وأمك دي خليها ساي،
ليها معزَّة البتولا بت الموفد
البت دي يا تماضر والله شرط كيف؟ نار الله الموقده
ولا ساعلة في سندي،.
لو ختت صورتها هني، بتجهجه الخلق دي كلها،..
قال متفلهمة علي الخُطّاب، قال، شديدة ومهندسة
وأبوها دنقلاوي سيد بلد، صحفي قديييم، قروشو كُتار، ولسانو سليط
لو ما كدا، كان بنجازف،..


..

..

نادية عثمان،..
أهو المجني عليه في الإسعاف،..
زمان كنت عامل قصة،
عربية بتكورك ويو ويو ويو عشان تسعف شجرة
شوية ملح، تراب فنجري، يجي ماشي بعندهم النيل، ويقول عوافي
اللله، تصير الدنيا طيبة ومُسْعَفة،..
شكراً ليك، وليكم كلكم،
علي الملح والتراب الفنجري، وعلي نيلكم الفردوسي


---------------------------
عارفة؟
يوم جيتي الإمارات كنت قاعد،..
أنا طبعاً في فهم الناس متفلهم، ودا كلو من كسل تلفوانتم بس
ما في زول وصل ميسي وما صاحبني، دا واقع
اتخيلتهم، أو اتخيلتك ح تقولي هالو، لأنو تلفوني علي البروفايل
مشيت كم محل كدا وجيت، قال لي بدري الياس إنك سافرتي
زعلت شوية، بس لما سألتو حلوة زي صورتها وألا كيف؟
قال أيوة، قلت ليهو ما تنفعن عيونك،..
دا اعتذار يا شقيقتي في الحبر،..

..

..


mutwakil toum،..
لي فترة فاكرك، واتلَفَّت هنا وهناك، كان ألمح ليك شغل يطمنّا عليك



------------------
انطباع عنَّك:
إنت كاتب ذكي وجميل، لا لُجاجة
وفي بعض الأمور الما بفهمها إنت واحد من الناس
البنتظر أقرأ رأيهم عشان أستدل
لأنو الناقد في رأسك مدوّر 100 ساعة في اليوم الواحد
ودا الشيء البفتقر ليهو الإنسان السوداني في العموم



...

..

القلب النابض،..

تحياتي، وما أجملك
وكوني بخير، أبداً بخير،..


-------------------------
انطباع عنّك:
عارفة؟ أنا محتار فيك، إنت ذكية ومفتّحة في إدراكك للكتابة مافي اتنين تلاتة
لكن من صحوبيتك لبت الأحفاد، واهتماماتك الدينية، "بعضها في رأيي غير مدروس جيداً"،..
حكمي دا بناءً على إمكاناتك نفسها، يعني إمكانات مع قضايا يصعب الفصل فيها،
دي مفروض تجوط للزول رأسو، حسب فهمي، وتخليهو ما يقدر يستوعب محسن خالد بالمرة،
ولا يقبلو حتى،..
غايتو دا لغز بالنسبة لي،...
مَرَّات بقول البت دي متدينة علي طريقتي نفسها، طريقة مش مرنة، أبداً، بل مع مطلق الحرية
انطباع محب جداً جداً،..

...

..


Shinteer،..
ود أشيقر،
يمين أديتني من الماهلة تب، بقلب ممهول، وكف مبهولة،..


---------------------------------
انطباع عنّك:
إنت وأنا عندنا قصة بورا الكواليس مدوّرة،
حول الحكمة الشعبية وقوتها وجمالها الخاص والخالص،
شخصياً مؤمن دون ريب إنك عُمدة الناحية دي،..
أنا مستغرب، الناس دي ليه ما وقفت وقفة ناصحة قدّام كتابتك
يمكن لأنَّك مُقَلّ وضنين، وعندك شعانين أخرى أنا خابرها،..
بس صَدَّقني، أوّل ما عملت معاي مداخلة اتنين، قلت "أمسك"، قلم فيلسوف


...

هيع

ابشر يا محسن

جاتك المحبة مبهولة

خم وصر

واقدل فوق عديلك

وتش عين الضلام بالضو

وزي ما قال الهمباتي شانتير

Quote: والتغا خايل فوق الزول البيستاهل. يا زول أقدل وأتغا فوق صوبَك

انا ايضا احبه
محسن اضافة نوعية مميزة للرواية السودانية .

احمد داود NZ

فاضلابي
سلام يا زول

كلامك سمين و ثمين في الزول دة.

و كما قال صديقي القديم ال مقاطعنا ( شنتير ) :

Quote: محسن مُحَصَّن من الغرور المَرَضي لأن النوع ده من الغرور بيصيب أصحاب المواعين الضيقة البتملاها مقالة في دورية أو ظهور في محفل أو حتى كتاب .. لكن هذا المحسن زول مواعينو واسعة وَساع تخليه يسخر من الغرور ذاتو. الزول ده أقرب للهمباتة والهمباتة ما بيصبيهم الغرور، بيصيبهم التـَّغـا .. والتغا خايل فوق الزول البيستاهل. يا زول أقدل وأتغا فوق صوبَك. في راسي كلام كتير ما قادر أنضمو في جمل مفيدة. ياخي انت تمسِّخ الكتابة ذاتها. عليك "البَـهْـلة" يا محسن.

شنتير : إنت طيب ؟

دمتم

يطيبن أيامك وأعمالك يا أبا جهينة. أنا طيب ومبسوط الحمد لله.
يا زول أقاطعكم كيف؟ أبداً وحياتك ما ناسيك .. بس منذ مدة بقيت بتاوِق بالشِّقوق وبَكتفي بالمتاوقة.
تسلم يا زول يا ممهول ورايق .. ودام بهاك.

..



ahmed haneen،..
أبشر يازول، والريشة الريشة


--------------
انطباع عنّك:
زولاً ضو، مما قلت هالو، عرفتك
أحلى ما فيك البساطة، التقعّر ما دربك ولا صنعتك
بدون مناسبة كدا بقول ليك،..
مسألة تترك أثر في زول من خلال التلفون بس،
دي موهبة، أبقى عليها عشرة لامن أجيك بالدرب


..

..


Ahmed Daoud،..
تحياتي يا أحمد،..
ولك أشرق ما في المودة من نهار


----------------------
انطباع عنك:
كن منقّباً كما أنت، وباحثاً عن رَوْح الله في الكلم
أو كما قيل في إحداثيات الإنسان:
يا ابن آدم
عِش أبداً كمعول
يلهث كي يمدَّ نفسَه للعمق

..


...

..

هشام المُجَمَّر،..
آه من منقار قدّوم أحمر، وتحنانو،..
كل ما دسينا منو قلوبنا ينقد ينقد، بالمواجع والسهر


----------------
انطباع عنّك:
أبقه أدينا تلفون، مشتاقين نسمعك..
السكات ما ينفعك،

...

..


أبو جهينة،..
كن بخير،..
يا وسيم الروح


---------------
انطباع عنّك:
واصل القص وحاول تحشدو بصدد فكرة،
نشر أو أي شيء تاني، خلي الفكرة دي في بالك


..

بختك يا محسن
اها شوف قدوم احمر كراعها خدره كيف
المحبة جات تفتشك وما لاقياك

ننضم للركب
فى الانتظار

محسن المجنون ، ممتلئ بالجمال ..
وطبعا في ناس كتار ما بيحبوا الجمال ...
إن شاء الله أي زول ما بيحب محسن ينشق عديييييل كده ..

تحبو ولا كترخيرك ورغم انفك وغصبا عنك وعني وعنكم وعنهن لانه الود الداهيه الاسمو محسن ربنا حباهو بحب الناس

respect to Mohsin Khalid

he is one of the greatest writers

we are lucky to have him in the board

may he be well and safe

..

أوووه
ولا حولاااا من قلوبكم،..
لامن والله خجلت أدخل البورد من أصلو،..
كتبت لصاحب معاي هنا "قلبي" وقلب هذا البوست،..
إني بخجل،..
والله أنا زول بتخجّلني السماحة،.
وقلت ليهو، تلقاني من النوع البجي لناس في محض زيارة،
ومعه من الخجل والاختشاء كأنو في مهمة خاطب لبنتهم،.
يزحزح ويمل وينحك، ما يعرف كباية العصير يمسكها من وين
ويحس دائماً في حاجة لاصقة ليهو في وشو أو خشمو،
وما تنحت قدر ما يحتّها
ولامن يمشي منهم، ما يكون أكّد ملامح أي زول فيهم،..
بس من طولة الدنقيره الخافتة،
يطلع مذاكر وحافظ كل نعلات الناس
وبإحساس، إنهم –كلهم- أسمى منو،
وإنو هو لا يساوي أمامهم إلا صداقة أحذيتهم
طيّب اللهُ خاطركم،
وأبلَغ بكم ما ترجون وتؤمّلون

فاضلابي،
سيد هذا الدَّبكر من الحب،..
أمّنا الكتابة وبس، يا شقيقنا في الحبر


...

..

ود قاسم،..
يا عنب جناين البورد،..
الجمال لا يحتمله حيز ليحلّ،..
الجمال ما يُنير،..
لروح مدىً من الشجر يتنفّس،..
للخالص من جمال الحق

--------------------
انطباع عنّك:
ياكا محطة سماح نوزن عليها روادي القلوب
بالليل نلتقطك زي ترتيل قرآن، أو صوت فيروزي
ونفرح


...

..

محمد الأمين محمد،..
يا صديقنا في الغار،..
اتوحشناك، آسيدي،..


-----------------
انطباع عنَّك وشواريب أخرى:
إنت زول جميل، وفنجري،
وكلامك صاح، في واحد بهناك قال محسن دا شنو البخافو منو،..
والله حزنت، يعني هسّع نداءات يا محسن يا محسن يا محسن دي قايلها خوف!
في زول خايف ليهو من زول؟
من الابتدائي كانت بتحبني أستاذة نضيييفة وجايانا من شندي،..
هسع بعد الوعى، ولامن أتذكرها،
ما كان في نظرتها ولا ونستها الخاصة معاي أي شيء مخلول
ولا أساءت لي كطفل،
بس ياها حكمة مما بديت تتراد، وين تمش تنحب،..
شكراً لله قبلك،..
وشكراً ليك وأنا ذاتي بحبك


..

..


hala alahmadi،..
شكراً يا إنسانة جميلة وفارسة إنت،..
بنشتاق ليك لما تغيبي،..


-----------
انطباع عنَّك:
خطك في البورد موزون جداً جداً، لا يضاهيه إلا كمال عبّاس
أعني في استقامته والتزامه


...

فاضلابي
والحبيبين
أنا حاجز معاكم حُبُّكانة
بجيكم بكرة
أحب حنانكم زاتو.

Quote: بس من طولة الدنقيره الخافتة، يطلع مذاكر وحافظ كل نعلات الناس وبإحساس، إنهم –كلهم- أسمى منو، وإنو هو لا يساوي أمامهم إلا صداقة أحذيتهم طيّب اللهُ خاطركم،

Therefore I respect you

Thanks Fadlabi

سلامات يا فاضلابي،

أفاد محسن خالد أنَّه:

Quote: ما يعرف كباية العصير يمسكها من وين

هسِّي في ذِمَّتك كتابتك دي كتابة زول ما بعرف يمسك كباية العصير من وين؟! والبجلفقو في الكتابة ويزلقهم الجلفقوهو يوقعهم علي قداديمهم ديل نقول عليهم شنو؟ ما بفرزو كباية العصير من القصير؟!

أكان كدي أسقي الناس ديل بالجك...ما تخاف عليهم شرفانين شرفاً يخليهم يبوِّزو من الزير.

تحيَّاتي لهم ولك.

أنا لا أحب محسن






















بل

أعشقه

محسن انا لمن جيت الامارات انت كنت وين ؟!!

..

Ishraga Mustafa،..
وبدوري أحترمكم، وأعزكم،..
ولك أجمل الأمنيات يا سيدتي،.


-----------
انبطاع عنّك:
أنت سيدة مكافحة لأجل نساء بلدك،..
وأتمنى أن تُوفّقي في كل ما تؤمّلين ويؤمّلن فيه


..

..


Adil Al Badawi،..
عارفك ما بتصدّق،..
بس إن بقينا حيين بتشوف،..


------------------------
انطباع عنّك:
غايتو انطباعي فيك بكونك قارئاً ممتازاً لوليم باتلر ييتس، طلع صحيح
بعدين أنا شايف إنك بتشبه ود أشيقر دا كتير، وتنفعو تكونوا أصحاب
أبالسة متدسيين، وراء لطف، كيف كيف ما عارف


...

..


أبو ذر بابكر،..
ياخي ما إنت عارف قلبنا، وزرتو مرات ومرات،..
دائماً عندك أوضة مفرّشة جوانا،..
ومراوحها تهفهف، ما قاعدين نقفلها تب، دائماً نقول هسع بجي

-----------------------------------
انطباع عنَّك:
كنت راسمك إزيرق زيي كدا،
بس الصورة دي ورتني لأي مدى بتشبه أسامة معاوية
حكمتو جميلة وبالغة، لأنك مأدّب زي أسامة،
حرام كان تطلع بتشبه شيطان من حلّتنا،


..

الفاضلابى العزيز


اجمل ما قراته فى هذا الاسفيرى لهذا البطل الاسمر الذى نقش اسمه


فى دواخلى، وظللنا نزكره كلما اجتمعنا مع عضو فى البوست ، واخذ منا


مساحه جيده فى افراح بوردات الرياض فله الف تحيه ونتمنى ان لا يبخل


علينا بالدرر 0


ومن خلالك اامل ان نسمع عن البطل الاخر عثمان محمد صالح فهم اثنين لا


ثالث لهم فى هذا البورد وفقهم الله قدر ما اسعدونا بسطورهم0


تحياتــــــــــــــــى


ســـــــــــــــــــيد

الأخ / الفاضلابي
رائع هذا البوست كمحسن خالد وأنت. ودونك معلقيه ومتابعيه من الزوار

هذا الرجل الرائع الروائي (محسن خالد) لديه جمال وملكة كتابة يعجز يراعي المتواضع أن يوصفه! وهو أضافة لذلك هرم من أهرام هذا المجال في بلادنا وبلا شك. وكتاباته:
1/ تنقلك الى عالم مليء بالجمال والروعه...
2/ وبها حسن وفن تعبير وإظهار أبعاد العبارات القريبة والبعيدة...
3/ وصراحة هي قلب نابض لكتاباته...
4/ وينقل فكرك الى مدي بعيد اوسع...
5/ ويحرك مكامن الجمال في دواخل قرائه...
6/ وأخيرا بها التشويق الممتع...

وهذا يسير اليسير مع التواضع عنهو وكتاباته. وهذا يعني - نحبه ونعشقه وسنواصل حبه،،،،

فكن أنت وهو وكل من ضرب حرفا في هذا البوست بكل خير،،،

أخوك: هشام

استثنائي و حميم و

زعولجي (!!!! مش؟)

so so so free
شيء أحسده عليه
كما أعرف انه يحسدني على عقدي الكتيييرة (ليس أجمل من أن تعقد حياتك)

حر!!! أعتقد أن هذا أكثر ما يلفت النظر فيه
لاأعني بالحرية المعنى الذي قد يخطر للبعض...(استخدامه الحر للتعابير و الكلمات)
أعني أنه يكتب دون أن يرى أحد أمامه أو يفكر في أحد وراءه
بمعنى اخر
يكتب دون tradition و لا يكتب "ما يطلبه الجمهور" رغم أني أخاف عليه من الأخيرة...لا ألمح بأنه مستلب، لكن كل كاتب عرضة لأن يدعه الاخرون للكتابة بنمط محدد، رغم رغبته في التغيير....على الأقل أعرف أن هذا كابوسي الذي يزعجني على الدوام

صريح بشكل فظيع!!!! هل هو صادق؟ هل أي منا كذلك؟
الصدق و الصراحة ليسا مترادفين

لا أعرف الترجمة بالعربي لكنه حقيقية caring و دافئ
يقبل النقد بروح طيبة ومرحة تشجعك على المزيد ...أعني بروح طيبة أنه لا ينكسر لك وكمان لا يشعرك بسخافتك

و أحيانا بيحنني ما عارفة ليه؟

للأسف..... مجامل
و للأسف أكتر لا يجيد المجاملة ...يعني بتكون ظاهرة فيهو الكضبة

أما حكاية حب وما حب...بلاش كلام فارغ...أبونا قاعد يتصفح الحتة دي

السلام لمحسن وزوار محسن . . . وبتتذكر يا محسن ؟؟؟

..

سيد محمد أحمد سيدنا،..
يا زول يضحك نهارك،..
ولك من الأمنيات أجملها،..
شكراً على محبتك الخاصة لي ولصديقي عثمان محمد صالح،..


---------------------
انطباع عنَّك:
إنت زول حَبَّاب وراقي،...
عارف؟ نحن ما اتنين بس، قصدي أنا وأخوي عثمان،
إنت بس اخترتلك مجنونين عجبوك،..
والله المحل دا من حلاتو التجاني الماحي بس،..
كدي أديها فتيشه تاني،..



..

..


Hisham Ibrahim،..
شكراً يا رجل،..
وكن بخير أبداً،..
وأسعدتني هذه المحبَّة بتبريراتها،..
وكلماتك الفنجرية بحقي


-----------------------------
انطباع عنَّك:
أنا أيضاً أعشقكم، ولي فيكم أمل
المحبّة لك، وكما قلت أنت لكل من ضرب هنا بحرف،..



...

..

Maysoon Nigoumi،..
حردنجي درجة واحد؟ مش كدا
أوكي يا شيطون النجومي،..
الله يدي صاحبي عصمت الدسيس الصبر وطولة البال،..

"ويكفيهو شر عُقَدك"،..

فعلاً أنا رخمة في المجاملات،...

-----------------------
انطباع عنَّك:
كاتبة ممتازة والله بدون غلاط أو لعب،..
بتدِّعي البساطة، بينما أنت ماكرة من بنات العمارات بامتياز

"بس، وكيتاً عليك"،..


...

..


tariq،..
والسلام ليك وعليك،..
وكن بخير، ورائقاً


----------------------
انطباع عنَّك:
غلبتني، شففني،...
ما متذكر
وحياة -لأنها عايشة جواي- البتولا بت الموفد ما متذكر

...

الشباب جميعاً
دامت محبتكم
تناول نصوص محسن خالد –كروائي وشاعر- في مداخلة واحدة حا يكون مخل عشان كدا حا أتكلم عن تلاتة محاور رئيسية في فكرة النص عند محسن خالد وأخلي البقية لمداخلة أخرى يتوفر لي قبلها زمن كاف أقدر أعيد فيه قراءة بعض النصوص مرة تانية وعلى ضوئها أكون كونت فكرة متكاملة بعض الشيء.
طيب..
المحور الأول:
الثيمة الأساسية للنص عند محسن خالد.
المحور الثاني:
استخدام تكنيك الـ Short Shot السينمائي لتوظيف الزمن –بمستوياته الثلاث- في نصوص محسن خالد، وانتصاب هذه المستويات (ماضي-حاضر-مستقبل) بالتناوب كـ Layers متناغمة دون أن يلقي مستوً بظلاله على المستويين الأخيرين، وبالتالي دون أن يخلق ذلك لدى القارئ إنتقالات فجائية تؤثر على تواصله مع شخوص النص، كما هي الفكرة عند استخدام ذات التكنيك سينمائياً.
المحور الثالث:
الجنس في نصوص محسن خالد:
كـ جدلية بين الميثولوجي والعلمي من ناحية
وبين الراهن والذاكرة من ناحية أخرى
وبين النوستالجيا والأماني من ناحية أخيرة،
و كـ مفردة خارج إطار اللغة المكتوبة أصلاً.







إنعل أبو الحديد زاتو!!
لقيتني كيف في النقد يا فاضلابي ؟
عليك الله الواحد لو لقى ليهو جاكيت جلد أسود وفرخ قطا عديم شغله ما كان ود الخواض دا شال وردتو دي ومشى الأوف لاين!!
طيب.. نجي للجد..
الناس بتقرا الرواية والشعر والـ.... ليه؟
طيب.. أنا أجاوب عن نفسي..
أولاً أنا الكتب القريتا حياتي كلها ما بتفوت ليها العشرين كتاب من شعر لي رواية!!
الحاصل إنو أنا جربت الخمر زمان وتبت لكن قعد أشتهي نشوتا دي كتير عشان كدا فكرت في بدائل ولقيتا في حاجات كتيرة، يعني مثلاً لما رونالدينهو يعمل حركات بالكورة دي فيها نشوة ما طبيعية وحاجات تانية لكن ثبت لي إنو قدرة الشاعرة على التصوير كحولها مركّز أها بقيت ساكي حكاية الصور الشعرية دي..
ومحسن خالد دا من ناحية الصور الشعرية دي زيو وزي أي بار
يعني مثلاً هو عندو القدرة اللغوية التخليهو يستهلك رواية كاملة في توصيف نملة!!
لكن بدل ما يوصف تيموليلت ويقول فيها كذ وكذا وعاملة زي كذا وكذا قال ليها:
"أورِّث عيوني الطير يطيرك شوف بعد ما أموت!"
ياخ أحب الشاعر البِعزِم خيالي قهوة على النيل وقبل ما الجرسون يجيب الطلب يكون هو وخيالي مرقوها في المسيسبي وجو راجعين معاهم هندي كدوسو جاهز على الولعة..
أها البيت دا لما قريتو أول حاجة مسكني أبو الشهيق الليل كلو وأسبوع كامل ما عايز يفك من راسي لحد ما كست ليهو أم فِت فِت.
من ناحية تانية الزول دا متواضع لدرجة تحير!! يعني مثلاً لا يمكن يتداخل معاهو زول في بوست وما يرد عليهو.. ولما جا سودانيز أون لاين كلغوي انزعج جداً من الغلطات الإملائية والنحوية في كتابة الناس لكن عشان متواضع ما حب يسك غلط الناس من بوست لبوست ويجرح شعورهم بكل تواضع فتح بوست سماه (إصلاح الكتابة في المنبر).. بعدين أول بوست فتحو كان بوست (تيموليلت) من أول سطر فوقو قدحو سبق السلام لما قال: " هاهنا، سنمحو ونكتب سيرة تيموليلت، في رهان مع محو وكتابة سيرتي، وسأكف وإيّاكم عن الخوض في حالها وحالي،... " سنكتب (كلنا) ونمحو (كلنا) وسأكف (وإياكم) ودي ما بعملا إلا زول مجواد ومتواضع وواثق من نفسو.. بعدين غالباً عندنا المثقف لما يلقاك ما بتعرف التناص والديالكتيك تاني سلام الله ما بيديك ليهو وزولنا دا عكس كدا تماماً.
طيب ممكن يجي زول يقول ياخ دا زول متطنقِّع وقعد يقول أنا كتير!!
ببساطة طنقعتو دي فالسو والأصيل فيهو التواضع وعشان تواضعو زايد بيحاول يغطيهو بالطنقعة المصطنعة دي
وبس.
أها يا فاضلابي زول زي دا ما عندك معاهو غير حل من إتنين يا تحبه يا تعلقو فوق شجرة..
وأنا بصراحة متفاسل بيهو على الشدر كلو.
يا شباب معليش على العربي الكتير والركاكة ديل لكن زي ما بقول شيخي دي ياها بصارتي مع الكتابة وناس تناص وتشيوء ديل والله لي الليلة ما بفرزن وحبيت اعبر معاكم عن محبتي للرجل الضو دا.

..

محمد السر،..

ما عارف أقول ليك شنو! غير إنو كلامك دا والله بكّاني وبس،..


...

Quote: ما عارف أقول ليك شنو! غير إنو كلامك دا والله بكّاني وبس،..

وشابكنا أنا تور شين..
أنا حضير الكتائب..
أحي أنا..
هيييع أنا الببكي تور شين
هيييع أنا السكتَّ أبو كلام
أها الليلة بتمشي مني وين؟
تتذكر يا موفد في بوست تيموليلت.. إنت كنت لما ترد على سموأل أبو سن بتكتب ليهو اسمو زي ما هو كاتبو بالإنجليزي (كوبي أند بيست) Samual وأنا جيت تداخلت معاه وكتبت سموأل كدا: (سمؤال) وياها سموأل البعرفا.. إنت عشان تصلحني من غير ما تحسسني قمت في المرأة التانية ما شلت إسم سموأل زي العادة (كوبي أند بيست) لا.. جيت كتبتو كدا (سموأل)!!
يا مان نحن ننقشا وهي طايرة بس بيخونا التعبير..
لغاية ما يجي زول جميل زي الود فاضلابي.
ويضحك نهارك يا زول حي.

..

محمد السر،..
"لو ما عارفك بتنقشها بتاعة "سموأل" دي، ما كان دردقتها ليك"،..

إنت قايل الببكي غير ناس تور شين ديل منو؟
البكا دا ما حَسَسَ، وشفاف
عندنا جِدَّنا اسمو ود الأحمير،..
الزول دا ختري خلاص في المضاربَة والصَرِف وعكازي وعُكازك،..
النوع الكان حجزوهو من خصيمو، بسل خوستو وبجرّح جسمو داك،
ويتكتّح بالتراب زي جاموس..
إلا شوف الزول دا كيف؟
لو أي واحدة من بنات الفريق.. بناتو، بنات أخوانو..
بنات أي زول، بدون فرز، اتعسّرت ولادتها ساي،..
تلقاهو لافح توبو ويبكي، يمشي ويجي جنب الباب ببره،..
يا فلان جبتَ العربية، جيبو الدكتور، سوا داك باصرو داك،
يا فلانة، أدخلي شوفي البنت انحلَّت،..
وليداتها الصغار أكلو، شوفيهم، إبقى متعوجين،
لو البت دي ما انحلّت أصلو ما يقعد في الجابرة دي،..
لا يرتاح ولا يريّح زول،..

لاحظ الزول دا من أفرس الجعليين،
بس ما بخجل من ولادة النسوان وجنس المواضيع البتخجّل أي جعلي دي،..
(ود الأحمير) دا عندو وعي إدراكي،..
الفَراسَة بدربها، والحنان علي الإنسان ككائن يستحق التكريم بدربو،..
لامن مات ما مدّ يدو علي مره، ولا اتساهل مع زول مدَّ يدو علي مره


ألدوس هكسلي، في مدينتو الفاضلة "الجزيرة" بقول إنو عمر "الرجل" ناقص، لو ما شِهِد
حالة وفاة، وكمان حالة ولادة،..

لامن هاشم محمد خالد، ودا جَرّاح سوداني قريبي في محمد خالد دا،
كان شَغّال في مدينة دوكا أنا زرتو وأصريّت أحضر حالة ولادة، الموت شفتو كتير، بس
الولادة لا، بس ما قدرت، صادتني خجلة وخوفه معاً،..

لكن لو اتزوجت لا بد أشهد المسألة دي، كنت مخطّط لحسناء لكن طرشقت،..
الحاجة دي بتخلي الإنسان انظر للمرأة، مش كأم ليهو وبس، أبداً، بل كأم للوجود نفسه،..


..


...

أحرَّ قلباهُ ممَّن قلبُه شَيمُ
ومَن بجسمي وحالي عند سقمُ
ما لي أكتِّمُ حبَّاً قد برى جسدي
وتدعي حب سيف الدولة الأمم
إن كان يجمعنا حب لغرته
فليت أنا بقدر الحب نقتسم









دعونا نقتسم محبة هذا الرجل.. أعتقد أنها تكفي لذلك

FAD of

تتذكر الاسم ده؟

محسن ده شفاااف ... وبفصل الحاجات بطريقة عجيبة .. ما لاقيتو لكن سمعت الصادق الرضي بحكي عنو

وقريتو هنا هناك .. وبالجد بحتاج لدعمك المعنوي ده










النقر يا فاضلابي

..


nashaat elemam،..
يا ولدي الوسطاني، بتغيب وين إنت؟
عملت فيها صحفي كبير وألا شنو؟


---------------------
انطباع عنّك:
إنك ولدي مهما تبقه كبير


...

..


Khallo،..
تحياتي، وكن بخير،..


------------------
انطباع عنّك:
مادام بتسمع الصادق فإنت حبيبنا،..
الصادق الرضي دا خلو بالكم منو،..


...

محسن خالد،،، الفن والابداع والادب يجرى فى عروقة
ويجبرك ان تحبة

-----------------------
انطباع عنك

انت من زمن قادم ، اخطات الميعاد

معاوية الطيب

فاضلابي
ازيك وشكراً ليك إنك قلتها نيابة عننا.
الصادق

محسن خالد


كاتب مبدع


وانسان..............

..


Mouawia El Tayeb،..
شكراً يا رجل،..
دي محبَّة الدوحة قبل ما نوصلها،..

-------------------
انطباع عنَّّك:
بجيك وبنشوف،
مبدئياً شكلك الزول الما بنوم لو ما عمل سمنار وألا منتدى



...

..

الصادق إسماعيل،..
تحياتي يا صديقنا في الغار،..
وكيفنو السقطيب بهناك؟


-------------------
انطباع عنَّك:
داسي ليك زرزرة، وينك إنت؟ اشتقت لصوتك


..

..


إنعام عبد الحفيظ،..
إنت ذاتك مبدعة، وكتّر خيرك
يا سودانية


-----------------------
انطباع عنَّك:
بتمشي بكرعين روحك داخل البورد

...

Quote: نار الله الموقده ولا ساعلة في سندي،. لو ختت صورتها هني، بتجهجه الخلق دي كلها

وانتا وكت هي سمحة كده الممرقك من حوش الدناقلة شنو يا الغايب ومارقا لينا في واحدة امها بتشبه تراجي..

ياكايد المحن ..وشنو كده ماعارف

يافاضلابى

سلام

انت عارف فى معرض الدوحة الاخير للكتاب ...كل يوم

بجى المعرض وباخد زمن ماشوية قدام روايات

محسن خالد وخالد عويس وعماد البليك ..انت عارف

كانت ماسكانى (ام فريحانة ) ليه ماعارف ..اقلب

الكتب واركز مع الناس البتجى تشوفها وكنت

انتظر تعليقاتهم بعد التصفح ...وتانى يوم

اجى اكرر نفس المشهد ...انا عارف هم مااول

من كتب الرواية فى السودان لكن احساس انو ده

جيلك قدم رؤيتو ووضع بصماتو ده احساس نجاح

لايمكن وصفه ..وغير كده انهم اتفردوا ووضعوا

حسهم الخاص بيهم وفتحوا افاق جديدة فى كتابة

الرواية غير مسبوقة ..

خلينا نحب معاك محسن خالد ده وليشمل الحب

خالد عويس وعماد البليك ...

خالص ودى

..

الوغد دكين،..
ما قلنا أبوها لسانو سليط زيك كدي وما برضى بكاتب معولق زيي،..
النوع التكلّمو ويعمل ما سامع داك!
عندي شورة عندي شورة عندي شورة،
لامن يمر زمن يكفي لإنضاج بيعة خلافة راشدة ذاتو،..
وما يجيك رد، أو يحل بجلحاتك شاكوش مضبّب

بعدين تراجي دي، أميرة وسمحة، غصباً عنك وعن كل الرطانة
وعثمان عووضة الرطاني الكبير ذاتو غصباً عنّو


...

..

محمد عبد الرحمن،..
ياخي كلامك دا سمح بالحيل،..
يشهد قلبي بنفس الحس بقف أمام الكتب،..
بالرغم من إنو صاحبنا حسن موسى ما عاجباهو حكاية جيل دي
بس لازم الناس يحسبو بعد كل عدد من السنين، صار عندهم كم شجرة
وفي يات من مجال! كتابة رسم موسيقى طب فيزياء غناء... إلخ
لو الناس اعتمدت النظرية دي، كان بتعرف مدى تقصيرنا كأمّة
وكان رفعت من معدّلات إنتاجها،..


------------
انطباع عنّك:
إنت زول محب جمال ونقي،..
وليشمل الحب أبناء السودان كلهم،
العويس والبليك لهما أجمل التحايا
البليك قرأتُه في "أنهار عكرة"


...

Quote: وانتا وكت هي سمحة كده الممرقك من حوش الدناقلة شنو يا الغايب ومارقا لينا في واحدة امها بتشبه تراجي.. ياكايد المحن ..وشنو كده ماعارف

هى تراجى الا تنشر ليكم صور اغراء

عشان تشوفوها سمحة ؟؟!!

الزولة دى سمممممحة وصغيروووووونة

لكن متعمدة تنشر الصور دى بس كان عجبكم

لأنو كل زول بيقدم نفسه بالصورة البتمثل

مبادئه..بعدين هى هنا ما جاية تعرض أزياء

ولا تعرض نفسها..

وفى كثيرات فى المنبر ده جميلاااات وسمحااااات

لكن عازفين عن نشر صورهم..لأنو ما موضوعنا هنا

المظهر .



عالم قرف ...


عذرا محسن ولكن واضح جدا من هو الذى

خرج بهذا البوست الجميل عن مساره

..حالة قرف مفاجئة أصابتنى . .

من هيافة البعض وسطحيتهم..

مرة حبوبة تراجى ومرة خالة ومرة تربيزة

مكواة.. قمة العجز .



وصحى زى ما قالوا : اذا غابت العقول

نشطت الحواس .


لهفى عليك يا بلدى و من زى ديل

وااااسفاى .

الأعـزاء فاضـلابي، محسـن، والجميع..
أرجـو أن اسـتلف عبارة الأخ والأستاذ الفاضل فضيلي جمـاع بعاليه:

Quote: يعجبني استخدامه للدارجة ، فإن به كثيرا من الإنطلاق والعفوية إلى درجة أنه قد يعطي في بعض الأحايين نتيحة معاكسة!

وهـذا _ يا محسـن _ أكتر ما أعجبت به فيك (بعـدين يا زول أنا أعجبت دي بكتبها زي دي بي همـزتها دي مع اني زاكرت في (اصـلاح الكتابة) لكن دي تبهرجت عليّ غايتو وعليك ابوك بالمـرة أفتينا فيها.. أفادك الله، ورزقك من حيث (نعـم) ومن حيث لا تحتسـب..تأسـرني بشكـل عـام لغتنا الدارجة الأصيلة غير المصطنعة ولا المُـتكلفة كما هي عنـدك...نفـس السبب دي يا محسـن هو المخليني أتمنـى ألاقيك وأتونس معاك بهـذه اللغـة التي أفـهمها وأحبها.. في الحقيقة هناك عـدد من الزملاء هنا أتمنى وأرجو مقابلتهم ومعرفتهم، لكن كل واحد لسبب مختلف...وإن شاء الله لامن أجي الإمارات خلال العام القادم كان ربنا حيّانا.. حالف بي جدي طاهر أبو ام جدين (صمغ التراب) إلا أصلك وأحـظى بملاقاتك.. تحياتي ومحبتي.. والشكـر والمـودة لكما...

أهم حاجة فى الموضوع إنه محسن خالد
زول واااثق من نفسه، بعرف متين يتكلم؟ و متين يسكت؟
و بجسد صوت طبقة كاااملة من شعبنا ، بنحاول واهمين إنه نتناسا كلامهم فى النت
بداعى الثقافة و التحضر،،،،،
فاضلابى .........قرأت له فى هذا المنبر ما يسر القلب و يشرح النفس
الأعزاء المتداخلين .........شرحو ( لحرفاء الكشتينة)
لذلك....
أحبكم جميعاً
و أحب الأرض التى أنجبتكم..
مودتى؛؛؛؛؛

***

Quote: ومنتظر أسمع رأيك في الحياة السرية عبر عِدَّة الشغل،..

محسن خالد،
الكتابة عن "الحياة السرية للأشياء" راودتي بالتأكيد، ولعلك ستدرك وتلتقط من كلامي أعلاه عن "إيماناتك بالكتابة والثقة بالإنسان" المدخل الذي سأتحسَّبه للكتابة عنها وعن هذه الجسارة الإنسانية التي لا بد أن تُكتَب بها مثل هذه الرواية! ثم هناك اهتمامي بالترجمة، الذي جعلني أتصورها مترجمة للإنكليزية(!) وما قد يثيره ذلك من أسئلة نقدية... وأخيراً، الموسيقى، الموسيقى!
"I thought I should tease you with a trailer before you see the movie "

ثم أني تلقيتُ تحيتك لـ( يا لجنون الكاتب الإسفيري...) وقد سَّرني أكثر أنك تحييِّها بـ"إصلاح الكتابة" وبحياتك الإسفيرية نفسها!

المحبة والود؛

ح.خ

..


Isa،..
تحياتي الماهلة،..
وأريتنا نتقابل ونتونَّس في أم بناياً قش،..
بالدارجي كدا، المدنكل

(أُعجبت) تتكتب بطريقتك دي ذاتها، بس أديها ضَمَّة من فوق، تضمك حبيبتك، قول آمين،..
الهمزات التي أوردتُها في هذا الباب هي المتعلَّقة بالفعل الرباعي،

يعني كيف نكتب: الإكرام، الاحتكام، الادعاء،.... هل فيها همزة من تحت أم لا؟
القاعدة باختصار، تقوم تطلّع أقرب فعل ممكن تطليعه من المفردة... وتعد حروفو، لو طلعوا أربعة، تديهو همزة من تحت، لو لا، تخليهو أم ميطي ساي،..

(الإكرام) أقرب فعل منها- هو: أكرمَ.... نعدو نلقاهو أربعة أحرف، إذن فيهو همزة من تحت
(الاحتكام) أقرب فعل منها- هو: احتكم.... نعدّو نلقاهو خمسة أحرف، إذن ما فيهو همزة من تحت
(الادعاء) أقرب فعل منها- هو: ادَّعى.... اللهي تُكتب هكذا: اددعى،... يعني دبل "دال" ما تنسَ،
أها لما تعدو، بطلع (ألف) (و 2 دال) و(عين) و(ألف) تاني، الأخير دا ألف مش ياء، يعني الحسبة خمسة أحرف، إذن ننساهو من الهمزة،..


---------------------------------
انطباع عنَّك:
أنت شخص ودود ومحب معرفة،..
مرحب بيك، أصلني بس


..

..

عبد الرحمن عزاز،..
ونحب الأرض التي أنجبتك، ودم طيباً،..


-------------------
انطباع عنَّك:
دي ملاحظة سمحة،
النت والكتب دايرات ينفصمن عن ضل أهلنا العجائز
وكمان يشتمن جمع ذلك الظل،..
الناس ديل فوق عناقريبن ديل، وبلغتن، لا لغة مالك ولا ابن كثير
بقولوا حكم لا بقولها سقراط ولا أبقراط

...

..

حافظ خير،..
طبعاً التقطتُها، من العبارة المشحوذة الاختصار دي،..
أخوك يا حافظ أخوك من صباح الرحمن كدا، ومع القهوة، دا ممكن يحصل يوم ونزورك!..
التقطتُها....
إلا طمع الانشداهة بس، لامن الشافعة تكون كرعيها نار، والمخرج يتباخل ببعض التفاصيل
ما ياهو بتميّل بجنبة كدا مع الشاشا وتبحلق، كأنك سترى ما لم يتصدّق به المخرج،..
إلا ياهو المخرج، والمخرج غالب، تطقشك حيطة السينما، وتنعدل في كرسيك من تاني
طمع الانشداهة المقهية بس،..

فعلاً العمل دا بلغة تانية بكون محل أسئلة سمحة،...
لو العمل دا أكثر من مشاغلتك دوِّر فيهو طوالي،..
وكن بخير،..


...

عارف يا محسن يا ودخالد
أنا بتفق معاف في حاجتين
في الحريه حدها السما
و في الثبات علي الموقف (و متكيف منك في الاتنين ديل شديد)
و غايتو أنا و إنت يوم كان إتشاكلنا
إلا يودونا القسم و لا يقفلوا المنبر
و بختلف معاك برضو في حاجتين
حرية الفرد بتنتهي بابتداء حرية الاخرين
و في إستقلال الغريزه و الفطره عند القارئ لكتاباتك
أنا ما زيك عشان أقول ليك
أنا ده رأيئ عنك ككاتب و ليس شخصيا
لا
ده رايئ فيك بالإجمالي كده
لأنو الكتابه عندي
عباره عن موقف
عموما كده إختلاف الرأي لا هناي للهناي و الحنك البيش داك
بس حبيت المشاركه
و تسلم

مهما منحنا هذا الفتى من حب فهو قليل فى حقه

فنحن فعلا نحبه ، ونحبه كثيرا

لا حولااااااااااااا

الناس ديل كلهم بحبوك؟

( حالتهم ديل بس العندهم ( باسويرد)!!)

غايتو يا ود البتولا اختى علا نرشحك فى الانتخابات المبكرة دى على الأقل ناس شندى يكفروا عن

ذنوبهم فى حق البلد دى الشالوها بسبب ولدهم الرئيس دة!!

انتوا عارفين آناس الجنى دة من يومه وليدا نجيض مو نى وكمان حنيييين

ماشفتوا صورته مع رفاقته وقت الجهلة( الفى بوست سندى) كيفن رويسه داك ملان كلام كتييير... وكيفن

عويناته مليانات حب وحنية وحيا...

اريده ود البتولا اختى والله يحفضه ويغتى

ان شاالله نتلم فى فرحه وجديده

قولوا آمييين

وليكم منى باقة حب

تحياتى

Quote: عندك مواقف سياسية بكمية معقولة من المجاملة بقول إني ما فاهمها، وبأي حال ما بتعنيني، أي زول مخيّر في رقبتو، أنا بتكلّم عنك ككاتبة

الليلة عاد كلامك كيفني شديد ..من شدة "الهجومات" والهجمات والهجائم
بقيت ما بصدق اي كلام جميل عني,,,
كلام شهادة تعلق.. يوما ما حادرج كلامك دا في واحد من كتبي..


مواقفي السياسية مواقف واضحة جدا.. انا افصل بين السودان الوطن
واي عجاجة اخرى.. هناك بعض الاشياء تقال هنا وهناك خالية من الصحة..
في حياتي لم انضوي تحت اي لافتة. حرة تماما..
كما قلت انت. كاتبة حرة...

وشكرا كونك ترى اني كاتبة..
مودتى واعجابي

..


هذه مشاركة باسم "أساسي" زعيم الضلاميين في المنتدى:

Quote: أقراك دائماً وأنا أستمتع بالغيظ أحياناً.. وأتلذَّذ بشطحاتك وأنا أسبك في سري ..وضوحك الفاضح يمتعني حد الكُره أحيانا كنت اتمني ان اكونك بتهذيب أكثر بيد أن تهذيبي المعدوم يجعلني أتراجع تصالحك مع ذاتك يكرّه الواحد وإيمانك بقناعاتك يجعل محاورتك متعة مدهشة فمفاجأة ردودك غير المتوقعة تجعل الحوار مخاطرة محفوفة بالفضول المستحب اللذيذ تعرف اني احب دكين وكتاباته .. حواراتكما معا تجعل سقف المتعة عندي يصل انعدام الجاذبية .. من أمتع الحوارات التي قرأتها قبل سنوات خلون قرأت لك في مكان ما لا اذكره انك قلت عن نفسك انك شخص كثير العلل أو المرض وانك تتوقع وفاتك قبل وصولك سن الأربعين نوعا ما صدقت هذه النبوءة وهي التي تجعلني أبتعد عن التعلّق بكتاباتك كثيرا فنحن قوم نحب بلا حدود لذا أخشي أن أحبك فأفجع فيك .. لذا أحيانا أتمني لو أني ما قرأتك يوماً ولم ألتفت لدكين حينما أخبرني أن اقرأك كما يجب ولكن للأسف فعلت ! وجب علي تحيتك بداية سلام أساسي

...

..

ناصر البطل،..
تحياتي، وكن بخير،..
وإن شاء الله ما نتشاكل يوم،..
أها حرية الفرد دي، يعمل نوع الأدب البعجبو، دا محسن
وحرية الآخر، يقرأ أو ما يقرأ البعجبو، دا ناصر
وناصر من حقو يوجّه نقد، ومحسن من واجبو يسمع
وما في أي حل تالت،
يا نرضى بكدا، يا السكاكين تدوِّر
دي نمرة واحد


نمرة اتنين
عن نفسي لا أنظر إلى الكتابة كموقف أو سلسلة من المواقف
للمزحة كدي بقوليك، الأخ شيوعي خمسيني وألا شنو؟
النظر إلى الكتابة كموقف يتضمن التوظيف للموقف وللمعالجة معاً،
وهذا بالضبط ما لا أؤمن به بصدد الأدب والفن،
في فهمي، الكتابة دي شغلة ممكن تتقاطع مع المجتمع أي نعم وبالحيل،
لكن لا هي مريسيل في يدو يرسلها وين ما عايز،
ولا كمان هي (ميرامو-بنت الملك) التي ستجعل منه مرسالاً لمكياجها

الكتابة التي تتحدث عنها هذه
في رأيي أنَّه لم يوفّق فيها إلا كولرنكو صاحب (قصيدة تربوية)
يعني مكسيم جوركي نفسو، صاحب البدعة دي، قال بدعو بطريقة اشتراكية
ولم يترك بداخل أعماله إلا مجرّد ظلال للاشتراكية

الكتابة قابلة جداً لإنو أي رأس ممكن يتفلق جواها،
وبرضو ممكن يتعالج ويتداوى أي فلّيق جواها،..

الكتابة براها وبس،...

وأنا كتابتي وما كتابتي،...


...

..


يازولyazoalيازول،..
تحياتي يا رجل وكن بخير،..


----------------
انطباع عنَّك:
من نقدك داك وتاني ما سمعناك،
خليني أكاويك، ولو عملت معاي مشاكل
بشتكيك لتماضر
كيفنّك؟ ولك المودة


...

..

مهيرة،...
د. نفيسة،..
كيفنّك يا شقيقة البتولا بت الموفد؟
شفتِ رفقاتي الفي صورة ديل، أبوهم ود أعمي لزم وجيراني طوالي،
اتنين من أبناء –محمد خالد عمر- معرّسين اتنين من أخواتن
وأنا زغت من أعملها تلاتة صفر
هم ما شاء ربي، بوليداتن وأنا لا هسع مزمبع بالخلاء
ولو ما خايفك تقولي "سجمي"،
كان بقوليك يا أم ياسر، دقي المحلب فوق توب ياسر،
كِرِب يا ياسر، ما عندك أخيّة
ساي كدا، بس بسطة من أمهم الدكتورة و الذكية "المسغفة" دي،
عارفة؟ شقيقتك البتولا بت الموفد دي، كانت دكتورة زيك كدا، إلا بلدية
صحيح والله، قلبي حواشة وجنينة بتاعة حنيّة،..
بس ما لقت ليها تربالية نجيضة لا هسع

كوني بخير،..
والعقيد ماكبث البشير أب رأساً متربع دا،
مسعولية رقبتو والجبهة، نحن باريين منو
أول شيء عشان عوير عوارة الله الواحدة دي،
الزول دا عوير ساااي، إنتو ما ملاحظين
في زول قبل كدا في البورد دا، قال البشير دا "دلاهة" في ذمتي دلاهة
وحقو الزول القال كدا دا، يدوهوا جائزة
بالله لو نوعو دا الآخر مرّة شاف فيها كتاب سنه تالتة ثانوي بيبقى رئيس
يعني ود أختك البتولا دا مفروض يبقوهو شنو؟

قلت أقطع معاك في ماكبث ود الجبهة ومحلّية الجبهة ومدينة الجبهة، وكتين جبتِ السيرة


...

..


bayan،..
د. نجاة محمود،..
أول شيء مبسوط ساااكت من آخر الصفحة دي،
أشيل وأجر –تطلع- بت شيريا وجارّة دكتوراة من خلفها كما العكّاز الكوكاب
لمنازلة الوجود
والله يا أخوانا أنا بحب التعليم العالي لأولاد بلدي كلهم،
وخصوصاً المرأة، لأنو المرأة دي "مطبخ" الدنيا بتمامها،..

لو في زول قال ليك إنت ما كاتبة ذكية ورصينة، كضاب
بخصوص السُّمَع والهجمات
البروّج إشاعة هو مسؤول عنها أمام الله والحق وضميرو
شخصياً اكتفيت بشهادة د. عمر السنوسي بحقك،
ما بعرفك عشان أثق فيك، لكن بعرف عمر وبثق فيهو
"وأنا ما خايف من أي زول"،..
عندي تاريخ قديم مع التدين والحركات الإسلامية، كاتبو روايات
دا ما عيب، لكن ذنب يُتاب منه، ومرحلة لا بد لأي عمر صبياني أن يمر بها
(لظروف مجتمعنا، ولطرق تربيتنا، ولعدم التوعية المناسبة في السن المناسبة)
مجتمع كان معزولاً ومتخلِّفاً،
يقوموا يجيبوا دين السعودية ودين مصر دا يسوطوهوا فيهو
دا حلو بالتوعية، وليس ببتر أعضاء المجتمع
البحصل خراب ودمار بدون شك،
وتلويث للذهنيات وانفصامات الواحد تلقاها بتَّاور أهلها من جُوَّه روحن

لكن ما بكضب عليك، إنت برضك راجعي مفاهيمك للوطنية واستغلال الكيزان للحتة دي
يعني عندك مواقف يستحيل بالنسبة لي أفهم إنها ما بتخدم خط الكيزان طاخ طاخ، وما شرط تكوني كوزة
أنا شخصياً بفضّل البوريه الأزرق والصليبي علي الكيزان، ورأيي إنهم مضرين أكتر منو


...

..

أساسي،..
زعيم الضلاميين
شكراً علي المحبّة، وأيضاً الشكر للوغد دكين،..
أقرأ قرايتك ساي، أنا ميّت ميّت، ما في اتنين تلاتة وع المواعيد
وراجيك لامن تنزل هنا باللبس خمسة والزمزمية، عندي معاك كلام كتير
نتمنى ليك بريك جميل،
وشتوية من أزاهير
لو نزلت هنا بلياقة كويسة ولقيتني ما في، قل:
كان وغداً يرحمه الله
إنا بكيناه وكنّا مذنبين


...

يوم الخميس جانا الخبر وانشاع ، في الاربع قبل ازرق طويل الباع !!




يا محسن فتش جيوبك يمكن تلقى اشارة . .

الليلة يا محسن
لميت ليك في عضم :
كلب السجان
الحياة السرية للأشياء
لو عندي شنطة كنت أقول ليك دخل يدك جوه ... وأقرصك فاهم؟؟؟

بقزقز بي مزاااج

هسة عليك الله زي جولي دي بموتها الميتة الحارة دي!!!!!!

في ناس أحيانا بتصدق نبواتهم .. وانا عدي احساس قوي
الزمن راح يجمعك بي واحدة من الجوائز المدنكلة زي ناس نوفل
أو ماشابه .. ياااارب

ربما في مكانٍ آخر أورد إنطباعاتي عن ما وقع في يدي

تحياتي

رحمابي

صديقى محسن انا شخصيا
متهم بالصعلكة


وما عارف همن حاسبنها كيف
كما يقول صديقى طلال

لكن بالواضح الفاضح نحن نحب الجمال
وهذا ابسط حق فى حقوق الانسان
الشاملة نظريا
والمعوقة بعد داك.....

عموما الآن اهديك
اغنية خضر بشير
الناحر فؤادى وموقد جوفى حر
يا من نحب



وووووووسلام
مع شوية تتتتتمة

..


tariq،....
فتشت جيوبي وحاتك،..
غير الفلس الكتير وتداعياته ما لقيت حاجة،
هروب الزوجات والحبيبات دا أهم تداعٍ للفلس،..
شح الدفي دي الجديد، نقصان السفر
وحرمان الفلس قبل الدكاترة من السَّكَر


-----------------------
انطباع عنَّك:
بتحب التشويق شكلك،..
ما فهمت أزرق طيبة دا مالو،..
لكن أنا أجلي لسع، قلت بموت 37 سنة،
لو داير تعرف متين بالضبط، ترجع البروفايل
تشوف تاريخ الميلاد، وتحسب بدربك،
نضوِّقك تشويقنا،
محسن خالد دا طفّر ليهو بأي كلام،
لو قدرتَ تدهشو وألا تخلعو
بتكون أنقذتو من يموت
وهو ميّت من كم عام مَرّوا علي رحيلها

..

..


AlRa7mabi،..
Oh yah?
بس بطريقة سندي وودز مان،..
ياخي جولي دي أنا ذاتي بتذكرها وبحزن،
وأقول ليه أنا كتلتها بالطريقة البشعة ديك،..
بس لازم، وحتم،
عشان الأمريكي دا ما يفتكر إنو بيعمل طيران ومجنزرات
ويمشي يكتل الناس وين ما يعجبو وبيظل "مجتمعو" سليم
"مجتمعو المدني" مش "جيشو النظامي"،..
جائزة مدنكلة دي، الله تعلم،
لا "نوفل" ولا "بوليتزر" ولا جائزة "نجيب" القريبة دي،
أنا سوداني، أهلو ذاتم ما عاجبن ودايرين موت،
السوداني عليه أن يؤمن بما يعمله وإنجازاته –على مستوى ضميره- فحسب،..
سنعمل بكد، وسننتظر اللحظة التي سنرتقي بها بمجتمعنا،..
وح نفرح، بدون أي جوائز

-----------------------
انطباع عنَّك:
إنت زول فنّان بالجد،
سأنتظر لمّتك الواعدني بيها دي،
وح نعزم معانا رانيا مأمون برضو


...

..

عصام عبد الحفيظ،..
غايتو أقرأ احتجاجك بالتصريح المبرّراتي الكاتبو ليك صاحبنا طلال دا، أصدّقك
أعاين براي، كصلوق ليهو وجهة نظر خاصة،..
وأشوف إمالة العين جُوّه النظارة الطايحة دي،..
أقول ليك طوالي،
سوي الداير تسويهو في البوست دا
يا صعلوق


...

سلامات
وعوافي
ياسيدي امرح في نواحي الروح ماشاء الله لك من مرح .. وكن لطيفا كون ارواحنا تهزها (سيرة) الموت .. فعندها ترفق بنا و(موت) بوداعة علنا نتذكر كيف تختارنا الدموع حينها .. وعلنا نستطيع اذ ان (العيون) اضحت موبوئة وهناك كائنات (تقتات) علي (بصيرتها) وبقية ما في (مخازنها) من ماء (الاحزان) ..
كن جميلا كما شهدناك هنا وانت تطلق صرخة ميلادك (الاسفيري)* الجميل .. اذكره جيدا اذ انك ولدت فيه واسنانك (مصطفة) كلوحة شرف (نوبل) ...
الكتابة ياسيدي عندك كاملة الوسامة ... تارة تتداعبها بصدقك واخري (بعجرفة) (شريفة) .. تختصر الحالة في سطر وتحتجزنا نحن في (اطار الدهشة) ..
والشاهد بيننا هو الحب ..
انعم بالمحبة ...
...........:
* المصطلح (ملكية مطلقة) للشاعر والمترجم الساحر الاستاذ حافظ خير .. وهذا منا للتذكير ..
معراج ..
حافظ خير دا برضو زول من عالم تاني .. زول جميل جميل للغاية ..لكنه شحيح التواجد ..
.............
كونوا جميعا نبلاء ...
وسيم المودة

طيب يا محسن انت اقعد وأتجلى مع نفسك واتذكر يوم الخميس كنت وين ؟

و

كان معاك منو ؟

و

عشان اقربا خلينا نقول الخميس بالليل .. اها وصلنا و لا لسه ؟؟

.

ود رملية،..
أوكي،
ح أموت كما أشتهي، وليس كما يُملي الموت،..
حافظ دا نسمة، يشهد قلبي لما أشوف كتابتو الملوّنة دي
صباحي بتلوّن جنون وبهجة، بزّاف نحبو نحن،..
شكراً وليك قهوة هذا الصباح،..

يا وسيم الروح


..

..


tariq،...
أممم، قاتلتك الشياطين،..
قصدك المريديان، وحوريتان عن ذات اليمين وذات الشمال قعيد
"ديل كاتبات من سوريا والله، وفي ذمتي"،..
بقينا أي حاجة زي دي، الواحد طوالي يقعد يتعذّر ويشرح،
براي سويتها في نفسي
غايتو ناس الدنيا ديل، يا عملات حبوبتي،..
بس كيف إنت عرفتني طاخ كدا، إزيك يا أستاذ محسن
لما قلت لي جيوبك، افترضتها عبارة مجازية،..
بالمداخلة التانية وبعد مشيت البيت شفت الجاكيت الكنت لابسو،
ولقيت الكرت بتاعك،..
أمَّك، مدير كبير إنت، بس عرفتني كيف؟


...

Quote: أحب محسن خالد

فاضلابى

الله يهنى سعيد بى سعيده !!!!!!!

الحمدالله الوصلنا ،،،،

Quote: بس عرفتني كيف؟

اسمع انا ما عندي غير المعرفة دي ،، فما تنجهني ساي ...

الباقي لى قدام . .

..



على محمد على بشير،..

آمييييين،..

----------------
انطباع عنّك:
إنت رجل بتحب جنس دعواتك الصالحة دي،
إن شاء الله ربنا يديك ويزيدك،...






tariq،...

أوكي،..
في انتظار قدّام دي لاحدي آخر محطّة منها،



...

محسن خالد .... كاتب رائع
لي درجة قف تأمل ...
نحن نحبّك آلدراوي
سموءل

..


samwal ebrahiem،...
كيفك يا أمير،..
ويا مرحبا،..

-------------
انطباع عنّك:
زول حلو، وصاحبي
وعايز تشوف تيموليلت بجدّك


..

محسن خالد
سيد المحبة دي كلها
أنا غلبني البقولو يا زول ده شنو ده
القلوب دي كلها حتقدر عليها كيف
الله يزيدك
و يعليك
و تكتب و تكتب و تكتب و تنحب.

مواصلة لما انقطع من ونستي معاك امبارح داير أضيف:
أنا عاوز أضيف فوق أنها كانت رقاصة.. كانت بترقص يعني!!
أضيف شنو ياخ... الكلام كمل والله..
كنت بحاول لي في مشروع (معلقة) مجهبزة (زي حقت محمد السر ديك)..
وفي النهاية غايتو.. أهو.. تمخض الجبل فولد (فد سطير):
أحب محسن..
في حب يا اخوانا أكتر من كدة؟
بالمناسبة يا فاضلابي: إنتا برضو بحبك.. بس عيبك الوحيد بيتمثل ـ من وجهة نظري ـ في علاقتك مع الضلالي داك الاسمو (قرمبوز)، غير كدة قطع شك زول حلو..
___________
مع دان براون وكوده الدافينشي يا محسن ضيعت إجازتي هنا في القاهرة، وأنا أتأهب للمغادرة شفرتك وصلتني بس للأسف: جات متأخرة!!

الزول ده ممتاز خلاص.
أول حاجة ما بختشي من عدم العرفة,
تاني حاجة ما بقول عارف وهو ما عارف
والله يا فاضلابي كلامك ده صاح ...
بعدين الجني مبروك ، التكتحوا ، بني المسيد ده في يومين ، البوست
ده من امس لليلة انكشحت فيه محاية محبة جارية ذي سيل اربعين ...

...
...

محسن :

أنت عارف -غنيوة الكاشف ديك -أنا بحبك" ، حُبي لك سليم
ومشروع ، انت تعلمه، ولكنني سامتع ان كتبته لك ثانية ، مثلما ما امتعني في
بوست الحرب والكلمات .
أنا ككل هؤلا الوسيمين أحبكيا محسن خالد ،
ومن ذا لا يحب الحُرية والروايات الجميلة...

..


fadlabi،..
أيوووة، أتفضل ياخ،..
البيت محروس وستو تكوس،..


-------------------------
انطباع عنّك:
أسرقو من صاحبي حافظ خير:
تعال بكتاباتك وتصاويرك


...

..


الفاتح وديدي،..
شوف لو إنت سافرت لأي بلد ما تنوم،
دا قانون أنا سارقو من الرحّالة العِظام
لما ترجع أهلك نوم لود عينك وعلي كيفك،..
في بلد تاني شوف شوف شوف
حوم حوم حوم

--------------------
انطباع عنّك:
إنت رجل كتّاب وفنّان
سيب الود دان براون دا، وخليك في الود الأزرق أب جلحات،..
عارف؟ سندي وودز مان قالت هو كاتبها المفضّل،
ودي أشنه حاجة فيها


..

..


Ibrahim Algrefwi،..
عارف غنية الكاشف، وأنا ذاتي فوق بحبك بحلفبك،..
وفاكرك تب من تسبير الأرض بالطباشير، خليك في الجوار أكتر
وسمّعنا نهنهة قلمك في الغنية، وصوتك في الصخر


----------------------
انطباع عنّك:
ما عندك شغلة بأي حاجة ما سمحة


..

لا ..
لأنو زول غياظ ..
ويخليك تتعرى قدام نفسك ..
زول فضيحة .. و يجرسك كلامو لامن تتضاير ..
و صعلوك بمزاج عالي ..
ولسانو سليط .. و همباتي لغة
وربّاطي ( عِرفة ) ..
و شِفت ..
وصديق الله الما بعرفوهو ناس ( جزاك اللهو خير ) ديك ..
و متمرد يحسسك إنك مشلول و أهبل و عبيط ..
وإنك زول دلدول ساكت و مكنكش في دلاقين وهم ..
والوحيد اليخليك تحسدو ( قبُلنا وحّدنا ) ..
وفوق ده وداك ..
بيخلي حب الحياة ( يتاورك ) تاني ..
وتتاورك معاهو حاجااااااااااااات ..


( بعشر ما شايف شغلو )
.. أها .. زول زي ده .. يحبو لي شنو ؟؟؟

محبة الناس نعمة كبيره خلاس


انطباعي عن المذكور اعلاه
__________
لا استطيع ان اقول اني افهمه .. لكن حدسي يخبرني
انو بني ادم عادي يأكل الطعام و يتغوطه .. لكنو ( فنان )
وفنان دي اقيفو لي فيها شوية ..
الفنان ده لازم يكون حريف في كل شي
مع روحو دي .. حريف
مع الناس .. حريف
في حبو .. حريف
في كضبو و صدقو .. حريف
في مباصرة الدنيا .. حريف
وفي ملاحظتو لي الالف الناقصة في كلمة (اقيفوا ) الفوق دي .. حريف
و في شتارتو في الغنا اريتو يكون حريف !!




شفتوا الحرفنة في رفع البوستات دي كيف !! ( وجه يغمز وسافي في آن )

..
Emad Abdulla،..
أممم، يضحك نهارك يا عفريت
ولك تحياتي أوفاها وأكملها،..


-------------------
انطباع عنَّك:
إنت قلم حريف، وبمزااااج


..

..

خدر،..
غايتو شتارتي في الغناء دي أصلو ما ناكرها،..
لكن...
متذوق فقري، مع إنو صوتي إذاعي والمسجلين في الأستديو بتاعنا هنا مبسوطين منو خالص،
لكن يجيرك الله الإيقاع تعبان تعب الموت، إلا نقرأ بيهو شعر وبس
أصحابي البعزوفوا ويغنوا مما يبدوا ترم ترم بحمّروا لي طوالي
بما يفيد: انطم، أطرب، أتلولح، أرقص، بس قدومك ما تفتحو عشان تشيل وألا تخفف دمك،..
لو كنت بعرف أنزل ملفات صوت
كان سمّعتك قراية الشعر الما خمج
أمس الليل كلو بسمع فيك وفي "رشا" الغناية،
والله إنتو غنايين خلاص
الله يغطيكم


...

تاني
أحب محسن خالد

Quote: تاني أحب محسن خالد

احبكم انتو الاتنين




احب اي زول حلو

دمتم جميعا رايقين و مرتاحين

..


fadlabi

ونحن كمان، أنا وسندي بنحبك
شفت كيف؟ وكتين ما سمعت كلام حافظ وجيتنا بكتاباتك وتصاويرك، قلنا نجيك بجكسينا،..




حمد فتح الرحمن،..
تحياتي يا زول حلو،
وكن بخير




--------------
انطباع سماعي:
حكى عنّك خالد عويس جميلاً ورؤوماً
ومتابع ذكرياتكم بهناك، إنت خالد دا برطن تمام وألا مستهبلني ساي؟



...

Quote: عندنا جِدَّنا اسمو ود الأحمير،.. الزول دا ختري خلاص في المضاربَة والصَرِف وعكازي وعُكازك،.. النوع الكان حجزوهو من خصيمو، بسل خوستو وبجرّح جسمو داك،

يا زول أنا عندي صاحب فوقو عرق جعليين إحتمال كبير يكون مارق في ود الأحيمر دا..
لمن يغلط عليهو زول لازم يديهو كف.. عرفنا فوقو العادة دي بقى أول ما يتناقش ليهو مع زول وتجي ساعة الكف طوالي نشيلوا من قدام زولو ونخارج الزول، نقفل عليهو الأوضة وننوموا وسط إتنين يكتفوهوا بي يدينهم وكرعينهم، الليل كلو يبكي ويحمينا النوم، لما نصحى الصباح ونسب ليه يقول "كان خليتوني كفتو ما كان أخير ليكم من النياصة طول الليل؟"، يفضل باقي يومو مكوفر.. لا ياكل لا يشرب ونهاية اليوم يجيب موس ويقعد يفصِّد جسمو، حتين يرتاح ويبقى زول عادي. في الأول أنا كنت بتضايق من الحاجة دي لكن لي قدام بقيت أتعامل معاها عادي زيها وزي عاشوراء والبطان.
يضحك نهاركم

..
محمد السر،..
زولك دا يا ود السر، ياهو ود الأحمير ذاتو،
مش شوية عِرِق،..
بس أرجعك لنظريتنا الأولى،
زولك دا في نفس الوكت بكوّن مقطّع الحنان والكرم، صاح وألا لا؟

...

يا فاضلابي ,
أنا جيت متأخر ,
لكن برضو أحب محسن خالد ...

لأنى البعرفك ،،
وبرضك حبيبى ..
زول زى مدينة
فاضلة وحنينة
مشارع خصيبة
وشوارع أمينة
مراقد رحيبة
كحضن الحبيبة
صهيلها وأنينــا

لأنك حبيبى ..
ولأنّك مدينة ..

فاضلابي
إذيك يالاخو

صديق أحمد ياخينا عندو غنية بتشبه كتابتك وحبك لمحسن خالدبقول فيها
(أجمل منو في الكون كلو ماشفنا) ياسلام غنا جد .
بعدين تعال ياخينا مالك غاتس أنت ذاتك (آي ده العرس ده العرس ولا الحاصل شنو؟ )

محسن ياخالد
يازول ياعجيب

........................
إنطباع عنك (حلوة دي )

كاتب مميز تجبر (البني آدم للوقوف ثم الجلوس حسب مزاج حرفك رهاني عليك سعيد
ياصاحبي .

فاضلابي
إذيك يالاخو

صديق أحمد ياخينا عندو غنية بتشبه كتابتك وحبك لمحسن خالدبقول فيها
(أجمل منو في الكون كلو ماشفنا) ياسلام غنا جد .
بعدين تعال ياخينا مالك غاتس أنت ذاتك (آي ده العرس ده العرس ولا الحاصل شنو؟ )

محسن ياخالد
يازول ياعجيب

........................
إنطباع عنك (حلوة دي )

كاتب مميز تجبر (البني آدم للوقوف ثم الجلوس حسب مزاج حرفك رهاني عليك سعيد
ياصاحبي .

..

الوليد محمد الأمين،..
إنت لو ما جيت كلو كلو، عارفنو قلبك معانا،


----------------
انطباع عنَّك،..
رجل فنّان ورايق وبنبادلك المحبة

..

..

معتصم الطاهر،..
دا كلام مِ التخين أوي،..

-------------------------
انطباع عوير وسخيف عنَّك:
إنت راجل عجوز ساي


...

..


خضر حسين خليل،..
وبرضو عندو
حبّك لي عقيدة ومبدأ
وريدك طريق أنا منو لازم أبدأ




--------------
انطباع عنَّك:
يشهد ربي بريدك، بصاحبنا بديع ومن غيرو،..
طيّب، بتذكّر زمان لامن داير تُشكِّل "بوستاً" إنت صاحب البدعة الحسنة دي، وألا أنا غلطان؟
أها الحلوة دي ذاتها، تاني أكتبها بدون همزة، في سيرة هزات فوق أظنّك ما شفتها
(انطباع)، شفتَ الحسنة في محسن بعشر أمثالها كيف؟


...

جينا نسجل في لائحة المحبة ولو من باب القرب من (تيموليلت)

عالياً لوجه المحبة
-محسن أظنك لخبطت شويه في الانطباعات الأخيرة , وتقبل تحيات عبد البديع -

انطباع عنك :
المحبة عندك صنو العذوبة .

ياسر قال ليك:

كرب يامحسن عندى اتنين، وامى قالت ليك جيد ليى).

تحية وتعظيم سلام( مشاغب) لشباب السودان وللأديب الواعد محسن خالد.

الاخ الفاضل الفاضلابى:

سامحنا على الهجوم العائلى فى بوست المحبة دة

تحياتى

زي ما قال الكتبوا
شن عاجبكم في البشبه الهنود السيرلانكا
اب لســــــانا فالت ..
الشين المدقدق
مافيه حاجه سمحه غير اسمو...
محسن،،، وقال ماعندو قروش
خالد،، وما عندو سيره غير الموت
زول زي ده بتحبو فيه شنو ؟؟؟؟
هكذادرشني الحاقدالموتور،
عدو الفن والنجاح والفرح ،
شامت قرض مصاص العرديب
وهذا الاسم ناله عن استحقاق لانه كل مايسمع عن سوداني ناجح يصدر صوتا كمن يمص عرديب ودايما شامت في خلق الله وقرضه مر في كل شى من تشوفوتحس بي مرارة في حلقك...
وطبعا انا سكت وفكرت وفكرت.. وقلت له بعد اصدرت صوت مص العرديب
ومنو القاليك انا بحب محسن خـــــــالد؟؟؟؟؟؟؟؟

..


الوليد محمد الامين،..
أها أقول ليكم خرفان، تقولوا لا "كتَّاب" وبنحبك،..
علي كيفكم،
ما بعرف والله ديل خلطهن مالي، إنت وخضر أعفو لي،..
كلام عبد البديع ليك،..
وكلام الزول الفنّان والحلو لخضر،..
ما داير أقول ليك غلطت في الكوبي والبيست
تقوم تمشي تسك التواريخ وتطلعني خرفان أكتر من زمان،..

...

..

مهيرة،..
حالي دا كنت ناوي أكاويك، وأقول ليك شردتي بدربك؟
حلوة الصورة دي ومشكورة عليها،..
أها دي البجراوية وألا بكاناً تاني؟
أوكي يا بت الجعلي، يلا أتشدعي، باقي الكلام و"الشيلة" كلو علي المسينجر،.
بعدين السودانيين ديل إنت عارفاهم قوالييين
قالوا لي شوف العروس ولا بدورلو سفر ولا طيّارة، جنبببك في "دبي" دي،..
شنو ليك؟ ما قَوَّالين؟
يضحك نهارك


...

..


محمد السنى دفع الله،..
الرجل العذب،..
والله صَدَقت
فَلْسان وزهجان وفَلْتان وضارباهو طنقعة، ومرحوم بعد حين،..
عجبتني حكاية العرديب دي، حلوة بزّاف
والله يا ود السني أنا بريدك من قلبي، وكلّمتك قبل كدا عن حكّيرتك دي
إنها في قلوبنا، قبل تلفزيوناتنا..
وقريب ود العين، بقع في ود العين

--------------
انطباع عنَّك:
إنت مدرسة سمحة خلاص، وكبيرة جد



...

نتابع حكاية
قرضة مصاص العرديب
اها بعد ماقلت ليه كده حسيت بالارتياح سرى في جسده ومد رجليه وشبك اياديه خلف رأسه
وقال...في راجل بقول انا بحب فلان..أحب محسن خالد !
وسبقتو بالكلام الشين ديل ما كلهم ......
فرح فرح شديدونظر الى ليس مليا الزي ديل ماعندهم ملياوقال هوذاتو مابعرف اكتب
ماعارف ليه اذكرت كلام للدكتور العلامة العبقري (عبدالله الطيب ))
قال : القبائل العربية التي دخلت السودان 11 قبيلة فيهم 9 قبائل مشهورة بالحــــســد
ورفع رأسه ونظر لي بعد ان مص العرديبة الاخيرة والقبيلتين ،،وقبل ان يكمل
وقفت وتحركت نحو الباب وقلت ليه
برضو حاسدين وفيهم من ارازل القوم مما يستحي ابليس يمشي معاهم
ببوظو سمعتو طيب ايه رايك
انــــــــا بــحــــــــــــــــــــــــــب محســــــن خالــــــــــــــــــــد
....... ....... ......ملحوظة
عليك الله شكرني انا بريد الشكر وانا حي بعدين سيرة البحر دي خليها دعواتنا ليك صباح ومســـاء
بي طول بحرك..........

..


محمد السني دفع الله،..
أو أو أو
ياخي مالك إنت داير تدخّلني في دوخة؟
ما عرفت أكتب ليك شنو!
أنا يا سيدي بحب محمد السني دفع الله
وبس،..
والعرديب نخليهو لحلوق العرديب،..

وما داير أجيب سيرة البحر،..
أو زي ما قال عاطف خيري الشفت
حنتقابل حقيقة بقولها ما بحلم
غصباً عن عيون الهم
وعن كل الجايي والمبهم

بحبّك يا زول، بزّاف بزّاف


..

الأستاذ محسن مبدع, يجيد اللغه العربيه و الدارجه السودانيه, و عندما اتنزه في افكاره اقول ْ( لوما أن فوق كل ذئ علم عليم, لقلت: أنت قمة الإبداع ).

أرحموا مبدعيناإنهم املنا المفقود

..


Nasruddin Al Basheer،..
تحياتي يا رجل،..
أولاً بالتبادي، كتابتك دي ذاتها سمحة ونضيفة ومدنكلة،..
وأهم شيء إنها "ذكية"،..
ود أشيقر دا زول نصيح حكمة، ونحن متفقين

-----------------------------
انطباع عنَّك:
عارف؟ خايف الناس يضحكوا علي لكن برضك كنت متخيلك إزيرق زيي،
أظن تكون فكرتي عن الكُتَّاب إنهم زُرُق، ما في مشكلة، ولا خوف..
بس بعد قابلتك يوم السمحة تماضر فاجأتني، إنت زول فنّان وراقي



Mohamed Omar Salem،..

شكراً يا إنسان وأمير،..
والحب لك، مَدَّ السهلة والعافية

------------------------------
انطباع عنّك:
أولاً أشكر لك هذه الترقية الصباحية،..
وتانياً إنت إنسان مسكون بحاجات جميلة وبتتمنى ليها دوام العافية
كن بخير/ وما أجملك


...