ظرفاء البلاد

لكل بلد ظرافائها
وبلادنا تذخر بعدد وافر منهم على مر السنين
لايخلو أي حيي من أحدهم أو أكثر
يمتازون بسرعة البديهة والوعي المتقدم وروح النكتة
ورشاقة التعبير والحس الفكاهي
وقفشاتهم وتعليقاتهم ترمومتر لحالة البلاد والوضع العام
ظرفاء المدن لا يختلفون عن ظرفاء الأقاليم إلا في اللغة ونوع القضايا
التي يعالجونها بتعليقاتهم

غرض هذا البوست رصدهم وعكس بعض نوادرهم
والكشف عن الذين لم تتسرب تعليقاتهم لتعم كل البلاد وظلت محفوظة ومحصورة لدى
مجايليهم أو في حيز مناطقهم


مظمنا يعرف الهادي الضلالي وكمال سينا وموسى ودنفاش ظرفاء أم درمان
وبعضنا يعرف ود الشايقي ظهير المريخ في الستينات صاحب النكتة الحاضرة

وفي الخرطوم عوض الصافي
وفي مدني زراع

وأكيد ناس عطبرة وكوستي ودنقلا وبورتسودان وكسلا وجوبا والأبيض والفاشر و ....الخ
ضحكوا كثيرآ وطويلآ لبعض رموزهم في مجال النكتة والتعليق الذكي الطريف والظريف

و

فلنحتفي بهم هنا ونرصد بعض إبداعاتهم ومبتدعاتهم

الخزين



لو تتذكر يا عبدالرحمن لمن كانت حيطة الساحة الشعبية قصيرة


قاموا قالوا يضربوها جير ابيض

الجماعة اياهم قدموا فاتورة مبدئية بي 10 الف جنية ( القديمة )

الخزين قال ليهم بالمايكرفون و الله لو ضاربنها زبادي و عاملين ليها زيق مربة ما تفوت الالفين جنيه

الخزين كان اذاعة الديم المتحركة

وطبعآ هناك ظرفاء متخصصين في التعليق والنكتة السياسية
وأخرين في مجالات أخرى
وكل فريق كورة في دفعاته المختلفة كان بينهم ظريف وحكاي
وفي كل فصل مدرسة كان هناك واحد يستقطب المعجبين بتعليقاته

فيا إبراهيم عدلان أنا حاسي بيك متحاوم في البورد ، والله يرحم زمان { المتواجدون الآن }
أكيد عندك مليون نكتة عن دريسة وأحمد العربي في الديم
وقدر ذلك في الطيران المدني
ده غير ناس جبيل الطينة والجموعية

كل عام وانت والاسرة بخير
متابع معاك
ولاننسى عمك الخزين الديامى الظريف
وقفشاته الجميله اثناء طوافه للاعلان عن
حفل او مباراة

عصام و عبدالرحمن و الله توارد خواطر عجيب

انا كتبت مداخلتي قبل مداخلة عبدالرحمن الثانية و عصام كنت بتكتب في مداخلتك عن العم الخزين


كل سنة وانتو طيبين

إبراهيم عدلان :
القلوب شواهد
كنت حاسس بيك متحاوم هنا
صاح الراحل العزيز الخزين كان من ظرفاء البلاد الأماجد
وكان بيعرف في الكورة وبيعرف في السياسة
وبيعرف في أي حاجة

بس كمان عايزنك تحكي عن أحمد العربي ودريسة وعوض جادين والسر وش الطيرة
وعوض كيتا

عصام علي أحمد :
أهلآ يا ابودية
تتابع ونص وخمسة
وتكتب كمان عن ظرفاء الإمتداد
وظرفاء جامعة القاهرة الفرع
وظرفاء الشايقية

فعلآ في توارد خواطر عجيب
يللا واصلوا إمكن نطلع منكم بي حاجة

الأب العزيز أبو ساندرا
الحلفايا تذخر بالعديد من ظرفاء المدينة أو ظرفاء البلاد كما أسميتهموكما هو الحال في كل منطقة من السودان , منهم نور الدين الشهير بأبو مية الذي قل أن تراه " واعي" يعني سكران ديمة .
في مرة من ذات المرات جاهو واحد من الناس البسطا الشغالين في كماين الحلفايا عشان نور الدين يحلق ليهو راسو, الراجل دخل البيت وتحديداً غرفة نور الدين ونور الدين كان مهووس بي ليلى علوى لدرجة إنو كان معلق صورتا في أعلى باب الغرفة وصاحبنا أول ما قعد قهى في الصورة شديد, أول ما نور دخل الغرفة الراجل سألو:
إنت يا نور الدين دي أمك ؟
نور الدين رد بسرعة و بدون تحفظ: هسي عليك الله دي لو أمي . . أبوي كان مات ؟

ظرفاء البلاد سلام
حينما فكرنا في تكريم نجوم الكوميديا
في السودان
من خلال فرقة الأصدقاء في عيديها الأول
جانا خاطر في اختيار ظريف من ظرفاء الكوميديا الشعبية
بجانب نجوم الكوميديا
ورشح لما الفنان محمد شريف علي
موسى ودنفاش ظريف امدرمان والسودان
وفعلا نسبة لمرضه ذهبنا له في منزله
ونحمل له هدية وعلم تذكاري وكان العلم باللون الأزرق والأبيض
وحينما مددنا له العلم نظر لمحمد شريف وقال له :
....................دبل هلالاب
وضحكت وعرفت ان هذا الرجل كوميدي حتى النخاع
لانو النكته لمن تطلع بتطلع ولو الواقف قدامكارسطو زاتو اداني ليها في وشي
كاش داون ..العوليق ديل هلالاب طبعا بعد التعديل عشان الرقابة
له الرحمة والمغفرة

ود الشايقي لاعب الكرة الرهيب
كان سريع البديهة وخفيف الظل
مرة كان في معسكر الفريق القومي
جلس فترة طويلة كنب يعني احتياطي
وكان الفريق لو واحد من الفريق جاتو ملاريا
خانتو تاني ما بلقاها
وقت تناول وجبة الغدا كان في لاعب عندو صداع
طلب حبوب فمر الجرسون وهو شايل الحبوب والموية
وما عرف الطلب الحبوب وقف قدام ود الشايقي
وقال ليهو انت العندك وجع راس
التفت ليهو ود الشايقي وقال ليهو
لالالا انا عندي وجع خانة

ولا ننسى أبو داؤود ..

Quote: ولا ننسى أبو داؤود

بالضبط
ظريف ظرفاء الفنانين
ومنهم
الراحل عبدالعظيم حركة
الراحل خليل إسماعيل

مرة الفنان الراحل خليل اسماعيل
قابلو واحد قال ليهو فلان الفلاني بفتش عليك
ليه ؟؟
عايز اوزع الأماني
وكان فلان خليل مكجنو وما عايزو اوزع اغنياته
فرد بسرعة
طيب اماني دي ما توزعه انت عشان ما اجي
القاها هنا واقوم افرتق
الرحمةوالمغفرة
له ولروادنا الذين اضاءو ورحلوا

اها الزي ناس حلاق الجامعة
محسوبين على الظرفاء وللا اصحاب
العبارات العفوية !
ممكن يكون في شخصيات كتيرة زيه
لك الود

ولا ننسي المرحوم
عـــوض دكــــام

ود بركات
كل سنه وانت طيب

ارجوا استدعاء كمال الي هنا لانه خير من يحكي اهل امدرمان

من ظرفاء بحري ( حرنكش ) وكان مبتلى بتدخين الخدرا
في مرة وفي منتصف الليل وهم جالسين ( شلة الانس ) وبعدها طلع البنقو لكن لم يكن معهم ورق برنسيس عشان يلفو فيه السجارة فقال لهم حرنكش أنا بمشي أجيب ليكم ورق من اليمني بتاع الدكان.
كان اليمني ينام قرب دكانه فصحاه حرنكش وقال له : السلام عليكم .. يا اخوي عندنا حبوبة توفت عايزين كفن .. اليمني قام وشال معه الفاتحة وبعدها فتح الدكان وأمتر له الكفن وبعد لفا الكفن وناوله له قام حرنكش قال : عليك الله أديني معاك دفتر ورق برنسيس.

ابوساندرا
سلامات وكل سنة وانت طيب
عمنا المرحوم سيد تلول او ( جحا النوبة) كما يحلو لنا تسميته
سيد تلول اول مرة لما جاء الخرطوم نزل الكلاكلة مع ود عمو وزى ما انتوا عارفين الكلاكلات مركز النوبة (دنقالة , محس , حلفاويين) ولما رجع البلد سالوه ناس البلد , الكلاكلة كيف يا سيد ؟ قال ليهم مافى زول بيتكلم فيها عربى غير الراديو.
حارجع ليكم شوية شوية

اها ياابوساندرا انا جيتك وحأتحكر ليك فى بوستك ده للارشفه الجايه ,,

وشكرا صديقى الحبيب فيصل عباس وكل سنه وانت طيب .

( والاقربون أولى ) عشان كده حأبدأ بعمى المرحوم عبد الوهاب الجعفرى الشقيق الاكبر لوالدى

يرحمهم الله ,

فقد كان المرحوم عبد الوهاب الجعفرى من اظرف ظرفاء ام درمان , وكان من اركان دار الرياضه

بام درمان , اذكر كنا فى طريقنا الى دار الرياضه عرجنا على مسجد لصلاة العصر وكان بمعيتنا احد

اصدقائه الذين هم دائما فى حالة فلس وقد مكث بعد الصلاه طويلا رافعا يديه يدعو واطال , فما

كان من الجعفرى والذى كان مستعجلا للحاق بالمباراه الا ان اخرج محفظته ورماها به قائلا ( يأخى

شيل العايزو وخلينا نلحق ) .

كمال عبد الجليل المشهور ب (سينا)

كان يرحمه الله من اظرف الظرفاء , ذهب ذات يوم لشراء اللحمه كعادته فى كل

يوم من عم سعيد وهو من كبار الجزاربن فى سوق ام درمان وطلب منه ان يوزن له

كيلو من الضأن , وبدأ عم سعيد ووضع قطعه كبيره من اللحم على الميزان الا ان

الكفه لم ترجح فقطع قطعه صغيره ووضعها ولم ترجح ايضا وكرر المسأله ثلاث مرات

وكفة الميزان لم ترجح قصاح عم سعيد : ايه الحكايه الميزان ده مالو ماعايز ينزل ,, فرد عليه

سينا وبلغة الحريق : ينزل كيف لو انت بتدى فيهو دو ـ وتريث

من ظرفاء الموردة توتو ترزي
برجع ليكم تاني

..
. ابو ساندرا والجميع سلام
. كمال على عمك عبد الوهاب الجعفرى , عليه الرحمه , كان طاقه كوميديه
. لا تفتر .. ربما يحفظ له السنى وكل المسرحيين الكثير .
.
.. المحطه الوسطى .. ام درمان .. أزمة مواصلا ت فى أوجهاباخنصار مافى حاجه خالص ..
. فاذا عربة كارو يجرها حصان .. واذا بصوت عالى ينادى تاكس ..وسط حيرة الكل ..
. يلتفت الجميع حتى سائق الكارو .. يقف الكارو .. يتجه اليه الجعفرى , يحادثه لبرهه
. يفسح له السائق بجواره يجلس بكامل بدلته و على جانبه شنطة السامسونايد..
.يدير السيايق اللجام شاقا السوق والشوارع تباعا, ميمما شطر المسرح القومى بام درمان
.وسط عبارات الاعجاب الدهشه التهليل التعليقات الضاحكه من الجميع
..
.

سيد تلول مشى وادى حلفا بعد الغرق , واثناء وجوده فى وكالة سفر طلب من صبى الوكالة يجيب ليه موية شراب , فقام الصبى لف سوق حلفا كله ورجع ليه بعد ساعة بدون موية وسيد لما ساله وين الموية ياولد؟ قال ليه ما لقيت مويه , ساعة كاملة وانت لافى فى السوق ومالقيت مويه ؟ وطوالى اتلفت لصاحب الوكالة وقال ليه , انتوا حلفا دى غرقوها بالتراب

ابو ساندرا وزوار البوست ، عيدكم سعيد.

ظرفاء امدرمان كُثر واشهرهم تم ذكره في بداية البوست ككمال سينا رحمه الله والهادي الضلالي ، وهناك ألكثيرين أذكر منهم الحاج شاخور رحمه الله!

يحكى أنه إنتقد الرئيس السابق نميري وتم استدعاءه لبيت النميري وكان هذا في الايام التي قرر فيها نميري أن ينصب نفسه إماماً وبعد ان ساله نميري من اصل الحكاية طلب منه ان يبيت معه فرفض الحاج شاخور بشدة فغضب نميري وساله عن السبب فاجاب يا ريس ما بعيد تصحى بكرة وتقول لي إني ارى في المنام أني اذبحك

Quote: وعوض جادين

كل سنة وانتو طيبين يا ابا ساندرا ورفاقه الظرفاء..


وسأحكي لكم مطولا عن ظرف عوض جادين بعد ان استأذن منه

وانا في انتظار الاذن علي الهاتف..

وعدنا نزار حسين

Quote: وسأحكي لكم مطولا عن ظرف عوض جادين بعد ان استأذن منه وانا في انتظار الاذن علي الهاتف..

لسع منتظر على الهاتف يا نزار ؟
لو أخدتها فركة كعب كداري للديم كنت جبت لينا الإذن
ومتعتنا بطرائف عوض جادين

همتك معانا يا أخو

ويا مصطفى سري لو كنت متابع هذا البوست نرجو أن تجلس مع العزيزة سمية 30
لتحكي لك عن ظرفاء الديم وتمونا بالطرائف

قالوا مرة عوض جادين سأل سمية عن إسمها
قالت : انا سمية تلاتين
قال ليها : سمية كم؟

فى مجانين الموردة يا ابو ساندرا

هل ديل من الظرفاء

لو منهم فى عطا وفى المرحوم مانديلا

وكثر .......................................................

عطا كان بيتحزم من وسطو وبيمشى عارى الصدر من الموردة حتى لخرطوم رجوعا وتحلو لة فى الشتاء القارص هذة الحركة

كان يوم نائم بالغلط فى محل مجنون جار لة وكان المجنون بيكرهة عطا قام صحى عطا ودقاهودقة فى مولد ما يلقاها

وعطا ساكت ساكت بعد الزول فرتق الناس بدت تكربن فى عطا يا عطا مالك سكتة ليهو قام قال ليهم

اللة يطلعنا من الموردة ومجانينة ....................................................................................

فى حقى .........................فى الرب..........................................فى بلوك

ديل من الموردة ................................................................................

سيد البوست ... وزوار البوست .... كل سنة وأنتو طيبين


الأخ/

Quote: عمر سعد

Quote: ..........................................فى بلوك

هل تقصد المرحوم / مبارك الطاهر ... ؟؟؟؟

ياخ الزول ده أظرف الناس ..... اللهم أرحمه وأغفر له ..

-

من ظرفاء عطبره السر عكاز...وهو شخص ذو نكته حاضره..من الشريك مدينة الرباطاب الاساسيه...وقد اشتهر بفن الإقتباس من القرآن الكريم
كان ذات مره يشاهد قطار فى بداية تحركه فظهرت حسناء رائعه من شباك احد العربات..ثم ظهرت حسناء اروع جمالاً من نافذة عربه تاليه فعلق قائلا "والآخره خير لك من الأولى"...!

وذات مره كان يلعب كرة قدم جناح..فكشّاه الباك كشّه عنيفه اوقعته ارضاً فعلق قائلا "والتفت الساق بالساق"..!
وذات مره طلب من صاحبه ان يعطيه رغيفا...وكان صاحبه يخبئ الرغيف فى ملابسه..فحلف له انه لا يحمل رغيفا..وبعد قليل سقطت رغيفه من داخل قميص صاحبه..فقال له" قد خاب من دسّاها"

وكان عادة يأتى الى المنزل متأخرا فيدخل دراجته بالمقلوب فيبدو وكأنه خارجا للتو...وعندما يسأله والده ماشى وين يرد عليه وهو يدخل الدراجه:أها خلينا المَرْقه...!

وكان ساخرا من الفقر فحكى ذات مره ان زوجته تضع له الصينيه وبها صحن فول وعيشتين..التقول عايزه تلعب معاهو "صفرجت"...!

Quote: كمال عبد الجليل المشهور ب (سينا) كان يرحمه الله من اظرف الظرفاء , ذهب ذات يوم لشراء اللحمه كعادته فى كل يوم من عم سعيد وهو من كبار الجزاربن فى سوق ام درمان وطلب منه ان يوزن له كيلو من الضأن , وبدأ عم سعيد ووضع قطعه كبيره من اللحم على الميزان الا ان الكفه لم ترجح فقطع قطعه صغيره ووضعها ولم ترجح ايضا وكرر المسأله ثلاث مرات وكفة الميزان لم ترجح قصاح عم سعيد : ايه الحكايه الميزان ده مالو ماعايز ينزل ,, فرد عليه سينا وبلغة الحريق : ينزل كيف لو انت بتدى فيهو دو ـ وتريث

بالله كتر لينا من الراجل ده مبالغه

الأخ الحبيب ابوساندرا
كل عام وانت والأسرة الكريمة بخير
عصر يوم الوقفة اتصلت بمنزلكم وأفادتني المدام بأنك نائم ورجوتها أن لا توقظك.
من ظرفاء الخرطوم أيام زمان رجل الأعمال وقطب الوطني الاتحادي آنذاك المغفور له إبراهيم جبريل.
مرة سأله أحد الشباب( يا عم إبراهيم عندك فكة عشرة جنيه؟ ) فأجاب بسرعة( يا إبني العشرة جنيه نفسها فكة وعايز تفكها)

تحياتي ومودتي.

هاك دى يا محمد الطيب
مره الجماعه بتكلمو عن غضب الوالدين لما الكلام كتروهو سينا قال ليهم
" والله غضب الوالدين ده شدة ما كعب فى الكشتينه بلحق الواحد, ياخى لو عندك تسعه يخليك تجر آس

الجماعه كلهم متلمين يوم الجمعه فى بانت بمنزل الكمندان (...) والحريق مدور

والكمندان ماسك ليهو دو اسود دبل ماعايز يفكو والفى يمينو قافل على دو الاسود

من تانى جره . فى هذه اللحظه دخل كمال سينا ومعه احد جيرانه كان قد ادخل ولده حراسة

القسم الاوسط فى مشاجره وحضر للكمندان الذى كان فى ذلك الوقت رئس القسم ليتوسط له لاطلاق

ابنه من الحراسه , والكمندان مازال ممسكا بدو الاسود حتى ادكت الكتشيته, سينا قال للراجل

ارح ياخى , ده مافك دو الاسود عايزو يفك ليك ولد .

ولود اللمين كثير من الظرف
نرجو ادراجه هنا يالسني..



كمال سالم شكرا ليك يا وجيه
ومزيدا منك ومنهم ...



يا بركوته انت وين؟؟؟

طلب فيصل عباس إدراج ابواللمين هنا كظريف

Quote: ولود اللمين كثير من الظرف

فهاك دي

في مناسبة عنا فيها وكان الجو بارد
طلب زيادة { عسا }
قالوا ليهو : العشا كمل
قال ليهم / كمل سزنغ

إشارة للزعيم المحبوب للأربعين مليون كوري\
كيم إيل سونغ

ابوساندرا
تشكر علي هذا البوست والذي نقلنا الي جو من المرح
من ظرفاء امدرمان وحي ابوروف تحديدا وهو من سكان الثورة الحارة السابعة حاليا العم قريب الله ابوصلعة وهو لاعب كرة معروف لعب لابوروف ودرب فريقها ولعب للهلال له من الطرائف الكثير
وبمناسبة عيد الاضحي واثناء الصلاة كان في واحد جارنا اسمو عمك الطاهر ماصلي مع الناس وبمجرد ما الامام انتهي من الصلاة ولم يبداء الخطبة عمك الطاهر ذبح الخروف وعلقو في الباب وبيسلخ فيهو اخونا قريب الله اتلفت شاف ليك الخروف معلق فوق فقال لي تعرف يامتولي عمك الطاهر دا لو كان سيدنا ابراهيم كان سيدنا اسماعيل راح فيها

Quote: هاك دى يا محمد الطيب مره الجماعه بتكلمو عن غضب الوالدين لما الكلام كتروهو سينا قال ليهم " والله غضب الوالدين ده شدة ما كعب فى الكشتينه بلحق الواحد, ياخى لو عندك تسعه يخليك تجر آس

والله يا احمد الباشر وكمال سالم خليتو الواحد قاعد يضحك في المكتب براه زي المجنون
والله سينا ده موضوع بوست برااااااه
وانا متاكد راجل بالظرافه وسرعه البديهه دي لو قعدتو تحكو عنو للسنه الجايه
مابتكونو كتبتو نص المواقف بتاعتو
ربنا يديكم ويديه العافيه
طلعتونا من الجو الزفت ده
وهل من مزيد

عبد الوهاب الجعفري
الفنان العملاق
عرقلة
شكلة
كل الشخصيات الشريرة والعنيفة
كانت توكل للجعفري
اطيب مخلوقات الله
واجمل من مشى على الأرض
اعني الجمال الجواني
وكان يحب النكته ويطلقها حتى ولو اصابته نفسه
في دار الرياضة كان احد الحكام قد اظهر ميوله الواضحة لأحد الفرق
وبما ان دار الرياضة ام درمان الكل بتعارفوا
سمع الحكم جماعة الجعفري في المصطبة بصيحوا بصوت عالي
بااااااع باااااع قاصدين الحكم انو بايع المبارااة
فمشى الحكم قريب من الخط ونظر فيهم مليا وهوحادر وصاري وشو
فما كان من المجموعة وبصوت واحد وبطريقة دراماتيكيه
عبد الوهاب الجعفري في دور الخرووف
فنظر الحكم الى الجعفري
طبعا الجعفري لازعل ولا اتلفت نظر للحكم وقال
والله لولقيتك في الأول كنت اديتك الدور وصاح باااااااااع باااااع
له الرحمةوالمغفرة

من حكاوي سيناالظريفة مع السياسة... التي سمعتها من شخصه عليه رحمة الله
أنه قابل الصادق المهدي في مناسبة زواج بود نوباوي
وبعد ان سلم عليه - مازح السيد الصادق قائلاً:
شنو يا السيد الصادق جايب لينا وزير نزولو ناقص...
(إشارة إلى الوزير جبر الله خمسين جبارة الذي تم تعيينه وزيرا في العهد الديمقراطي الأخير)..
فهمها الصادق المهدي وضحك بعمق في ذلك اليوم...
---
ولسينا حكاوي كثيرة مع نميري بحكم أن ودنوباوي يجمعهم .... أرجو من يعرفهاأن يحكيها إلينا
------
كذلك حكي عن فطنته وظرفه أن صاحب تاكسي أتى يحمل حاجة عجوز جدا دونهاالخرف وسمعها تقيل
ووقف أمام مجموعة تجلس تحت شجرة أمام بيت ما ضمنهم كمال سينا قائلاً لهم:
يا جماعة الحاجة دي شلتها من السكة حديد...
وعذبتني عذاب الويل وما لقينا البيت وقالت في ود نوباوي وحرام علي أنزلها وأخليها ... دي بتقيف بالجلالة..
قالت أهلها في ود نوباوي ...
قام كمال سينا سأل الحاجة عن اسم أهلها البتدور عليهم....
قالت ليه: ناس اسماعيل ميرغني سر الختم... أخوي ود عمي..
سينا قال لبتاع التاكسي: يا أخوي دي ود نوباوي "ناس الصادق والصديق وعبد الرحمن" - الحاجة دي دور بيها بحري الشعبية أو حي الختمية...
بتاع التاكسي توكل على الله ودور بحري....
بعد ساعتين جاهم راجع وشكر سينا... مخبرا أنه مجرد دخوله بحري الشعبية وسؤاله لأول شخص دلاه على البيت على طول....

حضور ومتابعة ودردقة من الضحك والابتسامة من بلاوي وحكاوي ظرفاء المدن..
وكمال سينا زول نكتة تمشي علي قدمين
وهو مريض وراقد في المستشفي زاره التلفزيون وتطرق الحديث الي الشان الرياضي
والملاعب والميادين والساحات المفتوحة
فقال للمذيعة الحكومة دي ما خلت ساحة ولميدان فاضي كلها لمتها عليها
حسع الواحد لو داير يطالع ليهو زول الخلاء ساحة فاضية ساااكت ما يلم فيها

رحم الله كمال سينا فقد رويت عنه طرائف عديدة

قيل أنه قد زاره جمع من أصحابه في عيد الأضحى ، وبكرم معهود فيه أصر أن يتناولوا معه صحن لحمة كارب . جاءهم باللحم وكان طيب المذاق فسأله أحدهم
" من وين اشتريت الخروف الكارب دا ؟؟ "
فأجابه بصدق
" والله الخروف دا أنا ما اشتريتو . عندي واحدي صاحبي من الجزيرة جابو لى هدية "
ويبدو أن الرجل أراد إغاظته فقال له
" لكين الضحية ما بتجوز بالهدية .. لازم تشتريها بى قروشك "
فأجابة سينا بسرعة
" ليه ؟؟
هو سيدنا إبراهيم زاااتو مشى الزريبة اشترى خروف ؟؟
ما الخروف جاهو هدية .

أبوساندرا مساك فل
وكل سنة وإنت طيب
دى حكاها فتحى مسعد حنفى عن أحد ظرفاء بحرى زمان .. عكاشة ميرغني

Quote: اغشي ليك عكاشة ميرغني ومن نوادرو انو كان عندو صاحب اسمو عمر الحلبي ودا كان في بداية الستينات عندو حكاية مشهورة وهي انو ختف واحدة حبشية معنكشة دهب وطلع ليها مسدس لعب وشال دهبها ولما المرا وصفتو للبوليس عرفوه طوالي وقبضوا عليهو ويوم المحكمة جابو عكاشة شاهد لانو صاحبو وما بتفارقو فالقاضي بيسألو اسمك شنو؟رد عليهو:عكاشة ميرغني المأمون وأحمد حسن جمعة0 طبعا القاضي اتنرفز وقال ليهو انت يازول جايي تهزر في المحكمة قام عكاشة قال ليهو لا ما بهزر سعادتك دا اسمي ولو ما مصدقني أثبت انو ما اسمي فالقاضي فوتها ليهو وقال ليهو طيب ياعكاشة احنا عارفين انك صاحب عمر المشهور بكاوبوي بحري (لان الجرايد كانت سمتو كاوبوي بحري بعد الحادثة )طيب يوم الحادثة انت ليه ما كنت معاهو.عكاشة رد عليهو وقال لاني سعادتك يوم الحادثة حصاني كان في البيطري ومسدساتي في التصليح. القاضي اداهو شهر سجن.

العزيز ابو ساندرا ابو البنيات..
كل سنة وانت وأسرتك الكريمة بخير.

انت ذاتك واحد من ظرفاء البلاد.



الأخ محمد الطيب حسن بروفايلك ده لكن مافى فلم
هندى عدييييل

ابو نضارات
صباح الخير
في معيتنا اليومين ديل الاخ الضاحك محمد شيلا .....نجم الكوميديا ... ونجم فرقة الهيلاهوب وممثل بورسودان الشرعي في النكت والتنكيت ....
وصاحب شخصية ابكرونة الشهيرة....
هو دنقلاوي.....هدندوي .....فلاتي.....يعني خلطة سودانية .
وعد انوا يكتب ليك عن اول سوداني قال نكته مسجلة....اعني.... الراحل المقيم العم جابر سعيد....
من ظرفاء بورسودان ..... نكتة متحركة.
ومن قفشاته انو كان في واحد من الشحادين في سوق ديم سواكن بيشحد بمدحة البرعي ( ياراحلين الي مني) ولما كان جابر صوته جميل .... وقف وبقي يمدح مع الراجل فواحد من الناس اده الراجل طراده .... وجابر خمسين قرش فعشان يوضح للناس انو ماشحات رجع القروش للراجل فالشحاد قال ليه : تشتغل معايا.
وفي الجراب الكتير من اجمل مدينة ساحلية .... عن دجانقو ....وشيبة جنني .... والكثيرين.
وراجع ليك.
التحايا
هارون دياب

الاخ ابو ساندرا
كل عام وانتم بخير وشكرا علي هذا البوست الظريف

الاخ حيدر الجقدلي - اطال الله عمره - من ظرفاء المساكن الشعبية ببحري وكثير من قفشاته منزلة في بوست الشعبية تحت مسمي ( جقدليات ) واعتقد ان شباب الشعبية لن يقصروا في هذا البوست .



جقدليات
بالأمس تذكرت احدى طرافات الأخ حيدر الجقدلي حين جاء أحد الشباب و هو ينطلق بموتر سايكل بسرعة جنونية و مثير غبار شديد ، نفس الموقف حدث بالشعبية اذ كان هناك مجموعة بينهم حيدر يقفون و جاء شاب ينطلق بموتر مثير لغبار شديد بالقرب منهم حينها قال حيدر موجها كلامه لصاحب الموتر: يا رب قندران بي ترليتو ، واحد من الواقفين معاهو سأله : عرفنا القندران الترلة لي شنو؟ رد عليهو حيدر : عشان لو جل من القندران ما يجلي من الترلة.

هذه سمعتها منسوبة الي كمال سينا:

قال كنا لاعبين كتشينة (حريق)...كل مرة يوزعوا لي الورق زي الكلمات المتقاطعة بتاعة سودان ناو

واقول ليهم (دك)...يقولوا (حك) وتاني يوزعوه اقول ليهم دك يقولوا حك...لامن خرتوني عدموني
الملينة الحمرا..ومرقت منهم بالليل ماشي علي بيتي...حكمة الله كلاب ام درمان دي كلها بارياني


حك حك حك حك حك حك حك حك حك حك حك حك

كمال سينا، رحمة الله عليه، كان بيلعب في الكوشتينة مع يس عمر الإمام وقام سألو قال ليهو بالله يا ناس الإنقاذ إنتو جيتوا تنقذونا من شنو؟ مش كان أحسن تخلونا في حالنا ديك؟
يس عمر الإمام قال ليهو والله نحن لو عملنا الانقلاب دا كان جون قرنق دخل الخرطوم عديل.
سينا قال ليهو والله جون قرنق كان أسي وصلنا في الخرطوم دي كنا قابلناهو بي "طلع البدر علينا من ثنيات الوداع".

انا غايتو دخلت في الحتة دي قاصد أفصل بين القوات
يعني زي قوات حفظ السلام وكدا
حتى ماتقوم عكة غبارها رابط بين
أمنة مختار وهاروزن دياب
ماتنتهي إلا في سواكن

فلو جلينا الموقع بيكون العتب على النظر

العزيز أبو ساندرا

تحياتي و أسمح لي أن أشترك مع الظرفاء في ظرفاء البلاد و أقدم بعض من ظرفاء مدينة (الأبيض) و أبدأ بالأخ ود بــري ..... هنالك خيط بظرفاء المدينة نزل في بوست (الأبيض دي وين)

(الأخ ود بري)

معروف للجميع بأنه هلالابي على السكين و صاحب مزاج رايق! و له ( صديق لدود) مريخابي . الصديق يصر دائما أن يجلس في دار الرياضة إلي جوار ود بري الذي لديه كرسي لا يبدله و لا يجلس عليه غيره حتى و إن لم يحضر المهم جلس ود بري و صديقه إلي جواره و كانت المباراة (هلال مريخ) و الهلال كان ضاغط المريخ (لمن جاب الزيت). في كل هجمة خطرة على مرمي المريخ ، يقوم صديقه المريخابي ينده: يا سيدي على .. يا سيدي على .. يا سيدي على .. تقوم تفشل الهجمة ، ود بري ينظر ليه بغضب و بدون تعليق و تكررت العملية لعدة مرات و في النهاية طلعت المباراة تعادل بدون أهداف. ود بري طلع (كابس) بس بدون أي تعليق. صباح اليوم التاني : ود بري جالس أمام دكانه ( محل عجلات) يشرب قهوة الصباح جاه صاحبة حزين و مهموم : يا ود بري ما سمعت الخبر المحزن ده بالله؟
خبر شنو؟ - طبعا لسع زعلان من نتيجة المباراة أمس –
ما سمعت سيدي على مات !!
فكان رد ودبري سريعا و ساخرا:
ليه ما يموت إذا امبارح ملعبو شوطين!!)

عزيزي ابوساندرا
كل سنه وانت بخير
ولاتنسوا في بحري الدكتور عوض دكام وقفشاته
فقد كان ايام الدفاع الشعبي يعمل في امدرمان بلبسه الذي يشبه لبس السجون فقابله طالب من طلاب المدارس المتوسطه فقال لعوض دكام
انت شغال شنو
فقال له عوض دكام
انا كبير استشاري الاسنان في السودان
فوضع الطالب يده علي راسه وقال
ياعمو بالغت والله دي قنبله تفجر الخرطوم كلها
فضحك عوض دكام ولم يعلق

مع حبي
ابوتسابيح

عزيزي ابوساندرا
كل سنه وانت بخير
ولاتنسوا في بحري الدكتور عوض دكام وقفشاته

فقد سئل عوض دكام مره هل مشيت الدفاع الشعبي فقال انا والله السوق الشعبي ما امشي خلي الدفاع الشعبي
ولا ننسي كذلك في بحري ظرفاء استاد التحرير
ابورادي ذلك القادم من الجريف شرق والذي يفقده الكل يوم ان يغيب عن الحضور
فوجوده يجعل للاستاد طعم اخر
وكذلك معه في الاستاد ابواللول


مع حبي وتقديري
ابوتسابيح

Quote: العزيز ابو ساندرا ابو البنيات.. كل سنة وانت وأسرتك الكريمة بخير. انت ذاتك واحد من ظرفاء البلاد.

أملت فينا خيرآ وظرافة ، العزيزة آمنة مختار ، فدشنتنا في زمرة الظرفاء
اسأل الله أن يحشرني معهم
أحسب انهم من أهل الجنة

أها ده واحد من ظرفاء البلاد معروف بلقب { طيارة } حكى عنه هيثم عبدالعزيز ود القوز
في بوستنا المقرؤ عن الديوم الشرقية فقال :

Quote: العزيز أبوسـانــدرا من طــرائــف شُلل الديوم الغربية و بالأخــص في القــوز هاك دي: أذكـــر في سنــة 1986 على ما أعتقد عندما وقعــت الطـيارة الليبريــة في أركــويت .... في القــوز هناك عندنا واحــد إسمــو طيارة معروف و مشهور بخفة الدم و الفكاهة و من ثم (بالشربـة) ... و كان في ذلك اليوم يالليل في حفلة في القوز ... و كان صاحبنـا طيارة دة واقف لطططط .. و برقص جم النســوان ... اهـا في مــرة فصيحة كدي قالت ليهـو ... يا طيارة زح كدة ما تقوم تقع فوقي ... و بسرعة البديهة قال ليها أقـع فيك إنت أصلو أركــويت ... و طبعاً الحفلة كلها بقت تضحك هاهاهاهاهاها... و بجيـــك صـــادي مرة تانيــة كان بقينا من أهـل الدنيــا... هيثـــم القــوز

تعال صادي هنا يا هيثم القوز وجيب معاك قفشات من طيارة

ود الشايقى لاعب المريخ

كان معتاد على السهر مع الاصدقاء
وحينما تزوج اصبح الانضباط والالتزام الاسرى صعبا عليه
واصبحت الوليه كلما يطلع تقول ليهو الساعه اسع كم
وكلما جاء متاخر تساله اسع الساعه كم

يوم جاء متاخر وسالته وقالت ليهو عليك الله شوف الساعه كم
فجاوبها - انتى يا وليه مجننانى الساعه كم الساعه كم
انا اصلو مأجر منك عجله

اتنين من ظرفاء كسلا ( نسيت اسمائهم )

كانوا كبار فى السن واصحاب وبيجلسوا فى الاستاد متجاورين
واحد بيشجع فريق الميرغنى والتانى بيشجع فريق التاكا كسلا
مره فى مباراه ميرغنى تاكا فى ستاد كسلا
وعمك بتاع الميرغنى بره الاستاد ولسع ما دخل الاستاد الميرغنى جاب
قون واتقدم على التاكا بهدف .. ففرح عمك وانبسط ولمن دخل حاول يرفع
كثافة عمك بتاع التاكا فقام ساله ليك
- الغالب منو يا فلان
فاجابه عمك التاكاوى
- الميرغنى
فساله زول الميرغنى
- بى كم قون
فاجابه التاكاوى ممتعضا
- قون واحد
فرد عليه بتاع الميرغنى مندهشا وهو يرفع حواجبه محاولا رفع كثافته
- قون واحد بس
فرد عليه التاكاوى
- هو كمان فى قون بيجى تيمان

يحكى عن حاج على الله ( واحد من ظرفاء الشعبيه بحرى ) والله يرحمه

انو كان لاعب كتشينه مع بعض الاصدقاء
وجاهو ورق جاهز وقافل على بتين حمر يعنى بت هارط او بت دينارى تفتح ليهو
والزول البيديهو البايظ عندو البتين وما شغالات معاهو وظل ممسكا بهن
الى ان قام واحد من التربيزه فتح ومسكوا ليك حاج على الله الاربعتاشر فوق
قام سال ليك صاحبه الشماله وقال ليهو عليك الله اسع ماسك البنات ديل داير
بيهن شنو وهن ماشغالات معاك
الراجل وبكل براءه مسك ليك بت الهارط وقال ليهو دى قريبة غطاء
فباغته حاج على الله وقال ليهو - طيب والتانيه دى قريبة امك

كتب الظريف علي محمد علي بشير :

Quote: اتنين من ظرفاء كسلا ( نسيت اسمائهم )

ديل إلا اسأل ليك عنهم زميلنا عصام علي أحمد
أصلو متخصص في نكت ناس كسلا
وعندو نكتة عن فريق الشايقية وأظنو فريق الميرغني وفريق الفلاتة وده ماعارف إسمه
ياريت عصام يكون متابع معانا ويجي يحكيها

وبالمناسبة كنت مفكر أضيف لظرفاء البلاد ، ظرفاء البورد
وكنت ح أختارك من ضمنهم

Quote: وفريق الفلاتة وده ماعارف إسمه

فريق القاش يا ابو ساندرا

Quote: وبالمناسبة كنت مفكر أضيف لظرفاء البلاد ، ظرفاء البورد وكنت ح أختارك من ضمنهم

ان كنت تحسبنا من الظرفاء
فحتما نحن تلاميزك يا امير ظرفاء البورد

الــــــــــــــــهــــــــــــــــــــادي الضـــــــــــلالي يا سامي براه كوم


والعالم الجبانات

نسو

عـمــــــــــــــــــك بــــــــيِّـــــــــــــن

ود هبانى الواحد دا قالى واحد بخيل جدا دخل عليه صاحبه رباطابى وهو يأكل ويجلس أمامه كلبه فكلما هم الرجل بتناول لقمة هم معه الكلب بتحريك رأسه إلى تحت وكلما رفع الرجل راسه ليأكل اللقمه حسب الكلب أن اللقمة له فرفع راسه فظل الكلب يرفع رأسه ويخفضه مع حركة صاحبه فأحتار صديقه الرباطابى من المشهد وقال لذلك الكلتان ياخ إنت بتدى فى الكلب دا إملاء والله شنو

أبوساندرا ،، تحايا بحجمك ،،

يُحكى عن بابكر (زراع) أحد ظرفاء مدينة ودمدني أنه عندما كان يقيم بدولة الإمارات مع اللاعب الفاضل سانتو

أن والدة سانتو بينما كانت تشاهد مباراة بالتلفزيون يلعب فيها الفاضل ، وقام أحد اللاعبين بضرب اقاضل

ودخل الدكتور الملعب ، قالت حاجة عشه أنا ما قلت ليك السجمه دي بطلها ،، فرد عليها زراع والله يا حاجه

عشه لو ما السجمة دي سيل ما كان يجيبك هنا ..



ويًحكى عنه عندما وجد الفنان صديق متولي صديقه موسى الثعلب ( ظريف آخر ) بمدينة كوستي في حالة فقدان وعي

أيام الزمن كان زين ، فأحضر صديق متولي موسى بعد نهاية الحفلة إلى مدني ، ولم يجد مكان لموسى غير بيت زراع ..

صحى موسى فوجد زراع بجواره فسأل زراع ( الجابك كوستي شنو ) رد زراع يا موسى إنت في مدني ، رد موسى معقول ؟؟

فما كان من زراع إلا وأن نهر موسى و قال ( سبحان الذي أسرى بعبده ليلاً ، قوم لقوك ما عارف الليل من الصباح وجابوك

ناس صديق متولي ) ..

عارف يا عبدالرحمن مدني مليانه بكمية من الظرفاء فيهم حالة عبقرية ، المرحوم يحى جاد كريم ( جحا ) كان

يضع إبداعاته في غالب رفيع ، بُحكى عنه أنه قد حضر إلى المنزل في حالة لم تمكنه من إدخال مرتبته

رغم إزدياد المطر ،، فدخل وتمدد بجوار أخيه زكريا ( ربنا يرحمه ) فهاج زكريا ، قبادره يحى ( يا زكريا إن بشرناك

بغلام إسمه يحى ) .

ويحكى عن يحى أثناء عمله باليمن أن قام بالجرورة من عم صالح أحد أبناء اليمين الذين عرفتهم مدني قبل رجوعه لليمن

وأشترى يحى أشياء لا تتجاوز في مجموعها (100ريال ) إلا أن عم صالح حاسبه ب (1400) ريال ، وإكتشق يحى أن عم صالح قد

جمع السنة الهجرية مع المديونية ، فقال يحى قصيدة عصماء ، أذكر منها :

يا صالح ويا مصلح لقد هيجتموا شجني .

أعيدوني إلى داري ..

أعيدوني إلى مدني ..

وفي مدني إلى قردة ( احد بائعات الخمر في ذلك الزمن ) .

وسأله صالح ويش هذه القردة يا جُحا ؟؟

أتمنى التوثيق لهؤلاء العباقرة ،، كانوا يُشكلون ملح المدينة ..

الاخ العزيز ابو ساندرا..
كل سنة وانت طيب والعينين دايما طيبات..
ابراهم البشير المشهور بـ(كِرّة) احد ظرفاء منطقة جبل اولياء ان لم يكن اظرفهم على الاطلاق.. يطلق التعبيرات الساخرة، بكل بساطة.. وهو بحق بطل المواقف الساخرة.. اليكم هذا المشهد للتدليل على سخرية على الرجل ..
جلس بعض الناس يتسامرون بعد سقوط الصاروخ الأمريكي علي مصنع الشفا بالخرطوم، وذلك قبل حلول الألفية الثالثة بقليل. فاقسم الكثيرون منهم أنهم لو (قبلوا) علي الأمريكان لأذاقوهم الأمرين( شفتو نحن شجعان كيف؟؟ لدرجة الغلط!!). وسرحوا ومرحوا في أنهم لاشك ملاقوهم ولا شك أنهم هازموهم (ناسنا نحن الهازمين الأمريكان، بإمكانياتنا التي أقواها هذا المشهد). وإنهم لهم قد تسلحوا
- والله نحن ما شينين خلاص كان قمنا. نحن البدور كتالنا منو ؟ نحن والله الأمم خاتانا لليوم أب سجم...
كان احد كِرّة حاضرا المشهد منذ البداية، فلم يشارك في القسم المغلظ بالقضاء علي الأمريكان. تدخل قائلاً: يا ناس إتو ماكُن نصاح أمريكان شنو البتقدرو عليهم.
تحفز الجميع.. مالك ماشفت جدودنا في المهدية شن سووا ووكتين كتشنر الخِويوِجي داك جاب ديشو وجا..
-إتو يا ناس ماكن نصاح .. سلاح زمان دا كان سلاح؟ تجري لامن تقبض الزول وُتعَمْتو(أي تلتحم معه).. دا سلاحن بنفع للزمن دا؟ هسع أمريكا دي ضربتكم كيفن..
- ما بطيارة جات من الشمال ضربت وفاتت.. رد احد الحضور..
- ضربت وفاتت زول جاب خبرها مافي؟ لا انشافت لا أنسمع لها صوت. وبعدين بعدما ماضربت مرقت تتقدل علي كيفها..ها غشيم ها..أمريكا ما ضربتك بطيارة..أمريكا من البحر الأحمر فكت صاروخ بوووووووو ضرب مصنع الشفا بدقة وما أصاب حتى مصنع الطحنية الجمبو.. تقول نكاتل أمريكا.. انتو الواحد فيكن يقعد في المُسْتُراح(دورة المياه) يهدف غلط..
حليمة

تحياتي ابو ساندرا:

طبعاً انا من ناس مدني...

والنكتة التالية بطلها زراع (ربنا يرحموا):

زراع سمع انو صاحبوا جاء من الامارات ليهوا شهرين و صاحبوا ما جي عزاهوا في أموا ..
أها زراع زعلان من صاحبوا شدييييييييييد...
اها صاحبوا لاقاهوا بالصدفة جنب الصينية بتاعت المستشفي (مستشفي مدني) وقام لفة الصينية
وجاء لي زراع عشان يديهوا الفاتحة ...زراع رفض يرفع للفاتحة وقال لي صاحبوا...


تديني الفاتحة في الصينية اصلو أمي ماتت في اسبوع المرور العربي..

ابو ساندرا ، والمتداخلين ، كل عام وانتم بخير
طبعا يا ابو ساندرا قعر بابور من اظرف ظرفاء الديم وبي حركاتو العجيبة ديك
مرة ايام ظهرت كلمة الحفلات الصغيرة وسموها (بارتي) كان في حفلة في حلتنا
لاحد الناجحين للجامعة ، جا قعر بابور وسال حفلتكم بمنو ، واحد من الشاب قال
(بارتي ) يا قعر ، الراجل قعد منتظر ، وزمان الفنان بيجي الحفلة اتناشر بليل
ولمن الساعة تلاتة ، قعر وقف على حيلو قال انتو فنانكم بارتي دة ساكن وين اصلو.

ابو ساندرا ، برضو عن قعر بابور، والذي كنا نقول ليه كشي كشي قعر بابور قال ما بختشي
عند وفاة عزيزنا سامي عز الدين الفكي وعند دفنه بمقابر فاروق ، جا قعر بابور
ولان سامي كان من الشباب النضر وحزنت عليه الديوم كلها وشبابها جاءوا الى المقابر
وصادف ان كانت هناك جنازة اخرى لكن عدد الذين شيعوا وفي المقابر لم يتجاوزوا
عشرة اشخاص ، فسال احد الشباب قعر (انت الناس ديل ما عرفناهم منو هم ) وقعر نفسوا
لا يعرفهم لكنه رد (سيبك منهم دي ودية انت عندك دوري بي جاي )بسبب كثرة المشيعين لسامي.

برضه من ظرفاء الديم
عبدالرحمن بركات ومصطفي سري والماظ بتاعة الزغني ..
كل عام انتو والماظ ب1000 خير

منعم اتا هشام هباني عامل ليك امر قبض بهناك تتحاوم بهنا داير ليك ضمانة
مني وللا من ابو ساندرا ، يا خي كل سنة وانت طيب

مكرر ، ودة كلو من منعم

والعم كردمان هو احد ظرفاء مدينة الثورة الحارة السابعة صاحب نكتة ورد سريع ساخر وشاعر مجيد في الحلمنتيش
في احد المرات وانحنا قاعدين في المسطبة ومعانا صديقنا محمد ابو الشهير بالنيتو وكان لابس بنطلون جينز من النوع البيقيف براهو موضة وكدا فجاء عمنا كردمان ماري وسلم وقال للنيتو
كل ما اشوفك صفائي بتعكر
وللخوة القديمة بقيت تتنكر
دا بنطلون جينز ولا شوال سكر

Quote: عـمــــــــــــــــــك بــــــــيِّـــــــــــــن

عمك بين
الشافع من طول الانتظار و شدة الزحمة على الباسطه غلط فى الكلام و قال ليهو
ما تلف لينا( اتنين بين) ياخى,... ما واقفين من الصباح!
عمك بين طوالى قال ليهو
و الله عمك بين كان بتلفا ! ... كان كمل زمااااااااااان

بوست لذيذ زي كاتبو ومشاركينو

بالله يا ابو ساندرا افضى ليه حبة وما تعمل لينا فيها فتران وعايز ليك جركانة عسل.

كتبت الشقيقة الجندرية :

Quote: بالله يا ابو ساندرا افضى ليه حبة وما تعمل لينا فيها فتران وعايز ليك جركانة عسل.

والله طلتك علينا هنا ، بعد طول غياب ، نقدرها ونعزها
وفعلآ احوك مرهق وفتران
الأسبوع الفات كلو جري في الأسواق
عشان سفر البنات
وأمس سافرت ساندرا إلى ماليزيا
واليوم مساءآ ح تسافر ماهيتاب إلى السودان
وكملو الفينا كلها والعندنا
تعب وفلس
فبدل جركانة العسل دي
رسلي جزلانة دنانير ودولارات
من ساعات العمل الإضافية

ابو ساندرا ازيك عيد سعيد بوست خفيف الظل زي سيدو

Quote: رسلي جزلانة دنانير ودولارات

دي بالغت فيها يعني نحن نقول شنو؟؟؟؟؟؟؟
صفية

من ظرفاء المهجر :

عبد الرحمن بركات المشهور باأبوساندرا .

كنا حضورا فى ندوه يحكى فيها احد السفراء المعاشيين تجربته وذكرياته

ايام العمل الدبلوماسى , ومن ضمن ماحكى السفير ان الناس دائما ماتفتكر

ان الدبلوماسيين ( ناس بتاعين شربه ) ودلل على ذلك حين ذكر بانه حينما

تخرجوا من دوره عسكريه تعقد للدبلوماسيين فى وادى سيدنا اقامت ادارة الجيش

حفل وداع لهم فى نادى الضباط بالخرطوم وكان عددهم عشرون دبلوماسيا من ضمنهم

مرتين ( سيدتين) .

وصلوا لمكان الاحتفال فوجدوا الترابيز مزدانه بما لذ وطاب من الوسكى المعتق

( الكلام ده ايام مايو ياجماعه قبل ان ترتد ) . قال السفير وكان من العشرين هنالك شخصين

فقط يتعاطون الخمر . وعندما انتهى السفير من حديثه وقف ابوساندرا وسأله : اوعى

يكون الشخصين ديل المرتين .. وضجت القاعه بالضحك .

من ظرفاء شندي الشاب الرائع الأمين مبارك الأمين
( الحكم الدولي النعيم سليمان خاله )

في مرة كان يستحمى ويغني بصوت عالى فمرت والدته بالقرب من نافذة الحمام وقالت له: يا ولد احترم نفسك وبطّل البتسوي في دا. قام قال ليها : والله انتو يا ناس شندي الحفلة في الحمام تفرتكوها.

من ظرفاء أمتداد الدرجة الثالثة
الهادي ودالجزيرة أبا ( صاحب الإستديو ) في زلط الصحافة
كان يمازح أحد أبناء الأمتداد( ص ) وكان هذا الشخص ( ص ) شين فقال له : والله أنتَ الداية يوم مرقتك من بطن أمك قالوا أول ماشافت وشك رمتك بعيد وقالت سجمي ككّو .

Quote: وعندما انتهى السفير من حديثه وقف ابوساندرا وسأله : أوعى يكون الشخصين ديل المرتين .. وضجت القاعه بالضحك

والأطرف إنو واحدة من تينك المرأتين { السفيرات } كانت قاعدة اليوم داك
شفتها مغطية وشها بيديها وميتة من الضحك
في نهاية الحفل ونحن خارجين حلفت قالت لا هي ولا ألأخرى عملنها

لكن يا كمال سالم المعروف هنا بغير رضاه بكمال علي
لقيت ذاكرتك رهيبة

بعد ظرافة و( فلسة ) أبو ساندرا أرجع بكم لفلسة أخرى بطلها المرحوم سينا

يقال أنه عندما أراد السيد صلاح إدريس دخول الوسط الرياضي عمل حفلاً كبيراً دعا له كل أعمدة الوسط الرياضي بالخرطوم للتعرف بهم وكان من ضمنهم المرحوم كمال سينا . طاف صلاح إدريس على كل المعازيم يردد لهم المعلومات التي عرفها عنهم وعندما وصل للمرحوم سينا
قال صلاح إدريس مخاطباً المرحوم سينا: ما شاء الله سمعت عنك كل خير ، قالوا لى أنك مريخابي من طراز فريد ، وقالوا لى أنك من أظرف أهل أمدرمان وقالوا لى .......
هنا قاطعه المرحوم سينا قائلاً : طيب القالوا ليك الكلام دا كلوا ، ما قالوا ليك إنى مفلس للطيش ؟؟؟

فاكهة الطيران المدني زمان


الطيب العبادي
مراد علي نور
اسماعيل طه

مرة من ذات المرات كانوا شغالين وردية ظهر و من بعيد قبل ما يصلوا المطار شافو ضنب الطيارة الفرنسية و المفترض انها قامت الصباح
لمن سألو ليه الطيارة الفرنسية ما قامت اجابهم احد الحضور انو الطيارة الفرنسية ضربت ليها صقر و هي نازلة
التلاته ردو بي صوت واحد منو في الصقور؟

مرة عوض الصافي ذهب لواحد صاحبه مريش
وطلب منه ودسلفاب
وفي رواية أخرى طلب سلفا كير
عشان هو كان فلسكاب جدآ
وفلسطين للنهاية
برر لصاحبه إنه عايز مبلغ يفتح بيهو تلاتة شوارع
إستغرب صاحبه فإستوضحه

قال : من بيتنا لشارع الزلط عندي 3 شوارع مقفلة
شارع دكان ودالبحر وشارع الجزر وشارع دكان اليماني
الجماعة ديل كلهن طالبني
كلهم عمل منهم ديناصور
ومابقدر أمشي بشوارعهم
فأدينا حاجة نفتح بيها الشوارع ياخ

يا سلام يا ابو ساندرا...

كده ممكن الواحد يستقبل العام الجديد بابتسامة...

بوست جميل حقيقة،، انا من قبيل بضحك زى الضارب لى شئ من الصباح







الله يسامحك يا عبدالاكريم .. حرقت لى اهم كرت كنت نازل بيه البوست

Quote: وكمال سينا زول نكتة تمشي علي قدمين وهو مريض وراقد في المستشفي زاره التلفزيون وتطرق الحديث الي الشان الرياضي والملاعب والميادين والساحات المفتوحة فقال للمذيعة الحكومة دي ما خلت ساحة ولميدان فاضي كلها لمتها عليها حسع الواحد لو داير يطالع ليهو زول الخلاء ساحة فاضية ساااكت ما يلم فيها

طبعا دى انا حضرتها فى عالم الرياضة وكان مريض فى المستشفى وزاروهو ناس التلفزيون.. وقاشر بيها وكده...
عملتها فينى يا عبدالكريم




سنة سعيدة على الجميع والسودان بخير

حسن عقد
من اظرف ظرفاء بورسودان.

Quote: حسن عقد من اظرف ظرفاء بورسودان.

بي عقدو دي وظريف كمان !
الله قادر

أبو ساندرا كل عام وانتم جميعا قراء المنبر بألف خير وعافية :
الشىء بالشىء يذكر جدنا المرحوم خير السيد ود مسود ( عم الصديق حسن مسعود ) معكم بالدوحة كان ساخرا وكان يعتقد انه بحكم مكانته فى (المقل ) معروف فى طول المنطقة وعرضها .نقل الى شفخانة المقل مساعد طبى جديد من الزومة . اول مريض جاءه كان جدنا خير السيد، مفترضا أنه يعرفه بحكم أنه من الزومة .سأله عن اسمه فأطرق صامتا ثم كرر عليه السؤال ظن ربما عنده ثقل فى أذنيه . فما كان من جدنا الذى اشتاط غضبا على اساس ان ود قسم السيدالحكيم ما عرف خير السيد ود مسود.فقال له " سجل عندك اسمى ( الخديوى اسماعيل )
اول من جاب من نيالا مركوب نمر قريبنا( ....) وكان فى ذالك الزمان مركوب النمر مودة وقاصرة على علية القوم .الحقيقة هذا الرجل جنن المركوب جن فى الأعراس وفى العزاء وفى صلاة الجمعة باختصار لابسه طول اليوم هذة الحكاية ضايقت جدنا خير السيد جداً والناس بدأت تعلق عن المركوب عندما قابل جدنا خير السيد ( .... )قال له " ياولدى حرم النمر دة أيامه الكان حى ماحام الحوامة دى "
(....) عندما كان وزيرا للخارجية طلب من مجموعة من الدبلوماسيين أن يعدوا له دراسة وسأل عن أحدهم لم يمكن موجوداً فقيل له مشى المستشفى لأنه زوجته وضعت تيمان . فقال لهم "دة دبلوماسى أم عربجى ؟ "

Quote: عم الصديق حسن مسعود ) معكم بالدوحة

اهو ناس نادوس { عبدالجليل عبدالحليم } طلع عندهم زول ظريف
انا كنت قايل رقم صفر بس

أبو ساندرا

تحياتي و من الأبيض تاني:

الأخ العزيز عبد الهادي على سالم ، عليه الرحمة
ترزي افرنجي (فلته) و مركز تجمع للأصدقاء في الأبيض – مرة كنا معه في الدكان و بدون أي مقدمات نادي ابنه (عوض) و طلب منه أن يكتب اسمه ، وقتها عوض كان في الفصل الأول ابتدائي و لسع ما كملوا الحروف. الابن عوض كتب اسمه ( عض) !
قال ليه : عض.. عض.. ما تخجل ، والله يا عوض أنا لحظة ولادتك كنت حاسي إنك حتطلع ، بليد قلت أساعدك شويه ، أسميك اسم ساهل و ظريف و ما يعمل ليك مشكلة في الكتابة : سميتك عوض .... تلاتة حروف بس بالعربي و بالانقليزي أربعة حروف ، و حرف ال A
مكرر ، تقوم تكتب لي (عض)
أمال يا ابني لو كنت سميتك ( تشيكوسلوفاكيا ) كنت عملت شنو؟

ابوساندرا
كل سنه انت وكل الداخلين
كل سنه وانتم طيبين
وكل سنه وانتم بألف خير
من اظرف الشخصيات القابلتها في حياتي
صديقنا زميل البورد
صديق الموج
فهو شخصية مرحه وكل ما تقابله تطلع بي نكته
مرة كنا معزومين فطور رمضان في استراحة(السعودية - الرياض)
وبعد الفطور اقترحت عليهم
نذهب الى البيت
نشرب قهوة وحجر شيشه
وعند الحضور الي البيت
صديق كان مزنوق وداير يدخل الحمام بسرعه
فتحت الباب وخشيت اعمل القهوه
ولما رجعت لقيت ناس صديق لسه واقفين على الباب
فسألته ليه ما خشيت
فأجاب ما منتظرك تقفل الباب الجوه ةتعمل حركات المغتربين دي
فقلت ليه ياخي ادخل الاولاد مافين
قال لي مشو وين
قلته ليه فاطرين مع خالتم
فقال
والله كمان لو ربنا وفقك وطلقتهم!!!!!!
عشان الواحد يجي داخل امفكو ؟؟؟؟

نشكر الزملاء المشاركين جميعآ
واللاحقين

يوم إحتفال الجالية السودانية بذكرى الإستقلال
قدم مذيع الحفل الأخ الزميل المهندس
شكري سليمان ماطوس
للإفتتاح بآي من الذكر الحكيم

فعلقت رشيدة :
ده ح يقرأ من القرآن واللا من الإنجيل




والجدير بالذكر انا كنت بتونس مع ماطوس وشاكسته ب يا قبطي

[B]الجماعه كلهم متلمين فى الشعبية ببحري والحريق مدور

وابو آمنة حامد ( يرحمه الله ) قافل علي دو والفى شماله ماسك ليهو دو ماعايز يفكو أصلو وكافي علي الواضة . والزول الماسك الدو عاطل ما شغال ليه سنين . والورق ادك وما في زول فتح .

ابو آمنة قلب الكرت ولقاه دو وقال للتاني : مالك ما عيز ترميه ؟
رد عليه : الدو شغال.

رد عليه ابو آمنة حامد : الدو أحسن منك شغال ؟ انت مالك ما اشتغلت .

0 نقلا عن بوست الشعبية الحي الذي أعشقه ).

والتحية للوجيه كمال سالم .

وظريف الدوحة ابو ساندرا .

ابو ساندرا
كل سنة وانت طيب


لك التحية على هذا البوست الظريف

وكيف لي أن لا آتي على ذكر أبو النكتة عبد العزيز داؤود
وعوض دكام......رحمهم الله

في طرائف قد أتيت على ذكرها في احدى المواضيع التي كتبتها...

نقولا ليك هنا تاني....


- عوض دكام رحمه الله من الشخصيات الظريفة جداً
قالوا في مرة عوض دكام كان فى فراش بكا...
وكان يوم رفع الفراش وعوض دكام مشى عشان يدفع فى الكشف
واحد من اصحابو قال ليهو : انت يا عوض مفروض تدفع بالدولار
عوض دكام قال ليهو : لية فارشين فى السوق الحر

- قال ليك ابو داود كان بغنى فى عرس والحفلة اشتغلت لحدى الصباح، ولغاية الوقت ده العروس والعريس ما جو، ولا شاف ليهو عروس ولا عريس لحدى ما الحفلة انتهت، بعد ما الحفلة انتهت قام قال للجماعة فى الميكرفون انتى يا اخوانا عرسكم ده خبر ولا شنو


تقديري

أظرف ظرفاءالمسينجر هو أبو ساندرا

أماأظرف رجل مشكوكش فهو طالب طب مسكين كان يدرس في الخارج أحب فتاة جميلة في قريتهم و عاد في إحدى أجازاته و هو يمني النفس بوصالها عاقداً العزم على أن (يفته) و يعترف لها بحبه .. في اليوم التالي ذهب لأداء واجب العزاء الذي فاته كما يقتضي الواجب .. و في نهاية الجولة دخل أحد البيوت فوجد مجموعة من أهل البيت مجتمعين في إحدى غرف المنزل .. كمية من الجلاليب المختلطة ببعض التياب و كدا ..

سلم على بعض الرجال ثم فوجئ بحبيبة القلب واقفة في نصهم و هي تمد يدها بالسلام بيد منقوشة بالحناء و مكشكشة بالذهب و الحال يدل على أنهاعروس جديدة لنج .. أصبح صاحبنا ما شايف قدامه و أخذ يسلم على البقية بـ آلية تامة و قلبه يفرفر و ذهنه مشغول بهذه المصيبة .. في نهاية الصف الطويييل كانت هنالك جلابية بيضاء معلقة على شماعة جانبية ظنها العاشق المكلوم رجلاً آخر فمد يده و هو لا يكاد يرى أمامه و أمسك بكم الجلابية و هو يردد :

سلام عليكم .. سلامات .. سلامات .. كيف الحال ؟!

ضحك الجميع ضحكة جماعية عظيمة فهرول صاحبنا خارج البيت (الطلعة الياها) و لم يغادر غرفته بعدها إلا إلى المطار ..أرشح هذا هذا العاشق الولهان ليصنف ضمن ظرفاء البلاد لأنه - على الأقل - يروى هذه الطرفة و هو يغالب الضحك و كأنه يسمعها لأول مرة .. و هو يردد من بين ضحكاته في كل مرة :

خلوا بالكم .. أنا الزول العاقل الوحيد الـ سلم ليهو على جلابية .. و السبب شاكوش !

أحد الأقارب كان عندو لوري.

أرسل ولده وقال ليه امشي جيب الاسبيرات الجديدة وركبها.

الولد جاب الاسبيرات الجديدة وركبها في اللوري.

هنا ساله ابوه : وين القطع القديمة ؟

أجاب الولد : رميتها.

سأله الوالد : ليه رميتها؟

أجاب الولد : ما هي بايظة يابوي.

زعل الوالد وقال لابنه : لو اي حاجة بايظة برموها ، انا كنت من زمان رميتك .

عوض دكام
... يحب البوبار والقشرات ووالحكاوى
والقفشات



مرة قال فى كوبر امدرمان قرصت لى عربية، طلعت ستها سمحة شديدعاينت ليى لقتنى شين.. قالت ليه شين كده وسايق مارسيدس!!؟

قال.. كاويتها بيدى وظهرت ليها خاتم البوبار، قلت ليها... ودكتور اسنان كمان.






الله يرحمه



برضه زعلان عشان كيكى قشر بقفشة كمال سينا... غايتو

كتب عمرو كمال إبراهيم :

Quote: برضه زعلان عشان كيكى قشر بقفشة كمال سينا... غايتو

هذه كافية لإدخالك في موسوعتنا عن ظرفاء البلاد
يا زريف

ابو ساندرا الحبيب

وآحد من أهلك ناس الابيض (احتفظ بالاسم) ساخر على مستوي المدينة و كمان دايما عامل (ألفة) في أي بيت بكا أو عرس يسمع ليك الجا منو و الغاب منو ... عشان كدة الناس بتخاف من لسانه. وآحد صاحبه فتح ليه مطعم و عزمه أول زول ياكل في المطم خوفا من لسانه .. بعد الوجبة الدسمة قابله واحد من اصدقاء صاحب المطعم و سأله رأيه في المطعم؟ قال ليهو ما بطاااااااال ، بس شطته باردة و مويته حاره!

Quote: يا زريف

طيب ممكن ازعل تانى؟؟








شكرا على البوست... جد جد سمح شديد

كتبت منى أحمد :

Quote: أظرف ظرفاءالمسينجر هو أبو ساندرا

هذه شهادة نعتز بها يا استاذة
فبالتأكيد رأيك يحتفى به
إستنادآ على كتاباتك العميقة
التي أتابعها أينما حلت

ونهنيء ناس الدوحة ومتابعي جريدة الراية القطرية عبر موقعها
بقلمك الرشيق
فالأستاذة منى تكتب في الراية عدد الجمعة فتابعوها
وفألكم طيب

ونضيف في قائمة { ظرفاء البلاد }
ظريف المنبر العام
الدكتور
الفنان
الإنسان
ياسر مبيوع

وياريت يتحفنا هنا بمحكوياته وتعليقاته الدسمة

عزيزي ابو سانــــــــــــدرا

التحيا الطيبات

من الظرفاء المغفور له باذن الله الفنان المسرحي عبد الوهاب الجعفري ، وودت أن أن أنقل هذه الطرفة في هذا البوست الظريف.

ثانيا يا ابا ساندرا وين ما شايفنك في بوست السني ....... والمسرح الغائب عن المنبر .

وهذه الطرفة مأخوذة من البوست المذكور.




كعادته ذّات مباراة دخل الوجيه عبد الوهاب الجعفري - الوجيه - هو لقبه الذي يحبه جدا ، دخل الي دار الرياضة امدرمان و تم ذلك الاستقبال المعتاد بتراكم المباريات و تعاقب السنين و قذفت الحناجر بتلك ( الباع ) كي يرتاح الوجيه الجعفري في صنع تحيته ذات الإنحناء النبيل و لم تعقه تلك الشنطة (الساموسنابت) الفاخرة التي كان يحملها في يده اليسري ، إلا ان تلك الشنطة جعلت احد اولئك المازحين يصيح مداعبا الوجيه الجعفري قائلا :- ((شنو يا الجعفري ، الشنطة دي فيها دولارات يعني ؟ و الله تلقاها كلها بواريك و شنبا ))
فما كان من الوجيه الجعفري إلا فتح تلك الشنطة و اخرج منها اوراقا و لوح بها امام ذلك الجمع مخاطبا ذلك المازح الحميم : - (( ده مسلسل إذاعي يا جهلول ، إنشاء الله يكون عندك رادي عشان تسمعوا ))
و تتلون دار الرياضة امدرمان بالضحكات و يقدل الوجيه عبد الوهاب الجعفري حتي يصل الي كرسيه ذلك المعروف ، يقال إن هذا الكرسي لا زال شاغرا و مستعدا لاستقبال طيف الوجيه كي يجلس عليه و ما اقسي الاماكن الخالية .

عزيزي ابو سانــــــــــــدرا

التحيا الطيبات

من الظرفاء المغفور له باذن الله الفنان المسرحي عبد الوهاب الجعفري ، وودت أن أن أنقل هذه الطرفة في هذا البوست الظريف.

ثانيا يا ابا ساندرا وين ما شايفنك في بوست السني ....... والمسرح الغائب عن المنبر .

وهذه الطرفة مأخوذة من البوست المذكور.




كعادته ذّات مباراة دخل الوجيه عبد الوهاب الجعفري - الوجيه - هو لقبه الذي يحبه جدا ، دخل الي دار الرياضة امدرمان و تم ذلك الاستقبال المعتاد بتراكم المباريات و تعاقب السنين و قذفت الحناجر بتلك ( الباع ) كي يرتاح الوجيه الجعفري في صنع تحيته ذات الإنحناء النبيل و لم تعقه تلك الشنطة (الساموسنابت) الفاخرة التي كان يحملها في يده اليسري ، إلا ان تلك الشنطة جعلت احد اولئك المازحين يصيح مداعبا الوجيه الجعفري قائلا :- ((شنو يا الجعفري ، الشنطة دي فيها دولارات يعني ؟ و الله تلقاها كلها بواريك و شنبا ))
فما كان من الوجيه الجعفري إلا فتح تلك الشنطة و اخرج منها اوراقا و لوح بها امام ذلك الجمع مخاطبا ذلك المازح الحميم : - (( ده مسلسل إذاعي يا جهلول ، إنشاء الله يكون عندك رادي عشان تسمعوا ))
و تتلون دار الرياضة امدرمان بالضحكات و يقدل الوجيه عبد الوهاب الجعفري حتي يصل الي كرسيه ذلك المعروف ، يقال إن هذا الكرسي لا زال شاغرا و مستعدا لاستقبال طيف الوجيه كي يجلس عليه و ما اقسي الاماكن الخالية .

سلامات
عجبني عنوان البوست شديد
وحبيت اشارك ............بس للاسف الشديد شميت فيهو ريحة العنصرية ............
يعني

Quote: { ظرفاء البلاد }

ويييييييييييين ظريفات البلاد
يعني ماشايفة اي رصد ليهم
تحياتي

أهلآ بالعزيز الظريف حسن طه
وأقدر لك إستدراكك النبيل عندما أعدت كتابة مداخلتك بخط أكبر { الباكر }
رحمة بالعيون التي في طرفها حور
وفي خاطرها بحلقة لردف سمين
أو عنق طويل

أو
الأهة الطويلة التي أودت بالخليل
و
أنا آه أنا آه

عبدالوهاب الجعفري من أميز ظرفاء البلاد
وسيذكر كلما رفت بسمة في ثغر بليل
أو هدرت ضحكة من صدر نبيل
وخاطر جميل

تجنبت دخول بوست السني خايف من التخمة
وإرتفاع السكر

لكن لن ينجلي هذا الليل
إلا بتصفحه
أصله خميس بيض

دي على وزن { خميس مشيط }

بعدين يا أبوعلي
تاني لم يكون عندك مغنى شديد
لا تنسى أخاك من فضل الظهر

طبعا تعتبر ودمدني توأمة أم درمان لتقارب وجهات الشبه بينهما من ناحية المجتمع
وتعارفه مع بعض وفي الكثير من المجالات الثقافية والفنية والرياضية وكثرة الظرفاء..
هذه بعض المقتطفات كتبها بعض الأخوة في منتدى ودمدني عن ظرفاء ودمدني.. في الحقيقة
أعجبتني ورأيت أن أنقل بعضها هنا.

هذه نكة عن المرحوم زراع حكاها الأخ عوض صقير.

كانت في دار الرياضة بمدني مباراة بين فريقي نادي الشاطيء ونادي النجوم.. وفي أثناء
المباراة حسب الحكم ضربة جزاء لصالح فريق نادي الشاطيء وأصر لاعب الشاطيء وكان إسمه
عطية على تنفيذ ضربة الجزاء (ومعروف عن عطية إنه دائما بشوت الكورة خارج الأستاد)..
وعندما تحرك عطية فى إتجاه الكورة صاح فيه زراع قال ليهو عليك الله ياعطية إتأخر شوية
النمشي أدخل جدادي.

رحم الله زراع وأسكنه فسيح جناته

كتبت ظريفة البورد أمل قدورة:

Quote: ويييييييييييين ظريفات البلاد يعني ماشايفة اي رصد ليهم تحياتي

أها يا أمل ، كمان عايزة تصفينا بالعنصرية النوعية
البلاد مليانة بالظريفات
ومنهن صديقتنا العزيزة بت الديم هاجر بشير
وهنا في المنبر ظريفات كثر
منهن الزعيمة تراجي مصطفى
وبيان ، لو كان نازل منها

أما هذا البوست فقد إحتشد بالظريفات
وعلى رأسهن
ظريفة الظريفات آمنة مختارو
حليمة محمد عبدالرحمن
الجندرية
صفية محمد
تيسير النوراني
سلمى صبحي
منى أحمد

والآن انت يا أمل قدورة

Quote: البلاد مليانة بالظريفات

شكرا على الاجابة الدبلوماسية

مع اني توقعت اجابة مختلفة
او بالاحرى توضيحية
عموما
البلاد مليانة بالظرفاء
ولكن الظريفات قلة
وده لاسباب علمية بحتة

Quote: ففي دراسه حديثة ثبت الاتي كشفت دراسة علمية ان الرجال اكثر قدرة على سرد النكات من النساء، وان الهرمون الذكوري (تيستوستيرون) يساعد في اشاعة المرح بين الجنسين ويقول البروفسور سام شاستر من جامعة نورفولك ونوريش الطبية، في دراسته التي نشرها في دورية «بريتيش ميديكال جورنال»، ان الرجال أقدر بكثير من المرأة على اضفاء الضحك بين الرفاق والرفيقات «حتى لو كانت نكاتهم لاذعة». ويضيف شاستر ان النساء اكثر قدرة على السخرية، لكن الرجال ينطلقون منها لقلب المواقف وتحويل السخرية الى ضحكات تنطلق من القلب وتنهي المواقف الحرجة وتحولها الى المرح. وخرج البروفسور بنتيجته من دراسة ما يزيد على 400 شخص من الجنسين بالتساوي ومن مختلف الاعمار والطبقات الاجتماعية ووجد ان باستطاعة 75 في المئة من الرجال اطلاق النكات المضحكة او اللاذعة مقابل اقل من 35 في المئة بين النساء. ويعتقد ان صغار السن (اقل من 30 عاماً) اكثر اندفاعاً في اطلاق النكات في حين ان الكبار يطلقون الفكاهة المبطنة التي لا تؤذي سامعها الا بعد التفكير فيها بتمعن! ويفسر شاستر كشفه بأنه نتيجة للهرمون الذكوري الذي يكون اكثر حيوية في مرحلة الشباب المندفع في حين ان النسوة اكثر تحفظا في بداية العمر. ويقول: «بين سن الـ11 و13 وفي بدايات البلوغ لدى الذكور يصبح الذكور أكثر عدوانية او مغامرة، لكن مع بلوغهم تتحول هذه العدوانية الى المرح والنكات». ويفسر الدكتور نيل نيف عالم النفس في جامعة نورثامبريا، نتيجة البحث وعلاقة الهرمون الذكوري بالنكات بأنه «علامة جدية على تنافس الذكور في ما بينهم على قلب المرأة او انتباهها». وهناك أمور تجعل من النكتة أكثر إثارة خاصة عندما يلقيها أشخاص ظرفاء. وهناك اشخاص متخصصون في تأليف النكت وابتداعها، وهي ملكة خاصة على صنع النكت بشكل بديع. وظهر في التاريخ العربي اشخاص ظرفاء كانت تروى عنهم النكات، مثل «جحا» وإن كان يعتقد بأنه شخصية وهمية اختلقها بعض الظرفاء. وكانت دراسة اشرف عليها الباحثون في جامعة ستانفورد في الولايات المتحدة الاميركية اعطت أدلة دامغة، وقاطعة على وجود اختلافات بين الجنسين في إدراك النكتة والمزاح. والدراسة لم تكن نظرية، او انثروبولوجية، بل شملت مراقبة وظائف المخ، وحركة العضلات. ولاحظ الباحثون أنشطة المخ لمجموعة من الرجال والنساء أثناء مشاهدتهم الأفلام الكرتونية او الكوميدية. وتوصلوا الى أن بعض الأجزاء من المخ المسؤولة عن إدراك اللغة والذاكرة وإنتاج أحاسيس إيجابية بالمكافأة، يحتمل أن تنشط أكثر عند المرأة لدى مشاهدتها للأفلام الكوميدية المرحة، والأمور الساخرة وكذلك المزاح. إلا أن بعض أجزاء المخ تثيرها النكات أكثر في النساء، ومن بينها القشرة الأمامية اليسرى ومركز الاحساس بالمكافأة. ولوحظ ان النساء اللاتي شملهن البحث كن أقل توقعاً لمدى كوميدية الرسوم المتحركة التي يشاهدنها، ولذلك عندما كشفت الدعابة كان مركز الاستمتاع اكثر نشاطاً عند النساء منه عند الرجال. وعلى العكس، بدا أن الرجال أكثر توقعاً لفكاهة الرسوم المتحركة من البداية وقبل مشاهدتها. وأظهرت دراسة في جامعة غرناطة أن الرجال والنساء عموما يضحكون للنكات التي تسخر من المرأة لا الرجل. ووفق الدراسة التي نشرت أجزاء منها في «انترناشونال جورنال أوف هيومر» وشملت أكثر من 1500 رجل وامرأة تراوح أعمارهم بين 18 و80 عاماً فإن الأشخاص في منتصف العمر يضحكون أكثر عندما تكون النكتة عن المرأة لا الرجل. وتبين أن الرجال والنساء الذين تراوح أعمارهم بين 45 و50 عاماً ضحكوا أكثر عند سماعهم النكات التي تسخر من النساء لا الرجال.

كتبت الظريفة امل قدورة
و { الظريفة } هذه ليست على سبيل المدح واللياقة
ولا { القاءآ للقول على عواهنه }
ولكن أمل التي أعرف لماحة وذكية وصاحبة طرائف
وتعليقات ماتعة

الدراسة يا أمل قالت :

Quote: إلا أن بعض أجزاء المخ تثيرها النكات أكثر في النساء، ومن بينها القشرة الأمامية اليسرى ومركز الاحساس بالمكافأة. ولوحظ ان النساء اللاتي شملهن البحث كن أقل توقعاً لمدى كوميدية الرسوم المتحركة التي يشاهدنها، ولذلك عندما كشفت الدعابة كان مركز الاستمتاع اكثر نشاطاً عند النساء منه عند الرجال. وعلى العكس، بدا أن الرجال أكثر توقعاً لفكاهة الرسوم المتحركة من البداية وقبل مشاهدتها.[/QUOTE يعني القصة قصة ذكاء وحسن توقع فالرجال بيفهمونها طائرة والنسوان بيدقسن فهل دي بلادة حس أم شعور عندهن أم بطء فهم أم تقلة الغريب الدراسة خلصت إلى إنهن كانن أكثر إستمتاعآ

---

Post: #112 Title: Re: ظرفاء البلاد Author: أبو ساندرا Date: 03-05-2008, 11:35 AM Parent: #110 يعني القصة قصة ذكاء وحسن توقع فالرجال بيفهمونها طائرة والنسوان بيدقسن فهل دي بلادة حس أم شعور عندهن أم بطء فهم أم تقلة الغريب الدراسة خلصت إلى إنهن كانن أكثر إستمتاعآ ------------------------------------- الكلام أعلاه ده حقي أنا يا أمل ماعارف الدخلو جوة الكوتيشن شنو يكون العمى؟

---

Post: #114 Title: Re: ظرفاء البلاد Author: aml gadora Date: 03-31-2008, 08:56 AM Parent: #112 Quote: يعني القصة قصة ذكاء وحسن توقع فالرجال بيفهمونها طائرة والنسوان بيدقسن فهل دي بلادة حس أم شعور عندهن أم بطء فهم أم تقلة الغريب الدراسة خلصت إلى إنهن كانن أكثر إستمتاعآ عندي تفسير اخذته من الدراسة Quote: ويفسر الدكتور نيل نيف عالم النفس في جامعة نورثامبريا، نتيجة البحث وعلاقة الهرمون الذكوري بالنكات بأنه «علامة جدية على تنافس الذكور في ما بينهم على قلب المرأة او انتباهها». الرجل مؤهل ومدرب على القاء النكات .......... بمعنى ان الرجل اكثر قدرة على اضفاء جو المرح .القاء النكات .اكثر خبرة في هذا المجال ......ومؤهل تاهيلا كاملا لذلك .... يعني الاوراق كلها مكشوفة عنده ...... اما المراءة فهي المتلقي دوما ...........ولا تبذل جهدا يذكر للعب دور الظريفة ........الا حالات نادرة ...........وبذلك يصبح الجزء المتعق بالنكات والمرح ........يصبح جزء خفي........فهي المتلقية ....... بالعربي يابوساندرا كده انتو وظيفتكم تضحكونا واحنا المتلقييين او بمعنى عمرك في حياتك اتفرجت على مسرحية كوميدية وشفت الممثلين بيضحكوا ؟؟؟!!! اها انتم(الرجال)............... الممثليين ونحن(النساء)................... الجمهور

---

Post: #111 Title: Re: ظرفاء البلاد Author: محمد الطيب يوسف Date: 03-05-2008, 10:18 AM Parent: #1 ياابو ساندرا سلام والله البوست دي من زمني القست ساي عاجبني وبعد مابقيت عو مالميت فيهو بركة المرقتو الليلة وخليتني قريتو تاني من قولة تيت طبعآ ظرفاء القري زي لاعبين الولايات مابشتهرو ونحن عندنا واحد في فداسي من أظرف ظرفاء البلد علي الأطلاق النكتة عندو حاضرة ومابجتهد فيها أسمو العاشق في مرة العاشق نادي جمال الوالي قال ليهو تعال يا جمال ، جمال سلم عليهو وقال ليهو كيفك يا العاشق ، قال ليهو تمام لكن دايرشغل ، جمال قال ليهو أنت يا العاشق شهادة ما عندك العاشق قال ليهو يعني أنت أسي داير تقول لي شغال بي شهادة .

---

Post: #113 Title: Re: ظرفاء البلاد Author: أبو ساندرا Date: 03-31-2008, 06:29 AM Parent: #1 نادر سالم أظرف ظرفاء الدوحة ------------------------ نادر سالم إبن أخت الأعزاء كمال سالم وعادل سالم تحديدآ أمه آمال سالم فهو إضافة إلى تعليقاته التي تأتي عفو الخاطر ودقساته المليحة عنده قواسم مشتركة مع الكومديان الراحل يونس شلبي فهاكم آخر حاجتين عملهم بعفويته المحببة قبل ايام الأولى : ----------- درج الأشقاء كمال وعادل سالم في ونساتهما التي غالبآ يحضرها نادر عندما يرد في الونسة إسم أحد أشقائهم وشقيقاتهم ، أن يلي إسم الشقيق او الشقيقة عبارة أخوي / أختي مثلا : أمس إتصلت آمال أختي يا عادل أو ياخ القرع ده ذكرني طبيخ آمال أختي يا كمال وهكذا و هاء شنو ؟ كذا يوم في إثناء الونسة ورد إسم آمال لكن ما قالوا أختي قام نادر قال ليهم : آمال أختي الجدير بالذكر أن آمال أختي هذه ، هي والدته

---

Post: #115 Title: Re: ظرفاء البلاد Author: أبو ساندرا Date: 03-31-2008, 09:09 AM Parent: #1 كتبت أمل قدورة : Quote: بالعربي يابوساندرا كده انتو وظيفتكم تضحكونا واحنا المتلقييين هل حصل قبل كده قلت ليكم أن أمل قدورة من { ظرفاء البلاد } ؟

---

Post: #116 Title: Re: ظرفاء البلاد Author: aml gadora Date: 03-31-2008, 09:30 AM Parent: #115 Quote: هل حصل قبل كده قلت ليكم أن أمل قدورة من { ظرفاء البلاد } ؟ لو انا كده ...............بكون بس من شواذ القاعدة مش بيقولو لكل قاعدة شواذ؟ --------------------------------------------------------------------- احيانا ........في بعض المسرحيات بيستعان بالجمهور لرفع مستوى المتعة

---

Post: #117 Title: Re: ظرفاء البلاد Author: أبو ساندرا Date: 04-01-2008, 07:04 AM Parent: #1 الظريف نادر سالم الثانية: -------- خرج متأخرآ - كعادته كل صباح - لإدراك السيارة التي تنقله للعمل { نقل جماعي } أتم تزرير القميص في الشارع ومعاه المشط ، لاحظ سيارة العمل قادمة من بعيد وفي نفس اللحظة شاهد زول يقطع الشارع من ناحية المركز الصحي المقابل كان الزول يقصده ، فركز نادر معاه ، وفي نفس الوقت كان مركز على السيارة وصله الزول وكان يعمل دورق من نوع الذي تؤخذ به العينات للفحص الزول سلم وبسرعة قال لنادر معتذرآ الزول : آسف يا ابن العم لكن انا مقدم لوطيفة وطلبوا مني شهادة طبية وهسع جيت العيادة وطلبوا مني عينة بول للفحص وأنا ملاوز عشان عندي سكري وخايف يرفضوني بسبب المرض فلو سمحت ممكن تبول لي هنا؟ نادر : { لاحظ ان السيارة على بعد خطوات فجاوب مستعجلا ياخ انا والله بلت ، لكن مافي مشكلة ، أقطع الشارع وشفت البيت داك بس أمشي دق الباب واسأل عن حاتم ،بيكون لسع ما بال الطريف أن نادر كان جاد جدآ في محاولته مساعدة الزول

---

Post: #118 Title: Re: ظرفاء البلاد Author: عصام الدين حسين حسن Date: 04-01-2008, 07:40 AM Parent: #117 يا أبو ساندرا إنت ما برضو تُحسب من ضمن الظرفاء ببهيتك وبهاءك .. وأوع تعمل جادي عشان ما نقوم ما نعرفك .. مع حبي وتقديري والأماني بعيون تعرف تفرز الحروف عشان أكتر من كده حيخسر ناس كتر في المعارك وربنا يصبر الأيدهم في النار ..

---

Post: #119 Title: Re: ظرفاء البلاد Author: أبو ساندرا Date: 04-01-2008, 08:36 AM Parent: #1 كتب الشفيف عصام حسين Quote: وربنا يصبر الأيدهم في النار .. انت منو القال ليك اسمه كده ؟

---

Post: #120 Title: Re: ظرفاء البلاد Author: أبو ساندرا Date: 04-03-2008, 07:43 AM Parent: #1 على وزن { آمال أختي } بتاعت نادر سالم حكى لي الصديق حسن مسعود ، الذي وردت سيرته في هذا البوست عندما حكى عن عمه صديقنا جعفر عبدالمنطلب قال حسن مسعود : حضر ضيف وسكن عند ناس عمي الضيف إسمه أحمد صار الجميع يصفونه أو ينادونه ب أحمد عمي يعني بيختصروا بدل يقولوا { احمد القاعد عن ناس هناي عمي } يوم كان العم بيبحث عن احمد ، واثناء بحثه وجد حسن مسعود وأولاده فسألهم : ياجننون ما شفتو أحمد عمي ؟

---

Post: #121 Title: Re: ظرفاء البلاد Author: معاوية محمد الحسن Date: 04-03-2008, 05:33 PM Parent: #120 ابوساندرا والجميع شكراً على البوست الظريف خفيف الدم وياريت لو الواحد بحفظ ماسمعناه من الظرفاء . قالوا ود الشايقي باك المريخ فى الستينات اراد ان يعلق عاى الراحة التي يوفرها جمال الوالي للاعبي المريخ فقال واللة لو لعبنا فى زمن جمال الوالي ده الجناح من بيتهم مايطلع .

---

Post: #122 Title: Re: ظرفاء البلاد Author: أبو ساندرا Date: 04-10-2008, 11:11 PM Parent: #1 طيارات أمدرمان ---------------- الطيارات لقب يطلقه ناس ام درمان على بعض المتطفلين فيها وهم جماعة يتميزون بالهندام النظيف جمع بينهم حب الطعام حبآ جما فكانوا يغشون بيوت البكيات أو الأفراح يتصيدون وجبة وقيل أن الشبع لايعرف طريقه إلى بطونهم ويمكن الواحد منهم يقش صينية مدنكلة لوحده ويقبل على الثانية ويقال أن الذي يعرف عن خبر فراش عزاء في مكان كان يخبر أصحابه بمقابل نقدي ، وكان ذلك المقابل بيتضاعف وفقآ لمكان الفراش ووزن الأسرة ففراش في الملازمين ، مثلآ ، بيفرق عن فراش في وداللدر وفراش المؤسرين الأثرياء بيختلف عن فراش غيرهم من هم دونهم في السعة والثراء قيل أن احدهم ، وهو ذي طرافة وملحة عرف بمأتم في الملازمين ومأتم أخر لأحدى الأسر الكبيرة في ودنوباوي فقرر أن يفطر في فراش الملازمين ويتغدى في فراش ودنوباوي وهو في طريقه لبرنامجه عرف أن أسرة مقتدرة في ود العمدة عندها بكاء فأخونا ماعرف يمشي ويف فوقف متمحنآ وفال: يا ناس أنا إتقطع الراوي : كمال سالم

---

Post: #123 Title: Re: ظرفاء البلاد Author: أبو ساندرا Date: 05-22-2008, 06:29 AM Parent: #1 Quote: الراوي : كمال سالم و كمال سالم يعد من أظرف ظرفاء أم درمان وهو بهذه الصفة يعد ، تبعآ لذلك من ظرفاء البلاد كنا نشاهد بطولة قطر الدولية لألعاب القوى وكان استاد نادي قطر مكتظآ بالمشاهدين على مقربة منا جلست سيدة تغطي رأسها جيدآ أي متحجبة ولكن كانت لابسة تي شيرت كط كشف عن ايادي بيضاء وجميلة كما ان جزء من البطن كان ظاهرآ بعض الحاضرات اللاتي كانن معنا إستهجنن وقالن مافي داعي للتناقض كمال سالم إستهجن بدوره تعليق رفيقاتنا وقال: { مالكم بيها ، عايزة ترضي الله وخلقه في نفس الوقت }