13 يوم في الخرطوم

هذه يوميات زيارتي القصيرة للخرطوم بعضها ونسة لاتخلو من غرض والبعض الآخر غرض لايخلو من ونسة ،فإذا كانت هناك فائدة فادعو لنا بخير الدعوات ، وإن لم تك كذلك فادعوا لنا بالهداية وفي الحالتين انا كسبان.
ولابد من التنويه ان عشة بت فاطنه ألهمتني هذا البوست بسؤالها عن البنات وأمهن {ست الدار } والخرطوم .
،إستمتعت بساندرا وماهيتاب جدآ عشان صاقروني كل الوقت بسبب إجازة جامعاتهن ، أما التومات سارا/سولارا بيطلعن لجامعاتهن من دغش الرحمن وبيرجعن مع المغيرب ومنبهرات جدآ باجواء الجامعة وعلاقاتهن الجديدة وأركان النقاش ،وكل اليوم يتهامسن معآ ولا نسمع غير الضحكات ولما زجرتهن ردت علي سولارا : يابابا أنت مشكلتك ماعندك توم! لكن سارا قالت ليها : صاح ماعندو توم لكن عندو تومة ماشايفاهو عامل معاها زينا ونسات خافتة وضحكات مجلجلة ! شفتو البنيات!
ومرة سولارا جات متأخرة ومكندكة ،قلنا ليها ده شنو ؟ وكنتي وين ؟ قالت لما خرجنا من الجامعة بدري عشان إعتذار الدكتور عن المحاضرة قررت الشلة ان نعمل رحلة ومشينا الغابة خمسة بنات وولدين ! طبعآ انا نهزرتها ،ورشيدة أخذت تشرح بهدوء قائلة ماعندنا مانع لكن لابد من اخطارنا ثم انتي يادوبك ليك أسبوع في الجامعة متين عملتي علاقات وشلة ؟ وطلبت منها التريث حتى تعرف زملائها جيدآ ، تعرفوالبت مفعوصة الرقبة قالت شنو! قالت: ياماما ودبركات ده مامواكب عصر السرعة وما ناقش حاجة عن البلد ،خليك منو ،إنت مالك ؟
أما دينا وهي المتبرجة الوحيدة في بيتنا فقد رجعت من العمرة ملتزمة ومتربطة وتسألنا عند كل وقت صلاة كم مرة: الأذان أذن ؟ طبعآ توجست وقلت لأمها ده كلو منك ! وديتيها العمرة رجعت لينا ظلامية! أمها قالت لي مش كدة أحسن من تبرجها الأول ، ثم لاتقلق مش دندنة دي ما حا تستحمل وما حا تخلي طريقتها بس أصبر 3 أيام ، بعد يومين عادت حليمة لعادتها القديمة ، ورشيدة ذاتها كانت جايبه معاها بلوزات كم طويل ،بعد يومين بقت تكفكف الكم وفي اليوم الثالث شالت المقص وهاك يا تقطيع وعادت أيضآ لحالتها القديمة وغنيت انا الحاج حجه وجه شراب البيره ما خله!
رشيدة ما كانت عارفاني جاي ، والبنات أخفوني في غرفة النوم وذهبن لأحضارها من موقف بصات بورسودان ولمن جات إنهمكت في إستقبال المهنئين وبعد ساعة دخلت غرفتها ورأتني! تخيلو كيف يكون حالها ؟! دي حكاية ما بتخلص

أما الخرطوم فالجو تمام ومائل للبرودة والحدائق ممتلئة والمنتديات شغالة ومزاج الناس رايق والشوارع أصبحت أفضل ، بس المشكلة لاحظت قدرة الناس على التعايش مع النظام وبالطبع هذا لن يؤدي إلى إنتفاضة!

مرحب عبدالرحمن بركات
ونحن فى انتظرك
فى العيد الكبير
ياخى خش معى فى الخط
[email protected]

Quote: رشيدة ما كانت عارفاني جاي ، والبنات أخفوني في غرفة النوم وذهبن لأحضارها من موقف بصات بورسودان ولمن جات إنهمكت في إستقبال المهنئين وبعد ساعة دخلت غرفتها ورأتني! تخيلو كيف يكون حالها ؟! دي حكاية ما بتخلص

يا الله يا أبو ساندرا





وتحية ليكم كلكم

محمد و نوسة

ابوساندرا
مرحب بيك
وحمدالله على السلامة

Quote: رشيدة ما كانت عارفاني جاي ، والبنات أخفوني في غرفة النوم وذهبن لأحضارها من موقف بصات بورسودان ولمن جات إنهمكت في إستقبال المهنئين وبعد ساعة دخلت غرفتها ورأتني! تخيلو كيف يكون حالها ؟! دي حكاية ما بتخلص

دي احلى مفاجأه تلاقي زول في الدنيا

عاوزين نسمع

عبد الرحمن رجال زيكم كدا بيجيبوهم من وين





حاولت اتصل بيك هناك لكن مانفع
حمدلله على السلامه

يا ايها العبد الرحمن ابو البنات البركات ، سلام حتى آخر قطرات ( تفاقماتك ) يا حبيب ..

يبدو لي أنها كانت من أجمل 13 يوم في عمر البورد و أنت تكتب عنك ، و عنا ، و عنها !!!

ليمونوت ( تقيل ) لهذه المرأة التي تهديك رشدك ، و تمنحك سر التواصل الحميم ..


فهل أطل طيفنا بينكم و أنتم / تن تضعون ثلج الحب على أكواب ليمون دافء المفاجآت ؟

ود بركات
تعال وكمل ماتبقى من رشيدتك ومن المفعوصات ،،


وانا ماهل تماما ومستمتع حتى يصلني بقايا كاسك

ماتتاخر
ومحبتي

يا ولاد الأيه!!!

أتاريكم مشيتو وراء المهندس!؟
لما عرفت إني نزلت الموضوع مرتين ، قلت يا إيدي شيليني ، وقررت أركز على الذي يشهد إقبال {ابراهيم} منهما ، وطبعآ سرح داك ، وهذا قايلو حتل, {أتاريكم كنتو كامنين لي }
أسمعوا يا ولاد والبنتين المعاكم تقومو تشيلو حاجاتكم السمحة دي وتجيبوها هناك ، عشان أنا ما بقدر على { إتنين} وحا أرد عليكم هناك . إتفقنا؟ طيب.