حسنه بت محمود.......الشاهد الاخير...

حسنه بت محمود.......الشاهد الاخير...


10-13-2003, 06:30 AM


  » http://sudaneseonline.com/cgi-bin/sdb/2bb.cgi?seq=msg&board=81&msg=1129193548&rn=29


Post: #1
Title: حسنه بت محمود.......الشاهد الاخير...
Author: Tumadir
Date: 10-13-2003, 06:30 AM
Parent: #0

تقف حسنه بت محمود فى شارع مظلم خارج الرواية





ماذا تريدون منى ايها القضاة والمحلفون؟؟؟

ها انذى اقف...وسط بركة الدم المفاجئة لصمتكم

وانا احمل مدية الانتقام الناعم

ولا آبه بشهيقكم المرتعب

نعم...قتلت ود الريس...وقطعت موطن شهوته وافتخاره الزائف

انتقاما لانسانيتى المكلومة


وثورة
ضارية ضدكم وضد صمتكم الريفى الطويل

اعرف انه لايعنيكم من جريمتى غير النميمة...فالدهشة التى ابديتموها مفتعلة...وصراخكم مفتعل...واندهاشكم غير صادق

لماذا قتلته؟؟؟

وهل يهمكم الامر الآن كثيرا؟؟؟

هل توقعتم غير ذلك؟؟؟...

ياللسذاجة...واللؤم

انا اعرف دورى بدقة

وانتم تعرفون دوركم

واعرف انكم حين تجمعتم فى الدار...تتصايحون
كنتم
تريدون سبر اغوارى المحتضرة لانكم تنشدون فيها ريحا لبحرآخر خلف سواحلى؟؟؟

فأنتم
عندما تعتلون هضابى فأنكم تنشدون ضباب افق آخر

اعرف اننى لم اكن يوما مبتغاكم ولا مبتغى الراوى ولا جده ولابت مجذوب ولا حتى ود الريس

ها انا ذى اقف فى حد سيف المنية معه...وامامنا يقف ملك موت واحد

فى فوهة غرفة واحدة

غرفة واحدة ضمتنا سويا.. قبل سويعات..حرقت نساء الحى فيها بخور الصندل ... اسمينها، ياللسخرية... بيت عرس.

ود الريس تفوق عليهم جميعا بالوصول الى هذه الغرفة...كبشا لفداء القبيلة

هل تعرفون لماذا كان رجال الحى يلهثون للارتباط بى والزواج منى؟؟؟

حتى الراوى ارتجف قلبه...فهو غير معصوم من جرثومة العدوى التى يتنزى بها جسم الكون

لم يرد احدهم الارتباط بحسنى بت محمود...بل ارادوا الزواج من ارملة مصطفى سعيد

كانوا رجالا ببعد واحد...افق واحد

وكان رجلا بالف

جميلة انا.؟؟؟..اعرف كم انا جميلة...ولكن جمالى لايلفت انظار هذه القبيلة....


مصطفى سعيد هو الرجل الذى استطاع ان يتذوق شموخى واباى

قامتى الفارعة...ويداى النظيفتان...
ملامحى الغامضة
كلها تفاصيل
كانت تباعد بينهم وبين الزواج من احدهم... بينما جاءت به الى بابى

تظنون اننى لا اعرف نساءه البيضاوات ؟؟؟
لا...يا ايها المحلفون الجالسون على منصة الغيب
اعرف حقيقة واحدة

....مصطفى سعيد كان يبحث عنى

و عندما

قتل آن همند وشيلا غرينود وايزابيلا سيموروجين موريس... بغموضه الافريقى الساحر..

كنت انا فى غياهب الآتى و المستحيل....ادرى انه كان يبحث عنى

اعرف اننى لا اعنى لكم الا مدفنا اللغز الكبير وحارسا من حراس الجن فى مملكة الصمت والفجبعة...مصطفى سعيد

مصطفى سعيد هو حسنه....هو الآخر الذى ولدته امرأة صامته

دموعها صامته ...وفجيعتها صامتة

جاءنى ...ليفك طلاسم اللغة الانثوية التى منحته الوجود

هل قلت جاءنى..

لا بالطبع...انا التى تبدت له

كشراع يتبدى تحت لجة القمر

انا التى تمظهرت له بالسكون الصاخب

ولوحت له بمفتاح الطلسم السرمدى...

انا التى تعرفت على نصف تفاحتى ...الضائع...واغلقت عليه شرفات الشوق والمتاهة

مصطفى سعيد كان جنوبا يحن الى الشمال ....ولكنى كنت امرأة من كل الاتجاهات

رياحى شرقية وامطارى شمالية غاباتى جنوبية ...ورعودى من اقصى الغرب

تريدون ان تعرفون اين ذهب مصطفى...ولماذا تركنى والولدين والغرفة المسقوفة فى متاريس السؤال؟؟؟

وماذا ننتظر نحن انصاف الابطال فى مجاهل الروايات...واواخر فصولها غير تبنى التسآل واحتمالات الاجابة؟؟؟

انا افضل الصمت يا سادتى....


فلنمت انا وود الريس والسر والفضول فى غرفة...سقفها صندل

وارضها بركة من دم

Post: #2
Title: Re: حسنه بت محمود.......الشاهد الاخير...
Author: bayan
Date: 10-13-2003, 07:00 AM
Parent: #1

جميل جدا هذا المنولوج
لا احد يحس باحساس حسنة الا امرأة مثلها
فى هذا المنلوج الذى يضاهى منولوج
ليدى ماكبث
عندما صرخت كل مياه الدنيا لن تمسح بقعة الدم او تطهر اليد القاتلة
فى ذلك المنلوج الذى خرج كل مافى النفس البشرية من شرور
تأتى انت بمنولوج حسنة بت محمود
الذى يصرخ ويفضح قلة حيلة المرأة السودانية
يخرج كل مافى النفس الانثوية من ظلم فادح
وما يفعله مجتمعنا باهدار كرامتنا
ومنعنا حتى من خيار ان نكون أرامل
واوفياء لمن نحب بعد الرحيل
فماتت حسنة على المبادئ
لقد كن دائما حسنة بت محمود و فاطمة بت جبر الدار ومريوم
نماذج لنساء متفردات جديرات بالاعجاب و التمثل

التحية لك فى هذا المنلوج الصارخ
ليتها لا تكون صرخة فى وادى بعيد
وخمسة نجوم لهذا البوست

Post: #3
Title: Re: حسنه بت محمود.......الشاهد الاخير...
Author: Tumadir
Date: 10-13-2003, 07:04 AM
Parent: #2

شكرا بيان


انتظر من بقية المهتمين القراءة والتعقيب فانا جد راجفة

Post: #6
Title: Re: حسنه بت محمود.......الشاهد الاخير...
Author: ازرق
Date: 10-13-2003, 08:31 AM
Parent: #3

يا تماضر كيفك انت

والله اعدتنى بعد غيبة

فعل حسنة بت محمود هو قتل معنوى لكل المفاهيم والعادات التى ترسخ

مفهوم (الشيئية) , وتحريض على عدم الرضوخ لمشيئة الهوام من الرجال

فهل تبعث حسنة بت محمود من جديد؟؟

Post: #4
Title: Re: حسنه بت محمود.......الشاهد الاخير...
Author: nile1
Date: 10-13-2003, 07:18 AM
Parent: #2

تماضــر

صورة رائعة حية..بس بأؤول أيه؟؟؟...ياسااااتر دا إنتي شايله من جنس الرجاله شيله منيله...تحياتي يا مبدعة

Post: #5
Title: Re: حسنه بت محمود.......الشاهد الاخير...
Author: عشة بت فاطنة
Date: 10-13-2003, 08:01 AM
Parent: #4

تماضر لقد قرات ما بين السطور فاخرجت لوحة من ماساة حسنة بت محمود وعبرت عن صمت ام مصطفى سعيد لقد بصرتي -ضم البا- بما لم يبصره الاخرون ، اعتقد ان هذا اجمل ما كتب عن موسم الهجرة الى الشمال وهذه اضافة اتمنى ان يقراها الطيب صالح فالرؤية النقدية لموقف القبيلة وشرفها المسفوح اشارة لثورة امراة لم يعطيها احد حقها حتى الراوي بتعاطفه معها كان مثال للسلبية والتردد ، هي التي اجرت الدم ثارا لكرامتها المهدورة وجسدها المستباح فردت كرامتها وغسلت عارالقبيلة الفاسقة ، التي تبيع وتشتري في اجساد النساء ، . وفعلا يا بيان هذا البوست عشرة نجوم للشاعرية والتفرد . ما سلب من النساء لا ترده الا النساء

Post: #7
Title: Re: حسنه بت محمود.......الشاهد الاخير...
Author: Ahlalawad
Date: 10-13-2003, 08:42 AM
Parent: #1

لست من المعنيين بالبوست وقد يكون هذا ما جعلني أنظر إلى هذه القطعة الأدبية الرائعة من زاوية واحدة هي زاوية إدراك تلك المرأة حسنى بت محمود لمؤهلاتها الكثيرة ومقارنتها بدورها في الرواية كنصف بطل مما جعلها تستقل هذا الدور وتشعر بأنها استغلت
She felt she had been used.

Post: #8
Title: Re: حسنه بت محمود.......الشاهد الاخير...
Author: ابو جهينة
Date: 10-13-2003, 11:55 AM
Parent: #7

تماضر
أصابتني هذه الجملة بالدهشة المرتدة إلى سنوات
( وثورة
ضارية ضدكم وضد صمتكم الريفى الطويل

اعرف انه لايعنيكم من جريمتى غير النميمة...فالدهشة التى ابديتموها مفتعلة...وصراخكم مفتعل...واندهاشكم غير صادق)
حاجة تمام جدا
تسلمي

Post: #9
Title: Re: حسنه بت محمود.......الشاهد الاخير...
Author: ودقاسم
Date: 10-13-2003, 12:37 PM
Parent: #1

تماضر
لك التحية
إيه رأيك نختلف هذه المرة أيضا ؟
أعتقد أنك لا تمانعين .
من يكتشف لا يمتلك امتلاكا أبديا ، للآخرين الحق في الاستفادة ( الاستمتاع ) بما اكتشفه غيرهم، ولو كان لكل مكتشف الحق في الاستمتاع بما اكتشف فإننا مضطرون لإقامة عوالمنا الخاصة والعيش فيها دون ملامسة عوالم الآخرين .
ليس للأموات حق في امتلاك الأحياء ، يبقى للأموات حق أن نتذكرهم ونذكر محاسنهم ونستلهم سيرتهم ، لكنهم لا يمتلكون بيتا أو متاعا أو علما أو شهوة أوحبا أبديا يلغي كل حب آخر
القبيلة ( المجتمع ) لديه قوانينه وأعرافه والتمرد على هذه القوانين والأعراف بطريقة القفز والتخطي والاختراق لا يغير واقعا ولا يصنع مستقبلا ، بل يظل تجربة فردية لا تقدم ولا تأخر
لحسابات القبيلة ( المجتمع ) قدر كبير من الصحة وليست كلها خطأ وليست كلها مرفوضة خاصة إذا ارتبطت بالاهتمام بالإنسان وتنشأته في ظروف اجتماعية واقتصادية لا تتيح له العيش بمجهود فردي .
المجتمع لا يرفض التغيير وإلا لما كان قبل بمصطفى سعيد أصلا ، وكان يمكن لحسنة أن تسعى لتقديم جديدها وطرح تجربتها دونما عنف .
ود الريس يمثل الحكمة المتوارثة والتي لا يقبل أي مجتمع إلغاءها كليا وتجاوزها كليا لصالح الجديد وبصورة مطلقة ، لأن ذلك ستنتج عنه فجوة تاريخية لن تجد من يسدها إلا أن نجعل الجديد هذا نبتا شيطانيا لا جذور له ، وفي هذه الحالة فإنه لن يصمد وسيموت لا محالة
للمرأة كامل الحقوق وكامل الخيارات وكامل الإنسانية ، إلا أن الا أن عقولنا وعقول مجتمعاتنا لا تقبل التجاوز والاختراق المتعجل ولا تقبل العنف ، فاسرة ينتجها ود الريس مع حسنة بت محمود لكانت خيرا من بركة الدم تلك
لا تجعلنني أسبح في بركة دم يا بنات أمي .


Post: #10
Title: Re: حسنه بت محمود.......الشاهد الاخير...
Author: Giwey
Date: 10-13-2003, 12:54 PM
Parent: #1

يا لهل من مرافعة

اوهى بالاحرى صرخة على لسان
حسنة فى وجه طوطم التقاليد
الشرقية والسودانية
صرخة بلغة قوية وشفافة فى
آن واحد
أعجبتنى فعلا هذه الفكرة
أن تستنطق الشخوص
بعد ان قضى منها الكاتب الاصيل وطرا

لك التحية بدءا ومنتهى يا تماضر يا اديبة

Post: #11
Title: Re: حسنه بت محمود.......الشاهد الاخير...
Author: maia
Date: 10-13-2003, 01:16 PM
Parent: #1

تماضر العزيزة
(مصطفى سعيد هو الرجل الذى استطاع ان يتذوق شموخى واباى)

كم هو جميل هذا التعبير الانثوي الرائع
شكرا لهذا الجمال

Post: #12
Title: Re: حسنه بت محمود.......الشاهد الاخير...
Author: nazar hussien
Date: 10-13-2003, 03:50 PM
Parent: #11

اعرف انه لايعنيكم من جريمتى غير النميمة...فالدهشة التى ابديتموها مفتعلة...وصراخكم مفتعل...واندهاشكم غير صادق

هو فعلا كذلك فحسنة بت محمود في هذا العصر هي قطعا ليست تلك
فالزمان تبدل عليهما وبينهما فرسخ من القيم قد انهار او بدأ
كذلك.

قرأتها علي كيفي وعلي هواي فصادفت معان وقيم كثيرة
اجتهدتي في هذا النص حد الخوف من الهجيمة وابتكرتي فيه
اسلوب اسباب الدهشة المعروفة سلفا.

فقلتي لنا وه ونحن نعلم بوجودك في الركن القصي ومع ذلك انخلعنا

ساعيد القراءة مرتين اخر وحتما ستلهمني المزيد

Post: #13
Title: Re: حسنه بت محمود.......الشاهد الاخير...
Author: مريم بنت الحسين
Date: 10-13-2003, 04:12 PM
Parent: #1

هالله هالله يا أستاذة...
أدهشتني وقفتك على هامش العظمة... ورؤيتك لعظمة لم ينتبه إليها أحد... تخيلتك تقفين على جانب كتاب أخضر عتيق... يضم بين ضفتيه أبطال قصة، اسطورة.... لكن الروعة في أن تنبيهنا إلى من هم ليسوا بالأبطال... مصطفى سعيد غمر الكل بسحره (الأفريقي)... وغموضه المتفرّد... فنسينا حسنه... كما هي العادة... أو هو التناسي....

لك الود يا رائعة

بنت الحسين

Post: #15
Title: Re: حسنه بت محمود.......الشاهد الاخير...
Author: Tumadir
Date: 10-13-2003, 04:51 PM
Parent: #13

الاصدقاء العزاز

ازرق
نايل ون

عشة بت فاطنة

اهل العوض

ابوجهينة

ود قاسم


قوى

مايا

نزار حسين

مريم بت الحسين


اعتز بالصدى الذى احدثه العمل فيكم


اعتز بمداخلاتكم وانطباعاتكم المشجعة


ويا اهل العوض انت من المهتمين... ومن هو المهتم...اليس هو من يأخذ الوقت ليقرأ ويبذل الجهد ليعلق؟؟؟

ودقاسم ...مالو؟؟؟ نختلف

حسنة بت محمود ماتت غاضبة...ورأيت ان استنطق منولوجوها الداخلى فى لحظة اليتم الاخيرة التى عاشتها لوحدها بصمت


ولو انه الجانب المحرض المتفائل دة ما ورد بخاطرى ...فأنا اشد على يدك فى تنيهى لما اغفلت عنه...وبرضو ما اختلفنا

عشة بت فاطنة الا ترين ان كثيرا من الرجال يبحث عن نموذج الام فى رحلة بحثه عن المرأة؟؟؟ تراءت لى صورة ام مصطفى سعيد كثيرا بين شفاه حسنة المطبقة ونظراتها الغامضة...شكرا للانتباه


شكرا للجميع والله كنت جبانة جدا وانا اترقب حضوركم وتعليقاتكم ...يعنى نقول براءة؟؟؟

Post: #14
Title: Re: حسنه بت محمود.......الشاهد الاخير...
Author: 3mak Hasabo
Date: 10-13-2003, 04:36 PM
Parent: #1

رائع هذا الثرد يا تماضر.....حقيقية لقد ادهشنى بكل عباراتة التى لم اجد لها وصف لقوتها وثقتها من موضعها.....حتى اعطانى ذاك الاحساس باننى قراءت موسم الهجرة للشمال ناقصة....واعتقد بانك عثرتى على احد الصفحات التى سقطت من اديبنا الطيب صالح عند الاعداد لطباعة موسم الهجرة للشمال

Post: #16
Title: Re: حسنه بت محمود.......الشاهد الاخير...
Author: Tumadir
Date: 10-13-2003, 04:56 PM
Parent: #14

عمك حسبو

بردا وسلاما ...بردا وسلاما

Post: #17
Title: Re: حسنه بت محمود.......الشاهد الاخير...
Author: KANDAKE
Date: 10-13-2003, 05:11 PM
Parent: #16

يجازيك يا دي المبدعة. أريته مخى بعد ده الحال.

Post: #18
Title: Re: حسنه بت محمود.......الشاهد الاخير...
Author: Tumadir
Date: 10-13-2003, 05:31 PM
Parent: #17

هرشك


لوووول

Post: #19
Title: Re: حسنه بت محمود.......الشاهد الاخير...
Author: Amin Elsayed
Date: 10-13-2003, 05:50 PM
Parent: #18

الحمد لله في راجل عجبك... مصطفي سعيد , كنت قايلك لحقتي زميلاتنا ال.Feminist؟

Post: #20
Title: Re: حسنه بت محمود.......الشاهد الاخير...
Author: Tumadir
Date: 10-13-2003, 05:54 PM
Parent: #19

انا ولا حسنه يا امين السيد؟؟؟

Post: #21
Title: Re: حسنه بت محمود.......الشاهد الاخير...
Author: KANDAKE
Date: 10-13-2003, 07:40 PM
Parent: #20

Amin:
What does feminism have to do with not liking men, May be you meant Lesbians
?

Post: #22
Title: Re: حسنه بت محمود.......الشاهد الاخير...
Author: Tumadir
Date: 10-13-2003, 07:45 PM
Parent: #21

ممكن استعمل شعارك ؟؟


Tell us what it is to be a woman so that we may know what it is to be a man. What moves at the margin. What it is to have no home in this place. To be set adrift from the one you knew. What it is to live at the edge of towns that cannot bear your company. (Toni Morrison Nobel Lecture, 1993)

Post: #23
Title: Re: حسنه بت محمود.......الشاهد الاخير...
Author: Osman Hamed
Date: 10-13-2003, 07:54 PM
Parent: #1

العزيزة تماضر(TUMADIR)
وقد كنت, كغيرى, أقولها تماضر, بفتح التاء وضم الضاض, حتى أن سمعتها على طريقتكم(العائليّة), من صديقتى مريم. على كل دعك من هذه الهرطقة, , ودعينى أقول لك شكراً على هذا النص المبدع, بلغته الشامخة, الشفيفة, المتماسكة وصوره الجماليّة المتميّزة. لأنىّ أعتقد أن الأمساك بناصيّة اللغة وتطويعها بهذه القدرة الفذّة/النابضة, هو واحد من ضمن عناصر, ربما كثيرة, قد أكسبته تلك الروعة وذلك الألق.
شكراً مجداً.
سلام

Post: #24
Title: Re: حسنه بت محمود.......الشاهد الاخير...
Author: wd al geran
Date: 10-13-2003, 07:57 PM
Parent: #1

براءة!! من الذي قال ذلك ؟؟

انا اقول مدانة بجريمة...




















الابداع.

وليتكي تواصلين

لكني شايف الجو زي الاتكهرب كدة

Post: #25
Title: Re: حسنه بت محمود.......الشاهد الاخير...
Author: Amin Elsayed
Date: 10-13-2003, 08:12 PM
Parent: #24

Dear Kandaka

اعرف ان زميلاتنا من مختلف مدارس اليسار السوداني وصديقاته يصبحنا صيدا سهلا لمدارس Feminism والمنظمات النسوية في اوروباونحن في اشد الحوجة لهم لبناء السودان الجديد ومشاكل المجتمع السوداني. انا شخصيا ماعندي اعتراض ان يكون الانسان مايريدLisbian او غيره. لكن حركات الFeminism تحرف الصراع في سودانا الجديد.

Post: #26
Title: Re: حسنه بت محمود.......الشاهد الاخير...
Author: Agab Alfaya
Date: 10-13-2003, 09:28 PM
Parent: #1

Quote:
فمصطفى سعيد كان يبحث عنى

و عندما

قتل آن همند وشيلا غرينود وايزابيلا سيموروجين موريس... بغموضه الافريقى الساحر..

كنت انا فى غياهب الآتى و المستحيل....ادرى انه كان يبحث عنى

يا سلام يا رائعة علي هذا التناص الرائع
كم جميل ان تتحول حسنة الي رمز وجودي لكل ما كان يبحث
عنه مصطفي سعيد،
لقد تغيرت حسنة بعد زواجها من مصطفي سعيد
صارت مثل نساء المدن، حتي ان من رغبوا في الزواج منها
فعلوا ذلك ليس حبا فيها وانما لانها زوجة مصطفي سعيد
ود الريس كهؤلاء الناس المغرمين باقتناء الحمير ،الواحد منهم لا تعجبه الحمارة الا اذا راي رجلا اخر راكبا عليها،
مصطفي سعيد موته كان خسارة، لا تعوض كما وصفه محجوب؛لقد ساعدنا مساعدة قيمة في تنظيم المشروع ،كان يتولي الحسابات.وهو الذي اشار علينا باستغلال ارباح المشروع في اقامة طاحونة للدقيق.لقد وفرت علينا اتعابا كثيرة،واصبح الناس اليوم يجيئونها من اطراف البلد.وهوالذي اشار علينا بفتح دكان تعاوني.الاسعار الان عندنا لاتزيد عن الاسعار في الخرطوم.المشروع اليوم يملك عشرة لواري..
رجوته اكثر من مرة ان يتولي الرئاسة ولكنه كان يرفض ويقول انني اجدر منه .العمدة والتجار كانوا يكرهونه كراهية شديدة لانه فتح عيون اهل البلد وافسد عليهم امرهم...ذلك هو الرجل الذي كان يستحق ان يكون وزيرا في الحكومة لو كان يوجد عدل في الدنيا
Quote:
هل تعرفون لماذا كان رجال الحى يلهثون للارتباط بى والزواج منى؟؟؟

حتى الراوى ارتجف قلبه...فهو غير معصوم من جرثومة العدوى التى يتنزى بها جسم الكون

لم يرد احدهم الارتباط بحسنى بت محمود...بل ارادوا الزواج من ارملة مصطفى سعيد

كانوا رجالا ببعد واحد...افق واحد

وكان رجلا بالف

Post: #27
Title: Re: حسنه بت محمود.......الشاهد الاخير...
Author: مهاجر
Date: 10-13-2003, 10:23 PM
Parent: #26

الاستاذة لو رديت مباشرة بنات حواء بقولوا حاجات تانية
لكن اهديك هذه الاغنية لما تحمله من معاني
واديك عبارة واحدة : اي انسان بحب مرة واحدة
لكن يعيش بقية عمروا حسب مقتضيات الطبيعة حوله



**



حقيقة قطعة رائعة

Post: #28
Title: Re: حسنه بت محمود.......الشاهد الاخير...
Author: Tumadir
Date: 10-14-2003, 00:16 AM
Parent: #27

عجب الفيا


مرحبا بك تزاول مهنتك فى بيتنا...!

الشرف زارنا بزيارتك



مهاجر


بنات حواء بعد العرفوه دة كله البزعلهم شنو تانى؟؟؟


حسنة بت محمود امراة بعواطف ...طبيعية ، ارادت ان تتزوج وتخلف وتعيش زوجة وام....لكنها لم تنج من ظلم الرجل لها...والاشتهاء المغروض...فلماذا لاتغضب؟؟؟

Post: #29
Title: Re: حسنه بت محمود.......الشاهد الاخير...
Author: Tumadir
Date: 10-14-2003, 02:02 AM
Parent: #28

عثمان حامد

وود الجيران


يامراااااحب


والف شكر

وسابلغ ياعثمان صديقتك مريم انك كنت هنا

ونورتوا

Post: #30
Title: Re: حسنه بت محمود.......الشاهد الاخير...
Author: merghani hamza
Date: 10-14-2003, 03:32 AM
Parent: #1

الرائعة ..تماضر
متى ستخرج بت محمود من عزلتها ومتى نكسر هذا الصمت
وامتنانى
ميرغنى حمزة

Post: #32
Title: Re: حسنه بت محمود.......الشاهد الاخير...
Author: إيمان أحمد
Date: 10-14-2003, 03:57 AM
Parent: #30

الأستاذة تماضر

تقولين راجفة، بالتأكيد، لاعجب

لما بك من احساس هاااائل دفقتيه في هذا النص

رااااااااائع

حد الابتسام والوجع في آن واحد. فهو نص محرض (بكسر الراء)، نعم محرض.

لك التحية، ولفنك نقف ، وشكرا لمنحنا الدهشة في زمن الرتابة

إيمان أحمد

Post: #31
Title: Re: حسنه بت محمود.......الشاهد الاخير...
Author: merghani hamza
Date: 10-14-2003, 03:45 AM
Parent: #1

كتبت متى تخرج من عزلتها يا تماضر لاننى اعتقد بان بت محمود لم تموت فقط
هى فى عزلة والعزلة تشابه الموت

Post: #33
Title: Re: حسنه بت محمود.......الشاهد الاخير...
Author: فتحي الصديق
Date: 10-14-2003, 04:17 AM
Parent: #1

تماضر
ما رأيك في ان تعيدي قراءة جميع روايات العالم لاجل اكمال ما نقص فيها؟
ارشح لك (الضفة الاخرى) لابكر ادم اسماعيل لتعيدي القراءة و...الكتابة
شكرا تماضر

Post: #34
Title: Re: حسنه بت محمود.......الشاهد الاخير...
Author: Tumadir
Date: 10-14-2003, 04:44 AM
Parent: #33

ايمان احمد

ميرغنى حمزة

فتحى الصديق


ما اجمل مزاركم السخى

اهلا بى مقدمك للبورد يا ايمان ...سمعت عنك اشياء جميلة ويبدو انك اجمل منها جميعا
ميرعنى توشكر ياخى


فتحى ....الموضوع فى الخاطر

لقتراحك على العين والراس

Post: #42
Title: Re: حسنه بت محمود.......الشاهد الاخير...
Author: إيمان أحمد
Date: 10-14-2003, 05:46 PM
Parent: #34

الأستاذة تماضر
شكرا لردك الرقيق، وثقتك.
إن كنت كما تقولين، فأنا حتما طفلة بضفائر تلعب في الشارع!
يافرحتي!

لك خالص الود والتقدير!

إيمان

Post: #43
Title: Re: حسنه بت محمود.......الشاهد الاخير...
Author: Tumadir
Date: 10-14-2003, 11:13 PM
Parent: #42

ولك ايضا يا ايمان

Post: #35
Title: Re: حسنه بت محمود.......الشاهد الاخير...
Author: hala guta
Date: 10-14-2003, 05:57 AM
Parent: #1

تماضر
انا قريت النص دة زى عشرة مرات
واقول اكتب لكن القى احسن اقرى تانى
فى كل مرة
اقراه كانى اراه للمرة الاولى


مدهش بحق

Post: #36
Title: Re: حسنه بت محمود.......الشاهد الاخير...
Author: doma
Date: 10-14-2003, 09:17 AM
Parent: #35

البت الحديقه ليك الانحناءه
بس عايزه اقول هل حقا كان مصطفي سعيد يبحث عن حسنه بت محمود عندما قتل عشيقاته البيضاويات؟؟ ام هو احساسه بالعجز امام الرجل الابيض والانتقام منه بعقليه تري الشرف مدفونا في فروج النساء ليت حسني انتصرت لبنات جنسها اينماكن بغض النظر عن لون بشرتهن

Post: #37
Title: Re: حسنه بت محمود.......الشاهد الاخير...
Author: Tumadir
Date: 10-14-2003, 11:46 AM
Parent: #36

هالة قوتة الحنينة

قولك هذا اسكر عصافير طربى...

وكبر راسى

براحة....على ولك شكرى


دوما

اعز من المنحنى....مش ممكن نتصرف فيها دى ولا شنو؟؟؟ المهم كلماتك مقدرة

من وجهة نظرى انه حسنة وام مصطفى هم القوسين الاحتووا شبه جملة حياتو المتعثرة....وراق لى ان يكون تخبطو بين نساء الخواجات دافعو الاساسى انه رايحة ليه نموذج امراة زى حسنة، انا بغير زيها عليه من شوقو للخواجيات بينما السكون عندها هى....ولا شنو؟؟؟ يعنى ببساطة
كدةغيرة نسوان عادية منى

Post: #38
Title: Re: حسنه بت محمود.......الشاهد الاخير...
Author: معتصم ود الجمام
Date: 10-14-2003, 12:20 PM
Parent: #37

العزيزه
تماضر كثيرا ما افكر في ادب الطيب صالح من زاوية دراميه
تمت معالجة عدد من اعمال الطيب صالح مسرحيا ولكن هذه العوالم الساحره لماذا لا نتجها نحن السودانين سنما وتلفزيون اتخيلي معاي يا تماضر موسم الهجره الى الشمال مسلسل تلفزيوني من بطولة ابراهيم حجازي اه لو نقدر نكون قدر السواهو الطيب صالح ليه هو موش مننا وده واقعنا واحد قبل كده طلع في الحيطه وقال الطيب صالح شخوصو ما واقعيه يعني بت مجذوب دي ما في السودان المهم ....
حسيت انك حسيت بحسنه شديد .. ممكن يا تماضر تشتغلي الشخصيه دي بالسكه الانتي سوقتيها فيها ملودرما عرض تداعى فيهو حسنة بت محمود اكتر من كده وتكوني فعلا اكتشفتي انت تماضر وحسب تحليلك ابعاد تانيه للشخصية
ياريت يا تماضر يجي يوم يكون عندنا القدره نشتغل موسم الهجره الى الشمال مسلسل سوداني ممثلين سودانيين ومخرج سوداني
حتظل هذه الامنية تراودني
ولك الود
معتصم سيد احمد

Post: #39
Title: Re: حسنه بت محمود.......الشاهد الاخير...
Author: doma
Date: 10-14-2003, 12:21 PM
Parent: #1

والله يا البت الحديقه يمكن المشكله فيني انا لانني لم افتتن قط بشخصية مصطفي سعيد وهو يجسم لي حجم الماساه وعمق الاتهزام للرجل القادم ليهزم الرجل الغربي متسلحا فقط بعضوه الذكوري ولذ اتبرأ منه ان كنت اما ام زوجه.لكين طبعا اهل الفن والادب ينظرون بعدسات اكثر جمالا ويرون ما لا اراه .
وليك القومه

Post: #40
Title: Re: حسنه بت محمود.......الشاهد الاخير...
Author: Tumadir
Date: 10-14-2003, 01:05 PM
Parent: #39

معتصم ود الجمام

انا معاك بحلم بظروف اجمل تخلى الاعمال الكبير دى يكون متاح للفنانين فرصة انتاجها ...والجديد الماطلع يطلع


انا كتبت حسنة بت محمود عشان اشتغلها بمسرح المرأة الواحدة...كتبتها هنا عشان اتنور باآراء واحفر فى الشخصية اكتر


وزى ما شايف اهى دومة بدت....هههه

دومة ...انا بستنط....قولى


بس اقول ليك حسنة دى الراجل دة اتزوجتو...وولدت منه...وكانت مؤملة تعيش معاه اطول لو ما ...زاغ

ومصطفى عنده تاثيرات نفسية معقدة اثرت على مسلكو المطروح فى الرواية ....فهو رحل من البلد وهو فى مرحلة ما قبل المراهقة...وكان بدا يفهم نفس المرأة فى القبلة الطبعتها على خده السيدة الاستضافتو فى بيتها...رحل وهو تائه بين مشاعر طفل ورجل...وما لقى قدامو الا نسوانه البيض ديل... هل هو كان مذنب فى كل سلوكه تجاهم؟؟؟ دة البشوفوه الناس بزوايا مختلفة....ودة مربط فرس القوة فى موسم الهجرة....ولا رايك شنو؟؟؟؟


واصلى حوار بالله...لانو مفيد لى

Post: #41
Title: Re: حسنه بت محمود.......الشاهد الاخير...
Author: KANDAKE
Date: 10-14-2003, 04:21 PM
Parent: #40

Amin:
What is it that you know about feminism that would hinder the building of new Sudan. I hope to hear from you some concerete objections to any feminist theory.
Kandake

Post: #48
Title: Re: حسنه بت محمود.......الشاهد الاخير...
Author: doma
Date: 10-15-2003, 10:50 AM
Parent: #40

البت الحديقه محبه وسلام
لو واصلت مصطفي سعيدات بجوا يظعمطوني يبدو ان حسنه بت محمود قد ارتضت ان تهدهد من بيدهم الدماءوكل العذر انها دماء بيضاء
يا نساء العالم اتحدن!!

Post: #44
Title: حسنه بت محمود.......الشاهد الاخير...
Author: Mutwakil Mahmoud
Date: 10-15-2003, 01:47 AM
Parent: #1

ياطماطم
أنا آخر مره أطل فيها علي المنتدي قلت ليك خشي الحوش المرشوش بحب معجبينك ديل وأتحكري في نص العنقريب وورجقي لكن النصيحه ليك يا الله ما كنت قايلك بتورجقي الورجقه دي كلها لو استمريتي بطريقتك دي بتقتلي ليكي زول ذي ماقال حلو اللسان الفنان زيدان يوم حار في رمضان لقو برش في الحوش الساعه ثلاثه قال ليهم رمضان كان أستمر بالطريقه دي شوف عيني يقتل ليهو زول
اه أنتي بكتابتك دي شوف عيني حتقتلي ليك زول
وبعدين والله بيسألوك مننا سؤال منكر ونكير
والله روعه ورائعه كعادتك
وأجزم أنك الوحيده القادره علي أنتشال مصطفي سعيد من تلك النهاية المحيره
أطلقي لخيالك العنان
ومني كل العون ليري النورهلا فعلنا ذلك؟
أشواقي حين تسعي اليك تشتاق
د. متوكل

Post: #45
Title: Re: حسنه بت محمود.......الشاهد الاخير...
Author: Mutwakil Mahmoud
Date: 10-15-2003, 01:55 AM
Parent: #1


Post: #46
Title: Re: حسنه بت محمود.......الشاهد الاخير...
Author: altahir_2
Date: 10-15-2003, 04:12 AM
Parent: #1

الشعلة الملتهبة في دنيانا
الاستاذة تُــــــــــــــماضر لك الف تحية

Post: #47
Title: Re: حسنه بت محمود.......الشاهد الاخير...
Author: الجندرية
Date: 10-15-2003, 08:52 AM
Parent: #1

يا تماضر
اسجل اعجابي
وساعود
محبتي

Post: #49
Title: Re: حسنه بت محمود.......الشاهد الاخير...
Author: Tumadir
Date: 10-15-2003, 10:58 AM
Parent: #47

doma


مافى وعميططن جاييى...حسنة دايرة تعمل معنى لوجودها...والحب بيدى معنى للوجود
د.متوكل

شكرا لحسن الظن...غير المشروط
الطاهر2

حبابك الف

الجندرية

i can't wait to see u here again.

شكرا لموهبتك الجندرية المؤصلة

Post: #50
Title: Re: حسنه بت محمود.......الشاهد الاخير...
Author: maia
Date: 10-15-2003, 12:43 PM
Parent: #1

تماضر العزيزة
بمشي وبجي وبلقى نفسي بدخل البوست ده في كل مرة ، دايما ابطال موسم الهجرة للشمال فيهم سحر غريب
وحسن بت محود شخصية انثى حقيقية
ياريت ما توقفي تكتبي لينا ابداعك

Post: #51
Title: Re: حسنه بت محمود.......الشاهد الاخير...
Author: ابو مهند
Date: 10-15-2003, 05:07 PM
Parent: #1

تماضر لك التخايا

(جميلة انا.؟؟؟..اعرف كم انا جميلة...ولكن جمالى لايلفت انظار هذه القبيلة)
كما قال احد رواد البورد معلقا يا ترى هل فعلا كان مصطفى يبحث عن حسنة ام هي التي اتته؟ يا لها من حكاية...وانا اعرف وهم يعرفون ان اولاد وبنات بلدي مبدعون دوما ونعرف مدى جمالهم ولكن كل هذا لا يعنيهم ويغضون عنه الطرف..ويا تماضر انت شعلة من الابداع ولي عوده

Post: #52
Title: Re: حسنه بت محمود.......الشاهد الاخير...
Author: Tumadir
Date: 10-15-2003, 11:31 PM
Parent: #51

ابومهند

اشعل الله جذوة ابداعك


شكرا ...لكن مش فكرة حسنة تكون حلم مصطفى سعيد الابدى...حلوة؟؟؟

وبعد الطيب صالح كتبها...نحن علينا التاويل

Post: #53
Title: Re: حسنه بت محمود.......الشاهد الاخير...
Author: Abdalla Gaafar
Date: 10-16-2003, 09:42 PM
Parent: #1

الغزيزة تماضر
عدت فوجدتك والحمد لله

ذات الحال جمال اللغة وتحريض الاقلام

لك الود والتقدير علي اهداء الدهشة دائما لكل الخلق

تماضر
اهي لعنة مصطفي سعيد حين تقف بت محمود ذات الوقفة التي وقفها مصطفي سعيد في قاعة المحكمة الكبري بلندن لتفعل ما عجز عنه مصطفي سعيد لتعترف...خارج الرواية والنص...بقتل ودالريس انتقاما لانسانيتها المكلومة!...لحظة تتساوي فيها الهزيمة والانتصار! اهو الانتفام لانسانيتها ام الانتقام لمن اصابتهن جرثومة عشق مصطفي سعيد بداءً بان همند وشيلا غرينود وايزابيلا سيمور وجين مورس وختاما بها (بت محمود)
نعم بت محمود كانت في غياهب الاتي المستحيل لانها كانت تملك سر النهاية فعبر اليها مصطفي سعيد ختاما لتراجيديا الصمت والفجيعة.
هكذا وصفها الراوي قامة ممشوقة,ممتلئة كعود قصب السكر و.......امرأة نبيلة الوقفة أجنبية الحسن او هكذا تخيلها في لحظة ضعف كالتي قادت ودالريس الي حيث اراد مصطفي سعيد ان ينهي المأساة...
قال الراوي وهو يحكي عن حسنة بت محمود

وارتجف قلبي من عذوبة ضحكتها. وانتشر دم المغيب فجأة في الافق الغربي كدماء ملايين ماتوا في حرب عارمة نشبت بين الارض والسماء وانتهت الحرب فجاةً بالهزيمة!!!!!!!

هزيمة من؟ لست ادري
تماضر
هكذا دائماً يصيبني الموسم بالطرب حتى الثمالة فأعود ممتلأاً به حتى الاندهاش.

ولعل الحنين الي الجذور هو الذي يُحدد دائما مقدرتنا علي ادمان أدب الكاتب الرائع جداً الطيب صالح.

تماضر

لك الود ....كان هذا ماتخيلته وانا أقرأ رائعتك( عرضحال حسنة بت محمود ضد ودالريس وآخرين)

البت الفكرة سلام

عبدالله جعفر

Post: #54
Title: Re: حسنه بت محمود.......الشاهد الاخير...
Author: هدهد
Date: 10-16-2003, 10:22 PM
Parent: #53

ياعبدالله
ادخل هنا واهرب حين يغلبني الكلام
اخاف اللغة الجميلة
هي تماضر حين تشاطر الحرف تصاحبه، تحبة ،تنهض بدورته الدموية
هي تماضر حين تخاف ان تقرأ لها
وبما اني مكسو بهذ الفرح الذي حكيت لك عنه قبل قليل
دعني انزع ملابسي واركز لهذا الكلام
فمن يكون مثلها حين تمسكنا
بهذا الكم من الابداع
ساعود فثمار تماضر تعرف كيف تهبك التذوق
كم هي عذبة
وكم هي تصلبك واقفاً
حين تكون اختاً وسلسلةً فقرية ونخاعاً ينتجك
عفواً
الغالية تماضر
اننا نحبك

Post: #55
Title: Re: حسنه بت محمود.......الشاهد الاخير...
Author: Tumadir
Date: 10-17-2003, 04:14 AM
Parent: #54

عبدالله جعفر وهدهد

ماذا اسمى هذا الذى تخطان؟؟؟

منفستو الفرح والامتاع؟؟؟

فرمان الشجون والتمدد فى الحريق؟؟؟

التشهد فى محضر الملائكة؟؟؟


انعقد لسانى...والله


وعذرا احبكما

Post: #56
Title: Re: حسنه بت محمود.......الشاهد الاخير...
Author: اسامة الخاتم
Date: 10-17-2003, 11:34 AM
Parent: #55

تماضر
دا كلام كبــــير

Post: #57
Title: Re: حسنه بت محمود.......الشاهد الاخير...
Author: Tumadir
Date: 10-17-2003, 02:57 PM
Parent: #56

اسمة الخاتم


كبر الله شانك

Post: #58
Title: Re: حسنه بت محمود.......الشاهد الاخير...
Author: محمد عبدالقادر سبيل
Date: 10-17-2003, 09:07 PM
Parent: #57

المبدعة تماضر
اقل ما قدمته لي هذه القطعة الذهبية المشغولة جيدا .. هو المتعة
ثم التأمل في الشأن الوجودي الاشكالي
ولكن خارج النص من المهم ان تعلم المنشغلات بقضايا المرأة ، أن في داخل كل فحل مقدارا ما من الانوثة، هو فقط ما يجعله- هذا الفحل - مقبولا من الآخرين ، أقصد ما ينطوي عليه من مودة وتسامح وبشاشة ورحمة ووسامة وجمال مظهر، اليست هذه من متعلقات الصورة النمطية للمرأة ( ثقافة المرأة)؟ 0
وفي المقابل فان داخل كل انثى حقيقية مقدارا ما من ثقافة الذكورة ، هو فقط ما يجعل حياتها ممكنة وسط وحوش المجتمع ومجرميه0
من هنا فان مهمةالفن والمبدعين ، في نظري، هي توسيع هامش الانوثة في الفحل الى اقصى حد ممكن ، دون المساس بفاعلية وظائفه الفسيولوجية طبعا ( حتى لا يفهموني غلط !! )
اقول هذا الكلام باعتبار ان محتوى نموذج الانثى تقليديا يشمل جملة من القيم الانسانية السمحاء بينها : التسامح والحياء واشاعة المحبة والخير والجمال ورعاية الرجل والبيئة والتربيته وصناعة الزينة . في مقابل مكونات نموذج الرجل التقليدي أو التاريخي ومنها ( خوض الحروب ، وترميل الحسان واغتصاب السلطة وممارسة العنف والقهر واظهار الصلابة والجرأة والاعتداد بالرأي و الخ )
ورغم وجود امثلة ذكورية وسط النساء ( مثل الخنساء التي امتدحت أخاها لأنه ساد عشيرته امردا ، وانه رمل نساء قبيلة اخرى ومثل تاتشر وكثير من الفامينست -اللائي يتعاملن مع قضية المرأة بعنف وروح ثأرية ويسعين الى قهر الرجال نوعا من العقاب ) .. رغم ذلك
فان الأمل مايزال معقودا باتجاه تحقيق نموذج مشترك ( تصوغه حزمة قيم انسانية رفيعة ومتبناة من الطرفين ) ولكن بشرط واحد
هو ان تظل لكليهما خصوصيته وميزته وطعمه المختلف0
اذن فيمكننا ان نخلص الى انه: ليست المشكلة بين المرأة والرجل التاريخي النمطي فقط ، وانما هنالك مشكلة بين هذا النوع من الرجال وبين ذاته،المحملة بتركة تاريخية ثقيلة ، الأمر الذي يتطلب يدا حنونا تمتد اليه لتنقذه من ورطة النموذج، فالمجتمع قاسي عليه ايضا ، وحينما نقول المجمع فان المرأة ايضا مشمولة ، طالما انها طالما غنت وامتدحت حالات تمثل النموذج في ابشع صوره، ناهيك عن نماذج النساء اللائي حرضن على العنف والخراب واشعلن الحروب عبر التاريخ . كما أن هنالك مشكلةالآن مع الانثى المناهضة للذكورة النمطية بواسطة ادوات هذه الذكورة النمطية ، حينها تتكسر النصال على النصال فقط0

نحن نحتاج الى امثالك يا تماضر، للنظر الى المشكلةبعين اوسع ، بهذه الجدلية والجدية ، لأنك مبدعة حقيقية0
_______________
رب اشرح لي صدري

Post: #59
Title: Re: حسنه بت محمود.......الشاهد الاخير...
Author: Tumadir
Date: 10-18-2003, 05:02 PM
Parent: #58

تلاستاذ محمد عبد القادر سبيل...


قرات مداخلتك عدة مرات...وخلصت لهذه اللوحة النموذجية التى تنشدها فى بحثك عن الحقيقة...انسان كامل الوجود ...حقوقه وواجباته واضحة وغير مهضومة....ودوره الاجتماعى والاخلاقى غير مشوه..امراة كانت ام رجلا...

جميل ان ننشد حلما مثاليا كهذا...

ولكنى لا اظنك قداغفلت عامل الزمن ، وهذا الذى نسميه الواقع ....الان..ابن التاريخ ووالد المستقبل
انه كزحف الرمال ...لا يثبت على شكل ...ولا يرسخ فى مكان...ولا يحده الزمان...

فاللاتى و الذين يحملون عبء التطوير وبناء المستقبل الانسانى...يا استاذ سبيل، يجدون صعوبة كبيرة فى ادارة حوار بارضية فكرية واحدة و مؤسسة لطرح قيم اجتماعية واخلاقية بهذه المباشرة والوضوح....والبساطة...من كثرو تعقيد الواقع الفكرى ...للمتحاورين...

فمثلا مازالت المراة السودانية خاصة وفى كل العالم تعانى من الاعتداء والعنف الجسدى... والنفسى والاجتماعى بعوامل ارثية تقليدية تاريخية وجغرافية وحتى حديثة ومتحضرة...

بينما يدعو البعض لانها نالت جل حقوقها ...ولماذا التباكى؟؟؟؟

انها عمليات معقدة وطويلة المدى...

والمراة اليوم عندما تعى حقيقة كونها امراة وتتعرف على دورها وحقها فى الوجود...اصبحت تتحايل احيانا وتصطدم بعنف احيانا اخرى، مع قوى القهر التى حدت من طاقاتها سنينا...وحالت بينها وبين حق التعرف على ذاتها واحتمالاتها وتبدياتها...وصديقتها المراة...بدون فهم التناسل...والانجاب...



يا سبيل...سنبحث معا عن سبيل...للخروج من عنق الزجاجة...اكيد هنالك سبيل


شكرا للحضور هنا


Post: #60
Title: Re: حسنه بت محمود.......الشاهد الاخير...
Author: Tumadir
Date: 10-21-2003, 02:29 AM
Parent: #59

من النبل ان اوصل راى ناقد لا ينتمى الى البورد قاله لى عبر التليفون,,,,

وقد اعجبته فكرة التناص هذه...خروج النص من النص....

لكنه بعتقد ان حسنة بت محمود...لا يجب ان تقول عن الراوى ...راوى... لانه فى نظرها هو الوصى على الاولاد...


قلت ان حسنة خرجت من النص ونظرت اليه فى منتصف المسافة بين القارىءظالمتلقى وبين الفضاء النصى...

هى تعى بواقعها كشخصية فى داخل رواية فى آخر فصولها...ويقع عليها عبء التساؤل وحل الغاز الابطال...


وقد اوردت ذلك فى حديث النص ...المنبعث من النص الاصلى...

بقى ان اقول ان الناقد هذا هو عبد اللطيف على الفكى....


اما نقدى الذاتى ...فانا قد اغفلت من لحظة هامة فى وقفتها الاخيرة ...عبى حد سيف المنية...فهى لم توجه كلاما لولدبها...وبم تبك لفراقهما او تشجعهم على تحمل غيابها

لذا لرم التنويه...


شكرا لكل من احب هذه الكتابة....او علق عليها.....وافتح الباب...على مفصلاته...للبقيه

Post: #61
Title: Re: حسنه بت محمود.......الشاهد الاخير...
Author: ابنوس
Date: 10-21-2003, 07:34 AM
Parent: #60

تماضر
اذن حسنى بت محمود .. هي الشاهد الوحيد

Post: #63
Title: Re: حسنه بت محمود.......الشاهد الاخير...
Author: Tumadir
Date: 10-21-2003, 01:32 PM
Parent: #61

ابنوس


ما بعيد

Post: #62
Title: Re: حسنه بت محمود.......الشاهد الاخير...
Author: mustadam
Date: 10-21-2003, 01:12 PM
Parent: #1

ياتماضر:
عندى ليك مفاجأه بس اصبرى خليها تنجض و اراجعها كويس عشان تليق بمقام نصك البديع
مصطفى آدم

Post: #64
Title: Re: حسنه بت محمود.......الشاهد الاخير...
Author: Tumadir
Date: 10-21-2003, 01:33 PM
Parent: #62

الشفقة تطير يا مصطفى آدم...الله يصبرنى

Post: #65
Title: Re: حسنه بت محمود.......الشاهد الاخير...
Author: Tumadir
Date: 10-22-2003, 01:40 PM
Parent: #64

انتى يانسخة ياعربية تطلعى فوق تقعدى مع صاحبتك الانجليزية الترجمها ليك مصطفى آدم....طيب؟؟؟؟

Post: #66
Title: Re: حسنه بت محمود.......الشاهد الاخير...
Author: ABU QUSAI
Date: 10-22-2003, 02:49 PM
Parent: #65

لك الله أيتها الرائعة . لك الله وانت تنبشين في موروثنا الثقافي في محاولة للانعتاق من تقاليد القبيلة البالية (ولكن ليست كلها) . أحييك وأحيي هذه اللغة الراقية . ولي قدام .

Post: #67
Title: Re: حسنه بت محمود.......الشاهد الاخير...
Author: mustadam
Date: 10-23-2003, 07:11 PM
Parent: #1

العزيزه تماضر
: أرجو إرسال عنوانك حتى أوافيك بالنسخه المنقحه. ناقشت النسخه الأولى التى نشرتها هنا مع بعض الزملاء بالكليه هنا و أجرينا بعض التعديلات الطفيفه. ربما أحتاج لنسخه من النص الأصلى على (ورد) . أحاول أن أستخدم إبداعك فى دراسه حول إشكالية الترجمه الأدبيه , إعتمادا على أن الروايه التى تدفق عنها نصك البديع قد ترجمت إلى العديد من اللغات, هذا بعد إذنك بالطبع!
مصطفى آدم

Post: #68
Title: Re: حسنه بت محمود.......الشاهد الاخير...
Author: Ishraga Mustafa
Date: 10-25-2003, 10:58 PM
Parent: #67

foooooooooooooooooooooog


um marafi

Post: #69
Title: Re: حسنه بت محمود.......الشاهد الاخير...
Author: الجندرية
Date: 12-02-2003, 10:43 AM
Parent: #1

فووووووووووووووووووق

Post: #70
Title: Re: حسنه بت محمود.......الشاهد الاخير...
Author: Tumadir
Date: 12-03-2003, 08:47 AM
Parent: #69

الجندريه

البورد قرب يقفل..

انا منتظراك