Post: #1
Title: مجرد ملاحظة
Author: Nasruddin Al Basheer
Date: 12-25-2005, 11:34 PM
Parent: #0
عضو جديد (1): احتراق طائرة ركاب سودانية في مطار بورتسودان (نسأل الله السلامة)
عدد المتداخلين: (1)
عضو قديم (1): احتراق أعصابي وأنا في انتظار خطيبتي
عدد المتداخلين: 278
عضو جديد (2): طالب يسير عارياً داخل فناء جامعة الخرطوم
عدد المتداخلين: 3 رجال بس
عضو قديم (2) قميص فرفور بتاع سهرة أمس كان ما ماتشينق مع البنطلون
عدد المتداخلين: 331
عضو جديد (3): شاطروني الأحزان في وفاة والدي
عدد المتداخلين: 5
عضو قديم (3): مازن ابني أطفأ ثلاث شمعات
عدد المتداخلين: 176
عضو جديد (4): اطلاق سراح السوداني سامي الحاج المعتقل بغوانتنامو (آمين يا رب)
عدد المتداخلين: 4
عضو قديم (4): طلاق الفنانة الناشئة ناريمان العرضة
عدد المتداخلين: 538
عضو جديد (5): أم أضاعت طفلها في زحام مواصلات الحاج يوسف
عدد المتداخلين: 6 (كلهم من الحاج يوسف)
عضو قديم (5) : داريو كان أضاع ركلة ترجيح للهلال
عدد المتداخلين: 345
ملحوظة:
أتوقع أن يكون عدد المتداخلين لهذا البوست اثنين فقط
|
Post: #2
Title: Re: مجرد ملاحظة
Author: ابوبكر الامين يوسف
Date: 12-25-2005, 11:50 PM
Parent: #1
Quote: ملحوظة:
أتوقع أن يكون عدد المتداخلين لهذا البوست اثنين فقط
|
العزيز نصرالدين تحياتى
حاولت الانتظار لاكون ثالثا ولكن طال انتظارى ؛؛؛
اذن فدعنى اسجل الاول حضورا ؛؛؛
|
Post: #3
Title: Re: مجرد ملاحظة
Author: waleed500
Date: 12-26-2005, 00:22 AM
Parent: #2
الاخ نصر الدين
تحياتى
تسجيل حضور وحجز مساحة
|
Post: #6
Title: Re: مجرد ملاحظة
Author: Nasruddin Al Basheer
Date: 12-26-2005, 03:20 AM
Parent: #3
الأخ وليد 500
تحية واحترام،،
مشكور يا سيدي على الحضور المشرف وحجز المساحة..
ودمت..
|
Post: #4
Title: Re: مجرد ملاحظة
Author: عبدالرحمن الحلاوي
Date: 12-26-2005, 00:24 AM
Parent: #2
الأخ أبوبكر ( الأمين ) قلنا وكثر الحديث عن ضرورة فصل المنابر فليكن هناك منبراً أو عنبر لمثل هذه الأمور ولا غضاضة ولكن طالما المنبر حر فتوقع أي شي والناس بطبعها ميالة ( للإثارة ) وداحين ما تحمبك في مثل هذه التفاصيل ورواد المنبر فيهم النافع الصالح وفيهم الضار النافع وفيهم الضار الضاري وفيهم السم الهاري وفيهم من المابعرف الخمسة من الطمسة .
ولغاية هنا كفاية وخلي بالك بحر.
|
Post: #7
Title: Re: مجرد ملاحظة
Author: Nasruddin Al Basheer
Date: 12-26-2005, 05:15 AM
Parent: #4
الأخ عبد الرحمن كيف أحوالك وعساك بخير
لعلك لم تقرأ موضوعي أعلاه بدليل أن مداخلتك كانت رداً على
رد الاخ أبو بكر على موضوع البوست الأصلي، لذلك جاء ردك غير
متناغم مع الموضموع..
البوست كان عبارة عن كاريكاتير مكتوب يصوّر أن أعضاء المنبر
يهتمون بالاسماء أكثر من اهتمامهم بالمواضيع المنشورة للنقاش.
وقد طرحت هذا الموضوع بدون (حمبكة) ، متمنياً التعليق على رأيي ، فربما
أكون مخطئاً أو متوهماً، لكن لمست بحسرة شديدة أن هناك مواضيع جادة
ورائعة تحال إلى الارشيف وهي في مهدها والسبب أن كتابها أعضاء حديثي
العهد بالمنبر، وعلى العكس تماماً هناك مواضيع هايفة إن لم تكن تافهة
تجد القبول والمتابعة والردود ، والسبب للاسف أن كاتبيها أعضاء قدماء
في المنبر.
هدفت بهذا البوست أن ننتبه إلى موضوع مهم وهو موضوع الموضوعية في
الطرح والنقاش، متمنياً أن يرتفع ذوقنا العام ونتناول الأمور بمنطق
الاشياء ودون إقحام العاطفة والشلة.
وفي النهاية أنا لا أنادي بحجر الحريات أو تكميم الافواه ، كما أن
المناداة بتهذيب الأذواق لا يعتبر بأي حال ضد الحريات أو تعدٍ لحقوق
الآخرين..
أرجو أن تكون قد فهمت قصدي .. والله من وراء القصد..
|
Post: #5
Title: Re: مجرد ملاحظة
Author: Nasruddin Al Basheer
Date: 12-26-2005, 01:49 AM
Parent: #2
الأخ أبو بكر الأمين يوسف ود فداسي
تحياتي وسلامي الحار..
أنا سعيد كونك الأول حضوراً في هذا البوست
فشكراً لك على هذا الدعم المعنوي وأطمع في الدعم المادي كذلك
(ممكن أرسل ليك رقم حسابي في البنك)..
أبو بكر يا اخي أنا بسأل عن صديقي الرائع شقيقك
يوسف الأمين يوسف (ابو الحاج)الذي زاملني ثلاث سنين في مقاعد
الدراسة في حنتوب الجميلة .. ومعه نفر كريم من أولاد فداسي
منهم عثمان عبد الرحمن ، مبارك أحمد إبراهيم والحاج على الأمين (صجة).
أرجو أن تبلغهم سلامي أنا نصر الدين البشير (روبش).
ربما يكون في الأول لم ألحظ تطابق اسمك الكامل مع اسم يوسف
لكن لما شفت صورتك مع بورداب الدوحة عرفتك من أول نظرة..
عموماً مشكور على الطلة البهية وتحية مشفرة لصاحبي يوسف الأمين..
|
Post: #8
Title: Re: مجرد ملاحظة
Author: محمدين محمد اسحق
Date: 12-26-2005, 05:32 AM
Parent: #5
الأخ نصر الدين
مرحبأ بك في دارك ..
قلت :-
Quote: ملحوظة:
أتوقع أن يكون عدد المتداخلين لهذا البوست اثنين فقط |
هاقد خابت توقعاتك فهناك اكثر من هذا العدد في بوستك هذا..
حقيقة أتفق معك في كثير مما قلته ..لكن أيضا حتي لا نظلم البعض
فهناك بعض القدامي يكتبون مواضيع وتمضي الي القاع دون متداخلين
وهذا شئ يمكن ان تلاحظه بالمتابعة ..
محبتي لك ..
|
Post: #9
Title: Re: مجرد ملاحظة
Author: Nasruddin Al Basheer
Date: 12-26-2005, 08:04 AM
Parent: #8
الأخ محمدين محمد اسحق
عوداً حميداً مستطاب
افتقدنا قلمك في الفترة الأخيرة..
ومرحب بيك في هذا المقام الطيب..
Quote:
هاقد خابت توقعاتك فهناك اكثر من هذا العدد في بوستك هذا..
حقيقة أتفق معك في كثير مما قلته ..لكن أيضا حتي لا نظلم البعض
فهناك بعض القدامي يكتبون مواضيع وتمضي الي القاع دون متداخلين
وهذا شئ يمكن ان تلاحظه بالمتابعة ..
|
وأنا حقيقة سعيد بخيبة توقعاتي.. ولكن قلتها من باب الطرفة..
أنا اتفق معك أن بعض القدامى لا تجد مواضيعهم الاهتمام المطلوب
ولكن تظل هناك جزأية مهمة أن الأعضاء الجدد لم يجدوا اهتمام بعض
الأعضاء القدامى ، ويعتقد البعض منهم أن مداخلاته مع أعضاء جدد
نوع من المغامرة بغض النظر عن مؤهلات وملكات المتداخَل معه،
بالضبط مثل خشية توم كروز أو براد بيت في
الاشتراك في فيلم مخرج شاب حديث عهد بالإخراج..
أشكرك على زيارتك الكريمة..
ولك ودي..
|
Post: #10
Title: Re: مجرد ملاحظة
Author: luai
Date: 12-26-2005, 11:56 AM
Parent: #1
نصرالدين تحياتي ..
هكذا نحن السودانيين ..شلليات في كل مكان ..
لا زالت فينا روح القبيلة والطائفة واولاد الحارة ..
يجذبنا خبر اللا خبر ..
ويدهشنا ..كلام اللا كلام ..
لكننا من الحقيقة ننفر كالحمام
وعلى الدنيا السلام ..
لذا لا تندهش اخي الكريم اذا فاجأتك الملاحظة
فالملاحظة ملاحظة ..من زمان ..
وكل الامر ..اننا لازلنا في بداية الطريق ..
تحياتي
|
Post: #12
Title: Re: مجرد ملاحظة
Author: عادل فضل المولى
Date: 12-26-2005, 12:22 PM
Parent: #10
نصر الدين
كيفك يا حبيب
والله أضحكتني حتى تلفتت يميناً ويساراً
الحمد لله المكتب كان فاضي
وكويس انك (ناقش) الموضوع
يعني كان جاتك عقدة ساكت في صمة خشمك
تصور اخوك مرات ينزل بوست ويعقد يحرسو
لا من يختفى وراء (الافق) زول ساكت يهببو مافي
اها دي علمتنا حاجات كثيرة
منها الصبر
وقطع العشم
لكن الأكعب من ديل كلهن
الشلليات
ودي حاجة كعبة جداً في البورد
يعني شيلني واشيلك
ويا ود دفعتي ارفع لي بوستي
اها وكان ماعلقت لي بزعل منك
تماما مثل الحريم في بيت البكاء
" كان شفتي هناية ما بكت حار علي ابوي..أها والله أكان مات أبوها الا اشيل معاي بصلة..)
وكدا
وكلك نظر
غايتو نحن حق العشرة والرفقة بنديهو الا اجتهد انت في الصبر
والضحكة مستمرة
قلت لي لسه برلوم...
مع انك زمان كنت سنير
زمن يا ناس
وسلم علي العيال
|
Post: #15
Title: Re: مجرد ملاحظة
Author: Nasruddin Al Basheer
Date: 12-26-2005, 03:19 PM
Parent: #12
|
Post: #16
Title: Re: مجرد ملاحظة
Author: Nasruddin Al Basheer
Date: 12-26-2005, 03:23 PM
Parent: #12
عادل فضل المولى كيف حالك يا اخي وليك وحشة..
أقول ليك نكتة تؤكد مرارة الصهينة..
الكلام ده حصل فعلاً افتكر في الشريف يعقوب شرق مدني
واحد من عرب الشكرية دخلت جمالو عشان تشرب من البحر واتسمرت
في مكانها وفي بعض الروايات تلككت..
المهم الراجل مشى أقرب قرية عشان يطلب النجدة
مشى لقى الإمام صاعد في المنبر والخطبة شغالة..
وقف في باب المسجد وقال: ها ناس عندنا ألبل اتلككت جنبكم وعاوزين النفير..
طبعاً الناس مع الإمام والخطبة ومافيش حد إشتغل بيهو
أعاد كلامو مرة ومرتين والحال في حالو..
لما تأكد تماماً بأنهم لن يعيروهوا أدنى اهتمام
قال في امتعاض : عليك الله شوف الناس دي مِبرْعِمة (بتعاين) كيفن؟
التطوّل تبِرْعمتكم إن شاء الله..
ورجع خائباً من حيث أتي..
أعتقد أن هذه العبارة بليغة جداً في التعبير عن استيائه
رغم أنهم معذورون ، لكنه عدم الاهتمام تحت أي مسمى من المسميات..
وضحكتني كتير بمداخلتك ومثال نسوان البكاء وكنت عاوز أذكر
المثال ده في مداخلة الأخ محمدين ، لكن خفت يقول الزول ده براي
وكلامو كتير ويهرب إلى غير رجعة.. فقلت خليهو في المداخلة الجاية
لكن لقيتك فاجأتني بإيراد المثل في تعليقك..
وزي ما بقولوا يا عادل الأمثال قسمة ونصيب ، والمثل طلع من قسمتك
وأنا عفيتو ليك وإن شاء الله ينفعك.. توارد خواطر عجيب مش كده؟!
وسوف استعمل هذه العبارة باسمي كماركة مسجلة لرفع أي بوست
تماماً مثل صنفرة نذار الخليفة..
(عليك الله شوف الناس دي مبرعمة كيفن؟ التطول تبرعمتكم إن شاء الله)..
شاكر كتير لمشاركتك اللطيفة وكتر خيرك كتير يا حبيب..
|
Post: #17
Title: Re: مجرد ملاحظة
Author: عادل فضل المولى
Date: 12-26-2005, 03:43 PM
Parent: #16
نصر الدين ابو حليب
لا تشوف وحشة
وين باقي النكتة
وبعدين شايف المداخلات بقت متكررة
يعني الجهاز علق
خلاص اعمل(edit) للمداخلة التحت وامسحها
..
اها انا راجي صاحبنا الواقف على باب الجامع
محبتي
|
Post: #13
Title: Re: مجرد ملاحظة
Author: Nasruddin Al Basheer
Date: 12-26-2005, 02:52 PM
Parent: #10
|
Post: #14
Title: Re: مجرد ملاحظة
Author: Nasruddin Al Basheer
Date: 12-26-2005, 02:53 PM
Parent: #10
الأخ العزيز لؤي
مساك الله بالخير
صراحة أنا من المتابعين للبورد منذ أكتر من 3 سنوات
ولاحظت هذه الملاحظة كما تفضلت وأوضحت أنت
لكن لما بقيت عضو حسيت إنو المسألة دي حارة شديد
أنا ما مريت بهذه التجربة لكن لاحظت إنو في بوستات
ذكية وجميلة وجديرة بالقراءة لكنها أحيلت للصالح
العام لأن كاتبها ليس له ضهر..
حاجة غريبة مش؟
ربنا يألف بين قلوبنا..
|
Post: #11
Title: Re: مجرد ملاحظة
Author: ALHALAWI
Date: 12-26-2005, 12:16 PM
Parent: #1
أخي نصر الدين
لقد أصبت كبد الحقيقة !!!
كنت قد أشرت سابقاً لنفس الموضوع ولكن بأسلوب مختلف .. حاولت البحث عن هذا الموضوع لكن للأسف لم أحصل عليه. يبدو أنه أحيل للمعاش الأبدي ...
أتفق معك في جميع ملاحظاتك ...
وأزيد عليها من خلال ملاحظة أخرى وهي أن معيار التداخل أو زيارة البوستات هو مدى إتفاق الآخر معك فكرياً أو سياسياً أو "شلياً" إن جاز التعبير .
ربما تكتب شيئاً ليس له علاقة بالفكر أو السياسة ولكن بطرح متزن جاد ... ومع ذلك قد لاتستطيع الوصول للشريحة التي تريدها أو تخلق تفاعلاً معهم فقط لأنك قد لا تلتقي فكرياً معهم.
ربما أكون متوهماً ... ولكنها ملاحظة أردت إضافتها. والأهم من ذلك تسجيل حضوري.
لك التحيــة وللجميع.
الحلاوي
|
Post: #18
Title: Re: مجرد ملاحظة
Author: معاذ منصور
Date: 12-26-2005, 04:51 PM
Parent: #11
الغالى ود البشير
المليون يبدأ بخطوة
واصل كفاحك واكتب وادعو غيرك للكتابة وحتى بدون مداخلات
ساعات الواحد بكتب لنفسه وهذا ليس عيب
لتقرأ ما كتبت مرات ومرات حتى تفهمه ثم ترد عليه
سمعت بالمجنون كان بكتب فى خطاب لنفسه سألوه ايه كتبت
رد بان الرسالة لم تصله بعد
قضايا كثيرة يتخوف الناس من المداخلات حولها لاسباب يعرفها الرافض
نفسه والكل حر فى ذلك
يكفي الاطلاع وحجمه وساعات العناوين الصفراء بابا لمزيد من التداخل
لك ودى وطول بالك نحن لسع برالمه زى ما قلت
تحياتنا للشله وكا عاوزين نوصيهم
|
Post: #19
Title: Re: مجرد ملاحظة
Author: ابوبكر الامين يوسف
Date: 12-27-2005, 00:04 AM
Parent: #18
Quote: الأخ أبوبكر ( الأمين ) قلنا وكثر الحديث عن ضرورة فصل المنابر فليكن هناك منبراً أو عنبر لمثل هذه الأمور ولا غضاضة ولكن طالما المنبر حر فتوقع أي شي والناس بطبعها ميالة ( للإثارة ) وداحين ما تحمبك في مثل هذه التفاصيل ورواد المنبر فيهم النافع الصالح وفيهم الضار النافع وفيهم الضار الضاري وفيهم السم الهاري وفيهم من المابعرف الخمسة من الطمسة .
ولغاية هنا كفاية وخلي بالك بحر. |
العزيز الحلاوى تحياتى
اتفق معك فى حرية المنبر وفيه الصالح والطالح
واحترم وصيتك جدا وتأكد انو البال بحرين ياصديقى
التحية عبرك لجميع الاصدقاء بالحلاوين
من الذين جمعتنى بهم فصول الدراسة فى حنتوب الثانوية
وجامعة امدرمان الاهلية
ودى واحترامى
|
Post: #20
Title: Re: مجرد ملاحظة
Author: ابوبكر الامين يوسف
Date: 12-27-2005, 00:09 AM
Parent: #19
العزيز نصرالدين تحياتى واحترامى
احيى فيك الذاكرة القوية ونعم انا شقيق يوسف الامين ( ابوالحاج )
تعرف يانصرالدين لو سالت الوالد من هو ابوبكر الامين ربما لايتذكر اننى ابنه
لان الاسم الشائع ( ابوالحاج ) وقوة الذاكرة والدقة تبين عمق الصلة مابينكما
اما الاخوان مبارك احمد وعثمان عبدالرحمن والصجة جميعهم بخير وستصلهم تحياتك
لك ودى واحترامى ياروبش
|
Post: #21
Title: Re: مجرد ملاحظة
Author: فيصل نوبي
Date: 12-27-2005, 01:18 AM
Parent: #1
الاخ نصر الدين
جينا نسلم و نكبر ليك الكوم عشان ما يكون المشاركين 2
وليد الكوز
جايب طوبتك !!!
ود فضل المولي
بالغت فيها دي
خيمتكم عمرانه
قلت لي بيت بكاء
ارفع لي و ارفع ليك
|
Post: #22
Title: Re: مجرد ملاحظة
Author: saadeldin abdelrahman
Date: 12-27-2005, 01:18 AM
Parent: #1
سلام نصرالدين وابومحمود والشباب
لي سؤال
ماهو تعريف الشله والشلليه
اليست الاحزاب شلليه ?
والجيش شلليه
والكوره شلليه
والبشر في علاقاتها عموما تسلك طريق الشلليه
لم قيل ان الطيور على أشكالها تقع?
انت حين تصادق او تتفق في الرأي فانت تلقائيا (تتشلل)
ده حال الدنيا.
هذاو مع اتفاقي مع موضوع البوست الاساسى والملاحظه الحقيقيه
والجديره بالاعجاب.
خالص مودتي
|
|