Post: #1
Title: فى ذكرى انشاء الدفاع الشعبى نريد ان نعرف لغز البعاتى و الشجر الناطق و القرود الكاسحه للألغام
Author: ABDELMAGID ABDELMAGID
Date: 11-27-2005, 09:18 PM
برنامج ساحات الفداء الذى كانت تبثه قناة الإنقاذ و ما زالت ( ولكن من وراء حجاب ليس خوفا من الله و لكن من سلفا كير !! )حفل بالعديد من القصص المثيرة و البطولات ( الزائفه ) و البهلوانيات و العنتريات و هستيريا الهوس الدينى !!!! حبوباتنا زمان حجونا بقصة ( ترب البنيه ) و الميت البقوم من ( غبرو ) و اجى انوم مع ناس الفراش بتاعو و ريحة ( الحنوط ) التى تملا الحوش او ( الصريف ) و هدوم الكفن و يا حليل حبوبتنا ( عشوشه بت مدنى ) التى كانت تجيد سرد و حبك مثل هذا النوع من القصص !!!! و لما كبرنا عرفنا انو الكلام ده كلام خرافه و تهويل حبوبات ( ساكت ) و لكن هدفه كان نبيلا حتى نخاف و نذهب للنوم مبكرا فيتسنى لنا الذهاب للمدرسه مبكرا و نحن فى كامل لياقتنا و جاهزين للتلقى و التحصيل و رحمهن الله هؤلاء الأمهات و الحبوبات و المربيات العظام غير المحجبات بلباس الوهم و النفاق الأصولى و انما بعفاف الطهر و الأصاله و ثوبها السودانى الجميل !!!! لكن ده كوم و الجونا بيو ناس الإنقاذ و كيزانم كوم تانى !!!! الشدره البتتكلم و القرد البكسح الألغام !!! و قصص الخرافه ( المأدلجه ) بفكر الشيطان الأخوانى و بعاعيتهم و عرسان حورهم العين الذين بعثوا مرة أخرى بعد ان أتو ( ببقجهم )بدلا من ( اكفانهم ) من معسكرات اسرى الحركه الشعبيه لتحرير السودان ؟؟؟
و سنواصل
جزاكم اللله خير !!!
عبدالماجد
|
Post: #2
Title: Re: فى ذكرى انشاء الدفاع الشعبى نريد ان نعرف لغز البعاتى و الشجر الناطق و القرود الكاسحه للألغ
Author: هشام هباني
Date: 11-27-2005, 09:54 PM
Parent: #1
عبد الماجد اخوي
انت ما شفت المهووس اسحق احمد فضل الله بتاع ساحات الفداء مرة في عام 1998 في حلقة خاصة في ذات البرنامج عما كانوا يسمونه زورا عرس الشهيد انه كان متحدثا في تلكم المناسبة امام اهل المرحوم المسكين متحدثا عن كراماته وظروف وفاته وكيف ابان( الشهيد) كرامة عندما هموا بدفنه فقال المهووس اسحق: اشهد الله اننا عندما هممنا بدفنه وقرانا على رأسه سورة الفاتحة اتمها معنا الشهيد؟؟ يعني يا اخوي عبد الماجد المسكين دفنوه حــــــي عديل افرفر؟؟؟ اللهم ارحمهم واغفر لهم وعذب مضلليهم وخادعيهم وبائعي دمائهم ....امين
|
Post: #4
Title: Re: فى ذكرى انشاء الدفاع الشعبى نريد ان نعرف لغز البعاتى و الشجر الناطق و القرود الكاسحه للألغ
Author: ABDELMAGID ABDELMAGID
Date: 11-27-2005, 10:44 PM
Parent: #2
اخوى هشام ود هبانى !!! بس شريط ( فيديو ) !! كان جابو و شفت ( الفطيسه ) البتتكلم !! من باكر دى بشيل ( بقجتى ) و بمشى ( اجاهد ) معام !!!
|
Post: #7
Title: Re: فى ذكرى انشاء الدفاع الشعبى نريد ان نعرف لغز البعاتى و الشجر الناطق و القرود الكاسحه للألغ
Author: ادريس خليفة علم الهدي
Date: 12-01-2005, 06:25 PM
Parent: #2
| Quote: عما كانوا يسمونه زورا عرس الشهيد انه كان متحدثا في تلكم المناسبة امام اهل المرحوم المسكين متحدثا عن كراماته وظروف وفاته وكيف ابان( الشهيد) كرامة عندما هموا بدفنه فقال المهووس اسحق: اشهد الله اننا عندما هممنا بدفنه وقرانا على رأسه سورة الفاتحة اتمها معنا الشهيد؟؟ |
زكرتني يا خال قصة الاستاذ مصطفي برجاز في الدويم قالوا ليهو في شهيد جاي في البنطون قال ليهم ود منو فذكر الاسم قال ليهم عل الطلاق مات شليق فتحولت المظاهره من مات شهيد الي مات مات شليق
محبتي واحترامي
|
Post: #3
Title: Re: فى ذكرى انشاء الدفاع الشعبى نريد ان نعرف لغز البعاتى و الشجر الناطق و القرود الكاسحه للألغ
Author: ABDELMAGID ABDELMAGID
Date: 11-27-2005, 09:58 PM
Parent: #1
عليك الله يا الولد ( المسمسم ) و ( مسحسح ) و ( مملس ) و ( محنكش ) يا البتقدم برنامج ( ساعه شباب ) فى تلفزيون الإنقاذ !! الله امسخك و اخليك ( شدره ناطقه )و ( قرد كاسح ) و ( تقوم بعاتى ) كان ما رسلت لى شريط فيديو للفطيسه البتتكلم و الشدره الناطقه و القرد الكاسح عشان نحاجج بيو ( الكفره ) الأمريكان و ( الغربيين ) و نتحدى قوانين الطبيعه ... عليك الله و بركات شيوخك ( اسحاق احمد فضل الله ) و ( حاج ماجد ) !!! و جايزتك انشاء الله ( شربة ماجى ) !!!!
عبدالماجد
|
Post: #5
Title: Re: فى ذكرى انشاء الدفاع الشعبى نريد ان نعرف لغز البعاتى و الشجر الناطق و القرود الكاسحه للألغ
Author: charles deng
Date: 11-28-2005, 07:10 AM
Parent: #3
WHAT A ROTTEN MIND!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
|
Post: #6
Title: Re: فى ذكرى انشاء الدفاع الشعبى نريد ان نعرف لغز البعاتى و الشجر الناطق و القرود الكاسحه للألغ
Author: اشرف السر
Date: 11-28-2005, 09:24 AM
Parent: #1
اخوي عبد الماجد
دي بركات شيخنا الترابي (يلحقنا ويفزعنا)
ويغتس حجرنا اذا بقدر يغتسنا اكتر من كدا..
مرة يفتينا جهاد... ومرات ما جهاد...
اسه الناس الراحت فيها دي كيف تكييفهم الاستشهادي!!!؟؟؟
|
Post: #8
Title: Re: فى ذكرى انشاء الدفاع الشعبى نريد ان نعرف لغز البعاتى و الشجر الناطق و القرود الكاسحه للألغ
Author: ABDELMAGID ABDELMAGID
Date: 12-01-2005, 09:57 PM
Parent: #1
أشكركم الأخوان
هشام هبانى
CHARLES DENG
اشرف السر
ادريس علم الهدى
على المرور ... عشنا و شفنا زمن الغول و ( بخيت اب قيد ) ....
عبدالماجد
|
Post: #9
Title: Re: فى ذكرى انشاء الدفاع الشعبى نريد ان نعرف لغز البعاتى و الشجر الناطق و القرود الكاسحه للألغ
Author: هشام هباني
Date: 12-07-2005, 09:14 PM
Parent: #8
انت يا عبد الماجد اخوي دحين وين (الدبابين) الاولاد الرساليين ديلك شنو الحصل عليهم دحين كلهم استشهدوا و ما شايفين ليهم اي وجود ولا رطبـــــــــوا وضاقوا مال البترول ده وبقوا ( النهابين)؟؟
محبتي
|
Post: #10
Title: Re: فى ذكرى انشاء الدفاع الشعبى نريد ان نعرف لغز البعاتى و الشجر الناطق و القرود الكاسحه للألغ
Author: ABDELMAGID ABDELMAGID
Date: 12-07-2005, 09:51 PM
Parent: #9
يا حليلم يا ودهبانى ... دفقوا ( مويتم ) على ( الرهاب ) و الله اجازيك يا الترابى !!!!!
عبدالماجد
|
|