الرائعة (شـــــــــــــيـــــري) وين؟؟؟؟

انتو يا جماعة وين شيري؟؟
الزولة دي واحدة من اسباب عودتي للمنبر
افتقد كتاباتها و (حكيها) وهترشتها

لعل المانع (من الظهور) خير
والعارف ليها درب يقول لي

Quote: وين؟؟؟؟

صحي يامحمد والله

الهترشة لحقتا امات طه ولا ايييه

في انتظارها.

طولت عديل الزولة دي

يكون عندها (طمام اجتماعي) ولا شنو؟؟؟

احتمال تتلقي الليلة في القاهرة
مع الهلال ...

والله ليها وحشه...
لكن تعرف يااحمد..
البت الكرور دي اصلها كدا تغييب تغييب و تجي كلمطر عز الخريف...
لا ادري ان كان لديها جدول محدد ام هي فقط سادره في غيبتها لا تلوي علي شي...

احتمال كبير تكون ابتدت ليها مشروع زراعي...
او فتحت مصنع بلاستيك...
او جالسه في مقهي الفينيق امامها ورق و كتب من بينهم كتاب "مقامات الحريري" للعقاد.. منكبه علي كلام"تلميذ و نبيذ و جدي حنيذ" محتاره و مزهوله و هي تنظر لأحدي صفحات المقامات المقسومه الي قسمين.... و كل كلمه في القسم الاعلي مرقمه... و امام نفس الرقم في الاسفل يوجد شرح للمعني في كلمات بسيطه و واضحه.. تتساءل عن السبب الذي جعل أبا القاسم بن علي بن محمد بن عثمان الحريري لا يكتب بهذه اللغه الواضحه المباشره من اول مره... ليه مصعبها علي الخلايق ...
الا ان تكتشف ليس هو من فعلها انماهم اخرون...

و الاحتمال الاكبر انها تكون جالسه كما الاشجار علي فروعها و عيونها مفنجله تحدق مبتسمه بي غتاته الي ما اصاب المنبر من حالات دواس ...


و الله يعلم...



تخريمه لابد منها :
أصطدم بي ..
أختلف معي في الطريق
فلا ألتقيني الا قليلا ..

وكلما اصطحبتيني -يا شيري- ..عادت ضحكتي ...

شاينينق استار
يعني بي الجد كان لازم تكتبي في البوست دا
اصلك انتي وشيري بتعرفو ليكم كلام براااااااااكم كدا
افتقد اللغة التي تجمل دارجيتنا وتضرب بها عرض حائط الابداع

لك وشيري كل التحايا النواضر
والله يرد غيبتها

السلام عليكم
وماذا أقول انا الذي كنت اغيب وأغيب عن المنبر
وحينما أرجع ..
أنقر على خانة البحث
ثم آتي بكل ما تكتبه Shiry مطبوعاً
ثم أغادر مرة أخرى..
لكي أغيب وأغيب...
وفي معيتي غنيمتي الثمينة...
هترشة Shiry
...
Shiningstar
فيك الكثير من هترشة Shiry
لماذا لا تنوبين عنها
في غيبتها...
قصَّر الله غيبتها
....
أحمد محمد عثمان..
لك الشكر

وما الناس إلا هالك وأبن هالك *** وذو نسب في الهالكين عريق

الزووول
ماغريبة عليك تقسي
الا ليه بينا بتخبي؟؟؟؟


كلام شيري من جمالو بشيل اي تنشنه في النفس ويصفي العكر ولا تملك الا الابتسام
والشعور بالكيف..

تسلم

شيرى....

أجهر بالصوت سؤالا عنك....

كان بيننا متسع من الحكى...

ترى أين ذهبت بك الهترشات؟؟؟

............

سننصب خيمتنا هنا بانتظارك......

سلام لكى ...حتى اوان العودة

ايزابيلا:

Quote: ترى أين ذهبت بك الهترشات؟؟؟

كدي زحي لي معاك في خيمتك دي .. الشمس اكلتنا

شيري..
ساظل كل يوم ارفع هذا البوست
رافعا معه امل الظهور والطلة منك
واردد-يوميا-
ويييييييينك انتي
طال غيابك
العيون تسألني عنك
والقليب
يقول حبابك

الليله عاد يابركة سيدي الحسن...


يا بت انت وين؟؟
و من هم الفي الجوار شاغلنك قدر دا...

اوعا يكون ارتد طرفك ثم عاد فسقط علي عيون عسليه شفافه... لرجل يميل قليلا للأمتلاء... وسيما بصوره فائقه... في منتصف العشرينات او التلاتينات (ما فارقه).... قمحي اللون تبدو كتل شعره المحمر كالحنبوكات....
يرتدي قميص كاروهات او خطوط او ما شابه ذلك ... كم طويل مكفكف الاطراف.. بنطلون فاتح اللون ...
(ما يلوح للعين عنه ينبئ عن تواضع الذوق)..

و و لو دا الحصل... اكيد.. لم يكن في خيالك ما يقدمك لمفاجأة ما لاح لعينيك... اصبحت كدبوس (ابره) صغير ينازل مشجبا عالي المغنطه...
و مشيتي و قلتو عدو لي...

ارجعي يا شيري الله يهديكي بس.... دوري محركات عقلك و مولدات طاقتك و صارعي عوامل الجاذبيه... و حاولي مواصلة الطفو حتي تبلغي حافة العيون.. تمسكي بغابة الرموش حولها و اقتلعي نفسك من الفلم دا.. تمتمي بي بقايا تحيه ثم وداع...
و طوييييييل علي هنا....

فأحمد و سعد الدين و الزووول و ايزابيلا و انا و جار النبي ..و آخرون كثر...وصلنا لأكتشاف (او هكذا اعتقد) ان للانسان حواس اخري غير الذوق و التذوق و ان للأشياء معان اخري لا شأن لها بلمكرونه بلبشامل و رباعيات شاهين و المطريات و النظارات الشمسيه...

بلمناسبه.. الجماعه ديل قايلنك مهترشه ساي... ما عارفين انك مصابه بحمي ربيعيه استوائيه وارد هاواي....
والا ما كل هذه الاوان ؟؟!!





دقيقه بس ...معاي تلفون...






ما تقولو لي انتظرتوني....



اما بعد...

احمد شكرا علي بوست سمح ..لي بنيه سكريه...سأتي كل ما توفرت معي البياسترات... عشان نشوف البت دي قصتها شنو ... و الاداها بي الكوريك منو...

Quote: لماذا لا تنوبين عنها في غيبتها...

الزووول ياخي قول كلام تاني... كيف لي ان انوب عن من لا يناب عنه؟؟
البت دي كن كانت وزيرة الري والمياه الجوفية... و استقالت عن وزارتها ... علي بليمين منصبها حيتلغي و لن يحل مكانها احد و الحكومة ستعلن بلبونط العريض
"وزارة ما فيها شيري بلخراب.... عنها ما اتسقت"...

اناغايتو ممكن اشقها ليكم ترع الا ان يأتي المطر...

وشكرا...
د.صفيه كرمبلين... ناظرة البحريه.. نائب مدير عام شركة شقيناها ترع..

الرائعة (شـ)ا(ي)ن(ي)نق ستا(ر)

نفس الملامح والشبه في الكتابات والابداعات والهترشات...
والبنية دي كان ارتد طرفا يانا الما شفناها تاني
دحين ان لقيتي ليها درب حدثيها بي الخيمة بتاعت ايزابيلا دي
وقولي ليها في ناس هناك قولة سلام تبقالم روح



بعدين يا بت دا منو الفي التلفون الطويل دا ؟؟؟ بالغتي معانا بس
نتفاهم في الموضوع دا برانا...

Quote: احمد شكرا علي بوست سمح ..لي بنيه سكريه...سأتي كل ما توفرت معي البياسترات... عشان نشوف البت دي قصتها شنو ... و الاداها بي الكوريك منو...

شكرا ليك انتي ولي شيري علي هترشاتكم دي...

صباح الخير..

الزولة دي لسه ما جات؟؟؟

صباح الخير
يا شيري
لمي طرفك الارتد دا وتعالي سلمي
وارجعي تاني

صحيح!!

Quote: ترى أين ذهبت بها الهترشات؟؟؟

افتقدنا كتاباتها

الله يرد غيبتها...

وراجين في السكة نمد (مع الاعتذار لتروتسكي)
يا شيري

يا ناس

الأخ أحمد
الشئ الذي حيرني أكثر في الأخت شيري هو لماذا إختارت أن تضع صورة غير صورتها (الصورة مأخؤذة من أحد الإعلانات في الإنترنيت) مما خلق لي الكثير من التشويش، أذكر أنى تداخلت معها مرة أو مرتين، وللحقيقة هي تكتب مواضيع شيقة، ولكن لك أن تتخيل أننى كنت أعتقد أن معظم الصور الفتوغرافيةالموجودة في البروفايلات هي نفسها صور الشخصيات التى تكتب فيحدث الربط في ذهنك بين الصورة الفتوغرافية الموضوعة في البروفايل وبين الشخص ثم تكتشف أن الصورة ليس لذلك الشخص.
على العموم نتمنى أن يكون مانع الغياب خير وترجع الأخت شيري للمنبر.
الصادق

Quote: هو لماذا إختارت أن تضع صورة غير صورتها

بقولو :
صورة البطل دائما افضل من البطل نفسه...

والحمدلله انو شيري خلتنا نتعلق بيها ونعجب بي كتاباتا
بدون مجاملة او كسير تلج عشان خاطر عيونها.. رسمت الصورة
الحسيه ليها جوانا بدون رتوش

الصورة فعلا من اعلانات الانترنت ...