الاستاذة كوثر بيومي الرائعة وشيخ العرب الضليع محمد الفاتح ابو عاقلة

اعجبني كثيرا برنامج اهل البادية الرائع الذى ابدعت الاستاذة كوثر في تقديمه رقم التباين الواسع بين بيئتها المتمدنة وبيئة البادية العفوية.

لله درك يا كوثر ولله درك اخي محمد الفاتح ابو عاقلةوالتحية للشاعر ود ام سيالة وود امنة وود شعيت وود الشوبلى وغيرهم من فحول شعراء البادية شرقها وغربها.


الطيب شيقوق

لك التحية أخي الطيب شيقوق

لقد نسيت الضيف الرئيسي للحلقات ناظر المجانين من المزروب العم حبيب جمعه سهل وحديثه الشيق عن فنون تلك المنطقة.

وهاك المساهمة دي لرفع البوست اليتيم ده فهذه الأيام البوستات التي تلقى الرواج هي بوستات العنصرية والشتائم.

لك كل الود

" محكمة الغرام" :

الشاعر المدني الكردوسي

طالبني الغرام رسل لي خمسة عساكر
وأنا عامل جنايات والعقل مو فاكر
بعد ودوني قابلتو القبيح الماكر
قال ختوه يرقد في السجن لا باكر
*****
بعد الصبح أصبح والسجن فتحوه
والمكتب عمر قالوا الأسير جيبوه
قال ليهم الولد ياتو هــــو ؟
قالوا عشوق خدود اللينة ماعرفتوه؟
*****
قالوا ها بالحيل بنعرف الغرام شاويهو
ومن فضلك تسامحو وغايتو لا تقاويهو
الماسكو الهوى العذري نازل فيهو
في حكم الشرع لا يكون جناية عليهو
*****
اتنفش الغرام برنيطو شالها نفاها
ضرب الكوبيا لا من سرحا وشقاها
إتناول قلم غيرها وكتابتو محاها
قال أمسكتو خمسين جلده إتنين نجمة غايتو معاها
*****
بعدما فاق بقول ودوه للباشكاتب
يمكن يلقى أورنيكو ويزيدلو الراتب
وجد عندو جمهور ناس فلانة مراتب
قال ليهو كون جالس لا تخاطب
*****
أخد ساعتين مصنقر فوق جمر قلاية
لا سمع رد جواب لا جاتني راجعة حكاية
فتش أوراقي أبد ما وجد لي خطايا
قال ودوهو للنائب غلبت براية
*****
يا خلاي بعد ما جيت وصلت النايب
قال أووك يا سلام أورنيكو فيهو نصايب
دا أصلو حرامي كان مسحب وغايب
ودوه للمامور براه الشايـــــب
*****
المامور بعدما جيت وقف قابلتو
شخص أبصاروا وعاين لي مسك في شغلتو
قال للعسكر التابعني كيف عملتو
ده ودوه للمستر يشوف مسألتو
*****
المستر بعدما جيت وقف قدامـو
عاين لي نص ساعة وطلب ترجامو
ترجاميهو ترجملو وعدل لو كلامو
قال ودوه لي مولاه قاضي إسلامو
*****
قاضي المحكمة الشرعية جيت عن بابو
مقدار ثانية فورا رد لي جوابو
قال لي معاك ما أحوال الغرام وأسبابو؟
قت لو القصة من زولا حرير قربابو
*****
القاضي إتمحن والمفتي برضو معاهو
قال ودو لي حكيم الصحة يكشف داهو
يمكن تكون مسألتو هينة والدوا بيلقاهو
ما يدروه حسرور المزرقن فاهو
*****
قم من حيني قاصد لي حكيم الصحة
امشي عليهو أردف كل مرة الوحة
قت لي سيبني ما عندك دوايا صح
أنا طبي .. ( ليم القرنهن ما شح )..
*****
سبتو براهو في اودتو ومرق خليتو
والحسس العلي جوه الضلع دسيتو
كل ما يهف لي عجلول الترى الفي قيدتو
ما لدواي طب أكان ما صديهن جسيتو
*****
يا خلاي خلاص هذا الحديث إنتم
والنوم فر والعينان دموعهن جم
مريودة أمها السولها السوار والكم
تجمع شملنا وبعد الفراق نتلم.
_________________
الناس في العروض ما تقيسه بي تيبانه
مايغرك لباسن والعروض عريانه
ديل حراس رزق زي التكنو أمانه
زي إبل الرحيل شايله السقى وعطشانه

الشايقي

لك التحية الطيب شيقوق علي هذا البوست الجميل
ولك التحية الاخ الشايقي عل المساهمة الرائعة
ان باديتنا تزخر بفحول الادباء والشعراء
ادباء وشعراء بالفطرة
ينتجون دررا وحكم كم نحن في حاجة مع الاستمتاع بها
ان ناخذ منها العبر والكثير من الدروس

شيقوق يبدو ان الحنين قد تاورك
ومن المؤكد ان النفس الذكية التي ارتوت من الدندر
وتنسمت عبير الحظيره ورتعت في صيد البريه
لن تقدر ان تظل معلبة بين الجدران الاربع
وهدير اجهزة التكييف التعيسة
اهل البادية الانقياء متمردون بطبعهم ضد التحنيط
لك التحية

الأخ عبدالله
لك الشكر
لقد حضرت ذات الحلقات التي تحدث عنها الأخ شيقوق واستمتعت بها كثيراً وندمت على عدم تسجيلها.
لك كل الود

الشايقي

يا الله يا العبد الله ما اروعك

لقد اصبت كبد الحقيقة وما هذا البوست الا لتنسم نسيم وهمبريب البادية وما هذا البوست الا نافذة للتنفس عبرها من زمهرير الغربة والحيطان الاربعة.

الاخ الشايقي حياك وشكرا ليك لمداخلتك الرائعة وانت ذاتك ما اقل من الشيخ الحبيب ولا ود ابو عاقلة.

شكرا ليك صحيح العم حبيب سقط اسمه من الذاكرة وكان ممتع للغاية.

الطيب شيقوق
لك الشكر على هذا البوست

الأستاذة كوثر رغم تمدنها ولكنها هي الأنسب
لتقديم برنامج عن البادية
كنت قد استمتعت جداً لتلك الحلقة والحلقة التي
قدمت في العام الماضي مع شيخ العرب الناظر الحبيب جمعة سهل
ناظر قبيلة المجانين وهو موسوعة في التراث
عمنا ود ام سيالة او ابو نواس السودان كما يسمية البعض في كردفان
فهو متمكن في شعر الدوباي والدوبيت
التحية لكوثر بيومي التي خرجت بتلفزيون السودان إلى البادية