Post: #1
Title: ألف شليل يا نورة يفوتو عشان ما يجيك شليلك زاتو
Author: محمد عبد المنعم عمر
Date: 11-08-2005, 02:22 PM
شوك الشوق - النص الكامل
شوك الشوق
( النص الكامل )
شوك الشوق لى الشوف آ خَىْ
ضارب فِطن النسج الحى
يا منقاش أحزانى إنشرت
وادى الفرح إتمدد صَى
عِـنْ ــ دُ يا راحلين ــ غُش الليل
ما لاقيتو جناياً زى ..
تكية نخل الفجُر الجاسِر
فوق فى المتَرَة .. عَرَاجِنْ ضَى
آ رعاوة .. العرب الرُّحّل
ما لاقاكُنْ فى المطرانى ؟
فى كاويقْ الجرف الأمحل
بين أسراب الرهو الراحِل
ساند أكتاف الليل الميّل
عِنْ ساساق الغيمة عليكُن
بين رقراق الخيمة معاكُن
ما أديتوهو شِوَىْ ... بى حرجل؟
آ رطّانة الليلُن ليّل
ما لاقاكُن فى ونساتكُن؟
بين الشادِى وبين كاساتكُن
فى صلواتكن .. عِنْ دعواتكن
أو .. دقساتكُن عِز خلواتكُن
.. زول .. زول الله
إن مِحِن .. آ .. بِسأل
الهبّاد لى غُلبْ أخواتو
الفرّاح عوّان الحلّىِ
الفدّاع لى الليل ظُلماتو
آ نجمات .. شقيش قولن لى
ما لاقاك طالِع .. متدلّى ؟
المطيوب من طيبة أُمّاتو
كالفجّاج .. الندّ نباتو
موج البحر اللّحَمَر هوجتو
وعِرق العِرِق .. اللاّوى ثباتو
جانا الشَدر الأخَدَر منو
ونار الشدر الأخَدَر جاتو
فات شِقيش ...
أب قولاً واحِد ..
وليش ما يرجع من غُرباتو
طوّل طُول .. ما طلّ علينا
وقاطِع مِننا جواباتو
الغابات جات تنشِد منو
والعربان راجين جياتو
أديناهم عرقو .. وعَلَقو
صورتو يقلِّب فى كِتْباتو
ضُل رشاشو .. ركيزة زولو
ساعة سِلمو .. ويوم حوباتو
سِن طوريتو ولون أبرولو
حِس طنبورو البى نغماتو
لهْلَب عِشق الناس الفقرا
وبرّد جوفُن .. بى غنواتو
... ويا غنواتو
الدخلت فينا
تمرق .. جينا على جِلاّتو
وجِيداً جينا .. طلقنا وشينا
وش الدنيا الليلة حلاتو
وش أطفالنا الليلة حلاتو
وغنى معانا غنانا هويتو
غنِّى العالم
غنى حياتو
لا ساومنا عليها قضيتو
ولا فكينا من إيدنا .. وَصَاتُو
ألف شليل يا نورة يفوتو
عشان ما يجيك شليلك زاتو
ولنا عوده
|
Post: #2
Title: Re: ألف شليل يا نورة يفوتو عشان ما يجيك شليلك زاتو
Author: waleedi399
Date: 11-09-2005, 02:44 AM
Parent: #1
الف شكر أخ محمد عبد المنعم
فقد كنت ابحث عن هذا النص طويلاً ...
اعتب عليك عدم كتابة اي تفاصيل عن صاحب القصيدة ..
او حتى عن القصيدة نفسها والظروف المحيطة بكتابتها!!!
لك خالص الشكر والتحية اخي محمد
|
Post: #3
Title: Re: ألف شليل يا نورة يفوتو عشان ما يجيك شليلك زاتو
Author: محمد عبد المنعم عمر
Date: 11-09-2005, 10:32 AM
Parent: #1
التحيه ليك يامحترم كل عام وانت بخير
وانا اسف جدا هذا النص للاستاذ محمد الحسن سالم حميد
ولنا عوده
|
Post: #4
Title: Re: ألف شليل يا نورة يفوتو عشان ما يجيك شليلك زاتو
Author: waleedi399
Date: 11-10-2005, 02:04 AM
Parent: #3
| Quote: هذا النص للاستاذ محمد الحسن سالم حميد |
شكراً يا أخ محمد عبد المنعم على الاهتمام ..
ومن اجل نورة ..
لفوق
|
Post: #5
Title: Re: ألف شليل يا نورة يفوتو عشان ما يجيك شليلك زاتو
Author: nashaat elemam
Date: 11-10-2005, 02:35 AM
Parent: #4
شكراً محمد للتذكير..
ويا وليد كل سنه وانت طيب .. وكيف العيد مع العرس؟
هذا النص موجود بمكتبة مصطفى سيد احمد.. ومعه ثلة من النصوص الاخرى وبعضها به مناسباتها.. واظن الاخ شيبا هو من قام بايراد عدد كبير منها.. لذا فعليكم المرور من هناك وستجدون عدداً كبيراً من اغنيات مصطفى صوتاً وبعضها مكتوبة أشعاراً
|
|