Post: #1
Title: النساء السودانيات أكثر عرضة للإصابة بأنفلونزا الطيور
Author: منصوري
Date: 11-08-2005, 02:57 AM
ليه لأنو طريقة نتف ريش الجدادة وجلدا عندنا لسه متخلفة في السودان.. يختوا موية في حلة تغلي ويكتفوا الجدادة ويدخلوها في الموية البي تغلي دي.بعد ما يضبحوها طبعاً ويخلوا الحلة تبجبج.. وتبجبج زيادة خاصة إذا بقت الجدادة لحما قوي.بطرية أو حجيرية او بلدية.. في هذه الأثناء بيحصل تأكسد وتنتج غازات سامة من ريش الجداد المغلى. خاصة المرأة وهي تنتف في الريش تصعد الأبخرة السامة الى قاع الدماغ.. وتتكون خلية وجرثومة أنلفلونزا الطيور... وطبعاً النتف هنا والسلخ في الخليج اصبح على البارد.لأنو الدجاج أو ( الدياي) اصبح تجاري واصبح هش. الكيماويات مهششه جلدو.. ,اصبح كدة زي البلاستيك..عشان كدة لما تلقى ليك دمعة ديك بلدي كارب .داك أبو نوعاً ريشو دهبي يلصف مع الشمش.. وتلقى ليك مرتاً كدة تزبط الحلة وتحش بصلتا دقاقة وناعمة زي بصلة الكمونية وتصفر البصلة نص كدة. وتقطع ليك فيها الديك البلدي دا.. وتجيب ليك دمعتو على لحمو في صينية بلدية صينية علموتيوم كبيرة.. وتلقي مرة كدة عواسة في الفطير البلدي بتاع القمح.تعوس الفطير موش يكون ابيض متلصق في بعضو لا الفطير البي يكون حرفو مقرمش داك ويكون مايل للصفرة شوية اكثر من الفطير الأبيض ,والقمح ذاتو.يكون القمح البلدي داك الأحمر أبو حبة دقاقة موش قمح الصعيد الأبيض الفشوش داك اب حبة بيضه وكبيرةحبتو بيضة وفشنك ساكت وفطيروا بيطلع ابيض ساكت... وكمان تطلع من لحم الديك دا.شوية كدة وتحمروا ليك بي بعضو تسبكو بي مويتو.. بعد ما تأكل.صابونة فنيك اصلية ما تطلع ريحة دمعة الديك من يدك لمدة أسبوع.كل مرة تشم في يدك تلقي فيها ريحة الدمعة الكاربة.. وديك زي دا.. ودمعة زي دي.. ومرة زي دي وفطير زي دا.. وديك زي دا.. ما بتوفر إلا في قرية من قرى وطني الحبيب.شماله أو شرقه او جنوبه أو غربه..
..........................
مأخوذة من وعن( بحث بالقاهرة. يقول النساء عامة معرضات لأنفلونزا الطيور)
|
Post: #2
Title: Re: النساء السودانيات أكثر عرضة للإصابة بأنفلونزا الطيور
Author: القلب النابض
Date: 11-08-2005, 05:20 AM
Parent: #1
منصوري
كل سنة وانت طيب
فال الله ولا فالك
|
Post: #3
Title: Re: النساء السودانيات أكثر عرضة للإصابة بأنفلونزا الطيور
Author: shammashi
Date: 11-08-2005, 05:43 AM
Parent: #2
دي ياخينا اسمها انفلونزا الفطور مش الطيور
والتنين بيخلن النخرين جاريات واحدة بالجرثوم والتانية بالشطة والبصل.
|
Post: #4
Title: Re: النساء السودانيات أكثر عرضة للإصابة بأنفلونزا الطيور
Author: منصوري
Date: 11-08-2005, 01:52 PM
Parent: #1
القلب النابض. وإنت بخير كمان..
إن شاء الله فال الله..( فال الله) دي ذكرتني بي قصة..( فضل الله) واحد خواجة عندو بحث إجتماعي إقتصادي.. وكان لزوم البحث لازم يقعد وسط اسر سودانية كدة.بس من بعيد لى بعيد من الصالون ولى بره..موش زي حكاية الأسر البريطانية ديك الببقى معاهم في كل حاجة..لا.. كل مايمى اسرة. رب الأسرة يسمعوا يقول والله الرتب ستين جنيه. لكن ( بفضل الله) من جاي لى جاي غايتو الشهر عدا.. ويمشى الأسرة التانية تقول غايتو بي فضل الله قدرنا ندفع روشتة العلاج... فالخواجة لما رجع قال والله غايتو حاجة تحير جننتني. اقل منصرف للأسرة لازم يكون 200 جنية وناس رواتبا ستين وتمانين.. لكن غايتو في واحد اسمو فضل الله لافي الأسرة السودانية دي كلها يتم ليهم رواتبهم عشان تلحق آخر الشهر..الكلام دا يا القلب النابض كان في السبعينات..
..................
شماسى إنت عايز تضيف للدمعة شطة والله شنو؟ طيب خليها شطة خضراء قرون تمسك القرن بي جاي وتقرش واللقمة بي جاي..
|
|