هوى يا جاهلة طيبك عبق......

تطرّق ادبنا السودانى الاصيل لمخاطبة المحبوبة بزخم مفرح على كل من المستوي الشعرى

او النثرى, فبرع كم ليس بالقليل فى تصوير المحبوبة او المحبوب بصور جميلة الى حد

الدهشـةوالاستغاثة وهنا اعنى حالة من الطرب الجموح تعترى متلقيي ومتزوقي الشعر مثلا

حينما تمسهم قصيدة مااو تصيبهم فى مقتل صبابة تجد الواحد منهم طربا(بكسر الراء)جزلا

ثملا بفرح لاتحده حدود ولسان حاله كما التوهج ينادى (يا لطيف)....واللطف هو حالة من

التوهج العفيف.


ولكن دعكم من هذا الآن فانه باب آخر -انيق- من ابواب الجمال المشرعة(بفتح الراء)

سنتطرق له فى حينه.

اذا فلندلف مباشرة الى لب الموضوع وهو مخاطبة(الخلقة) (الحس)فى المرأة السودانية-

تحديدا-فى اشعارنا بمختلف انواعهاوتسلسلاتهاالتأريخية. نجد ان جل الشعراء السودانيين

قد برع فى مادة الوصف الحسى كما لم يبرع فيه غيرهم من الشعراء..ولا اظننى مزايد فى

هذا- فالتهموا جسد المحبوبة حد الالتهام,او فلنقل لدرجة الهضم.



اما شعر المحبوبة فهو المبتدأ...

* الشعر اقدامك حصلا لقطيهو قلوبنا البعثرا يابدور القلعة وجوهرا

مرورا ب:

* خصل شعرك حروف شعرى اريتو يوصف حالنا شوق وحنين....

ولون شعرك سواد حظى معاك فى الريدة سبعة سنين.......


ولا انسى الفذ صلاح احمد ابراهيم فى مرياحينما قال:

* وجعلت الشعر كالشلال بعض يلزم الكتف وبعض يتبعثر...........( يا لطييييييييف )


الجبين:

* الجبين الهلا فوقو ضوّ فنار..منو بقّ الشارع فوقو ضوّ فنار......

-مثل هذا التلوين لا تجــود به الا قريحة من كتبه-

اما العيون فحدث ولا كلل

* العيون النوركن بجهرا وغير جمالكن مين السهرا

* امسكى عليك عيونك ديل امسكيهن................
خلينى اللروح انفكا من شبكة عيونك ديل امسكيهن

* يا عيون المها يا عيون

* العيون الفيهم نعاس هم اساسا معنى الجناس

* عيونى هم السبب فى اذايا وهم العيونى

* عيون الصيد الناعسات عيونى

* انا ما معيون اذاى ودواى خدود وعيون

-والكثير الكثير-

الخدود:

* جدلات الحرير ما ناعمة زى خديهــو...لى فى المسالمه غزال

* غرد العصفور فوق عودن ونامت الازهار فوق خدودن................(يالطيييييييييف)

* خدّك الساده نارو وقاده.....هههههههههه والله فكرت مية مره اكتبو ولا لا...

* الشامة فى خديدا....خلقوها للريدة

ام الفم فلم اجد له ســوى :

* اقيس الفم بودعه...القى الودع واســــع

رائعة المبدع خلف الله حمد

وربّما

* ست اللهيج السكرى انت الجمال بتفسرى وجوه القلوب بتعسكرى

اما صوت المحبوبة فقد اقلّ الشعراء فيه واحسب انه قد ورد مرة واحده

لا ثانى لها وهى :

* يا صوتها لما سرى مثل الحرير نعومة ونداوة وتكســـرا

النهـــــــود:

* النهيد باع فينا واشترى

* يا شتيلة السكر النى...نهدك الما رضّع جنى...اووب على امك اوبين علي

* البرتكان نهدك مدردم..........هههههههههه.....فكرت فيها الف مرة قبل ايرادها

الارداف:

* هوى يا جاهلة طيبك عبق
سنك برّاقا يســــوى بق
ترنعى تشبهى مهر السبق
بين اردافا نهيدهاانطبق

والكثير المثير


خلاصة القول ان مبدعينا شعراء الاغنية لم تفت عليهم فائتة فى شأن مخاطبة الحس

فى انثاهم- الممنوعة شرعا وثقافة-الا ومستهاقلوبهم قبل اقلامهم....وفى مقام آخر

سندلف الى الماهية التى خاطب بها شعراء الاغنية المرأة (المعنى) (الروح)....

كما اود ان اشير الى ان النماذج التى قمت بالاستدلال بهاهنا هى ماجادت به زاكرتى

الخربة.


معاونة

رغم من محاولاتى المتكررة فى اعمال وتنشيط الزاكره للجود

ببيت شعر واحد من اغانينا السودانية التى خاطبت( انف)

المرأة فلم تجد....اعينونى اعانكم الله....


ومودتى.

الخـيـر مـحـمـد عـوض

وقطعا ستذاد سعادتى اذا امدّنى اى متداخل بأى شيئ

كتب فى( لون) المرأة....



فى انتظار مشاركاتكم لندخل جميعا باب انثانا من اوسع رحيق.


ودمتم.

الخير يا كل الخير .. كل عام وانت بخير ... بوست جميل وواعد

......
كان مدخلي لحبها ....صوتها الجميل

Quote: وقطعا ستذاد سعادتى اذا امدّنى اى متداخل بأى شيئ كتب فى( لون) المرأة....

الخير ..كل عام وانت بخير


كتب ابو صلاح فى اللون:

الناعسات عيونن ونور جبينا هلا

مابين تبرى صافى واخضرانى اللون

وكتب ود القرشى:

اللون الخمرى الليله والخد الزهرى الليلة

وكتب عبيد عبد الرحمن

اه من صفاره العسجدى وعينو المتل عين الجدى

ابوصلاح كتب فى وصف الخنتيلة:

خدرتك اصيلة على النرجس يعظم تفصيلة

عتيق قال:

فيك ياذو الامرة عاجبانى رشاقة تبسيمة وضمرة

فى فاهك خمرة وفى لونك سمرة

عبد الرحمن الريح قال:

السادة لونو خمرى قلبى حباك

العبادى قال:

انزل يا صديق وشوف يد القدرة شوف حسن البداوة الما لمس بدرة

وراد النهر ادرونى ما بدرا الكاتل الصفار ام نضرة الخضرة

ود الرضى قال:

احمرارا مزج بياض تشبهى الروضة فى الرياض

اه انا الضاق بى الفياض سيدنا احجبنى ليك بياض

ابو صلاح قال:

سبعة ام لونا غامق الخضار فاق السندس لمعة ونضار

وقال المساح:

ظبى الخدر الما شاف قفار منه العسجد عار الصفار

وهناك الكثير ولو شاء ربى لعدت.

تسلم يا شفيف،،،

كتب تولوس :

Quote: الخير يا كل الخير .. كل عام وانت بخير ... بوست جميل وواعد

اشكرك اخى تولوس على المعايدة والمرور والتفاؤل وكل سنة وانت بالف خير

الفكرة الاساسية من البوست هى خلق جو من الهدنة او المهادنة ولو الى حين

فى خضم هذه الاجواء العكــرة.

ثم الخروج من هذا الزخم او الترف الفكرى العنيف الذى يمارسه علينا-قسرا-

(مثقفاتية)البورد...

هذا-طبعا- بعد فشلهم الذريع فى ايصال بعض افكارهم (المستنيره) الينا...

اورد من هذه الافكار على سبيل المثال ليس الا

* ثقافة التقوقع الهامشى *هامش الثقافة التقوقعية

*سلطة المركز ومركز السلطة

* الليبرالية وظلالها على الكونفدرالية

*الميتافيزيقياوعلم الوجود


وكدا يعنى

فقلنا نستريح هناشويه وناخد لينا جمة وبعد كده



(الزارعا الله فى الحجر بتقوم)


وابقوا عافية.


الخــيــر

هوووووي يا جاهله وطيبك عبق

الخير

يا صديقي

(الحمد لله الذي أنزل على عبده الكتاب)

الخير
( ماذا جنى أهلنا في هذه الحياة الدنيا حتى تنبري لهم جماعة لا تنبسط نفوسها لأي شئ يثير العاطفة والوجدان لتحرمهم من الطرب بصورة مثل تلك الصور التي وشاها البنّا لأنها في تقديرهم السقيم , صور فاضحه . ما أروع قول ذلك الشاعر محكم التعبير متكامل اللحن - فاضحاً كان أو غير فاضح - في قصيدته :
القوام اللادن منتبر مليان مال بي ديسا مروى وبالخمر نديان
النهيد ليمون والعيون جديان نور محيه الساطع والبدر سيان
باهي جيدك وافر والقوام كالبان والبدور خجلانه وانت محيك بان
طرفي ساهي وساهر بالدموع تعبان يالفريع الميل بالثمار غلبان )

منصور خالد

لك ودي

ولد سند

معروف

يا جميل يا نور الشقايق

مجلسك عمران شوفو رايق

عدو ناقص زول ولا تام

Quote: الخير ( ماذا جنى أهلنا في هذه الحياة الدنيا حتى تنبري لهم جماعة لا تنبسط نفوسها لأي شئ يثير العاطفة والوجدان لتحرمهم من الطرب بصورة مثل تلك الصور التي وشاها البنّا لأنها في تقديرهم السقيم , صور فاضحه . ما أروع قول ذلك الشاعر محكم التعبير متكامل اللحن - فاضحاً كان أو غير فاضح - في قصيدته : القوام اللادن منتبر مليان مال بي ديسا مروى وبالخمر نديان النهيد ليمون والعيون جديان نور محيه الساطع والبدر سيان باهي جيدك وافر والقوام كالبان والبدور خجلانه وانت محيك بان طرفي ساهي وساهر بالدموع تعبان يالفريع الميل بالثمار غلبان ) منصور خالد

اشكرك على التلوين

الخير

الاستـاذ/ صديق الموج

وجودك اضفى لونا بهيا لهذا البوست

اشكرك كثير الشكر ممنيا نفسى بعودتك مرات ومرات

Quote: عتيق قال: فيك ياذو الامرة عاجبانى رشاقة تبسيمة وضمرة فى فاهك خمرة وفى لونك سمرة

التحية لك وانت تنقل لنا لوحات متكاملة من شعر الافذاذ


ابو عتيق من ابرز شعراء الحقيبة تطويعا للكلمة

اليس هو من قال :

* يشرق سناك فى غيهب الليل الحلوك............(( اقف اجلالا لهذا الامتلاء ))

اظرف شمايل زاملوك

وهم اكملوك

ادبك هبة

وفيك ومهبة

وحسن الظباء

وطبع الملـــوك



ولك من الشكر اجزله يا جميل.

Quote: ابو عتيق من ابرز شعراء الحقيبة تطويعا للكلمة اليس هو من قال : * يشرق سناك فى قيهب الليل الحلوك............(( اقف اجلالا لهذا الامتلاء ))

الخير تحيات نواضر

نعم يا اثير محمد بشير عتيق هو القائل:

يبرق سناك فى غيهب الليل الحلوك واظرف شمائل زاملوك وهم اكملوك

ادبك هبة وفيك موهبة حسن الظباء وطبع الملوك

اتخيل انسان تبرق سنونه فى غيهب الليل الحلوك

يا عزيز هنالك بوست فتحه فتحى الصديق بعنوان يا صديق اكتب لينا عن عتيق

المهم سوف ارفع لك هذا البوست للاطلاع وسعيد انا بك كثيرا وحتى يمتلى الدن مجدد

خليتك عافية،،،

ود الرضي
مـاح رتل فوق هيبه ونفل خر بدرو وطمح الكفل
بـي الـمنير الـتام مـاافل اسـتقل ورفد الحفل
وقيل أنه الشاعر زمان إذا وصل به الوصف الحسي إلى حتة صعبة وأحس إنه اتطرف في الوصف يقوم يتمها بي: اللييييييييييييييييل الليييييييييييل

اشراقة

اشرقت انوار طلتك البهية وانت تزينين هذا البوست

بكلمات لشيخ افذاذ الحقيبة ( ود الرضى ) الذى كان

يمثل مدرسة قائمة بذاتها ذات لون ورائحة وطعم حلوالمذاق

Quote: مـاح رتل فوق هيبه ونفل خر بدرو وطمح الكفل بـي الـمنير الـتام مـاافل اسـتقل ورفد الحفل وقيل أنه الشاعر زمان إذا وصل به الوصف الحسي إلى حتة صعبة وأحس إنه اتطرف في الوصف يقوم يتمها بي: اللييييييييييييييييل الليييييييييييل

اطرب حد الطرب حينما يتغنى بهاالعملاق المطرب الطروب الاستاذ مبارك حسن بركات.

لكن يا اشراقة يا خيتى قولتى لى:

Quote: وصل به الوصف الحسي إلى حتة صعبة

(دى ما فوكا كلام)

ودمتى يا بهية.

الخير

Quote: ود الرضي مـاح رتل فوق هيبه ونفل خر بدرو وطمح الكفل بـي الـمنير الـتام مـاافل اسـتقل ورفد الحفل وقيل أنه الشاعر زمان إذا وصل به الوصف الحسي إلى حتة صعبة وأحس إنه اتطرف في الوصف يقوم يتمها بي: اللييييييييييييييييل الليييييييييييل

اشراقة شكيت محنك على الله..برفدوك يا شقية

لكن اسمعى ابو صلاح فى الحتة دى قال شنو:

الخصر قالى خبرونى الصدر والردف برونى

بالتقل كادو يبترونى وديسه حاجبنى ما بترونى

استاذى صديق

ينصر دينك يا رجل....

حقيقة اعجز عن شكرك وانت تقاذفنا الورود

بأنق كلام من نحب ونهوى...ومزيدا من السموق سيدى

Quote: الخصر قالى خبرونى الصدر والردف برونى بالتقل كادو يبترونى وديسه حاجبنى ما بترونى

ولنا عودة.

ود الضي قال

غاضّة وقاضي بصباص عينا والفاطر بريق العينا
تمشي الرنعه من دِرعينه قاصدا هلاكنا الله يعينا

تترنّع تفنن ديره فوق للعيبه جادعا بديره
زي الموج تلاعبه صديره اسم الله عليك يا بديره


هلا هلا يا جنا انا اخو ود الرضي

شوف ود الرضي يا ابو لين

محنّن بدون قُنلّه** وحّدو وتوبو واقع
يتغطى بسواعدو** ويحنو كأنه واجع

يلتجي بي مرافقو** وأطراف المضاجع
ويردد لى نغيماً** تشتاقلو المسامع

وتلّب فوق شفاهو** لؤلؤة المدامع
أعاين فيهو واضحك **أجري واجيهو راجع

متلاعب ليس الاّ **ما موضع مطامع
دِي ما بلقاها زولاً **زيّ انا صيدو ناجع

معروف اخوى

تعال بكاس الوصال

اسقينى خمر الجمال

على مروج الظلال

وبين مجارى التلال

اسمعنى لغة الدلال

عبد الرحمن الريح


التحية لك....ابشــر....كلام ود الضى سمح بالحييييييييل آجنى

الخير..معروف..اشراقة


عمكم ابو صلاح قال:

مرة الحاظه قابلونى ...............ظلما اسهامه نبلونى

قالت لى ارداف تقال بلونى..... والسنون تضوى قالبه لونى

بالله شوفو استعمال الجناس فى قال بلونى وقالبه لونى

الله الله،،،،

صديق الموج

ازيك يا زول يا سمح

ابو صلاح قال

في المهالك عمنا ورسينا ** ولي شروط الهوى ما نسينا
في الغرام اصبحنا ومسينا** يا نجوم السما آنسينا
يا مناظر لا تبعتينا ** لي شروك الغي المتينا



المناظر شنو يا صديق

الخير

بعد ما قال ليها

هوي يا جاهله طيبك عبق

بعد كدا قال

سنك براقا يسوي بق


وسن البرق لمن لا يعرفها هي جزء من لحم الخروف يؤكل نيئاً ,,

قرأت بعض أبياتٍ لمحمد المهدي المجذوب , أوردها المرحوم الاستاذ عبد الهادي الصديق في كتابه ( الشعر العربي في السودان ) , كان ذلك قبل سنواتٍ عديده , واليوم بحثت عنها ووجدتها في موقع سودانيات, اوردها هنا كيتاً في ملتاثي العقول

Quote: يا دفءَ (شيءٍ) إذا ما الليلُ أرعشهُ بَرْدُ الشتاءِ كفاني السُّهد َ مقرورا كالطفل أفلتَ ثدياً ثم رنّحهُ أمن ُ الطفولة تنويمًا و تخديرا و قمت أحفِزُه حيناً و أوقظه ُ حتى تنبّه ظامي الفوه ِ مفغورا أمسيتُ أرضعها المحضَ الصفيّ دمي حتى انثنيتُ رضيضَ الجِسم مبهورا منحتها زَهرَ الأحلام ِ يانعة ً حتى تدومَ و كنزَ الروح مذخورا * * * * و حفرة بدخانِ ِ الطلح ِ فاغِمة ٍ ُتندي الرَوَادِف َ تلوينا و تعطيرا لمحت فيهِ- و ما أمعنتُ - عاريةً ً تخفَىَ و تظهَرُ مثل النجم ِ مذعورا مدت بنانًا بهِ الحِناءُ يانعةٌ ً ترُد ُّ ثوباً إلى النهدينِ ِ محسورا قد لفّّها العِطر ُ لفّ الغيم ِ منتشرا بدر الدجىَ و رَوىَ عن نورِها نورا يزيد صُفرتها لمعاً و جِدتهَا صقلاً و ناهدها المشدود َ تدويرا أرخى الدخان لها سِتراً فبعّدها كدُّرةٍ في ضميرِ ِ البحر ِ مسجورا حتى إذا ضاق كِنٌ عنهُ أنفذه ُ هين الصعودِ خصاصُ البابِ مكسورا * * * * و شملة ٍ غمرت ساقين ِ و ابتدرت كالموج تلمس جيدًا رفّ مشهورا َيرِقُ تحتَ دخانِ الطلحِ ِ ساوَرَه ُ كالدمع في الخدّ تلماحاً و تغويرا ما شملةُ لسواد الليل حُلكتها و للهواجس تغشى الفكر مخمورا كالوحش جاثمة ً ثقلا ً فهل حضنتْ إلا الجمال رقيقَ العِطف منضورا ُتكتّم العطر حتى يرتوي عرَقاً منها الجمال ُ كروضٍ بات ممطورا ترى الدخان َ على أثنائها زبداً كالريش في نسمات الصبح مبهورا حتى إذا ما اكتفت قامت ْ و زايلها نجدٌ تساقطَ مثل الدر ِ منثورا تخيلتْ ، و أمانيها منضّرةٌ خلف الدخانِ حبيبا بات مهجورا و نفضت حلما غنى بوحدتها لحنَ الصبابة ِ غضِّ الصوتِ مسحورا وخفضت ناظرا هُدباهُ قد لمسَا خداً كنبعٍ رنا في الظل محبورا أضحى لها الأمرُ لم تُُحوِج هواي إلى جَهد ٍ ألهمها الإحسانُ تدبيرا ألقت إلي ّ بأشواق ٍ أجاذبها عنها و أوسعها مَزقاً و تنقيرا في لُجة ٍ بكرت ْ مداً و أذهلها عرضُ المحيط ِ فذابت فيهِ مشرورا مثل الشهاب له عزم لقد ذهبت به الجواء ُ بديدَ النور ِ منثورا و ما ارتويت و لا كفت، أخالُ بها مساً يعذب منها الروح مأسورا لقد ذهلت فما أبصرت من وطرٍ قد بات خلف ظلام النفس مسعورا عينٌ محجبة ٌ في النفسِ ِ زاخرة ٌ تسقي و تُظميء ُإرغاماً و تخييرا تزيّن الكونَ شهواناً و توسعه ُ في الروض ِ و الغيمِ إغراءاُ وتغريرا يهتزُ و الأرض في أشجان دورتها لذائذ ٌ خَلدت ْ في الكون ِ مقدورا و رُب ذرة ِ رمل ٍ حين جمشها ريح ٌ أهاجَ لديها الشوق َ مذرورا و قد ذهلت ُ ذهولَ الشَّربِ ترمقُهُم في الكأسِ ِ جمرة ُ كرم ٍ باتَ مسجورا و بتُّ أجمعها جمْعاً و ألزمُها فما تجمّع ُ مثل َ الماءِ مفجُورا

Quote: ابو صلاح قال في المهالك عمنا ورسينا ** ولي شروط الهوى ما نسينا في الغرام اصبحنا ومسينا** يا نجوم السما آنسينا يا مناظر لا تبعتينا ** لي شروك الغي المتينا المناظر شنو يا صديق

شفت ليك عفة جنس دى...

والله يا سند ديل كان نحن شفنا مناظر جنس دى كان عينا فى النار اظن نمشى عليها.

كلام سمح ويجى اخر الزمن الطيب مصطفى يقول ده غزل حسى ويشطب فى التسجيلات

اللهم لاتؤاخذنا بما فعل الشفهاء من يارب العالمين،،،،

تعرف يا صديق فكرت ان اضيف مادة اخرى لهذا البوست حتى يتثنى لمستنيرى البورد

المشاركة الفاعلة...مثلا نقوم بفتح موضوع عن العلمانية واثارها المرتقبة فى تناول

قضية الحقبة.....او اثر الانظمة الشمولية على ثراث الحقيبة.....

وهاك ياتنظير.....


فى فكرتى الكواكب والانجم السوارى

والحور مع جمالن بالنسبة ليك جوارى

ما دام صبحت عاشقك

والحب صبح ثمارى

سيبونى فى الارائك

اسجع مع القمارى



عبد الرحمن الريح

ونواصل

Quote: الخير بعد ما قال ليها هوي يا جاهله طيبك عبق بعد كدا قال سنك براقا يسوي بق وسن البرق لمن لا يعرفها هي جزء من لحم الخروف يؤكل نيئاً ,,

معروف يا ظريف كتر خيرك على ايراد قصيدة محمد المهدى مجذوب حفرة الدخان

اما بخصوص سن البرق فالتى تؤكل اسمها سن البرك وهى اول جزء من الضان يلامس

الارض عندما تبرك البهيمة.

اما ما يقصد الشاعر هنا:اى ان سنها تلمع مثل البرق عند التماعه من فرط بياضها

وهى تبسم بين اللمى ولفائدة التعريف:

اللمى سمرة فى الشفاه تستحسن..وكآن اخضرار شفتيهامثل السحاب ولمعان اسنانهامثل البرق

عندما يشلع او عندما يسوى بق...والله اعلم

شفت الناس ديل كانوا خطرين كيف..تسلموا،،،

صديق الموج

ياخي انت خطير

لكن انا مصر على سن البرق

لانو في ناس قالوا لي (سن البرك ) ممكن الناس تحورا ( للبرك الآسنه )

عشان كدا أهلنا الفُصاح سموها سن البرق

معروف السمح

انت عارف نحن ابدا ما مختلفين وانت عارف سن البرك او سن البرق

دى ما ياها الدوش زاتو وهى المنطقة مقدمة القفص الصدرى وبتكون دهينة وهى اصعب

موضع عند السلخ لانها تلى نهاية الرقبة..وتؤكل نية.

ما سمعت ابو صلاح قال :

براق سنك يساعد للغيم المزنه راعد

ساكن قلبى ومباعد تشتاق شوفتك عيونى

وذلك فى قصيدة يا ليل ابقالى شاهد وهى القصيدة التى سمعها الشيخ قريب الله

وكان فى خلوته وطلب من احد الحيران ان ينادى هذا الفنان وحكى عمر البنا ان

كرومة ذهب الى الشيخ وجلا وحسب انه سوف يزجره ولكن كل ما فعل الشيخ من كرومة

ان يغنى له هذه الاغنية ثانية وفعل كرومه ولما وصل المقطع الذى يقول:

يا ليل صار ليك معاهد طرفى اللى منامى زاهد

دنا لى سهرك واشاهد فوق لى نجمك ظنونى

صاح الشيخ صيحة عالية وخر ساقطا فتركه كرومة مع الحيران وخرج.

قمة التسامح الدينى ولكل واحد منهم ليل..

معروف ياخى احبك،،،

عبيد عبد الحمن قال:

زاد اذاى يا صاحى واعترانى نحول

طرفى دامع وساهر بالسهاد مكحول

لي حال الحول

والموانع بينى وبين حبيبى تحول

صبرى ضاع يا جافى وخصمى صار ممحول

الى ان يقول:

كم يواعد ويمطل والمطل ممطول

القوام معدول

الوريد كالدمية والاسيس مسدول

الكتيف مهدول

بعضة نام فوق بعضة تقول حرير مجدول

ايه يفيد القول

وايه يفيد من شعرى فيه مهما اقول

منه خالّة عقول

الوصول للبدرى ياخى ما معقول

ذاد ازاى يا صاحى واعترانى نحول

طرفى دامع وساهى وبالسهاد مكحول




هلا هلا انا اخوك يا عبيد

استاذى صديق اوردت :

Quote: يا ليل صار ليك معاهد طرفى اللى منامى زاهد دنا لى سهرك واشاهد فوق لى نجمك ظنونى صاح الشيخ صيحة عالية وخر ساقطا فتركه كرومة مع الحيران وخرج. قمة التسامح الدينى ولكل واحد منهم ليل..

وفى رواية اخرى سمعت ان الشيخ قريب الله كانت عيناه قد فاضتابالدمع

السخين وهو يسترق السمع الى ...يا ليل ابقالى شاهد.....

ولى عودة

الخـير

Quote: عبيد عبد الحمن قال: زاد اذاى يا صاحى واعترانى نحول طرفى دامع وساهى بالسهاد مكحول لي حال الحول والمغالق بينى وبين حبيبى تحول صبرى ضاع يا جافى وخصمى صار ممحول الى ان يقول: كم يواعد ويمطل يومى طال ممطول القوام معدول الوريد كالدمية والاسيس مسلول الكتيف مهدول بعضة نام فوق بعضة تقل حرير مجدول ايه يفيد القول وايه يفيد من شعرى فيه مهما اقول منه حالمة عقول الوصول للبدرى ياخى ما معقول ذاد ازاى يا صاحى واعترانى نحول طرفى دامع وساهى وبالسهاد مكحول

الخير كيف اصبحت...

بعد اذنك النصلح بعض الاخطاء الاملائية التى وردت فى القصيدة

طرفى دامع وساهر.


على حال الحول والموانع بينى وبين حبيبى تحول.



كم يواعد يمطل والمطل ممطول(شفت جنس المماطلة دى) حتى المماطلة زاتها معاها مماطلة.



الوريد كالدمية والاسيس مسدول والاسيس هو الشعر اى ان شعرها مسدل طويل وبالمناسبة

الاسيس هو نهايات القش الاخضر الناعم اللامع ولكن الشعراء يشبهون به شعر البنات

مثل الهضليم وهو ذكر النعام وعادة ما يكون ريشه اسود والنعامة الانثى لونها يميل

للحمرة والروبة هى الشجرة الظليلة والرسا وهو حبل البير الطويل وغيرهم وتلك عادة

يصف بها شعراء الحقيبة شعر البنات.



منه خاله عقول اى اختلت بمعنى ذهبت واختلال العقل هو الجنون

الاستاذ صديق

حسابى معاك بقى كلو كسور...

لك وافر الشكر على التصحيح ...


ولنا عودة.

عبيد عبد الرحمن
القوام معدول
والوريد كالدمية والأسيس مسلول
الكتيف مهدول
بعضه نام في بعضه تقول حرير مجدول

خليل فرح
شوف عناقد ديسها تقول عنب في كروم
شوف وريدا الماثل زي زجاجة روم
القوام اللادن والحشا المبروم
والصدير الطامح زي خليج الروم

سرور
فى الضي جبينها النادى
و البدر خلانو تجمع لطافة و رقة
و نفرة الغزلان
ما بين أن جسيمها اللادن الكسلان
يزرى الحرير الناعم والفريع اللان
داعجه ومكحلة خلقة
عظمها الرحمن بي كمال جمال الخلقة
وشحها الإيمان
جذب المناظر مننا منظرها الفتان
حين جات تميس تتختل وشفنا فيها البان
بدرى وغمامة ودميه فى فريع البان
وردفاً يتب بدروعه والقديم غلبان
من دون مرور النسمة أم قوام نديان
تجى فى الدروع منقسمة تميل تخذ أحيان
تقدل تتاتى كفيلة ويلعب الطغيان

صديق الموج والله أنا ما عندي أي محن لكن دا الحاصل

معروف والله بالغت عديل كده في سن البرق دي – يا زول المقام مقام غزل وشاعرية الجاب سيرة الأكل هنا منو؟؟

Quote: صاح الشيخ صيحة عالية وخر ساقطا فتركه كرومة مع الحيران وخرج.

وقيل أن الشيخ سئل حين أفاق عن استماعه للغناء فرد قائلاً : يغني المغني وكلٌ يبكي ليلاه
........وبجيكم راجعة

Quote: معروف والله بالغت عديل كده في سن البرق دي – يا زول المقام مقام غزل وشاعرية الجاب سيرة الأكل هنا منو؟؟

اشراقه

وانا اردد مع الشيخ ,,يغني المغني وكلٌ يبكي ليلاه



ليالي الخير جادن

رنا متخاوف بارق لجّ ** بعضو في بعضو ترادف لجّ
نصفو تثنى وآخر لج ** لاطم امواج من غير لُج


شوف الجناس الختري دا يا أبو الاموج

up

الى حين اشعار آخـــر

Quote: ليالي الخير جادن رنا متخاوف بارق لجّ ** بعضو في بعضو ترادف لجّ نصفو تثنى وآخر لج ** لاطم امواج من غير لُج شوف الجناس الختري دا يا أبو الاموج

معروف ...كيفك

انت انا عارف انا عاجبنى ياتو بيت فى القصيدة دى.البيت البقول


بوبح جيده وابصر واقل ظن مراقب صدق العاقل

قلب المخضوب فوق الفاقل تلا اليمنى ومشى متاقل

انت عارف دى نوع المشية البتتكلم براها وتقول

انعل ابو السآئله فى..يموت الما عاجبه المشى وهلم جر..

فى ناس يا معروف مشيتهم مدوزنة

عبيد قال فيها:

تيه فى تيه رفل نجم الليل زهى بالبدر احتفل

موفور النفل ساح نام فى الكفل

اسفل مرة عالى واعلى الكان سفل

تقولوا لى بتقلب!!!!!!شوفو الادب

صديق ازيك

شوف المشية دي

يمشي ردفه يكاد يوقفاهو ** كتفه يلثم طيات قفاهو
المرجرج كفلو الكفاهو ** المزمزم ذي خاتمو فاهو

لو تريض ساعة عشاهو ** طيبو سكن الطرق المشاهو
القمر والبان اختشاهو ** من جبينو وميلت حشاهو

وشوف ليك مشى

بى وحل للتبر نقل...يمشى حبة وشعرة واقل

انعقد رجحن بى الغقل...وهط المهدول فى الفقل

ومشية تانى

اللدانة وقول الوحل... والطريف الحبكه الكحل

ورى كيف الغيم الرحل... يا الخريف العقب المحل

هسع دى ما ياها زاتها:

كآن مشيتها من بيت جارتها مر السحاب لا ريث ولا عجل

وسؤالى لك يا استاذى الجليل هو:

ماهو السر وراء جمال ما كتب فى المرأة ووثقت له

حقيبة الفن بدرر روائع كهذى التى نقرأ ؟

هل لأنهن-فعلا- كنّ بذات ذاك القدر المدهش من الجمال؟

ام انها العفة كانت تتنزّل عليهم؟

ام انه الدين ومكارم الاخلاق؟

مثل هذا الكلام فوق طاقتى على التصديق

Quote: اللدانة وقول الوحل... والطريف الحبكه الكحل ورى كيف الغيم الرحل... يا الخريف العقب المحل هسع دى ما ياها زاتها: كآن مشيتها من بيت جارتها مر السحاب لا ريث ولا عجل

مشـيتا سمحـة بالحييييييل يا صديق.

وبجيكم صاد.

Quote: وسؤالى لك يا استاذى الجليل هو: ماهو السر وراء جمال ما كتب فى المرأة ووثقت له حقيبة الفن بدرر روائع كهذى التى نقرأ ؟ هل لأنهن-فعلا- كنّ بذات ذاك القدر المدهش من الجمال؟ ام انها العفة كانت تتنزّل عليهم؟ ام انه الدين ومكارم الاخلاق؟ مثل هذا الكلام فوق طاقتى على التصديق

الخير اخوى كيف حالك

نفس السؤال ده سالناه لى العم والشاعر محمد بشير عتيق

وكان اجابته كالتالى:

قال عمك عتيق يا اولادى المرأة السودانية اتعملن فيهن ثلاثة اسواء اشياء

يمكن تعمل لانثى..شلخوهن ودقوا ليهن شلوفتن وطهروهن كان ما قلنا فيهن كده

الكان بعرسن منو؟؟

اتخيل هذه الاجابة المفحمة وخصوصا الحقيبة جاءت بعد واقعة كررى والتى

فقدنا فيها عشرة الف رجل وشاب خلال ساعات ومحتاجين ان نتكاثر..

ولكن هذا لاينفى صدق العاطفة والثقافة العالية لدى هولاء الافذاذ..تسلم،،،

كدي شوفو سيد عبد العزيز قال شنو
من حور الجنان

من حور الجنان أم أنت إنسان الكمال

هل أنت الملاك جيت تورى الناس الجمال



سبجان من أنشاك حسناً فى غاية الكمال

يهواك الجنوب واليك ينقاد الشمال

وما أظن يحصوا حسنك لو يحصوا عدد الرمال

وبايه يقدروك يا ملك ملوك عصر الجمال



سلطان بهجتك محروس بجيوش الجلال

ويغار من صفاء حسنك صفاء ماء الزلال

فى مراية خدودك أِشوف تأكيد سحر الحلال

وأِشوف فى سما حسنك كل يوم يسطع هلال


صفا ماء الجمال فى مجال جمالك راق وجال

زى ماء الحياء فى عيون ربات الحجال

وما فعل السلاح تفعل عيناك النجال

مكسور الطريف كسر قلوب الرجال



يا خلاصة المعاني الصار معناك موضع مثال

فوق المحسنات حايز لطف وكرم خصال

الهة الجمال يعترفوا ليك ماليك مثال

تتمنى البدور تقبيل يداك بامتثال



يا طايل الوريد يا أهيف يا اللى خصمه زال

فيك منظر يحنن وفيك منظر فارس النزال

ليك من الغزالة جبين وقاد وعيون غزال

الحور من مناصبها لى قدرك تكتب نزال


يالغصن الرطيب عاجبنى فيك الإنهداك

اللادن قوامك من ملين وذو اعتدال

جوهر حسنك الصافى وسيرك طاهرات عدال

آيات بينات مافيهن للكافر جدال


شاركت الغمام والموج مناظر وارتحال

شاركت الظبا فى نفرتن والاكتحال

شاركت القلوب فى موضعهن وعلى كل حال

الأخ سيــف

Quote: شاركت الغمام والموج مناظر وارتحال شاركت الظبا فى نفرتن والاكتحال شاركت القلوب فى موضعهن وعلى كل حال

وانت يا سيف شاركتنا بطلتك البهية التى نتمنى ان لا تحرمنا منها

اشكرك يا ابو السيــوف....ومعزره للتأخر فى الرد.


مودتى.

سيف يا اخوى ما نسيت الشطرة الاخيرة

نفداك بالنفوس وفداء النفوس كان المحال

الاساتذة:

الخير محمد العوض

صديق الموج

معروف سند

والاخوة المتداخلون

شكرا جميلا لكم جميعا ..

وياخواننا رجاء خاص ..لى سنين بفتش لى كلمات اغنيتين:

1- من قليب الجافى ..لى قليبى الحان

2- يا رشا يا كحيل ..غيثنى ..هواك سبانى


ما تتلومو معاى ..عليكم الله

الاخ الماجد عاصمدي اغنية يا رشا يا كحيل مشيت جبتها ليك (الحقوق محفوظة لمنتديات عشاق السودان )

Quote: يا رشا يا كحيل غيثني هواك سباني يـا الأمرضنـي ومـا طبـانـي في خديـدك الـوح نـور ربانـي نـيـران اشـواقـك لاهبـانـي وسـهـام ألحـاظـك نشبـانـي مـــن ألـحـانـك تعـبـانـي مهمـوم تشهـق قصـرك بــان يتهادى يميل خصرك فريـع بـان يا رشا يا كحيل غيثني هواك سباني هـبـت لـروائـح دهـشـانـي يا نسيـم عقـد وعـود علشانـي قولـيـه غـرامـك أغـشـانـي وأدركنـي الـدمـع الراشـانـي حسنـك شانـك والحـب شانـي يا نسيـم روح بلـغ آه وأغشانـي بحـق مـن أنشـاك وأنشـانـي يا رشا يا كحيـل هـواك سبانـي جمـر الأشـواق هـب قـلانـي من إنطفـأ بـي دمعـي البلانـي أنـا لا أسـلاك لــو تسـلانـي حبيـبـي غـرامـك أبـلانــي ملكـنـي هــواك وخـلانــي فـارقـت أقـاربـي وخـلانـي حسنـك والاك والحـب والانـي يا رشا يا كحيـل هـواك سبانـي لهـمـلات حسـنـوا شجـانـي ليك نـور ولـي نـار سارجانـي رقـيـق اللمـحـتـه الـجــان فـي بحـور اشواقـك زجـانـي خاطـر بــي ومــا نجـانـي أعلـم أقبـل سـعـدي وأتـانـي لو طيفك فـي الأحـلام ناجانـي يـا رشـا يـا كحيـل غيثـنـي

يا سلام عليك يا معروف ..وياسلام على همتك


الشكر من هنا.. لى عندك (شوفها دى كم رطل كده)

اخوي عاصم كدي شوف ود الرضي بقول في البنية دي شنو
الجرحو نوسربي
الجرحو نوسربي غورفي الضمير
وفي قلبي خلف الكي ياناس الله لي
لو ما الشئ قسم وانا عقلي مداير
ليه عاشق المدلل بيهو شن داير
يمشي الكي قبل وينسف الداير
والمحبي المتل قمر العشاء الداير
والديس الغزير لي قامته يداير
يحيك بي عجن ويقولي شن داير
رجماك ياعشوق طاش الفكر حاير
ياناس الله لي

*عاصم اخوى شرفت الديار....ابقى داخل...جيتك سمحة تب وبندورها بالحيييل

وطلبك اعتبرو مقضى ...بس اصبر علي شوية.

*سيف كيفك يا زول يا رائع...جيدا جيتنا...نور بيتنا يوم ما جيتنا


* معروف مالك يا اخوى طولت مننا كده.

*استاذنا السمح صديق متابعك بالحيل فى الحوش التانى ( حوش البنية السكرية حلاوة لبن)

والله تراكا ماك هين..ههههههههه...المهم جياتك سمحة وبندورها تب.

يا صاحبة الإكليل

ما أظن النهار

العين تدورلو دليل

محياكي نورو جليل

كنت أقول شمس

لو ما الزمن كان ليل

**
وانت عليكي نور
**
لا زلت ليكي أميل

يا رمز السعادة

الما اتوجدلو زميل

يا آية التكميل

يا مراية الجمال

الفيكى كل جميل

ريحانة العصور

من قليبه الجافى ولى قليبى الحان النسيم يتردد عامل استمحان

------------------------------

يا نسيم ما بالك تثنى قامة البان انت رايق تلعب والعشوق تعبان
اكتشف ما دائى وما الدواء الصعبان هل ده جرحا بالغ ام ده سم ثعبان

--------------------------------

قالى لازم جرحك مدة الازمان لا روائحى يطبك لا ولا لقمان
البداوى جروحك شفته يا سقمان فى عصير الند البنضحه الرمان

---------------------------

صاحى سياف لحظك والطريف نعسان ليك رشرش قاطع جندل الفرسان
انت حسنا كامل فى قوام انسان ليك حسن الدنيا ولى شعر حسان

-------------------------------

الدوش افكارى وربا لى جنان خمرة تمزج تينة وتسقى در اسنان
رق يسطل سمعى لهيجك الرنان انت ناس فى دنيا والا حور فى جنان

-------------------------
يا الغرامك حل ورحل السكان من مدائن جوفى تملك الاركان
ما الذ النار السارجة بى لو كان يبقى قلبى وقلبك فى الغرام شركان

--------------------
انت حسنك كامل والعشوق كملان طش عقله الهامل وفارق الزملان
فى المنام يتقدل طيفك العطلان والحجارة اتنت لو قليبك لان

--------------------------------

حاشيـــــــــــــــــــــــــــــــة:

السمحين انا اكتب من ما كان يسمى ذاكرة المهم هنالك بيت يقول عجزه

والزهور بتصفق ويرقص الريحان الرجاء اتمامه

عفوا مكرر

الاعزاء

سيف مساعد

الخير

معروف

صديق الموج

لكم عميق ودى وامتنانى ..وشكرى الجزيل

وتقبلوا منى هذا الاهداء لكم جميعا:

كتب شاعرنا العظيم ود الرضى:


روح واعرض حالى

لى حبيب الروح وجيب لى طيبو الحالى

يا نسيم الليل..

قول له نام الخالى .. وهو يتخيل رنة الخلخالى
بالنظر اسخا لى .. وهنى بى رؤياك الحياة الماسخة لى

يانسيم الليل..

النسيم هبا لى
يا حسينة الذات .. الجمر هبا لى

يا حبيب رحماك..

لا تزيد بالبالى
ولا تكن شكواى .. موية فى غربالى

يا نسيم الليل

قال لى فيق يا غالى
ان تنل شكواك.. بيها لست ابالى
كلما اطراك .. العقل يابى لى
يا حبيب البى .. حنن اليابا لى
يا نسيم الليل..

لامنى فيك الوالى

والى ما بسواى .. كل من ياؤا لى
لست اعبأ بى .. زخرف الاقوالى
برضى فى التبريح .. والبكا المتوالى

يا نسيم الليل..

كم وكم قبالى
قلبو مشغول بيك .. وانت ماك مبالى
كلما اطراك .. لا اعى اقبالى
صرت من البى .. شخصى كاد يغبا لى
يا نسيم الليل..

يا عزول اجمالى
اهنى بى رؤياك .. خلنى واعمالى
لا حياة بى .. لولا ما آمالى
خلنى وبلواى .. انت مالك ومالى
يا نسيم الليل..

يا نسيم لى والى
هب من المحبوب .. فى كل الاحوالى
ها انا الراجيك.. واقفا لى نوالى
وقفة المملوك .. فى رجاء الوالى

يا نسيم الليل..

هاك صافى مقالى
يا بديع الذات.. انت نور امقالى
الجفا يا نور .. العيون لى قالى
هذا لو يرضيك.. حبذا يا غالى
يا نسيم الليل..


اتوقع ان تكون هنالك بعض الاخطاء..اعذرونى عليها

ولكم جميعا محبتى

Quote: اتوقع ان تكون هنالك بعض الاخطاء..اعذرونى عليها ولكم جميعا محبتى

عصوم مشكور على الهدية ومافى اى اخطاء فقط القصيدة لعمك محمد ود الرضى وليس

عمر البنا لذا لزم التنويه ..اكرر شكرى،،،

العزيز صديق الموج

شكرا على التصويب ..وقد قمت بالتعديل اللازم ..

وتقبل منى كل الود..وانا فى لهفة للمزيد ..فلا تبخل علينا!

اخواني الاحـباب عشاق شـعر الحقبة طال شـوقي لكم..

لكم وافر التحايا

عصـام تسـلم يا رجـل يا سمـح

صـديق شـوقي لا تحـده حـدود

سـاعود عما قريب.

اخوكم الخير.

عاصم وبقية الكوكبة الشفيفة هاكم دى من عمكم احمد محمد حسين العمرابى


خمرة هواك
---------

خمرة هواك يا مى صافية وجلية
هى اللاعبة بى الالباب لا البابلية
-------

كم ليل انوح سهران والناس خلية
عينى سهاد ودموع امست ملية
شاهدى اضطراب ونحول ظاهر عل
راضى وبشوف هجرك اكبر بلية
-----------

مى الفؤاد بهواك فاقد شلية
لو طال جفاك يضيع باقى التلية
انا لم ازل لهفان وانت الابية
سنيتى ان تحيى دايماخبية
--------

لو فى النساء رسل كنت النبية
ما بسلى ريدك لا وحياة ابيا
الروح تتوق للقاك دايما شهية
رافض النصح من خل ..رافض النهية
----------

كلت قواى زفرات وجدى وهية
اسباب هواى لحظات فاترات وهية
هاك منى باخلاص الماسه ديه
دررا تنافس الدر وازهار ندية
---------

وهلم روحى اليك يا مى هدية
كان النبى المعصوم قبل الهدية
ليك منى الف سلام والفى تحية
تغشاك مع النسام بى روح شجية
ماقال محب وعلى محبوبى حيا
وتقر عيةنك يا نور المحيا

الاعزاء:

صديق الموج

الخير محمد عوض

معروف سند

سيف مساعد

والقراء الكرام..

اهديكم هذه الياقوتة من شعر عمنا:محمد على الامى

حيث يقول فيها:


اسمعنى واشجينى ..بى ذكرة الاحباب بالله ناجينى

غرد يا الحمام

* * *

رحماك نجينى .. من زل همومى البى ..من قاع سجينى
خلى الهنا يجينى..وخلى السرور يصبح فى الطى يزجينى

* * *
تبريحى صالينى..وهيامى زاد اضعاف ومنامى سالينى
قول انت سلينى..خلى اليزول منى المى الموالينى
* * *
الشافو بالينى..والبين برى جسمى وبى نوايبه بالينى
يا دمعه بلينى..ويا قسوة الايام فكى الحدود لينى
* * *
من غيرك يشفينى..ومن غيرك يرتى يعيد صبرى المجافينى
قول ليه صافينى..زمنى القصد هجرى..فى هاوية خافينى
* * *
قد رشدى يهدينى..فى ملتقى النيلين..اتغنى اشدينى
على توتى عدينى..تجد الادب فطرى ..تجد الحادينى (الحياة ادينى)
* * *
صابحنى مسينى..يا جالب الافراح ....لا تبقى ناسينى
سجعك يواسينى..ورجاى فيك يا حمام..كان مت ترثينى
* * *
اصعد ونادينى....اقصد رياض شمبات...اسر بى ودينى
فى غناك ابدينى..اندب هناك حظى.. سعدى المعادينى
* * *
بطرى البساتينى..بطرى الشذى الفواح ..والمسك والتينى
يا جنة ختينى...هل بعد هذا رجوع؟...ويا حظى افتينى
* * *
ان رمت تروينى....رى العطيش فى بروق..بى جرعة داوينى
فى جوفى كاوينى..حب ام عفاف ام در....من قبل تكوينى

غرد يا الحمام

******************************************************

فوق

Quote: رحماك نجينى .. من زل همومى البى ..من قاع سجينى خلى الهنا يجينى..وخلى السرور يصبح فى الطى يزجينى

Quote: الاعزاء: صديق الموج الخير محمد عوض معروف سند سيف مساعد والقراء الكرام.. اهديكم هذه الياقوتة من شعر عمنا:محمد على الامى حيث يقول فيها: اسمعنى واشجينى ..بى ذكرة الاحباب بالله ناجينى غرد يا الحمام * * * رحماك نجينى .. من زل همومى البى ..من قاع سجينى خلى الهنا يجينى..وخلى السرور يصبح فى الطى يزجينى * * * تبريحى صالينى..وهيامى زاد اضعاف ومنامى سالينى قول انت سلينى..خلى اليزول منى المى الموالينى * * * الشافو بالينى..والبين برى جسمى وبى نوايبه بالينى يا دمعه بلينى..ويا قسوة الايام فكى الحدود لينى * * * من غيرك يشفينى..ومن غيرك يرتى يعيد صبرى المجافينى قول ليه صافينى..زمنى القصد هجرى..فى هاوية خافينى * * * قد رشدى يهدينى..فى ملتقى النيلين..اتغنى اشدينى على توتى عدينى..تجد الادب فطرى ..تجد الحادينى (الحياة ادينى) * * * صابحنى مسينى..يا جالب الافراح ....لا تبقى ناسينى سجعك يواسينى..ورجاى فيك يا حمام..كان مت ترثينى * * * اصعد ونادينى....اقصد رياض شمبات...اسر بى ودينى فى غناك ابدينى..اندب هناك حظى.. سعدى المعادينى * * * بطرى البساتينى..بطرى الشذى الفواح ..والمسك والتينى يا جنة ختينى...هل بعد هذا رجوع؟...ويا حظى افتينى * * * ان رمت تروينى....رى العطيش فى بروق..بى جرعة داوينى فى جوفى كاوينى..حب ام عفاف ام در....من قبل تكوينى غرد يا الحمام

******************************************************

عاصم مشكور على هذا الاهداء الموفق ..قاتل الله الاخطاء المطبعية كثيرا ما تغير المعنى
واحيانا تفسده..واليك طائفة منها


الشوقو بالينى...

ويا قسوة الايام فتى الحدود لينى

تجد الادب فطرى وتجد الحياء دينى

ان رمت تروينى رى العطيش فى ابروف بى جرعة داوينى

فى جوفى كاوينى حب العفاف فى امدر من قبل تكوينى

اخوي عاصم محمد شريف

حبابك يا راجل يا ضو وكتر الف خيرك لهذه الاشراقات الما بتجي الا من

السمحين الزيك ....والله ياعاصم شاعر اني مقصر مع البوست دا ودا سببو

انو الكي بورد بتاعي بايظ والكتابة بالماوس زي ما عارف مسالة مرهقة

وبتدور ليها زولا شواف مو زيي كدى...

لك مني خالص الود وتحياتي للامورة ملاذ

*********************************************************

صديق الموج

قائد الاسطول

وينك يارجل يا ضو والله مشتاقين

طبعا الايامات دي ما قاعد اكتب اي شيئ وبقيت من الفريجة سااااي

تبا لهذا الكي بورد اللعين.

لك مني كل الود والاحترام