مُصَنْقِرْ .. بغني

( بنفسٍ واحد هروِلوهُ .. هذا الهُراء - إن أردتم - )



صباحك يصبِّح صباح الدَّعاش
البيَرتِق رِعاش الحروف
البتَنتِقْ رويحةَ البِسبِّح بإسمك
يجرتق دواخل الحديث البيَحرق جميرو
ويفرتِق قُماشة قليب المغني المُشربَك نحيبو
ويشهِّق تلاوة حلاوة هواكي المَحكَّر
ينقِّر دُقاق الوجيب البيَسنِد صِباهو
النحيب البراهو بيَنقرش ربابِك عليهو
ويعدِّل نبيذك مزاج التِّرِنِّح ويفسِح
سطوعك غُنايا عليكي البِطَنبر قصيدو
وينبِّت نخيلك وخيلك تراوح
صباحاً مُصَنقِر عشانك يسبِّح
مُفَتِّح مسام الكلام المُنَمْنَمْ عليكي و مُنقَّشْ
يجوِّع شهية الوريد البيَغزل شمس نبضو ليكي
وعليكي بيَقَبِّل يبلل رَقِيبَة صباحو
الصباح البِصبِّح مساهو قياماً عليكي
وليكي السلام الممدد هطولك
يطال البعيد المَدَرْدَرْ سحابو ويَنَتِّحْ
مُوَحوِح يبح المدوزن لهاتو عليكي وطريَّه
ويتاوق ملاوذ وبابك تكيه
يَسارق صباحك بغيمه ونجيمه
تبشِّر بعِيَنْة خريفك
وبَنْزِفْ نزيفك جنينه
وبقيفك
خشوع التهَجُّدْ بقيفك
واطوِّل وقوفك
برتِّل واقيفك
وارتل وارتل وارتل وارتل
: صباحك صباح الصباحاتو صبحن صــــ ....


.............

ياااااااا

ياناس الشغل ده شغل عجيب ،، والأعجب منو لمن تسمع الكلام دا بأداء صاحبو الفنان عماد وأنا بطالب عماد يسجلو بصوتو وينزلو ،، وعلى عشاق الشعر الالحاح على عماد.

أب شيبه السمح

شكرا ..

لكن .. الستره مباريه الفضيحه آخوي ..
أقرا ساكت وادفنه قبلك .. إن عجبك وإن ما عجبك
وهو في النهايه هضربة روح ساكت .


ليك المحبه والإحترام

صباحك عيد
وغناك مجرتق الحروف
ابداعك مدفق
اروينا .. عطر الله سماك
**
كل سنه وانت طيب اخونا عماد
لك التحيه اخونا ابو شيبه
ربنا يحقق كل امانيكم
وفى انتظار سماع هذا الالق الجميل
دمتم وحفظكم الله

الأخت سوما ..

يديك العافيه
شكرا لحلاوة مرورك .. وشبالك المعطر
كتر خيرك كتير


مودتي والإحترام