يايمــــــــه رســــــلى لى عفـــــــــــــوك

شوفى الزمن يايمه ساقنى بعيد خلاص
جرعنى كاس ودرنى واتبهدلت واتعذبت ورنى الخلاص

يايمة يافيض الحنان الماكمل
يايمة يابدرى السبع دايما يهل

يايمة يانور الصباح وقتين يطل
يايمة يابحر الموده وقتين يفيض
يايمة ياشعلة امل زادت وميض

يايمة يانغما حنين بالشوق يرن
اتذكرك يايمة فى الدغش النسايمو يهبهبن
قايمه الصباح متكفكفى شايلى الحليله على المراح
فى الساعة ديك يادوبو ديكنا بدا الصياح
والطير صغاره يغردن
جبتى اللبن بانشراح
كبتيه قلتى اكلوه خير
اتذكرك يايمه فى ساعة الهجير
اتذكرك يابسمة الطفل الغرير
وقت الخلق ترقد تنوم
اسهر براى ع النجوم
والشوق يرن مجيهو فوق لى يحوم
اهتف باسمك فى الخيال
طيفك كمان فوقى جال
اتمنى لو لحظات يدوم
لكن فجاءة القاهو زال

اتذكرك يايمة ساعة الناس يجونا من البلد
ناعم ترابها على جسيماتن رقد
ديمة التمر فوق الهدوم لون الخدار لبد
والشوق عوارف
واتذكرك يايمة والناس قالو قايمين البلد
رصوا الهديمات عدلوا
ركبو اللوارى وقبلو ا
خلونى وحدى بلا انيس كيف انفرادى اتحملوا
شالو السلام من عندى ليك وانشاء الله عندك يوصلوا
يايمة ساعة يوصلوا ويقولوا ليك
وليدك شفناهوا فى بلد الامان
انا حالى يسعدبوا الزمان

يايمة رسلى لى عفوكى ينجينى من جور الزمان [

شكرا يا ود كسلا ،
كان نفسى فى هذه القصيدة كاملة...فشكرا.

وتحية لكل الأمهات ..زوكا عام وألجميع بألف خير.

شكرا يا ود كسلا ،
كان نفسى فى هذه القصيدة كاملة...فشكرا.

وتحية لكل الأمهات ..زوكا عام وألجميع بألف خير.