رسائل الاصدقاء

فى ثناياهانتعرف على الكثير من ملامحنا، اظن الا ضير في ان نتشاركها....

الى عزيزى شبشة ..
كل ما ترحل تترك شوقا كثيرا
وشجنا وغصة
وكوم من عصافير منحشر
فى ضل جناح غيمة وجرح
ما عندو آخر يوصلو
أو حتى عارف أولّو .....
وقبل ما تغيب يا سمح
وراك وطن جارح
مودّر فى التباريح
والتوجّع ...
برغم الفيهو متسامح
هرد كبدك عليهو أسى
ملاك لما اندفق منك
وطلّع روحك الجوة
قبل ما يطلّعك منو
وتد جّوانا لكنو
يا صاحب
خلاص غبت
ولميت حسك المقروش سدر لافوق
مسكت طريق
اقل ما فيهو نار الشوق
واقرب حاجة فيهو الدمعة
والصبر البموت مخنوق
طريق الغربة ضوّالك
وشداّلك رواحل
من شجن راجيك
وكت تسمع غناوى عزيزة
تتذكر عزيز جوّاك
او تفتح رسالة هناك
قبل ما تجيك عبّت من صميم الزول
غزير الدم
وما خلتلو قطرة آهة
فى شريان
ولا تم تم
يرقص فى شجن مفضوح
ويعرض فوق جرح فاتح
وينتح فى وطن كاسح
محل يمشى العرق يمشى
وما عاد من اسف يقدر
بشوش يديك مرة وشى
فلو اعرف
انا اتأخرت فى الجية
ام انك مرقت دغش على منفاك
وخليت الضجيج للطير

ونوم الغفلة للفارش ضميرو
لحاف
وللساكت بعد ما شاف
الا اخير
من القعدة البلا معنى الرحيل
غادى
ومن الشلل الرّخى الاعصاب
نزاع الروح ...
واخير من وقفة الاصنام
حراك لو فرفرة مذبوح
وغير مشوار طويل فى الليل
منو البحمل خطاوى الشوق
وكت برّاحة جوة تنوح
وتعطن فى الاسى المدلوق
غطا الاشجان
وتتمدّد تنوم من بدرى
وتتجدد حبال من ذكرى
فيما كان
وكان ما كان
رجيت محبوبة من غيبها البعيد توصل
تحت راكوبة فى القيف ما رماها تساب
ولا سوالها من ريح باب
رجيتها هناك
وما صديت وكت ما جات
وما صريت هواى فى الفات
جدعتو فدايتى جوة النيل
بس عافرت منو الحيل
وطشيت فى الحزن مجروح
وغنيت حسى كان مبحوح
وكايس للصحاب بلحيل
الاقيهم رهاب فى رهاب
واماشيهم
من الولف الشديد والفال
لحدى الخاطر المفتوح
بلا ابواب
يفوّت حسرة مليون ميل
ويفوّت ضحكة من فد زول
تخش قلب الصحاب وتجول
وتبسط ريدها للاحباب
وما احلى الحبية وكت
تسخى وتغنيلك
وتتقاسم معاك الراى
وحق الشاى
تناديلك حضن دافى
ووكت يبقى الفرح مافى

تهديلك وجودها معاك
وما اقساك يا صاحب
وكت تعبر عبور ذكرى
تكون جوّاى وما ملحوق
قوى ومتضارى بى فكرة
تسوق تمشيبها وين ما تسوق
روح عصفور طليق فى الروح
وسيب للغربة عش الشوق
فلولا فرقة الاحباب
ولا سفرة عزيز ما كان
بنبكى على زمن مشنوق
ولا اتولدت كمان احزان ...
وهيب بكرى
الحاج يوسف
السبت 27/5/2000م

شبوش

أنا جاي


خضر