Post: #1
Title: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: hanadi yousif
Date: 10-29-2005, 03:55 AM
مناشدة الى كل ضمير انسانى
يناشد صوت اللا جئين الناطق باسم اللاجئين المعتصمين فى حديقة صغيرة فى المهندسين قــرب جامع مصطفى محمود كل المنظمات الانسانية التى ليس لهاالا لون الانسان اوشكل الا شكل الانسـان او عرق الا عرق الانسان او دين الا دين الانسان انما هى انسانية بعتة وجدت من اجل الانسان على اختلاف لونه او شكله او عرقة او دينة انما يكفى انة انسان ..
نناشد كـل انسان كرمـة الله بانسانيتة الى التعاضد والتازر معنا فى يوم الاحـــد الموافــــــــــــــــق 30/10/2005م بحديقة البؤساء.....................
يفترش معنا الارض الصلبة التى نفترش ويلتحف السماء التى نلتحف ويقتسم معنا اللقمة الواحد التى تقسم على خمسة افواه وغرفة الماء التى يتقاسمها الصائمون ويصلى معنا ويتوجة الى السماء شاكيا ازمة الانسانية .
يوم مفتوح نحمل فية الاعلام البيضاء لنعلن فية للكل اننا لسنا خارجين عن القانون ولا ضد النظام ولا دعاهـ شغب او دعاهـ تخريب انما نعبر بعتصامنا هذا فى هذه البقعة الصغيرة من الارض عن معانتنا وازمتنا واننا نريد حلا ......ايتها الانسانية..
نعلن بكل طريقة مشروعة عن ازمتنا واننا لم ولن نلجا الى العنف او نجر الى العنف اننا مسالمون مستسلمون سوف نواصل اعتصامنا حاملين الاعلام البيضاء وندعو كل انسان لم يمت فيه الحس الانسانى ان لا يقمض عينية ويصـــم اذنية ويحجر قلبة فى وجة معاناتنا ويقف مكتوف الايدى ازاء ازمتنا .
ندعوه الى يوم مفتوح معنا ، ان يعيش يوم واحد فى عمق ازمتنا على ارض الواقع ويرى اثر اليوم الواحد ليحس ويشعر اثر الايام الطويلة علينا .......
|
Post: #2
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: gamal elsadig
Date: 10-29-2005, 04:06 AM
Parent: #1
هنــــــادي
لك خالص التقدير
ندعوه الى يوم مفتوح معنا ، ان يعيش يوم واحد فى عمق ازمتنا على ارض الواقع ويرى اثر اليوم الواحد ليحس ويشعر اثر الايام الطويلة علينا .......
من على البعد ومن ثنايا القلب نحن معكم ونحس ما يحسه كل مواطن سوداني مازوم وينتظر الخلاص ...
ومن هنا نعلن تضامننا التام معكم
جمال حسين
|
Post: #3
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: A.Razek Althalib
Date: 10-29-2005, 04:08 AM
Parent: #1
| Quote: يوم مفتوح نحمل فية الاعلام البيضاء لنعلن فية للكل اننا لسنا خارجين عن القانون ولا ضد النظام ولا دعاهـ شغب او دعاهـ تخريب انما نعبر بعتصامنا هذا فى هذه البقعة الصغيرة من الارض عن معانتنا وازمتنا واننا نريد حلا ......ايتها الانسانية.. |
نورد الرايات بيضاً...
ونصدرهن حُمراً قد روينا...
عاش..
تضامن نضال..
البلاشفة..
|
Post: #4
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: hanadi yousif
Date: 10-29-2005, 04:43 AM
Parent: #3
جمال
المجد والسلام
ودوما مناصر للحق
|
Post: #5
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: hanadi yousif
Date: 10-29-2005, 04:51 AM
Parent: #4
ابو رزقاء الكوز
الكلام موجه من صوت اللاجئيين للنظام المصري ما تفرح ما لنظام الكيزان السوداني
اقراء البيان كويس .
رئيسكم الفاصحنافي الفضائيات قال حايوطن اللاجئين في السودان . خلو زول يتكلم نيابة عن الرئيس في الفضائيات مثلا .
لكن لو علي انا سنصلبكم عرايا بالمسامير على بوابة التاريخ ثم نعبئ الزاكرة في النسيان ونقول هنا كانت الجبهة الظلامية
اللون الاحمر عامل ليك زقللة
|
Post: #6
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: عبداللطيف خليل محمد على
Date: 10-29-2005, 05:24 AM
Parent: #5
Quote: اللون الاحمر عامل ليك زقللة
|
دي حلوة .. تعليق زول زعلان شديد .. لو كانت بالـ ( غين ) كان طلعت أحلى ..
لكن السؤال يا هنادي يا بتي : الناس ديل مطالبم شنو ؟ يعنى اعادة توطين دي قاصدين بيها انهم عايزين يرجعوا البلد و ما لاقين طريقة ؟ ولا عايزين يهاجروا لبلد تاني ؟
الكلام دي يا بتي عشان نحن نعرف و نتضامن على بصيرة و ما نكون زي البصيرة أم حمد .
راجي ردك و اللون أسود .
|
Post: #12
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: hanadi yousif
Date: 10-29-2005, 09:48 AM
Parent: #6
يا عبد اللطيف ياولدي
شايت وين
ناس الديل هربوا من نار حكومتكم اكتشفو في ناس كيزان قاعدين في مصر الجديدة وعندهم عربات وشقق وعندهم حاجات كتيرة ياولدي ومن الصباح لابسين بدل حتى المساء
مطالب اللاجئين موجودة في المنبر ارجع ليها-عموماهم ما راجعين السودان الا الكيزان يتحاسبو ولو لقيت ليهم في السعودية طريقة يكون عمل خير
ضربك لمثل البصيرة ام حمد غير موفق - كان ممكن تقول لي عشان ما نكون معاكم معاكم ولا شنو رائك؟
معليش ابو رزقاء الكوز اللون الاحمر عامل ليه زغللة دي كيف؟ وانت برضو عامل ليك زغللة ولا شنو؟ بعدين صراعي مع الكيزان طويل ومستعدين نهاتر لما تكمل المهاترة وامتلك من المعلومات عن الكيزان ينفع للكتابة لمدة عشرة سنة قدام -لكن هذا البوست لصوت اللاجئين ولا ليك رائ تاني وعندي كمبيوتر قدامي وموصل- DSL -
|
Post: #8
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: A.Razek Althalib
Date: 10-29-2005, 06:24 AM
Parent: #5
هنادي...
معقولة دي بس...
ما غريبة إنك بترمي التهم جزافاً..
وبالحالة كمان محامية..
طبعاً ده كلو كوم ...
وياهو النضال...
عندكم..
كمان كوم تاني...
طبعاً..
المهم عندكم الغاية تبرر الوسيلة..
حتى ولو كان أرواح الناس البسطاء والأبرياء..
هي وسيلتكم.. لتحقيق غايتكم الفشلتو في تحقيقها..
خاصة وجُهد الوصول إليها عبر عمل الإنقلاب.. المايوي...
وبالعمل الديمقراطي... آخر إنتخابات ديمقراطية الشعب السوداني أداكم تلاته مقاعد مع الرأفة..
هنادي الشيوعية...
تعرفي معني شيوعية ..
ووقعها في العقل الجمعي لشعبنا السوداني..
خاصة ومواقفها الإيدولوجية المنافية لقيمنا الدينية..
والإجتماعية...
ولا دي كمان دايرة ليها شرح ودرس عصر ..
أشرحها ليكي...
طبعاً
| Quote: الكلام موجه من صوت اللاجئيين للنظام المصري ما تفرح ما لنظام الكيزان السوداني |
بالله عليكي قومي كده بلا لاجئين بلا لمة..
لاجئين شنو.. في مصر...
دولة قانونها بيديك حق التملك زيك وزي أي مواطن مصري ممكن تعمل..
ولا إلا ممكن مصر كلها تكون لاجئة...
غريب أمرك وغريبة كيف..
Quote: اقراء البيان كويس .
رئيسكم الفاصحنافي الفضائيات قال حايوطن اللاجئين في السودان . خلو زول يتكلم نيابة عن الرئيس في الفضائيات مثلا . |
تقصدي الرئيس السوداني عمر حسن عمر البشير..
طبعاً رئيسي غصباً عني وعنك...
وبخشم البندقية..
الرفعها ديك..
بس صلاحياتو بتنتهي بعد ست سنوات..
وبندخل دولة المؤسسات..
بعد إنزال إتفاق نيفاشا..
لأرض الواقع...
| Quote: لكن لو علي انا سنصلبكم عرايا بالمسامير على بوابة التاريخ ثم نعبئ الزاكرة في النسيان ونقول هنا كانت الجبهة الظلامية |
بتتحملي منظرنا...
ونحن عرايا...
ومساميرنا بتنقط دم...
على بوابة تاريخنا الوطني..
طبعاً بتطلع ذاكرة دموية...
من المحال نسيان إنو الجبهة لم تصفى فكرياً..
بل دموياً..
| Quote: اللون الاحمر عامل ليك زقللة |
مزعلك اللون الأحمر ده ولا شنو..
ده غايتو وضع يد...
ملك..
| Quote: المحامية هنادي يوسف.. |
المحاسب عبدالرازق عيسى الطالب... 
|
Post: #10
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: hanadi yousif
Date: 10-29-2005, 08:24 AM
Parent: #8
الشينة منكورة
ابو رزقاء الكوز
محاسب وين ؟
محاسب وقاعد 24 ساعة في النت.
(الشيوعية والقيم الدينية والاجتماعية) خطابك قديم لما طالع منو الغبار سبق قلت ليك سعاد الفاتح والكاروري ياخي الناس ديل غيرو خطابهم ولا ما متابع التلفزيون السوداني قادين الناس المساكين بتلفزيونكم وتشاهدوا في الفضائيات اشطر منك . شوف ليك حاجة ثانية
اللاجيئن موجودين في حديقة امام مفوضية اللاجئين تعال مارس هوياتكم اديهم شلوت شلوتين كدة .
يمتلك الكيزان شقق في قردين سيتي والمهندسين ولدينا ارقام الشقق يوم الحساب ومن اين لك هذاقرب ياكوز
اكيد عمر البشير رئسكم دة لازم يجي بانقلاب يعني الشعب السوداني حا يجيبو في انتخابات
انت مسكين ولا شنو؟
|
Post: #16
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: A.Razek Althalib
Date: 10-30-2005, 04:59 AM
Parent: #10
هنادي بت الفضل..
جينا والدنيا قبايل عيد...
وقلتي...
| Quote: ولدينا ارقام الشقق |
وأنا بقول ليكي..
اللهم لا حسادة....
وعشان كده برضو يا هنادي..
بتقولي لي..
ضمير إنساني...
وصوت لاجئين..
ولا زلتي متمسكة بالمعاني والقيم النبيلة...
يا زولة..
دي إنتي طلعتي غايتك أدني من وسيلتك...
شوفت كيف..
طبعاً زعلانة عشان كشفتك..
على الحقيقة...
ما تزعلي..
زمان لامن كنا..
طلاب في مصر...
قلنا أبعدو الحزب الشيوعي عن العمل السياسي المعارض..
قبل ما يقوم يعمل ليهو كم جسم هلامي...
من عينة حركة القوي (حق) والأجنحة المنشقة والمنبثقة..
ونظام السجم والإنقاص ده ...
بالريموت كنترول بيسقط..
لكن ترى الناس الزيك كمان زي خالة العيال تراجي ..
وبقية الناس الطالعة فوق الكفر..
طبعاً بتجيب ليهو ..
عمر مديد..
وبتجلب ليهو مؤيدين..
ومناصرين...
غصباً عن عين أبو أهلهم...
ولا يهمك...
بس خليها حلمة في عضانك..
أنا ما كوز..
وكان أصريتي..
برضو كضباً كاضبة...
موش حاجة غريبة...
|
Post: #7
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: محمد عبد المنعم عمر
Date: 10-29-2005, 05:44 AM
Parent: #1
تعالو ايها الجوعى تعالوا ايها الفقراء
مصطفى ...مصطفى هل تسمعنى...؟؟
نعم نحن فقراء الان اكثر مما مضى
بت الفضل تحياتي ونقف امامكم ولماذ لم يرد مصطفي
|
Post: #9
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: عبداللطيف خليل محمد على
Date: 10-29-2005, 06:31 AM
Parent: #7
| Quote: المحاسب عبدالرازق عيسى الطالب... |
تاني بالأحمر .. يعني جبت سيرة البحر ..
|
Post: #11
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: hanadi yousif
Date: 10-29-2005, 09:29 AM
Parent: #7
محمد عبد المنعم التحيةوالمجد
اطفال الشعب السوداني يموتون بسوء التغزية الجماعة الكيزان ناطيين كل شوية القاهرة للعلاج من التخمة
يوم الحساب
|
Post: #14
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: خضر حسين خليل
Date: 10-29-2005, 02:19 PM
Parent: #1
هنادي
تحياتي
نضم صوتنا لصوت الاجئين السودانيين
الحكومة المصرية مطالبة بوضع حد
لهذا السخف
هنادي
أرجواأن تنتبهي من محاولات الباشبوزق الجدد ( أبو رزقة ومن لف لفه)
وليبقي هذا البوست فقط من أجل صوت الاجئين .
أما الحديث عن الحزب الشيوعي والذي في تقديري المادة الدسمة والتي
بالتالي بدونها لامعني لوجود ( الباشبوزق وأبو رزقة في مقدمتهم)
فلهم أن يواصلوا في حربهم المقدسة ضد هذا العطاء .
دمت هنادي
خضر
|
Post: #15
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: عبداللطيف خليل محمد على
Date: 10-29-2005, 03:35 PM
Parent: #14
الأستاذة هنادي
حين أتيت مسترشدا بمثل الحاجة ( البصيرة أم حمد ) ما قصدت المعنى الحقيقي المراد على سبيل المثال المتداول و الذى ظلمنا فيه هذه الانسانة كثيرا ؛ حيث يقال أن الحدث قد ذكر في سبيل ( النكتة ) و أصبحت البصيرة أم حمد من المفترى عليهن في التأريخ . و حين جاء ذكرها في تعليقي السابق أيضا كان في سبيل ( التنكيت ) ذو ( الشترة ) العرجاء المقصودة حتى يأتي التعليق ممزوجا بالمزاح . و المزاح لا يقلل من شأن الموضوع أو الحدث أو التعليق و ذلك حتى لا يكون المنبر أو ( البوست ) جافا و غليظ . هذا هو القصد
.. و لا أكثر ..
أما :
Quote: شايت وين
ناس الديل هربوا من نار حكومتكم اكتشفو في ناس كيزان قاعدين في مصر الجديدة وعندهم عربات وشقق وعندهم حاجات كتيرة ياولدي ومن الصباح لابسين بدل حتى المساء
|
أنا ( شايت ) في اتجاه المرمى الشعبي المقصود ديمقراطيا من نقطة (جزاء) الكيزان.
و ألفت إنتباه الأستاذة هنادي الى أن ( سلاح ) الرمي في سلة الكيزان لكل رأي مخالف قد فات أوانه و ولى و لم يعد يخف أحدا الا اذا كان في الضالين . فالرجاء عدم رفع عصاة الكوزنة في وجوه الناس لأن ذلك يعد سبا ان لم يثبت .
أما ما عرفته عن وضع أولئك النفر ؛ فهم شلل و جماعات كانت تتبع للذين عارضوا النظام من فنادق القاهرة و منتجعات شرم الشيخ الجميلة ؛ فالسادة القادة المعارضون عادوا أدراجهم الى حيث ظلال الكيزان في الوزارات و مكاتب الدولة و برلمانها المعين ؛ و صاروا جزءا أساسيا في ما كنا ننعته بحكومة الجيهة ؛ آثروا الوزارة و قسمة السلطة و نسوا جيوش ( التابعين ) الذين لاقوا هذا المصير المخزي ؛ و تنكروا لهم حين أصبح الخيار السلطة أم ( عطالة ) القاهرة ؛ فتسابقت تنظيمات التجمع واحدا تلو الآخر لحجز مكان وثير في قطار الكيزان .
أصبحت كل ( قوى المعارضة ) جزءا من نظام الحكم و وقعت في الفخ الكيزاني المرسوم لها وهنا ضاعت حقوق الناس جميعا؛ من كانوا ( جيوشا ) و من كانوا ( حاشية ) و من كانوا يرفعون لواء عودة الفتح المبين و ( سلم سلاحك ) .
كلنا يا هنادي ضعنا في جاه السلطة؛ حتى أنت ؛ الآن عداد الضائعين .
و أقول لك : و أحسب انه قد يفوت عليك : سيسكت التجمع و تنظيماته عن كل شعارات الفترة
من يونيو 1989 حتى تاريخه و لن يقول بها أحد : المسامح كريم : هذا هو شعار مرحلة الزواج الكيزانى - التجمعي . سيسكت كل القادة السياسيون و النقابيون و العسكريون و غيرهم من طوائف قادتنا الكثر الميامين .
و بهذا ( راحت الشعارات ) و رحنا نحن جميعا ( شمار في مرقة ) و فينا الكثير من يأسف و يعض أصبع الندم على الفترة التى قضاها في صفوف اولئك المتنكرون .
تحياتي لك بقدر وقوفك الشجاع حتى الآن و أنت ترفعين شعار الرفض و المحاسبة ؛ و عبرك أعتذر بشدة لأمنا البصيرة أم حمد التى ظلمها زيف التاريخ كما ظلمنا قادتنا .
كل سنة و الجميع بخير .
|
Post: #17
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: hanadi yousif
Date: 10-30-2005, 06:13 AM
Parent: #15
الاخ/ عبد اللطيف
اعتزر لك بشدة ان فهمت اني وصمتك بالعار وهو الانتماء للكيزان وانا لم ارميك بهذه التهمة.
النفر الذين تتحدث عنهم هم لاجئين بكل ما تحمل كلمة لجوء من معني قانوني وانساني وصدقني يعشون مأساة حقيقية
صدقني انا امتلك قدرة على التعرف على الكيزان لدرجة قد لا تتخيلها فمن يهين والدك ومن يتربص بك وبي اهلك واصدقائك وابناء وطنك اكيد لديك القدرة على عرفته وان لبس ثوب الجن وهم كائنات متفصخة تشتم رائحتها من خلال الانترنيت.
بخصوص التجمع موضوع محتاج لنقاش قد اختلف معك في جزء واتفق معك على جزء ارجو اننفتح النقاش حول هذا المموضوع المهم في بوست اخر عزرا البوست لمناقشة قضايا اللاجئين
عفوا لكثرت ما اعدت على التعامل بجدية في كل الامور فقدت الحس في التعامل مع النكتة والمزاح.
فلك العتبة
بت الفضل
|
Post: #18
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: hanadi yousif
Date: 10-30-2005, 06:22 AM
Parent: #14
خضر حسين
لك المجد
فليبقى هذا البوست لصوت اللاجئن
دمتم
بت الفضل
|
Post: #20
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: hanadi yousif
Date: 10-30-2005, 06:35 AM
Parent: #19
النسر
التحية والمجد
اشكرك على الاضافة المحترمة
|
Post: #21
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: النسر
Date: 10-30-2005, 07:00 AM
Parent: #20
على الرغم من أن قرار المفوضية الذى تم |صداره فى الأول من يونيو الماضى 2004 وتم تمديده حتى يونيو القادم 2005 يسمح بتسجيل كافة ملتمسى اللجوء من السودانيين ومنحهم البطاقة الصفراء، إلا أن القرار يتجاهل أعداد كبيرة من السودانيين الحاصلين على البطاقة الزرقاء (بطاقة اللاجئ) وينتظرون مقابلات إعادة التوطين أو إضافة أحد أفراد الأسرة إلى بطاقاتهم وهى عملية باتت تمر ببطئ شديد جداً منذ يوليو الماضى وهو ما يتسبب فى مشكلات لأعداد كبيرة من اللاجئين الذين يشعرون بأن وضعهم معلق فى ظل عدم وجود فرص حقيقية فى مصر تسمح لهم ببناء حياة جديدة، وتزداد الأمور صعوبة بشكل خاص بالنسبة للنساء والاطفال والمسنين.
|
Post: #22
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: خالد عويس
Date: 10-30-2005, 07:23 AM
Parent: #21
معكم إلى نهاية هذا الطريق
|
Post: #23
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: hanadi yousif
Date: 10-31-2005, 03:27 AM
Parent: #22
النسر
التحية
اضف الى ذلك ان هناك تمييذ بين اللاجئين السودلنين ولاجئين مت اجناس اخرى
|
Post: #24
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: hanadi yousif
Date: 10-31-2005, 03:31 AM
Parent: #23
الاستاذ/ خالد عويس
لك التحية والاحترام
|
Post: #25
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: محمد عبد المنعم عمر
Date: 11-01-2005, 12:37 PM
Parent: #1
بت الفضل لكي التحيه
اليوم هناك مشاكل مع اللاجئين من طرف الحكومه المصريه
ولنا عوده
|
Post: #26
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: حاتم الياس
Date: 11-01-2005, 01:31 PM
Parent: #25
بلاشك نعلن تضامننا معهم ونتمنى أن يعود لهم الوعى بأهمية العوده لمباشرة دورهم النضالى الحقيقى على ارض الواقع وليس بموهبة الكى بورد واجندة المانحين ..الكثير يلصق بعض الملابسات للحزب الشيوعى السودانى فهو شماعه مريحه لأختصار أسئلة صعبة ومكان حسب ظنهم لأخفاء عورات وقبح الحاضر الحاضر الذى يمثلهم وأخرون بكر ايضاً يعتقدون فى ان مواقف الحزب ضد نظام الجبهة وسقفه النضالى المتسع يمكن ان يمتد الى مجال أبعد يمس الكرامة الوطنية ويجعله يصمت أزاء أوضاع مخزيه فقط لأنها تحرج النظام أو يمكن ان يكسب بها معركه سياسية....
ان الحزب الشيوعى السودانى وضعوا تحت سودانى ألف خط كان دائماً ضد المتاجره بمعاناة الشعب السودانى وكان دائماً ضد الحلول الذاتية الفرديه منطلقاً من أحساس جماعى لايتجزأ
وهو ليس حزب رخيص ولايطلب من منسوبيه ان يكونوا رخيصين ولديه رؤية سياسية ونضاليه واضحة المعالم قالها عبد الخالق وهو يصعد المشنقه حين سألوه ماذا قدمت لشعبك فقال (الوعى) ولم يشجع الحزب فى يوم من الأيام و(كضاااااااااب) أى واحد يجى يقول بأنو شجع السودانين على الهجره وقال ليهم (فزوا) أو أنه يشجع التسول أمام مفوضيات الأمم المتحده
الحوار فى هذا البوست يحاول ان يزج بالحزب الشيوعى ساكت..ويعلنه فى أحد الجوانب دون فهم ..للحزب رؤيته وفهمه قى ذلك كان مامن ممارسته من بياناته ووثائقه والماعارف يمشى يقرأ والماعارف أكتر يركب حافلات الثوره بالنص من الشهداء ويمشى سوق خليفه بيلقى محجوب شريف مغبر معفر قاعد فى مشروعو الكبير (هكر) ويسألو لماذا رفضت دعم منظمات أجنبية تسابقت لدعم هكر.......
أحمر أو أخضر او برتفالى لكنه يبقى الضمير الأنيق لشعبنا لأنه ينطلق من ثوابته وأهم توابته عدم الزج بالكرامة الوطنية فى (حتات ضيقه)
|
Post: #27
Title: Re: مناشدة لكل ضمير إنساني/ صوت آللاجئين / اميمة الفرجوني وهنادي فضل
Author: ابنوس
Date: 11-01-2005, 07:06 PM
Parent: #26
العزيزة هنادي بت فضل
وعبرك لكل لاجئ القاهرة ، الذين شردتهم سلطة الانقاذ ، وسكت عن قضيتهم التجمع ومولاه .
وأفترشوا الارض المبلولة ، وتنكرت لهم مفوضية اللاجئين .
نعلن تضامننا معكم . وندعوا كل السودان ليقف معكم في وضعكم الحالي ونحمل معكم الاعلام البيضاء .. والزرقاء من أجل حل عادل لقضية اللاجئين السودانيين .
|
|