Post: #1 Title: سامي عبد الوهاب..وباقي المريخاب..تعالوا كبّوا الجرسة يا شباب.. Author: عمر الفاروق Date: 10-24-2005, 01:36 AM Parent: #0
إتعودنا بعد كل نهاية بطولة محلية يكون الهلال والمريخ طرفاً فيها إنو الغلبة تكون للهلال على الدوام !!!!!! وإتعودنا طولة لسان المريخاب قبل كل مباراة .. المريخابي يمرق لسانو مترين ويجعجع جعجعة مباااااااااااااااالغة ... مزمل أبو القاسم يشيل وينفخ فيهم وهم يشيلوا ويعملوا كوبي بيست Copy Paste ويجوا يعملوا لينا الدوشة بي هنا.. المريخ فريق الفرصة الواحدة !!!! المريخ يحب المغامرات !!!!!! المريخ فريق البطولات يعشق الفوز فقط !!!!! المريخ حتى إن لم يدخل ولا بفرصة سيكون الفوز من نصيبه !!! المريخ ...المريخ ...المريخ ..
والله يا جماعة انا ما شفت لي طولة لسان في الفارغة ومقدودة قدر حقت ناس المريخ ديل !!! وعشان تتأكدوا من كلامي ده أقروا كلام مزمل الليلة ..أنا لسة ما قريتو لكن أتحداكم مزمل حا يكتب عن المريخ ما لم يكتبه مالك في الخمر !!! والما عارف نتيجة المباراة وحسم الدوري حا يحلف ستين يمين إنو الفاز بي البطولة فريق المريخ !!!!!
سامي يا أخوي تعال أكتب لينا الموشح بتاع كل مرة عن عظمة النجمة ونحن في المريخ إخوة ومهما حصل يا نجمة السعد نحبك !!! تعالوا أبكوا وإتجرسوا وأفرشوا هنا في البوست ده !!!! تعالوا أنفخوا روحكم النفخة الكدابة وأدونا إحساس إنو الهلال ده فريق تعبااااااان والمريخ هو سيد الساحة !!!! تعالوا يا مريخاب إتفاخروا بي نجمتكم هنا !!!! تعالوا يا مريخاب طلعوا العجب أفضل لاعب في السودان هنا !!!! تعالوا يا مريخاب أقنعونا إنو السعودي منقطة !!!! تعالوا يا مريخاب بي هنا وقولوا الهلال ما عمل أي إنجاز !!! كيجا وعباس وسامي ثابت وووووووو كلللللللللللكم تعالوا عزّوا بي جاي !!!!
تخريمة : الهلال فريق الأحلام لم يهزم ولمدة موسمين متتاليين دورياً في سابقة عالمية لن ينافسه فيها إلا تشلسي هذا إن فعلها !!!!!!!! الهلال فريق الأحلام ورونا أخر مرة غلبتوهو دورياً بتين يا نااااااااااااااس ؟؟؟؟؟؟؟ الهلال فريق الأحلام يحسم الدوري للمرة التالتة على التوالي والبون إتسع بين الهلال والمريخ في عدد بطولات الدوري الممتاز !!!!!!! تعالوا يا مريخاب أبكوا هنا !!!!!!!!!
هاك نجمة السعد دي!!!!
Post: #2 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: ALGARADABI Date: 10-24-2005, 02:34 AM Parent: #1
العريس عمر تحياتى وألف مبروك اخر مرة انتصر فيها المريخ على الهلال دوريا كان عام2001 و هذا للعلم يلا خليهم يعيشو على أمل 2006
Post: #3 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: عمر عبد الخالق سعيد Date: 10-24-2005, 02:42 AM Parent: #1
فوق ......... فوق مريــــــــــــــــــــــــخنا فــــــوق
Post: #4 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: abuguta Date: 10-24-2005, 03:02 AM Parent: #3
عمر الهلال امس كان تعبان المريخ قمة هيثم مصطفى قرفان العجب همة سعد المصرى هيمان ركاردو ضلمة
ها ها ها ها عمر والله انا مبسوط للمزيع كل ما يقول هلال المليون ومبسوط اكثر للمريخاب الكانو حاضرين معاى..من زعلتهم كل ما يقلو جيبو العشا اقول ليهم بعد المبارة ما تنهى عارف ليه عشان العشا حقنا كان بسيط هههههههههههههههه والله امس ضربت جنس ضرب ..ياريت لو كنت معاى ولقدام
Post: #6 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: humida Date: 10-24-2005, 03:17 AM Parent: #4
Post: #5 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: عمر الفاروق Date: 10-24-2005, 03:13 AM Parent: #1
القرضابي:
Quote: اخر مرة انتصر فيها المريخ على الهلال دوريا كان عام2001 و هذا للعلم يلا خليهم يعيشو على أمل 2006
ياخ يا قرضابي من 2001 ؟؟؟؟؟ معقولة ؟؟؟؟؟
ياخ 2001 دي ناس الجمارك بقوا ما بيدخلوا عرباتا !!!!!! يعني أسة بيكون في شافع عمرو خمممممممممسة سنة ما حضر كورة للمريخ دورية فاز فيها على الهلال!!!!؟؟ يعني الجيل العمرو خمسة سنة ده كلللللللللو بيشجع الهلال ؟؟؟؟
Post: #7 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: عمر الفاروق Date: 10-24-2005, 03:19 AM Parent: #1
عمر عبد الخالق:
Quote: فوق ......... فوق مريــــــــــــــــــــــــخنا فــــــوق
يا مريخاب قلنا ليكم البوست ده بوست تعزية ليكم وبيت الفراش حقكم عشان كده مفروض تجي تقول : ووووووووووووب ...ووووووووووووووووب ..مريخنا وووووووووووووووووب..
Post: #8 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: سامى عبد الوهاب مكى Date: 10-24-2005, 03:36 AM Parent: #1
ود الفاروق مبروك الفوز غير المستحق..
عليك الله فرحان..
برضو مبروك..
ونحن مريخ احسن من ده ماعايزين..
والرمله الدقاااقة قدام.
خلينى هسى عندى شكلة.
Post: #9 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: عمر الفاروق Date: 10-24-2005, 03:37 AM Parent: #1
أبقوتة :
هلالنا عظيم من زمن دريسة ... كورتو الراقية جملية حديثة .. ( تنطق حديسة لزوم القافية وكده ) هموا الدوري كاساتو نفيثة ... مش زي مريخ كاساتو مريسة ... في يوم القمة عملوا دسيسة .. وجوة الملعب فكوا كديسة ... مرمطناكم بشتناكم دكيناكم بقيتوا هريسة .. كاسرين عينكم زي عروسا يوم الدخلة تلاقي عريسا...
والله يا أبقوتة بختك سحورك أمبارح ألف وبطنك متممممممممممبلة !!! شفت بالله كيف نغمة هلال الملايييين دي ؟؟؟؟ بالله أسة الشوالي بيقدر يقول مريخ الملايييين ؟؟؟عوووووووووووع .. وبرضو نقول : ميااااااو ..ميااااااااااو ..ميااااااااو
Post: #10 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: tmbis Date: 10-24-2005, 03:44 AM Parent: #9
عمر .. بلاي فسح لي الكديسه دي معاك بجي بشيله بعدين بعد الفطور ..
Post: #11 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: عمر الفاروق Date: 10-24-2005, 03:49 AM Parent: #1
يا حميدة أخوي: ناس المريخ ديل في المباريات الودية ما عندهم عوجة ناس درع الإنقاذ وكاس وزارة التخطيط ودورة الخرطوم عاصمة الثقافة دي ما عندهم فيها مشكلة وما بتحتاج لي فار زاتو !!! لكن بطولات الرجال دي إلا بي الكدايس !!!! الجماعة ديل لو لاقيناهم في نهائي أفريقيا بيجيبو لينا نمر عديييييييييييييل .. تخريمة : هاك باقيرا ده ..
Post: #12 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: معتصم دفع الله Date: 10-24-2005, 05:01 AM Parent: #11
Quote: ناس المريخ ديل في المباريات الودية ما عندهم عوجة ناس درع الإنقاذ وكاس وزارة التخطيط ودورة الخرطوم عاصمة الثقافة دي ما عندهم فيها مشكلة وما بتحتاج لي فار زاتو !!!
يا عمك إنت ناس المريخ ديل مؤتمر وطني ؟..
Quote: لكن بطولات الرجال دي إلا بي الكدايس !!!! الجماعة ديل لو لاقيناهم في نهائي أفريقيا بيجيبو لينا نمر عديييييييييييييل ..
الشئ البعرفو يا عمك إنو التمثيل الخارجي دا لأبطال الدوري .. الجماعة ديل إلا يدوها ليهم بي تحت تحت ساي ..
يا كدايس تعاينن مرقتنو مريخي ..
Post: #13 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: waleedi399 Date: 10-24-2005, 05:44 AM Parent: #12
ود الفاروق
رمضان كريم .. وحمد لله الف على السلامة
في اول مداخلة .. وجميل ان تكون اول مداخلة
في هذه المناسبة العظيمة لفريق عظيم هي فوز الهلال العيظم
بس يا أخوي تعال دور معاي .. انا رجليني فترت
الجماعة ديل فارشين وووووووووووووين؟؟
يعني كابين الجرسة في ياتو خيمة
البركة فيكم!!
Post: #15 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: Rakoba Date: 10-24-2005, 06:07 AM Parent: #11
Quote: الجماعة ديل لو لاقيناهم في نهائي أفريقيا بيجيبو لينا نمر عديييييييييييييل
بدون نمور ولا حتى عصافير لم يفتح الله عليكم بكأس دولي حتى الآن، يمكن لما تظهر النمور في نهائي قاري تساعدكم!!! مين عارف؟!
Post: #14 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: سامى عبد الوهاب مكى Date: 10-24-2005, 05:57 AM Parent: #1
: بُرة تعالى برة!! :- لا .. لا أبيت ما بجى!! : برة البرير قال ليك تعالى!! :- لا .. لا والله ما بجى!! :يا برة عطلت الكورة .. يا برة سحرت المقصورة.. عليك الله أمرقى!! :-لا.. قلت ليكم لا كان جاء ود الياس ذاتو ما بجى...أنا أدخل وأطلع بمزاجى ... مش جايبنى فى شوال؟ وحات الله أوريكم المغسة وشغل الكدسة والمكشن بلا بصلة.. وان قعدتو للصباح مافى قوون بخش.. وجوة استادكم أنا ستكم!! ______________________________
او كما قال دكتور ..معاويه دفع الله
Post: #16 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: زول ساكت Date: 10-24-2005, 07:04 AM Parent: #14
ياعمر ياخي جرسة شنو الفارق نقطتين بس دا براهو انجاز يستحق ان يحتفلوا به ولا شنو
Post: #17 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: عمر الفاروق Date: 10-24-2005, 12:59 PM Parent: #1
سامي يا ود عبد الوهاب : بيعجبني في الزول العندو عزاء ومتصبر ولسة عندو إمكانية يهظر ويضحك مع ضيوفو !!!! إنت أظنو الفقيد المريخ ده ما عزيز عليك ولا ما وجيع شديد مش؟؟
Quote: ونحن مريخ احسن من ده ماعايزين..
وإنتو مريخ أكتر من كده زااااتو ما بتلقوهو !!!
Quote: والرمله الدقاااقة قدام.
يا أخوي هي فضل فيها رملة ؟؟؟؟ الرملة دي خليناها لي كديستكم دي عشان بعد تعمل عملتها تديها تفحيطة خلفية بي كرعينا عشان تداري ال ...... مش هي برضو عملت دينموز هراري جوة الملعب حسب الكجور المتفق عليهو ؟؟؟
Post: #18 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: عمر الفاروق Date: 10-25-2005, 01:01 AM Parent: #1
تمبس أخوي:
Quote: عمر .. بلاي فسح لي الكديسه دي معاك بجي بشيله بعدين بعد الفطور ..
ياخ انا راجييك لحدي وقت السحور ما جيت شلت كديستك دي مالك !!! يا تمبس ما تجنني وتقووم لي باقي كدايسي الفي راسي ديل !!!! إ،ت متأكد إنو دي كديسة ؟؟؟؟ انا شاكّي تكون دي نمر من نمور عهد الإنقاذ بس كششششششششت ... مياااااو ..ميااااو ..مياااااو
Post: #19 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: abas Date: 10-25-2005, 01:34 AM Parent: #1
ود الفاروق
رمضان كريم .. وحمد لله الف على السلامة
في اول مداخلة .. وجميل ان تكون اول مداخلة
في هذه المناسبة العظيمة لفريق عظيم هي فوز الهلال العيظم
بس يا أخوي تعال دور معاي .. انا رجليني فترت
الجماعة ديل فارشين وووووووووووووين؟؟
يعني كابين الجرسة في ياتو خيمة
البركة فيكم!!
والله بالجد عجبتني ظهورك هنا
وعجبني فوز الهلال بالدوري
ازيك يا ود العمده
Post: #20 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: sheba Date: 10-25-2005, 01:58 AM Parent: #1
جميل جداهذا المريخ البطل غير المتوج كما قال الشوالى
Post: #25 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: زول ساكت Date: 10-25-2005, 04:56 AM Parent: #20
Quote: كما قال الشوالى
رضي الله عنه بسند ضعيف
Post: #21 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: عمر الفاروق Date: 10-25-2005, 02:11 AM Parent: #1
معتصم دفع الله : ده شنو يا شفيف ؟؟؟؟ إنت أمبارح بايتة معاك ولا حاجة ؟؟؟؟ ياخ دي والله تعاليق زول ما نصيييييييييح !!! تعرف انا بضحك فيها من أمبارح !!! والله تعاليق تستاهل تتكتب في عمود كبد الحقيقة (أخر الحقائق)
Quote: يا عمك إنت ناس المريخ ديل مؤتمر وطني ؟..
تقول شنو يا قريبك الناس ديل من شالوا الكاس سنة 89 وبقوا كيزان !!!!
Quote: الشئ البعرفو يا عمك إنو التمثيل الخارجي دا لأبطال الدوري .. الجماعة ديل إلا يدوها ليهم بي تحت تحت ساي
Quote: يا كدايس تعاينن مرقتنو مريخي ..
Post: #22 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: عمر عبد الخالق سعيد Date: 10-25-2005, 02:49 AM Parent: #1
و برضو فـــــــــــــــــــ فوق ـــــــــــــــــــــــــــــــــــــــوق
Post: #23 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: عمر الفاروق Date: 10-25-2005, 03:09 AM Parent: #22
Post: #24 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: haleem Date: 10-25-2005, 04:49 AM Parent: #1
Quote: اكد خبير التحكيم النعيم سليمان صحة ركلة الجزاء التي لم يحتسبها الحكم بدرالدين عبد القادر لصالح الهلال في مباراة الديربي امس الاول وقال: ان عرقلة حمودة بشير كانت واضحة من الخلف وهي مخالفة مباشرة ولا تحتاج لهذه النظرة كما فعل الحكم المذكور .. وما اقدم عليه يعد ظلما لا يمكن القول بعده انه قاد المباراة لبر الامان كما ذكر البعض .. وكانت الخطورة كبيرة اذا ما احرز المريخ هدفا ولكن التعادل حفظ الكثير. ونبه الخبير الي خطورة اخطاء الحكام وتأثيرهم علي نتائج المباريات مما يتطلب الحيطة والحذر والمعالجة من المسؤولين بلجنة التحكيم المركزية.
نقلا عن الكابتن
Post: #26 Title: Re: سامي عبد الوهاب..وباقي المريخاب..تعالوا كبّوا الجرسة يا شباب.. Author: عمر الفاروق Date: 10-26-2005, 01:02 PM Parent: #1
العزاء الوحيد الذي لن ينتهي بإنتهاء مراسم الدفن هو عزاء المريخاب .. بجيكم إن شاء الله
