دا كلام عجيب

طيب يالأخو..طول بالك وأقرآ الكلام دا للنهاية...لأنو من الحاجات البتخليك تتفكر في قوة منطق القرآن وحجته البالغة...يعني كلام كلو واحد زايد واحد يساوي اتنين...كدي شوفو معاي الآيات دي من سورة الاسراء

(وَقَالُوا لَنْ نُؤْمِنَ لَكَ حَتَّى تَفْجُرَ لَنَا مِنَ الْأَرْضِ يَنْبُوعًا)

طيب دا مطلب من الكفار..قالوا دايرين الرسول يفجر ليهم ينبوع عشان اقتنعوا....

(أَوْ تَكُونَ لَكَ جَنَّةٌ مِنْ نَخِيلٍ وَعِنَبٍ فَتُفَجِّرَ الْأَنْهَارَ خِلَالَهَا تَفْجِيرًا)


ولا كمان تكون عندك حديقة أساسية نخيل وعنب وكدا والأنهارجارية في نصها...يعني روضة في غاية الجمال

(أَوْ تُسْقِطَ السَّمَاءَ كَمَا زَعَمْتَ عَلَيْنَا كِسَفًا أَوْ تَأْتِيَ بِاللَّهِ وَالْمَلَائِكَةِ قَبِيلًا)


وكان أبيت كمان..خلاص نزل السماء علينا حتة حتة أو أنزل ربك والملائكة علينا

...كلو كوم والآية الجاية دي كوم براهو

(أَوْ يَكُونَ لَكَ بَيْتٌ مِنْ زُخْرُفٍ أَوْ تَرْقَى فِي السَّمَاءِ وَلَنْ نُؤْمِنَ لِرُقِيِّكَ حَتَّى تُنَزِّلَ عَلَيْنَا كِتَابًا نَقْرَؤُهُ قُلْ سُبْحَانَ رَبِّي هَلْ كُنْتُ إِلَّا بَشَرًا رَسُولًا)


ولا يكون عندك بيت من زخرف ولا تطلع في السما عديل كدا...وحتي لو طلعت قدامنا عديل كدا ما حانقتنع الا تجي نازل ومعاك كتاب نقراهو

يعني باختصار كدا أنحنا ماحانقتنع مهما عملت...يالا تعال شوف حكمة ربنا سبحانه وتعالي في القرآن والتحليل المنطقي في الآية الجاية دي

(وَمَا مَنَعَ النَّاسَ أَنْ يُؤْمِنُوا إِذْ جَاءَهُمُ الْهُدَى إِلَّا أَنْ قَالُوا أَبَعَثَ اللَّهُ بَشَرًا رَسُولًا)


يعني ربنا سبحانه وتعالي عارف الناس ماحاتقتنع لما يجيهم بشر زيهم ودا للاحساس الانساني بالندية ودي حاجة جوة أي انسان...يعني مثال بسيط لو في واحد كانت عنده وجهة نظر في أي موضوع مهما كانت مقنعة كثير من الناس بتلقاهم بعاينو من زاوية الحاجة الغلط في كلام الزول دا وين

طيب تعال شوف قمة الاقناع في الآية دي..ووالله العظيم لو في أي انسان في لحظة صفاء مع نفسه مامكن تمر عليه الحجة دي بدون ما يؤمن انه القرآن منزل من فوق سبع سماوات من رب بالغ الحجة وفي قمة الرحمة والرغبة في هداية عباده

(قُلْ لَوْ كَانَ فِي الْأَرْضِ مَلَائِكَةٌ يَمْشُونَ مُطْمَئِنِّينَ لَنَزَّلْنَا عَلَيْهِمْ مِنَ السَّمَاءِ مَلَكًا رَسُولًا)


دا كلام عجيب..يعني الأرض دي لو كان فيها ملائكة ماشين زيهم زيكم كان رسلنا ليهم ملك عشان يعرف اتفاهم معاهم...تخيلو لو كان المرسل ملك..كان الناس ألّهته وقامت بعبادته بدل الله..يعني ياجماعة الكلام كلو واضح وبسيط ومامحتاج حكة راس

لمن نتلاقا مع آية أخري وليكم فائق الشكر علي مواصلة القرآءة

فوووق يا بن خالتي

من الآيات العظيمة جدا وذات الدلالات البالغة علي عمق المعرفة اللتي لا تترتب الا لخالق يعلم السر وأخفي هي آية تطور الجنين داخل الرحم....وذلك للسرد البليغ والتفصيل الدقائقي لهذه الخباياو ياالللللللللللللللللله يالجمال اللغة وفصاحتها.......نقول بسم الله

قل الله تعالي

( ولقد خلقنا الإنسان من سلالة من طين )

( ثم جعلناه نطفة فى قرار مكين )

ولو لاحظت لوصف الرحم بالقرار المكين..يعني مستودع حصين ولحدي هنا الكلام كلو في الظاهر للعين الي قوله تعالي

( ثم خلقنا النطفة علقة فخلقنا العلقة مضغة فخلقنا المضغة عظاما فكسونا العظام لحما ثم أنشأناه خلقا آخر فتبارك الله أحسن الخالقين )

يتتابع السرد الدقيق لمراحل تكون الجنين بدقة متناهية أعجزت أطباء التشريح وأذهلت كل من له علاقة بهذا العلم أن يتم هذا الوصف قبل ١٤قرنا من الزمان...لاحظ نطفة فعلقة فمضغة فعظام فكسونا العظام لحما...سبحان الله دا كلام عجيب

ياجماعة القرآن دا لو الواحد قراهو برواقة وفهم وختا الكورا واطة لتخلل الايمان خلاياه واحدة واحدة...ملحوظة الرجاء البحث عن مراحل تطور الجنين في الطب الحديث عشان تآمنوا