Post: #1
Title: كانت جـدة حقاً غـيـر... رسالة من تحت الماء
Author: waleedi399
Date: 10-23-2005, 04:46 AM
الزمان : 30/9/2005م، يوماً سطر على سجل تاريخي الخاص، ولن ينسـى ....
المكان : جدة بلد الرخاء والشدة وغسيل العدة كمان  بوابة الملتقى، وجسر العبور إلى البر الأمان إلى حين...
مهندسو خارطة الطريق: الحبيب / مزمل محمد احمد الهادي وشقيقي المهندس عثمان احمد عبد الله له الود والحب والاحترام،،
الموضوع : (عطلة نهاية مشوار صيف طويل جاف وبداية عهـد جديد وبواكير مواسم سعادة وغبطه خريفية تمطر بالشهد والعسل وتبشر بالأفراح)
هذا البوست بمثابة مهرجان امتداد لمواسم (تكسير التلج .. بس المرة دي ما برآآآي) تمتد مساحاته من الرياض وحتى جدة عبر هضاب وتضاريس المملكة الوعرة والشاهقة العلو ... متخطياً الحواجز والمسافات إلى أرض سوداننا الحبيب .. وبالعكس
فريق المناوبة في الاستقبال والحفاوة والكرم الحاتمي (بورداب جدة) ممثلين في :
جمال السنوسي (الحاضر الغائب، صاحب المواهب المتعددة).. صديق رحمة (حاتم الجداوي، على وزن حاتم الطائي) .. لؤي شمت (بوردابي مشترك ومتنقل، اللطيف الخلوق طيب المعشر) .. أساسي (عميد البورداب والمدير المتوج حديثاً حضور متواصل رغم المشاغل والمهام الكثيرة.. طبعاً فاكيها فينا ).. شرير البرتقالة (الرجل الجنتل الذي بخل علينا بالرؤيا لأكثر من مرة).. مهيد (سودانيات صاحب الابتسامة التي لا تفارق شفتاه ومهندس العلاقات العامة وعمدة جدة على وزن عمدة واشنطن)....
الشكر والتقدير والاحترام لكم جميعاً، على الدعوات المتكررة لنا وحرمنا المصون ... والعاقبة عندكم في المسرات ، كذلك أجزل شكري للأخ جمال السنوسي لدعوة الإفطار الرمضاني واليوم الجميل الذي قضيناهو معه في رحاب داره العامرة متنقلين بين منزله والمتنزهات القابعة على كورنيش جدة .
كذلك الإخوان صديق رحمة ولؤي شمت، أساسي وشرير البرتقالة ومن خارج المنبر أخي الشقيق/ عمر احمد والأخ / أسامة محمد عثمان والأخ فايز وكذلك الحبيب اللذيذ/ أيهاب حسن عبد العزيز وأسرته الكريمة على الدعوات الجماعية والمنفردة بالإضافة للزيارات واتصالاتكم المستمرة والمتكررة والاهتمام والحفاوة البالغة منقطعة النظير، والتي غمرتمونا بها طوال تلك الفترة التي قضيناها بدياركم العامرة التي كانت تمور كالمرجل في حركة دءوبة لا تتوقف تنبأ عن كرم ضيافة أهل ذلك الديار ....
كما أخص بالتقدير والشكر الوفير كذلك كل الأخوة الذين شاركوني مواسم السعادة والفرح سواء بالحضور أو المهاتفة عبر وسائل الاتصال المختلفة، بورداب الخرطوم وعلى رأسهم الأخ حسين ملاسي الذي كان حضوراً كما لم يتوانى أن يتفضل علينا بالاتصال مهنئاً وكذلك الأخ ناصر البطل (صاحب البوست المشهود) بورداب الإمارات وعلى رأسهم الأخ فيصل نوبي الذي كان في سؤال مستمر عني وله معزة ومودة خاصة في قلبي، بورداب الرياض بلا استثناء - وان كان يحز في نفسي عدم ذكر بعض الأسماء - الذين كانوا في تواصل واتصالات مستمرة طوال الوقت ولا أود أن اخص في ذلك شخصاً بعينه فكلهم كانوا كما العهد بهم، كذلك اخي وحبيبي / محمد عبد الرحمن من بورداب الدوحة واشكر الإخوة في (سودانيات) كذلك بالمشاركة والاتصالات المتكررة والذين اتصلو من داخل وخارج السودان والسعودية .. وكل من خطى قلمه حرف مهنئاً ومشاركا الفرحة بحروفهم النورانية فشكراً شكراً جزيلاً لكم جميعاً دون استثناء.. والعتبى حتى درجات الرضاء العليا لمن سقط اسمه سهواً وليس تناسياً أو تجاهلاً ولكم مني و (حرمنا المصون) خالص الحب والتقدير والاحترام والتحية ... والعتبى لمن لم يتمكن من التهنئة سواء عبر الاتصال أو الكتابة هنا للمشغوليات .. ولكم كل الحب والتقدير والاحترام ..
وليد 399+1 
|
Post: #2
Title: Re: كانت جـدة حقاً غـيـر... رسالة من تحت الماء
Author: فيصل نوبي
Date: 10-23-2005, 04:53 AM
Parent: #1
حمدلله علي السلامه
مشتاقييييييييييييييييييييييييييييييين
|
Post: #4
Title: Re: كانت جـدة حقاً غـيـر... رسالة من تحت الماء
Author: waleed500
Date: 10-23-2005, 05:03 AM
Parent: #2
فعلا دى رسالة من تحت الماء
ونسال الله ان يجعلك ايامك كلها عسل فى عسل
والف مبروك]دى براها سلامة..كويس حصلت الذيادة
|
Post: #10
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-24-2005, 05:50 AM
Parent: #4
..
.
المقاتل ولي 500
رمضان كريم .. تصوم وتفطر على خير
بارك الله لك يا صديقي، وعقبالك كدا انشاء الله
عشان تشاركنا العسل بالعسل يا غالي ..
معقولة بس يا ولي زيادة ..
وعلاوة زواج كمان ..
دا كلامك!
|
Post: #9
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-24-2005, 04:34 AM
Parent: #2
..
.
الحبيب الغالي
فيصل نوبي
الله يسلمك يا سيدي
والشهر الكريم عليك مبارك
انشاء الله ...
والله نحن أشواقنا اكبر
كم افتقدك كثيراً يا صديقي
لكن تاني ما بفوتكم تـب
وليد
|
Post: #3
Title: Re: كانت جـدة حقاً غـيـر... رسالة من تحت الماء
Author: Sidig Rahama Elnour
Date: 10-23-2005, 05:03 AM
Parent: #1
وليد 400
سلام وحمد لله على السلامة
لست بحاجة إلى أن أفصح لك عن فرحتي بفرحك
ولا عن تلك المطارح التي جمعتنا ذات يوم
يكفي أن تسترجع بعض ملامحها فيصيبك السرور
وأن تملأ صدركَ بشهقة من هوائها العليل
وتمضي صامتا
نحو أي مقصدٍ تريد
بخطوات منتظمة
وعينين لا تطرفان
لك العتبي يا صديقي لعدم تمكني من الحضور الى المطار لوداعك أنت وحرمك المصون
خذلني الوقت ، وخسرت ُ كل شيء ولم يتبقي غير حائط أخير اراهن عليه بأحرفي وهو عفوك
فرمم جسدي
تغمد بحنانك كل فضائحي وتقصيري
ولا تدق آخر مسمار في نعشي بشي في نفسك
حتماً سنلتقي مادام في العمر متسعٌ وبقية شهقة ...
شكراَ لكل ما كتبته عني وعن أهل جدة الذين حزنوا لفراقك أيما حزن
وفرحوا للقياك أيما فرحٍ ...
|
Post: #18
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-25-2005, 02:16 AM
Parent: #3
..
.
الحـبيب
صديق رحمة النور،،
.
.
كم نفتقدك كثيراً،،
وتمنينا ان نكون حضوراً بينكم
في استقبال ضيفكم الكريم
حرمكـم المصــون،،
الف حمد لله على السلامـة
خـيرها في غـيرها .....
:.
.:
حقاً يكفي أن تسترجع بعض الملامح
كي تسترجع وتجتر الذكرى لتلك الأمكنة
اتمنى أن تعاد لبضع لحظات سراع ..
...
ويا سيدي الجيات كثيرة انشاء الله
وانشاء الله ما اخر وداع ،،
وانا ابغض كلمة اسمها الوداع
انشاء الله نتلاقـى في ساعـة خير
أمــــــــــــــين ...
..
.
وليد500-100 بدون كسور
|
Post: #5
Title: Re: كانت جـدة حقاً غـيـر... رسالة من تحت الماء
Author: معتصم دفع الله
Date: 10-23-2005, 05:23 AM
Parent: #1
وليد 400
كده نقول الحمد لله ..
عقبال كل العصابة ..
وكل من له ضرس متاوره أو قائم عليه ..
تنفك عقدته ويشفى ضرسه ..
سعادتنا لا توصف يا صديقي ..
ربنا يسعدكم ويهنيكم ويجعل أيامكم كلها أفراح ..
وبالرفاء والبنين إن شاء الله ..
وعبرك نحي بورداب جدة ..
تخريمة سنغتوتة كده ..
| Quote: أساسي (عميد البورداب والمدير المتوج حديثاً حضور متواصل رغم المشاغل والمهام الكثيرة.. طبعاً فاكيها فينا ).. |
إن شاء الله أشوف فيهو يوم الزول دا ..
قال مدير متوج قال ..
|
Post: #6
Title: Re: كانت جـدة حقاً غـيـر... رسالة من تحت الماء
Author: ابو جهينة
Date: 10-23-2005, 05:59 AM
Parent: #5
وليد ود أحمد
حمدا لله على السلامة
جدة هي الغير ؟
جدة ياها جدة من زمان .. بس إنت حسع بتشوفا بعيون أخرى و السبب معروف
|
Post: #21
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-25-2005, 03:03 AM
Parent: #6
ابوجهينة ......
الراعي الرسمي لخارطة الطريق ...
تحياتي واشواقي .. يسلم ايامك يا لذيذ
تخيل بالجد جدة كانت غير مش هي اصلا كانت كدا
والطشاش في بلـد العمـي كلـو شــوف ...
بس بسم الله ماشاء الله ناس جدة مفتحين على الاخر ..
وأسال صديق رحمة واساسي القلب الكراسي لووووول
|
Post: #20
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-25-2005, 02:44 AM
Parent: #5
..
.
الحبيب
العزيز
الغالي
رجل ذو السريرة البيضاء
رجل المواقف والملمات
معتصم دفع الله ..
رمــضان كـــريـم،
أحبك حـتى الثمالـة يا صديقي
ربنا يسهل ضرسك،، ما تفكر في الخلع
ما تنخدع ... ركز على الحشوة
ما شفت تامبا ميت بيه كيف
مجازفات (نهــيّ) (تيكا باي)
وعقبال بيك نفرح يا زينة ...
نشرب شرباتك يا مووووووووو
ونوقد شمعاتك يا ميموووو
في القريب العاجل ...
انشاء الله ...
لأنك تستحق وأهل للخير والفرح
ربنا يهنيك ويسعدك يا رب ..
واتمنى ليك اجازة سعيدة ..
بين الاحـباب والاهـل ..
وربنا يبارك ليك مقدماً انشاء الله
وسوف لا تنقطع اتصالاتنا يا غالي
سوف نكون اونلاين على الدوام
ارجو ان تتسارع الخطى،،،
شايفك ماشي كويس في الطريق ..
خلي صاحبك بعدين يقعد يتلفت برأأأأأهو
|
Post: #7
Title: Re: كانت جـدة حقاً غـيـر... رسالة من تحت الماء
Author: 3mk-Tango
Date: 10-23-2005, 10:59 AM
Parent: #1
| Quote: كانت جـدة حقاً غـيـر |
يعني انت كنت قايلها ما غير ؟؟
399+ 1 = رسالة من تحت الماء
|
Post: #13
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-24-2005, 06:39 AM
Parent: #7
| Quote: يعني انت كنت قايلها ما غير ؟؟ |
لحدي ما مشيت ما كنت قايلها غير..
لكن لقيتها غير .. غير .. غير
يا تنقو ..
متين رسالتك ترسلها لينا من الشرقية ..
ممكن برضو لي قدام تكون غـير
محبتي الشديدة
..
.
|
Post: #8
Title: Re: كانت جـدة حقاً غـيـر... رسالة من تحت الماء
Author: عبد الله عقيد
Date: 10-23-2005, 11:13 AM
Parent: #1
الأخ الوليد ود احمد
آلاف التهاني والتبريكات بالزواج السعيد
ونسأل الله أن يجمع بينكما بخير وأن يوسع
لكما في الرزق من جميع جوانبه (العيال والمال).
وأن يهنيكما ويسعدكما..
|
Post: #11
Title: Re: كانت جـدة حقاً غـيـر... رسالة من تحت الماء
Author: mahmed alhassan
Date: 10-24-2005, 06:18 AM
Parent: #8
الاخ/وليد العريس
الف مبـــروك
جمع الله بينكم علي خيـــر
حمدا لله عي السلامـــة
يلا نشوك عشان نشوف الفرق؟
|
Post: #12
Title: Re: كانت جـدة حقاً غـيـر... رسالة من تحت الماء
Author: زول ساكت
Date: 10-24-2005, 06:37 AM
Parent: #11
Quote: الأخ الوليد ود احمد
آلاف التهاني والتبريكات بالزواج السعيد
ونسأل الله أن يجمع بينكما بخير وأن يوسع
لكما في الرزق من جميع جوانبه (العيال والمال).
وأن يهنيكما ويسعدكما.. |
آمييييييييييييييييييييييييين
وعقبال ماتكون وليد400+1
|
Post: #27
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-25-2005, 04:50 AM
Parent: #12
Quote: آمييييييييييييييييييييييييين
وعقبال ماتكون وليد400+1 |
ما خلاص بقيت واللي كان كان ..
والللللللله ما زول ساكـت
وليد
|
Post: #26
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-25-2005, 04:05 AM
Parent: #11
..
.
الحبيب
محمـد الحسـن
رمضـان كـريـم ...
جاييكم في القريب العاجل
وح تلقى الفرق كبير جدا
بين الامس واليوم ..
وانت ادرى!!
|
Post: #22
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-25-2005, 03:24 AM
Parent: #8
الغالي
عبد الله ود عقـيد
رمضان كريم،،
تشكر يا سيدي على الكلام
والدعوات الرمضانية الجميلة دي
ربنا يستجيب الدعوات، ويحقق الاماني
أدام الله الحب والتواصل بيننا ..
ولك خالص مودتي .....
ولـيد
|
Post: #14
Title: Re: كانت جـدة حقاً غـيـر... رسالة من تحت الماء
Author: لؤى
Date: 10-24-2005, 07:28 AM
Parent: #1
وليد العزيز
سلامات
نعم كانت جدّة غير حقّاً ، كيف لا وهي قد إحتضنت بين ثناياها أجمل عروسين .. سعدت جد للإلتقاء بكما ، وكنت آمل لو أنّ الظروف سنحت للقاء أرحب وأمسيات أطول ..
تحاياي عبرك للعروسة ، وبيننا الإتّصالات ..
صدّيق العزيز
سلامات
وين انت قاطع الحركة كدا ؟؟
عُذراً وليد
مودّتيـــــ
انا في البعيد مشتاق لهمسة من الوطن يانسمة
[email protected]
|
Post: #28
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-26-2005, 01:57 AM
Parent: #14
..
.
العزيز
لـؤي شمـت
كانت جدة غير كذلك ......
لان كل الاشياء فيها كانت جميلة
تنظمون فيه قوافي الريد
وتزينون مرافـئه..
تحاياك وصلت يا جميل إلى العروسة..
يا سيدي كان حيين بنتلاقى مرة وتانية
باذن الله تعالى ....
بس خلي السلك بينا في الوقت الحالي
وربنا يقرب البعـيد ..
أمـــين،،
:.:.:.:.
|
Post: #15
Title: Re: كانت جـدة حقاً غـيـر... رسالة من تحت الماء
Author: جمال السنوسي
Date: 10-24-2005, 07:33 AM
Parent: #1
عريس الموسم وكل موسم
وليد
يا ريت من أول وريتنا أنك يمكن حتعرس يوم
كان غايتو جهزنا الحفلة
ورجعنا لي زمن ( ما زال الليل طفلاً يحبو)
ولو سمحت ممكن ترجعو ورا شوية
الغنية دي للعريس والعروسة
والاولاد ديل يزحو لينا من جنب البنات
والزول ابو عكاز داك مالو ريحتو طاقة
ده شارب شنو ده
وبي غادي ناس في الليلة ديك
والعيال كبرت
والسجاير هبطرش
يا حليلو زمننا الاخضر
نحن الحمد لله ما حضرنا زمن الساعة 11
وتصريح النظام العام
والاوفرنايت
جوه البيت
وقفيل الابواب
والريفيرا
وغيرها
حرم يا وليد كان عملنا ليك حفلة في الميدان
وما بندفق ليك الموية
مكرفوناتنا للصباح
وتاني يوم الصبحية زي العرس
حفلة من جديد
اها تمشي شهر العسل وتجي راجع
نعمل ليك رحلة
غنا يوم كامل
نحن عندنا كم وليد
ما 399وليد
جمال
|
Post: #30
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-26-2005, 02:44 AM
Parent: #15
..
.
..
.
جـيـمي ..
المرة الجاية بوريك انو ح اعرس من بدري
كويس؟؟؟؟
عشان ما تبقى تزوق من الحفلة..
وترجعنا للزمن الجميل داك
ناس زول القميص اب فراشات داك
الواقف وراء الخيمة ..
ويغتنم الفرصة لصيد (الجكاسي)..
قال ليه الزوله الجاري فيها نور طويل
دي ما الحنان بتاعي انا ذاتو ...
والله طبعاً يا جمال اجابة السؤال دا ..
على حسب كمية التلج اللي بنكسروا
.:
:.
.:
:.
|
Post: #16
Title: Re: كانت جـدة حقاً غـيـر... رسالة من تحت الماء
Author: فيصل نوبي
Date: 10-24-2005, 02:54 PM
Parent: #1
صديقي وليد
اعتز بها كلمة
عدت و لانني مررت من هنا علي عجل ( ما عربية )
الوليد ذلك الاخ الذي التمسته في كل حرف صادق
كانت ايامنا من غيركم تائهه في بحور اشواق
لا اقول اهلا من جديد لانك لم تغادرنا
بل اقول افتقدك لانني افتقدك فلا تغيب عنا مرة اخري
قرأت كلماتك اكثر من مرة
فيها عتاب و يملؤها الشكر
لا اود الاطالة باطلالتي
و لك دعواتي الصادقة بالبنين الصالح
و تحياتي لك و لحرمك المصون ...
علي امل اللقاء قريبا بأذن الله
|
Post: #17
Title: Re: كانت جـدة حقاً غـيـر... رسالة من تحت الماء
Author: اساسي
Date: 10-24-2005, 06:03 PM
Parent: #16
العريس وليد
تشرفنا بكم وعروستك في جدة ليالي ملائكية ما تزال تحفنا بركاتها حتي الان
ورغم ان المنبر يومها لم يكن بالبيد الا انه المكتوب في الجواز لازم يزور (الجيب) ..رغم (غتاتة الغامدي ) .
ابهجتمونا ومايزال اريجكم يعبق في المكان
وزدتمونا حبا في الزواج
وعيني باردة عليكم
اما الهالك معتصم فهذا هزيان (عزابي) افاض به الصيام والجوع والعطش في كل
لذا لا نؤاخذ العزابة بما يهذون..
نقطة وسطر جديد
غايتو ناس الرياض كان (جلوك) زي هناي
تاني الا كل مرة تجو انت وهو بي جاي
سلم علي هناي شديد وقول ليهو سٌمِعنا صوتك
قاتل الله باسكن..وسنينه
|
Post: #33
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-27-2005, 04:17 AM
Parent: #17
..
.
اسـاســي ..
القلب الكراسي
العريس المرتقب
نجم نجوم العريس
(تلج ساقط خلاص)
انا برضو اتشرفت كثييييير وسعدنا بلقاؤكم انا والمدام ..
وانشاء الله الجاية تكون اطول وامهل باذن الله ..
يا زول لا (المنبر) ولا (بالبيد) ولا حتى (الجريسي)..
اخوك بقى اخصائي طيران .. عبر المحيطات
عندك زول ماشي علي كالفورنيا؟؟؟
راجي منك بس اشارة، وكلمة تديني البشارة
اساسي .. البهجة في عينيك كثر عليك الله
البهجة من (البيك) من البقولو عليك ....
قدمنا ونحمل على حقائبنا بعض اشواق لكم
اتمنى أن تبل وتطفئ بلقاء قريب انشاء الله ...
ويلا يا عمي شد حيلك واعملها خلي الفرحة تبقى فرحتين
خلي ناس معتصم وشتات وتمبس في الهواء ....
ضاربين (الهمبريب) سااااااااكت تقبل تحيات الاهل
|
Post: #32
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-26-2005, 03:12 AM
Parent: #16
Quote: صديقي وليد
اعتز بها كلمة
عدت و لانني مررت من هنا علي عجل ( ما عربية )
الوليد ذلك الاخ الذي التمسته في كل حرف صادق
كانت ايامنا من غيركم تائهه في بحور اشواق
لا اقول اهلا من جديد لانك لم تغادرنا
بل اقول افتقدك لانني افتقدك فلا تغيب عنا مرة اخري
قرأت كلماتك اكثر من مرة
فيها عتاب و يملؤها الشكر
لا اود الاطالة باطلالتي
و لك دعواتي الصادقة بالبنين الصالح
و تحياتي لك و لحرمك المصون ...
علي امل اللقاء قريبا بأذن الله |
صديقي فيصل نوبي ..
افحمتني ..
ما عندي ما اقوله ولا ازيد يا حبيب الكل
لك خالص حبي وتقديري واحترامي ....
وليد
|
Post: #19
Title: Re: كانت جـدة حقاً غـيـر... رسالة من تحت الماء
Author: Mayada
Date: 10-25-2005, 02:23 AM
Parent: #1
الاخ وليد تولتومية تسعة وتسعين زايد واحد...
الف الف مبروك وبالرفاه والبنين انشالله...
وتحياتنا لمدام واحد زايد تولتومية تسعة وتسعين...
ورمضان كريم وتصومو تفطر على الف خير انشالله...
ست البنيـــــــــــات
|
Post: #23
Title: Re: كانت جـدة حقاً غـيـر... رسالة من تحت الماء
Author: A.Razek Althalib
Date: 10-25-2005, 03:32 AM
Parent: #19
فوق..
جدة غير..
وهي رسالة من تحت العسل..
يا غرقان..
حافظ..
على الراية....
وشد ساعد على المجداف..
مبــ وليــ 399-1ـد ــك..
|
Post: #25
Title: Re: كانت جـدة حقاً غـيـر... رسالة من تحت الماء
Author: abuguta
Date: 10-25-2005, 03:42 AM
Parent: #23
وليد 400
وما تسمع كلام اساسى عنى
والله فرحان ليك
وربنا يسعدكم
لكن ما قلت لى ياخبرة
ساعدونى ياجماعة ابقى زيكم كيف
ابداء من وين
القروش قادة عندى سيارة عاوز ابيعها
كدى بعد اجيك قريب ياحبيب
|
Post: #36
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-29-2005, 02:24 AM
Parent: #25
..
.
ابوقوته
قنبلة الود الموقوته
الكلام القالو عنك ....
مش هو دا الغيرني منك
واللي شفتو معاك يحير
مافي داعي عشان لانك .....
عقبالك كدا يا فردة
وعقبال ما نشوفك معتقل كدا
في القفص الذهبي ........
بقرار جمهوري صادر من امانة الرياض
بلدية العليا والسليمانية والملز
بالقبض على كل عازب متجول بدون قسيمة زواج
في منطقة الرياض وما جاورها ....
Quote: ساعدونى ياجماعة ابقى زيكم كيف
ابداء من وين |
ابوقوته .. بخصوص هذه الجزئية من الموضوع
عليك بخارطة الطريق الذي سلكته انا ..
يمكنك الاستعانة باستشاري ومهندس الطرق "ابوجهينة"
فأنه خبير في تهريب العزابة الى بر الامان..
399 مرحب بزيارتكم...
|
Post: #35
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-27-2005, 05:12 AM
Parent: #23
ابو رزقة يا ود الطالب
أشد ساعد على المجداف..
واجيك بي قدرتي الباقية
ما بقول حطام انسان ..
لكن ممكن اقول انسان كامل
انسان قديم، في ثوب جديد يا حلو
ونحن على العهد ماضون وسائرون
وكذلك ساهـــرون ..
بارك الله فيك وفي ايامك
.
.
.
يا حبيب
|
Post: #40
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-31-2005, 03:32 AM
Parent: #23
Quote: يا غرقان..
حافظ..
على الراية.... |
|
Post: #34
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-27-2005, 05:04 AM
Parent: #19
..
.
مـيادة
يا سـت البنيات لي حدهن
رمضان كريم، وتصومي وتفطري على خير
والف حمد على السلامة بعد غيبة طويلة
وين الغياب الطويل دا .......
انشاء الله الداعي خير ...
شكراً جزيلاً على الاتصال والمباركة
وعقبال ما نردها ليك في الافراح انشاء الله
تقبلي تحياتي المدام ....
وليد
|
Post: #24
Title: Re: كانت جـدة حقاً غـيـر... رسالة من تحت الماء
Author: سارة حمزة
Date: 10-25-2005, 03:35 AM
Parent: #1
حمدا لله على السلامة
الف مبروك يا وليد تاني وربنا يسعدكم
|
Post: #37
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-29-2005, 03:27 AM
Parent: #24
العزيزة
..
.
سارة حمـزة
سلمك الله من كل شر وبارك الله فيك
ربنا يديم الافراح .. والعاقبة عندكم في المسرات
ربنا أديك على قدر الفي النية يا أختاه ..
.
.
.
وليد
|
Post: #29
Title: Re: كانت جـدة حقاً غـيـر... رسالة من تحت الماء
Author: ناصر البطل
Date: 10-26-2005, 02:08 AM
Parent: #1
جيناكم يا حبايبنا
و ألف حمد الله على السلامه
|
Post: #31
Title: Re: كانت جـدة حقاً غـيـر... رسالة من تحت الماء
Author: سجيمان
Date: 10-26-2005, 02:50 AM
Parent: #29
وليد
الف مبروك
وحمد الله على السلامة
والله كنت داير احضر العرس..... علا ما قدرت اسافر.... معليش خيرا في غيرا.. وفي العرسة الجاية
|
Post: #39
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-30-2005, 03:46 AM
Parent: #31
في حضرتنا ومعيتنا الدكتور سجيمان ...
مرحباً ..... يا مرحبا ... اشرقت الانوار
والله كنت شرفت الديار بحضورك، لكن نقول شنو
خيرها في غيرها يا دكتور والجايات أكثر يا ذوق
وكمان زي ما قلت في العرسه الجاية يكون الحديث واللقاء القادم
|
Post: #38
Title: Re: كانت جـدة حقاً غـيـر... رسالة من تحت الماء
Author: waleedi399
Date: 10-29-2005, 03:31 AM
Parent: #29
Quote: جيناكم يا حبايبنا
و ألف حمد الله على السلامه |
سلمك الله من كل شر يا بطل ..
تعال فرح ليالينا .. تعال قبل السنين ترحل
|
|