Post: #1
Title: *** سكة الزمن الصعب ***
Author: soma
Date: 10-20-2005, 03:54 PM
سكة الزمن الصعب ..
دفرت مشاويري المأرجحه
بين الأرض وراحة السحب ..
زحمت دروب فوق لى دروب
مسحت كلامنا ألفى الكتب
دمرت سرابات المدن ..
غاصت هناك ... تحت الترب ..
نزفت شرايين البلد..
قطعت وريد وسط العصب ..
ضاقت صدور .. عبرات تزور..
حلقا نشف جف و تعب ..
زفرات تمر فوق الحلق ..
مأموره تجرح بالغصب ..
سكة الزمن الصعب ..
****
ساقت خطانا في انحدار..
لى هاوية الخوف والرعب
طبعت قوانينها الغلط
في صفحة الزمن الكعب..
والليل طويل شايل الوجع..
ضلت خيوط صبحو الدرب..
والنيل هداك صامت حزين
عبرات تسد حلقا شرب..
والجوف هضم .. مر السكات ..
لمن شبع جوعا ضرب..
وا لا الفراق .. الكان حرب
من غير سلاح رغم الضرب
مدفور تلملم في الخطى..
تتعتر .0
.تصارع الشوق الغلب
تتضارا تحبس في الدمع..
السال حنين كيفن سكب
يا سكة الزمن الصعب
معووجه من أول طريق
لا فيكى صحبه ولا رفيق
إلا المتل مسيلمه ..
المعروف كلامو بالكضب
سومــــا
أسماء الجنيد
مسقط
|
Post: #2
Title: Re: *** سكة الزمن الصعب ***
Author: layon
Date: 10-20-2005, 04:12 PM
Parent: #1
سلاااام
غاليتي الغاليه سوما
مشتااااااقين ..ورمضان كريم
.
.
.
كم اشتاق الى التجول في مساحاتك
.
.
محبتي
ليون الصوماليه
|
Post: #3
Title: Re: *** سكة الزمن الصعب ***
Author: محمد عكاشة
Date: 10-20-2005, 04:18 PM
Parent: #2
سوما بت الجنيد
تحياتى
وشكرا لك
انسانا وحضورا
مع مودتى وتقديرى
|
Post: #4
Title: Re: *** سكة الزمن الصعب ***
Author: وحيد
Date: 10-20-2005, 04:39 PM
Parent: #1
روعة يا سوما
|
Post: #5
Title: Re: *** سكة الزمن الصعب ***
Author: بدرالدين شنا
Date: 10-20-2005, 10:18 PM
Parent: #1
الغالية أسماء
سلام ورمضان كريم
Quote: نزفت شرايين البلد..
قطعت وريد وسط العصب ..
ضاقت صدور .. عبرات تزور..
حلقا نشف جف و تعب .. |
أسماء الكلام دا سمح وفيهو حالات إبداع
اللهم إني مستمتع وفخور
لك ولأهل بيتك كل معزة وحب
|
Post: #6
Title: Re: *** سكة الزمن الصعب ***
Author: سجيمان
Date: 10-21-2005, 12:57 PM
Parent: #5
رائعة..وانيقة....وجميلة يا سوما...... دائما
|
Post: #7
Title: Re: *** سكة الزمن الصعب ***
Author: لؤى
Date: 10-21-2005, 01:12 PM
Parent: #1
سوما الرائعة
رمضان كريم وكلّ سنة وانتي طيبة
Quote:
والليل طويل شايل الوجع..
ضلت خيوط صبحو الدرب..
والنيل هداك صامت حزين
عبرات تسد حلقا شرب..
والجوف هضم .. مر السكات ..
لمن شبع جوعا ضرب..
|
وعشان كدا يا سوما ما تسكتي ، خلّيك حاضرة وأكتبي ، أكتبي عشان نرسم واقع جديد مطرّز بالسرور
ـــــ
انا في البعيد مشتاق لهمسة من الوطن يانسمة
[email protected]
|
Post: #8
Title: Re: *** سكة الزمن الصعب ***
Author: soma
Date: 10-21-2005, 02:26 PM
Parent: #7
سلااااااااااام يا الحبان
الشوق مطرز بالحرير والكتان
جيتكم لى دى فى راكوبتى بعد غيبه يعلم الله سرت بالى
وجبرت خاترى بالحيل.. شاحده ربى يجبر خاتركم ويعلى مقامكم
بركة الشهر الفضيل...
***
ليون الحنينه
الشوق لمة اهل ودعوات سمحه سماحتك يا الطيبه
ليك وحشه والله يا غاليه ..
اتمنى ان تكونى وكل الاهل بالف خير
لكى محبتى يا نواره ..
***
اخونا احمد عكاشه
رمضان كريم عليك
حبابك وحباب الطله يا ود الفريق والحله
يعظم شأنك ان شاء الله يا يابا ..
***
وحيد كيفنك يا ود البلد الاصيل
رمضان كريم عليك وربى يتقبل منك الصيام والقيام
قول آمين
شكرا لا تكفى لى وجودك بيننا يا سمح الخصال
اخى وحيد شكرا جمال ..
***
بدر الدين الحنين
السمح مو شين
لك وحشه اكبر من المسافه البينا
ربنا يجيبك قريب بالسلامه
ومره تانيه رمضان كريم عليك
ما تنسانا من صالح الدعوات
اكيد بتقيم الليل..
امانه خلاكم ده ما سمح فى رمضان ..عباده ساااااااى
ربنا يتقبل
شكرا البدر الضاوى الساحات ..شكرامساحات..
****
سجيمان عشا الضيفان
حبابك يابا
رمضان كريم عليك
كل سنه وانت طيب
تصوم وتفطر على خير
كتر خيرك كتير على كلامك البرد الروح
شكرا سجيمان ..شكرا اطنان
****
لؤى الضى
حبابك بعد غيبه طويله
دائما وجودك بشرفنى
وكلماتك وشاح بزين بيه صدرى
يديك الف عافيه يا سقف الاهل
الدعوات تبراك وين ما تقبل
شكرا سحاب
|
|