المشير عمر البشير

لنا عودة

المشير عمر البشير الرجل المعروف عنه في احسن الأحوال انه رجل (طيب) و (على نياته) ..
هل هو كذلك وهل حقيقة ان اختياره تم بحصافة من قبيلة الاسلاميين باعتبار انه الأنسب لتمرير
المخططات من تحته أم انه رجل داهية يحتمي بصفة الأبله التي مؤكد ستعمي عنه غضبة الجماهير
حينما تسن انيابها .
قد تكون الاٍنقاذ في بداياتها في حوجة الي قائد ابله تمرر من تحته مخططاتها لكن ايعقل ان تكون الاٍنقاذ
في حوجة الي هذا القائد طيلة عمرها الطويل الذي استمر 16 عاما الي نفس صفة القائد الذي ابتدرت به حركتها ، وهل يعقل ان لا يفهم (انساناً) انه مٍعبر لمخططات دامت هذه الفترة .
ام انه مشارك في ذلك بوعي؟
اي ان له -فعلاً- دور القائد في حركة الانقاذ بما يشمل ذلك من اغتيالاات واغتصاب وحملات تعذيب وتشريد .
تظهر براءة البشير دائما عقب حركات العنف التي ترتكبها الانقاذ . فبعد تصيفة شهداء رمضان -مثلاً-
اوضح اعلام الانقاذ - بطريقة توحي ان الخبر سري - ان توقيع البشير للاعدامات جاء بعد ان تمت الاعدامات .. هل يعقل ان يكون هذا الخبر الذي انتشر بين الجميع بما فيهم اسر الشهداء بأن هذه الحقيقة بهذه السطحية ؟ واذا كان كذلك ماهي مصلحة البشير في تأدية دور الـcover لمساوئ الاسلاميين ؟.
وعلى هذا الخبر يأتي القياس ففي جميع صفحات الانقاذ السوداء تظهر على السطح شخصية البشير كأبله وعبيط وبالتالي برئ من دماء الابرياء . (وهو ما حدث بعد اعدام الشهيد مجدي وتصفية الكثيرين) .
في انحرافة صغيرة الي دور البشير في صفحة الفساد الانقاذي تجد ان صفة الغباء والهبل اختفت عن محياه
اذ يفسد الرجل كما يفعل الاذكياء ، ويشرك في ذلك اهله وذويه .
البشير في اعتقادي رجل ذكي يجيد أداة رقصة الموت على جثث من يقفون في طريق طموحه العريض
وهو اكثر ادراكاً ان الوسائل التي تبرر غاياته قد لا تفتح له فوهة الرحمة حينما يبرز للعدالة لذلك هو يؤمن نفسه بسلك شائك من العبط والهبل فهو الأكثر وعياً بالدماء التي خاضتها الأنقاذ لذا هو يعمل قدر الامكان على غسل مخلفاتها لتأمين بعضاً من بعضه مقارنه باشقائه في الوليمة الذين اعمتهم السلطة على تأمين جسر الخروج ويفكرون كما يفكر جميع حكام العالم الثالث بالهرب حين تعلن صفارة الختام لذا يمتصون من شرايين البلد ما امكن لتمكين خاتمتهم بالخارج والعيش (بكرامة) في العالم الاول .
عموماً رغم ما تقدم مازال السؤال قائماً
هل المشير رجل عبيط جداً ؟ ام انه الاحوج لهذه الصفة المخرج؟

الضرب في الميت حرام

الاخ ادريس :

الريس ميت ؟
ميت وقاتل ..
الراجل بحالة جيدة وح يطلع فيها الدورة الرئاسية الجاية . وينزل منها ويطلع في البعدها
ودخلت نملة واكلت حبة ومرقت ، ودخلت نملة واكلت حبة ومرقت ، ودخلت ...،،،،
الي ان يتكرمش جلده ويقعد على كرسي المقعدين ويشوفوا لينا قاتل غيرو بي نفس مؤهلاته ،،
ويدخل بيت النمل ويمرق منو حبة حبة .. حبة حبة . لحدي جلدو يتكرمش ويقعد في الكرسي اياه
ده فلم بايخ ومكرر..

دمت

الاخ / متوكل
تحيه طيبه

Quote: ويشوفوا لينا قاتل غيرو بي نفس مؤهلاته

.... الزول دا في ناس من مصلحتها انو يستمر في الحكم عشان مصالحها تكون ماشة ولا شنو ياالحبيب ؟؟ لكن الي متي ؟؟

الحبيب متوكل
سلام

ارجع الي فترة مابعد الانقلاب ... والقرارات الارتجالية وخصوصا فيما يخص الحرب في الجنوب التي صرح بانه سوف ينهيا في 6 شهور ...
تفتكر القرار دا كان صادر من عندو كرجل عسكري أم من المأذون الشرعي للحور العين ؟؟
ولك حبي

الاخ/ متوكل

من يوم الانقلاب الي يوم ريسين غرقو المركب .... هل كان البشير يتمتع بكامل صلاحياته الدستورية كرئيس للجمهورية. وكم قرار صادر من الرئيس لم ينفذ او يلم يعمل به .
خالص الود

الحاله صعبة

غايتو الزول دة فى الكتل والعرس شاطر , ماهو بليد.

Quote: غايتو الزول دة فى الكتل والعرس شاطر , ماهو بليد.

شكراً فيصل آآي اهو ده البشير البنعرفوا ..
شاطر في العرس وعزال ..
وكتّال ..

العزيز متوكل توم

هو اكيد مصاب في الرأس و الصدر
ما اصابة معارك
خلقة الله

لكن الثابت أن لا منجي له من المحاسبة فيكفي ما لديه من قوة عقلية لذلك

تحياتي

مالو طيارتو وقعت

تحية الي سيادة الرئيس
المشير عمر حسن احمد البشير
سر دوما الي الامام

لا حول و لاقوة الا بالله

(انا لله وانا اليه راجعون)

دحين دى ما صورة عرسو التانى و لا شنو يا ناس سوداتيييييييييل

الاخ ادريس . سلامات ..
.... الزول دا في ناس من مصلحتها انو يستمر في الحكم عشان مصالحها تكون ماشة ولا شنو ياالحبيب ؟؟ لكن الي
اهو ده السؤال البقى فيهو شك . هل هو قاعد لسة عشان مصلحة الناس ؟
ولاااا قاعد لانو قوي وفارض نفسو؟ - نفسوا الامارة بي السوء- .
ما اظن صفة اهبل تؤهل متقدم لوظيفة بالقبول والاستمرار 16 سنة الا في حال السودان
يعني عشان تكون حاكم ناجح تكون عبيط . وعشان تكون ناحج جداً وتستمر جداً تكون عبيط جداً .
غايتو

و

Quote: تحية الي سيادة الرئيس المشير عمر حسن احمد البشير سر دوما الي الامام

الاخ الفاتح محمد عثمان ..
الرّيس من غير دعواتك دي سائر للامام ، ده طبعاً بي فهم (الامام) الجديد
للشعب السوداني المستفيد والمستفيد هو الاكثر corrupted يعني
ما محتاج لي كورس يصفق ليهو.. ساير ورقّاص .
ادعو للناس الواقفة والاتخلفت عشان تسير . التطبيل للناس القدام
او زي مال قال الطيب صالح في مريود (الله يخيبهم دايماً مع الغالب) .
اصبح ما مجدي تعرف لي . لانو البشير ما محتاج لي زول ينحني
وهو يطلع في ضهروا يتاوق . البشير طال طاااال ، من غير ما تدنقر بتاوق
وواصل .
يا ربي تدويهو العافية والقدم العريضة .

البشير على نياتو

الراجل ده كل يوم بيسوق الشعب السوداني من ايديه
ويوديه لحدي البحر

وبيرجعه عطشاااان

وهم عينهم لمويته


قال طيب قال

ده تربية الترابي ياخي

غير الثعالب التانية

خلاص يا ود التوم كلو كملتو كمان داير تقبل على البشير .. الله سبحانه علام الغيوب لكن يا ود التوم الرئيس الا تتفق معاي ان ( تقاطيع ) وجهه بتقول انو طيب ..


قول معاي يا الخدر الاخدر ....

Quote: خلاص يا ود التوم كلو كملتو كمان داير تقبل على البشير .. الله سبحانه علام الغيوب لكن يا ود التوم الرئيس الا تتفق معاي ان ( تقاطيع ) وجهه بتقول انو طيب ..

ود الباوقة يا صاحبي . ازيك
البوست ده مفتوح عشان نتحقق من طيبتو دي . وزي ما قالت هوزي طيب ويسوق الملايين البحر
والنتيجة نشاف حلق الملايين ، طيب آآآ هو قال لم مشى يستلم الحكومة عربيتو كانت ضاربة طارة كلتش
الليلة باسم الاسلام -عيني باردة- عماراتو تتاوق لي بعض (والعهدة على القائل) .
السودان بلد المليون سياسي محنك معقول عبيط وطيب يتحكر في قمة الهرم . لانو بس طيب .
ايواا طيب .