سلام يمــّة يا حاجة الهديّة بقلم: هشام هبانى

Quote: سلام يمــّة يا حاجة الهديّة* ــــــــــــــــــــــــــــــــــــ تعظيم سلام واجمل كلام ليك يمّة يا حاجة الهدية رمضان كريم والله اكرم ومقبولة صومتك يا رضيّة ومني ليك أبرك تحية اديك صحة واديك عافية و حجة لمكة العليّة وهناك تطوفي بالكعبة الشريفة وتدعي لينا يا شريفة ويا عفيفة الله افكنا من ولدك عمرهذا التليفة دلدول الخوازيق وكمان عامل خليفة وكمان افكنا من ملة الجبهة الجليفة ملة الدين المزوّر والخرافات السخيفة وافكنا من كل التوالي و الدلاقين الحليفة وافكنا من حالة العدم المخيفة وحالة الناس الشلش عدمانة حق الرغيفة و قولي لي ولدك عمر اب عصاية عمر الكرور عمر العرور عمر الطرور يا هوي يا وليد خلاص وقف كفاية وخاف الله في ناسا تعافر مدفونة حية للرزق يا دوب تدافر مضبوحة بشرع المجازر مكشوشة في دين الكوامر ومضروبة في جو المخافر ومظلومة في جوف المقابر ومطرودة في كل المهاجر ومنهوبة بالدجل المشاتر ومذلولة بصلف العساكر ومغدورة بشرع الخناجر ومرهوبة بكضب العناتر قولي لولدك عمر هذا العرور المعتبر الكنت قايلاهو انضف من قمر وكنت قايلاهو مهدينا المنتظر أوكنت قايلاهو المك نمر لكن يمـّة المولى ما قسملك ابدا ولد ربما خلوا التبيعة عكس قانون الطبيعة ودفنوا في الارض الولد وجانا من سرق البلد لم يلد ولم يفد هذا الكرور المستبد هذا الجبان المرتعد عمر المشير المعتبر عمر البشير الما بشر عمر العساكر والكجر عمر المفاسد والغجر قولي ليهو يا وليد وقف كفاية الوطن ماهو حوش بهايم للسعاية وارواحنا ماها لعبة هواية ودم الناس ماهو موية سقاية يا وليد يا هوي كفاية قولي ليهو: ماعافية منك ماني امك وابرا منك وكيف تداري الليلة ذنبك يوم تموت وتلاقي ربك وماني قايلاك سفاحا محنك وماني قايلاك سراقا وليك فنك يا ضنايا قايلاك راجلا زول مكارم شايل الناس في الحنايا بفرح الايتام بعطفو وبديهم الحب والعناية وقايلاك راجلا بشبع الناس الجعانة بستر الناس العرايا وقايلاك راجلا حقاني في ساعة المظالم بدي للمظلوم حماية وقايلاك راجلا ما بتكضب ما بتنافق دينو اصلي مو دعاية وقايلاك راجلا في كلامك في سلامك فنجريا فضلو باين بالعطايا يا ضنايا ضاع شقايا وطال اذايا ووب عليك من دم الضحايا وحق يتيما انت شارب دم ابوهو وانت اشنع من عدوهو شوقو للعيد والهدايا فاقد الريد والمحنة فاقد الحب والرعاية وبكرة برسب في القراية ولكن ماهو ناسي دم ابوهو وتارو والع في الحنايا ووب عليك يا جنايا من حق معذب في سجونك بالوشاية ما بخلي حقو ابدا في النهاية وحق مشرد بفنونك في الخطايا وبكرة جاي من جمر المنافي زعلو وافي وكيلو وافي وديمة قادل في المنايا يا هوي يا وليد وقف كفاية ما عافية منك ماني امك وابرا منك وماك طالع من حشايا واسأليه يمة عن كتلة الشفع صغار في العيلفون وكيف دمعة ام فقدت حشاها شويفعا دريفون والدمع سال مطر دافق هتون مالي العيون وكيفن ولدك كتال الرقاب عامل حنون اهدى للشفع حلاوة حلاوة من طعم المنون هذا المشير هذا الحمار رصاصو ولع في الدرافين الصغار باسم الله كبر وجاهد عمر الحمار وسال الدم ركب والبحر زاد احمرار واليوم قد كان عيد الضحية وكانوا شفعنا الضحية وليدك عمر اهدى للشفع ودار شان رفضوا الحرب رفضوا الدمار والليلة عامل فيها حمامة للحب والسلام ونافش ريشو في نيفاشا فاروقنا الهمام وصدق انو صانع الحب والوئام بعد ماكان بشجع لعبة الموت الزؤام يا سلام من كضب جاب الطمام ويا سلام من دجل ساكن النظام ويا سلام من عفن راكز تمام ويا سلام يا سلام من هذا السلام قولي ليهو : ماني امك ما عافية منك وابرا منك *** اسمعيني يمّة الهدية انت عارفة الدنيا فانية ولينا مكتوبة النهاية والله عارف والله شايف كل ما كان في النوايا والدين يا يمه قالوا النصيحة والسترة ديمة بارياها الفضيحة واتى يمة بتعرفي الله وبتخافي الله وبترضي بالكلمة الصريحة وتب ما بترضي بالفعلة القبيحة والليلة عندي ليك اخبارا ما مريحة في دولة وليدك عمر هذا التليحة دولة الدين المخستك والشعارات القبيحة وفي كل يوم تغرب شمس وفيها تسمع كم من فضيحة وان شاء الله يمّة متابعة اخبار السياسة؟ وعارفة حالة البلد الليلة زي صاج العواسة والشغلة لا طايوق لافهم كسرة شايطة وحالة زايطة جايطة زي كوم كناسة ولا زلنا في سوق النخاسة باعونا في كل المواسم بالاحابيل والخساسة والفساد والعفن الليلة قد طال السياسة ونظام الزفت الليلة زايد في ا لنجاسة عايز ليهو مشاطة وصندوق برنجي وناس فايقة للحكي والكواسة ويا ما ناس غنت عابدة للجاه والقروش وبالسحت والربا الليلة عبوها الكروش نهبوا العباد سرقوا البلاد اكلوها بوش ناس والله من صنف الوحوش وديل يا يمة شلة ولدك عمر الفشوش *** واظنك يمة سمعت بالبتاع اب ريالة عبدو البتاع سقط المتاع عبدو الحتالة عبدو الوزير عبدو الحقيرفاقد الرجالة بعد ما سرق ونهب البتاع بكل سفالة ومن فضيحتو البتاع قدم عديل استقالة والليلة وزيربتاعنا في الزمن الزبالة وده وليدك عمرالبتاع رقاهو بكل هبالة والليلة البتاع وزير دفاع وكمان زايد خمالة وزير دفاع في بلد شبعت عمالة بلد منكوحة بقوات اجانب في جنوبها وفي شمالها *** وبدور اسألك فد سؤال امي يا حاجة الهدية دحين (صراصر) نقلوها لكافور الغنية؟؟ وقالوا البنيات رطبّن فوق العمارات الجبهجية والوليدات طاروا فوق العلالي و المقامات المنجهية وقالوا اللبع اصبح حلال بالفتاوي المنهجية وده كلو في جاه وليدك فاروقنا بعدالتو الهمبتية عدلو بس للاقارب والبطانات والمعية والشعب ياكل نارو ( سنة سنتين شوية)* ( ويا بلال عليّ النار والضيق عليّ) **** اسمعني يا هوي ياعمر الهوان ياالورل المشير اللابس كمان نيشان عارفك لابد في القيادة وحولك ديدبان مدجج بالسلاح وعامل سيد الفرسان تصدر في الاوامر ولابد في سلام و امان ولو كنت ضكرا جد ربوك من زمان و زمان Man to manامرقوا ولاقونا برّه الايد تلاقي الايد دواس رجال والخبت مليان ولا قوات لا جيوش ولا لبيد ورا الحيطان ولا سيمبويا لا ايقاد ولا جودية كوفي ود عنــــان امرقوا طالعونا الخلا او في اي مكان في الصومال في الواغ واغ اوفي جبال عمّان وخلوا الناس تشوف و تعرف كمان وتشوف الدواس ومنو الفينا البفز وجبان و كان بقيت راجلا صح و ربحت الرهان ليك حق بعد داك تلعلع وتطوّل علينا لسان وبنتوضى بموية البحر ونرجع للبلد ننهان زي رجعة الباعونا ودخلوا البلد عميان وباعوا دم الشهيد بكل خنوع وهوان لكني بالطلاق اسمع هوي يا بشير الضان ماني الافزر البندرش لزيك ضعيف خيبان وماني الهوين رويجلا ضعيف ايمان ماني الافندي زول معايش لابد ذليل وجبان نحن رجال اولاد رجال وفي الحارة لينا مكان وفي المكارم والمكاره حرم بنكرم الضيفان وماربونا عشان نركع لدلق سلطان وما ربونا عشان نسكت بالظلم ننهان وماجابونا تمومة عدد في البشربلا ميزان والاعور بنقولو اعور لو تحرق البلدان والساكت عن كلام الحق قالوا اخرسا شيطان ودينّا وعقيدتنا خدمة الشعب و السودان خدمة سودانا الكبير بلدنا و سيد الاوطان Man to manوامرقوا لبرّة وخلوها واسمع يا عمر الكلك ظلم وضلام نحن ما عندنا كبير الا المولى سيد الاقسام الرجالة ماها نياشين ورتب وهدوم حكام ولا دقون ضلال تهلل تكبر لاعبة بالاسلام الرجالة قيم واخلاق ومواقف موزونة باحكام الراجل ما بجي بالسرقة و الناس رقاد و نيام بجي بالباب عديل وبقول يا ناس يا عووك سلام وبعد داك بقلع عديل من غير نضم و كلام وما بياكل حق الغلابة بالظلم وحرام لكنك يا زولنا يا هذا التعيس ورخيص جيتنا بالسرقة والخدعة والبلبيص غدرت بالناس الرجال ومتقوي بابليس ات ماك زول حارة وفارسا نبيل و جعيص ات زول دنيا ودينك فالصو في التدليس ات زول صفقة وفايقا شبع ترقيص وخليك حريص خليك حريص وانت القايد وانت الرئيس انت العريس وين المساكين الضاعوا في حرب الفطيس انباعوا بسجم الكلام انباعوا بتمنا بخيس وانغشوا في الزمن الهويس وخليك حريص خليك حريص انت القايد وانت الرئيس انت العريس واصل نكاحك ايها العر البخيس وبكرة ليكم نحن زي كلاب في قنيص وتب مافي ليكم ابدا والله ميس والبفرنب بكرة بلبس قرمصيص وليك سلامي امي يا حاجة الهدية واعفي عني ماني قاصدك يا هدية و يا رضية بدور افش غبينتي الجوّه في الجوف والطوّية وماني راكب دبابة وشايل بندقية شايل قولة الحق والصدق بحسن نية وشايل في كلامي ملامح من قضية قضية ظلم واضحة فاتت الحد بل عصيّة والصدق يا يمة ضايع الليلة في خوف الرعية ما عمر العرور شايل عصا وقنبلية والبفتح خشمو ما ليهو حق في الشكية والشكية يمة قالوا لي ابو ايدا قوية لكن ما في زول مات قبل يومو في الدنيا الدنية والبقولو الحق قلال والله ما بخافوا الاذية وكم شهيدا بدمو ناضل وهو ناضل للقضية وكم مناضل في سجنو كاتل شامخ النفس الابيّة وكم مهاجر في المنافي لسه ماسك في الهوية وحواء والدة جابت التاية الشهيدة السمهرية واقدلي وتلّي ايدك ياشهيدة يا عنيدة يا بنيّة وسلام عليك امي يا حاجة الهدية ودعتك الله واديك صحة واديك عافية وحجة لمكة العلية وقولي للمجرم وليدك ماني امك وابرا منك وانت سفاحا محنك وانت لفاحا محنك ماني امك وابرا منك وابرا منك يا اذيّة * هي السيدة الوالدة الحاجة الهديّة والدة السفاح عمر البشير * مقطع من اغنية شعبية سودانية.

الاخ ادريس تحياتى ورمضان كريم .
الدخرى هبانى,والله ما عرفت اكتب شنو, كلام متل دة اى تعليق عليهو بفسدو
بس يكون فوق للاطلاع.

الحبيب فيصل عثمان الحسن
الله اكرم
شكرا علي المرور ولي قدام

الحبيب فيصل عثمان الحسن
الله اكرم
شكرا علي المرور ولي قدام

العزيز/ الناظر ادريس


تحياتي واعزازي

شكرا ايها الجسور الا صيل على تكبدكم مشاق ومخاطرة تبني وتحمل مثل هذا البوست( الكارثة) والذي لا يمسه الا الموجوعون الاوفياء لهذا الوطن الحبيب وشكري لك اذ وفرتم علي زمناكبيرا في نقله من صفحة الاراء والمقالات الى المنبر وقد تعذر ذلك نسبة لعدم المام اخوكم ود هباني حتى الان في التعرف على امكانية خدمات هذا الموقع في نقل النصوص المقتطفة من موضوع ما الى صفحةالردود واكرر شكري مرة ثانية..

السيدةالوالدة الحاجة الهدية هي والدة السفاح عمر البشير وهي امرأة مشهود لها بالوقار والطيبة السودانية والكرم والتواصل مع الاهل الجيران في منطقة كوبر الفقيرة وايضا حتى بعد تحسن الاوضاع من حال الفقر الى حال العيش الرغد وهو عيش ونعيم رئاسي ليس بحلال وهي هنا مثلها ومثل امهاتنا الطيبات السودانيات الاصيلات لم تتغير ولم تتبدل شخصيتها الاصلية بفعل هذا الواقع الجديد والتحية لها ولكل امهاتنا الصابرات الطيبات ولكن قيل في المأثور الشعبي ( النار تلد الرماد) فخطابي عبر هذه الخاطرة استنكار موجه الى الوالدة الحاجة الهدية اذ كيف لهذا الرحم السوداني الطيب والكريم والاصيل والمفعم بالقيم السودانيى السمحاء ان ينجب كارثة او كاترينا اسمها عمر البشير اغرقت الوطن كله في مطلق الخراب وهو يقتل من يشاء ويذل من يشاء ويعذب من يشاء ويكافيء من يشاء بلا ادنى وازع اخلاقي وديني يؤكد انتماءه لهذه الوالدة الطيبة الكريمة وتلكم القيم السودانية النبيلة. و اكرر ثانية حبي واحترامي لها لانها في مقام امهاتنا الطيبات ولكن ( البطن بطرانة)؟؟

الخال / هشام هباني
تحية طيبه وبعد ،،
صيحيح النار بتلد الرماد
اذا كان تبني مثل هذا البوست كارثة فمرحبا بالكورارث

لك كل الود
ابن اختك ادريس خليفة علم الهدي

UP

..

فوق

.....

نضم يا ود هبانى و الله نضم ... يا أخوى هشام اتفق معك فى تلك الرسالة الت تطيب فيها خاطر أم السفاح البشير و هذا يؤكد معدنك و اصالتك السودانية الأصيلة لكن هنالك خلاف بسيط لا يفسد لودنا قضية هو من يجبر و يداوى جرح أم الشهيد مجدى ؟؟؟؟؟ و هذا على سبيل المثال لا الحصر من قائمة الشهداء الذين شرب دمائهم و مصاها بكل برودة دم السفاح ابن حاجه الهدية !!!!!!
عبدالماجد

ياسلام علي سلاسة التعبير واوفيت سعادة المشير

دي بس دايره سلاح النقل ولا الاشاره

ويوزعها الفاتح كسلاوي هذا نشيد انشاد الصبر والخلاص

اوفيت الخاله حقها تماما وهذا يدل علي انك اصيل وابن ناس

الباقي والدور عليها تحلف علي انها انها ما راضيه عليه ولا عافيه منه الا اذا استقال

الاخوان
صابر
محمد

عاطر التحايا

شكرا علي المرور

لكم كل الود

والله كلاما ما بنزاد, والله يدي ود عزاز قومنا ودهبانب العافية والصحة

وليك الف الف تحية العمدة ادريس

الحبيب ود مساعد
عاطر التحايا
تسلم ولي قدام

فوق

الاخ العزيز ود الهبانية
رمضان كريم
التحيةلك بعدد حروف الرسالة
تم حفظها
هل الكرور بيفهم

الاخ/حسن الطيب يس

Quote: التحيةلك بعدد حروف الرسالة

تسلم ياغالي

خالص الود

الخليفة/ ادريس

المناضل / هشام هباني

خواتيم مباركة وعيد سعيد مقدما

ود هباني يا ناظم الدرر
سائل المولى ما يغشاك شر
لقد اتحفتناوازلت عنا الضجر


كم انا سعيد اخوي ادريس وهشام لهذه التحف فلكما الشكر ولا فض فوكما

محسن عبدالقادر

اديك العافية وطول العمر

تسلم اخوي

خالص الود

//////

???????

for all

الاخ/صبري

عاطر التحايا

شكرا علي المرور

عيد سعيد وكل عام انت بالف خير

كل الود

فوق

............

*************

الخال ود هباني
حاشاك الغلط
ادريس خليفة علم الهدي

up

فوق

up

up

up

الناظر/ ادريس جمل الشيل
ما قصرت تب والدور ده برفعوا خالك براهو وكيتا في الكوز النبااااااح

محبتي واحترامي

الخال ود هباني

تحية لك أيها الجسور

Quote: وكيتا في الكوز النبااااااح

اها دي واحدة تاني كيتا فيهو

لي فوق

لي فوق

لي فوق

*************

لي فوق

up

up

**************

لا فوق

up