Post: #1
Title: فى الحتة دى !
Author: محمد حامد جمعه
Date: 10-17-2005, 02:33 PM
طيب يا جماعة ... اها ... الحل شنو .... بنتكلم عن قضية دارفور ... كدى علمونا الصاح والغلط فيها ... ناس بقال ومحمد سليمان بس شايلين امواسهم وشغالين ..... طهارة ... اى كلام ما بيعجبهم طوالى طاااااااااااااخ ... انت جلابى وجنجويد .... وامنجى ونافع خالك وقوش جدك ومؤجر وشغال (مغفل نافع ) ومانى شايف ليهم ناس (ابو داوؤد ) ديل صلاح مما جيت المنبر دا غير الشتيمة والردح بحق وباطل ... وبالمناسبة الحاجة لو ملاحظين طفشت الناس من بوستاتهم ... عاوزين يكضبو بس والناس تقول (امين ) ...
يا جماعة - وبخصص الكلام فى الحتة دى - للناس البقت زعلانة منى لانو بقال ورفاقه بقو مشربكين فينا انا ما عندى قضية (شخصية ) مع الجماعة ديل بس مشكلتى انى ضد (الزيف ) البيحصل باسم حقوق المساكين فى دارفور ... يا جماعة فى ذمتكم ...- ذمتى خلوها مؤتمر وطنى وكوز ومريخابى وبكتب بيدى الشمال - فى ذمتكم هسة دى حالة ... ناس مشردة وقاعدة فى الخلا المطر فوق راسهم والشمش فوق ضهرهم وبدل ما الناس تتحاور محاورة فاهمة وتقود لحلول (الجماعة التانين ) بس شغالين شتيمة ... يا مجرم الحرب يا فعلتك يا تركتك ... والناس هناك لا بتاكل بيانات لا بتتعالج بتوقيعات ... وعشان كدا منهجية الجماعة ديل واضح انها مسالة بتاعة ( شوفونى وبس ) لانو يا بقال وبقية المناضلين لو صحى قلبكم على اهلكم كان بحثتوا عن طريقة لتحسين ظروفهم ... حتقولو الحل فى المحاكمات و(الربط ) طيب دا لو بيحصل حيحصل متين سنة سنتين تلاتة عشرة ولغاية دا ما يحصل الحل شنو ... تقعدو بس تشتمو فى ناس دارفور يعنى الما ولدكم ومن اهلكم وخشم بيتكم زول عواليق ومطوفش ومشوطن مش كدا .. لو جا زميل فى المنبر دا وقال ليكم يا جماعة الموقف دا غلط ولا الراى دا اعوج ... القيامة تقوم ... تشبكوه ما عارف سويوتو وعملتو ... ودولة الجلابة القامت على قهر الغرابة ... قهر شنو ... بالله فكونا ... مما الله خلقنا عشنا مع كل السودانيين ... ما شفنا حلفاوى اكل حق زول من دارفور لانو غرابى وما شفنا شايقى طرد الفور والزغاوة من كريمة ودكاكين سوق تناقسى ... ما الغرابة ديل وصلو لحد انهم ناسبو ناس كتار فى الشمالية من حجر العسل لغاية تخوم مصر ... ولو عاوزين بحسب ليكم ... وامشو مدنى واسالو ناس (البوشى ) نسابتهم منو فى دارفور ... تانى فى اكتر من كدا التحام وتعايش زول يسلمك لحمو وعرضو تسترو ... فى اكتر من كدا ...
قصة دارفور وتخلفها ما بدعة ... والكلام دا قلناه كتير ... فى الشرق فى ظروف اسوا وفى حتات فى الشمالية دى زيو ... ولو على الدعم وسخاء اولاد المناطق ... يعملو شنو لدارفور ... يعنى جمال الوالى يخلى فداسى ويمشى يكب قروشو فى كتم وصلاح ادريس يخلى شندى فوق ويكب قروشو فى الطينة وابراهيم طلب والنفيدى يمشو جبل مره عشان تصفقو ليهم ... وين اغنياء دارفور .... هسة الزغاوة ديل فى ناس اغنى منهم تجار شطار ومدردحين ولو اهل الجزيرة يسمعون رنة قرش فى المريخ هم بيسمعو رنة التعريفة ام قد ... وين راسمالية دارفور .... ما قاعدين ماسكين قروشهم فى الشمال والخرطوم ... جيبو لى مشروع واحد دفع فيهو ثرى ومليونير من دارفور (مليم ) ... ما دفعو التكتح ... وجايين هنا تنوحو وتشتمو ... ولو على السلطة هسة فى زمن الانقاذ السجم دى غير الطيب سيخة وعطا المنان والجيلى احمد الشريف فى زول من غير عيال دارفور حكمهم ... ما خليل ابراهيم كان قرن فيها والاستاذ يحيى وصلاح على الغالى وعبد النبى على احمد ودريج وقائمة طويلة كلهم ديل لو ما نافعين يعملو ليكم شنو ... كدى الله يورينا فلاحة ناس بقال ديل وانشاء الله يبقى والى ونشوف ... عدلو وشغلو ...
المسالة فى دارفور عاوزة معالجة بتاعة عقل وحكمة وموضعية وشهادة مننا نحن ناس دارفور بحق انفسنا امينة مش نحمل بلاوينا للناس التانية ونقعد بس فى قنطير الكلام والجعجعة واحييك يا مناضل ومرحب يا بطل ... لو الزول مارس نفاق وتملق معانا يا نشتمو لو الزول بقى بتاع نصيحة ...
اها يا وليدات دارفور ... اهلنا قالو ما تمشو - يعنى ما تمسحو - الدهن فى الصوف ... امسحو فى وشكم ... عديل وبعدين تعالو املاو الحلة دى صور ... وبيانات ونجر بتاع قصص وحكاوى ... وشكرا لكل اهل السودان الاكرمو دارفور واحترمو اهلها وختوهم فوق راسهم لو فى زول جاب لنفسو الكلام من الدارفوريين والناس زعلت منو وابتو احسن يقعد مع نفسو كويس يشوف عملو الشين العملو شنو بعدين يجى ينصب نفسو صاحب مقعد (ولاية الفقيه ) على النضال وحركات التحرر الوطنى ...
|
Post: #2
Title: Re: فى الحتة دى !
Author: فيصل نوبي
Date: 10-17-2005, 02:52 PM
Parent: #1
| Quote: وين اغنياء دارفور .... هسة الزغاوة ديل فى ناس اغنى منهم تجار شطار ومدردحين ولو اهل الجزيرة يسمعون رنة قرش فى المريخ هم بيسمعو رنة التعريفة ام قد ... وين راسمالية دارفور .... ما قاعدين ماسكين قروشهم فى الشمال والخرطوم ... جيبو لى مشروع واحد دفع فيهو ثرى ومليونير من دارفور (مليم ) ... ما دفعو التكتح ... وجايين هنا تنوحو وتشتمو ... |
الاستثمارات بره البلد يا كمندان
|
Post: #3
Title: Re: فى الحتة دى !
Author: هشام مدنى
Date: 10-17-2005, 03:10 PM
Parent: #1
| Quote: المسالة فى دارفور عاوزة معالجة بتاعة عقل وحكمة وموضعية |
زمـــان قلنا الكلام ده..... كان الحــل ممكن..
لــكن الان مافي حل والعندو حل ماعندوا الشجاعة يقوله..
المصالح... والمصالح.. والمصالح...
|
|