ندك ونشك ولا نلعب ( يوجد صور)

ندك ونشك ولا نلعب ( يوجد صور)


09-23-2005, 06:03 AM


  » http://sudaneseonline.com/cgi-bin/sdb/2bb.cgi?seq=msg&board=80&msg=1127451782&rn=0

Post: #1
Title: ندك ونشك ولا نلعب ( يوجد صور)
Author: aosman
Date: 09-23-2005, 06:03 AM


زمان كنا مولعين شديد بلعب الكتشينة وخاصة الوست وطبعا كنا مفلسين شوية, عشان كده لمن الكتشينة تقدم شوية مرات كتيرة نتم الورق من الورق القديم, وبعد مرات ما بنلقى الورقة المناسبة عشان كده بنشيل اي كرت ونتكب فيهو بالقلم اسم الكرت المفقود مثلا دامت شيرية ولمن يكون عندنا قروش بنشتري كتشينة جديدة واللعب بالكتشينة الجديدة دائما بتكون ممتعة شديد والمنافسة بتكون عليها شديد وطبعا اللعيبة بكونوا اربعة لمن اتنين يتغلبوا بمروقوا وبجوا اتنين جدد بدلهم يعني التغيير بشمل خمسين في المية من اللعيبة.
الحاجة دي اتذكرتها مع تكوين الحكومة الجديدة في السودان ناس الحركة الشعبية وجزء من المعارضة الشمالية دخلوا في تكوين الحكومة الجديدة يعني الكتشينة اضافو ليها ورق جديد وعشان كده في ورق لازم يتحزف وكمان خمسين في المية من اللعيبة لازم يتغيروا لو استخدمنا منطق الكتشينة.
الغريبة الحكومة دي رفضت تمرق الورق الزيادة وقامت كتبت عليهم كلهم مستشار وزير دولة ومعظم اللعيبة بتاعنها خلتهم ووزعت ليهم الكروت من جديد بس في لاعب اسمه الجاز حلف قال ليهم كان زحيتوني من محلي ده انا شايل معاي كبريتة بوعلها في روحي وكلنا نحرق اها ده خلو ليهو كرته في يده وفي واحد تاني كمان قدم استقالته بفضيحة سلموهو الكرت بتاع الدفاع .
الحكومة دي ما عارفة بانه الكروت لمن تقدم بتتشرط وبتكون متعبة شديد في المسك ولا شنو يا جماعة؟؟؟؟؟؟؟؟؟؟
كده عليكم الله اشرحوا لي الحاصل!!!!!!!!! راسي شيب من الكلام ده!!!!!!!! اللهم لا اعتراض في حكمك.







في صور تانية بس اصبرو شوية
Post: #2
Title: Re: ندك ونشك ولا نلعب ( يوجد صور)
Author: aosman
Date: 09-25-2005, 10:32 PM
Parent: #1










1-للتعليق


2-للتعليق
Post: #3
Title: Re: ندك ونشك ولا نلعب ( يوجد صور)
Author: محمد السر
Date: 09-25-2005, 11:22 PM
Parent: #1

يعني ناس الإنقاذ عملوا الويست بي فردتين؟؟؟
بس المشكلة فردة بلاستيك وفردة ورق!!!
لكن عفيت منهم..
ويست..
حريق..
خم الولد..
حكم الشايب..
تتشكَّ تتدكَّ..
الجوكر دا (وزارة الطاقة) ما بشكوهو مع الورق
تفاتيح!!
Post: #4
Title: Re: ندك ونشك ولا نلعب ( يوجد صور)
Author: aosman
Date: 09-25-2005, 11:36 PM
Parent: #1

Quote: يعني ناس الإنقاذ عملوا الويست بي فردتين؟؟؟
بس المشكلة فردة بلاستيك وفردة ورق!!!


بس المشكلة اللعيبة ياهم زاتهم ما بتغيروا وفي لعيبة كده ثابتين كان اتغلبوا ولا لا لاعبين لاعبين مافي اي طريقة حتى لو الواحد مرق بيفضيحة برجعوه تاني