العائدون من الاجازات

خلال الاسبوعين الماضيين شهدنا عودة الكثير من الاسر والافراد العائدين من الوطن بعد ان امضو اجازاتهم في ربوع الوطن بين الاهل والاحباب , ورغم انهم كانو متواجدين في السودان في فترة واحدة تقريبا نلاحظ تباينا كبيرا في انطباعاتهم عن السودان والاحوال السائدة هناك , وبعد ان التقيت بالكثير من المعارف والاهل والاصدقاء العائدين من الاجازات واستفسرتهم عن الاحوال هناك بالتركيز على الاحوال المعيشية وفرص العمل وامكانية العودة النهائية والاستقرار هناك ... الخ لاحظت انهم منقسمين لفئتين
لا ثالث لهما :

الفئة الاولى : عادت بانطباع جيد وابدت رغبة شديدة في العودة النهائية بعد لملمة اطرافهم هنا , رغم انهم لم يقولو اطلاقا ان الوضع ممتاز 100% الا انهم اكدو ان الامور في تحسن وفرص العمل ( واقصد هنا العمل الحر ) متاحة وبقليل من الصبر والمثابرة الامور بتمشي خاصة وانهم وقفوا على تجارب بعض الذين سبقوهم في العودة النهائية وسارت امورهم بصورة جيدة رغم وجود عدد من التجارب الغير ناجحة لاسباب عديدة مثل عدم التخطيط الجيد او سوء الادارة وغيرها من اسباب .

الفئة الثانية : وهي فئة ( يا زول جدد اقامتك وخليك قاعد ) وهذه الفئة عادت بانطباع غير جيد وان الاحوال سيئة والاسعار غالية والصرف كتير والباعوض كتير والعيال مرضو وخلافه ...

اعتقد ان الفئتين صادقتين تماما , فلا احد ينكر ان هنالك تحسن نسبي في احوال البلد بصورة عامة وامكانية العودة النهائية والاستقرار متاحة ( اذا كنت جاهز طبعا ) , ولا يمكن ان ننكر غلا الاسعار والتردي في بعض الخدمات خاصة اذا تمت مقارنتها بالبلاد التي نعيش فيها حاليا .
اما التباين في انطباعات العائدين من الاجازات اعتقد انه يرجع الى تباين ظروفهم المادية والنفسية والتي انعكست بالتالي على انطباعاتهم التي خرجو بها من هناك , فمثلا شخص ذهب الى الاجازة وهو في وضع مادي جيد واستطاع خلال اجازته ان ينجز بعض الامور التي كان يخطط لانجازها هناك دون ان تمر به ضائقة مالية او خلافه حتما سيعود وهو راضي تماما عن نفسه وبالتالي سينعكس هذا الرضى على انطباعاته والعكس صحيح .

وبين هذا وذاك يبدو انه علينا ان نصبر حتى تتاح لنا فرصة الذهاب بانفسنا لنرى من اي الفئتين نحن . والى ان يحين ذلك يؤلمني جدا ان البعض يلتقطون بعض انطباعات العائدين المحبطين ليجدوها زريعة لكيل الشتائم لوطن اسمه ( السودان ) هو انت وانتي وانا ونحن جميعا , والذي سيكون بخير متى ما كنا نحن بخير بغض النظر عن ( حيكومات تجي وحيكومات تروح ) فالسودان هو الوطن الدائم .

محارب
تحياتي لك وللأسرة
صحيح أن أمور كثيرة (تنرفز) الواحد في السودان
صحيح أن عجلة التغيير تبدو بطيئة بشأن بعض الأشياء
صحيح أن هناك منغصات ومعوقات
صحيح أن هناك فساد ورشوة ومحسوبية و(جهاز مغتربين)
صحيح أن هناك تردي رهيب في الخدمة المدنية
صحيح أن الكهرباء تقطع في بعض الأحيان
ولكن
في تقديري كل الأمور ماشة نحو الأحسن
وسأكتب عن ذلك لاحقا.
علينا أن ننقد الأوضاع القائمة، لكن في المقابل هناك تحسن فالسودان اليوم ليس هو السودان 2000 أو 1990 أو حتى 2003

الحبيب خالد عويس

اولا حمد لله على سلامة العودة
وانشاء الله تكون وجدت الجميع بخير
سالت عنك يوم امس الاخ يحيى وعلمت انك رجعت بالسلامة


اثق تماما في قلمك الشريف وفي انتظار ان تكتب لنا عن ما عدت به من انطباعات


اكيد شكري ,,,

Quote: والى ان يحين ذلك يؤلمني جدا ان البعض يلتقطون بعض انطباعات العائدين المحبطين ليجدوها زريعة لكيل الشتائم لوطن اسمه ( السودان ) هو انت وانتي وانا ونحن جميعا , والذي سيكون بخير متى ما كنا نحن بخير

هذا هو فشفاش الحقيقة يا محارب

فالوطن بخير وعافية...بنيله وأرضه...

وبالله ما تنسي تصنفني معاك من الفئة الاولي...
برغم من انني لم اكن املك فلوس ايام اجازتي
ولم تعصلج معي يوما ما...

ولم ترتادني حالة حراق الروح والشحتفه المستديمه معنا الآن..

الاخ نزار

متعك الله بالصحة والعافية
امثالك يبعثو الطمائنينة في النفس

شكرا على المرور الكريم

up

Quote: فشفاش الحقيقة

يا نصار..هو الحقيقة عندها فشفاش.. نحن السودانين نقول فشفاش والمصريون يقولوا( فشة) وعندما اسمع كلمة فشفاش.. دي كدة طوالى بتذكر المرارة وواحد جزار كدة يجهز المرارة ويجيب الحويصلة الصفراوية.. العلى الكبدة ويروح نافخ الفشفاش ويكب فيهو هذه العتة وبعدين يفركها كدة بي يديهو يقول عشان تبقي طاعمة.ويروح مقطعها مع المرارة كلها . ما بحب المرارة عموماً.. والشعوب التانية هنا تتقزز مننا وتقول السودانيين سحاحير ياكلوا اللحم نى...
على العموم. سمعنا في اللغة( فلان اصاب كبد الحقيقة.., عين الحقيقة.. وقلب الحقيقة.. وذات الحقيقة.. ) وكلمة اصابها في مقتل البي يتداولها الكتاب دي ذاتو ما قاعدة تريحني.. ليه يقتلها هو من الأول.. وليه يصيبها في مقتل.. كمالا يريحنى حرف ( الخاء) في اللغة.. كدي حاول قول خا ..أخخخخ.. ما مريحة موش كدة.. في بعض المتحدثين اللبقين بيحاولوا يخففوها في الكلام... نصار أظنك تداعب لما قلتا فشفاش الحقيقة صاح...
وبعدين ربنا يعم بالسلام بلدنا. كلما نشوفو ماشي احسن بنفرح...

الاخ منصوري
(منصوري موقد نار انا )

تحياتي وتقديري

كدي يا خوي خلي الفشفاش ده شوية وورينا رايك شنو في انطباعات العائدين من الاجازات ديل

والله حيرونا عديييل

شكرا على المرور الكريم

up

Quote: فلان اصاب كبد الحقيقة.., عين الحقيقة.. وقلب الحقيقة.. وذات الحقيقة

يا منصوري بس ديل اضيف ليهن فشفاش

ببقن

جقاجق الحقيقة...

up

يا نصار بلدياتنا محارب دا بعد كدة حايقوم يديلنا على راسنا.. هو عاوز البوست بتاعو يمشى لى قدام ويناقش ليهو موضوعو دا.... قلنا يانصار نوقف من قصة الفشفاش الجبتها انت دي وننطلق لى قدام ونرجع لى محارب في موضوعو الأساسي.. كمان إنت تقدمت شوية يانصار وعملتها جقاجق..؟ إنت عارف يانصار الجقاجق دي لما تكون بتاعة خروف ياداب مضبوح. موش مضبوح ولحمو مصبر في التلاجة.. وبعدين تطبخا ليك مرة فالحة كدة. تكون صلصتا ما كتيرة.. وجيبوا ليك معاها عيش بلدي نوع الفوقو ردة بي فوق داك. والله ممكن تاكل ما تشبع لغاية ما عرقك ينقط.... يا بلدياتنا محارب.. ما تزعل حا نوقف هنا أنا ونصار.. ونقول ليك برضو( أنا بالكرم مشهور أنا.. وللضيف أعقر التور أنا.أنا من عيال منصور أنا..) يعني تمينا ليك يا محارب القصيدة البديتا انت تشكر.... بعدين يا نصار فكر شوية ... وردت في النص هكذا كلمة( مضبوح) ليه السودانيين يقلبوا الذال ضاء.. كدي فكر في الموضوع دا...هل كان أعراب الجزيرة العربية زمان في بطون الوديان عندهم حاجات زي دي.؟
بلدياتنا محارب..
أنا لم أنسى موضوعك الأساسي. وشوف أول رد لى عليك هو..( نتمني نشوف بلدنا ماشة لى قدام) معناهو شنو؟ معناهو في تقدم.. لكن المسألة شائكة وصعبة.. عشان نقول ليك خلاص ابدأ العد التنازلي وسوق اسرتك وارجع السودان.. المسألة ذات ابعاد تصورها بعيد جداً وياريت الناس تتجرد من المناظير السياسية عشان تعطي الحقيقة مجردة ودي صعبة يا محارب..كل واحد ليهو منظار سياسى له لون معين.. وقليل من يري الأبعاد خارج هذا المنظار بل يكون مقيد به تقيداً يكاد يكون كاملاً... ( يعني زي كلام مرتك بي تشوفوا غلط؟ نادر ما تشوفو غلط) إلا يصححك بعد ثالث وبعد رابع من خارج المنظور... وراي الشخصي انا حسناً طرحته هنا عشان تجد المناظير والألوان والوان الطيف السياسى والإجتماعي كلها وعليها أنت تصهر هذا الكم وتقرر هل ترجع السودان والله لا... برضو رجعة السودان تتوقف عليك؟ وعلى اسرتك مدلعهم؟ آيس كريم.. مشتروات حلويات عصاير مشكلة.. البسة شتوية البسة صيفية البسة رياضية. هوايات متعددة..نوع خاص من التعليم.. طبقية فوقية... كل هذا يدخل فيه المنظور الشخصى... هل حا يعيشوا في الشمالية والله يعيشوا في العاصمة..؟ هل حا ياكلوا القراصة والله عايزين. البتزا والبرياني والكبسة والهريس والمحمرات والمشويات..بعدين يدخل فيه عامل راس المال المناسب بالنسبة لك؟ وتدخل فيه الخبرات العملية بالنسبة لك خبرتك شنو؟ وفي اي مجال ممكن تطورها...ماهو هسه انت اذا كان عايزين يختوك في الخدمة المدنية يختوك شنو؟ يعني اكبر وظيفة تشوفا مفصرة معاك... جيراننا المصرين عندهم نظام تدفع لى وظيفتك اذا كان انت مغترب وكل ما تترقي دفعتك فى مصر انت عملياً تلقي نفسك ترقيت معاهم.. يعني لما تجي من أغترابك تلقي نفسك ممكن وكيل وزارة.. ( دي في عالم النظم وإطار الحكم يسموها دولة مؤسسات) يعني يروح راس الدولة الفوق لكن المؤسسات ثابتة وأطرها ونظمها ثابتة ولا رئيس الدولة يقدر يتدخل فيها.. خدمة مدنية عريقة عتيقة ثابتة... أها النظرية دي عندنا في السودان مافي... بأختصار ممكن اقوليك يا محارب.. ممكن تجي بأسرتك بعد اقل شى بيت وعربية ومائة الف ريال سعودي.. كدة ممكن حالك يمشى.. يعني في حركة موش زي زمان.. والله رايك شنو؟ بعدين يا بلدياتنا محارب شوف البوست بتاعك دا أنا ونصار قلبناهو ليك فاكهة ذات روض نمير.. من هنا شى ومن هنا شى .. لكن يظل الموضوع المهم.. هو تحديد الرجعة النهائية وراي الناس فيها شنو؟

المسألة ذات ابعاد تصورها بعيد جداً وياريت الناس تتجرد من المناظير السياسية عشان تعطي الحقيقة مجردة ودي صعبة يا محارب..كل واحد ليهو منظار سياسى له لون معين.. وقليل من يري الأبعاد خارج هذا المنظار بل يكون مقيد به تقيداً يكاد يكون كاملاً...
ـــــــــــــــــــــــــــــــــــــــــــــــــــــــــــــــــــــــــــــــ

(ياهو ده الشين البيخلي الزول يعضي ايديهو)

اخي منصوري

كلامك صحيح واضم صوتي لصوتك واتمنى ان الناس تتجرد من المناظير السياسية الضيقة خاصة في ما يتعلق بالوطن...

الذي يعارض النظام او الحكومة ايا كانت فهذا شأن يعنيه وله الحق في ان يعارض وفق الرؤية التي يراها....

ولكــــن يجب ان يفرق بين هذا وبين معاداة وطن
المنظار السياسي يجب ان يتوجه فقط للنظام الذي يعارضه
وهذا يقودنا لموضوع ( التربية الوطنية ) واعتقد انها تحتاج لبوستات كثيرة ...

يجب ان يكون الوطن فوق الجميع ... وبعدها فالنختلف فيمن يحكم ... وكيف يحكم

اخي محارب لك التحية لسردك هذا الموضوع فانطباع الفئتين كلاهما في محلهما فالمشكلة اولا في الشخص نفسة فاذا قسمنا الفئتين الى اثنين نجدان:

الفئة الاولى ذهبت الى السودان بدافع العمل فيه والرؤيه بعين البصيرة وفى نفس الوقت لها تخطيط وادارة صحيحة ومشاريعها ايضا فعالة لذا وذلك نقول ان ينجحو في كل بلد حتى ولو كان الاستثمار فيه قليل ناهك عن السودان الذي فتح ايدية الى العالم كله بالاستثمار.

فاما الفئة الثانية هذه ذهبت الى السودان بقليل من الحكمة والتخطيط بل يكونوا ليس لهم تجارب او الشخص الذي يدلهم على الافضل فبالاطلاق سيوف يكون مصيرهم الاحباط.

يعنى ممكن نصف الناس وليس تصنيف السودان اتحسن او لم يتحسن.

ولك مني خالص تحياتي

الاخ الامين



انا صنفت ( الناس ) العائدين من الاجازات حسب انطباعاتهم

شكرا على المرور والاضافة