Post: #1
Title: بخاري بشير..صقيلا وسميناً
Author: وجدي الكردي
Date: 09-06-2005, 10:39 AM
الاستاذ بخاري بشير, سكرتير تحرير الرأي العام, ورفيق الكيبورد, وشاعر الدوبيت المدسوس, وعضو المنبر النشط, عاد من اجازته السنوية صقيلا وسميناً وعلى محياه شريحة من الاناقة التي لم تبعثرها الكتاحة بعد.. رحبوا معنا بالزميل بخاري
|
Post: #2
Title: Re: بخاري بشير..صقيلا وسميناً
Author: عبد الحميد عوض
Date: 09-06-2005, 10:44 AM
Parent: #1
انا اول المرحبين واتمني ان الرجل قد تعافي تماما , بالمناسبة ياكردي الدنعو دا لسع ما قبلوهو ولا هو وبخاري ما بقعدو في حته واحدة
|
Post: #3
Title: Re: بخاري بشير..صقيلا وسميناً
Author: salma altijani
Date: 09-06-2005, 11:18 AM
Parent: #2
بخاري بشير
حمد الله علي السلامة
عندي مادة في السكرتارية نازلة متين عليك الله
|
Post: #4
Title: Re: بخاري بشير..صقيلا وسميناً
Author: نادية عثمان
Date: 09-06-2005, 01:16 PM
Parent: #3
بالله؟!!!
يعنى بخارى ود بشير البقطع فيهو الدوبيت ورا الدوبيت ده هو سكرتير تحرير الرأى العام ؟!!!
لاحولاااااااااااااااااااا
ياناس قولوا كلام غير ده!!!
|
Post: #5
Title: Re: بخاري بشير..صقيلا وسميناً
Author: salma altijani
Date: 09-06-2005, 01:21 PM
Parent: #4
يا نادية انتي قاصدة بخاري بشير؟
سكرتير تحريرنا؟
|
Post: #10
Title: Re: بخاري بشير..صقيلا وسميناً
Author: نادية عثمان
Date: 09-06-2005, 04:55 PM
Parent: #5
Quote: يا نادية انتي قاصدة بخاري بشير؟
سكرتير تحريرنا؟ |
سلمى التيجانى
سلومة العسل
يازولة هو انا اسألك تسألينى ؟!!
انا اقايتو فى زول دوبااااااااى وغناااااااى وبكاااااااااى بى هناك فى بوست المسادير اسمو بشير لكن ماعارفة ياهو بشيركم ولا تشابه بشائر !!!!
|
Post: #15
Title: Re: بخاري بشير..صقيلا وسميناً
Author: بخاري بشير
Date: 09-07-2005, 12:43 PM
Parent: #10
يا نادية
//////////////
لو ما الغنا السويتو ما بوصلك
يا الدهب المجمر الناس تجيك في محلك
يابت العزاز لي زمن من دلك
أبقي أدينا غشوة عند الجماعة المتلك
|
Post: #13
Title: Re: بخاري بشير..صقيلا وسميناً
Author: بخاري بشير
Date: 09-07-2005, 12:03 PM
Parent: #2
عزيزي عبد الحميد عوض
ويينك ياراجل ...والله مشتاقين..أما الدنعو لو ما وسعنا معه المكان تسعنا أشياء أخرى!!!!
//////////////
الأخت الفاضلة سلمى التجاني
يكفينا فخرا أنك من أسرة الراي العام,,بكل ذلك الألق والقدرة الفائقة على الإدهاش....ومادتك أصبري عليها شوية.
|
Post: #6
Title: Re: بخاري بشير..صقيلا وسميناً
Author: Abdulla Ageed
Date: 09-06-2005, 01:38 PM
Parent: #1
سيدة النمّة يستاهل رجوعو كرامة
مشتاقين كتير، ومعانا ليكا ملامة
كيف بتفوت بلا تأشِّر تسوي علامة؟
شِفقنا عليك ياخي انشاء الله تبقى سلامة
ود عقيد
|
Post: #7
Title: Re: بخاري بشير..صقيلا وسميناً
Author: وجدي الكردي
Date: 09-06-2005, 02:10 PM
Parent: #6
الزول السمح يوم الخميس واعدنا
في ديم كسلا ان سافرنا منو بعدنا
ياعبد الامين ما شفتو كيف واددنا ؟
الدرعة ام شلوخاً ستة مالكا عشقنا..!
* اها يانادية ..بخاري ده مطمورة دوبيت مرشوش بموية مطرة في صقيعة البطانة , رغم انو جعلي الا قليلاً., أو: لو اتزحلق غادي شوية كان طلع شايقي..!
قال يرتاح الليلة شوية وبكرة يجي..
|
Post: #8
Title: Re: بخاري بشير..صقيلا وسميناً
Author: محمدين محمد اسحق
Date: 09-06-2005, 02:20 PM
Parent: #7
اخي وجدي الكردي ..
نرحب معك بعودة الاخ والزميل بخاري بشير من أجازته السنوية ..
ونتمني ان يشاركنا في المنبر بارائه النيرة بمثل قوة مشاركات الاخت سلمي التجاني ..
|
Post: #9
Title: Re: بخاري بشير..صقيلا وسميناً
Author: وجدي الكردي
Date: 09-06-2005, 02:39 PM
Parent: #8
شكرا ليك
|
Post: #11
Title: Re: بخاري بشير..صقيلا وسميناً
Author: وجدي الكردي
Date: 09-07-2005, 04:04 AM
Parent: #9
ياودعقيد ويا نادية..
جهزوا الدوابيت _ جمع دوبيت ولا علاقة لها بالتوابيت _ بخاري جاييكم بمسدار: " عيون الصيد في الاجازة"..!
|
Post: #18
Title: Re: بخاري بشير..صقيلا وسميناً
Author: بخاري بشير
Date: 09-08-2005, 07:19 AM
Parent: #8
الأشتاذ الجليل محمدين محمد اسحق لك تحياتي ,,وأأمل أن أكون عند حسن الظن دائما.. مع فائق تقديري
|
Post: #16
Title: Re: بخاري بشير..صقيلا وسميناً
Author: بخاري بشير
Date: 09-07-2005, 12:56 PM
Parent: #6
الأخ الكريم والأصيل عبد الله عقيد لك التحايا
/////////////////
يا ود عقيد إت فائق جمعنا شهامة
فارع في الشعر باقيلنا ساس وعلامة
مشتاقين كتير وكايسين نضمكم ياما
ومابنفوتو ربعك كان تطير الهامة
|
Post: #12
Title: Re: بخاري بشير..صقيلا وسميناً
Author: بخاري بشير
Date: 09-07-2005, 10:08 AM
Parent: #1
العزيز جدا وجدي الكردي
لك آلاف التحايا
فعلا كان فقدي لرفقاء الكيبورد قاسيا, وأنا في ارتحال وتطواف لا بفتر أثناء الاجازة السنوية..في بلاد ليس كما قال الطيب صالح تموت من البرد حيتانها,ولكن في أصقاع من السودان إن وجدت فيها وسيلة اتصال هاتفي فأنت محظوظ..دع عنك وجود انترنت أو بوستات دافئة ,كما هوالحال ونحن بينكم.
أحبتي لكم افتقدناكم ,,ولكم تقاذفتنا الأشواق في تحنان الى اللقيا.
عزيزي وجدي لقد أدهشتنا بمفردتك الرائعة والفارعة برغم انك من منابت أخوتنا الحلفاويين..لك الود وأنت تنثر علينا هذه الرياحين..
ودمت
|
Post: #14
Title: Re: بخاري بشير..صقيلا وسميناً
Author: وجدي الكردي
Date: 09-07-2005, 12:27 PM
Parent: #12
على طريقة مايكوفسكي حين وضع مسدسه على جبينه ـ الايسر او الايمن, ما عارف _ وقال قولته الشهيرة:
الى الجميع: ها أنذا أموت الان..!
ثم فعل فعلته ورحل.
وها أنذا بكامل ارادة لساني النوبي اتنحى من هذا البوست.. بعد ان وصل سيد العربان لاترك المساحة للعرب العاربة والغاربة والمستغربة من الـ حيحصل للدوبيت في الحتة دي..!
مرحباً اخي واستاذي البخاري بشير.
|
Post: #17
Title: Re: بخاري بشير..صقيلا وسميناً
Author: nashaat elemam
Date: 09-08-2005, 06:53 AM
Parent: #14
مرحبتين حبابو ود البشير الجانا
طالت فرقتك والليله جيتنا حدانا
تايهين بي وراك وقلوبنا فاقدا حنانا
الليله النور غشانا وحروفنا تم بيانا
يا كردي الجمال بان عديل في حرفك
نورت المنتدى وهداك مخدر جرفك
كملت البيان والكان بجهلك عرفك
بخاري خلاص وصل الليله هجدو طرفك
|
Post: #19
Title: Re: بخاري بشير..صقيلا وسميناً
Author: وجدي الكردي
Date: 09-08-2005, 09:44 AM
Parent: #17
والله يانشأت عفيت منك
بتجيبوهو من وين جنس الكلام ده؟
|
Post: #20
Title: Re: بخاري بشير..صقيلا وسميناً
Author: محمد عكاشة
Date: 09-08-2005, 10:21 AM
Parent: #19
الاخ وجدى
بخارى بشير فتى متوثب... فى الصحافة والشعر والادب والعلاقات الحميمة...ليته يغتر قليلا ..ليته..
على اية حال...يبلغه سلامى...يجده بخير هو..
والعزيزة الما بتسأل..سلمى..
ونشات الامام الذى غاب عن
امرأة خيدع وغانية لعوب !!!!!!
وناس اللاب فى (الراى العام)
والبدوى
واسماعيل
وناس الرياضة
والحسابات
والمطبعة
وانا جاى
اسال عن مكانى ..ارجو ان يكون شاغرا..
وده عنوانى
[email protected]
مع مودتى وتقديرى
|
Post: #21
Title: Re: بخاري بشير..صقيلا وسميناً
Author: نادية عثمان
Date: 09-08-2005, 04:42 PM
Parent: #20
Quote: لو ما الغنا السويتو ما بوصلك
يا الدهب المجمر الناس تجيك في محلك
يابت العزاز لي زمن من دلك
أبقي أدينا غشوة عند الجماعة المتلك |
عاد بالغت جد ياود بشير الليلة
ايامنا الخلت ياراقى ياخى حليلها
ود الكردى أضبح وسوى لينا بليلة
كرامة وفرحة بالاستاذ مكانتو جليلة !!
|
Post: #22
Title: Re: بخاري بشير..صقيلا وسميناً
Author: بخاري بشير
Date: 09-09-2005, 07:05 AM
Parent: #21
يا نادية الشعر فرحان حروفو صقيلة
من درر القصيد نور قافيتك ضاويلة
أمسكي مني نضما ديك حروفو عديلة
والباقي نيابة عني تقولو هادي الريلة
|
Post: #23
Title: Re: بخاري بشير..صقيلا وسميناً
Author: بخاري بشير
Date: 09-09-2005, 07:09 AM
Parent: #20
العزيز دوما محمد عكاشة
آلاف التحايا,,,نورت البوست
نتمنى أن نتواصل ..مع محبتي ,,وسلامك وصل الى الجميع..وستظل مكانتك دائما شاغرة بيننا الى أن تأتي بالسلامة.
لك أشواقي ,,ونحن منتظرين طلتك
|
Post: #24
Title: Re: بخاري بشير..صقيلا وسميناً
Author: ست البنات
Date: 09-09-2005, 09:39 AM
Parent: #1
يا أهل الشعر
أرجونى جاية عليكم
الدوبيت حكم
كان حافية أوصل ليكم
حار منى الدليل
وغلبنى أعتر فيكم
شيطان الشعر
جهجهنى من واديكم
دحين أدونى وصفوا
قبل المغيب بألفيكم
ست البنات .
|
Post: #25
Title: Re: بخاري بشير..صقيلا وسميناً
Author: nashaat elemam
Date: 09-10-2005, 01:34 AM
Parent: #24
راجينك من أمس ولليله ما طليتي
دفرنا عليك شوقنا وانتي ما رديتي
تعبانين وراك ان كان عُقب صديتي
بنفرشلك ورودي وبضيفك في بيتي
|
Post: #29
Title: Re: بخاري بشير..صقيلا وسميناً
Author: بخاري بشير
Date: 09-11-2005, 11:37 AM
Parent: #25
يا نشأت يمين ست البنات ضواية
دفرنا عليها ألبل قاصدين تمودا نهاية
فارشين الورود قاصين عمرنا حكاية
دايرين ست البنات تزاورنا عند التاية
التاية:مسدار ياأهل المسادير
|
Post: #28
Title: Re: بخاري بشير..صقيلا وسميناً
Author: بخاري بشير
Date: 09-11-2005, 10:47 AM
Parent: #24
مرحب بي ست البنات
ديوانا ليك مفتوح
تشربي من شعر أفراحنا
والكيف بي هناك
دوبيت
شيطان الشعر
حالف يودر فيك
لكن الدليل
ياست البنات
جاد ليك.......
|
Post: #26
Title: Re: بخاري بشير..صقيلا وسميناً
Author: ست البنات
Date: 09-10-2005, 02:35 AM
Parent: #1
جاياكم عديل
اخوانى والأخوات
زى مطر الرشاش
والمدفع الرشاش
بتحكر قلوبكم
زى خضرة بلدنا
الهمبريبا دعاش
البقعد حداكم
والمستجير والطاش
ان فارق جواركم
شوفو يبقى طشاش
ست البنات .
|
Post: #31
Title: Re: بخاري بشير..صقيلا وسميناً
Author: بخاري بشير
Date: 09-12-2005, 07:36 AM
Parent: #26
يا ست البنات الشعر الجميل
والكلمة عندك حلوة
كل ما نشابي ليك
نلقاك انت السلوة
كتري من حديثك
الحالي زي العجوة
والكاينة التكون
مادايرين
وراكم رجوة
|
Post: #27
Title: Re: بخاري بشير..صقيلا وسميناً
Author: ست البنات
Date: 09-10-2005, 02:44 AM
Parent: #1
ماب أبعد قسم
ما ببقى غير الأوبة
نقارتنا ترزح
والدارة فوقها النوبة
البقر المجندل
فى الحارة ساعة الحوبة
الكرم الأصيل
من نمولى لا عند سوبا
اخوانى العزاز
العزة ليكم فال
الخير والفرح
طابعنا ستر الحال
والجار البعيد
ان شاف صغيركم جال
يلحقكم يمين
قبال تقولو تعال
ست البنات .
|
Post: #30
Title: Re: بخاري بشير..صقيلا وسميناً
Author: nashaat elemam
Date: 09-11-2005, 12:20 PM
Parent: #27
يا ست البنات الفرهدت يادوبه
فاح عطرك عبق خلى العقول مسلوبه
الخلانا جانين نقوم ونقع في نوبه
مطرك الغشاناونحنا في راكوبه
|
Post: #32
Title: Re: بخاري بشير..صقيلا وسميناً
Author: بخاري بشير
Date: 09-12-2005, 07:41 AM
Parent: #27
يا ست البنات ادنينا وابقي قريبة
اياك في البنات الشاعرةانت اديبة
ما بنقول كلام تاخدنا فيهو الريبة
لكن الشعر اسكرنا انت عجيبة
|
Post: #33
Title: Re: بخاري بشير..صقيلا وسميناً
Author: Abdulla Ageed
Date: 09-12-2005, 07:53 AM
Parent: #1
سلام جاكم.. مدنكل لي ولوف و ولوفة
نشأت والبخاري ونادية نادية حروفا
جات ست البنات بعد افقدنا حروفا
عودة سلامة يا غايبين وبركة الشوفة
|
Post: #34
Title: Re: بخاري بشير..صقيلا وسميناً
Author: بخاري بشير
Date: 09-12-2005, 10:24 AM
Parent: #33
سلام للغالي بلدياتنا بركة الشوفا
طربانين خلاص وانفاسنا ليك لهوفا
جات نماتك الهيمانة زاهية حروفا
وعقبان جادت الأشعار تقول شهفوفا
|
Post: #35
Title: Re: بخاري بشير..صقيلا وسميناً
Author: nashaat elemam
Date: 09-12-2005, 11:33 AM
Parent: #34
يا ود عقيد ارواحنا ليك ملهوفه
طليت دارنا جيت ياخي بركه الشوفه
كتيره الجيه منك تكفينا منك طوفه
والخوه البقت بيناتنا ياخ معروفه
رحب بيك بخاري وزاد في الترحيب
معروف قلبو ضمه في الغرام حبيب
في فراقكم ايامو كساها ديمه نحيب
والليله بوجودكم اشواقو باقه لهيب
|
Post: #36
Title: Re: بخاري بشير..صقيلا وسميناً
Author: ست البنات
Date: 09-12-2005, 06:46 PM
Parent: #1
بخارى كلامو نقط
فوق الخلوق الشهد
ويا نشات طربنا
من الحروف بالجد
ات يا ود عقيد
بيك العدد والحد
بس يا نادية خبى
فسراع تعالى حدانا
ماب نبقى بلاك
كيفن بتبقى بلانا
ما تنكرمى تب
بحر الشعر مرسانا
ان غربنا منو
نسماتو ماب تغبانا
ست البنات .
|
Post: #38
Title: Re: بخاري بشير..صقيلا وسميناً
Author: بخاري بشير
Date: 09-13-2005, 11:11 AM
Parent: #36
يا نشأت حباب ست البنات في دارنا
بالشعر الجميل والكلمة توقد نارنا
في سمح الخصال بارين دوام مسدارنا
بيهو يدوم ذكرنا وتزدهر أيامنا
|
Post: #37
Title: Re: بخاري بشير..صقيلا وسميناً
Author: ست البنات
Date: 09-12-2005, 07:02 PM
Parent: #1
يا اخوانى تب
الدنيا ما سايعانا
من مطر الشعر
البس رزازو كفانا
عطر للمجالس
بالسرتية غشانا
وبى توب السرور
وفيض السعد غطانا
نادية أقدل جاى
فاقدين غناك معانا
زمردة العقد
حباتو ناقصة بلاها
ست البنات .
|
Post: #39
Title: Re: بخاري بشير..صقيلا وسميناً
Author: بخاري بشير
Date: 09-13-2005, 11:13 AM
Parent: #37
ياست البنات أريتها نادية تزاور
وماتطول كتير ذكراها يوت بتتاور
الملكة براها زينة وفوق إدينا أساور
وفي النظم المقفى بناها در وجواهر
|
Post: #40
Title: Re: بخاري بشير..صقيلا وسميناً
Author: ست البنات
Date: 09-13-2005, 11:35 AM
Parent: #1
شعرك يا بخارى
رصانتو زايدة رصانة
زى بحرا طمح
غطى العقول والهامة
اتحيرت تب
قت يبقى قيس طلانا
أو يمكن جرير
بركت رواحلو حدانا
ست البنات .
|
Post: #41
Title: Re: بخاري بشير..صقيلا وسميناً
Author: بخاري بشير
Date: 09-13-2005, 12:09 PM
Parent: #40
الشعر ياست البنات بادياهو من تبيتي
قولك فيهو نافذ و باز جميع دوبيتي
عيدي النمة فوقنا إياك تفولي أبيتي
يغطيك بالكمال رب العباد ذو البيت
|
Post: #42
Title: Re: بخاري بشير..صقيلا وسميناً
Author: ست البنات
Date: 09-13-2005, 07:25 PM
Parent: #1
فى درب الشعر
والله دابى غريرة
ماب اكذب واقول
زى ناس بخارى
ضليعة
بتعلم حرف
والكلمة دابى بجيدها
يتفلت يطير
زى الحدية وطيرا
نشأت وود بشير
وين غير نظمكم سيرة
كملتوا الكلام
جهرت درركم عيننا
ست البنات .
|
Post: #43
Title: Re: بخاري بشير..صقيلا وسميناً
Author: بخاري بشير
Date: 09-16-2005, 08:03 AM
Parent: #42
الدرر الغوالي محدرات من نظمك
ومن فن المحسن والبديع قال فمك
زيديهو الكلام يا ستي كتري نمك
خليها العقول تايهات معاك ومنك
|
Post: #44
Title: Re: بخاري بشير..صقيلا وسميناً
Author: وجدي الكردي
Date: 09-17-2005, 10:39 AM
Parent: #43
والله حيرتونا
اعترف بأنني من المؤلفة السنتهم.. وبالكاد اتحدث العربية.. والبوست ده حقي.. برضو ما عايزين تدونا معاكم فرصة؟!
عملتوها لينا دوبيت ولغة شلعوها العربان
اكتبوا بالعربي ياجماعة يا نسحب البوست..!
|
Post: #45
Title: Re: بخاري بشير..صقيلا وسميناً
Author: nashaat elemam
Date: 09-19-2005, 01:32 AM
Parent: #44
يا كردي اللسان عوجتو ديك ملحوقه
خليك واستمع للقمري فوقك قوقه
هديك ست البنات ام بوختاً مطبوقه
جاتك والبخاري ينمو ليك بي روقه
|
Post: #46
Title: Re: بخاري بشير..صقيلا وسميناً
Author: بخاري بشير
Date: 09-19-2005, 09:21 AM
Parent: #45
قلمك يا الإمام نماتو مي مسبوقة
حائز للبرنجي دوام زواملو لحوقة
جات ست البنات وكلاما فيهو الروقة
باين من حروفا نافحانا يوت بي ذوقة
|
Post: #47
Title: Re: بخاري بشير..صقيلا وسميناً
Author: ست البنات
Date: 09-19-2005, 09:49 AM
Parent: #1
الكردى اخوى
احترت من كلماتك
سويتنا عجم
وكلماتنا مو واقعالك ؟
نحنا يمين فطيمنا
ان قال نثر قدامك
تحلف بس تقول
جاء سيبويه أمامك !
ست البنات .
|
Post: #48
Title: Re: بخاري بشير..صقيلا وسميناً
Author: ست البنات
Date: 09-19-2005, 11:19 AM
Parent: #1
تهديدك وصل
يا كردى
كيف تطردنا
من دارك نفوت
وطيف الشعر جمعنا
ماك من الغبش
أهل القداحة معلا
الفارشين بروشهم
فى السهلة
على باب الله
يغشاها الحزين
يملأ المخالى مسرة
ومن تمر القرير
يدوهو كمين ملوة
اتلومنا تب
من غير اذن زرناك
قبيل قايلين
يمين بالفرحة تتلقانا
ما كان العشم
يا كردى تتغابانا
وتحرج ناس بشير
ونشأت ونادية معانا
ست البنات .
|
Post: #49
Title: Re: بخاري بشير..صقيلا وسميناً
Author: nashaat elemam
Date: 09-21-2005, 00:51 AM
Parent: #48
يا ست البنات وجدي ما كان قصدو
مستمتع كتير وكيفو واصل حدو
بس غلبو البقولو فيك او في ندو
وميزاتكن كتار والله ما بنعدو
|
Post: #50
Title: Re: بخاري بشير..صقيلا وسميناً
Author: بخاري بشير
Date: 09-21-2005, 09:04 AM
Parent: #49
ياست البنات الكردي ما بتلااااام
عاشق للقوافي وحبو للأقلااااام
راجيكم تسوقوا بوستاتو لي قداااام
بالشعر الجميل والكلمة يسمو مقااااام
|
Post: #51
Title: Re: بخاري بشير..صقيلا وسميناً
Author: ست البنات
Date: 09-23-2005, 06:22 AM
Parent: #1
بخارى ونشأت انتو
اللوم يمين عداكم
فتشتوا العذر
للكردى
بس بيناتكم
اتأفف وفات
ما صد
ما قال اسف
ولا عقب كلام
كأنه ما كان عارف
النضم الكعب
يوصل بلود ومشارف
لكن برضو نحنا
سامحنا شان خوتكم
لو يظهر يقول
أدونى طيب خاطركم
ماب تخمر قلوب
والله فى حضرتكم
ست البنات .
|
Post: #52
Title: Re: بخاري بشير..صقيلا وسميناً
Author: serenader
Date: 09-23-2005, 08:11 AM
Parent: #1
وهاك دي يا بخاري، كان تتطرا ايامنا:
الخبر الأكيد قالوا بخاري رجع
من الإجازة الطالت أيامها بلا وجع
لو كت طاري صحابك ما ظني تجمع
بين الغاب في الخليج والطنش ما استرجع
ومعاوية بسلم عليك...
****
رد خاص لنشأت:
سلام مربع ومن أبو خالد العجماني
"يسلمولي هالشوارب" "كتير واحشاني"
إن غلبك تترجم، ولا جهجهتك المعاني
إيميل صغير بحلك لو كت تتطراني
|
Post: #53
Title: Re: بخاري بشير..صقيلا وسميناً
Author: nashaat elemam
Date: 09-24-2005, 01:00 AM
Parent: #52
ليك وحشة يا خاتم وشوفتك كتير واحشاني
كتر ألف خير بوستاً ذكرك وخلاك تطراني
ابو خالدك عرفتو.. الكم بالوجع اشقاني
خليناها غربة ما بتفرز بين سوري او سوداني
|
Post: #54
Title: Re: بخاري بشير..صقيلا وسميناً
Author: بخاري بشير
Date: 09-24-2005, 08:58 AM
Parent: #53
الخاتم حبيبنا أريت أيامنا ديك طاريها
وكت نطرى أم خدود ,, اللحظة بنعديها
يارب يا كريم تجمعنا في واديــــها
والاحباب عموم بيناتنا وإت دخريــها
///////////
العزيز الخاتم لك آلاف التحايا ,,وكل الأحباب طرفكم أبلغهم عنا السلام..وإن شاءالله تكون معانا قبل العيد خاصة ورمضان على الأبواب...نفطر فيهو فطرة مندكلة ونجر الشريط.
|
Post: #55
Title: Re: بخاري بشير..صقيلا وسميناً
Author: nashaat elemam
Date: 09-24-2005, 09:25 AM
Parent: #54
الشافعه الشلع براقا شلع جوفي
شالت لمنامي وخلت صعيبه ظروفي
شايقاني الشويدنه ومعاها زايد خوفي
شايف شوفة الميرود مطشش شوفي
|
Post: #63
Title: Re: بخاري بشير..صقيلا وسميناً
Author: serenader
Date: 09-28-2005, 01:16 PM
Parent: #54
هاك يا بخاري:
بخاري"سكرتيرنا" أيامنا ديك ماك طاريها
وخليها أم خدود، الفيها من جديد بقت فيها
وكتين نسيت نجعة الخليج ونشاف بواديها
شن نسانا الأحباب، عل الرجعة شن طاريها
|
Post: #64
Title: Re: بخاري بشير..صقيلا وسميناً
Author: serenader
Date: 09-28-2005, 01:22 PM
Parent: #53
هاك يا نشأت:
وحشة الأحباب يا نشأت كتير واجعاني
نشاف بقعة، ورطوبة نقعة، وكم "بتاني"
دي النستني طاري ناس وحاجات حامياني
حليله الرجعة.. حليلة الصحبة.. بالحيل واحشاني
|
Post: #56
Title: Re: بخاري بشير..صقيلا وسميناً
Author: serenader
Date: 09-27-2005, 07:41 AM
Parent: #1
هاك يا بخاري:
الخبر الأكيد قالوا البورد بلم
البطرا والمابطرا عندو فيهو قلم
لو كان باليد والخاطر ما بنتم
ما راجعين أكيد إلا تفنيشة أو دم
|
Post: #57
Title: Re: بخاري بشير..صقيلا وسميناً
Author: حسن البشاري
Date: 09-27-2005, 08:08 AM
Parent: #56
رغم اننا لسنا من اهل الشعر والمسادير والدوبيت، لكن المساجلات الرائعة جعلتنا من اشد المتابعين لهذا البوست التحفة الذي كشف لنا جوانب اخرى متألقة لاخواننا الصحافيين غير متابعة الاخبار والتحقيقات واللهث وراء السبق ..
تحية للكردي الذي اخرج اجمل ما عندكم .. وليتكم تواصلون ..
استاذنكم اخواني الكردي وبخاري ونشأت ونادية في توجيه تحية من القلب للاخ الخاتم المهدي .
|
Post: #58
Title: Re: بخاري بشير..صقيلا وسميناً
Author: بخاري بشير
Date: 09-27-2005, 09:19 AM
Parent: #57
الى الرائع البشاري "العالم"
حسن البشاري الليلة زار بوستاتنا
جانا العالم النحرير وزاد فرحاتنا
ساءل الله الكريم تتم جميع ونساتنا
نرجع من جديد نفرح نعيد الفاتنا
///////////
الى الراكز في الذاكرة الخاتم
يا الخاتم يمين ذكراك دوام تنشم
ويوت طيب حديثك عطورو تتنســــم
السودان جميل فاقد بدور التـــم
شاحدنلو الإله خطواتو تتقـــــدم
///////////
الى "العالم" البشاري
ليك مني السلام يا العالم النحريـر
وبلغ عني "مالك" أصلو شوقو وفيــر
قول ليهو القصيد ما شاف بعدكم خير
يا سيد البلاغة اليك بطول الســـير
|
Post: #59
Title: Re: بخاري بشير..صقيلا وسميناً
Author: حسن البشاري
Date: 09-27-2005, 10:12 AM
Parent: #58
ليتني يا بخاري استطيع مجاراتك ..
ليتني امتلك شيئا من ناصية الشعر لاقول فيك مالم تقله الاوائل
ليتني ..
رسالتك الى مالك وصلت
|
Post: #60
Title: Re: بخاري بشير..صقيلا وسميناً
Author: nashaat elemam
Date: 09-27-2005, 11:09 AM
Parent: #59
الليله يا البخاري حروفنا زاد لمعانا
مادام البشاري اتحكر قريب وحدانا
اب قلباً نضيف حاشاو تعرفو خيانا
فرحانين خلاص بوجودو نحنا معانا
|
Post: #61
Title: Re: بخاري بشير..صقيلا وسميناً
Author: حسن البشاري
Date: 09-27-2005, 01:13 PM
Parent: #60
العزيز نشأت الامام
يااجمل الناس خلقا واخلاقا.. كيف لكلماتي التي لا تمتطي فرسا من الشعر ان تلحق بمقامكم .. غير اني على يقين من انكم تحسون بما اعجز عنه من نظم.
لكم حديقة من الورد فيها ما تشتهون.
|
Post: #62
Title: Re: بخاري بشير..صقيلا وسميناً
Author: nashaat elemam
Date: 09-28-2005, 00:53 AM
Parent: #61
استاذي البشاري
قليل في حقك ما نقول.. نحن نحاول التجمل حتى تليق كلماتنا بمقامك..
حفيٌ أنا بمقدمك.. وبهيٌ بك هذا البوست
|
Post: #66
Title: Re: بخاري بشير..صقيلا وسميناً
Author: serenader
Date: 09-28-2005, 01:30 PM
Parent: #58
هاك يا بخاري تاني:
الزمن الجميل ممحوق يوت ما بتم
سودانك جمالو خلو عندك واتقسم
مرات يفرهد عبيرو وليهو نتنسم
ومرات يحرن بعيرو ويتخمخم
|
Post: #65
Title: Re: بخاري بشير..صقيلا وسميناً
Author: serenader
Date: 09-28-2005, 01:27 PM
Parent: #57
العزيز اللذيذ، والعالم الفذيذ: حسن البشاري
تلك ايام خلت.. ما بين "شباككم" المفتوح على قلب ردهتنا، وصياح "الحاج" يتعالى، وغلاط ونزاعات.. وآخرها مطبعة.. وتلفون من الما بجيب اسمو خوفي الهوا يقسمو.. يرفع ضغط أعلى محولات الراسخين في المبنى...
يعلم الله أني أطراكم ذات أشواق، ويتعالى عندي النداء:
حليل ناس ليلى ساعت الليل يجن... (إلى آخر المناحات)
لك شوقي وافتقادي.. واحملك تحية مضخمة و"مضببة" لفحل الدوبيت مالك.. وللاستثنائي محمد الربيع محمد صالح.. وذلك الثخين عديم العشرة ابن عبد القادر.. وجميع من عندكم جاور..
|
Post: #67
Title: Re: بخاري بشير..صقيلا وسميناً
Author: حسن البشاري
Date: 10-02-2005, 12:59 PM
Parent: #65
الاخوان بخاري ونشأت والكردي
اسمحو لي اولا ان احي الاخ الخاتم الذي لا يحلو الحديث ولا تحلو المجالس من دونه .. نفتقد ايامه بيننا وطلته المحببة الى النفس .. والتحيات وصلت للاخوان بالدوحة.
اعود اليكم بخاري ونشأت بهذه الرسالة التي حملني اياها اليكم الاخ مالك :
بسم الله الرحمن الرحيم
الاخ بخاري بشير
السلام عليكم ورحمة الله وبركاته
ما يزال اخوك يعاني من متلازمة العلاقة العكسية بين الوفاء (لحلفاء) ودادي, وبين البنان المتأبي لما يوجب ذلك من الكتابة والتواصل والتراسل. هذا مع ما كنت اعتقد – غير محق- انني عقدت مع الكلمة عهدا ان يظل الوفاء بيننا – مثلما هو الحال معكم حقا – سمة لا ينال منها الزمن .
اعتذر لهذه (الدخلة – بفتح الدال)المعقدة مثل راهننا السياسي , ربما دفعني اليها شوقي لكم الذي لايعلوه إلا تهالك الحزبيين على الوزارة (اظنها من الوزر بكسر الواو وليست من الوزر بفتحها).
تحياتي لمنتسبي الرأي العام من لدن الاخوان في الاستقبال الى قمة الهرم التحريري. يجب الا انسى القاعدة محمد الفاتح وحسن كوكو وكير وكوال اؤلئك الذين يسدون خدمات (اسناد) للصحفيين بعضهم يلتمسها في صحن فول شهي , وآخرون ينشدونها في سيجارة (نشوى) وبعضهم يطلبها في زجاجة بارد يمرئ بها الطعام , او لبانة لبنات حواء.
اعتذر للاطالة في الاطلالة وارجو الاقالة لما تراه من اخطاء في المقالة.
وفي الختام .. السلام
اخوك زول الله -- مالك
|
Post: #68
Title: Re: بخاري بشير..صقيلا وسميناً
Author: بخاري بشير
Date: 10-05-2005, 11:28 AM
Parent: #67
الاخ الأكرم والعالم الجليل حسن البشاري ..
لك التحايا والأشواق الندية..
أستأذنكم أخوتي ,,في أني سأرد هذه المرة بالحديث المباشر وأترك الشعر والمسادير لتعليقات قادمة..,,ربما ما دعاني لهذا التغيير عمق الحديث والمداخلات بين العالم البشاري والراجل الضكران الخاتم ذلك الذي هو نسيج وحده,,,ثم أصبحت المداخلات في عمقها القوي بحديث زول الله مالك محمد طه,,هذا الرجل الإستثنائي في كل شئ..
أخي البشاري لك الحق المطلق في هذا البوست أن تحادث من تشاء متى تشاء..,والخاتم أيم الله لقد افتقدته الديار السودانية قاطبة..بكل أطيافها فهو علم في فنون الصحافة وقلم مع الشعراء ,,وكلمة مع الأخوان وفوق هذا وذاك أديب صاحب عبارة راسخة وعقل متقد..
عزيزي البشاري تحياتي
كنت فعلا منتظر لكلمات الأخ مالك هذا البدوي القح الذي تقاذفته موانئ الإغتراب ..وهذا العالم بضروب العربية وفنونهاولو عايشه المتنبئ لقال "أن ابن محمد طه أعلم بشعري مني"
لقد تقاذفتنا الحياة أخي مالك بكل جبروتها ,,وأخذت منا كل جميل ,,واصبحنا نسترق منها ما نستطيعه من لحظة حلوة ..أو تعليق يخطف الالباب,,هكذا أصبحنا ولاأدري الى أين نسير..
عموما هذه هي الحياة لمن أرادها تؤخذ غلابا..
اليكم جميعا أخوتي التحايا والاشواق ...
والى لقاء آخر في دروب النيت
|
|