خميسك لو تبيع قميصك

الليلة الخميس يوم واحد في الشهر وللان ما قبضنا الرواتب ومفلسين (فلسة فار الجامع)

والمشكلة ما في الفلسة لانها فلسة وتفوت واكيد بتجي راجعة تاني , المشكلة انو الليلة الخميس وبكرة الجمعة ؟؟ وطبعا اخوانا هنا في الرياض ( الاسر ) عارفين كويس الخميس والجمعة يعني شنو

نحن السودانيين الحمد لله عندنا عادات سمحة جدا ومعروفة للجميع
وبرضو ولله الحمد عندنا شوية عادات كدة لا نحسد عليها

والخميس زي خميس الليلة ده بيخليك متكبكب ( زي العزبة الشافت ليها راجل )

فجأة ودون سابق انذار يرن جرس الباب تقوم تمشي عشان تفتح وفي حالة الخمايس الذي دي تديها نظرة من العين السحرية لكي يطمئن قلبك
وعينك ما تشوف الا النور

تشوف ليك كم حاجة كدة بمقاسات مختلفة ومتوشحين السواد زي (النينجات) بتاعين الافلام اليابانية
وكم شافع ينططو وكل واحد مصر انو يضغط على زر جرس الباب والقصير فيهم يقول لاخوانو الطوال ارفعوني

ومن خلف اللوحة من فوق تشوف ليك عمة عمتين ( بكسر العين) مقلوظات وما تستغرب كان سمعت ليك نهرة من واحد من اصحاب العمم ديل يقول ( يا زول ما تفتح خلينا ندخل الاولاد ديل عشان نمشي نلحق لينا قيم كوتشينة في الجمعية ؟؟)

طبعا المشهد ده كلو بيستغرق ثواني تكون اتأكدت تماما انو دعواتك الكنت بتردد فيها طول النهار في سرك ( حوالينا وما علينا ) لم تغادر طرف شلاليفك !

وتفتح الباب وانت مبتسم ابتسامة عريضة جدا من الاضان للاضان وترحب
وتطمن نفسك بمثلنا الشعبي ( عيب الزاد ولا عيب سيدو- وبليلة مباشر ولا ضبيحة مكاشر )

طيب لو ما سويت كده سامي نفسك محارب فوق كم؟؟؟؟
يازول ربنا يعينك ويبعد عنك النينجرز وأشباه النينجرز لانو ديل دينجرز

اخونا نادر

انا سميت نفسي ( محارب ) لاني بحارب في الفلس سنين وسنين بدون فايدة

مكنكش فينا تب

شكرا على مرورك الكريم

الاخ محارب
سلام
جعل الله خمايسك زى الفل.
ياخوى لى اسبوع بشوف بعين واحدة, ومتجنب الكمبيوتر التقول عندو برجم, اول ما افتح القى عنوان بوستك دة, قلت خلاص فى زول حيحل لى مشكلة الخمايس المهببة دى بفكرة سحرية, نجى نلقاك كشفت حالنا؟ عليهو العوض فى خميسنا دة.

محي الدين يا خوي كيف حالك

الظاهر عليك ممكون مكنة صاح بالخمايس

الله يكون في العون

غايتو انا لو لقيت لي وصفة سحرية بلحقك بيها تب



شكرا على المرور

ود قاسم
د. سجيمان

ياريت تفتو لينا في موضوع الخمايس ده

بكرة خميس ؟؟؟؟؟؟؟؟؟

طيب رايك شنو نجيك أنا ومعاي ضيوف من دبي ؟؟؟؟؟؟؟

العزيز خالد ...
ب
والله ده كان يكون يوم عيدنا عدييل

وتشرف انت ضيوفك

انت طبعا من ( اولاد البيت )


تحياتي لك للاسرة

الأخ محارب
والله الفلس ده لو كان بقى راجل وسيدنا عمر بن الخطاب كتلو.. كان ريحك وريحنا منو.. لكن تقول شنو؟
حكمة والله وحكاية.. لكن وصيتي ليك تصلح علاقاتك مع بتاعين الدكاكين (عندكم هناك في السعودية سوبر ماركت) لأنو بحلوك من الزنقات
الزي دي
وجعل الله كل أيامك خميسات - اخماس- خمايس- ما عارف ياتا بالضبط

الاخ نشأت

انا خايف نعدي غربتنا ونحن بنضَرب اخماس في اسداس ؟؟؟؟


شكرا على مرورك

أخوي محارب

تحياتي العطرات

سؤال قبل كشف الحال

السؤال:
إنت يا اخوي ديامي ولا شنو ؟؟

(خميسك لو تبيع قميصك)

العنوان ده شعار الديامة ..
ولا ماكدي يا أبو ساندرا.

كشف الحال:
الليله الخميس ... والله أنا ماسكني فلسة
عمري ما عشت زيها .. بس قول ربك يستر



إسماعيل حميم

الاخ اسماعيل حميم

لك التحايا


((إنت يا اخوي ديامي ولا شنو ؟؟))

دي غايتو نقشتها نقشة

سكنت الديم فترة وبعدين رحلنا

لكن للان يشدنا الحنين والشوق للديم وناسو

احلى ناس