بنات تالته (هديه لأبوحراز بمناسبة العوده)

للشاعر حيدر مجتبى علي

كان منزلهم في طرف القريه حين تم انشاء مدرسة البنات المتوسطه(الثانوي العام زمان) بجوارهم
لايفصلها عن بيتهم الا شارع صغير وكان قبول اول دفعه لهذه المدرسه جعله يراقب اسراب القطا في غدوها ورواحها بالزي المميز (بني مشرب بحمره )
كان يستمع كل يوم لنشيد العلم
ويتابع الالقاء الجماعي للاناشيد وسور القرآن
عاش مع هذه الدفعه ثلاثة سنين وبعدها كان لزاماً ان تتخرج هذه الكوكبه لترحل بعيداً للمدارس الثانويه(الثانوي العالي) فخرجت هذه القصيده طوعاً



بنات تالتة

خلاص فايتات بنات تالتة
صحي مغادرات بنات تالتة
كل الحلة ما فايتة
وكيف الليلة موقفنا
زمان ما كانوا ريحانا
وكانوا أنغام توالفنا
وكانوا شموع وكانوا شعل تضوي النور تثقفنا
وجاء الميعاد وفاتوا بعاد
بعد عرفة وبعد إلفة
بعد تحنان ليالي هنا وليالي حنان
عشقت الحمره في ألوان فساتينن
وعشت العشرة من أزواق أساطينن
وكيف انسى وليه انسى صحيح أنسى
ما بنسى
جمال أسماء
وكانوا نصر وكانوا عتاد
وكانوا هدى وكانوا رشاد
وكانوا آمال وكانوا اقبال وكانوا نوال
وكانوا عطاء وكانوا أمجاد ...
سنينهم ماجدة
نفوسهم خالدة .. قداسة تلاد
وكانوا شوادي .. تغني بلادي
وتذكر خيرها وتنبذ غيرها
وتعيش جادة . وعاد فايتات بنات تالتة
صحيح الليلة جاء المقدور و وخلت الدور وشالوا الحور
وفايتة بدور
بعد عشرة سنين وأيام
مرت حالمة كالأحلام
وكانت غنوة كالأنسام
وكانت سلسلة أفلام
عناوينهم شكول أرمسيس
وحب رمسيس والهام رع
وحتشبسوت ووستنجهام
وكانت فذلكة تاريخ وكانت رحلة للمريخ
وكانت نظرة في جندول وكانت لمحة من الزول
وكانت نعمة ما بتزول
ولكن خانت الأيام وفجأة اندست الآرام
ستات الضمير والزوق
ومستر هوق
ما اقساك يا دنيا وما احلاك يا منية
وما بنساك يا تالتة
وإجن ماشات بنات تالتة
وإجن سارحات بنات تالتة
وإجن لابسات بنات تالتة
يعني الزي أحب الري
طبعاً اتذكرتوا حكاية الزي وأحب الري وأعشق مي
اصلوا القصة ماشة تطول وما معقول
المذاكرة ... المفاكرة ... المساهرة
كانوا بذاكرو والله
قبيل ساهي
وطبعاً بنجحن مضمون
وكيفن يفشل الليمون
وكيفن يزعل الليون
يمين الغلطة بي صاحين
ولا المكتوبة في تصحيحنا بي نعمين
وكلوا صحيح وكلو سمح وكلوا زين
كتابة السمحة فيها غلط
طبعاً لا أحب السين
وبكرة ان شاء الله يا حلوين
تعودوا ديارنا متقلدين ومتباريين
لا بسين السمح كاويين
وفي الهاير سكندري مقبولين
يا ناس تالتة أحب تالتة وأريد تالتة
دي كانت فذة في نوعه
دي كانت قدوة التاريخ
وباكورة ثلاثة سنين
ودا كان أول العنقود ودا المريود
أحب باريود
وآخر حصة من عمر الزمان
كانت يوم الوداع يوم البنات راحلين
وداعا وداعا وداعا زينة السمحين

الاخ زول ساكت
رائه
اهلا ومرحب بعودة الاخ ابو حراز

العزيز

زول ساكـت

عودة ابوحراز

ما مابنهـا..

بس مالو داير يطفش بنات ثالثه

وبعدين تالـته ماشـات وين يا عبس

مرة اخرى مرحب بعودة ابوحراز

ولك خالص الود والتحـية يا عباس

ولـيـد

ياوليد 400

الواحد دا هواده ساي

جيبنا ليك صاحبك ابوحرازفي البوست دا
عشان يحكي ليكم عن حكايتو البقت

المكاشفي
عجبتك آمولانا

ياحليلينا ماكبرنا خلاص
ناس هسي يقول ليك ديل من زمن الثانوي العام

شكراً كثيرا أخي عباس
وشكراً لكل المشاركين
والف تحية لصديقي الشاعر حيدر المجتبى
طبعاً الراجل بعد أن كان شاعراً مرموقا
تحول الآن الى شيء آخر تماما
واصبح داعية اسلامي وأنصاري سنة
قام بحرق كل شيء
حتى بنات تالتة لم يسلمن من الحريق
وعندما تحاوره الآن
يحاورك في ابي حنيفة وابن تيمية
كانت فترة رائعة جداً
وكانت البنات وقتها بكامل حيائهن
كنت وقتها بالصف السادس
وكنت اراقبهن وهن يأتين بمدرستنا
وتشاء الصدف أن يقوم المعلمون بالمرحلة المتوسطة بعمل درس مسائي لهؤلاء النسوة
كان ذلك بالقرب من منزلنا
ولم اصدق وقتها
فقد دخلت عليهم ذات مرة لأسألهم من اعراب هذه الجملة { مات الجندي }
طبعاً اعرابها سهل جداً
ولكن لم أدخل لإعرابها
انما لأرى هذا الصيد الوفير
قال لي استاذ اللغة العربية يومه
وكان الأستاذ عثمان أحمد فضل الله يومها
قال لي : انشاء الله ما يقوم نهائي
قال مات الجندي قال

ابوحراز سلام
انت عارف انصار سنه دي اصلها ماخايله فوقو
ماعارف لشنو
وكمان مدير مدرسة بنات

سبحان مغير الاحوال

طبعاً الفنان عبد الله البعيو عندو شريط اسمو { البعيو بعد الشريعة }
لأنو الراجل تااااااب من الغناء وعمل لحية
وقايل خلاص الأمور المالية زي زمان
بعد شوية بقى حق القفة ما عندو
قام رجع تاني للغناء

عندنا برضو مادح أعمى
قام يوم جونا أنصار السنة في البيت
وقالوا ليهو هاك دي مليون جنيه بس تخلي المديح
الراجل فعلاص التزم
أها بعد شهرين المليون راحت في خبر كان
وأنصار السنة عملوا فيها نايمين
وصاحبك بقى محتار
لأنو زمان كل آخر شهر بيمدح في مكاتب الموظفين
وبيطلع ليهو بي 500 الف
طبعاً لمن انتظر ثلاثة شهور وانصار السنة ماجووووه في البيت
حضر لوالدي { الله يرحمه }
وقام قال ليهو : لو الجماعة ديل جوك هنا هاك المليون دي أديها ليهم }
قال بوركينا فاسو المؤمنة قال !!!