الكوريين إستنسخوا "بوبي"

في الأسبوع الماضي، أعلن علماء من كوريا الجنوبية إنهم تمكنوا من إستنساخ كلب...أي والله كلب، وقال العالم الكوري هوانق هوو سووك في هذا الصدد: رغم التقدم الملحوظ في علم الإستنساخ، إلا أن إستنساخ الكلب كانت تجربة صعبة جداَ مقارنتة بباقي الحيوانات الأخري....بس ليه؟ الراجال ما قال لينا. وقد نجح العالم الكوري هوانق من إستنساخ الكلب بعد ان اخذ خلية من أذن كلب أفغاني والبويضة من كلب آخر لم يذكر جنسيته، ومن ثم قام ببرمجة الجينات وعزلها ليبقي فقط جينة الكلب الأفغاني. ويقول المراقبون: ان الكلب الأفغاني، عموماَ جميل في مظهره ولكنه لا يتفوق بهاءاَ عن الكلب الأم التي أخذت منها البويضة. لماذا الكلب الأفغاني بالذات؟
هذا السؤال أثاره الفضولين، وطبعاَ نحن السودانيين عندنا إجابة جااااااهزة: كلب أفغاني ولا تركماني ما مشكلة...المشكلة يعني موش يكون عندهم أزمة كلاب، وطبعاَ الكوريين ديل والعياذ بالله بــــــــــــــــــــي.....يعني، ما عارفين نقول شنو.
طيب، نقول حلو ونقول جميل. الحكاية إنو في بليونير أمريكي إسمه جون سبيرلينج. الراجل كان عندو كلبة إسمها "مسي"Missy، ما أفغانية طبعاَ، لكنها خليط Mongrel وكان البليونير يحبها شديد..طبعاَ مدلعها وفاتح ليها حساب في ستي بنك وعندها طبيب خاص....أيوه فيكم حد زعلان؟........الفلوس فلوسو يا أخ....يحب كلب ولا يحب جداد إحنا مالنا؟. المهم هو في سنة 1998، بدأ يراود البيليونير سبيرلينج بعض القلق من فكرة فقدان كلبه مسي خاصة بعد ان تقدم بها السن. فقرر ان يخصص 2.3 مليون دولار لمركز أريزونا للبحوث بغرض أستنساخ مسي، لكن العلماء الأمريكيين خيبوا ظنه ولم ينجحوا في مهمتهم. ولسؤ حظ البيليونير، ماتت المسيكنة مسي عام 2002 عن عمر يناهز الخامسة عشر، وهذا عمر طويل قياساَ بعمر الكلاب. الراجل فكر وفكر وفكر ، وبدل ما يمشي سوق الكلاب ويشتري ليهو جريو صغنطوووطة كدي وحليوه...قال لا، وحلف بالطلاق ما يجيب إلا مسي ذاتا ، وما يسعد أبداَ إلا ويشوف الموزموزيل مسي بنفسها، تجري جك..جك...جك بي أربع أرجل وضنب و ينطنط في الفيلا. في النهاية ، وبعد تفكير جاد، إستقر به الرأي في كوريا الجنوبية وخاصة العالم هوانق ده.....أكيد كلاب كتار بيهوانق هوانقوا في بيتو.
أخوانا المسيحيين إتلموا وقالوا ليهو يامستر....ده شنو البتعمل فيهو دا؟....بلاش إحراجات يا أخ.....مسي ايه وزفت ايه، يعني ماسامع بالأمبورورو البيموتو في النيجر، خليك عندك أخلاق يااخ.
الراجل كشر وركب راسو وقال ليهم شوفو هوي: بايبل بتعكم دا شوفو ليهو رف خوتو فيه.....أخلاق شنو في عصر العولمة؟ قام الجماعة المؤمنين، بعد ما إقتنعوا، فروا وخلو الراجل يسوي العايز يسويه.
تكهن بعض المراقبين أن مشكلة البيليونير إسبيرلينج الأساسية ليس في الكلب مسي، إنما فيه هو، فالرجل معروف عنه إنه يخاف الموت، ويريد يطول عمره إلي أكثر من مائة عام وبالتالي فهو محتاج لإسبير.

أبراهام مدوت باك دينق

الاخ ابراهام


بختهم ، بعد ده ما حيكون عندهم أزمة لحوم