بصمة حميّد / محمد النصري أغنية للسلام

السلام عليكم
الناس في بلدي
متفآلون بالسلام
وها هو محمد الحسن سالم ( حميّد) يغني فيقول على لسان الفنان محمد النصري
سوقني .. محل ما الحبيبة قريبة تراعي الغرام
غريبة الأشواق حبيبة يجيبها منام في منام
سوقني معاك يا حمام
سوقني محل ما المحنة ..أيادي تقطّر سلام
سماحة الحياة فوق أهلنا.. وبلادي تقرقر وئام
غلابة..
غلابة وامان مو طيابة..بكارة بصارة وكرام
حباب الحبان في بابا ..أدخلو علي الحرام
فقارة..
فقارة ولكن غنايه ..غناية بهذا الغمام
بهذا النيل كم تقايه ..وتراب ..النرميهو قام
أرادة ..
ارادة القمره البتقدر.. براها تضوي الضلام
شعاع شمساً ياما خدّر..اذا يبّس لا يلام
ف يابا ..خرابا ..الحرابة..خرابا فكر سوسي سام
خرابا الكل نفسو تابا..عَقَابا تلّم عم سام
وليَّد ..مَخَلوق للقرايي ..وخزين مدخور للجسام
تتمِّر نيتو التخايي ..إلاما مذَهلل إلام
دَرٍب من دم ما بيودّي...حَرٍب سُبة حَرٍب حرام
تشيل وتشيل ماب تَدّي..عُقب آخرتها انهزام
بُطانة شيطان قديمة ..بعد دا منو العرشو دام
اذا الأنسان ما لو قيمة ..عليش خلّفو سام وحام
تعالوا ..تعالوا
تعالوا الدم ماهو موية ولاهو تَرَايا المسام
خبارّي بحمّر في اخويا ..وطراوة الخوة ابتسام
تعالوا نحانن بعضنا..نخل قلبو على التمام
نبضنا يشّهل أرضنا..أرضنا تَجٍم العُضام
تعالوا بدل نبني ساتر.. نخّيب ظن الصدام
نطيّب للعازة خاطر ..نقوّم لاطفالها سام

اخير كراكةً بتفتح حفير وتراكد الرٍكام
أم الدبابة البتكشح ..سعير الموت الزؤام
تعال لغابتك يا خيرا تعالها يا اسدالهمام
بدل دوشكا يغني طيرا..ومحل قنبلة ..عش نعام

بلد صمِّي وشعب واحد عصية على الأنقسام
أبية وبكراها واعد..صبية ومشهادا تام
بساط احمدي كم يشيلنا ..تشّهلنا على الدوام
نقِل ليلنا التقّوي حيلنا ودليلنا تمام التمام
تعال نلّقم سقف المتاهة نجم هداي في الضلام
ونطّعم حرف النزاهة ..لايلافك يا حمام
ديمقراطية وأمان سوا سوا عالين مقام
مواريثنا المن زمان محصّنة في أروع نظام
بريدك يا زول بريدك .. بعشقك حتى الهيام
أريحيتك عد تزيدك مهابة وليك القيام
وعهدي معاك يا حمام
يا حبيّب الرسل الكرام
يا رسول الأمراء العظام
عصامي على ما يرام
عهدي معاك يا حمام
ماب تهدل في خنادق
لا بتقدل فوق حطام
ولا بتنزل في فنادق
وسِطْنا مراعيك قدام
يا حمام تعال عمِّر فينا ميسك ..كفانا طَشيش الكلام
جناحيك جنوب شمال ..وامش طّوف يا حمام
محل غصن العزة مال ..عليك وعليهو السلام
يا حكيم الطير يا مهبِّر شِراك القَتلة اللئام
لا متين بإسم الحق تكبّر وبالرحمة تصلي امام
فلاحتو العالم يعمر محبة ..مودة ووئام
ويقص الأيد التدّمر ويشمر ساعد السلام
سوقني معاك يا حمام
سوقني زمن كلو عافي.. نتاجو علم خيرو عام
وبلا آ يمة من المنافي ..وطن وافي على الدوام


وما الناس إلا هالك وأبن هالك *** وذو نسب في الهالكين عريق

ناسف للعطل الفني في تحميل الأغنية
وقد تم اصلاحه

تحياتي يالزوول وشكرا جزيلا علي هذه الرائعة للرائع والمبدع دوما حميد امد الله في عمره وشكرا ليك انت علي هذا الاختيار الجميل