Post: #1
Title: حـب خــرافي ..
Author: خضر عطا المنان
Date: 07-05-2005, 12:32 PM
أحبتي :
(( أنها مقاطع لوطن مختطف .. أرقنا الشوق اليه وأقعدنا الحنين ..
ولكنا لا نزال نحلم بعودته يوما الينا سالما معافي ))..
***************************
حبي ليك ما حب خـرافي
عايشو في قلب المنافي
رغم بعـدك والتـجافي
وبيني بينك من مسافي
الا أنـك في شــغافي
وعمري جواك بـحر صافي
يا بلد ناسن عــزاز
كم تشتتوا في المنافي
ولسـه حبك في قلـوبم
يـــــــــاهو ذاتو
رغم بعدك والمسافي ..
*******************
يا بلد حبي الخرافي
ليك بســجل اعترافي
انك انتي
أيوا أنتي
أنتي يا نبع التصافي
لو نضمتي .. أو سكتي
عني غبتي .. أو حضرتي
جوا في أعمـاقي نمتي
حاضنة نيلك والمرافي ..
************************
حبي ليك ما حب خـرافي
عايشو في قلب المنافي
شعرة ما أهــتز مرة
رغم عيشة الغربة مرة
والدم السال من رعافي
ومهما قهرك أســـتمر
بكرة تنهضي تبقي حرة
وليكي أحبي ..أجيكي حافي
وهاكي سجلي اعتــرافي
أنو زيك أصــلو مـافي
أصلو مافي .. أصلو مافي ..
*******************
أنتي زيك أصلو مافي
مافي ... مافي
مـافي ضــمــة
أنتي يابا وياكي يمة
نور بيسطع في الضلمة
طفلة ترضــع في ملمة
وســـــــايقة أمـة
ماسكة للمجداف تقاتل
والجسيم هارساهو حمى
بى عناد الريح تعاكس
والغبار حوليها غـمة
وبرضو ماهماها يــمة
لو عليها الموج دا لما
وسافرت في قاعو ضــمة ..
*********************
انتي ياكي الباقية يمة
في المـــداين والمـنـافي
ضي كفاحي
نور صلاحي
زاد خريفي .. وصوت هتـافي
تقهري الليل العنيد
بي ارادتن من حـديد
لا بتهابي .. ولا بـتخــافي
رغم جـــرحك والصديد
وليك زمن ما شفتي عيد
تصحي باكر من جــديد
وتبقي عافي .. وناس عـوافي
رمز أمة .. وحــب خـــرافي
في قــلوب ناسن تعـزك
كم تشـتتوا في المـنـــافي
وكم تشـتتوا في المنــــافي ..
*************************
خضرعطاالمنان
[email protected]
|
|