Post: #1
Title: ياناس البورد صاحبكم ده طلع (ودابرك )اصلى لكن برضو رائع.
Author: سامى عبد الوهاب مكى
Date: 06-15-2005, 07:56 AM
نسبه لحوجتى لاستخدام الانترنت بغرض مراجعه بعض الاشياء دخلت لاحد المقاهى التى انتشرت فى امدرمان..وبعد استلام الكرت توجهت لجهاز رقم خمسه ومعى صديق لى...ويبدوا اننا تبادلنا الحديث بصوت عالى فاذكر انه سالنى إن كنت اعرف سجيمان وحين رددت بالإيجاب سالنى إن كان بمقدورى طباعة بعض مقالاته..وانصرف بعد ذلك...مباشره بعد انصرافه انحنى تجاهى شخص من الجهاز المجاور يبدوا انه سمع مادار بيننا من حديث دنا منى وبصوت اشبه للهمس سالنى:-
الاخ بوردابى؟؟
شنو!
قصدى انت بتكتب فى سودانيزاونلاين(بنفس الهمس)؟؟
نعم
مد يده مصافحاً وهو يتلفت انا برضى بكتب فى سودانيزاون لاين والتفت حوله مره اخرى.
حقيقه اصابنى الخوف!! فقد خيل لى ان الشخص مراقب او كلانا!!
سالته بنفس الصوت الهامس عرفت كيف(والله انا زاتى احترت فى حركاتنا المريبه)ههههههههههههههههههه
اجاب بانه سمع حديثى مع صديقى.
المهم تبادلنا الاسامى اخبرته باسمى وهو طبعاً نفس الاسم الحقيقى واخبرنى هو باسمه المستعار(النك نيم) وحين طلبت الاسم الحقيقى غاص داخل الطاقيه رافضاً..هنا تاكدت تماماً ان هناك شئ مريب والامر لايعدوان يكون احد ثلاثه امور اولهما ان الشخص غريب الاطوار او ان فى امر اشتراكنا مايستوجب التخفى ولم يخبرنى احد بذلك او الاحتمال الاقوى ان صاحبنا مصاب بالارتياب.
المهم تقمصت نفس الشخصيه الجاسوسيه واشرت عليه بالسكوت فالتفت مباشره الى الجهاز.
توقفت قليلاً للتفكير!!!! وتذكرت لقب الرجل فرجعت للبحث عن مشاركاته لتسليط بعض الضوء على هذا الزميل المريب...ويالها من مفاجاه هو فى الحقيقه من اكثر الاعضاء روعه من حيث الماده التى يشارك بها..اديب من الطراز الاول..ولكن لدهشتى ايضاً اكتشفت ان معظم الاعضاء يظنون انه احد الطيور المهاجره(طلع ودابرك اصلى)
|
Post: #2
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: almulaomar
Date: 06-15-2005, 08:59 AM
Parent: #1
أخي الكريم
هذا نتاج ظاهرة فريدة في التاريخ الإنساني وتيار أدبي وفكري متميز هو أدب المخابرات وهو أدب له تأثير بليغ وواضح على حياة الناس وطريقة تفكيرهم, ومصيرهم , وخلق حالة من الفوبيا والرهاب والشلل العام تركت بصماتها على شتى مناحي الإبداع .
وزي ود أبركك ده كتير في البورد ملايين أولاد أبرك في شكل طيور مهاجره. وكان تعب منك جناح شغل الجناح التاني أو رك في أقرب سلك كهربا بين عمودين بشرط يكون قريب من طاحونه.
|
Post: #3
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: خدر
Date: 06-15-2005, 10:50 AM
Parent: #2
يا سامي
مبالغة لكن 
ياخي انت طلعت بتحكي بي طريقه خطيره جدا
انا بضحكـ لحدي اسه في طريقة سردكـ للقصة
|
Post: #5
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: سامى عبد الوهاب مكى
Date: 06-16-2005, 01:34 AM
Parent: #3
Quote: يا سامي
مبالغة لكن
ياخي انت طلعت بتحكي بي طريقه خطيره جدا
انا بضحكـ لحدي اسه في طريقة سردكـ للقصة |
والله ياخدر الخوفه الدخلت فينى خلتنى لمن اجى اخش النت حتى فى البيت اتاكد انه الاولاد نايمين...
لكن ماقلتو لى الزول ده مالو!!!
ياجماعه ماتخلونا على عمانا..على الاقل الواحد يعيش دور رفعت الجمال ده بمزاج
|
Post: #4
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: سامى عبد الوهاب مكى
Date: 06-16-2005, 01:29 AM
Parent: #2
| Quote: وزي ود أبركك ده كتير في البورد ملايين أولاد أبرك في شكل طيور مهاجره |
يعنى انا الوحيد الدقسته كان ممكن اتمنى واقول اخوكم سامى طبعاً موجود فى السويد..
ههههههههه..
طبعاً السويد لانو نفسى ياملا عمر اكون فى السويد وبعد الاكتشاف الخطير ده خليكم عارفين انى داخل من مقهى فى موقف الشهداء فرع السويد(اوصف ليكم المكان عشان تصدقونى) .
|
Post: #6
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: ود المايقوما
Date: 06-16-2005, 03:04 AM
Parent: #1
سامي حبيبنا الغالي
لك التحية
في ناس في السويد وفي ناس في امريكا وفي ناس في ........... ولكن صدقني انت الموجود في امدرمان
اسعدهم( ولو كنت في بحري كنت حتكون سعيد اكتر )
ـــــــــــــــــــــــــــ
لقيتك ... والرزاز مدخل
|
Post: #7
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: اساسي
Date: 06-16-2005, 03:10 AM
Parent: #6
اجمل شمار قرأته في الخمسة اشهر السابقة ..
علي كدا يا سامي جون قرنق دا يكون لابد في كرتون كسلا طيلة فترة النضال السابق
|
Post: #10
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: سامى عبد الوهاب مكى
Date: 06-16-2005, 03:38 AM
Parent: #7
Quote: اجمل شمار قرأته في الخمسة اشهر السابقة ..
علي كدا يا سامي جون قرنق دا يكون لابد في كرتون كسلا طيلة فترة النضال السابق
|
ماتستبعد الامور زى مابقول جارنا ابراهيم.....ياما ناس هنا وانت قايلهم هناك وياما ناس هناك وانت قايلهم هنا والاهم منهم ناس هناك لكن قلوبهم ماطلعت من قربنا.
|
Post: #8
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: سجيمان
Date: 06-16-2005, 03:11 AM
Parent: #6
سامي
| Quote: معظم الاعضاء يظنون انه احد الطيور المهاجره(طلع ودابرك اصلى) |
يا اخي في داعي للفضائح حسي
ما تخلي الناس علي عماها
|
Post: #11
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: سامى عبد الوهاب مكى
Date: 06-16-2005, 03:41 AM
Parent: #8
Quote: سامي
Quote: معظم الاعضاء يظنون انه احد الطيور المهاجره(طلع ودابرك اصلى)
يا اخي في داعي للفضائح حسي
ما تخلي الناس علي عماها |
تعرف ياسجيمان طلعت العميان انا كنت بشوفهم بعااااااد واتاريهم فى الجهاز الجنبى(وانا اشيل واقول الله يرد غربتهم)
|
Post: #9
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: سامى عبد الوهاب مكى
Date: 06-16-2005, 03:35 AM
Parent: #6
Quote: سامي حبيبنا الغالي
لك التحية
في ناس في السويد وفي ناس في امريكا وفي ناس في ........... ولكن صدقني انت الموجود في امدرمان
اسعدهم( ولو كنت في بحري كنت حتكون سعيد اكتر ) |
والله حقيقه لكن...
حكاية لو كنت فى بحرى دى كتيره شيلها.
ياود المايقوما تغربت لست سنوات متواصله اكبر فوائدى فيها كانت معرفه ان لا مكان يحل محل الوطن الكبير السودان والصغير امدرمان فى دواخلنا..
اصدقك القول انى كنت اشتاق لمنظر عربات الكارو وروائح زنكى الخدار..الى الغبار ومشهد الموظفين يغطون الوجوه من لهيب الشمس باوراق الصحف فى المحطه الوسطى فى انتظار التاكسى الطرحه ..ومشاهدة الدافورى اوقات العصريه ومنظر قدر الفول وملمس المرتبه البارد الذيذ الذى يصيبنا بالخدر حين نستلقى اخيراً وجوهنا للسماء ولا شئ يحجب الرؤيا بيننا حتى يخيل لك ان كل نجوى مستجابه.
هكذا كان الامر معى.
|
Post: #12
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: ناذر محمد الخليفة
Date: 06-16-2005, 05:09 AM
Parent: #9
سامي إذيك ...
رايك شنو لوقلت ليك (ود أبركك) دا أنا عرفتو !!!
|
Post: #13
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: سامى عبد الوهاب مكى
Date: 06-16-2005, 05:13 AM
Parent: #12
Quote: ناذر محمد الخليفة
سامي إذيك ...
رايك شنو لوقلت ليك (ود أبركك) دا أنا عرفتو !!! |
ناذر ملك النِبله..
لكن لقيتك نياااااش.
تعرف نسيت اقول حاجه وهو بتكلم معاى جات واحده داخله انا شكيت انها تكون عشوشه اصليه.
|
Post: #14
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: ناذر محمد الخليفة
Date: 06-16-2005, 05:17 AM
Parent: #13
| Quote: جات واحده داخله انا شكيت انها تكون عشوشه اصليه |
أها وعشوشتك دي زاااتا انا عرفتها تاني عندك كلام
|
Post: #15
Title: Re: ياناس البورد صاحبكم ده طلع (ودابرك )اصلى لكن برضو رائع.
Author: سامى عبد الوهاب مكى
Date: 06-16-2005, 05:29 AM
Parent: #14
Quote: Quote: جات واحده داخله انا شكيت انها تكون عشوشه اصليه
أها وعشوشتك دي زاااتا انا عرفتها تاني عندك كلام |
لا ياناذر دى مااا حتعرفها.
إلا كان تكون بتشم كويس(دى ماعندها علاقه بتناول لحوم اكلاب)
|
|