طلب عضوية النادي الصعب

قد يسال البعض ما هو النادي ذو العضوية الصعبة شديد…. قالوا اسم النادي … نادي الأزواج المخلصين… وده نادي شروط العضوية فيه شديدة خالص …. وفيه كثير من الشروط وبعضها بيكون تعجيزي… المهم واحد صاحبنا قال ياخي أنا زول جد مخلص لزوجتي…. وأكيد المفروض أكون عضو في النادي ده وما في زول اخلص مني لزوجته والمؤسسة الزوجيه

اها صاحبنا أخد بعضه وقام مشي للنادي وهناك بعد محاولات مستميتة تمكن من مقابلة لجنة القبول… وهي لجنه تعجبك

اها… قاموا سآلو صاحبنا … سؤال بسيط قالو ليهو أوصف لينا كيف بتقضي يومك….


قال صاحبنا:

أول ما اصحي الصباح بدخل المطبخ … بغسل العدة وأجهز الشاي والفطار والذي منه واخد صينة الفطور للمدام في غرفة النوم …. ومعه كباية عصير فرش بارد زائد الجرائد والمجلات وكمان ورده نضره ..

اصحيها بحنان وصوت ناعم وانتظر لما تصحي اديها الفطور بعد ما اصبح عليها … بعدين امشي غرفة الأولاد اصحيهم واحميهم وألبسهم… وافطرهم… وبعد داك ارجع للمدام… واتاكد من أنها فطرت وشربت العصير والشاي والقهوة كمان… ومن هناك استأذن المدام للخروج لا خد الأولاد للمدرسة والذهاب من هناك للعمل واهو لما ارجع من العمل أقوم اغشي الأولاد في المدرسة وأجيبهم معاي … ولما نصل البيت برضو ادخل المطبخ واغسل عدة الفطور واعمل الغدي والشاي واغدي المدام والأولاد وبعد داك اغسل الملابس واكوي وبعد داك أخد المدام لناس أمها وسوق سعد قشره كمان وفي المغرب اعمل الشاي باللبن والبسكويت وأجيب المدام من ناس أمها واقعد اراجع للأولاد الدروس وافتح للمدام التلفزيون عشان تشاهد قناة هي وأشوف ألفي نفسه شنو من الموضة والعطور والحلي وما اخلي ليها حاجه في نفسه الا وامشي اشتريها ليها

اها بعد داك ادخل مع الأولاد غرفتهم وأقص ليهم قصص حلوه ناعمه علشان ينوموا وبعد داك امشي أونس المدام وأطيب خاطره بتلبية إي طلبات تطلبه وأخليها تقلب في قنوات التلفزيون زى ما عايزه لما يشيله النوم …. اها بعد داك أنا بنوم….


توقع صاحبنا أن يقبل طلب العضوية بتاعه فورا


….. المهم الطلب رفض !!!!!!!!! وبشد وعنف كمان!!!!!!!!!

…. طيب ليه….؟؟؟؟؟؟؟؟؟؟؟


قالو ليهو: ليه تخلي العدة تبيت في المطبخ بدون غسيل …!.



عجبي .......!!

اندريا أخوي إنت كويس وبخير. سؤال غير برئ:- انت من ام درمان,راجل المدام ده ليه خليتو من بحري؟سؤال برئ بس ما 100%ام درمان ما فيها أسواق والله شنو؟سؤال برئ فعلا انت ح تقدم لعضوية النادي ده متين؟

سوف اصنع لى فتاه من دخان سجائري
لتلم عن وجهي غبار الاغتراب
وتحميني من مكابدة النزيف الصادق الرضي
وحتى ذلك الحين معا يا عزيزى وليم
من أجل عالم بلا "نساوين"
لأنو مع ازياد معدل "النساوين"العالمي وبالذات في حلتنا- يازول قال ليك الرجال بقو برضعو عديييل-الظاهر قدرة يفكو شفرتنا الوراثية يازول يدك معانا قبال يولدونا تاني
يبقو علينا ولدتين
مرة من ناس الانقاذ
ومرة من " نسوانا"
والطب رايو واضح في حتة الولادات المتتابعة دي.ياراجل يدك معانانفتح نادي التخلص الفوري من الزوجات وبدون قيمة مضافة .نخلصك من زوجتك ونطلق معاها مرة الجيران وقريباحنرفع سقف التخليص ليشمل كل الازواج في اسرتك..
(بالمناسبة انا لسه عاقل اقصد عازب والعازب يشوف في جيرانو!ولا شنو)

العزيز حجر... شكرا علي السؤال..... انا ما عارف انته طلعته بحكاية امدرمان وبحري دي من وين.... لان غرض البوست معالجه في شكل ضحكه ......... اما الاجابه عن سؤالك ... من اهم شروط العضويه ان تكون متزوج... وانا منتظر النصيب ودمته عزيزا....

Quote: ياراجل يدك معانانفتح نادي التخلص الفوري من الزوجات وبدون قيمة مضافة .نخلصك من زوجتك ونطلق معاها مرة الجيران وقريباحنرفع سقف التخليص ليشمل كل الازواج في اسرتك..

الحبيب عادل ده كلام ده.....


وبعدين بكره اكيد اكيد حتنضم اقله لنادي المتزوجين ... ما هي دي طبيعة الاشياء ودمته عزيزا

وليم اندريه

Quote: قالو ليهو: ليه تخلي العدة تبيت في المطبخ بدون غسيل …!.

بينى وبينك ليهم حق ما يدوه العضوية ده اصلو طالب زواج والله داير يشترى ريسفر ديجتال
\تحياتى

الحبيب حبيب بلدو .... نورته البوست... بيني وبينك تكون احلي لو غسالة عده وشرط نوع وليبوووووووووووووووول ودمته عزيزا

واحد سالني قال لي انته البيضحكك شنو.... قلته ليهو... الناس دي تدخل تتاوق ...وتمشي ... ما قادره تفته

معقوله بس.... يعني المداخلات اختصرت في ثلاثه اراء مختلفه... يعني بالرغم من اهمية الاخلاص في الحياة الزوجيه اجد بس 3 اراء من الجنس الخشن... يعني الموضوع واقع بارد علي الجنس الناعم ... لا ابدا دي ما ممكن تكون اساس النادي الصعب.....