اشد رحال بعيرى الى الوطن بعد غياب 17 سنة... وصاياكم

الأرض .. ذلك الكيان الذي يشتد إليه الحنين وتتمسك به النفس تمسك الروح بالجسد .. يظل لبريقه معنى اخر متوهج شديد الخصوصية والتفرد .. ذلك الجذر الذي يجذب أرواحنا إليه متجاوزة الم الوحدة ومرارة البعاد ..

بعد 17 سنة افترشت فيها برش الغربه فى بيت الاحزان... اكفكف ماتبقى من الدموع وارفع فراش حزنى ....وبى فرحة طفل..

الاخ ود الكتابي

نتمنى لك رحلة طيبة لربوع الوطن وسلام لكل الاهل والاعزة وتروح وترجع بالسلامة .

الاخ democracy


شكرا ليك وربنا يجمع الشمل

ادروب


انسان الشرق الجميل

مرحب بيك فى وطنك ومرحا لى وطنك بيك


فى الانتظار ومعى بعض الزهرات

التلفون فى البرفايل تبعى

ضمره عقاب

سبعة عشر عاماً يا أدروب يا إبن الخطيب ، إنت صبرك فاق صبر أيوب ، كيف صبرت كل هذه المدة يا أخي ، كان الله في عونك أخي ، والله قلبي معاك ، وأسأل الله أن يرد غربتك سالماً غانماً ، سبعة عشر سنة من البلد دي إتغيرت وإبتدلت وإتحولت ،ذهبت أجيال لتخلفها أجيال ، دخلت الركشة وسيلة للمواصلات وأصبح أصحاب التاكسي الأصفر يتسولون الزبائن وسط زحام الحافلات عربات خلقت أساساً لنقل البضائع فأصبحت تنقل البشر في بلادنا وإرتفاع هذه العربات عن سطح الأرض قياساً بعرضها وطولها يؤدي في كثير من الحفر والمطبات إلى إختلال توازنها الأمر الذي يجعلها أكثر العربات سبباً وتسبيباً للحوادث وهي تعرف في بلادي بأمجاد وفيها كرسي أمامي واحد يسمى كرسي الشهيد لأن أبسط حادث يؤدي إلى وفاة الراكب لذلك تجده حتى في ساعات الذروة فاضي. الناس تتعامل بالجنيه والعملة دينار وتجمع دينارات وهو خطأ فاحش والأصوب دنانير ، مطار الخرطوم تحسن منظره سوداتيل فعلت في السودان أشياء جميلة وجليلة فدخل الهاتف النقال قريتنا قبل أن تدخلها الكهرباء ، استغني الناس عن الفحم وشاع إستخدام الغاز الخدمات ساءت وتردت من سئ إلى أسوأ لو جاك وجع رأس ساكت لا سمح الله فأنت في حاجة إلى شوالين دنانير عشان تتعالج ، الفول مازال هو الوجبة الرئيسية والشاي بقي في الشارع عند نسوان ، شاي وقهوة وonline chat فأصبحت أى شجرة نيم أو لبخ في أى شارع من شوارع العاصمة عبارة عن ماسنجر يعني أدفع وضيف ست الشاي في ماسنجرك ودردش بقدر دنانيرك وعدد كبابي الشاي والقهوة وشتت. البلد كلها بقت تسف والتمباك بقي حاجة مهمة الناس بقت مغبشة صيفاً وشتاء والشيب غزا رؤوس الجميع حتى رأس الرجاء الصالح الواحد البيكون عمره تسعة عشر سنه تديهو عشرة سنوات زيادة من عندك بحسب تقدير مغتربي الخليج ، الحر والسخانة تذيب الحديد ، ويوم الجمعه الساعة واحد ونص لغاية تلاته ونص زي يوم القيامة من شدة الحر ، الضبان سيد الموقف نهاراً والباعوض ليلاً الأغنام إختفت في كثير من أحياء العاصمة ، التناقض لا حدود له إذا ذهبت هيلتون هوتيل في أى ويك إند تجد الصورة مقلوبة ، ناس لابسه نضيف وكابه النقه ويدفعوا ليك في حجر معسل بتاع شيشه ما لا يستطيع مواطن بسيط دفعه على صحن فول ، العضام يا أدروب بقت تتباع ودي ما عشان ناس البلد أصبحو يربو كلاب ديل نص الناس ما قادرين يربو نفسهم حا يقعدو يربو ليك كلاب ، العضام دي يا سيدي الفاضل عشان تظبط حلة الملاح وتديها نكهة ، سوق الخضار فيهو التفاح والتين والتوت والعنب وجربان يأكل بعينو. العيش بقي متوفر ، إنتشرت محلات الموبليا والأجهزة الكهربائية ففي كثير من الشوارع تحسب نفسك أنك في أحد شوارع أسواق الخليج في أب جنزير في كم مهول من البشر ماشين جايين جايين ماشين زحمة ليل نهار وصباح مساء والناس دي كلها زي تيران الساقية لافه في شنو الله أعلم ويتكرر المنظر بصفة يوميه ، المويه أصبحت عكرانه لمن بقت عندنا مياه في قوارير ، وعندنا برضو ستيم تفاح بحجم عادي وحجم عائلي ... وسوف أتوقف هنا عشان ما أكون سبب حتى بطريقة غير مباشرة في أن تغير رأيك وتسافر مكان تاني لقضاء إجازتك.
إجازة سعيدة ، ورغم كل هذه المتنقضات التي ذكرتها يظل الوطن جتماع ولم شمل مع الأسرة ووجبة كسره تسوى الدنيا

الأخ أدروب
سلاما
نتمنى لك رحلة طيبة إلى ربوع الوطن.
أجمل ما أستحضره في مشاعر العودة، مقطع للمبدع محمد المكي إبراهيم:
كل هذي الوجوه النوائم تحلم في نومها بالوطن
كلها تتشرب سمرته الداكنة
وصبوته الساخنة
وتاريخه المحتقن
كلها تتذرّع بالنوم حتى يهلّ المطار

(آمل أن أكون قد أوردت الأبيات صحيحة فأنا أكتبها من الذاكرة)

Quote: بعد 17 سنة افترشت فيها برش الغربه فى بيت الاحزان... اكفكف ماتبقى من الدموع وارفع فراش حزنى.

هـــنا بعض مشاعر، وليدة تجربة تكاد تكون مماثلة:

ترجع بالسلامه سالم غانم ... بعدين يا اخوي المله... بشويش والفرق شاسع في 17 سنه غربه... .... الناس هي الناس حلوه وطيبه وبسيطه ... اما ناس هلتون ديل اوعاك منهم ... ناس بزنس وبس ........ اذا كانت في الفاضي او المليان

الاخ والصديق عبدالله الخطيب

ربنا يرجعك سالم الى اهلك واتمنى ان تلاقيهم مبسوطين وفي صحةوعافية
واتمنى ان نلتقي هناك وسط اهلنا

تذكر كل التفاصيل قهوة حاج صديق - مركز الشباب - مكتب قسم المسلمية
الحي الشرقي -المسلمية الثانوية - الاصحاب - تلك الضحكات المملؤه صدقا



تغير الحال كثير لن ولن تستطيع التخيل !!!

الاخ ودعقاب شكرا جزيلا واوعدك انى اتصل بيك وعازمك قهوة شرقية لا غربيه...


almulaomar

Quote: سبعة عشر عاماً يا أدروب يا إبن الخطيب ، إنت صبرك فاق صبر أيوب

ايوب لوكان معاى كان اتجهجه زى ما قال ادروب فى النكته رمضان ده نجهجه سفر بس... كلامك عن الوطن طبعته وسوف اقراه قبل الهبوط عشان الواحد مايتصدم وشكرا ليك ولو كنت فى البلد تعال نتشتت فى الهلتون.

الاخ محجوب البيلي
شكرا الفصيدة جميله جدا مع كل تحياتى للك


الاخ
willeim andrea



شكرا على المرور وبمناسبة الهلتون ديه , اخوك مشتاق لكسرة فى راكوبه وقهوة مالهلتون 17 سنه شفت فيها ما هو افخم من هلتون ...



اليف الروح طارق اسماعيل سلام اخرت الحجز مخصوص حتى نبقى معا اطول مدة تعيد فيها ذكريات ايام خلت لن ننساه....تخريمه كيف الخروج من السودان لابد اخد اوراق من الجامعة وكيف امور الخدمة العسكريه وماشابه ذالك...

الاخ عبد الله

و الله الشوق بحر لكن الجري اكتر من اللازم الايام دي مضيوفين بالعديد من أفراد الاسرة ساتكلم معك لاحقا... هل غيرت تلفونك

سأتصل بك في نفس التلفون القديم، اذا حدث تغيير الرجاء ارسال التلفون على بريدي

[email protected]

24 ساعة وسوف اكون فى احضان الوطن

الاخ ادروب

مرحب بك فى وطنك

كل شئ تغير فى السودان وانت يمكنك ان تقيم نوع التغير اما خور كلاب اكيد ما عادت ذى زمان

الشوارع شاحبة حتى الناس القدام معظمهم رحلوا فى اخر زيارة لى لم اعد اعرف الوجوه الا

دكتورة هفاف وابناء التبريزى كلها وجوه جديدة احكى لنا لما تصل بالسلامة وحلو الكلام من خشم سيدوا

اجازة ممتعة فى مدينتك (ارجو شراء مولد كهرباء لزوم المكيف الصيف وصل)

انتصار

وصلت لندن ومتمحن فى الجاى

الأخ العزيز أدروب
اجازة سعـيدة
بـين الأهل
عثمان