Post: #1
Title: ده البحبو فى السودان
Author: Khalid Osman Jaafar
Date: 05-21-2005, 08:44 PM
Parent: #0
البوست ده فكرتو مأخودة من هنا:
مذكرات خواجه فى الخرطوم......!!!!!
وهى محاولة لرؤية نص/تلت/ربع الكوب المليان فيما يتعلق بالسودان
كلنا عارفين بلدنا مشاكلو كتيييرة، وعايز كتير عشان يتقدم
المطلوب:
انك تذكر حاجة واحدة ـ على الأقل ـ بتحبها فى السودان
والهدف:
اننا نذكر بعض بالجوانب المشرقة فى بلدنا؛ عشان كل ما طغت الحاجات السيئة نقول لأ، برضو فى كده وكده وكده..
وأهم من ده كلو..
نحب بلدنا أكتر ونشتغل عشانا
|
Post: #2
Title: Re: ده البحبو فى السودان
Author: Khalid Osman Jaafar
Date: 05-21-2005, 08:46 PM
Parent: #1
أفتتح ليكم الكلام..
حقيقة الزول لو فكر بلقى نفسو بحب حاجات كتيرة فى السودان. أما عنى، فيكفينى انو أهلى فيهو. وبتذكر صلاة العيد البحرص عليها فى المسجد البيصلى أغلبهم فيهو..
فرحة الوشوش البتبارك لى بعض بنية صافية..
وقتها بحس انى فعلا بحب البلد دى..
صحى انها سخنة وحالتها بالبلا زى ما بقولو؛ لكن برضو عندنا حلوة
لمة الأصحاب والونسة والأحلام والطموحات الجميلة ـ رغم انو معظمها عن السفر بره 
بيوت العرس وفرحة الناس الصادقة فيها..
وبرضو بيوت البكا وكيف بتنقلب لى ونسة فى الكورة والسياسة (والبلد كلها سياسيين بالفطرة  )
ده عالم تانى اسمو السودان..
بيعرف قيمتو أكتر البيبعد عنو..
العيد ما عندو طعم الا فى السودان..
وحاجات تانية كتييرة
لكن أخليكم انتو تقولوها 
أها..يلا..
|
Post: #3
Title: Re: ده البحبو فى السودان
Author: Nasser Mousa
Date: 05-22-2005, 00:00 AM
Parent: #2
السلام مبدأ وهو للجميع
والحوار اساس وبرضو للجميع
نومة الحوش والصحيان المبكر المن غير منبه ( منبهو بياع اللبن )
سماع الراديو واخبار ستة ونص واخبار الساعة تلاتة وعالم الرياضة وجريدة بالجنبة للضمان .
موية الزير وقعدة في الشارع بالكرسي او في ا########## ما فرقت تحت شجرة ظليلة .
المواصلات والكبسيبات والمشاوير الكداري الطويلة ديك وجقة حول الكباري التلاتة .
صلاة الجمعة وكل طقوسها .
رمضان والابري الاحمر ( الحلو مر ) والابري الابيض والرقاق زالعصايد .
يووووووووووووووووووووووووووك حاجات كتيرة والله افتقدناها
اكيد حا ارجع تاني
ناصر موسى
|
Post: #4
Title: Re: ده البحبو فى السودان
Author: banadieha
Date: 05-22-2005, 02:57 AM
Parent: #3
قدلة حافي حالق في الطريق الشاقي الترام وشقة بحر الريفيرا لحدي قيف توتي وبعدها يا أعود لزمان لي منهو ثلاثين سنة رايح مني..أو أفوت في نص البحر.
|
Post: #5
Title: Re: ده البحبو فى السودان
Author: Khalid Osman Jaafar
Date: 05-23-2005, 03:04 PM
Parent: #1
up
|
Post: #6
Title: Re: ده البحبو فى السودان
Author: Khalid Osman Jaafar
Date: 05-26-2005, 05:38 AM
Parent: #1
?
|
Post: #7
Title: Re: ده البحبو فى السودان
Author: Hussein Mallasi
Date: 05-26-2005, 06:02 AM
Parent: #6
دخول دار الرياضة عصراً.
|
Post: #8
Title: Re: ده البحبو فى السودان
Author: Khalid Osman Jaafar
Date: 05-29-2005, 12:00 PM
Parent: #1
سلام يا حسين
بالله انت من رواد دار الرياضة امدرمان؟
عارف نكتة (التطعيم) ضد (الجدرى)؛ مش؟
|
Post: #9
Title: Re: ده البحبو فى السودان
Author: Khalid Osman Jaafar
Date: 06-11-2005, 08:32 AM
Parent: #1
UP
|
Post: #10
Title: Re: ده البحبو فى السودان
Author: Khalid Osman Jaafar
Date: 07-01-2005, 02:23 PM
Parent: #1
up!
|
Post: #11
Title: Re: ده البحبو فى السودان
Author: Elawad Eltayeb
Date: 07-02-2005, 08:20 AM
شراب الموية من الماسورة مباشرةً بعد مشوار كداري ساخن
|
Post: #12
Title: Re: ده البحبو فى السودان
Author: Elawad Eltayeb
Date: 07-02-2005, 08:21 AM
Parent: #11
تصفح الكتب جنب الجامع الكبير
|
Post: #13
Title: Re: ده البحبو فى السودان
Author: saadeldin abdelrahman
Date: 07-02-2005, 01:24 PM
Parent: #1
سلام...
ولو العاجبني ببدأ بحاجه فيها شئ من المظاهر السلبيه...لكن هي لمة الشباب جنب دكان الحله أو عامود النور أو أحد اللساتك أو المساطب...حيث تنطلق من هذه المنتديات المشاريع (المستنيره) من بوش (فتا ما المسخوط داك)..ووجبه كنا نسميها الفرشه نتناولها الساعه الثانيه ظهرا بعد المدرسه وتشييع الجكس إلى هوادجهن أو راحلاتهن من 11خ أو مواصلات..والفرشه هذه عباره عن خليط من الطحنيه والجبنه والعسل ومعاها رغيف حااااااااار في الجو الرهاب داك وبعد كده إذا أسعفتنا الميزانيه كمان حاجه بارده كده تجعل عيناك تدوران حول محوريهما..وبالعدم مويه من السبيل..الغريبه برضو بيخلى عيونك تلف! وده كلو إستعدادا للدافوري (تحدي بالبيبسي)..ثم العوده لمراكز الإنطلاق..والتخطيط لبرنامج الليله أو الذهاب لحفل عام فى أحد الأيام القادمه.. وبعد شويه واحد ينط وهو يتحسس كرشته: بوش كيف شباب?...ويرد عليه الجميع : زبط...ويبدأ اللتيق الحثيث...الدكان مافيهو رغيف الحق الفرن...زيت السمسم المره ده ما كويس جيب من دكان سيف داك بس ما يشوفك آدم (صاحب الدكان الذي نحن فيه) آي عليك الله يا آدم أديها حبة جبنه كده زياده مع المويه...وما يلبث صحن البوش أن يلامس الأرض حتى يرتفع كأنهاTouch down عالم آفات كيف!..
قد أنداح وأغرق المنبر وقرائه وبكري زاتو! لكن هذا لن يحملني فى فعل لحظى الى عيون وطني!
أشياء مبعثره!
منظر الكتاحه ولها في الأفق نذير...النهوض في اليوم التالي وأنت تارك لوحه فنيه عبقريه لجسدك علي فراشك...
ريحة الدعاش يا أخوانا كانت تغريني بأن أتذوق طعم الأرض لولا الخوف من الناس المسلطين أن يتهمونى بالجنون أو الطفوله وأكاد أذكر أنني فعلت ذلك بعيدا عن أعين الفضوليين..
لذاذة الونسه لما الكهرباء تقطع.....ضحكات جداتى ...رحم الله إحداهما وأطال عمر الباقيه...نكاتهن معجونه بخبيز الزمن..جدتى لأبي رحمها الله ردت على تحرشاتنا بها وبنظارتها قعر الكبايه بأن قالت : شفتوا العيون الورا النظاره دى كانت مجرحه قلوب الصبيان...ولم نستطع مواصلة غدانا من الضحك!..الله يرحمك يا حبوبه.
فطيرة بي لبن مع جدى رحمه الله بعد صلاة المغرب...كنت أترصدها بشده..وانبسط حين يحثنى على (القيام سدارى) بما تبقى فى (الكوريه) ختيتها بين قوسين عشان ما يجى ينط لى واد من الحناكيش ويقول عاصمتها سيول.
هي أشياء لا تشترى وقد تعود وقد لا....حب الأرض ..المكان...الناس....البساطه ...النيل الأبيض ....الخريف و .........إحساس أكبر من اليتم في الغربه.
ونعشق الأرض التي لا هواء بها ولا ماؤها عذب لكنها لنا وطن.
|
Post: #14
Title: Re: ده البحبو فى السودان
Author: Salma Daoud
Date: 07-06-2005, 02:35 AM
Parent: #13
...لمن تكون رايح ليك من بيت و أي زول تقيف تسأله مستعد يوصف ليك و كمان يركب معاك يوصلك و يرجع كداري....
علي بابك لمصطفى سيد احمد أو 5 سنين لي ود الأمين في المواصلات...
أغنية "كلنا تامين" مقدمة جنة الأطفال يوم الجمعه و احنا بنجهز في الفطور...
بصلة ملاح الروب الابيض...
نوم الحيشان تحت النجوم و القمره باقة و تعاين ليك...
منظر الرجال في عقد بالجلاليب الناصعة و العمم المكربة و مراكيب جلد التمساح أو الأصلة...
--------------------------------------------------------------------------------------
بوست جميل حقو نرفعه فوق عشان يذكرنا من وقت للتاني ليه بنحب البلد دي!!!
|
Post: #15
Title: Re: ده البحبو فى السودان
Author: Salma Daoud
Date: 07-07-2005, 04:17 AM
Parent: #14
قزازة بزيانوس "ما في زول من ناس المكتب يسمعني" بـاردة في نص مشوار في الحر...
قطر الموت في منتزه المقرن "الملاهي" بالرغم من إنه قديم و مكركب...
الدخله على مدني و انت جاي من الخرطوم لمن تظهر ليك المكاتب بتاعت بصات الجزيرة... و اللي بتعني لي إني قربت من حبوبة و بيتها و اهتمامها الغير عادي بي!!!
دقة قلبي دقة واحدة زيادة كل ما أجي ماره بشارع الجامعة قصاد المين رود "بالرغم من البوابة الfancy العملوها جديد الما بحبها!!
و
حـ
أ
و
ا
صـ
ل
|
Post: #16
Title: Re: ده البحبو فى السودان
Author: أيمن جبارة الله الخضر
Date: 07-07-2005, 05:11 AM
Parent: #15
حفلات عقد الجلاد
البيبسي الما خمج لمن يخليك تدمع دااك
بالتأكيد صحن البوش الما بيحصل الواطه ده
النيــــــــــــــــــــــــــــــــــــل..
القرية .. البلد..
الأهل ولمتهم وونستهم وضحكهم..
|
Post: #17
Title: Re: ده البحبو فى السودان
Author: Khalid Osman Jaafar
Date: 07-16-2005, 08:03 AM
Parent: #1
سلام للجميع
سعيد جدا بمشاركاتكم وبانو البوست بدأ يؤدى الغرض منو، وهو اثارة الذكريات وربط الناس بالبلد رغم حالتها الصعبة
ويللا نواصل ..
|
Post: #18
Title: Re: ده البحبو فى السودان
Author: مصدق مصطفى حسين
Date: 07-17-2005, 04:57 AM
Parent: #1
قعدة الكراسى قدام البيت .... فى الشارع
تردد طول الوقت :
و عليكم السلام ..... إتفضلوا،
.... و عليكم السلام .... إتفضلوا ....
|
Post: #19
Title: Re: ده البحبو فى السودان
Author: بلدى يا حبوب
Date: 07-17-2005, 11:03 AM
Parent: #1
خالد عثمان
وعلى مسئوليتى
الذهاب عصرا الى شاطى النيل والجلوس على الضفة لشرقية للنيل الابيض يعنى فى عابة السنط والسفر فى رحلة صيد حتى مغيب الشمس ثم الاستمتاع بروعة المساء والعوده محملا بما علق بسنارة السمك ولنقل يوم فى الاسبوع مع الطبيعة النيلية
تحياتى
|
|